ກົມກົງສຸນ, ກະຊວງການຕ່າງປະເທດ ວາງມາດຕະການແກ້ໃນສະເພາະໜ້າ ແລະ ຍາວນານ ໂດຍສະເພາະເພີ່ມຈຳນວນການຮັບເອກະສານຄຳຮ້ອງຂອງແຕ່ລະວັນຫລາຍຂຶ້ນກ່ວາເກົ່າ ເຊັ່ນຈາກສະພາບປົກກະຕິທີ່ມີຄວາມສາມາດຮັບພິຈາລະນາໄດ້ປະມານສູງສຸດ 300 ຄົນ ມາເປັນ 500 ກ່ວາຄົນ ຫລື ຫລາຍກ່ວານັ້ນ ເພື່ອແກ້ໄຂບັນຫາປະຊາຊົນຈໍໍານວນຫລາຍລຽນແຖວເຮັດຫນັງສືຜ່ານແດນໃນແຕ່ລະວັນ. ທ່ານ ສີສຸພັນ ມະນີວັນ, ຮອງຫົວໜ້າກົມກົງສຸນ ກະຊວງການຕ່າງປະເທດ ໃຫ້ສໍາພາດຕໍ່ນັກຂ່າວວິທະຍຸກະຈາຍສຽງແຫ່ງຊາດວ່າ:

ພາຍຫລັງລັດຖະບານແຈ້ງການເປີດປະເທດນັບແຕ່ວັນທີ 9 ພຶດສະພາ 2022 ເປັນຕົ້ນມາ, ສັງເກດເຫັນວ່າ ຈຳນວນປະຊາຊົນທີ່ມາຂໍເຮັດຫນັງສື ຜ່ານແດນມີຈຳນວນສູງຂຶ້ນ ແລະ ບວກກັບຫລາຍປະເທດກໍໄດ້ລຸດຜ່ອນມາດຕະການຕ່າງໆໃນການເຂົ້າ-ອອກເມືອງຂອງປະເທດຕົນ ແລະ ຫລາຍປະເທດກໍເລີ່ມເປີດປະເທດຢ່າງເປັນປົກກະຕິ ຈຶ່ງເຮັດໃຫ້ຈຳນວນປະຊາຊົນລັ່ງໄຫລມາຂໍຫນັງສືຜ່ານແດນມີຈຳນວນເພີ່ມຂຶ້ນຫລາຍ ແລະ ມີລັກສະນະຮີບດ່ວນ.

ຕໍ່ບັນຫານີ້ກົມກົງສຸນ ກະຊວງການຕ່າງປະເທດ ໄດ້ຄົ້ນຄ້ວາເພື່ອຊອກຫາວິທີ ແລະມາດຕະການຕ່າງໆ ເພື່ອຮອງຮັບ ແລະແກ້ໄຂບັນຫາຢ່າງຮີບດ່ວນ ໃນສະເພາະຫນ້ານີ້ໄດ້ປຸກລະດົມຈິດໃຈພະນັກງານພາຍໃນກົມກົງສຸນ ໃຫ້ມີຄວາມເສຍສະຫລະເວລາຂອງຕົນ ເພື່ອມາບໍລິການຮັບໃຊ້ແກ່ປະຊາຊົນ ໂດຍໄດ້ຈັດຕັ້ງພະນັກງານຈຳນວນຫນຶ່ງ ມາຈັດຄວາມເປັນລະບຽບ ແລະ ກວດກາເອກະສານໃຫ້ປະຊາຊົນຢູ່ພາຍໃນກົມກົງສຸນ ກ່ອນໂມງລັດຖະການ, ເພີ່ມຈຳນວນການຮັບເອກະສານຄຳຮ້ອງຂອງແຕ່ລະວັນຫລາຍຂຶ້ນກ່ວາເກົ່າ ໂດຍໃຫ້ພະນັກງານກົມກົງສຸນດຳເນີນການສຳພາດໃຫ້ໝົດທຸກຄົນ ເຖິງວ່າຈະກາຍໂມງເລີກວຽກລັດຖະການແລ້ວກໍຕາມ ແລະມີແຜນສົ່ງພະນັກງານສຳພາດເພີ່ມຕື່ມ ໄປປະຈໍາຢູ່ແຕ່ລະສູນຮັບຄຳຮ້ອງຂໍຫນັງສືຜ່ານແດນທີ່ຕ່າງແຂວງ ເພື່ອເພີ່ມຂີດຄວາມສາມາດຮັບຄຳຮ້ອງໃນແຕ່ລະວັນໃຫ້ໄດ້ຫລາຍຂຶ້ນຕື່ມອີກ,

