ຕາມການລາຍງານຂອງສູນຂ່າວສານການແພດສຸຂະສຶກສາ
ຍັງບໍ່ມີທ່າທີ່ຈະຫຼຸດລົງຈາກ 2000 ເຊິ່ງນະຄອນຫຼວງວຽງຈັນແມ່ນມີຜູ້ຕິດເຊື້ອໃໝ່ສູງສຸດລຽນກັນຫຼາຍມື້ແລ້ວ.
ພະຍາກອນອາກາດ ປະຈໍາວັນທີ 24 ມີນາ 2022
ພະຍາກອນອາກາດ ປະຈໍາວັນທີ 24 ມີນາ 2022 ອອກຂ່າວເວລາ 16 ໂມງ 00
ພະຍາກອນອາກາດ ປະຈໍາວັນທີ່ ວັນທີ 24 ມີນາ 2022 ບໍລິເວນຄວາມກົດດັນຂອງອາກາດຮ້ອນ ຍັງສືບຕໍ່ປົກຄຸມຢູ່ທົ່ວທຸກພາກຂອງປະເທດລາວດ້ວຍກໍາລັງອ່ອນ, ສົມທົບກັບກະແສລົມ ຕາເວັນຕົກສ່ຽງໃຕ້ພັດປົກຄຸມພາກເໜືອ ແລະ ກະແສລົມຕາເວັນອອກສ່ຽງໃຕ້ພັດປົກຄຸມພາກກາງ ແລະ ພາກໃຕ້.
ຊຶ່ງຈະເຮັດໃຫ້ມີຝົນຕົກ ຟ້າຮ້ອງ ຟ້າເຫຼື້ອມໃນລະດັບຄ່ອຍຢູ່ເກືອບທົ່ວໄປໃນແຕ່ລະພາກ ແລະ ຕົກໃນລະດັບປານກາງ ພ້ອມມີລົມພັດແຮງຢູ່ບາງທ້ອງຖິ່ນ.
ຮອງລັດຖະມົນຕີກະຊວງການເງິນ ຊຸກຍູ້ການຜັນຂະຫຍາຍ ວາລະແຫ່ງຊາດ ແລະ ແຜນງົບປະມານແຫ່ງລັດ
ໃນວັນທີ 23 ມີນາ 2022 ນີ້, ທ່ານ ບຸນເຫລືອ ສິນໄຊວໍຣະວົງຮອງລັດຖະມົນຕີກະຊວງການເງິນ ພ້ອມຄະນະ ໄດ້ລົງຊຸກຍູ້ການຈັດຕັ້ງຜັນຂະຫຍາຍວາລະແຫ່ງຊາດ ແລະ ແຜນງົບປະມານແຫ່ງລັດປະຈໍາປີ 2022 ຢູ່ນະຄອນຫລວງວຽງຈັນ(ນວ) ໂດຍມີ ທ່ານ ພູຂົງ ບັນນະວົງ ຮອງເຈົ້າຄອງນະຄອນຫລວງວຽງຈັນ, ມີຫົວໜ້າກົມ-ຮອງກົມກ່ຽວຂ້ອງອ້ອມຂ້າງກະຊວງການເງິນ, ຫົວໜ້າ-ຮອງຫົວໜ້າພະແນກກການເງິນ, ຫົວໜ້າ 3 ຂະແໜງສາຍຕັັ້ງປະຈໍານະຄອນຫລວງວຽງຈັນ ແລະ ພະນັກງານຫລັກແຫລ່ງຂອງຂະແໜງການເງິນ ເຂົ້າຮ່ວມ.
ໂອກາດນີ້, ທ່ານ ສີລິລາດ ທົງສິນທອງເພັງ ຫົວໜ້າພະແນກການເງິນນະຄອນ ຫລວງວຽງຈັນ ໄດ້ລາຍງານສະພາບໂດຍລວມກ່ຽວກັບ ການຈັດຕັ້ງຜັນຂະຫຍາຍໂດຍອີງໃສ່ມະຕິຂອງສະພາແຫ່ງຊາດຊຸດທີ IX, ມະຕິຂອງລັດຖະບານ ວ່າດ້ວຍການແບ່ງຄວາມຮັບຜິດຊອບໃນການຈັດຕັັ້ງຜັນຂະຫຍາຍມະຕິຂອງສະພາແຫ່ງຊາດ ກ່ຽວກັບການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ, ແຈ້ງການຂອງຫ້ອງວ່າການສໍານັກງານນາຍົກລັດຖະມົນຕີ, ນະຄອນຫລວງວຽງຈັນໄດ້ອອກຂໍ້ຕົກລົງ ວ່າດ້ວຍການຮັບ ຮອງ ແລະ ແບ່ງຄວາມຮັບຜິດຊອບຈັດຕັັ້ງປະຕິບັດ ແຜນຜັນຂະຫຍາຍວາລະແຫ່ງຊາດກ່ຽວກັບ ການແກ້ໄຂຄວາມຫຍຸ້ງຍາກ ທາງດ້ານເສດຖະກິດ-ການເງິນຂອງນະຄອນ ຫລວງວຽງຈັນ, ພ້ອມທັງໄດ້ແຕ່ງຕັັ້ງຄະນະຮັບຜິດຊອບການຈັດຕັັ້ງປະຕິບັດມາດຕະການວຽກຈຸດສຸມຂອງຂະແໜງການເງິນ, ໃນແຜນຜັນຂະຫຍາຍວາລະແຫ່ງຊາດຊາດ ກ່ຽວກັບການແກ້ໄຂຄວາມຫຍຸ້ງຍາກ ທາງດ້ານເສດຖະກິດ-ການເງິນ ໂດຍມອບໃຫ້ບັນດາຂະແໜງການ ແລະສາມຂະແໜງສາຍຕັັ້ງຜັນຂະຫຍາຍ ໃຫ້ເປັນອັນລະອຽດ.
