ການລັກຊັບພົນລະເມືອງ ຍັງເປັນປະກົດການຫຍໍ້ທໍ້ທີ່ພົ້ນເດັ່ນໃນສັງຄົມ!

July 22, 2022

ຮທ ສັນຕິສຸກ ໄຊຍະພູມມິນ ໃນວັນທີ 20 ກໍລະກົດ 2022, ກອງບັນຊາການ ປກສ ເມືອງສີສັດຕະນາກ ຈັດກອງປະຊຸມສະຫຼຸບ 6 ເດືອນຕົ້ນປີ ແລະ ວາງແຜນການວຽກຈຸດສຸມທ້າຍປີ 2022 ຂຶ້ນທີ່ສະໂມສອນປົກຄອງເມືອງສີສັດຕະນາກ ໂດຍການເຂົ້າຮ່ວມເປັນປະທານຂອງ ທ່ານ ເດດສົງຄາມ ທຳມະວົງ ຄະນະປະຈຳພັກນະຄອນຫຼວງວຽງຈັນ ເລຂາພັກເມືອງ ເຈົ້າເມືອງສີສັດຕະນາກ, ມີ ພັທ ບຸນສົງ ດາລາແສນ ຫົວໜ້າກອງບັນຊາການ ປກສ ເມືອງສີສັດຕະນາກ, ມີບັນດາພະນັກງານ ປກສ ເມືອງສີສັດຕະນາກ, ມີ 9 ຫ້ອງການອ້ອມຂ້າງເມືອງ ແລະ 37 ອົງການປົກຄອງບ້ານ ຈຳນວນ 105 ທ່ານ ຍິງ 9 ທ່ານ ເຂົ້າຮ່ວມ.

ພັທ ອິນປັນ ຫາດາວເຮືອງ ຮອງຫົວໜ້າກອງບັນຊາການ ປກສ ເມືອງສີສັດຕະນາກ ໃຫ້ຮູ້ວ່າ: ຕະຫລອດໄລຍະ 6 ເດືອນຕົ້ນປີ ກອງບັນຊາການ ປກສ ເມືອງສີສັດຕະນາກ ສຸມໃສຂຶ້ນບັນຊີ, ຈັດແບ່ງປະເພດ, ມອບແບ່ງຂັ້ນຄຸ້ມຄອງ ແລະ ຕິດຕາມການເຄື່ອນໄຫວເປົ້າໝາຍ 231 ຄົນ, ຍິງ 19 ຄົນ.

6 ເດືອນຕົ້ນປີມີຄະດີເກີດຂຶ້ນ 105 ເລື່ອງ, ທຽບໃສ່ 6 ເດືອນຕົ້ນປີ 2021 ແມ່ນຫຼຸດລົງ 13 ເລື່ອງ ເທົ່າກັບ 11,01% ແລະສາມາດແກ້ໄຂໄດ້ 68 ເລື່ອງ ເທົ່າກັບ 64,76% ດຳເນີນ 33 ເລື່ອງ, ກັກຕົວ 45 ຄົນ, ຍິງ 9 ຄົນ ປະກົດການຫຍໍ້ທໍ້ທີ່ພົ້ນເດັ່ນແມ່ນ ລັກຊັບພົນລະເມືອງ ເກີດຂຶ້ນ 93 ເລື່ອງ ໃນນີ້ ລັກລົດຈັກ 78 ເລື່ອງ, ຊິງຊັບ 7 ເລື່ອງ, ປຸ້ນຊັບ 1 ເລື່ອງ, ຍັກຍອກຊັບພົນລະເມືອງ 1 ເລື່ອງ ແລະ ອື່ນໆ.

ສຳລັບທ້າຍປີ 2022, ກອງບັນຊາການ ປກສ ເມືອງສີສັດຕະນາກ

1. ຈະສືບຕໍ່ນຳພາການເມືອງແນວຄິດໃຫ້ ນາຍ ແລະ ພົນຕຳຫຼວດ ຕິດພັນກັບການປັບປຸງກົງຈັກໃຫ້ສອດຄ່ອງ.

2. ສົມທົບກັບຂະແໜງການທີ່ກ່ຽວຂ້ອງໃນການສ້າງບ້ານ, ກຸ່ມບ້ານພັດທະນາ, ສ້າງບ້ານປ້ອງກັນຄວາມສະຫງົບສຸກດີ, ບ້ານປອດຄະດີ, ບ້ານປອດຢາເສບຕິດ, ບ້ານວັດທະນາທຳ ແລະ ຄອບຄົວວັດທະນາທຳໃຫ້ມີຄຸນນະພາບ ແລະ ປະກົດຜົນເປັນຈິງ.

3. ສືບຕໍ່ແກ້ໄຂປະກົດການຫຍໍ້ທໍ້ ຕິດພັນກັບການຈັດຕັ້ງວາລະແຫ່ງຊາດ ວ່າດ້ວຍການແກ້ໄຂຢາເສບຕິດ. 4

. ສຸມໃສ່ປັບປຸງພື້ນຖານໂຄ່ງລ່າງ ສ້າງຫ້ອງການກອງຮ້ອຍຈະລາຈອນ ແລະ ປັບປຸງກໍ່ສ້າງຄ້າຍກັກຂັງຊົ່ວຄາວ.

ທ່ານ ເດດສົງຄາມ ທຳມະວົງ ຄະນະປະຈຳພັກ ນະຄອນຫຼວງວຽງຈັນ ເລຂາພັກເມືອງ ເຈົ້າເມືອງສີສັດຕະນາກ ໄດ້ຍ້ອງຍໍຊົມເຊີຍຕໍ່ຜົນງານທີ່ຈັດຕັ້ງປະຕິບັດຜ່ານມາ ມີທັງດ້ານດີ ແລະ ດ້ານຄົງຄ້າງທີ່ຈະຕ້ອງໄດ້ສຸມໃສ່ປັບປຸງແກ້ໄຂ ເພື່ອເຮັດໃຫ້ເມືອງ ສີສັດຕະນາກ ມີສະຖຽນລະພາບທາງດ້ານການເມືອງ ມີຄວາມເປັນລະບຽບຮຽບຮ້ອຍທາງດ້ານສັງຄົມ ເຊິ່ງທ່ານໄດ້ເນັ້ນໃຫ້ຖືເອົາວຽກການປາບປາມຢາເສບຕິດ ເປັນໜ້າທີ່ຄວາມຮັບຜິດຊອບໄປຕາມຂະບວນການກົດໝາຍຢ່າງເຂັ້ມງວດ ແລະ ເຮັດໜ້າທີ່, ມີວີໃນ, ມີນ້ຳໃຈເສຍສະລະ ກຽມພ້ອມໃຫ້ຄວາມຊ່ວຍເຫຫຼືອ ແລະ ບໍລິການປະຊາຊົນ.

ແຫຼ່ງຂ່າວ: ປ້ອງກັນຄວາມສະຫງົບນະຄອນຫຼວງວຽງຈັນ

ແຜ່ນດິນໄຫວເປັນບໍລິເວນກວ້າງຢູ່ ແຂວງຫລວງນໍ້າທາ ແລະ ບໍ່ແກ້ວ

ໂທລະໂຄ່ງ THOLAKHONG

July 22, 2022

ເກີດແຜ່ນດິນໄຫວເປັນບໍລິເວນກວ້າງຢູ່ ແຂວງຫລວງນໍ້າທາ ແລະ ບໍ່ແກ້ວ ກົມອຸຕຸນິຍົມ ແລະ ອຸທົກກະສາດ ໄດ້ລາຍງານສະພາບການເກີດ ແຜ່ນດິນໄຫວ ຄັ້ງວັນທີ 21 ກໍລະກົດ 2022 ຈາກສູນຂໍ້ມູນຂ່າວສານ ແຜ່ນດິນໄຫວແຫ່ງຊາດລາວ ໃນຂອບເຂດທົ່ວປະເທດ ເຊິ່ງໄດ້ພົບສັນຍານ ການເກີດແຜ່ນດິນໄຫວທີ່ປະເທດເພື່ອນບ້ານ ເຊັ່ນ: ມຽນມາ ຈໍານວນ 50 ກວ່າຄັ້ງ ມີຄວາມຮູ້ສຶກໄດ້ເປັນບໍລິເວນກວ້າງລາຍລະອຽດຂອງການເກີດ ແຜ່ນດິນໄຫວທີ່ຮູ້ສຶກໄດ້ ຄືດັ່ງນີ້:

1. ແຜ່ນດິນໄຫວ ວັນທີ 21 ກໍລະກົດ 2022 ເວລາ 23:40 ໂມງ ຄືການເຕືອນ (Before shock) ຂະໜາດ 5.1 ຣີກເຕີ ຄວາມເລິກ 4 ກິໂລ ແມັດ (ກມ) ທາງຕາເວັນຕົກສ່ຽງເໜືອ ຂອງແຂວງບໍ່ແກ້ວ ປະມານ 63 ກມ ແລະ ຫລວງນໍ້າທາ ປະມານ 83 ກມ ເກີດຂຶ້ນກ່ອນຮູ້ສຶກໄດ້ ເປັນບໍລິເວນກວ້າງ.

