ຕຶກສຸກເສີນ ແລະ ກວດເຂດນອກ ຂອງໂຮງໝໍເສດຖາທິຣາດ ທີ່ໄດ້ຮັບການຊ່ວຍເຫຼືອລ້າຈາກລັດຖະບານຍີ່ປຸ່ນຖືກກໍ່ສ້າງສໍາເລັດແລ້ວ

ຕາມ Embassy of Japan in Laos ລາຍງານວ່າ: 27 ຕຸລາ, ພິທີມອບຮັບໂຄງການກໍ່ສ້າງ ແລະ ປັບປຸງໂຮງໝໍເສດຖາທິຣາດທີ່ແມ່ນໂຄງການສະໜັບສະໜຸນຈາກລັດຖະບານຍີ່ປຸ່ນໄດ້ຖືກຈັດຂຶ້ນທີ່ນະຄອນຫຼວງວຽງຈັນ. ໂຄງການດັ່ງ່ກາວໄດ້ຮັບການຊ່ວຍເຫຼືອລ້າຈາກລັດຖະບານຍີ່ປຸ່ນທີ່ມີມູນຄ່າທັງໝົດປະມານ 17 ລ້ານໂດລາສະຫະລັດ ໃນການກໍ່ສ້າງຕຶກສຸກເສີນ ແລະ ກວດເຂດນອກຂອງໂຮງໝໍເສດຖາທິຣາດ ແລະ ຍົກລະດັບອຸປະກອນການແພດໃຫ້ແກ່ໂຮງໝໍເສດຖາທິຣາດ ແລະ ໂຮງໝໍແຂວງຈໍາປາສັກ.

ໃນພິທີມອບຮັບ, ພະນະທ່ານ ເຄໂຊ ທາເກວາກະ, ເອກອັກຄະຣາຊະທູດຍີ່ປຸ່ນປະຈໍາ ສປປ ລາວ ໄດ້ກ່າວຊົມເຊີຍ ແລະ ຍິນດີຕໍ່ໝາກຜົນສໍາເລັດອັນສໍາຄັນຂອງໂຄງການດັ່ງກ່າວ. ພ້ອມດຽວກັນນັ້ນ, ພະນະທ່ານ ດຣ. ສະໜອງ ທອງສະນະ, ຮອງລັດຖະມົນຕີກະຊວງສາທາລະນະສຸກ, ທ່ານ ດຣ. ຫວັງນະຄອນ ດິດຕະພົງ, ຜູ້ອໍານວຍການໂຮງໝໍເສດຖາທິຣາດ ແລະ ທ່ານ ໂຕຊິໂອະ ຮິໂລເຊະ, ຫົວໜ້າອົງການໄຈກ້າປະຈໍາລາວ ກໍ່ໄດ້ກ່າວຍິນດີ ແລະ ຊົມເຊີຍ ໃນງານເຊັ່ນດຽວກັນ.

ເປົ້າໝາຍໂຄງການດັ່ງກ່າວນີ້ກໍ່ແມ່ນເພື່ອຍົກລະດັບສະພາບແວດລ້ອມດ້ານການແພດໃຫ້ແກ່ທັງສອງໂຮງໝໍເພື່ອຮັບປະກັນການເຂົ້າຮັບການບໍລິການການແພດທີ່ເໝາະສົມຂອງປະຊາຊົນໃນທ້ອງຖິ່ນ ແລະ ສ້າງໂອກາດໃຫ້ແພດໝໍ ແລະ ພະຍາບານໄດ້ຍົກລະດັບຄວາມສາມາດ ແລະ ທັກສະຂອງພວກເຂົາໂດຍການນໍາໃຊ້ອຸປະກອນການແພດທີ່ຖືກມອບ.ທ່ານທູດ ທາເກວາກະ ຍັງໄດ້ກ່າວຕື່ມອີກວ່າ:

“ພວກເຮົາຫວັງເປັນຢ່າງຍິ່ງວ່າການສະໜັັບສະໜຸນໃນຄັ້ງນີ້ຈະເປັນອີກໜຶ່ງກໍາລັງແຮງຊຸກຍູ້ການບັນລຸໜ້າທີ່ອັນສໍາຄັນຂອງໂຮງໝໍເສດຖາທິລາດ ແລະ ໂຮງໝໍແຂວງສະຫວັນນະເຂດ ແລະ ລວມໄປເຖິງການປິ່ນປົວຄົນເຈັບຈາກ Covid-19”.

