ອາຊີ-ໂປຕາສ ສາກົນ (ລາວ) ມອບທຶນພັດທະນາບ້ານໃຫ້ບັນດາບ້ານອ້ອມຂ້າງໂຄງການ ມູນຄ່າທັງໝົດບັນລຸ 5.54 ຕື້ກວ່າກີບ

ວັນທີ 11 ມີນາ 2025 ອາຊີ-ໂປຕາສ ສາກົນ (ລາວ)ໄດ້ແຈກຢາຍກອງທຶນພັດທະນາບ້ານໃຫ້ 22 ບ້ານອ້ອມຂ້າງໂຄງການ, ໂດຍສຸມໃສ່ການນຳໃຊ້ເຂົ້າໃນການປັບປຸງ ແລະ ພັດທະນາພື້ນຖານໂຄງລ່າງຂອງບ້ານ,  ຍົກລະດັບຊີວິດການເປັນຢູ່ຂອງປະຊາຊົນ, ປັບປຸງວຽກງານດ້ານການສຶກສາ, ຝຶກອົບຮົມຄວາມຮູ້ທັກສະດ້ານຕ່າງໆ ປະກອບມີ 02 ເມືອງຄື: ເມືອງທ່າແຂກ: ບ້ານດົງໃຕ້, ນາດິນຈີ່, ນາໂພທ່າ, ທ່າງາມ, ທ່າແຮ່, ໜອງຫ່າງ, ໂຄກປ່າທ່ອນ, ດົງໂຊກ-ໂພນໄຊ, ດອນທົ່ງ, ໂນນຕູມ ລວມຈໍານວນເງິນ 762,433,000 ກີບ ແລະ ເມືອງໜອງບົກ: ບ້ານນາຄໍາ, ດົງບູນ, ໂນນຈິກ, ດົງຄຸງ, ໜອງຜໍາ, ນານ້ອຍ, ໂນນແຕ້, ໂນນສີລາ, ຊຽງຫວາງທົ່ງ, ໜອງປາຫຼາດ, ດົງຍາງ, ດົງຂວາງ, ປາກເປັ່ງ ລວມຈໍານວນເງິນ 1,106,065,500 ກີບ. ເຂົ້າຮ່ວມໃນພິທີດັ່ງກ່າວ ມີ ການນຳເມືອງທ່າແຂກ, ການນຳເມືອງ ໜອງບົກ, ຫົວໜ້າພະແນກພະລັງງານ ແລະ ບໍ່ແຮ່, ຕາງໜ້າຫ້ອງວ່າການແຂວງ, ຕາງໜ້າສະພາປະຊາຊົນແຂວງ, ຫ້ອງການທີ່ກ່ຽວຂ້ອງຂອງທັງສອງເມືອງ, ຄະນະອຳນວຍການບໍລິສັດ ແລະ ອຳນາດການປົກຄອງບ້ານເປົ້າໝາຍ.

ເຊິ່ງນັບແຕ່ປີ 2022 ເປັນຕົ້ນມາ ອາຊີ-ໂປຕາສ ສາກົນ (ລາວ) ໄດ້ມອບທຶນພັດທະນາໃຫ້ບັນດາບ້ານອ້ອມຂ້າງໂຄງການເປັນເວລາ 4 ປີຕິດຕໍ່ກັນ, ມາຮອດປັດຈຸບັນລວມແລ້ວໄດ້ສະໜອງທຶນພັດທະນາໃຫ້ແກ່ຊາວບ້ານອ້ອມຂ້າງໂຄງການທັງໝົດ 5.54 ຕື້ກວ່າກີບ, ເຊິ່ງໄດ້ຊຸກຍູ້ການພັດທະນາເສດຖະກິດຂອງບ້ານ ແລະ ປັບປຸງຊີວິດການເປັນຢູ່ຂອງຊາວບ້ານໄດ້ຢ່າງມີປະສິດທິຜົນ.

ດ້ວຍການສະໜັບສະໜູນຂອງລັດຖະບານ ແລະ ປະຊາຊົນລາວ, ອາຊີ-ໂປຕາສ ສາກົນ (ລາວ) ລົງເລິກພັດທະນາອຸດສາຫະກຳເກືອໂປຕາສຂອງລາວເປັນເວລາ 16 ປີ ແລະ ໄດ້ກາຍເປັນໂຄງການຜະລິດຝຸ່ນໂປຕາສທີ່ໃຫຍ່ທີ່ສຸດໃນອາຊີຕາເວັນອອກສຽງໃຕ້. ບໍລິສັດໄດ້ຍຶດໝັ້ນແນວຄິດ ການພັດທະນາແບບມີໄຊຊະນະຮ່ວມກັນຕະຫຼອດມາ, ມຸ່ງເນັ້ນເຖິງການຊຸກຍູ້ການພັດທະນາເສດຖະກິດ-ສັງຄົມຂອງທ້ອງຖິ່ນ ແລະ ຊີວິດການເປັນຢູ່ຂອງປະຊາຊົນ, ປະກອບສ່ວນສຳຄັນເຂົ້າໃນຄວາມຈະເລີນຮຸ່ງເຮືອງຂອງປະເທດລາວ ແລະ ຄວາມຮັ່ງມີຂອງປະຊາຊົນລາວ. ທັງ 2 ຝ່າຍ ກໍ່ຄືພາກລັດ ແລະ ບໍລິສັດ ໄດ້ສ້າງການພົວພັນມິດຕະພາບທີ່ເປັນມູນເຊື້ອບົນພື້ນຖານຄວາມໄວ້ເນື້ອເຊື່ອໃຈເຊິ່ງກັນ ແລະ ກັນ, ສະໜັບສະໜູນເຊິ່ງກັນ ແລະ ກັນ, ເຊື່ອມໂຍງ ແລະ ຊຸກຍູ້ເຊິ່ງກັນ ແລະ ກັນ.

ໃນອະນາຄົດ ອາຊີ-ໂປຕາສ ສາກົນ (ລາວ) ຈະສືບຕໍ່ຊ່ວຍເຫຼືອຊາວບ້ານທີ່ຢູ່ອ້ອມຂ້າງໂຄງການໃຫ້ມີແຫຼ່ງລາຍຮັບ, ເພີ່ມລາຍໄດ້, ລົງເລິກພັດທະນາການຮ່ວມມືລະຫວ່າງບໍລິສັດ ແລະ ຊຸມຊົນອ້ອມຂ້າງເພື່ອສ້າງອະນາຄົດທີ່ດີຂຶ້ນຮ່ວມກັນ, ໂດຍຜ່ານຈັດຕັ້ງປະຕິບັດໂຄງການຕ່າງໆເຊັ່ນ: ຊ່ວຍເຫຼືອຊາວບ້ານໃນການຟື້ນຟູທີ່ດິນ, ສອນເຕັກນິກການເພາະປູກແບບທັນສະໄໝ, ມອບຝຸ່ນ ໂປຕາສ ແລະ ອື່ນໆ.

ບໍລິສັດ ລາວ ໂທລະຄົມມະນາຄົມ ມະຫາຊົນ ດຳເນີນກອງປະຊຸມສະຫຼຸບຜົນງານການເຄື່ອນໄຫວວຽກງານ ປະຈໍາປີ 2024

ໃນຕອນເຊົ້າຂອງວັນທີ 20 ກຸມພາ 2025 ຢູ່ທີ່ສຳນັກງານໃຫຍ່ ບໍລິສັດ ລາວ ໂທລະຄົມມະນາຄົມ ມະຫາຊົນ, ນະຄອນຫຼວງວຽງຈັນ ໄດ້ຈັດກອງປະຊຸມປະຈຳປີ 2024 ຂຶ້ນຢ່າງເປັນທາງການ, ພາຍໃຕ້ການເປັນປະທານຂອງ  ທ່ານ ສຸພົນ ຈັນທະວີໄຊ ຄະນະບໍລິຫານງານພັກ ກະຊວງເຕັກໂນໂລຊີ ແລະ ການສື່ສານ, ເລຂາຄະນະພັກຮາກຖານ, ຜູ້ອຳນວຍການໃຫຍ່ ບໍລິສັດ ລາວ ໂທລະຄົມມະນາຄົມ ມະຫາຊົນ, ໃຫ້ກຽດເຂົ້າຮ່ວມມີ ທ່ານ ບັນດິດ. ສຈ ບໍ່ວຽງຄໍາ ວົງດາລາ ກຳມະການສູນກາງພັກ, ເລຂາຄະນະພັກ, ລັດຖະມົນຕີ ກະຊວງເຕັກໂນໂລຊີ ແລະ ການສື່ສານ  ພ້ອມດ້ວຍແຂກທີ່ຖືກເຊີນ ແລະ ຜູ້ແທນກອງປະຊຸມຈາກ ລລທ ສູນກາງ, ລລທ ສາຂາແຂວງທົ່ວປະເທດ, ບໍລິສັດ ລາວ ໂມບາຍມັນນີ ຈຳກັດ ແລະ ບໍລິສັດ T-Plus ເຂົ້າຮ່ວມທັງໝົດ 265 ທ່ານ.