ຜ່ານການຈັດຕັັ້ງປະຕິບັດແຜນປີ 2022 ສາມາດສັງລວມການຈັດຕັັ້ງປະຕິບັດມາຮອດວັນທີ 22 ມີນາ 2022 ສາມາດປະຕິບັດລາຍຮັບໄດ້ທັງໝົດ 906,76 ຕື້ກີບເທົ່າກັບ 16,26% ຂອງແຜນການປີ. ໃນນີ້, ລາຍຮັບພູດສູນກາງປະຕິບັດໄດ້ 589,52 ຕື້ກີບ ເທົ່າກັບ 14,38% ຂອງແຜນການປີ, ລາຍຮັບທ້ອງຖິ່ນ ນວ ປະຕິບັດໄດ້ທັງໝົດ 317,24 ຕື້ກີບເທົ່າກັບ 21,49% ຂອງແຜນການປີ. ພ້ອມກັນນີ້, ກໍໄກ້ສຸມໃສ່ການປັບປຸງກົງຈັກການຈັດຕັ້ງ, ຂຸດຄົ້ນແຫລ່ງລາຍຮັບທີ່ເປັນທ່າແຮງບົ່ມຊ້ອນໃນການເກັບລາຍຮັບ, ຜັນຂະຫຍາຍວຽກງານການຂະຫຍາຍຖານລາຍຮັບສ່ວຍສາອາກອນ ແລະ ຂະຫຍາຍລະບົບ TaxRIS, ຫັນຫົວໜ່ວຍທຸລະກິດເຂົ້າໃນລະບົບອາກອນມູນຄ່າເພີ່ມ,ດຳເນີນການວຽກແກ້ໄຂລົດນໍາເຂົ້າບໍ່ຖືກຕ້ອງ, ຄຸ້ມຄອງພະຫະນະລັດບໍລິຫານ, ເຂັ້ມງວດການອັດຊ່ອງວ່າງການຮົ່ວໄຫລຂອງລາຍຮັບ ຈາກການນໍາເຂົ້າສິນຄ້າປະເພດເຄື່ອງກໍ່ສ້າງ, ເຄື່ອງໃຊ້ໄຟຟ້າ, ການອັດຊ່ອງວ່າງການຮົ່ວໄຫລຂອງລາຍຮັບຈາກການ ນໍາເຂົ້ານໍ້າມັນເຊື້ອໄຟ ແລະ ຊຸກຍູ້ສົ່ງເສີມອໍານວຍຄວາມສະດວກດ້ານພາສີ-ອາກອນ ຕໍ່ຫົວໜ່ວຍທຸລະກິດນໍາເຂົ້າ-ສົ່ງອອກສິນຄ້າ ແລະ ເຄື່ອງຂອງຕາມຄໍາແນະນໍາຂອງກະຊວງການເງິນສະບັບເລກທີ 4490/ກງ ແລະ ຕາມແຈ້ງການຂອງກະຊວງການເງິນສະບັບເລກທີ 4491/ກງ ຕື່ມອີກ.
ພ້ອມນີ້, ຍັງໄດ້ຮັບຟັງການປະກອບຄຳເຫັນຈາກ ຫົວໜ້າກົມຕ່າງໆທີ່ມາຈາກກະຊວງການເງິນ ໂດຍຍົກໃຫ້ເຫັນແບບແຜນ, ວີທີການ, ມາດຕະການການຈັດເກັບລາຍຮັບທີ່ຈະເປັນບ່ອນອີງ ແນໃສ່ການແກ້ໄຂບັນຫາຂໍ້ຄົງຄ້າງໃນປີຜ່ານມາ ແລະ ຖືເອົາບັນຫາກ່ຽວກັບການຜັນຂະຫຍາຍວາລະແຫ່ງຊາດ ໃນການແກ້ໄຂຄວາມຫຸ້ຍງຍາກທາງດ້ານເສດຖະກິດ-ການເງິນ ທີ່ຕິດພັນກັບການຈັດຕັ້ງປະຕິບັດແຜນງົບປະມານແຫ່ງລັດໃນປີ 2022 ສອດຄ່ອງກັບເງື່ອນໄຂທ່າແຮງບົ່ມຊ້ອນໃນດ້ານຕ່າງໆ.
ໂອກາດນີ້, ທ່ານ ບຸນເຫລືອ ສິນໄຊວໍລະວົງ ແລະ ທ່ານ ພູຂົງ ບັນນະວົງ ກໍໄດ້ຮ່ວມບົດບັນທຶກກ່ຽວກັບ ບັນດາມາດຕະການຊຸກຍູ້ການຈັດຕັັ້ງປະຕິບັດວາລະແຫ່ງຊາດ ແລະ ແຜນງົບປະມານແຫ່ງລັດປີ 2022 ແລະ ການປັບປຸງກົງຈັກການຈັດຕັັ້ງຂອງຂະແໜງການເງິນຂັັ້ນທ້ອງຖິິ່ນຂອງນະຄອນຫລວງວຽງຈັນ ໂດຍມີບັນດາຫົວໜ້າກົມ-ຮອງກົມກ່ຽວຂ້ອງອ້ອມຂ້າງກະຊວງການເງິນ, ຫົວໜ້າ-ຮອງຫົວໜ້າພະແນກກການເງິນ, ຫົວໜ້າ 3 ຂະແໜງສາຍຕັັ້ງປະຈໍານະຄອນຫລວງວຽງຈັນ ເຂົ້າຮ່ວມ.
ແຫຼ່ງຂ່າວ: ປະເທດລາວ
ອ່ານເບິ່ງເງື່ອນໄຂ ການໄປຮັບເຂັມກະຕຸ້ນ (ເຂັມ 3 ແລະ ເຂັມ 4)
ເພື່ອເຮັດໃຫ້ການຈັດຕັ້ງປະຕິບັດສັກວັກຊີນປ້ອງກັນໂຄວິດ-19 ໃຫ້ບັນລຸຄາດໝາຍ ແລະ ເພື່ອກະຕຸ້ນການສ້າງພູມຄຸ້ມຮ່າງກາຍໃຫ້ຕໍ່ເນື່ອງ, ຫຼຸດຜ່ອນອາການຮຸນແຮງ ໃນເວລາຕິດເຊື້ອ ຂອງພະຍາດໂຄວິດ-19, ກົມອະນາໄມ-ສົ່ງເສີມສຸຂະພາບ ຈຶ່ງອອກແຈ້ງການແນະນຳດ້ານວິຊາການ ດັ່ງລຸ່ມນີ້:
1. ກົມອະນາໄມ-ສົ່ງເສີມສຸຂະພາບ ຂໍແຈ້ງມາຍັງທ່ານຫົວໜ້າພະແນກສາທາລະນະສຸກນະຄອນຫຼວງ ແລະ ພະແນກສາທາລະນະສຸກແຂວງ 17 ແຂວງ ໃຫ້ຊາບກ່ຽວກັບການສັກວັກຊີນກັນພະຍາດໂຄວິດ-19 ເຂັ້ມກະຕຸ້ນຮອບ ທີ2 (ເຂັ້ມ4) ໃຫ້ແກ່ກຸ່ມເປົ້າໝາຍບຸລິມະສິດ ແລະ ກຸ່ມທົ່ວໄປແຕ່ອາຍຸ 18 ປີ ຂື້ນໄປ.
