ຕາມການລາຍງານ ຈາກສຳນັກຂ່າວ CBS News ລາຍງານ: ເຈົ້າໜ້າທີ່ພົບອີກ 2 ສົບທີ່ເປັນເດັກນ້ອຍ ອາຍຸ 4 ປີ ແລະ 10 ປີ, ເຮັດໃຫ້ຍອດຜູ້ເສຍຊີວິດເພີ່ມຂຶ້ນເປັນ 18 ຄົນ, ອີກ 145 ຄົນຍັງບໍ່ຮູ້ຊະຕາກຳຈາກເຫດຄອນໂດຫຼູແຄມທະເລໄມອາມີຖະຫຼົ່ມທີ່ສະຫະລັດອາເມລິກາ.

ເກືອບໜຶ່ງອາທິດທີ່ທີມງານກູ້ໄພຂອງສະຫະລັດສືບຕໍ່ປະຕິບັດພາລະກິດຄົ້ນຫາຜູ້ຫາຍສາບສູນ ແລະ ຊ່ວຍເຫຼືອຜູ້ລອດຊີວິດ ພາຍຫຼັງອາຄານທີ່ຢູ່ອາໄສ 12 ຊັ້ນ ໃນເມືອງ ເຊີຟໄຊດ໌, ລັດຟລໍຣີດາ ຖະຫຼົ່ມລົງມາໃນວັນທີ 24 ມິຖຸນາ 2021 ທີ່ຜ່ານມາ.

ທ່ານ ແດນຽນລາ ເລວິນ ຄາວາ, ເຈົ້າເມືອງໄມອາມີ-ເດດ ເຄົາຕີ້ກ່າວວ່າ: ການຄົ້ນຫາຜູ້ຫາຍສາບສູນຈຳນວນ 145 ຄົນທີ່ຍັງບໍ່ຮູ້ຊະຕາຊີວິດ ຍັງຄົງດຳເນີນຕໍ່ໄປ,  ຖືເປັນຝັນຮ້າຍສຳລັບຜູ້ຢູ່ອາໄສທີ່ລອດຊີວິດທີ່ຈະຕາມຫຼອກຫຼອນພວກເຂົາໄປຕະຫຼອດ.

ໄອເລຍນາ ມອນຕີກິວໂດ ໜຶ່ງໃນຜູ້ລອດຊີວິດຈາກເຫດການລະທຶກຂວັນກ່າວວ່າ: ນາງສະເດີດຕື່ນຂຶ້ນຍ້ອນສຽງດັງເປັນຕາຢ້ານ ກ່ອນຈະເຫັນຮອຍແຕກຕາມຝາຫ້ອງປາກົດຂຶ້ນອ້ອມຮອບ, ຈາກນັ້ນຕົນຈິ່ງຮີບແລ່ນລົງໄປຊັ້ນລຸ່ມໂດຍບໍ່ຄິດຊີວິດ ສ່ວນຮອຍແຕກຂອງຕຶກກໍຍັງສົ່ງສຽງດັງຕາມຫຼັງນາງຕະຫຼອດເວລາ.

ຊາຣາ ໄນຣ໌ ຜູ້ລອດຊີວິດອີກຄົນກ່າວວ່າ: ນາງພັກຢູ່ຊັ້ນລຸ່ມຂອງຕຶກ, ພໍເມື່ອໄດ້ຍິນສຽງດັງຂຶ້ນກໍຮີບແລ່ນອອກໄປຂ້າງນອກທັນທີ, ພາບໂຮງຈອດລົດໃຕ້ດິນພັງລົງມາຍັງເປັນພາບຕິດຕາຂອງນາງຮອດມື້ນີ້.

“ພໍແຕ່ພວກເຮົາແລ່ນອອກມາຫວິດອາຄານບໍ່ພໍອຶດໃຈກໍເກີດມີ ສຽງດັງ ‘ຕູມ’ ສຸດແຮງ ແລ້ວພວກເຮົາກໍແນມບໍ່ເຫັນຫຍັງເລີຍ ຍ້ອນຄວັນສີຂາວປົກຄຸມໄປທົ່ວ” ຊາຣາ ໄນຣ໌ ກ່າວເພີ່ມ.

ພະນັກງານກູ້ໄພ 200 ກວ່າຄົນກຳລັງຄົ້ນຫາຜູ້ລອດຊີວິດຜ່ານກອງຊາກສະຫຼັກຫັກພັງ ໂດຍບໍ່ໄດ້ພັກຜ່ອນທັງກາງເວັນ ແລະ ກາງຄືນ ເຖິງແມ່ນຈະມີໂອກາດໜ້ອຍໃນການຊ່ວຍເຫຼືອຜູ້ສູນຫາຍທີ່ອາດຈະລອດຊີວິດກໍຕາມ.