ໃນພິທີດັ່ງກ່າວ ທ່ານ ອາລຸນນະເດດ ບານຈິດ ຄະນະປະຈຳພັກ, ຮອງຜູ້ອໍານວຍການໃຫຍ່ ບໍລິສັດ ລາວ ໂທລະຄົມມະນາຄົມ ມະຫາຊົນ ໄດ້ຂຶ້ນຜ່ານບົດສະຫຼຸບຜົນງານການເຄື່ອນໄຫວວຽກງານດຳເນີນທຸລະກິດໃນປີ 2024 ແລະ ທິດທາງແຜນການໃນປີ 2025 ຕໍ່ກອງປະຊຸມ ເຊິ່ງທ່ານໄດ້ຍົກໃຫ້ເຫັນຜົນງານພົ້ນເດັ່ນ ທີ່ ລາວ ໂທລະຄົມ ສາມາດຍາດແຍ່ງມາໄດ້ໃນໜຶ່ງປີຜ່ານມາເປັນຕົ້ນແມ່ນ: ໄດ້ລົງທຶນຂະຫຍາຍຕາໜ່າງລະບົບໂທລະຄົມມະນາຄົມມີມູນຄ່າທັງໝົດ 15.74 ລ້ານໂດລາສະຫະລັດ; ປັດຈຸບັນ ລລທ ມີສະຖານີມືຖື 2G, 3G, 4G, 4.5G ຄວບຄຸມພື້ນທີ່ປະຊາກອນທົ່ວປະເທດ ແລະ ນອກຈາກນັ້ນຍັງມີ 5G ໃຫ້ບໍລິການຢູ່ບັນດາຕົວເມືອງໃຫຍ່ ແລະ ມີ FTTH ໃຫ້ບໍລິການທົ່ວປະເທດ.

ທັງໝົດເຫຼົ່ານັ້ນ ມັນໄດ້ກາຍເປັນປັດໃຈຫຼັກທີ່ພັກດັນໃຫ້ກຸ່ມບໍລິສັດ ລາວ ໂທລະຄົມ ສາມາດຂະຫຍາຍຖານລູກຄ້າ ໃໝ່ ແລະ ຮັກສາຈຳນວນລູກຄ້າເກົ່າໄວ້ໄດ້ຢ່າງໝັ້ນຄົງ, ມາຮອດປັດຈຸບັນມີລູກຄ້າໃຊ້ບໍລິການຕົວຈິງ MBB ແລະ FBB ຈໍານວນ 3.3 ລ້ານກ່ວາເລກໝາຍ; ໃນປີ 2024 ຜ່ານມາກຸ່ມບໍລິສັດສາມາດສ້າງລາຍຮັບໄດ້ທັງໝົດ 2,397.93 ຕື້ກີບ (ບໍ່ລວມອາກອນ), ສາມາດປະຕິບັດພັນທະໃຫ້ລັດຖະບານໄດ້ທັງໝົດຈຳນວນ  549.75 ຕື້ກີບ, ນອກຈາກນັ້ນ ຍັງໄດ້ປັບປຸງລະບຽບ, ນະໂຍບາຍສະຫວັດດີການສັງຄົມຕ່າງໆເພື່ອຍົກສູງລະດັບຊີວິດການເປັນຢູ່ຂອງພະນັກງານໃຫ້ດີຂຶ້ນເລື້ອຍໆ ໄປຄຽງຄູ່ກັບການດໍາເນີນທຸລະກິດຍັງໄດ້ປະກອບສ່ວນຊ່ວຍເຫຼືອ ແລະ ໃຫ້ການອຸປະຖຳຕໍ່ອົງຈັດຕັ້ງຂອງພັກ-ລັດ, ສັງຄົມ, ການສຶກສາ ແລະ ສະໜອງການບໍລິການເຂົ້າໃນກອງປະຊຸມລະດັບຊາດ (ASEAN) ທີ່ ສປປ ລາວ ເປັນເຈົ້າພາບ ລວມມູນຄ່າທັງໝົດ 12 ຕື້ກວ່າກີບ ແລະ ຍັງໄດ້ສືບຕໍ່ສະໜອງອຸປະກອນ ແລະ ສັນຍານອິນເຕີເນັດສຳລັບການຮຽນທາງໄກ, ກອງປະຊຸມທາງໄກຂອງອົງການຈັດຕັ້ງພັກ-ລັດຈຳນວນໜຶ່ງໃນມູນຄ່າຫຼາຍຕື້ກີບ.

ແຜນການປີ 2025 ນີ້, ລາວ  ໂທລະຄົມ ຈະສູ້ຊົນຮັກສາຖານລູກຄ້າເກົ່າ ແລະ ສ້າງຖານລູກຄ້າໃໝ່,ຈະສ້າງລາຍຮັບໃຫ້ໄດ້ທັງໝົດ 2,624.68 ຕື້ກີບ, ທຽບໃສ່ປີ 2024 ເພີ່ມຂຶ້ນ 9.26% ຄາດຄະເນກໍາໄລສຸດທິໃຫ້ໄດ້ 612.29 ຕື້ກີບ ແລະ ຄາດຄະເນວ່າຈະສາມາດປະຕິບັດພັນທະໃຫ້ລັດຖະບານຈຳນວນ 597.09 ຕື້ກີບ; ນອກຈາກນັ້ນຍັງຈະໄດ້ລົງທຶນທັງໝົດ 17.29 ລ້ານໂດລາສະຫະລັດ ເພື່ອສືບຕໍ່ປັບປຸງ ແລະ ຂະຫຍາຍເຄືອຂ່າຍການໃຫ້ບໍລິການດ້ານໂທລະຄົມ ໂດຍສະເພາະແມ່ນ Mobile Broadband and Fixed Broadband ໃຫ້ຮັບປະກັນໃຫ້ແກ່ການບໍລິການລູກຄ້າທາງດ້ານປະລິມານ ແລະ ຄຸນນະພາບ, ຂໍ້ມູນມີຄວາມປອດໄພ ແລະ ເປັນລະບົບທັນສະໄໝເພື່ອຮັບປະກັນໃຫ້ແກ່ການບໍລິການສັງຄົມ ທັງໝົດເຫຼົ່ານີ້ກໍ່ເພື່ອໃຫ້ບັນລຸຕາມແຜນຍຸດທະສາດ ແລະ ວິໄສທັດກ້າວໄປສູ່ຍຸກ Lao Digital Life.

ວັນທີ 9 ກຸມພາ 2025 ທີ່ນະຄອນຫຼວງວຽງຈັນ, ສປປ ລາວ, ໂຮງແຮມ ອາມາຣີ ວຽງຈັນ ໄດ້ເປີດຕົວຢ່າງເປັນທາງການເມື່ອວັນທີ 9 ກຸມພາ 2025 ຊຶ່ງໄດ້ສ້າງບາດກ້າວຄັ້ງສຳຄັນໃຫ້ກັບສາຍງານການໂຮງແຮມໃນປະເທດລາວດ້ວຍທີ່ພັກທີ່ມີສິ່ງອຳນວຍຄວາມສະດວກທັນສະໄໝ, ການບໍລິການທີ່ອົບອຸ່ນ, ແລະທີ່ຕັ້ງແຄມແມ່ນ້ຳຂອງທີ່ພົ້ນເດັ່ນໃນຕົວເມືອງ. ໂຮງແຮມແຫ່ງນີ້ແມ່ນພ້ອມຕ້ອນຮັບແຂກພາຍໃນປະເທດຕັ້ງແຕ່ມື້ນີ້ເປັນຕົ້ນໄປໃນຂະນະທີ່ແຂກພາຍນອກປະເທດສາມາດຈອງຜ່ານລະບົບອອນໄລນ໌ໃນເວັບໄຊທ໌ເພື່ອມາເຂົ້າພັກຕັ້ງແຕ່ວັນທີ 1 ມີນາ 2025 ເປັນຕົ້ນໄປ.

ໂຮງແຮມແຫ່ງນີ້ ຕັ້ງຢູ່ໃຈກາງເມືອງທີ່ຄຶກຄື້ນແຄມຝັ່ງແມ່ນ້ຳຂອງ ໃກ້ກັບແຫຼ່ງທ່ອງທ່ຽວ ແລະ ແຫຼ່ງທຸລະການສຳຄັນຫຼາຍແຫ່ງ ຫ່າງຈາກສະໜສາມບິນນານາຊາດວັດໄຕພຽງແຕ່ 15 ນາທີ. ເຊິ່ງບັນດາສະຖານທີ່ດັ່ງກ່າວ ແມ່ນສາມາດເດີນທາງໄປມາໄດ້ຢ່າງສະດວກ ແລະ  ງ່າຍດາຍ ຊ່ວຍໃຫ້ແຂກຜູ້ເຂົ້າພັກໄດ້ສຳຜັດທັງວິຖີຊີວິດຂອງຄົນທ້ອງຖິ່ນ ແລະ ມົນສະເໜ່ວັດທະນະທຳທີ່ເກົ່າຂອງແຕ່ລະສະຖານທີ່ອ້ອມຮອບໄດ້ຢ່າງຕິດແທດ.

