ຕາມການລາຍງານຂອງສູນຂ່າວສານການແພດສຸຂະສຶກສາ ປະຈຳວັນທີ 13 ມີນາ 2022
ສັງເກດໄດ້ວ່າ 2-3 ມຶ້ ຫຼັງມານີ້ ຜູ້ຕິດເຊື້ອໃໝ່ເພີ່ມຂຶ້ນຫຼາຍເມື່ອທຽບກັບໄລຍະກອນທີ່ມີແຕ່ 100-200 ຕໍ່ມາ ແຕ່ມາມື້ວານມີຜູ້ຕິດເຊື້ອໃໝ່ເຖິງ 400 ແລະ ມາມື້ນີ້ ກໍເກືອບ 400, ເຊິ່ງມັນເປັນສັນຍານໃຫ້ເຮົາທຸກຄົນຈົ່ງຢ່າປະມາດ ແລະ ເມີນເສີຍຕໍ່ໂຄວິດ-19.
ຫໍໄຕປີດົກ ວັດສີມຸງຄຸນ (ວັດກາງ) ທີ່ຕັ້ງຢູ່ບ້ານວັດກາງ, ເມືອງສາລະວັນ, ແຂວງສາລະວັນ ຈະໄດ້ຮັບການປະກາດເປັນມໍລະດົກແຫ່ງຊາດລະດັບທ້ອງຖິ່ນ ພາຍໃນຕົ້ນເດືອນເມສາ 2022 ເຊີ່ງອົງການປົກຄອງແຂວງຈະຈັດໃຫ້ມີຫລາຍກິດຈະກໍາສໍາຄັນທີ່ຕິດພັນກັບການສົ່ງ ເສີມການທ່ອງທ່ຽວ ໂດຍສະເພາະລາວທ່ຽວລາວ.
ທ່ານ ສົມໃຈ ອຸ່ນຈິດ, ຮອງເຈົ້າແຂວງ, ຜູ້ຊີ້ນໍາວຽກງານວັດທະນະທໍາ-ສັງຄົມ ແຂວງສາລະວັນ ໃຫ້ສໍາພາດວ່າ: ຫໍໄຕປີດົກຂອງແຂວງສາລະວັນ ສ້າງຂຶ້ນມາໄດ້ 238 ປີແລ້ວ (ສ້າງຂຶ້ນໃນປີ 1784) ຖືເປັນມໍລະດົກມິ່ງເມືອງທີ່ຊົງຄຸນຄ່າຂອງ ແຂວງສາ ລະວັນ ເຊີ່ງຖືກຝູງບິນ T28 ຂອງຈັກກະພັດອາເມລິກາຍິງທໍາລາຍໃນຊຸມປີ 1970 ເຮັດໃຫ້ໄດ້ຮັບຄວາມເສຍຫາຍໜັກສົມຄວນ ຈາກນັ້ນໃນປີ 2009 ອົງການປົກຄອງແຂວງໄດ້ຕົກລົງໃນການກໍ່ສ້າງ ແລະ ປະຕິສັງຂອນຫໍໄຕປີດົກຄືນໃໝ່ ເປັນຕົ້ນ: ການກໍ່ສ້າງກົມມະລຽນອ້ອມຂ້າງຫໍໄຕ, ກໍ່ສ້າງຫໍປະດິດສະຖານເສົາຫໍໄຕຫລັງເກົ່າທີ່ຫລົງເຫລືອຈາກການທໍາລາຍຂອງເຮືອບິນເຊີ່ງຫໍໄຕຫລັງເກົ່າທີ່ມີອາຍຸ 200 ກວ່າປີ ຍັງເຫລືອ 29 ຕົ້ນ ແລະ ອື່ນໆ ເຊີ່ງມາຮອດປັດຈຸບັນໄດ້ສໍາເລັດຮຽບຮ້ອຍແລ້ວ. ຂະນະທີ່ອົງການປົກຄອງແຂວງພວມສົມທົບກັບກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ກະກຽມຈັດພິທີປະກາດຮັບຮອງເອົາຫໍໄຕປີດົກ ວັດສີມຸງຄຸນ ເປັນ ມໍລະດົກແຫ່ງຊາດທາງດ້ານວັດທະນະທໍາລະດັບທ້ອງຖິ່ນ ໂດຍຄາດວ່າຈະຈັດຂຶ້ນໃນລະຫວ່າງວັນທີ 5-9 ເມສາ 2022.
ທ່ານຮອງເຈົ້າແຂວງ ໃຫ້ຮູ້ຕື່ມວ່າ: ສໍາລັບກິດຈະກໍາທີ່ຈະຈັດຂຶ້ນໃນໂອກາດປະ ກາດຮັບຮອງເອົາຫໍໄຕປີດົກ ວັດສີມຸງຄຸນ ເປັນມໍລະດົກແຫ່ງຊາດລະດັບທ້ອງຖິ່ນໃນຄັ້ງນີ້ ມີຫລາຍຢ່າງ ເປັນຕົ້ນ: ງານວາງສະແດງສິນຄ້າຂອງປະຊາ ຊົນພາຍໃນແຂວງ, ການປະກວດນັກຮຽນ-ໝໍລໍາ, ການແຫ້ພະໄຕປີດົກ-ໜັງສືຜູກໃບລານ, ແຫ່ຫໍຜາສາດເຜີ້ງ ແລະ ອື່ນໆ ເພື່ອສ້າງຄວາມເບີກບານມ່ວນຊື່ນ ກໍຄື ດຶງດູດນັກທ່ອງທ່ຽວເຂົ້າໄປທ່ອງທ່ຽວ ແຂວງສາລະວັນ ໃຫ້ຫລາຍຂຶ້ນກວ່າເກົ່າ ແລະ ເປັນການປະກອບສ່ວນສໍາຄັນເຮັດໃຫ້ຫໍໄຕແຫ່ງນີ້ກາຍເປັນຄັງຄວາມຮູ້ທາງດ້ານພຸດທະສາສະໜາ ແລະ ເປັນສະຖານສະສົມ ຫລື ເກັບຮັກສາໄວພະໄຕປີດົກ-ໜັງສືຜູກໃບລານຄົງຢູ່ຄູ່ກັບຊາວພຸດທະສາສະໜາຕະຫລອດໄປ.
