ກອງປະຊຸມລັດຖະບານສະໄໝສາມັນປະຈໍາເດືອນສິງຫາ 2021 ໄຂຂຶ້ນໃນວັນທີ 23 ແລະ ປິດລົງໃນວັນທີ 24 ສິງຫາ 2021 (ມື້ວານນີ້) ທີ່ສໍານັກງານນາຍົກລັດຖະມົນຕີ, ພາຍໃຕ້ການເປັນປະທານ ຂອງທ່ານ ພັນຄຳ ວິພາວັນ, ນາຍົກລັດຖະມົນຕີ; ມີບັນດາທ່ານສະມາຊິກລັດຖະບານ ເຂົ້າຮ່ວມຢ່າງພ້ອມພຽງ.

ທ່ານນາງ ທິບພະກອນ ຈັນທະວົງສາ, ຮອງລັດຖະມົນຕີ, ຮອງຫົວໜ້າຫ້ອງວ່າການສຳນັກງານນາຍົກລັດຖະມົນຕີ, ຜູ້ປະຕິບັດໜ້າທີ່ໂຄສົກລັດຖະບານ ຖະແຫຼງຕໍ່ສື່ມວນຊົນເຖິງຜົນສໍາເລັດຂອງກອງປະຊຸມຄັ້ງນີ້ວ່າ: ກອງປະຊຸມ ໄດ້ຮັບຟັງການລາຍງານ, ຄົ້ນຄວ້າ, ປຶກສາຫາລື ແລະ ຕົກລົງ ຕໍ່ເອກະສານຕ່າງໆດັ່ງນີ້:

1. ກອງປະຊຸມເຫັນດີດ້ານຫຼັກການ ຮັບຮອງເອົາບົດສະຫຼຸບຕີລາຄາຮອບດ້ານ ກ່ຽວກັບການຈັດຕັ້ງປະຕິບັດວຽກງານທີ່ພົ້ນເດັ່ນຂອງລັດຖະບານ ໃນເດືອນສິງຫາ ຜ່ານມາ ແລະ ທິດທາງແຜນວຽກຈຸດສຸມເດືອນກັນຍາ2021ແລະ ບົດລາຍງານສະຫຼຸບຕີລາຄາຜົນການຈັດຕັ້ງປະຕິັບັດມາດຕະການປ້ອງກັນ, ຄວບຄຸມ ແລະ ສະກັດກັ້ນການແຜ່ລະບາດຂອງພະຍາດ ໂຄວິດ-19. ກອງປະຊຸມມອບໃຫ້ຫ້ອງວ່າການສໍານັກງານນາຍົກລັດຖະມົນຕີ ປັບປຸງເນື້ອໃນບົດສະຫຼຸບລາຍງານດັ່ງກ່າວ ຕາມການປະກອບຄຳເຫັນຂອງ ສະມາຊິກລັດຖະບານ ເພື່ອໃຫ້ຄົບຖ້ວນ, ສົມບູນ ແລະ ເປັນບ່ອນອີງໃຫ້ບັນດາຂະແໜງການ ແລະ ທ້ອງຖິ່ນນຳໄປຜັນຂະຫຍາຍ ແລະ ສາມາດຈັດຕັ້ງປະຕິບັດໄດ້ຢ່າງມີປະສິດທິຜົນ. ສຳລັບວຽກງານໂຄວິດ-19ແມ່ນໃຫ້ຄະນະສະເພາະກິດ ສືບຕໍ່ປະຕິບັດຕາມແຜນວຽກຈຸດສຸມທີ່ໄດ້ກຳນົດໄວ້ໂດຍສະເພາະການກະກຽມສູນຈຳກັດບໍລິເວນ ແລະ ສູນປິ່ນປົວ ສຳລັບແຮງງານລາວທີ່ເດີນທາງກັບຄືນປະເທດ ພ້ອມທັງເພີ່ມທະວີ ເຜີຍແຜ່ຂໍ້ມູນຂ່າວສານ ສຶກສາອົບຮົມແຮງງານ ຢູ່ໃນສູນຈຳກັດບໍລິເວນ, ເອົາໃຈໃສ່ການໃຫ້ຂໍ້ມູນທີ່ຊັດເຈນທາງດ້ານການແພດ ແລະ ແລະ ຂໍ້ມູນອື່ນໆ, ຕອບໂຕ້ຂ່າວບິດເບືອນນ ແລະ ບໍ່ມີມູນຄວາມຈິງ.

2. ກອງປະຊຸມເຫັນດີດ້ານຫຼັກການ ຮັບຮອງເອົາບົດລາຍງານ ການຈັດຕັ້ງປະຕິບັດໂຄງການກໍ່ສ້າງທາງລົດໄຟ ລາວ-ຈີນ ແລະ ການກະກຽມຄວາມພ້ອມດ້ານຕ່າງໆ ກ່ອນ ແລະ ພາຍຫຼັງການເປີດບໍລິການລົດໄຟ ເດືອນທັນວາ 2021. ແລະມອບໃຫ້ກະຊວງໂຍທາທິການແລະຂົນສົ່ງກຳນົດແຜນວຽກລະອຽດ ແຕ່ຫົວທີ ພ້ອມທັງມີການຊີ້ນໍາ, ຕິດຕາມຊຸກຍູ້, ກວດກາ ການຈັດຕັ້ງປະຕິບັດ, ພ້ອມກັນນີ້ ໃຫ້ປະສານສົມທົບກັບກະຊວງແຜນການ ແລະ ການລົງທຶນ, ກະຊວງການຕ່າງປະເທດ, ກະຊວງຍຸຕິທໍາແລະ ພາກສ່ວນກ່ຽວຂ້ອງອື່ນໆ ກວດກາຄືນບັນຫາທີ່ຍັງຄົງຄ້າງໃຫ້ລະອຽດ ເພື່ອສຸມໃສ່ແກ້ໄຂ ແລະ ປ້ອງກັນບໍ່ໃຫ້ເກີດບັນຫາຕ່າງໆຕາມມາພາຍຫຼັງ. ສຳລັບພິທີເປີດນຳໃຊ້ລົດໄຟລາວ- ຈີນແມ່ນວັນທີ 02 ທັນວາ 2021 ຕາມແຜນ ທີ່ສອງລັດຖະບານ ໄດ້ເປັນເອກະພາບກັນຜ່ານມາ.