ເມື່ອບໍ່ດົນມານີ້ ໂຮງແຮມ ອາມາຣີ ວຽງຈັນ ໄດ້ຈັດງານສະເຫຼີມສະຫຼອງເປີດຕົວຢ່າງຍິ່ງໃຫຍ່ເມືອວັນທີ 9 ກຸມພາ 2025 ນີ້ ຊຶ່ງໄດ້ຮັບກຽດຈາກແຂກຜູ້ມີກຽດລະດັບສູງໂດຍສະເພາະແມ່ນ ທ່ານ ສອນໄຊ ສີພັນດອນ ນາຍົກລັດຖະມົນຕີແຫ່ງ ສ ປ ປ ລາວ ລວມໄປເຖິງບັນດາຄະນະການນຳພັກລັດລະດັບສູງ, ບັນດາຫົວໜ້າໜ່ວຍງານອົງການສາກົນ ແລະ ຄູ່ຮ່ວມທຸລະກິດ ທີ່ສຳຄັນຈາກທຸກພາກສ່ວນ ຊຶ່ງມາຮ່ວມເປັນສັກຂີພິຍານໃນການເປີດປະຕູສູ່ບາດກ້າວໃໝ່ຂອງໂຮງແຮມຫຼູໃນລາວ. ພາຍໃນງານ, ບັນດາແຂກຜູ້ເຂົ້າຮ່ວມໄດ້ມີໂອກາດສຳຜັດກັບບັນຍາກາດທີ່ອົບອຸ່ນ, ສິ່ງອຳນວຍຄວາມສະດວກ, ການບໍລິການທີ່ເອົາໃຈໃສ່, ການສະແດງກ່ຽວກັບແບຣນອາມາຣີ ແລະ ອາຫານທີ່ໄດ້ຮັບການປຸງແຕ່ງຢ່າງພິຖີພິຖັນ. ການເປີດຕົວທີ່ປະສົບຄວາມສຳເລັດໃນຄັ້ງນີ້ ໄດ້ຊ່ວຍຍົກລະດັບພາບລັກຂອງ ອາມາຣີ ວຽງຈັນ ໃນຖານະໂຮງແຮມຊັ້ນແຖວໜ້າຂອງລາວເຮົາ ທີ່ພ້ອມຕ້ອນຮັບນັກເດີນທາງຈາກທັງພາຍໃນແລະຕ່າງປະເທດ.

ທ່ານ ຮົ້ວ ແສງອາລຸນ ປະທານກຸ່ມບໍລິສັດ ຕັງຈະເລີນ ແລະ ເປັນບໍລິສັດຜູ້ລົງທຶນຫຼັກຂອງ ອາມາຣີ ວຽງຈັນ ໄດ້ໃຫ້ຄຳເຫັນວ່າ “ອາມາຣີ ວຽງຈັນ ຈະກາຍເປັນປະກົດການໃໝ່ ຂອງສາຍງານໂຮງແຮມໃນປະເທດລາວ. ພວກເຮົາໄດ້ເຮັດວຽກຢ່າງໜັກເພື່ອກຽມພ້ອມຕ້ອນຮັບແຂກຜູ້ເຂົ້າພັກໄດ້ໃນທຸກປັດໃຈບໍ່ວ່າຈະເປັນ ການບໍລິການ ແລະ ສິ່ງອຳນວຍຄວາມສະດວກ ລວມໄປເຖິງຄຸນະພາບຂອງອາຫານແລະເຄື່ອງດື່ມ. ນອກນັ້ນ ດ້ວຍທີ່ຕັ້ງທີ່ພົ້ນເດັ່ນ ແລະ ການອອກແບບສະຖາປະນິດທີ່ພິຖີພິຖັນ, ຂ້າພະເຈົ້າມີຄວາມເຊື່ອໝັນເປັນຢ່າງຍິ່ງວ່າ ໂຮງແຮມແຫ່ງນີ້ຈະກາຍເປັນຈຸດໝາຍປາງທາງອັນດັບຕົ້ນໆສຳລັບແຂກຜູ້ເຂົ້າພັກທັງພາຍໃນແລະຕ່າງປະເທດຢ່າງແນ່ນອນ ຄວບຄູ່ກັບການບໍລິການລະດັບສາກົນ.”

ນອກຈາກນີ້, ທ່ານປະທານ ພຶດສະພາ ພູມມະສັກ ປະທານ ກຸ່ມບໍລິສັດ ອາຊີລົງທຶນ ພັດທະນາ ແລະ ກໍ່ສ້າງ ເຊິ່ງເປັນບໍລິສັດຄູ່ຮ່ວມລົງທຶນຂອງ ອາມາຣີ ວຽງຈັນ ໄດ້ຂະຫຍາຍຕື່ມວ່າ “ດ້ວຍສະຖານທີ່ຕັ້ງຍຸດທະສາດ ແລະ ສິ່ງອຳນວຍຄວາມສະດວກພາຍໃນໂຮງແຮມທີ່ຄົບວົງຈອນ, ຂ້າພະເຈົ້າມີຄວາມເຊື່ອໝັ້ນເປັນຢ່າງຍິ່ງວ່າ ອາມາຣີ ວຽງຈັນ ຈະກາຍເປັນສື່ກາງ ຫຼື ຊ່ອງທ່າງທີ່ນຳພາ ແລະ ພັດທະນາການທ່ອງທ່ຽວລາວໃຫ້ນັບມື້ນັບຂະຫຍາຍຕົວຍິ່ງຂຶ້ນ.” 

ຕາງໜ້າຈາກສຳນັກງານໃຫຍ່ ONYX Hospitality Group ໄດ້ກ່າວເພີ່ມຕື່ມອີກວ່າ “ການກໍ່ຕັ້ງ ອາມາຣີ ວຽງຈັນ ເປັນອີກໜຶ່ງສັນຍາລັກແຫ່ງຄວາມເລັດ ແລະ ຄວາມພາກພູມຂອງໂຮງແຮມໃນເຄືອຂອງພວກເຮົາທີ່ນອນຢູ່ໃນພາກພື້ນຕາເວັນອອກສຽງໃຕ້. ເຮົາມີຄວາມຕັ້ງໃຈທີ່ຈະເສີມຂະຫຍາຍເຄືອຂ່າຍໂຮງແຮມເຮົາໃຫ້ນັບມື້ນັບຫຼາຍຂຶ້ນ ຄຽງຄູ່ໄປກັບການຮັກສາຄຸນນະພາບການບໍລິການໃຫ້ໄດ້ມາດຕະຖານສາກົນພາຍໃຕ້ແບຣນ ອາມາຣີ. ການເປີດຕົວໂຮງແຮມແຫ່ງນີ້ ບໍ່ແມ່ນພຽງແຕ່ເປັນອີກໜຶ່ງແລນມາກທີ່ສຳຂອງລາວ, ແຕ່ຍັງເປັນການຍົກລະດັບປະສົບການການເຂົ້າພັກດ້ວຍການບໍລິການທີ່ອົບອຸ່ນ ແລະສະຖານທີ່ທີ່ອອກແບບມາເພື່ອສະທ້ອນເຖິງວັດທະນະທຳແລະວິຖີຊີວິດຂອງເມືອງວຽງຈັນ”

ໂຮງແຮມ ອາມາຣີ ວຽງຈັນ ປະກອບດ້ວຍຫ້ອງພັກແລະຫ້ອງສູດຈຳນວນ 248 ຫ້ອງ ຊຶ່ງອອກແບບມາໃຫ້ປະສົມປະສານກັບຄວາມຫຼູຫຼາແລະຄວາມສະດວກສະບາຍຢ່າງລົງຕົວ ໂດຍມີໃຫ້ເລືອກທັງວິວຕົວເມືອງທີ່ສວຍງາມແລະທັດສະນີຍະພາບແມ່ນ້ຳຂອງທີ່ກວ້າງສຸດສາຍຕາ. ຫ້ອງພັກທຸກຫ້ອງແມ່ນມາພ້ອມກັບເຕັກໂນໂລຊີທີ່ທັນສະໄໝ, ມີສັນຍານອີນເຕີເນັດຄວາມໄວສູງ, ແລະສິ່ງອຳນວຍຄວາມສະດວກແບບຄົບວົງຈອນເພື່ອຕອບສະໜອງແຂກຕະຫຼອດການເຂົ້າພັກ ບໍ່ວ່າຈະເປັນການເດີນທາງມາເພື່ອທຸລະການ ຫຼື ທ່ອງທ່ຽວ. ນອກນັ້ນ ໂຮງແຮມແຫ່ງນີ້ ຍັງມີ ສະລອຍນ້ຳຊັ້ນດາດຟ້າ, ສູນອອກກຳລັງກາຍທີ່ທັນສະໄໝ ແລະ ຫ້ອງສະປາເພື່ອຄວາມຜ່ອນຄາຍ ພ້ອມດ້ວຍ Club Nava ພື້ນທີ່ພິເສດບັນຍາກາດສ່ວນຕົວ ໄວ້ສຳລັບແຂກທີ່ເຂົ້າພັກໃນຫ້ອງສູດຂຶ້ນໄປອີກດ້ວຍ.

