Blog - ໂທລະໂຄ່ງ THOLAKHONG

ເປີດໂຕສູນຈຳໜ່າຍລົດ FAWCAR ສາຂາວຽງຈັນ ຢ່າງເປັນທາງການ ພ້ອມລົດ SUV ລຸ້ນ JOYEE S04 ແລະ S08 ສູ່ຕະຫຼາດລາວ

ຂ່າວທົ່ວໄປ

User

-

August 19, 2026

ເປີດໂຕສູນຈຳໜ່າຍລົດ FAWCAR ສາຂາວຽງຈັນ ຢ່າງເປັນທາງການ ພ້ອມລົດ SUV ລຸ້ນ JOYEE S04 ແລະ S08 ສູ່ຕະຫຼາດລາວ

ວັນທີ 17 ສິງຫາ 2026 ຜ່ານມາ, ທີ່ນະຄອນຫຼວງວຽງຈັນ – ບໍລີສັດເຕີຫຼົງ ໂອໂຕ ໄດ້ເປີດໂຕສູນຈຳໜ່າຍລົດ FAWCAR ສາຂາວຽງຈັນ ຢ່າງເປັນທາງການ ພ້ອມເປີດໂຕລົດລຸ້ນໃໝ່ຫຼ້າສຸດ 2 ລຸ້ນຄື ລົດ SUV ລຸ້ນ JOYEE S04 (ໄຟຟ້າ 100%) ແລະ JOYEE S08 (Plug-in Hybrid) ສູ່ຕະຫຼາດລາວ. ງານຄັ້ງນີ້, ໃຫ້ກຽດເຂົ້າຮ່ວມໂດຍ ທ່ານ ບຸນວັນ ວິລະວົງ ຫົວໜ້າຫ້ອງການ ກະຊວງອຸດສາຫະກໍາ ແລະ ການຄ້າ, ທ່ານ Yang Zhiyong ປະທານຄະນະກວດກາ ກຸ່ມບໍລິສັດ ເຕີຫຼົງ ໂອໂຕ, ພ້ອມດ້ວຍແຂກຜູ້ມີກຽດ, ອິນຟູເລນເຊີ ແລະ ບັນດາສື່ມວນຊົນຈາກຫຼາຍສຳນັກ.

ການເປີດໂຕຄັ້ງນີ້, ຖືເປັນອີກກ້າວສຳຄັນຂອງ FAWCAR ໃນການເລັ່ງຂະຫຍາຍຍຸດທະສາດໃນພາກພື້ນອາຊຽນ. ເຊິ່ງອາໄສຮາກຖານການຜະລິດລົດອັນເຂັ້ມແຂງຂອງ China FAW ແລະ ຄຸນນະພາບທີ່ໄດ້ຮັບການຮັບຮອງຈາກລັດວິສາຫະກິດຊັ້ນນຳຂອງ ສປ ຈີນ, ໂດຍເນັ້ນ ການອອກແບບທີ່ໂດດເດັ່ນ, ປະຢັດພະລັງງານ, ປອດໄພ ແລະ ຮອງຮັບຮູບແບບການໃຊ້ງານຫຼາຍດ້ານ. ພ້ອມນີ້ ຍັງຊ່ວຍຍົກລະດັບອຸດສາຫະກຳການຂົນສົ່ງສີຂຽວໃນທ້ອງຖິ່ນ. FAWCAR ໄດ້ນຳໃຊ້ລົດໄຟຈີນ-ລາວ ໃນການຈັດສົ່ງລົດ, ສະໜອງອາໄຫຼ່ໄດ້ຢ່າງວ່ອງໄວ ເພື່ອຕອບໂຈດແກ່ຜູ້ໃຊ້ລົດໃນລາວ ຕັ້ງແຕ່ການຊື້ລົດ, ການໃຊ້ລົດ ເຖິງການບຳລຸງຮັກສາ. ພິເສດ, ລົດທັງ 2 ລຸ້ນນີ້ ໄດ້ຮັບການອອກແບບ ແລະ ຜະລິດ ສຳລັບຕະຫຼາດລາວ ເພື່ອຮັບມືກັບສະພາບອາກາດ ແລະ ຖະໜົນຫຫົນທາງທັງໃນ ແລະ ນອກເມືອງ.

ສຳລັບ JOYEE S04: SUV ໄຟຟ້າ 100% ລຸ້ນ 445KM ລາຄາ 22,500 USD ແລະ ລຸ້ນ 565KM ລາຄາ 23,800 USD. ລະບົບການຂັບເຄື່ອນໄຟຟ້າ Jigull ທີ່ມີປະສິດທິພາບ 88%, ຮອງຮັບທັງການເດີນທາງໄປວຽກປະຈຳວັນ ແລະ ການຂັບລົດທ່ອງທ່ຽວໄລຍະສັ້ນ, ປະຢັດ ແລະ ອຸ່ນໃຈ ເພາະແບັດເຕີຣີ ນຳໃຊ້ເທັກໂນໂລຊີ High-molecular Carbon Nanocoating ເປັນຄັ້ງທຳອິດໃນອຸດສາຫະກຳ ຜ່ານການທົດສອບຄວາມປອດໄພເຖິງ 169 ຂັ້ນ. ສາມາດຮັບມືກັບໄຟໄໝ້, ການແຊ່ນ້ຳທະເລ ແລະ ກັນກະແທກຢູ່ພື້ນລົດ. ພາຍໃນໂຕລົດມີເນື້ອທີ່ກວ້າງຂວາງ, ຫຼັງຄາແກ້ວພາໂນຣາມາ ແລະ ແກ້ວແວ່ນກັນຄວາມຮ້ອນ, ເຮັດໃຫ້ຫ້ອງໂດຍສານປອດໂປ່ງ ແລະ ບໍ່ຮູ້ສຶກອຶດອັດ, ມີຈໍຄວບຄຸມ 14.6 ນິ້ວ, ພ້ອມລະບົບຊ່ວຍຂັບຂີ່ອັດສະລິຍະ L2, ກ້ອງ 360° ຮອບຄັນ, ຊ່ວຍເລື່ອງການຈອດຢູ່ບ່ອນທີ່ແຄບ, ດ້ານຫຼັງເບາະນັ່ງ ສາມາດເກັບເຄື່ອງໄດ້ຫຼາຍຢ່າງ ແລະ ມີຫົວຈ່າຍໄຟເພື່ອຕໍ່ອຸປະກອນຕ່າງໆ ເຊິ່ງຕອບໂຈດການໃຊ້ງານແບບຄອບຄົວໄດ້ຢ່າງເຕັມທີ່.

ສຳລັບ JOYEE S08: SUV Plug-in Hybrid ລາຄາ 24,800 USD, ໃຊ້ລະບົບຂັບເຄື່ອນປະສົມປະສານກັນລະຫວ່າງ ນໍ້າມັນ ແລະ ໄຟຟ້າ, ສາມາດຂັບຂີ່ດ້ວຍໄຟຟ້າລ້ວນໄດ້ເຖິງ 200 km ແລະ ຮອງຮັບ 2C ການສ້າງໄວ (Fast Charging). ເມື່ອແບັດເຕີຣີ – ນໍ້າມັນເຕັມຖັງ ສາມາດແລ່ນໄດ້ເຖິງ1,500km, ແບັດເຕີຣີທົນທານ ຮອງຮັບການກັນນ້ຳ, ພ້ອມລະບົບຊ່ວຍຂັບຂີ່ອັດສະລິຍະຮອບດ້ານ ແລະ ມີກ້ອງ 360° ອ້ອມຄັນຕະຫຼອດການເດີນທາງ. rkp.oຫ້ອງໂດຍສານເນັ້ນຄວາມກວ້າງສະບາຍ ພ້ອມຈຸດໄວ້ເຄື່ອງ 33 ຈຸດ, ເບາະນັ່ງຫຸ້ມດ້ວຍ ວັດສະດຸໜັງຈາກເຫັດຫຼິນຈື່ ຊ່ວຍລະບາຍຄວາມຮ້ອນໄດ້ດີ ແລະ ມີຫຼັງຄາແກ້ວພາໂນຣາມາ ສາມາດເປີດ- ປິດໄດ້ຢ່າງສະດວກ. ເຊິ່ງເໝາະສຳລັບເປັນລົດຄອບຄົວອີກໜຶ່ງຄັນ. ພິເສດ, ລົດລຸ້ນນີ້ ຍັງຕິດອັນດັບທີ 4 ຈາກ 10 ອັນດັບ ສຳລັບລົດທີ່ດີທີ່ສຸດ ໃນປະເພດລົດ Hybrid ອີກດ້ວຍ.

ເພື່ອທົດສອບຄວາມສາມາດໃນການອອກແບບໃຫ້ເໝາະກັບຕະຫຼາດລາວ ແລະ ທົດລອງຄຸນນະພາບຂອງລົດທັງ 2 ລຸ້ນ, ທີມ FAWCAR ໄດ້ເລີ່ມການທົດສອບຂັບຂີ່ໃນໄລຍະທາງ 1,500km ຈາກນະຄອນຫຼວງວຽງຈັນ ສປປ ລາວ ໄປສູ່ ພະນົມເປັນ, ກຳປູເຈຍ. ສຳລັບ JOYEE S04 ເນັ້ນການທົດສອບສະພາບການເດີນທາງໃນເມືອງ ແລະ ຊານເມືອງຂອງລາວ, ສ່ວນ JOYEE S08 ຈະເດີນທາງຜ່ານຫົນທາງເຂດສາຍແດນທັງສອງປະເທດ.

ປັດຈຸບັນ ຄວາມຕ້ອງການລົດພະລັງງານໃໝ່ໃນລາວກຳລັງເພີ່ມຂຶ້ນຢ່າງຕໍ່ເນື່ອງ. ແບຣນລົດຈາກຈີນກໍໄດ້ຮັບການຍອມຮັບເພີ່ມຂຶ້ນ. ສຳລັບກ້າວຕໍ່ໄປ ຈະຂະຫຍາຍການຈຳໜ່າຍຈາກນະຄອນວຽງຈັນສູ່ຂອບເຂດທົ່ວປະເທດ.

ສາມາດໄປສຳຜັດລົດຕົວຈິງໄດ້ແລ້ວມື້ນີ້ ທີ່ສູນຈຳໜ່າຍລົດ FAWCAR ຕັ້ງຢູ່: ບ້ານດົງນາໂຊກໃຕ້, ເມືອງສີໂຄດຕະບອງ, ນະຄອນຫລວງວຽງຈັນ, ເບີໂທຕິດຕໍ່: 020 9538 7666, ເພຈ: @Delong Auto ເຕີຫລົງ ອໍໂຕ້

#FAWCAR #JOYEES04 #JOYEES08#FAWCARCambodiaLaunch#DrivingForwardWithFAWCAR#FAWCARTHEEVENT

ຍທຂ ອອກແຈ້ງການຄຸ້ມຄອງການຂົນສົ່ງໂດຍສານພາຍໃນ ແລະ ລະຫວ່າງປະເທດ ເພື່ອຄວາມເປັນລະບຽບຮຽບຮ້ອຍ-ຄວາມປອດໄພຂອງຜູ້ໂດຍສານ

ແຈ້ງການ

User

-

August 14, 2026

0

ຍທຂ ອອກແຈ້ງການຄຸ້ມຄອງການຂົນສົ່ງໂດຍສານພາຍໃນ ແລະ ລະຫວ່າງປະເທດ ເພື່ອຄວາມເປັນລະບຽບຮຽບຮ້ອຍ-ຄວາມປອດໄພຂອງຜູ້ໂດຍສານ

ຫ້ອງການ ກະຊວງໂຍທາທິການ ແລະ ຂົນສົ່ງ ອອກແຈ້ງການ ສະບບັບເລກທີ 19229/ຫກ, ລົງວັນທີ 13 ສິງຫາ 2026 ກ່ຽວກັບການຄຸ້ມຄອງການຂົນສົ່ງໂດຍສານພາຍໃນ ແລະ ລະຫວ່າງປະເທດ ເພື່ອຄວາມເປັນລະບຽບຮຽບຮ້ອຍ ຂອງສັງຄົມ ແລະ ຄວາມປອດໄພຂອງຜູ້ໂດຍສານ ແລະ ຜູ້ຮ່ວມໃຊ້ເສັ້ນທາງ.

ລາຍລະອຽດລຸ່ມນີ້:

ຕຳຫຼວດໄທຕັ້ງຄ່າຫົວ 1 ແສນບາດ ໄລ່ລ່າໂຈນ 2 ຄົນ ໃຊ້ອາວຸດປືນບຸກປຸ້ນຮ້ານຄຳ.

