ພິທີທຳລາຍສິນຄ້າໝົດອາຍຸ ແລະ ສິນຄ້າລອກຮຽນແບບ ໄດ້ຈັດຂື້ນໃນວັນທີ 10 ມີຖຸນາ 2022 ນີ້ ຢູ່ຫ້ອງການອຸດສາຫະກໍາ ແລະ ການຄ້າເມືອງແບງ ໂດຍການເຂົ້າຮ່ວມຂອງທ່ານ ສອນເພັດ ອິນທະປັນຍາສັກ ຮອງເຈົ້າເມືອງໆແບງ, ມີພະນັກງານພາຍໃນຫ້ອງການອຸດສາຫະກໍາ ແລະ ການຄ້າເມືອງ, ຜູ້ຕາງໜ້າຈາກ ພາກສວນທີ່ກ່ຽວຂ້ອງຂອງເມືອງເຂົ້າຮ່ວມ.

ສິນຄ້າທີ່ນຳມາທຳລາຍໃນຄັ້ງນີ້ ປະກອບມີປະເພດສິນຄ້າປອມແປງ, ສິນຄ້າເກືອດຫ້າມ ແລະ ສິນຄ້າໝົດອາຍຸ ຄິດເປັນມູນຄ່າ 4 ລ້ານກວ່າກີບ, ລວມທັງໝົດມີ 8 ລາຍການ ເຊິ່ງໄດ້ມາຈາກການລົງຕິດຕາມກວດກາຢູ່ບັນດາຫ້າງຮ້ານຂາຍເຄື່ອງພາຍໃນເມືອງ ແລະ ຢຶດຈາກລົດຂົນສົງຈຳນວນໜຶ່ງ ແຕ່ເດືອນ ມັງກອນ ເປັນຕົ້ນມາ ຂອງເຈົ້າໜ້າທີ່ກວດກາການຄ້າ ປະສານສົມທົບກັບຂະແໜງການທີ່ກ້ຽວຂ້ອງຂອງເມືອງ ທັງນີ້ກໍ່ເພື່ອເປັນຕິດຕາມກວດກາການຈຳໜ່າຍສິນຄ້າ ແລະ ຜະລິດຕະພັນຕາມທ້ອງຕະຫຼາດ, ຮ້ານຄ້າ ໃຫ້ມີຄຸນນະພາບ, ຖືກຕ້ອງຕາມລະບຽບກົດໝາຍ ທັງເປັນການປົກປ້ອງຜູ່ບໍລິໂພກ ໂດຍສະເພາະແມ່ນການປະຕິບັດຕາມກົດໝາຍວ່າດ້ວຍການປົກປ້ອງຜູ້ຊົມໃຊ້ ແລະ ກົດໝາຍວ່າດ້ວຍຊັບສິນທາງປັນຍາ (ສະບັບປັບປຸງ)ໃນຂອບເຂດເມືອງແບງໃຫ້ເຂັ້ມງວດ ແລະ ຕໍ່ເນື່ອງ.

ຂ່າວ: ຂ່າວປະຈຳວັນ Daily News Oudomxay

ຈີນ-ຣັດເຊຍ ເປີດຂົວຂ້າມຊາຍແດນຮ່ວມກັນ ວັນ​ທີ11​ ມິຖຸນາ​ 2022, ຈີນ ​ແລະ ຣັດ​ເຊຍ ຮ່ວມ​ຈັດ ​ພິທີ ​ເປີດ​ຂົວ ຂ້າມ​ແມ່​ນ້ຳ​ ອາ​ມູຣ(Amur) ​ເປັນຊາຍແດນ ເຊື່ອມ​ຕໍ່ ​ລະຫວ່າງ ​ເມືອງ​ບລາ​ໂກ ​ເວສ​ເຊ​ນ (Blagoveshchensk)​ ໃນ​ພາກ​ຕາ​ເວັນ​ອອກ​ໄກ​ ຂອງຣັດ​ເຊຍ ກັບ​ເມືອງ ​ເຮ່ຍ​ເຫີ (Heihe)​ ແຂວງ ​ເຮ​ຍ​ຫລົງຈຽງ (Heilongjiang)​ ຂອງ​ຈີນ ມີ​ຄວາມ​ຍາວ​1.000 ກວ່າແມັດ ​ໃຊ້​ງົບປະມານ ​ໃນ​ການ​ກໍ່ສ້າງ 342 ລ້ານ​ໂດ​ລາ​ ສະຫະລັດ ຫລັງ​ຈາກ​ ໄດ້​ເລີ່ມລົງມືກໍ່ສ້າງ​ເມື່ອ​ປີ 2016 ​ແລະ ສຳ​ເລັດ ​ໃນເດືອນ​ ພຶດສະພາ 2020 ​ແຕ່​ການ​ເປີດ​ຂົວ​ ຊັກ​ຊ້າ​ ອອກ​ໄປ ຍ້ອນ​ການ ​ແພ່​ລະບາດ ​ຂອງພະຍາດໂຄ​ວິດ-19.