2. ໃຫ້ບໍລິການ ສັກວັກຊີນ ໂຄວິດ-19 ສັກເຂັມກະຕຸ້ນຮອບທີ2 (ເຂັ້ມ4) ພາຍຫຼັງໄດ້ຮັບເຂັ້ມກະຕຸ້ນຮອບ1 (ເຂັມ3) ເຊິ່ງຫ່າງກັນ 3 ເດືອນຂຶ້ນໄປ ໃຫ້ກຸ່ມເປົ້າໝາຍທີ່ເປັນບຸລິມະສິດເຊັ່ນ:
- ກຸ່ມພະນັກງານສາທາລະນະສຸກ
- ກຸ່ມພະນັກງານທີ່ເຮັດວຽກປ້ອມດ່ານຫນ້າທີ່ມີຄວາມສ່ຽງ ເຊັ່ນ: ພະນັກງານການທູດ, ຜູ້ເດີນທາງເຂົ້າ-ອອກ, ພະນັກງານເຮັດວຽກຢູ່ດ່ານຊາຍແດນ, ກຳລັງປ້ອງກັນຊາດ ປ້ອງກັນຄວາມສະຫງົບ ພະນັກງານກະຊວງຕ່າງໆ ແລະ ອົງການບໍລິການທີ່ເຮັດວຽກກັບຄົນຫຼາຍຄົນ ລວມທັງທະນາຄານ, ທ່ອງທ່ຽວ, ໂຮງຈັກໂຮງງານ ແລະ ອື່ນໆ
- ກຸ່ມຄົນທີ່ມີພະຍາດພູມຄຸ້ມກັນບົກຜ່ອງ ຫຼື ມີພະຍາດປະຈຳໂຕ ລວມທັງຜູ້ສູງອາຍຸ 60 ປີ ຂື້ນໄປ
3. ເງື່ອນໄຂຜູ້ທີ່ຈະສັກເຂັ້ມກະຕຸ້ນຮອບທີ2 (ເຂັມ4) ຢູ່ ສປປ ລາວ
- ຜູ້ທີ່ໄດ້ຮັບວັກຊີນ J&J ຫລື Sputnik Light ຫນື່ງເຂັ້ມ ຄົບ 2 ເຂັ້ມ ໄດ້ສອງເດືອນຂຶ້ນໄປ ສາມາດສັກວັກຊິນ AstraZeneca ຫລື Pfizer ເປັນເຂັມກະຕຸ້ນທີ່ຫນື່ງ ແລະ ພາຍຫລັງເຂັມກະຕຸ້ນຫນຶ່ງໄດ້ສາມເດືອນຂື້ນໄປ ສາມາດຮັບວັກຊິນເຂັ້ມກະຕຸ້ນທີ່ສອງໄດ້ໄດ້ຮັບວັກຊິນ Sinopharm/Sinovac ຄົບ 2 ເຂັ້ມ ໄດ້ສອງເດືອນຂຶ້ນໄປ ຄວນສັກວັກຊິນ ເຂັ້ມກະຕຸ້ນຮອບທີ 1 AstraZeneda ຫລື Pfizer ແລະ ພາຍຫລັງເຂັ້ມກະຕຸ້ນຫນຶ່ງໄດ້ສາມເດືອນຂື້ນໄປສາມາດຮັບວັກຊິນ ເຂັ້ມກະຕຸ້ນທີສອງໄດ້.
- ຜູ້ທີ່ໄດ້ຮັບວັກຊິນ Sputnik V, AstraZeneda ຫລື Pfizer ຄົບ 2 ເຂັ້ມ ໄດ້ສາມເດືອນຂຶ້ນໄປ ສາມາດສັກວັກຊິນ ເຂັ້ມກະຕຸ້ນຮອບທີ 1 ໃຊ້ວັກຊິນ AstraZeneca ຫລື Pfizer ແລະ ພາຍຫລັງເຂັ້ມກະຕຸ້ນຮອບນຶ່ງ (ເຂັ້ມ3)ສາມເດືອນຂື້ນໄປສາມາດຮັບວັກຊິນເຂັ້ມກະຕຸ້ນທີ່ສອງ (ເຂັມ4) AstraZeneda ຫລື Pfizer ໄດ້ວັກຊີນທີ່ຈະໄດ້ຮັບໃນໄລຍະນີ້ແມ່ນວັກຊີນ AstraZeneda ຫຼື Pfizer ລາຍລະອຽດແມ່ນ ໃຫ້ກວດເບິ່ງ ປະຫວັດການ ຮັບວັກຊີນຜ່ານມາ ແລະ ອີງໃສ່ຄູ່ມືຕາຕະລາງການໃຫ້ວັກຊີນ
- ສຳລັບຜູ້ທີ່ຕິດເຊື້ອພະຍາດໂຄວິດ-19 ພາຍຫຼັງປິ່ນປົວດີແລ້ວ 2 ເດືອນ ສາມາດມາຮັບວັກຊີນໂຄວິດໄດ້ເລີຍບໍ່ວ່າ ຈະເປັນເຂັມ 1, ເຂັ້ມ 2 ຫຼື ເຂັ້ມກະຕຸ້ນກໍຕາມໂດຍອີງໃສ່ຕາຕະລາງການໃຫ້ວັກຊີນຜ່ານມາ
- ສຳລັບກຸ່ມອາຍຸ 12-17 ປີ ແມ່ນໃຫ້ສັກເຂັ້ມກະຕຸ້ນຮອບ 1 (ເຂັມ3) ໃນໄລຍະນີ້ແມ່ນອະນຸຍາດໃຫ້ແຕ່ໃຊ້ວັກຊີນ Pfizer ເທົ່ານັ້ນ ໃນສະເພາະແຂວງ ຫຼື ເມືອງທີ່ມີເງື່ອນໄຂໃຊ້ວັກຊີນຊະນິດນີ້.
- ສຳລັບໂຮງຫມໍ ທີ່ຢູ່ຫ່າງໄກ ເດີນທາງໄປມາຫຍຸ້ງຍາກ ສຳລັບກຸ່ມອາຍຸ 12-17 ປີ ແມ່ນໃຫ້ໃຊ້ວັກຊີນ Sinopharm/Sinovac ເປັນເຂັ້ມກະຕຸ້ນ.
- ສໍາຄັນໃນກຸ່ມອາຍຸ 12-17 ປີ ແມ່ນຍັງບໍ່ອະນຸຍາດໃຫ້ສັກວັກຊີນເຂັ້ມກະຕຸ້ນຮອບ 2 (ເຂັມ4) ຢ່າງເດັດຂາດ.