User

-

August 6, 2026

0

ຕຳຫຼວດໄທຕັ້ງຄ່າຫົວ 1 ແສນບາດ ໄລ່ລ່າໂຈນ 2 ຄົນ ໃຊ້ອາວຸດປືນບຸກປຸ້ນຮ້ານຄຳ.

ອີງຕາມສຳນັກຂ່າວໄທລັດລາຍງານ ໃນວັນທີ 5 ສິງຫາ 2026 ກ່ຽວກັບຄວາມຄືບໜ້າກໍລະນີຄົນຮ້າຍໃຊ້ອາວຸດປືນບຸກປຸ້ນຮ້ານຄຳ ຢູ່ຫ້າງແຫ່ງໜຶ່ງ ໃນຈັງຫວັດຊຽງລາຍ ປະເທດໄທ ເຊິ່ງຄົນຮ້າຍສາມາດລັກເອົາຄຳໄປໄດ້ທັງໝົດ 184 ບາດ ເປັນເງິນມູນຄ່າ 13 ລ້ານກວ່າບາດ.

ປັດຈຸບັນທາງດ້ານເຈົສ້າໜ້າທີ່ຕຳຫຼວດໄທ ໄດ້ປະສານສົມທົບຫາ ທາງການລາວ ເພື່ອຂໍຄວາມຮ່ວມມືໃນການຕິດຕາມຜູ້ຕ້ອງສົງໃສຕາມເບາະແສທີ່ໄດ້ຮັບ ຈາກການກວດສອບພາບຈາກກ້ອງວົງຈອນປິດພົບວ່າ: ຫຼັງກໍ່ເຫດຄົນຮ້າຍໄດ້ຂັບລົດຫຼົບໜີ ແລະ ໄດ້ຈອດລົດຖິ້ມໄວ້ແຄມນ້ຳຂອງ ກ່ອນຈະມີເຮືອປິດສະໜາມາຮັບຂ້າມກັບມາທີ່ ເມືອງຫ້ວຍຊາຍ ແຂວງບໍ່ແກ້ວ.

ທາງດ້ານເຈົ້າໜ້າທີ່ໄທເປີດເຜີຍວ່າ: ໄດ້ຕັ້ງລາງວັນນຳຈັບຄົນຮ້າຍທັງ 2 ແລ້ວ ເປັນເງິນມູນຄ່າ 1 ແສນບາດ ຫຼື ປະມານ 70 ລ້ານກີບ ແລະ ເລັ່ງລວບລວມຫຼັກຖານເພື່ອຂໍອະນຸມັດໝາຍຈັບ ເຊິ່ງຂະນະນີ້ທາງເຈົ້າໜ້າທີ່ລາວຢູ່ໃນລະຫວ່າງການໄລ່ລ່າຕິດມຕາມຕົວຄົນຮ້າຍມາດຳເນີນຄະດີຕາມລະບຽບກົດໝາຍ.

ແຫຼ່ງທີ່ມາ: ໄທລັດ

ຕຳຫຼວດຊຽງໃໝ່ບຸກຈັບແມ່ຄ້າຊາວລາວ ລັກຂາຍເປັດພາໂລ້ ມາ 3 ປີ ໂດຍໄດ້ຮັບອະນຸຍາດ.

ຂ່າວຕ່າງປະເທດ

User

-

August 4, 2026

0

ຕຳຫຼວດຊຽງໃໝ່ບຸກຈັບແມ່ຄ້າຊາວລາວ ລັກຂາຍເປັດພາໂລ້ ມາ 3 ປີ ໂດຍໄດ້ຮັບອະນຸຍາດ.

ໃນວັນທີ 3 ສິງຫາ 2026 ຜ່ານມາ, ເຈົ້າໜ້າທີ່ສືບສວນ ກວດຄົນເຂົ້າເມືອງ ຈັງຫວັດຊຽງໃໝ່ປະເທດໄທ ເຂົ້າກວດສອບຕະຫຼາດແຫ່ງໜຶ່ງ ຫຼັງໄດ້ຮັບແຈ້ງຈາກພົນລະເມືອງດີວ່າ: ມີການລັກລອບໃຊ້ແຮງງານຕ່າງດ້າວຜິດກົດໝາຍ ໃນພື້ນທີ່ ອໍາເພີເມືອງ ຈັງຫວັດຊຽງໃໝ່.

ຈາກການລົງພື້ນທີ່ຕົວຈິງພົບເຫັນ: ຍິງສາວຊາວລາວ 1 ຄົນ ລັກລອບປະກອບອາຊີບຂາຍເປັດພະໂລ້ມາແລ້ວ 3 ປີ ໂດຍບໍ່ໄດ້ຮັບອະນຸຍາດ ຈາກການກວດສອບພົບວ່າ: ຜູ້ຖືກຫາເຄີຍໄດ້ຮັບໃບອະນຸຍາດເຮັດວຽກກັບນາຍຈ້າງຄົນໄທ ແຕ່ພາຍຫຼັງກໍໄດ້ປ່ຽນມາປະກອບອາຊີບນີ້ແທນ.

ເບື້ອງຕົ້ນທາງເຈົ້າໜ້າທີ່ໄດ້ຄວບຄຸມຕົວແມ່ຄ້າຊາວລາວສົ່ງໃຫ້ພະນັກງານສອບສວນ ເມືອງຊຽງໃໝ່ ເພື່ອດຳເນີນຄະດີຕາມລະບຽບກົດໝາຍຕໍ່ໄປ.

ສານແຂວງອັດຕະປື ຊີ້ແຈງຄະດີ ນ. ດາວິນ ມະນີວົງ ເປັນບຸກຄົນທົ່ວໄປ ກະທຳຜິດເຮັດທຸລະກິດບໍ່ຖືກຕ້ອງ ສ່ວນ ນ. ພຸດທິດາວັນ ໄກສອນເສນາ ກະທຳຜິດ ເປັນພະນັກງານທີ່ສໍ້ລາດບັງຫຼວງ

Uncategorized

User

-

August 4, 2026

0

ສານແຂວງອັດຕະປື ຊີ້ແຈງຄະດີ ນ. ດາວິນ ມະນີວົງ ເປັນບຸກຄົນທົ່ວໄປ ກະທຳຜິດເຮັດທຸລະກິດບໍ່ຖືກຕ້ອງ ສ່ວນ ນ. ພຸດທິດາວັນ ໄກສອນເສນາ ກະທຳຜິດ ເປັນພະນັກງານທີ່ສໍ້ລາດບັງຫຼວງ

ໂດຍອີງຕາມການໃຫ້ຂໍ້ມູນ ຂອງ ສານປະຊາຊົນແຂວງອັດຕະປື ໃນຄັ້ງວັນທີ 3 ສິງຫາ 2026 ວ່າ: ເພຶ່ອເປັນການຊີ້ແຈ້ງກ່ຽວກັບຄະດີ 2 ເລື່ອງທີ່ສານປະຊາຊົນແຂວງອັດຕະປື ໄດ້ຕັດສີນແລ້ວນັ້ນ ປັດຈຸ ບັນເຫັນໄດ້ວ່າ: ສື່ສັງຄົມອອນລາຍໄດ້ລົງຂ່າວໄປໃນທາງທີ່ບິດເບືອນຄວາມເປັນຈິງ ເຮັດໃຫ້ສັງຄົມກໍາລັງໃຫ້ຄວາມສົນໃຈ ແລະ ເຂົ້າໃຈໄປໃນທາງທີ່ຜິດ ຕໍ່ຄໍາຕັດສິນຂອງສານ ລະຫວ່າງ ຄະດີກ່ຽວກັບການກະທຳຜິດ ຂອງເຈົ້າກຳທົ່ວໄປ (ບຸກຄົນທົ່ວໄປ) ຕິດພັນກັບຈຳນວນເງີນ ຖືກເສຍຫາຍ ຈາກການກະທຳຜິດຂອງພະນັກງານທີ່ສໍ້ລາດບັງຫຼວງ ຢູ່ແຂວງອັດຕະປື ທີ່ສານໄດ້ເປີດປະຊຸມສານ ໃນຄັ້ງວັນທີ 16 ກໍລະກົດ 2026, ຄະດີອາຍາ ເລກທີ 64/ ຂຕ.ອ, ລົງວັນທີ 20 ເມສາ 2026, ຕາມຄຳຕັດສີນ ເລກທີ 89/ ຂຕ.ອ, ລົງວັນທີ 16 ກໍລະກົດ 2026. ໃນນີ້ ມີຈຳເລີຍ ທັງໝົດ 9 ຄົນ, ຍິງ 6 ຄົນ ແລະ ຄະດີອາຍາ ເລກທີ 59/ ຂຕ.ອ, ລົງວັນທີ 17 ມີນາ 2026, ຕາມຄຳຕັດສີນ ເລກທີ 90/ ຂຕ.ອ, ລົງວັນທີ 30 ກໍລະກົດ 2026. ກ່ຽວກັບ ການກະທຳຜິດ ຂອງພະນັກງານຢູ່ແຂວງອັດຕະປື ໃນຂໍ້ຫາ ສໍ້ລາດບັງຫຼວງ, ໃນນີ້ ມີຈຳເລີຍ ທັງໝົດ 15 ຄົນ, ຍິງ 4. ດັ່ງນັ້ນ ຈຶ່ງຢາກໃຫ້ຜູ້ຮັບຂໍ້ມູນຂ່າວສານ ທາງສື່ສັງຄົມອອນລາຍ ຈົ່ງໃຊ້ວິຈາລະນະຍານໃນການຕິດຕາມຂໍ້ມູນທີ່ເປັນທາງການ ໃຫ້ຖືກຕ້ອງ, ສະນັ້ນ ເພື່ອເຮັດໃຫ້ສັງຄົມເຂົ້າໃຈຢ່າງຖືກຕ້ອງ ຈິ່ງໄດ້ຊີ້ແຈ້ງກ່ຽວກັບ ການກະທຳຜິດ ຂອງນາງ ດາວິນ ມະນີວົງ ແລະ ນາງ ພຸດທິດາວັນ ໄກສອນເສນາ ດັ່ງນີ້:

ຄະດີ ຂອງນາງ ດາວິນ ມະນີວົງ ແມ່ນຄະດີອາຍາ ເລກທີ 64/ ຂຕ.ອ, ລົງວັນທີ 20 ເມສາ 2026, ຕາມຄຳຕັດສີນ ເລກທີ 89/ ຂຕ.ອ, ລົງວັນທີ 16 ກໍລະກົດ 2026,ເຊິ່ງສານໄດ້ຕັດສີນໃຫ້ຜູ້ກ່ຽວ ມີຄວາມຜິດໃນສະຖານໂທສານຸໂທດ ຕາມມາດຕາ 297 ແລະ ມາດຕາ 298 ການດຳເນີນທຸລະກິດໂດຍບໍ່ຖືກຕ້ອງຕາມກົດໝາຍ ແລະ ການຄິດໄລ່ດອກເບ້ຍສູງ ຕາມປະມວນກົດໝາຍອາຍາ ປີ 2017. ເຊິ່ງສານໄດ້ຕັດສີນ ລົງໂທດ ນາງ ດາວິນ ມະນີວົງ (ຈໍາເລີຍ4) ໃນຂໍ້ຫາ ການດໍາເນີນທຸລະກິດໂດຍບໍ່ຖືກຕ້ອງຕາມກົດໝາຍ ກຳນົດ ຫົກເດືອນ ແລະ ປັບໃໝ 5,000,000 ກີບ, ລົງໂທດ ນາງ ດາວິນ ມະນີວົງ (ຈໍາເລີຍ4) ໃນຂໍ້ຫາ ການຄິດໄລ່ດອກເບ້ຍສູງ ກຳນົດ ຫົກເດືອນ ແລະ ປັບໃໝ 5,000,000 ກີບ, ລວມລົງໂທດຕັດອິດສະລະພາບຈຳເລີຍ ທັງໝົດ ໜື່ງ ປີ ໃຫ້ປະຕິບັດ ຫ້າເດືອນ ຊາວສີ່ວັນ ສ່ວນທີ່ເຫຼືອພາກໄວ້ ແລະ ປັບໃໝ 10,000,000 ກີບ ແລະໃຫ້ໃຊ້ແທນເງີນສ່ວນຕ່າງທີ່ໄດ້ຈາກການກະທຳຜິດ ຈຳນວນ 5,054,100,000 ກີບ ຄືນແກ່ລັດ ເຊິ່ງເງີນຈຳນວນດັ່ງກ່າວນີ້ ຜູ້ກ່ຽວໄດ້ມາຈາກການກະທຳຜິດໃນຂໍ້ຫາ ການດຳເນີນທຸລະກິດໂດຍບໍ່ຖືກຕ້ອງຕາມກົດໝາຍ ແລະ ການຄິດໄລ່ດອກເບ້ຍສູງ, ການກະທຳຜິດຂອງ ນາງ ດາວີນ ມະນີວົງ ຜູ້ກ່ຽວບໍ່ໄດ້ກະທຳຜິດ ໃນຂໍ້ຫາການສໍ້ລາດບັງຫຼວງ.