ເຈົ້າໜ້າທີຕຳຫຼວດ ປກສ ແຂວງອຸດົມໄຊ ສົມທົບພາກສ່ວນກ່ຽວຂ້ອງເຂົ້າຈັບກຸມເປົ້າໝາຍມີການຜະລິດຢາເສບຕິດ ພ້ອມຍຶດເຄື່ອງຂອງກາງຫຼາຍປະເພດ

ໃນຕົ້ນເດືອນ ມິຖຸນາ 2021 ທາງກອງບັນຊາການ ປກສ ແຂວງອຸດົມໄຊ ໄດ້ຮັບແຫຼ່ງຂ່າວຈາກພົນລະເມືອງດີວ່າ: ຢູ່ຈຸດພື້ນທີ່ສວນລ້ຽງງົວ ຢູ່ເຂດບ້ານພູສະຫວັນ, ເມືອງໄຊ ແຂວງອຸດົມໄຊ ໄດ້ພົບເຫັນຮ່ອງຮອຍສົງໄສມີການຜະລິດຢາເສບຕິດ ຈິ່ງໄດ້ແຕ່ງຕັ້ງພະນັກງານວິຊາສະເພາະລົງກວດກາຊັນນະສູດຈຸດພື້ນທີ່ດັ່ງກ່າວ ຜ່ານການກວດກາ ຊັນນະສູດເຫັນວ່າມີຂໍ້ມູນຫຼັກຖານທີ່ເຊື່ອຖືໄດ້ວ່າ, ມີການຜະລິດຢາເສບຕິດຢູ່ຈຸດດັ່ງກ່າວແທ້ ເປົ້າໝາຍສົງໄສທີ່ເປັນເຈົ້າຂອງສວນ ແລະ ເປັນຕົວການໃນການເຄື່ອນໄຫວຜະລິດຢາເສບຕິດແມ່ນ ທ້າວ ວາລີ ວ້າ ປະຊາຊົນຢູ່ ບ້ານພູສະຫວັນ, ເມືອງໄຊ, ແຂວງອຸດົມໄຊ,

ມາຮອດເວລາ 6 ໂມງເຊົ້າ ຂອງວັນທີ 27 ມິຖຸນາ 2021 ເຈົ້າໜ້າທີ່ຈຶ່ງເຂົ້າກວດກາຕິດຕາມ ສະພາບຢູ່ຈຸດພື້ນທີ່ດັ່ງກ່າວ ພົບເຫັນເປົ້າໝາຍ 2 ຄົນທີ່ເຄື່ອນໄຫວເຂົ້າ-ອອກ ເຮືອນຂອງເປົ້າໝາຍ ເຂດບ້ານພູສະຫວັນ ( ຫຼັກ 28 ) ເມືອງໄຊ ແຂວງອຸດົມໄຊຫາຈຸດພັກເຊົ່າຂອງພວກກ່ຽວທີ່ ບ້ານຫຼັກ 32 ທ່າທາງມີພິລຸດສົງໄສ ຈິ່ງໄດ້ເຂົ້າກວດກາສອບຖາມ ຈິ່ງຮູ້ວ່າຊື່ ທ້າວ ເຈຍວ່າ ແລະ ນາງ ເດົາລີ (ຜົວເມຍ) ແລະ ໄດ້ກວດກາພົບເຫັນຢາບ້າ ຈໍານວນ 81 ມັດ, ກັບ 4 ຖົງນ້ອຍ ມີ 162.800 ເມັດ ນ້ໍາໜັກ 19 ກິໂລກຣາມ ທີ່ບັນຈຸຢູ່ໃນແກັດເຈ້ຍກະກຽມເຄື່ອນຍ້າຍອອກຈໍາໜ່າຍ

ຈາກນັ້ນທາງກອງບັນຊາການ ປກສ ແຂວງ ຈິ່ງໄດ້ປະສານສົມທົບກັບກຳລັງກອງບັນຊາການທະຫານ ແຂວງອຸດົມໄຊເພື່ອວາງແຜນເຂົ້າມ້າງຄະດີ ຢ່າງຮີບດ່ວນ ດ້ວຍຮູບການເຂົ້າຈັບກຸມ ແລະ ກວດຄົ້ນເຄຫະສະຖານ (ເຮືອນ) ຢູ່ບ້ານພູສະຫວັນ ແລະ ຈຸດພັກເຊົາຂອງເປົ້າໝາຍຢູ່ບ້ານຫຼັກ 32 ພ້ອມທັງ ບັນຈຸກໍາລັງເຂົ້າກວດຄົ້ນ ຈຸດສົງໄສມີການຜະລິດຢາເສບຕິດຢູ່ໃນພື້ນທີ່(ສວນ) ຂອງເປົ້າໝາຍ ໂດຍຊ້ອງ ໜ້າກັບອົງການປົກຄອງບ້ານ ແລະ ຜູ້ຕາງໜ້າຈາກອົງການໄອຍະການປະຊາຊົນແຂວງ ໂດຍມີຈຸດເປົ້າໝາຍທັງໝົດ 7 ຈຸດ, ຜ່ານການຈັດຕັ້ງປະຕິບັດສາມາດກັກຕົວເປົ້າໝາຍ ແລະ ຍຶດເຄື່ອງຂອງກາງຫຼາຍປະເພດ.