ໂຮງແຮມ ອາມາຣີ ວຽງຈັນ ຍັງໃຫ້ບໍລິການອາຫານທີ່ຫຼາກຫຼາຍ ເພື່ອຕອບສະໜອງຄວາມຕ້ອງການທຸກລະດັບ ເຊິ່ງປະກອບມີ 4 ຫ້ອງອາຫານ ແລະ ບາຣ໌. ຫ້ອງອາຫານ ອາມາຢ່າ (Amaya Food Gallery) ແມ່ນຫ້ອງອາຫານຫຼັກ ໂດຍໃຫ້ບໍລິການອາຫານສາກົນປະສົມປະສານກັບອາຫານທ້ອງຖິ່ນ ມີພື້ນທີ່ຮອງຮັບກວ້າງຂວາງ ເໝາະກັບທຸກໂອກາດ. ໄມຕີ ຄາເຟ່ (MaiTree Café) ເປັນພື້ນທີ່ສຳລັບບໍລິການເຄື່ອງດື່ມ ແລະ ເຂົ້າໜົມເປັນຫຼັກ ເໝາະສຳລັບມານັ່ງຫຼິ້ນ ຫຼື ປຶກສາຫາລືດ້ານທຸລະການຕ່າງໆ. ອາຄົວ ບາຣ໌(Aqua Pool Bar) ເປັນບາຣ໌ແຄມສະລອຍນ້ຳ ຄອຍໃຫ້ບໍລິການຫານວ່າງ ແລະ ເຄື່ອງດື່ມ ສຳລັບແຂກທີ່ມາແວ່ ຫຼື ໃຊ້ບໍລິການສະລອຍນ້ຳ. ສຸດທ້າຍແຕ່ບໍ່ທ້າຍສຸດ, ສະເຕລລ່າ ບາຣ໌ (Stellar Rooftop Bar) ແມ່ນຕັ້ງຢູ່ຊັ້ນດາດຟ້າ ໃຫ້ບໍລີການເຄື່ອງດື່ມແອລກໍຮໍ ແລະ ອາຫານ ພິເສດພ້ອມວິວພາໂນລາມ່າຂອງແມ່ນນ້ຳຂອງທີ່ສະຫວາດສະເຫວີຍຍາມຄ່ຳຄືນ.

ອາມາຣີ ວຽງຈັນ ຍັງເປັນພື້ນທີ່ສຳລັບຈັດງານປະຊຸມ ແລະ ງານລ້ຽງ ຊຶ່ງສາມາດຮອງຮັບຮູບແບບງານໄດ້ຫຼາຍລະດັບ ບໍ່ວ່າຈະເປັນຫ້ອງໂຖງໃຫຍ່ ທີ່ສາມາດຮອງຮັບແຂກໄດ້ເຖິງ 600 ທ່ານ ເໝາະກັບງານປະຊຸມຂະໜາດໃຫຍ່, ງານດອງ, ແລະ ງານສຳຄັນອື່ນໆ ພ້ອມຍັງປະກອບມີຫ້ອງປະຊຸມຂະໜາດກາງ 3 ຫ້ອງ ເໝາະສຳລັບການປະຊຸມທົ່ວໄປ ແລະ ງານລ້ຽງສັງສັນທີ່ເນັ້ນຄວາມເປັນສ່ວນຕົວ. ນອກຈາກນັ້ນ, ໂຮງແຮມ ຍັງມີຫ້ອງຮັບຮອງແຂກລະດັບ VIP ທີ່ໃຫ້ຄວາມເປັນສ່ວນຕົວສູງ. ໂດຍລວມແລ້ວ ຫ້ອງຈັດງານແຕ່ລະຫ້ອງໄດ້ຮັບການອອກແບບຢ່າງທັນສະໄໝດ້ວຍສິ່ງອຳນວຍຄວາມສະດວກຄົບວົງຈອນ ສາມາດຕອບສະໜອງທຸກຄວາມຕ້ອງການໃນລະຫວ່າງການດຳເນີນການຈັດງານ.

ຫຼັງຈາກການເປີດຕົວຢ່າງເປັນທາງການ, ໂຮງແຮມອາມາຣີ ວຽງຈັນ ພ້ອມໃຫ້ບໍລິການແຂກຜູ້ເຂົ້າພັກດ້ວຍມາດຕະຖານລະດັບສາກົນ ໃຫ້ກັບແຂກຕະຫຼອດການເຂົ້າພັກ ແລະ ຈະກາຍເປັນຈຸດໝາຍໃໝ່ທີ່ຈະຊ່ວຍເປັນອີກໜຶ່ງຊ່ອງທາງໃນການສ້າງວຽກເຮັດງານທຳໃຫ້ກັບປະຊາຊົນທ້ອງຖິ່ນ ພ້ອມຍັງຍົກລະດັບອຸດສາຫະກຳການບໍລິການ ແລະ ທ່ອງທ່ຽວຢ່າງແທ້ຈິງ.

ສຳລັບຂໍ້ມູນເພີ່ມຕື່ມ ແມ່ນສາມາດຕິດຕໍ່ຫາທາງໂຮງແຮມໄດ້ໂດຍກົງ ຫຼືສາມາດຕິດຕາມການເຄື່ອງໄຫວຕ່າງໆໄດ້ຜ່ານທາງເວັບໄຊທ໌ amari.com/vientiane ແລະ ສື່ອອນໄລນ໌ Facebook: Amari Vientiane ຂອງ ໂຮງແຮມ ອາມາຣີ ວຽງຈັນ.

ກ່ຽວກັບແບຣນ ໂຮງແຮມ ອາມາຣີ

ອາມາຣີ ແມ່ນແບຣນໂຮງແຮມຈາກປະເທດໄທຊັ້ນແຖວໜ້າພາຍໃຕ້ເຄືອ ONYX Hospitality Group ເຊິ່ງໄດ້ຮັບການຍອມຮັບໃນດ້ານການບໍລິການທີ່ອົບອຸ່ນ ແລະ ເປັນກັນເອງ ພ້ອມຍັງໝູນໃຊ້ແນວຄິດໂຮງແຮມແບບຮ່ວມສະໄໝໃຫ້ແທດເໝາະກັບວັດທະນະທຳແລະ ເອກະລັກປະຈຳທ້ອງຖິ່ນນັ້ນໆ. ອາມາຣີ ມີໂຮງແຮມຕັ້ງຢູ່ຫຼາຍແຫ່ງໃນພາກພື້ນອາຊີຕາເວັນອອກສຽງໃຕ້ ເຊິ່ງມີເອກະລັດແຕກຕ່າງກັນຕາມແຕ່ລະສະຖານທີ່ ແຕ່ຍັງເນັ້ນໜັກ ແລະ ຮັກສາມາດຕະຖານການບໍລິການໃນລະດັບສາກົນ. ສຳລັບຂໍ້ມູນເພີ່ມຕື່ມ, ສາມາດເຂົ້າຊົມໄດ້ທີ່: www.onyx-hospitality.com.

ທະນາຄານ ສົ່ງເສີມກະສິກໍາ ຈໍາກັດ (ທສກ) ແລະ ທະນາຄານ ເພື່ອການກະເສດ ແລະ ສະຫະກອນການກະເສດ (ທກສ) ລາດຊະອານາຈັກໄທ ໄດ້ຈັບມືກັນເປີດໃຫ້ການບໍລິການທາງດ້ານການເງິນລະຫວ່າງປະເທດ.