ຕາມການລາຍງານ ຂອງຄະນະສະເພາະກິດ ປະຈຳວັນທີ 27 ຕຸລາ 2021 ໂດຍທ່ານນາງ ດຣ. ບົວຜັນ ຄຳພາພົງຜ່ານ ຮອງຫົວໜ້າສູນວິເຄາະ ແລະ ລະບາດວິທະຍາ, ກະຊວງສາທາລະນະສຸກ ໃຫ້ຮູ້ວ່າ:

ຄຽງຄູ່ກັບການຕິດເຊື້ອພາຍໃນຊຸມຊົນທີ່ເພີ່ມຂື້ນໃນແຕ່ລະວັນ ຈຳນວນຜູ້ເສຍຊີວິດຈາກພະຍາດໂຄວິດ-19 ກໍ່ເພີ່ມຂື້ນສູງແບບກ້າວກະໂດດ ເຊັ່ນດຽວກັນ ເຫັນໄດ້ຈາກ ໃນຕົ້ນເດືອນຕຸລາ ມີຈຳນວນຜູ້ເສຍຊີວິດສະສົມ ຈາກພະຍາດດັ່ງກ່າວ 20 ຄົນ ມາຮອດວັນທີ 28 ຕຸລາ ຈຳນວນຜູ້ເສຍຊີວິດສະສົມ ແມ່ນ 59 ຄົນ.

ສາເຫດທີ່ຄົນເຈັບຕິດເຊື້ອ ແລ້ວກ້າວສູ່ຂັ້ນວິກິດ ແລະ ເສຍຊີວິດ ສ່ວນໜື່ງ ກໍ່ແມ່ນມີພະຍາດປະຈໍາຕົວ, ເປັນກຸ່ມຜູ້ສູງອາຍຸ ທີ່ສວ່ນໃຫຍ່ບໍ່ໄດ້ຮັບການສັກວັກຊິນ ແລະ ບາງຄົນຕິດເຊື້ອມາໄດ້ໄລຍະໜື່ງແລ້ວ ຈຶ່ງເຂົ້າມາປິ່ນປົວ.

ການມາປິ່ນປົວທີ່ໂຮງໝໍຊ້າ ສົ່ງຜົນໃຫ້ອາການຜູ້ກ່ຽວພັດທະນາສູ່ຂັ້ນວິກິດຢ່າງໄວວາຈົນເຖິງຂັ້ນເສຍຊີວິດໄດ້.

ສະນັ້ນ ຖ້າມີຄົນຕິດເຊື້ອໃນຊຸມຊົນຫຼາຍ ແລະ ລາມເປັນວົງກວ້າງໃນຫຼາຍບ້ານ ຈະເປັນຄວາມສ່ຽງແກ່ຜູ້ທີ່ມີພະຍາດປະຈໍາຕົວ ແລະ ຜູ້ສູງອາຍຸທີ່ສຸດ. ດັ່ງນັ້ນ, ຫາກທ່ານນອນຢູ່ໃນກຸ່ມສ່ຽງ ຫຼື ມີອາການ ຄວນຮີບຮ້ອນພົບແພດ ເພື່ອເກັບຕົວຢ່າງກວດ ເພື່ອສະກັດກັ້ນບໍ່ໃຫ້ອາການເຂົ້າຂັ້ນວິກິດ.