4. ການສັກວັກຊີນເຂັ້ມກະຕຸ້ນຮອບ 1 (ເຂັມ 3) ແລະ ເຂັ້ມກະຕຸ້ນຮອບ 2(ເຂັ້ມ4) ແມ່ນໃຫ້ຈັດຕັ້ງປະຕິບັດສຳເລັດກ່ອນປີໃຫມ່ລາວໃນທົ່ວປະເທດ ໂດຍ ນຳໃຊ້ວັກຊີນ AstraZeneca ເປັນບູລິມະສິດ ໃນກຸ່ມອາຍຸ 18 ປີ ຂຶ້ນໄປ ໃຫ້ໄດ້ໃຊ້ໄວເທົ່າທີ່ໄວ ກ່ອນວັກຊີນຈະຫມົດອາຍຸໃນເດືອນມີນາ ແລະ ເມສາ
5. ໃຫ້ເພີ້ມທະວີວຽກງານໂຄສະນາສຸຂະສຶກສາ ໃຫ້ຂໍ້ມູນເຂົ້າຮອດເຂົ້າເຖິງກຸ່ມເປົ້າໝາຍໂດຍສະເພາະຜູ້ສູງອາຍຸ, ຜູ້ມີພະຍາດປະຈຳໂຕ, ແມ່ຍິງຖືພາ ແລະ ແມ່ລູກອ່ອນ
6. ມອບໃຫ້ສຳນັກງານອົງການ ຫົວໜ່ວຍທຸລະກິດ ຄອບຄົວ ໄດ້ມີການຕິດຕາມກວດກາ ເບິ່ງສະມາຊິກຂອງຕົນເອງ ມີໃຜທີ່ຍັງບໍ່ໄດ້ສັກ ເມື່ອຄົບກຳນົດຕາມໄລຍະເວລາຂອງການສັກ ທີ່ໄດ້ກ່າວມາຂ້າງເທິງນັ້ນຈົ່ງໄດ້ມີການຈັດຕັ້ງປຸກລະດົມກັນອອກມາສັກ ໃຫ້ຄົບຕາມໄລຍະທີ່ໄດ້ກຳນົດ,
ດັ່ງນັ້ນ, ຈື່ງແຈ້ງມາຍັງທ່ານຫົວຫນ້າພະແນກສາທາລະນະສຸກແຂວງ ເພື່ອຊາບ ແລະ ຊີ້ນຳຫນ່ວຍງານຮັບຜິດຊອບໃນຂັ້ນແຂວງ ຂັ້ນເມືອງ ແລະ ໂຮງໝໍນ້ອຍ ໃຫ້ພ້ອມກັນຈັດຕັ້ງປະຕິບັດຕາມເນື້ອໃນຂ້າງເທິງໃຫ້ຖືກຕ້ອງ ແລະ ໄດ້ຮັບຜົນສຳເລັດຕາມຄາດຫມາຍ.
.
ສະຫຼຸບວຽກງານຈັດຕັ້ງ ແລະ ກໍ່ສ້າງພັກ-ພະນັກງານ
ອົງຄະນະພັກທະນາຄານແຫ່ງ ສປປ ລາວ (ທຫລ) ຈັດກອງປະຊຸມວຽກງານຈັດຕັ້ງ, ກໍ່ສ້າງພັກ-ພະນັກງານ ໃນວັນທີ 24 ມີນາ 2022 ພາຍໃຕ້ການເປັນປະທານຂອງ ສະຫາຍ ສອນໄຊ ສິດພະໄຊ ກຳມະການສູນກາງພັກ, ເລຂາຄະນະພັກ-ຜູ້ວ່າການ ທຫລ, ພ້ອມດ້ວຍພະນັກງານພາຍໃນ ທຫລ ເຂົ້າຮ່ວມ.
ສະຫາຍ ພານຸສັກ ແກ່ນວົງພະຈັນ ກຳມະການພັກ ທຫລ, ຫົວໜ້າກົມຈັດຕັ້ງ ແລະ ພະນັກງານ ໄດ້ສະຫລຸບຕີລາຄາວຽກງານຈັດຕັ້ງ, ກໍ່ສ້າງພັກ-ພະນັກງານ ທຫລ ເຊິ່ງໃນຊຸມປີຜ່ານມາ, ຄະນະພັກ ຄະນະນຳແຕ່ລະຂັ້ນ ໄດ້ເປັນເຈົ້າການ ແລະ ຍົກສູງຄວາມຮັບຜິດຊອບໃນການນຳພາວຽກງານຈັດຕັ້ງ, ກໍ່ສ້າງພັກ-ພະນັກງານຢ່າງມີຜົນສຳ ເລັດ, ສະແດງອອກສະພາບແນວຄິດຂອງຖັນແຖວ ສະມາຊິກພັກ-ພະນັກງານ ໂດຍ ລວມມີຄວາມໜັກແໜ້ນ, ມີສະຕິຕໍ່ການຈັດຕັ້ງ ແລະ ເຊື່ອໝັ້ນຕໍ່ການນຳພາຂອງການ ຈັດຕັ້ງທຸກຂັ້ນ, ມີຄວາມຮັບຮູ້ຕໍ່ແນວທາງນະໂຍບາຍ-ນິຕິກຳຂອງຂັ້ນເທິງວາງອອກໃນແຕ່ລະໄລຍະ; ການກໍ່ສ້າງປັບປຸງພັກ ໄດ້ດຳເນີນຕາມກົດລະບຽບພັກ ແລະ ກ້າວສູ່ຄຸນນະພາບໃໝ່ ທີ່ໜັກແໜ້ນກວ່າເກົ່າ, ຖັນແຖວພະນັກງານ ນັບມື້ນັບເຕີບໃຫຍ່ທາງດ້ານປະລິມານ ແລະ ຄຸນນະພາບ ແລະ ໄດ້ຜ່ານການບຳລຸງສ້າງທາງດ້ານທິດສະດີການ ເມືອງ, ດ້ານວິຊາການ-ເຕັກນິກ ລວມທັງພາສາຕ່າງປະເທດ ຢ່າງເປັນລະບົບຕໍ່ເນື່ອງ; ການຈັດຕັ້ງແຕ່ລະຂັ້ນ ໄດ້ຮັບການປັບປຸງເປັນລະບົບຄົບຊຸດຫລາຍຂຶ້ນ, ມີລະບຽບ-ກົນໄກ-ເຄື່ອງມື ໃນການບໍລິຫານທີ່ເໝາະສົມ, ມີຕາໜ່າງການບໍລິການທີ່ກວ້າງຂວາງ. ຄຽງຄູ່ກັບຜົນສຳເລັດແຫ່ງການນຳພາໃນຊຸມປີຜ່ານມາ, ການເຄື່ອນໄຫວບາງດ້ານ ກໍ່ຍັງມີດ້ານອ່ອນ ຂໍ້ຄົງຄ້າງຈຳນວນໜຶ່ງ ທີ່ຕ້ອງເອົາໃຈໃສ່ປັບປຸງແກ້ໄຂ.
ກອງປະຊຸມຄັ້ງນີ້, ຜູ້ເຂົ້າຮ່ວມໄດ້ພ້ອມກັນຄົ້ນຄວ້າເຊື່ອມຊຶມມະຕິ ແລະ ເອກະ ສານສຳຄັນ ຂອງກອງປະຊຸມວຽກງານຈັດຕັ້ງທົ່ວປະເທດ ຄັ້ງທີ XI, ມະຕິຂອງຄະນະບໍລິຫານງານສູນກາງພັກ ເລກທີ 04/ຄບສພ ວ່າດ້ວຍເພີ່ມທະວີການນຳພາຂອງພັກເພື່ອສ້າງການຫັນປ່ຽນຢ່າງແຂງແຮງ ແລະ ເລິກເຊິ່ງ ວຽກງານພະນັກງານ ແລະ ຄົ້ນ ຄວ້າປະກອບຄວາມເຫັນ ຕໍ່ການສະຫລຸບຕີລາຄາການເຄື່ອນໄຫວວຽກງານຈັດຕັ້ງ, ກໍ່ສ້າງພັກ-ພະນັກງານ ຢູ່ອົງຄະນະພັກ ທຫລ ໃນຊຸມປີຜ່ານມາ (2016-2021) ແລະ ກຳນົດທິດທາງແຜນການໃນຊຸມປີຕໍ່ໜ້າ (2022-2025).
