ອີງຕາມກໍາລັງວິຊາສະເພາະ ປກສ ເມືອງຈັນທະບູລີ ນະຄອນຫຼວງວຽງຈັນ ເຂົ້າຈັບຕົວຜູ້ຄ້າຂາຍຢາເສບຕິດ ກ່ອນ 1 ຄົນ ແລ້ວນໍາໄປສອບສວນຂະຫຍາຍຜົນ, ເຊິ່ງຜູ້ກ່ຽວໄດ້ຊັດທອດເຖິງຜູ້ຮ່ວມຂະບວນການອີກ 3 ຄົນ; ເຈົ້າຫນ້າທີ່ ຈຶ່ງເລັ່ງຕິດຕາມຊອກຄົ້ນຈັບກຸມ ແລະ ກວດຄົ້ນເຄຫະສະຖານພົບເຫັນຢາບ້າເກືອບ 6 ແສນເມັດ ແລະ ສິ່ງເສບຕິດທີ່ຜິດກົດຫມາຍອີກຫຼາຍລາຍການ ຈຶ່ງໄດ້ນໍາຕົວພວກກ່ຽວມາດໍາເນີນຄະດີ.

ພັທ ພົມມີ ແສນຈົງຮັກ ຫົວຫນ້າພະແນກຕໍາຫຼວດ ປກສ ເມືອງຈັນທະບູລີ ໃຫ້ຮູ້ ໃນວັນທີ 29 ມິຖຸນາ 2022 ວ່າ: ພາຍຫຼັງໄດ້ຮັບຂໍ້ມູນຈາກພົນລະເມືອງດີ ວ່າມີກຸ່ມຄົນຈໍານວນຫນຶ່ງເຄື່ອນໄຫວຄ້າຂາຍຢາເສບຕິດ ຢູ່ ເຂດເມືອງຈັນທະບູລີ, ຈາກນັ້ນ, ຈຶ່ງໄດ້ນໍາກໍາລັງວິຊາສະເພາະລົງຕິດຕາມ ເຫັນວ່າມີຂໍ້ມູນຫຼັກຖານ. ຮອດ ວັນທີ 10 ມິຖຸນາ 2022 ໄດ້ຈັບຕົວ ທ້າວ ວິລະພົນ ຫຼື ຜົນ ອາຍຸ 21 ປີ ຢູ່ບ້ານຊຽງຍືນ ເມືອງຈັນທະບຸລີ.

ຜ່ານການສອບສວນ ຜູ້ກ່ຽວຮັບສາລະພາບວ່າ: ໄດ້ຊື້-ຂາຍຢາບ້າ ມາແຕ່ປີ 2021 ຮ່ວມກັບ ທ້າວ ສຸກມີໄຊ ຫຼື ຕານ້ອຍ; ສະນັ້ນ, ມາຮອດວັນທີ 28 ມິຖນາ 2022 ຈຶ່ງໄດ້ເຂົ້າຈັບຕົວ ທ້າວ ສຸກມີໄຊ ອາຍຸ 36 ປີ ແລະ ນາງ ນິດ ອາຍຸ 32 ປີ ທັງສອງຢູ່ບ້ານຊໍາ ເກດ ເມືອງສີໂຄດຕະບອງ ນວ (ເປັນຜົວເມຍກັນ) ຢູ່ຮ້ານຄາຣາໂອເກະແຫ່ງຫນຶ່ງ ເຂດບ້ານນາໄຊ ເມືອງໄຊ ເສດຖາ.

