ອີງຕາມແຈ້ງການ PPT ສາຂາ ນາໄຊ
ໂທລະໂຄ່ງຂໍເປັນກຳລັງໃຈໃຫ້ທຸກທ່ານ ໃຫ້ຜ່ານວິກິດຄັ້ງນີ້ໄປນໍາກັນໃຫ້ໄດ້.
ຮອງເຈົ້າແຂວງໆຊຽງຂວາງ ລົງກວດກາການກໍ່ສ້າງເຂື່ອນໄຟຟ້ານ້ຳງື່ມ 4
ຮອງເຈົ້າແຂວງໆຊຽງຂວາງລົງກວດກາການກໍ່ສ້າງເຂື່ອນໄຟຟ້ານ້ຳງື່ມ 4.
ເມື່ອບໍ່ດົນມານີ້, ທ່ານ ບົວເງິນ ຫຸມໄຊຍະພົມ ຮອງເຈົ້າແຂວງຊຽງຂວາງ, ຜູ້ຊີ້ນຳວຽກງານເສດຖະກິດ ພ້ອມຄະນະໄດ້ລົງກວດກາການກໍ່ສ້າງເຂື່ອນໄຟຟ້ານ້ຳງື່ມ 4 ທີ່ຄຸ້ມຫີນໝູເພິງ ບ້ານຊາຍ ເມືອງພູກູດ ແຂວງຊຽງຂວາງ ໂດຍທ່ານໄດ້ເນັ້ນໜັກໃຫ້ເອົາ ໃຈໃສ່ສຶກສາອົບຮົມການເມືອງແນວຄິດ ປະຊາຊົນ 2 ເມືອງທີ່ຖືກຜົນກະທົບ, ແກ້ໄຂຜົນກະທົບໂດຍອີງໃສ່ລະບຽບກົດໝາຍ, ຕ້ອງຮັບປະກັນດ້ານຄວາມປອດໄພ, ປະສານງານພົວພັນກັນຢ່າງສະໜິດແໜ້ນໃນການແກ້ໄຂ ແລະ ຈັດຕັ້ງປະຕິບັດວຽກງານ ເພື່ອໃຫ້ໂຄງ ການດຳເນີນໄປຕາມເປົ້າໝາຍ ແລະ ສຳເລັດຕາມຕາດໝາຍທີ່ວາງໄວ້.
ໂອກາດນີ້, ທ່ານ ຄຳໄສ ລາສະສີມາ ຫົວໜ້າໂຄງການເຂື່ອນໄຟຟ້ານ້ຳງງື່ມ 4 ໄດ້ລາຍງານ ການຈັດຕັ້ງປະຕິບັດໃນແຕ່ລະໜ້າວຽກມີຜົນສຳເລັດໃນຫລາຍດ້ານ, ເຂື່ອນໄຟຟ້ານ້ຳງື່ມ 4 ເປັນໂຄງການລົງທຶນຂອງລັດຖະບານລາວ ໂດຍມອບໃຫ້ລັດວິສາຫະກິດໄຟຟ້າລາວ ເປັນຜູ້ຈັດຕັ້ງປະຕິບັດໃນຮູບແບບກໍ່ສ້າງ ແລະ ຄຸ້ມຄອງ-ບຳລຸງຮັກສາ, ເປັນເຂື່ອນຄອນກີດອັດແໜ້ນ, ສັນເຂື່ອນຍາວ 228 ແມັດ, ສູງ 74 ແມັດ, ມີກຳລັງຕິດຕັ້ງ240 ເມກາວັດ, ຕິດຕັ້ງເຄື່ອງຈັກ 3 ເຄື່ອງ, ສາມາດຜະລິດພະລັງງານໄຟຟ້າໄດ້ 872 ກິໂລວັດໂມງຕໍ່ປີ(GWH/ປີ), ລວງສູງນ້ຳຕົກອອກແບບ 260 ແມັດ, ລວງຍາວອຸມົງ ສົ່ງນ້ຳ16,5 ກິໂລແມັດ, ຄວາມຍາວຂອງທໍ່ສົ່ງນ້ຳ 1.030 ແມັດ, ປະລິມານການໄຫຼອອກແບບທັງໝົດ 107,3 ແມັດກ້ອນຕໍ່ວິນາທີ, ເນື້ອທີ່ອ່າງເກັບນ້ຳ 5,51 ກິໂລຕາແມັດ, ບໍລິມາດອ່າງເກັບນ້ຳໄດ້ 80,4 ລ້ານແມັດກ້ອນ, ນ້ຳທີ່ໃຊ້ໃນການແລ່ນຈັກ 47,7 ລ້ານແມັດກ້ອນກະແສໄຟຟ້າທີ່ຜະລິດທັງໝົດ ຈະສົ່ງເຂົ້າລະບົບສາຍສົ່ງ ຂອງລັດວິສາຫະກິດໄຟຟ້າລາວ ເພື່ອຕອບສະໜອງພະລັງງານ ໃຫ້ບັນດາແຂວງພາກເໜືອ, ມູນຄ່າການກໍ່ສ້າງຂອງໂຄງການ 706 ລ້ານກວ່າໂດລາສະຫະລັດ.
ປັດຈຸບັນ, ການກໍ່ສ້າງເຂື່ອນສຳເລັດ 95,53%, ສາຍສົ່ງສຳເລັດ 55,33%, ວຽກສິ່ງແວດລ້ອມ 87,79%, ວຽກກໍ່ສ້າງຫົວງານນ້ຳປະປາບ້ານພຽງຫລວງ 75,89%, ວຽກກໍ່ສ້າງຂົວຂ້າມນ້ຳງື່ມ ບ້ານພຽງຫຼວງ ສຳເລັດ 100%, ກໍ່ສ້າງປະຕູນ້ຳເຂົ້າຫາເຮືອນຈັກ 99,48%, ກໍ່ສ້າງອຸມົງສົ່ງນ້ຳເຂົ້າຫາເຮືອນຈັກ 76,61% ແລະ ກໍ່ສ້າງເຮືອນຈັກ ສຳເລັດ 94,84%.
ແຫຼ່ງຂ່າວ: ປະເທດລາວ
ພິທີມອບ-ຮັບ ລົດບັນທຸກນໍ້າສະອາດ
ພິທີມອບ-ຮັບ ລົດບັນທຸກນໍ້າສະອາດໃຫ້ແກ່ 7 ແຂວງ ໄດ້ຈັດຂຶ້ນໃນວັນທີ່ 6 ພຶດສະພາ 2022 ທີ່ ສູນນໍ້າສະອາດ ແລະ ອະນາໄມສິ່ງແວດລ້ອມ ລັດຖະບານຍີ່ປຸ່ນໄດ້ໃຫ້ການຊ່ວຍເຫຼືອລົດຈຳນວນ 9 ຄັນ ໃຫ້7 ແຂວງ ໂດຍມີແຂວງຄື:
1.ແຂວງອຸດົມໄຊ 2. ແຂວງຫຼວງພະບາງ3. ແຂວງສະຫັວນນະເຂດ4. ແຂວງສາລະວັນ5.ແຂວງເຊກອງ6.ແຂວງຈຳປາສັກ7.ແຂວງໄຊສົມບູນ ແລະ ອີກ1ຄັນແມ່ນມອບໃຫ້ສູນນໍ້າສະອາດ ແລະ ອະນາໄມສິ່ງແວດລ້ອມກະຊວງສາທາລະນະສຸກ,ລົດດັ່ງກ່າວສາມາດບັນຈຸນໍ້າສະອາດໄດ້ 4.000 ລິດ ລວມມູນຄ່າທັງໜົດ 68.916.430. (ເຢັນ ຍີ່ປຸ່ນ) ຫົກສິບແປດລ້ານເກົ້າແສນສິບຫົກພັນສີ່ຮ້ອຍສາມສິບເຢັນ ຍີ່ປຸ່ນ.
