ກະຊວງພາຍໃນ ຮ່ວມກັບ 4 ທະນາຄານທຸລະກິດຄື: ທະນາຄານການຄ້າຕ່າງປະເທດລາວ ມະຫາຊົນ, ທະນາຄານພັດທະນາລາວ ຈຳກັດ, ທະນາຄານສົ່ງເສີມກະສິກຳ ແລະ ທະນາຄານຮ່ວມທຸລະກິດລາວ-ຫວຽດ ຈຳກັດ ເຊັນສັນຍາອອກບັດພະ ນັກງານ-ລັດຖະກອນ ຢູ່ ສປປ ລາວ ໃນວັນທີ 24 ມິຖຸນາ ຜ່ານມາ ເພື່ອເຮັດໃຫ້ການຈັດຕັ້ງປະຕິບັດການອອກບັດໃຫ້ພະນັກງານ-ລັດຖະກອນທົ່ວປະເທດ ສໍາເລັດຕາມແຜນການທີ່ກໍານົດໄວ້ ທັງເປັນການອໍານວຍຄວາມສະດວກ ໃນການນໍາໃຊ້ບັດຂອງພະນັກງານທັງສູນກາງ ແລະ ທ້ອງຖິ່ນ ໃຫ້ມີຄວາມສະດວກສະບາຍ ໃນການເຂົ້າເຖິງລະບົບບໍລິການຂອງທະນາຄານໄດ້ງ່າຍ ແລະ ຢ່າງວ່ອງໄວ, ຕາງໜ້າລົງນາມໂດຍ ທ່ານ ນາງ ແພງພັນ ດວງປະຊາ ຮອງຫົວໜ້າຫ້ອງການ ກະຊວງພາຍໃນ ແລະ ຕາງໜ້າຈາກ 4 ທະນາຄານທຸລະກິດ ໂດຍມີ ທ່ານ ທອງຈັນ ມະນີໄຊ ລັດຖະມົນຕີກະຊວງພາຍໃນ ພ້ອມດ້ວຍພະນັກງານທີ່ກ່ຽວຂ້ອງ ເຂົ້າຮ່ວມເປັນສັກຂີພິຍານ.

ໃນໄລຍະຜ່ານມາ ໄດ້ມີການເຮັດທົດລອງຈັດຕັ້ງປະຕິບັດ ອອກບັດໃຫ້ແກ່ພະນັກ ງານ-ລັດຖະກອນ ຢູ່ກະຊວງພາຍໃນ ໂດຍແມ່ນທະນາຄານການຄ້າຕ່າງປະເທດລາວມະຫາຊົນ(ທຄຕລ) ເປັນຜູ້ພິມບັດຕາມການຢັ້ງຢືນຄວາມຖືກຕ້ອງຂອງຂໍ້ມູນພະນັກງານ-ລັດຖະກອນ ຈາກກະຊວງພາຍໃນ, ຈາກນັ້ນ ກໍໄດ້ສືບຕໍ່ອອກບັດໃຫ້ບັນດາກະຊວງ-ອົງການ ຂັ້ນສູນກາງ ເລີ່ມແຕ່ປີ 2017 ເປັນຕົ້ນມາຮອດປີ 2020 ສຳເລັດ 46 ພາກສ່ວນ ປະມານ 13.550 ບັດ ກວມ 66% ຂອງຈຳນວນພະນັກງານ-ລັດຖະກອນຢູ່ຂັ້ນສູນກາງ(ຕາມສະຖິຕິລັດຖະກອນປີ 2020), ພ້ອມກັນນັ້ນ ກໍໄດ້ຜັນຂະຫຍາຍການ ຈັດຕັ້ງປະຕິບັດວຽກງານ ອອກບັດພະນັກງານ-ລັດຖະກອນ ລົງສູ່ທ້ອງຖິ່ນຂັ້ນແຂວງສຳ ເລັດແລ້ວ 9 ແຂວງ, ລວມທັງໝົດປະມານ 9.554 ບັດ ກວມ 29% ຂອງຈຳນວນພະນັກ ງານ-ລັດຖະກອນຢູ່ຂັ້ນແຂວງ ອີງຕາມສະຖິຕິລັດຖະກອນປີ 2021.