ຈາກນັ້ນ, ຈຶ່ງຂໍຄໍາສັ່ງກວດຄົ້ນເຄຫະສະຖານ ຈາກອົງການໄອຍະການສານເຂດ III ແລ້ວໄດ້ສົມທົບ ກັບອໍານາດການປົກຄອງບ້ານຊໍາເກດ, ປກສ ກຸ່ມຫນອງບຶກ ແລະ ພາກສ່ວນກ່ຽວຂ້ອງ ເຂົ້າກວດຄົ້ນ ເຄຫະ ສະຖານ ພົບເຫັນ ທ້າວ ຈ່ຽວ ຊ່າງເຫຼືອງ ອາຍຸ 36 ປີ, ເຊື້ອຊາດ, ສັນຊາດຫວຽດນາມ ແລະ ກວດພົບຢາບ້າ 299 ມັດ ແລະ 4 ຖົງນ້ອຍ ເທົ່າກັບ 598.690 ເມັດ, ເຄື່ອງປ້ໍາຢາບ້າ ຈໍານວນ 1 ເຄື່ອງ, ຢາໄອສ໌ 2 ຖົງ ໃຫຍ່, ສານເສບຕິດສີແດງ ຈໍານວນ 2 ຖົງໃຫຍ່, ສານເສບຕິດສີສົ້ມ ຈໍານວນ 1 ຖົງໃຫຍ່ ຈຶ່ງໄດ້ນໍາຕົວ ພວກກ່ຽວມາສອບສວນ.

ຜ່ານການສອບສວນ ຜູ້ກ່ຽວຮັບສາລະພາບວ່າ: ຢາບ້າທີ່ກວດພົບແມ່ນຂອງພວກກ່ຽວແທ້ ເຊິ່ງໄດ້ເລີ່ມຄ້າຂາຍຢາບ້າ ມາແຕ່ປີ 2021 ຈົນເຖິງ ປັດຈຸບັນ, ທັງນີ້, ກອງບັນຊາການ ປກສ ເມືອງຈັນທະບູລີ ພວມເລັ່ງສືບສວນ-ສອບສວນ ຂະຫຍາຍຜົນຫາ ກຸ່ມແກ້ງຮ່ວມຂະບວນການ ມາດໍາເນີນຄະດີ.

ແຫຼ່ງຂ່າວ: ຄວາມສະຫງົບ

ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ເຂົ້າຢ້ຽມຂໍ່ານັບ ນາຍົກລັດຖະມົນຕີ ແຫ່ງ ຣາຊະອານາຈັກ ກໍາປູເຈຍ ໃນໂອກາດທີ່ ທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ນໍາພາຄະນະຜູ້ແທນ ເດີນທາງເຂົ້າຮ່ວມກອງປະຊຸມຄະນະກໍາມາທິການຮ່ວມ ວ່າດ້ວຍການຮ່ວມມືສອງຝ່າຍ ລາວ-ກໍາປູເຈຍ (JC) ຄັ້ງທີ 14, ໃນລະຫວ່າງວັນທີ 06-08 ກໍລະກົດ 2022, ທີ່ ນະຄອນຫຼວງພະນົມເປັນ, ຣາຊະອານາຈັກ ກໍາປູເຈຍ.

ໃນຕອນເຊົ້າຂອງວັນທີ 07 ກໍລະກົດ 2022, ທ່ານ ຮອງນາຍົກລັດມົນຕີ ສະເຫຼີມໄຊ ກົມມະສິດ ພ້ອມດ້ວຍຄະນະ ໄດ້ເຂົ້າຢ້ຽມຂໍ່ານັບ ສົມເດັດ ອັກຄະມະຫາ ເສນາບໍດີ ເຕໂຈ ຮຸນແຊນ, ນາຍົກລັດຖະມົນຕີ ແຫ່ງ ຣາຊະອານາຈັກ ກໍາປູເຈຍ. ໃນໂອກາດນີ້, ທ່ານ ຮອງນາຍົກລັດຖະມົນຕີ ສະເຫຼີມໄຊ ກົມມະສິດ ໄດ້ສະແດງຄວາມຂອບໃຈ ມາຍັງ ສົມເດັດ ນາຍົກລັດຖະມົນຕີ ເຕໂຈ ຮຸນແຊນ ທີ່ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບໃນຄັ້ງນີ້, ພ້ອມທັງໄດ້ສະແດງຄວາມຊົມເຊີຍ ຕໍ່ຜົນສໍາເລັດໃນການເລືອກຕັ້ງສະມາຊິກສະພາທ້ອງຖິ່ນ (ສະພາຕາແສງ) ຊຸດທີ 5, ຊຶ່ງໄດ້ຈັດຂຶ້ນໃນວັນທີ 7 ມິຖຸນາ 2022 ຜ່ານມາ ແລະ ຊົມເຊີຍພັກປະຊາຊົນກໍາປູເຈຍ ທີ່ໄດ້ຮັບໄຊຊະນະໃນການເລືອກຕັ້ງຄັ້ງນີ້.

