ສືບຕໍ່ເສີມຂະຫຍາຍການຮ່ວມມື ເພື່ອສ້າງ ກອງທັບລາວ-ຈີນ ໃຫ້ເຂັ້ມແຂງຮອບດ້ານ ສາມາດປົກປັກຮັກສາອະທິປະໄຕ ແລະ ຄວາມໝັ້ນຄົງຂອງປະເທດຊາດ( ເນື່ອງໃນໂອກາດວັນສ້າງຕັ້ງກອງທັບປົດປ່ອຍປະຊາຊົນຈີນຄົບຮອບ 95 ປີ)

ຈາກເຫດການເກີດຂະບວນປະທ້ວງທີ່ນະຄອນນານຊ່າງປະເທດຈີນ ເມື່ອວັນທີ 01 ສິງຫາ 1927 ເປັນສັນຍາລັກຂອງການກຳເນີດກອງທັບປົດປ່ອຍປະຊາຊົນຈີນ, ໂດຍພາຍໃຕ້ການຊີ້ນຳ ນຳພາ ແລະ ການປັບປຸງກໍ່ສ້າງຈາກພັກກອມມູນິດຈີນ.

95 ປີແຫ່ງການກໍາເນີດແລະເຕີບໃຫຍ່ຂະຫຍາຍຕົວ ແລະ ສູ້ຮົບຢ່າງພິລະອາດຫານແລະມີໄຊດ້ວຍຄວາມເສຍສະຫຼະເລືອດເນື້ອເພື່ອປົດປ່ອຍປະເທດຊາດ, ກອງທັບປົດປ່ອຍປະຊາຊົນຈີນໄດ້ຢືດໝັ້ນພາຍໃຕ້ການນໍາພາຂອງພັກຢ່າງເດັດດ່ຽວ ນັບແຕ່ມື້ສ້າງຕັ້ງກອງທັບໄດ້ສ້າງຜົນງານ ຄຸນຄວາມດີອັນຍອດຍິ່ງໃນການເຕົ້າໂຮມມະຫາສາມັກຄີທົ່ວປວງຊົນ, ຍາດເອົາໄຊຊະນະແຫ່ງການປະຕິວັດ ແລະ ສະຖາປະນາ ສາທາລະນະລັດ ປະຊາຊົນຈີນ ໂດຍພາຍໃຕ້ການຊີ້ນຳ ນຳພາອັນປິຊາສາມາດ ຈາກພັກກອມມູນິດຈີນ; ນໍາເອົາຄວາມຢູ່ເຢັນເປັນສຸກໃຫ້ແກ່ພໍ່ແມ່ປະຊາຊົນຈີນ, ບຸກບຶນສູ້ຊົນຜ່ານຜ່າຄວາມຫຍຸ້ງຍາກນານາປະການເພື່ອພາລະກິດການສ້າງສາພັດທະນາປະເທດຈີນສັງຄົມນິຍົມ ແລະການຟຶ້ນຟູຄວາມຈະເລີນຮຸ່ງເຮືອງອັນຍິ່ງໃຫຍ່ຂອງຊົນຊາດຈີນ; ທັງສຸມໃສ່ກໍ່ສ້າງກໍາລັງປ້ອງກັນຊາດ-ປ້ອງກັນຄວາມສະຫງົບຂອງປະເທດຊາດ, ຮັກສາສັນຕິພາບຂອງໂລກ,ເຊີດຊູຄວາມກ້າວໜ້າຂອງມວນມະນຸດ ແລະເສີມຂະຫຍາຍ ຖານະບົດບາດອັນສຳຄັນໃນການປົກປັກຮັກສາສັນຕິພາບຂອງພາກພື້ນແລະທົ່ວໂລກ.

95 ປີແຫ່ງການຜ່ານຜ່າ ພະຍຸລົມແດງ, 95 ປີແຫ່ງການກ້າວໄປໜ້າດ້ວຍຄວາມພະຍາຍາມ. ກອງທັບປົດປ່ອຍປະຊາຊົນຈີນ ໄດ້ຢືດໝັ້ນແລະຜັນຂະຫຍາຍແນວຄວາມຄິດ ປະທານ ສີຈີ່ນພີງ ກ່ຽວກັບການສ້າງກອງທັບໃຫ້ມີຄວາມໜັກແຫນ້ນເຂັ້ມແຂງຢ່າງຮອບດ້ານ, ຢຶດໝັ້ນຕໍ່ອຸດົມການສັງຄົມນິຍົມຕະຫຼອດມາ,ໜັກແໜ້ນໃນຄວາມຮັບຜິດຊອບ ແລະ ພາລະໜ້າທີ່ຂອງຕົນ, ຕັ້ງໜ້າຕໍ່ການເຝິກແອບສິລະປະຍຸດ-ຍຸດທະວິທີກຽມພ້ອມສູ້ລົບ,ພ້ອມທັງມີການປະຕິຮູບກອງທັບຢ່າງຕໍ່ເນື່ອງ ສ້າງກອງທັບໃຫ້ເຂັ້ມແຂງຮອບດ້ານແລະມີສິສັນ ພິເສດ ຂອງສປຈີນ, ເພື່ອເປົ້າໝາຍສູ້ຊົນໃນການສ້າງຕັ້ງກອງທັບປົດປ່ອຍປະຊາຊົນຈີນ ເມື່ອຄົບຮອບ 100 ປີແມ່ນໃຫ້ກາຍເປັນກອງທັບເຂັ້ມແຂງລະດັບນຳໜ້າຢ່າງຮອບດ້ານໃນທົ່ວໂລກ.ສັນຕິພາບ ແມ່ນອຸດົມການຮ່ວມກັນຂອງປະຊາຊົນໃນທົ່ວໂລກ ແລະປະຊາຄົມໂລກກໍ່ຕ້ອງການກໍາລັງປົກປັກຮັກສາສັນຕິພາບ; ປະເທດຈີນຈະສືບຕໍ່ເດີນຕາມເສັ້ນທາງການພັດທະນາຮາກຖານເປັນກຳລັງປົກປັກຮັກສາສັນຕິພາບ.

ໃນທ່າມກາງການປະຕິຮູບ ແລະເປີດປະຕູສູ່ພາຍນອກ ແລະເດີນຕາມເສັ້ນທາງລັດທິຫຼາຍຝ່າຍ, ໃນຖານະເປັນຜູ້ເຂົ້າຮ່ວມການສ້າງສາສັນຕິພາບໃນທົ່ວໂລກ.

