ຮັບປະກັນຄວາມປອດ100%

October 31, 2022

ທ່ານ ພົນຈັດຕະວາ ບົວພັນ ຟອງມະນີ ຫົວໜ້າກອງບັນຊາການປ້ອງກັນຄວາມສະຫງົບນະຄອນຫຼວງວຽງຈັນ (ນວ) ໄດ້ກ່າວໃນພິທີຖະແຫຼງຂ່າວກ່ຽວກັບການກະກຽມປາງບຸນນະມັດສະການພະທາດຫຼວງວຽງຈັນປະຈຳປີ 2022 ເມື່ອບໍ່ດົນມານີ້ວ່າ: ກ່ຽວກັບການກະກຽມປ້ອງກັນຮັກສາຄວາມສະຫງົບ, ຄວາມເປັນລະບຽບຮຽບຮ້ອຍໃນງານບຸນນະມັດສະການພະທາດຫຼວງປະຈໍາປີ 2022 ນີ້ ແມ່ນຈະໄດ້ຈັດທັງໝົດ 5 ວັນ, ພາຍຫຼັງໄດ້ຮັບການຕົກລົງເປັນເອກະພາບ, ທາງຄະນະປ້ອງກັນຄວາມສະຫງົບ ນວ ໄດ້ສະເໜີຂໍທິດຊີ້ນຳກັບກະຊວງປ້ອງກັນຄວາມສະຫງົບ ແລະ ພ້ອມທັງໄດ້ປະສານກັບກອງບັນຊາການປ້ອງກັນຊາດນະຄອນຫຼວງວຽງຈັນ ໂດຍໄດ້ຂຶ້ນແຜນການຈັດວາງກຳລັງເຂົ້າໃສ່ໃນການກະກຽມໃນການປ້ອງກັນຄວາມສະຫງົບໃຫ້ເປັນລະບຽບຮຽບຮ້ອຍ ແລະ ໄດ້ຂຶ້ນແຜນບັນຈຸກຳລັງທັງໝົດ 1.700.00 ກວ່າຄົນ, ເພື່ອກຽມຄວາມພ້ອມ ແລະ ໄດ້ກຳນົດບັນດາຈຸດທີ່ຈະຈັດວາງກຳລັງປ້ອງກັນຈຸດຕ່າງໆທີ່ຈະລະບາຍລົດທາງເຂົ້າ-ອອກ, ພ້ອມມວນຊົນທີ່ຈະມາທ່ຽວໃນງານບຸນ ແລະ ງານວາງສະແດງ, ເພື່ອຮັກສາຄວາມເປັນລະບຽບຮຽບຮ້ອຍ ແລະ ຮັກສາຄວາມປອດໄພໃຫ້ໄດ້ 100%.

ທ່ານຍັງກ່າວຕື່ມວ່າ: ຮຽກຮ້ອງມາຍັງປະຊາຊົນທັງຊາວລາວ ແລະ ຊາວຕ່່າງປະເທດທີ່ອາໄສຢູ່ນະຄອນຫຼວງວຽງຈັນ ແລະ ບັນດາແຂວງຕ່າງພາຍໃນປະເທດທີ່ຈະມາເຂົ້າຮ່ວມງານບຸນນະມັດສະການພະທາດຫຼວງປີນີ້ເພື່ອຮັບປະກັນໃນການມາຫຼິ້ນມາທ່ຽວໃຫ້ມີຄວາມມ່ວນຊື່ນຕ້ອງມີສະຕິລະວັງຕົວ, ກ່ອນອອກຈາກເຮືອນຕ້ອງມີການຮັບປະກັນຄວາມປອດໄພ ແລະ ຖ້າເຂົ້າມາຮ່ວມໃນງານຕ້ອງມີສະຕິລະວັງຕົນເອງ, ການຖືສິ່ງຂອງທີ່ມີຄຸນຄ່າເປັນຕົ້ນວັດຖຸເງິນ – ຄໍາ, ກໍຕ້ອງຮັກສາດ້ວຍຕົນເອງເພື່ອຮັບປະກັນຄວາມປອດໄພ, ສຳລັບລູກຫຼານທີ່ເຂົ້າມາທ່ຽວບຸນໃຫ້ບັນດາຜູ້ປົກຄອງມີສະຕິໃຫ້ຂຽນເບີໂທລະສັບ, ຊື່ພໍ່, ແມ່ ໃສ່ຖົງໂສ້ງ ແລະ ເສື້ອ.

ແຫຼ່ງຂ່າວ: VTE9

ໂຄງການອະນຸລັກ ຮູບແຕ້ມຝາຜະໜັງບັນດາວັດເກົ່າ ແກ່ ທີ່ສ້າງຂຶ້ນໃນ ສະຕະວັດທີ XIX ຢູ່ແຂວງສະຫວັນນະເຂດ

ໂທລະໂຄ່ງ THOLAKHONG

October 31, 2022

ພິທີລົງນາມໃນການໃຫ້ທຶນ ສະໜັບສະໜູນ ໂຄງການອະນຸລັກ ຮູບແຕ້ມຝາຜະໜັງບັນດາວັດເກົ່າ ແກ່ ທີ່ສ້າງຂຶ້ນໃນ ສະຕະວັດທີ XIX ຢູ່ແຂວງສະຫວັນນະເຂດ ຈຳນວນ 3 ວັດຄື: ວັດບ້ານຕາແຫຼວເກົ່າ, ວັດບ້ານທວດເມືອງຈຳພອນ ແລະ ວັດບ້ານໜອງບົວທ່າເມືອງສອງ ຄອນ ແຂວງສະຫວັນນະເຂດ, ເຊິ່ງພິທີດັ່ງກ່າວ ໄດ້ຈັດຂຶ້ນໃນວັນ ທີ 26 ຕຸລາ 2022 ທີ່ເດີ່ນວັດ ບ້ານຕາແຫຼວເກົ່າເມືອງຈຳພອນ, ໂດຍການເຂົ້າຮ່ວມເປັນປະ ທານຂອງທ່ານ ນາງ ຫຼິງທອງ ແສງຕາວັນ ຮອງເຈົ້າແຂວງສະ ຫວັນນະເຂດ, ທ່ານ ປອ ປີເຕີ ແຮມມອນ ເອກອັກຄະລັດຖະທູດ ສະຫະລັດອາເມຣິກາ ປະຈຳ ສປປ ລາວ, ມີບັນດາພາກສ່ວນທີ່ກ່ຽວ ຂ້ອງຈາກແຂວງ, ເມືອງຈຳພອນ ແລະເມືອງສອງຄອນ, ເຖົ້າແກ່ ແນວໂຮມບ້ານເຂົ້າຮ່ວມ. ທ່ານ ນາງ ສຸນັນທາ ກັນ ລະຍາ ປະທານສະມາຄົມສົ່ງເສີມ ການອະນຸລັກສິລະປະວັນນະຄະດີ (ສອສວ) ໄດ້ລາຍງານໃຫ້ຮູ້ ວ່າ:

ໂຄງການອະນຸລັກຮູບແຕ້ມຝາ ຜະໜັງ ບັນດາວັດໃນ ສັດຕະວັດທີ 19 ຢູ່ແຂວງສະຫວັນນະເຂດໄດ້ ຮັບທຶນພາຍໃຕ້ໂຄງການ: ທຶນ ທ່ານ ເອກອັກຄະລັດຖະທູດສະຫະ ລັດອາເມຣິກາ ເພື່ອອະນຸລັກວັດ ທະນະທຳປີ 2022, ເຊິ່ງຢູ່ແຂວງ ສະຫວັນນະເຂດ ປະກອບມີ 3 ວັດ ຄື: ວັດບ້ານຕາແຫຼວເກົ່າ, ວັດ ບ້ານທວດ ເມືອງຈຳພອນ ແລະ ວັດບ້ານໜອງບົວທ່າ ເມືອງສອງ ຄອນ, ໃນມູນຄ່າ 49.800ໂດລາ ສະຫະລັດ, ປະກອບມີ: ໃຫ້ພະແນກ ຖະແຫຼງຂ່າວ-ວັດທະນະທຳແລະ ທ່ອງທ່ຽວແຂວງສະຫວັນນະ ເຂດ, ຫ້ອງການຖະແຫຼງຂ່າວ-ວັດ ທະນະທຳເມືອງທັງສອງເມືອງ, ສະຖາບັນວິຈິດສິນແຫ່ງຊາດ, ວິ ທະຍາໄລສິລະປະສຶກສາ ແລະ ໂຮງຮຽນວິຈິດສິນແຂວງສະຫວັນ ນະເຂດ ເປັນຄູ່ຮ່ວມງານຫຼັກໃນ ໂຄງການ.

ເຊິ່ງໃນນັ້ນກິດຈະກຳ ຂອງໂຄງການປະກອບດ້ວຍ: ການລົງສຳຫຼວດພື້ນທີ່ ແລະຄັດ ລອກຮູບແຕ້ມຝາຜະໜັງ, ຈາກນັ້ນ ກໍ່ຈະມີການຝຶກອົບຮົມນັກສິລະປະ ພ້ອມດ້ວຍການສ້າງກິດຈະກຳ ປູກຈິດສຳນຶກ ໃຫ້ກັບຊາວບ້ານ ແລະນ້ອງນັກຮຽນ, ຈາກນັ້ນ ກໍ່ຈະ ໄດ້ເກັບກຳຂໍ້ມູນເພື່ອຈັດພິມປື້ມ ແລະປື້ມເອເລັກໂຕຼນິກບັນດາກິດ ຈະກຳຂອງໂຄງການ ແລະຮູບ ແຕ້ມຝາຜະໜັງ, ພ້ອມນັ້ນກໍ່ຈະມີ ການຈັດງານວາງສະແດງຜົນ ງານ ແລະສິ່ງສຳຄັນແມ່ນການກະ ກຽມຂຶ້ນແຜນ ເພື່ອຂໍທຶນສະໜັບ ສະໜູນວຽກງານບູລະນະຝາຜະ ໜັງກໍ່ຄືຕົວອາຄານສະ ຖານບູຮານ ວັດທັງ 3 ແຫ່ງ.