ຈຸດທີ 1 ກວດຄົ້ນເຄຫະສະຖານ ( ເຮືອນ ) 2 ຫຼັງ ແລະ ກວດຄົ້ນພື້ນທີ່(ສວນ)ຈຸດຜະລິດຢາເສບຕິດ ຢູ່ເຂດບ້ານພູສະຫວັນ ເມືອງໄຊ ແຂວງອຸດົມໄຊ ສາມາດກັກຕົວຜູ້ຖືກຫາໄດ້ 1 ຄົນ ຊື່ ທ້າວ ວາລີ ວ້າ ອາຍຸ 31 ປີ, ສັນຊາດ ລາວ, ປະຊາຊົນ ພົບຂອງກາງ ເຄື່ອງຈັກຜະລິດຢາບ້າຈໍານວນ 2 ເຄື່ອງ ຢາເສບຕິດປະເພດ(ຢາບ້າ)ຈໍານວນ 1.469.999 ເມັດ ນ້ໍາໜັກ 139,2 ກິໂລ ກຣາມ,ຢາບ້າ ທີ່ຍັງເປັນແປ້ງຝຸ່ນສີແດງ ບໍ່ທັນໄດ້ອັດເປັນເມັດ ມີຈໍານວນ 846,5 ກິໂລກຣາມ,ຢາໄອສ໌ ນ້ໍາໜັກ 3 ກິໂລກຣາມ,ຢາປະເພດເມັດສີຂາວມີເຄື່ອງໝາຍ WY ຄ້າຍຄືຢາບ້າ ຈໍານວນ 8.791 ເມັດນ້ໍາໜັກ 800 ກຣາມ,ແປ້ງຝຸ່ນສີຂາວ ນ້ໍາໜັກ 17,2 ກິໂລກຣາມ,ກາຈໍ້າ ມີເຄື່ອງໝາຍຕົວ Y ຈໍານວນ 1 ອັນ, ມີເຄື່ອງໝາຍຕົວ A ຈໍານວນ 1 ອັນ ແລະ ເຄື່ອງ ໝາຍເລກ 1ຈໍານວນ 1 ອັນ,ຖົງຢາງເປົ່າ 17,2 ກິໂລກຣາມ, ລົດຈັກ 2 ຄັນ, ກວດຄົ້ນເຮືອນ 2 ຫຼັງ ພົບຂອງກາງ ເງິນກີບ ຈໍານວນ 18.000.000 ກີບ, ເງິນບາດໄທ 155.000 ບາດ, ສາຍຄໍຄ້າຍຄືຄໍາ 1 ເສັ້ນ,ລົດຈິບ ຍີ່ຫໍ້ TOYOTA ລຸ້ນ FORTUNER ສີຂາວ ທະບຽນ ກກ 3889 ອຸດົມໄຊ,ລົດກະບະ HUYNDAI ສີຂາວ ( ບໍ່ມີປ້າຍ ) ແລະ ລົດຈັກ 2 ຄັນ.

ຈຸດທີ 2 ກວດຄົ້ນເຄຫະສະຖານ ( ເຮືອນ ) 1 ຫຼັງ ກັກຕົວຜູ້ຖືກຫາໄດ້ 1 ຄົນ ຊື່ທ້າວ ຕຸວ້າ ອາຍຸ 20 ປີ, ສັນຊາດລາວ, ປະຊາຊົນ,ຂອງກາງ ຢາບ້າ 218 ເມັດ ນ້ໍາໜັກ 22,7 ກຣາມ,ປືນສັ້ນ 9 ມມ 1 ກະບອກ ພ້ອມລູກປືນ 24 ລູກ,ລົດຈັກ 1 ຄັນ,ເງິນກີບ ຈໍານວນ 43.000.000 ກີບ,ເງິນບາດ ຈໍານວນ 98.000 ບາດ,ສາຍຄໍສີເຫຼືອງຄ້າຍຄືຄໍາ 1 ເສັ້ນ.

ຈຸດທີ 3 ກວດຄົ້ນເຄຫະສະຖານ ( ເຮືອນ ) 1 ຫຼັງ ຜູ້ຖືກຫາໄດ້ 1 ຄົນ ຊື່ນາງ ໄມ່ມົວ ອາຍຸ 49 ປີ, ສັນຊາດລາວ, ປະຊາຊົນ ມີຂອງກາງ ຢາບ້າ 95 ເມັດ ນ້ໍາໜັກ 10,1 ກຣາມ,ເງິນກີບ ຈໍານວນ 1.700.000 ກີບ,ເງິນບາດໄທ ຈໍານວນ 111.000 ບາດ, ຕາດ່ຽງຊັງຢາຝິ່ນ 1 ອັນ,ໂທລະສັບ 6 ເຄື່ອງ,ໃບຕາດິນ 1 ໃບ.

