ໃນຖານະຜູ້ເສຍພາສີອາກອນລາຍໃຫຍ່ທີ່ສຸດຂອງປະເທດ, ບໍລິສັດ ເບຍລາວ ໄດ້ປະກອບສ່ວນເສຍພາສີຫຼາຍກວ່າ 5,100 ຕື້ກີບ ໃນປີ 2024, ເຊິ່ງເພິ່ມຂື້ນຫຼາຍກວ່າ 32% ເມື່ອທຽບໃສ່ປີ 2023.

ທີ່ນະຄອນຫຼວງວຽງຈັນ, ສປປ ລາວ – ວັນທີ 20 ມັງກອນ 2025 – ບໍລິສັດເບຍລາວຈຳກັດ (ເບຍລາວ), ເຊິ່ງເປັນຜູ້ນຳດ້ານທຸລະກິດໃນລາວຕັ້ງແຕ່ປີ 1973, ມີຄວາມພາກພູມໃຈທີ່ໄດ້ສະໜັບສະໜູນກິດຈະກຳຕ່າງໆຂອງພາກລັດໂດຍຜ່ານການປະກອບສ່ວນໃນຖານະເປັນຜູ້ເສຍພາສີລາຍໃຫຍ່ທີ່ສຸດຂອງ ສປປ ລາວ. ໃນປີ 2024, ບໍລິສັດເບຍລາວໄດ້ເສຍພາສີເຂົ້າລັດເປັນຈຳນວນເງິນຫຼາຍກວ່າ 5,1 ພັນຕື້ກີບ (240 ລ້ານ ໂດລາສະຫາລັດ) ເຊິ່ງເພີ່ມຂື້ນຫຼາຍກວ່າ 32% ເມື່ອທຽບກັບປີ 2023.

“ໃນຖານະທີ່ເປັນບໍລິສັດທີ່ມີເອກະລັກສະເພາະທີ່ຕິດພັນຢ່າງແໜ້ນແຟ້ນກັບຊາດລາວ, ບໍລິສັດເບຍລາວ ມີຄວາມມຸ່ງໝັ້ນຢ່າງເຕັມທີ່ ທີ່ຈະສະໜັບສະໜູນການພັດທະນາ ແລະ ເຕີບໂຕ ຂອງຊາດ ໂດຍການຈ່າຍຄ່າພາສີທັງໝົດຂອງພວກເຮົາ, ໃນຖານະທີ່ເປັນຫົວໜ່ວຍທຸລະກິດທີ່ມີຄວາມຮັບຜິດຊອບ ຕໍ່ເສດຖະກິດ ແລະ ສັງຄົມໂດຍລວມ. ການຈ່າຍພາສີທີ່ຫຼາຍກວ່າ 5,1 ພັນຕື້ ເຂົ້າລັດຖະບານ ຖືວ່າເປັນການປະກອບສ່ວນສະໜັບສະໜູນການພັດທະນາເສດຖະກິດ-ສັງຄົມຂອງປະເທດຊາດ ແລະ  ສະຫວັດດີການຊີວິດການເປັນຢູ່ຂອງປະຊາຊົນລາວຢ່າງແທ້ຈິງ” ກ່າວໂດຍ ທ່ານ ເຮັນຣິກ ຈູລ ແອນເດິເຊັນ, ຜູ້ອຳນວຍການບໍລິສັດເບຍລາວ.

ທ່ານ ກິດສະໜາ ວົງໄຊ, ປະທານສະພາຜູ້ບໍລິຫານບໍລິສັດເບຍລາວ, ກ່າວອີກວ່າ ການເກັບພາສີອາດຈະໄດ້ຫຼາຍຂື້ນກວ່ານີ້ ຖ້າວ່າ ບໍ່ມີການລັກລອບນຳເຂົ້າເບຍທີ່ຜິດກົດໝາຍ ເຂົ້າມາໃນ ສປປ ລາວ ຈາກປະເທດໃກ້ຄຽງ ໂດຍສະເພາະ ຈາກປະເທດຫວຽດນາມ. “ພວກເຮົາໄດ້ເຫັນການເພີ່ມຂື້ນຂອງການລັກລອບນຳເຂົ້າຜະລິດຕະພັນເຄື່ອງດື່ມ ເຊັ່ນ: ເບຍ ຈາກປະເທດອື່ນ ໃນປະລິມານຫຼວງຫຼາຍຢ່າງໜ້າກັງວົນ ເພື່ອຫຼີກລ່ຽງການເສຍພາສີ”. ສິ່ງເຫຼົ່ານີ້ໄດ້ສົ່ງຜົນເສຍຕໍ່ການເກັບລາຍຮັບພາສີເຂົ້າລັດຖະບານ ແລະ ກະທົບຄວາມອາດສາມາດໃນການປັບປຸງຊີວິດການເປັນຢູ່ຂອງປະຊາຊົນລາວ. ການກະທຳທີ່ຜິດກົດໝາຍນີ້ສົ່ງຜົນເສຍຕໍ່ເສດຖະກິດທ້ອງຖິ່ນຕະຫຼອດຮອດຕ່ອງໂສ້ອຸດສາຫະກຳ ຕັ້ງແຕ່ຊາວນາ ໄປຮອດຜູ້ຜະລິດໂຮງຈັກໂຮງງານ, ຜູ້ຄ້າຂາຍທີ່ຖືກຕ້ອງຕາມກົດໝາຍ ແລະ ນັກທຸລະກິດດ້ານອາຫານ ແລະ ເຄື່ອງດື່ມ. ນອກຈາກນີ້ຜູ້ລັກລອບນຳເຂົ້າແບບບໍ່ຖືກຕ້ອງ ອາດຈະຈຳໜ່າຍຜະລິດຕະພັນປອມທີ່ບໍ່ໄດ້ຄຸນນະພາບ ແລະ ອາດກໍ່ໃຫ້ເກີດອັນຕະລາຍຕໍ່ສຸຂະພາບໄດ້”.