ແຫຼ່ງຂ່າວ: Lao National Radio
ປັດຈຸບັນ, ແຂວງສາລະວັນ ໄດ້ອະນຸມັດໂຄງການລົງທຶນຂອງເອກະຊົນພາຍໃນ ແລະ ຕ່າງປະເທດ ທັງໝົດ 74 ໂຄງການ, ມູນຄ່າການລົງທຶນ 2.148 ຕື້ກີບ (ສະເພາະປີ2021 ອະນຸມັດ 4 ໂຄງການ, ມູນຄ່າ 74,03 ຕື້ກີບ). ໃນຈໍານວນໂຄງການດັ່ງກ່າວ ມີໂຄງການທີ່ດໍາເນີນການເຄື່ອນໄຫວປົກກະຕິຕາມແຜນການ 42 ໂຄງ, ໂຄງການທີ່ຢຸດສະງັກ 11 ໂຄງການ, ໂຄງການເຄື່ອນໄຫວບໍ່ປົກກະຕິ 2 ໂຄງການ ແລະ ໂຄງການທີ່ບໍ່ມີປະສິດທິຜົນ ແລະ ຖືກລົບລ້າງຢ່າງເປັນທາງການ 19 ໂຄງການ ເຮັດໃຫ້ການລົງທຶນໃນກິດຈະການສໍາປະທານພາຍໃນແຂວງຍັງເຫລືອ 55 ໂຄງການ, ມູນຄ່າ 1.652 ຕື້ກີບ.
ທ່ານ ໂພສີ ແກ້ວສີພັນດອນ, ຫົວໜ້າພະແນກແຜນການ ແລະ ການລົງທຶນແຂວງສາລະວັນ ໃຫ້ສໍາພາດຕໍ່ສື່ມວນຊົນໃນວັນທີ 9 ມີນາ 2022 ວ່າ: ທັງ 19 ໂຄງ ການທີ່ຖືກລົບລ້າງ ສ່ວນໃຫຍ່ແມ່ນໂຄງການລົງທຶນຂອງຕ່າງປະເທດເຊີ່ງເມື່ອກ່ອນຂໍອະນຸຍາດລົງທຶນປູກໝາກເຍົາເພື່ອຜະລິດນໍ້າມັນໃບໂອດີເຊວ ແຕ່ບໍ່ໄປບໍ່ມາຫຍັງ, ຮອງມາແມ່ນມີບາງໂຄງການສົ່ງຜົນກະທົບຫລາຍຕໍ່ສິ່ງແວດລ້ອມ ແລະ ຖືກກ່າວເຕືອນຫລາຍຄັ້ງແຕ່ແກ້ໄຂບໍ່ໄດ້, ຂະນະທີ່ນັກລົງທຶນຈໍານວນໜຶ່ງຂໍອະນຸຍາດລົງທຶນແລ້ວແຕ່ບໍ່ຈິງໃຈດໍາເນີນກິດຈະການ ເມື່ອທາງແຂວງສະເໜີໃຫ້ປັບປຸງແກ້ໄຂແຕ່ບໍ່ສາມາດແກ້ໄຂ. ນອກຈາກນີ້ ມີບາງໂຄງການລົງທຶນທີ່ຕິດພັນກັບວັດຖຸດິບປ້ອນໂຮງງານມີຈໍາກັດ ຫລື ບໍ່ສາມາດຕອບສະໜອງ ໂດຍສະເພາະແມ່ນເຄືອແຫມ, ທັງ ໝົດນີ້ເປັນສາເຫດສໍາຄັນເຮັດໃຫ້ອົງການປົກຄອງແຂວງຈໍາເປັນຕ້ອງສັ່ງລົບລ້າງໂຄງ ການດັ່ງກ່າວ ເພາະຖືວ່າເປັນໂຄງການທີ່ບໍ່ມີປະສິດທິຜົນ.