ໂດຍປະເຊີນໜ້າກັບຄວາມສ່ຽງ ແລະສີ່ງທ້າທ້າຍຫຼາຍປະການມີລັກສະນະສັບສົນ, ກອງທັບປົດປ່ອຍປະຊາຊົນຈີນ ປະຕິບັດໜ້າທີ່ຕາມຄວາມຮຽກຮ້ອງຕ້ອງການທາງດ້ານຍຸດທະສາດ ໃນການພັດທະນາ ແລະ ຮັບປະກັນຄວາມປອດໄພຂອງປະເທດຊາດ, ປົກປັກຮັກສາອະທິປະໄຕ, ຄວາມໝັ້ນຄົງ ແລະຜົນປະໂຫຍດຂອງຊາດ, ໃຫ້ການສະໜັບສະໜູນທາງດ້ານຍຸດທະສາດເພື່ອພາລະກິດການນຳພາຂອງພັກກອມມູນິດຈີນແລະເພື່ອລະບອບສັງຄົມນິຍົມ, ເພື່ອການທ້ອນໂຮມປະເທດຊາດໃຫ້ເປັນເອກະພາບແລະຜືນແຜ່ນດິນອັນຄົບຖ້ວນ.

ເພື່ອປົກປັກຮັກສາຜົນປະໂຫຍດຂອງຈີນຢູ່ຕ່າງປະເທດ, ເພື່ອຊຸກຍູ້ສັນຕິພາບ ແລະ ການພັດທະນາຂອງໂລກ. ກອງທັບປົດປ່ອຍປະຊາຊົນຈີນນປະຕິບັດໜ້າທີ່ຂອງຕົນໃນຖານະເປັນປະເທດໃຫຍ່,ເພືອປົກປັກຮັກສາສັນຕິພາບຂອງໂລກ, ເຊີ່ງປະກອບສ່ວນເຂົ້າໃນການ ການກູ້ໄພພິບັດທຳມະຊາດດ້ານມະນຸດສະທຳ, ແລະພະຍາຍາມສະໜອງ ດ້ານສາທາລະນຸປະໂພກ ໃຫ້ແກ່ປະຊາຄົມໂລກຕື່ມອີກ ຕາມແນວທາງທີ່ເປັນຄູ່ຮ່ວມຊະຕາກຳ.

ໃນ 32 ປີແຫ່ງການເຂົ້າຮ່ວມໃນການເຄື່ອນໄຫວຮັກສາສັນຕິພາບສາກົນຂອງອົງການສະຫະປະຊາຊາດ, ກອງທັບປົດປ່ອຍປະຊາຊົນຈີນໄດ້ຈັດສົ່ງກຳລັງຮັກສາສັນຕິພາບ ເກືອບ 50.000 ຄົນ ໃນຈຳນວນ 25 ຄັ້ງ, ທັງເປັນປະເທດທີ່ໄດ້ປະກອບອາວຸດທາງທະຫານຫຼາຍກວ່າໝູ່ໃນບັນດາປະເທດສະມາຊິກ ຂອງສະພາຄວາມໝັ້ນຄົງສະຫະປະຊາຊາດ. ກອງທັບຈີນໄດ້ຈັດສົ່ງກຳປັ່ນປ້ອງກັນທາງທະເລ 41 ລຳໄປປະຕິບັດການຮັກສາສັນຕິພາບຢູ່ເຂດອ່າວ ອາແດນ ແລະເຂດນ່ານນ້ຳຂອງໂຊມາເລຍ, ໄດ້ສົ່ງກຳປັ່ນ 7,000 ກວ່າລຳເພື່ອປະຕິບັດພາລະກິດການຮັກສາຄວາມປອດໄພ. ກອງທັບຈີນໄດ້ສົ່ງກຳລັງກູ້ໄພວິຊາສະເພາະໄປຮ່ວມການຊ່ວຍເຫຼືອກູ້ໄພແລະການຊ່ວຍເຫຼືອດ້ານມະນຸດສະທຳສາກົນ, ແລະໄດ້ສະໜອງອຸປະກອນການແພດແລະໃຫ້ການຊ່ວຍເຫຼືອດ້ານການແພດ, ໄດ້ສະແດງໃຫ້ເຫັນເຖິງຄວາມຮັບຜິດຊອບຢ່າງສູງຂອງທະຫານຈີນ.

ໂດຍສະເພາະ ນັບແຕ່ເລີ່ມມີການລະບາດພະຍາດໂຄວິດ-19 ໃນທົ່ວໂລກ, ກອງທັບຈີນບໍ່ພຽງແຕ່ໄດ້ປະກອບສ່ວນອັນພົ້ນເດັ່ນໃນການປ້ອງກັນແລະຄວບຄຸມການລະບາດໂຄວິດ-19 ຢູ່ພາຍໃນປະເທດຈີນເທົ່ານັ້ນ, ແຕ່ຫາກຍັງໄດ້ດຳເນີນການຮ່ວມມືແລະຊ່ວຍເຫຼືອຕ້ານການແຜ່ລະບາດພະຍາດນີ້ໃຫ້ບັນດາປະເທດຢ່າງຕັ້ງໜ້າ. ປະເທດຈີນ ແລະ ປະເທດລາວເປັນປະເທດບ້ານໃກ້ເຮືອນຄຽງ ມີແຜ່ນດິນຕິດຈອດກັນ,ສາຍພົວພັນມິດຕະພາບອັນເປັນມູນເຊື້ອທີ່ມີມາແຕ່ດົນນານນັ້ນບໍ່ສາມາດຕັດແຍກອອກຈາກກັນໄດ້,ເປັນຄູ່ຮ່ວມຊະຕາກຳ ຮ່ວມສຸກຮ່ວມທຸກນໍາກັນ ແລະ ຕ້ອງມີຄວາມແຂງແກ່ນໝັ້ນຄົງຮ່ວມກັນ.