ເພີ່ມທະວີການເຜີຍແຜ່ຂໍ້ມູນກ່ຽວກັບການປະກອບເອກະສານ ແລະ ຂັ້ນຕອນການຍື່ນຄໍາຮ້ອງດ້ວຍຕົນເອງ ໃຫ້ປະຊາຊົນຮັບຮູ້ ແລະ ບໍ່ຫລົງເຊື່ອບັນດາກຸ່ມນາຍຫນ້າ ທີ່ອ້າງວ່າສາມາດຊ່ວຍແລ່ນເອກະສານໃຫ້ໄດ້, ສ່ວນມາດຕະການແກ້ໄຂບັນຫາໃນໄລຍະຍາວນັ້ນ ປະຈຸບັນກົມກົງສຸນ ກຳລັງຄົ້ນຄ້ວາ ແລະ ອອກແບບລະບົບແຈກບັດຄິວນັດສຳພາດໂດຍຜ່ານລະບົບອອນລາຍ ແລະ ໄດ້ສຳເລັດການຮ່າງ ກົດຫມາຍວ່າດ້ວຍຫນັງສືຜ່ານແດນ ແລະ ຜ່ານຂັ້ນຕອນການລົງທາບທາມຄຳເຫັນຢູ່ຂັ້ນສູນກາງ, ຢູ່ບັນດາແຂວງພາກເຫນືອ ແລະ ແຂວງພາກກາງແລ້ວ ແລະ ພາຍໃນອາທິດນີ້ກໍຈະໄດ້ລົງທາບທາມຄຳເຫັນຢູ່ບັນດາແຂວງພາກໃຕ້ ແລະຄາດວ່າຈະສົ່ງໃຫ້ສະພາແຫ່ງຊາດພິຈາລະນາໃນທ້າຍປີ 2022 ນີ້. ກົດຫມາຍສະບັບນີ້ແມ່ນມີຄວາມສໍາຄັນຫລາຍ ເພື່ອກຳນົດຫລັກການ, ລະບຽບການ ແລະ ມາດຕະການກ່ຽວກັບການຄຸ້ມຄອງ ແລະ ຕິດຕາມກວດກາວຽກງານຫນັງ ສືຜ່ານແດນຂອງປະເທດເຮົາ ແລະ ເພື່ອເຮັດໃຫ້ການປະຕິບັດວຽກງານດັ່ງກ່າວມີຄວາມຖືກຕ້ອງ, ຊັດເຈນ, ວ່ອງໄວ, ທັນສະໄຫມ ແລະ ເປັນລະບົບ ແນໃສ່ປົກປ້ອງສິດ ແລະ ຜົນປະໂຫຍດຂອງພົນລະເມືອງລາວ, ອໍານວຍຄວາມສະດວກໃຫ້ພົນລະເມືອງລາວໃນການເດີນທາງເຂົ້າ-ອອກປະເທດ, ພັກເຊົາ ຫລື ອາໄສຢູ່ຕ່າງປະເທດ.

ຕໍ່ສະພາບການທີ່ເກີດຂຶ້ນ ທ່ານ ສີສຸພັນ ມະນີວັນ ຕາງໜ້າໃຫ້ກົມກົງສຸນ ຂໍສະແດງຄວາມຂໍໂທດ ແລະ ຂໍອະໄພມາຍັງປະຊາຊົນທີ່ມາໃຊ້ບໍລິການ ແລະຂໍຄວາມຮ່ວມມືມາຍັງຜູ້ທີ່ຕ້ອງການເຮັດໜັງສືຜ່ານແດນ ນອກຈາກຢູ່ກົມກົງສຸນທີ່ນະຄອນຫລວງວຽງຈັນ, ຍັງມີສູນຮັບຄໍາຮ້ອງຂໍຫນັງສື ຜ່ານແດນຢູ່ ແຂວງອຸດົມໄຊ, ແຂວງຊຽງຂວາງ, ແຂວງໄຊຍະບູລີ, ແຂວງຄຳມ່ວນ, ແຂວງສະຫວັນນະເຂດ ແລະ ແຂວງຈຳປາສັກ.