ຜ່ານການຈັດຕັ້ງປະຕິບັດວຽກງານຕົວຈິງ ພົບວ່າຢູ່ຂັ້ນທ້ອງຖິ່ນ ບໍ່ມີສະເພາະແຕ່ ທຄຕລ ທີ່ນໍາໃຊ້ບໍລິການເບີກຈ່າຍເງິນເດືອນຜ່ານທະນາຄານ, ຍັງມີທະນາຄານອື່ນອີກເຊັ່ນ: ທະນາຄານພັດທະນາລາວ, ທະນາຄານສົ່ງເສີມກະສິກຳ ແລະ ທະນາຄານຮ່ວມທຸລະກິດລາວ-ຫວຽດ ຈຳກັດ, ໃນນັ້ນ ແຂວງຜົ້ງສາລີ 26 ພາກ ສ່ວນ ມີ 1021 ບັນຊີ ທີ່ເບີກຈ່າຍເງິນເດືອນຜ່ານທະນາຄານພັດທະນາລາວ, ແຂວງຊຽງຂວາງ 2 ພາກ ສ່ວນ ມີ 231 ບັນຊີທີ່ເບີກຈ່າຍເງິນເດືອນຜ່ານທະນາ ຄານຮ່ວມທຸລະກິດ ລາວ-ຫວຽດ ຈຳກັດ, ແຂວງອັດຕະປື ເບີກຈ່າຍເງິນເດືອນຜ່ານທະນາຄານຮ່ວມທຸລະກິດລາວ-ຫວຽດ 7 ພາກ ສ່ວນ ມີ 360 ບັນຊີ, ເບີກຈ່າຍເງິນເດືອນ ຜ່ານທະນາຄານການຄ້າຕ່າງປະເທດລາວມະຫາຊົນ 8 ພາກສ່ວນ ມີ 762 ບັນຊີ, ເບີກຈ່າຍເງິນເດືອນຜ່ານທະນາຄານພັດທະນາລາວ 9 ພາກສ່ວນ ມີ 1.129 ບັນຊີ ແລະ ເບີກຈ່າຍເງິນເດືອນຜ່ານທະນາຄານສົ່ງເສີມກະສິກຳ 9 ພາກສ່ວນ ມີ 742 ບັນຊີ.

ຂ່າວ-ພາບ: ວຽງຈັນໃໝ່

ເວລາ 13:45 ໂມງ ວັນທີ 17 ມິຖຸນາ 2022, ປກສ ກຸ່ມ III ສີສັງວອນ ເມືອງໄຊເສດຖາ ນະຄອນຫຼວງວຽງຈັນ ຈັບຕົວຜູ້ຖືກສົງໃສ ຄ້າຂາຍຢາເສບຕິດ 3 ຄົນຊື່: ທ້າວ ທະວີສຸກ ຫຼື ໂຕ້ ອາຍຸ 24 ປີ ກໍາມະກອນ ບ້ານໂພນພະເນົາ, ນາງ ຄຳຈັນ ຫຼື ຈ໋ອດ ອາຍຸ 59 ປີ ບ້ານຮ່ອງແກ ແລະ ນາງ ມະຍຸລີ ຫຼື ນ້ອຍ ອາຍຸ 33 ປີ (ທັງສອງເປັນແມ່ລູກ) ພ້ອມຂອງກາງຢາບ້າ 172 ເມັດ ສົ່ງໃຫ້ ປກສ ເມືອງໄຊເສດຖາ ດໍາເນີນຄະດີ.

ຜ່ານການສອບສວນຂອງເຈົ້າໜ້າທີ່ ພວກກ່ຽວ ໃຫ້ການຮັບສາລະພາບວ່າ ຢາບ້າ ເຈົ້າໜ້າທີ່ກວດພົບໃນເວລາເຂົ້າຈັບຕົວ ເປັນຂອງພວກຕົນ ຊື້ຈາກຍິງຄົນໜຶ່ງ ບໍ່ຮູ້ຊື່ ແລະ ທີ່ຢູ່ ຈຳນວນ 3 ຄັ້ງ ແລະ ຄັ້ງລ່າສຸດ ວັນທີ 15 ມິຖຸນາ 2022 ຍິງທີ່ບໍ່ຊາບຊື່ໄດ້ເອົາຢາບ້າ 200 ເມັດມາສົ່ງໃຫ້ພວກຕົນ ຈາກນັ້ນຈິ່ງໄດ້ນຳເອົາຢາບ້າຈຳນວນໜຶ່ງໄປຂາຍ. ຕົກມາຮອດວັນທີ 17 ມິຖຸນາ 2022 ໃນຂະນະທີ່ພວກຕົນລໍຖ້າຂາຍຢາບ້າຢູ່ນັ້ນ ຖືກເຈົ້າໜ້າທີ່ຈັບຕົວພ້ອມຂອງກາງຢາບ້າ 172 ເມັດ.

ປັດຈຸບັນເຈົ້າໜ້າທີ່ພວມເລັ່ງຕິດຕາມຊອກຄົ້ນຫາ ເພື່ອຈັບຕົວພັກພວກຮ່ວມຂະບວນການ ມາດຳເນີນຄະດີຕາມຂັ້ນຕອນຂອງກົດໝາຍ. 

