ກະຊວງ​ປ້ອງ​ກັນ​ປະເທດ​ໄດ້ປະກາດ​ການ​ເລື່ອນ​ຊັ້ນ​ໃຫ້​ນາຍ​ທະຫານ​ຊັ້ນ ພັນ​ໂທ ຂຶ້ນ​ຊັ້ນ ພັນ​ເອກ ຈຳນວນ 46 ສະຫາຍ ໃນ​ວັນ​ທີ 19 ມັງກອນ 2023 ນີ້, ໂດຍ​ການ​ເປັນ​ປະທານ​ຂອງ ​ສະຫາຍ ພົນ​ໂທ ທອງ​ລອຍ ສິລິ​ວົງ ກຳມະການ​ສູນ​ກາງ​ພັກ ຮອງ​ລັດຖະມົນຕີ​ກະຊວງ​ປ້ອງ​ກັນ​ປະເທດ, ຫົວໜ້າ​ກົມ​ໃຫຍ່​ການເມືອງ​ກອງທັບ, ມີ​ຄະນະ​ນຳກະຊວງ​ປ້ອງ​ກັນປະເທດ, ພະນັກງານ​ຫຼັກ​ແຫຼ່ງ ແລະ ນາຍ​ທະຫານ​ທີ່​ໄດ້​ຮັບ​ການ​ເລື່ອນ​ຊັ້ນ​ໃໝ່​ເຂົ້າ​ຮ່ວມ.

ສະຫາຍ ພົນ​ຕີ ວໍລະ​ສານ ວິລັດ​ດາ​ວົງ ກຳມະການ​ຄະນະ ພັກ​ກະຊວງ ຮອງ​ຫົວໜ້າ​ກົມ​ໃຫຍ່​ການເມືອງ​ກອງທັບ ໄດ້​ຜ່ານ​ດຳລັດ​ຂອງ​ນາຍົກລັດຖະມົນຕີ​ວ່າ​ດ້ວຍ​ການ​ເລື່ອນ​ຊັ້ນ​ໃຫ້​ນາຍ​ທະຫານ ແລະ ອີງ​ຕາມ​ກົດໝາຍ ນາຍ​ທະຫານ​ກອງທັບ​ປະຊາຊົນ​ລາວ ( ສະບັບ​ປັບປຸງ ) ໃນ​ນັ້ນ ໄດ້​ຮັບ​ການ​ເລື່ອນ​ຊັ້ນ ​ພັນ​ເອກ​ມີ:

ສະຫາຍ ພັນ​ເອກ ບຸນ​ຍົດ ພົງ​ສະ​ຫວັດ ຮອງຫົວໜ້າ​ກົມປ້ອງ​ກັນ​ອາກາດ ກົມ​ໃຫຍ່​ເສນາ​ທິ​ການ​ກອງທັບ,

ສະຫາຍ ພັນ​ເອກ ພູ​ເງິນ ພົມ​ເມືອງ ຮອງ​ຫົວໜ້າກົມ​ອົບຮົມ ກົມ​ໃຫຍ່​ເສນາທິ​ການ​ກອງທັບ,

ສະຫາຍ ພັນ​ເອກ ທອງ​ດຳ ດວງ​ມາລາ ຮອງຫົວໜ້າ​ກົມ 49 ກົມ​ໃຫຍ່​ເສນາ​ທິ​ການ​ກອງທັບ,

ສະຫາຍ ພັນ​ເອກ ມີ​ສຸກ ຂັນ​ທະຍົງທອງ ຮອງຫົວໜ້າກົມ​ໂຮງຮຽນ ກົມໃຫຍ່​ເສນາທິ​ການ​ກອງທັບ,

ສະຫາຍ ພັນ​ເອກ ຄຳ​ເກິ່ງ ພົມມະວັນ ຮອງຫົວໜ້າກົມປ້ອງກັນ​ພາຍ​ໃນ ກົມ​ໃຫຍ່​ການເມືອງ​ກອງທັບ,

ສະຫາຍ ພັນ​ເອກ ອຳພອນ ສຸກ​ວິ​ໄຊ ຮອງ​ຫົວໜ້າຫ້ອງ​​ການເມືອງ ກົມ​ໃຫຍ່​ການເມືອງ​ກອງທັບ,

ສະຫາຍ ພັນ​ເອກ ຈັນ​ມີ ໄຊສົມ​ພອນ ຮອງຫົວໜ້າກົມ​ນະໂຍບາຍ ກົມ​ໃຫຍ່ການເມືອງ​ກອງທັບ,

ສະຫາຍ ພັນເອກ ດວງ​ມະນີ ສີ​ວິ​ໄຊ ຮອງຫົວໜ້າ​ຫ້ອງ​ການ ກົມ​ໃຫຍ່​ການເມືອງ​ກອງທັບ,

ສະຫາຍ ພັນ​ເອກ ນາງ ​ຫຼ້າ ຄຸນ​ນະວົງສາ ຮອງ​ຫົວໜ້າຫ້ອງການ​ສະຫະພັນ​ແມ່ຍິງກອງທັບ ກົມ​ໃຫຍ່​ການເມືອງ​ກອງທັບ, ສະຫາຍ ພັນ​ເອກ ສົມ​ພິດ ແກ້ວວັນທອງ ຮອງ​ຫົວໜ້າກົມ​ເສນາ​ພະລາ ກົມ​ໃຫຍ່​ພະລາ​ທິ​ການ​ກອງທັບ,

ສະຫາຍ ພັນ​ເອກ ບຸນ​ມີ ວິເສດ​ສິນ ຮອງ​ຫົວໜ້າຫ້ອງ​ການ ກົມ​ໃຫຍ່ພະລາທິການ​ກອງທັບ,

ສະຫາຍ ພັນ​ເອກ ຈັນ​ພອນ ພົນຫາ​ວົງ ຮອງຫົວໜ້າການທະຫານ ຫົວໜ້າ​ຫ້ອງ​ອົບຮົມ ວິທະຍາຄານ​ການ​ແພດ​ ກົມໃຫຍ່ພະລາທິການກອງທັບ,

ສະຫາຍ ພັນ​ເອກ ທອງ​ອ້ວນ ຄຳ​ວັນ​ທອງ ຮອງຫົວໜ້າຫ້ອງການເມືອງ ກົມ​ໃຫຍ່​ພະລາ​ທິ​ການ​ກອງທັບ,

ສະຫາຍ ພັນ​ເອກ ສຸກ ພະ​ມີ​ໄຊ ຮອງ​ຫົວໜ້າກົມ​ກໍ່ສ້າງ-ຄຸ້ມ​ຄອງ​ຊັບສິນ ກົມ​ໃຫຍ່​ພະລາ​ທິ​ການ​ກອງທັບ,

ສະຫາຍ ພັນ​ເອກ ເພັດ​ທອງຄູນ ວົງ​ຜາ​ຈັນ ຮອງ​ຫົວໜ້າກົມນໍ້າມັນເຊື້ອ​ໄຟ ກົມ​ໃຫຍ່​ພະລາ​ທິ​ການ​ກອງທັບ,

ສະຫາຍ ພັນ​ເອກ ພຶດສະພາ ສົນທິ​ລາດ ຫົວໜ້າ​ການ​ທະຫານ ສະ​ຖາ​ບັນ​ອະນາໄມ, ກັນພະຍາດ ແລະ ສົ່ງເສີມ​ສຸຂະພາບ​ ກົມໃຫຍ່ ພະລາທິການກອງທັບ,

ສະຫາຍ ພັນ​ເອກ ບຸນ​ທະໜອມ ສາຍ​ຄຳຈັນ ຮອງ​ຫົວໜ້າກົມ​ເສນາ​ເຕັກນິກ ກົມ​ໃຫຍ່​ເຕັກນິກ​ກອງທັບ,

ສະຫາຍ ພັນເອກ ສອນ​ວິໄລ ປັນຍາ​ສິດ ອຳນວຍ​ການ​ໂຮງງານ​ປະສານເຫຼົ່າພາກ​ກາງ ກົມ​ໃຫຍ່​ເຕັກນິກ​ກອງທັບ,

ສະຫາຍ ພັນ​ເອກ ສັກ​ສີ ຈັນທະບັນດິດ ອຳນວຍການໂຮງງານ​ປະສານ​ເຫຼົ່າ​ພາກ​ໃຕ້ ກົມໃຫຍ່ເຕັກນິກກອງທັບ, ສະຫາຍ ພັນ​ເອກ ນວນ​ທອງ ບຸນ​ທອງ​ວັນ ຫົວໜ້າ​ການເມືອງ ໂຮງງານ ອ 410 ກົມໃຫຍ່ເຕັກນິກກອງທັບ,

ສະຫາຍ ພັນ​ເອກ ສຸດທິພົງ ເພັງ​ວິໄລ​ຈິດ ອຳນວຍ​ການ​ໂຮງງານ​ທາດລະເບີດ ກົມໃຫຍ່ເຕັກນິກກອງທັບ,

ສະຫາຍ ພັນ​ເອກ ສີ​ມອນ ຄະ​ວົງສາ ຮອງຫົວໜ້າ​ກົມ​ເຕັກນິກ​ເຫຼົ່າຮົບ ກົມໃຫຍ່ເຕັກ ນິກກອງທັບ,

ສະຫາຍ ພັນ​ເອກ ຄຳ​ນິດ ທຸມມະ​ວົງສາ ອຳນວຍ​ການບໍລິສັດກໍ່ສ້າງ-ຂົວ​ທາງ​ຄົບ​ວົງຈອນ ຫ້ອງວ່າການ​ກະຊວງ​ປ້ອງກັນປະເທດ,

ສະຫາຍ ພັນ​ເອກ ຄຳ​ເຫຼັກ ເພັດ​ສີ​ສົມ​ພູ ຫົວໜ້າການເມືອງໂຮງຮຽນ 301 ກົມ 213,

ສະຫາຍ ພັນ​ເອກ ໄມ​ພອນ ພິ​ພັກ ຫົວໜ້າ​ຫ້ອງການ ແລະ ບໍລິຫານ​ ກອງພົນທີ 1,

ສະຫາຍ ພັນ​ເອກ ພູ​ວຽງ ດາ​ວັນນະ​ຮັກ ຮອງຫົວໜ້າກອງພົນ ຮັບຜິດຊອບວຽກງານພະລາທິການ, ຫົວໜ້າ​ຫ້ອງພະລາທິການກອງ​ພົນ​ທີ 1,