ໂອກາດນີ້, ສະຫາຍ ສະຫາຍ ສອນໄຊ ສິດພະໄຊ ໄດ້ເນັ້ນໜັກບາງບັນຫາ ໂດຍສະເພາະ ການເພີ່ມທະວີຄວາມຮັບຜິດຊອບຕໍ່ໜ້າທີ່ການເມືອງ ແລະ ເປັນເຈົ້າການສືບຕໍ່ເຊື່ອມຊຶມ-ກຳແໜ້ນເນື້ອໃນກອງປະຊຸມຄັ້ງນີ້ ໃຫ້ເລິກເຊິ່ງ ເພື່ອຜັນຂະຫຍາຍເປັນແຜນການ ແລະ ວິທີການເຄື່ອນໄຫວວຽກງານອັນລະອຽດຂອງຕົນ, ທັງຊຸກຍູ້ຕິດຕາມການຈັດຕັ້ງປະຕິບັດຕົວຈິງໃນແຕ່ລະໄລຍະ ແນໃສ່ເຮັດໃຫ້ວຽກງານຈັດຕັ້ງ, ກໍ່ສ້າງພັກ-ພະນັກງານ ຢູ່ອົງຄະນະພັກ ທຫລ ມີບາດກ້າວຫັນປ່ຽນໃໝ່ຢ່າງຈະແຈ້ງ, ເສີມຂະຫຍາຍລັກສະນະນໍາໜ້າ, ຈໍາກັດ ແລະ ແກ້ໄຂສິ່ງຫຍໍ້ທໍ້ຕ່າງໆ ໃນວຽກງານດັ່ງກ່າວໃຫ້ໝົດໄປ.
ແຫຼ່ງຂ່າວ: ປະເທດລາວ
ໂຄງການຂະຫຍາຍລະບົບນໍ້າປະປາ ນະຄອນ ຫຼວງພະບາງ
ວາງສີລາລຶກໂຄງການຂະຫຍາຍລະບົບນໍ້າປະປາ ນະຄອນ ຫຼວງພະບາງ
ເພື່ອເຮັດໃຫ້ປະຊາຊົນພາຍໃນຄອນຫຼວງພະບາງ ໄດ້ຊົມໃຊ້ນໍ້າສະອາດຢ່າງທົ່ວເຖິງນັ້ນ ໃນວັນທີ 23 ມີນາ 2022 ກົມນໍ້າປະປາ ກະຊວງໂຍທາທິການ ແລະຂົນສົ່ງ ໄດ້ມີພິທີວາງສີລາລຶກໂຄງການຂະຫຍາຍລະບົບນໍ້າປະປາ ນະຄອນ ຫຼວງພະບາງ ແຂວງຫຼວງພະບາງຂຶ້ນ ທີ່ໂຮງງານຜະລິດນໍ້າປະປາ ບ້ານຜານົມ ນະຄອນຫຼວງພະບາງ, ໃຫ້ກຽດເຂົ້າຮ່ວມວາງສີລາລຶກໃນຄັ້ງນີ້ ມີທ່ານ ວຽງສະຫວັດ ສີພັນດອນ ລັດຖະມົນຕີ ກະຊວງໂຍທາທິການ ແລະຂົນສົ່ງ, ທ່ານ ຄຳຂັນ ຈັນທະວີສຸກ ເຈົ້າແຂວງຫຼວງພະບາງ, ທ່ານ ເຄນີຈິ ໂຄບາຢາຊິ ເອກອັກຄະລັດຖະທູດ ຍີ່ປຸ່ນ ປະຈຳລາວ, ມີຫົວໜ້າອົງການໄຈກາປະຈຳລາວ, ຫົວໜ້າກົມນໍ້າປະປາ, ຫົວໜ້າພະແນກໂຍທາທິການ ແລະຂົນສົ່ງແຂວງ, ພ້ອມດ້ວຍແຂກຖືກເຊີນເຂົ້າຮ່ວມຢ່າງພ້ອມພຽງ.
ໂຄງການຂະຫຍາຍລະບົບນໍ້າປະປາ ນະຄອນ ຫຼວງພະບາງ ແມ່ນໄດ້ຮັບທຶນຊ່ວຍເຫຼືອລ້າຈາກອົງການໄຈກາ ປະເທດຍີ່ປຸ່ນປະຈຳລາວ, ໂດຍມີໜ້າວຽກທີ່ສຳຄັນຈະກໍ່ສ້າງ ແລະຂະຫຍາຍຄື: ກໍ່ສ້າງ ແລະປັບປຸງສິ່ງອຳນວຍຄວາມສະດວກຂອງໂຮງງານຜະລິດນໍ້າປະປາເພີ່ມຕື່ມ 6,000 ແມັດກ້ອນຕໍ່ມື້, ປັບປຸງ ຕິດຕັ້ງລະບົບໄຟຟ້າ ແລະກົນຈັກ, ກໍ່ສ້າງອ່າງເກັບນໍ້າສູງຕື່ມ 1,500 ແມັດກ້ອນ, ວາງທໍ່ສົ່ງ ແລະທໍ່ແຈກຈ່າຍ ຕື່ມອີກ 58 ກິໂລແມັດ, ຕິດຕັ້ງລະບົບຄວບຄຸມ ແລະອື່ນໆ. ທັງນີ້ກໍ່ເພື່ອ ຮັບປະກັນການສະໜອງນໍ້າປະປາທີ່ສະອາດ, ປອດໄພ, ມີຄຸນນະພາບ ໃຫ້ປະຊາຊົນພາຍໃນນະຄອນ ຫຼວງພະບາງ ກໍ່ຄືໃຫ້ສາມາດຕອບສະນອງຕາມຄວາມຮຽກຮ້ອງຕ້ອງການຂອງນັກທ່ອງທ່ຽວ ທີ່ເຂົ້າມາທ່ຽວຊົມນະຄອນຫຼວງພະບາງ ນະຄອນສີຂຽວໃຫ້ນັບມື້ນັບຫຼາຍຂຶ້ນ.