ຕາມການລາຍງານຂອງແຟນເພຈ ຂ່າວ ປກສ ແຂວງ ບໍລິຄຳໄຊ ໃຫ້ຮູ້ວ່າ: ໃນຄັ້ງວັນທີ 20 ຕຸລາ 2021 ເຈົ້າໜ້າທີ່ ກອງບັນຊາການ ປກສ ເມືອງຄໍາເກີດ ແຂວງບໍລິຄໍາໄຊ ໄດ້ສົມທົບກັບເຈົ້າໜ້າທີ່ ປກສ ກຸ່ມທົ່ງແຄະ ກັກຕົວ ທ້າວ ທັນ ອາຍຸ 47 ປີ, ຢູ່ບ້ານ ທົ່ງວຽງຄໍາ ເມືອງຄໍາເກີດ ໃນຂໍ້ຫາ ຄ້າຂາຍຢາເສບຕິດ (ຢາບ້າ) ພ້ອມຢຶດຂອງກາງ (ຢາບ້າ) ຈໍານວນ 1,919 ເມັດ ແລະ ໂທລະສັບ 02 ໜ່ວຍ ມາທໍາການສືບສວນ-ສອບສວນ ຜ່ານການສືບສວນ-ສອບສວນ ທ້າວ ທັນ ໄດ້ໃຫ້ການຮັບສາລະພາບວ່າ: ຜູ້ກ່ຽວແມ່ນໄດ້ເຄື່ອນໄຫວ ຄ້າຂາຍຢາເສບຕິດປະເພດຢາບ້າຢ່າງແທ້ຈິງ, ເລີ່ມຂາຍມາແຕ່ເດືອນ ມິຖຸນາ 2020 ຂາຍມາແລ້ວ 06 ຄັ້ງ, ຢາບ້າທີ່ຜູ້ກ່ຽວຊື້ມາຂາຍແຕ່ລະຄັ້ງແມ່ນໄດ້ໄປຊື້ນໍາ ທ້າວ ກ (ນາມສົມມຸດ) ຢູ່ບ້ານທົ່ງວຽງຄໍາ ເມືອງຄໍາເກີດ ຊື້ຈໍານວນ 05 ຄັ້ງ, ຄັ້ງລະ 01 ຖົງ, ລາຄາຖົງລະ 300,000 ກີບ (ສາມແສນກີບ) ໄດ້ຢາມາແລ້ວຜູ້ກ່ຽວກໍ່ໄດ້ເອົາໄປຂາຍໃຫ້ພວກໄວໜຸ່ມຈໍານວນຫຼາຍຄົນຢູ່ໃນເທດສະບານເມືອງ ຄໍາເກີດ, ລາຄາເມັດລະ 5,000 ກີບ (ຫ້າພັນກີບ) ຄັ້ງສຸດທ້າຍ ເວລາປະມານ 15 ໂມງ ຂອງວັນທີ 19 ຕຸລາ 2021 ຜູ້ກ່ຽວໄດ້ຍ່າງໄປຊື້ເຄື່ອງຍ່ອຍຢູ່ຮ້ານນາງ ຂັນດອກໄມ້ ບ້ານ ທົ່ງວຽງຄໍາ ເມືອງ ຄໍາເກີດ, ນາງຂັນດອກໄມ້ ໄດ້ຖາມຜູ້ກ່ຽວວ່າ: ຢາກຂາຍຢາບ້າບໍ ຜູ້ກ່ຽວຈຶ່ງຕອບວ່າຂາຍ ຈາກນັ້ນນາງ ຂັນດອກໄມ້ ຈຶ່ງໄດ້ຂາຍຢາບ້າໃຫ້ທ້າວ ທັນ ຈໍານວນ 10 ຖົງໃນລາຄາ 3,500,000 ກີບ ( ສາມລ້ານຫ້າແສນກີບ) ແຕ່ບໍທັນຈ່າຍເງີນ, ຖ້າຂາຍໝົດແລ້ວຈື່ງຈ່າຍເງີນຕາມພາຍຫຼັງ, ເເລ້ວຜູ້ກ່ຽວກໍ່ໄດ້ນໍາຢາບ້າຈໍານວນດັ່ງກ່າວໄປຂາຍໃຫ້ໄວໜຸ່ມຈໍານວນຫຼາຍຄົນ ຢູ່ກຸ່ມທົ່ງແຄະແລ້ວຈໍານວນ 19 ເມັດ, ຍັງເຫຼືອ 1,919 ເມັດ.

ມາຮອດເວລາປະມານ 08 ໂມງ ຂອງວັນທີ 20 ຕຸລາ 2021 ຈຶ່ງຖືກເຈົ້າໜ້າທີ່ ປກສ ເມືອງຄໍາເກີດກັກຕົວມາສືບສວນ-ສອບສວນ ຮອດເວລາປະມານ 16 ໂມງຂອງວັນດຽວກັນເຈົ້າໜ້າທີ່ ປກສ ເມືອງຄໍາເກີດ ຈື່ງໄດ້ສົມທົບກັບເຈົ້າໜ້າທີ່ພາກສ່ວນທີ່ກ່ຽວຂ້ອງເຂົ້າກວດຄົ້ນເຮືອນ ຂອງນາງຂັນດອກໄມ້ ຕາມການຊັກທອດຂອງທ້າວທັນ ພົບເຫັນຢາບ້າຈໍານວນ 05 ມັດ, ມີ 10,000 ເມັດ ແລະ ປຶນສັ້ນ 01 ກະບອກ ພ້ອມກັກຕົວນາງຂັ້ນດອກໄມ້ ມາດໍາເນີນການສືບສວນ-ສອບສວນເຊີ່ງຜູ້ກ່ຽວໄດ້ໃຫ້ການຊັດທອດຫາພັກພວກທີ່ຮ່ວມຂະບວນການຕື່ມອີກ, ປະຈຸບັນເຈົ້າໜ້າທີ່ຕໍາຫຼວດພວມສືບຕໍ່ຂະຫຍາຍຜົນເພື່ອນໍາຈັບຕົວກຸ້ມແກ້ງຮ່ວມຂະບວນການດຽວກັນມາດໍາເນີນຄະດີຕາມກົດໝາຍໃນຂັ້ນຕໍ່ໄປ.