ສະຫາຍ ພັນ​ເອກ ຄຳ​ຕັນ ແສງ​ມາ​ລາພອນ ຫົວໜ້າ​ຫ້ອງການ ແລະ ບໍລິຫານ ກອງ​ພົນ​ທີ 3,

ສະຫາຍ ພັນເອກ ທອງ​ສຸກ ຈັນ​ມະນີ ຫົວໜ້າການເມືອງ​ ກອງພັນ​ໃຫຍ່ 301 ກອງ​ພົນ​ທີ 3,

ສະຫາຍ ພັນ​ເອກ ຈອມ​ໃຈ ໄຊ​ພະ​ວົງ ຫົວໜ້າ​ການເມືອງ​ ກອງພັນ​ໃຫຍ່ 302 ກອງ​ພົນທີ 3,

ສະຫາຍ ພັນ​ເອກ ສົມບູນ​ ໄຊ​ສົງຄາມ ຮອງຫົວໜ້າກອງພົນ ຫົວໜ້າ​ຫ້ອງ​ເຕັກນິກ​ ກອງ​ພົນ​ທີ 5,

ສະຫາຍ ພັນ​ເອກ ບຸນ​ມີ​ໄຊ ຫຼ້າ​ສຸ​ວົງ ຫົວໜ້າ​ຫ້ອງ​ການ ແລະ ບໍລິຫານ ກອງ​ບັນຊາ​ການ​ທະຫານແຂວງ​ຜົ້ງສາລີ,

ສະຫາຍ ພັນ​ເອກ ພອນ​ເອື້ອຍ ຄຳ​ມີພົນ ຫົວໜ້າຫ້ອງການ ແລະ ບໍລິຫານ ກອງ​ບັນຊາ​ການ​ທະຫານແຂວງຫຼວງ​ນໍ້າ​ທາ,

ສະຫາຍ ພັນເອກ ຕຸ້ຍ ພົມ​ມີ​ໄຊ ຮອງຫົວ ໜ້າການເມືອງ, ຫົວໜ້າຫ້ອງການເມືອງ ກອງບັນຊາ​ການ​ທະຫານແຂວງອຸດົມໄຊ,

ສະຫາຍ ພັນ​ເອກ ວິລະສິນ ມິດ​ຕະພອນ ຮອງຫົວໜ້າການເມືອງ, ຫົວໜ້າ​ຫ້ອງການເມືອງ ກອງບັນຊາການທະຫານແຂວງ​ຫຼວງ​ພະ​ບາງ,

ສະຫາຍ ພັນ​ເອກ ບຸນ​ເລີດ ບຸບຜາ​ວັນ ຫົວໜ້າ​ການ​ທະຫານກອງ​ບັນຊາ​ການ​ທະຫານ​ແຂວງ​ຄຳມ່ວນ,

ສະຫາຍ ພັນ​ເອກ ບຸນ​ຍົງ ແກ້ວ​ມະນີ ຫົວໜ້າ​ຫ້ອງ​ການ​​ ປກຊ-​ປກສ ແຂວງ​ຄຳ​ມ່ວນ, ສະຫາຍ ພັນ​ເອກ ເຄນ​ຄຳ ວໍລະ​ຈິດ ຫົວໜ້າຫ້ອງການ ​ປກຊ-​ປກສ ແຂວງສາລະ​ວັນ,

ສະຫາຍ ພັນເອກ ບຸນ​ໄຫຼ ໄຊ​ຍະ​ສິງ ຮອງຫົວໜ້າ​ກອງພັນ​ໃຫຍ່ ຮັບຜິດຊອບ​ວຽກ​ງານ​ພະລາ​ທິ​ການ ຫົວໜ້າ ພະແນກພະລາທິການ ກອງພັນ​ໃຫຍ່ 703 ກອງ​ບັນຊາ​ການ​ທະຫານ​ອາກາດ,

ສະຫາຍ ພັນ​ເອກ ໄຊ​ອຸດອນ ສຸ​ພິ​ດາ ຮອງຫົວໜ້າກົມ​ຄົ້ນຄວ້າ​ວິທະຍາສາດ-ປະຫວັດສາດ​ການ​ທະຫານ ​ວປກ,

ສະຫາຍ ພັນ​ເອກ ນວນ​ສີ​ສຸກ ພົງ​ປະສານສັກ ຫົວໜ້າ​ຄະນະ​ວິຊາ​ຄູ​ສື່ສານ ​ວປກ, ສະຫາຍ ພັນ​ເອກ ຂັນ​ທະ​ໄຊ ໄຊ​ນະຄອນ ຮອງຄະນະວິຊາ​ຄູ​ການ​ທະຫານ​ທ້ອງ​ຖິ່​ນ ວ​​ປກ,

ສະຫາຍ ພັນ​ເອກ ຄຳ​ສອນ ແກ້ວ​ບຸນ​ປັນ ຮອງ​ຄະນະ​ວິຊາ​ຄູ​ຍຸດ​ທະ​ບັ້ນ​ຮົບ​​ ວປກ,

ສະຫາຍ ພັນ​ເອກ ອັ້ນ ພົມ​ມະ​ວົງ ຫົວ ໜ້າ​ຄະນະ​ວິຊາ​ຄູ​ລັດ​ຖະສາດ-ນິຕິສາດ ​ວປກ,

ສະຫາຍ ພັນ​ເອກ ຫຼຽນ​ທອງ ເພັງ​ສະຫວັນ ຫົວໜ້າ​ຄະນະ​ວິຊາ​ຄູ​ລົດ​ຕັງ-ຍານ​ເກາະ ​ວປກ,

ສະຫາຍ ພັນ​​​ເອກ ສົມ​ເພັດ ວົງ​ພະຈັນ ຫົວໜ້າຫ້ອງ​ຄົ້ນຄວ້າວິທະຍາສາດ-ປະຫວັດສາດການທະຫານ ​ວິທະຍາຄານ​ພະລາ​ທິ​ການກອງທັບ

ສະຫາຍ ພັນເອກ ກິ​ແກ້ວ ລິດ​ແສນ​ຫວັງ ຮອງອຳນວຍການຮັບຜິດຊອບ ວຽກງານພະລາທິການ ຫົວໜ້າ​ຫ້ອງ​ພະລາ​ທິ​ການ ໂຮງຮຽນກໍ່ ສ້າງ​ນາຍ​ສິບ ​ເລກ 2 ວຽງໄຊ.

ໂອກາດ​ນີ້, ສະຫາຍ ພົນ​ໂທ ທອງ​ລອຍ ສິລິ​ວົງ ໄດ້​ໃຫ້​ກຽດ​ໂອ້​ລົມ ແລະ ໃຫ້​ທິດ​ຊີ້​ນຳ​ຫຼາຍບັນ ຫາສຳຄັນ​ຕໍ່​ນາຍ​ທະຫານຂັ້ນ​ສູງ​ທີ່​ໄດ້​ຮັບ​ການ​ເລື່ອນ​ຊັ້ນ​ໃໝ່​ໃນຄັ້ງ​ນີ້, ພ້ອມ​ທັງ ​ໄດ້​ເນັ້ນ​ໜັກ​ໃຫ້​ນາຍ​ທະຫານ​ແຕ່​ລະ​ສະຫາຍ​ສືບຕໍ່​ເຝິກຝົນ​ຫຼໍ່​ຫຼອມ​ຕົນ​ເອງ​ຮອບດ້ານ, ພ້ອມກັນ​ຍົກ​ສູງຄວາມ​ຮັບຜິດຊອບ​ການເມືອງ​ຂອງ​ຕົນ​ຢ່າງ​ເປັນ​ເຈົ້າ​ການ, ເປັນ​ຫຼັກ​ແຫຼ່ງ​ໃນ​ການ​ເຕົ້າໂຮມ​ຄວາມ​ສາມັກຄີ​ພາຍ​ໃນ​ໃຫ້​ໜັກ​ແໜ້ນ, ສຸມ​ໃສ່​ປັບປຸງ​ແບບແຜນ​ວິທີ​ເຮັດ​ວຽກ​ໃຫ້​ຮັດກຸມ​ໃນ​ການ​ປັບປຸງ​ແບບແຜນ​ວິທີ​ເຮັດ​ວຽກ​ເປັນ​ບັນຫາ​ສຳຄັນ ບົນ​ພື້ນຖານ​ຕ້ອງ​ປະຕິບັດ​ຕາມ​ຫຼັກການ​ລວມ​ສູນ​ປະຊາທິປະໄຕ ເຮັດ​ວຽກ​ເປັນ​ໝູ່​ຄະນະ, ແບບແຜນ​ເຮັດ​ວຽກ​ຕ້ອງ​ມີ​ຂັ້ນ​ມີ​ຕອນ ແລະ ມີ​ຈຸດ​ສຸມ, ພາຍຫຼັງໄດ້​ຮັບ​ຊັ້ນ​ໃໝ່​ກັບ​ຄືນ​ກົມ​ກອງ ຈົ່ງ​ສືບຕໍ່​ປະຕິບັດ​ໜ້າທີ່​ການເມືອງ​ຂອງ​ຕົນ​ໃຫ້​ສຳເລັດ​ດີ​ກວ່າ​ເກົ່າ ເພື່ອ​ພ້ອມ​ກັນ​ກໍ່ສ້າງ​ກອງທັບ​ກ້າວ​ຂຶ້ນ​ເປັນ​ກອງທັບ​ປະຕິວັດມີ​ແບບແຜນທັນ​ສະໄໝ.

