ເຈົ້າແຂວງໄຊຍະບູລີ ມອບເງິນໃຫ້ເມືອງຊຽງຮ່ອນນໍາໄປຟື້ນຟູພື້ນຖານໂຄງລ່າງ ທີ່ຖືກນໍ້າຖ້ວມ

ແຫລ່ງຂ່າວຈາກ ແຂວງໄຊຍະບູລີ ໃຫ້ຮູ້ວ່າ: ໃນໂອກາດທີ່ ລົງຕິດຕາມສະພາບຜົນກະທົບຈາກໄພນໍ້າຖ້ວມຢູ່ເມືອງຊຽງຮ່ອນ ໃນວັນທີ 14 ສິງຫາ 2022 ນີ້, ທ່ານ ພົງສະຫວັນ ສິດທະວົງ ເຈົ້າແຂວງໄຊຍະບູລີ ຍັງໄດ້ມອບເງິນຈໍານວນ 100 ລ້ານກີບ ໃຫ້ການນໍາຂອງເມືອງ ເພື່ອນໍາໄປຟື້ນຟູບູລະນະພື້ນຖານໂຄງລ່າງຕ່າງໆທີ່ໄດ້ຮັບຜົນກະທົບ ຈາກໄພພິບັດທາງທໍາມະຊາດ. ພ້ອມທັງເນັ້ນໃຫ້ອົງການປົກຄອງເມືອງຈົ່ງເອົາໃຈ ໃສ່ຟື້ນຟູສະພາບຈິດໃຈປະຊາຊົນຜູ້ທີ່ໄດ້ຮັບຜົນກະທົບ ແລະ ຟື້ນຟູອາຄານສະຖານທີ່ຕ່າງໆໃຫ້ຜູ້ປະສົບໄພ ໃຫ້ສາມາດກັບມາໃຊ້ຊີວິດຢ່າງເປັນປົກກະຕິ.

ໂອກາດນີ້, ທ່ານ ກົງທອງ ສິດທິໄຊ ເຈົ້າເມືອງຊຽງຮ່ອນ ໄດ້ລາຍງານໃຫ້ຮູ້ວ່າ: ອຸທົກກະໄພຄັ້ງນີ້ ໄດ້ສ້າງຄວາມເສຍຫາຍໃຫ້ປາຊາຊົນ ຈໍານວນ 244 ຄອບຄົວ, ເຮືອນເສຍຫາຍ 4 ຫລັງ, ເຮືອນຖືກນໍ້າພັດໄຫລສູນຫາຍ 1 ຫລັງ, ໂຮງຮຽນ 1 ຫລັງ, ເນື້ອທີ່ທໍາການຜະລິດເສຍຫາຍ 600 ກວ່າເຮັກຕາ, ເນື້ອທີ່ສວນຢາງພາລາ 2,5 ເຮັກຕາ,ມີງົວຕາຍ 21 ໂຕ, ໄກ່ ແລະ ເປັດ 790 ໂຕ, ລົດໄຖນາເສຍຫາຍ 2 ຄັນ, ລົດຈັກ 13 ຄັນ, ໜອງປາ 43 ໜອງ, ເຂົ້າເປືອກເສຍຫາຍ 789 ເປົາ, ເຂົ້າສານເສຍຫາຍ 231 ເປົາ, ຊົນລະປະທານຫລາຍແຫ່ງໄດ້ຮັບຜົນເສຍຫາຍ, ດິນເຈື່ອນທັບຖົມທາງ, ນໍ້າເຊາະເສັ້ນທາງ ລະຫວ່າເມືອງ ຊຽງຮ່ອນ-ເມືອງເງິນ ຖືກຕັດຂາດ, ຊັບສິນ, ເຄື່ອງໃຊ້ໃນຄົວເຮືອນຂອງປະຊາຊົນເສຍຫາຍເປັນຈຳນວນຫລວງຫລາຍ ເຊິ່ງຍັງບໍ່ສາມາດປະເມີນມູນຄ່າເສຍຫາຍພ້ອມກັນນີ້, ທ່ານເຈົ້າແຂວງ ພ້ອມດ້ວຍການນຳຂັ້ນເມືອງ ຍັງໄດ້ລົງຕິດຕາມສະພາບຜົນກະທົບຈາກນໍ້າຖ້ວມຢູ່ ບ້ານປົ່ງ, ບ້ານາອອນ ແລະ ບ້ານທາດ ອີກດ້ວຍ.