ໃນໄລຍະນີ້ປະຊາຊົນທີ່ຢູ່ແຂວງເຫລົ່ານີ້ ຫລື ຢູ່ບັນດາແຂວງໃກ້ຄຽງ ສາມາດໄປໃຊ້ບໍລິການຢູ່ບັນດາສູນຮັບຄຳຮ້ອງດັ່ງກ່າວ ເພື່ອເປັນການລຸດຜ່ອນຄ່າໃຊ້ຈ່າຍໃນການເດີນທາງ ທັງຫລຸດຜ່ອນຄວາມແອອັດຂອງປະຊາຊົນ ຢູ່ນະຄອນຫລວງວຽງຈັນ ແລະ ຂໍໃຫ້ມີສະຕິຢ່າຫລົງເຊື່ອບັນດານາຍຫນ້າ ທີ່ອ້າງຕົນວ່າຈະສາມາດພາໄປເຮັດ ຫລື ຊ່ວຍແລ່ນເອກະສານ ພ້ອມທັງເລັ່ງລັດຂັ້ນຕອນການອອກຫນັງສືຜ່ານແດນໃຫ້ຕົນໄດ້ໄວຢູ່ນະຄອນຫລວງວຽງຈັນ, ແຕ່ເຈົ້າຫນ້າທີ່ຈະພິຈາລະນາອຳນວຍຄວາມສະດວກອອກດ່ວນໃຫ້ສະເພາະກໍລະນີສຸກເສີນ ເຊັ່ນຄົນເຈັບ ທີ່ມີຄວາມຈໍາເປັນຕ້ອງເດີນທາງດ່ວນໄປຮັກສາປິ່ນປົວຢູ່ຕ່າງປະເທດ ໂດຍມີເອກະສານຢັ້ງຢືນຈາກໂຮງຫມໍເທົ່ານັ້ນ.

ແຫຼ່ງຂ່າວ: Lao National Radio

ໃນວັນທີ 6 ມິຖຸນາ 2022 ເຈົ້າໜ້າທີ່ ປກສ ເມືອງຊໍາໃຕ້ ໄດ້ລົງປະຕິບັດໜ້າທີ່ຢູ່ກູ່ມບ້ານພັນຊໍາ ພໍເມືອຮອດຈຸດສົ້ນຂົວຫ້ວຍສະໜອງ ລະຫວ່າງກາງບ້ານພຽງດ້າຍ ຫາ ບ້ານສົບແກ້ມ ກູ່ມພັນຊໍາ ເມືອງຊໍາໃຕ້ ແຂວງຫົວພັນ ໄດ້ພົບເຫັນຜູ້ຕ້ອງສົງໄສ ຈຳນວນ 2 ຄົນ ເຈົ້າໜ້າທີ່ຈື່ງໄດ້ເຂົ້າກວດຄົ້ນ, ຜູ້ທີ່1 ຊື່ ທ້າວຈື່ເນັ່ງ ປະຊາຊົນ ບ້ານເມືອງກວັນ ເມືອງກວັນ ແຂວງຫົວພັນ ແລະ ນາງ ປໍເຢ້ປະຊາຊົນ ບ້ານດ່ານໄຊ ເມືອງວຽງໄຊ ແຂວງຫົວພັນ ຜ່ານການກວດກາໄດ້ພົບເຫັນຢາບ້າຈໍານວນ 6 000 ເມັດ ແລະ ຢາຝິ່ນຈໍານວນ 1 ກ້ອນ ນ້ໍາໜັກ 2,4 ກລາມ, ເງິນກີບທະນາຄານຈໍານວນ 5 000 000 ກີບ, ໂທລະສັບມືຖື 2 ໜ່ວຍ, ລົດຈັກຢີ່ຫໍ່ຮອນດາ 2 ຄັນ ຈາກນັ້ນເຈົ້າໜ້າທີ່ຈຶ່ງໄດ້ຈັບຕົວພວກກ່ຽວທັງສອງ ພ້ອມຂອງກາງ ເພື່ອມາດຳເນີນການສືບສວນ -ສອບສວນຂະຫຍາຍຜົນຕໍ່ໄປ.