ທ່ານ ສອນໄຊ ສີພັນດອນ ນາຍົກລັດຖະມົນຕີໄດ້ໂອ້ລົມຕໍ່ກອງປະຊຸມສະຫຼຸບວຽກງານ ແຜນການ ແລະ ການລົງທຶນ ປະຈຳປີ 2022 ແລະ ທິດທາງປະຈຳປີ 2023 ໃນວັນທີ 18 ມັງກອນ ນີ້ ທີ່ຫໍປະຊຸມແຫ່ງຊາດ ໂດຍ ມີ ທ່ານ ຄຳເຈນ ວົງໂພສີ ລັດຖະມົນຕີກະຊວງແຜນການ ແລະ ການລົງທຶນ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ທ່ານນາຍົກລັດຖະມົນຕີໄດ້ສະແດງຄວາມຍ້ອງຍໍຊົມເຊີຍຕໍ່ຂະແໜງແຜນການ ແລະ ການລົງທຶນ ທີ່​ສາ​ມາດຍາດຜົນງານເດັ່ນຫຼາຍ ໃນໄລຍະທີ່ຜ່ານມາ ແລະ ໄດ້ເນັ້ນໃຫ້ເອົາໃຈໃສຕື່ມ 11 ບັນຫາດັ່ງນີ້:

ບັນດາສະຫາຍສະມາຊິກພັກ ແລະ ພະນັກງານ ຕ້ອງເດັດຂາດ ເພີ່ມຄວາມເປັນເຈົ້າການ, ຄວາມຮັບຜິດຊອບ ພາຍໃຕ້ຄໍາຂວັນ” ສ້າງການຫັນປ່ຽນຢ່າງແຂງແຮງ ວຽກງານແຜນການ ແລະ ການລົງທຶນໃນເງື່ອນໄຂໃໝ່” ຕ້ອງບຸກທະລຸທາງດ້ານຈິນຕະນາການ, ຄິດໃໝ່, ລຸກໃໝ່, ສ້າງການຫັນປ່ຽນ ໃນການເຮັດວຽກໃຫ້ວ່ອງໄວຂຶ້ນ, ມີປະສິດທິພາບຂຶ້ນ​ຕື່ມ, ເຂົ້າໃຈສະພາບການປ່ຽນແປງທີ່ເກີດຂຶ້ນໃນແຕ່ລະໄລຍະຢ່າງພາວະວິໄສ ແລະ ແກ້ໄຂໃຫ້ທັນໂດຍອີງໃສ່ 3 ຫຼັກການທີ່ກໍານົດໃນວາລະແຫ່ງຊາດຄື: ເດັດດ່ຽວ-ເຂັ້ມງວດ, ໂປ່ງໃສ ແລະ ເປັນມືອາຊີບ ຄືການສ້າງຄວາມເປັນນັກວິຊາການ, ສ້າງຄວາມເປັນຊ່ຽວຊານໃຫ້ແກ່ອົງກອນ ແລະ ຕົນເອງ;

ສືບຕໍ່ເອົາໃຈໃສ່ສຶກສາອົບຮົມການເມືອງ-ແນວຄິດ ສ້າງ ແລະ ພັດທະນາບຸກຄະລາກອນ ຂອງຂະ ແໜງແຜນການ ແລະ ການລົງທຶນ ໃຫ້ມີຄວາມຮູ້ຄວາມສາມາດ, ມີຄວາມເປັນເຈົ້າການ, ມີຈັນຍາບັນ, ຮັກວິຊາຊີບ, ອົດທົນເສຍສະຫຼະ ແລະ ປະຕິບັດວິໄນ ທາງດ້ານແຜນການ-ການເງິນຢ່າງເຄັ່ງຄັດ, ຍົກສູງສະຕິຄວາມຮັບຜິດຊອບໜ້າທີ່ການເມືອງ ທີ່ໄດ້ຮັບມອບໝາຍ ແລະ ຖືເອົາຜົນປະໂຫຍດຂອງປະເທດຊາດເປັນກົກ ເພື່ອລຶບລ້າງປະກົດການຫຍໍ້ທໍ້ໃຫ້ຂາດໂຕ.

ຂະແໜງແຜນການ ແລະ ການລົງທຶນ ເປັນຂະແໜງການມະຫາພາກ ທີ່ຕີຈັງຫວະ ແລະ ຕິດຕາມການປະຕິບັດນະໂຍບາຍ ແລະ ມາດຕະການຕ່າງໆ ໃຫ້ລັດຖະບານ ຮ່ວມຂະແໜງການຕ່າງໆ.

ດັ່ງນັ້ນ, ຈະເຮັດແນວໃດເພື່ອໃຫ້ເສດຖະກິດຂອງປະເທດຍັງສືບຕໍ່ຂະຫຍາຍຕົວຢ່າງຕໍ່ເນື່ອງ ແລະ ມີຄຸນນະພາບ, ຄວາມທຸກຍາກຂອງປະຊາຊົນໄດ້ຮັບການແກ້ໄຂ ແລະ ສ້າງວຽກເຮັດງານທຳ, ສິ່ງໜຶ່ງທີ່ເປັນປັດໄຈຕັດສິນ ແມ່ນຕ້ອງມີລະບົບສະຖິຕິທີ່ເຂັ້ມແຂງ ແລະ ລົງເຖິງຮາກຖານ, ມີການຄົ້ນຄວ້າວິໄຈຢ່າງໜັກແໜ້ນ ສາມາດສະເໜີແນະນະໂຍບາຍຕ່າງໆ ໃຫ້ແກ່ການນຳຢ່າງທັນການ, ຕ້ອງສ້າງກົນໄກໃນການປະສານງານ ລະຫວ່າງພາກສ່ວນຕ່າງໆ ຕັ້ງແຕ່ຫົວທີໃຫ້ມີຄວາມໂລ່ງລ່ຽນ, ສະດວກ, ວ່ອງໄວ ແລະ ມີປະສິດທິຜົນສູງ; ມີຄວາມເຂົ້າໃຈໃນບົດບາດ-ພາລະໜ້າທີ່ຂອງແຕ່ລະພາກສ່ວນ ທັງສູນກາງ ແລະ ທ້ອງຖິ່ນ.

ສືບຕໍ່ເປັນເຈົ້າໃນການປະສານ ແລະ ຈັດຕັ້ງປະຕິບັດ ວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນໃຫ້ເປັນຮູບປະທໍາ, ນໍາໃຊ້ທຸກນະໂຍບາຍ ແລະ ມາດຕະການແກ້ໄຂ ແລະ ຄຸ້ມຄອງເສດຖະກິດມະຫາພາກໃຫ້ມີສະຖຽນລະພາບໂດຍພື້ນຖານ, ແກ້ໄຂຄວາມກົດດັນດ້ານເສດຖະກິດໃຫ້ຜ່ອນເບົາລົງເທື່ອລະກ້າວ; ຕ້ອງປະສານສົມທົບກັນຢ່າງກົມກຽວທັງໃນຂະແໜງການເອງ, ຂະແໜງການດ້ວຍກັນ ແລະ ຂະແໜງການກັບທ້ອງຖິ່ນໃຫ້ມີປະສິດທິຜົນສູງຂຶ້ນ.

ປັບປຸງການສ້າງແຜນໃນໄລຍະໃໝ່ ເລີ່ມຈາກແຜນປີ 2023 ແລະ ປີຕໍ່ໆໄປ ຕ້ອງຕິດແທດກັບຕົວຈິງ ແລະ ມີວິທະຍາສາດຫຼາຍຂຶ້ນ, ປະຕິຮູບລະບົບການລົງທຶນຂອງລັດໃຫ້ມີການຫັນປ່ຽນໃໝ່ຢ່າງແທ້ຈິງ ໂດຍສະເພາະການຈັດບຸລິມະສິດ ແລະ ສຸມໃສ່ໂຄງການທີ່ຈຳເປັນ ແລະ ຮີບດ່ວນ, ມີປະສິດທິຜົນ ແລະ ເຫັນຜົນໄວດ້ານເສດຖະກິດທີ່ແທ້ຈິງ ຄຽງຄູ່ກັບການຈຳກັດໂຄງການທີ່ບໍ່ມີປະສິດທິຜົນ ເພື່ອບໍ່ໃຫ້ສ້າງໜີ້ສະສົມເພີ່ມຂຶ້ນຕື່ມ, ພ້ອມນັ້ນ ກໍຕ້ອງໄດ້ກວດກາຄືນໂຄງການລົງທຶນຂອງລັດທີ່ຍັງບໍ່ທັນໄດ້ປະຕິບັດ, ບໍ່ມີຄວາມຄືບໜ້າ, ບໍ່ມີປະສິດທິຜົນ, ແກ່ຍາວເວລາຈັບຈອງໂຄງການ ແລະ ເນື້ອທີ່, ຖ້າບໍ່ມີຄວາມຄືບໜ້າໃຫ້ສະເໜີໂຈະຊົ່ວຄາວ ຫຼື ຖາວອນ.

ສືບຕໍ່ຄົ້ນຄວ້າ ວິທີການຊໍາລະໜີ້ສິນທີ່ຍັງເຫຼືອດ້ວຍຮູບແບບຕ່າງໆ ໃນຂອບເພດານງົບປະມານທີ່ມີໃນແຕ່ລະປີ ແລະ ບໍ່ກະທົບຕໍ່ສະພາບຄ່ອງໃນການດໍາເນີນທຸລະກິດ, ປະຕິບັດກົດໝາຍການລົງທຶນຂອງລັດ ແລະ ຄໍາແນະນໍາຕ່າງໆຢ່າງ​ເຂັ້ມ​ງວດ.

ສຸມໃສ່ປັບປຸງວຽກງານສົ່ງເສີມ ແລະ ຄຸ້ມຄອງການລົງທຶນ ຢ່າງແຂງແຮງເລິກເຊິ່ງ, ແກ້ໄຂຂອດຂັ້ນການບໍລິການປະຕູດຽວໃຫ້ໄດ້ໄວ, ຮັດກຸມ, ໂປ່ງໃສ ແລະ ຖືກຕ້ອງຕາມລະບຽບການ; ເພີ່ມທະວີການຈັດຕັ້ງປະຕິບັດຄໍາສັ່ງເລກທີ 02/ນຍ ແລະ 03/ນຍ ຢ່າງເຂັ້ມງວດ ເພື່ອປັບປຸງສະພາບແວດລ້ອມການດໍາເນີນທຸລະກິດພາຍໃນປະເທດໃຫ້ດີຂຶ້ນ, ບຸກທະລຸໃນການນໍາໃຊ້ເຄື່ອງມືທັນສະໄໝເຂົ້າໃນການສະເໜີຂໍລົງທຶນ, ຄົ້ນຄວ້າຕໍ່ການສະເໜີຈົນຮອດຂອດການແຈ້ງຜົນການຄົ້ນຄວ້າຢ່າງເປັນລະບົບ.

ສືບຕໍ່ຄຸ້ມຄອງ ແລະ ສົ່ງເສີມເຂດເສດຖະກິດພິເສດ ໃຫ້ກາຍເປັນກໍາລັງແຮງແທ້ຈິງໃຫ້ການພັດທະນາ ເສດຖະກິດ-ສັງຄົມ: ພັດທະນາເຂດເສດຖະກິດພິເສດຕ້ອງໃຫ້ມີຈຸດສຸມ, ມີການບໍລິຫານ ແລະ ຄຸ້ມຄອງເຂດໃຫ້ຮັດກຸມຕາມສັນຍາ, ລະບຽບ ແລະ ກົດໝາຍຢ່າງເຄັ່ງຄັດ. ການບໍລິການຂອງພາກລັດ ຢູ່ພາຍໃນເຂດເສດຖະກິດພິເສດ ກໍຕ້ອງເຮັດແບບປະຕູດຽວ ແລະ ຄົບຊຸດ ເພື່ອສ້າງສະພາບແວດລ້ອມທີ່ເອື້ອອໍານວຍຄວາມສະດວກໃຫ້ແກ່ຜູ້ລົງທຶນ. ຮຽກຮ້ອງໃຫ້ບັນດາທ້ອງຖິ່ນທີ່ມີເຂດເສດຖະກິດພິເສດຕ້ອງລົງຕິດຕາມ, ກວດກາຢ່າງໃກ້ຊິດໃນການຄຸ້ມຄອງບໍລິຫານໃຫ້ເຂົ້າສູ່ລະບຽບ, ມີຄວາມສະຫງົບ ແລະ ເອົາການບໍລິການທີ່ມີຄວາມວ່ອງໄວ, ສະດວກ ເພື່ອດຶງດູດການລົງທຶນເຂົ້າໃນເຂດແຕ່ລະແຫ່ງ.