ພ້ອມນັ້ນ, ທ່ານ ຮອງນາຍົກລັດຖະມົນຕີ ສະເຫຼີມໄຊ ກົມມະສິດ ຍັງໄດ້ຕາງໜ້າໃຫ້ ລັດຖະບານ ແລະ ປະຊາຊົນລາວ ສະແດງຄວາມຂອບໃຈ ມາຍັງລັດຖະບານ ແລະ ປະຊາຊົນກໍາປູເຈຍ ທີ່ໄດ້ໃຫ້ການຊ່ວຍເຫຼືອແກ່ ສປປ ລາວ ໃນໄລຍະຜ່ານມາ, ໂດຍສະເພາະໃນວຽກງານການຕ້ານ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19.

ພ້ອມນີ້, ທ່ານ ຮອງນາຍົກລັດຖະມົນຕີ ສະເຫຼີມໄຊ ກົມມະສິດ ຍັງໄດ້ນໍາເອົາຄວາມຢື້ຢາມຖາມຂ່າວ ແລະ ຄໍາເຊື້ອເຊີນ ຂອງ ພະນະທ່ານ ພັນຄໍາ ວິພາວັນ, ນາຍົກລັດຖະມົນຕີ ແຫ່ງ ສປປ ລາວ ເຖິງ ສົມເດັດ ນາຍົກລັດຖະມົນຕີ ອັກຄະມະຫາ ເສນາບໍດີ ເຕໂຈ ຮຸນແຊນ ພ້ອມດ້ວຍພັນລະຍາ ເດີນທາງຢ້ຽມຢາມ ສປປ ລາວ ຢ່າງເປັນທາງການ ໃນໂອກາດທີ່ເໝາະສົມ.

ໃນໂອກາດດຽວກັນນີ້, ສົມເດັດ ນາຍົກລັດຖະມົນຕີ ເຕໂຈ ຮຸນແຊນ ກໍສະແດງຄວາມຍິນດີຕ້ອນຮັບ ແລະ ຕີລາຄາສູງ ຕໍ່ການເດີນທາງເຂົ້າຮ່ວມກອງປະຊຸມຄະນະກໍາມາທິການຮ່ວມ ວ່າດ້ວຍການຮ່ວມມືສອງຝ່າຍ ລາວ-ກໍາປູເຈຍ (JC) ຄັ້ງທີ 14 ຂອງຄະນະຜູ້ແທນ ສປປ ລາວ ໃນຄັ້ງນີ້, ພ້ອມທັງ ຕີລາຄາສູງຕໍ່ສາຍພົວພັນ ທີ່ເປັນມູນເຊື້ອອັນດີງາມທີ່ມີຮ່ວມກັນມາ ແຕ່ດົນນານ ລະຫວ່າງ ຣາຊະອານາຈັກ ກຳປູເຈຍ ແລະ ສປປ ລາວ ໂດຍສະເພາະ ໃນຊຸມທີ່ຜ່ານມາ ການຮ່ວມມືສອງຝ່າຍ ໄດ້ມີການເພີ່ມຂຶ້ນຫຼາຍກວ່າເກົ່າ ແລະ ໄດ້ຮັບໝາກຜົນຢ່າງເປັນຮູບປະທຳ ອັນໄດ້ນຳເອົາຜົນປະໂຫຍດຕົວຈິງມາສູ່ປະຊາຊົນ ສອງປະເທດ ລາວ ແລະ ກຳປູເຈຍ.

ນອກຈາກນັ້ນ ສົມເດັດ ນາຍົກລັດຖະມົນຕີ ເຕໂຈ ຮຸນແຊນ ຍັງໄດ້ຝາກຄໍາຂອບໃຈ ແລະ ຄໍາຢື້ຢາມຖາມຂ່າວ ເຖິງ ພະນະທ່ານ ນາຍົກລັດຖະມົນຕີ ພົນຄໍາ ວິພາວັນ ແລະ ຍິນດີຕອບຮັບຄໍາເຊື້ອເຊີນ ຢ້ຽມຢາມ ສປປ ລາວ ຢ່າງເປັນທາງການ ຂອງ ພະນະທ່ານ ພົນຄໍາ ວິພາວັນ.