ລົດດັ່ງກ່າວແມ່ນມອບໃຫ້ແກ່ພະແນກສາທາລະນະສຸກແຂວງ ແລະ ສູນນໍ້າສະອາດ ແລະ ອະນາໄມສິ່ງແວດລ້ອມ ເພື່ອນຳໃຊ້ໃຫ້ເປັນປະໂຫຍດເພື່ອກະກຽມຮັບມືໄພພິບັດທາງທຳມະຊາດ , ເພື່ອກະກຽມການແຈກຢາຍໃຫ້ປະຊາຊົນທີ່ກຳລັງຈະຂາດແຄນນໍ້າສະອາດ ແລະ ວຽກງານ ກັນ,ຄວບຄຸມ ແລະ ຕອບໂຕ້ການແຜ່ລະບາດຂອງພະຍາດໂຄວິດ-19.
ເຂົ້າຮ່ວມພິທີມອບ ໂດຍແມ່ນ ທ່ານ ດຣ. ໄພວັນ ແກ້ວປະເສີດ ຮອງລັດຖະມົນຕີກະຊວງສາທາລະນະສຸກ, ມີ ຫ້ອງການກະຊວງສາທາລະນະສຸກ, ກົມ, ສູນ ແລະ ພະນັກງານທີ່ກ່ຽວຂ້ອງ ພ້ອມດ້ວຍພະແນກສາທາລະນະສຸກ 7 ແຂວງ ເຂົ້າຮ່ວມ.
ຂໍ້ມູນຈາກ: ສູນຂ່າວສານການຄ້າສຸຂະສຶກສາ
ສະຖານທູດຣັດເຊຍ ຖະແຫຼງກ່ຽວກັບສະພາບການໃນອູແກຣນ
ທ່ານ ດານິລ ອາ ໂວໂດປີອານອບ ເລຂານຸການຕີ ປະຈຳສະຖານທູດ ສ ຣັດເຊຍ ປະຈຳ ສປປ ລາວ ໄດ້ສືບຕໍ່ຕາງໜ້າໃຫ້ສະຖານທູດຣັດເຊຍ ປະຈຳ ສປປ ລາວ ຖະແຫຼງກ່ຽວກັບສະພາບການໃນປະເທດອູແກຣນ ໃນວັນທີ 6 ພຶດສະພາ ຜ່ານມາ ທີ່ສູນວິທະຍາສາດ ແລະ ວັດທະນະທໍາ ສ ຣັດເຊຍ ປະຈໍາ ສປປ ລາວ ວ່າ: ປັດຈຸບັນ, ກອງທັບຣັດເຊຍ ຍັງສືບຕໍ່ດໍາເນີນການເຄື່ອນໄຫວພິເສດທາງການທະຫານ ໂດຍລະບຸວ່າ ຣັດເຊຍ ຈະບັນລຸບັນດາເປົ້າໝາຍ ແລະ ຈຸດປະສົງຂອງຕົນຢ່າງແນ່ນອນ.
ທ່ານ ດານິລ ອາ ໂວໂດປີອານອບ ໄດ້ກ່າວອີກວ່າ: ປັດຈຸບັນ, ຄະນະຜູ້ແທນຣັດເຊຍ ແລະ ອູແກຣນ ກຳລັງດຳເນີນການປຶກສາຫາລືກ່ຽວກັບ ຮ່າງຂໍ້ຕົກລົງເກືອບທຸກວັນ ຜ່ານລະບົບທາງໄກ ຊຶ່ງວາລະຂອງການເຈລະຈາລວມມີສະຖານະທີ່ເປັນກາງຢ່າງຖາວອນ, ບໍ່ຕິດອາວຸດນິວເຄຣຍ, ສະຖານະທີ່ບໍ່ແມ່ນສະມາຊິກກຸ່ມ ແລະ ບໍ່ຕິດອາວຸດຂອງອູແກຣນ, ການປົດປ່ອຍອູແກຣນຈາກ ອຸດົມການນາຊີ, ການຮັບຮູ້ສະພາບຕົວຈິງທາງພູມສາດການເມືອງໃໝ່, ການຍົກເລີກບັນດາມາດຕະການຂວ້ຳບາດ ແລະ ສະຖານະຂອງພາສາຣັດເຊຍ.
ທ່ານ ດານິລ ອາ ໂວໂດປີອານອບ ໄດ້ກ່າວອີກວ່າ: ຣັດເຊຍ ເຫັນດີສືບຕໍ່ດຳເນີນການເຈລະຈາ ແລະ ເຫັນວ່າ ມີຄວາມຈຳເປັນທີ່ຈະຕ້ອງເຂົ້າໃຈວ່າ ຝ່າຍຣັດເຊຍບໍ່ໄດ້ຮຽກຮ້ອງໃຫ້ອູເເກຣນຍອມຈໍານົນ ແຕ່ຮຽກຮ້ອງໃຫ້ການນຳອູເເກຣນ ໂດຍສະເພາະແມ່ນ ທ່ານ ວະລາດິເມຍ ເຊເລັນສະກີ ອອກຄໍາສັ່ງປ່ອຍພົນລະເຮືອນທັງໝົດ ແລະ ຢຸດຕິການຕໍ່ຕ້ານ.
ເປົ້າໝາຍຂອງຣັດເຊຍບໍ່ໄດ້ລວມເອົາການປ່ຽນແປງລະບອບການປົກຄອງໃນອູແກຣນ, ຣັດເຊຍ ຕ້ອງການຮັບປະກັນຄວາມປອດໄພ ແລະ ຄວາມໝັ້ນຄົງ ຂອງປະຊາຊົນໃນພາກຕາເວັນອອກຂອງອູແກຣນ ເພື່ອບໍ່ໃຫ້ເຂົາເຈົ້າຖືກຂົ່ມຂູ່ຈາກກຳລັງທະຫານ ແລະ ຈາກຂະບວນການນາຊີ ແລະ ບໍ່ມີໄພຂົ່ມຂູ່ໃດໆຕໍ່ກັບສະຫະພັນຣັດເຊຍ ທີ່ອອກມາຈາກດິນແດນອູແກຣນ.
ຂ່າວ-ພາບ: ສຸກສະຫວັນ
ດ່ວນ! ເປີດດ່ານສາກົນທຸກດ່ານ ສຳລັບການເຂົ້າ-ອອກ ສປປ ລາວ
ໃນທີ່ສຸດມື້ນີ້ກໍມາຮອດ! ເປີດປະເທດແລ້ວ ພ້ອມຕ້ອນຮັບທຸກທ່ານເຂົ້າລາວ.