ຂໍ້ມູນ: ຂ່າວສານຫຼວງພະບາງ
ນຳສົ່ງກຸ່ມຄ້າຂາຍຢາເສບຕິດ ເມືອງສີໂຄດຕະບອງ
ຕາມການລາຍງານ ຂອງປ້ອງກັນຄວາມສະຫງົບນະຄອນຫຼວງວຽງຈັນ ໃຫ້ຮູ້ວ່າ: ພັທ ຄຳຊ່ຽນ ມະນີວົງ ຫົວໜ້າ ປກສ ກຸ່ມໜອງໜ້ຽວ ໃຫ້ຮູ້ວ່າ: ພາຍຫຼັງໄດ້ຮັບການລາຍງານຈາກອຳນາດການປົກຄອງບ້ານໜອງແຕ່ງ ເມືອງສີໂຄດຕະບອງ ນະຄອນຫຼວງວຽງຈັນ ວ່າມີກຸ່ມຄົນອາໃສຫ້ອງແຖວເປັນບ່ອນມົ້ວສຸມເສບຢາເສບຕິດ, ວັນທີ 17 ມີນາ 2022 ເວລາ 14:00 ໂມງ ປກສ ກຸ່ມ ໜອງໜ້ຽວ ໄດ້ສົມທົບກັບອຳນາດການປົກຄອງບ້ານ, ກຳລັງ ປກຊ – ປກສ ບ້ານເຂົ້າແກ້ໄຂ, ກັກຕົວເປົ້າໝາຍໄດ້ທັງໝົດ 12 ຄົນ, ຍິງ 1 ຄົນ ພ້ອມຂອງກາງຢາບ້າ 421 ເມັດ.
ຜ່ານການກວດກາຕົວຈິງໃນເບື້ອງຕົ້ນ ພົບເຫັນຢາບ້າ 338 ເມັດ, ຢູ່ກັບທ້າວ ຄໍາຮັກ ອາຍຸ 25 ປີ ກຳມະກອນ ບ້ານ ໜອງແຕ່ງເໜືອ ແລະ ພົບເຫັນອີກ 83 ເມັດຢູ່ກັບທ້າວ ຈອນ ອາຍຸ 29 ປີ ບ້ານໜອງແຕ່ງໃຕ້; ຜ່ານການສອບສວນເບື້ອງຕົ້ນຂອງເຈົ້າໜ້າທີ່ໃຫ້ຮູ້ວ່າ: ພວກກ່ຽວທັງສອງໄດ້ຮວ່ມກັນຄ້າຂາຍ ແລະ ເສບຢາເສບຕິດ ມາແຕ່ປີ 2019 ໂດຍຊື້ມາຈາກຊາຍຄົນໜຶ່ງບໍ່ຮູ້ທີ່ຢູ່ ຊື້ຄັ້ງລະ 200 ຫາ 400 ເມັດ, ຄັ້ງລ່າສຸດໄດ້ຊື້ມາຈຳນວນ 421 ເມັດ, ເພື່ອຈະມາຂາຍ, ແລ້ວຖືກເຈົ້າໜ້າທີ່ເຂົ້າກັກຕົວກ່ອນ ຕໍ່ກັບຄະດີດັ່ງກ່າວໄດ້ນຳສົ່ງຕົວພວກກ່ຽວທັງ 2 ຄົນໃຫ້ກອງຄະດີ ປກສ ເມືອງສີໂຄດຕະບອງ ນະຄອນຫຼວງວຽງຈັນ ສືບຕໍ່ດຳເນີນຄະດີຕາມກົດໝາຍ.
ສ່ວນຜູ້ຖືກຫາອີກ 9 ຄົນ, ຍິງ 1 ຄົນ, ເຈົ້າໜ້າທີ່ກວດຄົ້ນຕົວບໍ່ພົບຢາເສບຕິດ ຈິ່ງໄດ້ນໍາຕົວພວກກ່ຽວມາສຶກສາອົບຮົມກ່າວເຕືອນ ໃຫ້ຮັບຮູ້ເຖິງພິດໄພຜົນຮ້າຍຂອງຢາເສບຕິດ ແລະ ຢຸດເຊົາປັບປ່ຽນພຶດຕິກຳທີ່ບໍ່ດີ ແລະ ໄດ້ສົ່ງໄປບຳບັດປິ່ນປົວ ຢູ່ສູນປິ່ນປົວ ແລະ ຝຶກວິຊາຊີບຜູ້ຕິດຢາເສບຕິດ ສົມສະຫງ່າ 1 ຄົນ ເນື່ອງຈາກເປັນເປົ້າໝາຍເກົ່າທີ່ບໍ່ມີການປ່ຽນແປງພຶດຕິກຳ; ສວ່ນອີກ8 ຄົນ, ຍິງ 1 ຄົນ ໄດ້ເຮັດບົດບັນທຶກແລ້ວມອບໃຫ້ຜູ້ປົກຄອງ ແລະ ການຈັດຕັ້ງບ້ານສືບຕໍ່ສຶກສາອົບຮົມໃຫ້ກາຍເປັນພົນລະເມືອງດີຂອງສັງຄົມຕໍ່ໄປ.
ຈັດຕັ້ງປະຕິບັດກົດໝາຍວ່າດ້ວຍການກັນ ແລະ ຄວບຄຸມພະຍາດຕິດຕໍ່
ປະເມີນການຈັດຕັ້ງປະຕິບັດກົດໝາຍວ່າດ້ວຍການກັນ ແລະ ຄວບຄຸມພະຍາດຕິດຕໍ່ ຢູ່ 5 ແຂວງ ພາກກາງ ແລະພາກໃຕ້.