ໃນຕອນເຊົ້າ ຂອງ ວັນທີ 5 ກຸມພາ 2025 ທະນາຄານ ສົ່ງເສີມກະສິກຳ ຈຳກັດ (ທສກ) ກັບ ທະນາຄານ ເພື່ອການກະເສດ ແລະ ສະຫະກອນການກະເສດ (ທກສ) ແຫ່ງ ລາດຊະອານາຈັກໄທ ໄດ້ຮ່ວມກັນລົງນາມໃນບົດບັນທຶກຄວາມເຂົ້າໃຈ (MOU) ເພື່ອເປີດໂຕການໃຫ້ບໍລິການໂອນເງິນລະຫວ່າງ ໄທ-ລາວ ເພື່ອອໍານວຍຄວາມສະດວກໃຫ້ແກ່ແຮງງານລາວທີ່ເດີນທາງໄປເຮັດວຽກ ແລະ ປະກອບອາຊີບຢູ່ປະເທດໄທ ໃຫ້ເຂົາເຈົ້າເຫຼົ່ານັ້ນສາມາດໂອນເງິນກັບບ້ານໄດ້ຢ່າງວ່ອງໄວ, ປອດໄພໃນອັດຕາຄ່າທຳນຽມຕ່ຳ ແລະ ປະຢັດຄ່າໃຊ້ຈ່າຍຫຼາຍຂຶ້ນ.

ການບໍລິການແມ່ນແບ່ງອອກເປັນ 2 ໄລຍະຄື: ໄລຍະທີ 1 ພາຍຫຼັງລົງນາມເປັນຕົ້ນໄປຄົນລາວທີ່ໄປປະກອບອາຊີບ ຫຼື ອາໃສຢູ່ ປະເທດໄທ ສາມາດເງິນໂອນກັບບ້ານໄດ້ຜ່ານປ່ອງບໍລິການຂອງ ທກສ ທຸກສາຂາທົ່ວປະເທດ.

ໄລຍະທີ 2 ແມ່ນຈະເລີ່ມບໍລິການຜ່ານລະບົບແອັບພລິເຄຊັນເທິງມືຖື ພຽງແຕ່ດາວໂຫຼດ ແລະ ເປີດນໍາໃຊ້ App Mobile Banking ກໍ່ສາມາດໂອນເງິນໄປຫາບັນຊີປາຍທາງໄດ້ຢ່າງສະດວກສະບາຍ ຫຼື ຕັ້ງຄ່າໃຫ້ໂອນເງິນກັບບ້ານແບບອັດຕະໂນມັດສໍາລັບຜູ້ທີ່ປະກອບອາຊີບ ແລະ ເຮັດວຽກງານຢູ່ປະເທດໄທ ໂດຍບໍ່ຕ້ອງເດີນທາງໄປທີ່ປ່ອງບໍລິການທີ່ທະນາຄານ.

ພິທີຮ່ວມລົງນາມເຊັນບົດບັນທຶກຄວາມເຂົ້າໃຈ (MOU) ໃນຄັ້ງນີ້ແມ່ນມີຜູ້ຕາງໜ້າຈາກທັງສອງຝ່າຍຄື ທສກ ລົງນາມໂດຍ ທ່ານ ພິລາວັນ ສໍພາບມີໄຊ, ຜູ້ອໍານວຍການ ທສກ ແລະ ຕາງໜ້າຝ່າຍ ທກສ ລົງນາມໂດຍ ທ່ານ ຊັດໄຊ ສີຣິໄລ, ຜູ້ຈັດການ ທກສ. ພິທີດັ່ງກ່າວຍັງໄດ້ຮັບກຽດກ່າວມີຄໍາເຫັນຕໍ່ໂຄງການຮ່ວມມືລະຫວ່າງ ທສກ ແລະ ທກສ ໂດຍ ທ່ານ ພົງໄຊສັກ ອິນທະລາດ, ຮອງລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ແຫ່ງ ສປປ ລາວ, ທ່ານ ນາງ ຂັນແກ້ວ ຫຼ້າມະນີເງົາ, ຮອງຜູ້ວ່າການທະນາຄານແຫ່ງ ສປປ ລາວ, ທ່ານ ນາງ ມໍລະກົດ ສີສະຫວັດ, ເອກອັກຄະລະຊະທູດໄທ ປະຈຳ ສປປ ລາວ ຊຶ່ງການນໍາຂັ້ນສູງຈາກທັງສອງຝ່າຍຍົກໃຫ້ເຫັນຄວາມສໍາຄັນໃນການຮ່ວມມື ແລະ  ການສະໜັບສະໜູນຈາກລັດຖະບານທັງສອງຝ່າຍ ລາວ ແລະ ໄທ.

ນອກນັ້ນ, ພິທີດັ່ງກ່າວຍັງໄດ້ມີຜູ້ເຂົ້າຮ່ວມຈາກການຈັດຕັ້ງພາກລັດ ແລະ ເອກະຊົນເຂົ້າຮ່ວມຄື: ຄະນະນຳຂັ້ນກົມຈາກ ທະນາຄານ ແຫ່ງ ສປປ ລາວ, ກະຊວງແຮງງານ ແລະ ສະຫວັດດີການສັງຄົມ, ກະຊວງການເງິນ, ກະຊວງປ້ອງກັນຄວາມສະຫງົບ, ສຳນັກງານນາຍົກລັດຖະມົນຕີ, ສະມາຄົມບໍລິການຈັດຫາງານ, ບັນດາບໍລິສັດຈັດຫາງານ, ຄະນະຜູ້ບໍລິຫານຈາກທັງສອງຝ່າຍ ແລະ ແຂກຜູ້ເຂົ້າຮ່ວມທຸກທ່ານ ຮ່ວມເປັນສັກຂີພະຍານທີ່ ໂຮງແຮມ ດອນຈັນ ພາເລດ, ນະຄອນຫຼວງວຽງຈັນ.

ການພັດທະນາໂຄງການຮ່ວມມືໃນຄັ້ງນີ້ແມ່ນເພື່ອເປັນການດໍາເນີນງານການຈັດຕັ້ງປະຕິບັດວຽກງານຕາມ ບົດບັນທຶກຄວາມເຂົ້າໃຈທີ່ໄດ້ເຊັນຮ່ວມກັນກ່ອນໜ້ານີ້ລະຫວ່າງ ທສກ ກັບ ກະຊວງແຮງງານ ແລະ ສະຫວັດດີການສັງຄົມ ວ່າດ້ວຍການສຶກສາຄວາມເປັນໄປໄດ້ໃນການສ້າງສິ່ງອຳນວຍຄວາມສະດວກໃຫ້ແກ່ຜູ້ອອກແຮງງານ ໃຫ້ສາມາດເຂົ້າເຖິງການມີວຽກເຮັດງານທໍາທັງພາຍໃນ ແລະ ຕ່າງປະເທດ ກໍ່ຄື ການໃຫ້ບໍລິການສິນເຊື່ອສໍາລັບແຮງງານ ແລະ ການບໍລິການໂອນເງິນກັບບ້ານຜ່ານລະບົບທະນາຄານຂອງແຮງງານລາວທີ່ຢູ່ຕ່າງປະເທດ. ວຽກງານດັ່ງກ່າວນີ້ຖືເປັນໜື່ງໃນວຽກງານບູລິມະສິດຂອງ ທສກ ເພື່ອອຳນວຍຄວາມສະດວກໃຫ້ແກ່ບັນດາແຮງງານລາວທີ່ໄປປະກອບອາຊີບ ແລະ ເຮັດວຽກຢູ່ປະເທດໄທ ໃຫ້ສາມາດເຂົ້າເຖິງການບໍລິການທາງການເງິນທີ່ຖືກຕ້ອງຕາມກົດໝາຍ ແລະ ປອດໄພ. ນອກຈາກນີ້, ວຽກງານດັ່ງກ່າວຍັງເປັນການສ້າງເງື່ອນໄຂທີ່ສະດວກໃຫ້ແກ່ພາກລັດຖະບານເວົ້າລວມ, ເວົ້າສະເພາະກໍ່ຄື ກະຊວງແຮງງານ ແລະ ສະຫວັດດີການສັງຄົມ ໃຫ້ສາມາດຕິດຕາມຈໍານວນຕົວເລກລາຍຮັບທີ່ເປັນເງິນຕາຕ່າງປະເທດຈາກການອອກໄປປະກອບອາຊີບຂອງຄົນລາວທີ່ຢູ່ຕ່າງປະເທດໃຫ້ມີຄວາມຖືກຕ້ອງ ແລະ ຊັດເຈນ ຮັບປະກັນໃຫ້ແກ່ວຽກງານຄຸ້ມຄອງ ແລະ ດັດສົມວຽກແຮງງານຕາມນະໂຍບາຍດ້ານແຮງງານຂອງລັດຖະບານ ເພື່ອປະກອບສ່ວນເຂົ້າໃນການພັດທະນາລະບົບເສດຖະກິດຂອງຊາດ.