ຈຸດທີ 4 ກວດຄົ້ນເຄຫະສະຖານ ( ເຮືອນ ) 1 ຫຼັງ ກັກຕົວຜູ້ຖືກຫາໄດ້ 1 ຄົນ ຊື່ນາງ ໄມ່ຊົງ ອາຍຸ 16 ປີ, ສັນຊາດລາວ, ປະຊາຊົນ,ມີຂອງກາງ ຢາບ້າ 366 ເມັດ ນ້ໍາໜັກ 31,8 ກຣາມ,ເງິນກີບ ຈໍານວນ 9.000.000 ກີບ,ເງິນບາດໄທ ຈໍານວນ 217.000 ບາດ,ລົດຈັກ ຮອນດາເວບ 1 ຄັນ,ສາຍຄໍສີເຫຼືອງຄ້າຍຄືຄໍາ 1 ເສັ້ນ ນ້ໍາໜັກ 36,1 ກຣາມ,ໂທລະສັບ 3 ເຄື່ອງ.

ຈຸດທີ 5 ຜູ້ຖືກຫາໄດ້ 1 ຄົນ ຊື່ນາງ ເຊັງວ້າ ອາຍຸ 18 ປີ, ສັນຊາດລາວ, ປະຊາຊົນ,ເຄື່ອງຂອງກາງຍຶດໄດ້ມີ ເງິນກີບ ຈໍານວນ 1.700.000 ກີບ,ເງິນບາດ ຈໍານວນ 219.000 ບາດ, ສາຍຄໍສີເຫຼືອງຄ້າຍຄືຄໍາ ພ້ອມກີ້ 1 ເສັ້ນ, ນໍ້າໜັກ 19,4 ກຣາມ,ປືນແກັບ 01ກະບອກ.ເປົ້າໝາຍຈຳນວນດັ່ງກ່າວ ຢູ່ບ້ານພູສະຫວັນ ເມືອງໄຊ ແຂວງອຸດົມໄຊ.

ຈຸດທີ 6 ເຄຫະສະຖານ ( ເຮືອນ ) 1 ຫຼັງ ຢູ່ບ້ານ ຫຼັກ 32 ແລະ ກວດຄົ້ນຈຸດຜະລິດຢາເສບຕິດ ຢູ່ເຂດບ້ານພູສະຫວັນ ເມືອງໄຊ ກັກຕົວຜູ້ຖືກຫາໄດ້ 1 ຄົນ ຊື່ທ້າວ ກາເຢັງຊົງ ອາຍຸ 34 ປີ, ສັນຊາດລາວ, ອາຊີບສອມແປງລົດ, ຢູ່ບ້ານຫຼັກ 32, ເມືອງໄຊ, ແຂວງອຸດົມໄຊ ຂອງກາງມີ ເຈ້ຍປໍສາ 60 ກິໂລກຣາມ,ສະກ໋ອດສີຂາວ 17 ກໍ່,ສະກ໋ອດສີເຫຼືອງ 5 ກໍ່,ຖົງຢາງ 2 ຕັບ,ຢາງບ້ວງສີແດງ 2 ກິໂລກຣາມ,ເງິນກີບ ຈໍານວນ 210.000.000 ກີບ,ປື້ມບັນຊີເງິນຝາກ 1 ຫົວ,ໂທລະສັບ 2 ເຄື່ອງ,ສາຍຄໍສີເຫຼືອງຄ້າຍຄືຄໍາ ພ້ອມກີ້ພະ 1 ເສັ້ນ ນ້ໍາໜັກ 77,1 ກຣາມ,ປືນລົມ 1 ກະບອກ ພ້ອມລູກ 2 ລູກ,ເອກະສານນໍາໃຊ້ລົດ 1 ຊຸດ,ລົດກະບະ ຍີ່ຫໍ້ TOYOTA ລຸ້ນ REVO ສີປອນເງິນ ທະບຽນ ມຂ 8866 ກໍາແພງນະຄອນຈຳນວນ 1 ຄັນ,ເຄື່ອງຈັກຜະລິດຢາບ້າ 1 ເຄື່ອງ, ເຄື່ອງອັດຢາບ້າ ພ້ອມຈັກປັນໄຟ 1 ເຄື່ອງ,ຢາບ້າເມັດສີຂຽວ ຈໍານວນ 43.956 ເມັດ ນ້ໍາໜັກ 4 ກິໂລ ກຣາມ,ຢາໄອສ໌ ນ້ໍາໜັກ 1 ກິໂລກຣາມ,ຖົງຢາງເພື່ອບັນຈຸຢາບ້າ ( ຖົງເປົ່າ ) ນ້ໍາໜັກ 13,6 ກິໂລ ກຣາມ,ແປ້ງຝຸ່ນສີແດງ ນ້ໍາໜັກ 1,5 ກິໂລກຣາມ,ແປ້ງຝຸ່ນສີຂຽວ 1 ຖົງນ້ອຍ ນ້ໍາໜັກ 360 ກຣາມ,ແປ້ງຝຸ່ນສີຂາວ 9,4 ກິໂລກຣາມ,ກາຈ້ໍາ ມີເຄື່ອງໝາຍຕົວ Y ຈໍານວນ 4 ອັນ, ມີເຄື່ອງໝາຍຕົວ A ຈໍານວນ 3 ອັນ ແລະ ເຄື່ອງ ໝາຍເລກ 1 ຈໍານວນ 3 ອັນ,ລົດຊິ້ງ 1 ຄັນ.