ຂ່າວ: ປ້ອງກັນຄວາມສະຫງົບນະຄອນຫຼວງວຽງຈັນ

ໃນວັນທີ 23 ມິຖຸນາ ນີ້, ສະຫາຍ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກປະຊາຊົນ ປະຕິວັດລາວ ປະທານປະເທດແຫ່ງ ສປປ ລາວ ໄດ້ພົບປະໂອ້ລົມ ຕໍ່ການນໍາ ແລະ ພະນັກງານຫຼັກແຫຼ່ງຂອງ ສະພາທິດສະດີສູນກາງພັກ, ຄະນະໂຄສະນາອົບຮົມສູນກາງພັກ (ຄອສພ) ແລະ ສະຖາບັນວິທະຍາສາດເສດຖະກິດ-ສັງຄົມແຫ່ງຊາດ (ສວສສຊ), ໂດຍການຕ້ອນ ຮັບຂອງ ສະຫາຍ ຄໍາພັນ ເຜີຍຍະວົງ ຄະນະເລຂາທິການສູນກາງພັກ ປະທານສະພາທິດສະດີສູນກາງພັກ, ຫົວໜ້າ ຄອສພ.ໃນໂອກາດນີ້, ສະຫາຍ ຄໍາພັນ ເຜີຍຍະວົງ ໄດ້ລາຍງານສະພາບການເຄື່ອນໄຫວວຽກງານ ຂອງສະພາທິດສະດີສູນກາງພັກ ໃນໄລຍະຜ່ານມາ ຊຶ່ງຍົກໃຫ້ເຫັນບັນດາຜົນສໍາເລັດ ໃນການເຄື່ອນ ໄຫວວຽກງານຄົ້ນຄວ້າທິດສະດີ ແລະ ພຶດຕິກໍາ; ການຈັດຕັ້ງດໍາເນີນກອງປະຊຸມສໍາມະນາທິດສະດີ ທັງພາຍໃນ ແລະ ຕ່າງປະເທດ; ສະພາບການປັບປຸງກົງຈັກການຈັດຕັ້ງຂອງສະພາທິດສະດີສູນກາງພັກ ປະກອບມີ ຄະນະປະຈໍາສະພາທິດສະດີສູນກາງພັກ; ຄະນະກໍາມະການດ້ານການເມືອງ-ຄວາມໝັ້ນຄົງ; ຄະນະກໍາມະການດ້ານເສດຖະກິດ-ການເງິນ; ຄະນະກໍາມະການດ້ານວັດທະນະທໍາ-ສັງຄົມ ແລະ ຄະນະເລຂາທິການວິທະຍາສາດ.

ສະພາທິດສະດີສູນກາງພັກ ມີຫ້ອງການສະພາທິດສະດີສູນກາງພັກ ເປັນກົງຈັກຊ່ວຍວຽກບໍລິຫານ ໂດຍພາຍໃຕ້ການຊີ້ນໍາໂດຍກົງຂອງຮອງປະທານຜູ້ປະຈໍາການສະພາທິດສະດີສູນກາງພັກ, ການປັບປຸງພາລະບົດບາດຂອງສະພາທິດສະດີສູນກາງພັກ ແນໃສ່ເພື່ອໃຫ້ມີຄຸນນະພາບກວ່າເກົ່າ ຊຶ່ງສະພາທິດສະດີສູນກາງພັກແມ່ນການຈັດຕັ້ງໜຶ່ງທີ່ຂຶ້ນກັບການຊີ້ນໍາໂດຍກົງຂອງກົມການເມືອງສູນກາງພັກ, ມີພາລະບົດບາດໃຫ້ຄໍາປຶກສາແກ່ຄະນະບໍລິຫານງານສູນກາງພັກ, ກົມການເມືອງສູນກາງພັກ, ຄະນະເລຂາທິການສູນກາງພັກ ກ່ຽວກັບບັນຫາທິດສະດີການເມືອງ, ແນວຄິດ-ທິດສະດີຂອງພັກ ແລະ ວິທະຍາສາດສັງຄົມ ເພື່ອເປັນພື້ນຖານໃຫ້ແກ່ການກໍານົດ, ປັບປຸງ ແລະ ບູລະນະແນວທາງ, ນະໂຍບາຍຂອງພັກຕາມທິດກ້າວຂຶ້ນສັງຄົມນິຍົມ.