ການລົງນາມເພື່ອຮ່ວມມືລະຫວ່າງສອງທະນາຄານຈາກສອງປະເທດ ຖືເປັນນິມິດໝາຍອັນດີໃນການເລີ່ມຕົ້ນ ຮ່ວມມືກັນພັດທະນາລະບົບການບໍລິການທາງການເງິນລະຫວ່າງປະເທດໃຫ້ມີຄວາມສະດວກ ແລະ ຕອບສະໜອງຕໍ່ຄວາມຕ້ອງການຂອງສັງຄົມ. ທັງສອງຝ່າຍ ທສກ ແລະ ທກສ ເຊື່ອໝັ້ນຢ່າງຍິ່ງວ່າການຮ່ວມມືຂອງທັງສອງທະນາຄານ ຈະບໍ່ຢຸດພຽງແຕ່ເທົ່ານີ້, ທັງສອງຝ່າຍ ທສກ ແລະ ທກສ ຍັງຈະສືບຕໍ່ຮ່ວມມືກັນໃນດ້ານອື່ນໆ ໂດຍອາໃສທ່າແຮງຂອງແຕ່ລະຝ່າຍ ສົມທົບກັບການສະໜັບສະໜູນຈາກພາກລັດຖະບານເພື່ອເຮັດໃຫ້ວຽກງານການບໍລິການ ແລະ ການພົວພັນທາງດ້ານການເງິນລະຫວ່າງສອງທະນາຄານໃຫ້ມີການພັດທະນາຢ່າງຮອບດ້ານຫຼາຍຂຶ້ນໃນອະນາຄົດ.

ໃນຖານະຜູ້ເສຍພາສີອາກອນລາຍໃຫຍ່ທີ່ສຸດຂອງປະເທດ, ບໍລິສັດ ເບຍລາວ ໄດ້ປະກອບສ່ວນເສຍພາສີຫຼາຍກວ່າ 5,100 ຕື້ກີບ ໃນປີ 2024, ເຊິ່ງເພິ່ມຂື້ນຫຼາຍກວ່າ 32% ເມື່ອທຽບໃສ່ປີ 2023.

ທີ່ນະຄອນຫຼວງວຽງຈັນ, ສປປ ລາວ – ວັນທີ 20 ມັງກອນ 2025 – ບໍລິສັດເບຍລາວຈຳກັດ (ເບຍລາວ), ເຊິ່ງເປັນຜູ້ນຳດ້ານທຸລະກິດໃນລາວຕັ້ງແຕ່ປີ 1973, ມີຄວາມພາກພູມໃຈທີ່ໄດ້ສະໜັບສະໜູນກິດຈະກຳຕ່າງໆຂອງພາກລັດໂດຍຜ່ານການປະກອບສ່ວນໃນຖານະເປັນຜູ້ເສຍພາສີລາຍໃຫຍ່ທີ່ສຸດຂອງ ສປປ ລາວ. ໃນປີ 2024, ບໍລິສັດເບຍລາວໄດ້ເສຍພາສີເຂົ້າລັດເປັນຈຳນວນເງິນຫຼາຍກວ່າ 5,1 ພັນຕື້ກີບ (240 ລ້ານ ໂດລາສະຫາລັດ) ເຊິ່ງເພີ່ມຂື້ນຫຼາຍກວ່າ 32% ເມື່ອທຽບກັບປີ 2023.

“ໃນຖານະທີ່ເປັນບໍລິສັດທີ່ມີເອກະລັກສະເພາະທີ່ຕິດພັນຢ່າງແໜ້ນແຟ້ນກັບຊາດລາວ, ບໍລິສັດເບຍລາວ ມີຄວາມມຸ່ງໝັ້ນຢ່າງເຕັມທີ່ ທີ່ຈະສະໜັບສະໜູນການພັດທະນາ ແລະ ເຕີບໂຕ ຂອງຊາດ ໂດຍການຈ່າຍຄ່າພາສີທັງໝົດຂອງພວກເຮົາ, ໃນຖານະທີ່ເປັນຫົວໜ່ວຍທຸລະກິດທີ່ມີຄວາມຮັບຜິດຊອບ ຕໍ່ເສດຖະກິດ ແລະ ສັງຄົມໂດຍລວມ. ການຈ່າຍພາສີທີ່ຫຼາຍກວ່າ 5,1 ພັນຕື້ ເຂົ້າລັດຖະບານ ຖືວ່າເປັນການປະກອບສ່ວນສະໜັບສະໜູນການພັດທະນາເສດຖະກິດ-ສັງຄົມຂອງປະເທດຊາດ ແລະ  ສະຫວັດດີການຊີວິດການເປັນຢູ່ຂອງປະຊາຊົນລາວຢ່າງແທ້ຈິງ” ກ່າວໂດຍ ທ່ານ ເຮັນຣິກ ຈູລ ແອນເດິເຊັນ, ຜູ້ອຳນວຍການບໍລິສັດເບຍລາວ.

ທ່ານ ກິດສະໜາ ວົງໄຊ, ປະທານສະພາຜູ້ບໍລິຫານບໍລິສັດເບຍລາວ, ກ່າວອີກວ່າ ການເກັບພາສີອາດຈະໄດ້ຫຼາຍຂື້ນກວ່ານີ້ ຖ້າວ່າ ບໍ່ມີການລັກລອບນຳເຂົ້າເບຍທີ່ຜິດກົດໝາຍ ເຂົ້າມາໃນ ສປປ ລາວ ຈາກປະເທດໃກ້ຄຽງ ໂດຍສະເພາະ ຈາກປະເທດຫວຽດນາມ. “ພວກເຮົາໄດ້ເຫັນການເພີ່ມຂື້ນຂອງການລັກລອບນຳເຂົ້າຜະລິດຕະພັນເຄື່ອງດື່ມ ເຊັ່ນ: ເບຍ ຈາກປະເທດອື່ນ ໃນປະລິມານຫຼວງຫຼາຍຢ່າງໜ້າກັງວົນ ເພື່ອຫຼີກລ່ຽງການເສຍພາສີ”. ສິ່ງເຫຼົ່ານີ້ໄດ້ສົ່ງຜົນເສຍຕໍ່ການເກັບລາຍຮັບພາສີເຂົ້າລັດຖະບານ ແລະ ກະທົບຄວາມອາດສາມາດໃນການປັບປຸງຊີວິດການເປັນຢູ່ຂອງປະຊາຊົນລາວ. ການກະທຳທີ່ຜິດກົດໝາຍນີ້ສົ່ງຜົນເສຍຕໍ່ເສດຖະກິດທ້ອງຖິ່ນຕະຫຼອດຮອດຕ່ອງໂສ້ອຸດສາຫະກຳ ຕັ້ງແຕ່ຊາວນາ ໄປຮອດຜູ້ຜະລິດໂຮງຈັກໂຮງງານ, ຜູ້ຄ້າຂາຍທີ່ຖືກຕ້ອງຕາມກົດໝາຍ ແລະ ນັກທຸລະກິດດ້ານອາຫານ ແລະ ເຄື່ອງດື່ມ. ນອກຈາກນີ້ຜູ້ລັກລອບນຳເຂົ້າແບບບໍ່ຖືກຕ້ອງ ອາດຈະຈຳໜ່າຍຜະລິດຕະພັນປອມທີ່ບໍ່ໄດ້ຄຸນນະພາບ ແລະ ອາດກໍ່ໃຫ້ເກີດອັນຕະລາຍຕໍ່ສຸຂະພາບໄດ້”.

ທ່ານ ແອນເດິເຊັນ ກ່າວຕື່ມອີກວ່າ: ໃນປີ 2024 ຍອດຂາຍສົ່ງອອກຂອງເບຍລາວໄດ້ເພີ່ມຂຶ້ນສອງເທົ່າເມື່ອທຽບໃສ່ກັບປີ 2023. ລາວໄດ້ກ່າວວ່າ “ເຄືອຄ່າຍການຈໍາໜ່າຍທົ່ວໂລກຂອງກຸ່ມບໍລິສັດ ຄາຣສະເບີກ ໄດ້ຊ່ວຍເພີ່ມຍອດຂາຍສົ່ງອອກຂອງຜະລິດຕະພັນເບຍລາວ. ພວກເຮົາໄດ້ສົ່ງອອກເບຍລາວຫຼາຍກວ່າ 13 ລ້ານ ໂດລາສະຫາລັດ ໃນປີ 2024 ໃນ 20 ປະເທດທົ່ວໂລກ. ນີ້ເປັນການສະແດງໃຫ້ເຫັນວ່າພວກເຮົາສາມາດຂະຫຍາຍຄວາມນິຍົມໃນຜະລິດຕະພັນເບຍລາວຢູ່ພາຍນອກປະເທດໄດ້ ແລະ ການຂະຫຍາຍຕົວຂອງລາຍໄດ້ຈາກການສົ່ງອອກຂອງພວກເຮົາແມ່ນຊ່ວຍນໍາເອົາເງິນຕາຕ່າງປະເທດມາສູ່ເສດຖະກິດຂອງລາວ ແລະ ສະຫນັບສະຫນູນຄ່າເງິນກີບຂອງລາວ”

