ກອງປະຊຸມຜູ້ບໍລິຫານການສຶກສາ ແລະ ກິລາ ປະຈຳປີ 2021 ໄດ້ໄຂຂຶ້ນຢ່າງເປັນທາງການ ໃນຕອນເຊົ້າວັນທີ 10 ມີນາ 2022 ທີ່ຫ້ອງປະຊຸມກະຊວງສຶກສາທິການ ແລະ ກິລາ (ຕຶກໄອຊີທີ) ນະຄອນຫຼວງວຽງຈັນ, ໂດຍພາຍໃຕ້ການເປັນປະທານຂອງທ່ານ ຮສ.ປອ ພຸດ ສິມມາລາວົງ ກຳມະການສູງກາງພັກ, ເລຂາພັກ, ລັດຖະມົນຕີ ກະຊວງສຶກສາທິການ ແລະ ກິລາ, ມີທ່ານ ນາງ ມະນີວັນ ເຢຍປາວເຮີ ຮອງປະທານກຳມາທິການວັດທະນະທຳ-ສັງຄົມ ສະພາແຫ່ງຊາດ ພ້ອມດ້ວຍບັນດາຮອງລັດຖະມົນຕີ ສສກ, ຫົວໜ້າກົມ, ຮັກສາການກົມ, ຕາງໜ້າຫ້ອງວ່າການສຳນັກງານນາຍົກລັດຖະມົນຕີ ແລະ ກະຊວງ ຕະຫຼອດຮອດຜູ້ບໍລິຫານການສຶກສາ ແລະ ກິລາ ທີ່ຢູ່ຂັ້ນສູນກາງ ແລະ ທ້ອງຖິ່ນໃນຂອບເຂດທົ່ວປະເທດ ທີ່ເຂົ້າຮ່ວມແບບເຊິ່ງໜ້າ ແລະ ຜ່ານລະບົບທາງໄກ.

ການຈັດກອງປະຊຸມຄັ້ງນີ້, ແມ່ນເພື່ອເປັນການທົບທວນຄືນການຈັດຕັ້ງປະຕິບັດແຜນພັດທະນາການສຶກສາ ແລະ ກິລາ ປີ 2021 ໃນທ່າມກາງທົ່ວຂະແໜງການສຶກສາ ແລະ ກິລາທົ່ວປະເທດ ພວມຜັນຂະຫຍາຍວາລະແຫ່ງຊາດ ວ່າດ້ວຍການແກ້ໄຂບັນຫາຫຍຸ້ງຍາກດ້ານເສດຖະກິດ-ການເງິນ ແລະ ແກ້ໄຂບັນຫາຢາເສບຕິດໃນສະພາບແວດລ້ອມທີ່ມີການແຜ່ລະບາດຂອງພະຍາດໂຄວິດ-19 ແລະ ປະກອບສ່ວນຢ່າງຕັ້ງໜ້າເຂົ້າໃນການສ້າງການຫັນປ່ຽນໃໝ່ຢ່າງແຂງແຮງ, ເລິກເຊິ່ງ ແລະ ຮອບດ້ານໃນວຽກງານການສຶກສາ, ວິທະຍາສາດ ແລະ ກິລາໃຫ້ປະສົບຜົນສຳເລັດຢ່າງຈົບງາມ.