ປີນີ້ແມ່ນປີສ້າງຕັ້ງສາຍພົວພັນທາງການທູດລະຫວ່າງຈີນ-ລາວຄົບຮອບ 61 ປີ, ໃນຖານະເປັນເພື່ອນບ້ານສັງຄົມນິຍົມທີ່ມີອຸດົມການແລະມີຄວາມສະແຫວງຫາຮ່ວມກັນ, ຈີນແລະລາວໄດ້ມີນ້ຳໃຈສາມັກຄີມິດຕະພາບທີ່ເປັນມູນເຊື້ອອັນຈິງໃຈ ຕະຫຼອດ 61 ປີທີ່ຜ່ານມາ. ພາຍໃຕ້ການຊີ້ນຳພາ ຂອງສອງພັກແລະສອງລັດ ລາວ-ຈີນ, ການພົວພັນຄູ່ຮ່ວມມືຍຸດທະສາດຮອບດ້ານຈີນ-ລາວໄດ້ສືບຕໍ່ຂະຫຍາຍຕົວ, ການຮ່ວມມືນັບມື້ນັບເລິກເຊິ່ງ, ໜັກແໜ້ນນັບມື້ນັບເພີ່ມຂຶ້ນ.ປີນີ້ແມ່ນປີທີ 6 ຂອງ ການຮ່ວມມື ແມ່ນ້ຳລ້ານຊ້າງ-ແມ່ນ້ຳຂອງ, ສົນທິສັນຍາກ່ຽວກັບຄູ່ຮ່ວມມືເສດຖະກິດຮອບດ້ານໃນພາກພື້ນ (RCEP) ໄດ້ບັງເກີດຜົນຢ່າງເປັນຮູບປະທຳ, ການຄ້າຂາຍໄຟຟ້າສອງສົ້ນລະຫວ່າງຈີນ-ລາວໄດ້ເລີ່ມດຳເນີນຢ່າງເປັນທາງການ. ເຂດສາທິດກາກບອນຕ່ຳໃນເຂດເສດຖະກິດກວມລວມໄຊເສດຖາໄດ້ຮັບການດຳເນີນງານແລະໂຄງການລົດຍົນພະລັງງານໃໝ່ໄດ້ຮັບການມອບ-ຮັບເປັນທາງການ ເພື່ອຮັບມືກັບການປ່ຽນແປງຂອງດິນຟ້າອາກາດ. ທາງລົດໄຟລາວ-ຈີນ ແລະ ທາງດ່ວນ ວຽງຈັນ-ວັງວຽງໄດ້ເປີດການນຳໃຊ້ ແລະບໍລິການຢ່າງມີປະສິດທິຜົນ, ການຄ້າສອງຝ່າຍລະຫວ່າງຈີນກັບລາວເພີ່ມຂຶ້ນຢ່າງບໍ່ຢຸດຢັ້ງ. ບັນດາຜົນງານທີ່ບັນລຸໄດ້ໃນການຮ່ວມມືນີ້ ບໍ່ພຽງແຕ່ສອດຄ່ອງກັບຜົນປະໂຫຍດພື້ນຖານ ແລະ ຄວາມມຸ່ງມາດປາດຖະໜາລວມຂອງປະຊາຊົນສອງປະເທດເທົ່ານັ້ນ, ແຕ່ຫາກຍັງປະກອບສ່ວນເຂົ້າໃນສັນຕິພາບ, ສະຖຽນລະພາບ ແລະ ການພັດທະນາຂອງພາກພື້ນ ແລະ ໃນໂລກ.

ຈຸດພິເສດຂອງລະບອບສັງຄົມນິຍົມແມ່ນມີຍຸດທະສາດໃນການເລືອກເດີນຕາມເສັ້ນທາງການພັດທະນາພາຍໃຕ້ສັນຕິພາບ, ນະໂຍບາຍການຕ່າງປະເທດແບບຢູ່ຮ່ວມກັນໂດຍສັນຕິວິທີ ແລະ ຄວາມເປັນເຈົ້າຂອງຕົນເອງ ເປັນມູນເຊື້ອທາງດ້ານວັດທະນາທໍາຂອງປະເທດຈີນ ເຊິ່ງເປັນພື້ນຖານໃຫ້ປະເທດຈີນຈະຢຶດໝັ້ນປະຕິບັດນະໂຍບາຍປ້ອງກັນຊາດທີ່ມີລັກສະນະປົກປ້ອງຕົນເອງຢ່າງສະເໝີຕົ້ນສະເໝີປາຍ,ແຕ່ປະເທດຈີນຈະບໍ່ຖອຍແມ່ນແຕ່ບາດກ້າວດຽວໃນທຸກບັນຫາທີ່ແຕະຕ້ອງເຖິງຜົນປະໂຫຍດລວມຂອງປະເທດຊາດຢ່າງເດັດຂາດ.

ບັນຫາໄຕ້ຫວັນ ເປັນບັນຫາຄົງຄ້າງໃນສະໄໝສົງຄາມພາຍໃນຂອງປະເທດຈີນ, ການແກ້ໄຂບັນຫາດັ່ງກ່າວນີ້ດ້ວຍວິທີໃດກໍຕາມ ມັນແມ່ນກິດຈະການພາຍໃນຂອງປະເທດຈີນ,ການບັນລຸເປົ້າໝາຍເຕົ້າໂຮມເອກະພາບຢ່າງຄົບຖ້ວນແມ່ນອຸດົມການຮ່ວມຂອງລູກຫຼານປະຊາຊົນຈີນທັງມວນ, ຖ້າຫາກວ່າມີກຸ່ມຄົນບໍ່ຫວັງດີ ຈະຕັດແຍກໄຕ້ຫວັນອອກຈາກປະເທດຈີນ, ແມ່ນກອງທັບປົດປ່ອຍປະຊາຊົນຈີນຈະເດັດດ່ຽວຕໍ່ຕ້ານຢ່າງກ້າຫານໂດຍບໍ່ມີເງື່ອນໄຂໃດໆ ແລະຕໍ່ສູ້ຈົນເຖິງໄຊຊະນະໃນທີ່ສຸດ. ໃນມື້ວັນທີ 2 ສິງຫານີ້, ທ່ານ ນາງແນນຊີ ເປໂລຊີ ປະທານສະພາຕໍ່າອາເມຣິກາ ບໍ່ເອົາຫົວຊາຕໍ່ການຄັດຄ້ານຢ່າງຮຸນແຮງ ແລະ ການຕໍ່ວ່າທັກທ້ວງຢ່າງເຄັ່ງຂຶມຂອງຝ່າຍຈີນ, ເຂົາຕັ້ງໃຈລັກໄປຢ້ຽມຢາມເຂດໄຕ້ຫວັນຂອງຈີນ ເຊິ່ງໄດ້ລະເມີດຫຼັກການປະເທດຈີນດຽວ ແລະ ຂໍ້ກຳນົດທີ່ກ່ຽວຂ້ອງໃນຖະແຫຼງການຮ່ວມ 3 ສະບັບລະຫວ່າງຈີນແລະອາເມຣິກາ, ໄດ້ກະທົບກະເທືອນເຖິງພື້ນຖານການເມືອງຂອງການພົວພັນຈີນ-ອາເມຣິກາຢ່າງໜັກໜ່ວງ, ໄດ້ລ່ວງລ້ຳອະທິປະໄຕ ແລະ ຜືນແຜ່ນດິນອັນຄົບຖ້ວນຂອງຈີນຢ່າງຈົງແຈ້ງ, ໄດ້ທຳລາຍສັນຕິພາບ ແລະ ສະຖຽນລະພາບຂອງເຂດສອງຝັ່ງຊ່ອງແຄບໄຕ້ຫວັນຢ່າງໜັກໜ່ວງ.ກອງທັບປົດປ່ອຍປະຊາຊົນຈີນຍາມໃດກໍຍົກສູງສະຕິກຽມພ້ອມສູ້ຮົບຢ່າງຮອບດ້ານ ເພື່ອດຳເນີນການເຄື່ອນໄຫວ ແລະຕອບໂຕ້ທາງດ້ານການທະຫານ,ເພື່ອປົກປັກຮັກສາອະທິປະໄຕແລະຜືນແຜ່ນດິນອັນຄົບຖ້ວນຂອງປະເທດຊາດຢ່າງເດັດດ່ຽວ, ຄັດຄ້ານເຈດຈໍານົງທີ່ມຸ່ງຫວັງສ້າງສະຖານະການ ເພື່ອສ້າງ “ສອງປະເທດຈີນ” ຫຼື “ໜຶ່ງຈີນ, ໜຶ່ງໄຕ້ຫວັນ”. ອາເມລິກາ ແລະ ກຸ່ມກອ້ນ ຫວັງຕັດແຍກໄຕ້ຫວັນອອກຈາກຈີນ ຕ້ອງຮັບຜິດຊອບຕໍ່ການກະທຳບໍ່ຖືກຕ້ອງຂອງຕົນ.