ຈຸດທີ 7 ເຄຫະສະຖານ ( ເຮືອນ ) 1 ຫຼັງ ຢູ່ບ້ານຫຼັກ 32 ກັກຕົວຜູ້ຖືກຫາໄດ້ 2 ຄົນ ຊື່ ທ້າວ ເຈຍ ວ້າ ອາຍຸ 26 ປີ, ສັນຊາດລາວ, ປະຊາຊົນ ຢູ່ບ້ານພູສະຫວັນ ແລະ ນາງ ເດົາລີ ອາຍຸ 24 ປີ, ສັນຊາດລາວ, ປະຊາຊົນ ຢູ່ບ້ານປຸງວົງ, ເມືອງໄຊ, ແຂວງອຸດົມໄຊ ມີຂອງກາງ ຢາບ້າ ຈໍານວນ 81 ມັດ ກັບ 4 ຖົງນ້ອຍ ມີ 162.800 ເມັດ ນ້ໍາໜັກ 19 ກິໂລກຣາມ,ລົດກະບະ ແດຫັນ ສີປອນເງິນ ທະບຽນ ກດ 1622 ກໍາແພງນະຄອນຈຳນວນ 1 ຄັນ. ຜ່ານການສືບສວນ-ສອບສວນ ທ້າວ ວາລີ ວ້າ ໄດ້ໃຫ້ການຮັບສະພາບວ່າ ໄດ້ເຄື່ອນໄຫວຜະລິດຢາບ້າແທ້, ເຄື່ອງຂອງກາງຢາເສບຕິດ, ເຄື່ອງຈັກ, ເຄື່ອງມື, ອຸປະກອນທີ່ໃຊ້ຜະລິດຢາເສບຕິດ ທີ່ເຈົ້າໜ້າທີ່ກວດກາພົບເຫັນ ແລະ ຍຶດໄດ້ ຢູ່ສວນຂອງຜູ້ກ່ຽວນັ້ນແມ່ນຂອງຜູ້ກ່ຽວແທ້ ເຊິ່ງເລີ່ມຜະລິດຢາບ້າມາແຕ່ເດືອນ ກຸມພາ 2021 ເປັນຕົ້ນມາ ໂດຍມີຜູ້ຮ່ວມຂະບວນການໃນການຜະ ລິດຢາບ້າໃນຄັ້ງນີ້ຫຼາຍຄົນ, ປະຈຸບັນລາຍຄະດີດັ່ງກ່າວຢູ່ໃນການສືບສວນ-ສອບສວນຂອງເຈົ້າໜ້າທີເພື່ອຂະຫຍາຍຜົນ ແລະ ດໍາເນີນຄະດີຕາມຂັ້ນຕອນຂອງກົດໝາຍ.

ຜັກກະລໍ່າປີ ແມ່ນພືດອີກຊະນິດໜຶ່ງ ທີ່ສັງຄົມໃຫ້ຄວາມຍອມຮັບ ແລະ ນິຍົມກັນ ນຳມາປຸງແຕ່ງເປັນອາຫານຢ່າງແຜ່ຫຼາຍ ຊຶ່ງປັດຈຸບັນ ປະຊາຊົນລາວບັນດາເຜົ່າ ໄດ້ໃຫ້ຄວາມສົນໃຈໃນການປູກພືດຊະນິດດັ່ງກ່າວ ເພື່ອຜະລິດເປັນສິນຄ້າ ຢ່າງເປັນຂະບວນການຟົດຟື້ນພໍສົມຄວນ ແລະ ຕະຫຼາດ ກໍມີຄວາມຕ້ອງການຢ່າງກວ້າງຂວາງ.