ຕາມການຖະແຫຼງຂ່າວ ໃນວັນທີ 7 ພຶດສະພາ 2022 ໂດຍ ທ່ານ ນ. ທິບພະກອນ ຈັນທະວົງສາ, ຮອງລັດຖະມົນຕີ, ຮອງຫົວໜ້າຫ້ອງວ່າການສຳນັກງານນາຍົກລັດຖະມົນຕີ, ຜູ້ປະຕິບັດໜ້າທີ່ໂຄສົກລັດຖະບານ ໃຫ້ຮູ້ວ່າ:
ເນື່ອງຈາກການລະບາດຂອງພະຍາດໂຄວິດ-19 ແລະ ອັດຕາການຕາຍ ຢູ່ປະເທດເຮົາ ໄດ້ຫຼຸດໜ້ອຍຖອຍລົງ ແລະ ອີງຕາມຄວາມຮຽກຮ້ອງຕ້ອງການຕົວຈິງ ເພື່ອຟື້ນຟູເສດຖະກິດ ໃນໄລຍະການລະບາດຂອງພະຍາດດັ່ງກ່າວ, ຄະນະສະເພາະກິດ ຈຶ່ງໄດ້ປະສານສົມທົບກັບພາກສ່ວນກ່ຽວຂ້ອງຄົ້ນຄວ້າ ມາດຕະການໃນການເຂົ້າ-ອອກ ສປປ ລາວ ໃນໄລຍະໃໝ່ ໃຫ້ສອດຄ່ອງກັບສະພາບຕົວຈິງ ໂດຍໄດ້ສົມທຽບກັບບົດຮຽນຕົວຈິງຢູ່ບັນດາປະເທດອ້ອມຂ້າງ ເຊັ່ນ: ສສ ຫວຽດ ນາມ, ຣາຊະອານາຈັກກຳປູເຈຍ ແລະ ຣາຊະອານາຈັກໄທ. ຫຼັງຈາກນັ້ນ ກໍ່ໄດ້ນຳເອົາຮ່າງມາດຕະການດັ່ງກ່າວ ທາບທາມ ເພື່ອຮັບປະກັນຄວາມກຽມພ້ອມຮອບດ້ານ ແລະ ການມີສ່ວນຮ່ວມ ຂອງທົ່ວສັງຄົມ ຢ່າງກວ້າງຂວາງ. ໂດຍອີງໃສ່ຜົນການທາບທາມ, ຄະນະສະເພາະກິດ ຈຶ່ງໄດ້ຄົ້ນຄວ້າປັບປຸງບັນດາມາດຕະການຕື່ມ ແລະ ໄດ້ລາຍງານສະເໜີລັດຖະບານພິຈາລະນາ. ມາຮອດມື້ນີ້, ລັດຖະບານ ໄດ້ກຳນົດມາດຕະການສຳລັບການເຂົ້າອອກປະເທດ, ເຊິ່ງຂ້າພະເຈົ້າ ຈະຂໍອະນຸຍາດອ່ານລາຍລະອຽດຂອງແຈ້ງການ ໃຫ້ບັນດາທ່ານຊາບ ດັ່ງນີ້:
ເຫັນດີຜ່ອນຜັນມາດຕະການເຂົ້າ-ອອກສປປລາວຄື:
1.ເປີດດ່ານສາກົນທຸກດ່ານ ສຳລັບການເຂົ້າ-ອອກ ຂອງພົນລະເມືອງລາວ, ຄົນຕ່າງງດ້າວ, ຄົນຕ່າງປະເທດ ແລະ ຄົນບໍ່ມີສັນຊາດ.
- ໃຫ້ພົນລະເມືອງຂອງບັນດາປະເທດທີ່ມີສັນຍາຍົກເວັ້ນວີຊາ ກັບ ສປປ ລາວ ແບບສອງຝ່າຍ ຫຼື ຝ່າຍດຽວ ສາມາດເດີນທາງເຂົ້າ ສປປ ລາວ ໂດຍບໍ່ຈຳເປັນຕ້ອງຂໍວີຊາ.
- ສໍາລັບພົນລະເມືອງ ຂອງບັນດາປະເທດ ທີ່ບໍ່ມີສັນຍາຍົກເວັ້ນວີຊາ ກັບ ສປປ ລາວ ແມ່ນ ສາມາດຂໍວີຊາຈາກສະຖານທູດ, ສະຖານກົງສູນ ແຫ່ງ ສປປ ລາວ ທີ່ປະຈຳຢູ່ຕ່າງປະເທດ ຫຼື ຜ່ານລະບົບ E-VISA ຫຼື ຂໍ ວີຊາກັບດ່ານ ຢູ່ດ່ານສາກົນ ທີ່ມີໜ່ວຍງານວີຊາກັບດ່ານ.
- ພົນລະເມືອງລາວ, ຄົນຕ່າງດ້າວ, ຄົນຕ່າງປະເທດ ແລະ ຄົນບໍ່ມີສັນຊາດ ອາຍຸແຕ່ 12 ປີ ຂຶ້ນໄປ ທີ່ບໍ່ທັນມີໃບຢັ້ງຢືນສັກວັກຊີນຄົບໂດສ ໃຫ້ມີຜົນກວດດ້ວຍເຄື່ອງກວດແບບໄວ (ATK) ພາຍໃນ 48 ຊົ່ວໂມງ ກ່ອນອອກຈາກປະເທດຕົ້ນທາງ. ເມື່ອເດີນທາງມາຮອດ ສປປ ລາວ ແລ້ວ ແມ່ນ ຈະບໍ່ມີການກວດຕົວຢ່າງ ຢູ່ສະໜາມບິນ ຫຼື ຢູ່ດ່ານຊາຍແດນສາກົນ ທາງບົກ ຫຼື ທາງເຮືອ. ສ່ວນຜູ້ທີ່ມີໃບຢັ້ງຢືນການສັກວັກຊີນຄົບໂດສແລ້ວ ແມ່ນສາມາດເດີນທາງເຂົ້າມາ ສປປ ລາວ ໄດ້ປົກກະຕິ ໂດຍບໍ່ມີການກວດຫາເຊື້ອໂຄວິດ-19 ອີກ ທັງຈາກປະເທດຕົ້ນທາງ ແລະ ເມື່ອເດີນທາງມາຮອດ ສປປ ລາວ.
- ສໍາລັບຄົນຕ່າງປະເທດ ທີ່ເດີນທາງເຂົ້າມາ ສປປ ລາວ ກໍລະນີມີການຕິດເຊື້ອພະຍາດໂຄວິດ-19 ແມ່ນຕ້ອງຮັບຜິດຊອບຄ່າໃຊ້ຈ່າຍໃນການປິ່ນປົວດ້ວຍຕົນເອງ.
2.ເຫັນດີດ້ານຫຼັກການ ໃຫ້ສາມາດນຳໃຊ້ພາຫະນະປະເພດຕ່າງໆ ເຂົ້າ-ອອກ ສປປ ລາວ ຄືກັນກັບໄລຍະກ່ອນການລະບາດຂອງພະຍາດໂຄວິດ-19. ມອບໃຫ້ກະຊວງໂຍທາທິການ ແລະ ຂົນສົ່ງ ອອກຄຳແນະນຳກ່ຽວກັບການນຳໃຊ້ພາຫະນະສ່ວນຕົວ, ໂດຍສານ ແລະ ທ່ອງທ່ຽວ ເຂົ້າ-ອອກ ສປປ ລາວ ໃຫ້ສອດຄ່ອງກັບສັນຍາສອງຝ່າຍ ແລະ ຫຼາຍຝ່າຍທີ່ ສປປ ລາວ ເປັນພາຄີ.