ຂ່າວຈາກ: Lao national Radio

ຕາມກາານລາຍງານຂອງ ມູນນິທິຊ່ວຍເຫຼືອຜູ້ປະສົບໄພ ແຂວງຄຳມ່ວນ Rescue Khammouan ໃຫ້ຮູ້ວ່າ: ຂໍແຈ້ງທຸກໆການຈັດຕັ້ງທຸກໆເຂດແລະຮອດວັດທຸກໆວັດພາຍໃນປະເທດລາວແລະປະເທດໃກ້ຄຽງ.

ປະຈຸບັນນີ້ ມີສົບຄູບາຫຼືຍາຄູ ຫຼື ຈົວໄດ້ເສຍຊີວິດແລ້ວມາຟູນຳ້ບ້ານ ດອນຂຽວໃຕ້ ເມືອງ ໜອງບົກ ແຂວງ ຄຳມ່ວນ – ສູງປະມານ 1,67-1,70 ຊັງຕີແມັດ ອາຍຸປະມານ 35-36 ປີ ມີ ສາຍແອວ 1 ເສັ້ນມັດແອວ.

ສະນັ້ນ ຈຶ່ງແຈ້ງມາຍັງສຳນັກສົງທຸກວັດແລະປະເທດໃກ້ຄຽງໃຫ້ຮັບຊາບ “ ແລະ ລວບລວມຄູບາ ຈົວພາຍໃນວັດດ້ວຍວ່າ ແມ່ນວັດໃດ

ໂທປະສານງານ : 020 23451624 ( ກາຍ 3 ວັນຈະໄດ້ຊາປະນະກິດ ກຸ້ໄພ 1624 ແຂວງຄຳມ່ວນ ຊາປະນະກິດໃຫ້ )

ການພັດທະນາພື້ນຖານໂຄງລ່າງ ຖືເປັນສິ່ງສໍາຄັນສະເໝີ ຄະນະຮັບຜິດຊອບພັດທະນາໂຄງການເຂດເສດຖະກິດພິເສດ ສາມຫຼ່ຽມຄໍາ ຍາມໃດກໍຖືເອົາການພັດທະນາພື້ນຖານໂຄງລ່າງເປັນພິເສດ ເພື່ອຮອງຮັບກໍຄືການພັດທະນາເອື້ອອໍານວຍໃຫ້ແກ່ການເດີນທາງໄປມາມີຄວາມສະດວກສະບາຍຂຶ້ນ ເຊິ່ງຕະຫຼອດໄລຍະທີ່ຜ່ານມາກໍໄດ້ພັດທະນາທັງບ່ອນພັກທີ່ຢູ່ອາໄສເປັນຕົ້ນເຮືອນພັກ, ໂຮງແຮມ, ອາພັດເມັນ ແລະ ເສັ້ນທາງເຊື່ອມຕໍ່ຫາເຂດເສດຖະກິດພິເສດຫຼາຍຈຸດ ໂດຍສະເພາະໃນມໍ່ໆມານີ້ ຄະນະຮັບຜິດຊອບໂຄງການໄດ້ພັດທະນາກໍ່ສ້າງເສັ້ນທາງຈາກເຂດເສດຖະກິດພິເສດ ສາມຫຼ່ຽມຄຳ ຫາ ສະໜາມບິນສາກົນບໍ່ແກ້ວ ເສັ້ນທາງດັ່ງກ່າວນີ້ໄດ້ເລີ່ມລົງມືກໍ່ສ້າງມາແຕ່ທ້າຍປີ 2020 ເປັນຕົ້ນມາມີຄວາມຍາວທັງໝົດ 5 ກິໂລແມັດ ເປັນທາງ 4 ເລນ ແລະ ມີຄວາມກວ້າງ 18 ແມັດ ລວມທັງຄູຂັ້ນກາງ.