2. ແຜ່ນດິນໄຫວ ວັນທີ 22 ກໍລະກົດ 2022 ເວລາ 00:07 ໂມງ ຄືເຫດການແຜ່ນດິນໄຫວຂະໜາດໃຫຍ່ (Main shock) ຂະໜາດ 6.4 ຣີກເຕີ ຄວາມເລິກ 3 ກມ ທາງທິດຕາເວັນຕົກສ່ຽງເໜືອ ຂອງແຂວງບໍ່ແກ້ວ ປະມານ 67 ກມ ແລະ ຫລວງນໍ້າທາ ປະມານ 76 ກມ ຮູ້ສຶກໄດ້ ເຖິງຄວາມຮຸນແຮງໃນຫລາຍພື້ນທີ່.

3. ແຜ່ນດິນໄຫວ ວັນທີ 22 ກໍລະກົດ 2022 ເວລາ 05:22 ໂມງ ຄືເຫດການແຜ່ນດິນໄຫວຕາມມາ (After shock) ທີ່ມີຂະໜາດໜ້ອຍກວ່າ 5.3 ຣີກເຕີ ຄວາມເລິກ 3 ກມ ທາງທິດຕາເວັນຕົກສ່ຽງເໜືອ ຂອງແຂວງ ບໍ່ແກ້ວ ປະມານ 62 ກມ ແລະ ຫລວງນໍ້າທາ ປະມານ 82 ກມ ຮູ້ສຶກໄດ້ໃນ ຫລາຍພື້ນທີ່.

ສາເຫດແຜ່ນດິນໄຫວຂະໜາດກາງ ຫາ ໃຫຍ່ ເກີດໂດຍ ທໍາມະຊາດ ສາມາດສ້າງຄວາມເສຍຫາຍໄດ້.

ຈັດພິທີມອບ – ຮັບໃບຢັ້ງຢືນການເຂົ້າເປັນສະມາຊິກ ສໍານັກງານປົກປ້ອງເງິນຝາກ

ໂທລະໂຄ່ງ THOLAKHONG

July 22, 2022

ສກຈຮ ຈຳປາສັກ ຈຳກັດ ຈັດພິທີມອບ – ຮັບໃບຢັ້ງຢືນການເຂົ້າເປັນສະມາຊິກ ສໍານັກງານປົກປ້ອງເງິນຝາກ.

ສະຖາບັນການເງິນຈຸລະພາກທີ່ຮັບເງິນຝາກ ຈໍາປາສັກ ຈຳກັດ (ສກຈຮ ຈຳປາສັກ) ໜຶ່ງໃນສະຖາບັນການເງິນທີ່ໄດ້ຮັບຄວາມໄວ້ວາງໃຈຈາກສັງຄົມ; ຕະຫຼອດໄລຍະ 7 ປີກວ່າແຫ່ງການດໍາເນີນທຸລະກິດ ໄດ້ມີການເຕີບໃຫຍ່ຂະຫຍາຍຕົວຕໍ່ເນື່ອງ ສາມາດເປີດໜ່ວຍບໍລິການຄວບຄຸມໄປທົ່ວ 4 ແຂວງພາກໃຕ້. ປັດຈຸບັນກໍາລັງວາງແຜນອອກຜະລິດຕະພັນເງິນຝາກປະຢັດຮູບແບບພິເສດທີມີຊື່ວ່າ “ເງິນຝາກປະຢັດ ດອກທະວີ”

ໃນວັນທີ 15 ກໍລະກົດ 2022 ທາງສະຖາບັນໄດ້ຈັດພິທີ ມອບ-ຮັບໃບຢັ້ງຢືນການເຂົ້າເປັນສະມາຊິກ ສໍານັກງານປົກປ້ອງເງິນຝາກ ຍົກລະດັບຄວາມໜ້າເຊື່ອຖືສູ່ສັງຄົມ.

ໂດຍຜູ້ອໍານວຍການສະຖາບັນກໍໄດ້ກ່າວວ່າ: ຕະຫລອດໄລຍະ 7 ປີກວ່າ ຫລັງຈາກໄດ້ຮັບອະນຸຍາດສ້າງຕັ້ງຢ່າງເປັນທາງການຈາກທະນາຄານແຫ່ງ ສປປ ລາວໃນວັນທີ 4 ມີນາ 2015 ສະຖາບັນການເງິນຈຸລະພາກທີ່ຮັບເງິນຝາກ ຈຳປາສັກ ຈຳກັດ ໄດ້ເລີ່ມໃຫ້ບໍລິການຢ່າງເປັນທາງການໃນວັນທີ 10 ມີນາ 2015 ແລະ ໄດ້ເອົາໃຈໃສ່ປະຕິບັດພາລະກິດຂອງຕົນຢ່າງຕັ້ງໜ້າ ໃນການຂະຫຍາຍການບໍລິການທາງການເງິນໄປສູ່ພາກສ່ວນທີ່ບໍ່ສາມາດເຂົ້າເຖິງການບໍລິການຂອງທະນາຄານ ໃຫ້ໄດ້ເຂົ້າເຖິງການບໍລິການການເງິນທີ່ເໝາະສົມ ໂດຍຮັບປະກັນການບໍລິການທີ່ເຂົ້າເຖິງງ່າຍ ແລະ ມີຈັນຍາບັນ ແນໃສ່ບັນລຸວິໄສທັດຂອງການເປັນສະຖາບັນການເງິນຈຸລະພາກທີ່ເຂົ້າໃຈວິຖີຊີວິດຂອງຄົນລາວ, ເຂົ້າເຖິງງ່າຍ ແລະ ມີຈັນຍາບັນ.

ການບໍລິການການເງິນຈຸລະພາກຂອງ ສກຈຮ ຈຳປາສັກ ໄດ້ມີການຂະຫຍາຍຕົວຢ່າງຕໍ່ເນື່ອງ ແລະ ໝັ້ນຄົງ ຈົນກວມທັງ 10 ເມືອງຂອງແຂວງ ຈໍາປາສັກ ແລະ ແຂວງອ້ອມຂ້າງກໍໍຄືໄດ້ຮັບການອະນຸຍາດສ້າງຕັ້ງໜ່ວຍບໍລິການ 01 ແຫ່ງຢູ່ແຂວງສາລະວັນ ໃນວັນທີ 26 ມິຖຸນາ 2017, ໄດ້ຮັບການອະນຸຍາດສ້າງຕັ້ງໜ່ວຍບໍລິການແຂວງອັດຕະປືໃນວັນທີ 6 ທັນວາ ປີ 2018 ແລະ ໄດ້ຮັບການອະນຸຍາດສ້າງຕັ້ງໜ່ວຍບໍລິການ ແຂວງເຊກອງ ໃນວັນທີ 6 ມິຖຸນາ ປີ 2019

ໃນການເຄື່ອນໄຫວດຳເນີນທຸລະກິດໃນ 7 ປີຜ່ານມາ ສກຈຮ ຈໍາປາສັກກໍໄດ້ມີການສ້າງລາຍຮັບ ແລະ ກຳໄລເປັນກ້າວໆຈົນມາຮອດທ້າຍປີ 2021 ສກຈຮ ຈປສ ໄດ້ມີ:

ຍອດເຫລືອເງິນຝາກເທົ່າກັບ 321,610,071,541.19 ກີບ
ຍອດເຫລືອເງິນກູ້ເທົ່າ 334,470,410,600.01 ກີບ
ກຳໄລໃນປີເທົ່າກັບ 11,269,274,000.74 ກີບ
ໄດ້ແຈ້ງເສຍພັນທະອາກອນໃຫ້ລັດ ຈຳນວນ 2,769,421,380.00 ກີບ