ກະຊວງແຮງງານ ແລະສະຫວັດດີການສັງຄົມ ມອບລູກລະເບີດບໍ່ທັນແຕກທີ່ຕົກຄ້າງ ແລະສຳພາວຸດປອດທາດແຕກ ໃຫ້ກະຊວງປ້ອງກັນປະເທດ

ຕາມການລາຍງານ ຂອງ Lao National Radio ໃຫ້ຮູ້ວ່າ: ຄະນະກຳມະການຄຸ້ມຄອງແຫ່ງຊາດ ເພື່ອແກ້ໄຂບັນຫາລະເບີດບໍ່ທັນແຕກທີ່ຕົກຄ້າງຢູ່ລາວ ກະຊວງແຮງງານ ແລະສະຫວັດດີການສັງຄົມ ມອບລູກລະເບີດບໍ່ທັນແຕກທີ່ຕົກຄ້າງ ແລະສຳພາວຸດທີ່ປອດທາດແຕກ ໃຫ້ກະຊວງປ້ອງກັນປະເທດ ໃນຕອນເຊົ້າວັນທີ 28 ຕຸລາ 2021, ທີ່ຫໍພິພິດທະພັນປະຫວັດສາດກອງທັບ ໂດຍການເຂົ້າຮ່ວມຂອງທ່ານນາງ ໃບຄໍາ ຂັດຕິຍະ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ແລະພົນໂທ ທອງລອຍ ສິລິວົງ ຮອງລັດຖະມົນຕີກະຊວງປ້ອງກັນປະເທດ, ຫົວໜ້າກົມໃຫ່ຍການເມືອງກອງທັບ ມີພາກສ່ວນກ່ຽວຂ້ອງທັງສອງຝ່າຍເຂົ້າຮ່ວມ.

ໃນພິທີທ່ານ ໂຈມແຍງ ແພງທອງສະຫວັດ, ຫົວໜ້າຫ້ອງການຄະນະກຳມະການຄຸ້ມຄອງແຫ່ງຊາດ ເພື່ອແກ້ໄຂບັນຫາລະເບີດບໍ່ທັນແຕກທີ່ຕົກຄ້າງຢູ່ລາວ ຊີ້ໃຫ້ເຫັນວ່າ: ລາວ ເປັນປະເທດທີ່ຖືກຖີ້ມລະເບີດໜັກໜ່ວງທີ່ສຸດໃນໂລກເມື່ອສະເລ່ຍໃສ່ຫົວຄົນ, ໄລຍະສົງຄາມອິນດູຈີນ ລະຫວ່າງ ປີ 1964 ເຖິງ 1973 ສປປ ລາວກາຍເປັນສະໝໍລະພູມສູ້ຮົບທາງພາກພື້ນດິນ ແລະ ທາງອາກາດຢ່າງຮ້າຍແຮງ, ຈັກກະພັດອາເມລິກາໄດ້ນໍາໃຊ້ຍົນມາຖີ້ມລະເບີດ ລົງໃສ່ດິນແດນຂອງ ສປປ ລາວ ຈໍານວນ 580,000 ຖ້ຽວບິນ ໃນທຸກໆ 8 ນາທີ່ຕະຫຼອດ 24 ຊົ່ວໂມງ ເປັນເວລາ 9 ປີ, ມີລະເບີດຖືກຖີ້ມຫຼາຍກວ່າ 2 ລ້ານໂຕນ ໃນນັ້ນມີລະເບີດລູກຫວ່ານ ຫຼາຍກວ່າ 270 ລ້ານໜ່ວຍ ແລະ ຄາດວ່າມີປະມານ 30% ຫຼື 80 ລ້ານໜ່ວຍ ຂອງລະເບີດດັ່ງກ່າວຍັງບໍ່ທັນແຕກ ເປັນເນື້ອທີ່ 87,000 ກິໂລຕາແມັດ ທີ່ເປັນອຸປະສັກອັນໃຫຍ່ຫຼວງໃນການພັດທະນາເສດຖະກິດ-ສັງຄົມ ກໍ່ຄືການດໍາລົງຊີວິດຂອງປະຊາຊົນລາວບັນດາເຜົ່າໃນຂອບເຂດທົ່ວປະເທດຈົນຮອດທຸກມື້ນີ້, ສະນັ້ນຈຸດປະສົງໃນການມອບລູກລະເບີດບໍ່ທັນແຕກທີ່ຕົກຄ້າງ ແລະສຳພາວຸດທີ່ປອດທາດແຕກ ໃຫ້ກະຊວງປ້ອງກັນປະເທດໃນຄັ້ງນີ້ ເພື່ອນໍາໃຊ້ເຂົ້າໃນການວາງສະແດງຢູ່ຫໍພິທິທະພັນກອງທັບປະຊາຊົນລາວ ກໍ່ຄືການສຶກສາຮຽນຮູ້ ປູກຈິດສໍານຶກກ່ຽວກັບການຕໍ່່ສູ້ອັນພິລາດອາດຫານຂອງກອງທັບປະຊາຊົນປະຕິວັດລາວ.