ສໍາລັບມູນຄ່າການກໍ່ສ້າງທັງໝົດ ຫຼາຍກວ່າ 50 ລ້ານໂດລາສະຫະລັດ ມາຮອດປັດຈຸບັນແມ່ນສຳເລັດ 100% ແລະ ໄດ້ເປີດນຳໃຊ້ແລ້ວ.

ນອກຈາກນັ້ນ, ເສັ້ນທາງແຫ່ງນີ້ໄດ້ຕັ້ງຊື່ວ່າ: ‘ຖະໜົນສະໜາມບິນ’ ເປັນເສັ້ນທາງທີ່ຕ້ອງໄດ້ຕັດຜ່ານສາຍພູກິ່ວລົມ ເປັນໜ່ວຍພູທີ່ມີຫີນຫຼາຍພໍສົມຄວນ ຈຶ່ງເຮັດໃຫ້ການກໍ່ສ້າງຕ້ອງໃຊ້ເວລາກໍຄືລ້າຊ້າກ່ອນແຜນກໍານົດໜ້ອຍໜຶ່ງຍ້ອນໄດ້ເຈາະເອົາຫີນອອກ. ພ້ອມດຽວກັນ, ເສັ້ນທາງສາຍນີ້ຍັງໄດ້ຕິດຕັ້ງໄຟເຍືອງທາງ, ປູກຕົ້ນໄມ້ ແລະ ດອກໄມ້ປະດັບ ຕະຫຼອດທາງຢ່າງຫຼວງຫຼາຍ ຈົນກາຍເປັນເສັ້ນທາງສັນຈອນທີີ່ສວຍງາມອີກເສັ້ນໜຶ່ງໃນເຂດເສດຖະກິດພິເສດສາມຫຼ່ຽມຄຳ ອີກດ້ວຍ.

ຂໍ້ມູນຂ່າວ ແລະ ຮູບພາບ: ຫ້ອງການຄຸ້ມຄອງໂຄສະນາເຜີຍແຜ່ຂໍ້ມູນຂ່າວສານ ສະພາບໍລິຫານເຂດເສດຖະກິດພິເສດ ສາມຫຼ່ຽມຄຳ.

ອີງຕາມສຳນັກ​ຂ່າວ​ ຊິນ​ຮວາ ໃຫ້ຮູ້ວ່າ: ທ່ານ ຮຸນເຊັນ, ນາຍົກ ລັດຖະມົນຕີ ກຳປູ​ເຈຍ ຈັດ​ສັນ​ເງິນ ​ອຸດ​ໜູນ​ ຫຼາຍ​ກວ່າ 100 ລ້ານ​ໂດ​ລາ​ ສະຫະລັດ ​ໃຫ້ການໄຟຟ້າ ກຳປູ​ເຈຍ ​ເພື່ອ​ຮັກສາ ລາຄາໄຟຟ້າ​ ​ໃຫ້​ຄົງ​ທີ ​ໃນ​ປີ​ນີ້ ​ເນື່ອງ​ຈາກ ລາຄາ​ໄຟຟ້າອາດ​ເພີ່ມ​ຂຶ້ນ 2​ເທົ່າ ຖ້າ​ບໍ່​ມີ​ເງິນ​ອຸດ​ໜູນຈາກ​ລັດຖະບານ ​ໂດຍ​ບາງ​ປະ​ເທດປັບ​ເພີ່ມ ອັດຕາ​ຄ່າ​ໄຟຟ້າ​ແລ້ວ ​ແຕ່​ລາຄາ​ໄຟຟ້າ​ ໃນ​ກຳປູ​ເຈຍ ຍັງ​ຄົງຢູ່​ຄື​ເກົ່າ ພ້ອມ​ທັງ​ຮຽກຮ້ອງໃຫ້​ປະຊາຊົນປະຢັດໄຟຟ້າ ​ແລະ ຫັນ​ມາ ​ໃຊ້​ພາຫະນະໄຟຟ້າ ​ເພື່ອ​ຫຼຸດ​ການ​ໃຊ້​ນ້ຳມັນ​ ເຊື້ອ​ໄຟ​ ​ແລະ ການ​ປ່ອຍ​ ມົນ​ລະ​ພິດ.