ດັ່ງຄອບຄົວ ຂອງທ່ານ ບົກວ່າງ, ປະຊາຊົນບ້ານພູຫົວຊ້າງ ເມືອງອະນຸວົງ ແຂວງໄຊສົມບູນ ທີ່ໄດ້ຢຶດຖືການປູກຜັກກະລໍ່າປີເປັນສິນຄ້າ ແລະ ສາມາດສ້າງລາຍຮັບເຂົ້າຄອບຄົວ ໄດ້ເປັນຢ່າງດີ. ທ່ານ ບົກວ່າງ ໃຫ້ຮູ້ວ່າ ການປູກຜັກກະລໍ່າປີ ແມ່ນໄດ້ລິເລີ່ມໃນໄລຍະປີ 2019 ເປັນຕົ້ນມາ ແລະ ການປູກຜັກແບບປະສົມປະສານ ເປັນຕົ້ນ ຫອມບົ່ວ, ຫອມປ້ອມ, ຜັກກາດ, ໝາກແຕງ, ໝາກຖົ່ວ ແລະ ໝາກຊູ ແມ່ນເລີ່ມຕົ້ນປູກນັບແຕ່ປີ 1989 ເປັນຕົ້ນມາ, ໃນເວລານັ້ນການປູກ ແມ່ນເນັ້ນໃສ່ການບໍລິໂພກພາຍໃນຄອບຄົວ ເປັນສ່ວນໃຫຍ່ ຊຶ່ງຍັງບໍ່ທັນມີທ່າແຮງເພື່ອຜະລິດເປັນສິນຄ້າໄດ້ເທື່ອ, ການປູກແມ່ນປະຕິບັດຕາມເປັນຕາມເກີດ, ປູກແບບພື້ນບ້ານ ແລະ ປະຖົມປະຖານ ໂດຍອາໄສທຳມະຊາດເປັນຕົ້ນຕໍ, ແຕ່ມາຮອດໄລຍະການສ້າງຕັ້ງແຂວງໄຊສົມບູນ ໄດ້ມີເງື່ອນໄຂຫຼາຍຢ່າງ ທີ່ອຳນວຍຄວາມສະດວກ ດັ່ງນັ້ນ ເພິ່ນຈິ່ງໄດ້ຕັດສິນໃຈເລີ່ມຕົ້ນປູກຢ່າງຈິງຈັງ ໂດຍສຸມໃສ່ການປູກຜັກກະລໍ່າປີເປັນຕົ້ນຕໍ, ສໍາລັບໝາກຊູ, ໝາກແຕງ, ຫອມບົ່ວ ແລະ ຫອມປ້ອມ ເປັນການປູກແບບສຳຮອງ.

ພ້ອມດຽວກັນນີ້ ລາຍຮັບຈາກການຂາຍຕົວຈິງ ສຳລັບຜັກກະລໍ່າປີ ແມ່ນສາມາດສ້າງລາຍຮັບໄດ້ 10-20 ລ້ານກີບ ຕໍ່ງວດ ແລະ ພືດຜັກແບບປະສົມປະສານ ສາມາດສ້າງລາຍຮັບໄດ້ 5-6 ລ້ານກີບ ຕໍ່ເດືອນ ເຖິງວ່າຈະເປັນຈຳນວນເງິນ ທີ່ຍັງບໍ່ທັນຫຼວງຫຼາຍ ແລະ ບໍ່ສາມາດເປັນຄອບຄົວຕົວແບບໄດ້ກໍຕາມ ແຕ່ມັນກໍສາມາດແກ້ໄຂຄວາມຫຍຸ້ງຍາກພາຍໃນຄອບຄົວ ໄດ້ເປັນຢ່າງດີ ທັງສະແດງໃຫ້ເຫັນເຖິງຄວາມດຸໝັ່ນຂະຫຍັນພຽນ ແລະ ມີຄວາມຕັດສິນໃຈສູງ ເຂົ້າໃນການພັດທະນາເສດຖະກິດຄອບຄົວຂອງຕົນ ໃຫ້ມີຖານະດີຂຶ້ນ ໂດຍປະຕິບັດຕາມຄຳເວົ້າທີ່ວ່າ: ເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນ ເທື່ອລະກ້າວ ຊຶ່ງເປັນມູນເຊື້ອທີ່ຫຼາຍຄອບຄົວຄວນເອົາເປັນແບບຢ່າງ.