ສ່ວນຄະດີ ຂອງນາງ ພຸດທິດາວັນ ໄກສອນເສນາ ແມ່ນຄະດີອາຍາ ເລກທີ 59/ ຂຕ.ອ, ລົງວັນທີ 17 ມີນາ 2026, ຕາມຄຳຕັດສີນ ເລກທີ 90/ ຂຕ.ອ, ລົງວັນທີ 30 ກໍລະກົດ 2026. ຜູ້ກ່ຽວໄດ້ກະທຳຜິດທີ່ເປັນການ ການສໍ້ລາດບັງຫຼວງ ໃນຂໍ້ຫາ ການຍັກຍອກຊັບຂອງລັດ ຫຼື ລວມໝູ່, ການດໍາເນີນທຸລະກິດໂດຍບໍ່ຖືກຕ້ອງຕາມກົດໝາຍ ແລະ ການຄິດໄລ່ດອກເບ້ຍສູງ, ຕາມມາດຕາ 354, 355, 297 ແລະ 298 ຂອງປະມວນກົດໝາຍອາຍາ, ເຊິ່ງສານໄດ້ຕັດສີນ ໃຫ້ຜູ້ກ່ຽວຖືກລົງໂທດຕາມແຕ່ລະຂໍ້ຫາຄື:ລົງໂທດຕັດອິດສະລະພາບ ໃນຂໍ້ຫາການດໍາເນີນທຸລະກິດໂດຍບໍ່ຖືກຕ້ອງຕາມກົດໝາຍ ກໍານົດ ຫົກເດືອນ ແລະ ປັບໃໝ 5,000, 000 ກີບ,ລົງໂທດຕັດອິດສະລະພາບ ໃນຂໍ້ຫາການຄິດໄລ່ດອກເບ້ຍສູງກໍານົດ ຫົກ ເດືອນ ແລະ ປັບໃໝ 5,000,000 ກີບ.

– ໃນຂໍ້ຫາ ການຍັກຍອກຊັບ ຂອງລັດ ຫຼື ລວມໝູ່ ຕະຫຼອດຊີວິດ ແລະ ປັບໃໝ ໜື່ງສ່ວນຮ້ອຍ(1%) ຂອງມູນຄ່າຄວາມເສຍຫາຍ ຄື: ເງີນຈຳ ນວນ 10,000,000,000 ກີບ X 1% ເທົ່າ 100,000,000 ກີບ, ລວມລົງໂທດ ນາງ ພຸດທິດາວັນ ໄກສອນເສ ນາ (ຈໍາເລີຍ15) ຕັດອິດສະລະພາບ ຕະຫຼອດຊີວິດ ແລະ ປັບໃໝ ທັງໝົດ ຈຳນວນ 110,000,000 ກີບ
ສ່ວນເງີນ ຈຳນວນ 22,000,000 ກີບ ທີ່ສານໃຫ້ຜູ້ກ່ຽວສົ່ງຄືນ ແກ່ລັດນັ້ນ ແມ່ນເງີນທີ່ນາງ ພຸດທິດາວັນ ໄກສອນເສນາ ໄດ້ຈາກການກະທຳຜິດ ໃນຂໍ້ຫາການດໍາເນີນທຸລະກິດໂດຍບໍ່ຖືກຕ້ອງຕາມກົດໝາຍ ແລະ ການຄິດໄລ່ດອກເບ້ຍສູງ(ມາດຕາ 297,298) ພ້ອມນັ້ນ ກໍ່ຍັງໃຫ້ຮັບຜິດຊອບ ໃຊ້ແທນເງີນຂອງລັດທີ່ຖືກເສຍຫາຍ ຕາມບ້ວງເງີນທີ່ຜູ້ກ່ຽວໄດ້ຮ່ວມກະທຳຜິດ.

——–
©️ຂ່າວສານອອນລາຍ ອັດຕະປື

ສານປະຊາຊົນແຂວງອັດຕະປື ຕັດສິນຄະດີສໍ້ລາດບັງຫຼວງ ລົງໂທດຈຳເລີຍ 15 ຄົນ ໃນນັ້ນຈໍາຄຸກຕະຫຼອດຊີວິດ 10 ຄົນ

Uncategorized

User

-

July 31, 2026

0

ສານປະຊາຊົນແຂວງອັດຕະປື ຕັດສິນຄະດີສໍ້ລາດບັງຫຼວງ ລົງໂທດຈຳເລີຍ 15 ຄົນ ໃນນັ້ນຈໍາຄຸກຕະຫຼອດຊີວິດ 10 ຄົນ

ສານປະຊາຊົນແຂວງອັດຕະປື ໄດ້ພິຈາລະນາຕັດສີນຄະດີ ກ່ຽວກັບການກະທຳຜິດສໍ້ລາດບັງ ຫຼວງ ຂອງພະນັກງານຢູ່ ແຂວງອັດຕະປື ໂດຍໄດ້ຕັດສິນລົງໂທດຈໍາເລີຍທີ່ກະທໍາຜິດ ທັງໝົດ 15 ຄົນ, ຍິງ 4 ຄົນ, ໃນນັ້ນ ໂທດຈໍາຄຸກຕະຫຼອດຊີວິດ ມີຈໍານວນ 10 ຄົນ, ຍິງ 2 ຄົນ. ທ່ານ ນາງ ລັດຕະນາ ສິມາວັດ, ຫົວໜ້າຫ້ອງການສານປະຊາຊົນແຂວງອັດຕະປື ໄດ້ຖະແຫຼງຂ່າວຕໍ່ສື່ມວນຊົນ ໃນວັນທີ 30 ກໍລະກົດ 2026 ໃຫ້ຮູ້ວ່າ: ສານປະຊາຊົນແຂວງອັດຕະປື ໄດ້ພິຈາ ລະນາຕັດ ສີນຄະດີ ກ່ຽວກັບການກະທຳຜິດ ສໍ້ລາດບັງຫຼວງ ຂອງພະນັກງານຢູ່ ແຂວງອັດຕະປື. ເຊີ່ງມີລາຍລະອຽດດັ່ງນີ້: ໃນປີ 2021 ຫາ 2024 ພວກຈຳເລີຍໄດ້ຮ່ວມມືກັນ ກະທຳຜິດ ໂດຍມີ ທ້າວ ສຸລິໄຊ ສຸລິຍາໄລ ຫຼື ໝູ (ຈໍາເລີຍ) ເປັນຫົວໂປ່ຕົວການ ໃນການສໍ້ລາດບັງຫຼວງ ໃນຈໍານວນເງິນ 8 ບ້ວງ ຂອງແຂວງອັດຕະປື ມີເງິນຈໍານວນດັ່ງນີ້: ເງີນກີບ ຈໍານວນ103,489,679,995 ກີບ, ເງີນໂດລາ ຈໍານວນ 2,356,000 ໂດລາສະຫະລັດ ແລະ ເງີນດົງ ຈໍານວນ 1,500,000,000 ດົງ, ເຊຶ່ງເງິນດົງຈໍານວນດັ່ງກ່າວໄດ້ຖອນ ແລະ ແລກປ່ຽນເປັນເງິນກີບ ແລະ ເງິນບາດ.

May be an image of text that says 'ลานปะดามิ้ม PEOPLE' COURT สามปะทุาลุ้มแ2ว) สามปะ ดกลุม อัดตะปิ පී The People's Court of Attapeu Province'

ກ່ຽວກັບການກະທຳຜິດ ຂອງພະນັກງານຢູ່ແຂວງອັດຕະປື ໃນຂໍ້ຫາ ສໍ້ລາດບັງຫຼວງ, ໃນນີ້ ມີຈຳເລີຍ ທັງໝົດ 15 ຄົນ, ຍິງ 4 ຄົນ ຄື:

1) ທ້າວ ສຸລິຈັນ ພອນແກ້ວ (ຈໍາເລີຍ1), ອາຍຸ 53 ປີ, ອາຊີບ ພະນັກງານ (ອາດີດກໍາມະການພັກແຂວງ, ຫົວໜ້າຫ້ອງວ່າການແຂວງອັດຕະປື), ປັດຈຸບັນຢູ່ ບ້ານໄຊສີ, ເມືອງໄຊເສດຖາ, ແຂວງອັດຕະປື ຖືກຫາວ່າ: ການສໍ້ລາດບັງຫຼວງ ຂໍ້ຫາການຍັກຍອກຊັບຂອງລັດ ຫຼື ລວມໝູ່, ການຮັບສິນບົນ, ການສວຍໃຊ້ຖານະຕໍາແໜ່ງ, ສິດອໍານາດ, ໜ້າທີ່ເອົາຊັບຂອງລັດ, ລວມໝູ່ ຫຼື ບຸກຄົນ, ການປອມ ແປງເອກະສານ ຫຼື ການນໍາໃຊ້ເອກະສານປອມ, ການດໍາເນີນທຸລະກິດໂດຍບໍ່ຖືກຕ້ອງຕາມກົດໝາຍ ແລະ ການຄິດໄລ່ດອກເບ້ຍສູງ, ຕາມມາດຕາ 354, 355, 358, 359, 364, 297 ແລະ 298 ຂອງປະມວນກົດໝາຍອາຍາ, ລົງໂທດຕັດອິດສະລະພາບ ຕະຫຼອດຊີວິດ ແລະ ປັບໃໝ ໜື່ງສ່ວນຮ້ອຍ (1%) ຂອງມູນຄ່າຄວາມເສຍຫາຍ ຈຳນວນ 992,816,961 ກີບ, 60,898 ໂດລາສະຫະລັດ ແລະ 30,000,000 ດົງ, ຮິບເງິນ ທ້າວ ສຸລິຈັນ ພອນແກ້ວ(ຈຳເລີຍ1) ຈໍານວນ 1,551,712,000 ກີບ ເຂົ້າເປັນຂອງລັດ, ໃຫ້ ທ້າວ ສຸລິຈັນ ພອນແກ້ວ(ຈຳເລີຍ1) ສົ່ງເງິນສ່ວນຕ່າງໄດ້ຈາກການປ່ອຍເງີນກູ້ດອກເບ້ຍສູງ ທັງໝົດ ຈຳນວນ 4,200,249,000 ກີບ ຄືນແກ່ລັດ.

2) ທ້າວ ສູນນະຄອນ ແກ້ວວຽງຄໍາ (ຈໍາເລີຍ2 ), ອາຍຸ 59 ປີ, ອາຊີບ ພະນັກງານ (ອາດີດກໍາມະການພັກແຂວງ, ຫົວໜ້າພະແນກແຜນການ ແລະ ການລົງທືນແຂວງອັດຕະປື), ປັດຈຸບັນຢູ່ບ້ານ ຫຼັກ 3, ເມືອງສາມັກຄີໄຊ, ແຂວງອັດຕະປື ຖືກຫາວ່າ: ການສໍ້ລາດບັງຫຼວງ ໃນສະຖານການຍັກຍອກຊັບຂອງລັດ ຫຼື ລວມໝູ່, ການຮັບສິນບົນ ແລະ ການສວຍໃຊ້ຖານະຕໍາແໜ່ງ, ສິດອໍານາດ, ໜ້າທີ່ເອົາຊັບ ຂອງລັດ, ລວມໝູ່ ຫຼື ບຸກຄົນ, ຕາມມາດຕາ 354, 355, 358 ແລະ 359 ຂອງປະມວນກົດໝາຍອາ ຍາ, ລົງໂທດ ຕັດອິດສະລະພາບ ທ້າວ ສູນນະຄອນ ແກ້ວວຽງຄໍາ(ຈໍາເລີຍ2) ຕະຫຼອດຊີວິດ ແລະ ປັບໃໝ ໜື່ງສ່ວນຮ້ອຍ(1%) ຂອງມູນຄ່າຄວາມເສຍຫາຍ ທັງໝົດ ຈຳນວນ 34,420,000 ກີບ ແລະ 4,340 ໂດລາສະຫະລັດ ຮິບເງິນ ຈໍານວນ 42,000,000 ກີບ ແລະ 2,000 ໂດລາສະຫະລັດ ເຂົ້າເປັນຂອງລັດ.