ນັບແຕ່ເຫດການດັ່ງກ່າວນີ້ໄດ້ເກີດຂື້ນມາ,ໄດ້ມີຫລາຍກວ່າ160 ປະເທດໃນໂລກໄດ້ສະແດງທັດສະນະຄັດຄ້ານການກະທຳທີ່ບໍ່ຖືກຕ້ອງຂອງ ນາງ ແນນຊີ ເປໂລຊີ. ວັນທີ 3 ສິງຫານີ້, ໂຄສົກກະຊວງການຕ່າງປະເທດແຫ່ງ ສປປ ລາວໄດ້ອອກຖະແຫຼງການ ໂດຍກ່າວວ່າ: ສປປ ລາວ ໄດ້ຕິດຕາມຢ່າງໃກ້ຊິດ ແລະ ສະແດງຄວາມເປັນຫ່ວງຕໍ່ສະພາບການຢູ່ຊ່ອງແຄບໄຕ້ຫວັນ, ລວມທັງການກະທຳທີ່ເປັນການຍຸແຍ່ ຊຶ່ງອາດຈະນໍາໄປສູ່ຄວາມເຄັັ່ງຕຶງໃນພາກພື້ນ. ສປປ ລາວ ຢືນຢັນຄືນນະໂຍບາຍອັນສະເໝີຕົ້ນສະເໝີປາຍຂອງຕົນໃນການສະໜັບສະໜູນ ນະໂຍບາຍຈີນດຽວ ແລະ ຖືວ່າໄຕ້ຫວັນ ເປັນສ່ວນໜຶ່ງທີ່ຕັດແຍກອອກບໍ່ໄດ້ຂອງ ສປ ຈີນ, ຄັດຄ້ານ ທຸກເຈດຈໍານົງທີ່ມຸ່ງຫວັງສ້າງສະຖານະການເພື່ອສ້າງ “ສອງປະເທດຈີນ” ຫຼື “ໜຶ່ງຈີນ, ໜຶ່ງໄຕ້ຫວັນ”. ສປປ ລາວ ຢ້ໍາຄືນ ການສະໜັບສະໜູນນະໂຍບາຍຂອງລັດຖະບານ ສປ ຈີນ ໃນການທ້ອນໂຮມ ປະເທດຊາດໂດຍສັນຕິວິທີ.ບໍ່ວ່າສະຖານນະພາບໃນທົ່ວໂລກຈະເກີດມີການຜັນແປຢ່າງສັບສົນແນວໃດກໍ່ຕາມ, ສອງພັກ,ສອງລັດ ແລະ ກອງທັບລາວ-ຈີນ ກໍຍັງຈະເປັນອ້າຍນ້ອງກັນ ຖານນ້ຳໃຈ 4ດີ.

ຝ່າຍຈີນໄດ້ຕີລາຄາສູງຕໍ່ທ່າທີຢ່າງກົງໄປກົງມາແລະເດັດຂາດຂອງຝ່າຍລາວໃນການສະໜັບສະໜູນ ນະໂຍບາຍຈີນດຽວ, ຕໍ່ຕ້ານການຕັດແຍກ ຊ່ອງແຄບ ໄຕ້ຫວັນ ອອກຈາກ ສປ ຈີນ. ປີນີ້ ເປັນວັນຄົບຮອບການສ້າງຕັ້ງກອງທັບປົດປ່ອຍປະຊາຊົນຈີນຄົບຮອບ 95 ປີ, ໄດ້ຈັດໃຫ້ມີການເຝິກຊ້ອມຮ່ວມ ຊ່ວຍເຫຼືອມະນຸດສະທຳທາງການແພດ ແລະກິດຈະກຳການບໍລິການທາງການແພດ ຂະບວນລົດໄຟສັນຕິພາບ-2022 ໄດ້ສຳເລັດຜົນອັນຈົບງາມທີ່ນະຄອນຫຼວງວຽງຈັນ,ເຊີ່ງເປັນຄັ້ງທຳອິດສຳລັບຂະບວນລົດໄຟທິມແພດເສນາຮັກຂອງກອງທັບປົດປ່ອຍປະຊາຊົນຈີນມາເຝິກຊ້ອມຮ່ວມທີ່ຕ່າງປະເທດ,ທັງເປັນການມາປະຕິບັດໜ້າທີ່ຂອງຄະນະແພດໝໍຂະບວນລົດໄຟສັນຕິພາບຊຸດທີ4,ເຊິ່ງຈະສ້າງກໍາລັງແຮງອັນໃໝ່ໃຫ່ແກ່ການພັດທະນາສາຍພົວພັນລະຫວ່າງສອງກອງທັບລາວ-ຈີນ.