ສະຫາຍ ທອງລຸນ ສີສຸລິດ ໄດ້ໃຫ້ຄໍາເຫັນຊີ້ນໍາ ຕໍ່ສະພາທິດສະດີສູນກາງພັກ, ຄອສພ, ສວສສຊ ໃນການສືບຕໍ່ຈັດຕັ້ງປະຕິບັດໜ້າທີ່ການເມືອງຂອງຕົນ ໃນນີ້ໄດ້ເນັ້ນໃຫ້ສະພາທິດສະດີສູນກາງພັກ ເປັນເຈົ້າການໃນການສຸມທຸກກໍາລັງແຮງຂອງຕົນ ເຂົ້າໃນການສືບຕໍ່ຈັດຕັ້ງນໍາພາ-ຊີ້ນໍາການ ເຄື່ອນໄຫວປະຕິບັດພາລະບົດບາດ, ສິດ ແລະ ໜ້າທີ່ຂອງຕົນ ໃຫ້ສໍາເລັດຜົນ ແລະ ມີປະສິດທິພາບ; ເອົາໃຈໃສ່ຕໍ່ການປັບປຸງກົນໄກການຈັດຕັ້ງເຄື່ອນໄຫວວຽກງານຄົ້ນຄວ້າທິດສະດີ ແລະ ສະຫຼຸບພຶດຕິກໍາແຫ່ງການຈັດຕັ້ງນໍາພາຂອງພັກ ໂດຍສະເພາະ ໃນສະເພາະໜ້ານີ້ ແມ່ນສຸມໃສ່ການຄົ້ນຄວ້າທິດສະດີ ແລະ ສະຫຼຸບພຶດຕິກໍາ ກ່ຽວກັບການການສ້າງປະຖົມປັດໄຈ ເພື່ອກ້າວເດີນສູ່ຈຸດໝາຍສັງຄົມນິຍົມ ໃຫ້ສໍາເລັດຜົນ ຕາມລະດັບຄາດໝາຍ ພ້ອມກັບບັນດາໂຄງການຄົ້ນຄວ້າລະດັບຊາດໃນຫົວຂໍ້ຕ່າງໆ ໃຫ້ສາມາດຮັບຮອງເອົາຜົນການຄົ້ນຄວ້າຢ່າງເປັນທາງການ ເພື່ອປັບປຸງບູລະນະແນວທາງຂອງພັກ ໃຫ້ນັບມື້ນັບອຸດົມສົມບູນ ເທື່ອລະກ້າວ.

ແຫຼ່ງຂ່າວ:

ໃນໄລຍະ 5 ເດືອນຕົ້ນປີ 2022 ກອງຄຸ້ມຄອງພາຫະນະ ນະຄອນຫລວງວຽງຈັນ (ນວ) ສາມາດໃຫ້ບໍລິການຂຶ້ນທະບຽນລົດແກ່ປະຊາຊົນໄດ້ຈຳນວນ 21.294 ຄັນ ຖ້າທຽບໃສ່ປີຜ່ານມາເພີ່ມຂຶ້ນ 50%; ສາມາດໂອນຊື່, ປ່ຽນປ້າຍ, ປ່ຽນສີ, ປ່ຽນຈັກໄດ້ 23.272 ຄັນ ແລະ ກວດເຕັກນິກລົດໄດ້ 41.047 ຄັນ.

ຂະນະດຽວກັນ ກໍມີຜູ້ນຳໃຊ້ລົດໄຟຟ້າມາຂຶ້ນທະບຽນແລ້ວຈຳນວນ 257 ຄັນ ແລະ ຄາດວ່າຈະເພີ່ມຂຶ້ນອີກເລື້ອຍໆ.

ໃນວັນທີ 21 ມິຖຸນາ 2022 ທີ່ຜ່ານມານີ້, ທ່ານ ບຸນປອນ ບຸນສົມຫວັງ ຫົວໜ້າກອງຄຸ້ມຄອງພາຫະນະ ແລະ ການຂັບຂີ່ ນະຄອນຫລວງວຽງຈັນ(ນວ) ໄດ້ໃຫ້ສຳພາດຕໍ່ນັກຂ່າວ ວ່າ: ໃນໄລຍະຜ່ານມາ ກອງຄຸ້ມຄອງພາຫະນະ ແລະ ການຂັບຂີ່ ນວ ໄດ້ສຸມໃສ່ປະຕິບັດຕາມທິດຊີ້ນຳຂອງນະ ຄອນຫລວງ ໃນການແກ້ໄຂບັນຫາຕາມທິດ 3 ຫລຸດ 3 ເພີ່ມ ໂດຍສະເພາະການຫລຸດຜ່ອນອຸບັດ ເຫດຕາມທ້ອງຖະໜົນ ແລະ ຮັບປະກັນການກວດກາເຕັກນິກຍານພາຫະນະ ໃຫ້ໄດ້ຕາມມາດຕະຖານ.