ເພື່ອສ້າງຄວາມເຊື່ອໝັ້ນໃຫ້ແກ່ລູກຄ້າເງິນຝາກກໍຄືຜູ້ຄຸ້ມຄອງ ແລະ ສັງຄົມໂດຍລວມຕໍ່ການເຕີບໃຫຍ່ຂະ ຫຍາຍຕົວໃນການດຳເນີນທຸລະກິດການເງິນຈຸລະພາກ ເວົ້າລວມ, ເວົ້າສະເພາະກໍຄືການຮັບຝາກເງິນຈາກມວນຊົນບໍ່ວ່າຈະເປັນເງິນຝາກປະຢັດ ຫລື ຝາກມີກຳນົດ. ທາງຄະນະສະພາບໍລິຫານກໍຄືຄະນະອຳນວຍການໄດ້ມີຄວາມຕັດສິນໃຈສູງໃນການຍື່ນໜັງສືສະເໜີຂໍເຂົ້າເປັນສະມາຊິກຂອງສຳນັກງານປົກປ້ອງເງິນຝາກໃນວັນທີ 26 ຕຸລາ ປີ 2021 ຫລັງຈາກໄດ້ຜ່ານການຄົ້ນຄວ້າທັງທາງດ້ານນິຕິກໍາ, ເອກະສານລາຍງານກ່ຽວກັບຜົນການດຳເນີນງານໃນປີຜ່ານໆມາຢ່າງລະອຽດແລ້ວທາງສຳນັກງານປົກປ້ອງເງິນຝາກກໍໄດ້ອອກຂໍ້ຕົກລົງຮັບເອົາ ສກຈຮ ຈຳປາສັກ ເຂົ້າເປັນສະມາຊິກໃນວັນທີ 23 ທັນວາ 2021 ເຊິ່ງການຖືກຮັບເຂົ້າເປັນສະມາຊິກຂອງສຳນັກງານປົກປ້ອງເງິນຝາກເປັນສະຖາບັນການເງິນຈຸລະພາກແຫ່ງທໍາອິດໃນພາກໃຕ້. ຖືວ່າເປັນກຽດ ແລະ ສັກສີອັນຍິ່ງໃຫຍ່ຂອງພວກເຮົາເພາະມັນເປັນການຢັ້ງຢືນເຖິງຄວາມເຊື່ອໝັ້ນຂອງຂັ້ນເທິງທີ່ມີຕໍ່ຄວາມໝັັ້ນຄົງ ແລະ ຍືນຍົງຂອງສະຖາບັນການເງິນພວກເຮົາ ແລະ ເປັນການຢັ້ງຢືນຕໍ່ມວນຊົນເຖິງການຍຶດໝັ້ນດຳເນີນພາລະກິດເພື່ອບັນລຸວິໄສທັດຂອງອົງກອນຢ່າງມີຄວາມໂປ່ງໃສ ແລະ ມີຈັນຍາບັນ, ທ່ານ ຜູ້ອໍານວຍການກ່າວ.

ທ່ານ ຍັງກ່າວຕື່ມວ່າ: ໃນຕໍ່ໜ້າ, ສກຈຮ ຈຳປາສັກ ມີແຜນໃນການຂະຫຍາຍການບໍລິການໃຫ້ກວ້າງຂວາງກວ່າເກົ່າ ເພື່ອແນໃສ່ບໍລິການເງິນຝາກລູກຄ້າຢ່າງທົ່ວເຖິງໃນທຸກຂົງເຂດ ເປັນອົງກອນທີ່ສົ່ງເສີມການອອມເງິນໃຫ້ແກ່ມວນຊົນທີ່ມີລາຍໄດ້ໜ້ອຍ ໂດຍອອກແບບຜະລິດຕະພັນເງິນຝາກທີ່ເໝາະສົມກັບຮູບແບບລາຍຮັບເຊັ່ນ: ຜະລິດຕະພັນເງິນຝາກທະວີຊັບທີ່ເປັນຜະລິດຕະພັນເງິນຝາກມີກຳນົດທີ່ມີດອກເບ້ຍສູງສຸດເຖິງ 10,5% ຕໍ່ ປີ ແລະ ສາມາດຝາກເຂົ້າຕື່ມໄດ້ຢ່າງຕໍ່ເນື່ອງຕາມຄວາມຕ້ອງການໃນການອອມເງິນຂອງຜູ້ໃຊ້ບໍລິການ ເຊິ່ງຜະລິດຕະພັນດັ່ງກ່າວນີ້ແມ່ນໄດ້ໃຫ້ບໍລິການມາເປັນເວລາ 3 ປີ ແລ້ວ ແລະ ມີຍອດເຫລືອບັນຊີເທົ່າ ກັບ 5,964 ເຊິ່ງກໍຖືວ່າເປັນຜະລິດຕະພັນທີ່ໄດ້ຮັບຄວາມນິຍົມພໍສົມຄວນ. ນອກຈາກນັ້ນ, ພວກເຮົາກຳລັງວາງແຜນອອກຜະລິດຕະພັນເງິນຝາກປະຢັດຮູບແບບພິເສດທີມີຊື່ວ່າ “ເງິນຝາກປະຢັດ ດອກທະວີ” ທີ່ຈະເພີ່ມອັດຕາດອກເບ້ຍໃຫ້ເມື່ອລູກຄ້າມີການຝາກເງິນຢ່າງສະໝ່ຳສະເໝີໃນທຸກໆເດືອນ ເຊິ່ງຈະເປີດໃຫ້ບໍລິການໃນມໍ່ໆນີ້.

ສຶກສາອົບຮົມຜູ້ຄອມເມັ້ນໃນເຟດບຸກທີ່ຂັດຕໍ່ແນວທາງ

ໂທລະໂຄ່ງ THOLAKHONG

July 22, 2022

ປກສ ກຸ່ມເຂດນາຊວງ ສຶກສາອົບຮົມຜູ້ຄອມເມັ້ນໃນເຟດບຸກທີ່ຂັດຕໍ່ແນວທາງ

ໃນວັນທີ 21 ກໍລະກົດ 2022 ຜ່ານມາທີ່ ຫ້ອງການ ປກສ ກຸ່ມເຂດນາຊວງ ເມືອງວຽງທອງ ແຂວງບໍລິຄຳໄຊ ໄດ້ມີການສຶກສາອົບຮົມຜູ້ທີ່ຄອມເມັ້ນທາງເຟດບຸນໄປໃນທາງທີ່ຂັດຕໍ່ແນວທາງເຊີ່ງແມ່ນ:ວັນທີ 20 ກໍລະກົດ 2022 ໄດ້ມີຜູ້ໃຊ້ເຟດບຸນຊື້ວ່າ( ມິວ ສິດ , ໃນພາສາໃທ) ແຕ່ຊື້ແທ້ແມ່ນ ທ້າວ ໄມລ້ານ ອາຍຸ 30 ປີ ປະຊາຊົນ ຢູ່ບ້ານ ນາວັງໄຄ ໄດ້ໄປຄອມເມັ້ນໃນ ແຈ້ງການ ຂອງໂຮງໝໍສູນກາງ 103 ກອງທັບ ທີ່ມີເນື້ອໃນທີ່ວ່າ ຫ້າມເອົາເງີນໃຫ້ແພດໝໍໃນທຸກກໍລະນີ (ໃສ່ຊອງຜ່າຕັດ),ຫ້າມຈ່າຍເງີນຕ່າງໆເພີ່ມທີ່ບໍມີບີນຂອງໂຮງໝໍທີ່ຖືກຕ້ອງ(ໃບອອກໂຮງໝໍ,ໃບວິເຄາະ,ໃບລັງສີ,ໃບລ້າງບາດ) ແລ້ວຜູ້ກ່ຽວໄດ້ໄປຄອມເມັ້ນໄປໃນທາງທີ່ຜິດ ແລະ ແຕະຕ້ອງເຖີ່ງໂຮງໝໍເມືອງ ວຽງທອງ ໃນຄອມເມັ້ນທີ່ວ່າ:

(ໂຮງໝໍເມືອງວຽງທອງເປັນແບບຢ່າງ ຖ້າກຶນແຕ່ເງີນຢ່າງດຽວເວົ້າມາລະເບື່ອເລີຍ) ສະນັ້ນທາງ ປກສ ກຸ່ມເຂດນາຊວງ ແລະ ທາງໂຮງໝໍເມືອງ ຈີ່ງໄດ້ເອີ້ນຜູ້ກ່ຽວມາຂຽນບົດບັນທຶກ ແລະ ຮັບສະລະພາບ ຂໍໂທດຕໍ່ສັງຄົມໃນການຄອມເມັ້ນໃນເນື້ອໃນດັ່ງກ່າວພ້ອມທັງໃຫ້ລົບຄໍາຄອມເມັ້ນນັ້ນ.