ຂະນະ​ທີ່ ລາຄາ​ ນ້ຳມັນ​ ແອັດ​ຊັງ​ທຳ​ມະ​ດາ ​ໃນ​ວັນ​ພຸດ​ທີ 6 ກໍລະກົດ​ນີ້ ​ຢູ່​ທີ່ 5.800 ຣຽວ(riel)ຕໍ່​ລິດ, ສ່ວນ​ລາຄາ​ ນ້ຳມັນ ​ກາ​ຊວນ​ ຢູ່​ທີ່ 6.200 ​ຣຽວ(riel)ຕໍ່​ລິດ ເພີ່ມ​ຂຶ້ນ 22% ​ແລະ 39% ​ ​ຕາມ​ລຳດັບ ເມື່ອ​ທຽບ​ໃສ່​​ ໄລຍະ​ ກາງ​ເດືອນ​ ກຸມ​ພາ​ ຜ່ານ​ມາ. ຂະນະ​ດຽວ​ກັນ ທ່ານHun Sen ​ໄດ້​ເນັ້ນ ຄວາມ​ສຳຄັນ​ ຂອງ​ເຂື່ອນ ​ໄຟຟ້າ ​ນ້ຳຕົກ ​ແລະ ​ໂຮງ​ໄຟຟ້າ ພະລັງງານ ​ແສງຕາ​ເວັນ ​ເພື່ອ​ຊ່ວຍ ​ຈັດ​ສົ່ງ ​ໄຟຟ້າ ທີ່​ມີ​ສະຖຽນ ​ລະ​ພາບ ​ແລະ ຮັກສາ ​ຄ່າ​ໄຟຟ້າ​ ໃຫ້​ຄົງ​ທີ ທ່າມກາງ ​ວິ​ກິດ ພະລັງງານ​ໂລກ ​ໂດຍ​ຈີນ ​ເປັນ​ຜູ້​ ພັດທະນາ ​ເຂື່ອນ​ໄຟຟ້າ ​ນ້ຳຕົກ ຂະໜາດ​ໃຫຍ່ ​ໃນ​ກຳປູ​ເຈຍ ລວມທັງ ​ໂຮງ​ໄຟຟ້າ ​ຖ່ານ​ຫີນ ​ແລະ ​ໂຮງ​ໄຟຟ້າ​ ພະລັງງານ ​ແສງຕາ​ເວັນ ກວມ​ເອົາ ​ອັດຕາ​ສ່ວນ 65,7% ຂອງ​ພະລັງງານ ທັງ​ໝົດ​ ທີ່​ຜະລິດ ​ໃນ​ກຳປູ​ເຈຍ.

ແຫຼ່ງຂ່າວ ແລະ ຮຽບຮຽງໂດຍ: ປະເທດລາວ

ໃນວັນທີ 30 ມິຖຸນາ 2022, ທີ່ ນະຄອນຫຼວງເວວລິງຕັນ, ທ່ານ ສິນໃຈ ມະນີວັນ ໄດ້ສໍາເລັດການຍື່ນສານຕາຕັ້ງຕໍ່ພະນະທ່ານ ນາງ ແດມ ຊິນດີ ຄິໂຣ (Dame Cindy Kiro), ຜູ້ສຳເລັດຣາຊະການ ນິວຊີແລນ ເພື່ອດໍາເນີນລົງຕໍາ ແໜ່ງເປັນເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສາທາລະນະລັດ ປະຊາທິ ປະໄຕ ປະຊາຊົນລາວ ປະຈໍາ ປະເທດ ນິວຊີແລນ ໂດຍມີສໍານັກງານສະຖານທູດຕັ້ງຢູ່ນະຄອນຫຼວງແຄນເບີຣາ, ປະເທດ ອົດສະຕຣາລີ.