3.ໃຫ້ບັນດາກະຊວງ, ອົງການທຽບເທົ່າ ແລະ ອົງການປົກຄອງທ້ອງຖິ່ນທຸກຂັ້ນ ຕະຫຼອດຮອດຜູ້ປະກອບການທຸລະກິດ ກະກຽມຄວາມພ້ອມທຸກດ້ານ ໃນການບໍລິການຕ້ອນຮັບນັກທ່ອງທ່ຽວ ໂດຍສະເພາະການປັບປຸງສະຖານທີ່ທ່ອງທ່ຽວ, ໂຮງແຮມ, ຮ້ານອາຫານ, ການບໍລິການຂົນສົ່ງ ແລະ ອື່ນໆ ທີ່ຕິດພັນໃຫ້ໄດ້ມາດຕະຖານ ແລະ ມີຄຸນນະພາບດີກວ່າເກົ່າ ໂດຍໃຫ້ຖືວ່າວຽກງານທ່ອງທ່ຽວແມ່ນຄວາມຮັບຜິດຊອບລວມຂອງສັງຄົມ ເພື່ອເປັນການກະຕຸກຊຸກຍູ້ຟື້ນຟູເສດຖະກິດ ທີ່ກຳລັງພົບຄວາມຫຍຸ້ງຍາກຍ້ອນມີການລະບາດຂອງພະຍາດ ໂຄວິດ-19.
4.ມອບໃຫ້ຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ສົມທົບກັບຂະແໜງສາທາລະນະສຸກ ສືບຕໍ່ຕິດຕາມເຝົ້າລະວັງ ສາຍພັນໃໝ່ ເພື່ອຮັບປະກັນ ໃຫ້ແກ່ການປ້ອງກັນ, ຄວບຄຸມ, ກວດວິເຄາະ ແລະ ປິ່ນປົວ ຢ່າງມີປະສິດທິພາບ ແລະ ປະສິດທິຜົນ. ພ້ອມທັງ ສຸມໃສ່ການຈັດຕັ້ງການສັກວັກຊີນ ໃຫ້ໄດ້ຕາມຄາດໝາຍທີ່ວາງໄວ້.
5.ນອກຈາກນີ້ ຍັງໄດ້ມີມາດຕະການຜ່ອນຜັນພາຍໃນປະເທດ ໂດຍເຫັນດີໃຫ້ເປີດຮ້ານບັນເທີງ ແລະ ຄາລາໂອເກະ, ແຕ່ໃຫ້ເອົາໃຈໃສ່ປະຕິບັດມາດຕະການປ້ອງກັນໂຄວິດ-19 ຢ່າງເຂັ້ມງວດ.
ມາດຕະການທີ່ໄດ້ກ່າວມາທັງໝົດນັ້ນ ພຶດສະພາ 2022 ແລະ ມີຜົນສັກສິດ ນັບແຕ່ວັນທີ 9 ພຶດສະພາ 2022 ເປັນຕົ້ນໄປ, ພ້ອມຍັງຈະສືບຕໍ່ປະເມີນສະພາບການ, ທົບທວນ ແລະ ດັດປັບມາດຕະການ ໃຫ້ເໝາະສົມກັບສະພາບຕົວຈິງຕື່ມ, ກໍລະນີມີການປ່ຽນແປງ ລັດຖະບານ ຈະແຈ້ງໃຫ້ຊາບເປັນແຕ່ລະໄລຍະ.
.
ຈັບໄດ້ທັງຜູ້ຂາຍ ແລະ ຜູ້ເສບ ລວມ 9 ຄົນ
ຕາມການລາຍງານ ຂອງປ້ອງກັນຄວາມສະຫງົບນະຄອນຫຼວງວຽງຈັນໃຫ້ຮູ້ວ່າ:
ໃນວັນທີ 4 ພຶດສະພາ 2022, ເວລາ 13 : 15 ໂມງ, ກອງບັນຊາການ ປກສ ເມືອງໄຊເສດຖາ ນວ, ສົມທົບກັບບ້ານຄໍາສະຫວາດ ແກ້ໄຂກຸ່ມມົ້ວສຸມຕິດພັນກັບການຄ້າຂາຍຢາເສບຕິດ, ຈັບຕົວ 9 ຄົນ, ຍິງ 1 ຄົນ ໃນນີ້ຜູ້ຄ້າຂາຍຢາບ້າ 1 ຄົນ ຊື່ ທ້າວ ນ້ອຍ ອາຍຸ 41 ປີ, ຫວ່າງງານ ພັກເຊົາ ຢູ່ບ້ານ ຄຳສະຫວາດ ເມືອງໄຊເສດຖາ ນວ, ຢຶດຂອງກາງຢາບ້າໄດ້ 212 ເມັດ, ເງິນລາວ 390,000 ກີບ ແລະ ໂທລະສັບ 1 ໜ່ວຍ ມາດຳເນີນຄະດີ.
ຜ່ານການສືບສວນ-ສອບສວນ ເກັບກຳຂໍ້ມູນຫຼັກຖານ ຮູ້ໄດ້ວ່າ:
ທ້າວ ນ້ອຍ ຜູ້ຂາຍຢາເສບຕິດ ພັກເຊົາ ຢູ່ຫ້ອງເຊົ່າເຂດບ້ານ ຄໍາສະຫວາດ ຕົ້ນເດືອນ ມັງກອນ 2021, ມີການພົວພັນເຄື່ອນໄຫວ ຊື້ຂາຍຢາບ້າ ນຳຜູ້ຊາຍບໍ່ຮູ້ຊື່ ແລະ ທີ່ຢູ່ແນ່ນອນ ແລ້ວມາຈຳໜ່າຍຊື້ຂາຍ ໃຫ້ກຸ່ມໄວລຸ້ນທົ່ວໄປຄັ້ງລະ 200 ເມັດ;ໃນພຶ້ນທີ່ຫ້ອງເຊົ່າ ເປັນບ່ອນຂາຍ ຜ່ານມາເຄີຍຮັບຊື້ຢາບ້ານໍາຊາຍຄົນດັ່ງກ່າວ ມາຂາຍຫຼາຍຄັ້ງ, ເງິນທີ່ໄດ້ຈາກການຂາຍຢາບ້າ ໄດ້ເອົາໄປໃຊ້ຈ່າຍຫຼິ້ນກິນຟຸມເຟືອຍ.
ຕົກມາຮອດວັນທີ 4 ພຶດສະພາ 2022, ຈຶ່ງຖືກເຈົ້າໜ້າທີ່ເຂົ້າຈັບຕົວ. ຕໍ່ກັບຄະດີດັ່ງກ່າວ ກອງບັນຊາກນ ປກສ ເມືອງໄຊເສດຖາ ກຳລັງເລັ່ງສືບສວນ-ສອບສວນຂະຫຍາຍຜົນ ຫາກຸ່ມແກ້ງຜູ້ຮ່ວມຂະບວນການ ມາດຳເນີຄະດີຕາມກົດໝາຍ ແລະ ຕໍ່ຜູ້ເສບຢາເສບຕິດ 8 ຄົນ, ຍິງ 1 ຄົນ ເຈົ້າໜ້າທີ່ ໄດ້ສຶກສາອົບຮົມ ແລະ ສົ່ງສູນປິ່ນປົວ ແລະ ຝຶກວິຊາຊີບ ຜູ້ຕິດຢາເສບຕິດ ນະຄອນຫຼວງວຽງຈັນ.