ສ່ວນໃນປີ 2021 ທີ່ຜ່ານມາ, ກອງຄຸ້ມຄອງພາຫະນະ ສາມາດໃຫ້ບໍລິການຂຶ້ນທະບຽນລົດໃໝ່ໄດ້ທັງໝົດ 42.015 ຄັນ; ໂອນຊື່, ປ່ຽນປ້າຍ, ປ່ຽນສີ, ປ່ຽນຈັກໄດ້ທັງໝົດ 41.578 ຄັນ ແລະ ກວດເຕັກນິກລົດ 74.381 ຄັນ. ນອກຈາກນີ້, ພວກເຮົາກໍສາມາດຂະຫຍາຍຫ້ອງການໄດ້ 3 ສາຂາ ເພື່ອອຳນວຍຄວາມສະດວກໃຫ້ແກ່ປະຊາຊົນທີ່ຢູ່ເຂດໃກ້ຄຽງ ເຊິ່ງທັງສາມສາຂາແມ່ນສາມາດໃຫ້ບໍລິການ ຄືກັນກັບສຳນັກງານໃຫຍ່ຢູ່ທົ່ງປົ່ງ ເປັນຕົ້ນ ການຂື້ນທະບຽນໃໝ່, ຕໍ່ທະບຽນ, ໂອນກຳມະສິດ, ຕໍ່ໃບຂັບຂີ່ ແລະ ຕິດປ້າຍລົດ ປະກອບມີ: ສາຂາບ້ານສີວິໄລ(ໃກ້ກັບໂຮງຮຽນສອນຂັບລົດນ້ຳຊ່ວງ) ເມືອງນາຊາຍທອງ ໄດ້ເປີດບໍລິການມາແຕ່ວັນທີ 06/01/2020; ສາຂາບ້ານໂພນຄຳ (ຫລັກ16) ເມືອງໄຊທານີ ໄດ້ເປີດບໍລິການແຕ່ວັນທີ 18/01/2021 ເປັນຕົ້ນມາ ແລະ ສາຂາບ້ານດົງໂພສີ (ຕໍ່ໜ້າສາງທ່າບົກ-ທ່ານາແລ້ງ) ເມືອງຫາດຊາຍຟອງ ໄດ້ເປີດໃຫ້ບໍລິການໃນວັນທີ 04/01/2022.ທ່ານ ບຸນປອນ ບຸນສົມຫວັງ ໃຫ້ຮູ້ຕື່ມວ່າ:

ໃນປັດຈຸບັນ ມີຫລາຍບໍລິສັດ ທີ່ນຳເຂົ້າລົດໄຟຟ້າ ເຊິ່ງມີຫລາຍລຸ້ນຫລາຍລາຄາ ເຮັດໃຫ້ຜູ້ຊົມໃຊ້ມີທາງເລືອກຫລາຍຂຶ້ນ ແລະ ຈະມີທ່າອ່ຽງໃນການຂະ ຫຍາຍຕົວຂອງລົດໄຟຟ້ານັບມື້ເພີ່ມຂຶ້ນ ຕາມຄວາມຮຽກຮ້ອງຕ້ອງການຕົວຈິງຂອງສັງຄົມ. ແຕ່ເຖິງຢ່າງໃດກໍຕາມ ບັນຫາທີ່ສຳຄັນທີ່ສຸດກໍຄື ຕ້ອງຮັບປະກັນໄດ້ຄຸນນະພາບ, ຄວາມປອດໄພ ແລະ ສະ ຖານທີ່ອຳນວຍຄວາມສະດວກໃນການສາກໄຟ ຢູ່ສະຖານທີ່ສາທາລະນະ ແລະ ຈຸດຕ່າງໆ ເພື່ອຮອງຮັບໃຫ້ແກ່ຜູ້ຂັບຂີ່ລົດໄຟຟ້າ.

ຂ່າວ: ປະເທດລາວ

ໃນວັນທີ 22 ມິຖຸນາ 2022, ທ່ານ ທອງລຸນ ສີສຸລິດ ປະທານປະເທດແຫ່ງ ສປປ ລາວ ພ້ອມຄະນະໄດ້ລົງຕິດຕາມ, ຊຸກຍູ້ ແລະ ຊີ້ນໍາ ຜູ້ປະກອບການທຸລະກິດຜະລິດສິນຄ້າຂອງບໍລິສັດ ມິດຕະພາບກະສິກຳ ຈຳກັດ ແລະ ບໍລິສັດ ກຣີນຟິດລາວ ຈຳກັດ ຢູ່ເມືອງໄຊທານີ ນະຄອນ ຫລວງວຽງຈັນ ໂດຍການຕ້ອນຮັບຢ່າງອົບອຸ່ນ ຂອງທ່ານ ອານຸພາບ ຕຸນາລົມ ເລຂາຄະນະພັກນະຄອນຫຼວງ ແລະ ທ່ານ ອາດສະພັງທອງ ສີພັນດອນ ເຈົ້າຄອງນະຄອນຫລວງວຽງຈັນ ພ້ອມດ້ວຍຄະນະ.