ສໍາລັບໂຄງການລົງທຶນ 55 ໂຄງການ ທີ່ຍັງເຫລືອ ກວມເອົາ 3 ຂະແໜງ ຄື: ກະສິກໍາ-ປ່າໄມ້ 23 ໂຄງການ, ມູນຄ່າ 800 ຕື້ກີບ, ອຸດສາຫະກໍາ 11 ໂຄງການ, ມູນຄ່າ 507,95 ຕື້ກີບ ແລະ ບໍລິການ 21 ໂຄງການ, ມູນຄ່າ 344,06 ຕື້ກີບ. ໃນຈໍານວນ 55 ໂຄງການ ເປັນການລົງທຶນຕ່າງປະເທດ 31 ໂຄງການ, ມູນຄ່າ 1.273 ຕື້ກີບ, ໃນນີ້ ຫຼາຍກວ່າໝູ່ແມ່ນການລົງທຶນຈາກຫວຽດນາມ, ມູນຄ່າ 548,64 ຕື້ກີບ, ກວມເອົາ 43,04%, ຮອງລົງມາແມ່ນການລົງທຶນຈາກ ຈີນ, ມູນຄ່າ 530,27 ຕື້ກີບ, ກວມເອົາ 41,63% ແລະ ປະເທດໄທ, ມູນຄ່າ 102,36 ຕື້ກີບ, ກວມເອົາ 7,82% ແລະ ອື່ນໆ ມູນຄ່າ 97,75 ຕື້ກີບ, ກວມເອົາ 7,46%. ສ່ວນການລົງທຶນພາຍໃນ ມີ 24 ໂຄງ ການ, ມູນຄ່າ 379,11 ຕື້ກີບ, ກວມເອົາ 22,48%.
ທ່ານ ໂພສີ ແກ້ວສີພັນດອນ ໃຫ້ຮູ້ຕື່ມວ່າ: ການອໍານວຍຄວາມສະດວກໃນການລົງທຶນ ແລະ ການຄຸ້ມຄອງການລົງທຶນຢູ່ ແຂວງສາລະວັນ ແມ່ນປະຕິບັດຕາມກົດ ໝາຍ ແລະ ນິຕິກໍາທີ່ລັດຖະບານ ກໍຄື ກະຊວງກ່ຽວຂ້ອງວາງອອກທຸກຢ່າງ, ແຕ່ຜ່ານການປະຕິບັດຕົວຈິງເຫັນວ່າຍັງມີຂໍ້ຫຍຸ້ງຍາກຫຼາຍຢ່າງທີ່ຕ້ອງໄດ້ສືບຕໍ່ແກ້ໄຂໃຫ້ດີຂຶ້ນ ເປັນຕົ້ນ: ບໍລິສັດທີ່ໄດ້ຮັບສິດສໍາປະທານຈາກລັດຖະບານ ແລະ ອົງການປົກ ຄອງແຂວງຈໍານວນໜຶ່ງ ຈັດຕັ້ງປະຕິບັດໂຄງການບໍ່ໄປຕາມກົດໝາຍ ແລະ ບໍ່ໄປຕາມສັນຍາ (ຕໍ່ອາຍຸສັນຍາຫລາຍຄັ້ງ), ມີລັກສະນະຈັບຈ່ອງໂຄງການໄວ້ເພື່ອຊອກຫານັກລົງທຶນ ແລະ ໂອນກິດຈະການໃຫ້ຜູ້ລົງທຶນໃໝ່ (ຂາຍກິດຈະການ) ເຊີ່ງພາກລັດຍັງບໍ່ທັນໄດ້ນໍາໃຊ້ມາດຕະການຢ່າງເດັດຂາດ, ບາງໂຄງການມີຂໍ້ຂັດແຍ່ງເນື້ອທີ່ດິນກັບປະຊາຊົນທີ່ເຂົ້າໄປທໍາການຜະລິດໃນຂອບເຂດສໍາປະທານຂອງບໍລິສັດ, ບາງບໍລິສັດດໍາເນີນກິດຈະການ ບໍ່ສອດຄ່ອງຕາມບົດວິພາກເສດຖະກິດ-ເຕັກນິກ ແລະ ອື່ນໆ.
ແຫຼ່ງຂ່າວ: Lao National Radio
ວັນທີ 10 ມີນາ 2022 ຜ່ານມາ, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ແຫ່ງ ສປປ ລາວ ພ້ອມດ້ວຍບັນດາຮອງລັດຖະມົນຕີກະຊວງທີ່ກ່ຽວຂ້ອງ ໄດ້ເຄື່ອນໄຫວເຮັດວຽກຢູ່ແຂວງຄຳມ່ວນ ໂດຍມີທ່ານ ວັນໄຊ ພອງສະຫວັນ ເຈົ້າແຂວງຄຳມ່ວນ, ບັນດາທ່ານການນຳຂອງແຂວງ, ຫົວໜ້າພະແນກການອ້ອມຂ້າງແຂວງ ຮ່ວມຕ້ອນຮັບ.