ລາວ ສົ່ງ 29 ປະເພດກິລາເພື່ອເຂົ້າຮ່ວມຊີເກມ ຄັ້ງທີ 31
ຮ່ວມເຊຍ ແລະ ໃຫ້ກຳລັງໃຈຄະນະນໍາ ແລະ ນັກລາລາວ 29 ປະເພດທີ່ເຂົ້າຮ່ວມຊີເກມ ຄັ້ງທີ 31
ລາວເຮົາ ກຽມສົ່ງຄະນະນໍາ ແລະ ນັກກິລາ 435 ຄົນ ໃນ 29 ປະເພດກິລາ ເຂົ້າຮ່ວມແຂ່ງຂັນງານມະຫາກໍາກິລາຊີເກມ ຄັ້ງທີ 31 ທີ່ ສສ ຫວຽດນາມ ໄດ້ຮັບກຽດເປັນເຈົ້າພາບ ຈະຂຶ້ນໃນລະຫວ່າງ ວັນທີ 12-23 ພຶດສະພາ 2022, ເຊີ່ງແບ່ງ ອອກເປັນ 2 ພາກສ່ວນ ຄື: ປະເພດທີ່ນໍາໃຊ້ງົບປະມານຂອງລັດຖະບານຮອບດ້ານ ມີ 18 ປະເພດ ຄື: ເປຕັງ, ບີລຽດ-ສະນຸກເກີ້, ຄິດບ໋ອກຊິງ, ມວຍລາວ, ວູຊູ, ລົດຖີບ, ເທຄວັນໂດ, ມວຍສາກົນ, ກະຕໍ້, ປັນຈັກສີລັດ, ກາຣາເຕໂດ, ຢູໂດ, ມວຍປໍ້າ, ຍິ່ງທະນູ, ແລ່ນ-ລານ, ຍົກນໍ້າຫນັກ, ໂວວິນາມ ແລະ ລອຍນໍ້າ.
ສ່ວນອີກຫນຶ່ງພາກສ່ວນ ແມ່ນກິລາທີ່ກຸ້ມຕົນເອງດ້ານງົບປະມານຮັບໃຊ້ ມີ 11 ປະເພດ ຄື: ບານເຕະ ຍິງ-ຊາຍ, ດອກປີກໄກ່, ເຕັນນິສ, ບານສົ່ງຫາດຊາຍ, ກ໊ອຟ, ຍິມນາສຕິກ, ອີສະ ປອດ, ຍິງປືນ, ປິງປ໋ອງ, ເພາະກາຍ ແລະ ແດ້ນສະປອດ. ພິທີຖະແຫລງຂ່າວກ່ຽວກັບການກະກຽມສົ່ງຄະນະນໍາ ແລະ ນັກກິລາເຂົ້າຮ່ວມງານມະຫາກໍາກິລາດັ່ງກ່າວຢ່າງເປັນທາງການຈັດຂຶ້ນໃນຕອນບ່າຍວັນທີ 4 ພຶດສະ ພາ 2022 ທີ່ຫ້ອງປະຊຸມຄະນະເສດຖະສາດ, ມະຫາວິທະຍາໄລແຫ່ງຊາດ, ນະຄອນ ຫລວງວຽງຈັນ ໂດຍການໃຫ້ກຽດເຂົ້າຮ່ວມຂອງ ທ່ານ ຈັນສະຫມອນ ຈັນຍາລາດ, ຮອງນາຍົກລັດຖະມົນຕີ, ລັດຖະມົນຕີ ກະຊວງປ້ອງກັນປະເທດ. ທ່ານ ພຸດ ສິມມາລາວົງ, ລັດຖະມົນຕີກະຊວງສຶກສາທິການ ແລະ ກິລາ ໃຫ້ຮູ້ວ່າ:
ການເຂົ້າຮ່ວມແຂ່ງຂັນງານມະຫາກໍາກິລາຊີເກມ ຄັ້ງທີ 31, ນອກຈາກເປັນການປະຕິບັດຫນ້າທີ່ທາງດ້ານການເມືອງ ແລະ ວິຊາສະເພາະຂອງນັກກິລາລາວ ຍັງເປັນການຮັດແຫນ້ນສາຍພົວພັນພິເສດລະຫວ່າງ ລາວ ແລະ ຫວຽດນາມ ທີ່ມີມູນເຊື້ອຮ່ວມກັນມາແຕ່ດົນນານ, ທັງເປັນການປຸກລະດົມຈິດໃຈຮັກຊາດຂອງປະຊາຊົນລາວບັນດາເຜົ່າ ແລະ ເປັນການເຜີຍແຜ່ວັດທະນະທໍາອັນດີງາມຂອງຊາດລາວ, ທັງເປັນການປະຕິບັດນະໂຍບາຍການພົວພັນກັບບັນດາປະເທດອາຊຽນ ແລະ ເປັນການຍົກຖານະບົດບາດຊື່ສຽງຂອງລາວໃນຂົງເຂດອະນຸພາກພື້ນ ແລະ ສາກົນໃຫ້ນັບມື້ພົ້ນເດັ່ນຂຶ້ນ.
ການເຂົ້າຮ່ວມແຂ່ງຂັນຊີເກມຄັ້ງນີ້ ຄະນະນັກກິລາລາວ ຈະສູ້ຊົນໃຫ້ໄດ້ຫລຽນຫລາຍວ່າຊີເກມ ຄັ້ງທີ 30 ທີ່ຈັດຂຶ້ນຢູ່ຟິລິບປິນໃນປີ 2019 ຜ່ານມາ ເຊີ່ງນັກກິລາລາວສາມາດຍາດໄດ້ 1 ຫລຽນຄໍາ, 5 ຫລຽນເງິນ ແລະ 29 ຫລຽນທອງ, ລວມ 35 ຫລຽນ ຈັດຢູ່ອັນດັບທີ 10 ຈາກທັງຫມົດ 11 ປະເທດທີ່ເຂົ້າຮ່ວມແຂ່ງຂັນ. ໃນໂອກາດນີ້ ທ່ານ ຈັນສະຫມອນ ຈັນຍາລາດ ໄດ້ໃຫ້ກຽດໂອ້ລົມ ເຊີ່ງທ່ານໄດ້ເນັ້ນຫນັກໃຫ້ຄະນະນໍາ ແລະ ນັກກິລາລາວທີ່ຈະເຂົ້າຮ່ວມແຂ່ງຂັນຊີເກມຄັ້ງນີ້ ເອົາ ໃຈໃສ່ຫລາຍບັນຫາສໍາຄັນ ເປັນຕົ້ນ:
ຄະນະນໍາ ແລະ ຄູຝຶກ ຕ້ອງເພີ່ມະວີຄວາມຮັບ ຜິດຊອບໃນການຕິດຕາມການຝຶກ ແອບຂອງນັກກິລາຢ່າງໃກ້ສິດ, ຍົກສູງການປະ ຕິບັດລະບຽງວິໄນຢ່າງເຂັ້ມງວດ, ຄູຝຶກຂອງກິລາແຕ່ລະປະເພດຕ້ອງຊອກຮູ້ຂໍ້ມູນທາງດ້ານເຕັກນິກ, ສະຖານທີ່ພັກ ແລະ ສະຖານທີ່ແຂ່ງຂັນຈາກເຈົ້າພາບເພື່ອແຈ້ງໃຫ້ນັກກິລາຂອງຕົນຮັບຮູ້ລ່ວງຫນ້າ, ສ່ວນນັກກິລາທຸກຄົນຕ້ອງເອົາໃຈໃສ່ໃນການແຂ່ງຂັນຢ່າງສຸດຕາມສາມາດ ແລະ ອື່ນໆ ເພື່ອໃຫ້ໄດ້ຫລຽນລາງວັນປະເພດຕ່າງໆ ຫລາຍເທົ່າທີ່ຈະຫລາຍໄດ້ ແນໃສ່ສ້າງຊື່ສຽງໃຫ້ແກ່ປະເທດຊາດ ກໍຄື ສ້າງຄວາມພາກພູມໃຈໃຫ້ແກ່ປວງຊົນລາວທັງຊາດ.