ແຫຼ່ງຂ່າວ: ສະຖານີ-ວິທະຍຸ ເມືອງ ວຽງທອງ

ໄຂກອງປະຊຸມລັດຖະບານ ເປີດກວ້າງ ຄັ້ງທີ I ປີ 2022

ໂທລະໂຄ່ງ THOLAKHONG

July 21, 2022

ໃນຕອນເຊົ້າຂອງວັນທີ 21 ກໍລະກົດ 2022 ທີ່ນະຄອນຫຼວງວຽງຈັນ, ລັດຖະບານ ໄດ້ຈັດກອງປະຊຸມລັດຖະບານ ເປີດກວ້າງ ຄັ້ງທີ I ປີ 2022 ພາຍໃຕ້ການເປັນປະທານຂອງທ່ານ ພັນຄໍາ ວິພາວັນ, ນາຍົກລັດຖະ ມົນຕີ, ມີບັນດາທ່ານ ຮອງນາຍົກລັດຖະມົນຕີ, ສະມາຊິກລັດຖະບານ, ບັນດາທ່ານເຈົ້າແຂວງ ແລະ ເຈົ້າຄອງນະ ຄອນຫຼວງວຽງຈັນ, ຕາງໜ້າຈາກແນວລາວສ້າງຊາດ, ອົງການຈັດຕັ້ງພັກ, ອົງການຈັດຕັ້ງມະຫາຊົນ, ອົງການກວດສອບແຫ່ງລັດ ໄດ້ເຂົ້າຮ່ວມຢ່າງພ້ອມພຽງ. ກອງປະຊຸມຄັ້ງນີ້ ໄດ້ດໍາເນີນໄປໃນທ່າມກາງບັນຍາກາດທີ່ສະພາບການສາກົນ ແລະ ພາກພື້ນ ຍັງມີສືບຕໍ່ຜັນແປຢ່າງສະຫຼັບສັບຊ້ອນ ເຊິ່ງນອກຈາກຜົນກະທົບ ຂອງການແຜ່ລະບາດພະຍາດໂຄວິດ-19 ແລ້ວ ຍັງມີຜົນກະທົບຢ່າງໜັກໜ່ວງ ຈາກສະພາບການທີ່ເກີດຂຶ້ນ ຕໍ່ເສດຖະກິດໂລກ, ໂດຍສະເພາະ ຕໍ່ຕ່ອງໂສ້ການຄ້າ ລະຫວ່າງປະເທດ, ການສະໜອງນ້ຳມັນ, ສະບຽງອາຫານ, ສິນຄ້າທີ່ຈຳເປັນຈຳນວນໜຶ່ງ ບໍ່ພຽງພໍກັບຄວາມຕ້ອງການ ຈຶ່ງເປັນສາເຫດຕົ້ນຕໍເຮັດໃຫ້ລາຄານ້ຳມັນເຊື້ອໄຟ, ລາຄາສິນຄ້າສູງຂຶ້ນ ແລະ ເຮັດໃຫ້ອັດຕາເງິນເຟີ້ສູງຂຶ້ນໃນໂລກ, ລວມທັງ ປະເທດທີ່ຈະເລີນແລ້ວ, ຍິ່ງເປັນການຊ້ຳເຕີມຕໍ່ການຟື້ນຕົວ ແລະ ຂະຫຍາຍຕົວທາງດ້ານເສດຖະກິດ-ການຄ້າ ຂອງໂລກ ທີ່ແກ່ຍາວມາເປັນເວລາ 2 ປີກວ່າແລ້ວ ຍ້ອນຜົນກະທົບຈາກການແຜ່ລະບາດ ຂອງພະຍາດໂຄວິດ-19.

ສໍາລັບຢູ່ປະເທດເຮົາ ກໍ່ບໍ່ສາມາດຫຼີກລ່ຽງຜົນກະທົບ ຈາກສະພາບດັ່ງກ່າວເຊັ່ນດຽວກັນ, ໂດຍສະເພາະຜົນກະທົບຕໍ່ສະຖຽນລະພາບທາງດ້ານເສດຖະກິດມະຫາພາກ ທີ່ມີຄວາມບອບບາງຢູ່ແລ້ວ ເປັນຕົ້ນ ບັນຫາການຂາດດູນການຄ້າ ແລະ ເງິນຕາຕ່າງປະເທດ, ການເໜັງຕີງແຮງ ຂອງອັດຕາແລກປ່ຽນເງິນຕາ, ການເໜັງຕີງ ຂອງລາຄານ້ຳມັນເຊື້ອໄຟ, ລາຄາສິນຄ້າ, ເຄື່ອງອຸປະໂພກບໍລິໂພກທີ່ເພີ່ມຂຶ້ນສູງ. ກອງປະຊຸມລັດຖະບານ ເປີດກວ້າງ ຄັ້ງທີ I ປີ 2022 ຈະໄດ້ດຳເນີນເປັນເວລາ 2 ວັນ ຄື: ວັນທີ 21-22ກໍລະກົດ ເຊິ່ງຈະໄດ້ປຶກສາຫາລື, ຄົົ້ນຄວ້າ ແລະ ເປັນເອກະພາບກັນ ຕໍ່ 5 ຫົວຂໍ້ ທີ່ສໍາຄັນ ແລະ ເຄັ່ງຮ້ອນ ໃນການຈັດຕັ້ງຜັນຂະຫຍາຍແຜນພັດທະນາເສດຖະກິດ-ສັງຄົມ ຕິດພັນກັບບັນດາວຽກຈຸດສຸມຂອງສອງວາລະແຫ່ງຊາດ ທີ່ສະພາແຫ່ງຊາດໄດ້ຮັບຮອງ ກໍ່ຄື ການແກ້ໄຂບັນຫາລວມຂອງຊາດ ດັ່ງນີ້:

(1) ບົດສະຫຼຸບການເຄື່ອນໄຫວວຽກງານພົ້ນເດັ່ນ ໃນ 6 ເດືອນຕົ້ນປີ 2022 ແລະ ທິດທາງວຽກຈຸດສຸມ 6 ເດືອນທ້າຍປີ 2022 ຂອງລັດຖະບານ;

(2) ບົດລາຍງານ ແຜນປະຕິບັດຕົວຈິງ ກ່ຽວກັບການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ຕິດພັນກັບແຜນປະຕິບັດຕົວຈິງ 02 ວາລະແຫ່ງຊາດ ແລະ ແຜນງົບປະມານແຫ່ງລັດ 06 ເດືອນທ້າຍປີ 2022 ຕາມມະຕິກອງປະຊຸມສະໄໝສາມັນ ເທື່ອທີ 3 ສະພາແຫ່ງຊາດ ຊຸດທີ IX;

(3) ບົດລາຍງານ ສະພາບການປະຕິບັດນະໂຍບາຍອັດຕາດອກເບ້ຍທະນາຄານ ລວມທັງສະພາບການຄຸ້ມຄອງສະຖາບັນການເງິນຈຸລະພາກ, ຮ້ານແລກປ່ຽນເງິນຕາ, ໂຮງຊວດຈຳ ແລະ ຮ້ານຄຳ ໃນໄລຍະຜ່ານມາ ແລະ ສະ ເໜີທິດທາງຄາດໝາຍປັບປຸງໃນຕໍ່ໜ້າ;

(4) ບົດລາຍງານ ສະພາບການແກ້ໄຂການຂາດແຄນ, ບໍລິການນ້ຳມັນ ແລະ ການປັບປຸງໂຄງສ້າງລາຄານ້ຳມັນ ໃນປະຈຸບັນ ແລະ ທິດທາງຄາດໝາຍປັບປຸງໃນຕໍ່ໜ້າ;

(5) ບົດລາຍງານຜົນສຳເລັດ ໃນການປ້ອງກັນ, ຄວບຄຸມ ແລະ ແກ້ໄຂການແຜ່ລະບາດ ຂອງພະຍາດໂຄວິດ-19 ແລະ ທິດທາງແຜນການ, ມາດຕະການໃນຕໍ່ໜ້າ ພາຍຫຼັງການເປີດປະເທດ ໃນວັນທີ (09 ພິຶດສະພາ 2022) ແລະ ການແກ້ໄຂພະຍາດຕາມລະດູການ (ໄຂ້ຍຸງລາຍ).