ວຽກຮ່ວມມືກັບສາກົນ, ຮ່ວມມືລາວ-ຫວຽດນາມ ແລະ ຮ່ວມມືລາວ-ຈີນ ແມ່ນສືບຕໍ່ຊຸກຍູ້ ເສີມຂະຫຍາຍ, ຂົນຂວາຍການຊ່ວຍເຫຼືອທາງດ້ານວິຊາການ ແລະ ທຶນຮອນ ເຂົ້າມາໃນຂະບວນການພັດທະນາ ຕ້ອງມີຈຸດສຸມ, ມີການເລືອກເຟັ້ນ ແລະ ເປັນລະບົບ; ຫັນເອົາທຶນຈາກການຊ່ວຍເຫຼືອທາງການເພື່ອການພັດທະນາ ໄປສູ່ການພັດທະນາຄົນ, ສ້າງຂີດຄວາມສາມາດໃຫ້ພະນັກງານກາຍເປັນຊ່ຽວຊານ, ນໍາໃຊ້ການຊ່ວຍເຫຼືອເຂົ້າໃນການພັດທະນາໂຄ່ງລ່າງພື້ນຖານທີ່ຈໍາເປັນແທ້ໆ. ສະເພາະການຮ່ວມມືກັບ ສສ ຫວຽດນາມ ແລະ ສປ ຈີນ ນັ້ນ ຕ້ອງຖືເປັນວຽກບຸລິມະສິດເພື່ອສ້າງໃຫ້ໄດ້ ຄວາມໄວ້ເນື້ອເຊື່ອໃຈ, ໝາກຜົນຕົວຈິງ. ເປັນເຈົ້າການຊຸກຍູ້ໃຫ້ບັນດາຂະແໜງການທີ່ກ່ຽວຂ້ອງເລັ່ງຜັນຂະຫຍາຍເນື້ອໃນຖະແຫຼງການຮ່ວມລະຫວ່າງລາວ-ຈີນ, ລາວ-ຫວຽດນາມ ໃນການສ້າງແຜນແມ່ບົດຮ່ວມກັນ. ພວກເຮົາເອງຕ້ອງເປັນເຈົ້າການປັບປຸງ ປ່ຽນແປງປະຕິຮູບໃນແບບແຜນການເຮັດວຽກໃຫ້ວ່ອງໄວ, ມີຄຸນນະພາບ, ມີແນວຄິດບຸກທະລຸອັນໃໝ່ ແລະ ຈິງໃຈໃນວຽກງານການຮ່ວມມື.

ໃຫ້ເອົາໃຈໃສ່ແຕ່ຫົວທີວຽກງານປະເມີນຜົນໂຄງການໃນແຕ່ລະໄລຍະ (ຊຶ່ງມີ 4 ໄລຍະຂອງການປະເມີນ) ຕ້ອງປະຕິບັດໃຫ້ໄດ້, ເລັ່ງໃສ່ວຽກງານຕິດຕາມ-ກວດກາເປັນປົກກະຕິ ເມື່ອເຫັນແລ້ວກໍຕ້ອງມີການວາງມາດຕະການແກ້ໄຂ ຖ້າເກີດບັນຫາ, ຖ້າປະຕິບັດໄດ້ດີກໍຕ້ອງມີການຍ້ອງຍໍຊົມເຊີຍ;

ວຽກບໍລິການ, ການປະສານງານໃຫ້ມີຄວາມໂລ່ງລ່ຽນ, ວ່ອງໄວ ແມ່ນບຸລິມະສິດຫຼັກໃນທຸກໜ້າວຽກລວມທັງການຫັນກົງຈັກໃຫ້ກະທັດຮັດ ແຕ່ມີຄຸນນະພາບນັ້ນແມ່ນວຽກທີ່ຕັດສິນທຸກການປະຕິບັດໜ້າທີ່ວຽກງານໃຫ້ມີຜົນສໍາເລັດ, ການເລືອກເຟັ້ນບຸກຄົນທີ່ໂດດເດັ່ນທາງດ້ານຄວາມຮູ້ – ຄວາມສາມາດ ແລະ ມີຄຸນສົມບັດສິນທໍາປະຕິວັດທີ່ໜັກແໜ້ນແມ່ນໜ້າທີ່ຂອງຄະນະນໍາຂະແໜງ ແຜນການ ແລະ ການລົງທຶນຕ້ອງໄດ້ລົງເລິກຄົ້ນຄວ້າ​ຢ່າງ​ຖີ່​ຖ້ວນ.

ທ່ານ ນາ​ຍົກ​ລັດ​ຖະ​ມົນ​ຕີ ຍັງໄດ້ຮຽກຮ້ອງມາຍັງຄະນະພັກ, ຄະນະນໍາ ພ້ອມດ້ວຍພະນັກງານຫຼັກແຫຼ່ງຂອງຂະແໜງແຜນການ-ການລົງທຶນ ແລະ ທຸກຂະແໜງການສືບຕໍ່ຍົກສູງຄວາມຮັບຜິດຊອບໜ້າທີ່ການເມືອງຂອງຕົນແທ້ໆໃນພາລະກິດພັດທະນາເສດຖະກິດ-ສັງຄົມແຫ່ງຊາດໃຫ້ມີຄວາມເຂັ້ມແຂງ ແລະ ໜັກແໜ້ນ, ມີຈິດໃຈຮັກຊາດ, ເສຍສະຫຼະເພື່ອ ສ່ວນລວມ, ຊື່ສັດບໍລິສຸດ, ພ້ອມກັນຈັດຕັ້ງປະຕິບັດບັນດາມາດຕະການຕ່າງໆ ຢ່າງຈິງຈັງຄືກັນກັບນັກຮົບປະຕິວັດໃນສະໜາມຮົບຕໍ່ສູ້ກູ້ຊາດໃນເມື່ອກ່ອນ ແລະ ສະໜາມຮົບແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ທີ່ປະເທດເຮົາກໍາລັງປະເຊີນຢູ່ໃນປັດຈຸບັນ ທີ່ມີຄວາມສ່ຽງຫຼາຍປະການ ແລະ ຖືເປັນບາດລ້ຽວທີ່​ພວກເຮົາຕ້ອງໄດ້ສຸມກໍາລັງແຮງ ແລະ ມັນສະໝອງ ເຂົ້າໃນການສຶກສາ-ຄົ້ນຄວ້າ, ລົງເລິກວິໄຈບັນຫາໃຫ້ລະອຽດໃຫ້ຮູ້ສາເຫດຕົ້ນຕໍແທ້ຈິງ ແລະ ຈະແຈ້ງເພື່ອຮ່ວມຈິດຮ່ວມໃຈ ສາມັກຄີ ເປັນນໍ້າ ໜຶ່ງໃຈດຽວກັນ ເຮັດໃຫ້ບັນດາຄາດໝາຍຕ່າງໆ ບັນລຸໄດ້ຜົນສໍາເລັດໃໝ່ ຢ່າງເປັນຮູບປະທໍາ.

ແຫຼ່ງຂ່າວ: ປະຊາຊົນ

ທ່ານນາຍົກລັດຖະມົນຕີ ຢ້ຽມຢາມ​ ພົບປະໂອ້ລົມ ນາຍ ແລະ ພົນທະຫານກອງພົນທະຫານຮາບທີ 5

ໃນວັນທີ 13 ມັງກອນ 2023,​ ທ່ານ ສອນໄຊ ​ສີພັນດອນ ນ​າຍົກລັດຖະມົນຕີໄດ້ເຄື່ອນໄຫວຢ້ຽມຢາມ ແລະ ພົບປະໂອ້ລົມນາຍ ແລະ ພົນທະຫານກອງພົນທະຫານຮາບທີ 5 ເນື່ອງໃນໂອກາດວັນສ້າງຕັ້ງກອງທັບປະຊາຊົນລາວ ຄົບຮອບ 74 ປີ (20/1/1949-20/1/2023), ໂດຍການຕ້ອນຮັບຈາກທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ ພ້ອມດ້ວຍຄະນະ; ມີການນຳກະຊວງປ້ອງກັນປະເທດ,​ ຄະນະພັກ-ຄະນະບັນຊາກອງພົນທະຫານຮາບທີ 5 ແລະ ພາກສ່ວນກ່ຽວຂ້ອງເຂົ້າຮ່ວມ.

ໃນໂອກາດນີ້, ທ່ານ ພັນເອກ ຂັນທີ ສະໜາມອຸ່ນ ຫົວໜ້າການທະຫານກອງພົນທະຫານຮາບທີ 5 ໄດ້ຂຶ້ນລາຍງານໃຫ້ຊາບໂດຍຫຍໍ້ ກ່ຽວກັບສະພາບຈຸດພິເສດ, ທີ່ຕັ້ງ, ພາລະບົດບາດ ແລະ ໜ້າທີ່ການເມືອງຂອງກົມກອງ, ລວມທັງຜົນງານທີ່ຍາດມາໄດ້ຕະຫຼອດໄລຍະຜ່ານມາ ຊຶ່ງກອງພົນທະຫານຮາບທີ 5 ມີພາລະບົດບາດເປັນກຳລັງຫຼວງເຄື່ອນທີ່, ພາຍໃຕ້ການຊີ້ນໍາ-ບັນຊາໂດຍກົງຮອບດ້ານຂອງກະຊວງປ້ອງກັນປະເທດ, ເປັນກຳລັງຫຼັກແຫຼ່ງໃນການຈັດຕັ້ງປະຕິບັດວຽກງານປ້ອງກັນຊາດ-ປ້ອງກັນຄວາມສະຫງົບຊ່ວຍໜູນໃຫ້ຂອບເຂດຂອງ 4 ແຂວງພາກໃຕ້, ຊີ້ນໍາອົງການ, ກົມກອງຈັດຕັ້ງກຳລັງລົງກໍ່ສ້າງຮາກຖານການເມືອງຕາມຂອບເຂດກົມກອງຕັ້ງທັບແບບທາງກວ້າງ ແລະ ທາງເລິກ, ປະສານສົມທົບກັບກອງບັນຊາການທະຫານ 4 ແຂວງພາກໃຕ້ປົກປັກຮັກສາຊາຍແດນເຮັດໃຫ້ສະພາບມີຄວາມສະຫງົບໂດຍພື້ນຖານ. ພ້ອມກັນນັ້ນ, ກໍໄດ້ເອົາໃຈໃສ່ປັບປຸງກໍ່ສ້າງກຳລັງໃຫ້ເຕີບໃຫຍ່ເຂັ້ມແຂງໃນທຸກດ້ານ, ສຸມໃສ່ອົບຮົມ-ຫັດແອບ ແລະ ປັບປຸງລະບຽບແບບແຜນໃຫ້ມີຄວາມຮັດກຸມເປັນເອກະພາບ; ຊີ້ນໍາຄະນະພັກ-ຄະນະບັນຊາແຕ່ລະຂັ້ນ, ແຕ່ລະກົມກອງສ້າງພະລາທິການກັບທີ່ຕາມທິດເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ ໂດຍສຸມໃສ່ເພີ່ມພູນຜະລິດຜົນປູກຝັງ-ລ້ຽງສັດເພື່ອຮັບປະກັນການແກ້ໄຂຊີວິດການເປັນຢູ່ຂອງພະນັກງານ-ນັກຮົບນັບມື້ດີຂຶ້ນ. ຄຽງຄູ່ກັນນັ້ນ, ກໍໄດ້ເອົາໃຈໃສ່ຈັດຕັ້ງປະຕິບັດຂົງເຂດວຽກງານຕ່າງໆທີ່ປິ່ນອ້ອມໜ້າທີ່ການເມືອງຂອງກົມກອງຕົນເອງ ໂດຍສາມາດຍາດໄດ້ຜົນສໍາເລັດທີ່ເປັນພື້ນຖານຫຼາຍດ້ານ.

