ອົງການໄອຍະການປະຊາຊົນສູງສຸດ ໄດ້ເປີດກອງປະຊຸມເຜີຍແຜ່ປື້ມຄູ່ມືການຕິດຕາມກວດກາການດຳເນີນຄະດີເດັກ ຂຶ້ນໃນລະຫວ່າງ ວັນທີ 10-14 ມັງກອນ 2022 ທີ່ ຫ້ອງປະຊຸມ ຂອງອົງການໄອຍະການປະຊາຊົນ ແຂວງຄຳມ່ວນ ເຊິ່ງໄດ້ຮັບການສະໜັບສະໜູນຈາກ ໂຄງການ (UNICEF) ປະຈຳ ສປປ ລາວ ໃຫ້ກຽດເປັນປະທານ ກອງປະຊຸມໂດຍ ທ່ານ ນາງ ພອນເພັດ ອຸ່ນແກ້ວ, ຫົວໜ້າສະຖາບັນຄົ້ນຄວ້າ ແລະ ຝຶກອົບຮົມໄອຍະການ, ຫົວໜ້າກອງເລຂາວຽກງານຍຸຕິທຳສຳລັບເດັກ ທັງເປັນສະມາຊິກສະພາແຫ່ງຊາດ ຊຸດທີ IX (ສສຊ ເຂດເລືອກຕັ້ງ 14 ແຂວງສາລະວັນ), ຕາງໜ້າຄະນະນໍາອົງການໄອຍະການປະຊາຊົນສູງສຸດ, ມີຜູ້ຕາງໜ້າຄະນະນຳອົງການໄອຍະການປະຊາຊົນ ແຂວງຄຳມ່ວນ, ແຂວງຊຽງຂວາງ, ແຂວງບໍລິຄຳໄຊ, ແຂວງສະຫວັນນະເຂດ ແລະ ອົງການໄອຍະການປະຊາຊົນເຂດ 12 ເຂດ ທີ່ຂຶ້ນກັບບັນດາອົງການໄອຍະການປະຊາຊົນແຂວງດັ່ງກ່າວເຂົ້າຮ່ວມ, ນອກນັ້ນຍັງມີເຈົ້າໜ້າທີ່ສືບສວນ-ສອບສວນ ແລະ ຕາງໜ້າສະຫະພັນແມ່ຍິງ ທີ່ເຮັດໜ້າທີ່ປົກປ້ອງສິດ ແລະ ຜົນປະໂຫຍດຂອງແມ່ຍິງ ເຂົ້າຮ່ວມຈຳນວນ 59 ທ່ານ.

ການເຜີຍແຜ່ປື້ມຄູ່ມືການຕິດຕາມກວດກາການດຳເນີນຄະດີເດັກໃນຄັ້ງນີ້ ແມ່ນໄດ້ສ້າງຄວາມຮັບຮູ້ ແລະ ຄວາມເຂົ້າໃຈ ໃຫ້ພະນັກງານອົງການໄອຍະການປະຊາຊົນ ແລະ ເຈົ້າໜ້າທີ່ສືບສວນ-ສອບສວນ ໃຫ້ມີຄວາມເປັນເອກະພາບໃນການດໍາເນີນຄະດີ, ການຕິດຕາມກວດກາ ແລະ ການສັ່ງຟ້ອງຄະດີເດັກໃຫ້ຄົບຖ້ວນ, ຮອບດ້ານ, ພາວະວິໃສ ແລະ ຖືກຕ້ອງຕາມກົດໝາຍ ໂດຍການເນັ້ນໃຫ້ພະນັກງານຜູ້ເຮັດວຽກຕົວຈິງ ຫຼື ນັກສຳມະນາກອນຄົ້ນຄວ້າ ແລະ ແລກປ່ຽນພາກປະຕິບັດໃນການດຳເນີນຄະດີ ແລະ ການຕິດຕາມກວດກາ ກັບເນື້ອໃນບັນດາເອກສານສຳຄັນ ທີ່ນຳມາຄົ້ນຄວ້າເປັນຕົ້ນແມ່ນ: “ສົນທິສັນຍາສາກົນ ແລະ ລະບຽບການຕ່າງໆ ຂອງສະຫະປະຊາຊາດກ່ຽວກັບວຽກງານຍຸຕິທໍາສໍາລັບເດັກ; ກົດໝາຍພາຍໃນ ແລະ ນິຕິກໍາຕ່າງໆ ທີ່ພົວພັນກັບວຽກງານຍຸຕິທໍາສໍາລັບເດັກ; ຄວາມຮັບຮູ້ກ່ຽວກັບການສື່ສານກັບເດັກ; ການຕິດຕາມກວດກາການດໍາເນີນຄະດີເດັກ; ການຕິດຕາມກວດກາການປະຕິບັດກົດໝາຍຂອງໜ່ວຍງານສືບສວນ-ສອບສວນເດັກ; ການແກ້ໄຂຄະດີເດັກທາງດ້ານບໍລິຫານ ແລະ ທາງດ້ານຂະບວນຍຸຕິທໍາ ຂອງຂະແໜງການຕິດຕາມກວດກາການດໍາເນີນຄະດີອາຍາ ແລະ ຄະດີເດັກ; ການຕິດຕາມກວດກາການປະຕິບັດກົດໝາຍໃນການດໍາເນີນຄະດີເດັກຢູ່ສານເດັກ ແລະ ຄະນະສານເດັກ; ການຕິດຕາມກວດກາການຈັດຕັ້ງປະຕິບັດຄໍາຕົກລົງຄະດີເດັກຂອງສານ; ການຮື້ຟື້ນຄະດີເດັກ”.