3. ກອງປະຊຸມ ເຫັນດີດ້ານຫຼັກການຮັບຮອງເອົາບົດລາຍງານຄວາມຄືບໜ້າການຈັດຕັ້ງປະຕິບັດ ການຫັນກຸ້ມຕົນເອງດ້ານງົບປະມານ ຂອງຫົວໜ່ວຍງົບປະມານ ແລະ ເຫັນດີໃຫ້ເຮັດທົດລອງຢູ່ 5 ຫົວໜ່ວຍງົບປະມານ; ມອບໃຫ້ກະຊວງການເງິນ ສົມທົບກັບກະຊວງກ່ຽວຂ້ອງ ຊຸກຍູ້ຕິດຕາມ, ກວດກາ ການຈັດຕັ້ງປະຕິບັດຕົວຈິງໃຫ້ມີປະສິດທິຜົນ ຄຽງຄູ່ກັບການສ້າງ ແລະ ປັບປຸງ ນິຕິກຳທີ່ຈຳເປັນ ເພື່ອຄຸ້ມຄອງ ແລະ ສົ່ງເສີມວຽກງານດັ່ງກ່າວ. ພ້ອມກັນນີ້ ກໍສືບຕໍ່ຄົ້ນຄວ້າບັນດາຫົວໜ່ວຍງົບປະມານ ທີ່ມີເງື່ອນໄຂ ແລະ ທ່າແຮງ ຢູ່ສູນກາງ ແລະ ທ້ອງຖິ່ນ ເພື່ອຫັນມາຈັດຕັ້ງປະຕິບັດການຫັນກຸ້ມຕົນເອງທາງດ້ານງົບປະມານໃຫ້ຫຼາຍຂຶ້ນ.

4. ກອງປະຊຸມເຫັນດີດ້ານຫຼັກການຮັບຮອງເອົາຮ່າງແຜນແມ່ບົດສົ່ງເສີມ ແລະ ພັດທະນາທຸລະກິດລິເລີ່ມ (Start Up)ໃນໄລຍະກ້າວເຂົ້າສູ່ເສດຖະກິດດິຈີຕອນ; ມອບໃຫ້ກະຊວງເຕັກໂນໂລຊີແລະການສືື່ສານ ສົມທົບກັບພາກສ່ວນກ່ຽວຂ້ອງປັບປຸງເນື້ອໃນຄໍາສັບໃຫ້ລະອຽດ, ຈະແຈ້ງ, ຮັດກຸມ ແລະອື່ນໆຕາມການປະກອບຄໍາເຫັນຂອງສະມາຊິກລັດຖະບານ. ພາຍຫຼັງສຳເລັດການປັບປຸງແລ້ວ ໃຫ້ນຳໄປຜ່ານທ່ານ ຮອງນາຍົກລັດຖະມົນຕີ, ຜູ້ຊີ້ນຳເສດຖະກິດ ເພື່ອກວດກາຄືນ ສຸດທ້າຍ ກ່ອນສະເໜີທ່ານ ນາຍົກລັດຖະມົນຕີ ລົງນາມ ແລະ ປະກາດໃຊ້.

5. ກອງປະຊຸມເຫັນດີດ້ານຫຼັກການ ຮັບຮອງເອົາບົດລາຍງານການກຳນົດລາຄາຫົວໜ່ວຍການກໍ່ສ້າງເຄຫາສະຖານ; ມອບໃຫ້ກະຊວງໂຍທາທິການແລະຂົນສົ່ງ ສືບຕໍ່ປະສານສົມທົບກັບພາກສ່ວນກ່ຽວຂ້ອງ ປັບປຸງຄືນຕາມການປະກອບຄຳເຫັນຂອງສະມາຊິກລັດຖະບານ ກ່ຽວກັບການກຳນົດລາຄາຈຳນວນໜຶ່ງໃຫ້ມີຄວາມຄ່ອງຕົວ ຂຶ້ນກັບມາດຕະການເງື່ອນໄຂດ້ານວັດສະດຸກໍ່ສ້າງ, ຄ່າຂົນສົ່ງໄປເຂດຫ່າງໄກສອກຫຼີກ, ການເໜັງຕີງຂອງອັດຕາແລກປ່ຽນ ແລະ ອື່ນໆ ເພື່ອເຮັດໃຫ້ການຄິດໄລ່ແທດເໝາະກັບສະພາບຕົວຈິງ ແຕ່ລະໄລຍະ.

6. ກອງປະຊຸມ ເຫັນດີຮັບຮອງເອົາຮ່າງແຜນພັດທະນາອຸດສາຫະກໍາປຸງແຕ່ງ ແລະ ຫັດຖະກໍາ 2021-2025; ມອບໃຫ້ກະຊວງອຸດສາຫະກໍາ ແລະ ການຄ້າ ປະສານສົມທົບກັບພາກສ່ວນກ່ຽວຂ້ອງ ປັບປຸງຮ່າງແຜນດັ່ງກ່າວ ໃຫ້ມີເນື້ອໃນຄົບຖ້ວນສົມບູນຂຶ້ນ ຕາມການປະກອບຄຳເຫັນຂອງສະມາຊິິກລັດຖະບານ. ພາຍຫຼັງສຳເລັດການປັບປຸງແລ້ວ ໃຫ້ນຳໄປຜ່ານທ່ານ ຮອງນາຍົກລັດຖະມົນຕີ, ຜູ້ຊີ້ນຳເສດຖະກິດ ເພື່ອກວດກາຄືນ ສຸດທ້າຍ ກ່ອນສະເໜີທ່ານ ນາຍົກລັດຖະມົນຕີ ລົງນາມ ແລະປະກາດໃຊ້.