ເນື່ອງໃນໂອກາດວັນສ້າງຕັ້ງກອງທັບປົດປ່ອຍປະຊາຊົນຈີນຄົບຮອບ 95ປີນີ້, ຂໍອວຍພອນໄຊອັນປະເສີດຕໍ່ພາລະກິດການພັດທະນາສັງຄົມນິຍົມຂອງສອງປະເທດລາວ-ຈີນຈົ່ງສືບຕໍ່ຂະຫຍາຍຕົວຢ່າງຕໍ່ເນື່ອງ,ກອງທັບທັງສອງປະເທດຈີນ-ລາວຈົ່ງສືບຕໍ່ເຕີບໃຫຍ່ຂະຫຍາຍຕົວແລະເຂັ້ມແຂງຢ່າງບໍ່ຢຸດຢັ້ງ, ປະຊາຊົນສອງປະເທດຈົ່ງມີສາຍພົວພັນອັນດີ ມີໄມຕີຈິດມິດຕະພາບອັນແໜ້ນແຟ້ນ ສືບຕໍ່ໄປ.

ໂດຍ: ພັ.ອ ພິເສດ ຫຼີປິ່ງ ທິປຶກສາທູດຝ່່າຍປ້ອງກັນຊາດ ສປຈີນ

ເມື່ອວັນທີ 27 ກໍລະກົດ 2022, ຫຼັງຈາກທີ່ໄດ້ສຳຫຼວດທີ່ດິນຮ່ວມກັບລັດຖະບານເປັນເວລາ 45 ວັນ, ເຂດພັດທະນາເສດຖະກິດໃໝ່ສີທັນດອນກໍໄດ້ເປີດຕົວໂຄງການໃໝ່ 2 ໂຄງການຢ່າງເປັນທາງການກໍຄື ໂຄງການໂຮງແຮມແຄນຄູ່ ເຊິ່ງເປັນສິ່ງກໍ່ສ້າງທີ່ສຳຄັນ ມີຄວາມສູງ 238.98ແມັດ ແລະ ໂຄງການສາງຄ່ຽນຖ່າຍສິນຄ້າ ເຊິ່ງໄດ້ລົງພາກສະໜາມ ແລະ ໄດ້ເປີດສາກການກໍ່ສ້າງຢ່າງເປັນທາງການໃນຍຸກຫຼັງໂລກລະບາດ.

ທ່ານ ຊີຫຼ່ຽງ (XU LIANG) ຫົວໜ້າວິຊາການພະແນກກໍ່ສ້າງເຂດເສດຖະກິດໃໝ່ສີທັນດອນໄດ້ກ່າວວ່າ ການສຳຫຼວດທາງອາກາດ ແລະ ການສຳຫຼວດທໍລະນີສາດພາກພື້ນຂອງບໍລິເວນໂຮງແຮມແຄນຄູ່ຄາດວ່າຈະສຳເລັດໃນທ້າຍເດືອນກັນຍານີ້, ແລະ ພິທີວາງສີລາເລິດເຊິ່ງຄາດວ່າຈະໄດ້ຈັດຂຶ້ນຫຼັງລະດູຝົນຜ່ານໄປ.

ໂຮງແຮມແຄນຄູ່ເປັນຕຶກອາຄານທີ່ມີຄວາມວິຈິດງົດງາມ ແລະ ສະຫງ່າງາມທີ່ສຸດແຫ່ງໜຶ່ງຂອງພາກໃຕ້ທີ່ກຳລັງຈະສ້າງຂຶ້ນ, ເຊິ່ງໂຮງແຮມໄດ້ຖືກອອກແບບຄ້າຍຄືກັບແຄນ(ເຄື່ອງດົນຕີພື້ນເມືອງລາວຊະນິດຫນຶ່ງ)ເຊິ່ງເປັນມໍລະດົກໂລກທາງວັດທະນະທຳທີ່ຈັບຕ້ອງບໍ່ໄດ້ຂອງລາວ ແລະ ຍັງເປັນສັນຍາລັກອັນໂດດເດັ່ນຂອງລາວ.

ຄວາມສູງທັງໝົດຂອງໂຮງແຮມແມ່ນ 238,98ແມັດ ເຊິ່ງໃນຕໍ່ໄປຈະກາຍເປັນຕຶກອາຄານທີ່ສູງທີ່ສຸດໃນລາວ.

ຫຼັງຈາກສ້າງໂຮງແຮມສຳເລັດແລ້ວຈະໃຫ້ບໍລິການນັກທ່ອງທ່ຽວຈາກປະເທດເພື່ອນບ້ານໃນຂອບເຂດອາຊີຕາເວັນອອກສ່ຽງໃຕ້ ແລະ ທົ່ວມຸມໂລກກໍຈະເດີນທາງເຂົ້າມາໃນພາກໃຕ້ຂອງລາວ. ບໍ່ພຽງແຕ່ການບໍລິການໂຮງແຮມເທົ່ານັ້ນ ຍັງມີການບໍລິການເສີມບໍ່ວ່າຈະເປັນ ອາຫານ,ເຄື່ອງດື່ມ, ການທ່ອງທ່ຽວ, ການຈັບຈ່າຍຊື້ຂອງ ແລະ ສິ່ງບັນເທິງຕ່າງໆເຊິ່ງຈະລວມຢູ່ໃນໂຄງການໂຮງແຮມແຄນຄູ່.

ມີຊັ້ນຊົມວິວຢູ່ຊັ້ນເທິງສຸດ, ຈຸດນັ້ນທ່ານສາມາເແນມເຫັນແມ່ນ້ຳຂອງທີ່ເປັນແມ່ນ້ຳສາຍສຳຄັນທີ່ສຸດຂອງອາຊີຕາເວັນອອກສ່ຽງໃຕ້ ໄດ້ໃນໄລຍະ 3ກິໂລແມັດ ແລະ ຍັງສາມາດແນມເຫັນຂອບຊາຍແດນລະຫວ່າງລາວ – ກຳປູເຈຍ ທີ່ຫ່າງອອກໄປ 10 ກມ ແລະ ຍັງຕິດກັບນ້ຳຕົກຕາດທີ່ໃຫຍ່ທີ່ສຸດໃນອາຊີຕາເວັນອອກສ່ຽງໃຕ້ກໍຄື ນ້ຳຕົກຕາດຄອນພະເພັງທີ່ຖືຂະໜານນາມວ່າ:

“ ໄຂ່ມຸກແຫ່ງແມ່ນ້ຳຂອງ ” ທີ່ຕົກແຕ່ງຢ່າງສວຍງາມດ້ວຍແມ່ນ້ຳ ແລະ ພູເຂົາຍິ່ງໃຫຍ່ຕະການຕາ, ຕື່ນຕາຕື່ນໃຈໄປກັບຄວາມສວຍສົດງົດງາມຂອງທຳມະຊາດ ຊຶມຊັບກັບຄວາມສຸກໃນຊີວິດ.ໃນຕອນບ່າຍຂອງມື້ດຽວກັນນັ້ນ, ບໍລິສັດ ຮ່ວມພັດທະນາ ໂຄງການເຂດພັດທະນາເສດຖະກິດໃໝ່ສີທັນດອນ ແລະ ບໍລິສັດ ຈຳປາອາຊີ ການຄ້າ ຈຳກັດ ກໍໄດ້ຮ່ວມກັນຈັດພິທີເປີດໂຄງການສາງຄຽນຖ່າຍສິນຄ້າໜອງນົກຂຽນຢ່າງເປັນທາງການ. ໃນໄລຍະທຳອິດຂອງໂຄງການກວມເອົາເນື້ອທີ່ 120,000ຕາແມັດ ແລະ ເນື້ອທີ່ກໍ່ສ້າງປະມານ 22,000ຕາແມັດ ເຊິ່ງລວມມີຫ້ອງການພາສີ, ບໍລິເວນຫໍພັກຂອງບໍລິສັດ, ຕູ້ແຊ່ເຢັນ ແລະ ພື້ນທີ່ເກັບເຄື່ອງເຢັນ, ສາງເກັບຖ່າຍສິນຄ້າ, ສາງສິນຄ້າລວມ ແລະ ແຍກ, ຕາຕະລາງລາຍລະອຽດຈະສຳເລັດແລ້ວພາຍໃນສອງອາທິດ.

ໂຄງການຄຽນຖ່າຍສິນຄ້ານີ້ຢູ່ຫ່າງຈາກຊາຍແດນລາວ-ກຳປູເຈຍ 3ກມ ຫຼັງຈາກກໍ່ສ້າງເສັດສິ້ນແລ້ວນັ້ນຈະສົ່ງເສີມການແລກປ່ຽນທາງຄ້າການຄ້າລະຫວ່າງລາວ-ກຳປູເຈຍ-ໄທ ແລະ ຍົກລະດັບການບໍລິການດ້ານໂລຈິກຕິກ. ນອກຈາກນີ້ຍັງຈະກາຍເປັນຈຸດສຳຄັນທາງດ້ານເສດຖະກິດຂອງຈີນ – ລາວ – ກຳປູເຈຍ ໃນອະນາຄົດອີກດ້ວຍ.

ນັບແຕ່ລາວໄດ້ເປີດປະເທດເປັນທາງການ ໂຄງການເຂດພັດທະນາເສດຖະກິດໃໝ່ສີທັນດອນ ກໍໄດ້ເສີມຂະຫຍາຍການພົວພັນກັບລັດຖະບານ ແລະ ການລົງທຶນ ໃນປີ 2022 ທາງບໍລິສັດມີແຜນຈະເປີດພື້ນທີ່ສຳລັບການລົງທຶນໃຫມ່ 66 ເຮັກຕາ ໃນໄລຍະທໍາອິດ, ໂຮງແຮມແຄນຄູ່, ສາງຄຽນຖ່າຍສິນຄ້າໜອງນົກຂຽນ, ການລົງທຶນອື່ນໆຂອງເຈົ້າຂອງໂຄງການເອງ. ໃນຂະນະດຽວກັນກໍໄດ້ສຳເລັດການສົ່ງເສີມການລົງທຶນສະໜາມກ໊ອຟ 36ຫຼຸມ ແລະ ໂຄງສ້າງລ້ຽງປາ 20,000ໂຕນ ກັບພັນທະມິດໃນປະເທດ.

ນອກຈາກນີ້ການເປີດຕົວຂອງ 2 ໂຄງການຍັງສະແດງໃຫ້ເຫັນເຖິງການພັດທະນາ ແລະ ການກໍ່ສ້າງທີ່ເປັນຈຸດໃໝ່ທີ່ຍອດນິຍົມທີ່ສຸດ.

ແຫຼ່ງຂ່າວ: Four Thousand Islands 四千美岛联合开发有限公司

ກອງປະຊຸມສະຫຼຸບຕີລາຄາຄືນ ຜົນການຈັດຕັ້ງປະຕິບັດແຜນງົບປະມານແຫ່ງລັດ ຂອງແຂວງໄຊຍະບູລີ ໃນ 6 ເດືອນ ຕົ້ນປີ ແລະ ທິດທາງແຜນງົບປະມານ 6 ເດືອນ ທ້າຍປີ ພະແນກການເງິນແຂວງໄຊຍະບູລີ ໄດ້ຈັດຂຶ້ນໃນວັນທີ 5 ສິງຫາ 2022 ນີ້ ທີ່ຫ້ອງປະຊຸມພະແນກການເງິນແຂວງ.

ໂດຍການເປັນປະທານຂອງທ່ານ ວັນດາວ ແວວທະນັດສີ ຫົວໜ້າພະແນກການເງິນແຂວງ, ມີຄະນະພະແນກ, ຫົວໜ້າ, ຮອງຫົວໜ້າຂະແໜງສາຍຕັ້ງ, ມີຫົວໜ້າຫ້ອງການການເງິນເມືອງ 11 ເມືອງ ພ້ອມດ້ວຍຫົວໜ້າສ່ວຍສາອາກອນ ປະຈໍາເມືອງ ແລະ ພະນັກງານວິຊາການພະແນກການເງິນເຂົ້າຮ່ວມ.