ໃນກອງປະຊຸມ, ທ່ານ ປອ ບຸນປັນ ໄຊມຸນຕຣີ ຫົວໜ້າແຜນການ ສສກ ໄດ້ລາຍງານຫຍໍ້ກ່ຽວກັບຜົນການຈັດຕັ້ງປະຕິບັດແຜນພັດທະນາການສຶກສາ ແລະ ກິລາ ປະຈຳປີ 2021 ແລະ ແຜນວຽກຈຸດສຸມປີ 2022 ຂອງຂະແໜງການຍ່ອຍ ເປັນຕົ້ນແມ່ນ ຂະແໜງການສຶກສາກ່ອນໄວຮຽນ, ຂະແໜງການຍ່ອຍປະຖົມສຶກສາ, ຂະແໜງການຍ່ອຍມັດທະຍົມຕອນຕົ້ນ, ຂະແໜງການຍ່ອຍມັດທະຍົມສຶກສາຕອນປາຍ, ຂະແໜງການຍ່ອຍການສຶກສານອກໂຮງຮຽນ, ຂະແໜງການຍ່ອຍການສຶກສາຄູ, ຂະແໜງການຍ່ອຍອາຊີວະສຶກສາ ແລະ ອົບຮົມວິຊາຊີບ, ຂະແໜງການຍ່ອຍການສຶກສາຊັ້ນສູງ, ວຽກງານກິດຈະການນັກສຶກສາ, ຂະແໜງການຍ່ອຍກິລາ-ກາຍະກໍາ (ກິລາມວນຊົນ, ພະລະ ແລະ ສິລະປະສຶກສາ), ວຽກງານກິລາລະດັບສູງ, ຂະແໜງການຍ່ອຍບໍລິຫານ-ຄຸ້ມຄອງ ແລະ ຂະແໜງການຍ່ອຍວິທະຍາສາດ, ຊຶ່ງທຸກຂະແໜງການລ້ວນແລ້ວມີຜົນສໍາເລັດທີ່ພົ້ນເດັ່ນ, ຄຽງຄູ່ກັບຜົນສຳເລັດດັ່ງກ່າວນັ້ນ, ກໍຍັງມີບັນຫາ ແລະ ສິ່ງທ້າທາຍທີ່ແຕ່ລະຂະແໜງການຈະຕ້ອງໄດ້ສຸມໃສ່ຈັດຕັ້ງປະຕິບັດ ເພື່ອແກ້ໄຂໃຫ້ບັນລຸຜົນສຳເລັດຕາມລະດັບຄາດໝາຍທີ່ວາງໄວ້.

ນອກຈາກນີ້, ຍັງໄດ້ມີການວາງແຜນວຽກຈຸດສຸມ ປະຈໍາປີ 2022 ອີກດ້ວຍ.

ສຳລັບກອງປະຊຸມຜູ້ບໍລິຫານການສຶກສາ ແລະ ກິລາ ປະຈຳປີ 2021 ແມ່ນຈະໄດ້ດໍາເນີນໄປເປັນເວລາ 2 ວັນ ລະຫວ່າງວັນທີ 10-11 ມີນາ 2022, ຊຶ່ງໃນກອງປະຊຸມ ນອກຈາກໄດ້ຮັບຟັງການລາຍງານຫຍໍ້ຂອງການຈັດຕັ້ງປະຕິິບັດແຜນພັດທະນາການສຶກສາ ແລະ ກິລາ ປະຈຳປີ 2021, ທິດທາງແຜນການປີ 2022 ແລ້ວ, ຍັງໄດ້ມີການລາຍງານຜົນການຈັດຕັ້ງປະຕິບັດມະຕິກອງປະຊຸມ ປະຈຳປີ 2021, ແນວທາງການປັບປຸງຄຸນນະພາບຂອງວຽກງານກິລາ ເພື່ອເຂົ້າແຂ່ງຂັນ, ລາຍງານການບັນຈຸ ຈັດສັນຄູ ແລະ ບັນຫາຄູອາສາສະໝັກ ປີ 2021, ການແກ້ໄຂຜົນກະທົບຂອງພະຍາດໂຄວິດ-19 ຕໍ່ຂະແໜງການສຶກສາ ແລະ ກິລາ, ການຈັດສັນງົບປະມານທີ່ຕິດພັນກັບນະໂຍບາຍປະຢັດຂອງລັດຖະບານ, ເຜີຍແຜ່ບົດລາຍງານກອງປະຊຸມໂຕະມົນລະດັບສູງຄັ້ງທີ 13, ແນວທາງໃນການປັບປຸງວຽກງານວິທະຍາສາດໃນອະນາຄົດ ແລະ ແຜນການສະເຫຼີມສະຫຼອງປີສາມັກຄີມິດຕະພາບ ລາວ-ຫວຽດນາມ ປີ 2022.