7. ກອງປະຊຸມ ເຫັນດີດ້ານຫຼັກການຮັບຮອງເອົາບັນດາຮ່າງກົດໝາຍ ທີ່ຈະນໍາສະເໜີຕໍ່ກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດ ຊຸດທີ IX ໃນເດືອນຕຸລາ 2021ຄື: ຮ່າງກົດໝາຍ ວ່າດ້ວຍລັດຖະບານ(ສະບັບປັບປຸງ); ຮ່າງກົດໝາຍວ່າດ້ວຍໂທລະຄົມມະນາຄົມ (ສະບັບປັບປຸງ); ຮ່າງກົດໝາຍວ່າດ້ວຍເຕັກໂນໂລຊີລະດັບສູງ (ສ້າງໃໝ່); ແລະຮ່າງກົດໝາຍວ່າດ້ວຍງົບປະມານ (ສະບັບປັບປຸງ).ມອບໃຫ້ຄະນະຮັບຜິດຊອບປັບປຸງຮ່າງກົດໝາຍທັງ4ສະບັບນີ້ສົມທົບກັບພາກສ່ວນກ່ຽວຂ້ອງ ນໍາໄປປັບປຸງ ແລະ ຮຽບຮຽງຄືນ ຕາມການປະກອບຄໍາເຫັນຂອງສະມາຊິກລັດຖະບານ ເພື່ອໃຫ້ມີເນື້ອໃນຈະແຈ້ງ, ຄົບຖ້ວນ ແລະຮັດກຸມກ່ອນນໍາສະເໜີຕໍ່ກອງປະຊຸມສະໄໝສາມັນ ເທື່ອທີ 2 ຂອງສະພາແຫ່ງຊາດ ຊຸດທີ IXໃນເດືອນຕຸລາ 2021.

8.ກອງປະຊຸມເຫັນດີດ້ານຫຼັກການຮັບຮອງເອົາຮ່າງດໍາລັດ ວ່າດ້ວຍການຄຸ້ມຄອງທຸລະກິດກາຊີໂນ.ມອບໃຫ້ກະຊວງແຜນການ ແລະ ການລົງທຶນ ສົມທົບກັບພາກສ່ວນກ່ຽວຂ້ອງ ນຳເອົາການປະກອບຄຳຄິດຄຳເຫັນຂອງບັນດາສະມາຊິກລັດຖະບານ ໄປປັບປຸງ ແລະ ຮຽບຮຽງຄືນ ຮ່າງດຳລັດດັ່ງກ່າວ ໃຫ້ມີເນື້ອໃນຄົບຖ້ວນ ແລະ ສົມບູນ. ພາຍຫຼັງປັບປຸງສໍາເລັດແລ້ວ ສະເໜີທ່ານນາຍົກລັດຖະມົນຕີ ພິຈາລະນາລົງນາມ ແລະ ປະກາດໃຊ້ຕາມລະບຽບການ.

ທ່ານນາງ ທິບພະກອນ ຈັນທະວົງສາ, ຮອງລັດຖະມົນຕີ, ຮອງຫົວໜ້າຫ້ອງວ່າການສຳນັກງານນາຍົກລັດຖະມົນຕີ ໃຫ້ຮູ້ເຖິງວຽກງານສໍາຄັນຂອງຊາດທີ່ຈະສືບຕໍ່ປະຕິບັດພາຍໃນເດືອນກັນຍານີ້ວ່າ: ເດືອນກັນຍາທີ່ຈະມາເຖິງນີ້ ເປັນເດືອນໜຶ່ງທີ່ລັດຖະບານ ຍັງຈະສືບຕໍ່ພົບຄວາມຫຍຸ້ງຍາກ ແລະ ສິ່ງທ້າທາຍຫຼາຍດ້ານ ໂດຍສະເພາະໃນເງື່ອນໄຂທີ່ພວກເຮົາມີຄວາມຫຍຸ້ງຍາກທາງດ້ານເສດຖະກິດ-ການເງິນ, ການແກ້ໄຂສະພາບການແຜ່ລະບາດຂອງພະຍາດໂຄວິດ-19ໃນຂະນະທີ່ແຮງງານລາວຍັງສືບຕໍ່ເດີນທາງກັບຄືນປະເທດຈໍານວນຫຼາຍ, ທັງເປັນເດືອນທຳອິດ ແຫ່ງການຈັດຕັ້ງປະຕິບັດວາລະແຫ່ງຊາດ ກ່ຽວກັບການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ການແກ້ໄຂບັນຫາຢາເສບຕິດ ແລະ ບັນດານິຕິກຳທີ່ກ່ຽວຂ້ອງ. ດັ່ງນັ້ນ, ໃນເດືອນກັນຍາ2021ລັດຖະບານ ຈະໄດ້ສຸມໃສ່ວຽກງານຕົ້ນຕໍຈຳນວນໜຶ່ງ ດັ່ງນີີ້:

1. ສືບຕໍ່ຈັດຕັ້ງປະຕິບັດວຽກງານປ້ອງກັນຊາດ ແລະ ປ້ອງກັນຄວາມສະຫງົບ ໃຫ້ແຂງແຮງຂຶ້ນກວ່າເກົ່າ ເພືີ່ອຮັກສາສະຖຽນລະພາບທາງດ້ານການເມືອງ ແລະ ຄວາມເປັນລະບຽບຮຽບຮ້ອຍໃນສັງຄົມຢ່າງຕໍ່ເນື່ອງ ດ້ວຍມາດຕະການຕ່າງໆທີີ່ແທດເໜາະກັບຕົວຈິງກວ່າເກົ່າ ໃນນີີ້ລວມທັງການສືບຕໍ່ລາດຕະເວນຕາມຊາຍແດນ, ການປ້ອງກັນສໍານັກງານ, ອົງການ, ທ້ອງຖິີ່ນ ໃຫ້ເປັນປົກກະຕິ ແລະ ເຂັ້ມງວດ ທັງສຸມໃສ່ຈັດຕັ້ງປະຕິບັດວາລະແຫ່ງຊາດ ກ່ຽວກັບການແກ້ໄຂບັນຫາຢາເສບຕິດ ໃຫ້ໄດ້ຮັບຜົນດີເປັນກ້າວໆ.

2. ສືບຕໍ່ຄຸ້ມຄອງເສດຖະກິດມະຫາພາກ, ຄຸ້ມຄອງການເໜັງຕີງຂອງອັດຕາແລກປ່ຽນ ດ້ວຍມາດຕະການຕ່າງໆໃຫ້ເໝາະສົມ,ເອົາໃຈໃສ່ກ່ຽວກັບການສ້າງຖານລາຍຮັບຕິດພັນກັບການເກັບລາຍຮັບໃຫ້ຄົບຖ້ວນດ້ວຍການນຳໃຊ້ອຸປະກອນທັນສະໄໝ, ການປະຕິບັດມາດຕະການປະຢັດງົບປະມານ; ພ້ອມທັງສືບຕໍ່ສົ່ງເສີມການຜະລິດກະສິກຳ ແລະ ຈັດຕັ້ງປະຕິບັດວຽກງານຕ່າງໆໃນຂົງເຂດເສດຖະກິດໃຫ້ສໍາເລັດຕາມແຜນ.