ໃນໂອກາດດຽວກັນ, ທ່ານ ນາຍົກລັດຖະມົນຕີໄດ້ມີຄໍາເຫັນໂອ້ລົມຕໍ່ຜູ້ເຂົ້າຮ່ວມໂດຍໄດ້ຕີລາຄາສູງຕໍ່ໝາກຜົນຂອງການປະຕິວັດ ແລະ ມູນເຊື້ອອັນດີງາມ ຂອງກອງທັບປະຊາຊົນລາວ ຕະຫຼອດໄລຍະ 74 ປີຜ່ານມາເວົ້າລວມ, ເວົ້າສະເພາະຜົນສຳເລັດ ທີ່ນາຍ ແລະ ພົນທະຫານ ກອງພົນທະຫານຮາບທີ 5 ສາມາດຍາດມາໄດ້, ພ້ອມທັງຍົກໃຫ້ເຫັນສະພາບການພົ້ນເດັ່ນ ທີ່ເກີດຂຶ້ນ ຢູ່ພາຍໃນ ແລະ ຕ່າງປະເທດ, ສະພາບການພັດທະນາເສດຖະກິດ-ສັງຄົມ ແຫ່ງຊາດ ໂດຍສະເພາະ ຄວາມພະຍາຍາມຂອງລັດຖະບານ ແລະ ພາກສ່ວນທີ່ກ່ຽວຂ້ອງ, ຜົນສຳເລັດ, ຂໍ້ສະດວກ-ຫຍຸ້ງຍາກ ແລະ ສິ່ງທ້າທາຍ ຕໍ່ການປົກປັກຮັກສາ ແລະ ສ້າງສາພັດທະນາປະເທດເຮົາໃນປັດຈຸບັນ. ຕໍ່ສະພາບການດັ່ງກ່າວ, ທ່ານ ນາຍົກລັດຖະມົນຕີ ໄດ້ມີຄຳເຫັນເນັ້ນໜັກ ໃຫ້ຄະນະພັກ-ຄະນະບັນຊາຕະຫຼອດຮອດພະນັກງານ-ນັກຮົບທົ່ວກອງພົນທະຫານຮາບທີ 5 ເອົາໃຈໃສ່ຕື່ມບາງດ້ານ ເປັນຕົ້ນ ເຊີດຊູສະຕິລະວັງຕົວ, ສະຕິປົກປັກຮັກສາແນວທາງນະໂຍບາຍຂອງພັກ-ລັດ, ປົກປັກຮັກສາໝາກຜົນຂອງການປະຕິວັດ, ປົກປັກຮັກສາລະບອບໃໝ່ໄວ້ໃຫ້ໝັ້ນຄົງ; ສົມທົບແໜ້ນ ລະຫວ່າງ ວຽກງານ ປກຊ-ປກສ ກັບການສ້າງສາພັດທະນາເສດຖະກິດ-ສັງຄົມ; ເພີ່ມທະວີການເຮັດວຽກງານກໍ່ສ້າງຮາກຖານການເມືອງ ຕິດພັນກັບການພັດທະນາຊົນນະບົດຮອບດ້ານຕາມທິດ 3 ສ້າງ; ປັບປຸງແບບແຜນວິທີເຮັດວຽກໃຫ້ມີລັກສະນະປະຕິວັດບຸກ, ມີວິທະຍາສາດ, ແທດຕົວຈິງ ແລະ ໂປ່ງໃສ, ມີການແບ່ງງານ, ມອບໝາຍຄວາມຮັບຜິດຊອບຢ່າງຈະແຈ້ງ, ແບບແຜນນຳພາຕ້ອງປະດິດສ້າງ, ກ້າຄິດ, ກ້າເຮັດ ແລະ ກ້າຮັບຜິດຊອບຕໍ່ຜົນໄດ້ຜົນເສຍໃນການຈັດຕັ້ງປະຕິບັດໜ້າທີ່ການເມືອງ ທີ່ນອນໃນຂອບເຂດຮັບຜິດຊອບ ໂດຍຖືເອົາຜົນປະໂຫຍດຂອງຊາດ, ຂອງປະຊາຊົນ ເປັນບ່ອນອີງ; ຕັ້ງໜ້າປັບປຸງກຳລັງໃນທຸກດ້ານໃຫ້ໜັກແໜ້ນເຂັ້ມແຂງ, ເອົາໃຈໃສ່ຕໍ່ການປັບປຸງລະບອບຄຸ້ມຄອງ-ບັນຊາ, ປັບປຸງກຳລັງປະເພດຕ່າງໆ ໂດຍຖືເອົາຄຸນນະພາບເປັນຕົ້ນຕໍ; ສຸມທຸກເງື່ອນໄຂຄວາມສາມາດ ໃນການສ້າງເສດຖະກິດ ເພື່ອກ້າວໄປເຖິງການກຸ້ມຕົນເອງ ຢ່າງຮອບດ້ານ ໂດຍຖືເອົາວຽກງານຄຸ້ມຄອງ ແລະ ລ້ຽງດູກອງທັບ ດ້ວຍການສ້າງພະລາທິການກັບທີ່ເປັນວຽກງານຕົ້ນຕໍ; ເຂົ້າຮ່ວມຢ່າງຕັ້ງໜ້າກໍ່ສ້າງກິດຈະການດ້ານເສດຖະກິດ-ສັງຄົມຢູ່ທ້ອງຖິ່ນ, ຊ່ວຍເຫຼືອປະຊາຊົນ ໃນການປັບປຸງຊີວິດການເປັນຢູ່ດ້ານວັດຖຸ ແລະ ວັດທະນະທຳໃຫ້ນັບມື້ນັບດີຂຶ້ນ; ສືບຕໍ່ປະຕິບັດແນວທາງການຕ່າງປະເທດ ສັນຕິພາບ, ເອກະລາດ, ມິດຕະພາບ ແລະ ການຮ່ວມມື, ປັບປຸງ ແລະ ເພີ່ມທະວີການຮ່ວມມືຮອບດ້ານກັບກອງທັບເພື່ອນມິດຍຸດທະສາດ ແລະ ການຮ່ວມມືກັບບັນດາປະເທດສັງຄົມນິຍົມອ້າຍນ້ອງ ເພື່ອຍາດແຍ່ງການຊ່ວຍເຫຼືອ ແລະ ປັບປຸງກໍ່ສ້າງກອງທັບໃຫ້ກ້າວໜ້າສູ່ຄຸນນະພາບໃໝ່.

ໃນໂອກາດເຄື່ອນໄຫວຢ້ຽມຢາມຂອງທ່ານ ນາຍົກລັດຖະມົນຕີຄັ້ງນີ້, ທ່ານ ຍັງໄດ້ມອບວັດຖຸປັດໄຈຈໍານວນໜຶ່ງໃຫ້ກອງພົນທະຫານຮາບທີ 5 ເພື່ອປະກອບສ່ວນເຂົ້າໃນການປັບປຸງພັດທະນາກອງພົນໃຫ້ເຕີບໃຫຍ່ເຂັ້ມແຂງເປັນກ້າວໆ, ພ້ອມກັນນັ້ນ ກໍໄດ້ລົງຢ້ຽມຢາມພະນັກງານ-ນັກຮົບກອງພັນ 565 ແລະ ກອງພັນ 611 ທີ່ຂຶ້ນກັບກອງພົນທີ 5 ຕື່ມອີກ.

ແຫຼ່ງຂ່າວ: ປະຊາຊົນ

ໃນຕອນບ່າຍຂອງວັນທີ 11 ມັງກອນ 2023 ຢູ່ຫ້ອງວ່າການສູນກາງພັກ, ສະຫາຍ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກ ປະຊາຊົນ ປະຕິວັດລາວ, ປະທານປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ສະຫາຍ ຟ້າມ ມິງ ຈິງ ກໍາມະການກົມການເມືອງສູນກາງພັກກອມມູນິດຫວຽດນາມ, ນາຍົກລັດຖະມົນຕີ ແຫ່ງ ສສ ຫວຽດນາມ ພ້ອມດ້ວຍຄະນະ ໃນໂອກາດເດີນທາງມາຢ້ຽມຢາມ ສປປ ລາວ ຢ່າງເປັນທາງການ.