ຜ່ານການດຳເນີນກອງປະຊຸມ ທ່ານ ນາງ ພອນເພັດ ອຸ່ນແກ້ວ ຍັງໄດ້ຕີລາຄາສູງຕໍ່ຄວາມຮັບຜິດຊອບຂອງນັກສຳມະນາກອນ ແລະ ວິທະຍາກອນ ທີ່ມີຄວາມເອົາໃຈໃສໃນການຄົ້ນຄວ້າ ແລະ ຮັບຟັງ ການສະແດງອອກໃນທີ່ປະຊຸມ ມີຄວາມສົນໃຈແລກປ່ຽນບົດຮຽນເຊິ່ງກັນ ແລະ ກັນຢ່າງກົງໄປກົງມາ ດ້ວຍບັນຍາກາດທີ່ຟົດຝື້ນ ເຮັດໃຫ້ຜູ້ເຂົ້າຮ່ວມກຳໄດ້ຫຼັກການດຳເນີນຄະດີ ແລະ ການຕິດຕາມກວດກາຢ່າງຖືກຕ້ອງ ໂດຍເນັ້ນໃສ່ຂັ້ນຕອນໃນການປະຕິບັດຕົວຈິງ ເພື່ອໃຫ້ສອດຄ່ອງກັບສົນທິສັນຍາສາກົນ ແລະ ລະບຽບການຕ່າງໆ ຂອງສະຫະປະຊາຊາດກ່ຽວກັບວຽກງານຍຸຕິທຳ; ກົດໝາຍພາຍໃນ, ນິຕິກຳ, ການສື່ສານກັບເດັກ ແລະ ວິທີການຕິດຕາມກວດກາປະຕິບັດກົດໝາຍຂອງໜ່ວຍງານສືບສວນ-ສອບສວນເດັກ ແລະ ການຕິດຕາມກວດກາການຈັດຕັ້ງປະຕິບັດຄຳຕົກລົງຄະດີເດັກຂອງສານ ເພື່ອປົກປ້ອງສິດຜົນປະໂຫຍດສູງສຸດຂອງເດັກໃນ ສປປ ລາວ.