ໂອກາດນີ້ທ່ານຮອງນາຍົກ ພ້ອມດ້ວຍຄະນະ ແລະ ການນຳຂອງແຂວງຄຳມ່ວນ ກໍ່ໄດ້ລົງຕິດຕາມ ເບິ່ງຄວາມຄືບໜ້າຂອງການກໍ່ສ້າງໂຮງຮຽນມັດທະຍົມວິຊາຊີບ ຕົວແບບ ມິດຕະພາບ ລາວ-ຫວຽດນາມ ຢູ່ທີ່ບ້ານສອງເໝືອງ ເມືອງໜອງບົກ ໂດຍໄດ້ຮັບທຶນໃນການກໍ່ສ້າງ ຈາກຂອງຂວັນປະທານປະເທດ ສສ ຫວຽດນາມ ມູນຄ່າ 5 ລ້ານໂດລາສະຫະລັດ ເພື່ອຕອບສະໜອງການຝຶກອົບຮົມວິຊາຊີບ ໃນລະດັບ 1+3 ໃຫ້ແກ່ນັກຮຽນມັດທະຍົມຕອນປາຍ ແລະ ຜູ້ຫວ່າງງານ, ຜູ້ດ້ອຍໂອກາດ ລວມທັງ ແຮງງານລາວ ທີ່ກັບມາຈາກປະເທດໃກ້ຄຽງ ໃນຊ່ວງການແຜ່ລະບາດຂອງພະຍາດໂຄວິດ-19 ໂດຍມີເປົ້າໝາຍ ພາຍໃນ 5 ສາຂາວິຊາຊີບ ເຊັ່ນ:
ຕິດຕັ້ງ-ສ້ອມແປງເຄື່ອງໃຊ້ໄຟຟ້າ, ສ້ອມແປງເຄື່ອງຈັກນ້ອຍທົ່ວໄປ, ກໍ່ສ້າງເຄຫາ ສະຖານ, ດ້ານກະສິກຳ (ປູກຝັງ-ລ້ຽງສັດ) ແລະ ປຸງແຕ່ງຜະລິດຕະພັນດ້ານກະສິກຳ. ເຊິ່ງໂຄງການແມ່ນໄດ້ເລີ່ມລົງມື ຈັດຕັ້ງປະຕິບັດໃນເດືອນມັງກອນ 2022 ມາຮອດປະຈຸບັນແມ່ນມີຄວາມຄືບໜ້າແລ້ວປະມານ 13% ແລະ ຄາດວ່າຈະໃຫ້ສຳເລັດໃນການກໍ່ສ້າງພາຍໃນໄລຍະເວລາ 11 ເດືອນ ຕາມແຜນຂອງໂຄງການ. ພ້ອມດຽວກັນ ທ່ານຮອງນາຍົກ ຍັງໄດ້ລົງພົບປະກັບພໍ່ແມ່ປະຊາຊົນ ແລະ ຮ່ວມພິທີການ ມອບ-ຮັບ ໂຄງການກໍ່ສ້າງປ້ອງກັນ ຕາຝັ່ງເຈື່ອນ ຂອງແມ່ນໍ້າເຊບັ້ງໄຟ ຢູ່ບ້ານນາວາງໃຫຍ່ (ເຂດວັດຕຸ້ມພະວັງ) ເມືອງໜອງບົກ ເຊິ່ງມີຄວາມຍາວ 300 ແມັດ ໂດຍໄດ້ສຳເລັດໃນເດືອນກໍລະກົດ 2021 ຜ່ານມາ ໃຊ້ໄລຍະເວລາໃນການກໍ່ສ້າງ 3 ເດືອນ ໂດຍແມ່ນບໍລິສັດ ດີເອັມ ຈຳກັດຜູ້ດຽວ ເປັນຜູ້ຮັບເໝົາ ລວມມູນຄ່າ 7,9 ຕື້ກວ່າກີບ.
ໂອກາດນີ້ ທ່ານຮອງນາຍົກລັດຖະມົນຕີ ກໍ່ໄດ້ໂອ້ລົມ ໂດຍເນັ້ນໃຫ້ອຳນາດການປົກຄອງ ແລະ ພໍ່ແມ່ ປະຊາຊົນບ້ານນາວາງໃຫຍ່ ສືບຕໍ່ເອົາໃຈໃສ່ການຜະລິດກະສິກຳ ປູກຝັງ-ລ້ຽງສັດ ໃຫ້ແຂງແຮງ ເພື່ອກາຍ ເປັນສິນຄ້າ ສ້າງລາຍຮັບໃຫ້ແກ່ຄອບຄົວໃຫ້ສູງຂຶ້ນ ໂດຍມອບໃຫ້ຂະແໜງການກ່ຽວຂ້ອງຂອງແຂວງ, ຂອງເມືອງ ລົງຊຸກຍູ້ທາງດ້ານເຕັກນິກວິຊາການ, ວິທີການ, ຂັ້ນຕອນໃນການຜະລິດ ລວມເຖິງການຊອກຫາຕະຫຼາດຮອງຮັບ ຜົນຜະລິດຂອງພໍ່ແມ່ປະຊາຊົນ, ສືບຕໍ່ປັບປຸງວຽກງານກໍ່ສ້າງຮາກຖານການເມືອງຢູ່ໃນຂັ້ນບ້ານໃຫ້ມີຄວາມແຂງແຮງ, ຍູ້ແຮງທາງດ້ານການພັດທະນາເສດຖະກິດ ແກ້ໄຂຊີວິການເປັນຢູ່ຂອງຄອບຄົວໃຫ້ດີຂຶ້ນ, ເອົາໃຈໃສ່ປັບປຸງລະບົບ ການຈັດຕັ້ງ, ການຄຸ້ມຄອງບ້ານ ໃຫ້ມີຄວາມໜັກແໜ້ນ ເພື່ອນຳພາບໍລິຫານບ້ານໃຫ້ມີຄວາມເຂັ້ມແຂງ, ສືບຕໍ່ ເອົາໃຈໃສ່ຕໍ່ວຽກງານປ້ອງກັນຊາດ-ປ້ອງກັນຄວາມສະຫງົບ ໂດຍສະເພາະແມ່ນການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ເພື່ອບໍ່ໃຫ້ຊາວໜຸ່ມ-ໄວໜຸ່ມ ລູກຫຼານ ທີ່ເປັນອະນາຄົດໜໍ່ແໜງຂອງຊາດ ໄດ້ຖືກເບືອເມົາດ້ວຍຢາເສບຕິດ. ໂອກາດຽວກັນນີ້ທ່ານຮອງນາຍົກ ຍັງໄດ້ມອບເງິນຈຳນວນໜຶ່ງໃຫ້ແກ່ ບ້ານນາວາງໃຫຍ່ ເພື່ອຊຸກຍູ້ບໍລິຫານວຽກງານພາຍໃນບ້ານໃຫ້ມີຄວາມສະດວກຂຶ້ນ.