ສຳລັບການຂາຍ ແມ່ນຂາຍຕາມການສັ່ງຊື້ຂອງພໍ່ຄ້າ-ແມ່ຄ້າ ຢູ່ທ້ອງຕະຫຼາດ ພາຍໃນແຂວງ ແລະ ສົ່ງຂາຍໃຫ້ບໍລິສັດ ພູເບ້ຍມາຍນິງ ໃນຈຳນວນ 500 ກິໂລ ໃນທຸກໆ ອາທິດ ຕໍ່ໜຶ່ງຄັ້ງ ຊຶ່ງລາຄາຂາຍທີ່ສົ່ງໃຫ້ພໍ່ຄ້າ-ແມ່ຄ້າ ໃນຕະຫຼາດ ແມ່ນ 3000 ກີບ ຕໍ່ກິໂລ ແລະ ສົ່ງໃຫ້ບໍລິສັດ ພູເບ້ຍ ມາຍນິງ ແມ່ນ 8000 ກີບ ຕໍ່ກິໂລ. ນອກນີ້ ຍັງໄດ້ສົ່ງຂາຍໃຫ້ບັນດາເມືອງພາຍໃນແຂວງ ແລະ ສົ່ງໄປຂາຍ ຢູ່ແຂວງວຽງຈັນ ຕື່ມອີກ. ອາດເວົ້າໄດ້ວ່າ ຜັກກະລໍ່າປີ ແລະ ພືດຜັກແບບປະສົມປະສານ ຂອງທ່ານ ບົກວ່າງ ໄດ້ເຮັດໃຫ້ຕະຫຼາດ ທັງພາຍໃນ ແລະ ຕ່າງແຂວງ ໃຫ້ຄວາມຍອມຮັບ ພ້ອມທັງສັ່ງຊື້ຢ່າງເປັນຂະບວນການກວ້າງຂວາງ ພໍສົມຄວນ. ຊຶ່ງຄາດວ່າອີກບໍ່ດົນທ່ານ ບົກວ່າງ ຈະກາຍເປັນບຸກຄົນ ແລະ ຄອບຄົວຕົວແບບ ໃນການປູກພືດຜັກຜະລິດເປັນສິນຄ້າ ຢ່າງແນ່ນອນ. ສຳລັບການບົວລະບັດຮັກສາ ແມ່ນສຸມໃສ່ການຖາງຫຍ້າ ອອກຈາກບໍລິເວນລຳຕົ້ນຂອງຜັກ ເປັນບັນຫາສຳຄັນ ໄປພ້ອມກັບການກຳຈັດບັນດາສັດຕູພືດທີ່ເຂົ້າມາທຳລາຍຜັກກະລໍ່າປີ ແລະ ພືດຜັກຊະນິດອື່ນໆ ພ້ອມທັງເຕີມຝຸ່ນ ແລະ ຫົດນໍ້າ ໃຫ້ເປັນປົກກະຕິ ພຽງທໍ່ນີ້ ຜັກກໍຈະງອກງາມ ແລະ ຂາຍໄດ້ ຕາມຄວາມຕ້ອງການ.

ສຳລັບແຮງງານທີ່ໝູນໃຊ້ເຂົ້າໃນການບົວລະບັດຮັກສາ ແມ່ນນໍາໃຊ້ແຮງງານຂອງລູກໆ ພາຍໃນຄອບຄົວ ເປັນແຮງງານຕົ້ນຕໍ ທີ່ໄດ້ພ້ອມກັນຄຸກຄີ ແລະ ຫ້າວຫັນ ບົວລະບັດຮັກສາໃນແຕ່ລະມື້ ຢ່າງສະໝໍ່າສະເໝີ.
ຜ່ານການຢຶດຖືການປູກຜັກກະລໍ່າປີ ແລະ ພືດຜັກແບບປະສົມປະສານຊະນິດຕ່າງໆ ເປັນສິນຄ້າ ຂອງທ່ານ ບົກວ່າງ ປະຊາຊົນບ້ານພູຫົວຊ້າງ ເມືອງອະນຸວົງ ແຂວງໄຊສົມບູນ ເຮັດໃຫ້ເສດຖະກິດຄອບຄົວຂອງເພິ່ນ ມີຖານະດີຂຶ້ນເປັນກ້າວໆ ຈາກຄອບຄົວທີ່ເຄີຍຫຍຸ້ງຍາກໃນເມື່ອກ່ອນ ມາຮອດປັດຈຸບັນ ໄດ້ຄ່ອຍໆ ມີທ່າອຽງຫຼຸດພົ້ນອອກຈາກຄວາມທຸກຍາກເປັນລຳດັບ ແລະ ຮັບປະກັນຄວາມສະດວກສະບາຍ ທາງດ້ານການເງິນພາຍໃນຄອບຄົວ ເທື່ອລະກ້າວ.

ທ່ານຜູ້ອ່ານທີ່ເຄົາລົບ ແລະ ຮັກແພງ ທຸກໆ ທ່ານ ຍ້ອນຄວາມດຸໝັ່ນ, ຊື່ສັດ, ປະຢັດ ແລະ ອົດທົນ ບວກກັບຄວາມມີຫົວຄິດປະດິດສ້າງ ໃນການທຳມາຫາກິນ ທີ່ບໍ່ຂັດກັບລະບຽບກົດໝາຍຂອງບ້ານເມືອງ, ກ້າຄິດ, ກ້າເຮັດ ແລະ ຕັດສິນໃຈ ຈຶ່ງເຮັດໃຫ້ເສດຖະກິດຄອບຄົວຂອງທ່ານ ບົກວ່າງ ໄດ້ຮັບການພັດການດີຂຶ້ນ ແລະ ອີ່ມໜຳສໍາລານ.