ແຫຼ່ງຂ່າວ: ໜັງສືພິມສຶກສາ-ກິລາລາຍວັນ

ສປປ ລາວ ເຮົາໄລຍະຜ່ານມາ ໜຶ່ງໃນສິນຄ້າສົ່ງອອກຄືພະລັງງານໄຟຟ້າ ເຊິ່ງມີເຂື່ອນໄຟຟ້າຫຼາຍແຫ່ງທີ່ຜະລິດເພື່ອການສົ່ງອອກໂດຍສະເພາະ ຊົມໃຊ້ພາຍໃນກວມອັດຕາສ່ວນໜ້ອຍກວ່າຕົວຢ່າງ ເຂື່ອນໄຟຟ້ານ້ຳເທີນ II, ໄຟຟ້າຖ່ານຫີນຫົງສາ ແລະແຫ່ງອື່ນໆ ໃນນັ້ນຕະຫຼາດຮັບຊື້ສ່ວນໃຫຍ່ກໍ່ແມ່ນບັນດາປະເທດຮ່ວມຊາຍແດນກັບ ສປປ ລາວເຮົາ ແລະຫຼ້າສຸດນີ້ມີລາຍງານວ່າ ລາຊະອານາຈັກໄທແມ່ນໄດ້ເຊັນສັນຍາຮັບຊື້ໄຟຟ້າຈາກລາວເພີ່ມອີກ 1.500 ເມກາວັດ.

ໂດຍພິທີເຊັນບົດບັນທຶກຄວາມເຂົ້າໃຈ ໃນການຂະຫຍາຍການຮ່ວມມືການຊື້-ຂາຍພະລັງງານໄຟຟ້າ ລະຫວາງ ສປປ ລາວ ແລະ ລາຊະອານາຈັກໄທ ໄດ້ຈັດຂຶ້ນໃນຕອນເຊົ້າຂອງວັນທີ 4 ມີນາ 2022 ຜ່ານມານີ້ ໃນຮູບແບບອອນລາຍ ຝ່າຍ ສປປ ລາວ ລົງນາມໂດຍ ທ່ານ ປອ. ດາວວົງ ພອນແກ້ວ, ລັດຖະມົນຕີກະຊວງພະລັງງານ ແລະ ບໍ່ແຮ່ ແລະ ຝ່າຍຣາຊະອານາຈັກໄທ ລົງນາມໂດຍ ທ່ານ ສຸພັດທະນະພົງ ພັນມີເຊົາ, ຮອງນາຍົກລັດຖະມົນຕີ, ລັດຖະມົນຕີວ່າການກະຊວງພະລັງງານ ແຫ່ງ ຣາຊະອານາຈັກໄທ ໂດຍມີຫົວໜ້າຫ້ອງການກະຊວງ, ຫົວໜ້າກົມ, ຜູ້ອຳນວຍການລັດວິສາກິດທີ່ຂຶ້ນກັບທັງ 2 ຝ່າຍເຂົ້າຮ່ວມເປັນສັກຂີ່ພິຍານ.

ການເຊັນສັນຍາຄັ້ງນີ້ເປັນການຮ່ວມມື, ເຂົ້າໃຈການຊື້-ຂາຍພະລັງງານໄຟຟ້າ ທີ່ ລັດຖະບານ ຂອງສອງປະເທດ ກໍ່ຄື ລະຫວ່າງ ສອງກະຊວງເຊັນຮ່ວມກັນເປັນສະບັບທີ 6 ແລ້ວ, ນັບແຕ່ປີ 1993 ເປັນຕົ້ນມາ.

ການຂະຫຍາຍບົດບັນທຶກຄວາມເຂົ້າໃຈໃນແຕ່ລະຄັ້ງນັ້ນ, ທັງສອງ ລັດຖະບານ ກໍ່ເພີ່ມອັດຕາການແລກປ່ຽນຊື້-ຂາຍຮ່ວມກັນເລື້ອຍໆ. ຢ່າງໃດກໍ່ຕາມ ອີງໃສ່ຄວາມຮຽກຮ້ອງຕ້ອງການ ການຊົມໃຊ້ພະລັງງານໄຟຟ້າຂອງ ຣາຊະອານາຈັກໄທ ນັບມື້ນັບສູງຂຶ້ນ ລັດຖະບານ ຂອງທັງສອງປະເທດຈຶ່ງໄດ້ຕົກລົງໃຫ້ເພີ່ມປະລິມານການສົ່ງພະລັງງານໄຟຟ້າຈາກ ສປປ ລາວ ຫາ ຣາຊະນາຈັກໄທ ເພີ່ມຂຶ້ນຈາກ 9.000 MW ເປັນ 10.500 MW.