ແຫຼ່ງຂ່າວ: ປະເທດລາວ Pathedlao

ແຫຼງຂ່າວຈາກ ແຂວງສະຫວັນນະເຂດ ໃຫ້ຮູວ່າ: ເມື່ອບໍ່ດົນມານີ້, ຫ້ອງການອຸດສາຫະກຳ ແລະ ການຄ້າ ນະຄອນ ໄກສອນ ພົມວິຫານ ຈັດພິທີມອບສົ່ງສິນຄ້າເສື່ອມຄຸນນະພາບ, ໝົດອາຍຸການນໍາໃຊ້ ເພື່ອນໍາໄປທໍາລາຍຖິ້ມ ທີ່ສະໜາມຂີ້ເຫຍື້ອບ້ານຊອກ ຈໍານວນ 56 ລາຍການ, ມູນຄ່າລວມ 155 ລ້ານກວ່າກີບ. ທັງນີ້ ກໍເພື່ອເຮັດໃຫ້ຜູ້ຂາຍ ແລະ ຜູ້ຊື້ ເຫັນໄດ້ຄວາມສຳຄັນໃນການຄັດເລືອກ ເອົາສິນຄ້າທີ່ມີຄຸນນະພາບມາຈຳໜ່າຍ, ຊົມໃຊ້ ແລະ ບໍລິໂພກ ສິນຄ້າທີ່ໄດ້ຕາມມາດຕະຖານ, ທັງຮັບປະກັນທາງດ້ານສຸຂະພາບຂອງຕົນເອງ ແລະ ຄົນໃນຄອບຄົວ ໂດຍມີ ທ່ານ ປະສົງສິນ ຈະເລີນສຸກ ເຈົ້ານະຄອນ ໄກສອນ ພົມວິຫານ ແລະ ພາກສ່ວນກ່ຽວຂ້ອງ ເຂົ້າຮ່ວມ.

ໃນພິທີ, ທ່ານ ຄໍາສີເພັດ ໄຊຍະວົງ ຫົວໜ້າຫ້ອງການອຸດສາຫະກໍາ ແລະ ການຄ້ານະຄອນ ໄກສອນ ພົມວິຫານ ໄດ້ໃຫ້ຮູ້ວ່າ: ຜ່ານການຈັດຕັ້ງປະຕິບັດ ໃນໄລຍະຜ່ານມາ ຫ້ອງການອຸດສາຫະກຳ ແລະການຄ້າ ກໍຄື ເຈົ້າໜ້າທີ່ກວດກາການຄ້າ ໄດ້ເອົາໃຈໃສ່ລົງຕິດຕາມ ກວດກາສິນຄ້າທີ່ລະເມີດ ຕໍ່ກົດລະບຽບຄຸ້ມຄອງການຄ້າ ເປັນຕົ້ນ ສິນຄ້າເສື່ອມຄຸນ, ສິນຄ້າໝົດອາຍຸການນໍາໃຊ້, ສິນຄ້າຫ້າມຈຳໜ່າຍ, ສິນຄ້າທີ່ມີສານປົນເປື້ອນ ແລະ ສິນຄ້າບໍ່ໄດ້ມາດຕະຖານ ຕາມຫ້າງຮ້ານ, ຮ້ານສະດວກຊື້, ຕະຫລາດ, ສ້າງເກັບມ້ຽນ ແລະ ສະຖານທີ່ບໍລິການຕ່າງໆ ໃນເທສະບານນະຄອນ ໄກສອນ ພົມວິຫານ.ຜ່ານການລົງເຄື່ອນໄຫວຕົວຈິງ ສາມາດລົງກວດກາສິນຄ້າຮ້ານສະດວກຊື້ໄດ້ 23 ຮ້ານ, ຮ້ານຂາຍຍ່ອຍໄດ້ 75 ຮ້ານ, ຮ້ານຂາຍອາຫານສົດ ແລະ ອາຫານທະເລ ໄດ້ 7 ຮ້ານ, ສາງແຊເຢັນ 6 ສາງ, ຄຣິນິກເສີມຄວາມງາມ 6 ແຫ່ງ, ຮ້ານນວດສະປາ 9 ຮ້ານ ແລະ ສາມາດກວດຢຶດ-ອາຍັດສິນຄ້າໄດ້ ປະເພດສິນຄ້າເສື່ອມຄຸນນະພາບ(ເສຍຄຸນ) ຈໍານວນ 56 ລາຍການ, ມູນຄ່າລວມ 155 ລ້ານກວ່າກີບ ແລະ ໄດ້ນໍາມາທຳລາຍຖິ້ມໃນຄັ້ງນີ້.ຂ່າວ-ພາບ: ນະຄອນ ໄກສອນ ພົມວິຫານ.