ເຊິ່ງຂົວ​ແຫ່ງ​ນີ້ ຈະ​ຊ່ວຍ​ ຫຼຸດຜ່ອນ ​ໄລຍະ​ທາງ ​ໃນ​ການ​ເດີນທາງ ​ແລະ ຂົນ​ສົ່ງ​ ສິນຄ້າ ຂ້າມ​ຊາຍ​ແດນ ລະຫວ່າງ​ ຈີນ ກັບ ຣັດ​ເຊຍ ​ໄດ້​ເຖິງ 1.500 ກິ​ໂລ​ແມັດ.

ຖື​ເປັນ​ເສັ້ນທາງ ​ສຳຄັນ ຂອງຣັດ​ເຊຍ ​ໃນ​ການ​ຄ້າ​ຂາຍ ກັບ​ຈີນ ​ແລະ ຈະ​ຊ່ວຍ​ ເພີ່ມ​ມູນ​ຄ່າ ​ສິນຄ້າ ກັບ​ຈີນ ​ໄດ້​ເຖິງ 200 ຕື້​ໂດ​ລາ​ ສະຫະລັດ ​ໃນ​ອີກ 2 ປີ​ຕໍ່ໜ້າ ​ໂດຍ​ສະ​ເພາະ​ຈີນ ຖື​ເປັນ​ຜູ້​ຊື້​ ສິນຄ້າ ​ປະ​ເພດ ຊັບ ພະຍາກອນ​ ທຳ​ມະ​ຊາດ ​ແລະ ຜະລິດ​ຕະພັນ ທາງ​ກະສິກຳ ຫລາຍທີ່ສຸດ ຂອງຣັດ​ເຊຍ.

ແຫຼ່ງຂ່າວ: Lao National Radio

ປະຈຳວັນທີ 13/06/2022

.

.

ພິທີມອບ-ຮັບ ໂຄງການຟື້ນຟູ ແລະ ກໍ່ສ້າງທີ່ພັກອາໄສໃຫ້ປະຊາຊົນທີ່ໄດ້ຮັບຜົນກະທົບຈາກໄພນ້ຳຖ້ວມໃນປີ 2018 ຄືນໃໝ່ຢູ່ເມືອງປາກແບງ ແຂວງອຸດົມໄຊ ຂຶ້ນໃນວັນທີ 10 ມິຖຸນານີ້ ທີ່ບ້ານໄຊມຸງຄຸນ ເມືອງຮຸນ ແຂວງອຸດົມໄຊ ຊຶ່ງມີທ່ານນາງ ວິໄລຄຳ ໂພສາລາດ ຮອງລັດຖະມົນຕີກະຊວງໂຍທາທິການ ແລະ ຂົນສົ່ງ (ຍທຂ) ຫົວໜ້າຄະນະຊີ້ນຳຂັ້ນສູນກາງ, ມີທ່ານ ສົມຈິດ ປັນຍາສັກ ຮອງເຈົ້າແຂວງ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ໂຄງການດັ່ງກ່າວ ເປັນໂຄງການຟື້ນຟູທີ່ພັກອາໄສໃຫ້ປະຊາຊົນ ຈຳນວນ 4 ບ້ານຄື: ບ້ານພູຫຼວງ, ບ້ານມົກພາງ, ບ້ານດອນສະອາດ, ບ້ານພູລາງ ເມືອງປາກແບງ ທີ່ໄດ້ຮັບຜົນກະທົບຈາກໄພນ້ຳຖ້ວມໃນປີ 2018 ຜ່ານມາ. ດັ່ງນັ້ນ, ເພື່ອໃຫ້ປະຊາຊົນໄດ້ມີທີ່ພັກອາໄສຖາວອນ ທາງໂຄງການຈຶ່ງໄດ້ກໍ່ສ້າງເຮືອນຈໍານວນ 15 ຫຼັງ ເພື່ອສືບຕໍ່ມອບໃຫ້ປະຊາຊົນຜູ້ທຸກຍາກທີ່ໄດ້ຮັບຜົນກະທົບຈາກໄພພິບັດດັ່ງກ່າວ.