3) ທ້າວ ຄໍາເຜີຍ ໂສມຖາວອນ(ຈໍາເລີຍ 3), ອາຍຸ 60 ປີ, ອາຊີບ ພະນັກງານບໍານານ (ອາດີດກໍາມະການພັກແຂວງ, ຫົວໜ້າພະແນກການເງິນແຂວງ), ປັດຈຸບັນຢູ່ບ້ານໂພນສະຫວ່າງ, ເມືອງສາມັກຄີໄຊ, ແຂວງອັດຕະປື ຖືກຫາວ່າ: ການສໍ້ລາດບັງຫຼວງ ໃນສະຖານ ການຍັກຍອກຊັບຂອງລັດ ຫຼື ລວມໝູ່, ການຮັບສິນບົນ, ການສວຍໃຊ້ຖານະຕໍາແໜ່ງ, ສິດອໍານາດ, ໜ້າທີ່ເອົາຊັບ ຂອງລັດ, ລວມໝູ່ ຫຼື ບຸກຄົນ, ຕາມມາດຕາ 354, 355, 358 ແລະ 359 ຂອງປະມວນກົດໝາຍອາຍາ, ລົງໂທດ ຕັດອິດສະລະພາບ ທ້າວ ຄໍາເຜີຍ ໂສມຖາວອນ (ຈໍາເລີຍ3) ຕະຫຼອດຊີວິດ ແລະ ປັບໃໝ ຈຳນວນ 1,828,008,205 ກີບ, ຈໍານວນ 40,000 ໂດລາສະຫະລັດ, ຮິບເງິນຈາກທ້າວ ຄໍາເຜີຍ ໂສມຖາ ວອນ (ຈໍາເລີຍ3) ຈໍານວນ 1,500,000,000 ກີບ ເຂົ້າເປັນຂອງລັດ.

4) ທ້າວ ທູນໄຊ ເມກດາວົງ(ຈໍາເລີຍ 4), ອາຍຸ 60 ປີ, ອາຊີບ ພະນັກງານບໍານານ (ອາດີດຮອງພະ ແນກການເງິນແຂວງອັດຕະປື), ປັດຈຸບັນຢູ່ບ້ານ ໄຊສະອາດ, ເມືອງ ສາມັກຄີໄຊ, ແຂວງອັດຕະປື, ຖືກຫາວ່າ: ການສໍ້ລາດບັງຫຼວງ ໃນສະຖານ ການຍັກຍອກຊັບຂອງລັດ ຫຼື ລວມໝູ່, ການຮັບສິນບົນ, ການສວຍໃຊ້ຖານະຕໍາແໜ່ງ, ສິດອໍານາດ, ໜ້າທີ່ເອົາຊັບ ຂອງລັດ, ລວມໝູ່ ຫຼື ບຸກ ຄົນ ແລະ ການດໍາເນີນທຸລະກິດທີ່ບໍ່ຖືກຕ້ອງຕາມກົດໝາຍ ແລະ ການຄິດໄລ່ດອກເບ້ຍສູງ, ຕາມມາດຕາ 354, 355, 358, 359, 297 ແລະ 298 ຂອງປະມວນກົດໝາຍອາຍາ, ລົງໂທດ ຕັດອິດສະລະພາບ ທ້າວ ທູນໄຊ ເມກດາວົງ (ຈໍາເລີຍ4) ຕະຫຼອດຊີວິດ ແລະ ປັບໃໝ ທັງໝົດ ຈໍານວນ 32,250,000 ກີບ ແລະ ຈໍານວນ 40,000 ໂດລາສະຫະລັດ, ຮິບເງີນຈາກທ້າວ ທູນໄຊ ເມກດາວົງ(ຈໍາເລີຍ4) ຈຳນວນ 225,000,000 ກີບ ເປັນຂອງລັດ.

6) ທ້າວ ອິນປົງ ສີລາວິກອນ (ຈໍາເລີຍ6 ), ອາຍຸ 38 ປີ, ອາຊີບ ພະນັກງານ (ອາດີດວິຊາການຂະ ແໜງບໍລິການ ຂື້ນກັບຄັງເງິນປະຈໍາແຂວງ), ປັດຈຸບັນຢູ່ບ້ານສົມໂຄດ, ເມືອງໄຊເສດຖາ, ແຂວງ ອັດຕະປື ຖືກຫາວ່າ: ການສໍ້ລາດບັງຫຼວງ ໃນສະຖານ ການຍັກຍອກຊັບຂອງລັດ ຫຼື ລວມໝູ່, ການຮັບສິນບົນ ແລະ ການສວຍໃຊ້ຖານະຕໍາແໜ່ງ, ສິດອໍານາດ, ໜ້າທີ່ເອົາຊັບ ຂອງລັດ, ລວມໝູ່ ຫຼື ບຸກຄົນ ຕາມມາດຕາ 354, 355, 358 ແລະ 359 ຂອງປະມວນກົດໝາຍອາຍາ, ລົງໂທດຕັດອິດ ສະລະພາບ ທ້າວ ອິນປົງ ສີລາວິກອນ (ຈໍາເລີຍ6) ຕະຫຼອດຊີວິດ ແລະ ປັບໃໝ ທັງໝົດ ຈຳນວນ 2,033,989,750 ກີບ ແລະ ຈໍານວນ 46,320 ໂດລາສະຫະລັດ, ຮິບເງີນຈາກທ້າວ ອິນປົງ ສີລາວິກອນ (ຈໍາເລີຍ6) ຈຳນວນ 130,000,000 ກີບ ເປັນຂອງລັດ.

7) ທ້າວ ສຸລິໄຊ ສຸລິຍາໄລ ຫຼື ໝູ (ຈໍາເລີຍ 7), ອາຍຸ 37 ປີ, ອາຊີບ ພະນັກງານ (ອາດີດຮອງຂະ ແໜງຄົ້ນຄວ້າສັງລວມ ຂື້ນກັບຫ້ອງວ່າການແຂວງ), ປັດຈຸບັນຢູ່ບ້ານ ຫຼັກ3, ເມືອງສາມັກຄີໄຊ, ແຂວງອັດຕະປື ຖືກຫາວ່າ: ການສໍ້ລາດບັງຫຼວງ ໃນສະຖານ ການຍັກຍອກຊັບຂອງລັດ ຫຼື ລວມໝູ່, ການໃຫ້ສິນບົນ, ການສວຍໃຊ້ຖານະຕໍາແໜ່ງ, ສິດອໍານາດ, ໜ້າທີ່ເອົາຊັບ ຂອງລັດ, ລວມໝູ່ ຫຼື ບຸກ ຄົນ, ການປອມແປງເອກະສານ ຫຼື ການນໍາໃຊ້ເອກະສານປອມ, ການຫຼີ້ນການພະນັນທີ່ຕ້ອງຫ້າມ ແລະ ການຟອກເງິນ, ຕາມມາດຕາ 354, 355, 357, 359, 364, 141 ແລະ 130 ຂອງປະມວນກົດໝາຍອາຍາ, ລົງໂທດ ຕັດອິດສະລະພາບ ທ້າວ ສຸລິໄຊ ສຸລິຍາໄລ (ຈຳເລີຍ7) ຕະຫຼອດຊີວິດ ແລະ ປັບໃໝ ທັງໝົດ ຄື: ຈໍານວນ 3,459,996,813 ກີບ, ຈໍານວນ 70,198 ໂດລາສະຫະລັດ ແລະ ຈໍານວນ 45,000,000 ດົງ.

8. ທ້າວ ອຸດທະລີ ສີງທໍາມະວົງ (ຈໍາເລີຍ 8, ອາຍຸ 43 ປີ, ອາຊີບ ພະນັກງານ (ອາດີດ ຫົວໜ້າຂະ ແໜງບໍລິຫານ ຂື້ນກັບຫ້ອງວ່າການແຂວງ), ປັດຈຸບັນຢູ່ບ້ານ ຫຼັກ3, ເມືອງສາມັກຄີໄຊ, ແຂວງອັດຕະປື ຖືກຫາວ່າ: ການສໍ້ລາດບັງຫຼວງ ໃນສະຖານ ການຍັກຍອກຊັບຂອງລັດ ຫຼື ລວມໝູ່, ການຮັບສິນ ບົນ, ການສວຍໃຊ້ຖານະຕໍາແໜ່ງ, ສິດອໍານາດ, ໜ້າທີ່ເອົາຊັບ ຂອງລັດ, ລວມໝູ່ ຫຼື ບຸກຄົນ. ຕາມມາດຕາ 354, 355, 358 ແລະ 359 ຂອງປະມວນກົດໝາຍອາຍາ, ລົງ ໂທດຕັດອິດສະລະພາບ ທ້າວ ອຸດທະລີ ສີງທໍາມະວົງ(ຈຳເລີຍ8) ທັງໝົດ ຊາວ ປີ ແລະ ປັບໃໝ ຈໍານວນ 1,000,000 ກີບ, ຈໍານວນ 400 ໂດລາສະຫະລັດ ແລະ ຈໍານວນ 30,000,000 ດົງ, ຮິບເງີນຈາກທ້າວ ອຸດທະລີ (ຈໍາເລີຍ8) ຈໍານວນ 100,000,000 ກີບເປັນຂອງລັດ.

9) ນາງ ມະນີສອນ ເພັດວິໄລ (ຈໍາເລີຍ 9), ອາຍຸ 34 ປີ ອາຊີບ ພະນັກງານ (ອາດີດວິຊາການການເງິນຂະແໜງບໍລິຫານ ຂື້ນກັບຫ້ອງວ່າການແຂວງ), ປັດຈຸບັນຢູ່ ບ້ານສາມັກຄີ, ເມືອງສາ ມັກຄີໄຊ, ແຂວງອັດຕະປື ຖືກຫາວ່າ: ການສໍ້ລາດບັງຫຼວງ ໃນສະຖານ ການຍັກຍອກຊັບຂອງລັດ ຫຼື ລວມໝູ່, ການຮັບສິນບົນ, ການສວຍໃຊ້ຖານະຕໍາແໜ່ງ, ສິດອໍານາດ, ໜ້າທີ່ເອົາຊັບ ຂອງລັດ, ລວມໝູ່ ຫຼື ບຸກ ຄົນ, ຕາມມາດຕາ 354, 355, 358 ແລະ 359 ຂອງປະມວນກົດໝາຍອາຍາ, ລົງໂທດ ຕັດອິດສະ ລະພາບ ນາງ ມະນີສອນ ເພັດວິໄລ (ຈໍາເລີຍ 9) ຕະຫຼອດຊີວິດ ແລະ ປັບໃໝ ທັງໝົດ, ຈຳນວນ 1,839,298,031 ກີບ, ຈໍານວນ 400 ໂດລາສະຫະລັດ ແລະ ຈໍານວນ 30,000,000 ດົ້ງ, ຮິບເງີນນາງ ມະນີສອນ ເພັດວິໄລ (ຈໍາເລີຍ 9) ຈຳນວນ 30,000,000 ກີບ ເປັນຂອງລັດ.

10) ນາງ ນິພາພອນ ໂພທິລາດ(ຈໍາເລີຍ 10), ອາຍຸ 34 ປີ, ອາຊີບ ພະນັກງານອາສາສະໝັກຢູ່ຫ້ອງວ່າການແຂວງອັດຕະປື, ປັດຈຸບັນຢູ່ບ້ານ ໂພນສະຫວ່າງ, ເມືອງສາມັກຄີໄຊ, ແຂວງອັດຕະປື ຖືກຫາວ່າ: ການສໍ້ລາດບັງຫຼວງ ໃນສະຖານ ການຍັກຍອກຊັບຂອງລັດ ຫຼື ລວມໝູ່, ການໃຫ້ສິນບົນ, ການຮັບສິນບົນ, ການສວຍໃຊ້ຖານະຕໍາແໜ່ງ, ສິດອໍານາດ, ໜ້າທີ່ເອົາຊັບ ຂອງລັດ, ລວມໝູ່ ຫຼື ບຸກຄົນ ແລະ ການຟອກເງິນ, ຕາມມາດຕາ 354, 355, 357, 358, 359 ແລະ 130 ຂອງປະມວນກົດໝາຍອາຍາ ລົງໂທດ ຕັດອິດສະລະພາບ ນາງ ນິພາພອນ ໂພທິລາດ (ຈໍາເລີຍ10) ຕະຫຼອດຊີວິດ ແລະ ປັບໃໝ ທັງໝົດ ຈຳນວນ 2,353,579,750 ກີບ ແລະ 47,520 ໂດລາສະຫະລັດ.