ເພື່ອປະຕິບັດພັນທະຂອງເຮົາທີ່ມີຕໍ່ປະຊາຊົນລາວ, ບໍລິສັດເບຍລາວ ຍັງປະຕິບັດຫຼາຍກິດຈະກຳຄວາມຮັບຜິດຊອບຕໍ່ສັງຄົມ (CSR) ຢ່າງກວ້າງຂວາງ. ນັບແຕ່ປີ 2022 ເປັນຕົ້ນມາ, ບໍລິສັດໄດ້ໃຊ້ງົບປະມານຫຼາຍກວ່າ 10 ຕື້ກີບ ເຂົ້າໃນຂົງເຂດຕ່າງໆເຊັ່ນ: ຄວາມຍືນຍົງດ້ານສິ່ງແວດລ້ອມ, ການສຶກສາ, ການຊ່ວຍເຫຼືອຜູ້ຖືກກະທົບໄພພິບັດ, ການຊ່ວຍເຫຼືອຊຸມຊົນ, ການປິ່ນປົວສຸຂະພາບ ແລະ ອື່ນໆ. ຂະນະດຽວກັນ, ພະນັກງານ ແລະ ຜູ້ໄດ້ຮັບທຶນການສຶກສາຂອງ ເບຍລາວ ຍັງໄດ້ເຂົ້າຮ່ວມກິດຈະກໍາຕ່າງໆຂອງຊຸມຊົນ ລວມທັງການປູກຕົ້ນໄມ້, ການເກັບຂີ້ເຫຍື້ອ ແລະ ແຍກຂີ້ເຫຍື້ອ, ແລະການບໍາລຸງຮັກສາໂຮງຮຽນ.

ທ່ານ ແອນເດີເຊັນ ໄດ້ສະຫລຸບໄວ້ວ່າ: “ວິໄສທັດ Sail 27 ຂອງກຸ່ມບໍລິສັດ ຄາຣສະເບີກໄດ້ຕົວແບບການເຄື່ອນໄຫວກິດຈະກຳທາງດ້ານທຸລະກິດຂອງພວກເຮົາ, ເຊິ່ງພວກເຮົາບໍ່ພຽງແຕ່ເຮັດວຽກເພື່ອເພີ່ມຄຸນນະພາບຜະລິດຕະພັນ ແລະ ນະວັດຕະກໍາໃໝ່ໆເທົ່ານັ້ນ ແຕ່ພອ້ມກັນນັ້ນ ພວກເຮົາຍັງຊຸກຍູ້ການເຕີບໂຕແບບຍືນຍົງ ພ້ອມດ້ວຍ ການລົງທຶນເຂົ້າໃນການດູແລຮັກສາສິ່ງແວດລ້ອມ ແລະ ການມີສ່ວນຮ່ວມຕໍ່ຊຸມຊົນ, ເພື່ອສືບຕໍ່ສ້າງຜົນປະໂຫຍດຕໍ່ປະຊາຊົນລາວຕື່ມອີກ.

ສໍາເລັດຕາມເປົ້າໝາຍແລ້ວ ກັບການເປີດ ທະນາຄານຄຳ ລາວ ຢ່າງເປັນທາງການ ສະຖາບັນການເງິນແຫ່ງທໍາອິດໃນປະເທດລາວ ທີ່ໃຫ້ບໍລິການທະນາຄານທີ່ອີງໃສ່ທຸລະກໍາວັດຖຸມີຄ່າ ໄດ້ສະເຫຼີມສະຫຼອງການເປີດໂຕ ຢ່າງເປັນທາງການ ໃນວັນທີ 03 ທັນວາ 2024 ຜ່ານມາ, ໄດ້ມີພິທີເປີດ ທະນາຄານຄຳ ລາວ ຢ່າງເປັນທາງການ ທີ່ຕຶກສໍານັກງານ ທີ່ບ້ານໂພນໄຊ, ເມືອງໄຊເສດຖາ, ນະຄອນຫຼວງວຽງຈັນ ໃຫ້ກຽດເຂົ້າຮ່ວມນໍາພາເປັນສັກຂີພະຍານ ໂດຍ ພະນະທ່ານ ສອນໄຊ ສີພັນດອນ, ນາຍົກ ລມຕ ແຫ່ງ ສປປ ລາວ ແລະ ບັນດາການນໍາ ຂອງ ພັກ-ລັດ ຕາງໜ້າຈາກບັນດາກະຊວງ ແລະ ອົງການຈັດຕັ້ງຕ່າງໆ ພ້ອມດ້ວຍ ຄະນະນໍາ ແລະ ທຸກພາກສ່ວນທີ່ຮັບຜິດຊອບຂອງ ຈາກທະນາຄານຄໍາ ລາວ ພ້ອມພຽງກັນເຂົ້າຮ່ວມຈັດຕັ້ງ ແລະ ສະເຫຼີມສະຫຼອງ ໃນພິທີອັນມີຄວາມໝາຍຄວາມສໍາຄັນຄັ້ງນີ້.

ພິທີເປີດ ທະນາຄານຄໍາ ລາວ ຢ່າງເປັນທາງການ ໃນຄັ້ງນີ້ ຖືເປັນບາດກ້າວອັນສໍາຄັນ ຕໍ່ການປະກອບສ່ວນຈັດຕັ້ງ ຜັນຂະຫຍາຍ ຄວາມຕັ້ງໃຈຂອງ ພັກ ແລະ ລັດຖະບານລາວ ທີ່ຢາກໃຫ້ມີທະນານຄານຄໍາຂຶ້ນ ເພື່ອປະຕິບັດພາລະບົດບາດໃນການສໍາຮອງຄໍາເພື່ອຄໍ້າປະກັນຄວາມໝັ້ນຄົງ ແລະ ສ້າງສະພາບຄ່ອງທາງດ້ານການເງິນ ແລະ ການຄັງ, ຄໍ້າປະກັນ ຄ່າເງິນກີບໃຫ້ຢູ່ໃນລະດັບທີ່ໝັ້ນທ່ຽງ ອີກທັງຈະປະກອບສ່ວນການຍົກລະດັບມາດຕະຖານອຸດສາຫະກໍາລາວ ໃຫ້ໄດ້ໃນລະດັບສາກົນ ເພີ່ມພູນມູນຄ່າແກ່ຊັບພະຍາກອນ ໃຫ້ໄດ້ມູນຄ່າ ແລະ ປະໂຫຍດສູງສຸດສ້າງສະຖຽນລະພາບທາງດ້ານເສດຖະກິດ ໃຫ້ແກ່ ສປປ ລາວ ໃຫ້ນັບມື້ ນັບເຂັ້ມແຂງ ແລະ ຂະຫຍາຍຕົວຢ່າງໝັ້ນຄົງຍືນຍົງສີວິໄລ.