ທ່ານ ໂຈມແຍງ ແພງທອງສະຫວັດ ໃຫ້ຮູ້ຕື່ມວ່າ: ລູກລະເບີດບໍ່ທັນແຕກທີ່ຕົກຄ້າງ ແລະ ສຳພາວຸດທີ່ປອດທາດແຕກທີ່ມອບໃຫ້ຫໍພິທິທະພັນປະຫວັດສາດກອງທັບປະຊາຊົນລາວ, ກະຊວງປ້ອງກັນປະເທດ ໃນຄັ້ງນີ້ປະກອບມີລູກບົ່ມໃຫ່ຍ, ບົ່ມບີ, ລູກປືນຄົກ, ລູກປືນໃຫຍ່, ລູກຈະຫຼວດ, ສໍາພະວຸດອື່ນໆອີກຈໍານວນ 14 ລາຍການ ນອກຈາກນີ້, ຍັງໄດ້ມອບຂໍ້ມູນທີ່ຄໍາຄັນ ແລະຈໍາເປັນຈໍານວນໜຶ່ງເຊັ່ນ: ແຜນທີ່ການຖິ້ມລະເບີດຂອງ ສ. ອາເມລິກາ, ແຜ່ນປ້າຍໂຄສະນາກ່ຽວກັບລະເບີດລູກຫວ່ານ, ແຜນທີ່ປະຕິບັດງານຂອງອົງການປະຕິບັດງານເພື່ອມະນຸດສະທໍາ ແກ້ໄຂບັນຫາລູກລະເບີດບໍ່ທັນແຕກ, ແຜ່ນປ້າຍໂຄສະນາສຶກສາຄວາມສ່ຽງໄພຈາກລູກລະເບີດບໍ່ທັນແຕກ, ຟິມວີດີໂອ ກ່ຽວກັບການສົ່ງເສີມການແກ້ໄຂບັນຫາ ລບຕ ແລະ ຂໍ້ມູນກ່ຽວກັບການຖິ້ມລະເບີດຂອງ ສ.ອາເມລິກາຢູ່ ສປປ ລາວ. ໃນຕໍ່ໜ້າຄະນະກໍາມະການຄຸ້ມຄອງແຫ່ງຊາດ ເພື່ອແກ້ໄຂບັນຫາລະເບີດບໍ່ທັນແຕກທີ່ຕົກຄ້າງຢູ່ລາວ ກະຊວງແຮງງານ ແລະສະຫວັດດີການສັງຄົມ ຈະສືບຕໍ່ປະສານສົມທົບກັບອົງການປະຕິບັດແກ້ໄຂບັນຫາລະເບີດບໍ່ທັນແຕກ ໂດຍສະເພາະແມ່ນໂຄງການເກັບກູ້ລະເບີດແຫ່ງຊາດ ເພື່ອຊອກ ແລະ ແກ້ໄຂລະເບີດລະເບີດບໍ່ທັນແຕກທີ່ຕົກຄ້າງມອບໃຫ້ແກ່ ຫໍພິທິທະພັນປະຫັວດສາດກອງທັບຕື່ມອີກ.

ການກໍ່ສ້າງຂົວນໍ້າພະນາຍ 3 ມີຄວາມຄືບໜ້າໃກ້ຈະສໍາເລັດ ແລະ ເປີດນໍາໃຊ້ໃນອີກບໍ່ດົນນີ້

ຂົວນໍ້າພະນາຍ 3 ມີ ທີ່ຕັ້ງ ຢູ່ບ້ານເກິນກາງ, ເມືອງທຸລະຄົມ, ແຂວງວຽງຈັນ ເສັ້ນທາງແຕ່ 3 ແຍກຄຸ້ມໝື່ນໝັ້ນ ລັດໄປໃສ່ທາງໜ້າທະນາຄານສົ່ງເສີມກະສິກໍາ ໜ່ວຍບໍລິການເມືອງທຸລະຄົມ, ໂດຍຜ່ານທາງຫລັງຂອງສໍານັກງານປົກຄອງເມືອງ ຮັບເໝົາໂດຍ ບໍລິສັດ ຟ້າໃສ ການຊ່າງ ກໍ່ສ້າງຂົວທາງ ແລະ ເຄຫາສະຖານ ຈໍາກັດ, ເລີ່ມລົງມືກໍ່ສ້າງ ວັນທີ 24 ກັນຍາ 2021 ເປັນຕົ້ນມາ ໂດຍການເຫັນດີເຫັນພ້ອມຂອງພາກສ່ວນກ່ຽວຂ້ອງ ແລະ ປະຊາຊົນຊາວເມືອງ, ຈຸດປະສົງຂອງການກໍ່ສ້າງຂົວດັ່ງກ່າວນີ້ ເພື່ອຫລຸດຜ່ອນການສັນຈອນແອອັດ, ເຮັດໃຫ້ການເດີນທາງມີຄວາມສະດວກສະບາຍຂຶ້ນກວ່າເກົ່າ, ເປັນຂົວສໍາຮອງໃຊ້ສະເພາະລົດເບົາທີ່ນໍ້າໜັກບໍ່ເກີນ 8 ໂຕ່ນ, ມີຮາວເຫຼັກທັງສອງຟາກຂ້າງ ແລະ ຮາວກັ້ນລວງສູງ 3 ຈຸດ, ຄວາມຍາວ 33 ແມັດ, ກວ້າງ 4 ແມັດ, ເປັນຂົວເກົ່າທີ່ສະມັດຕະພາບຍັງໃຊ້ງານໄດ້ດີ ໄດ້ຜ່ານການກວດກາເຕັກນິກມາດຖານ ແລະ ຄຸນນະພາບຈາກ ຂະແໜງໂຍທາທິການ ແລະ ຂົນສົ່ງ, ສໍາລັບຊິ້ນສ່ວນອຸປະກອນຂອງຂົວທີ່ບໍ່ພຽງພໍ ແມ່ນໄດ້ຮັບການສະໜອງຈາກພະແນກໂຍທາທິການ ແລະ ຂົນສົ່ງແຂວງວຽງຈັນ, ຂົວແຫ່ງນີ້ຈະກາຍເປັນຂົວອະນຸລັກຮູບແບບຂົວເບເລ່ ເປັນອະນຸສອນໄປອີກຍາວນານ.