3. ສຳລັບວຽກງານໃນຂົງເຂດວັດທະນະທໍາ-ສັງຄົມແມ່ນກະກຽມແລະເປີດສົກຮຽນໃໝ່ສົກປີ 2021-2022 ຂອງທຸກຊັ້ນຮຽນໃຫ້ສອດຄ່ອງຕາມມາດຕະການຂອງຄະນະສະເພາະກິດຂັ້ນສູນກາງແລະທ້ອງຖິ່ນວາງອອກ; ສືບຕໍ່ເພີີ່ມທະວີການຄຸ້ມຄອງ, ຕິດຕາມ, ກວດກາແລະຊຸກຍູ້ການຈັດຕັ້ງປະຕິບັດມາດຕະການປ້ອງກັນ, ຄວບຄຸມ, ສະກັດກັ້ນແລະແກ້ໄຂການແຜ່ລະບາດຂອງພະຍາດໂຄວິດ-19, ການຂະຫຍາຍສູນກັກກັນແລະສູນປິ່ນປົວເພືີ່ອຮອງຮັບແຮງງານລາວທີີ່ກັບຄືນປະເທດລວມທັງດໍາເນີນການສັກວັກຊີນໃຫ້ບັນລຸຄາດໝາຍທີີ່ກໍານົດໄວ້; ສືບຕໍ່ເພີ່ມທະວີການໂຄສະນາເຜີຍແຜ່ແນວທາງ, ນະໂຍບາຍຂອງພັກ-ລັດແລະຂໍ້ມູນກ່ຽວກັບຂົງເຂດແຮງງານ, ໂອກາດໃນການປະກອບອາຊີບ, ຕິດພັນກັບການສຶກສາອົບຮົມການເມືອງແນວຄິດໃຫ້ແກ່ແຮງງານທີ່ກັບຄືນປະເທດເພື່ອເປັນຂໍ້ມູນແລະສ້າງຄວາມພ້ອມໃນການປະກອບສ່ວນໃນການພັດທະນາເສດຖະກິດຢູ່ປະເທດເຮົາ, ລວມທັງສືບຕໍ່ໂຄສະນາມາດຕະການຕ່າງໆຂອງຄະນະສະເພາະກິດໂຄວິດ-19 ໃຫ້ສັງຄົມຮ່ວມມືໃນການປົກປ້ອງຕົນເອງແລະຄອບຄົວຈາກການຕິດເຊື້ອ; ເພີ່ມທະວີການຕິດຕາມຂ່າວ, ຕອບໂຕ້ຂ່າວບິດເບືອນ, ແລະຂ່າວບໍ່ມີຄວາມຈິງ; ສືບຕໍ່ຄົ້ນຄວ້າຮູບການແລະວິທີການເປີດການທ່ອງທ່ຽວໃນຮູບແບບໃໝ່ແລະເປີດການທ່ອງທ່ຽວຕາມຄວາມເໝາະສົມແລະຄວາມພ້ອມຂອງແຕ່ລະທ້ອງຖິ່ນ; ສືບຕໍ່ເກັບກໍາຂໍ້ມູນແຮງງານຕິດພັນກັບການຈັດຝຶກອົບຮົມສີມືແຮງງານ; ສືບຕໍ່ຕິດຕາມເຝົ້າລະວັງການປ່ຽນແປງດິນຟ້າອາກາດຕິດພັນກັບການສະໜອງຂໍ້ມູນຂ່າວສານທັງກະກຽມຮັບມືໃຫ້ທັນສະພາບການພ້ອມທັງຕິດຕາມເຝົ້າລະວັງແລະກະກຽມຄວາມພ້ອມໃນດ້ານຕ່າງໆເພືີ່ອຕ້ານແລ້ງ-ຕ້ານຖ້ວມ.

4. ສືບຕໍ່ປັບປຸງກົງຈັກການຈັດຕັ້ງຕ່າງໆຂອງອົງການບໍລິຫານລັດຕິດພັນກັບພາລະບົດບາດ, ສິດແລະໜ້າທີີ່ໃຫ້ສອດຄ່ອງກັບຄວາມຮຽກຮ້ອງຕ້ອງການອັນໃໝ່ທັງໃຫ້ສາມາດຍົກສູງປະສິດທິພາບຂອງການຄຸ້ມຄອງລັດໂດຍການຫັນເປັນທັນສະໄໝ, ຄຸ້ມຄອງສັງຄົມດ້ວຍກົດໝາຍໃຫ້ແຂງແຮງ, ຫຼຸດຜ່ອນສິ່ງກີດຂວາງຕ່າງໆທີີ່ເປັນອຸປະສັກໃຫ້ແກ່ການພັດທະນາຢູ່ປະເທດເຮົາ.

5. ສືບຕິດຕາມຢ່າງໃກ້ຊິດສະພາບພາກພື້ນແລະສາກົນທີີ່ມີການຜັນປ່ຽນຢ່າງສັບສົນເພືີ່ອດໍາເນີນແນວທາງການຕ່າງປະເທດຢ່າງເໝາະສົມ. ພ້ອມກັນນີ້, ກໍ່ໃຫ້ສືບຕໍ່ກະກຽມຄວາມພ້ອມຮອບດ້ານໃຫ້ແກ່ການເຄືີ່ອນໄຫວວຽກງານການຕ່າງປະເທດຂອງການນໍາພັກ-ລັດແລະກະກຽມການຕ້ອນຮັບຜູ້ນໍາຂອງບັນດາປະເທດເພື່ອນມິດທີ່ຈະເດີນທາງມາຢ້ຽມຢາມປະເທດເຮົາ.