11) ທ້າວ ແກ້ວພູທອນ ວິລະທໍາ (ຈໍາເລີຍ 11), ອາຍຸ 47 ປີ, ອາຊີບ ພະນັກງານ (ອາດີດຮອງຂະ ແໜງຈັດຕັ້ງ-ບໍລິຫານ ຂື້ນກັບພະແນກການເງິນແຂວງ), ປັດຈຸບັນຢູ່ບ້ານວົງສໍາພັນ, ເມືອງພູວົງ, ແຂວງອັດຕະປື ຖືກຫາວ່າ: ການສໍ້ລາດບັງຫຼວງ ໃນສະຖານ ການຍັກຍອກຊັບຂອງລັດ ຫຼື ລວມໝູ່, ການຮັບສິນບົນ, ການສວຍໃຊ້ຖານະຕໍາແໜ່ງ, ສິດອໍານາດ, ໜ້າທີ່ເອົາຊັບ ຂອງລັດ, ລວມໝູ່ ຫຼື ບຸກ ຄົນ, ຕາມມາດຕາ 354, 355, 358 ແລະ 359 ຂອງປະມວນກົດໝາຍອາຍາ, ລົງໂທດ ຕັດອິດສະ ລະພາບ ທ້າວ ແກ້ວພູທອນ ວິລະທໍາ (ຈໍາເລີຍ11) ສິບຫົກ ປີ ຫົກເດືອນ ແລະ ປັບໃໝ ຈໍານວນ 8,883,770 ກີບ, ຮິບເງິນ ທ້າວ ແກ້ວພູທອນ ວິລະທໍາ (ຈໍາເລີຍ11) ທີ່ໄດ້ຈາກການຮັບສີນບົນ ຈໍານວນ 888,377,000 ກີບ ເປັນຂອງລັດ.

12) ທ້າວ ສຸກສະຫວັນ ບຸນພັນ (ຈໍາເລີຍ12 ), ອາຍຸ 55 ປີ, ອາຊີບ ພະນັກງານ (ອາດີດຮອງຫົວໜ້າຄັງເງິນປະຈໍາແຂວງ), ປັດຈຸບັນຢູ່ບ້ານເມືອງໃໝ່, ເມືອງສາມັກຄີໄຊ, ແຂວງອັດຕະປື. ຖືກຫາວ່າ: ການສໍ້ລາດບັງຫຼວງ ໃນສະຖານ ການຍັກຍອກຊັບຂອງລັດ ຫຼື ລວມໝູ່, ການຮັບສິນບົນ, ການສວຍໃຊ້ຖານະຕໍາແໜ່ງ, ສິດອໍານາດ, ໜ້າທີ່ເອົາຊັບ ຂອງລັດ, ລວມໝູ່ ຫຼື ບຸກຄົນ, ຕາມມາດຕາ 354, 355, 358 ແລະ 359 ຂອງປະມວນກົດໝາຍອາຍາ, ລົງໂທດຕັດອິດສະລະພາບ ທ້າວ ສຸກສະຫວັນ ບຸນພັນ (ຈໍາເລີຍ12) ຫ້າ ປີ ແລະ ປັບໃໝ ຈໍານວນ 1,000,000 ກີບ.

ຮິບເງິນຈາກ ທ້າວ ສຸກສະຫວັນ ບຸນພັນ (ຈໍາເລີຍ12) ຈໍານວນ 100,000,000 ກີບ ເປັນຂອງລັດ.

13) ທ້າວ ພອນພິລຸນ ໄຊສົມບັດ (ຈໍາເລີຍ 13), ອາຍຸ 49 ປີ, ອາຊີບ ພະນັກງານ (ອາດີດຮອງຂະ ແໜງບັນຊີ ແລະ ກວດກາ ຂື້ນກັບຄັງເງິນປະຈໍາແຂວງ), ປັດຈຸບັນຢູ່ບ້ານເມືອງໃໝ່, ເມືອງສາມັກຄີໄຊ, ແຂວງອັດຕະປື ຖືກຫາວ່າ: ການສໍ້ລາດບັງຫຼວງ ໃນສະຖານການຮັບສິນບົນ ຕາມມາດຕາ 354 ແລະ 358 ຂອງປະມວນກົດໝາຍອາຍາ, ລົງໂທດຕັດອິດສະລະພາບ ທ້າວ ພອນພິລຸນ ໄຊສົມບັດ (ຈໍາເລີຍ13) ສອງ ປີ ຫົກ ເດືອນ ໃຫ້ປະຕິບັດຕົວຈິງ ເຈັດ ເດືອນ ສິບເອັດ ວັນ ສ່ວນທີ່ເຫຼືອພາກໄວ້ ແລະ ປັບໃໝ ຈໍານວນ 295,000 ກີບ, ຮິບເງີນຈາກທ້າວ ພອນພິລຸນ ໄຊສົມບັດ (ຈໍາເລີຍ13) ຈໍານວນ 29,500,000 ກີບ ເປັນຂອງລັດ.

14) ນາງ ສິມມະລີ ຄໍາໝັ້ນ(ຈໍາເລີຍ 14), ອາຍຸ 44 ປີ ອາຊີບ ພະນັກງານ ຫ້ອງວ່າການແຂວງ, ປັດຈຸ ບັນຢູ່ບ້ານສາມັກຄີ, ເມືອງສາມັກຄີໄຊ, ແຂວງອັດຕະປື ຖືກຫາວ່າ: ການສໍ້ລາດບັງຫຼວງ ໃນສະຖານ ການຍັກຍອກຊັບຂອງລັດ ຫຼື ລວມໝູ່, ການສວຍໃຊ້ຊັບຂອງລັດ ຫຼື ລວມໝູ່ ແລະ ຄວາມເລິນເລີ້ໃນການປະຕິບັດໜ້າທີ່, ຕາມມາດຕາ 354, 355, 360 ແລະ 368 ຂອງປະມວນກົດໝາຍອາຍາ, ລົງ ໂທດຕັດອິດສະລະພາບ ນາງ ສິມມະລີ ຄໍາໝັ້ນ (ຈໍາເລີຍ14) ສິບແປດ ປີ ຫົກ ເດືອນ ແລະ ປັບໃໝ ຈໍານວນ 10,855,649 ກີບ, ໃຫ້ ມອບເງີນ ຈຳນວນ 200,000,000 ກີບ ທີ່ນາງ ສິມມະລີ ຄໍາໝັ້ນ (ຈໍາເລີຍ14) ໄດ້ມອບເປັນຂອງກາງ ຄືນແກ່ຫ້ອງວ່າການແຂວງ ແລະ ໃຫ້ (ຈຳເລີຍ14) ໃຊ້ແທນເງີນ ຂອງຫ້ອງວ່າການແຂວງ(ທີ່ຍັງບໍ່ທັນມອບ) ຈໍານວນ 292,782,473 ກີບ.

15) ນາງ ພຸດທິດາວັນ ໄກສອນເສນາ (ຈໍາເລີຍ 15), ອາຍຸ 36 ປີ, ອາຊີບ ພະນັກງານພະແນກການເງິນແຂວງ, ປັດຈຸບັນຢູ່ບ້ານໂພນສະຫວ່າງ, ເມືອງສາມັກຄີໄຊ, ແຂວງອັດຕະປື ຖືກຫາວ່າ: ການສໍ້ ລາດບັງຫຼວງ ໃນສະຖານການຍັກຍອກຊັບຂອງລັດ ຫຼື ລວມໝູ່, ການດໍາເນີນທຸລະກິດໂດຍບໍ່ຖືກ ຕ້ອງຕາມກົດໝາຍ ແລະ ການຄິດໄລ່ດອກເບ້ຍສູງ, ຕາມມາດຕາ 354, 355, 297 ແລະ 298 ຂອງປະມວນກົດໝາຍອາຍາ, ລົງໂທດ ຕັດອິດສະລະພາບ ນາງ ພຸດທິດາວັນ ໄກສອນເສນາ (ຈໍາເລີຍ15) ຕະຫຼອດຊີວິດ ແລະ ປັບໃໝ ຈໍານວນ 110,000,000 ກີບ ໃຫ້ ນາງ ພຸດທິດາວັນ ໄກສອນເສນາ (ຈໍາເລີຍ15) ສົ່ງເງີນຈໍານວນ 22,000,000 ກີບ ຄືນແກ່ລັດ.

ພ້ອມນັ້ນແມ່ນໃຫ້ພວກຈຳເລີຍ ຮ່ວມກັນໃຊ້ແທນຄ່າເສຍຫາຍໃຫ້ແກ່(ລັດ) ຈຳນວນ 51,951,708,972 ກີບ , ຈຳນວນ 2,316,000 ໂດລາສະຫະລັດ ແລະ ຈໍານວນ 60,000 ບາດ, ຖ້າວ່າ ພວກຈຳເລີຍ ບໍ່ສາມາດໃຊ້ແທນລັດໄດ້ ກໍ່ໃຫ້ປະກາດຂາຍຊັບທີ່ຢຶດ ແລະ ອາຍັດໄວ້ ເພື່ອເອົາມາໃຊ້ແທນ ຖ້າເຫຼືອກໍ່ໃຫ້ສົ່ງຄືນພວກຈຳເລີຍ, ຖ້າບໍ່ພໍກໍ່ໃຫ້ພວກຈໍາເລີຍ ສືບຕໍ່ຮັບຜິດຊອບໃຊ້ແທນ, ໃຫ້ ພວກຈຳເລີຍ ຮັບຜິດຊອບ ຄ່າໃຊ້ຈ່າຍໃນການດຳເນີນຄະດີຂອງເຈົ້າໜ້າທີ່ສະ ເພາະກິດຂອງແຂວງ, ໃຫ້ ພວກຈຳເລີຍ ຮ່ວມກັນຮັບຜິດຊອບ ຄ່າທຳນຽມສານ.

ສ່ວນທ້າວ ສຸກໃໝ ສຸດບຸນລົ້ນ ໃນໄລຍະດໍາເນີນຄະດີຜູ້ກ່ຽວໄດ້ເສຍຊີວິດ ຈຶ່ງເປັນສາເຫດໃຫ້ຊັດມ້ຽນທາງອາຍາ ຕາມຄໍາສັ່ງ ສະບັບເລກທີ 67/ອກລ.ຂ ລົງວັນທີ 28 ຕຸລາ 2024 ຂອງອົງການຕ້ານການສໍ້ລາດບັງຫຼວງຂັ້ນແຂວງ, ແຕ່ຄວາມເສຍຫາຍທາງແພ່ງແມ່ນໃຫ້ຜູ້ກ່ຽວຮັບ ຜິດຊອບໃຊ້ແທນໃຫ້ແກ່ລັດໂດຍເອົາຊັບຜູ້ກ່ຽວທີ່ໄດ້ຢືດ ແລະ ອາຢັດໄວ້ນັ້ນມາໃຊ້ແທນໃຫ້ແກ່ລັດ.

ທ່ານນາງ ລັດຕະນາ ສິມາວັດ, ຫົວໜ້າຫ້ອງການ ສານປະຊາຊົນແຂວງ ຍັງໄດ້ກ່າວອີກວ່າ: ທັງໝົດທີ່ຖະແຫຼງໄປນັ້ນເປັນການສັງລວມເອົາແຕ່ຜົນຕັດສິນຂອງສານ ເພື່ອຖະແຫຼງຂ່າວ ໃຫ້ມວນຊົນໄດ້ຮັບຊາບ ສ່ວນລາຍລະອຽດແມ່ນຢູ່ໃນຄໍາຕັດສິນ. ພາຍຫຼັງຄະນະສະເພາະກິດໄດ້ເກັບກໍາຂໍ້ມູນແລ້ວເຫັນວ່າ ໄດ້ສ້າງຄວາມເສຍຫາຍຕົວຈິງໃຫ້ແກ່ແຂວງອັດຕະປື ເປັນເງີນ ຈໍານວນ 51,951,708,972 ກີບ, ຈຳນວນ 2,316,000 ໂດລາສະຫະລັດ ແລະ ຈໍານວນ 60,000 ບາດ. ພາຍຫຼັງ ໄດ້ຮັບຄຳສັ່ງຟ້ອງ ຂອງຫົວໜ້າອົງ ການໄອຍະການປະຊາຊົນແຂວງອັດຕະປື, ຄະນະສານອາຍາ ຂອງສານປະຊາຊົນ ແຂວງອັດຕະປື ໄດ້ຄົ້ນຄວ້າບັນດາຂໍ້ມູນຫຼັກຖານຕ່າງໆຢ່າງຮອບດ້ານ ແລະ ໃນວັນທີ 30 ກໍລະກົດ 2026 ເວລາ 8 ໂມງ 00 ນາທີ ທີ່ຫ້ອງປະຊຸມສານຂອງສານປະຊາຊົນ ແຂວງອັດຕະປື ໄດ້ເປີດປະຊຸມສານ ເພື່ອພິຈາລະນາຕັດສີນ ຄະດີອາຍາ ເລກທີ 59/ ຂຕ.ອ, ລົງວັນທີ 17 ມີນາ 2026, ຕາມຄຳຕັດສີນ ເລກທີ 90/ ຂຕ.ອ, ລົງວັນທີ 30 ກໍລະກົດ 2026.