ໃນໂອກາດນີ້, ທ່ານ ປອ ຈັນທອນ ສິດທິໄຊ, ຜູ້ອໍານວຍການໃຫຍ່ ທະນາຄານຄໍາ ລາວ ໄດ້ກ່າວວ່າ: ການເປີດບໍລິການ ທະນາຄານຄໍາ ລາວ ຢ່າງເປັນທາງການໃນຄັ້ງນີ້ ໄດ້ສະແດງໃຫ້ເຫັນເຖິງຄວາມມຸ້ງໝັ້ນຕັ້ງໃຈ ແລະ ການຮ່ວມຈິດຮ່ວມໃຈອັນແຮງກ້າລະຫວ່າງ ພັກ-ລັດ ກັບປະຊາຊົນລາວ ໃນການສຸມສະຕິປັນຍາແກ້ໄຂປັນຫາຄວາມຫຍຸ້ງຍາກທາງດ້ານ ເສດຖະກິດ-ການເງິນ ທີ່ປະເທດພວກເຮົາ ພວມປະເຊີນຢູ່ນີ້ ໃຫ້ຄ່ອຍໆບັນເທົາ ແລະ ຫມົດໄປໃນຕໍ່ຫນ້າ. ນອກຈາກນີ້, ທ່ານ ຍັງໄດ້ກ່າວເພີ່ມເຕີມວ່າ: ເພື່ອເປັນການຮັບປະກັນການບໍລິການທີ່ໄດ້ມາດຕະຖານ ແລະ ເປັນມືອາຊີບ, ທະນາຄານຄໍາ ລາວ ແມ່ນໄດ້ຮ່ວມມືກັບພາກສ່ວນ ທີ່ກ່ຽວຂ້ອງຂອງລັດຖະບານໂດຍສະເພາະແມ່ນ ກະຊວງການເງິນ ແລະ ທະນາຄານ ແຫ່ງ ສປປ ລາວ ພ້ອມກັບ ຄູ່ຮ່ວມມືຍຸດທະສາດ ດ້ານການຄ້າຈາກທັງພາຍ ແລະ ສາກົນ ກໍຄືບັນດາທະນາຄານ, ສະຖາບັນການເງິນ, ວິສາຫະກິດວັດຖຸມີຄ່າ ໃຫ້ມີຄວາມພ້ອມຮອບດ້ານ ບໍ່ວ່າຈະເປັນໃນດ້ານການຄຸ້ມຄອງບໍລິຫານຈັດການ, ເຄື່ອງມືອຸປະກອນຕ່າງໆ ທີ່ທັນສະໄໝ ຕາມມາດຕະຖານທີ່ສາກົນຍອມຮັບ. ໃນມື້ນີ້, ທະນາຄານຄໍາ ລາວ ແມ່ນພ້ອມແລ້ວ ທີ່ຈະສະໜອງການຜະລິດຕະພັນ ແລະ ການບໍລິການ ທີ່ຫຼາກຫຼາຍ ແລະ ເຂົ້າເຖິງໄດ້ງ່າຍ ສູ່ສັງຄົມລາວ ເປັນຕົ້ນແມ່ນ ການເປີດບັນຊີຝາກຄໍາ, ສິນເຊື່ອກູ້, ການອອກໃບຢັ້ງຢືນຄໍາ ເພື່ອນໍາໃຊ້ເປັນຫຼັກຊັບຄໍ້າປະກັນ, ການຮັບຝາກຄໍາດ້ວຍຫ້ອງໝັ້ນຄົງເກັບຮັກສາ ແລະ ຕູ້ນິລະໄພຂັ້ນສູງ, ການຂົນສົ່ງວັດຖຸມີຄ່າ ຕະຫຼອດຮອດຕູ້ສະໜອງກົດອັດຕະໂນມັດ ແລະ ອື່ນໆ ທີ່ພ້ອມໃຫ້ບໍລິການແກ່ສັງຄົມລາວແລ້ວ ຕັ້ງແຕ່ມື້ນີ້ເປັນຕົ້ນໄປ ແລະ ນອກນີ້ກໍໄດ້ກຽມພ້ອມທີ່ຈະສະໜອງ ອີກຫຼາກຫຼາຍຜະລິດຕະພັນເຊັ່ນ: ການບໍລິການຄ້າຄໍາໃນ Digital Platform ລະດັບສາກົນ (International Gold Trading), ການກັ່ນຫຼອມຄໍາ, ການປະເມີນມູນຄ່າແຮ່ຄໍາທີ່ຍັງບໍ່ໄດ້ຂຸດຄົ້ນ ເພື່ອຕີມູນຄ່າເປັນຊັບສິນປະກອບເຂົ້າງົບປະມານ ໃຫ້ແກ່ລັດຖະບານ ແລະ ການສໍາຮອງຄໍາໃຫ້ແກ່ປະເທດຊາດ ໃນອະນາຄົດຕໍ່ໜ້າ.

ພາຍຫຼັງສໍາເລັດພິທີ ທີ່ຕຶກສໍານັກງານທະນາຄານຄ້າ ລາວ ແລ້ວ, ໄດ້ມີການສືບຕໍ່ສະເຫຼີມສະຫຼອງພິທີເປີດບໍລິການ ຢ່າງເປັນທາງການ ທີ່ ໂຮງແຮມ ແລນມາກ ຣີເວີ້ໄຊ ໂດຍການໃຫ້ກຽດເຂົ້າຮ່ວມນໍາພາເປັນສັກຂີພະຍານ ໂດຍ ພະນະທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ ແຫ່ງ ສປປ ລາວ ແລະ ບັນດາການນໍາ ຂອງ ພັກ-ລັດ ຕາງໜ້າຈາກບັນດາກະຊວງ ແລະ ອົງການຈັດຕັ້ງຕ່າງໆ ພ້ອມດ້ວຍ ຄະນະນໍາ ຕາງຫນ້າຈາກບັນດາທະນາຄານ, ວິສາຫະກິດຜູ້ປະກອບການ ທີ່ເປັນຄູ່ຮ່ວມມືພັນທະມິດ ຂອງທະນາຄານຄໍາ ລາວ ຈາກທັງພາຍໃນ ແລະ ຕ່າງປະເທດ ຕະຫຼອດຮອດບັນດາລູກຄ້າຂອງທະນາຄານຄໍາ ລາວ ເຂົ້າຮ່ວມຢ່າງເບີກບານຟົດຟື້ນ.

ໃນພິທີດັ່ງກ່າວນີ້, ທະນາຄານຄຳລາວ ແມ່ນໄດ້ມີການລົງນາມ ເຊັນສັນຍາຮ່ວມມືທາງດ້ານທຸລະກິດ ແລະ ຍຸດທະສາດ ກັບບັນດາທະນາຄານ, ສະຖາບັນການເງິນ ແລະ ວິສາຫະກິດຜູ້ປະກອບການວັດຖຸມີຄ່າ ເພື່ອຮ່ວມກັນ ສ້າງປັດໄຈ ແລະ ກົນໄກການຮ່ວມມື ເພື່ອເປັນພຶ້ນຖານອັນສໍາຄັນ ໃນການປະກອບສ່ວນສ້າງສາພັດທະນາປະເທດຮ່ວມກັນຕໍ່ໄປ.

ໃນໂອກາດນີ້, ທ່ານ ນາງ ວັດທະນາ ດາລາລອຍ, ຮັກສາການຜູ້ວ່າການ ທະນາຄານແຫ່ງ ສປປ ລາວ ໄດ້ມີຄໍາເຫັນວ່າ ທະນາຄານຄໍາ ລາວ ແມ່ນມີຄວາມສໍາຄັນໃນລະບົບເສດຖະກິດ ຈຶ່ງເຫັນດີໃຫ້ອະນຸຍາດດໍາເນີນທຸລະກິດ ທະນາຄານຄໍາ ເພື່ອເປັນອົງປະກອບໜຶ່ງໃນ ລະບົບການເງິນ-ເງິນຕາ, ປະກອບສ່ວນຮັກສາສະຖຽນລະພາບດ້ານການເງິນ ແລະ ພັດທະນາເສດຖະກິດ-ສັງຄົມ ຂອງ ສປປ ລາວ ເຊິ່ງທະນາຄານແຫ່ງ ສປປ ລາວ ເປັນຜູ້ຄຸ້ມຄອງມະຫາພາກກ່ຽວກັບທະນາຄານຄໍາ ພາຍໃຕ້ກົດໝາຍວ່າດ້ວຍທະນາຄານທຸລະກິດ. ອີງໃສ່ ກົດໝາຍດັ່ງກ່າວ, ທະນາຄານແຫ່ງ ສປປ ລາວ ໄດ້ອອກຂໍ້ຕົກລົງ ວ່າດ້ວຍທຸລະກິດຂອງທະນາຄານຄໍາ ທີ່ກໍານົດຫຼັກການ, ລະບຽບການ ມາດຕະການ ກ່ຽວກັບການດໍາເນີນທຸລະກິດຂອງທະນາຄານ ເພື່ອເປັນບ່ອນອີງ ໃນການໃຫ້ບໍລິການຜະລິດຕະພັນຂອງ ທະນາຄານຄ້າ ໃຫ້ມີປະສິດຕິພາບ ແລະ ມີຄວາມໂປ່ງໃສ ແລະ ເຕີບໃຫຍ່ເຂັ້ມແຂງ ເພື່ອປະກອບສ່ວນພັດທະນາລະບົບສະຖາບັນ ການເງິນ ແລະ ເສດຖະກິດ-ສັງຄົມຂອງ ສປປ ລາວ ໃຫ້ໄດ້ຮັບການຂະຫຍາຍຕົວຢ່າງຕໍ່ເນື່ອງ.

ການເປີດບໍລິການ ທະນາຄານຄຳ ລາວ ຢ່າງເປັນທາງການໃນຄັ້ງນີ້ ເປັນໜຶ່ງໃນຂີດໝາຍອັນສໍາຄັນ ທີ່ສະແດງໃຫ້ເຫັນເຖິງ ເຈດຕະນາ, ຄວາມມຸ້ງໝັ້ນຕັ້ງໃຈ ແລະ ການຮ່ວມແຮງຮ່ວມໃຈ ໃນການປະກອບສ່ວນພັດທະນາ ລະບົບສະຖາບັນການເງິນ-ການຄັງ ໃຫ້ມີຄວາມເຂັ້ມແຂງ, ສາມາດເຊື່ອມໂຍງກັບພາກພື້ນ ແລະ ສາກົນ ອີກທັງເປັນການ ຊຸກຍູ້ກິດຈະກໍາທາງດ້ານເສດຖະກິດ ໃຫ້ຂະຫຍາຍຕົວຢ່າງຕໍ່ເນື່ອງ ແລະ ໝັ້ນຄົງຍືນຍົງ ສອດຄ່ອງກັບແນວທາງນະໂຍບາຍ ພັດທະນາເສດຖະກິດ-ສັງຄົມ ຂອງພັກ ແລະ ລັດຖະບານ ທີ່ເປັນ ວາລະແຫ່ງຊາດ ໃຫ້ນັບມື້ນັບປະກົດຜົນເປັນຈິງ.