ນອກຈາກນີ້, ເພືີ່ອໃຫ້ທິດທາງວຽກຈຸດສຸມ ໃນເດືອນກັນຍາ ປີ 2021 ໄດ້ຮັບການຈັດຕັ້ງປະຕິບັດຢ່າງເປັນຮູບປະທໍາຕົວຈິງ, ບັນດາທ່ານສະມາຊິກລັດຖະບານ ຕະຫຼອດຮອດອົງການປົກຄ້ອງທ້ອງຖິ່ນ ຕ້ອງໄດ້ຫັນເປັນແຜນປະຕິບັດລະອຽດ; ມີການແບ່ງຄວາມຮັບຜິດຊອບໃຫ້ການຈັດຕັ້ງ ແລະ ບຸກຄົນ ຢູ່ແຕ່ລະຂັ້ນ ໃນແຕ່ລະໄລຍະໃຫ້ຈະແຈ້ງ ທັງສອດຄ່ອງກັບເງື່ອນໄຂສະພາບຄວາມເປັນຈິງຂອງແຕ່ລະຂັ້ນ, ແຕ່ລະບ່ອນ ໃນການຈັດຕັ້ງປະຕິບັດແຕ່ລະວຽກຕ້ອງແທດຕົວຈິງ, ພະຍາຍາມຫຼີກເວັ້ນການປະຕິບັດວຽກງານທີີ່ມີລັກສະນະຮູບການ ໃນນີີ້ລວມທັງການປະຕິບັດ 2 ວາລະແຫ່ງຊາດທີີ່ສະພາແຫ່ງຊາດໄດ້ຮັບຮອງນັ້ນ ໃຫ້ໄດ້ຮັບຜົນເປັນຢ່າງດີ.

ຕາມການລາຍງານ ຂອງໜ່ວຍກູ້ຊີບອົງການກາແດງຫຼວງພະບາງ ໃຫ້ຮູ້ວ່າ: ໃນວັນທີ 24 ສິງຫາ 2021 ເວລາ 17:00 ນາທີ ໄດ້ຮັບແຈ້ງເຂົ້າເບີ 0711625 ວ່າ ມີຄົນພົບເຫັນສົບຄົນຈົມນ້ຳ ຢູ່ທີ່ບ້ານ​ວັງເງິນ ນະຄອນຫຼວງ​ພະບາງ.

ເມື່ອທີມງານໜ່ວຍກູ້ຊີບອົງການກາແດງລາວ ໄດ້ອອກກວດສອບພົບ​ຄົນເສຍຊີວິດເພດຍິງ​ 0​1 ຄົນ​ ສັນຊາດ​ລາວຊື່ນາງ​ ແຄນ ອາຍຸ​ 17 ປີ ບ້ານຢູ່ປັດຈຸບັນ ບ້ານ​ຕີນຜາ ນະຄອນຫຼວງພະບາງ​ ແຂວງຫຼວງພະບາງ​ ຕາມການບອກເລົ່າ ຂອງຍາດພີ່ນ້ອງ​ ຜູ້ເສຍຊີວິດແມ່ນຈົມນ້ຳແຕ່​ ວັນເສົາ ກົງກັບວັນທີ່​ 21​ ສິງຫາ​ 2021​ ທີ່ບ້ານວັງເງິນ​ ນະຄອນຫຼວງ​ພະບາງ​ ດັ່ງນັ້ນທາງທີມງານໜ່ວຍກູ້ຊີບອົງການກາແດງລາວ ຈຶ່ງໄດ້ທຳການຫໍ່ສົບແລ້ວນຳສົ່ງສາລາວັດປ່າຊ້າບ້ານຫຼັກສິບ.

ຂໍສະແດງຄວາມເສຍໃຈ ມາຍັງຍາດຕິພີ່ນ້ອງຜູ້ເສຍຊີວິດ ແລະ​ ຂໍໃຫ້ດວງວິນຍານຂອງຜູ້ເສຍຊີວິດໄປສູ່ສຸຂະຕິດ້ວຍເທີ້ນ.

ຕາມການລາຍງານ ຂອງໂຮງໝໍແຂວງຈຳປາສັກ ໃຫ້ຮູ້ວ່າ: ຜົນສຳເລັດທີມແພດຜ່າຕັດໝໍທຳມືນຢາສະຫຼົບແລະແພດເດັກ​ ທີ່ໄດ້ຜ່າຕັດເກີດລູກ ແລະ ຊ່ວຍເກີດລູກທຳມະຊາດໃຫ້ຜູ້ຍີງຖືພາທີ່ຕິດເຊື້ອໂຄວິດ-19 ທີ່ມີອາການຫນັກຢ່າງປອດໄພ.

ວັນທີ 24 ສີງຫາ 2021 ທີມງານແພດຜ່າຕັດສູນໂພນທອງ ສົມທົບກັບ ທີມຜ່າຕັດທີ່ປະຈຳການໂຮງໝໍພາກສະໝາມການເງີນພາກໃຕ້, ໝໍທຳມືນຢາສະຫຼົບ ແລະ ໝໍເດັກ ໄດ້ທຳການຜ່າຕັດຊ່ວຍເກີດລູກ,

ກໍລະນີທີ 1: ຜ່າຕັດຊ່ວຍເກີດລູກ (ຮອຍຜ່າຕັດເກົ່າ) ແມ່ຍີງຖືພາ 35ອາທິດ ລູກຜູ້ທີ 2, ຮອຍປາດເກົ່າ , ຕິດເຊື້ອໂຄວີດ-19 ເຊີ່ງແມ່ນແຮງງານນຳເຂົ້າ ແລະ ມີຜົນສຳເລັດໄປດ້ວຍດີ ເດັກເພດ ຍິງນ້ຳໜັກ3000 g , ເດັກແຂງແຮງດີ.

ກໍລະນີທີ 2:  ເກີດລູກທໍາມະຊາດ ແມ່ຍິງຖືພາ35ອາທິດ ລູກຜູ້ທີ1 ຕິດເຊື້ອໂຄວີດ-19,​ ຜູ້ກ່ຽວມີອາການອັກເສບປອດຮຸນແຮງ, ແລະ​ພະຍາດຕ່ອມຄໍຫນຽງເປັນພິດ ຈັດໃນກຸ່ມຄົນເຈັບຫນັກ,​ ທີ່ມີຄວາມສ່ຽງສູງຕໍ່ການລອດຊີວິດ,​ເຊີ່ງແມ່ນແຮງງານນຳເຂົ້າ ແລະ ມີຜົນສຳເລັດໄປດ້ວຍດີ.​ ເດັກເກີດເພດ ຍິງ, ນ້ຳໜັກ2800g ,ເດັກແຂງແຮງດີ.