ຂ່າວ ແລະ ຮູບພາບ: ອົງການໄອຍະການປະຊາຊົນສູງສຸດ

ຕາມການລາຍງານ ຈາກປ້ອງກັນຄວາມສະຫງົບນະຄອນຫຼວງວຽງຈັນໃຫ້ຮູ້ວ່າ:

ພັທ ຄໍາມະນີ ແກ້ວສີຫາ ຫົວໜ້າພະແນກຕໍາຫຼວດ ປກສ ເມືອງໄຊທາ ນີ ໃຫ້ສໍາພາດ ໃນວັນທີ 5 ມັງກອນ ນີ້ ວ່າ: ເພື່ອເປັນການກັນ-ສະກັດກັ້ນ ແລະ ຕ້ານກຸ່ມບໍ່ຫວັງດີທີ່ຫວັງມ້າງເພ່ທໍາລາຍຄວາມສະຫງົບສຸກຂອງປະ ເທດ ທັງເປັນການຈັດຕັ້ງປະຕິບັດວາລະແຫ່ງວ່າດ້ວຍການແກ້ໄຂບັນ ຫາຢາເສບຕິດ; ປກສ ເມືອງໄຊທານີຈຶ່ງໄດ້ຫັນເອົາກໍາລັງວິຊາສະເພາະລົງຕິດ ຕາມ-ກວດກາ ເພື່ອຂຶ້ນບັນຊີເປົ້າໝາຍທີ່ພົວພັນຢາເສບຕິດຢູ່ບັນດາຈຸດຫຼໍ່ແຫຼມຂອບເຂດຄວາມຮັບຜິດຊອບຂອງຕົນດ້ວຍຄວາມເດັດຂາດ, ໂປ່ງໃສ ແລະ ເປັນມືອາຊີບ ເຮັດໃຫ້ສາມາດມ້າງ-ແກ້ໄຂຄະດີໄດ້ເປັນຈໍານວນຫຼາຍ; ຄະດີທີ່ພົ້ນເດັ່ນລ້າສຸດທີ່ເກີດຂຶ້ນຢູ່ບ້ານດອນໜູນໃນຄັ້ງວັນທີ 23 ທັນວາ 2021 ຜ່ານມາ ທີ່ເຈົ້າໜ້າທີ່ສາມາດຈັບຜູ້ຖືກຫາໄດ້ 3 ຄົນ ພ້ອມທັງຢຶດຂອງກາງຢາບ້າໄດ້ 31.210 ເມັດ ແລະ ຊັບສິນທີ່ກ່ຽວຂ້ອງໄປສອບສວນ.

ຄະດີດັ່ງກ່າວ, ພັທ ຄໍາມະນີ ແກ້ວສີຫາ ເປີດເຜີຍວ່າ: ໃນເວລາປະມານ 22:30 ໂມງຂອງວັນທີ 22 ທັນວາ 2021 ເຈົ້າໜ້າທີ່ ປກສ ກຸ່ມບ້ານໄຊ ແລະ ອໍານາດການປົກຄອງບ້ານດອນໜູນ ເມືອງໄຊທານີ ໄດ້ອອກກວດກາລາດຕາເວນຕາມຄວາມຮັບຜິດຊອບ ຢູ່ຕາມເສັ້ນທາງຮ່ອມນ້ອຍ ແລະ ຂະນະດຽວກັນໄດ້ເຫັນເປົ້າໝາຍມີທ່າທາງພິລຸດສົງໄສທີ່ກໍາລັງຄ້າຂາຍຢາເສບຕິດຢູ່ ຈຶ່ງໄດ້ນໍາຕົວໄປສອບສວນ ຈຶ່ງຮູ້ວ່າຜູ້ກ່ຽວ ຊື່ ທ້າວ ອາມີ ຫຼື ອັອດ ອາຍຸ 39 ປີ ຢູ່ບ້ານດອນໜູນ ນອກນີ້, ຍັງພົບເຫັນຂອງກາງ ປະເພດຢາບ້າ ຈໍານວນ 210 ເມັດ. ຜ່ານການສອບສວນຂະຫຍາຍຜົນ ຈຶ່ງຈັບຕົວເປົ້າໝາຍຊື້-ຂາຍຢາເສບຕິດ ຕາມການຊັດທອດຂອງທ້າວ ອາມີ ໄດ້ອີກ2 ຄົນຄື: ນາງ ໄຊພອນ ອາຍຸ 57 ປີ ມີຂອງກາງຢາບ້າ 1.000 ເມັດ ແລະ ທ້າວ ສາຍສະຫອນ ຫຼື ຄໍາຫຼ້າ ອາຍຸ 29 ປີ ຂໍ້ຫາເສບຢາເສບຕິດ ແລະ ປິດບັງການກະທໍາຜິດຂອງຄົນອື່ນ ເຊິ່ງທັງສອງແມ່ນເປັນແມ່-ລູກກັນ ຢູ່ບ້ານດອນໜູນ.