ໃນພິທີຖະແຫລງຂ່າວຄັ້ງນີ້ ຍັງໄດ້ມີການມອບ-ຮັບການສະຫບັນສະຫນູນ ຈາກ 1 ກະຊວງ ແລະ 6 ບໍລິສັດ ຕື່ມອີກ. ສໍາລັບງານມະຫາກໍາກິລາຊີເກມ ຄັ້ງທີ 31 ທີ່ ສສ ຫວຽດນາມ ໄດ້ຮັບກຽດເປັນເຈົ້າພາບ ຈະຈັດຂຶ້ນໃນລະຫວ່າງ ວັນທີ 12-23 ພຶດສະພາ 2022 ໂດຍຈະແຂ່ງຂັນທັງມົດ 40 ປະເພດກິລາ.
ຂໍ້ມູນຈາກ: Lao National Radio
ສານຕັດສິນຄົນຮັບໃຊ້ສີສຸກ ດາວເຮືອງ ຈໍາຄຸກ 7 ປີ
ຕາມການລາຍງານຂອງ ຄວາມສະຫງົບ ໃຫ້ຮູ້ວ່າ: ພາຍຫຼັງສານປະຊາຊົນ ນະຄອນຫຼວງວຽງຈັນ ນໍາເອົາສໍານວນຄະດີຢາເສບຕິດລາຍໃຫຍ່ທີ່ມີ ທ້າວ ສີ ສຸກ ດາວເຮືອງ ເປັນຫົວໂປ່ໂຕການ ແລະ ມີພັກ ພວກຮ່ວມຂະບວນການດຽວກັນອີກ 4 ຄົນ ຂຶ້ນມາ ພິຈາລະນາຕັດສິນໃນ ວັນທີ 3 ມີນາ 2022 ແລະ ຫນຶ່ງໃນນັ້ນແມ່ນ ທ້າວ ທົງໄຊ ຫຼື ເຫຼືອກ (ຈໍາເລີຍ 4 ) ທີ ເຄີຍເປັນຄົນຮັບໃຊ້ຈໍາເລີຍ 1 ( ສີສຸກ ດາວເຮືອງ ) ສານໄດ້ພິຈາລະນາຕັດ ສິນໃນຂໍ້ຫາມີຢາເສບຕິດ ປະເພດຢາອີໄວ້ຄອບຄອງ ແລະ ອາວຸດເສີກ ຈໍາຄຸກ 7 ປີ ພ້ອມທັງປັບ ໃຫມ 12 ລ້ານກີບ.
ໃນປີ 2014, ທ້າວ ທົງໄຊ ຫຼື ເຫຼືອກ ໄດ້ເປັນຄົນຮັບໃຊ້ ທ້າວ ສີສຸກ ດາວເຮືອງ ໄປຕາມສະຖານທີ່ ຮ້ານບັນເທີງຕ່າງໆໄປແຕ່ລະຄັ້ງ ຈໍາເລີຍ 1 ຈະເອົາຢາອີ ໃຫ້ເກັບຮັກສາຄັ້ງລະ 8 ຫາ 10 ເມັດ, ບາງຄັ້ງ ຈໍາເລີຍ 1 ຍັງບອກໃຫ້ເອົາຢາອີ ໃສ່ຈອກເຫຼົ້າ, ຈອກເບຍ ໄປແຕ່ລະຄັ້ງ ຈໍາເລີຍ 1 ເອົາເງິນຄ່າຈ້າງໃຫ້ຄັ້ງລະ 1.000 ບາດ, ມາຮອດໄລຍະເດືອນມັງກອນ 2017, ທ້າວ ໄຊຊະນະ ແກ້ວພິມພາ ຖືກເຈົ້າຫນ້າທີ່ປະເທດ ໄທຈັບຕົວ ແລ້ວຈໍາເລີຍ 1 ຈຶ່ງໄດ້ໂທລະສັບບອກໃຫ້ຈໍາເລີຍ 4 ມາເອົາປືນຢູ່ເຮືອນຂອງຈໍາເລີຍ 1 ໄປ ເກັບ ມ້ຽນໄວ້ຢູ່ເຮືອນຂອງຈໍາເລີຍ 4 ຈໍານວນ 4 ກະບອກຄື: ປືນສັ້ນຍີ່ຫໍ້ກັອກ 17 ຈໍານວນ 1 ກະບອກພ້ອມ ລູກຈໍານວນ 15 ລູກ, ປືນສັ້ນບີບີ ກັນດັດແປງ 1 ກະບອກ ພ້ອມລູກຈໍານວນ 6 ລູກ, ປືນສັ້ນ P238 ສີດໍາ ຈໍານວນ 1 ກະບອກ ພ້ອມລູກຈໍານວນ 2 ລູກ ແລະ ປືນສັ້ນຍີ່ຫໍ້ ຫັນລີ ຈໍານວນ 1 ກະບອກ ພ້ອມລູກ ຈໍານວນ 5 ລູກ; ນອກນີ້, ຍັງມີລູກປືນອີກຈໍານວນຫນຶ່ງທີ່ບໍ່ໄດ້ນັບ; ມາຮອດວັນທີ 31 ມີນາ 2017, ເວລາ 10:00 ໂມງ ຈໍາເລີຍ 1 ໄດ້ໂທລະສັບບອກໃຫ້ຈໍາເລີຍ 4 ໄປຫາຢູ່ເຮືອນຂອງ ເພື່ອເດີນທາງໄປແຂວງຫຼວງ ພະບາງ, ຈາກນັ້ນ, ຈໍາເລີຍ 4 ກໍເອົາປືນສັ້ນ P238 ພ້ອມລູກປືນຕິດຕົວໄປນໍາ, ຈໍາເລີຍ 1 ກໍໄດ້ເອົາ ຢາອີ ໃຫ້ຈໍານວນ 8 ເມັດ ກ່ອນໄປຂີ່ລົດໄປຮັບເອົາຫມູອີກ 2 ຄົນ, ຕໍ່ມາ, ກໍພາກັນເດີນທາງໄປແຂວງຫຼວງພະ ບາງ ໄປຮອດເວລາປະມານ 18:00 ໂມງ ຂອງວັນດຽວກັນແລ້ວພາກັນໄປຈອງຫ້ອງພັກຢູ່ໂຮງແຮມແຫ່ງ
ຫນຶ່ງຮອດ ເວລາ 1:00 ໂມງ ຂອງວັນທີ 1 ເມສາ 2017 ຈຶ່ງຖືກເຈົ້າຫນ້າທີ່ຈັບຕົວແລ້ວກວດຄົ້ນຕົວພົບ ເຫັນປືນສັ້ນຈໍານວນ 1 ກະບອກ ພ້ອມລູກ 2 ລູກ ແລະ ຢາອີ ຈໍານວນ 8 ເມັດ; ຕໍ່ມາເຈົ້າຫນ້າທີ່ ຈຶ່ງໄດ້ທໍາການກວດຄົ້ນເຄຫະສະຖານເຮືອນຂອງ ຈໍາເລີຍ 4 ພົບ ເຫັນປືນສັ້ນຍີ່ຫໍ້ກັອກ17 ຈໍາ ນວນ 1 ກະບອກ ພ້ອມລູກຈໍານວນ 88 ລູກ, ປືນສັ້ນຍີ່ຫໍ້ SIGSAUERJ228 ສີດໍ 1 ກະ ບອກ ພ້ອມລູກ 9 ລູກ, ປືນສັ້ນ ຫັນລີ 38 ສີເລດ ຈໍານວນ 1 ກະບອກ ພ້ອມລູກ 5 ລູກ, ລູກປືນສັ້ນບໍ່ຮູ້ຊະ ນິດຈໍານວນ 42 ລູກ ທີ່ເປັນ ປືນຂອງຈໍາເລີຍ 1 ຝາກໄວ້ມາດໍາເນີນຄະດີ.