ຜົນສຳເລັດຄັ້ງນີ້ແມ່ນການຮ່ວມແຮງຮ່ວມໃຈ​ແລະ​ການຊີ້ນໍາ-ນໍາພາຂອງການຈັດຕັ້ງທຸກຂັ້ນ,​ເຮັດໃຫ້ພວກເຮົາໄດ້ຜ່ານຜ່າທຸກອຸປະສຸກ ແລະຂໍ້ຫຍຸ້ງໄປດ້ວຍດີ,​ຕອບສະຫນອງໄດ້ກັບຄໍາຂັວນທີ່ວ່າ ລູກເກີດລອດ-ແມ່ປອດໄພ.

ອີງຕາມການກໍ່ສ້າງວິສະວະກໍາພະລັງງານໄຟຟ້າ ແລະ ວິສະວະກໍາສະໜອງໄຟຟ້າລາກແກ່ ຂອງ ລົດໄຟລາວ-ຈີນ ໄດ້ມີຄວາມຄືບໜ້າຢ່າງລາບລື່ນ ແລະ ສະດວກ, ເສັ້ນທາງພະລັງງານໄຟຟ້າຂະໜາດ 10 kv ທີ່ເຊື່ອມຈອດກັນ ແລະ ເຄື່ອງອຸປະກອນທີ່ກ່ຽວຂ້ອງ ຂອງເສັ້ນທາງລົດໄຟທັງໝົດຈະເລີ່ມສົ່ງກະແສໄຟຟ້າໃນວັນທີ 24 ສິງຫາ ປີ 2021. ຈາກນັ້ນ, ເຄື່ອງອຸປະກອນຕ່າງໆ ເຊັ່ນ: ສາຍເຄເບີ້ນທີ່ເຊື່ອມຈອດກັນ, ສາຍສົ່ງກາງຫາວ ແລະ ໝໍ້ແປງໄຟເປັນຕົ້ນ ຈະໄດ້ຊັກນໍາໄຟຟ້າໝົດ（10 kv）.

ນອກຈາກນັ້ນແລ້ວ, ວິສະວະກໍາສາຍສົ່ງກາງຫາວ ຂອບເຂດລະຫວ່າງອຸໂມງມິດຕະພາບ ບໍ່ເຕັນ ຫາ ສະຖານີລົດໄຟວຽງຈັນ ແລະ ສະຖານີລົດໄຟວຽງຈັນ ຫາ ສະຖານທີ່ຮັກສາສ້ອມແປງຫົວລົດໄຟ（Locomotive depot）ກໍຈະເລີ່ມສົ່ງກະແສໄຟຟ້າເຂົ້າເພື່ອເປີດໃຊ້ງານຢ່າງເປັນທາງການ ໃນເວລາ 9:00 ໂມງເຊົ້າ ຂອງວັນທີ 18 ກັນຍາ ປີ 2021. ຫຼັງຈາກນັ້ນ, ສາຍສົ່ງກາງຫາວ, ສາຍສະໜອງໄຟຟ້າ ແລະ ເຄື່ອງອາໄຫຼ່ທີ່ເຊື່ອມຕໍ່ຕາມແນວເສັ້ນທາງລົດໄຟທັງໝົດຈະໄດ້ຊັກນໍາໄຟຟ້າແຮງສູງ（27.5kv）. ດັ່ງນັ້ນ, ຈຶ່ງແຈ້ງມາຍັງບັນດາພາກສ່ວນທີ່ກ່ຽວຂ້ອງ ແລະ ປະຊາຊົນທີ່ຢູ່ຕາມແນວເສັ້ນທາງລົດໄຟ ເພື່ອຮັບຊາບ,ແລະຕ້ອງລະມັດລະວັງຕົວໃນການປ້ອງກັນດ້ານຄວາມປອດໄພ ແລະ ເອົາໃຈໃສ່ກັບຄວາມປອດໄຟດ້ານການຮັກສາທາງລົດໄຟ.

ຫຼັງຈາກເສັ້ນທາງພະລັງງານໄຟຟ້າທີ່ເຊື່ອມຈອດກັນຂອງເສັ້ນທາງລົດໄຟລາວ-ຈີນ ໄດ້ສົ່ງກະແສໄຟຟ້າເຂົ້າແລ້ວ, ເຄື່ອງອຸປະກອນຕ່າງໆ ເຊັ່ນ: ສາຍເຄເບີ້ນທີ່ເຊື່ອມຈອດກັນ, ສາຍສົ່ງກາງຫາວ, ໝໍ້ແປງໄຟ ແລະ ອື່ນໆ ຈະໄດ້ຊັກນໍາໄຟຟ້າແຮງສູງຂະໜາດ 10 kv. ແລະ ຫຼັງຈາກວິສະວະກໍາສາຍສົ່ງກາງຫາວໄດ້ສົ່ງກະແສໄຟຟ້າເຂົ້າແລ້ວ, ສາຍສົ່ງໄຟຟ້າ ແລະ ເຄື່ອງອາໄຫຼ່ທີ່ເຊື່ອມຕໍ່ຈະໄດ້ຊັກນໍາໄຟຟ້າແຮງສູງຂະໜາດ 27.5 kv, ໃນຂອບເຂດ 20 ແມັດ ຢູ່ອ້ອມຂ້າງສາຍສົ່ງກາງຫາວລ້ວນແຕ່ເປັນເຂດໄຟຟ້າແຮງສູງທີ່ອັນຕະລາຍ. ເພື່ອປ້ອງກັນທາງລົດໄຟເກີດອຸປະຕິເຫດທີ່ເຮັດໃຫ້ຄົນບາດເຈັບ ຫຼື ຕາຍດ້ວຍໄຟຟ້າຊ໋ອດ, ຫ້າມບໍ່ໃຫ້ປະຊາຊົນທີ່ຢູ່ຕາມແນວເສັ້ນທາງລົດໄຟເຂົ້າໃກ້ ພາຍໃນຂອບເຂດ 2 ແມັດ ຂອງສາຍສົ່ງກາງຫາວທີ່ເປັນເຂດອັນຕະລາຍນັ້ນ, ຫ້າມຂ້າມຜ່ານສິ່ງຂອງຕ່າງໆໂດຍທາງກົງ ຫຼື ທາງອ້ອມ, ຫ້າມປີນຂຶ້ນເສົາໄຟເຫຼັກ ຂອງສາຍສົ່ງກາງຫາວ ແລະ ຫ້າມຫຼິ້ນຢູ່ໃກ້ກັບບໍລິເວນສາຍສົ່ງກາງຫາວຢ່າງເດັດຂາດ.