ການລົງເຄື່ອນໄຫວຊຸກຍູ້ການຜະລິດເປັນສິນຄ້າໃນຄັ້ງນີ້, ທ່ານ ປະທານປະເທດ ໄດ້ຮັບຟັງການລາຍງານຜົນການດຳເນີນທຸລະກິດ ຂອງຜູ້ປະກອບການທັງສອງບໍລິສັດ; ສຳລັບ ບໍລິສັດ ມິດຕະ ພາບກະສິກຳ ຈຳກັດ ໄດ້ເລີ່ມດຳເນີນການຜະລິດມາແຕ່ປີ 2017, ຜະລິດຕະພັນສ່ວນໜຶ່ງແມ່ນສົ່ງເຂົ້າສູ່ຕະຫລາດພາຍໃນ ແລະ ຈຳນວນໜຶ່ງແມ່ນສົ່ງອອກຕ່າງປະເທດ ເປັນຕົ້ນແມ່ນ ຜະລິດຕະພັນຈາກໝາກຕາວ, ຜັກທຽມດອງ, ແຈ່ວໝາກເຜັດ ແລະ ປະເພດນ້ຳໝາກໄມ້; ສ່ວນໂຮງງານຜະລິດຫົວ ອາຫານສັດ ຂອງບໍລິສັດ ກຣີນຟິດ ລາວ ຈຳກັດ ມີກຳລັງການຜະລິດ 20 ໂຕນຕໍ່ຊົ່ວໂມງ, ປະມານ 3 ລ້ານໂຕນຕໍ່ປີ. ໃນນັ້ນ, ມີຫົວອາຫານໝູ, ໄກ່, ເປັດ, ປາ, ງົວ, ນົກກະທາ ແລະ ກົບ ເຊິ່ງໄລຍະທຳອິດປີ 2020 ສາມາດຜະລິດໄດ້ 40 ພັນໂຕນ, 2021 ຜະລິດໄດ້ 28 ພັນໂຕນ ແລະ ປີນີ້ ວາງຄາດໝາຍໄວ້ແມ່ນ 40 ພັນໂຕນ, ສ່ວນວັດຖຸດິບທີ່ໃຊ້ເຂົ້າໃນການຜະລິດ 90% ແມ່ນທັນຍາພືດ ຄື: ສາລີ, ເຂົ້າບຣາເລ ແລະ ມັນຕົ້ນ. ຢ່າງໃດກໍຕາມ ທັງສອງບໍລິສັດ ກໍຍັງປະສົບຄວາມຫຍຸ້ງຍາກຕ່າງໆ ເປັນຕົ້ນ ການແຂ່ງຂັນດ້ານລາຄາຈາກສິນຄ້າປະເພດດຽວກັນ, ບັນຫາການເຂົ້າເຖິງແຫລ່ງທຶນ, ການຂາດແຄນເງິນຕາ, ຂາດແຄນນໍ້າມັນຂົນສົ່ງ, ບັນຫາວັດຖຸດິບ ແລະ ອື່ນໆ.ໃນໂອກາດດັ່ງກ່າວ, ທ່ານ ປະທານປະເທດ ໄດ້ໃຫ້ກຽດໂອ້ລົມ ແລະ ມີບາງຄຳເຫັນເນັ້ນໜັກ ເພື່ອເປັນທິດຊີ້ນຳແກ່ສອງບໍລິສັດ ເປັນຕົ້ນແມ່ນໃຫ້ທັງສອງບໍລິສັດ ຫັນມາສົ່ງເສີມປະຊາຊົນ ພ້ອມທັງ ແນະນຳເຕັກນິກໃນການຜະລິດ ເພື່ອໃຫ້ໄດ້ວັດຖຸດິບທີ່ມີຄຸນນະພາບເຂົ້າມາປ້ອນໂຮງງານ, ທັງເປັນການຫລຸດຜ່ອນຕົ້ນທຶນຂອງການນຳເຂົ້າວັດຖຸດິບຈາກຕ່າງປະເທດ ເນື່ອງຈາກລາວເຮົາມີທ່າແຮງໃນການຜະລິດວັດຖຸດິບຢູ່ແລ້ວ; ພ້ອມນັ້ນ ໄດ້ເນັ້ນໃຫ້ບໍລິສັດຜະລິດສົ່ງອອກໃຫ້ຫລາຍ ເພາະຈະເປັນການຊຸກຍູ້ສົ່ງເສີມປະຊາຊົນໃຫ້ກ້າວເຂົ້າສູ່ການຜະລິດໃຫ້ຫລາຍຂຶ້ນ.