ຈາກນັ້ນເວລາ 14 ໂມງ ຂອງວັນດຽວກັນເຈົ້າໜ້າທີ່ ໄດ້ປະສານສົບທົບກັນເຂົ້າກວດຄົ້ນເຮືອນຂອງທ້າວ ກ້າຍິ່ງມົວ ປະຊາຊົນ ຢູ່ບ້ານເມືອງກວັນ ເມືອງກວັນ ແຂວງຫົວພັນ ເຊິ່ງເປັນພໍ່ຂອງທ້າວຈື່ເນັ່ງ ຜ່ານການກວດ ຄົ້ນໄດ້ພົບເຫັນຢາບ້າ ຈໍານວນ 130 ເມັດ ແລະ ຢາຝິ່ນ 1 ຫໍ່ ນ້ໍາໜັກ 5,3 ກລາມ , ເງິນ 750 000 ກີບ ທີ່ຊຸກເຊື່ອງໄວ້ຢູ່ພື້ນເຮືອນຂອງຜູ່ກ່ຽວ. ຜ່ານການສືບສວນ-ສອບສວນຜູ່ກ່ຽວໄດ້ສາລະພາບວ່າ ຢາບ້າຈໍານວນ 130 ເມັດ ແລະ ຢາຝິ່ນ 1 ຫໍ່ ນ້ໍາໜັກ 5,3 ກລາມ, ເງີນ 750 000 ກີບ ແມ່ນຂອງຜູ່ກ່ຽວແທ້ ໄດ້ຊື້ນໍາບຸກຄົ້ນທີ່ບໍ່ຮູ້ຊື່ ເພື່ອມາເສບ ແລະ ຂາຍ.

ຈາກນັ້ນເຈົ້າໜ້າທີ່ ປກສ ເມືອງຊໍາໃຕ້ ຈື່ງໄດ້ສົ່ງພວກກ່ຽວທັງ 3 ຄົນພ້ອມຂອງກາງສົ່ງໃຫ້ພະແນກສະກັດກັ້ນ ແລະ ຕ້ານຢາເສບຕິດແຂວງຫົວພັນ ເພື່ອດຳເນີນຄະດີຕາມລະບຽບກົດໝາຍຕໍ່ໄປ.

ຂໍ້ມູນຈາກ: ເຫດການບ້ານເມືອງ-Hedkanbarnmeuang

ປັດຈຸບັນ ອັດຕາແລກປ່ຽນ ຫລື ຄ່າເງິນກີບ ໂດຍລວມໄດ້ມີການເໜັງຕີງໃນທິດທາງທີ່ອ່ອນຄ່າຕໍ່ເນື່ອງ ໃນຈັງຫວະແຮງ ແລະ ມີຄວາມແຕກໂຕນລະຫວ່າງ ອັດຕາແລກປ່ຽນຂອງທະນາ ຄານ ແລະ ຕະຫລາດນອກລະບົບ;

ໃນນີ້, ອັດຕາແລກປ່ຽນໄດ້ມີການເໜັງຕີງແຮງຫລາຍ ນັບແຕ່ໄລ ຍະທ້າຍເດືອນມີນາ 2022.

ສາເຫດທີ່ພາໃຫ້ເກີດສະພາບດັ່ງກ່າວ ແມ່ນເກີດຈາກປັດໄຈພາຍນອກ ການແຂງຄ່າຂອງເງິນໂດລາຢູ່ສາກົນ, ການເພີ່ມຂຶ້ນສູງຫລາຍຕໍ່ເນື່ອງຂອງລາຄາຄໍາ, ລາຄານໍ້າມັນ ແລະ ທ່າອ່ຽງ ການເພີ່ມຂຶ້ນຂອງອັດຕາດອກເບ້ຍ ແລະ ອັດຕາເງິນເຟີ້ ໃນຂົງເຂດເສດຖະກິດສຳຄັນຂອງໂລກ ແລະ ພາກພື້ນ.