ທ່ານ ແອນເດິເຊັນ ກ່າວຕື່ມອີກວ່າ: ໃນປີ 2024 ຍອດຂາຍສົ່ງອອກຂອງເບຍລາວໄດ້ເພີ່ມຂຶ້ນສອງເທົ່າເມື່ອທຽບໃສ່ກັບປີ 2023. ລາວໄດ້ກ່າວວ່າ “ເຄືອຄ່າຍການຈໍາໜ່າຍທົ່ວໂລກຂອງກຸ່ມບໍລິສັດ ຄາຣສະເບີກ ໄດ້ຊ່ວຍເພີ່ມຍອດຂາຍສົ່ງອອກຂອງຜະລິດຕະພັນເບຍລາວ. ພວກເຮົາໄດ້ສົ່ງອອກເບຍລາວຫຼາຍກວ່າ 13 ລ້ານ ໂດລາສະຫາລັດ ໃນປີ 2024 ໃນ 20 ປະເທດທົ່ວໂລກ. ນີ້ເປັນການສະແດງໃຫ້ເຫັນວ່າພວກເຮົາສາມາດຂະຫຍາຍຄວາມນິຍົມໃນຜະລິດຕະພັນເບຍລາວຢູ່ພາຍນອກປະເທດໄດ້ ແລະ ການຂະຫຍາຍຕົວຂອງລາຍໄດ້ຈາກການສົ່ງອອກຂອງພວກເຮົາແມ່ນຊ່ວຍນໍາເອົາເງິນຕາຕ່າງປະເທດມາສູ່ເສດຖະກິດຂອງລາວ ແລະ ສະຫນັບສະຫນູນຄ່າເງິນກີບຂອງລາວ”

ເພື່ອປະຕິບັດພັນທະຂອງເຮົາທີ່ມີຕໍ່ປະຊາຊົນລາວ, ບໍລິສັດເບຍລາວ ຍັງປະຕິບັດຫຼາຍກິດຈະກຳຄວາມຮັບຜິດຊອບຕໍ່ສັງຄົມ (CSR) ຢ່າງກວ້າງຂວາງ. ນັບແຕ່ປີ 2022 ເປັນຕົ້ນມາ, ບໍລິສັດໄດ້ໃຊ້ງົບປະມານຫຼາຍກວ່າ 10 ຕື້ກີບ ເຂົ້າໃນຂົງເຂດຕ່າງໆເຊັ່ນ: ຄວາມຍືນຍົງດ້ານສິ່ງແວດລ້ອມ, ການສຶກສາ, ການຊ່ວຍເຫຼືອຜູ້ຖືກກະທົບໄພພິບັດ, ການຊ່ວຍເຫຼືອຊຸມຊົນ, ການປິ່ນປົວສຸຂະພາບ ແລະ ອື່ນໆ. ຂະນະດຽວກັນ, ພະນັກງານ ແລະ ຜູ້ໄດ້ຮັບທຶນການສຶກສາຂອງ ເບຍລາວ ຍັງໄດ້ເຂົ້າຮ່ວມກິດຈະກໍາຕ່າງໆຂອງຊຸມຊົນ ລວມທັງການປູກຕົ້ນໄມ້, ການເກັບຂີ້ເຫຍື້ອ ແລະ ແຍກຂີ້ເຫຍື້ອ, ແລະການບໍາລຸງຮັກສາໂຮງຮຽນ.

ທ່ານ ແອນເດີເຊັນ ໄດ້ສະຫລຸບໄວ້ວ່າ: “ວິໄສທັດ Sail 27 ຂອງກຸ່ມບໍລິສັດ ຄາຣສະເບີກໄດ້ຕົວແບບການເຄື່ອນໄຫວກິດຈະກຳທາງດ້ານທຸລະກິດຂອງພວກເຮົາ, ເຊິ່ງພວກເຮົາບໍ່ພຽງແຕ່ເຮັດວຽກເພື່ອເພີ່ມຄຸນນະພາບຜະລິດຕະພັນ ແລະ ນະວັດຕະກໍາໃໝ່ໆເທົ່ານັ້ນ ແຕ່ພອ້ມກັນນັ້ນ ພວກເຮົາຍັງຊຸກຍູ້ການເຕີບໂຕແບບຍືນຍົງ ພ້ອມດ້ວຍ ການລົງທຶນເຂົ້າໃນການດູແລຮັກສາສິ່ງແວດລ້ອມ ແລະ ການມີສ່ວນຮ່ວມຕໍ່ຊຸມຊົນ, ເພື່ອສືບຕໍ່ສ້າງຜົນປະໂຫຍດຕໍ່ປະຊາຊົນລາວຕື່ມອີກ.