ແຫຼ່ງຂ່າວ: Khammouane News
ພາຍຫຼັງທີ່ມີຂ່າວອອກມາວ່າຈະມີການປັບຂຶ້ນຄ່າແຮງຂັ້ນຕໍ່າຈາກ 1,1 ລ້ານເປັນ 1,5 ລ້ານກີບ ຕໍ່ຄົນຕໍ່ເດືອນ ແລະ ຈະປະຕິບັດນັບແຕ່ວັນທີ 1 ພຶດສະພາ 2022 ເປັນຕົ້ນໄປ; ຢ່າງໃດກໍຕາມ, ເລື່ອງນີ້ຍັງຈະຕ້ອງລໍຖ້າລັດຖະບານພິຈາລະນາຄືນໃຫມ່ອີກຄັ້ງຫຼັງຈາກທີ່ສະພາການຄ້າ ແລະ ອຸດສາຫະກໍາແຫ່ງຊາດລາວສະເຫນີຂໍເລື່ອນ.
ຈາກບັນຫາຄ່າຄອງຊີບທີ່ຖີບຕົວສູງຂຶ້ນຊຶ່ງມາຈາກຫຼາຍປັດໄຈຊຶ່ງກະທົບຕໍ່ຊີວິດການເປັນຢູ່ຂອງທົ່ວສັງຄົມຢ່າງຫຼີກລ່ຽງບໍ່ໄດ້, ຕໍ່ຫນ້າສະພາບເຂົ້າຍາກຫມາກແພງ; ອົງການ3ຝ່າຍ (ສູນກາສະຫະພັນກໍາມະບານລາວ, ກະຊວງແຮງງານ ແລະ ສະຫວັດດີການສັງຄົມ,ສະພາການຄ້າ ແລະ ອຸດສາຫະກໍາແຫ່ງຊາດລາວ) ທີ່ມີ ບົດບາດຄຸ້ມຄອງ,ປົກປ້ອງ ແລະ ພັດທະນາແຮງງານລາວ, ກໍ່ມີຄວາມເປັນຫ່ວງເປັນໃຍຈຶ່ງໄດ້ມີການຫາລື 3 ຝ່າຍມາແລ້ວຫຼາຍຄັ້ງເພື່ອສະເຫນີປັບຂຶ້ນຄ່າແຮງຂັ້ນ ຕ່ໍາ, ຫຼ້າສຸດ,ເລື່ອງນີ້ກໍ່ເປັນຫນຶ່ງໃນຫົວຂໍ້ສໍາຄັນຂອງກອງປະຊຸມ 3 ຝ່າຍກ່ຽວກັບວຽກງານສາຍພົວພັນແຮງງານ ຄັ້ງທີ 19 ຊຶ່ງຈັດຂຶ້ນເມື່ອວັນທີ 4 ມີນາ 2022 ທີ່ ນະຄອນຫຼວງວຽງຈັນ, ໂດຍການເປັນປະທານຂອງທ່ານ ນາງ ໃບຄໍາ ຂັດທິຍະ, ລັດຖະມົນຕີກະຊວງແຮງງານແລະສະຫວັດດີການສັງຄົມ (ຮສສ). ທ່ານ ນາງອາລີ ວົງຫນໍ່ບຸນທໍາ, ປະທານຄະນະບໍລິຫານສູນກາງສະຫະພັນກໍາມະບານລາວ ແລະທ່ານ ວັນທອງ ສິດທິກຸນ, ຮອງປະທານສະພາການຄ້າ ແລະ ອຸດສາຫະກໍາ ແຫ່ງຊາດລາວ.
ທັງນີ້, ມີຫຼາຍບັນຫາທີ່ກອງປະຊຸມໄດ້ນໍາຂຶ້ນປຶກສາຫາລື, ໂດຍສະເພາະກໍແມ່ນຊ່ອງທາງເພື່ອນໍາໄປສູ່ການຊ່ວຍເຫຼືອແຮງງານລາວທີ່ພວມປະສົບບັນຫາຢຸດຈ້າງ. ງານເພາະຫຼາຍກິດຈະການຕ້ອງປິດຕົວລົງຈາກຜົນກະທົບໂຄວິດ-19. ເຮັດໃຫ້ອັດຕາຫວ່າງງານເພີ່ມຂຶ້ນຈາກ 9,7% ມາເປັນ 21,8% ໃນປີ2021.