ທ່ານ ສອນໄຊ ສິດພະໄຊ ຜູ້ວ່າທະນາຄານແຫ່ງສປປ ລາວ ໄດ້ລາຍງານຕໍ່ກອງປະຊຸມສະໄໝສາມັນ ເທື່ອທີ 3 ຂອງສະພາແຫ່ງຊາດ ຊຸດທີ IX ໃນວັນທີ 13 ມິຖຸນາ 2022ວ່າ: ສຳລັບປັດໄຈພາຍໃນ ແມ່ນພື້ນຖານເສດຖະກິດພາຍໃນຍັງບອບບາງ ແລະ ຍັງຢູ່ໃນໄລຍະຟື້ນຕົວ, ລາຍຮັບທີ່ເປັນເງິນຕາຕ່າງປະເທດມີຈຳກັດ ແຕ່ພັນທະໃນການຊຳລະໃຫ້ຕ່າງປະເທດມີສູງຕໍ່ເນື່ອງ;

ການຈັດຕັ້ງປະ ຕິບັດນະໂຍບາຍ ແລະ ມາດຕະການດ້ານການຄຸ້ມຄອງເງິນຕາຕ່າງປະເທດ ຂອງທຸກພາກສ່ວນກ່ຽວ ຂ້ອງ ຍັງບໍ່ທັນກົມກຽວ ຮອບດ້ານ ແລະ ການປະຕິບັດລະບຽບກົດໝາຍ ຍັງບໍ່ທັນເຂັ້ມງວດເທົ່າທີ່ຄວນ ສົ່ງຜົນໃຫ້ຍັງມີສະພາບລາຍຮັບທີ່ເປັນເງິນຕາຕ່າງປະເທດ ແລະ ເງິນລົງທຶນ ຈາກຕ່າງປະເທດ ຈໍານວນຫລາຍຍັງບໍ່ທັນເຂົ້າມາປະເທດ ຕາມລະບຽບການ, ຍັງມີການເຄື່ອນໄຫວທຸລະກໍາທີ່ຕິດພັນກັບເງິນຕາຕ່າງປະເທດ ແບບບໍ່ຖືກຕ້ອງຕາມລະບຽບກົດໝາຍ, ເຮັດໃຫ້ເງິນຕາຕ່າງປະເທດເຂົ້າສູ່ລະບົບທະນາຄານໜ້ອຍກວ່າທີ່ຄວນຈະເປັນ, ສົ່ງຜົນກະທົບຕໍ່ປະລິມານການສະໜອງເງິນຕາຕ່າງປະເທດຂອງລະບົບທະນາຄານ ໃນສະພາບທີ່ລາຄາສິນຄ້ານຳເຂົ້າທີ່ຈຳເປັນຕໍ່ການດຳລົງຊີວິດ ໄດ້ເພີ່ມຂຶ້ນສູງຫລາຍ ນອກເໜືອຈາກພັນທະໜີ້ສິນຕໍ່ຕ່າງປະເທດ, ໃນ 5 ເດືອນຕົ້ນປີ 2022, ເຖິງແມ່ນວ່າຕົວເລກມູນຄ່າດູນການຄ້າດ້ານສິນຄ້າຂອງ ສປປ ລາວ ໄດ້ເກີນດູນຢູ່ໃນລະດັບເກືອບ 548,93 ລ້ານໂດລາ ດີກວ່າໄລຍະດຽວກັນຂອງປີຜ່ານມາ 9,62%, ແຕ່ໃນນີ້ມີພຽງແຕ່ 32% ຂອງມູນຄ່າການສົ່ງອອກ ເທົ່ານັ້ນ ທີ່ໄດ້ໂອນເຂົ້າມາປະເທດຜ່ານລະບົບທະນາຄານ; ໃນຂະນະທີ່ 92% ຂອງມູນຄ່າການນໍາເຂົ້ານັ້ນ ແມ່ນໄດ້ມີການໂອນອອກຜ່ານລະ ບົບທະນາຄານ ເຮັດໃຫ້ພວກເຮົາໄດ້ປະເຊີນກັບສະພາບການມີກະແສເງິນອອກປະເທດ ຜ່ານລະບົບທະນາຄານ ຫລາຍກວ່າມີກະແສເງິນເຂົ້າປະເທດຜ່ານລະບົບທະນາຄານ ໃນລະດັບທີ່ສູງ. ສະພາບດັ່ງກ່າວ ໄດ້ສົ່ງຜົນກະທົບເຮັດໃຫ້ທະນາຄານທຸລະກິດ ສາມາດເກັບຊື້ເງິນຕາຕ່າງປະເທດໄດ້ໜ້ອຍກວ່າລະດັບທີ່ຄວນຈະເປັນ ຫລື ໜ້ອຍກວ່າມູນຄ່າການສົ່ງອອກ ແລະ ມູນຄ່າການລົງທຶນຈາກຕ່າງປະເທດຫຼາຍ ແຕ່ຄວາມຮຽກຮ້ອງຕ້ອງການເງິນຕາຕ່າງປະເທດຂອງທົ່ວສັງຄົມ ເພື່ອການຊຳລະສະສາງກັບຕ່າງປະເທດຍັງສືບຕໍ່ຢູ່ໃນລະດັບສູງ ແລະ ເພີ່ມຂຶ້ນຕໍ່ເນື່ອງ.