ກະຊວງສາທາລະນະສຸກ ໄດ້ຈັດກອງປະຊຸມປະເມີນການຈັດຕັ້ງປະຕິບັດກົດໝາຍວ່າດ້ວຍການກັນ ແລະ ຄວບຄຸມພະຍາດຕິດຕໍ່ຂື້ນ ສຳລັບແຂວງພາກກາງ ແລະ ພາກໃຕ້ ໃນວັນທີ 24 ມີນາ 2022 ຢູ່ທີ່ໂຮງແຮມຈຳປາສັກແກຣນ ນະຄອນປາກເຊ ແຂວງຈຳປາສັກ ໂດຍການສະໜັບສະໜູນຂອງໂຄງການມູນນິທິເກົາຫຼີເພື່ອການດູແລສຸຂະພາບສາກົນ ຫຼືໂຄຟີ (KOFHI ) ແລະ ອົງການອະນາໄມໂລກ (WHO), ກອງປະຊຸມໄດ້ຮັບກຽດເປັນປະທານຮ່ວມຂອງ ທ່ານ ດຣ ໄພວັນ ແກ້ວປະເສີດ ຄະນະປະຈຳພັກກະຊວງ, ຮອງລັດຖະມົນຕີກະຊວງສາທາລະນະສຸກ,ທ່ານ ແກ້ວລັດຕະນະ ສີຫາວົງ ຄະນະປະຈຳພັກແຂວງ, ຮອງປະທານສະພາປະຊາຊົນແຂວງຈຳປາສັກ,ເຂົ້າຮ່ວມມີບັນດາທ່ານ ສະມາຊິກສະພາແຫ່ງຊາດ, ຫົວໜ້າກົມ, ຮອງຫົວໜ້າກົມຂອງ ກະຊວງສາທາ ລະນະສຸກ, ທ່ານຜູ້ຕາງໜ້າຈາກສະພາແຫ່ງຊາດ, ສໍານັກງານນາຍົກລັດຖະມົນຕີ, ກະຊວງຍຸຕິທໍາ, ທ່ານຜູ້ຕ່າງ ສະມາຊິກສະພາແຫ່ງຊາດທີ່ເປັນກຳມາທິການວັດທະນະທຳ-ສັງຄົມແຂວງ, ຫົວໜ້າ/ຄະນະຫ້ອງວ່າການແຂວງ, ພະແນກສາທາລະນະສຸກແຂວງ, ພະແນກຍຸດຕິທຳແຂວງ ແລະ ພະແນກແຮງານ ແລະ ສະຫວັດດີການສັງຄົມ ລວມທັງພະແນກການອື່ນໆຈາກ 5 ແຂວງພາກກາງ ແລະ ພາກໃຕ້ (ແຂວງຈຳປາສັກ, ສະຫວັນນະເຂດ, ສາລະວັນ, ເຊກອງ ແລະ ອັດຕະປື) ໃນກອງປະຊຸມຄັ້ງນີ້ ໄດ້ຜ່ານບົດປະເມີນການຈັດຕັ້ງປະຕິບັດກົດໝາຍວ່າດ້ວຍການຈັດຕັ້ງປະຕິບັດດກົດໝາຍວ່າດ້ວຍກັນ ແລະ ຄວບຄຸມພະຍາດຕິດຕໍ່,ຈາກນີ້ກໍໄດ້ມີການປະກອບຄຳຄິດຄຳເຫັນ ເນັ້ນໃສ່ປັບປຸງບາງຄຳສັບ,ບາງເນື້ອໃນ ແລະບາງມາດຕາ ໃນກົດໝາຍທີ່ປະກາດໃຊ້ຜ່ານມາ, ເຊິ່ງ ກົດໝາຍວ່າດ້ວຍກັນ ແລະຄວບຄຸມພະຍາດຕິດຕໍ່ທີ່ປະກາດໃຊ້ໃນວັນທີ 19 ທັນວາ ປີ 2017 ມີທັງໝົດ IX ໝວດ 83 ມາດຕາ.
ຈຸດປະສົງກົດໝາຍສະບັບນີ້ ກຳນົດ ຫຼັກການ, ລະບຽບການ ແລະ ມາດຕະການ ກ່ຽວກັບການຄຸ້ມຄອງ, ຕິດຕາມ ກວດກາວຽກງານກັນ ແລະ ຄວບຄຸມພະຍາດຕິດຕໍ່ ເພື່ອໃຫ້ວຽກງານດັ່ງກ່າວມີຄຸນນະພາບ ແລະ ດຳເນີນຢ່າງເປັນ ປົກກະຕິ ແນໃສ່ຕ້ານ, ສະກັດກັ້ນການເກີດ, ການລະບາດຂອງພະຍາດຕິດຕໍ່, ຫຼຸດຜ່ອນການເຈັບເປັນ, ການເສຍຊີ ວິດຂອງຄົນ ຮັບປະກັນໃຫ້ພົນລະເມືອງ ມີສຸຂະພາບແຂງແຮງ, ສາມາດເຊື່ອມໂຍງກັບພາກພື້ນ ແລະ ສາກົນ ປະ ກອບສ່ວນເຂົ້າໃນການປົກປັກຮັກສາ ແລະ ພັດທະນາປະເທດຊາດ. ກອງປະຊຸມຄັ້ງນີ້ ເພື່ອກະກຽມຄວາມພ້ອມໃນການປັບປຸງກົດໝາຍວ່າດ້ວຍການກັນ ແລະ ຄວບຄຸມພະຍາດຕິດຕໍ່ . ສາມາດຮູ້ໄດ້ຈຸດດີ ແລະ ຂໍ້ຄົງຄ້າງໃນການຈັດຕັ້ງປະຕິບັດກົດໝາຍດັ່ງກ່າວໃນໄລຍະຜ່ານມາ, ເກັບກໍາໄດ້ທຸກການປະກອບຄໍາເຫັນກ່ຽວກັບການປັບປຸງກົດໝາຍວ່າດ້ວຍການກັນ ແລະ ຄວບຄຸມພະຍາດຕິດຕໍ່ ໃຫມີຄວາມຖືກຕ້ອງ ແລະ ເໝາະສົມ ພ້ອມທັງ ສອດຄ່ອງກັບການສະພາບຄວາມເປັນຈິງຂອງເສດຖະກິດ – ສັງຄົມໃນປະຈຸບັນ ແລະ ອະນາຄົດ ຫຼາຍຂຶ້ນ.ເກດສະໜາ
ປະຊາຊົນທີ່ຖືກໄຟໄໝ້ເຮືອນ ຢູ່ບ້ານທົ່ງແສງຈັນ ເມືອງຫ້ວຍຊາຍ ໄດ້ຮັບເຄື່ອງຊ່ວຍເຫຼືອແລ້ວ
ປະຊາຊົນທີ່ຖືກໄຟໄໝ້ເຮືອນ ຢູ່ບ້ານທົ່ງແສງຈັນ ເມືອງຫ້ວຍຊາຍ ໄດ້ຮັບເຄື່ອງຊ່ວຍເຫລືອ.
ແຫລ່ງຂ່າວຈາກແຂວງບໍ່ແກ້ວ ໃຫ້ຮູ້ວ່າ: ໃນວັນທີ 23 ມີນາ 2022 ນີ້, ພະອາຈານ ບຸນນໍາ ທໍາມະວົງ ປະທານອົງການພຸດທະສາສະໜາສໍາພັນລາວ ເມືອງຫ້ວຍຊາຍ ພ້ອມຄະນະພະສົງ ສໍາມະເນນ ວັດປ່າອ້ອຍ ແລະ ວັດແກ້ວໂພນສະຫວັນ ໄດ້ນໍາເອົາເຄື່ອງອຸປະໂພກ-ບໍລິໂພກ ພ້ອມດ້ວຍເງິນສົດຈຳນວນໜຶ່ງ ມອບໃຫ້ແກ່ຄອບຄົວປະຊາ ຊົນຊົນ ຜູ້ທີ່ໄດ້ຮັບຜົນກະທົບຈາກເຫດການໄຟໄໝ້ເຮືອນ ຢູ່ບ້ານທົ່ງແສງຈັນ ເມືອງຫ້ວຍຊາຍ ເພື່ອຊ່ວຍບັນເທົາທຸກ.