– ທ້າວ ທົງໄຊ (ຈໍາເລີຍ4) ໄດ້ເຄື່ອນໄຫວກະ ທໍາຜິດ ດ້ວຍຮູບການເປັນຄົນຮັບໃຊ້ໃຫ້ແກ່ຈຶ່ງ ເລີຍ 1 ເຊິ່ງສະແດງອອກຈໍາເລີຍ 4 ຈະເປັນຄົນ ຕິດຕາມຈໍາເລີຍ 1 ໄປຕາມສະຖານທີ່ຮ້ານອາ ຫານ ແລະ ຮ້ານບັນ ເທີງຕ່າງໆ ເຊິ່ງໄປແຕ່ລະຄັ້ງ ຈໍາເລີຍ 1 ຈະເອົາຢາອີ ມອບໃຫ້ຈໍາເລີຍ 4 ເປັນ ຄົນເກັບຮັກສາຄອບຄອງ ເພື່ອເອົາໄວ້ໃສ່ຈອກ ເຫຼົ້າ ໃຫ້ແກ່ຫມູ່ຄູ່ຂອງຈໍາເລີຍ 1; ນອກຈາກນີ້, ຈໍາເລີຍ 4 ຍັງໄດ້ຮັບເອົາອາວຸດເສີກ ປະເພດປືນ ພ້ອມດ້ວຍລູກປືນຈາກຈໍາເລີຍ 1 ໄປເກັບຮັກສາ ໄວ້ຢູ່ເຮືອນຂອງຕົນ ແລະ ຍັງພົບຂອງກາງ ຢາອີ ຈໍານວນ 8 ເມັດ ນໍ້າຫນັກ 2,6597 ກຣາມ ແລະ ປືນຈໍານວນ 4 ກະບອກ ຕາມບົດບັນທຶກຈັບຕົວ ແລະ ບົດບັນທຶກກວດຄົ້ນເຄຫະສະຖານ, ຈໍາ ເລີຍ 4 ກໍຮັບວ່າໄດ້ຄອບຄອງຢາເສບຕິດ (ຢາອີ) ແລະ ມີ ອາວຸດເສີກໄວ້ໃນຄອບຄອງໂດຍບໍ່ຖືກຕ້ອງຕາມກົດຫມາຍແທ້.
ຕາມການພິລາລະນາຂອງຄະນະສານແລ້ວເຫັນວ່າຈໍາເລີຍ 4 ໄດ້ກະທໍາຜິດຕາມມາດຕາ 2 ຂໍ້ 2 ວັກ 1 ຂອງກົດຫມາຍວ່າດ້ວຍການປັບປຸງ ມາດຕາ 146 ຂອງກົດຫມາຍອາຍາສະບັບປີ 2005 ແລະ ມາດຕາ 75, 76 ຂອງກົດຫມາຍວ່າດ້ວຍຢາ ເສບຕິດປີ 2013; ດັ່ງນັ້ນ, ຄະນະສານອາຍາສານ ປະຊາຊົນ ນະຄອນຫຼວງວຽງຈັນ ຈຶ່ງຕັດສິນຕັດອິດສະລະພາບລົງໂທດຈໍາຄຸກ ທ້າວ ທົງໄຊ (ຈໍາເລີຍ4) 7 ປີ ແລະ ປັບ ໃຫມ່ 12 ລ້ານກີບ.
ແຈ້ງການ ການນໍາໃຊ້ເຄື່ອງທົດສອບແບບໄວ ທີ່ໄດ້ຮັບອະນຸຍາດຈາກກົມອາຫານ ແລະ ຢາ
ເຖິງ: ບັນດາສະຖານທີ່ບໍລິການສາທາລະນະສຸກທີ່ໄດ້ຮັບອະນຸຍາດກວດວິເຄາະຊອກຫາການຕິດເຊື້ອໂຄວິດ-19 ດ້ວຍເຄື່ອງທົດສອບແບບໄວ AgRDT (ຫຼື Antigen Test Kit, ATK) ກວດວິເຄາະການຕິດເຊື້ອໂຄວິດ-19 ທັງພາກລັດ ແລະ ເອກະຊົນໃນຂອບເຂດທົ່ວປະເທດ. ເລື່ອງ: ການນໍາໃຊ້ເຄື່ອງທົດສອບແບບໄວ AgRDT (ຫຼື Antigen Test Kit, ATK) ກວດວິເຄາະການຕິດເຊື້ອໂຄວິດ-19 ທີ່ໄດ້ຮັບອະນຸຍາດຈາກກົມອາຫານ ແລະ ຢາ.
– ອີງຕາມ ກົດຫມາຍວ່າດ້ວຍຢາ ແລະ ຜະລິດຕະພັນການແພດ ສະບັບເລກທີ 07/ສພຊ, ລົງວັນທີ 21 ທັນວາ 2011; – ອີງຕາມ ຄໍາສັ່ງວ່າດ້ວຍການນໍາເຂົ້າ, ຈໍລະຈອນຈໍາຫນ່າຍ ແລະ ນໍາໃຊ້ ເຄື່ອງທົດສອບແບບໄວ AgRDT ເພື່ອກວດວິເຄາະ ຊອກຫາການຕິດເຊື້ອໂຄວິດ-19 ສະບັບເລກທີ 3994/ສທ, ລົງວັນທີ 30 ທັນວາ-2022.
ການນໍາໃຊ້ເຄື່ອງທົດສອບແບບໄວ AgRDT (ຫຼື Antigen Test Kit, ATK) ກວດວິເຄາະການຕິດເຊື້ອໂຄວິດ-19 ເປັນພາກສ່ວນຫນຶ່ງທີ່ສໍາຄັນໃນການຄັດກອງ ແລະ ຄົ້ນຫາກໍລະນີຜູ້ຕິດເຊື້ອໄດ້ທັນການ, ສະນັ້ນ ເຄື່ອງທົດສອບແບບໄວ AgRDT ຕ້ອງມີຄຸນນະພາບ ແລະ ປະສິດທິພາບ ເຊິ່ງໃນໄລຍະຜ່ານມາກົມອາຫານ ແລະ ຢາ ໄດ້ຈັດຕັ້ງປະຕິບັດການອະນຸຍາດ ນໍາໃຊ້ໃນພາວະສຸກເສີນ (Emergency Use Authorization, EUA) ໂດຍອີງໃສ່ການອະນຸຍາດນໍາໃຊ້ໃນພາວະສຸກເສີນ ຈາກອົງການອະນາໄມໂລກ ຫຼື ຈາກປະເທດທີ່ເຂັ້ມແຂງ ເຊິ່ງປະຈຸບັນເຄື່ອງທົດສອບແບບໄວ AgRDT ທີ່ໄດ້ຮັບອະນຸຍາດ ຈາກກົມອາຫານ ແລະ ຢາ ມີທັງຫມົດ 10 ລາຍການ (ລາຍລະອຽດດັ່ງເອກະສານຄັດຕິດທີ 1).