ນອກຈາກນັ້ນແລ້ວ, ຖ້າຫາກວ່າປະຊາຊົນທີ່ຢູ່ຕາມແນວເສັ້ນທາງລົດໄຟພົບເຫັນມີສິ່ງຂອງຕ່າງໆ ເຊັ່ນ: ສົ້ນສາຍໄຟ ຫຼື ເຄືື່ອງອາໄຫຼ່ ແລະ ອື່ນໆທີ່ແຂວນຫ້ອຍຢູ່ເທິງສາຍພະ ລັງງານໄຟຟ້າ ແລະ ສາຍສົ່ງກາງຫາວ,ແມ່ນຫ້າມບໍ່ໃຫ້ໄປສໍາພັດ ຫຼື ເຂົ້າໃກ້. ຖ້າຫາກວ່າພົບເຫັນເຄື່ອງອຸປະກອນຕ່າງໆຂອງສາຍພະລັງງານໄຟຟ້າ ແລະ ສາຍສົ່ງກາງຫາວຖືກລັກ, ທໍາລາຍມ້າງ, ຫຼື ພົບເຫັນວ່າເກີດອັກຄີໄພ, ຕ້ອງແຈ້ງໃຫ້ພາກສ່ວນກ່ຽວຂ້ອງທີ່ຢູ່ໃກ້ທີ່ສຸດ. ຖ້າຫາກວ່າພົບເຫັນສາຍພະລັງງານໄຟຟ້າ ແລະ ສາຍສົ່ງໄຟຟ້າຂາດ, ຕົກ, ຈະຕ້ອງຮັກສາໄລຍະຫ່າງຄວາມປອດໄພ 10 ແມັດຂຶ້ນໄປ, ແລະ ຕ້ອງແຈ້ງໃຫ້ພາກສ່ວມກ່ຽວຂ້ອງກັບທາງລົດໄຟ ຫຼື ກົມຕໍາຫຼວດທີ່ຢູ່ໃກ້ທີ່ສຸດຢ່າງທັນທີ.

ໃນວັນທີ 23.08.2021 ເວລາ 16:00ນາທີ ໜວ່ຍກູ້ຊີບອົງການກາແດງແຂວງວຽງຈັນ ໄດ້ຮັບແຈ້ງເຫດຜ່ານເບີ 023 1625 ວ່າມີເຫດຄາດຕະກຳ (ລູກຂ້າພໍ່ເສຍຊີວິດ) ຢູ່ບ້ານ ໂພນຫໍ ເມືອງໂພນໂຮງ ແຂວງວຽງຈັນ.

ເມື່ອໜ່ວຍກູ້ຊີບໄປຮອດບ່ອນເກີດເຫດພົບເຫັນຜູ້ເສຍຊີວິດ 1 ຄົນ,ເປັນເພດຊາຍ, ອາຍຸ 60 ປີ (ສ່ວນລາຍລະອຽດຂອງການຄາດຕະກຳ ຄັ້ງນີ້ແມ່ນຢູ່ລະຫວ່າງການສືບສວນ-ສອບສ່ວນ ຂອງເຈົ້າຫນ້າທີ່)

ດັ່ງນັ້ນ, ໜ່ວຍກູ້ຊີບອົງການກາແດງແຂວງວຽງຈັນຈຶ່ງໄດ້ຫໍ້-ມ້ຽນສົບຜູ້ເສຍຊີວິດ ແລ້ວມອບໃຫ້ຍາດພີ້ນ້ອງປະກອບພິທີທາງສາສະໜາ

ຂໍສະແດງຄວາມເສຍໃຈນຳຍາດພີ່ນ້ອງຜູ້ເສຍຊີວິດດ້ວຍເທີນ!

ເຫດ (ແຂນຄໍຕາຍ) ເຂດບ້ານແສງສະຫວ່າງ

ຕາມການລາຍງານ ຂອງ ໜ່ວຍກູ້ໄພ ນະຄອນຫຼວງວຽງຈັນ 1624 – ສູນສັ່ງການ ໃຫ້ຮູ້ວ່າ ໃນວັນທີ 24/08/2021 ເວລາ 06:48 ນາທີ ໄດ້ຮັບແຈ້ງເຫດເຂົ້າໝາຍເລກສຸກເສີນ 1624 ວ່າ: ມີເຫດ ຄົນແຂນຄໍຕາຍ (ຢູ່ເຮືອນ) ຢູ່ທີ່ ບ້ານ ແສງສະຫວ່າງ, ເມືອງ ໄຊເສດຖາ ,ນະຄອນຫຼວງວຽງຈັນ.

ໜ່ວຍກູ້ຊີບກູ້ໄພ ນະຄອນຫຼວງ-ສູນສັງການ ຈິ່ງໄດ້ອອກກວດສອບເຫດ ພົບຜູ້ເສຍຊີວິດ 01 ຄົນເປັນເພດຊາຍ ເບື້ອງຕົ້ນຄົນເຈັບໄດ້ເສຍຊີວິດມາເປັນເວລາ 5 ຊົ່ວໂມງແລ້ວ ຈິ່ງມີຄົນມາເຫັນ ທາງໜ່ວຍກູ້ໄພ ໄດ້ມ້ຽນສົບຜູ້ເສຍຊີວິດ ເພື່ອສົ່ງໃຫ້ພີ່ນ້ອງ ທຳພິທີທາງສາດສະໜາ ຕໍ່ໄປ.