ໂດຍມີຈຸດປະສົງເພື່ອສົ່ງເສີມການຮ່ວມມືດ້ານພະລັງງານໄຟຟ້າ ລະຫວ່າງ ສປປ ລາວ ແລະ ຣາຊະອານາຈັກໄທ, ທັງເປັນການສະໜັບສະໜູນ ແລະ ໃຫ້ຄວາມສໍາຄັນກ່ຽວກັບການຊື້-ຂາຍພະລັງງານສະອາດ ເພື່ອຫຼຸດຜ່ອນຜົນກະທົບຕໍ່ສິ່ງແວດລ້ອມ ລວມເຖິງກາລະໂອກາດທາງດ້ານການລົງທຶນໃນຂະແໜງພະລັງງານໄຟຟ້າ. ພ້ອມກັນນີ້, ການຂະຫຍາຍຂອບການຮ່ວມມືການຊື້-ຂາຍພະລັງງານໄຟຟ້າສະບັບທີ 6 , ຍັງຈະເປັນພື້ນຖານອັນສໍາຄັນເພື່ອຮອງຮັບໃນການສົ່ງກະແສໄຟຟ້າ ຈາກໂຄງການຂະໜາດໃຫຍ່ ຂອງ ສປປລາວ ໃຫ້ ຣາຊະອານາຈັກໄທ ໃນອະນາຄົດ.

ໃນນີ້ລວມມີບັນດາເຂື່ອນໄຟຟ້ານ້ຳຕົກນ້ຳງື່ມ-3, ນ້ຳຂອງຈຸດປາກລາຍ, ນ້ຳຂອງຫຼວງພະບາງ, ນ້ຳຂອງປາກແບງ, ນ້ຳຂອງຊະນາຄາມ ແລະ ໂຄງການເຂື່ອນໄຟຟ້າເຊກອງ 4A,4B ເຊິ່ງຈະປະກອບສ່ວນສໍາຄັນ ໃນການສ້າງລາຍຮັບທີ່ເປັນພື້ນຖານໃຫ້ແກ່ການພັດທະນາປະເທດຊາດ, ທັງຊຸກຍູ້ໃຫ້ແກ່ການແກ້ໄຂຄວາມທຸກຫຍາກຂອງປະຊາຊົນບັນດາເຜົ່າໃຫ້ມີຊີວິດການເປັນຢູ່ທີ່ດີຂຶ້ນ. ມາຮອດທ້າຍປີ 2021 ສປປ ລາວ ໄດ້ສົ່ງຂາຍພະລັງງານໄຟຟ້າ ໃຫ້ ຣາຊະອານາຈັກໄທ ທັງໝົດ 8 ໂຄງການ, ລວມກຳລັງຕິດ 5.415,8 MW ແລະ ໃນກາງປີ 2022 ນີ້ ຄາດວ່າຈະສົ່ງອອກຕື່ມອີກ 1 ໂຄງການ ລວມກຳລັງຕິດຕັ້ງ 514 MW.

 ແຫຼ່ງຂ່າວ: ເສດຖະກິດການຄ້າ

ແຕ່ງ​ຕັ້ງ ທ່ານ ອິນທະປັນຍາ ຂຽວວົງພະຈັນ ເປັນ​ຮອງ​ຫົວ​ໜ້າ​​ຫ້ອງວ່າ​ການ​ສຳ​ນັກ​ງານ​ປະ​ທານ​ປະ​ເທດ.