ສໍາເລັດຕາມເປົ້າໝາຍແລ້ວ ກັບການເປີດ ທະນາຄານຄຳ ລາວ ຢ່າງເປັນທາງການ ສະຖາບັນການເງິນແຫ່ງທໍາອິດໃນປະເທດລາວ ທີ່ໃຫ້ບໍລິການທະນາຄານທີ່ອີງໃສ່ທຸລະກໍາວັດຖຸມີຄ່າ ໄດ້ສະເຫຼີມສະຫຼອງການເປີດໂຕ ຢ່າງເປັນທາງການ ໃນວັນທີ 03 ທັນວາ 2024 ຜ່ານມາ, ໄດ້ມີພິທີເປີດ ທະນາຄານຄຳ ລາວ ຢ່າງເປັນທາງການ ທີ່ຕຶກສໍານັກງານ ທີ່ບ້ານໂພນໄຊ, ເມືອງໄຊເສດຖາ, ນະຄອນຫຼວງວຽງຈັນ ໃຫ້ກຽດເຂົ້າຮ່ວມນໍາພາເປັນສັກຂີພະຍານ ໂດຍ ພະນະທ່ານ ສອນໄຊ ສີພັນດອນ, ນາຍົກ ລມຕ ແຫ່ງ ສປປ ລາວ ແລະ ບັນດາການນໍາ ຂອງ ພັກ-ລັດ ຕາງໜ້າຈາກບັນດາກະຊວງ ແລະ ອົງການຈັດຕັ້ງຕ່າງໆ ພ້ອມດ້ວຍ ຄະນະນໍາ ແລະ ທຸກພາກສ່ວນທີ່ຮັບຜິດຊອບຂອງ ຈາກທະນາຄານຄໍາ ລາວ ພ້ອມພຽງກັນເຂົ້າຮ່ວມຈັດຕັ້ງ ແລະ ສະເຫຼີມສະຫຼອງ ໃນພິທີອັນມີຄວາມໝາຍຄວາມສໍາຄັນຄັ້ງນີ້.

ພິທີເປີດ ທະນາຄານຄໍາ ລາວ ຢ່າງເປັນທາງການ ໃນຄັ້ງນີ້ ຖືເປັນບາດກ້າວອັນສໍາຄັນ ຕໍ່ການປະກອບສ່ວນຈັດຕັ້ງ ຜັນຂະຫຍາຍ ຄວາມຕັ້ງໃຈຂອງ ພັກ ແລະ ລັດຖະບານລາວ ທີ່ຢາກໃຫ້ມີທະນານຄານຄໍາຂຶ້ນ ເພື່ອປະຕິບັດພາລະບົດບາດໃນການສໍາຮອງຄໍາເພື່ອຄໍ້າປະກັນຄວາມໝັ້ນຄົງ ແລະ ສ້າງສະພາບຄ່ອງທາງດ້ານການເງິນ ແລະ ການຄັງ, ຄໍ້າປະກັນ ຄ່າເງິນກີບໃຫ້ຢູ່ໃນລະດັບທີ່ໝັ້ນທ່ຽງ ອີກທັງຈະປະກອບສ່ວນການຍົກລະດັບມາດຕະຖານອຸດສາຫະກໍາລາວ ໃຫ້ໄດ້ໃນລະດັບສາກົນ ເພີ່ມພູນມູນຄ່າແກ່ຊັບພະຍາກອນ ໃຫ້ໄດ້ມູນຄ່າ ແລະ ປະໂຫຍດສູງສຸດສ້າງສະຖຽນລະພາບທາງດ້ານເສດຖະກິດ ໃຫ້ແກ່ ສປປ ລາວ ໃຫ້ນັບມື້ ນັບເຂັ້ມແຂງ ແລະ ຂະຫຍາຍຕົວຢ່າງໝັ້ນຄົງຍືນຍົງສີວິໄລ.