ແຫຼ່ງຂ່າວ: ຂປລ

ຄາດວ່າລົດໄຟຂົນສົ່ງສິນຄ້າດ່ວນພິເສດລະຫວ່າງມະເລເຊຍ-ໄທ-ລາວ ຈະເປີດນຳໃຊ້ຢ່າງເປັນທາງການໃນເດືອນຕຸລາປີນີ້, ຕາມຂ່າວຈາກໜັງສືພິມລຽນເຫີຈາວປ້າວຂອງສິງກະໂປ: ລົດໄຟຂົນສົ່ງສິນຄ້າດ່ວນພິເສດອາຊຽນ ຫຼື Asean Express ທີ່ເຊື່ອມຕໍ່ລະຫວ່າງມະເລເຊຍ ໄທ ແລະ ລາວຄາດວ່າຈະເປີດນຳໃຊ້ຢ່າງເປັນທາງການໃນເດືອນຕຸລາປີນີ້.

ວັນທີ 11 ສິງຫານີ້, ບໍລິສັດທາງລົດໄຟມະເລເຊຍໄດ້ອອກຖະແຫຼງການໂດຍລະບຸວ່າ, ລົດໄຟຂົນສົ່ງສິນຄ້າດ່ວນພິເສດອາຊຽນແມ່ນເດີນທາງອອກຈາກມະເລເຊຍໄປສູ່ປະເທດລາວ, ຢູ່ກາງທາງຈະແວ່ປະເທດໄທ, ມີໄລຍະທາງຍາວທັງໝົດ 2.206 ກິໂລແມັດ, ຄາດວ່າຈະໃຊ້ເວລາເດີນທາງ 72 ຊົ່ວໂມງ.

ເນື້ອໃນຖະແຫຼງການດັ່ງກ່າວລະບຸຕື່ມວ່າ, ລົດໄຟຂົນສົ່ງສິນຄ້າດ່ວນພິເສດອາຊຽນແມ່ນຈຸດເລີ່ມຕົ້ນທີ່ບໍລິສັດທາງລົດໄຟມະເລເຊຍບຸກເບີກຕະຫຼາດສາກົນ, ແລະສາມາດຖືເປັນຄວາມພະຍາຍາມເພື່ອຊຸກຍູ້ແຜນການທາງລົດໄຟພາກພື້ນອາຊີທີ່ເລີ່ມຈາກນະຄອນຄຸນໝິງຂອງຈີນ ໄປຮອດສິງກະໂປ.

ແຫຼ່ງຂ່າວ: CRI

ທ່ານ ສະໜອງ ທອງຊະນະ ຮອງລັດຖະມົນຕີກະຊວງສາທາລະນະສຸກ ໄດ້ໃຫ້ສໍາພາດຕໍ່ສື່ມວນຊົນ ໃນວັນທີ 12 ສິງຫາ 2022 ກ່ຽວກັບການກະກຽມຄວາມພ້ອມ ເພື່ອຊ່ວຍເຫລືອສຸກເສີນດ້ານສຸຂະພາບຫລັງນ້ຳຖ້ວມ ຢູ່ບັນດາທ້ອງຖິ່ນຕ່າງໆໃນໄລຍະລະດູ ຝົນນີ້ວ່າ: ກະຊວງສາທາລະນະສຸກ ເປັນຂະແໜງການໜຶ່ງໃນຄະນະກຳມະການ ເພື່ອຮັບມື ແລະ ຕອບໂຕ້ໄພພິບັດລະດັບຊາດ ແລະ ໃນໄລຍະລະ ດູຝົນນີ້ ມັກເກີດມີສະພາບນໍ້າຖ້ວມຢູ່ໃນຫລາຍທ້ອງຖິ່ນ, ເຊິ່ງກະທົບຕໍ່ສຸຂະພາບ ກໍຄື ຊີວິດຂອງປະຊາຊົນ ໃນເຂດທີ່ຖືກກະທົບຈາກນໍ້າຖ້ວມ, ໂດຍສະເພາະເກີດມີພະຍາດຕ່າງໆທີ່ມາກັບນໍ້າ.