ທັງນີ້ກໍ່ເພື່ອເປັນ ການປູກຈິດສຳນຶກ ກ່ຽວກັບການ ອະນຸລັກມໍລະດົກວັດທະນະທຳໃຫ້ ແກ່ປະຊາຊົນໃນທ້ອງຖິ່ນ ໂດຍ ສະເພາະຄົນຮຸ່ນໃໝ່, ອີກຢ່າງກໍ່ ເພື່ອໃຫ້ປະຊາຊົນໃນທ້ອງຖິ່ນໄດ້ ນຳໃຊ້ ແລະອະນຸລັກມໍລະດົກວັດ ທະນະທຳແບບຍືນຍົງ, ພ້ອມນັ້ນ ກໍ່ເພື່ອຝຶກຝົນໃຫ້ນັກສຶກສາໄດ້ ຮຽນຮູ້ສິລະປະການແຕ້ມຮູບຝາ ຜະໜັງແບບດັ້ງເດີມຕື່ມອີກ. ທ່ານ ນາງ ຫຼິງທອງ ແສງ ຕາວັນ ກໍ່ໄດ້ຕາງໜ້າຄະນະນໍາ ຂອງແຂວງ, ກໍ່ຄືພະແນກຖະແຫຼງ ຂ່າວ, ວັດທະນະທໍາ ແລະທ່ອງ ທ່ຽວແຂວງ, ຊາວເມືອງຈໍາພອນ, ເມືອງສອງຄອນ ແລະອໍານາດ ການປົກຄອງບ້ານຕາແຫຼວ, ບ້ານ ທວດ ແລະບ້ານໜອງບົວທ່າ ເຊິ່ງ ເປັນຜູ້ທີ່ໄດ້ຮັບຜົນປະໂຫຍດ ຈາກ ທຶນສະໜັບສະໜູນຈາກກອງທຶນ ທູດສະຫະລັດອາເມຣິກາໃນການ ບູລະນະ ແລະຮັກສາວັດທະນະທໍາ ຮູບແຕ້ມຝາຜະໜັງວັດທັງ 3 ແຫ່ງ, ເຊິ່ງການຊ່ວຍເຫຼືອດ້ວຍທຶນ ສະໜັບສະໜູນຈາກກອງທຶນດັ່ງ ກ່າວນີ້ເປັນເທື່ອທໍາອິດທີ່ແຂວງ ສະຫວັນນະເຂດ ໄດ້ຮັບຂໍສະແດງ ຄວາມຂອບອົກຂອບໃຈທຸກພາກ ສ່ວນ ໃນການສະໜັບສະໜູນໃຫ້ ທຶນໃນຄັ້ງນີ້.

ໃນພິທີຄັ້ງນີ້ກໍ່ໄດ້ມີການລົງ ນາມໃນບົດທຶກລະຫວ່າງທ່ານ ໂພສີສ້ອຍ ກຸທິລາດ ຫົວໜ້າ ພະແນກຖະແຫຼງຂ່າວ-ວັດທະ ນະທຳ ແລະທ່ອງທ່ຽວແຂວງສະ ຫວັນນະເຂດ ແລະທ່ານ ເກຼັກອໍຮິທ ເລຂານຸການເອກ ສະຖານເອກ ອັກຄະລັດຖະທູດ ສ.ອາເມຣິກາ ປະຈຳ ສປປ ລາວ, ໂດຍການເປັນ ສັກຂີພະຍານຂອງຄະນະປະທານ ແລະແຂກທີ່ເຂົ້າຮ່ວມ.

ແຫຼ່ງຂ່າວ: ສະຫວັນພັດທະນາ ຂ່າວ / Savanhphathana News

ສາຍການບິນອູຣານລັດເຊຍ Ural Airlines ສູ່ ສປປ ລາວ

ໂທລະໂຄ່ງ THOLAKHONG

October 31, 2022

ຖືວ່າເປັນຂ່າວດີ ສຳລັບການມີຖ້ໜວບິນຕົງຈາກ ລັດເຊຍ ສູ່ ສປປ ລາວ

ຍົນຖ້ຽວທໍາອິດຂອງສາຍການບິນອູຣານ ບິນຈາກເມືອງ ວະລາດີວົດສະຕົກ ໄດ້ລົງຈອດສະຫນາມບິນສາກົນວັດໄຕ ໃນຕອນແລງວັນທີ 29 ຕຸລາ ທີ່ຜ່ານມາ, ໂດຍໃຫ້ການຕ້ອນຮັບຈາກ ທ່ານຮອງລມຕກະຊວງໂຍທາທິການ ແລະ ຂົນສົ່ງພ້ອມຄະນະ, ຮອງທູດລັດເຊຍພ້ອມຄະນະນີ້ແມ່ນການເປີດຖ້ຽວບິນລະຫວ່າງລັດເຊຍແລະລາວ,ໃນຊ່ວງທຳອິດນີ້ອາດມີອາທິດລະ 1 ຖ້ຽວ( ວັນເສົາ) ຕໍ່ໄປຖ້າມີຄົນໂດຍສານຫຼາຍກໍອາດເພີ່ມຖ້ຽວບິນຂຶ້ນ.

ຖ້ຽວບິນຄັ້ງທໍາອິດລະຫວ່າງ ສປປ ລາວ-ສະຫະພັນຣັດເຊຍ ວລາດີວອດສຕົກ-ວຽງຈັນ, ເລີ່ມແລກຈະໃຫ້ບໍລິການ 1ຖ້ຽວ/ອາທິດ (ທຸກໆວັນເສົາ) ຕາມຂໍ້ມູນຈາກ Flight Rader ໄດ້ບັນທຶກໃນວັນທີ 29/10/2022 ດັ່ງນີ້:

Vladivostok – Vientiane ເວລາອອກ : ວລາດີວອດສຕົກ ເວລາ 16:25 ນາທີ ເຖິງ ນະຄອນຫຼວງວຽງຈັນ 19:45ນາທີ ລະຫັດຖ້ຽວບິນ U67165

Vientiane -Vladivostok ອອກຈາກ ນະຄອນຫຼວງວຽງຈັນ ເວລາ 20:53ນາທີ – ເຖິງ ວລາດີວອດສຕົກ ເວລາ 05:46ນາທີ ລະຫັດຖ້ຽວບິນ U67166 ປະຕິບັດການບິນໂດຍສາຍການບິນ Ural Airlines ເຊິ່ງເປັນສາຍການບິນຊັ້ນນໍາຂອງຣັດເຊຍ ໄດ້ຮັບຄວາມນິຍົມ, ໄລຍະເລີ່ມແລກສໍາລັບເສັ້ນທາງນີ້ ໄດ້ນໍາໃຊ້ເຮືອບິນລຸ້ນໃໝ່ Airbus A320-Neo ປະກອບດ້ວຍຊັ້ນທຸລະກິດ 12ບ່ອນນັ່ງ ແລະ ບ່ອນນັ່ງຊັ້ນທໍາມະດາ 144ບ່ອນນັ່ງ, ບໍ່ມີຂໍ້ມູນຈາກສາຍການບິນຈະໃຫ້ບໍລິການຈັກຖ້ຽວ/ອາທິດ , ຕາມຂໍ້ມູນເບື້ອງຕົ້ນທົດລອງແມ່ນ 1ຖ້ຽວ/ອາທິດ ແມ່ນທຸກໆວັນເສົາ ເຊິ່ງອາດຈະເພີ່ມຄວາມຖີ່ການບິນຂຶ້ນ ຖ້າມີຜູ່ໂດຍສານຫຼາຍ ໃນອານາຄົດ.

ເມືອງວລາດີວອດສຕົກ ເປັນເມືອງທາງພາກຕາເວັນອອກ ແລະ ມີນັກສຶກສາລາວ ແລະ ປະຊາຊົນລາວ ອາໃສຢູ່ ເປັນເມືອງທີ່ມີຄວາມສວຍງາມ ການເປີດຖ້ຽວບິນກົງລະຫວ່າງ ລາວ-ຣັດເຊຍ ຈະມີຄວາມສໍາຄັນຫຼາຍຕໍ່ການໄປມາຫາສູ່ ຂອງປະຊາຊົນ ,ນັກທຸລະກິດ, ຂໍໃຫ້ຖ້ຽວບິນປະຫວັດສາດນີ້ຈົ່ງປະສົບຜົນສໍາເລັດ .

ສຳລັບລາຄາ ເຮືອບິນ Airbus A320neo ຈາກວລາດີວໍສຕ໊ອກ ຈະອອກເດີນທາງເຖິງ ນະຄອນຫຼວງວຽງຈັນ ກໍານົດວັນເສົາ ຂອງທຸກໆອາທິດ, ເວລາບິນແມ່ນ 6 ຊົ່ວໂມງ 25 ນາທີ ຄ່າໃຊ້ຈ່າຍຂອງການເດີນທາງດັ່ງກ່າວ ໄປ-ກັບ ແມ່ນປະມານ 115.000 ຣູເບີລ = 31ລ້ານກ່ວາກີບ, (ອັດຕາແລກປ່ຽນ 100ຣູເບີລ = 270,000ກີບ) ສ່ວນໂດລາ ທຽບເທົ່າ 1,870 USD ທັງຂາໄປ ແລະ ຂາກັບ,

ໃນອະນາຄົດ ຢ່າງຫນ້ອຍທີ່ສຸດຈະໃຫ້ມີ 1ຖ້ຽວບິນ/ອາທິດ ແລະ ຫຼັງຈາກນັ້ນຈະມີຖ້ຽວບິນ2ຖ້ຽວ/ ຕໍ່ອາທິດ ແລະ ຖ້າຫາກວ່າຜູ້ທີ່ຕ້ອງການນໍາໃຊ້ມີຈໍານວນຫຼາຍ, ສາຍການບິນຈະພິຈາລະນາຂໍເພີ່ມ ຫຼື ນໍາໃຊ້ເຮືອບິນໃຫ່ຍ.

ແຫຼ່ງຂໍ້ມູນຈາກ: ແອໂຣລາວ AEROLAOS

ມອບ-ຮັບ ຊັບສິນທີ່ສານຕັດສິນຮິບເປັນຂອງລັດ

ໂທລະໂຄ່ງ THOLAKHONG

October 24, 2022

ໂດຍປະຕິບັດຕາມ ຄໍາສັ່ງຂອງນາຍົກລັດຖະມົນຕີ ສະບັບເລກທີ 07/ນຍ, ລົງວັນທີ 05 ເມສາ 2017 ວ່າດ້ວຍການຂຶ້ນບັນຊີເຕົ້າໂຮມຊັບສິນທີ່ສານຕັດສິນຮິບເປັນຂອງລັດ ແລະ ຕາມຂໍ້ຕົກລົງ ສະບັບເລກທີ 0695/ກງ, ລົງວັນທີ 4 ມີນາ 2022 ວ່າດ້ວຍການແຕ່ງຕັ້ງຄະນະຮັບຜິດຊອບເຕົ້າໂຮມຊັບສິນທີ່ເຈົ້າໜ້າທີ່ຢຶດ, ອາຍັດ ແລະ ສານຕັດສິນຮິບເປັນຂອງລັດ.