ຕາມການລາຍງານ ຂອງ Khammouan News ໃຫ້ຮູ້ວ່າ: ພິທີເຊັນສັນຍາຮັບເໝົາບໍລິການເກັບມ້ຽນ ແລະ ຂົນສົ່ງຂີ້ເຫຍື້ອໃນຂອບເຂດເທສະບານ ເມືອງທ່າແຂກ ລະຫວ່າງ ທ່ານ ແກ້ວລັນດອນ ຈັນທະປານີ ເຈົ້າເມືອງທ່າແຂກ ທັງເປັນປະທານອົງການ ພັດທະນາ ແລະ ບໍລິຫານຕົວເມືອງທ່າແຂກ (ອພບຕ) ຕາງໜ້າໃຫ້ແກ່ຝ່າຍລັດ ກັບ ທ່ານ ພອນປະເສີດ ທຳມະວົງສາ ປະທານບໍລິສັດ ກຣີນເທັກ ຈຳກັດ ຈັດຂຶ້ນໃນວັນທີ 20 ສິງຫາ 2021 ທີ່ຫ້ອງວ່າການ ແຂວງຄຳມ່ວນ ໂດຍມີທ່ານ ປອ. ສົມສະອາດ ອຸ່ນສີດາ ຮອງເຈົ້າແຂວງຄຳມ່ວນ, ມີບັນດາພະແນກການ, ຂະແໜງການອ້ອມຂ້າງແຂວງ ແລະ ພາກສ່ວນກ່ຽວຂ້ອງເຂົ້າຮ່ວມເປັນສັກຂີພະຍານ.

ໂຄງການເກັບມ້ຽນຂີ້ເຫຍື້ອ ຂອງບໍລິສັດກຣີນເທັກ ເປັນຮູບການລົງທຶນພາຍໃນ 100% ໃນມູນຄ່າການລົງທຶນທັງໝົດ 6 ແສນກວ່າໂດລາສະຫະລັດ ເຊິ່ງມີອາຍຸການສຳປະທານ 05 ປີ (2021-2026) ແລະ ສາມາດຕໍ່ສັນຍາໄດ້ຕາມກົດໝາຍວ່າດ້ວຍການສົ່ງເສີມການລົງທຶນ ໂດຍໄດ້ແບ່ງເປັນແຕ່ລະ ໄລຍະໃນການຈັດຕັ້ງປະຕິບັດຄື: ໄລຍະການສຳຫຼວດ, ເກັບກຳຂໍ້ມູນການໃຊ້ບໍລິການຕົວຈິງ ເພື່ອກຳນົດຈຸດ ວາງຖັງຂີ້ເຫຍື້ອ ແລະ ຈຸດໄວ້ຂີ້ເຫຍື້ອຂອງຄົວເຮືອນທີ່ລົດບໍ່ສາມາດເຂົ້າເຖິງ ພ້ອມທັງຂະຫຍາຍການບໍລິການ ໃຫ້ໄດ້ 85-100% ຂອງຈຳນວນ 28 ບ້ານ ແລະ 7.655 ຄົວເຮືອນໃນຂອບເຂດເທສະບານ, ການກະກຽມພາຫະນະກົນຈັກ, ອຸປະກອນຮັບໃຊ້, ຊັບພະຍາກອນມະນຸດ ເຂົ້າໃນການຮັບໃຊ້ວຽກງານ ບໍລິການເກັບມ້ຽນ ແລະ ຂົນສົ່ງຂີ້ເຫຍື້ອ ໃນໄລຍະເວລາ 120 ວັນ ພາຍຫຼັງເຊັນສັນຍາ.

ດ້ານສິດ ແລະ ພັນທະຂອງຝ່າຍບໍລິສັດຜູ້ສຳປະທານ ຕ້ອງສ້າງແຜນເຄື່ອນໄຫວນຳສະເໜີ ເພື່ອຂໍອະນຸມັດຈາກບັນດາ ອົງການລັດທີ່ກ່ຽວຂ້ອງ ແລະ ດຳເນີນກິດຈະການໃຫ້ຖືກຕ້ອງຕາມກົດໝາຍ ແລະ ລະບຽບການຕ່າງໆ, ປຸກລະດົມປະຊາຊົນໃນທ້ອງຖິ່ນເຂົ້າຮ່ວມເຮັດວຽກເປັນຄົນງານໃນໂຄງການ ດ້ວຍຮູບການຕອບແທນແຮງງານ ຕາມກົດໝາຍແຮງງານຂອງ ສປປ ລາວ ໄດ້ກຳນົດໄວ້, ຈັດຫາພາຫະນະລົດຂົນສົ່ງຂີ້ເຫຍື້ອ, ວັດຖຸອຸປະກອນ ແລະ ແຮງງານ ໃຫ້ພຽງພໍສຳລັບບໍລິການ, ເກັບຄ່າບໍລິການຕາມຂໍ້ກຳນົດຂອງປະທານ ອພບຕ ແລະ ຂໍ້ຕົກລົງຂອງທ່ານເຈົ້າແຂວງ ຕາມລາຄາທີ່ໄດ້ກຳນົດ, ມີແຜນປ້ອງກັນໄພອັນຕະລາຍທີ່ອາດຈະເກີດຂຶ້ນ ໃນການປະຕິບັດວຽກງານ, ໃຫ້ຄວາມຮູ້ແກ່ພະນັກງານ ກຳມະກອນ ໃນການປະຖົມພະຍາບານຂັ້ນຕົ້ນ ແລະ ວິທີປ້ອງກັນພະຍາດຕິດແປດຈາກຂີ້ເຫຍື້ອ, ສ້າງສັນຍາກັບຜູ້ໃຊ້ບໍລິການ ໃນການເກັບມ້ຽນ-ຂົນສົ່ງຂີ້ເຫຍື້ອ ຕາມຄົວເຮືອນ, ສຳນັກງານ-ອົງການ, ສະຖານທີ່ບໍລິການອື່ນໆ ໄປຖິ້ມສະໜາມຂີ້ເຫຍື້ອຢ່າງເປັນປົກກະຕິ ແລະ ຕໍ່ເນື່ອງ ຮັບປະກັນບໍ່ໃຫ້ຂີ້ເຫຍື້ອຕົກຄ້າງສະສົມຢູ່ຫຼາຍວັນ ແລະ ປະຕິບັດພັນທະອາກອນຕ່າງໆ ຕາມລະບຽບກົດໝາຍ.