ສະນັ້ນ, ເພື່ອປ້ອງກັນບັນຫາດັ່ງກ່າວ, ຂະແໜງສາທາລະນະສຸກ ກໍໄດ້ມີການກະ ກຽມຄວາມພ້ອມດ້ານຕ່າງໆ ເພື່ອຮັບມື ແລະ ຕອບໂຕ້ສຸກເສີນດ້ານສາທາລະນະສຸກຫລັງ ນໍ້າຖ້ວມ ໂດຍສະເພາະໄດ້ແນະນໍາໃຫ້ໂຮງໝໍ 17 ແຂວງ ແລະ ໂຮງໝໍເມືອງ 135 ແຫ່ງທົ່ວປະເທດ ໄດ້ກະກຽມພ້ອມໃນການປິ່ນປົວສຸກເສີນ.

ນອກນີ້, ຍັງໄດ້ແນະນໍາໃຫ້ກະກຽມວຽກງານອະນາໄມ-ສົ່ງເສີມສຸຂະພາບ ໂດຍເນັ້ນໃຫ້ເອົາໃຈໃສ່ວຽກສຸຂະສຶກສາດ້ານຄວາມສະອາດ, ສິ່ງແວດລ້ອມ, ວິດຖ່າຍ,ໂດຍສະເພາະສຸຂະພາບ ແມ່ ແລະ ເດັກ, ໂພຊະນາການ ແລະ ພາຍຫລັງນ້ຳແຫ້ງອາດຈະມີການລະບາດຂອງພະຍາດຕ່າງໆ, ເຊິ່ງອາດມີການຕິດເຊື້ອ, ການແພ່ເຊື້ອ ໃນກຸ່ມຜູ້ປະສົບເຄາະຮ້າຍໃນເຂດຕ່າງໆ. ຕໍ່ບັນຫານີ້, ກໍໄດ້ມີການຄວາມພ້ອມໃນລະບົບສອບສວນບົ່ງມະຕິພະຍາດໂດຍໄວ ແລະ ວາງມາດຕະການຄວບຄຸມພະຍາດລະບາດ. ທ່ານ ສະໜອງ ທອງຊະນະ ໃຫ້ຮູ້ຕື່ມວ່າ: ປັດຈຸບັນ, ໄດ້ແນະນໍາໃຫ້ໂຮງງານຜະລິດຢາ ກະກຽມສຳຮອງຢາ ແລະ ອຸປະກອນການແພດ ໃຫ້ສາມາດຜະລິດຕອບສະໜອງ ແລະ ຈັດສັນງົບປະມານໃຫ້ພຽງພໍ.

ນອກນີ້ ຍັງໄດ້ມີການນຳສົ່ງຢາ ແລະ ອຸປະກອນ ກະກຽມໄວ້ຢູ່ສາງແຕ່ລະພາກ; ສໍາລັບສູນກາງໄດ້ກະກຽມລົດຮັບ-ສົ່ງຢາ ແລະ ອຸປະກອນການແພດ ຖ້າມີຄວາມຮຽກຮ້ອງຕ້ອງການ ໃຫ້ສາມາດສົ່ງທັນເວລາ; ໄດ້ມີການກະກຽມລົດແພດສຸກເສີນ ເພື່ອນຳສົ່ງຄົນເຈັບຕະຫລອດ ຢູ່ສູນກາງ ແມ່ນມີລົດນຳສົ່ງຄົນເຈັບໃນລະດັບທີ່ທັນສະໄໝສາມາດຜ່າຕັດຄົນເຈັບໄດ້ກັບທີ່ ເຊິ່ງກຽມພ້ອມຕະຫລອດ 24 ຊົ່ວໂມງ. ພ້ອມກັນນັ້ນ, ຢູ່ແຕ່ລະແຂວງກໍມີລົດນໍາສົ່ງຄົນເຈັບແຂວງລະ 1 ຄັນ ແລະ ກະຊວງສາທາລະນະສຸກ ຈະໄດ້ຕອບສະໜອງລົດນຳສົ່ງຄົນເຈັບໃຫ້ທຸກເມືອງອີກ ຈຳນວນ 135 ຄັນ ເພື່ອໃຫ້ສາມາດນຳໃຊ້ໃນກໍລະນີເກີດໄພພິບັດ ຫລືມີເຫດການສຸກເສີນຕ່າງໆ, ທັງໄດ້ກະກຽມການຕອບສະໜອງນ້ຳ ແລະ ວິດຖ່າຍ,ໂດຍມີລົດກັ່ນກອງນ້ຳສະອາດ ຈຳນວນ 6 ຄັນ ເພື່ອກະກຽມເອົາໄປປະຈໍາຢູ່ເຂດທີ່ເກີດໄພພິບັດໄດ້ທັນທີ. ນອກນີ້, ຍັງມີລົດສົ່ງນໍ້າສະອາດອີກ ຈຳນວນ 20 ຄັນ.