ການຜະລິດ, ການສ້າງຜະລິດຕະພັນ ຕ້ອງສາມາດແຂ່ງຂັນໄດ້ທັງຄຸນນະພາບ, ລວມທັງການໂຄສະນາ, ການບໍລິການ ແລະ ລາຄາ ຖ້າເຮັດໄດ້ລາວເຮົາກໍຈະຫລຸດຜ່ອນການນຳເຂົ້າໃນອະນາຄົດ, ພ້ອມທັງສ້າງຄວາມເຂັ້ມແຂງ ໃຫ້ແກ່ການຜະລິດພາຍໃນ, ສາມາດຕອບສະໜອງການຊົມໃຊ້ ຢູ່ພາຍໃນ ແລະ ເປັນສິນຄ້າສົ່ງອອກ ເພື່ອດຶງເອົາເງິນຕາເຂົ້າປະເທດ, ປະກອບສ່ວນສໍາຄັນ ເຂົ້າໃນການແກ້ໄຂຄວາມຫຍຸ້ງຍາກດ້ານເສດຖະ ກິດ-ການເງິນ-ເງິນຕາ ໃນປັດຈຸບັນ ແລະ ສ້າງຄວາມເຂັ້ມແຂງໃຫ້ແກ່ລະບົບ ເສດຖະກິດແຫ່ງຊາດໃນຕໍ່ໜ້າ.

ຂ່າວ: ປະເທດລາວ

ໃນຕອນບ່າຍ ວັນທີ 22 ມິຖຸນາ 2022 ທີ່ສຳນັກງານນາຍົກລັດຖະມົນຕີ, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ຜູ້ຊີ້ນຳວຽກງານຂົງເຂດເສດຖະກິດ ໄດ້ເປັນປະທານກອງປະຊຸມ ພົບປະປຶກສາຫາລືກັບຜູ້ພັດທະນາເຂດເສດຖະກິດພິເສດ ບໍ່ເຕ່ນແດນງາມ ໂດຍຜ່ານລະບົບກອງປະຊຸມທາງໄກ (Video Conference) ໂດຍມີຜູ້ຕາງໜ້າກະຊວງ, ອົງການປົກຄອງແຂວງ ແລະ ພະແນກການກ່ຽວຂ້ອງ ແຂວງຫຼວງນໍ້າທາ ພ້ອມດ້ວຍ ຄະນະຮັບຜິດຊອບພັດທະນາເຂດເສດຖະກິດພິເສດບໍ່ເຕ່ນແດນ ເຂົ້າ ຮ່ວມ.

ການປະຊຸມຄັ້ງນີ້ ໄດ້ຮັບຟັງການລາຍງານ ກ່ຽວກັບຄວາມຄືບໜ້າ ໃນການພັດ ທະນາເຂດເສດຖະກິດພິເສດ ບໍ່ເຕ່ນແດນງາມ ກໍ່ຄືຄວາມຄືບໜ້າ ໃນການຈັດຕັ້ງປະ ຕິບັດຜົນກອງປະຊຸມ ຄັ້ງວັນທີ 29 ພຶດສະພາ 2022 ທີ່ເຂດເສດຖະກິດພິ ເສດບໍ່ເຕ່ນແດນງາມ ຈາກຜູ້ພັດທະນາເຂດດັ່ງກ່າວ, ພ້ອມກັນນັ້ນ ຜູ້ເຂົ້າຮ່ວມກອງປະ ຊຸມ ກໍ່ໄດ້ປະກອບຄຳຄິດເຫັນ ຕໍ່ຂົງເຂດວຽກງານ ທີ່ຕິດພັນກັບຄວາມຮັບຜິດ ຊອບ ຂອງຂະແໜງການ ແລະ ທ້ອງຖິ່ນຕົນ ໂດຍສະເພາະ ການປະຕິບັດກົດ ໝາຍ ແລະ ລະບຽບການ ໃນການພັດ ທະນາເຂດ ຂອງຜູ້ພັດທະນາ ແລະ ຜູ້ລົງທຶນ, ການຄຸ້ມຄອງເຂດ, ການກຳນົດຂອບເຂດໂຄງການຄືນໃໝ່, ການລ້ອມຮົ້ວອ້ອມເຂດ, ການອະນຸມັດການລົງທຶນ, ການຜັນຂະຫຍາຍການ ຈັດຕັ້ງປະຕິບັດເຂດຮ່ວມມືເສດຖະກິດ ບໍ່ເຕ່ນ ສປປ ລາວ ແລະ ບໍ່ຫານ ສປ ຈີນ, ການຄຸ້ມຄອງ ແລະ ສົ່ງເສີມແຮງງານລາວ; ການນຳເຂົ້າທຶນ ແລະ ນຳໃຊ້ເງິນຕາຕ່າງປະເທດ, ການເກັບພັນທະອາກອນ ແລະ ການນຳເຂົ້າ-ສົ່ງອອກສິນຄ້າ, ການຄຸ້ມຄອງແຮງ ງານຕ່າງປະເທດ ແລະ ການສ້າງໂຄງການທີ່ມີສ່ວນຮ່ວມກັບປະຊາຊົນ, ການອະ ນຸມັດປຸກສ້າງ ຢູ່ພາຍໃນເຂດ, ການລົບ ລ້າງປ້າຍໂຄສະນາ ແລະ ທະບຽນພາຫະນະ ທີ່ບໍ່ຖືກຕ້ອງ, ກວດກາຄືນ ການນຳໃຊ້ລະບົບໂທລະຄົມມະນາຄົມ, ການຄຸ້ມຄອງທີ່ດິນ ແລະ ສິ່ງແວດລ້ອມ, ການອອກແບບ ແລະ ຈັດສັນຜັງເມືອງ, ການສະເໜີລົງທຶນກິດຈະການໂຮງຮຽນ, ໂຮງໝໍ ແລະ ອື່ນໆ.