ໃນໂອກາດນີ້, ທ່ານ ປອ ຈັນທອນ ສິດທິໄຊ, ຜູ້ອໍານວຍການໃຫຍ່ ທະນາຄານຄໍາ ລາວ ໄດ້ກ່າວວ່າ: ການເປີດບໍລິການ ທະນາຄານຄໍາ ລາວ ຢ່າງເປັນທາງການໃນຄັ້ງນີ້ ໄດ້ສະແດງໃຫ້ເຫັນເຖິງຄວາມມຸ້ງໝັ້ນຕັ້ງໃຈ ແລະ ການຮ່ວມຈິດຮ່ວມໃຈອັນແຮງກ້າລະຫວ່າງ ພັກ-ລັດ ກັບປະຊາຊົນລາວ ໃນການສຸມສະຕິປັນຍາແກ້ໄຂປັນຫາຄວາມຫຍຸ້ງຍາກທາງດ້ານ ເສດຖະກິດ-ການເງິນ ທີ່ປະເທດພວກເຮົາ ພວມປະເຊີນຢູ່ນີ້ ໃຫ້ຄ່ອຍໆບັນເທົາ ແລະ ຫມົດໄປໃນຕໍ່ຫນ້າ. ນອກຈາກນີ້, ທ່ານ ຍັງໄດ້ກ່າວເພີ່ມເຕີມວ່າ: ເພື່ອເປັນການຮັບປະກັນການບໍລິການທີ່ໄດ້ມາດຕະຖານ ແລະ ເປັນມືອາຊີບ, ທະນາຄານຄໍາ ລາວ ແມ່ນໄດ້ຮ່ວມມືກັບພາກສ່ວນ ທີ່ກ່ຽວຂ້ອງຂອງລັດຖະບານໂດຍສະເພາະແມ່ນ ກະຊວງການເງິນ ແລະ ທະນາຄານ ແຫ່ງ ສປປ ລາວ ພ້ອມກັບ ຄູ່ຮ່ວມມືຍຸດທະສາດ ດ້ານການຄ້າຈາກທັງພາຍ ແລະ ສາກົນ ກໍຄືບັນດາທະນາຄານ, ສະຖາບັນການເງິນ, ວິສາຫະກິດວັດຖຸມີຄ່າ ໃຫ້ມີຄວາມພ້ອມຮອບດ້ານ ບໍ່ວ່າຈະເປັນໃນດ້ານການຄຸ້ມຄອງບໍລິຫານຈັດການ, ເຄື່ອງມືອຸປະກອນຕ່າງໆ ທີ່ທັນສະໄໝ ຕາມມາດຕະຖານທີ່ສາກົນຍອມຮັບ. ໃນມື້ນີ້, ທະນາຄານຄໍາ ລາວ ແມ່ນພ້ອມແລ້ວ ທີ່ຈະສະໜອງການຜະລິດຕະພັນ ແລະ ການບໍລິການ ທີ່ຫຼາກຫຼາຍ ແລະ ເຂົ້າເຖິງໄດ້ງ່າຍ ສູ່ສັງຄົມລາວ ເປັນຕົ້ນແມ່ນ ການເປີດບັນຊີຝາກຄໍາ, ສິນເຊື່ອກູ້, ການອອກໃບຢັ້ງຢືນຄໍາ ເພື່ອນໍາໃຊ້ເປັນຫຼັກຊັບຄໍ້າປະກັນ, ການຮັບຝາກຄໍາດ້ວຍຫ້ອງໝັ້ນຄົງເກັບຮັກສາ ແລະ ຕູ້ນິລະໄພຂັ້ນສູງ, ການຂົນສົ່ງວັດຖຸມີຄ່າ ຕະຫຼອດຮອດຕູ້ສະໜອງກົດອັດຕະໂນມັດ ແລະ ອື່ນໆ ທີ່ພ້ອມໃຫ້ບໍລິການແກ່ສັງຄົມລາວແລ້ວ ຕັ້ງແຕ່ມື້ນີ້ເປັນຕົ້ນໄປ ແລະ ນອກນີ້ກໍໄດ້ກຽມພ້ອມທີ່ຈະສະໜອງ ອີກຫຼາກຫຼາຍຜະລິດຕະພັນເຊັ່ນ: ການບໍລິການຄ້າຄໍາໃນ Digital Platform ລະດັບສາກົນ (International Gold Trading), ການກັ່ນຫຼອມຄໍາ, ການປະເມີນມູນຄ່າແຮ່ຄໍາທີ່ຍັງບໍ່ໄດ້ຂຸດຄົ້ນ ເພື່ອຕີມູນຄ່າເປັນຊັບສິນປະກອບເຂົ້າງົບປະມານ ໃຫ້ແກ່ລັດຖະບານ ແລະ ການສໍາຮອງຄໍາໃຫ້ແກ່ປະເທດຊາດ ໃນອະນາຄົດຕໍ່ໜ້າ.

ພາຍຫຼັງສໍາເລັດພິທີ ທີ່ຕຶກສໍານັກງານທະນາຄານຄ້າ ລາວ ແລ້ວ, ໄດ້ມີການສືບຕໍ່ສະເຫຼີມສະຫຼອງພິທີເປີດບໍລິການ ຢ່າງເປັນທາງການ ທີ່ ໂຮງແຮມ ແລນມາກ ຣີເວີ້ໄຊ ໂດຍການໃຫ້ກຽດເຂົ້າຮ່ວມນໍາພາເປັນສັກຂີພະຍານ ໂດຍ ພະນະທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ ແຫ່ງ ສປປ ລາວ ແລະ ບັນດາການນໍາ ຂອງ ພັກ-ລັດ ຕາງໜ້າຈາກບັນດາກະຊວງ ແລະ ອົງການຈັດຕັ້ງຕ່າງໆ ພ້ອມດ້ວຍ ຄະນະນໍາ ຕາງຫນ້າຈາກບັນດາທະນາຄານ, ວິສາຫະກິດຜູ້ປະກອບການ ທີ່ເປັນຄູ່ຮ່ວມມືພັນທະມິດ ຂອງທະນາຄານຄໍາ ລາວ ຈາກທັງພາຍໃນ ແລະ ຕ່າງປະເທດ ຕະຫຼອດຮອດບັນດາລູກຄ້າຂອງທະນາຄານຄໍາ ລາວ ເຂົ້າຮ່ວມຢ່າງເບີກບານຟົດຟື້ນ.