ໂອກາດນີ້, ສະຫາຍ ທອງລຸນ ສີສຸລິດ ເລຂາທິການໃຫຍ່, ປະທານປະເທດ ໄດ້ສະແດງຄວາມຍິນດີຕ້ອນ ຮັບ ແລະ ຊົມເຊີຍ ສະຫາຍ ຟ້າມ ມິງ ຈິງ ກໍາມະການກົມການເມືອງສູນກາງພັກ ກອມມູນິດຫວຽດນາມ, ນາຍົກລັດຖະມົນຕີ ແຫ່ງ ສສ ຫວຽດນາມ ພ້ອມດ້ວຍຄະນະ ທີ່ໄດ້ເດີນທາງມາຢ້ຽມຢາມ ສປປ ລາວ ຢ່າງເປັນທາງການໃນຄັ້ງນີ້ ເຊິ່ງເປັນການປະກອບສ່ວນສໍາຄັນເຂົ້າໃນການຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມອ້າຍນ້ອງ. ສະຫາຍ ທອງລຸນ ສີສຸລິດ ໄດ້ສະແດງຄວາມພາກພູມໃຈ ແລະ ເອກອ້າງທະນົງໃຈເປັນຢ່າງຍິ່ງທີ່ເຫັນວ່າ ສາຍພົວພັນມິດຕະພາບຂອງສອງປະເທດ ລາວ-ຫວຽດນາມ ໄດ້ສືບຕໍ່ມີຄວາມໜັກແໜ້ນ, ກ້າວສູ່ລວງເລິກຢ່າງບໍ່ຢຸດຢັ້ງ ແລະ ກາຍເປັນມໍລະດົກອັນລໍ້າຄ່າ ທີ່ບັນດາບັນພະບູລຸດຂອງສອງປະເທດໄດ້ສ້າງໄວ້. ໃນປີຜ່ານມາ, ສອງພັກ, ສອງລັດ ພວກເຮົາໄດ້ປະສານສົມທົບກັນຢ່າງແໜ້ນແຟ້ນ ໃນການສະເຫລີມສະຫລອງປີສາມັກຄີມິດຕະພາບ ຢ່າງເປັນຂະບວນຟົດຟື້ນ, ມີເນື້ອໃນເລິກເຊິ່ງ ແລະ ແທດເໝາະກັບສະພາບການຕົວຈິງຂອງສອງປະເທດ. ພ້ອມທັງໄດ້ສະແດງຄວາມຊົມເຊີຍຕໍ່ຜົນສໍາເລັດຂອງການພົບປະສອງຝ່າຍ ລະຫວ່າງ ສອງນາຍົກລັດ ຖະມົນຕີລາວ-ຫວຽດນາມ ກໍຄື ການເຂົ້າຮ່ວມພິທີສະຫລຸບປີສາມັກຄີມິດຕະພາບ ລາວ-ຫວຽດນາມ, ຫວຽດນາມ-ລາວ ປີ 2022 ເຊິ່ງສອງຝ່າຍ ໄດ້ຢືນຢັນທີ່ຈະພ້ອມກັນຈັດຕັ້ງຜັນຂະຫຍາຍຂໍ້ຕົກລົງ ຂອງການນໍາຂັ້ນສູງຂອງສອງພັກ, ບັນດາຂໍ້ຕົກລົງຂອງສອງລັດຖະບານ ກໍຄື ສືບຕໍ່ເສີມຂະຫຍາຍ ແລະ ປົກປັກຮັກສາສາຍພົວພັນພິເສດທີ່ຫາຍາກ ລະຫວ່າງ ສອງປະເທດ ລາວ-ຫວຽດນາມ ໃຫ້ນັບມື້ນັບເຂົ້າສູ່ລວງເລິກ ແລະ ມີປະສິດທິຜົນ ໂດຍສະເພາະຊຸກຍູ້ການພົວພັນຮ່ວມມືດ້ານເສດຖະກິດ-ການຄ້າ, ການລົງທຶນ, ສຶກສາ, ການສ້າງຊັບພະຍາກອນມະນຸດ, ສາທາ ລະນະສຸກ, ວິທະຍາສາດ-ເຕັກນິກ ແລະ ອື່ນໆ ໃຫ້ມີປະສິດທິຜົນຂຶ້ນກວ່າເກົ່າ, ສົມຄູ່ກັບການພົວພັນທີ່ດີທາງດ້ານການເມືອງ, ພ້ອມທັງໄດ້ຕີລາຄາສູງ ຕໍ່ຜົນສໍາເລັດຂອງກອງປະຊຸມລະຫວ່າງສອງກົມການເມືອງ ລາວ-ຫວຽດນາມ ໃນທ້າຍເດືອນ ທັນວາ 2022 ຜ່ານມາ.

ພ້ອມນີ້, ສະຫາຍ ທອງລຸນ ສີສຸລິດ ໄດ້ຝາກຄວາມຢື້ຢາມຖາມຂ່າວອັນອົບອຸ່ນໄປຍັງ ສະຫາຍ ເລຂາທິ ການໃຫຍ່ ຫງວຽນ ຟູ ຈ້ອງ, ສະຫາຍ ປະທານປະເທດ ຫງວຽນ ຊວັນ ຟຸກ, ບັນດາສະຫາຍການນໍາຂັ້ນສູງ ແລະ ອະດີດການນໍາ ພັກ, ລັດ ສສ ຫວຽດນາມ, ພ້ອມທັງໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ການນໍາພາອັນສະຫລາດສ່ອງໃສ, ຖືກຕ້ອງ ແລະ ມີຫົວຄິດປະດິດສ້າງຂອງພັກກອມມູນິດ ຫວຽດນາມ ກໍຄື ການຄຸ້ມຄອງບໍລິຫານປະເທດຢ່າງມີປະສິດທິຜົນຂອງລັດຖະບານ ຫວຽດນາມ ເຖິງວ່າສະພາບການພາກພື້ນ ແລະ ໃນໂລກ ຈະມີການຜັນແປໄປຢ່າງສັບສົນ ບວກກັບການແພ່ລະບາດຂອງພະຍາດໂຄວິດ-19, ແຕ່ ພັກ, ລັດ ແລະ ປະຊາຊົນຫວຽດນາມ ອ້າຍນ້ອງ ຍັງສາມາດສືບຕໍ່ຍາດໄດ້ຜົນສໍາເລັດອັນໃຫຍ່ຫລວງ, ຮອບດ້ານ, ມີສະຖຽນລະພາບທາງການເມືອງໜັກແໜ້ນ, ຮັບປະກັນດ້ານປ້ອງກັນຊາດ, ປ້ອງກັນຄວາມສະຫງົບ, ເສດຖະກິດມີການຂະຫຍາຍຕົວຕໍ່ເນື່ອງ, ຊີວິດການເປັນຢູ່ຂອງປະຊາຊົນ ໄດ້ຮັບການປັບປຸງດີຂຶ້ນເລື້ອຍໆ, ບົດບາດ, ອິດທິພົນຂອງ ສສ ຫວຽດນາມ ນັບມື້ຍິ່ງໄດ້ຮັບການຍົກສູງຂຶ້ນໃນເວທີພາກພື້ນ ແລະ ໃນໂລກ. ພ້ອມທັງໄດ້ສະແດງຄວາມຂອບອົກຂອບໃຈ ແລະ ຮູ້ບຸນຄຸນຢ່າງສູງ ຕໍ່ພັກ, ລັດຖະບານ ແລະ ປະຊາຊົນຫວຽດນາມອ້າຍນ້ອງ ທີ່ຍາມໃດກໍໄດ້ໃຫ້ການສະໜັບສະໜູນ, ຊ່ວຍເຫລືອອັນໃຫຍ່ຫລວງ, ລໍ້າຄ່າ, ທັນການ ແລະ ມີປະສິດທິຜົນ ໃຫ້ແກ່ປະຊາຊົນລາວ ຕະຫລອດມາ.

ສະຫາຍ ຟ້າມ ມິງ ຈິງ ໄດ້ສະແດງຄວາມຂອບໃຈ ຕໍ່ການຕ້ອນຮັບອັນອົບອຸ່ນ ແລະ ສະແດງຄວາມພາກ ພູມໃຈ ທີ່ໄດ້ເດີນທາງມາຢ້ຽມຢາມ ສປປ ລາວ ຢ່າງເປັນທາງການໃນຄັ້ງນີ້ ເປັນການຢ້ຽມຢາມ ສປປ ລາວ ເປັນຄັ້ງທຳອິດ ພາຍຫລັງຮັບຕຳແໜ່ງນາຍົກລັດຖະມົນຕີ ແລະ ເປັນຄະນະຜູ້ແທນຂັ້ນສູງທຳອິດຂອງຕ່າງປະເທດມາຢ້ຽມຢາມ ລາວ ໃນປີ 2023, ພ້ອມທັງໄດ້ແຈ້ງໃຫ້ຊາບເຖິງຈຸດປະສົງຂອງການຢ້ຽມຢາມຄັ້ງນີ້ ນອກຈາກຢ້ຽມຢາມຢ່າງເປັນທາງການແລ້ວ ຍັງໄດ້ ເຂົ້າຮ່ວມພິທີສະຫລຸບປີສາມັກຄີມິດຕະພາບ ລາວ-ຫວຽດນາມ, ຫວຽດນາມ-ລາວ ປີ 2022 ອັນມີຄວາມໝາຍຄວາມສໍາຄັນຂອງສອງປະເທດ, ເຂົ້າຮ່ວມກອງປະຊຸມຄະນະກຳມະການຮ່ວມມື ທະວິພາຄີ ລະຫວ່າງ ລັດຖະບານ ແຫ່ງ ສປປ ລາວ ແລະ ລັດຖະບານ ແຫ່ງ ສສ ຫວຽດນາມ ຄັ້ງທີ 45 ເພື່ອຕິດຕາມການຜັນຂະຫຍາຍບັນດາໜ້າວຽກທີ່ ກອງປະຊຸມສອງກົມການເມືອງ ລາວ-ຫວຽດນາມ ໄດ້ຕົກລົງຮ່ວມກັນໃນທ້າຍປີ 2022 ຜ່ານມາ, ທັງຍັງເປັນການສະແດງຄວາມຊົມເຊີຍ ຕໍ່ ສະຫາຍ ສອນໄຊ ສີພັນດອນ ທີ່ໄດ້ຮັບເລືອກຕັ້ງໃຫ້ດໍາລົງຕໍາແໜ່ງເປັນ ນາຍົກລັດຖະມົນຕີ ແຫ່ງ ສປປ ລາວ ໃນກອງປະຊຸມ ສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ IX ໃນວັນທີ 30 ທັນວາ 2022 ຜ່ານມາ. ພ້ອມກັນນັ້ນ, ກໍໄດ້ນໍາເອົາຄວາມຢ້ຽມຢາມຖາມຂ່າວ ແລະ ຄໍາອວຍພອນປີໃໝ່ ຈາກການນໍາຂັ້ນສູງຂອງ ສສ ຫວຽດນາມ ເຖິງການນໍາຂັ້ນສູງຂອງ ພັກ-ລັດ ແລະ ປະຊາຊົນລາວບັນດາເຜົ່າທຸກຖ້ວນໜ້າ.