ສະນັ້ນ, ໃນວັນທີ 21 ຕຸລາ 2022 ນີ້ ທີ່ສາງເກັບມ້ຽນຂອງກາງຄະດີ ຂອງກົມຕໍາຫຼວດສະກັດກັ້ນ ແລະ ຕ້ານຢາເສບຕິດ ກົມໃຫຍ່ຕໍາຫຼວດ ກະຊວງປ້ອງກັນຄວາມສະຫງົບ, ໄດ້ເຊັນບົດບັນທຶກມອບ-ຮັບຊັບສິນທີ່ສານຕັດສິນຮິບເປັນຂອງລັດ (ສະເພາະຢູ່ນະຄອນຫຼວງວຽງຈັນ) ທີ່ຢູ່ໃນການຄຸ້ມຄອງຂອງກົມຕໍາຫຼວດສະກັດກັ້ນ ແລະ ຕ້ານຢາເສບຕິດ ກົມໃຫຍ່ຕໍາຫຼວດ ກະຊວງປ້ອງກັນຄວາມສະຫງົບ ໃຫ້ກົມຄຸ້ມຄອງຊັບສິນແຫ່ງລັດ ກະຊວງການເງິນ, ເພື່ອນໍາໄປຂຶ້ນບັນຊີເປັນຂອງລັດ ແລະ ມອບເງິນເຂົ້າງົບປະມານຂອງລັດຕາມກົດໝາຍ ແລະ ລະບຽບການ.

ໂດຍຕາງໜ້າເຊັນບົດບັນທຶກມອບຂອງທ່ານ ພັອ ສາລີ ພຸດທະວົງ ຫົວໜ້າກົມຕໍາຫຼວດສະກັດກັ້ນ ແລະ ຕ້ານຢາເສບຕິດ ກົມໃຫຍ່ຕໍາຫຼວດ ກະຊວງປ້ອງກັນຄວາມສະຫງົບ ແລະ ຕາງໜ້າເຊັນບັດບັນທຶກຮັບຂອງທ່ານ ສົມບູນ ລັດຕະນະພອນ ຮອງຫົວໜ້າກົມຄຸ້ມຄອງຊັບສິນແຫ່ງລັດ ກະຊວງການເງິນ ໂດຍຊ້ອງໜ້າຄະນະກໍາມະການຕາມຂໍ້ຕົກລົງ ສະບັບເລກທີ 0695/ກງ, ຂະແໜງຈັດຕັ້ງປະຕິບັດຄໍາຕັດສິນຂອງສານ, ພະແນກຍຸຕິທໍານະ ຄອນຫຼວງວຽງຈັນ, ພ້ອມດ້ວຍພະນັກວິຊາການທີ່ກ່ຽວຂ້ອງເຂົ້າຮ່ວມ.

ສຳລັບຊັບສິນທີ່ສານຕັດສິນຮິບເປັນຂອງລັດມອບ-ຮັບປະກອບມີ: ທີ່ດິນພ້ອມເຮືອນຈໍານວນ 8 ຕອນ, ໄມ້ແປຮູບຈໍານວນ 92 ໂຕ, ລົດໃຫຍ່ຈໍານວນ 12 ຄັນ, ລົດຈັກຈໍານວນ 19 ຄັນ, ວັດຖຸມີຄ່າຈໍານວນ 43 ລາຍການໃນ 17 ຄະດີ; ເງິນສົດ. ໃນນີ້, ເງິນກີບຈຳນວນ 2,103 ຕື້ກີບ, ເງິນບາດໄທຈຳນວນ 698.680 ບາດ, ເງິນໂດລາສະຫະລັດຈຳນວນ 4.202 ໂດລາສະຫະລັດ, ເງິນຢວນຈຳນວນ 50 ຢວນ, ເງິນດົງ ຈຳນວນ 10.000 ດົງ.

ສ່ວນທິດທາງແຜນການຈັດຕັ້ງປະຕິບັດໃນຕໍ່ໜ້າຄະນະທີ່ຖືກແຕ່ງຕັ້ງຕາມຂໍ້ຕົກລົງ ສະບັບເລກທີ 0695/ກງ,ລົງວັນທີ 4 ມີນາ 2022 ຈະໄດ້ສືບຕໍ່ລົງກວດກາເກັບກໍາຂໍ້ມູນຊັບສິນທີ່ຮິບເປັນຂອງລັດຢູ່ບັນດາແຂວງ, ເພື່ອນໍາເອົາຊັບສິນມາເຕົ້າໂຮມຂຶ້ນບັນຊີເປັນຊັບສິນຂອງລັດຕາມກົດໝາຍວ່າດ້ວຍຊັບສິນຂອງລັດ ແລະ ລະບຽບການ.

ແຫຼ່ງຂໍ້ມູນ: ກະຊວງການເງິນ

ບຸກຈັບເຈົ້າຂອງຢາບ້າ ເຂດນະຄອນໄກສອນ

ໂທລະໂຄ່ງ THOLAKHONG

October 24, 2022

ຕອນເຊົ້າເວລາປະມານ 2:10 ໂມງ ຂອງວັນທີ 20 ຕຸລາ, ເຈົ້າຫນ້າທີ່ທະຫານຊາຍແດນ ກອງຮ້ອຍ 324 ກອງບັນຊາການທະຫານແຂວງສະຫວັນນະເຂດ ປະຕິບັດຫນ້າທີ່ວິຊາສະເພາະອອກເຄື່ອນໄຫວ ລາດຕະເວນ ພົບເຫັນຊາຍ 3 ຄົນ ຢູ່ໃນເຮືອທີ່ສົງໄສກາງນໍ້າຂອງ ເຂດບ້ານໂນນອຸດົມ ນະຄອນໄກ ສອນ ພົມວິຫານ ຈຶ່ງທໍາການເຂົ້າກວດຄົ້ນພົບເຫັນຢາເສບຕິດ ຈໍານວນ 10 ເປົາ ຫຼື ເທົ່າກັບ 1.994. 000 ເມັດ ພ້ອມທັງກັກຕົວເປົ້າຫມາຍໄດ້ 2 ຄົນ ມາສອບສວນຂະຫຍາຍຜົນ.

ຕໍ່ກັບຄະດີດັ່ງກ່າວ, ເຈົ້າຫນ້າທີ່ ວິຊາສະເພາະລາຍງານໃຫ້ຮູ້ວ່າ: ໃນເວລາປະມານ 2:10 ໂມງ ຂອງ ວັນທີ 20 ຕຸລາ 2022, ເຈົ້າຫນ້າທີ່ທະຫານຊາຍ ແດນ 324 ທີ່ກໍາລັງປະຕິບັດຫນ້າທີ່ອອກກວດກາເຄື່ອນ ໄຫວຕະເວນຢູ່ໃນເຂດຄວາມຮັບຜິດຊອບຂອງຕົນໄດ້ພົບເຫັນເຮືອ ແລະ ຊາຍ 3 ຄົນ ຢູ່ໃນເຮືອທີ່ຕ້ອງ ສົງໄສຢູ່ກາງລໍາແມ່ນໍ້າຂອງ ຈຸດບ້ານໂນນອຸດົມ ນະຄອນໄກສອນ ພົມວິຫານ ເຫນືອປາກຫ້ວຍຄໍາກ້ານ, ເຊິ່ງ

ຫນ້າກັບບ້ານທ່າໄຄ້ ແຂວງມຸກດາຫານ (ປະເທດໄທ). ຈາກນັ້ນ, ເຈົ້າຫນ້າທີ່ 324 ຈຶ່ງໄດ້ຕິດຕາມ ແລະ ກັກ ເຮືອຄັນດັ່ງກ່າວ ພ້ອມເຂົ້າຈັບກຸມພວກຖືກຫາໄດ້ 2 ຄົນ ຄື: ທ້າວ ກິໂຫຼນ ອາຍຸ 53 ປີ ຢູ່ບ້ານຜັກຂະ ແລະ ທ້າວ ສຸວັນ ອາຍຸ 38 ປີ ຢູ່ບ້ານນາໂພ ທັງສອງຄົນຢູ່ນະຄອນໄກສອນພົມວິຫານ, ສ່ວນ ອີກຄົນຫນຶ່ງແມ່ນ ໄດ້ເອົາຕົວຫຼົບຫນີ, ໃນນັ້ນ, ກວດພົບເຫັນຂອງກາງຢາເສບຕິດ ຈໍານວນ 10 ເປົາ ມີ 997 ມັດ ຫຼື ເທົ່າກັບ 1.994.000 ເມັດ, ພາຫະນະເຮືອຫາງຍາວ 1 ລໍາ ແລະ ຈັກຍີ່ຫໍ້ຮອນດ້າ 13 ແຮງມ້າ.

– ຜ່ານການສືບສວນ-ສອບສວນເບື້ອງຕົ້ນ, ຜູ້ຖືກຫາທັງສອງຄົນໄດ້ໃຫ້ຂໍ້ມູນວ່າ: ຢາເສບຕິດປະເພດຢາບ້າ ທີ່ເຈົ້າໜ້າທີ່ຢຶດໄດ້ໃນຄັ້ງນີ້ ແມ່ນພວກກ່ຽວເປັນຄົນຮັບມາຂາຍຕໍ່ ໂດຍຂາຍຂ້າມໄປປະເທດໄທ ສ່ວນເຈົ້າຂອງຢາບ້າແມ່ນບໍ່ຮູ້ ແລະ ທີ່ຢູ່.

ໃນວັນດຽວກັນເຈົ້າຫນ້າທີ່ກອງບັນຊາການທະຫານ ແຂວງສະຫວັນນະເຂດ ຍັງໄດ້ນໍາຢາເສບຕິດຈໍາ ນວນດັ່ງກ່າວມາມອບໃຫ້ ເຈົ້າຫນ້າທີ່ກອງບັນ ຊາການ ປກສ ແຂວງສະຫວັນນະເຂດ ສືບຕໍ່ດໍາເນີນການ ສອບສວນຂະຫຍາຍຜົນ, ເຊິ່ງກ່າວມອບໂດຍ ພັທ ແກ້ວ ຄໍາ ບຸນເລີຍ ຮອງຫົວຫນ້າກອງບັນຊາ ການ ທະຫານແຂວງ ແລະ ກ່າວຮັບໂດຍ ນັທ ວົງຄໍາ ອິນທະບານ ຮອງຫົວຫນ້າກອງບັນຊາການ ປກສ ແຂວງ, ມີ ຄະນະຫ້ອງ ປກຊ-ປກສ ແຂວງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ແຫຼ່ງຂ່າວ ແລະ ພາບ ຄວາມສະຫງົບ