ໃນພິທີດັ່ງກ່າວນີ້, ທະນາຄານຄຳລາວ ແມ່ນໄດ້ມີການລົງນາມ ເຊັນສັນຍາຮ່ວມມືທາງດ້ານທຸລະກິດ ແລະ ຍຸດທະສາດ ກັບບັນດາທະນາຄານ, ສະຖາບັນການເງິນ ແລະ ວິສາຫະກິດຜູ້ປະກອບການວັດຖຸມີຄ່າ ເພື່ອຮ່ວມກັນ ສ້າງປັດໄຈ ແລະ ກົນໄກການຮ່ວມມື ເພື່ອເປັນພຶ້ນຖານອັນສໍາຄັນ ໃນການປະກອບສ່ວນສ້າງສາພັດທະນາປະເທດຮ່ວມກັນຕໍ່ໄປ.

ໃນໂອກາດນີ້, ທ່ານ ນາງ ວັດທະນາ ດາລາລອຍ, ຮັກສາການຜູ້ວ່າການ ທະນາຄານແຫ່ງ ສປປ ລາວ ໄດ້ມີຄໍາເຫັນວ່າ ທະນາຄານຄໍາ ລາວ ແມ່ນມີຄວາມສໍາຄັນໃນລະບົບເສດຖະກິດ ຈຶ່ງເຫັນດີໃຫ້ອະນຸຍາດດໍາເນີນທຸລະກິດ ທະນາຄານຄໍາ ເພື່ອເປັນອົງປະກອບໜຶ່ງໃນ ລະບົບການເງິນ-ເງິນຕາ, ປະກອບສ່ວນຮັກສາສະຖຽນລະພາບດ້ານການເງິນ ແລະ ພັດທະນາເສດຖະກິດ-ສັງຄົມ ຂອງ ສປປ ລາວ ເຊິ່ງທະນາຄານແຫ່ງ ສປປ ລາວ ເປັນຜູ້ຄຸ້ມຄອງມະຫາພາກກ່ຽວກັບທະນາຄານຄໍາ ພາຍໃຕ້ກົດໝາຍວ່າດ້ວຍທະນາຄານທຸລະກິດ. ອີງໃສ່ ກົດໝາຍດັ່ງກ່າວ, ທະນາຄານແຫ່ງ ສປປ ລາວ ໄດ້ອອກຂໍ້ຕົກລົງ ວ່າດ້ວຍທຸລະກິດຂອງທະນາຄານຄໍາ ທີ່ກໍານົດຫຼັກການ, ລະບຽບການ ມາດຕະການ ກ່ຽວກັບການດໍາເນີນທຸລະກິດຂອງທະນາຄານ ເພື່ອເປັນບ່ອນອີງ ໃນການໃຫ້ບໍລິການຜະລິດຕະພັນຂອງ ທະນາຄານຄ້າ ໃຫ້ມີປະສິດຕິພາບ ແລະ ມີຄວາມໂປ່ງໃສ ແລະ ເຕີບໃຫຍ່ເຂັ້ມແຂງ ເພື່ອປະກອບສ່ວນພັດທະນາລະບົບສະຖາບັນ ການເງິນ ແລະ ເສດຖະກິດ-ສັງຄົມຂອງ ສປປ ລາວ ໃຫ້ໄດ້ຮັບການຂະຫຍາຍຕົວຢ່າງຕໍ່ເນື່ອງ.

ການເປີດບໍລິການ ທະນາຄານຄຳ ລາວ ຢ່າງເປັນທາງການໃນຄັ້ງນີ້ ເປັນໜຶ່ງໃນຂີດໝາຍອັນສໍາຄັນ ທີ່ສະແດງໃຫ້ເຫັນເຖິງ ເຈດຕະນາ, ຄວາມມຸ້ງໝັ້ນຕັ້ງໃຈ ແລະ ການຮ່ວມແຮງຮ່ວມໃຈ ໃນການປະກອບສ່ວນພັດທະນາ ລະບົບສະຖາບັນການເງິນ-ການຄັງ ໃຫ້ມີຄວາມເຂັ້ມແຂງ, ສາມາດເຊື່ອມໂຍງກັບພາກພື້ນ ແລະ ສາກົນ ອີກທັງເປັນການ ຊຸກຍູ້ກິດຈະກໍາທາງດ້ານເສດຖະກິດ ໃຫ້ຂະຫຍາຍຕົວຢ່າງຕໍ່ເນື່ອງ ແລະ ໝັ້ນຄົງຍືນຍົງ ສອດຄ່ອງກັບແນວທາງນະໂຍບາຍ ພັດທະນາເສດຖະກິດ-ສັງຄົມ ຂອງພັກ ແລະ ລັດຖະບານ ທີ່ເປັນ ວາລະແຫ່ງຊາດ ໃຫ້ນັບມື້ນັບປະກົດຜົນເປັນຈິງ.