ໃນໂອກາດກ່າວເປີດກອງປະຊຸມ, ທ່ານ ປະທານກອງປະຊຸມ ໄດ້ຮຽກຮ້ອງບັນດາທ່ານ ສະມາຊິກລັດຖະບານ, ບັນດາທ່ານເຈົ້າແຂວງ ແລະ ເຈົ້າຄອງນະຄອນຫຼວງວຽງຈັນ ຈົ່ງພ້ອມກັນເອົາໃຈໃສ່ຄົ້ນຄວ້າ ແລະ ປະກອບຄຳເຫັນ ຢ່າງເລິກເຊິ່ງ ດ້ວຍການສະເໜີທັດສະນະ ຢ່າງກົງໄປກົງມາ, ກະທັດຮັດ, ມີຈຸດສຸມ ແລະ ມີທາງອອກທີ່ຈະແຈ້ງ ເພື່ອເຮັດໃຫ້ກອງປະຊຸມຄັ້ງນີ້ ມີປະສິດທິຜົນສູງ ແລະ ບັນລຸຕາມຄາດໝາຍທີ່ໄດ້ກຳນົດໄວ້.

ແຫຼ່ງຂ່າວ: ປະຊາຊົນ

ຊົມເຊີຍ! ແຂວງໄຊສົມບູນ ລາຍຮັບເພີ່ມ ແລະ ລາຍຈ່າຍຫຼຸດລົງ

ໂທລະໂຄ່ງ THOLAKHONG

July 21, 2022

6 ເດືອນຕົ້ນປີ ແຂວງໄຊສົມບູນ ເກັບລາຍຮັບເຂົ້າງົບປະມານ ໄດ້ 250 ຕື້ກວ່າກີບ

6 ເດືອນຕົ້ນປີນີ້ ອົງການປົກຄອງແຂວງໄຊສົມບູນ ໄດ້ເອົາໃຈໃສ່ຈັດຕັ້ງປະຕິບັດແຜນພັດທະນາເສດຖະກິດ ແລະ ສັງຄົມ ປະຈຳປິີ 2022 ຕິິດພັນກັບດຳລັດ 414/ລບ ເຮັດໃຫ້ເສດຖະກິດມະຫາພາກຂອງແຂວງຂະຫຍາຍຕົວຢ່າງຕໍ່ເນື່ອງ.

ໃນໂອກາດເຂົ້າຮ່ວມກອງປະຊຸມລັດຖະບານເປີດກວ້າງ ຄັ້ງທີ I ປີ 2022 ທ່ານ ພອຍຄຳ ຮຸ່ງບຸນຍວງ ເຈົ້າແຂວງໄຊສົມບູນ ໄດ້ເປີດເຜີຍຕໍ່ສື່ມວນຊົນເມື່ອວັນທີ 21 ກໍລະກົດ ວ່າ: ໃນໄລຍະ 6 ເດືອນຕົ້ນປີນີ້ ການເກັບລາຍຮັບເຂົ້າງົບປະມານຂອງແຂວງໄຊສົມບູນ ບັນລຸ 250,07 ຕື້ກີບ ເທົ່າກັບ 44,82% ຂອງແຜນການປີ, ທຽບໃສ່ໄລຍະດຽວກັນຂອງປີຜ່ານມາເພີ່ມຂຶ້ນ 27,40%, ລາຍຈ່າຍ ປະຕິບັັັດໄດ້ 105,91 ຕື້ກີບ ເທົ່າກັບ 29,31%, ແຜນປີ, ທຽບໃສ່ໄລຍະດຽວກັນຂອງປີຜ່ານມາຫຼຸດລົງ 20,74%.

ໃນຂະນະທີ່ການລົງທຶນຂອງລັດ ໄດ້ຮັບອະນຸມັດທຶນທັງໝົດ 102.616,11 ຕື້ກີບ, ໃນນີ້, ສູນກາງອະນຸມັດ 46 ໂຄງການ ມູນຄ່າ 151.162,50 ຕື້ກີບ (ສະພາແຫ່ງຊາດຮັບຮອງແລ້ວ) ແຂວງອະນຸມັດ 137 ໂຄງການ ມູນຄ່າ 11.452,61 ຕື້ກີບ (1 ໂຄງການ ກຽມສະເໜີ ສະພາປະຊາຊົນແຂວງ ຮັບຮອງ); ໄດ້ຄົ້ນຄວ້າອະນຸມັດໂຄງການລົງທຶນເອກະຊົນພາຍໃນ ແລະ ຕ່າງປະເທດ ທັງໝົດ 6 ໂຄງການ, ມູນຄ່າລົງທຶນທັງຫມົດ 32,17 ລ້ານໂດລາ ແລະ 85 ຕື້ກີບ, ໃນນີ້ ເຊັນສັນຍາສໍາປະທານ (CA) ຈໍານວນ 3 ໂຄງການ, ໂຄງການສຶກສາສໍາຫຼວດທາງດ້ານເສດຖະກິດ-ເຕັກນິກ 2 ໂຄງການ ແລະ ໂຄງການສ້າງຕັ້ງໂຮງງານ ປຸງແຕ່ງແຮ່ເຫຼັກ 1 ໂຄງການ.

ໄດ້ສໍາເລັດການຕິດຕາມ, ຊຸກຍູ້ການເກັບກ່ຽວຜົນຜະລິດເຂົ້ານາແຊງທົ່ວແຂວງ ໃນເນື້ອທີ່ 138,9 ຮຕ, ສະມັດຖະພາບ 3,4 ໂຕນ/ເຮັກຕາ, ຜົນຜະລິດໄດ້ 459,7 ໂຕນ ເທົ່າກັບ 85,23% ຂອງແຜນປີ,ຊຸກຍູ້ສົ່ງເສີມການລ້ຽງສັດເປັນສິນຄ້າເພື່ອສົ່ງໄປຕ່າງແຂວງ ປະກອບມີ ຄວາຍ 1.869 ໂຕ, ງົວ 7.911 ໂຕ, ໝູ 1.439 ໂຕ, ແກະ 56 ໂຕ, ແບ້ 26.803 ໂຕ, ສັດປີກ 26.803 ໂຕ, ສະໜອງຊີ້ນປະເພດຕ່າງໆ ໃຫ້ແກ່ຕະຫຼາດພາຍໃນແຂວງໄດ້ 1.421.376,3 ກິໂລ ເທົ່າກັບ 61,92%, ສົ່ງອອກຕ່າງແຂວງ 89.649,57 ກິໂລ ເທົ່າກັບ 81,04%; ຊຸກຍູ້, ສົ່ງເສີມການລ້ຽງໄກ່ພັນໄຂ່ໃນທົ່ວແຂວງ ໄດ້ 4 ຟາມ, ນອກນັ້ນຍັງໄດ້ສຸມໃສ່ຊຸກຍູ້ການຜະລິດກະສິກໍາໃນໄລຍະລະດູຝົນ ເປັນຕົ້ນແມ່ນການປູກເຂົ້ານາປີຂອງປະຊາຊົນໃນທົ່ວແຂວງທັງໝົດ 8.101,91 ຮຕ, ຕົກກ້າສໍາເລັດແລ້ວ 85% (ມາຮອດປັດຈຸບັນບາງບ່ອນປັກດໍາສໍາເລັດແລ້ວປະມານ 10%), ເນື້ອທີ່ໄຮ່ໝູນວຽນ ຈໍານວນ 3.018 ຮຕ (ມາຮອດປັດຈຸບັນສັກ ເຂົ້າໄຮ່ສໍາເລັດແລ້ວ 60%).