ໂຄງການນີ້ໄດ້ຮັບການສະໜັບສະໜູນທາງດ້ານງົບປະມານຈາກອົງການສະຫະປະຊາຊາດດ້ານເຄຫາສະຖານ ຢູເອັນຮາບີຕັດ (UN Habitat ). ສຳລັບການຊ່ວຍເຫຼືອທາງດ້ານພື້ນຖານໂຄງລ່າງຈັດສັນທີ່ຢູ່ອາ​ໄສຄື: ຕັດຜັງບ້ານມີເນື້ອທີ່ທັງໝົດ 32.27 ເຮັກຕາ, ສາມາດຈັດສັນໃຫ້ປະຊາຊົນໄດ້ 300 ຄອບຄົວ, ໃນເນື້ອທີ່ 20×20 ແມັດຕໍ່ 1 ຕອນ, ກໍ່ສ້າງເສັ້ນທາງ, ສ້າງນ້ຳລິນ, ຕິດຕັ້ງໄຟຟ້າ, ດຶງໄຟເຂົ້າເຮືອນປະຊາຊົນສຳເລັດ, ລວມມູນຄ່າສະເພາະວຽກພື້ນຖານໂຄງລ່າງ 7 ຕື້ 600 ລ້ານກ່ວາກີບ ຊຶ່ງອົງການຢູເອັນຮາບີຕັດ ໄດ້ຊ່ວຍກໍ່ສ້າງເຮືອນ 15 ຫຼັງ ໃຫ້ປະຊາຊົນໃນມູນຄ່າ 1 ຕື້ກວ່າກີບ, ນອກນີ້ຍັງມີເງິນບໍລິຫານໂຄງການ, ເງິນຝຶກອົບຮົມສີມືແຮງງານເພື່ອສ້າງຄວາມເຂັ້ມແຂງໃຫ້ປະຊາຊົນ, ໂຄງການດັ່ງກ່າວໄດ້ເລີ່ມລົງມືຈັດຕັ້ງປະຕິບັດໃນປີ 2020 ໃຊ້ເວລາກໍ່ສ້າງ 3 ເດືອນຈຶ່ງສຳເລັດ ເປັນໂຄງການກໍ່ສ້າງເຮືອນກໍ່ຊັ້ນດຽວ ຊຶ່ງມີເນື້ອທີ່ 54 ຕາແມັດ, ມີ 1 ຫ້ອງນອນລວມ, 1 ຫ້ອງຄົວ ແລະ 1 ຫ້ອງນໍ້າ, ໂອກາດດັ່ງກ່າວເຈົ້າຂອງໂຄງການຈຶ່ງໄດ້ມອບເຮືອນຈຳນວນ 15 ຫຼັງໃຫ້ແກ່ແຂວງອຸດົມໄຊ ເພື່ອມອບຕໍ່ໃຫ້ປະຊາຊົນເປັນຜູ້ຄຸ້ມຄອງ ແລະ ນຳໃຊ້.

ສໍາມະນາກ່ຽວກັບຢາພື້ນເມືອງລາວໃນຮູບແບບການຜະລິດສະຫະກອນເພື່ອຊຸກຍູ້ເສດຖະກິດ

ໃນວັນທີ 9 ມິຖຸນານີ້ ທີ່ມະຫາວິທະຍາໄລ ສຸພານຸວົງ ນະຄອນ-ຫຼວງພະບາງ, ສະຖາບັນການແພດ ແລະ ການຢາພື້ນເມືອງຮ່ວມກັບສູນຂໍ້ມູນຂ່າວສານ ແລະ ຝຶກອົບຮົມ, ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ຈັດກອງປະຊຸມສໍາມະນາກ່ຽວກັບຢາພື້ນເມືອງລາວໃນຮູບແບບການຜະລິດສະຫະກອນເພື່ອຊຸກຍູ້ເສດຖະກິດ ໂດຍການເປັນປະທານຂອງ ທ່ານ ບຸນເລື່ອນ ດວງເດືອນ ຫົວໜ້າສະຖາບັນການແພດ ແລະ ການຢາພື້ນເມືອງ, ບັນດາແຂກຖືກເຊີນທີ່ກ່ຽວຂ້ອງເຂົ້າຮ່ວມ.