ສະຫາຍ ທອງລຸນ ສີສຸລິດ ແລະ ສະຫາຍ ຟ້າມ ມິງ ຈິງ ໄດ້ແລກປ່ຽນຄໍາຄິດເຫັນນໍາກັນຫລາຍບັນຫາ, ໂດຍສະເພາະ ກ່ຽວກັບການສືບຕໍ່ເສີມຂະຫຍາຍສາຍພົວພັນການຮ່ວມມືໃນດ້ານຕ່າງໆ ເປັນຕົ້ນ ແມ່ນການແລກ ປ່ຽນບົດຮຽນທາງດ້ານວຽກສາຍພັກ, ການຮ່ວມມືທີ່ມີປະສິດທິຜົນທາງດ້ານສາຍລັດ ແລະ ການປະຕິບັດແຜນການຮ່ວມມື ແລະ ໂຄງການຕ່າງໆ ໃຫ້ມີປະສິດທິຜົນຍິ່ງໆຂຶ້ນ, ສືບຕໍ່ຊ່ວຍເຫລືອເຊິ່ງກັນ ແລະ ກັນໃນການພັດທະນາເສດຖະກິດໃຫ້ເຂັ້ມແຂງ, ເປັນເຈົ້າຕົນເອງ ແລະ ນໍາເອົາຜົນປະໂຫຍດຕົວຈິງມາສູ່ປະຊາຊົນສອງຊາດ ລາວ-ຫວຽດ ນາມອ້າຍນ້ອງ. ສອງຝ່າຍໄດ້ຢືນຢັນຄືນເຖິງນະໂຍບາຍອັນສະເໝີຕົ້ນສະເໝີປາຍ ແລະ ຄວາມໝາຍໝັ້ນທີ່ຈະສືບຕໍ່ພ້ອມກັນອອກແຮງ ປົກປັກຮັກສາ ແລະ ເພີ່ມພູນຄູນສ້າງ ສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລາວ-ຫວຽດນາມ, ຫວຽດນາມ-ລາວ ໃຫ້ຫມັ້ນຄົງຂະໜົງແກ່ນ ແລະ ນັບມື້ນັບແຕກດອກອອກຜົນຢ່າງບໍ່ຢຸດຢັ້ງ.

ໃນວັນດຽວກັນ, ສະຫາຍ ຟ້າມ ມິງ ຈິງ ແລະ ຄະນະ ຍັງໄດ້ໄປຢ້ຽມຢາມບັນດາອະດີດການນໍາຂັ້ນສູງຂອງ ສປປ ລາວ ຄື: ສະຫາຍ ຈູມມາລີ ໄຊຍະສອນ, ສະຫາຍ ບຸນຍັງ ວໍລະຈິດ ອະດີດປະທານປະເທດ ແລະ ສະຫາຍ ທອງສິງ ທໍາມະວົງ ອະດີດນາຍົກລັດຖະມົນຕີ ແຫ່ງ ສປປ ລາວ ອີກດ້ວຍ.

ແຫຼ່ງຂ່າວ: ຂປລ

ໂດຍຕອບສະໜອງຕາມຄຳເຊີນຂອງ ສະຫາຍ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ, ສະຫາຍ ຟ້າມ ມິງ ຈິງ ນາຍົກລັດຖະມົນຕີ ແຫ່ງ ສາທາລະນະລັດ ສັງຄົມນິຍົມ ຫວຽດນາມ ພ້ອມຄະນະຜູ້ແທນຂັ້ນສູງ ໄດ້ເດີນທາງຢ້ຽມຢາມ ສາທາລະນະລັດ ປະຊາທິປະໄຕ ປະຊາຊົນລາວ ຢ່າງເປັທາງການ, ພ້ອມທັງເຂົ້າຮ່ວມກອງປະຊຸມຄະນະກຳມະການຮ່ວມມືທະວິພາຄີ ລະຫວ່າງ ລັດຖະ ບານ ແຫ່ງ ສປປ ລາວ ແລະ ລັດຖະບານ ແຫ່ງ ສສ ຫວຽດນາມ ຄັ້ງທີ 45 ແລະ ເຂົ້າຮ່ວມພິທີສະຫລຸບປີສາມັກຄີມິດຕະພາບລາວ-ຫວຽດນາມ, ຫວຽດນາມ-ລາວ ແຕ່ວັນທີ 11-12 ມັງກອນ 2023 ເພື່ອຮັດແໜ້ນ ແລະ ເສີມຂະຫຍາຍ ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງປະເທດ ລາວ ແລະ ຫວຽດນາມ ໃຫ້ແໜ້ນແຟ້ນຍິ່ງໆຂຶ້ນ.

ຄະນະຜູ້ແທນຂັ້ນສູງຂອງ ສສ ຫວຽດນາມນໍາໂດຍ ສະຫາຍ ຟ້າມ ມິງ ຈິງ ນາຍົກລັດຖະມົນຕີ ແຫ່ງ ສສ ຫວຽດນາມ ໄດ້ເດີນທາງເຖິງນະຄອນຫລວງວຽງຈັນ ໃນຕອນເຊົ້າຂອງວັນທີ 11 ມັງກອນ 2023 ແລະ ໄດ້ມີພິທີຕ້ອນຮັບຢ່າງເປັນທາງການ ແລະ ສົມກຽດ ໂດຍ ສະຫາຍ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ, ທີ່ສໍານັກງານນາຍົກລັດຖະມົນຕີ. ຫລັງຈາກສໍາເລັດພິທີຕ້ອນຮັບຢ່າງເປັນທາງການ, ສະຫາຍ ນາຍົກລັດຖະ ມົນຕີ ສອນໄຊ ສີພັນດອນ ພ້ອມດ້ວຍຄະນະຜູ້ແທນຂັ້ນສູງຂອງ ສປປ ລາວ ໄດ້ດໍາເນີນການພົບປະສອງຝ່າຍກັບ ສະຫາຍ ນາຍົກລັດຖະມົນຕີ ຟ້າມ ມິງ ຈິງ ແລະ ຄະນະຜູ້ແທນຂັ້ນສູງ ແຫ່ງ ສສ ຫວຽດນາມ, ທີ່ສໍານັກງານນາຍົກລັດຖະມົນຕີ. ໃນການພົບປະຄັ້ງນີ້, ສະຫາຍ ນາຍົກລັດຖະມົນຕີ ສອນໄຊ ສີພັນດອນ ໄດ້ສະແດງຄວາມຍິນດີຕ້ອນຮັບອັນອົບອຸ່ນ ຕໍ່ການຢ້ຽມຢາມ ສປປ ລາວ ຢ່າງເປັນທາງການ ຄັ້ງນີ້ ຂອງ ສະຫາຍ ນາຍົກລັດຖະມົນຕີ ຟ້າມ ມິງ ຈິງ ເຊິ່ງຖືເປັນການຢ້ຽມຢາມ ແລະ ພົບປະກັນຄັ້ງທໍາອິດ ຂອງສອງນາຍົກລັດຖະມົນຕີ, ສະແດງໃຫ້ເຫັນເຖິງໄມຕີຈິດມິດຕະພາບອັນດູດດື່ມ, ຄວາມສາມັກຄີຮັກແພງອັນສະໜິດສະໜົມຂອງສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ອ້າຍນ້ອງຢ່າງແທ້ຈິງ.

ໃນໂອກາດດຽວກັນນີ້, ສະຫາຍ ນາຍົກລັດຖະມົນຕີ ຟ້າມ ມິງ ຈິງ ກໍໄດ້ສະແດງຄວາມຂອບໃຈຢ່າງຈິງໃຈ ຕໍ່ການຕ້ອນຮັບອັນອົບອຸ່ນ ແລະ ສົມກຽດ ຈາກລັດຖະບານ ແລະ ປະຊາຊົນລາວ ໃນຄັ້ງນີ້, ພ້ອມທັງໄດ້ສະແດງຄວາມຊົມເຊີຍຢ່າງຈິງໃຈຕໍ່ ສະຫາຍ ສອນໄຊ ສີພັນດອນ ທີ່ໄດ້ຮັບເລືອກຕັ້ງໃຫ້ດໍາລົງຕໍາແໜ່ງເປັນ ນາຍົກລັດຖະມົນ ຕີ ແຫ່ງ ສປປ ລາວ ໃນກອງປະຊຸມ ສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ IX ໃນວັນທີ 30 ທັນວາ 2022 ຜ່ານມາ. ພ້ອມນັ້ນ, ສະຫາຍ ນາຍົກລັດຖະມົນຕີ ແຫ່ງ ສສ ຫວຽດນາມ ກໍໄດ້ເຊື້ອເຊີນ ສະຫາຍ ນາຍົກລັດຖະມົນຕີ ແຫ່ງ ສປປ ລາວ ເດີນທາງຢ້ຽມຢາມ ສສ ຫວຽດນາມ ໃນໂອກາດທີ່ເໝາະສົມ.

ການພົບປະຄັ້ງນີ້, ສອງຝ່າຍໄດ້ຮ່ວມກັນທົບທວນຄືນ ແລະ ຕີລາຄາສູງ ຕໍ່ການຮ່ວມມືຮອບດ້ານ ຂອງສອງປະເທດ, ການຈັດຕັ້ງປະຕິບັດບັນດາໂຄງການຮ່ວມມື ແລະ ຂໍ້ຕົກລົງຮ່ວມມືສອງຝ່າຍ ກໍຄື ການຕົກລົງຂອງການນໍາຂັ້ນສູງຂອງສອງປະເທດ ໃນທຸກໆດ້ານຕະຫລອດໄລຍະຜ່ານມາ ເປັນຕົ້ນ ການພົວພັນຮ່ວມມືດ້ານການເມືອງ ສືບຕໍ່ມີຄວາມຮັດແໜ້ນ, ໝັ້ນທ່ຽງ, ມີຫລາຍຮູບ, ຫລາຍແບບ, ສ້າງໄດ້ຄວາມເຊື່ອໝັ້ນເຊິ່ງກັນ ແລະ ກັນ ໃນລະດັບສູງ, ມີການໄປມາ ແລະ ພົບປະ ລະຫວ່າງການນໍາຂັ້ນສູງ ແລະ ທຸກລະດັບ ເປັນປົກກະຕິ; ການຮ່ວມມືດ້ານປ້ອງກັນຊາດ, ປ້ອງກັນຄວາມສະຫງົບ ແລະ ການຕ່າງປະເທດ ນັບມື້ນັບໄດ້ຮັບການເສີມຂະຫຍາຍ ແລະ ມີປະສິດທິພາບ; ການຮ່ວມມືດ້ານເສດຖະກິດ-ການຄ້າ, ການລົງທຶນ, ການສຶກສາ, ສາທາລະນະສຸກ, ຖະແຫລງຂ່າວ, ວັດທະນະທໍາ, ກິ ລາ, ທ່ອງທ່ຽວ, ອົງການຈັດຕັ້ງມະຫາຊົນ ແລະ ລະຫວ່າງປະຊາຊົນກັບປະຊາຊົນ ໄດ້ຮັບການເພີ່ມທະວີ ແລະ ນໍາເອົາຜົນປະໂຫຍດຢ່າງເປັນຮູບປະທໍາ ມາສູ່ປະຊາຊົນສອງຊາດ ເປັນຢ່າງດີ, ບັນດາຂໍ້ຫຍຸ້ງຍາກ ແລະ ຂໍ້ຄົງຄ້າງຕ່າງໆ ແມ່ນໄດ້ຮັບຄວາມເອົາໃຈໃສ່ແກ້ໄຂຈາກທັງສອງຝ່າຍ ເຮັດໃຫ້ສາມາດຜ່ານໄປໄດ້ດ້ວຍດີ. ການຮ່ວມມືລະຫວ່າງບັນ ດາກະຊວງ, ຂະແໜງການ ແລະ ທ່ອງຖິ່ນ ນັບມື້ນັບໃກ້ຊິດສະໜິດສະໜົມ ແລະ ມີປະສິດທິຜົນ.