ວັນອາຫານໂລກ, ວັນສາກົນ ແລະ ສັບປະດາແຫ່ງຊາດ

ໂທລະໂຄ່ງ THOLAKHONG

October 24, 2022

ກະຊວງກະສິກໍາ ແລະ ປ່າໄມ້ ຮ່ວມກັບ ອົງການອາຫານ ແລະ ການກະເສດ ຈະຈັດງານສະເຫຼີມສະຫຼອງ ວັນອາຫານໂລກ ຄົບຮອບ 42 ປີ ແລະ ການລະນຶກ ວັນສາກົນ ເພື່ອລຶບລ້າງຄວາມທຸກຍາກ ຄົບຮອບ 30 ພາຍໃຕ້ຄໍາຂວັນ “ພວກເຮົາພ້ອມກັນກ້າວໄປ ເພື່ອສົ່ງເສີມການຜະລິດ, ໂພຊະນາການ, ສິ່ງແວດລ້ອມ ແລະ ຊີວິດການເປັນຢູ່ທີ່ດີກວ່າເກົ່າ ສໍາລັບທຸກຄົນ” ແລະ ຄໍາຂວັນທີ່ວ່າ: “ກຽດສັກສີເພື່ອທຸກຄົນ ໃນການປະຕິບັດຕົວຈິງ: ຄວາມໝາຍໝັ້ນທີ່ພວກເຮົາໃຫ້ຮ່ວມກັນ ເພື່ອຄວາມຍຸຕິທໍາທາງສັງຄົມ, ສັນຕິພາບ ແລະ ໂລກຂອງພວກເຮົາ” ດ້ວຍຫຼາຍກິດຈະກຳ ເຊັ່ນ: ຕອນບ່າຍໃນວັນທີ 24 ຕຸລາ ຈະມີປາຖະກະຖາ ແລະ ໃນວັນທີ 25 ຈະມີການຈັດສຳມະນາ ກ່ຽວກັບ 2 ວັນດັ່ງກ່າວ,ງານວາງສະແດງສິນຄ້າ ແລະ ຈຳໜ່າຍສິນຄ້າກະສິກຳ ແຕ່ວັນທີ 24 -28 ຕຸລາ 2022 ທີ່ ສະຖາບັນຄົ້ນຄວ້າກະສິກຳ, ປ່າໄມ້ ແລະ ພັດທະນາຊົນນະບົດ (ເຂດດົງໂດກ).

ທ່ານ ເພັດ ພົມພິພັກ ລັດຖະມົນຕີກະຊວງກະສິກໍາ ແລະ ປ່າໄມ້ ໄດ້ກ່າວໃນກ່າວໃນງານຖະແຫລງຂ່າວ ເນື່ອງໃນໂອກາດວັນອາຫານໂລກ, ວັນສາກົນ ແລະ ສັບປະດາແຫ່ງຊາດ ເພື່ອລຶບລ້າງຄວາມທຸກຍາກ ໃນວັນທີ 21 ຕຸລາ 2022 ວ່າ: ຄວາມທຸກຍາກ ແລະ ໄພອຶດຫິວ ໄດ້ເປັນບັນຫາໃຫຍ່ຂອງໂລກມາເປັນເວລາຫລາຍສະຕະວັດແລ້ວ.

ຕະຫຼອດໄລຍະຜ່ານມາ ໂລກຂອງພວກເຮົາ ຍັງໄດ້ພົບກັບຫລາຍໆບັນຫາຫຍຸ້ງຍາກ ແລະ ສິ່ງທ້າທາຍຕ່າງໆ ເຊັ່ນ: ການປ່ຽນແປງທາງດ້ານດິນຟ້າອາກາດຂອງໂລກ, ໄພພິບັດທາງທໍາມະຊາດ, ການລະບາດຂອງພະຍາດ, ຄວາມວຸ້ນວາຍທາງສັງຄົມ, ບັນຫາຄວາມຂັດແຍ່ງ, ການລະບາດພະຍາດໂຄວິດ-19, ການເພີ່ມຂຶ້ນຂອງລາຄາສິນຄ້າ, ນໍ້າມັນ ໄດ້ສືບຕໍ່ສົ່ງຜົນກະທົບໃຫ້ແກ່ປະຊາກອນໂລກເກືອບ 828 ລ້ານຄົນຂາດສານອາຫານ ແລະ ປະສົບກັບຄວາມອຶດຫິວ ຊຶ່ງມີທ່າອ່ຽງເພີ່ມຂຶ້ນໃນແຕ່ລະປີ. ປະກົດການດັ່ງກ່າວນັ້ນ ໄດ້ເປັນການເພີ່ມທະວີໃຫ້ມີຄວາມທຸກຍາກ ແລະ ໄພອຶດຫິວຫຼາຍຂຶ້ນ.

ດັ່ງນັ້ນ, ອົງການອາຫານ ແລະ ການກະເສດຂອງສະຫະປະຊາຊາດ ໄດ້ກຳນົດເອົາ ວັນທີ 16 ຕຸລາ ຂອງທຸກປີ ເປັນວັນອາຫານໂລກ ຊຶ່ງເລີ່ມແຕ່ ປີ 1980 ເປັນຕົ້ນມາ ແລະ ໄລຍະຕໍ່ມາ ສະຫະປະຊາຊາດ ກໍໄດ້ກຳນົດເອົາວັນທີ 17 ຕຸລາ ເປັນວັນສາກົນເພື່ອລຶບລ້າງຄວາມທຸກຍາກ ໂດຍເລີ່ມແຕ່ ປີ 1992 ເປັນຕົ້ນມາ, ມາຮອດ ປີ 2003 ລັດຖະບານ ແຫ່ງ ສປປ ລາວ ກໍໄດ້ກຳນົດເອົາ ວັນທີ 17-24 ຕຸລາ ເປັນສັບປະດາແຫ່ງຊາດ ເພື່ອລຶບລ້າງຄວາມທຸກຍາກ.

ດັ່ງນັ້ນ, ການໂຮມຊຸມນຸມ 2 ວັນດັ່ງກ່າວ ແມ່ນມີຄວາມໝາຍສໍາຄັນຫລາຍ, ບໍ່ສະເພາະແຕ່ແນໃສ່ປູກຈິດສຳນຶກ ແລະ ສ້າງຄວາມຮັບຮູ້ ໃຫ້ປະຊາຊົນໃນທົ່ວໂລກ ໄດ້ເຂົ້າໃຈເຖິງ ຄວາມທຸກຍາກ ແລະ ໄພອຶດຫິວ ເຊິ່ງບໍ່ແມ່ນບາບກຳທີ່ເທວະດາຟ້າແຖນເປັນຜູ້ກຳນົດໃຫ້ ແຕ່ມັນແມ່ນປະກົດການທາງສັງຄົມທີ່ສາມາດລຶບລ້າງໃຫ້ໝົດໄປໄດ້ ແລະ ປຸກລະດົມປະຊາຊາດ ໂດຍສະເພາະຜູ້ທຸກຍາກ ອຶດຫິວ ໃຫ້ຮູ້ສຶກວ່າຕົນເອງມີກຽດສັກສີ ຂອງຄວາມເປັນມະນຸດ, ມີເຫື່ອແຮງສະຕິປັນຍາຄືຄົນທົ່ວໄປ ເທົ່ານັ້ນ ແຕ່ຍັງເປັນການເຮັດໃຫ້ເຂົາເຈົ້າມີກໍາລັງໃຈ, ມີຄວາມກ້າຫານ ແລະ ມີຄວາມສາມາດບືນຕົວອອກຈາກຄວາມທຸກຍາກ ແລະ ໄພອຶດຫິວໄດ້. ພ້ອມນັ້ນ ກໍຖືໂອກາດນີ້ ເປັນການສ້າງຄວາມຮັບຮູ້ ແລະ ຮຽກຮ້ອງໃຫ້ທຸກພາກສ່ວນ ຈົ່ງມີສ່ວນຮ່ວມ ໃນການຜະລິດສະບຽງອາຫານ ໃຫ້ມີປະສິດທິພາບ ແລະ ຍືນຍົງ.

ແຫຼ່ງຂ່າວ: ຂປລ

ບໍລິສັດ ຊີໂນ-ອາກຣີ ໂປຕາສ ເຂົ້າຮ່ວມມະຫາກໍາສີມືຫັດຖະກໍາລາວ

ໂທລະໂຄ່ງ THOLAKHONG

October 20, 2022

ວັນທີ 17 ຕຸລາ ຜ່ານມາ, ທ່ານ ທົງ ຢົງເຮີງ ປະທານ ແລະ ອໍານວຍການບໍລິສັດ ຊີໂນ-ອາກຣີ ໂປຕາສຈໍາກັດ (ຊີໂນ-ອາກຣີ ໂປຕາສ) ໂດຍໄດ້ຮັບການເຊື້ອເຊີນຈາກ ທ່ານ ມະໄລທອງ ກົມມະສິດ ລັດຖະມົນຕີກະຊວງອຸດສາຫະກໍາ ແລະ ການຄ້າ ໄດ້ເຂົ້າຮ່ວມພິທີເປີດມະຫາກໍາສີມືຫັດຖະກໍາລາວ ຄັ້ງທີ 21 (ຕໍ່ໄປນີ້ເອີ້ນຫຍໍ້ວ່າ “ງານວາງສະແດງ”) ທີ່ໄດ້ຈັດຂຶ້ນທີ່ສູນການຄ້າ ລາວ-ໄອເຕັກ, ພ້ອມທັງໄດ້ໃຫ້ການສະໜັບສະໜູນດ້ານງົບປະມານແກ່ສະມາຄົມຫັດຖະກໍາລາວ, ທີ່ເປັນເຈົ້າພາບຈັດງານເປັນຈໍານວ 20.000.000 ກີບ. ງານດັ່ງກ່າວ, ໄດ້ຮັບກຽດເຂົ້າຮ່ວມໂດຍ ທ່ານ ພັນຄໍາ ວິພາວັນ ນາຍົກລັດຖະມົນຕີແຫ່ງ ສປປ ລາວ, ທ່ານ ມະໄລທອງ ກົມມະສິດ, ລັດຖະມົນຕີກະຊວງອຸດສາຫະກໍາ ແລະ ການຄ້າ, ທ່ານ ນາງ ສຸວິຕາ ປະເສີດ ປະທານສະມາຄົມ ຫັດຖະກໍາລາວ ແລະ ຍັງມີບັນດາທູຕານຸທູດ ແລະ ເພື່ອນມິດຈາກພາກທຸລະກິດ ອຸດສາຫະກໍາ-ການຄ້າ ກໍໄດ້ເຂົ້າຮ່ວມ.