————
©️ຂ່າວສານອອນລາຍ ອັດຕະປື

ປະກາດສ້າງຕັ້ງ ສະມາຄົມສົ່ງເສີມຄຸນຄ່າວັດທະນະທຳລາວ ເພື່ອອະນຸລັກມໍລະດົກຊາດ ແລະ ພັດທະນາສູ່ Soft Power

User

-

July 17, 2026

0

ກອງປະຊຸມປະກາດສ້າງຕັ້ງ “ສະມາຄົມສົ່ງເສີມຄຸນຄ່າວັດທະນະທຳລາວ” (ສຄວລ) ຫຼື Lao Cultural Values Promotion Association (LCVPA) ໄດ້ຈັດຂຶ້ນຢ່າງເປັນທາງການໃນວັນທີ 16 ກໍລະກົດ 2026 ທີ່ນະຄອນຫຼວງວຽງຈັນ ຕາມຂໍ້ຕົກລົງຂອງຄະນະຈັດຕັ້ງສູນກາງພັກ ສະບັບເລກທີ 824/ຄຈສພ, ລົງວັນທີ 23 ມິຖຸນາ 2026 ແລະ ເຄື່ອນໄຫວພາຍໃຕ້ດໍາລັດ 536/ລບ ວ່າດ້ວຍສະມາຄົມ, ໂດຍການໃຫ້ກຽດເຂົ້າຮ່ວມຂອງ ທ່ານ ປອ ວິສຸກ ພົມພິທັກ ຮອງຫົວໜ້າຄະນະຈັດຕັ້ງສູນກາງພັກ, ທ່ານ ຄຳມະນີ ອິນທິລາດ ປະທານທີ່ປຶກສາສະມາຄົມ, ທ່ານ ພູວົງ ພະມີສິດ ຮອງປະທານສູນກາງແນວລາວສ້າງຊາດ (ຜູ້ບໍ່ປະຈໍາການ) ປະທານກິດຕິມະສັກຂອງສະມາຄົມ, ພ້ອມດ້ວຍຜູ້ຊົງຄຸນວຸດທິ, ຜູ້ປະກອບການວັດທະນະທຳ ແລະ ພາກສ່ວນທີ່ກ່ຽວຂ້ອງເຂົ້າຮ່ວມຢ່າງພ້ອມພຽງ.

ທ່ານ ສະຫວັນຄອນ ຣາຊມຸນຕຣີ ປະທານສະມາຄົມສົ່ງເສີມຄຸນຄ່າວັດທະນະທຳລາວ ໄດ້ຂຶ້ນຜ່ານບົດລາຍງານ ໂດຍໄດ້ຍົກໃຫ້ເຫັນເຖິງປະຫວັດສາດ ແລະ ຄວາມເປັນມາອັນຍາວນານຂອງຄວາມສາມັກຄີລະຫວ່າງປະຊາຊົນບັນດາເຜົ່າ ເຊິ່ງເປັນວັດທະນະທຳອັນຍອດຍິ່ງຂອງຊາດ. ທ່ານໄດ້ເນັ້ນໜັກວ່າ ນັບຕັ້ງແຕ່ໄລຍະຕໍ່ສູ້ປົດປ່ອຍຊາດ ຈົນເຖິງຍຸກປ່ຽນແປງໃໝ່ໃນປີ 1986, ພັກ-ລັດ ໄດ້ມີນະໂຍບາຍສົ່ງເສີມວັດທະນະທຳໃຫ້ຊຶມເລິກເຂົ້າສູ່ມວນຊົນ ແລະ ຫັນວັດທະນະທຳມາເປັນທ່າແຮງປາຍແຫຼມໃນການດຶງດູດການທ່ອງທ່ຽວ ຕິດພັນກັບການຜະລິດ ແລະ ບໍລິການດ້ານວັດທະນະທຳ ທີ່ສາມາດດຶງດູດນັກທ່ອງທ່ຽວຕ່າງປະເທດເຂົ້າມາ ສປປ ລາວ ໄດ້ເຖິງ 4-5 ລ້ານຄົນໃນຊຸມປີທີ່ຜ່ານມາ.

ຈາກທ່າແຮງດັ່ງກ່າວ, ຄະນະຂົນຂວາຍຈຶ່ງໄດ້ເຕົ້າໂຮມກັນສ້າງຕັ້ງສະມາຄົມນີ້ຂຶ້ນ ເພື່ອເປັນຕົວແທນປິ່ນອ້ອມໃຫ້ແກ່ຜູ້ປະກອບການ ບົນວິໄສທັດການຍູ້ແຮງວັດທະນະທຳລາວໃຫ້ກາຍເປັນ “ເສດຖະກິດວັດທະນະທຳ” (Culture Economy) ຫຼື “ເສດຖະກິດສ້າງສັນ” (Creative Economy) ແລະ ຫັນເປັນ Soft Power ເພື່ອສ້າງລາຍຮັບໃຫ້ແກ່ປະຊາຊົນ ແລະ ເສດຖະກິດຂອງຊາດ. ນອກນັ້ນ, ໃນຖານະທີ່ ສປປ ລາວ ເປັນສະມາຄົມຂອງອົງການ UNESCO, ສະມາຄົມຈະສຸມໃສ່ການປົກປັກຮັກສາມໍລະດົກວັດທະນະທຳ ຄວບຄູ່ກັບການຍາດແຍ່ງທຶນຮອນ ແລະ ໂຄງການສະໜັບສະໜູນຈາກສາກົນ ເພື່ອຂັບເຄື່ອນວຽກງານວັດທະນະທຳໃຫ້ຕິດພັນກັບການພັດທະນາຍືນຍົງສີຂຽວ ແລະ ເປັນມິດກັບສິ່ງແວດລ້ອມ ພ້ອມທັງຮຽກຮ້ອງທຸກພາກສ່ວນຮ່ວມກັນອຸ້ມຊູສະໜັບສະໜູນ.

ສຳລັບຄະນະບໍລິຫານງານສະມາຄົມສົ່ງເສີມຄຸນຄ່າວັດທະນະທຳລາວ ຊຸດປະຖົມມະລຶກ ປະກອບມີ: ທ່ານ ສະຫວັນຄອນ ຣາຊມຸນຕຣີ ເປັນປະທານສະມາຄົມ; ທ່ານ ຄຳໝັ້ນ ໄຊຍະແສງ ແລະ ທ່ານ ນ. ບຸນມີ ຂັນຕິວົງ ເປັນຮອງປະທານ; ທ່ານ ຂັນທະວົງ ດາລາວົງ ເປັນກຳມະການບໍລິຫານ ທັງເປັນຜູ້ອຳນວຍການ ແລະ ທ່ານ ກໍວິເສດ ພະໄຊສົມບັດ ເປັນກຳມະການບໍລິຫານ.

ລັດຖະບານ ກຳນົດ 8 ຄາດໝາຍ 5 ວຽກຈຸດສຸມ ພັດທະນາຊີວິດການເປັນຢູ່ຂອງປະຊາຊົນ

ຂ່າວພາຍໃນ

User

-

July 10, 2026

0

ລັດຖະບານ ກຳນົດ 8 ຄາດໝາຍ 5 ວຽກຈຸດສຸມ ພັດທະນາຊີວິດການເປັນຢູ່ຂອງປະຊາຊົນ

ໃນວາລະແຫ່ງຊາດ ວ່າດ້ວຍການພັດທະນາຊົນນະບົດ ແລະ ແກ້ໄຂຄວາມທຸກຍາກ ຂອງລັດຖະບານ ໄດ້ກຳນົດ 8 ຄາດໝາຍ, 5 ວຽກຈຸດສູມ, 5 ທິດທາງ ແລະ 5 ຫລັກການ ໃນການຈັດຕັ້ງປະຕິບັດ ເພື່ອສຸມໃສ່ພັດທະນາຊີວິດການເປັນຢູ່ຂອງປະຊາຊົນ ໃຫ້ດີຂຶ້ນເທື່ອລະກ້າວ.

ທ່ານ ມອນໄຊ ລາວມົວຊົ່ງ ຮອງປະທານສະພາແຫ່ງຊາດ ໄດ້ຖະແຫລງຂ່າວ ກ່ຽວກັບການຄົ້ນຄວ້າ, ພິຈາລະນາບົດລາຍງານຂອງລັດຖະບານ ກ່ຽວກັບ “ວາລະແຫ່ງຊາດ ວ່າດ້ວຍການພັດທະນາຊົນນະບົດ ແລະ ແກ້ໄຂຄວາມທຸກຍາກ” ໃນວາລະດຳເນີນກອງປະຊຸມສະໄໝວິສາມັນເທື່ອທີ 1 ຂອງສະພາແຫ່ງຊາດ ຊຸດທີ X ໃນວັນທີ 10 ກໍລະກົດ 2026 ນີ້ວ່າ:

ວາລະແຫ່ງຊາດ ວ່າດ້ວຍການພັດທະນາຊົນນະບົດ ແລະ ແກ້ໄຂຄວາມທຸກຍາກ ຂອງລັດຖະບານ ໄດ້ກຳນົດ 7 ຄາດໝາຍ ເພື່ອຈັດຕັ້ງປະຕິບັດວຽກງານພັດທະນາຊົນນະບົດ ແລະ ແກ້ໄຂຄວາມທຸກ ຍາກຂອງປະຊາຊົນ ຄື: ສູ້ຊົນສ້າງຄອບຄົວພົ້ນທຸກ ໃຫ້ໄດ້ຫລາຍກວ່າ 100.000 ຄອບຄົວ, ສ້າງບ້ານພົ້ນທຸກ ໃຫ້ໄດ້ຫລາຍກວ່າ 1.000 ບ້ານ, ສ້າງເມືອງພົ້ນທຸກ ໃຫ້ໄດ້ຫລາຍກວ່າ 25 ເມືອງ. ໃນນີ້, ສ້າງບ້ານ ຈຸດສຸມຕົວແບບ ໃນການແກ້ໄຂຄວາມທຸກຍາກ ໃຫ້ໄດ້ຢ່າງໜ້ອຍ ແຂວງລະ 4-5 ບ້ານ; ສຸມໃສ່ສ້າງອາຊີບ ແລະ ແຫລ່ງລາຍຮັບ ຂອງປະຊາຊົນ ໃຫ້ມີຄວາມໝັ້ນຄົງ, ພ້ອມທັງເຂົ້າເຖິງການບໍລິການ ດ້ານສາທາລະນຸປະໂພກຂັ້ນພື້ນຖານ; ສຸມໃສ່ພັດທະນາໂຄງລ່າງພື້ນຖານ ແລະ ສິ່ງອໍານວຍຄວາມສະດວກ ເພື່ອຮັບໃຊ້ການດໍາລົງຊີວິດ; ສຸມໃສ່ຈັດສັນພູມລໍາເນົາ ແລະ ອາຊີບໝັ້ນຄົງ ໃຫ້ປະຊາຊົນບັນດາເຜົ່າ, ຫລຸດຜ່ອນການເຄື່ອນຍ້າຍຂອງພົນລະເມືອງແບບຊະຊາຍ; ສ້າງ ແລະ ປັບປຸງລະບົບການເມືອງ ຢູ່ຂັ້ນຮາກຖານ ໃຫ້ມີຄວາມໜັກແໜ້ນ, ເຂັ້ມແຂງ, ສາມາດນໍາພາປະຊາຊົນ, ເປັນເຈົ້າການປົກປັກຮັກສາຄວາມສະຫງົບ ແລະ ຄວາມເປັນລະບຽບຮຽບຮ້ອຍໃນສັງຄົມ ມີຄວາມມຸ່ງໝັ້ນໃນການພັດທະນາຕົນເອງ, ພັດທະນາບ້ານ ແລະ ຊຸມຊົນ ໃຫ້ຫລຸດພົ້ນອອກຈາກຄວາມທຸກຍາກ, ສ້າງໃຫ້ມີຂະບວນການ, ສ້າງວິຊາຊີບໃຫ້ຊາວໜຸ່ມ ໃນຮາກຖານໃຫ້ຫລາຍຂຶ້ນ; ຂົນຂວາຍ ແລະ ຍາດແຍ່ງການລົງທຶນ ທັງພາຍໃນ ແລະ ຕ່າງປະເທດ ເຂົ້າໃນການພັດທະນາຊົນນະບົດຢ່າງມີຈຸດສຸມ, ບໍ່ເອື່ອຍອີງໃສ່ແຕ່ງົບປະມານ ຂອງລັດ ດ້ານດຽວ; ສ້າງ ແລະ ປັບປຸງນິຕິກໍາ, ກົນໄກ ໃນການຈັດຕັ້ງປະຕິບັດວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ ໃຫ້ເປັນລະບົບຄົບຊຸດ, ເຂັ້ມງວດ, ສອດຄ່ອງ, ຮັດກຸມ.