ໂຄງການໂອກາດຈະເລີ່ມແຜນງານຝຶກງານແບບມີສ່ວນຮ່ວມເພື່ອສະໜັບສະໜູນຄົນທີ່ມີຄວາມພິການ: ການຮ່ວມມືກັນລະຫວ່າງພາກລັດ ແລະ ເອກະຊົນ ເພື່ອສົ່ງເສີມໂອກາດດ້ານການຈ້າງງານ.

ວັນທີ 28 ສິງຫາ 2024, ນະຄອນຫຼວງວຽງຈັນ, ສປປ ລາວ: ອົງການ ເວີລດ໌ ເອດຢູເຄຊັນ ແລະ ກົມນະໂຍບາຍ ຕ່່ຜູ້ມີຜົນງານ, ພິການ ແລະ ຜູ້ອາຍຸສູງ (ກອງເລຂາ ຄະນະກຳມະການແຫ່ງຊາດ ເພື່ອຄົນພິການ), ກະຊວງແຮງງານ ແລະ ສະຫວັດດີການສັງຄົມ (ກະຊວງ ຮສສ) ໄດ້ຈັດກອງປະຊຸມເຜີຍແຜ່ຂໍ້ມູນກ່ຽວກັບແຜນງານຝຶກງານແບບມີ ສ່ວນຮ່ວມ ຂອງຄົນທີ່ມີຄວາມພິການຂຶ້ນຢ່າງເປັນທາງການ ຊຶ່ງເປັນສ່ວນໜຶ່ງຂອງໂຄງການໂອກາດ ເພື່ອເສີມສ້າງ ຄວາມເຂັ້ມແຂງ ດ້ານການພັດທະນາແບບມີສ່ວນຮ່ວມຂອງຄົນພິການ ໂດຍການສະໜັບສະໜູນຈາກອົງການພັດທະນາ ສາກົນປະເທດສະຫະລັດອາເມລິກາ (USAID). ກອງປະຊຸມເຜີຍແຜ່ໃນຄັ້ງນີ້ແມ່ນມີເປົ້າໝາຍເພື່ອແຈ້ງໂອກາດສຳລັບການຝຶກງານ ສຳລັບຄົນທີ່ມີຄວາມພິການທີ່ສະໜອງໂດຍຫົວໜ່ວຍແຮງງານຈາກພາກລັດ ແລະ ເອກະຊົນ ທີ່ຢູ່ໃນນະຄອນຫຼວງ ວຽງຈັນ.

ແຜນງານນີ້ມີຈຸດປະສົງເພື່ອຊ່ວຍເຫຼືອຜູ້ຊອກວຽກເຮັດງານທຳທີ່ມີຄວາມພິການໃຫ້ໄດ້ຮັບປະສົບການ ດ້ານວິຊາຊີບ, ສົ່ງເສີມທັກສະຂອງພວກເຂົາ ແລະ ເພີ່ມໂອກາດດ້ານການມີວຽກເຮັດງານທຳຜ່ານການຝຶກອົບຮົມ ໃນໜ້າວຽກຕົວຈິງ ກັບຫົວໜ່ວຍແຮງງານທີ່ເຂົ້າຮ່ວມແຜນງານ. ຢູ່ສປປ ລາວ ແມ່ນມີອຸປະສັກຫຼາຍຢ່າງ ທີ່ຈຳກັດການຈ້າງງານຂອງ ຄົນທີ່ມີຄວາມພິການ. ເນື່ອງຈາກຄວາມຫຍຸ້ງຍາກໃນການເຂົ້າເຖິງການສຶກສາຈຶ່ງເຮັດໃຫ້ພວກເຂົາຂາດຄວາມຮູ້ ແລະ ທັກສະທີ່ເໝາະສົມກັບຄວາມຕ້ອງການຂອງຕະຫຼາດແຮງງານ ແລະ ຂາດຄວາມໝັ້ນໃຈ ໃນການຊອກວຽກເຮັດງານ ທຳດ້ວຍຕົນເອງຕາມຄວາມສົນໃຈຂອງພວກເຂົາ. ນອກຈາກນີ້, ການບໍ່ມີປະສົບການດ້ານວິຊາຊີບຂັ້ນເບື້ອງຕົ້ນ ບວກກັບຄວາມເຂົ້າໃຈ ແລະ ທັດສະນະດ້ານລົບກ່ຽວກັບຄວາມພິການ ໄດ້ນຳໄປສູ່ການຈຳແນກຂອງບາງຫົວໜ່ວຍ ແຮງງານ, ຈຳກັດການເຂົ້າເຖິງໂອກາດດ້ານການຈ້າງງານ ແລະ ສ້າງສະພາບແວດລ້ອມ ທີ່ບໍ່ເອື້ອອຳນວຍໃນການເຮັດວຽກ. ການສຳຫຼວດທີ່ດຳເນີນຢູ່ນະຄອນຫຼວງວຽງຈັນສະແດງ ໃຫ້ເຫັນວ່າ ການພັດທະນາທັກສະໃນໜ້າວຽກຕົວຈິງແມ່ນຮູບແບບທີ່ເປັນທີ່ຕ້ອງການຂອງຄົນທີ່ມີຄວາມພິການຫຼາຍກວ່າການຝຶກອົບຮົມດ້ານວິຊາຊີບທີ່ສະໜອງໂດຍໂຮງຮຽນອາຊີວະສຶກສາ ແລະ ຝຶກອົບຮົມວິຊາຊີບຂອງລັດຖະບານ.