ກອງປະຊຸມຄັ້ງນີ້, ຈັດຂຶ້ນເພື່ອທົບທວນຄືນບັນດານະໂຍບາຍ ແລະ ລະບຽບການຂອງບັນດາຂະແໜງ ການທີ່ກ່ຽວຂ້ອງກັບການຊຸກຍູ້ສົ່ງເສີມການປູກ, ການຜະລິດເປັນສິນຄ້າ ແລະ ການນໍາໃຊ້ພືດທີ່ເປັນຢາຂອງລາວ ເພື່ອເປັນບ່ອນອີງໃຫ້ແກ່ການເຕົ້າໂຮມບັນດາໝໍຢາພື້ນເມືອງ ແລະ ຜູ້ປະກອບການໃຫ້ເປັນກຸ່ມ ຫຼື ສະຫະກອນການຜະລິດ, ບໍ່ໃຫ້ມີລັກສະນະກະແຈກກະຈາຍ ແລະ ເຮັດພໍໃຜພໍລາວ, ເພື່ອແລກປ່ຽນຄວາມຮູ້ ປະສົບການດ້ານການຄຸ້ມຄອງ ແລະ ດ້ານວິຊາການທີ່ກ່ຽວຂ້ອງກັບວຽກງານຢາພື້ນເມືອງຈາກບັນດານັກວິຊາການ, ໝໍຢາພື້ນເມືອງ ແລະ ຜູ້ປະກອບການຈາກຂະແໜງການສາທາລະນະສຸກ ແລະ ຂະແໜງການອື່ນໆທີ່ກ່ຽວຂ້ອງກັບວຽກງານຢາພື້ນເມືອງ, ເພື່ອຊຸກຍູ້ສົ່ງເສີມກຸ່ມການຜະລິດ ແລະ ສະຫະກອນການຜະລິດຢາພື້ນເມືອງລາວ ໃຫ້ກາຍເປັນເສດຖະກິດ.

ທ່ານ ບຸນເລື່ອມ ດວງເດືອນ ກ່າວວ່າ: ກອງປະຊຸມຄັ້ງນີ້, ເນື້ອໃນທີ່ຈະນໍາສະເໜີຕໍ່ບັນດາຜູ້ເຂົ້າຮ່ວມມີ 21 ຫົວບົດ ຊຶ່ງແຕ່ລະຫົວບົດລ້ວນແຕ່ມີຄວາມສໍາຄັນ ແລະ ເປັນປະໂຫຍດຕໍ່ການພັດທະນາວຽກງານຢາພື້ນເມືອງໂດຍສະເພາະແມ່ນບັນດານະໂຍບາຍ ແລະ ລະບຽບການຂອງບັນດາຂະແໜງການທີ່ກ່ຽວຂ້ອງກັບການສົ່ງເສີມການປູກ, ການຜະລິດເປັນສິນຄ້າ ແລະ ການນໍາໃຊ້ພືດທີ່ເປັນຢາຂອງລາວ ເພື່ອເປັນບ່ອນອີງໃຫ້ແກ່ການເຕົ້າ ໂຮມເປັນກຸ່ມ ຫຼື ສະຫະກອນການຜະລິດ, ບໍ່ໃຫ້ມີລັກສະນະກະແຈກກະຈາຍ.