ເຄື່ອງທີ່ນຳມາມອບໃນຄັ້ງນີ້, ປະກອບມີ: ວັດປ່າອ້ອຍ ມອບສັງກະສີ 23 ແຜນ, ເຂົ້າສານ 3 ເປົາ, ນໍ້າດື່ມ 15 ແກັດ, ໝີ່ 6 ແກັດ, ຄຸ 21 ໜ່ວຍ, ພັດລົມ 1 ໜ່ວຍ, ເຂົ້າໜົມຈໍານວນໜຶ່ງພ້ອມເງິນສົດ 1 ລ້ານກີບ ແລະ ວັດແກ້ວໂພນສະຫວັນ ໄດ້ມອບເສື່ອນອນ, ຜ້າຫົ່ມ, ໝໍ້ຫຸງເຂົ້າ, ເຕົາລີດ, ໝໍ້ຂາງ, ໝໍ້ແກງ, ໝອນ, ມຸງ, ຜ້າປູ, ໝໍ້ນໍ້າຮ້ອນ, ໝໍ້ຫຸ່ງເຂົ້າ ຢ່າງລະໜຶ່ງອັນ ພ້ອມເງິນສົດ 3 ແສນກີບ ລວມມູນຄ່າທັງໝົດ 6 ລ້ານກວ່າກີບ.
ໂອກາດນີ້, ທ່ານ ສ່ອງໄຊ ສະຫວ່າງ ຕາງໜ້າຄອບຄົວທີ່ໄດ້ຮັບຜົນກະທົບ ສະແດງຄວາມຂອບໃຈ ມາຍັງທາງປະທານອົງການພຸດທະສາສະໜາສໍາພັນລາວ ແລະ ພະສົງສໍາມະເນນ ແລະ ອົງການຈັດຕັ້ງບ້ານ ທີ່ເຫັນໄດ້ຄວາມສໍາຄັນ ແລະ ເປັນຫວ່ງເປັນໃຍຕໍ່ຄອບຄົວຂອງຂ້າພະເຈົ້າ ກໍຄື ຄອບຄົວທີ່ຖືກເຄາະຮ້າຍ ຈາກເຫດການໄຟໄໝ້ເຮືອນໃນຄັ້ງນີ້ຈຳນວນ 9 ຄົນ ທີ່ຂາດທີ່ຢູ່ອາໄສ.
ພ້ອມກັນນີ້, ການຈັດຕັ້ງບ້ານ ກໍໄດ້ສືບຕໍ່ປຸກລະດົມປະຊາຊົນພາຍໃນບ້ານ ຮ່ວມໃຈກັນປຸກ ເຮືອນໃໝ່ ໃຫ້ຄອບຄົວທີ່ໄດ້ຮັບຜົນກະທົບ ໄດ້ມີບ່ອນຢູ່ອາໄສຕໍ່ໄປ.
ການບັນລຸຄວາມສະເໜີພາບ ຍິງ-ຊາຍ ແລະ ການສ້າງຄວາມເຂັ້ມແຂງໃຫ້ແມ່ຍິງ ແລະ ເດັກ
ກອງປະຊຸມຄະນະກຳມາທິການ ວ່າດ້ວຍ ສະຖານະພາບຂອງແມ່ຍິງ ສປຊ ສະໄໝທີ 66 ພາຍໃຕ້ຫົວຂໍ້: “ການບັນລຸຄວາມສະເໜີພາບ ຍິງ-ຊາຍ ແລະ ການສ້າງຄວາມເຂັ້ມແຂງໃຫ້ແມ່ຍິງ ແລະ ເດັກທັງໝົດ ພາຍໃຕ້ແຜນງານໂຄງການ ແລະ ນະໂຍບາຍການຫຼຸດຜ່ອນຄວາມສ່ຽງດ້ານໄພພິບັດ, ສິ່ງແວດລ້ອມ ແລະ ການປ່ຽນແປງຂອງດິນຟ້າອາກາດ” ໄດ້ຈັດຂຶ້ນ ໃນລະຫວ່າງວັນທີ 14-25 ມີນາ 2022 ທີ່ ສຳນັກງານໃຫ່ຍ ອົງການ ສປຊ ທີ່ ນິວຢອກ.
ໃນໂອກາດດັ່ງກ່າວ, ທ່ານ ນາງ ອິນລະວັນ ແກ້ວບຸນພັນ, ປະທານຄະນະບໍລິຫານງານສູນກາງສະຫະພັນແມ່ຍິງລາວ ໄດ້ຕາງໜ້າໃຫ້ລັດຖະບານ ສປປ ລາວ ກ່າວບົດປະກອບຄຳເຫັນ ໂດຍຜ່ານການບັນທຶກວີດີໂອ, ຊຶ່ງໄດ້ຢໍ້າຄືນເຖິງຄວາມພະຍາຍາມຂອງລັດຖະບານ ສປປ ລາວ ໃນການສືບຕໍ່ສົ່ງເສີມບົດບາດຂອງແມ່ຍິງ ເພື່ອມີສ່ວນຮ່ວມຢ່າງເຕັມສ່ວນໃນທຸກຂົງເຂດວຽກງານ ລວມທັງ ການແກ້ໄຂບັນຫາການປ່ຽນແປງຂອງສະພາບດິນຟ້າອາກາດ, ວຽກງານປົກປັກຮັກສາສິ່ງແວດລ້ອມ ແລະ ການຫຼຸດຜ່ອນຄວາມສ່ຽງດ້ານໄພພິບັດ ໂດຍການເຊື່ອມສານວຽກງານດັ່ງກ່າວ ເຂົ້າໃນນະໂຍບາຍ, ແຜນຍຸດທະສາດ, ໂຄງການສະເພາະຂອງຂະແໜງການທີ່ກ່ຽວຂ້ອງ ແລະ ແຜນພັດທະນາເສດຖະກິດ-ສັງຄົມແຫ່ງຊາດ ຂອງ ສປປ ລາວ.
ນອກນັ້ນ, ສປປ ລາວ ຍັງໄດ້ປັບປຸງຂົງເຂດນິຕິກຳທີ່ກ່ຽວຂ້ອງຫຼາຍສະບັບ ເພື່ອເປັນພື້ນຖານທີ່ເອື້ອຍອຳນວຍ ໃຫ້ແມ່ຍິງສາມາດປະກອບສ່ວນເຂົ້າໃນວຽກງານການຄຸ້ມຄອງໄພພິບັດ, ການປ່ຽນແປງດິນຟ້າອາກາດ, ການເຕີບໂຕສີຂຽວ ແລະ ການປົກປັກຮັກສາສິ່ງແວດລ້ອມ, ທັງໝົດແມ່ນແນໃສ່ເພື່ອສົ່ງເສີມ, ປົກປ້ອງສິດທິ ແລະ ຍົກສູງບົດບາດຂອງແມ່ຍິງ ແລະ ການມີສ່ວນຮ່ວມໃນວຽກງານສໍາຄັນຕ່າງໆຂອງຊາດ ລວມທັງ ເພື່ອປະກອບສ່ວນໃນການຈັດຕັ້ງປະຕິບັດວາລະ 2030 ເພື່ອການພັດທະນາແບບຍືນຍົງ.
ແຫຼ່ງຂໍ້ມູນ: Permanent Mission of the Lao PDR to the United Nations