ທີ່ສໍາຄັນແມ່ນລັດຖະມົນຕີ ຮສສ ກໍ່ໄດ້ກ່າວເຖິງການຄົ້ນຄວ້າພິຈາລະນາປັບປຸງຄ່າແຮງງານຂັ້ນຕ່ໍາ, ໂດຍລະບຸວ່າ ໄດ້ມອບໃຫ້ແຕ່ລະຝ່າຍນໍາໄປຄົ້ນຄວ້າເຖິງຄວາມ ເປັນໄປໄດ້. ຊຶ່ງເບື້ອງຕົ້ນກໍຄາດການວ່າຈະປັບຂຶ້ນໃນວັນທີ 1 ພຶດສະພາປີນີ້, ຢ່າງໃດກໍຕາມ, ເນື່ອງຈາກເງື່ອນໄຂ ແລະ ຄວາມພ້ອມຕ່າງໆຍັງບໍ່ທັນອໍານວຍ, ດັ່ງນັ້ນສະພາການຄ້າ ແລະອຸດສາຫະກໍາແຫ່ງຊາດລາວຈຶ່ງສະເຫນີຂໍເລື່ອນການປັບຂຶ້ນຄ່າແຮງງານ ໄປເປັນວັນທີ 1 ພຶດສະພາ 2023, ແຕ່ນັ້ນກໍເປັນພຽງຂໍ້ສະຫຼຸບທີ່ຍັງຕ້ອງລໍຖ້າການພິຈາລະນາຄືນອີກຄັ້ງຂອງລັດຖະບານ. ຄ່າແຮງຂັ້ນຕໍ່າທີ່ຈ່າຍກັນຢູ່ໃນປັດຈຸບັນ, ແມ່ນປະຕິບັດມາໄດ້3ປີກວ່າແລ້ວ,ນັບຈາກການປັບປຸງຄັ້ງທີ 8 ເມື່ອປີ 2018 ຊຶ່ງປັບຂຶ້ນ 2ແສນກີບ ຈາກ 9 ແສນກີບເປັນ 1,1 ລ້ານກີບຕໍ່ຄົນຕໍ່ເດືອນ.
ແຫຼ່ງຂ່າວ: ເສດຖະກິດສັງຄົມ
ຕາມການລາຍງານຈາກຄະນະສະເພາະກິດປະຈຳວັນທີ 11 ມີນາ 2022 ໂດຍທ່ານ ດຣ. ຣັດຕະນະໄຊ ເພັດສຸວັນ ໃຫ້ຮູ້ວ່າ: ສຳລັບ ສປປ ລາວ ມາຮອດມື້ນີ້ ພວກເຮົາໄດ້ປະເຊີນໜ້າ ກັບການລະບາດເປັນຮອບທີ 3 ແລ້ວ ແລະ ທ່າອ່ຽງໃນປະຈຸບັນ ແມ່ນກຳລັງຢູ່ໃນໄລຍະຂາຂື້ນ ຊຶ່ງຕົວເລກໃນບາງແຂວງ ໂດຍສະເພາະນະຄອນຫຼວງວຽງຈັນ ເຫັນວ່າ ຕົວເລກກັບຄືນມາ ເພີ້ມສູງຂື້ນໃນແຕ່ລະວັນ ພາຍຫຼັງທີ່ພວກເຮົາເຫັນຕົວເລກຜູ້ຕິດເຊື້ອປະຈຳວັນ ຕ່ຳກ່ວາ 200 ຄົນ ເປັນເວລາເກືອບ 1 ເດືອນ!
ຈາກການສຸ່ມເກັບ 10 ຕົວຢ່າງ ໃນນະຄອນຫຼວງວຽງຈັນ ພົບວ່າ 90% ແມ່ນກວດພົບເຫັນ ສາຍພັນ ໂອມິກຣອນ ແລະ ບົດຮຽນຈາກຫຼາຍໆປະເທດ ໂດຍສະເພາະ ປະເທດໃກ້ຄຽງ ການລະບາດຮອບໃໝ່ນີ້ຈະເຖິງຈຸດສູງສຸດໃນ 1 ຫາ 2 ເດືອນນີ້. ສະນັ້ນ, ຖ້າຫາກພວກເຮົາ ຫາກບໍ່ມີມາດຕະການທີ່ຮັດກຸມອອກມາເພື່ອຕອບໂຕ້ ແລະ ຮອງຮັບການລະບາດໃນຄັ້ງນີ້, ເຖິງວ່າອັດຕາການເສຍຊີວິດ ຈະບໍ່ຮຸນແຮງຄືກັບ ສາຍພັນແດນຕ້າກໍ່ຕາມ ແຕ່ການເສຍຊີວິດ ແມ່ນຈະກະທົບຢ່າງໜັກໜ່ວງ ຕໍ່ຜູ້ທີ່ມີອາຍຸສູງກ່ວາ 60 ປີ, ຜູ້ທີ່ມີພະຍາດປະຈຳໂຕ, ແມ່ຍິງຖືພາ ແລະ ຜູ້ທີ່ບໍ່ທັນໄດ້ສັກວັກຊີນ ຫຼື ສັກວັກຊີນບໍ່ຄົບທຸກເຂັມທີ່ແນະນຳ!
ຫ້ອງວ່າການ ແລະ ວິທະຍາຄານຕຳຫຼວດປະຊາຊົນ (ວຕປ) ປະກາດເລື່ອນຊັ້ນໃຫ້ນາຍຕຳຫຼວດທີ່ມີຜົນງານດີເດັ່ນ.