ງານມະຫາກໍາຄັ້ງນີ້, ຈັດໂດຍ ສະມາຄົມ ຫັດຖະກໍາລາວ ໂດຍຈະຈັດຂຶ້ນປີລະຄັ້ງ, ເປັນການຮວບຮວມສິນຄ້າຫັດຖະກໍາຜ້າໄໝລາວ, ຜະລິດຕະພັນເຮັດດ້ວຍໄມ້, ເຄື່ອງປະດັບ, ຜະລິດ ຕະພັນກະສິກໍາ ແລະ ອື່ນໆ, ຕາມທິດທາງນະໂຍບາຍຂອງລັດຖະບານລາວ “ໜຶ່ງເມືອງໜຶ່ງຜະລິດ ຕະພັນ” ເພື່ອເປັນການຊຸກຍູ ແລະ ຍົກລະດັບສີມືຫັດຖະກໍາລາວ ໃຫ້ມີຄຸນນະພາບຂຶ້ນເລື້ອຍໆ, ເຊິ່ງເປັນບາດກ້າວລິເລີ່ມທີ່ສໍາຄັນຂອງການພັດທະນາ. ໃນປີນີ້ ຄາດວ່າມີບັນດາໜ່ວຍງານຕ່າງໆເຂົ້າຮ່ວມງານວາງສະແດງຫລາຍກ່ວາ 230 ຮ້ານ, ຊຶ່ງມີຈໍານວນຫລາຍກວ່າປີຜ່ານມາ, ພ້ອມນັ້ນ ຄຸນນະພາບຂອງຜະລິດຕະພັນ ຖ້າທຽບໃສ່ປີທີ່ຜ່ານມາຖືວ່າມີການຍົກລະດັບຂຶ້ນຫລາຍ, ງານວາງສະ ແດງ ຈະສົ່ງເສີມການສົ່ງອອກຜະລິດຕະພັນ ສີມືຫັດຖະກໍາລາວ ທີ່ມີຄຸນນະພາບ, ເປັນການຂັບເຄື່ອນການພັດທະນາເສດຖະກິດພາຍໃນທ້ອງຖິ່ນ ແລະ ສົ່ງເສີມເສດຖະກິດຂອງ ສປປ ລາວ.

ພິທີເປີດໄດ້ເລີ່ມຕົ້ນ ດ້ວຍການສະແດງຂອງກອງດຸລິຍາງ ຈາກຄະນະຊາວໜຸ່ມ ແລະ ການ ສະແດງສິນລະປະຈາກສະມາຄົມ ຫັດຖະກຳລາວ, ບັນດາແຂກທີ່ມີກຽດໄດ້ເຂົ້າຮ່ວມກັນຕັດແຖບຜ້າ ແລະ ທ່ານນາຍົກ ພັນຄໍາ ວິພາວັນ ໄດ້ລັ່ນຄ້ອງ 9 ບາດ ເພື່ອເປັັນສີລິມຸງຄຸນໃນການປະກາດເປີດງານມະຫາກໍາສີມືຫັດຖະກຳລາວ ຄັ້ງທີ 21 ຢ່າງເປັນທາງການ.

ໂອກາດນີ້, ທ່ານພັນຄໍາ ວິພາວັນ ກໍໄດ້ຢ້ຽມຊົມສະຖານທີ່ວາງສະແດງຕ່າງໆ, ໃນແຕ່ລະຫ້ອງວາງສະແດງ ທີ່ທ່ານ ນາຍົກ ໄດ້ເຂົ້າຢ້ຽມຊົມ ທ່ານກໍໄດ້ໃຫ້ຄວາມສົນໃຈລາຍລະອຽດກ່ຽວກັບຜະລິດຕະພັນ, ທັງໄດ້ສຳພັດ ແລະ ກວດເບິ່ງຄຸນນະພາບຂອງຜະລິດຕະພັນ, ໄດ້ສອບຖາມກ່ຽວກັບຂັ້ນຕອນການຜະລິດແປຮູບ ແລະ ການຈຳໜ່າຍ, ຊຶ່ງສະແດງໃຫ້ເຫັນເຖິງຄວາມເອົາໃຈໃສ່ ແລະສະໜັບສະໜູນຂອງທ່ານນາຍົກລັດຖະມົນຕີ ທີ່ມີຕໍ່ການພັດທະນາຫັດຖະກຳລາວ.

ໃນລະຫວ່າງການຢ້ຽມຊົມງານວາງສະແດງຂອງທ່ານນາຍົກລັດຖະມົນຕີ, ທ່ານ ທົງຢົງເຮີງ ກໍໄດ້ລາຍງານໂດຍຫຍໍ້ສະພາບຄວາມຄືບໜ້າຂອງໂຄງການຂອງ ບໍລິສັດ ຊີໂນ-ອາກຣີ ໂປຕາສ ຕໍ່ທ່ານນາຍົກ, ເມື່ອທ່ານນາຍົກໄດ້ຮັບຊາບວ່າບໍລິສັດ ຊີໂນ-ອາກຣີ ໂປຕາສ ໄດ້ເຕີບໂຕກາຍເປັນວິສາຫະກິດຜະລິດຝຸ່ນໂປຕາສ ທີ່ໃຫຍ່ທີ່ສຸດຢູ່ ສປປ ລາວ ແລະ ໃນພາກພື້ນອາຊີຕາເວັນ ອອກສ່ຽງໃຕ້, ທ່ານ ກໍໄດ້ງຶກຫົວສະແດງຄວາມພາກພູມໃຈເປັນຢ່າງຍິ່ງ, ພ້ອມທັງເນັ້ນໜັກວ່າ ບໍລິສັດ ຕ້ອງສືບຕໍ່ຮັກສາຄວາມໄວຂອງການພັດທະນາ ແລະ ເຮັດການພັດທະນາໂຄງການເກືອໂປຕາສຂອງລາວໃຫ້ດີຂຶ້ນຕື່ມອີກກ້າວໜຶ່ງ. ທ່ານ ທົງ ຢົງເຮີງ ໄດ້ສະແດງຄວາມຂອບໃຈຕໍ່ທ່ານນາຍົກ ທີ່ໄດ້ໃຫ້ການເອົາໃຈໃສ່ ແລະ ສະໜັບສະໜູນໂຄງການຝຸ່ນໂປຕາສຂອງ ບໍລິສັດ ຊີໂນ-ອາກຣີ ແລະ ໄດ້ກ່າວວ່າຊີໂນ-ອາກຣີ ໂປຕາສ ຈະໃຊ້ທຸກຄວາມພະຍາຍາມ ເພື່ອສ້າງໃຫ້ກາຍເປັນວິສາຫະກິດຜະລິດຝຸ່ນໂປຕາສ ທີ່ໃຫຍ່ທີ່ສຸດໃນອາຊີ.

ຫລັງຈາກນັ້ນ, ທ່ານ ທົງຢົງເຮີງ ຍັງໄດ້ໂອ້ລົມຮ່ວມກັບລັດຖະມົນຕີ, ຮອງລັດຖະມົນຕີກະຊວງອຸດສະຫະກຳ ແລະ ການຄ້າ, ທ່ານປະທານ ແລະ ຮອງປະທານສະມາຄົມຫັດຖະກຳ ຢ່າງໄມຕີຈິດມິດຕະພາບ. ທ່ານ ມະໄລທອງ ກົມມະສິດ ໄດ້ສະແດງຄວາມຂອບໃຈບໍລິສັດ ຊີໂນ-ອາກຣີ ທີ່ເຂົ້າຮ່ວມໃນພິທີເປີດມະຫາກໍາສີມືຫັດຖະກໍາລາວຄັ້ງນີ້. ນອກນີ້, ທ່ານ ທົງ ຢົງເຮີງ ໄດ້ກ່າວຕື່ມອີກວ່າບໍລິສັດ ຕັ້ງໝັ້ນທີ່ຈະພັດທະນາເປັນເວລາຍາວນານຢູ່ລາວ ກໍຕ້ອງປະຕິບັດໜ້າທີ່ຮັບ ຜິດຊອບທາງສັງຄົມ. ບໍລິສັດ ຊີໂນ-ອາກຣີ ບໍ່ພຽງແຕ່ຈະຊຸກຍູ້ການພັດທະນາເສດຖະກິດພາຍໃນທ້ອງຖິ່ນຂອງແຂວງຄຳມ່ວນ ເທົ່ານັ້ນ, ແຕ່ຍັງຫວັງທີ່ຈະປະກອບສ່ວນກຳລັງແຮງເຂົ້າໃນການພັດທະນາຂະແໜງອຸດສາຫະກໍາຕ່າງໆ ເຊິ່ງລວມທັງ ຂະແໜງຫັດຖະກຳ; ບໍລິສັດຈະປະຕິບັດຕາມທິດຊີ້ນຳຂອງລັດຖະມົນຕີກະຊວງອຸດສະຫະກຳ ແລະ ການຄ້າ, ປະສານສົມທົບກັບ ສະມາຄົມ ຫັດຖະກຳລາວ ເພື່ອພະຍາຍາມຊ່ວຍກັນໃຫ້ຜະລິດຕະພັນຫັດຖະກຳ ທີ່ມີຄຸນນະພາບຂອງລາວໄດ້ໄປຈຳໜ່າຍຢູ່ ສປ ຈີນ, ບັນດາປະເທດ ອາຊີອາຄະເນ ແລະ ປະເທດອື່ນໆໃນຂອບເຂດທົ່ວໂລກ, ເພື່ອໃຫ້ຫລາຍໆຄົນ ແລະ ຫລາຍໆປະເທດ ໄດ້ເຂົ້າໃຈ ແລະ ຮູ້ຈັກປະເທດລາວຫລາຍຂຶ້ນໂ ດຍຜ່ານສີນຄ້າຫັດຖະກຳ, ຈາກສິ່ງດັ່ງກ່າວ ກໍຈະດຶງດູດນັກລົງທຶນເຂົ້າມາລົງທຶນ ແລະ ພັດທະນາໃນຂະແໜງການຕ່າງໆຢູ່ລາວໄດ້ຫລາຍຍິ່ງຂຶ້ນ ເຊິ່ງຈະຊ່ວຍຂັບເຄື່ອນການພັດທະນາເສດຖະກິດຂອງ ສປປ ລາວ.

ການແຂ່ງຂັນຢູໂດ ທົ່ວປະເທດ ຊີງຂັນລັດຖະມົນຕີ ສສກ 2022

ໂທລະໂຄ່ງ THOLAKHONG

October 20, 2022

ສະໂມສອນ ຢູໂດ ວຽງຈັນ ສາມາດຍາດມາໄດ້ເຖິງ 6 ຫຼຽນຄຳ, 11 ຫຼຽນເງິນ ແລະ 3 ຫຼຽນທອງ ເປັນອັນດັບໜຶ່ງ ຄອງເຈົ້າຫຼຽນຄຳ ໃນການແຂ່ງຂັນຢູໂດ ຊີງແຊ໋ມທົ່ວປະເທດ ຄັ້ງທີ 11 ປະຈຳປີ 2022 ຊີງຂັນທ່ານລັດຖະມົນຕີ ກະຊວງສຶກສາທິການ ແລະ ກິລາ (ສສກ) ໄປຄອງ ຂະນະທີ່ຮອງເຈົ້າຫຼຽນຄຳ ຕົກເປັນຂອງສະໂມສອນ ຢູໂດ ສະຫວັນນະເຂດ ແລະ ອັນດັບທີ 3 ສະຖາບັນກິລາ-ກາຍະກຳ.