ຈາກນັ້ນ, ເຈົ້າໜ້າທີ່ຈຶ່ງໄດ້ນໍາຕົວນາງ ໄຊພອນ ໄປສອບສວນນໍາໄປສູ່ການຈັບຕົວ ທ້າວ ສຸບັນ ອາຍຸ 58 ປີ ບ້ານດອນໜູນ ໃນຂໍ້ຫາ ຄ້າຂາຍຢາເສບຕິດ ໃນນັ້ນ, ພົບເຫັນຂອງກາງປະເພດຢາບ້າ 30.000 ເມັດ, ເງິນກີບ 150.000.000 ກີບ, ເງິນບາດ 3.784.000 ບາດ, ເງິນໂດລາ 24.000 ໂດລາ, ລົດໃຫ່ຍ 3 ຄັນ, ວັດຖຸຄ້າຍຄືເງິນ ແລະ ຄໍາ ແລະ ໃບຕາດິນຈໍານວນໜຶ່ງ. ສໍາລັບ ທ້າວ ສຸບັນ ແມ່ນເປັນເປົ້າໝາຍຄ້າຂາຍຢາເສບຕິດທີ່ເຈົ້າໜ້າທີ່ຕິດຕາມການເຄື່ອນໄຫວມາໄດ້ 2 ປີ ແລ້ວ ຈົນມີຂໍ້ມູນຫຼັກຖານທີ່ໜາ ແໜ້ນ ຈຶ່ງນໍາໄປສູ່ການຈັບກຸມໃນຄັ້ງນີ້.

ໃນການແກ້ໄຂຄະດີແມ່ນໄດ້ເຮັດຢ່າງຖືກຕ້ອງຕາມຫຼັກການວິຊາສະ ເພາະ ເປັນຕົ້ນແມ່ນເວລາຈັບຕົວ ຕ້ອງໃຫ້ມີຫຼັກຖານ ຫຼືວ່າມີຂອງກາງ, ມີຄວາມເດັດຂາດ ນໍາໃຊ້ມາດຕະການຕ່າງໆທີ່ກົດໝາຍໄດ້ກໍານົດໄວ້, ໃນເວ ລາໄລ່ນໍາ ຕ້ອງໃຫ້ມີຄວາມວອ່ງໄວ, ມີການຕັດສິນໃຈສູງ ແລະ ມີຄວາມໂປ່ງໃສຕໍ່ໜ້າທີ່ ໂດຍສະເພາະແມ່ນເວລາຈັບຕົວ-ກວດຄົ້ນຕົນຕົວ, ກວດຄົ້ນເຄຫາສະຖານ, ພາຫະນະແລະອື່ນໆຕ້ອງມີການຈັດຕັ້ງບ້ານເຂົ້າຮ່ວມ ພ້ອມ ທັງເຮັດບົດບັນທຶກ ແລະ ຖ່າຍຮູບຢູ່ກັບທີ່ ໂດຍຊ້ອງໜ້າຜູ້ຖືກຈັບຕົວເຮັດຢ່າງລະອຽດ ເພື່ອຄວາມສະດວກໃນການປະກອບຂໍ້ມູນຫຼັກຖານໃສ່ສໍານວນຄະດີໃຫ້ເຮັດກຸມ ແລະ ແນໃສ່ໃຫ້ຜູ້ກະທໍາຜິດ ຖືກດໍາເນີນຄະດີຕາມຂັ້ນຕອນຂອງກົດໝາຍ.