ພ້ອມນີ້, ຍັງໄດ້ກຳນົດ 5 ວຽກຈຸດສຸມ ຄື: ສ້າງອາຊີບ ແລະ ແຫລ່ງລາຍຮັບຂອງປະຊາຊົນ ໃຫ້ມີຄວາມໝັ້ນຄົງ ແລະ ຍືນຍົງ; ພັດທະນາໂຄງລ່າງພື້ນຖານ ແລະ ສິ່ງອໍານວຍຄວາມສະດວກ ຢູ່ເຂດຊົນນະບົດ; ສ້າງຄວາມເຂັ້ມແຂງ ໃຫ້ແກ່ຄະນະກໍາມະການປົກຄອງຕາແສງ, ການຈັດຕັ້ງບ້ານ ແລະ ປະຊາຊົນພາຍໃນບ້ານ; ຂົນຂວາຍ ແລະ ຍາດແຍ່ງ ສຸມການລົງທຶນເຂົ້າໃສ່ການພັດທະນາຢູ່ຊົນນະບົດ; ສ້າງ ແລະ ປັບປຸງນິຕິກໍາ, ກົນໄກ ໃນການຈັດຕັ້ງປະຕິບັດ ວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ ໃຫ້ລະອຽດ, ຈະແຈ້ງກວ່າເກົ່າ.

ສຳລັບ ທິດທາງຂອງວາລະແຫ່ງຊາດສະບັບນີ້ ໄດ້ກຳນົດ 5 ທິດທາງ ຄື: ເລັ່ງຊຸກຍູ້ສົ່ງເສີມ ໃຫ້ປະຊາຊົນຮູ້ທໍາມາຫາກິນແບບໃໝ່, ຈັດຕັ້ງການຜະລິດ ແລະ ຊຸກຍູ້ການຜະລິດກະສິກໍາ ແບບປະສົມປະສານ ເພື່ອໃຫ້ມີສະບຽງອາຫານພຽງພໍ ແລະ ກ້າວໄປສູ່ການຜະລິດເປັນສິນຄ້າ ເພື່ອສ້າງອາຊີບ ແລະ ວຽກເຮັດງານທໍາ ເປັນແຫລ່ງລາຍຮັບທີ່ໝັ້ນຄົງ; ເລັ່ງພັດທະນາໂຄງລ່າງພື້ນຖານ ແລະ ສິ່ງອໍານວຍຄວາມສະດວກຢູ່ຊົນນະບົດ ຢ່າງມີຈຸດສຸມ ເປັນຕົ້ນ ດ້ານຄົມມະນາຄົມ ແລະ ຂົນສົ່ງ, ກະສິກໍາ, ສິ່ງແວດລ້ອມ, ສຶກສາ, ສາທາ, ໄຟຟ້າ, ນໍ້າສະອາດ, ໂທລະຄົມ ແລະ ການສື່ສານ ໃຫ້ສາມາດເຂົ້າເຖິງ ແລະ ນໍາໃຊ້ຢ່າງທົ່ວເຖິງ; ຫັນພະນັກງານລົງກໍ່ສ້າງຮາກຖານການເມືອງ, ພັດທະນາຊົນນະບົດ ແລະ ແກ້ໄຂຄວາມທຸກຍາກ ຕາມພາລະບົດບາດຂອງຂະແໜງການ ພ້ອມທັງກໍ່ສ້າງບຸກຄະລາກອນກັບທີ່ ແລະ ສຸມໃສ່ປັບປຸງລະບົບການເມືອງ ຢູ່ຮາກຖານ ໃຫ້ມີຄວາມເຂັ້ມແຂງ, ໜັກແໜ້ນ ສາມາດນໍາພາວຽກງານຢູ່ຂັ້ນທ້ອງຖິ່ນ ໃຫ້ມີປະສິດທິພາບ ແລະ ປະສິດທິຜົນ; ສຸມທຶນຮອນເຂົ້າໃສ່ການພັດທະນາຢູ່ຊົນນະບົດ ຢ່າງມີຈຸດສຸມ ແລະ ໄປລວງດຽວກັນດ້ວຍການສະໜອງງົບປະມານຂອງລັດ, ການລະດົມ ແລະ ຍາດແຍ່ງຈາກແຫລ່ງທຶນຕ່າງໆ; ເລັ່ງສ້າງ ແລະ ປັບປຸງ ບັນດານິຕິກໍາ, ກົນໄກ ທີ່ກ່ຽວຂ້ອງ ກັບວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ ເພື່ອເອື້ອອໍານວຍໃນການຈັດຕັ້ງປະຕິບັດ ໃຫ້ມີປະສິດທິພາບ ແລະ ປະສິດທິຜົນ. ສ່ວນຫລັກການ ໃນການຈັດຕັ້ງປະຕິບັດວາລະແຫ່ງຊາດ ມີ 5 ຫລັກການ ຄື: ຮັບປະກັນຄວາມເຂັ້ມງວດ-ເດັດຂາດ; ຮັບປະກັນຄວາມໂປ່ງໃສ; ຮັບປະກັນດ້ານວິທະຍາສາດ-ວິຊາການ; ຮັບປະ ກັນຄວາມເປັນມືອາຊີບ ແລະ ຮັບປະກັນຄຸນນະພາບ ແລະ ຄວາມຍືນຍົງ.

ທ່ານ ມອນໄຊ ລາວມົວຊົ່ງ ຍັງໃຫ້ຮູ້ອີກວ່າ: ວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ ບໍ່ແມ່ນໜ້າທີ່ຂອງບຸກຄົນໃດບຸກຄົນໜຶ່ງ ຫລື ຂະແໜງການໃດໜຶ່ງ ແຕ່ມັນແມ່ນ “ຄວາມຮັບຜິດຊອບຮ່ວມກັນ” ຂອງທົ່ວປວງຊົນລາວທັງຊາດ, ສະພາແຫ່ງຊາດ ຊຸດທີ X, ສະພາປະຊາຊົນຂັ້ນແຂວງ, ແນວລາວສ້າງຊາດ, ສະຫະພັນນັກຮົບເກົ່າແຫ່ງຊາດລາວ, ອົງການຈັດຕັ້ງມະຫາຊົນ ເພີ່ມທະວີການຕິດຕາມ, ກວດກາ, ຊຸກຍູ້ການຈັດຕັ້ງປະຕິບັດ ວາລະແຫ່ງຊາດສະບັບນີ້ ຢ່າງເຂັ້ມງວດ ເພື່ອຮັບປະກັນທຸກແຜນວຽກ, ງົບປະມານທຸກຮ່ວງ ຈະໄດ້ຮັບການຈັດຕັ້ງປະຕິບັດຢ່າງໂປ່ງໃສ ແລະ ມີປະສິດທິຜົນ.

6 ເດືອນ ຕົ້ນປີ 2026 (GDP) ຂະຫຍາຍຕົວ ສະເລ່ຍຢູ່ໃນລະດັບ 5% ແລະ ເກັບລາຍຮັບໄດ້ 44,956 ຕື້ກີບ ເທົ່າກັບ 54% ຂອງແຜນການ

Uncategorized

User

-

July 7, 2026

0

6 ເດືອນ ຕົ້ນປີ 2026 (GDP) ຂະຫຍາຍຕົວ ສະເລ່ຍຢູ່ໃນລະດັບ 5% ແລະ ເກັບລາຍຮັບໄດ້ 44,956 ຕື້ກີບ ເທົ່າກັບ 54% ຂອງແຜນການ

ທ່ານ ສອນໄຊ ສີພັນດອນ ນາຍົກລັດຖະມົນແຫ່ງ ສປປ ລາວ ໄດ້ລາຍງານກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ, ແຜນງົບປະມານແຫ່ງລັດ ແລະ ແຜນເງິນຕາ ໃນໄລຍະ 6 ເດືອນຕົ້ນປີ 2026 ແລະ ທິດທາງແຜນການ 6 ເດືອນ ທ້າຍປີ 2026 ຕໍ່ກອງປະຊຸມສະໄໝວິສາມັນ ເທື່ອທີ 1 ຂອງສະພາແຫ່ງຊາດຊຸດທີ X ໃນວັນທີ 6 ກໍລະກົດນີ້, ທີ່ສະພາແຫ່ງຊາດ.

ທ່ານ ສອນໄຊ ສີພັນດອນ ລາຍງານວ່າ: ລັດຖະບານ ໄດ້ເອົາໃຈໃສ່ຊຸກຍູ້ ແລະ ສົ່ງເສີມພາກສ່ວນຕ່າງໆສຸມໃສ່ການຜະລິດ ແລະ ການບໍລິການຕາມທ່າແຮງຂອງຊາດ ແລະ ຂອງທ້ອງຖິ່ນ ຊຶ່ງໄດ້ເຮັດໃຫ້ເສດຖະກິດສືບຕໍ່ຂະຫຍາຍຕົວດີ, ໃນໄລຍະ 6 ເດືອນຕົ້ນປີ 2026 ລວມຍອດຜະລິດຕະພັນພາຍໃນ (GDP) ຂະຫຍາຍຕົວ ສະເລ່ຍຢູ່ໃນລະດັບ 5% (ໃນໄຕມາດ 1 ຂະຫຍາຍຕົວ 5.5% ແລະ ໄຕມາດ 2 ຂະຫຍາຍຕົວ 4.6%) ທຽບໃສ່ໄລຍະດຽວກັນຂອງປີຜ່ານມາ ຂະຫຍາຍຕົວ 4.8%, ຄິດເປັນມູນຄ່າໃນປີ ເທົ່າກັບ 199,987 ຕື້ກີບ ເທົ່າກັບ 48% ຂອງແຜນການ (ມະຕິສະພາ: 417,523 ຕື້ກີບ).
ໃນນີ້, ຂະແໜງກະສິກຳ: ຂະຫຍາຍຕົວ 4.3% ກວມເອົາ 17.4% (ມະຕິສະພາ: ຂະຫຍາຍຕົວ 4.6%, ກວມເອົາ 21.9%); ຂະແໜງອຸດສາຫະກຳ ຂະຫຍາຍຕົວ 5.1% ກວມເອົາ 35.0% (ມະຕິສະພາ: ຂະຫຍາຍຕົວ 5.1%, ກວມເອົາ 31.1%); ຂະແໜງບໍລິການ ຂະຫຍາຍຕົວ 5.3% ກວມເອົາ 37.2% (ມະຕິສະພາ: ຂະຫຍາຍຕົວ 6.6%, ກວມເອົາ 36.6%) ແລະ ພາສີ-ອາກອນຜະລິດຕະພັນສຸດທິ ຂະຫຍາຍຕົວ 4.9% ກວມເອົາ 10.5% (ມະຕິສະພາ: ຂະຫຍາຍຕົວ 4%, ກວມເອົາ 10.4%).