ສະຫະພັນກິລາຢູໂດແຫ່ງຊາດ ຈັດການແຂ່ງຂັນຢູໂດ ຊີງແຊ໋ມທົ່ວປະເທດ ຄັ້ງທີ 11 ປະຈຳປີ 2022 ຊີງຂັນທ່ານລັດຖະມົນຕີ ກະຊວງສຶກສາທິການ ແລະ ກິລາ (ສສກ) ໃນລະຫວ່າງວັນທີ 15-16 ຕຸລາ ຜ່ານມາ ທີ່ສູນໂບໂດເຊັນເຕີ (ຂ້າງສະໜາມກິລາເຈົ້າອານຸວົງ), ໃຫ້ກຽດເຂົ້າຮ່ວມມອບລາງວັນຂອງ ທ່ານ ນາງ ຂັນທະລີ ສີຣິພົງພັນ ຮອງລັດຖະມົນຕີ ກະຊວງສຶກສາທິການ ແລະ ກິລາ, ທ່ານ ສົມພູ ພົງສາ ຮອງປະທານຄະນະກຳມະການໂອແລມປິກແຫ່ງຊາດລາວ, ທ່ານ ແສງພອນ ພົນອາມາດ ຫົວໜ້າກົມກິລາລະດັບສູງ ກະຊວງ ສສກ ແລະ ທ່ານ ເຂັມຊາດ ພິລາພັນເດຊ ປະທານສະຫະພັນຢູໂດແຫ່ງຊາດລາວ ພ້ອມດ້ວຍຄະນະບໍລິຫານງານ, ຜູ້ອຳນວຍການສະຖາບັນກິລາ-ກາຍະກຳ, ຕາງໜ້າສະຖານທູດຍີ່ປຸ່ນ, ບັນດາຜູ້ໃຫ້ການສະໜັບສະໜູນ, ຄະນະນຳ, ຄູຝຶກ ແລະ ນັກກິລາ ແຕ່ລະສະໂມສອນພາຍໃນ ແລະ ຕ່າງປະເທດ ຕະຫຼອດຮອດກອງເຊຍ ແລະ ສື່ມວນຊົນ.
ການແຂ່ງຂັນລາຍການດັ່ງກ່າວ ຈັດຂຶ້ນກໍເພື່ອເປັນການສ້າງໂອກາດໃຫ້ນັກກິລາຮຸ່ນສືບທອດມີຄວາມສາມາດກ້າສະແດງອອກໃນເວທີການແຂ່ງຂັນ ແນໃສ່ສ້າງນັກກິລາກຽມເຂົ້າຮ່ວມການແຂ່ງຂັນກິລາແຫ່ງຊາດ ຄັ້ງທີ 11 ທີ່ແຂວງຊຽງຂວາງ ເປັນເຈົ້າພາບ ທ້າຍປີນີ້ ພ້ອມທັງເປັນການຄັດເລືອກນັກກິລາດີເດັ່ນກຽມຕາງໜ້າທີມຊາດລາວ ຮ່ວມງານກິລາຊີເກມ ຄັ້ງທີ 31 ທີ່ປະເທດກຳປູເຈຍ ປີ 2023 ແລະ ການແຂ່ງຂັນກິລາເອຊຽນເກມ ທີ່ຫາງໂຈວ ສປ ຈີນ ໃນປີ 2023 ອີກດ້ວຍ.

ລາຍການນີ້ ມີນັກກິລາຢູໂດເຂົ້າຮ່ວມ 121 ຄົນ, ຍິງ 33 ຄົນ ຈາກ 16 ສະໂມສອນ ແບ່ງເປັນ 30 ຮຸ່ນ ປະກອບມີ ປະເພດຮຸ່ນອະນຸຊົນ ຕໍ່າກວ່າ 12 ປີ ມີ 6 ຮຸ່ນນ້ຳໜັກ, ປະເພດເຍົາວະຊົນ ຮຸ່ນອາຍຸ 13-15 ປີ 10 ຮຸ່ນນໍ້າໜັກ, ປະເພດເຍົາວະຊົນ ອາຍຸ 16-20 ປີ 12 ຮຸ່ນນໍ້າໜັກ ແລະ ປະເພດທົ່ວໄປ ອາຍຸ 21 ປີ ຂຶ້ນໄປ 13 ຮຸ່ນນໍ້າໜັກ. ນອກຈາກນັ້ນ, ຍັງມີການຊີງຂັນຊະນະເລີດ ໃນປະເພດຕ່າງໆ ເປັນຕົ້ນແມ່ນຂັນປະເພດທີມຄະແນນລວມດີເດັ່ນ 1 ຂັນ ຂອງທ່ານ ລັດຖະມົນຕີ ສສກ ແລະ ຂັນປະເພດທີມຊະນະເລີດ 1 ຂັນ ຂອງທ່ານປະທານສະຫະພັນກິລາຢູໂດແຫ່ງຊາດ ພ້ອມທັງຂັນລາງວັນປະເພດນັກກິລາດີເດັ່ນ, ຂັນລາງວັນນັກກິລາດີເດັ່ນຊາຍ ປະເພດອາຍຸ -12 ປີ, ຂັນລາງວັນນັກກິລາດີເດັ່ນຍິງ ປະເພດ ອາຍຸ -12 ປີ, ຂັນລາງວັນນັກກິລາດີເດັ່ນຊາຍ ປະເພດ ອາຍຸ 13-15 ປີ, ຂັນລາງວັນນັກກິລາດີເດັ່ນຍິງ ປະເພດ ອາຍຸ 13-15 ປີ, ຂັນລາງວັນນັກກິລາດີເດັ່ນຊາຍ ປະເພດ ອາຍຸ 16-20 ປີ, ຂັນລາງວັນນັກກິລາດີເດັ່ນຍິງ ປະເພດ ອາຍຸ 16-20 ປີ, ຂັນລາງວັນນັກກິລາດີເດັ່ນຊາຍ ປະເພດ ອາຍຸ 21 ປີຂຶ້ນໄປ ແລະ ຂັນລາງວັນນັກກິລາດີເດັ່ນຊາຍ ປະເພດ ອາຍຸ 21 ປີຂຶ້ນໄປ.
ຜ່ານການແຂ່ງຂັນປະກົດວ່າ: ສະໂມສອນ ວຽງຈັນ ສາມາດຄອງເຈົ້າຫຼຽນຄຳ ດ້ວຍການກວາດທັງໝົດ 6 ຫຼຽນຄຳ, 11 ຫຼຽນເງິນ ແລະ 3 ຫຼຽນທອງ ຂະນະທີ່ຮອງເຈົ້າຫຼຽນຄຳ ຕົກເປັນຂອງສະໂມສອນ ຢູໂດ ສະຫວັນນະເຂດ ຍາດໄດ້ 6 ຫຼຽນຄຳ, 6 ຫຼຽນເງິນ ແລະ 4 ຫຼຽນທອງ, ອັນດັບທີ 3 ສະຖາບັນກິລາ-ກາຍະກຳ ຍາດໄດ້ 5 ຫຼຽນຄຳ, 2 ຫຼຽນເງິນ ແລະ 8 ຫຼຽນທອງ, ອັນດັບທີ 4 ສະໂມສອນ Ippon Judo Club ຈາກປະເທດໄທ ຍາດໄດ້ 5 ຫຼຽນຄຳ, 2 ຫຼຽນເງິນ ແລະ 2 ຫຼຽນທອງ, ອັນດັບທີ 5 ສະໂມສອນ Blue Tree Phuket ຈາກປະເທດໄທ ຍາດໄດ້ 5 ຫຼຽນຄຳ, 1 ຫຼຽນເງິນ ແລະ ອັນດັບທີ 6 ສະໂມສອນ ກະຊວງປ້ອງກັນປະເທດ ຍາດໄດ້ 2 ຫຼຽນຄຳ ແລະ 1 ຫຼຽນເງິນ ພິເສດນອກຈາກນີ້ ກໍຍັງມີການແຂ່ງຂັນຢູໂດປະເພດຕໍ່ສູ້ທີມ ຜົນປະກົດວ່າ ຊະນະເລີດ ຕົກເປັນຂອງ ສະໂມສອນ Ippon Judo Club, ອັນດັບທີ 2 ສະໂມສອນ ວຽງຈັນ ແລະ ອັນດັບທີ 3 ສະໂມສອນ Blue Tree Phuket.
ລາຍການດັ່ງກ່າວ ແມ່ນໄດ້ຮັບການສະໜັບສະໜູນຈາກ ບໍລິສັດ ເຄພີ ຈຳກັດ, ບໍລິສັດ ລາວໂຕໂຢຕ້າ ບໍລິການ ຈຳກັດ, ບໍລິສັດ ເຄພີ 3G ໂນມຸນ, ບໍລິສັດ ຄຣູສະປອດ ຈຳກັດ, ບໍລິສັດ ເຄພີ ບິວ ຈຳກັດ (ສະຫວັນນະເຂດ), ພະແນກຂາຍນ້ຳມັນເຄື່ອງແຊວ ເຄພີ, ພະແນກຢາງ ບຣີດສະໂຕນ ເຄພີ, ບໍລິສັດ ທິບພະຍະປະກັນໄພ ຈຳກັດ, ບໍລິສັດ ຄູໂບຕ້າ ລາວໂຊນ ຈຳກັດ, ບໍລິສັດ ລາວໂທລະຄົມ ມະນາຄົມ ມະຫາຊົນ, ບໍລິສັດ ເທບຈະເລີນ ຊະມຸນຕີ, KSP, ບໍລິສັດ ອີຊູຊຸ ລາວ, KP Logistic, ບໍລິສັດ ອີໂນະຈິໂອະ ເຄພີ ລາວ ຈຳກັດ, ບໍລິສັດ ຟ້າໃຫຍ່ ມີເດຍ ຈຳກັດ.