ພາບ-ຂ່າວ: ຈິນລະວອນ ວໍລະສົມບູນ

Cr: Media Laos

ການພົບປະຄັ້ງນີ້, ສະຫາຍເລຂາທິການໃຫຍ່ ປະທານປະເທດ ທ່ານ ທອງລຸນ ສີສຸລິດ ໄດ້ສະແດງຄວາມປິຕິຊົມຊື່ນເປັນຢ່າງຍິ່ງ ທີ່ໄດ້ນໍາພາຄະນະຜູ້ແທນຂັ້ນສູງພັກ, ລັດແຫ່ງ ສປປ ລາວ ຢ້ຽມຢາມສັນຖະວະໄມຕີ ສສ ຫວຽດນາມ ໃນບັນຍາກາດທີ່ທັງສອງພັກຫາກໍສໍາເລັດກອງປະຊຸມໃຫຍ່ ຄັ້ງທີ XI ຂອງພັກປະຊາຊົນ ປະຕິວັດລາວ, ການຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XIII ຂອງພັກກອມມູນິດຫວຽດນາມ ແລະ ພວມອອກແຮງຈັດຕັ້ງຜັນຂະຫຍາຍມະຕິກອງປະຊຸມໃຫຍ່, ຍຸດທະສາດ ແລະ ແຜນພັດ ທະນາເສດຖະກິດ – ສັງຄົມຂອງແຕ່ລະພັກ, ແຕ່ລະປະເທດຢ່າງເປັນຂະບວນຟົດຟື້ນ.

ພາຍຫຼັງການພົບປະທາງການສອງຝ່າຍ, ສະຫາຍເລຂາທິການໃຫຍ່ ປະທານປະເທດ ທ່ານ ທອງລຸນ ສີສຸລິດ ແລະ ສະຫາຍເລຂາທິການໃຫຍ່ ຫງວຽນ ຟູຈ້ອງ ໄດ້ເປັນສັກຂີພິຍານໃນການລົງນາມ ເອກະສານກ່ຽວກັບການຮ່ວມມືສອງຝ່າຍຄື: ຂໍ້ຕົກລົງວ່າດ້ວຍຍຸດທະສາດຮ່ວມມືສອງຝ່າຍ ລາວ-ຫວຽດນາມ ໄລຍະ 2021-2030; ສັນຍາຮ່ວມມືສອງຝ່າຍ ລາວ-ຫວຽດນາມ ໄລຍະ 2021-2025; ຂໍ້ຕົກລົງວ່າດ້ວຍການຮ່ວມມື ລະຫວ່າງຫ້ອງວ່າການສູນກາງພັກປະຊາຊົນ ປະຕິວັດລາວ ແລະ ຫ້ອງວ່າການສູນກາງພັກກອມມູນິດ ຫວຽດ ນາມ ໄລຍະ 2021-2025 ຂໍ້ຕົກລົງວ່າດ້ວຍການຮ່ວມມືລະຫວ່າງຄະນະກໍາມະການສູນກາງແນວລາວສ້າງຊາດ ແລະ ຄະນະຂົນຂວາຍປະຊາຊົນສູນກາງພັກກອມມູນິດ ຫວຽດນາມ ໄລຍະ 2021- 2025 ຂໍ້ຕົກລົງວ່າດ້ວຍການຮ່ວມມືລະຫວ່າງ ກະຊວງແຜນການ ແລະ ການລົງທຶນຂອງລາວ ແລະ ກະຊວງແຜນການ ແລະ ການລົງທຶນຂອງຫວຽດນາມ ໄລຍະ 2021-2023;

ບົດບັນທຶກວ່າດ້ວຍແຜນ ການຮ່ວມມື ວັດທະນະທໍາ, ສິນລະປະ ແລະ ທ່ອງທ່ຽວ ລະຫວ່າງ ກະຊວງຖະ ແຫຼງຂ່າວ, ວັດທະນະທໍາ ແລະ ທ່ອງ ທ່ຽວລາວ ກັບ ກະຊວງວັດທະນະທໍາ, ກິລາ ແລະ ທ່ອງທ່ຽວ ຫວຽດນາມ ໄລຍະ 2021-2025; ບົດບັນທຶກວ່າດ້ວຍແຜນ ການຮ່ວມມືໃນຂົງເຂດຂ່າວສານ ລະ ຫວ່າງກະຊວງຖະແຫຼງຂ່າວ, ວັດທະນາທຳ ແລະ ທ່ອງທ່ຽວລາວ ກັບ ກະຊວງຖະແຫຼງຂ່າວ ແລະ ການສື່ສານຫວຽດ ນາມ ແລະ ສັນຍາການຮ່ວມມືທາງດ້ານເສດຖະກິດລະຫວ່າງ ວິສາຫະກິດ ລາວ ແລະ ຫວຽດນານຈຳນວນໜຶ່ງ.