ຂະແໜງການທີ່ຂະຫຍາຍຕົວດີ ແມ່ນຂະແໜງການບໍລິການຮ້ານອາຫານ ແລະ ທີ່ພັກອາໄສຕິດພັນກັບການທ່ອງທ່ຽວ, ການຂົນສົ່ງ, ການຂາຍຍົກ ຂາຍຍ່ອຍ, ການກໍ່ສ້າງ ແລະ ອຸດສະຫະກຳປຸງແຕ່ງອື່ນໆ (ການປຸງແຕ່ງໄມ້, ເຈ້ຍ, ການປຸງ ແຕ່ງໂລຫະ, ອະໂລຫະ, ເຄື່ອງກົນຈັກ ແລະ ອຸປະກອນຕ່າງໆ). ສໍາລັບ GDP ຕໍ່ຫົວຄົນ ແລະ GNI ຕໍ່ຫົວຄົນ ຈະສາມາດລາຍງານໄດ້ໃນທ້າຍປີ 2026.
ສໍາລັບການປະຕິບັດແຜນງົບປະມານແຫ່ງລັດ ໄດ້ສຸມໃສ່ປະຕິບັດມາດຕະການຕ່າງໆ ເພື່ອຊຸກຍູ້ໃຫ້ແກ່ການປະຕິບັດແຜນງົບປະມານ ໂດຍສະເພາະການເກັບລາຍຮັບໃຫ້ໄດ້ຕາມແຜນ ຫຼື ເກີນແຜນ ທີ່ສະພາແຫ່ງຊາດຮັບຮອງ. ໃນນັ້ນ, ໄດ້ສຸມໃສ່ຂະຫຍາຍຖານລາຍຮັບ ແລະ ຫັນເປັນທັນສະໄໝການຄຸ້ມຄອງງົບປະມານ ຕາມມະຕິ 04/ລບ ວ່າດ້ວຍການຮັບຮອງແຜນປະຕິບັດຕົວຈິງ ການຫັນການເກັບລາຍຮັບເປັນທັນສະໄໝ ໃນໄລຍະ 5 ປີ (2026-2030). ໄປຄຽງຄູ່ກັບການປະຕິບັດມາດຕະການອັດຊ່ອງຫວ່າງການຮົ່ວໄຫຼໃນການຈັດເກັບລາຍຮັບງົບປະມານ. ໃນນີ້, ສິ່ງທີ່ພົ້ນເດັ່ນບາງຂະແໜງການໄດ້ຂະຫຍາຍຕົວເຮັດໃຫ້ມີພັນທະເພີ່ມຂຶ້ນ ໂດຍສະເພາະກິດຈະການກຸ່ມບໍ່ແຮ່ ເພີ່ມຂຶ້ນ 36%, ຂົນສົ່ງ ແລະ ສາງສິນຄ້າ 32%, ພາຫະນະ 30% ປະເພດອາກອນຈັດເກັບໄດ້ຫຼາຍ ອາກອນກໍາໄລ ເພີ່ມຂຶ້ນ 24% ເປັນເງິນ 1,453 ຕື້ກີບ; ອາກອນມູນຄ່າເພີ່ມ ເພີ່ມຂຶ້ນ 18.6% ເປັນເງິນ 782 ຕື້ກີບ; ຄ່າຊັບພະຍາກອນ ເພີ່ມຂຶ້ນ 34% ເປັນເງິນ 915 ຕື້ກີບ; ຄ່າທຳນຽມທາງໄດ້ 107 ກວ່າຕື້ກີບ ເພີ່ມຂຶ້ນ 16%; ລາຍຮັບອາກອນທີ່ດິນ ໄດ້ 134 ຕື້ກີບ ເພີ່ມຂຶ້ນ 4%.

ນອກຈາກນັ້ນ, ໄດ້ລົງເລິກເກັບລາຍຮັບບັນດາຫົວໜ່ວຍທຸລະກິດ ຂະໜາດໃຫຍ່ ໂດຍສະເພາະຜູ້ຮັບເໝົາຫຼັກ, ຜູ້ຮັບເໝົາຊ່ວງຕໍ່ບັນດາໂຄງການໄຟຟ້າ, ບໍ່ແຮ່ ແລະ ລາຍຮັບຈາກການຕ້ານ ແລະ ສະກັດກັ້ນການລັກລອບໜີ້ພາສີ ໄດ້ 9 ຕື້ກີບ, ໄດ້ເຮັດໃຫ້ລາຍຮັບງົບປະມານມີທ່າອ່ຽງເພີ່ມຂຶ້ນ, ໃນວຽກງານງົບປະມານແຫ່ງລັດມີ 3 ຕົວຊີ້ບອກຕົ້ນຕໍ ຊຶ່ງຄາດວ່າຈະສາມາດປະຕິບັດໄດ້ຕາມຄາດໝາຍທີ່ ສະພາຮັບຮອງ. ໃນ 6 ເດືອນຕົ້ນປີ ສາມາດເກັບລາຍຮັບໄດ້ 44,956 ຕື້ກີບ ເທົ່າກັບ 54% ຂອງແຜນການ, ທຽບໃສ່ໄລຍະດຽວກັນເພີ່ມຂຶ້ນ 19% ເປັນເງິນປະມານ 7,198 ຕື້ກີບ (ແຜນການ: 83,600 ຕື້ກີບ). ໃນນັ້ນ, ລາຍຮັບພາຍໃນປະຕິບັດໄດ້ 43,970 ຕື້ກີບ ເທົ່າກັບ 56% ຂອງແຜນການປີ (ສູນກາງປະຕິບັດໄດ້ 31,531 ຕື້ກີບ ເທົ່າກັບ 58% ຂອງແຜນການປີ ແລະ ທ້ອງຖິ່ນປະຕິບັດໄດ້ 12,439 ຕື້ກີບ ເທົ່າກັບ 52%).

ອັດຕະປື ແຈ້ງຫ້າມຊື້-ຂາຍ ໝູຊີ້ນ (ໝູໜ້າຟາມ) ຕໍ່າ ຫຼື ສູງກວ່າ ລາຄາຕົ້ນທຶນການລ້ຽງ

Uncategorized

User

-

July 1, 2026

0

ອັດຕະປື ແຈ້ງຫ້າມຊື້-ຂາຍ ໝູຊີ້ນ (ໝູໜ້າຟາມ) ຕໍ່າ ຫຼື ສູງກວ່າ ລາຄາຕົ້ນທຶນການລ້ຽງ

ວັນທີ 30 ມິຖຸນາ 2026 ທີ່ພະແນກອຸດສາຫະກຳ ແລະ ການຄ້າແຂວງອັດຕະປື ໄດ້ຈັດກອງປະຊຸມ ເຜີຍແຜ່ ແຈ້ງການສະບັບເລກທີ 0786/ຫກ, ເຜີຍແຜ່ ຄໍາແນະນໍາ ເລກທີ 0609/ກຄພນ ເລື່ອງ ຫ້າມຊື້-ຂາຍ ໝູຊີ້ນ (ໝູເປັນໜ້າຟາມ) ຕໍ່າກວ່າ-ສູງກວ່າ ຕົ້ນທຶນການລ້ຽງ ແລະ ບັນດາເອກະສານທີ່ຕິດພັນກັບວຽກງານການສ້າງໂຄງປະກອບລາຄາ ເພື່ອປົກປ້ອງສິດຜົນປະໂຫຍດຂອງຜູ້ບໍລິໂພກ.
ໂດຍການເປັນປະທານຂອງ ທ່ານ ພູໄຊ ວໍລະລາດ ຮອງຫົວໜ້າພະແນກອຸດສາຫະກຳ ແລະ ການຄ້າ ແຂວງອັດຕະປື, ມີຫ້ອງການອຸດສາຫະກຳ ແລະ ການຄ້າ 5 ເມືອງ ພ້ອມດ້ວຍຕົວແທນນໍາເຂົ້າໝູ ແລະ ເຈົ້າຂອງຟາມໝູ ເຂົ້າຮ່ວມ.

ກອງປະຊຸມຜູ້ເຂົ້າຮ່ວມໄດ້ຮັບຟັງການ ເຜີຍແຜ່ ແຈ້ງການສະບັບເລກທີ 0786/ຫກ ເລື່ອງ: ຫ້າມຊື້-ຂາຍ ໝູຊີ້ນ (ໝູເປັນໜ້າຟາມ) ຕໍ່າກວ່າ-ສູງກວ່າ ຕົ້ນທຶນການລ້ຽງ ໂດຍເນື້ອໃນໄດ້ລະບຸໄວ້ວ່າ:
ເພື່ອເປັນການຈັດຕັ້ງປະຕິບັດ ແລະ ຜັນຂະຫຍາຍເນື້ອໃນ ມາດຕາ 6 ຂອງດໍາລັດ ວ່າດ້ວຍການຄຸ້ມ ຄອງລາຄາສິນຄ້າ ແລະ ຄ່າບໍລິການ ກ່ຽວກັບການປະຕິບັດບັນດາມາດຕະການຄວບຄຸມລາຄາ ແລະ ມາດຕະການກຳນົດລາຄາສູງສຸດ, ລາຄາຕໍ່າສຸດ ຫຼື ຂອບເຂດລາຄາ ເພື່ອຮັກສາສະຖຽນລະພາບທາງດ້ານລາຄາ ຂອງຊີ້ນໝູ ໃນທ້ອງຕະຫຼາດ ທັງເປັນການປົກປ້ອງ ແລະ ຊຸກຍູ້ສົ່ງເສີມຜູ້ປະກອບການຜະລິດ/ລ້ຽງໝູຊີ້ນ ໃຫ້ມີຄວາມໝັ້ນຄົງ, ຮັບປະກັນການສະໜອງຊີ້ນໝູ ໃຫ້ແກ່ຕະຫຼາດ ກໍຄືສັງຄົມຢ່າງພຽງພໍ ແລະ ລາຄາເໝາະສົມ ຕາມກົນໄກຕະຫຼາດ ໃນແຕ່ລະໄລຍະ ແລະ ຮັບຟັງ ຄຳແນະນຳ ການຈັດຕັ້ງປະຕິບັດແຈ້ງການ ກ່ຽວກັບຫ້າມຊື້-ຂາຍ ໝູຊີ້ນ(ໝູເປັນໜ້າຟາມ) ຕໍ່າກວ່າຕົ້ນທຶນການລ້ຽງ ສະບັບເລກທີ 0786/ຫກ

ໃນນັ້ນ, ການກໍານົດລາຄາໜ້າຟາມ ຫ້າມຜູ້ປະກອບການລ້ຽງໝູ ແລະ ນາຍຮ້ອຍ ຊື້-ຂາຍ ໝູຊີ້ນ (ໝູເປັນໜ້າຟາມ) ໃນລາຄາທີ່ ຕໍ່າກວ່າ ຫຼື ສູງກວ່າ ໂຄງປະກອບລາຄາຕົ້ນທຶນ ທີ່ຂະແໜງກະສິກຳ ແລະ ສິ່ງແວດລ້ອມ ຄິດໄລ່ ແລະ ຢັ້ງຢືນອອກໃນແຕ່ລະເດືອນ ຢ່າງເດັດຂາດ, ຊຶ່ງໝູຊີ້ນ (ໝູເປັນໜ້າຟາມ) ທີ່ນໍາມາຄິດໄລ່ ແລະ ຢັ້ງຢືນໂຄງປະກອບລາຄາຕົ້ນທຶນເພື່ອກຳນົດ ລາຄາຂາຍໜ້າຟາມ ແມ່ນໝູຊີ້ນທີ່ມີນໍ້າໜັກ ແຕ່ 100 ຫາ 120 ກິໂລ.

ສ່ວນໝູຊີ້ນທີ່ມີນໍ້າໜັກຫຼຸດ ຫຼື ເກີນ ທີ່ໄດ້ກໍານົດໄວ້ນີ້ ແມ່ນໃຫ້ອີງຕາມການຕົກລົງລາຄາກັນເອງ ລະຫວ່າງ ຜູ້ຊື້ ແລະ ຜູ້ຂາຍ, ຮັບຟັງການເຜີຍແຜ່ ການຄຸ້ມຄອງ, ການຈັດຕັ້ງປະຕິບັດດ້ານວິຊາການ ໃນ ການການຄິດໄລ່ໂຄງປະກອບລາຄາ ຕົ້ນທຶນ / ຕົ້ນທາງ ການຜະລິດ ແລະ ການນໍາເຂົ້າ ໝູ ແລະ ຊາກໝູ ທີ່ຂະ ແໜງກະສິກຳ ແລະ ສິ່ງແວດລ້ອມ ຈັດຕັ້ງປະຕິບັດ, ລາຍງານການຄຸ້ມຄອງ, ການຈັດຕັ້ງປະຕິບັດການຄິດໄລ່ ໂຄງສ້າງລາຄາ ຊີ້ນໝູ ໜ້າຂຽງ ໃນຂອດການຈໍາໜ່າຍ ຂາຍຍົກ-ຂາຍຍ່ອຍ.