ແຫຼ່ງຂ່າວ: ໜັງສືພິມສຶກສາ-ກິລາລາຍວັນ

ແຂວງຈຳປາສັກ ຮັບຮອງບ້ານພັດທະນາ ໄດ້ 576 ບ້ານ

ໂທລະໂຄ່ງ THOLAKHONG

October 20, 2022

ປັດຈຸບັນ ແຂວງຈຳປາສັກໄດ້ຢັ້ງຢືນ ແລະ ຮັບຮອງບ້ານພັດທະນາ ຈຳນວນ 576 ບ້ານ ກວມ 89,9% ຂອງຈຳນວນບ້ານທັງໝົດທົ່ວແຂວງ, ສ້າງບ້ານໃຫຍ່ເປັນຕົວເມືອງນ້ອຍ ໄດ້ 25 ບ້ານ, ໄດ້ກຳນົດເປັນຈຸດສຸມແຜນສ້າງບ້ານພັດທະນາໃຫ້ປະຊາຊົນຢູ່ດີກິນດີ ຈຳນວນ 20 ບ້ານ, ໃນຂະນະດຽວກັນໄດ້ຫັນເອົາ ພະນັກງານລົງກໍ່ສ້າງຮາກຖານການເມືອງ ຈຳນວນ 1.158 ສະຫາຍ ແລະ ສຸມໃສ່ນຳພາຈັດຕັ້ງປະຕິບັດຕາມ 6 ເນື້ອໃນ 9 ມາດຖານ ໂດຍຜ່ານການຈັດຕັ້ງປະຕິບັດຕົວຈິງໄດ້ຮັບຜົນສຳເລັດຫຼາຍດ້ານ.ສະຫາຍ ວິໄລວົງ ບຸດດາຄຳ ເລຂາພັກແຂວງ ເຈົ້າແຂວງຈຳປາສັກ ໄດ້ປະກອບຄຳເຫັນ ໃນຫົວຂໍ້” ການກໍ່ສ້າງຮາກຖານການເມືອງ, ພັດທະນາຊົນນະບົດຮອບດ້ານ ຕິດພັນກັບການສ້າງບ້ານພັດທະນາ ປະຊາຊົນຢູ່ດີກິນດີ ຢູ່ແຂວງຈຳປາສັກ” ຕໍ່ກອງປະຊຸມ ສະຫຼຸບຕີລາຄາວຽກງານກໍ່ສ້າງຮາກຖານການເມືອງ ຕິດພັນກັບການພັດທະນາຊົນນະບົດ ແລະ ວຽກງານ 3 ສ້າງ ໃຫ້ຮູ້ວ່າ:

ໃນໄລຍະຜ່ານມາ ແຂວງຈຳປາສັກໄດ້ເອົາໃຈໃສ່ສຶກສາອົບຮົມ ການເມືອງ-ແນວຄິດໃຫ້ແກ່ຄະນະພັກ, ສະມາຊິກພັກ, ອົງການຈັດຕັ້ງຕ່າງໆ ແລະ ປະຊາຊົນດ້ວຍການຈັດຕັ້ງເຜີຍແຜ່ເຊື່ອມຊຶມແນວທາງນະໂຍບາຍ, ບັນດາມະຕິ, ຄໍາສັ່ງຕ່າງໆຂອງພັກ-ລັດ ຕິດພັນກັບ ການຈັດຕັ້ງປາຖະກະຖາເລົ່າມູນເຊື້ອວັນສໍາຄັນຂອງພັກ-ຂອງຊາດ ຢ່າງເປັນລະບົບຕໍ່ເນື່ອງ, ຄຽງຄູ່ກັນນັ້ນ ກໍໄດ້ຖືເປັນສໍາຄັນຕໍ່ການປັບປຸງຄວາມເຂັ້ມແຂງການຈັດຕັ້ງໃນລະບົບການເມືອງຢູ່ຂັ້ນຮາກຖານ ໂດຍສຸມໃສ່ກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ຕາມ 5 ເນື້ອ ໃນເປັນບັນຫາໃຈກາງ.ໃນນັ້ນໄດ້ເອົາໃຈໃສ່ນໍາພາ-ຊີ້ນໍາຕໍ່ການກໍ່ສ້າງ ແລະ ປັບປຸງການຈັດຕັ້ງການຜະລິດ ແລະ ການບໍລິການ ໂດຍສຸມໃສ່ຈັດຕັ້ງກຸ່ມການຜະລິດ, ສະຫະກອນການຜະລິດ ແລະ ການບໍລິການຢູ່ຂັ້ນບ້ານ ໄປຄຽງຄູ່ກັບການກໍ່ສ້າງພື້ນຖານໂຄງລ່າງທີ່ຈໍາເປັນຕິດພັນ ກັບການຍູ້ແຮງການຜະລິດເປັນສິນຄ້າ, ການບໍລິການ ດ້ວຍການປຸກລະດົມບັນດາຫົວໜ່ວຍທຸລະກິດ, ຜູ້ປະກອບການທັງພາຍໃນ ແລະ ຕ່າງປະເທດ ສົມທົບກັບກໍາລັງແຮງຂອງປະຊາຊົນ ຊຶ່ງເປັນການ ປະກອບສ່ວນເຂົ້າໃນການພັດທະນາບ້ານ,

ໃນນັ້ນ, ໄດ້ສົ່ງເສີມ ແລະ ສ້າງເປັນກຸ່ມການຜະລິດ, ສະຫະກອນ ໄດ້ມີການຂະຫຍາຍຕົວເພີ່ມຂຶ້ນ, ທົ່ວແຂວງມີກຸ່ມການຜະລິດກະສິກໍາ 186 ກຸ່ມ, ມີ 14 ສະຫະກອນ ແລະ ມີ 157 ຟາມ, ອັນທີ່ພົ້ນເດັ່ນແມ່ນ ກຸ່ມຜະລິດເຂົ້າເປັນສິນຄ້າ ບ້ານປາໂມກ, ກຸ່ມຜະລິດກາເຟ ແລະ ພືດຜັກ ບ້ານກອງຕຸ່ນ, ກຸ່ມຜະລິດຕະພັນປາແດກ ບ້ານໂນນສະຫວ່າງ ນະຄອນປາກເຊ, ກຸ່ມການຜະລິດເສັ້ນເຝີບ້ານດອນຂະເໝົາ, ກຸ່ມການຜະລິດຫັດຖະກໍາ ຈັກສານບ້ານໂພນສະອາດ, ສະຫະກອນຜະລິດກາເຟພູພຽງບໍລິເວນ, ສະຫະກອນສິນເຊື່ອເງິນຝາກປະຢັດ ກະດັນ ຮຸ່ງເຮືອງ, ສະຫະກອນສິນເຊື່ອເງິນຝາກປະຢັດ ບ້ານໜອງໄຮໂຄກ ແລະ ສ້າງໄດ້ຜະລິດຕະພັນສິນຄ້າ ໂອດັອບ ຈໍານວນ 32 ຫົວໜ່ວຍ, 96 ຜະລິດຕະພັນ ລວມມູນຄ່າຜະລິດຕະພັນທັງໝົດ 30 ຕື້ກວ່າກີບ, ມູນຄ່າການຈໍາໜ່າຍ 39 ຕື້ກວ່າກີບ; ທົ່ວແຂວງມີກອງທຶນພັດທະນາບ້ານທັງໝົດ 474 ກອງທຶນ, ມີສະມາຊິກທັງໝົດ 48.340 ຄົນ, ມີທຶນໝູນວຽນທັງໝົດ 43 ຕື້ກວ່າກີບ; ໃນນັ້ນ, ໄດ້ຍົກລະດັບ ກອງທຶນທີ່ມີຄວາມເຂັ້ມແຂງເປັນສະຫະກອນສິນເຊື່ອເງິນຝາກປະຢັດ ຈໍານວນ 8 ແຫ່ງ ໃນ 5 ເມືອງ ທີ່ຂຶ້ນກັບການຄຸ້ມຄອງຂອງທະນາຄານແຫ່ງ ສປປ ລາວ ປະຈໍາພາກໃຕ້, ໄດ້ເອົາ ໃຈໃສ່ກໍ່ສ້າງ ແລະ ປັບປຸງກໍາລັງການຜະລິດຢູ່ ຂັ້ນຮາກຖານໃຫ້ມີຄວາມເຂັ້ມແຂງ ໂດຍສຸມໃສ່ການຈັດຕັ້ງຝຶກອົບຮົມ, ສະໜອງຂໍ້ມູນຂ່າວສານ, ເຕັກນິກວິທະຍາສາດເຂົ້າໃນການຜະລິດ, ການປູກ, ການລ້ຽງ, ການປຸງແຕ່ງເປັນສິນຄ້າ ແລະ ການບໍລິການ.

ພ້ອມນັ້ນ, ໄດ້ຫັນເອົາພະນັກງານວິຊາການລົງຊ່ວຍປະຊາຊົນ ນໍາພາຈັດຕັ້ງປະຕິບັດຕົວຈິງ ໂດຍການນໍາໃຊ້ທ່າແຮງດ້ານຊັບພະຍາກອນທໍາມະຊາດກັບທີ່; ທົ່ວແຂວງມີສູນບໍລິການດ້ານເຕັກນິກ ກະສິກໍາ ຈໍານວນ 8 ສູນ, 2 ສະຖານີ, ໃນປີ 2021 ທີ່ຜ່ານມາ ສາມາດຜະລິດເຂົ້າໄດ້ 444.768 ໂຕນ, ຜະລິດກາເຟໄດ້ 85.878 ໂຕນ, ຜົນຜະລິດຢາງພາລາ 53.901 ໂຕນ, ມັນຕົ້ນ 819.835 ໂຕນ, ໝາກມ່ວງຫິມມະພານ 12.172 ໂຕນ, ໝາກອາໂວກາໂດ 1.911 ໂຕນ, ປູກພືດຜັກຕ່າງໆ ເປັນສິນຄ້າ ຜົນຜະລິດໄດ້ 1,5 ລ້ານໂຕນ, ການສະໜອງຊີ້ນ, ປາ, ອາຫານ ແລະ ອື່ນໆ ສະເລ່ຍໄດ້ 63,54 kg/ຄົນ, ບ້ານໄດ້ນໍາໃຊ້ໄຟຟ້າໃນລະບົບ 641 ບ້ານ ເທົ່າກັບ 100%, ທົ່ວແຂວງມີໄຟຟ້າ ຊົມໃຊ້ 129.099 ຫຼັງຄາເຮືອນ ເທົ່າກັບ 92,92%, ມີເສັ້ນທາງທຽວໄດ້ 2 ລະດູຢ່າງສະດວກ 633 ບ້ານ (98,75%), ສາມາດນໍາໃຊ້ລະບົບສື່ສານໂທລະຄົມມະນາຄົມໃນທົ່ວແຂວງ ກວມ 98%.

ແຫຼ່ງຂ່າວ: ປະຊາຊົນ

ງານມະຫາກຳ ສີມືຫັດຖະກຳລາວ ຄັ້ງທີ 21 ປີ 2022

ໂທລະໂຄ່ງ THOLAKHONG

October 19, 2022

ງານມະຫາກຳສີມືຫັດຖະກຳລາວ ມີ 230 ຮ້ານເຂົ້າຮ່ວມວາງສະແດງມີຈຳນວນ 230 ຮ້ານ ເຂົ້າຮ່ວມງານມະຫາກຳ ສີມືຫັດຖະກຳລາວ ຄັ້ງທີ 21 ປີ 2022 ພາຍໃຕ້ຄໍາຂວັນ: ສີໄມ້ລາຍມືຄືອຸທິຍານແຫ່ງການທ່ອງທ່ຽວ “ສະເໜຜ້າບ່ຽງລາວ” ປີນີ້ ຄົບຮອບ 25 ປີ ວັນສ້າງຕັ້ງສະມາຄົມຫັດຖະກຳລາວ.