ໃນໄລຍະຜ່ານມາ, ຂະແໜງສາທາລະນະສຸກ ໄດ້ຮັບການສະໜັບສະໜູນດ້ານອຸປະ ກອນ ແລະ ຊ່ວຍເຫລືອຝຶກອົບຮົມວຽກງານຕອບໂຕ້ ການລະບາດຂອງພະຍາດຕ່າງໆ ຈາກບັນດາປະເທດເພື່ອນມິດ ແລະ ຄູ່ຮ່ວມພັດທະນາ ເປັນຕົ້ນ ແມ່ນວຽກງານສຸຂະອະນາໄມ, ໂພຊະນາການ, ແມ່ ແລະ ເດັກ ແລະ ອື່ນໆ.

ແຕ່ແນວໃດກໍຕາມ ວຽກງານການຕອບໂຕ້ໄພພິບັດນີ້ ມັນແມ່ນໜ້າທີ່ຂອງທຸກພາກສ່ວນໃນສັງຄົມ ທີ່ຕ້ອງໄດ້ຮ່ວມມືຮ່ວມໃຈກັນ ເພື່ອຕອບໂຕ້ໄພພິບັດທີ່ຈະເກີດຂຶ້ນ.ຂ່າວ-ພາບ: ສຸພາສະຫວັນ

ແຫຼ່ງຂ່າວ: ຂປລ

ປກສ ເມືອງສີສັດຕະນາກ ຈັບຜູ້ຖືກຫາຄ້າຂາຍຢາເສບຕິດ 17 ຄົນ, ຢຶດຢາບ້າໄດ້ 2 ພັນກວ່າເມັດ

ໃນທ້າຍເດືອນກໍລະກົດ ຫາ ຕົ້ນເດືອນສິງຫາ 2022, ພະແນກຕໍາຫຼວດ ກອງບັນຊາການ ປກສ ເມືອງສີສັດຕະນາກ ນະຄອນຫຼວງວຽງຈັນ ສົມທົບກັບ ພາກສ່ວນກ່ຽວຂ້ອງ ແກ້ໄຂບັນຫາຢາເສບຕິດ ໄດ້ 5 ເລື່ອງ, ຢຶດຢາບ້າໄດ້ 2 ພັນກວ່າເມັດ ແລະ ຈັບຜູ້ຖືກສົງໄສ 17 ຄົນ, ຍິງ 1 ຄົນ. ພັທ ສີທາດ ໜູການ ຮອງຫົວໜ້າພະແນກຕໍາຫຼວດ ປກສ ເມືອງສີສັດຕະນາກ ນວ ໃຫ້ຮູ້ວ່າ: ໄລຍະສຸມໃສ່ຈັດຕັ້ງວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ, ທ້າຍເດືອນກໍລະກົດ ຫາຕົ້ນເດືອນສິງຫາ 2022, ແກ້ໄຂຄະດີຢາເສບຕິດໄດ້ 5 ເລື່ອງຄື:

ໃນວັນທີ 21 ກໍລະກົດ 2022 ໄດ້ສົມທົບກັບ ປກສ ກຸ່ມວັດນາກ ແລະ ພາກສ່ວນກ່ຽວຂ້ອງ ມ້າງຈຸດມົ້ວສຸມຄ້າຂາຍຢາເສບຕິດ ຢູ່ຮ້ານອິນເຕີເນັດກາເຟ ຫຼື ຮ້ານເກມ ຕັ້ງຢູ່ບ້ານໂພນປ່າເປົ້າ ເມືອງສີສັດຕະນາກ ຈັບຕົວຜູ້ຖືກຫາໄດ້ 4 ຄົນຊື່ ທ້າວ ເກື່ອງ ອາຍຸ 37 ປີ ຫວ່າງງານ ຢູ່ບ້ານສີເມືອງ, ທ້າວ ອານຸສອນ ຢູ່ບ້ານທາດຂາວ, ທ້າວ ພຸດທະສອນ ຢູ່ບ້ານໂພນປ່າເປົ້າ ແລະ ທ້າວ ບຸນທະວີ ຢູ່ບ້ານທ່າພະລານໄຊ ເມືອງສີສັດຕະນາກ ພ້ອມຂອງກາງຢາບ້າ 903 ເມັດ, ຢາໄອ໌ 2 ຖົງນ້ອຍ ຫຼັງຈາກເປີດກວ້າງດຳເນີນຄະດີ ມາຮອດວັນທີ 27 ກໍລະກົດ 2022, ເຂົ້າແກ້ໄຂເປົ້າໝາຍຄ້າຂາຍຢາເສບຕິດ ຢູ່ເຂດບ້ານທົົ່ງພານທອງ ຈັບຕົວຜູ້ຖືກສົງໄສ ຊື່ທ້າວ ຄໍາພູ ອາຍຸ 19 ປີ ກຳມະກອນ ຢູ່ບ້ານທົ່ງພານທອງ ເມືອງສີສັດຕະນາກ ມີຢາເສບຕິດ 28 ເມັດ.ສອບສວນເບື້ອງຕົ້ນເຫັນວ່າມີການຊັດທອດ ຮອດວັນທີ 1 ສິງຫາ 2022, ຈຶ່ງສົມທົບກັບຫຼາຍພາກສ່ວນ ເຂົ້າແກ້ໄຂຢູ່ບ້ານຈອມເພັດໃຕ້ ຊື່ ທ້າວ ເກ ອາຍຸ 30 ປີ ກຳມະກອນ ຢູ່ບ້ານໄຊສະຖານ ມີຢາເສບຕິດ 101 ເມັດ,