ຕາມການລາຍງານຂອງ ທ່ານ ພົມມະສອນ ວົງໄຊ ປະທານບໍລິສັດຮັບເໝົາໃຫ້ຮູ້ວ່າ ພາຍຫລັງໄດ້ຮັບຂໍ້ຕົກລົງອະນຸມັດ ແລະ ໃບສັ່ງວຽກແລ້ວ ຕົນເອງໄດ້ເອົາໃຈໃສ່ຊີ້ນໍາ-ນໍາພາພະນັກງານວິຊາການຂອງບໍລິສັດ ຮີບຮ້ອນເລັ່ງມືປະຕິບັດທຸກໜ້າວຽກຕາມແບບໂຄງສ້າງ, ຕາມເຕັກນິກ ແລະ ຕາມວິຊາສະເພາະ ເຖິງວ່າຈະມີຄວາມຫຍຸ້ງຍາກບາງວຽກ ກໍ່ໄດ້ອົດທົນຜ່ານຜ່າຈຶ່ງເຮັດໃຫ້ວຽກງານສໍາເລັດຕາມຈຸດປະສົງ ແລະ ຄາດໝາຍທີ່ວາງໄວ້, ລວມໄລຍະເວລາກໍ່ສ້າງ-ປະກອບຂົວ 33 ວັນ, ນອກຈາກນັ້ນສໍາລັບວຽກເພີ່ມເຕີມທີ່ບໍ່ນອນຢູ່ໃນສັນຍາ ເຊັ່ນ: ວຽກອະນາໄມອ້ອມກໍາແພງສໍານັກງານປົກຄອງເມືອງ, ອະນາໄມທາງຮ່ອມ, ເຫຼົ່າທາງ ແລະ ລວງຮ່ອງ ນໍ້າລະບາຍແຄມທາງແມ່ນເປັນການປະກອບສ່ວນຊ່ວຍເຫຼືອລ້າ, ພາຍໃຕ້ການຕິດຕາມຊຸກຍູ້ຊີ້ນໍາຢ່າງຕໍ່ເນື່ອງຂອງວິຊາການຂະແໜງໂຍທາທິການ ແລະ ຂົນສົ່ງ, ການນໍາເມືອງ ແລະ ພາກສ່ວນກ່ຽວຂ້ອງ, ປະຊາຊົນໃກ້ຄຽງກໍ່ເຫັນດີສະໜັບສະໜູນ, ຕື່ນຕົວຫຍັບຍ້າຍສິ່ງກີດຂວາງ ຈຶ່ງເຮັດໃຫ້ການກໍ່ສ້າງດໍາເນີນໄປດ້ວຍດີ ແລະ ວຽກງານມີຄວາມຄືບໜ້າວ່ອງໄວຕາມແຜນການ; ໂອກາດທີ່ ທ່ານ ນາງ ວົງເດືອນ ວັດຕະໂສ ເຈົ້າເມືອງທຸລະຄົມ ແລະ ທ່ານ ກິຄໍາ ວົງໄຊ ຮອງເຈົ້າເມືອງທຸລະຄົມ ໄດ້ລົງໄປຕິດຕາມຊຸກຍູ້, ກວດກາ ແລະ ໃຫ້ທິດຊີ້ນໍາຕໍ່ບໍລິສັດຮັບເໝົາ.