ພ້ອມນີ້, ສອງຝ່າຍ ໄດ້ຮ່ວມກັນວາງທິດທາງແຜນການຮ່ວມມືໃນຕໍ່ໜ້າ, ເຊິ່ງສອງຝ່າຍໄດ້ເຫັນດີເປັນເອກະພາບທີ່ຈະສືບຕໍ່ປະສານສົມທົບກັນຢ່າງໃກ້ຊິດ ເພື່ອຜັນຂະຫຍາຍຕາມທັດສະນະຍູ້ແຮງການຮ່ວມມືຮອບດ້ານໃນທຸກຂົງເຂດວຽກງານ ເປັນຕົ້ນ ການຮ່ວມມືດ້ານການເມືອງ, ປ້ອງກັນຊາດ-ປ້ອງກັນຄວາມສະຫງົບ, ການຕ່າງປະ ເທດ, ເສດຖະກິດ-ການຄ້າ, ການລົງທຶນ, ການເຊື່ອມໂຍງພື້ນຖານໂຄງລ່າງ, ການທ່ອງທ່ຽວ, ພະລັງງານ, ກະສິກໍາສະອາດ, ການສຶກສາ, ວັດທະນະທໍາ, ສາທາລະນະສຸກ, ວິທະຍາສາດ-ເຕັກນິກ ແລະ ອື່ນໆ. ໄປຄຽງຄູ່ກັນນັ້ນ, ສອງຝ່າຍເຫັນດີໃນການສືບຕໍ່ເພີ່ມທະວີ ການສຶກສາອົບຮົມມູນເຊື້ອຄວາມສາມັກຄີພິເສດ ລາວ-ຫວຽດນາມ ໃນຖັນແຖວພະນັກງານ ແລະ ປະຊາຊົນ ກໍຄື ຖັນແຖວຊາວໜຸ່ມ-ເຍົາວະຊົນ ຂອງສອງປະເທດ. ນອກນີ້, ສອງຝ່າຍ ຍັງໄດ້ແລກປ່ຽນຄໍາຄິດຄໍາເຫັນ ກ່ຽວກັບສະພາບການພົ້ນເດັ່ນໃນພາກພື້ນ ແລະ ສາກົນ ທີ່ສອງຝ່າຍມີຄວາມສົນໃຈຮ່ວມກັນ.

ໂອກາດດຽວກັນນີ້, ສະຫາຍ ນາຍົກລັດຖະມົນຕີ ສອນໄຊ ສີພັນດອນ ໄດ້ຕາງໜ້າໃຫ້ລັດຖະບານ ແລະ ປະຊາຊົນລາວ ສະແດງຄວາມຂອບໃຈ ຕໍ່ພັກ, ລັດຖະບານ ແລະ ປະຊາຊົນຫວຽດນາມອ້າຍນ້ອງ ທີ່ໄດ້ໃຫ້ການຮ່ວມມື ແລະ ການຊ່ວຍເຫລືອອັນໃຫຍ່ຫລວງ, ລໍ້າຄ່າ, ທັນການ ແລະ ມີປະສິດທິຜົນ ຕໍ່ ສປປ ລາວ ຕະຫລອດໄລຍະຜ່ານມາ ບໍ່ວ່າຈະໃນພາລະກິດຕໍ່ສູ້ປົດປ່ອຍຊາດໃນເມື່ອກ່ອນ ກໍຄື ໃນໄລຍະປົກປັກຮັກສາ ແລະ ສ້າງສາພັດທະນາປະເທດໃນປັດຈຸບັນ. ພ້ອມທັງໄດ້ສະແດງຄວາມຂອບໃຈຕໍ່ຄໍາຊົມເຊີຍ ແລະ ຄໍາເວົ້າອັນຈົບງາມຂອງ ສະຫາຍ ນາຍົກລັດຖະມົນຕີ ຟ້າມ ມິງ ຈິງ ແລະ ພ້ອມທີ່ຈະຮ່ວມເຮັດວຽກກັບ ສະຫາຍ ຟ້າມ ມິງ ຈິງ ຢ່າງໃກ້ຊິດ ເພື່ອເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະ ຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມອ້າຍນ້ອງ ໃຫ້ຍືນຍົງ ແລະ ໜັກແໜ້ນຍິ່ງໆຂຶ້ນ.

ພາຍຫລັງສໍາເລັດການພົບປະສອງຝ່າຍ, ສອງສະຫາຍນາຍົກລັດຖະມົນຕີ ລາວ ແລະ ຫວຽດນາມ ໄດ້ເຂົ້າຮ່ວມເປັນສັກຂີພິຍານການລົງນາມເອກະສານຮ່ວມມືສອງຝ່າຍ ຈໍານວນ 10 ສະບັບຄື: ບົດບັນທຶກຄວາມເຂົ້າໃຈ ວ່າດ້ວຍ ການສ້າງກົນໄກການປຶກສາຫາລືວຽກງານການທູດເສດຖະກິດ ລະຫວ່າງ ກະຊວງການຕ່າງປະເທດ ແຫ່ງ ສປປ ລາວ ແລະ ກະຊວງການຕ່າງປະເທດ ແຫ່ງ ສສ ຫວຽດນາມ; ບົດບັນທຶກຄວາມເຂົ້າໃຈ ວ່າດ້ວຍ ແຜນງານການຄົ້ນຄວ້າ ແລະ ຝຶກອົບຮົມໃຫ້ແກ່ ນັກການທູດ ແລະ ພະນັກງານກະຊວງການຕ່າງປະເທດ ລະຫວ່າງ ກະຊວງການຕ່າງປະເທດ ແຫ່ງ ສປປ ລາວ ແລະ ກະຊວງການຕ່າງປະເທດ ແຫ່ງ ສສ ຫວຽດນາມ; ສົນທິສັນຍາ ວ່າດ້ວຍ ການຊ່ວຍເຫລືອເຊິ່ງກັນ ແລະ ກັນ ທາງດ້ານຍຸຕິທໍາໃນບັນຫາທາງແພ່ງ ລະຫວ່າງ ສປປ ລາວ ແລະ ສສ ຫວຽດ ນາມ; ສັນຍາ ລະຫວ່າງ ລັດຖະບານ ແຫ່ງ ສປປ ລາວ ແລະ ລັດຖະບານ ແຫ່ງ ສສ ຫວຽດນາມ ວ່າດ້ວຍ ຄູ່ຮ່ວມມືດີຈິຕອນ; ອະນຸສັນຍາ ວ່າດ້ວຍ ການຮ່ວມມືກໍ່ສ້າງບຸກຄາລະກອນ ລະຫວ່າງ ລັດຖະບານ ແຫ່ງ ສປປ ລາວ ແລະ ລັດຖະບານ ແຫ່ງ ສສ ຫວຽດນາມ; ແຜນການຮ່ວມມື ປີ 2023 ລະຫວ່າງ ກະຊວງສຶກສາທິການ ແລະ ກິລາ ແຫ່ງ ສປປ ລາວ ແລະ ກະຊວງສຶກສາທິການ ແລະ ກໍ່ສ້າງ ແຫ່ງ ສສ ຫວຽດນາມ; ບົດບັນທຶກຄວາມເຂົ້າໃຈ ລະຫວ່າງ ກະຊວງສາທາລະນະສຸກ ແຫ່ງ ສປປ ລາວ ແລະ ກະຊວງສາທາລະນະສຸກ ແຫ່ງ ສສ ຫວຽດນາມ; ບົດບັນທຶກການສ້າງຕັ້ງສາຍພົວພັນຮ່ວມມືມິດຕະພາບ ລະຫວ່າງ ແຂວງຈໍາປາສັກ ແຫ່ງ ສປປ ລາວ ແລະ ແຂວງກວາງຈິ ແຫ່ງ ສສ ຫວຽດນາມ; ບົດບັນທຶກຄວາມເຂົ້າໃຈ ວ່າດ້ວຍ ການຮ່ວມມືດ້ານນະວັດຕະກໍາທາງດ້ານການເງິນ ແລະ ລະບົບຊໍາລະ ລະຫວ່າງ ທະນາຄານ ແຫ່ງ ສປປ ລາວ ແລະ ທະນາຄານແຫ່ງລັດ ຫວຽດນາມ; ບົດບັນທຶກຄວາມເຂົ້າໃຈ ລະຫວ່າງ ກະຊວງໂຍທາທິການ ແລະ ຂົນສົ່ງ ແຫ່ງ ສປປ ລາວ ແລະ ກະຊວງຄົມມະນາຄົມ ແລະ ຂົນສົ່ງ ແຫ່ງ ສສ ຫວຽດນາມ ກ່ຽວກັບ ການຮ່ວມມືຮອບດ້ານຂົງເຂດຄົມມະນາຄົມ ແລະ ຂົນສົ່ງທາງນໍ້າ.

ໃນວັນດຽວກັນ, ສະຫາຍ ຟ້າມ ມິງ ຈິງ, ນາຍົກລັດຖະມົນຕີ ແຫ່ງ ສສ ຫວຽດນາມ ພ້ອມຄະນະຜູ້ແທນຂັ້ນສູງ ກໍໄດ້ເດີນທາງໄປວາງພວງມາລາຢູ່ ອານຸສາວະລີນັກຮົບນິລະນາມ ເພື່ອສະແດງຄວາມເຄົາລົບ ແລະ ລະນຶກເຖິງອ້າຍນ້ອງທະຫານນັກຮົບ ທີ່ໄດ້ຕໍ່ສູ້ເສຍສະລະເລືອດເນື້ອເພື່ອປະເທດຊາດ ແລະ ປະຊາຊົນ ໃນສະໄໝສົງຄາມ.

ແຫຼ່າງຂ່າວ: ປະເທດລາວ