ແຜນການຝຶກງານແບບມີສ່ວນຮ່ວມ ເຊິ່ງຈະເລີ່ມຈັດຕັ້ງປະຕິບັດຢູ່ນະຄອນຫຼວງວຽງຈັນແຕ່ປີ 2024 ຈົນຮອດປີ 2027 ຈະຊ່ວຍເປັນຂົວຕໍ່ເຮັດໃຫ້ຄົນທີ່ມີຄວາມພິການໄດ້ພັດທະນາທັກສະຂອງເຂົາເຈົ້າໂດຍກົງຈາກການຝຶກງານຕົວຈິງ. ກອງປະຊຸມ ເຜີຍແຜ່ຂໍ້ມູນໃນຄັ້ງນີ້ມີຜູ້ເຂົ້າຮ່ວມປະມານ 100 ຄົນ ເຊິ່ງລວມມີຜູ້ຊອກວຽກເຮັດງານທຳ ແລະ ຫົວໜ່ວຍແຮງງານ ເຊິ່ງໄດ້ມີໂອກາດໄດ້ຮຽນຮູ້ກ່ຽວກັບແຜນງານ ແລະ ເງື່ອນໄຂໃນການສະໝັກ ພ້ອມທັງການສະ ໜັບສະໜູນຂອງແຜນງານທີ່ພວກເຂົາຈະໄດ້ຮັບ.

ສຳລັບຜູ້ຊອກວຽກເຮັດງານທຳທີ່ມີຄວາມພິການແມ່ນເລີ່ມແຕ່ອາຍຸ 14 ປີ ຫຼື ສູງກວ່າ ໂດຍບໍ່ຈຳແນກປະເພດ ຂອງ ຄວາມພິການທີ່ມີສິດສະໝັກເຂົ້າຮ່ວມໃນແຜນງານ. ຫົວໜ່ວຍແຮງງານພາກລັດ ແລະ ເອກະຊົນທີ່ສົນໃຈເຂັ້າຮ່ວມ ແຜນງານດັ່ງກ່າວນີ້ແມ່ນສາມາດສະໝັກຜ່ານລະບົບອອນລາຍ (ສະໜອງໃຫ້ໃນທ້າຍບົດຄວາມນີ້). ກອງປະຊຸມເຜີຍແຜ່ສຳລັບຫົວໜ່ວຍແຮງງານແມ່ນເຂົ້າຮ່ວມໂດຍ ທ່ານ ໂຈມແຍງ ແພງທອງສະຫວັດ, ຫົວໜ້າກົມນະໂຍບາຍຕ່່ຜູ້ມີຜົນງານ, ພິການ ແລະ ຜູ້ອາຍຸສູງ (ກອງເລຂາ ຄະນະກຳມະການແຫ່ງຊາດ ເພື່ອຄົນພິການ (ກອງເລຂາ ຄຊພກ)), ກະຊວງແຮງງານ ແລະ ສະຫວັດດີການສັງຄົມ (ກະຊວງ ຮສສ), ທ່ານ ໂມເຄິລ ແມັກຄອດ, ຜູ້ຕາງໜ້າອົງການ USAID ປະຈຳ ສປປ ລາວ, ທ່ານ ເບີນາດ ແຟຣງ ແລະ ພາກສ່ວນທີ່ກ່ຽວຂ້ອງກໍ່ໄດ້ເຂົ້າຮ່ວມນຳ.