ຜ່ານການສອບສວນໄດ້ຊັດທອດຫາພັກພວກຮ່ວມຂະບວກການອີກ 8 ຄົນ, ຍິງ 1 ຄົນ ຊື່ ທ້າວ ເສດຖາ ອາຍຸ 28 ປີ ຫວ່າງງານ ຢູ່ບ້ານຈອມເພັດໃຕ້ ເວລາຈັບກຸມມີຢາເສບຕິດ 30 ເມັດ, ທ້າວ ວິລະບຸດ ອາຍຸ 25 ປີ ຫວ່າງງານ ຢູ່ບ້ານຈອມເພັດໃຕ້ ກວດຄົ້ນຕົວມີຢາເສບຕິດ 172 ເມັດ, ທ້າວ ເພັດນິນ ອາຍຸ 22 ປີ ຫວ່າງງານ ຢູ່ບ້ານຈອມເພັດໃຕ້ ມີຢາເສບຕິດ 100 ເມັດ, ທ້າວ ສົມຈັນ ອາຍຸ 25 ປີ ຫວ່າງງານ ຢູ່ບ້ານຈອມເພັດໃຕ້ ມີຢາເສບຕິດ 5 ເມັດ, ທ້າວ ວັນເພັງ ອາຍຸ 34 ປີ ກຳມະກອນ ຢູ່ບ້ານຈອມເພັດໃຕ້ ມີຢາເສບຕິດ 4 ເມັດ, ທ້າວ ຟ້າມີໄຊ ອາຍຸ 48 ປີ ຫວ່າງງານ ບ້ານສວນມອນ ມີຢາເສບຕິດ 351 ເມັດ ທັງ 7 ຄົນ ຢູ່ເມືອງສີສັດຕະນາກ ແລະ ນາງ ໄຊນາ ອາຍຸ 29 ປີ ຫວ່າງງານ ບ້ານກາງທ່າ ເມືອງຫາດຊາຍຟອງ, ຕົກມາຮອດ ທີ 3 ສິງຫາ 2022, ໄດ້ສືບຕໍ່ຈັບຕົວ ທ້າວ ສຸກສັນ ອາຍຸ 48 ປີ ຫວ່າງງານ ບ້ານທ່າພະລານໄຊ ເມືອງສີສັດຕະນາກ ພ້ອມຂອງກາງ 250 ເມັດ ມາສອບສວນໄດ້ຂໍ້ມູນ ຕົກມາວັນທີ 4 ສິງຫາ 2022, ໄດ້ເຂົ້າຈັບທ້າວ ໄຊນະຄອນ ອາຍຸ 39 ປີ ຫວ່າງງານ ຢູ່ບ້ານທົ່ງພານທອງ ມີຢາເສບຕິດ 168 ເມັດ, ທ້າວ ພອນປະເສີດ ອາຍຸ 32 ປີ ຫວ່າງງານ ຢູ່ບ້ານໂພນປ່າເປົ້າ ມີຢາເສບຕິດ 10 ເມັດ, ທ້າວ ຄໍາຮູ້ ອາຍຸ 31 ປີ ຫວ່າງງານ ຢູ່ບ້ານໂພນປ່າເປົ້າ ມີຢາເສບຕິດ 157 ເມັດ ແລະ ທ້າວ ບຸນມີໄຊ ອາຍຸ 32 ປີ ກໍາມະກອນ ຢູ່ບ້ານໂພນປ່າເປົ້າ ມີຢາເສບຕິດ 7 ເມັດ ທັງ 4 ຄົນ ຢູ່ເມືອງສີສັດຕະນາກ. ຕໍ່ກັບການດຳເນີນຄະດີນີ້ ກອງບັນຊາການ ປກສ ເມືອງສີສັດຕະນາກ ກຳລັງດໍາເນີນຕາມກົດໝາຍ.

ຂ່າວ: ເຄືອວັນ, ພາບ:ມີໄຊ, ປ້ອງກັນຄວາມສະຫງົບນະຄອນຫຼວງວຽງຈັນ

ອັດຕະປື ມອບແຜນຈັດສັນທີ່ດິນ ຄຸ້ມຄອງຊັບພະຍາກອນທຳມະຊາດ ແລະ ສິ່ງແວດລ້ອມ ແບບຮອບດ້ານ ເພື່ອກໍານົດການແບ່ງຄວາມຮັບຜິດຊອບຂອງບັນດາພະແນກການທີ່ກ່ຽວຂ້ອງ ແລະ ອົງການປົກຄອງຂັ້ນເມືອງ ແລະ ບ້ານ ໃນການຜັນຂະຫຍາຍ ຈັດຕັ້ງປະຕິບັດແຜນຈັດສັນທີ່ດິນ, ຄຸ້ມຄອງ ຊັບພະຍາກອນທໍາມະຊາດ ແລະ ສິ່ງແວດລ້ອມແບບຮອບດ້ານ, ເພື່ອວາງແຜນນໍາໃຊ້ທີ່ດິນ ທີ່ຢູ່ໃນການ ຄຸ້ມຄອງການນຳໃຊ້ທີ່ດິນຂອງບັນດາຂະແໜງການ ໃຫ້ບັນລຸຕາມເປົ້າໝາຍ,