ຫ້ອງວ່າການສໍານັກງານປະທານປະເທດ (ຫສປທ), ປະກາດການຈັດຕັ້ງພາຍໃນຂອງຕົນຂຶ້ນ ໃນວັນທີ 9 ມີນານີ້ ທີ່ຫ້ອງປະຊຸມດັ່ງກ່າວ, ພາຍໃຕ້ການເປັນປະທານຂອງ ທ່ານ ນາງ ປານີ ຢາທໍ່ຕູ້ ກໍາມະການກົມການເມືອງສູນກາງພັກ ຮອງປະທານປະເທດ ແຫ່ງ ສປປ ລາວ, ທ່ານ ນາງ ເຂັມມະນີ ພົນເສນາ ກໍາມະການສູນກາງພັກ ຫົວໜ້າຫ້ອງວ່າການສໍານັກງານປະທານປະເທດ, ມີຮອງຫົວຫ້ອງການ, ຫົວໜ້າກົມ-ຮອງກົມ ພ້ອມດ້ວຍ ຂະແໜງການກ່ຽວຂ້ອງເຂົ້າຮ່ວມ.

ໃນພິທີ ທ່ານ ສຸລິຍາ ພົມມີສິດ ຮອງຫົວໜ້າກົມຄຸ້ມຄອງພະນັກງານ ຫ້ອງວ່າການສູນກາງພັກ ໄດ້ຜ່ານຄຳສັ່ງວ່າດ້ວຍ ການຍົກຍ້າຍພະນັກງານໄປຮັບໜ້າທີ່ໃໝ່, ຄະ​ນະເລຂາທິການສູນກາງພັກ ອອກຄຳສັ່ງຍົກຍ້າຍ ທ່ານ ອິນທະປັນຍາ ຂຽວວົງພະຈັນ ກຳມະການຄະນະພັກ ຫົວໜ້າກົມກົດໝາຍ ກະຊວງຍຸຕິທຳໄປຮັບໜ້າທີ່ໃໝ່ຢູ່ຫ້ອງວ່າການສຳນັກງານປະທານປະເທດ, ມະຕິຕົກລົງວ່າດ້ວຍການແຕ່ງຕັ້ງກຳມະການຄະນະພັກ ຫ້ອງວ່າການສຳນັກງານປະທານປະເທດ ແລະ ດຳລັດວ່າດ້ວຍການແຕ່ງຕັ້ງຮອງຫົວໜ້າຫ້ອງວ່າການສຳນັກງານປະທານປະເທດ ໂດຍເຫັນດີແຕ່ງຕັ້ງ ທ່ານ ອິນທະປັນຍາ ຂຽວວົງພະຈັນ ເປັນກຳມະການຄະນະພັກ ຮອງຫົວໜ້າຫ້ອງວ່າການສຳນັກງານປະທານປະທານ.

ໂອກາດນີ້, ທ່ານຮອງປະທານປະເທດໄດ້ໃຫ້ກຽດໂອ້ລົມ ຊຶ່ງທ່ານໄດ້ສະແດງຄວາມຍ້ອງຍໍ ຊົມເຊີຍຕໍ່ທ່ານ ອິນທະປັນຍາ ຂຽວວົງພະຈັນ ທີ່ໄດ້ຮັບແຕ່ງຕັ້ງເປັນ ​ກຳ​ມະ​ການ​ພັກ ຮອງຫົວໜ້າຫ້ອງວ່າການສຳນັກງານປະທານປະທານ ຊຶ່ງຈະເປັນກໍາລັງແຮງປະກອບສ່ວນສໍາຄັນ ເຂົ້າໃນການນໍາພາ, ຊີ້ນໍາວຽກງານຂອງ ຫສປທ ໃຫ້ນັບມື້ນັບເຂັ້ມແຂງຂຶ້ນ, ເຫັນໄດ້ວ່າ ສະຫາຍ ເປັນຜູ້ທີ່ໄດ້ຜ່ານການຝຶກຝົນຫຼໍ່ຫຼອມ ຜ່ານບັ້ນທົດສອບໃນວຽກງານຕົວຈິງຫຼາຍດ້ານ ໂດຍສະເພາະ ວຽກງານທີ່ຕິດພັນກັບວຽກງານວິຊາສະເພາະ, ດ້ານກົດໝາຍ ແລະ ໄດ້ຮັບຄວາມໄວ້ວາງໃຈຈາກຂັ້ນເທິງ ຊຶ່ງມີຄວາມເຊື່ອໝັ້ນວ່າ ຈະສືບຕໍ່ຜັນຂະຫຍາຍບົດຮຽນ, ປະສົບການ, ຄວາມຮູ້ ແລະ ຄວາມສາມາດຂອງຕົນເຂົ້າໃນການຈັດຕັ້ງປະຕິບັດວຽກງານ ຫສປທ ໃຫ້ມີປະສິດທິພາບ ແລະ ປະສິດທິຜົນສູງ.