ສະນັ້ນ ກົມອາຫານ ແລະ ຢາ ຈຶ່ງແຈ້ງມາຍັງບັນດາສະຖານທີ່ບໍລິການສາທາລະນະສຸກທີ່ໄດ້ຮັບອະນຸຍາດກວດວິເຄາະ ຊອກຫາການຕິດເຊື້ອໂຄວິດ-19 ດ້ວຍເຄື່ອງທົດສອບແບບໄວ AgRDT (ຫຼື Antigen Test Kit, ATK) ກວດວິເຄາະ ການຕິດເຊື້ອໂຄວິດ-19 ທັງພາກລັດ ແລະ ເອກະຊົນ ຈົ່ງຕິດຕາມບັນຊີລາຍການ ແລະ ເລືອກນໍາໃຊ້ສະເພາະລາຍການທີ່ໄດ້ ຮັບອະນຸຍາດຕາມລະບຽບການ ຈາກກົມອາຫານ ແລະ ຢາເທົ່ານັ້ນ ເພື່ອຮັບປະກັນປະສິດທິພາບ ແລະ ຄວາມຊັດເຈນຂອງການ ກວດວິເຄາະ (ລາຍລະອຽດດັ່ງເອກະສານຄັດຕິດທີ 2).
.
.
ດັ່ງນັ້ນ, ຈຶ່ງແຈ້ງມາຍັງທ່ານເພື່ອຊາບ ແລະ ປະຕິບັດຕາມແຈ້ງການສະບັບນີ້ດ້ວຍ.
ຜູ້ອໍານວຍການທະນາຄານໂລກ ປະຈໍາ ສປປ ລາວ ພົບປະກັບ ລັດຖະມົນຕີກະຊວງການເງິນ
ນະຄອນຫຼວງວຽງຈັນ, ວັນທີ 4 ພຶດສະພາ 2022 – ທ່ານ ນາງ ມາຣ່ຽມ ເຊີແມນ, ຜູ້ອໍານວຍການທະນາຄານໂລກ ປະຈໍາ ມຽນມາ, ກຳປູເຈຍ ແລະ ສປປ ລາວ, ໄດ້ເລີ່ມຕົ້ນການຢ້ຽມຢາມ ສປປ ລາວ ຄັ້ງທໍາອິດມື້ນີ້ ໂດຍການເຂົ້າພົບ ທ່ານ ບຸນໂຈມ ອຸບົນປະເສີດ, ລັດຖະມົນຕີກະຊວງການເງິນ.
ທ່ານ ນາງ ເຊີແມນ ໄດ້ເຂົ້າມາເປັນຜູ້ອຳນວຍການທະນາຄານໂລກ ຂອງສາມປະເທດອາຊີຕາເວັນອອກສຽງໃຕ້ ນັບແຕ່ຕົ້ນປີ 2020 ແຕ່ກ່ອນໜ້ານີ້ບໍ່ສາມາດເດີນທາງມາຢ້ຽມຢາມປະເທດລາວໄດ້ ຍ້ອນຂໍ້ຈຳກັດໃນການເດີນທາງໃນຊ່ວງພະຍາດໂຄວິດ19.
ໃນລະຫວ່າງການສົນທະນາກັບທ່ານລັດຖະມົນຕີກະຊວງການເງິນ, ທ່ານນາງ ເຊີແມນ ໄດ້ລາຍງານກ່ຽວກັບການຮ່ວມມືລະຫວ່າງ ກຸ່ມທະນາຄານໂລກ ແລະ ສປປ ລາວ ໃນຕໍ່ໜ້າ.
ຂອບການຮ່ວມມືດັ່ງກ່າວ ໄດ້ກໍານົດຂົງເຂດແລະວິທີການເຮັດວຽກຮ່ວມກັນລະຫວ່າງ ສປປ ລາວ ແລະ ກຸ່ມທະນາຄານໂລກແຕ່ປີ 2022 ຫາ 2026.
ທ່ານໄດ້ເນັ້ນຫນັກເຖິງຄວາມພ້ອມຂອງທະນາຄານໂລກ ທີ່ຈະສະຫນັບສະຫນູນວາລະແຫ່ງຊາດ ເພື່ອແກ້ໄຂຄວາມຫຍຸ້ງຍາກທາງດ້ານເສດຖະກິດ ແລະ ການເງິນ, ຕົວຢ່າງເຊັ່ນ ການໃຫ້ຄໍາແນະນໍາດ້ານວິຊາການ ກ່ຽວກັບຫນີ້ສິນ ແລະ ການຮັບມືກັບສິ່ງທ້າທາຍທາງດ້ານເສດຖະກິດ ທີ່ເກີດຈາກການແຜ່ລະບາດຂອງໂຄວິດ19 ແລະ ຜົນກະທົບຈາກສົງຄາມໃນປະເທດຢູເຄຣນ:
ທ່ານ ບຸນໂຈມ ແລະ ທ່ານ ນາງ ເຊີແມນ ໄດ້ແລກປ່ຽນຄໍາຄິດຄໍາເຫັນ ກ່ຽວກັບການຊ່ວຍເຫຼືອດ້ານວິຊາການຂອງທະນາຄານໂລກ ໃນວຽກງານຄຸ້ມຄອງໜີ້ສິນ ແລະ ການຈັດຕັ້ງປະຕິບັດນະໂຍບາຍ ເພື່ອປັບປຸງຄວາມໂປ່ງໃສ ແລະ ຄວາມຍືນຍົງທາງດ້ານການເງິນ.
ທັງສອງຝ່າຍຍັງໄດ້ປຶກສາຫາລືຕື່ມອີກ ກ່ຽວກັບໂຄງການຊ່ວຍເຫຼືອຂອງທະນາຄານໂລກຕໍ່ກະຊວງການເງິນ ລວມທັງການຄຸ້ມຄອງການເງິນພາກລັດ ແລະ ການຫັນປ່ຽນລະບົບພາສີເປັນທັນສະໄໝ, ຄຽງຄູ່ກັບການປຶກສາຫາລືເລື່ອງຄວາມສຳຄັນທາງດ້ານທຶນມະນຸດ, (ສາທາລະນະສຸກ ແລະ ການສຶກສາ) ເພື່ອການພັດທະນາເສດຖະກິດຂອງລາວໃນອະນາຄົດ.
ໃນອາທິດນີ້ ທ່ານ ນາງ ເຊີແມນ ຍັງຈະພົບປະກັບ ລັດຖະມົນຕີ ກະຊວງແຜນການ ແລະ ການລົງທືນ ກ່ອນທີ່ຈະເດີນທາງ ໄປຢ້ຽມຢາມ 3 ແຂວງພາກເໜືອ ແລະ ຈະໄປຢ້ຽມຢາມແຂວງບໍລິຄຳໄຊ ແລະ ຄຳມ່ວນ ໃນອາທິດໜ້າ ກ່ອນທີ່ຈະເດີນທາງກັບປະເທດມຽນມາ.