ດັ່ງນັ້ນຫວ່າງບໍ່​ດົນ​ມານີ້ ທີ່ພະແນກຊັບພະຍາກອນທາມະຊາດ ແລະ ສິ່ງແວດລ້ອມແຂວງອັດຕະປື ໄດ້ຈັດພິທີມອບແຜນຈັດສັນທີ່ດິນ ຄຸ້ມຄອງຊັບພະຍາກອນທໍາມະຊາດ ແລະ ສິ່ງແວດລ້ອມແບບຮອບດ້ານ, ໂດຍການເຂົ້າຮ່ວມຂອງທ່ານ ທະນູໄຊ ບັນຊາລິດ ຮອງເຈົ້າແຂວງອັດຕະປື, ມີທ່ານເຈົ້າເມືອງ ພ້ອມດ້ວຍຫົວໜ້າພະແນກການອ້ອມຂ້າງແຂວງ ແລະ ຂະແໜງການທີ່ກ່ຽວຂ້ອງເຂົ້າຮ່ວມ.ທ່ານ ຫັດສະໃນ ສີບຸນເຫຼືອງ ຫົວໜ້າພະແນກຊັບພະຍາກອນທຳມະຊາດ ແລະ ສິ່ງແວດລ້ອມແຂວງອັດຕະປື ໄດ້ຜ່ານມະຕິຂອງກອງປະຊຸມສະພາປະຊາຊົນແຂວງ ວ່າດ້ວຍການຮັບຮອງ ເອົາແຜນຈັດສັນທີ່ດິນ, ຄຸ້ມຄອງຊັບພະຍາກອນທຳມະຊາດ ແລະ ສິ່ງແວດລ້ອມ ຂອງແຂວງອັດຕະປື ຮອດປີ 2030ຊຶ່ງກອງປະຊຸມໄດ້ຕົກລົງ ແລະ ຮັບຮອງເອົາແຜນຈັດສັນທີ່ດິນ ໄດ້ກຳນົດເປົ້າໝາຍ ແລະ ​ໂຕເລກຂອງການຈັດສັນເນື້ອທີ່ດິນແຕ່ລະປະເພດ,

ໃນນັ້ນ ເນື້ອທີ່ດິນທີ່ຈະສະຫງວນ ແລະ ອະນຸລັກໄວ້ ເພື່ອເປັນເນື້ອທີ່ປ່າປົກຫຸ້ມມີ 88.000 ກວ່າເຮັກຕາ ຊຶ່ງລວມທັງທີ່ດິນບໍລິເວນນໍ້າ ທີ່ນອນໃນເຂດພື້ນທີ່ດັ່ງກ່າວ ຈຳນວນ 14.000 ກວ່າເຮັກຕາ, ເນື້ອທີ່ຈະນໍາໃຊ້ ແລະ ພັດທະນາມີ 148.000 ກວ່າເຮັກຕາ ຊຶ່ງລວມທີ່ດິນບໍລິເວນນໍ້າທີ່ນອນຢູ່ເຂດພື້ນທີ່ດັ່ງກ່າວ ຈຳນວນ 22.000 ກວ່າເຮັກຕາ, ເນື້ອທີ່ດິນທີ່ຈະສະຫງວນ ແລະ ອະນຸລັກໄວ້ ເພື່ອເປັນເນື້ອທີ່ປ່າປົກຫຸ້ມ ຊຶ່ງລວມທັງດິນບໍລິເວນນໍ້າ ທີ່ນອນໃນເຂດພື້ນທີ່ດັ່ງກ່າວ ທັງໝົດ 860.000 ກວ່າເຮັກຕາ, ເນື້ອທີ່ຈະນຳໃຊ້ ແລະ ພັດທະນາ ຊຶ່ງລວມທັງທີ່ດິນບໍລິເວນນໍ້າ ທີ່ນອນໃນເຂດພື້ນທີ່ດັ່ງກ່າວ,

ໃນນັ້ນ ເນື້ອທີ່ດິນກະສິກຳມີ 109.000 ກວ່າເຮັກຕາ ເນື້ອທີ່ດິນນໍ້າໃຊ້ເຂົ້າໃນຂະ ແໜງການຕ່າງໆ ທັງໝົດ 16.000 ກວ່າເຮັກຕາ.ໃນກອງປະຊຸມ ຍັງໄດ້ ມອບ-ຮັບ ປຶ້ມແບບແຜນຈັດສັນທີ່ດິນຄຸ້ມຄອງຊັບພະຍາກອນທຳມະຊາດ ແລະ ສິ່ງແວດລ້ອມ ຂອງແຂວງອັດຕະປື ຊຶ່ງໄດ້ມອບໃຫ້ແຕ່ລະພະແນກການອ້ອມຂ້າງແຂວງ, ບັນດາເມືອງ, ກຳລັງ ປກສ, ປກຊ ໂດຍການກ່າວມອບຂອງ ທ່ານ ທະນູໄຊ ບັນຊາລິດ.

ຂ່າວ-ພາບ: ທິດປະສົງ