ນອກນັ້ນ, ເພື່ອສົ່ງເສີມກຸ່ມການຜະລິດ ແລະ ສະຫະກອນຜະລິດຢາພື້ນເມືອງລາວໃຫ້ກາຍເປັນເສດຖະກິດ, ອີກດ້ານໜຶ່ງ ເພື່ອປົກປ້ອງສຸຂະພາບຂອງຜູ້ບໍລິໂພກ, ສ້າງຄວາມໝັ້ນໃຈໃຫ້ແກ່ສັງຄົມໃຫ້ມີການຊົມໃຊ້ຢາພື້ນເມືອງຫຼາຍຂຶ້ນ. ພ້ອມດຽວກັນນັ້ນ ທັງເປັນການຍົກລະດັບວຽກງານການແພດ ແລະ ການຢາພື້ນເມືອງໃຫ້ໄປຕາມທິດຂອງ ແນວຄິດ ປະທານ ໄກສອນ ພົມວິຫານ ທີ່ວ່າ: ໃຫ້ສົມທົບຢາພື້ນເມືອງກັບຢາຫຼວງເຂົ້າໃນການຮັກສາສຸຂະພາບ ຊຶ່ງໄລຍະຜ່ານມາ, ພັກ-ລັດ ຖະບານ ໄດ້ຖືເອົາວຽກງານການປິ່ນປົວດ້ວຍການແພດພື້ນເມືອງສົມທົບກັບການປິ່ນປົວດ້ວຍການແພດສະໄໝໃໝ່,ໃນນີ້ວຽກງານສົ່ງເສີມການປູກ ແລະ ການນໍາໃຊ້ພືດເປັນຢາແບບຍືນຍົງ ເປັນວຽກງານໜຶ່ງທີ່ສໍາຄັນ ແລະ ເປັນໜຶ່ງໃນອົງປະກອບຂອງການບໍລິການສາທາລະນະສຸກ. ສະນັ້ນ, ຂະບວນການຜະລິດທີ່ໄດ້ມາດຕະຖານແມ່ນມີຄວາມຈໍາເປັນຕ້ອງມີນະໂຍບາຍ ແລະ ລະບຽບການຕ່າງໆ ເພື່ອເປັນບ່ອນອີງໃຫ້ແກ່ການຈັດຕັ້ງປະຕິບັດໃຫ້ເປັນເອກະພາບຂອງຜູ້ປະກອບການປຸງແຕ່ງຢາພື້ນເມືອງ.

ສຶກສາ ການລ້ຽງ ແລະ ເຕັກນິກການປະສົມພັນກົບ, ສາມາດນຳໄປສ້າງເປັນອາຊີບໄດ້

.

.

.

.

.

.

.

ເຈົ້າໜ້າທີ່ ປກສ ເມືອງແອດຈັບໂຕຜູ້ຄ້າຂາຍຢາເສບຕິດ ຂອງກາງຢາບ້າຈໍານວນ 206 ເມັດ

ເຈົ້້າໜ້າທີ່ ປກສ ເມືອງແອດ ແຂວງຫົວພັນ ໄດ້ຮັບແຫຼ່ງຂໍ້ມູນຈາກພົນລະເມືອງດີວ່າ ມີບຸກຄົນເຄື່ອນໄຫວ ຄ້າຂາຍຢາເສບຕິດຢູ່ໃນຂອບເຂດບ້ານພຽງລູ້ ເມືອງແອດ ແຂວງຫົວພັນ.

ສະນັ້ນເຈົ້າໜ້າທີ່ ປກສ ເມືອງແອດ ຈຶ່ງໄດ້ແຕ່ງຕັ້ງໜ່ວຍງານວິຊາສະເພາະ ລົງຕິດຕາມເກັບກໍາຂໍ້ມູນພິສູດແຫຼ່ງຂ່າວຕົວຈິງ ເຫັນວ່າມີຂໍ້ມູນຄວາມຈິງແທ້ ມາຮອດເວລາ 11 ໂມງ 30 ນາທີ ຂອງວັນທີ 8 ມິຖຸນາ 2022, ເຈົ້າໜ້າທີ່ ປກສ ເມືອງແອດໄດ້ນໍາກໍາລັງ ສົມທົບກັບ ກອງບັນຊາການ ທະຫານ ເມືອງ, ໄອຍາການ ເຂດII ປະຈໍາເມືອງແອດ, ປກສ ກຸ່ມ ບ້ານດ່ານ, ອໍານາດການປົກຄອງບ້ານ ພ້ອມດ້ວຍ ປກສ ບ້ານພຽງລູ້ ເຂົ້າກວດຄົ້ນເຄຫາສະຖານ ເຮືອນຂອງເປົ້າໝາຍດັ່ງກ່າວ ຊື່ ນາງ ຢ້ຽນ ອາຍຸ 60 ປີ, ຊົນເຜົ່າ ອີ້ວມຽນ ເຊິ່ງເປັນ ປະຊາຊົນຢູ່ບ້ານ ພຽງລູ້ ເມືອງແອດ ແຂວງຫົວພັນ, ຜ່ານການກວດຄົ້ນຂອງເຈົ້າໜ້າທີ່ສະເພາະກິດ ໄດ້ພົບເຫັນຂອງກາງ ປະເພດຢາບ້າ ຈໍານວນ 1 ຖົງ ມີ 206 ເມັດ, ໂທລະສັບຢູນີເທວ 1 ເຄື່ອງ, ເງິນກີບທະນາຄານ 1,500,000 ກີບ ( ໜຶ່ງລ້ານຫ້າແສນກີບ ); ທີ່ຊຸກເຊື່ອງໄວ້ຢູ່ໃນກະຕ່າເຄື່ອງ ທີ່ຫ້ອງນອນຂອງຜູ້ກ່ຽວ,