ພາຍຫຼັງ ທ່ານ ວັນດາວ ແວວທະນັດສີ ກ່າວເປີດກອງປະຊຸມຢ່າງເປັນທາງການ ທ່ານ ນາງ ພອນທິບ ລິນທະວົງ ຮອງຫົວໜ້າພະແນກການເງິນແຂວງ ໄດ້ຂຶ້ນຜ່ານບົດສະຫຼຸບຕີລາຄາຄືນການຈັດຕັ້ງປະຕິບັດແຜນງົບປະມານແຫ່ງລັດ 6 ເດືອນ ຕົ້ນປີ 2022 ແລະ ທິດທາງແຜນການງົບປະມານ 6 ເດືອນ ທ້າຍປີ 2022 ໂດຍໄດ້ຍົກໃຫ້ເຫັນວຽກງານທີ່ພົ້ນເດັ່ນ ແລະ ບັນດາດ້ານອ່ອນຂໍ້ຄົງຄ້າງ ທີ່ຈະຕ້ອງໄດ້ມີມາດຕະການປັບປຸງແກ້ໄຂ, ເຊິ່ງໂດຍລວມແລ້ວໃນປີ 2022 ແຂວງໄຊຍະບູລີ ໄດ້ຮັບມອບໝາຍຕົວເລກແຜນເກັບລາຍຮັບງົບປະມານຈາກກະຊວງການເງິນ ລວມທັງພູດສູນກາງປະຕິບັດຢູ່ແຂວງທັງໝົດ 1.125,37 ຕື້ ກີບ, ທຽບໃສ່ປີຜ່ານມາ ເທົ່າກັບ 99,17%, ຫຼຸດລົງເປັນເງິນ 9,39 ຕື້ກີບ.

ຜ່ານການຈັດຕັ້ງປະຕິບັດ 6 ເດືອນ ຕົ້ນປີ ສາມາດເກັບລາຍຮັບເຂົ້າງົບປະມານໄດ້ທັງໝົດ 531,49 ຕື້ ກີບ ເທົ່າກັບ 94,45% ຂອງແຜນ 6 ເດືອນ ຕົ້ນປີ ເທົ່າກັບ 47,23% ຂອງແຜນການປີ, ທຽບໃສ່ໄລຍະດຽວຂອງປີ ຜ່ານມາເທົ່າກັບ 104,03%.

ລາຍຮັບພູດສູນກາງ ຕົວເລກແຜນການປີ 890,86 ຕື້ກີບ, ທຽບໃສ່ແຜນການປີຜ່ານມາ ເທົ່າກັບ 105,95%, ເພີ່ມຂື້ນ 5,95% ເປັນເງິນ 50,00 ຕື້ກີບ, ປະຕິບັດໄດ້ 437,24 ຕື້ກີບ, ເທົ່າກັບ 98,15% ຂອງແຜນ 6 ເດືອນຕົ້ນປີ, ເທົ່າກັບ 49,08% ຂອງແຜນການປີ, ທຽບໃສ່ໄລຍະດຽວກັນຂອງປີຜ່ານມາ ເທົ່າກັບ 107.66%. ໃນນີ້ ພາສີ: ແຜນການປີ 890,00 ຕື້ກີບ, ປະຕິບັດໄດ້ 436,86 ຕື້ກີບ, ເທົ່າກັບ 49,09 % ຂອງແຜນການປີ, ສ່ວຍສາອາກອນ (ປັບປຸງລັດວິສາຫະກິດ) ແຜນການປີ 860,00 ລ້ານກີບ , ປະຕິບັດໄດ້ 378,29 ລ້ານ, ເທົ່າກັບ 43,99 % ຂອງແຜນການປີ.

ລາຍຮັບພາຍໃນແຂວງ ຕົວເລກແຜນ 234,51 ຕື້ກີບ, ທຽບໃສ່ແຜນການປີຜ່ານມາເທົ່າກັບ 79,79% ຫຼຸດລົງ 20,21%, ເປັນເງິນ 59,40 ຕື້ກີບ, ປະຕິບັດໄດ້ 94,25 ຕື້ກີບ, ເທົ່າກັບ 80,38%, ຂອງແຜນ 6 ເດືອນຕົ້ນປີ, ເທົ່າກັບ 40,19 % ຂອງແຜນການປີ, ທຽບໃສ່ໄລຍະດຽວກັນຂອງປີຜ່ານມາ ເທົ່າກັບ 89.93%; ໃນນີ້ ສ່ວຍສາອາກອນ : ແຜນການປີ 228,80 ຕື້ກີບ, ທຽບໃສ່ແຜນການປີຜ່ານມາ ເທົ່າກັບ 102,52% ເພີ່ມຂື້ນ 2,52%, ເປັນເງິນ 5,62 ຕື້ກີບ, ປະຕິບັດໄດ້ 85,92 ຕື້ກີບ, ເທົ່າກັບ 75,11% ຂອງແຜນ 6 ເດືອນຕົ້ນປີ, ເທົ່າກັບ 37,55 % ຂອງແຜນການປີ, ທຽບໃສ່ໄລຍະດຽວກັນຂອງປີຜ່ານມາ ເທົ່າກັບ 85,20%.

ຂະແໜງຄຸ້ມຄອງຊັບສິນຂອງລັດ : ແຜນການປີ 5,66 ຕື້ກີບ, ທຽບໃສ່ແຜນການປີຜ່ານມາ ເທ່າກັບ 8,01 % ຫຼຸດລົງ 91,99 %, ເປັນເງິນ 65,02 ຕື້ກີບ. ປະຕິບັດໄດ້ 8,13 ຕື້ກີບ, ເທົ່າກັບ 143,64 % ຂອງແຜນການປີ.

ຄຸ້ມຄອງວິສາຫະກິດລັດລົງທຶນ : ແຜນ 50,00 ລ້ານກີບ, ປະຕິບັດໄດ້ 200,00 ລ້ານກີບ ເທົ່າກັບ 400%. ດ້ານລາຍຈ່າຍ : ແຜນການປີ 518,73 ຕື້ກີບ, ທຽບໃສ່ແຜນການປີຜ່ານມາ ເທົ່າກັບ 94,42% ຫຼຸດລົງ 5,58% ເປັນເງິນ 30,60 ຕື້ກີບ, ປະຕິບັດໄດ້ 245,47 ຕື້ກີບ, ເທົ່າກັບ 78,72% ຂອງແຜນ 6 ເດືອນຕົ້ນປີ, ເທົ່າກັບ 47,32% ຂອງແຜນການປີ, ທຽບໃສ່ໄລຍະດຽວກັນປີຜ່ານມາ ເທົ່າກັບ 98,23%. ແຜນລາຍຮັບດຸ່ນດ່ຽງຈາກສູນກາງ 284,21 ຕື້ກີບ, ກວມເອົາ 54,78% ຂອງແຜນລາຍຈ່າຍທັງໝົດ, ປະຕິບັດໄດ້ 190,43 ຕື້ກີບ, ເທົ່າກັບ 97,87% ຂອງແຜນ 6 ເດືອນຕົ້ນປີ, ເທົ່າກັບ 67,00% ຂອງແຜນການປີ, ທຽບໃສ່ໄລຍະດຽວກັນຂອງປີຜ່ານມາ ເທົ່າກັບ 119,56%.