ທ່ານກ່າວຕື່ມວ່າ: ຄຽງຄູ່ກັນນັ້ນໄດ້ຊຸກຍູ້, ສົ່ງເສີມຜະລິດຕະພັນອຸດສາຫະກໍາປຸງແຕ່ງ ໃນທົ່ວແຂວງ ສາມາດປະຕິບັດໄດ້ 23.205 ຕື້ກີບ ເທົ່າກັບ 84,69% ຂອງແຜນປີ; ມູນຄ່າຜະລິດຕະພັນຫັດຖະກໍາ ສາມາດປະຕິບັດໄດ້ 953 ກວ່າລ້ານກີບ ເທົ່າກັບ 8,81% ຂອງແຜນປີ, ໄດ້ເອົາໃຈໃສ່ຕິດຕາມ, ຊຸກຍູ້ບັນດາໂຄງການກໍ່ສ້າງເສັ້ນທາງພາຍໃນແຂວງ ຊຶ່ງຫຼາຍໂຄງການມີຄວາມຄືບໜ້າດີ ຕາມແຜນການທີ່ວາງໄວ້ເປັນຕົ້ນ: ໂຄງການກໍ່ສ້າງປ້ອງກັນຕາຝັ່ງເຈື່ອນ ແລະ ພັດທະນາແຄມນໍ້າຈັ່ງ ໄລຍະທີ 2 ສາມາດປະຕິບັດໄດ້ 85,18%, ໂຄງການສໍາຫຼວດ-ອອກແບບ ແລະ ກໍ່ສ້າງເສັ້ນທາງຕັດຕາຜ້າຈຸດສຸມຜາລະແວກ ເມືອງຮົ່ມ ປະຕິບັດໄດ້ 51,64%; ໂຄງການກໍ່ສ້າງທາງປູແຮ່ ເສັ້ນທາງຫຼວງແຫ່ງຊາດ 5A ໄລຍະທີ 2 ປະຕິບັດໄດ້ 93,33%; ໂຄງການປັບປຸງຍົກລະດັບປູຢາງ 2 ຊັ້ນ ເສັ້ນທາງຫຼວງແຫ່ງຊາດເລກ 5B ແຕ່ຂົວນ້ຳຍອນ-ບ້ານນາໄຊສະຫວ່າງ ເຂດແດນແຂວງວຽງຈັນ ປະຕິບັດໄດ້ 32,77%; ໂຄງການກໍ່ສ້າງທາງເບຕົງຖະໜົນໄຊຊະນະ ປະຕິບັດໄດ້ 95,81%; ໂຄງການກໍ່ສ້າງທາງເບຕົງຖະໜົນອະນຸວົງ ປະຕິບັດໄດ້ 98,78%.

ແຫຼ່ງຂ່າວ: ປະຊາຊົນ

ຄ້າຂາຍຢາເສບຕິດ ແລະ ຢາໄອສ໌ ທັງຕິດຄຸກ ແລະ ຖືກປັບໃຫມ

ໂທລະໂຄ່ງ THOLAKHONG

July 21, 2022

ນາງ ທິບພາພອນ ຫຼື ເປະ ອາຍຸ 33 ປີ ບ້ານດອນດູ່ ເມືອງຫາດຊາຍຟອງ ນະຄອນຫຼວງວຽງຈັນ ເຄື່ອນໄຫວຄ້າຂາຍຢາເສບຕິດ ແລະ ຢາໄອສ໌ ຖືກຄະນະສານອາຍາ ສານປະຊາຊົນນະຄອນ ຫຼວງວຽງຈັນ ຕັດສິນລົງໂທດຕັດອິດສະລະພາບ ຈໍາຄຸກ 5 ປີ ພ້ອມທັງປັບໃຫມ 10.000.000 ກີບ.

ຕາງຫນ້າອົງການໄອຍະການນະຄອນຫຼວງວຽງຈັນ ໄດ້ຜ່ານຄໍາຖະແຫຼງສໍານວນຄະດີໃຫ້ຮູ້ວ່າ: ນາງ ທິບ ພະພອນ ເຄີຍຖືກສານຕັດສິນລົງໂທດ ໃນຂໍ້ຫາການຄ້າຂາຍຢາເສບຕິດມາແລ້ວ 1 ຄັ້ງ, ເຊິ່ງສານໄດ້ຕັດສິນ ລົງໂທດ 8 ປີ, ມາຮອດໄລຍະເດືອນກັນຍາ 2019 ຜູ້ກ່ຽວປະຕິບັດໂທດຫມົດ ຈຶ່ງຖືກປ່ອຍຕົວອອກມາ; ຈາກນັ້ນ, ກໍໄດ້ເລີ່ມເຄື່ອນໄຫວຄ້າຂາຍຢາເສບຕິດຕື່ມອີກ, ເຊິ່ງຢາບ້າທີ່ນໍາມາຂາຍແຕ່ລະຄັ້ງແມ່ນຊື້ນໍາໄວ ລຸ້ນບໍ່ຮູ້ຊື່ທີ່ຂາຍຢູ່ຮ້ານເກມເຂດບ້ານບໍ່ໂອ, ຜ່ານມາເຄີຍຊື້ຫຼາຍຄັ້ງໆລະ 200 ເມັດ, ເມື່ອໄດ້ຢາບ້າເເລ້ວກໍ ນໍາໄປຂາຍຕໍ່ໃຫ້ກັບ ທ້າວ ຕ້ອມ ອາຍຸ 30 ປີ (ບໍ່ຮູ້ທີ່ຢູ່) ແລະ ໄດ້ຂາຍໃຫ້ກັບໄວລຸ້ນທີ່ມົ້ວສຸມຢາເສບຕິດຄັ້ງ ລະ10 ເມັດ; ສ່ວນສະຖານທີ່ຊື້-ຂາຍຢາບ້າແມ່ນຢູ່ຕໍ່ຫນ້າໂຮງງານຂ້າສັດເຂດບ້ານດອນດູ່.

ວັນທີ 13 ທັນວາ 2020, ເວລາ 20:00 ໂມງ ນາງ ທິບພະພອນ ໄດ້ໄປຊື້ຢາບ້ານໍາໄວຫນຸ່ມບໍ່ຮູ້ຊື້ ຢູ່ ຮ້ານເກມເຂດບ້ານບໍ່ໂອ ຈໍານວນ 30 ເມັດ ເເລະ ຢາໄອສ໌ 1 ຖົງນ້ອຍ ແລ້ວກໍນໍາຢາບ້າມາເສບເອງຈໍານວນ 4 ເມັດ, ສ່ວນຢາບ້າ ແລະ ຢາໄອສ໌ ທີ່ເຫຼືອຜູ້ກ່ຽວແມ່ນໄດ້ເອົາຊກເຊື່ອງໄວ້ໃນຫ້ອງນອນ ແລະ ມື້ຕໍ່ມາ, ຜູ້ກ່ຽວຈຶ່ງຖືກເຈົ້າຫນ້າທີ່ ຈັບຕົວ ແລະ ທໍາການກວດຄົ້ນຫ້ອງນອນພົບຂອງກາງຢາບ້າຈໍານວນ 26 ເມັດ ເເລະ ຢາໄອສ 1 ຖົງນ້ອຍ ໄປດໍາເນີນຄະດີ.

ຜ່ານການຄົ້ນຄວ້າບັນດາຂໍ້ມູນ, ຫຼັກຖານ ແລະ ເອກກະສານຕ່າງໆ ທີ່ມີຢູ່ໃນສໍານວນຄະດີຢ່າງ ລະອຽດ, ຖີ່ຖ້ວນ, ຮອບດ້ານ ແລະ ພາວະວິໄສແລ້ວ ເຫັນວ່າ ມີຫຼັກຖານຮັດກຸມທີ່ຫນັກແຫນ້ນ ແລະ ພຽງພໍ ຢັ້ງຢືນວ່າ: ການກະທໍາຂອງຈໍາເລີຍ ເປັນການກະທໍາຜິດທາງອາຍາໃນຂໍ້ຫາການຄ້າຂາຍຢາເສບຕິດ (ຢາບ້າ ແລະ ຢາໄອສ໌) ທີ່ແຕະຕ້ອງເຖິງສະຖຽນລະພາບທາງດ້ານເສດຖະກິດຂອງຊາດ ແລະ ເຮັດໃຫ້ສັງຄົມບໍ່ມີ ຄວາມສະຫງົບ ຕາມປະມວນກົດຫມາຍອາຍາ ມາດຕາ 315, ເຊິ່ງມັນສະແດງອອກຕາມບົດບັນທຶກຄໍາໃຫ້ ການຂອງຈໍາເລີຍ ທີ່ກ່າວມາຂ້າງເທິງນັ້ນ.