ທ່ານ ສອນໄຊ ສິດພະໄຊ ໄດ້ກ່າວວ່າ: ສະພາບຄວາມກັງວົນຕໍ່ຄວາມບໍ່ແນ່ນອນຢູ່ຕະຫລາດສາກົນ ແລະ ຕໍ່ສະພາບຄ່ອງດ້ານເງິນຕາຕ່າງປະເທດຂອງລະບົບທະນາຄານ ໄດ້ສົ່ງຜົນກະທົບຕໍ່ສະ ພາບຈິດໃຈ ຕໍ່ຈິດຕະສາດຂອງສັງຄົມຫລາຍ ພາໃຫ້ເກີດມີສະພາບທີ່ບໍ່ຊຸກຍູ້ຄວາມເຂັ້ມແຂງຂອງຄ່າເງິນຂອງຊາດຈຳນວນໜຶ່ງ ເປັນຕົ້ນການຂົນຂວາຍຊອກຊື້ເງິນຕາຕ່າງປະເທດເກີນຄວາມຈຳເປັນ, ກັກຕຸນເງິນຕາຕ່າງປະເທດ, ກຳນົດ ແລະ ຊື້-ຂາຍ ເງິນຕາແບບບໍ່ຖືກຕ້ອງຕາມກົດໝາຍ ໃນອັດຕາແລກ ປ່ຽນທີ່ອ່ອນຄ່າຫລາຍຕໍ່ເນື່ອງ ເກີນລະດັບດຸນຍະພາບດ້ານເສດຖະກິດ-ເງິນຕາ ທີ່ຄວນຈະເປັນ ໂດຍສະເພາະ ໃນໄລຍະທີ່ສະພາບລາຄານໍ້າມັນເຊື້ອໄຟສູງຂຶ້ນຫລາຍຕໍ່ເນື່ອງ ແລະ ການສະໜອງນໍ້າມັນເຊື້ອໄຟຢູ່ພາຍໃນປະເທດບໍ່ປົກກະຕິ ຍິ່ງເຮັດໃຫ້ຄວາມຕ້ອງການຖືຄອງເງິນຕາຕ່າງປະເທດເພີ່ມຂຶ້ນ ສ້າງແຮງກົດດັນໃຫ້ອັດຕາແລກປ່ຽນຍິ່ງອ່ອນຄ່າ.