ແຫຼ່ງຂ່າວ: ປະຊາຊົນ

ເມືອງນາແລ ຈູດທໍາລາຍເຄື່ອງອຸປະໂພກ-ບໍລິໂພກທີ່ໝົດອາຍຸການນຳໃຊ້.

ແຫລ່ງຂ່າວຈາກ ແຂວງຫລວງນໍ້າທາ ໃຫ້ຮູ້ວ່າ: ພິທີຈູດທໍາລາຍເຄື່ອງອຸປະໂພກ-ບໍລິໂພກທີ່ໝົດອາຍຸການນຳໃຊ້ ລວມມູນຄ່າ 2.420.000 ກີບ ໄດ້ຈັດໃນວັນທີ 7 ມີນາ ຜ່ານມາ ຢູ່ໂຮງໝໍຊຸມຊົນເມືອງນາແລ ໂດຍມີ ທ່ານ ຕັນ ວັນປະເສີດ ຮອງເຈົ້າເມືອງນາແລ ແລະ ພາກສ່ວນກ່ຽວຂ້ອງເຂົ້າຮ່ວມ.

ໃນພິທີ ທ່ານ ສອນເພັດ ຈັນພົມມາ ຮອງອໍານວຍການໂຮງໝໍຊຸມຊົນເມືອງນາແລ ໄດ້ລາຍງານການຈັດຕັ້ງປະຕິບັດ ລົງການກວດອາຫານສໍາເລັດຮູບ ຕາມທ້ອງຕະຫລາດ ແລະ ເຄື່ອງດື່ມ, ສິນຄ້າທີ່ໝົດອາຍຸການນຳໃຊ້ຢູ່ເຂດເທສະບານເມືອງ ໂດຍສົມທົບກັບເຈົ້າໜ້າທີ່ກວດກາອາຫານ ແລະ ຢາ,ຫ້ອງການອຸດສາຫະກໍາ ແລະ ການຄ້າ ແລະ ຂະແໜງການທີ່ກ່ຽວຂ້ອງ ລົງກວດຕາມຮ້ານ, ຈຸດຕ່າງໆ ພາຍໃນຂອບເຂດເທສະບານເມືອງເປັນເວລາ 2 ວັນ, ໃນນັ້ນ ມີຮ້ານຂາຍຍົກ ແລະ ຂາຍຍ່ອຍ ທັງໝົດ 38 ຮ້ານ, ກວດພົບອາຫານ ແລະ ເຄື່ອງດື່ມທີ່ໝົດອາຍຸ 16 ຮ້ານ ລວມມູນຄ່າ 2.420.000 ກີບ ເຊິ່ງເຄື່ອງທີ່ກວດພົບສ່ວນຫລາຍແມ່ນ ເຂົ້າໜົມ, ແປັບຊີ, ໝີ່, ສະບູ, ອາຫານກະປ່ອງ, ໂຟມລ້າງໜ້າ ແລະ ອື່ນໆ.ການລົງກວດກາສິນຄ້າໃນຄັ້ງນີ້, ກໍເພື່ອໃຫ້ຜູ້ຈໍາໜ່າຍສິນຄ້າ ມີສະຕິໃນການກວດອາຫານສໍາເລັດຮູບຢູ່ໃນຮ້ານຂອງຕົນ ໃຫ້ຮັບປະກັນຄຸນນະພາບສິນຄ້າທີ່ດີໃຫ້ແກ່ລູກຄ້າ, ໃຫ້ຜູ້ບໍລິໂພກໄດ້ຮັບອາຫານທີ່ດີ, ນໍາໃຊ້ສິນຄ້າທີ່ດີ ສະອາດປອດໄພຈາກສິ່ງເຈືອປົນຕ່າງໆ ທີ່ຈະກະທົບຕໍ່ສຸຂະພາບຂອງຜູ້ບໍລິໂພກໃນຕໍ່ໜ້າ ແລະ ຍາວນານ.

ແຫຼ່ງຂ່າວ: ປະເທດລາວ