ພິທີເປີດງານມະຫາກຳ ສີມືຫັດຖະກຳລາວ ຄັ້ງທີ 21 ປີ 2022 ແລະ ສະເຫຼີມສະຫຼອງວັນສ້າງຕັ້ງສະມາຄົມ ຫັດຖະກຳລາວ ຄົບຮອບ 25 ປີ ໄດ້ຈັດຂຶ້ນໃນວັນທີ 17 ຕຸລານີ້ ທີ່ສູນວາງສະແດງສິນຄ້າລາວ-ໄອເຕັກ, ນະຄອນຫຼວງວຽງຈັນ ໂດຍໃຫ້ກຽດເຂົ້າຮ່ວມຂອງ ທ່ານ ພັນຄຳ ວິພາວັນນາຍົກລັດຖະມົນຕີ, ທ່ານ ປ້າ ນາລີ ສີສຸລິດ ພັນລະຍາ ຂອງທ່ານ ທອງລຸນ ສີສຸລິດ ປະທານປະເທດແຫ່ງ ສປປ ລາວ, ປະທານຄະນະທີ່ປຶກສາສະມາຄົມຫັດຖະກຳລາວ, ທ່ານ ມະໄລທອງ ກົມມະສິດລັດຖະມົນຕີກະຊວງ ອຸດສາຫະກຳ ແລະ ການຄ້າ, ພ້ອມດ້ວຍແຂກຖືກເຊີນ, ບັນດາບໍລິສັດ ແລະ ຫົວໜ່ວຍທຸລະກິດເຂົ້າຮ່ວມ.ທ່ານ ພູທອງ ໄຊສະນິດ ຮອງປະທານສະມາຄົມຫັດຖະກຳລາວ ລາຍງານວ່າ: ງານມະຫາກໍາສີມືຫັດຖະກໍາລາວ ຄັ້ງທີ 21, ເປີດຂຶ້ນຂຶ້ນແຕ່ 15-23 ຕຸລາ 2022, ພາຍໃຕ້ຄໍາຂວັນ: ສີໄມ້ລາຍມື ຄື ອຸທິຍານແຫ່ງການທ່ອງທ່ຽວ “ສະເໜ່ຜ້າບ່ຽງລາວ” ຖືເປັນບຸນປາງໃຫຍ່ສໍາລັບຊາວຊ່າງ ແລະ ຜູ້ປະກອບການດ້ານຫັດຖະກໍາລາວ, ມີຈຸດປະສົງຫຼັກ ເພື່ອສະເຫຼີມສະຫຼອງ “ວັນຫັດຖະກໍາລາວ ວັນທີ 1 ພະຈິກ” ທີ່ຈະມາເຖິງໃນມໍ່ໆນີ້ ແລະ ສະເຫຼີມສະຫຼອງວັນສ້າງຕັ້ງສະມາຄົມຫັດຖະກໍາລາວ ຄົບຮອບ 25 ປີ, ເພື່ອສ້າງກາລະໂອກາດໃຫ້ຊຸມຊົນ ແລະ ລູກຄ້າ ຜູ້ມາທ່ຽວຊົົມ ສາມາດຊື້, ໄດ້ພົບ-ໄດ້ເຫັນຄວາມຫຼາກຫຼາຍຂອງເຄື່ອງຫັດຖະກໍາລາວ, ສ້າງຄວາມປະທັບໃຈ ແລະ ຄວາມຫຼົງໄຫຼກັບມະຫັດສະຈັນສີໄມ້ລາຍມືຂອງນາຍຊ່າງຫັດຖະກໍາລາວເຮົາ, ເພື່ອເຕົ້າໂຮມຄວາມສາມັກຄີບັນດາຊາວຊ່າງຫັດຖະກຳທຸກໆທ້ອງຖິ່ນ ໃນທົ່ວປະເທດ ພ້ອມກັນອະນຸລັກ ແລະ ສົ່ງເສີມເຄື່ອງຫັດຖະກໍາ ທີ່ມີລັກສະນະເປັນມູນເຊື້ອ, ສົ່ງເສີມພູມປັນຍາ, ຂຸດຄົ້ນທ່າແຮງທາງດ້ານຫັດຖະກຳຢູ່ທຸກທ້ອງຖິ່ນ ປະກອບສ່ວນເຂົ້າໃນການສ້າງລາຍຮັບ ແລະ ພັດທະນາຊີວິດການເປັນຢູ່ຂອງທ້ອງຖິ່ນ ໃຫ້ນັບມື້ດີຂຶ້ນ, ເພື່ອໃຫ້ບັນດາຊາວຊ່າງ ແລະ ຜູ້ປະກອບການ ດ້ານຫັດຖະກຳ ໄດ້ມີໂອກາດເຂົ້າເຖິງການຕະຫຼາດ (ມີບ່ອນຂາຍ) ຜະລິດຕະພັນຫັດຖະກໍາຂອງຕົນ ພ້ອມທັງໄດ້ມີໂອກາດພົບປະແລກປ່ຽນບົດຮຽນ, ປະສົບການທາງດ້ານການຜະລິດ, ການວາງສະແດງ ແລະ ການຂາຍ, ເພື່ອປະກອບສ່ວນສ້າງເປັນສະຖານທີ່ທ່ອງທ່ຽວດ້ານຫັດຖະກໍາ ດັ່ງຄໍາຂັວນທີ່ວ່າ; “ສີໄມ້ລາຍມື ຄືອຸທິຍານແຫ່ງການທ່ອງທ່ຽວ”ງານມະຫາກໍາ ສີມືຫັດຖະກໍາລາວ ຄັ້ງນີ້ ຈະດໍາເນີນໄປຈົນເຖິງວັນທີ 23 ຕຸລາ 2022 ຊຶ່ງມີຫຼາຍພາກສ່ວນຫັດຖະກໍາ ທີ່ມາຈາກບັນດາແຂວງທົ່ວປະເທດເຂົ້າຮ່ວມ ປະກອບມີ:

ພາກສ່ວນແຜ່ນແພ ຜ້າ ໄໝ, ຜ້າຝ້າຍພື້ນເມືອງ, ພາກສ່ວນເຄື່ອງປະດັບ, ພາກສ່ວນເຄື່ອງຈັກສານ, ພາກສ່ວນຜະລິດຕະພັນວັດທະນະທໍາ ເຄື່ອງປັ້ນດິນເຜົາ, ພາກສ່ວນໄມ້ແກະສະຫຼັກ, ເຟີນີເຈີ, ພາກສ່ວນອາຫານສໍາເລັດຮູບພື້ນເມືອງ, ກາເຟ, ສະໝູນໄພ ແລະ ອື່ນໆ. ນອກນນັ້ນ, ຍັງມີພາກສ່ວນສາທິດ ຫຼື ສະແດງການຜະລິດຕົວຈິງ ເປັນຕົ້ນແມ່ນ: ສາທິດການແສ່ວຜ້າ, ແກະສະຫຼັກຫີນ, ເຂັນຝ້າຍ, ສາວໄໝ, ປັກດິ້ງ, ຈັກສານ ຈາກຊາວຊ່າງແຂວງຜົ້ງສາລີ, ຫຼວງນໍ້າທາ, ຫຼວງພະບາງ, ຊຽງຂວາງ, ແຂວງວຽງຈັນ, ຈໍາປາສັກ, ສາລະວັນ ແລະ ອັດຕະປື. ຈໍານວນຮ້ານເຂົ້າຮ່ວມວາງສະແດງ ແລະ ຂາຍຄັ້ງນີ້ ມີທັງໝົດ 230 ຮ້ານ (ບຸດ).

ພ້ອມກັນນີ້ ພາຍໃນງານຍັງມີຫຼາກຫຼາຍກິດຈະກຳຕື່ມອີກ.ໂອກາດດັ່ງກ່າວ, ທ່ານ ນາງ ຈັນທະຈອນ ວົງໄຊ ຮອງປະທານສະພາການຄ້າ ແລະ ອຸສາຫະກຳແຫ່ງຊາດລາວ ໄດ້ກ່າວເປີດງານຢ່າງເປັນທາງການວ່າ: ງານມະຫາກຳສີມືຫັດຖະກຳລາວ ກາຍເປັນບຸນປະເພນີປາງໃຫຍ່ ປະຈຳປີຂອງຊາວຊ່າງຫັດຖະກຳລາວ. ສະມາຄົມຫັດຖະກໍາລາວ ເປັນສະມາຄົມໜຶ່ງທີ່ໝັ້ນຄົງ ແລະ ເຄື່ອນໄຫວມາໄດ້ 25 ປີ, ມັນສະແດງເຖິງຄວາມເອົາໃຈໃສ່ຂອງຄະນະບໍລິຫານງານແຕ່ລະຊຸດ, ແຕ່ລະສະໄໝ ທີ່ໄດ້ທຸ່ມເທເຫື່ອແຮງ ແລະ ສະຕິປັນຍາ ເຂົ້າໃນການບໍລິຫານວຽກງານຂອງສະມາຄົມ ໃຫ້ສາມາດຍືນຍົງຈົນເຖິງທຸກວັນນີ້. ພ້ອອມກັນນັ້ນ, ສະມາຄົມຫັດຖະກໍາລາວ ຍັງມີຜົນງານອີກຫຼາຍດ້ານທີ່ພົ້ນເດັ່ນເຊັ່ນ: ໃນການອານຸລັກຮັກສາ ແລະ ສົ່ງເສີມພູມປັນຍາທາງດ້ານຫັດຖະກຳ ຊຶ່ງມັນສະແດງເຖິງການມີສ່ວນຮ່ວມໃນການສ້າງວຽກເຮັດງານທຳ ໃນຂົງເຂດຊົນນະບົດ, ການສ້າງລາຍໄດ້ ໃຫ້ກັບຊຸມຊົນ, ສະໜັບສະໜູນນະໂຍບາຍຂອງພັກ ແລະ ລັດຖະບານໃນການແກ້ໄຂຄວາມທຸກຈົນ.ໃນພິທີດັ່ງກ່າວ ທ່ານ ພັນຄຳ ວິພາວັນ ໄດ້ໃຫ້ກຽດຕັດແຖບຜ້າ ແລະ ລັ່ນຄ້ອງ 9 ບາດ ເປີດງານມະຫາກຳ ສີມືຫັດຖະກຳລາວ ຄັ້ງທີ 21 ປີ 2022 ຢ່າງເປັນທາງການ ແລະ ຢ້ຽມຊົມການວາງສະແດງສີມືຫັດຖະກຳລາວ.

ແຫຼ່ງຂ່າວ: ປະຊາຊົນ

1...151617...261 Page 16 of 261