ແຫຼ່ງຂ່າວ: ປະເທດລາວ

ໃນລະຫວ່າງວັນທີ 12-15 ມິຖຸນາ ນີ້, ທ່ານ ຄຳແພງ ໄຊສົມແພງ ລັດຖະມົນຕີກະຊວງອຸດສາຫະກຳ ແລະ ການຄ້າ ໄດ້ນໍາພາຄະນະຜູ້ແທນ ສປປ ລາວ ເຂົ້າຮ່ວມກອງປະຊຸມລັດຖະມົນຕີອົງການ ການຄ້າໂລກ (ອຄລ) ຄັ້ງທີ 12 ທີ່ ເຊີແນວ ປະເທດສະວິດ ໂດຍການເປັນປະທານຂອງທ່ານ ຕີມົວ ຊູເລເມນົບ (Timur Suleimenov) ລັດຖະມົນຕີປະຈໍາສໍານັກງານປະທານປະເທດກາຊັກສະຖານ.

ກອງປະຊຸມດັ່ງກ່າວ ເປັນເວທີປຶກສາຫາລືລະຫວ່າງບັນດາ​ລັດຖະມົນຕີຂອງ ອຄລ​ ເພື່ອ​ທົບທວນ​ຄືນ​ບັນດາວຽກງານຕ່າງໆທີ່ຕິດພັນກັບ ອຄລ, ຜັນຂະຫຍາຍການຈັດຕັ້ງປະຕິບັດວຽກງານລະບົບ​ການ​ຄ້າ​ຫຼາຍ​ຝ່າຍ ແລະ ໃຫ້ທິດຊີ້ນຳອັນຈຳເປັນໃນການຈັດຕັ້ງປະຕິບັດແຜນ​ວຽກ​ຂອງ ອຄລ ໃນ​ອະນາຄົດ ເພື່ອໃຫ້ສອດຄ່ອງກັບສະພາບການປ່ຽນແປງຂອງເສດຖະກິດໂລກໃນປັດຈຸບັນ, ໂດຍສະເພາະຈະພິຈາລະນາບັນດາປະເດັນຕ່າງໆທີ່ເປັນສິ່ງທ້າທ້າຍ ທີ່ສົ່ງຜົນກະທົບຕໍ່ບັນດາສະມາຊິກ ອຄລ ຊຶ່ງຈະມີຫຼາຍຫົວຂໍ້ວາລະທີ່ຈະນຳເຂົ້າມາປຶກສາຫາລືໃນກອງປະຊຸມ ເປັນຕົ້ນ: ສິ່ງທ້າທາຍຂອງລະບົບການຄ້າຫຼາຍຝ່າຍໃນປັດຈຸບັນ; ການຮັບມືຕໍ່ການແຜ່ລະບາດຂອງພະຍາດໂຄວິດ-19; ຄວາມໝັ້ນຄົງດ້ານສະບຽນອາຫານ; ກະສິກຳ; ການຖົມຂຸມການປະມົງ; ການຄ້າທາງເອເລັກໂຕຣນິກ ແລະ ການປະຕິຮູບ ອຄລ.ກອງປະຊຸມຄັ້ງນີ້ ໄດ້ມີພິທີເປີດຢ່າງເປັນທາງການໃນວັນທີ 12 ມິຖຸນາ 2022 ຊຶ່ງປະກອບມີຄະນະຜູ້ແທນຂັ້ນສູງຈາກບັນດາປະເທດສະມາຊິກ, ປະເທດສັງເກດການ, ອົງກ​ານຈັດຕັ້ງສາກົນຕ່າງໆ ແລະ ພາກສ່ວນຕ່າງໆທີ່ກ່ຽວຂ້ອງເຂົ້າຮ່ວມ ຈໍານວນ 400 ກວ່າຄົນ. ກອງປະຊຸມໄດ້ຈັດຂຶ້ນໃນໄລຍະທີ່ການດໍາເນີນງານຂອງອົງການຈັດຕັ້ງສາກົນ ກໍຄື ອຄລ ກໍາລັງພົບພໍ້ກັບສິ່ງທ້າທາຍທີ່ບໍ່ເຄີຍມີມາກ່ອນ, ໂດຍສະເພາະການແຜ່ລະບາດຂອງພະຍາດໂຄວິດ-19, ສະພາບເສດຖະກິດໂລກມີຄວາມທົດຖອຍ ແລະ ການປ່ຽນແປງຂອງສະພາບດິນຟ້າອາກາດ. ພາຍຫຼັງພິທີເປີດກອງປະຊຸມ ແລະ ສືບຕໍ່ວາລະຄົບຄະນະຂອງມື້ດັ່ງກ່າວ, ທ່ານ ຄຳແພງ ໄຊສົມແພງ ໄດ້ກ່າວຄໍາເຫັນຕໍ່ກອງປະຊຸມ ໂດຍຮຽກຮ້ອງໃຫ້ບັນດາປະເທດສະມາຊິກ ມີຂໍ້ຕົກລົງຮ່ວມກັນໃນບັນຫາທີ່ໄດ້ປຶກສາຫາລືກັນເປັນເວລາດົນນານເຊັ່ນ: ການຖົມຂຸມການປະມົງ; ການແກ້ໄຂຕໍ່ການລະບາດຂອງພະຍາດໂຄວິດ-19; ບັນຫາກະສິກຳ; ແລະ ການປະຕິຮູບ ອຄລ ເປັນຕົ້ນ.