ໃນການກ່າວພີທີເປີດກອງປະຊຸມ, ທ່ານ ໂຈມແຍງ ແພງທອງສະຫວັດ, ຫົວໜ້າກົມນະໂຍບາຍ ຕໍ່ຜູ້ມີຜົນ ງານ, ພິການ ແລະ ຜູ້ອາຍຸສູງໄດ້ເນັ້ນຄວາມສຳຄັນກ່ຽວກັບແຜນງານຝຶກງານແບບມີສ່ວນຮ່ວມ ຂອງຄົນທີ່ມີ ຄວາມພິການ ໂດຍກ່າວວ່າ: “ແຜນງານນີ້ຈະຊ່ວຍໃຫ້ຄົນພິການມີທັກສະຈຳເປັນ ທີ່ຕະຫຼາດແຮງງານຕ້ອງການ ໂດຍຜ່ານ ການຝຶກອົບຮົມໃນໜ້າວຽກຕົວຈິງທີ່ສະໜອງໂດຍຫົວໜ່ວຍແຮງງານທັງພາກລັດ ແລະ ເອກະຊົນ ຊຶ່ງຈະຊ່ວຍເພີ່ມໂອ ກາດດ້ານການຈ້າງງານໃຫ້ແກ່ຄົນທີ່ມີຄວາມພິການຢູ່ໃນ ສປປ ລາວ.” ສ່ວນ ທ່ານ ໄມເຄິລ ແມັກຄອດ ກໍ່ໄດ້ເນັ້ນໃສ່ບົດບາດທີ່ສຳຄັນດ້ານການຮ່ວມມືຂອງພາກລັດ ແລະ ເອກະຊົນໃນການ ສົ່ງເສີມຄວາມເຂັ້ມແຂງທາງດ້ານເສດຖະກິດໃຫ້ແກ່ ຄົນທີ່ມີຄວາມພິການຢູ່ໃນ ສປປ ລາວ. “ກອງປະ ຊຸມເຜີຍແຜ່ຂໍ້ມູນໃນມື້ນີ້ຖືເປັນຫຼັກໝາຍສຳຄັນສຳລັບຄວາມພະຍາຍາມຮ່ວມກັນຂອງພວກເຮົາເພື່ອສະໜັບສະ
ໜູນຄົນທີ່ມີຄວາມພິການຢູ່ ສປປ ລາວ. ທ່ານ ໄມເຄິລ ແມັກຄອດ ຍັງກ່າວວ່າ: ໂດຍການມອບໂອກາດດ້ານການ ຝຶກງານໃຫ້ແກ່ພວກເຂົາ ແມ່ນພວກເຮົາກຳລັງຊ່ວຍໃຫ້ເຂົາເຈົ້າກ້າວສູ່ການເສີມສ້າງທັກສະ ແລະ ໄດ້ຮັບປະສົບການ ເຮັດວຽກ ຊຶ່ງເປັນສິ່ງສຳຄັນສຳລັບເຂົ້າເຖິງໂອກາດດ້ານການຈ້າງງານໃນອະນາຄົດ,”

ເປົ້າໝາຍຂອງແຜນງານຝຶກງານແບບມີສ່ວນຮ່ວມຂອງຄົນທີ່ມີຄວາມພິການພາຍໃຕ້ໂຄງການໂອກາດແມ່ນເພື່ອອຳນວຍຄວາມສະດວກໃນການຝຶກງານໃຫ້ກັບຄົນທີ່ມີຄວາມພິການຢ່າງຫນ້ອຍ 35 ທ່ານໃນຫົວໜ່ວຍແຮງງານຈາກ ພາກລັດ ແລະ ເອກະຊົນຢູ່ນະຄອນຫຼວງວຽງຈັນ. ຜູ້ຝຶກງານຈະໄດ້ຮັບເງິນອຸດໜູນປະຈຳເດືອນ, ປະກັນອຸປະຕິເຫດ ສ່ວນບຸກຄົນ, ສິ່ງອຳນວຍຄວາມສະດວກທີ່ສົມເຫດສົມຜົນ, ການຊ່ວຍເຫຼືອແບບເພື່ອນຊ່ວຍເພື່ອນ, ການຝຶກງານ ເປັນເວລາ 6 ເດືອນ. ນອກຈາກນີ້, ຜູ້ໃຫ້ຄຳປຶກສາຈະຕິດຕາມຄວາມກ້າວໜ້າໃນການພັດທະນາທັກສະ, ການເສີມສ້າງ ຄວາມສາມາດ ແລະ ການສ້າງຄວາມໝັ້ນໃຈໃນສະຖານທີ່ເຮັດວຽກຂອງຜູ້ຝຶກງານ. ທາງທີມງານໂຄງການ ຄາດຫວັງ ໃຫ້ຫົວໜ່ວຍແຮງງານຈະມອບໝາຍເພື່ອນຮ່ວມງານຊ່ວຍອຳນວຍຄວາມໃຫ້ແກ່ຜູ້ຝຶກງານແຕ່ລະຄົນໃນການສະໜອງ
ການຝຶກອົບຮົມໃນໜ້າວຽກຕົວຈິງ, ຝຶກສອນ ແລະ ໃຫ້ຄຳປຶກສາເພື່ອຊ່ວຍໃຫ້ພວກເຂົາເຕີບໂຕ ແລະ ປະສົບຜົນ ສຳເລັດໃນບົດບາດຂອງຕົນເອງ.

ສະໝັກເຂົ້າຝຶກງານ ສຳລັບຜູ້ຊອກວຽກທີ່ມີຄວາມພິການ ທີ່ນີ້. https://ee.kobotoolbox.org/x/pWNXpbc8 ແລະ ສະໝັກຮັບຜູ້ຝຶກງານ ສຳລັບຫົວໜ່ວຍແຮງງານ ທີ່ນີ້. https://ee.kobotoolbox.org/x/bA3Zr3Ys