ນອກນັ້ນ, ຍັງເຫັນ ວ່າການກະທໍາຂອງ ນາງ ທິບພາພອນ ຫຼື ເປະ (ຈໍາເລີຍ) ເປັນການກະທໍາຜິດໂດຍວ່າ ຈໍາເລີຍ ຈົງໃຈເຄື່ອນ ໄຫວຄ້າຂາຍຢາເສບຕິດ (ຢາບ້າ ແລະ ຢາໄອສ໌) ທັງໆທີ່ຈໍາ ເລີຍກໍຮູ້ດີວ່າ ຢາເສບຕິດກົດຫມາຍຫ້າມຜະລິດ, ປຸງແຕ່ງ, ມີໄວ້ໃນຄອບຄອງ, ຄ້າຂາຍ, ຈໍາຫນ່າຍ, ນໍາເຂົ້າ, ສົ່ງອອກ ແລະ ຂົນສົ່ງໂດຍເດັດຂາດ. ພ້ອມນັ້ນ, ເຫັນວ່າ ຈໍາເລີຍ ມີສະຕິສໍາປະຊັນຍະສົມບຸນດີ, ບໍ່ເປັນບ້າ ເສຍຈິດ ແລະ ມີອາຍຸກະສຽນທາງອາຍາແລ້ວ ດ້ວຍເຫດຜົນ ແລະ ຫຼັກຖານດັ່ງກ່າວ ຄະນະສານອາຍາສານ ປະຊາຊົນນະຄອນຫຼວງວຽງຈັນ ຈຶ່ງເຫັນຄວນຕັດສິນລົງໂທດຕັດອິດສະລະພາບຈໍາຄຸກຈໍາເລີຍ 5 ປີ ແລະ ປັບໃຫມ 10.000.000 ກີບ.

ຂ່າວ ແລະ ຮູບພາບ: ຄວາມສະຫງົບ

ມ້າງຄະດີລັກຊັບຂອງພົນລະເມືອງ ໄດ້ 2 ເລື່ອງ ຈັບຕົວຜູ້ຮ່ວມຂະບວນ ການ ດຽວກັນໄດ້ 10 ຄົນ

ໂທລະໂຄ່ງ THOLAKHONG

July 21, 2022

ຕາມການລາຍງານຂອງ ຄວາມສະຫງົບ ໃຫ້ຮູ້ວ່າ: ເຈົ້າຫນ້າທີ່ພະແນກຕໍາຫຼວດ ຫນ່ວຍງານສືບສວນ-ສອບສວນຄະດີອາຍາ ກອງບັນຊາການ ປກສ ເມືອງ ທ່າແຂກ ແຂວງຄໍາມ່ວນ ມ້າງຄະດີລັກຊັບຂອງພົນລະເມືອງ ໄດ້ 2 ເລື່ອງ ຈັບຕົວຜູ້ຮ່ວມຂະບວນ ການ ດຽວກັນໄດ້ 10 ຄົນ ຍິງ 1 ຄົນ ແລະ ສາມາດເກັບກູ້ລົດຈັກ ຄືນມາໄດ້ 15 ຄັນ ເພື່ອມອບຄືນ ໃຫ້ເຈົ້າຂອງ ເດີມ.

ພັຕ ຄໍາພວງ ເພຍຄໍາ ຮອງຫົວຫນ້າພະແນກຕໍາຫຼວດ ປກສ ເມືອງທ່າແຂກ ໃຫ້ຮູ້ໃນວັນທີ 18 ກໍລະ ກົດ 2022 ວ່າ: ລົດຈັກຈໍານວນດັ່ງກ່າວ, ເຈົ້າຫນ້າຕໍາຫຼວດວິຊາສະເພາະ ປກສ ເມືອງ ແມ່ນເກັບກູ້ຄືນມາ ໄດ້ຈາກຄະດີລັກຊັບຂອງພົນລະ ເມືອງ 2 ເລື່ອງ ທີ່ມ້າງໄດ້ໃນໄລ ຍະ 3 ເດືອນຜ່ານມາ, ໃນນີ້, ຄະດີ ເລື່ອງທີ 1: ເຈົ້າຫນ້າທີ່ສາມາດກັກຜູ້ຖືກຫາໄດ້ 4 ຄົນ ຍິງ 1 ຄົນ ໃນວັນ ທີ 28 ພຶດສະພາ 2022, ພ້ອມ ທັງ ເກັບກູ້ລົດຈັກທີ່ພວກກ່ຽວລັກໄປນັ້ນຄືນມາໄດ້ຈໍານວນ 8 ຄັນ; ຜ່ານການສອບສວນ ຈຶ່ງຮູ້ວ່າຜູ້ຖືກ ຫາຊື່ ທ້າວ ວິໄລກອນ ຫຼື ເລ້ ອາຍຸ 28 ປີ ຢູ່ບ້ານໂພນພີມ ເມືອງແຂກ, ນາງ ຕ່າຍ ແສງທອງ ອາຍຸ 25 ປີ, ປະຊາຊົນຢູ່ບ້ານສຸກສະຫວັນ ເມືອງທ່າແຂກ, ທ້າວ ນ້ອຍ ຫຼື ຖັງ ອາຍຸ 44 ປີ, ຢູ່ບ້ານໂພນພິມ ເມືອງທ່າ ແຂກ ແລະ ທ້າວຕຸ່ນ ອາຍຸ 21 ປີ, ຢູ່ບ້ານໂພນພິມ ເມືອງທ່າແຂກ.

ຄະດີເລື່ອງທີ 2: ຈັບຕົວຜູ້ຖືກ ຫາໄດ້ 6 ຄົນ, ເກັບກູ້ລົດຈັກຄືນມາ ໄດ້ ຈໍານວນ 7 ຄັນ, ຜູ້ຖືກຫາຊື່ ທ້າວ ນ໋ອດ ຫຼື ແກ້ວ ອາຍຸ 24 ປີ ຢູ່ບ້ານຄອນສົງ ເມືອງປາກກະດິງ ແຂວງບໍລິຄໍາໄຊ, ທ້າວ ສອນເພັດ ຫຼື ເຕີ່ງ ອາຍຸ 22 ປີ, ຢູ່ບ້ານແກ້ງເຫຼັກ ເມືອງຍົມມະລາດ, ທ້າວ ເຈມ ຫຼື ເລັກ ອາຍຸ 19 ປີ, ຢູ່ບ້ານປາກຸງ ເມືອງ ຍົມມະລາດ, ທ້າວ ໄຫມ ອາຍຸ 19 ປີ, ຢູ່ບ້ານແກ້ງເຫຼັກ ເມືອງຍົມມະລາດ, ທ້າວ ສາຍຍັນ ອາຍຸ 18 ປີ ຢູ່ ບ້ານແກ້ງຫຼັກ ເມືອງຍົມ ມະລາດ ແລະ ທ້າວ ເບັ້ນ ອາຍຸ 16 ປີ ຢູ່ບ້ານແກ້ງເຫຼັກ ເມືອງຍົມມະລາດ ແຂວງ ຄໍາມວນ.

ເຈົ້າຫນ້າທີ່ຍັງໃຫ້ຮູ້ຕື່ມອີກວ່າ: ປັດຈຸບັນ, ຍັງສືບຕໍ່ຂະຫຍາຍຜົນຫາກຸ່ມແກ້ງທີ່ຮ່ວມຂະບວນການມາ ດໍາເນີນຄະດີຕາມລະບຽບກົດຫມາຍ, ສ່ວນຂອງກາງລົດຈັກຈໍານວນທີ່ເກັບກູ້ຄືນມາໄດ້ແມ່ນຈະໄດ້ມອບຄືນ ໃຫ້ເຈົ້າຂອງເດີມ ແລະ ສ່ວນຂອງກາງທີ່ຍັງເກັບກູ້ບໍ່ທັນໄດ້ເຈົ້າຫນ້າທີ່ຈະເລັ່ງສອບສວນ ແລະ ເກັບກູ້ຂອງ ກາງຄືນມາ ເພື່ອມອບຄືນໃຫ້ເຈົ້າຂອງເດີມ.

ຮູບຂ່າວ:

ເພື່ອສົ່ງເສີມການເດີນທາງ, ການບໍລິການດ້ານການທ່ອງທ່ຽວພາຍໃນ

ໂທລະໂຄ່ງ THOLAKHONG

July 21, 2022

ເປີດຄືນ ສາຍການບິນ ປາກເຊ - ໂຮ່ຈິມິນ - ປາກເຊ

ວັນທີ 19 ກໍລະກົດ 2022, ລັດວິສາຫະກິດການບິນລາວ ສາຂາແຂວງຈໍາປາສັກ ໄດ້ຈັດພິທີຕ້ອນຮັບຜູ້ໂດຍສານສາຍຕ່າງປະເທດ ເສັ້ນທາງ ປາກເຊ - ໂຮ່ຈິມິນ – ປາກເຊ. ເຂົ້າຮ່ວມພິທີ ມີ ທ່ານ ສູນທະລັກ ນາມຜົນ ຫົວໜ້າລັດວິສາຫະກິດການບິນລາວ ສາຂາແຂວງຈໍາປາສັກ, ທ່ານ ສົມພະໄທ ເກດມາລາ ຫົວໜ້າຂະແໜງທ່ອງທ່ຽວ ພະແນກຖະແຫຼ່ງຂ່າວ, ວັດທະນະທຳ ແລະ ທ່ອງທ່ຽວ ແຂວງ ພ້ອມດ້ວຍພະນັກງານວິຊາການ ພ້ອມດ້ວຍເຈົ້າໜ້າທີ່ລັດວິສາຫະກິດການບິນລາວ ແລະ ໜ່ວຍງານທີ່ກ່ຽວຂ້ອງ ເຂົ້າຮ່ວມ.