ພ້ອມນັ້ນ ກໍຮຽກຮ້ອງໃຫ້ມີຄວາມຄືບໜ້າໃນການເຈລະຈາບັນຫາຕ່າງໆເຊັ່ນ: ຂົງເຂດກະສິກໍາ ແລະ ຄວາມໝັ້ນຄົງດ້ານສະບຽງອາຫານ; ມາດຕະການເພື່ອຮັບປະກັນການຫຼຸດພົ້ນອອກຈາກປະເທດດ້ອຍພັດທະນາຢ່າງໂລ່ງລ່ຽນ ແລະ ລະບົບ​ການ​ແກ້​ໄຂ​ຂໍ້​ຂັດ​ແຍ່ງຂອງ ອຄລ. ນອກຈາກນີ້ ສປປ ລາວ ຍັງໄດ້ເຂົ້າຮ່ວມກອງປະຊຸມຂອງວາລະຫົວຂໍ້ກ່ຽວກັບ “ບັນຫາສິ່ງທ້າທ້າຍຂອງລະບົບການຄ້າຫຼາຍຝ່າຍ” ຊຶ່ງເປັນແກນຫຼັກສຳຄັນຂອງກົດໝາຍການຄ້າສາກົນ ເພື່ອສະແດງໃຫ້ເຫັນວ່າ ລະບົບການຄ້າຫຼາຍຝ່າຍ ສາມາດເປັນສ່ວນໜຶ່ງໃນການແກ້ໄຂບັນຫາ, ສະໜັບສະໜູນ ແລະ ຟື້ນຟູ ອຄລ ໃຫ້ມີຄວາມໜ້າເຊື່ອຖື. ສະນັ້ນ, ບັນດາປະເທດສະມາຊິກ ອຄລ ຕ້ອງສະແດງໃຫ້ເຫັນວ່າ ລະບົບການຄ້າຫຼາຍຝ່າຍ ສາມາດບັນລຸໄດ້ຂໍ້ຕົກລົງທີ່ເຫັນດີເປັນເອກະພາບຮ່ວມກັນໃນຫຼາຍບັນຫາທີ່ເຄັ່ງຮ້ອນ ແລະ ຮີບດ່ວນ ທີ່ທົ່ວໂລກກໍາລັງປະເຊີນໜ້າຢູ່ໃນປັດຈຸບັນ ເພື່ອຮັກສາລະບົບການຄ້າຫຼາຍຝ່າຍ ແລະ ສ້າງໂລກແຫ່ງການເຊື່ອມໂຍງເສດຖະກິດ ທີ່ຕ່າງຝ່າຍຕ່າງໄດ້ຮັບຜົນປະໂຫຍດຮ່ວມກັນ. ທ່ານ ລັດຖະມົນຕີ ພ້ອມດ້ວຍຄະນະ ຍັງຈະສືບຕໍ່ເຂົ້າຮ່ວມກອງປະຊຸມໃນວາລະສຳຄັນອື່ນໆ ໃນໄລຍະທີ່ເຂົ້າຮ່ວມກອງປະຊຸມດັ່ງກ່າວ.

ຂ່າວ: ກະຊວງອຸດສາຫະກຳ ແລະ ການຄ້າ