ໃນວັນທີ 27 ຕຸລາ 2021 ນີ້ ທ່ານ ພົມມະສອນ ວົງໄຊ ປະທານບໍລິສັດ ໄດ້ລາຍງານໜ້າວຽກທີ່ຍັງຄ້າງເລັກນ້ອຍອີກຈໍານວນໜຶ່ງທີ່ຈະຕ້ອງໄດ້ເລັ່ງລົງມືຈັດຕັ້ງປະຕິບັດໃຫ້ສໍາເລັດໂດຍໄວ ເປັນຕົ້ນ: ວຽກອະນາໄມ, ທາສີ ແລະ ຄວາມຮຽບຮ້ອຍດ້ານອື່ນໆ ເຊິ່ງຄາດວ່າການຈັດພິທີເປີດ-ມອບຮັບ ຈະມີຂຶ້ນໃນອີກບໍ່ດົນນີ້ຕາມຄວາມພ້ອມຂອງການນໍາເມືອງ, ທ່ານເຈົ້າເມືອງ ແລະ ຮອງເຈົ້າເມືອງທຸລະຄົມ ໄດ້ກ່າວສະແດງຄວາມຍ້ອງຍໍຊົມເຊີຍຕໍ່ ທ່ານ ພົມມະສອນ ວົງໄຊ ທີ່ໄດ້ມີຄວາມຮັບຜິດຊອບສູງ ເອົາໃຈໃສ່ປະຕິບັດທຸກໜ້າວຽກຢ່າງເປັນເຈົ້າການ ຈົນເຮັດໃຫ້ວຽກງານສໍາເລັດຕາມເວລາທີ່ກໍານົດ ແລະ ສືບຕໍ່ປະຕິບັດວຽກຄ້າງຄາໃຫ້ສໍາເລັດໃນເວລາອັນຄວນ ເພື່ອໃຫ້ໄດ້ຈັດພິທີມອບຮັບ ແລະ ເປີດນໍາໃຊ້ຢ່າງເປັນທາງການໃນອີກບໍ່ດົນນີ້.

ຂ່າວ: ຫ້ອງການ ຖວທ ເມືອງທຸລະຄົມ

ຕາມການລາຍງານ ຂອງປ້ອງກັນຄວາມສະຫງົບນະຄອນຫຼວງວຽງຈັນ ໃຫ້ຮູ້ວ່າ: ໃນເວລາ 20:30 ໂມງ ວັນທີ 25 ຕຸລາ 2021 ພະແນກຕຳຫຼວດສະກັດກັ້ນ ແລະ ຕ້ານອັກຄີໄພ ນະຄອນຫຼວງວຽງຈັນ ໄດ້ຮັບແຈ້ງວ່າ: ມີເຫດໄຟໄໝ້ເຮືອນປະຊາຊົນ, ຢູ່ບ້ານຮ່ອງໄກ່ແກ້ວ ເມືອງຈັນທະບູລີ ນວ, ຫຼັງຈາກໄດ້ຮັບແຈ້ງ ພະແນກຕຳຫຼວດສະກັດກັ້ນ ແລະ ຕ້ານ ອັກຄີໄພ ນະຄອນຫຼວງວຽງຈັນ ກໍ່ໄດ້ກຽມຄວາມພ້ອມ ກຳລັງພົນ ແລະ ພາຫະນະ ພ້ອມທັງປະສານສົມທົບກັບ ກົມຕຳຫຼວດສະກັດກັ້ນ ແລະ ຕ້ານ ອັກຄີໄພ ກະຊວງປ້ອງກັນຄວາມສະຫງົບ, ອອກໄປຫາຈຸດເກີດເຫດ ໂດຍມີ ລົດມອດໄຟ 3 ຄັນ, ໃຊ້ເວລາປະມານ 1 ຊົ່ວໂມງ ຈື່ງສາມາດດັບມອດໄຟໄດ້.