ລັດວິສາຫະກິດ ການບິນລາວ ໄດ້ເລີ່ມເປີດຄືນ ສາຍຕ່າງປະເທດ ທີ່ເດີນທາງເຂົ້າ – ອອກ ສະໜາມບິນສາກົນ ປາກເຊ ໂດຍສະເພາະ ເສັ້ນທາງ ປາກເຊ – ນະຄອນຫຼວງໂຮ່ຈິມິນ ສສ ຫວຽດນາມ – ປາກເຊ ເຊິ່ງຈະເປີດບໍລິການທຸກໆວັນຄານ ແລະ ວັນເສົາ, ລາຄາ ເລີ່ມຕົ້ນ ຢູ່ທີ່ 117 ໂດລາສະຫະລັດ/ຄົນ. ພ້ອມນີ້ລັດວິສາຫະກິດການບິນລາວ ຍັງໄດ້ເປີດບໍລິການເດີນທາງ ເຂົ້າ – ອອກ ພາຍໃນປະເທດ ຄື: ເສັ້ນທາງ ປາກເຊ – ວຽງຈັນ – ປາກເຊ ເຊິ່ງບິນທຸກວັນ ອອກເວລາ 9:50 ໂມງ, ດ້ວຍເຮືອບິນ ແອຣ໌ບັດ.

ທັງນີ້ ກໍເພື່ອເປັນການໂຄສະນາ ແລະ ສົ່ງເສີມການເດີນທາງ, ການບໍລິການດ້ານການທ່ອງທ່ຽວພາຍໃນແຂວງຈໍາປາສັກໃຫ້ມີບັນຍາກາດ ແລະ ສີສັນ ພາຍຫຼັງທີ່ຜ່ານສະພາບການແຜ່ລະບາດ ຂອງພະຍາດໂຄວິດ 19. ຈອງປີ້ໄດ້ແລ້ວມື້ນີ້ ທີ່ www.laoairlines.com ແລະ ແອັບ Lao Airlines, ຫ້ອງຂາຍປີ້ເຮືອບິນການບິນລາວ ແລະ ຕົວແທນຈໍາໜ່າຍປີ້ເຮືອບິນ.

ສອບຖາມຂໍ້ມູນເພີ່ມເຕີມໂທ 031 212 252, 031 251 921, ວອສແອັບ +856 20 59 642 555

ແຫຼ່ງຂ່າວ: ໜັງສືພິມຈຳປາໃໝ່ 𝐂𝐡𝐚𝐦𝐩𝐚𝐦𝐚𝐢 𝐍𝐞𝐰𝐬𝐩𝐚𝐩𝐞𝐫

ກອງທັບປົດປ່ອຍປະຊາຊົນຈີນ ເດີນທາງຮອດນະຄອນຫຼວງວຽງຈັນຮຽບຮ້ອຍແລ້ວ!

ໂທລະໂຄ່ງ THOLAKHONG

July 21, 2022

ພິທີຕ້ອນຮັບໜ່ວຍແພດ “ຂະບວນລົດໄຟສັນຕິພາບ” ກອງທັບປົດປ່ອຍປະຊາຊົນຈີນ ໄດ້ຈັດຂຶ້ນໃນວັນທີວັນທີ 19 ກໍລະກົດ 2022 ທີ່ສະຖານີລົດໄຟວຽງຈັນ ໂດຍໄດ້ຮັບການຕ້ອນຮັບຈາກ ທ່ານ ພົວ ບົວສິງ ອິນທະວົງ ຮອງຫົວໜ້າກົມໃຫຍ່ພະລາທິການ, ຮອງຜູ້ຮັບຜິດຊອບຂະບວນລົດໄຟສັນຕິພາບ 2022, ທ່ານ ພົວ ຄໍາແພງ ພູມມາແກ້ວ ຫົວໜ້າກົມເສນາຮັກ ພ້ອມດ້ວຍນາຍທະຫານເຂົ້າຮ່ວມ.

ທ່ານ ພົວບົວສິງ ອິນທະວົງ ໄດ້ກ່າວວ່າ: ຕາງໜ້າກະຊວງປ້ອງກັນປະເທດ ແລະ ກົມໃຫຍ່ພະລາທິການກອງ ທັບປະຊາຊົນລາວ ສະແດງຄວາມຍິນດີ, ຊົມເຊີຍ ແລະຕ້ອນ ຮັບ “ຂະບວນລົດໄຟສັນຕິພາບ 2022” ທີ່ໄດ້ເດີນທາງຕາມເສັ້ນທາງລົດໄຟລາວ-ຈີນ ມາຮອດນະຄອນຫລວງວຽງຈັນ ດ້ວຍຄວາມສະຫວັດດີພາບ ແລະ ປອດໄພ.

ຂະບວນລົດໄຟສັນຕິພາບ ມີຄວາມສໍາຄັນໃນການເພີ່ມທະວີຮັດແໜ້ນ ສາຍພົວພັນມິດຕະພາບ ລະຫວ່າງສອງຊາດ, ສອງກອງທັບ ໃຫ້ມີຄວາມໜັກແໜ້ນ ແລະ ເຂົ້າສູ່ລວງເລິກເທື່ອລະກ້າວ.ທ່ານ ພັນເອກພິເສດ ເສິນ ຊຸນມີງ ຮອງຫົວໜ້າເສນາຮັກ ກົມຮັບປະກັນພະລາທິ ການຂອງຄະນະກໍາມະການທະຫານສູນກາງ, ຫົວໜ້າຄະນະຂະບວນລົດໄຟສັນຕິພາບ 2022 ຂອງກອງທັບປົດປ່ອຍປະຊາຊົນຈີນ ກໍໄດ້ກ່າວວ່າ: ການເຂົ້າຮ່ວມຝຶກຊ້ອມຄັ້ງນີ້ແມ່ນມີຄວາມໝາຍສໍາຄັນ ມິດຕະພາບລະຫວ່າງສອງກອງທັບ ລາວ-ຈີນ. ໃນການເດີນ ທາງຄັ້ງນີ້ ສະມາຊິກຄະນະເສນາຮັກຂອງພວກຂ້າພະເຈົ້າ ມີຄວາມກຽມພ້ອມທຸກຢ່າງໃນການຊ້ອມຮົບ ແລະ ຂ້າພະເຈົ້າກໍໄດ້ຮັບຮູ້ວ່າ, ຄະນະກົມເສນາຮັກຝ່າຍລາວ ກໍໄດ້ກຽມ ພ້ອມທຸກຢ່າງໃຫ້ແກ່ການຊ້ອມຮົບຄັ້ງນີ້.

ຂ້າພະເຈົ້າຫວັງວ່າການຊ້ອມຮົບ ຂອງສອງກອງທັບ ລາວ-ຈີນ ພວກເຮົາຈະໄດ້ຮັບຜົນສໍາເລັດຢ່າງຈົບງາມ.

ສຳລັບ ພິທີທາງການຈະຈັດຂຶ້ນໃນວັນທີ 25 ກໍລະກົດ 2022, ທີ່ສະໂມສອນໃຫຍ່ພະລາທິການກອງທັບນະຄອນຫລວງວຽງຈັນ, ໃນຕອນບ່າຍມື້ດຽວກັນ ຈະມີການຫັດແອບຝຶກຊ້ອມຕົວຈິງລະຫວ່າງ ໜ່ວຍເສນາຮັກ ແລະ ໜ່ວຍພາລາທິການ“ຂະບວນລົດໄຟສັນຕິພາບ 2022” ແລະ ກອງທັບປະຊາຊົນລາວ ທີ່ສະໜາມຈໍາລອງເມືອງໂພນໂຮງ ແຂວງວຽງຈັນ.

ແຫຼ່ງຂ່າວ: ປະເທດລາວ Pathedlao

1...383940...261 Page 39 of 261