ຕາມການລາຍງານ ຂອງປ້ອງກັນຄວາມສະຫງົບໃຫ້ຮູ້ວ່າ: ຫ້ອງວ່າການ ແລະ ວິທະຍາຄານຕຳຫຼວດປະຊາຊົນ (ວຕປ) ກະຊວງ ປກສ ໄດ້ປະກາດເລື່ອນຊັ້ນໃຫ້ນາຍຕຳຫຼວດ ທີ່ມີຜົນງານດີເດັ່ນ ແລະ ຄົບມາດ ຖານເງື່ອນໄຂໃນການເລື່ອນຊັ້ນ, ປະດັບຊັ້ນແຕ່ລະພາກສ່ວນໂດຍ ພົຕ ສົມວັນ ສາຍລ້ອງພາ ຫົວໜ້າຫ້ອງວ່າການກະຊວງ ປກສ ແລະ ພັອ ຄໍາພັດ ສາລິວອນ ຮອງຫົວໜ້າອຳນວຍການ ວຕປ, ມີບັນດາຄະນະພັກ-ຄະນະບັນຊາ ແລະ ພະ ນັກງານ-ນັກຮົບ ເຂົ້າຮ່ວມ.
ຫ້ອງວ່າການ ກະຊວງ ປກສ ໄດ້ຈັດຂຶ້ນໃນວັນທີ 10 ມີນາ 2022 ມີຈຳນວນ ນາຍຕຳຫຼວດທີ່ໄດ້ຮັບການເລື່ອນຊັ້ນ 21 ສະຫາຍ ຍິງ 5 ສະຫາຍ; ໃນນີ້, ມີ ພັນຕີ ຂຶ້ນ ພັນໂທ 3 ສະຫາຍ, ຮ້ອຍເອກ ຂຶ້ນ ພັນຕີ 9 ສະຫາຍ ຍິງ 2 ສະ ຫາຍ ແລະ ຮ້ອຍໂທ ຂຶ້ນ ຮ້ອຍເອກ 9 ສະ ຫາຍ ຍິງ 3 ສະຫາຍ; ພ້ອມທັງ, ຜ່ານຂໍ້ຕົກລົງ ຂອງກະຊວງ ປກສ ວ່າດ້ວຍການແຕ່ງຕັ້ງນາຍຕຳຫຼວດທີ່ຂຶ້ນກັບຫ້ອງວ່າການ; ໃນນີ້, ໄດ້ແຕ່ງ ຕັ້ງ ພັອ ວິໄລຄຳ ສີຊານົນ ເປັນຫົວ ໜ້າກົມນິຕິກຳ ແລະ ກົດໝາຍ ແລະ ພັທ ຄຳຜູ ຈັນທະລາສີ ເປັນຮອງຫົວໜ້າກົມທີ່ຂຶ້ນກັບຫ້ອງວ່າການກະຊວງ ປກສ.
ສຳລັບ ວຕປ ໄດ້ຈັດຂຶ້ນໃນວັນທີ 7 ມີນາ 2022, ມີຈຳນວນ 13 ສະຫາຍ ຍິງ 4 ສະຫາຍ; ໃນນີ້, ເລື່ອນຊັ້ນ ພັນຕີ ຂຶ້ນ ພັນໂທ 3 ສະຫາຍ ຍິງ 1 ສະຫາຍ, ຮ້ອຍເອກ ຂຶ້ນ ພັນຕີ 2 ສະຫາຍ ແລະ ຮ້ອຍໂທ ຂຶ້ນ ຮ້ອຍເອກ 8 ສະຫາຍ ຍິງ 3 ສະຫາຍ.
ເໃນຕອນເຊົ້າວັນທີ 9 ມີນາ 2022 ນີ້, ເມືອງສາມັກຄີໄຊແຂວງອັດຕະປື ໄດ້ເປີດພິທີວັນສັກວັກຊິນແຫ່ງຊາດ ໃຫ້ວັກຊິນກັນພະຍາດໂຄວິດ-19 ແກ່່ກຸ່ມເປົ້າໝາຍເດັກອາຍຸແຕ່ 6 ປີ ຫາ 11 ປີ. ໃຫ້ກຜຽດເຂົ້າຮ່ວມຂອງທ່ານ ພິທູນ ມະວົງສາ ຮອງເຈົ້າເມືອງສາມັກຄີໄຊ ທັງເປັນຄະນະກຳມະການເພື່ອແມ່ ແລະ ເດັກຂັ້ນເມືອງ, ມີທ່ານ ດຣ ອິນປັນ ອິນທິລາດ ຫົວນ້າພະແນກສາທາລະນະສຸກແຂວງອັດຕະປື, ມີພະນັກງານວິຊາການແພດໝໍ,ຄູ-ນັກຮຽນ ແລະ ພໍ່ແມ່ຜູ້ປົກຄອງເດັກເຂົ້າຮວ່ມຢ່າງພ້ອມພຽງ.
ທ່ານ ພິທູນ ມະວົງສາ ໄດ້ກ່າວວ່າ: ມາຮອດປະຈຸບັນຕົວເລກການສັກວັກຊິນປ້ອງກັນ ໂຄວິດ-19 ໃນທົ່ວເມືອງ ສາມັກຄີໄຊ ປະຕິບັດໄດ້ເຂັມທີ 1.320 ກວ່າຄົນ ເທົ່າກັບ 77%, ເຂັມທີ 2.280 ກວ່າຄົນ ເທົ່າກັບ 67%, ສັກເຂັມທີ 3 ໄດ້ 5.368 ເທົ່າກັບ 13% .