ໃນໂອກາດນີ້, ທ່ານປະທານກອງປະຊຸມ ໄດ້ຊີ້ນຳໃຫ້ພາກສ່ວນກ່ຽວຂ້ອງ ເອົາໃຈໃສ່ຕື່ມບາງດ້ານ ເປັນຕົ້ນ ໃຫ້ກະຊວງກ່ຽວຂ້ອງ ແຕ່ງຕັ້ງພະນັກງານ ຂະແໜງການຂອງຕົນ ລົງສົມທົບກັບທ້ອງຖິ່ນ ແລະ ພາກສ່ວນກ່ຽວຂ້ອງ ຈັັດຕັ້ງປະຕິບັດວຽກງານທີ່ຢູ່ໃນຄວາມຮັບຜິດຊອບຕົນ ໃຫ້ມີຜົນສຳເລັດເປັນກ້າວໆ; ໃຫ້ຂະແໜງການກ່ຽວຂ້ອງ ຄົ້ນຄວ້າ ແລະ ປະຕິບັດນະໂຍບາຍຕ່າງໆ ຕໍ່ການພັດທະນາເຂດ ໃຫ້ແທດເໝາະກັບສະພາບເງື່ອນໄຂຕົວຈິງຕື່ມ; ໃຫ້ກະຊວງແຜນ ການ ແລະ ການລົງທຶນ ສືບຕໍ່ເປັນໃຈກາງ ຕິດຕາມ, ກວດກາ ແລະ ຊຸກຍູ້ການພັດ ທະນາເຂດ ໃຫ້ສາມາດດຳເນີນແຜນການທີ່ກຳນົດໄວ້; ໃຫ້ຜູ້ພັດທະນາ ສືບຕໍ່ພັດທະນາເຂດເສດຖະກິດພິເສດບໍ່ເຕ່ນແດນງາມ ມີຄວາມຄືບໜ້າໄວກວ່າເກົ່າ ໃຫ້ກາຍເປັນຕົວເມືອງໃໝ່, ເປັນເຂດທີ່ໜ້າຢູ່, ໜ້າທ່ອງທ່ຽວ, ມີຄວາມສະຫງົບ, ມີຄວາມເປັນລະບຽບຮຽບຮ້ອຍ, ເປັນບ່ອນສ້າງວຽກເຮັດງານທຳ, ເປັນຖານເກັບລາຍຮັບທີ່ສຳຄັນ ເຂົ້າງົບປະມານແຫ່ງລັດ, ປະກອບສ່ວນເຂົ້າໃນການພັດທະນາເສດຖະກິດ-ສັງຄົມໂດຍລວມຂອງປະເທດ ກໍ່ຄືແຂວງຫຼວງນໍ້າທາ ໃຫ້ມີການພັດທະນາ ຫຼາຍຂຶ້ນກວ່າເກົ່າ; ໃຫ້ຜູ້ພັດທະນາ ສືບຕໍ່ສະໜັບສະໜູນ, ອຳນວຍຄວາມສະດວກ ແລະ ໃຫ້ການຮ່ວມມືກັບ ຂະແໜງການ ແລະ ພາກສ່ວນທີ່ກ່ຽວຂ້ອງ ໃນການແກ້ໄຂບັນຫາຄົງຄ້າງຕ່າງໆ ທີ່ໄດ້ປຶກສາຫາລືກັນ ໃນກອງປະຊຸມຄັ້ງວັນທີ 29 ພຶດສະພາ 2022 ທີ່ເຂດເສດຖະກິດພິເສດບໍ່ເຕ່ນແດນງາມ ໃຫ້ສຳເລັດເປັນກ້າວໆ.

ຂ່າວ: Lao National Radio