ດ້ານການແບ່ງຂັ້ນຄຸ້ມຄອງລະຫວ່າງແຂວງກັບເມືອງ ປະຕິບັດໄດ້ທັງໝົດ 94,25 ຕື້ກີບ, ເທົ່າກັບ 43,23% ຂອງແຜນການປີ, ທຽບໃສ່ໄລຍະດຽວກັນ ເທົ່າກັບ 84,81%, ຂັ້ນແຂວງຄຸ້ມຄອງ ປະຕິບັດໄດ້ 72,25 ຕື້ກີບ, ເທົ່າກັບ 40,57% ຂອງແຜນການປີ, ຂັ້ນເມືອງຄຸ້ມຄອງ ປະຕິບັດໄດ້ 22,00 ຕື້ກີບ, ເທົ່າກັບ 55,71% ຂອງແຜນການປີ. ລາຍຮັບວິຊາການອ້ອມຂ້າງແຂວງ ປະຕິບັດໄດ້ 9,08 ຕື້ກີບ, ເທົ່າກັບ 51,96% ຂອງແຜນການປີ, ທຽບໃສ່ໄລຍະດຽວ ເທົ່າກັບ 80,15%.

ໃນນີ້ ຄ່າທໍນຽມ ປະຕິບັດໄດ້ 2,14 ຕື້ກີບ, ເທົ່າກັບ 72,11% ທຽບໃສ່ໄລຍະດຽວ ເທົ່າກັບ 120,48%, ຄ່າບໍລິການ ປະຕິບັດໄດ້ 6,93 ຕື້ກີບ, ເທົ່າກັບ 47,78% ທຽບໃສ່ໄລຍະດຽວ ເທົ່າກັບ 72,64%.

ທ່ານຍັງໃຫ້ຮູ້ຕື່ມວ່າ: ໃນ 6 ເດືອນທ້າຍປີຈະໄດ້ສູ້ຊົນຈັດເກັບລາຍຮັບໃຫ້ໄດ້ທັງໝົດ 559,15 ຕື້ກີບ, ກວມເອົາ 49,69 % ຂອງແຜນການປີ, ຄາດຄະເນໝົດປີ 1.090,65 ຕື້ກີບ, ເທົ່າກັບ 96,91 % ຂອງແຜນການປີ, ໃນນີ້ ລາຍຮັບພູດສູນກາງ ຄາດຄະເນ 6 ເດືອນທ້າຍປີ 445,48 ຕື້ກີບ, ກວມເອົາ 50,01%ຂອງ ແຜນການປີ, ຄາດຄະເນໝົດປີ 882,72 ຕື້ກີບ, ເທົ່າກັບ 99,09% ຂອງແຜນການປີ; ໃນນີ້ລາຍຮັບພາສີ ຄາດຄະເນ 445,00 ຕື້ກີບ, ກວມເອົາ 50,00%ຂອງແຜນການປີ, ຄາດຄະເນໜົດປີ 881,86 ຕື້ກີບ, ເທົ່າກັບ 99,09%ຂອງແຜນການປີ, ລາຍຮັບສ່ວນສາອາກອນ(ຄຸ້ມຄອງລັດວິສາຫະກິດ) ຄາດຄະເນ 481,70 ລ້ານກີບ, ກວມເອົາ56,01% ຂອງແຜນການປີ, ຄາດຄະເນໜົດປີ 860,00 ລ້ານກີບ, ເທົ່າກັບ 100%ຂອງແຜນການປີ, ລາຍຮັບພາຍໃນແຂວງ ຄາດຄະເນ 6 ເດືອນທ້າຍປີ 113,67 ຕື້ກີບ, ກວມເອົາ 48,47% ຂອງແຜນການປີ, ຄາດຄະເນໝົດປີ 207,92ກີບ, ເທົ່າກັບ 88,66% ຂອງແຜນການປີ; ໃນນີ້ ສ່ວຍສາອາກອນ ຄາດຄະເນ 6 ເດືອນທ້າຍປີ 111,60 ຕື້ກີບ, ກວມເອົາ 48,78 % ຂອງແຜນການ ປີ, ຄາດຄະເນໝົດປີ 197,53 ຕື້ກີບ, ເທົ່າກັບ 86,33% ຂອງແຜນການປີ. ຄຸ້ມຄອງຊັບສິນຂອງລັດ ຄາດຄະເນ 6 ເດືອນທ້າຍປີ 2,06 ຕື້ກີບ, ກວມເອົາ 64,08 % ຂອງແຜນການ ປີ, ຄາດຄະເນໝົດປີ 10,19 ຕື້ກີບ, ເທົ່າກັບ 180,04% ຂອງແຜນການປີ. ຄຸ້ມຄອງລັດວິສາຫະກິດລັດລົງທຶນ ຄາດຄະເນໝົດປີ 200 ລ້ານກີບ, ເທົ່າກັບ 400 % ຂອງແຜນການປີ ລື່ນແຜນ.

ດ້ານລາຍຈ່າຍ ຄາດຄະເນ 6 ເດືອນທ້າຍປີ 273,25 ຕື້ກີບ, ກວມເອົາ 52,68% ຂອງແຜນການປີ, ຄາດຄະເນໝົດປີ 518,73 ຕື້ກີບ, ເທົ່າກັບ 100 % ຂອງແຜນການປີ. ລາຍຈ່າຍໜົດປີທຽບໃສ່ຂໍ້ມູນແຜນຈ່າຍຕົວຈິງບໍ່ພໍ ພາກ 60 ແລະ 61 ເງິນເດືອນນະໂຍບາຍ ເປັນເງິນ 32,42 ຕື້ກີບ ຕົວເລກດັ່ງກ່າວຈະໄດ້ສະເໜີກະຊວງການເງິນດັດແກ້ເພີ່ມ 6 ເດືອນທ້າຍປີ ເພື່ອໃຫ້ລາຍຈ່າຍສາມາດເບີກຈ່າຍໄດ້.

ການດຸ່ນດ່ຽງງົບປະມານ ຄາດຄະເນ 6 ເດືອນທ້າຍປີ 93,78 ຕື້ກີບ, ກວມເອົາ 33,00% ຂອງແຜນການປີ, ຄາດຄະເນໝົດປີ 284,21 ຕື້ກີບ, ເທົ່າກັບ 100% ຂອງແຜນການປີ.

ແຫຼ່ງຂ່າວ: News.XBL