ທັງນີ້, ກໍເພື່ອເປັນການຈັດຕັ້ງຜັນຂະຫຍາຍວາລະແຫ່ງຊາດວ່າດ້ວຍການແກ້ໄຂຢາເສບຕິດໂດຍຕິດພັນກັບການກໍ່ສ້າງຮາກຖານການເມືອງຈຶ່ງໄດ້ນໍາພາກໍາລັງວິຊາສະເພາະໂດຍປະສານສົມທົບກັບອໍານາດປົກຄອງບ້ານ, ປກສ ກຸ່ມ ແລະ ພາກສ່ວນທີ່ກ່ຽວຂ້ອງຢ່າງກົມກຽວ ຈັດຕັ້ງປະຕິບັດເຮັດວຽກງານໂຄສະນາ-ເຜີຍແຜ່ຜົນຮ້າຍ, ຄວາມເປັນອັນຕະລາຍ, ບັນດາກົດ ໝາຍ ແລະ ນິຕິກໍາຕ່າງໆທີ່ກ່ຽວຂ້ອງກັບຢາເສບຕິດ ເພື່ອເຮັດໃຫ້ອໍານາດການປົກຄອງບ້ານ, ພໍ່-ແມ່ປະຊາຊົນ ແລະທຸກຊັ້ນຄົນຢູ່ໃນສັງຄົມໃຫ້ໄດ້ຮັບ ຮູ້ແລະເຂົ້າໃຈ ພ້ອມທັງປະກອບສ່ວນ, ເຂົ້າຮ່ວມແກ້ໄຂ ໂດຍການກວດກາ, ຂຶ້ນບັນຊີເປົ້າໝາຍຢາເສບຕິດແຕ່ລະປະເພດ ຢູ່ແຕ່ລະບ້ານຄືນໃໝ່ຕາມຫຼັກການວິຊາສະເພາະ ແລະໄດ້ແບ່ງຂັ້ນໃນການຄຸມຄອງເປົ້າໝາຍແຕ່ລະປະເພດຢ່າງຂາດຕົວ.

ນອກນັ້ນ, ຍັງໄດ້ຕິດຕາມ-ກວດກາປະຫວັດການເຄື່ອນໄຫວໄປ-ມາຂອງບຸກຄົນ,ການປະກອບອາຊີບແລະອື່ນໆຕາມລະບຽບການຄຸ້ມຄອງສໍາມະໂນຄົວ ພາຍຫຼັງທີ່ພົບເຫັນບຸກຄົນໃດ ຫຼື ກຸ່ມຄົນໃດທີ່ມີການມົ້ວສຸມ, ຊື້-ຂາຍສິ່ງຜິດກົດໝາຍ ກໍຈະນໍາຕົວໄປສຶກສາອົບຮົມ ພ້ອມທັງດໍາເນີນຄະດີ; ກວດກາ ແລະເຮັດບົດບັນທຶກກ່າວເຕືອນບັນດາຫ້າງຮ້ານແລະທຸລະກິດທີ່ມີຄວາມສ່ຽງກ່ຽວກັບຢາເສບຕິດ, ສ້າງເປັນລາຍຄະດີສະເພາະຕິດຕາມ, ອອກກວດກາລາດຕາເວນຕະຫຼອດ 24 ຊົ່ວໂມງເປັນປະຈໍາ ແລະ ເມື່ອພົບເຫັນກໍວາງແຜນແກ້ໄຂທັນທີ.

ຢ່າງໃດກໍຕາມ, ເພື່ອເປັນການສະກັດກັ້ນບຸກຄົນບໍ່ດີເຫຼົ່ານັ້ນເຄື່ອນໄຫວກະທໍາຜິດ ຈຶ່ງຮຽກຮ້ອງມາຍັງທຸກພາກສ່ວນ ໂດຍສະເພາະພໍ່-ແມ່ປະຊາຊົນ ແລະ ຄົນອ້ອມຂ້າງ ຈົ່ງເປັນຫູ-ເປັນຕາຊ່ວຍເຈົ້າໜ້າທີ່, ຕ້ອງກວດກາຄົນໃນຄອບຄົວຂອງຕົນຢ່າງເປັນປະຈໍາ ເມື່ອພົບກໍລະນີສົງໄສຕ້ອງຮີບຮ້ອນໃຫ້ລາຍງານຕໍ່ເຈົ້າໜ້າທີ່-ທີ່ກ່ຽວຂ້ອງ ເພື່ອແກ້ໄຂໃຫ້ທັນເວລາ ແລະ ນໍາຕົວພວກກ່ຽວໄປປິ່ນປົວ-ບໍາບັດຕາມຂັ້ນຕອນຢ່າງຖືກຕ້ອງ.