ຈາກນັ້ນ, ເຈົ້າໜ້າທີ່ ປກສ ເມືອງແອດ ຈຶ່ງໄດ້ຍຶດຂອງກາງຈໍານວນດັ່ງກ່າວ ພ້ອມທັງຈັບຕົວຜູ້ກ່ຽວມາດໍາເນີນການສືບສວນ-ສອບສວນ ຫາກຸ່ມແກ້ງຮ່ວມຂະບວນການ ເພື່ອມາດໍາເນີນຄະດີຕາມຂັ້ນຕອນຂອງກົດໝາຍ.

ແຫຼ່ງຂ່າວ: ຫ້ອງການ ຖວທ ເມືອງແອດ

ໃນຄັ້ງວັນທີ່ 08-09 ມີຖຸນາ 2022 ກອງຄຸ້ມຄອງອຸທິຍານແຫ່ງຊາດນໍ້າແອດ-ພູເລີຍ ໄດ້ມີຄວາມຍິນດີ ທີ່ໄດ້ຕ້ອນຮັບ ທີມງານຜູ້ແທນຈາກທະນາຄານໂລກ, ກົມປ່າໄມ້ ກະຊວງກະສິກໍາ ແລະ ປ່າໄມ້ ແລະ ພະແນກກະສິກໍາ ແລະ ປ່າໄມ້ ແຂວງຫົວພັນ.ໃນລະຫວ່າງການປະຊຸມຊ່ວງເຊົ້າ ຢູ່ທີ່ ເມືອງຮ້ຽມ ໄດ້ມີການປຶກສາຫາລືກ່ຽວກັບວຽກງານການຄຸ້ມ​ຄອງ, ບັນຫາສິ່ງທ້າທາຍຂອງອຸທິຍານແຫ່ງຊາດນໍ້າແອດ-ພູເລີຍ ແລະ ຄວາມຄືບໜ້າໂຄງການພູມີທັດ ແລະ ຊີວິດການເປັນຢູ່ຂອງ ສປປ ລາວ (LLL).

ພາຍຫຼັງສໍາເລັດກອງປະຊຸມ ຜູ້ເຂົ້າຮ່ວໄດ້ເດີນທາງໄປທີ່ບ້ານສົ້ນຂົວ ເມືອງຫົວເມືອງ ເພື່ອທ່ຽວຊົມແຫຼ່ງທ່ອງທ່ຽວລ່ອງເຮືອເບີ່ງສັດປ່າໃນຢາມກາງຄືນ ຢູ່ແມ່ນໍ້າເນີນ, ຢ້ຽມຢາມທີມງານລາດຕະເວນທີ່ປະຈໍາຢູ່ປ້ອມຍາມປ່າ ແລະ ເພື່ອປຶກສາຫາລືເພີ່ມກ່ຽວກັບວຽກງານການຄຸ້ມຄອງອຸທິຍານແຫ່ງຊາດນໍ້າແອດ-ພູເລີຍ ແລະ ໂຄງການ LLL.ໃນລະຫວ່າງການລົງຢ້ຽມຢາມແຫຼ່ງທ່ອງທ່ຽວລ່ອງເຮືອເບີ່ງສັດປ່າໃນຢາມກາງຄືນ ຢູ່ແມ່ນໍ້າເນີນ ໃນຄັ້ງນີ້ ໄດ້ພົບເຫັນສັດປ່າຫຼາຍປະເພດຄື: ລີງລົມ(ສັດປ່າປະເພດໄກ້ຈະສູນພັນ), ກວາງ, ເຫງັນ, ຟານ, ແລນ ແລະ ນົກປະເພດຕ່າງໆ ເຊັ່ນ: ນົກເຕັ້ນຊີວ… ພວກເຮົາຂໍສະແດງຄວາມຂອບໃຈຢ່າງຊຸດຊື້ງມາຍັງຜູ້ເຂົ້າຮ່ວມທຸກໆທ່ານທີ່ໄດ້ມາຢ້ຽມຢາມ ແລະ ໃຫ້ການສະໜັບສະໜູນອຸທິຍານແຫ່ງຊາດນໍ້າແອດ-ພູເລີຍ ຂອງພວກເຮົາ