ໃນໂອກາດນີ້, ພະນະທ່ານ ນາງ ແດມ ຊິນດີ ຄິໂຣ ໄດ້ສະແດງຄວາມຍິນດີຕ້ອນຮັບຢ່າງອົບອຸ່ນ ແລະ ຊົມເຊີຍ ທ່ານ ສິນໃຈ ມະນີວັນ ທີ່ໄດ້ຖືກແຕ່ງຕັ້ງເປັນເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈໍາ ປະເທດ ນິວຊີແລນ. ທ່ານທູດ ສິນໃຈ ມະນີວັນ ໄດ້ນໍາເອົາຄວາມຢ້ຽມຢາມຖາມຂ່າວອັນອົບອຸ່ນ ແລະ ພອນໄຊ ອັນປະເສີດຈາກ ພະນະ ທ່ານ ທອງລຸນ ສີສຸລິດ, ປະທານປະເທດ ແຫ່ງ ສປປ ລາວ ຝາກເຖິງຜູ້ສຳເລັດຣາຊະການ ນິວຊີແລນ ແລະ ສະແດງຄວາມຂອບໃຈຢ່າງຈິງໃຈ ຕໍ່ການຕ້ອນຮັບອັນແສນອົບອຸ່ນ ແລະ ການອໍານວຍຄວາມສະດວກຕ່າງໆ ໃນການຈັດພິທີຍື່ນສານຕາຕັ້ງໃຫ້ແກ່ທູດລາວໃນຄັ້ງນີ້.

ພ້ອມນີ້, ທ່ານທູດ ສິນໃຈ ມະນີວັນ ກໍ່ໄດ້ຕາງໜ້າໃຫ້ ລັດຖະ ບານ ແລະ ປະຊາຊົນ ແຫ່ງ ສປປ ລາວ ສະແດງຄວາມຂອບໃຈ ຕໍ່ລັດຖະບານ ກໍຄືປະຊາຊົນນິວຊີແລນ ທີ່ໄດ້ໃຫ້ການຊ່ວຍເຫຼືອ ແລະ ສະໜັບສະໜູນ ສປປ ລາວ ໃນໄລຍະຜ່ານມາ ໂດຍສະເພາະແມ່ນ ຂົງ ເຂດ ການສຶກສາ ແລະ ການພັດທະນາຊັບພະຍາກອນມະນຸດ, ກະສິກໍາປ່າໄມ້, ການທ່ອງທ່ຽວ, ການຄຸ້ມຄອງຊັບພະ ຍາກອນນໍ້າ ແລະ ນໍາໃຊ້ພະລັງງານທົດແທນ, ການເກັບກູ້ລະເບີດບໍ່ທັນແຕກ ແລະ ອື່ນໆ ອັນໄດ້ປະກອບສ່ວນສຳຄັນເຂົ້າໃນການສ້າງສາພັດທະນາປະເທດ ແລະ ຫວັງວ່າ ຈະສືບຕໍ່ໄດ້ຮັບການຊ່ວຍເຫຼືອໃນຊຸມປີຕໍ່ໜ້າ. ພະນະທ່ານ ຜູ້ສຳເລັດຣາຊະການ ໄດ້ສະແດງຄວາມຂອບໃຈ ສປປ ລາວ ທີ່ໄດ້ໃຫ້ການຮ່ວມມື ແລະ ສະໜັບສະໜູນນິວຊີແລນ ໃນເວທີພາກພື້ນ ແລະ ສາກົນ ພ້ອມທັງກ່າວວ່າ ນິວຊີແລນ ຈະສືບຕໍ່ໃຫ້ການຊ່ວຍເຫຼືອ ແລະ ຮ່ວມມືທີ່ເໝາະສົມ ກັບ ສປປ ລາວ.

ພິທີຍື່ນສານຕາຕັ້ງຄັ້ງນີ້ ໄດ້ຈັດຂຶ້ນ ແລະ ດຳເນີນໄປດ້ວຍບັນຍາກາດທີ່ດີ ແລະ ສົມກຽດ. ສປປ ລາວ ແລະ ນິວຊີແລນ ໄດ້ສ້າງຕັ້ງສາຍພົວພັນການທູດຮ່ວມກັນ ນັບແຕ່ວັນທີ 07 ກຸມພາ 1963 ເປັນຕົ້ນມາ.

ແຫຼ່ງຂ່າວ: Lao National Radio