ສະນັ້ນ, ຕໍ່ກັບການຮັບມືການລະບາດຂອງພະຍາດນີ້ ເຫັນໄດ້ວ່າ ບໍ່ແມ່ນພຽງແຕ່ຄວາມຮັບຜິດຊອບທາງດ້ານວິຊາການ ແຕ່ຄວາມເປັນເຈົ້າການຂອງທຸກພາກສ່ວນອົງການປົກຄອງທ້ອງຖິ່ນທຸກຂັ້ນ ຈົ່ງໃຫ້ຄວາມສຳຄັນເພື່ອຕິດຕາມ, ກວດກາ ແລະ ປະສານງານຢ່າງໃກ້ຊິດ ແລະ ທັນການ ແນໃສ່ເປັນການປຸກລະດົມລູກ ຫລານ, ພໍ່ແມ່ປະຊາຊົນ ໄດ້ປະກອບສ່ວນສັກຢາວັກຊິນປ້ອງກັນພະຍາດໂຄວິດ-19ໃນວັນສັກຢາແຫ່ງຊາດໃຫ້ເປັນຂະບວນຟົດຟື້ນ.
ຫລັງຈາກນັ້ນພະນັກງານວິຊາການແພດໝໍກໍ່ໄດ້ລົງມືສັກຢາຕາມແຜນການຢ່າງເປັນຂະບວນຟົດຟື້ນໃນນີ້ໄດ້ສັກຢາວັກຊິນກັນພະຍາດໂຄວິດ-19 ( ຊີໂນຟາມເຂັມທີ່1) ໃຫ້ນັກຮຽນປະຖົມແຕ່ຫ້ອງ ປໍ5 ຫາ ປໍ1 ແລະ ເດັກນ້ອຍອານຸບານຜູ້ທີ່ມີອາຍຸ 6 ປີ ຂຶ້ນໄປຕາມລຳດັບ.
ຈຸດປະສົງການລົງສັກຢາວັກຊິນໃນຄັ້ງນີ້ກໍ່ເພື່ອເຮັດໃຫ້ກຸ່ມເປົ້າໝາຍໄດ້ຮັບການບໍລິການວັກຊິນປ້ອງກັນພະຍາດໂຄວິດ-19 ເພື່ອສຸຂະພາບແມ່ ແລະ ເດັກ ໃຫ້ບັນລຸຢ່າງໜ້ອຍ 80% ຂຶ້ນໄປ.
ແຫຼ່ງຂ່າວ: ຂປລ
ໃນວັນທີ 10 ມີນາ 2022 ນີ້ ຢູ່ທີ່ຫ້ອງປະຊຸມພະແນກແຮງງານສະຫວັດດີການ-ສັງຄົມແຂວງ ໄດ້ມີພິທີມອບເງິນນະໂຍບາຍອຸດໜູນເທື່ອດຽວ ໃຫ້ແກ່ຜູ້ເສຍສະ ຫລະຊີວິດໃນປາງສົງຄາມ ປະຈໍາປີ 2020 ແລະ ປີ 2021. ໂດຍການເຂົ້າຮ່ວມຂອງທ່ານ ບຸນຮຽນ ແກ້ວບົວພາດ ຮອງເລຂາພັກແຂວງອັດຕະປື, ມີທ່ານ ນາງ ອໍາຄາ ສີຫາລາດ ຫົວໜ້າພະແນກແຮງງານສະຫວັດດີການ ແລະສັງຄົມແຂວງ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ທ່ານ ໄຊຍະລາດ ຊຸມພົນພັກດີ ຮອງຫົວໜ້າພະ ແນກ ແຮງງານສະຫວັດດີການ ແລະ ສັງຄົມແຂວງ ໄດ້ຂື້ນຜ່ານຂໍ້ຕົກລົງຂອງທ່ານເຈົ້າແຂວງວ່າການດ້ວຍຕົກລົງອະ ນຸມັດຈ່າຍເງິນນະໂຍບາຍອຸດຫນູນຜູ້ເສຍຊີວິດໃນປາງສົງຄາມ ປະຈຳປີ 2020 ແລະ ປີ2021ຈຳນວນ 23 ທ່ານ, ຍິງ 1 ທ່ານ, ໃນນັ້ນ; ໄດ້ມອບນະໂຍບາຍອຸດໝູນເທື່ອດຽວຜູ້ທີ່ຍັງມີຊີວິດຢູ່ປີ 2020 ມີ 1 ທ່ານ, ປີ 2021 ມີ 5 ທ່ານ, ອຸດໝູນຜູ້ເສຍສະຫລະຊີວິດໃນປາງສົງຄາມງວດ lll ປີ 2021 ມີ 18 ທ່ານ, ຍິງ 1 ທ່ານ, ລວມເປັນເງິນທັງໝົດ 513.982.125 ກີບ.
ເງິນດັ່ງກ່າວແມ່ນໄດ້ມອບ-ຮັບ ໃຫ້ສາຍຍາດພີ່ນ້ອງ,ລູກຫລານຜູ້ສືບທອດ ຢ່າງເປັນທາງການ ແລະ ໃຫ້ກຽດກ່າວມອບຂອງທ່ານ ບຸນຮຽນ ແກ້ວບົວພາດ ຮອງເລຂາພັກແຂວງ.
ແຫຼ່ງຂ່າວ: ປະເທດລາວ