ພັທ ຄຳເພັດ ດາລາວົງ ຫົວໜ້າພະແນກຕຳຫຼວດ ສະກັດກັ້ນ ແລະ ຕ້ານ ອັກຄີໄພ ນວ ໃຫ້ຮູ້ວ່າ: ເຮືອນຫຼັງທີ່ເກີດເຫດດັ່ງກ່າວ ແມ່ນເປັນເຮືອນຂອງ ແມ່ຕູ້ ແວງ ທອງວັນ ອາຍຸ 73 ປີ, ເປັນເຮືອນ 2 ຊັ້ນ, ຊັ້ນລຸ່ມກໍ່ດ້ວຍສີມັງ, ຊັ້ນສອງແອ້ມດ້ວຍໄມ້, ມຸງສັງກະສີ, ຈຸດທີ່ເກີດເຫດແມ່ນຢູ່ຊັ້ນ 2 ຂອງເຮືອນ ເປັນຫ້ອງນອນຂອງ ແມ່ຕູ້ ແວງ, ພາຍໃນຫ້ອງນອນມີເຄື່ອງໃຊ້ໄຟຟ້າຈຳນວນໜື່ງ ໃນມື້ທີ່ເກີດເຫດ ວັນທີ 25 ຕຸລາ 2021 ເວລາ 19 : 00 ໂມງ ຜູ້ກ່ຽວບໍ່ໄດ້ຢູ່ເຮືອນ ໃນຂະນະທີ່ໄຟພວມລຸກໄໝ້ໄດ້ມີຫຼານຊາຍ ກັບ ໝູ່ ອີກໜື່ງຄົນ ໄດ້ຍີນສຽງຄົນຮ້ອງໃສ່ວ່າມີໄຟໄໝ້ເຮືອນ ເມື່ອໄດ້ຍີນຜູ້ກ່ຽວກັບໝູ່ໄດ້ພາກັນແລ່ນຂື້ນໄປເບີ່ງຊັ້ນສອງ ເຫັນປະຕູຫ້ອງນອນ ແມ່ຕູ້ ແວງ ໄຂປະໄວ້ເຫັນຄວັນໄຟກຸ້ມຢູ່ໃນຫ້ອງ ແລະ ຈຸດທີ່ເກີດປະກາຍໄຟ ແມ່ນຢູ່ກ້ອງໂທລະພາບ ເຊີ່ງເປັນປັກໄຟ ຜູ້ກ່ຽວຈິ່ງແລ່ນລົງມາງັບສະວີກໄຟຟ້າຢູ່ຊັ້ນລຸ່ມ ແລ້ວພາກັນຫິ້ວຄຸນ້ຳຂື້ນໄປເພື່ອຈະດັບມອດໄຟ ແຕ່ບໍ່ສາມາດດັບໄຟໄດ້ ເພາະໄຟເລີ່ມໄໝ້ແຮງ ຫຼັງຈາກນັ້ນຈິ່ງພາກັນອອກໄປນອກເຮືອນ ແລະ ອີກປະມານ 15 ນາທີ ລົດມອດໄຟກໍ່ມາເຖີງທີ່ເກີດເຫດ, ສາເຫດທີ່ເກີດອັກຄີໄພໃນຄັ້ງນີ້ເກີດຍ້ອນ ໄຟຟ້າຊ໊ອດ ຈາກປັກໄຟໂທລະພາບ ລວມມູນຄ່າຄວາມເສຍຫາຍ 250.000.000 ( ສອງຮ້ອຍຫ້າສິບລ້ານກີບ ).

ພະແນກຕຳຫຼວດ ສະກັດກັ້ນ ແລະ ຕ້ານ ອັກຄີໄພ ນວ, ຈິ່ງຮຽກຮ້ອງມາຍັງປະຊາຊົນ ຈົ່ງເປັນເຈົ້າການມີສະຕິໃນການນຳໃຊ້ໄຟຟ້າ ຖອດປັກໄຟທຸກຄັ້ງກ່ອນອອກຈາກເຮຶອນ, ການນຳໃຊ້ຟືນ-ໄຟ ແຕ່ງຢູ່ຄົວກີນ ການຈູດຂີ້ເຫຍື້ອ ແລະ ອື່ນໆ ຄວນກວດເບີ່ງຄືນວ່າດັບມອດດີແລ້ວຫຼືບໍ່ ເພື່ອຄວາມປອດໄພ ທາງດ້ານຊີວິດ ແລະ ຊັບສີນຂອງທ່ານ.

ຕອນເຊົ້າວັນທີ 27 ຕຸລາ 2021 ທ່ານ ພັນຄໍາ ວິພາວັນ, ນາຍົກລັດຖະມົນຕີ ແຫ່ງ ສປປ ລາວ ໄດ້ສືບຕໍ່ນໍາພາຄະນະຜູ້ແທນລາວເຂົ້າຮ່ວມກອງປະຊຸມສຸດຍອດອາຊຽນ-ຍີ່ປຸ່ນ ຄັ້ງທີ 24 ແລະ ກອງປະຊຸມສຸດຍອດອາຊຽນ-ອົດສະຕຣາລີ ຄັ້ງທີ 1 ໂດຍຜ່ານຮູບແບບທາງໄກ. ສໍາລັບກອງປະຊຸມສຸດຍອດອາຊຽນ-ຍີ່ປຸ່ນ ຄັ້ງທີ 24 ພາຍໃຕ້ການເປັນປະທານຮ່ວມຂອງ ສົມເດັດ ຊຸນຕານ ຮາຈິ ຮັດຊານານ ໂບນເກຍ ແຫ່ງ ບຣູໄນ ແລະ ທ່ານ ກິຊິດະ ຟູມິໂອະ, ນາຍົກລັດຖະມົນຕີ ຍີ່ປຸ່ນກອງປະຊຸມ ໄດ້ຕີລາຄາສູງຕໍ່ການຮ່ວມມືອາຊຽນ-ຍີ່ປຸ່ນ ເຊິ່ງໄດ້ຮັບຜົນສຳເລັດທີ່ສຳຄັນຫຼາຍດ້ານ.

ຜູ້ນຳອາຊຽນ ໄດ້ສະແດງຄວາມຂອບໃຈຕໍ່ການປະກອບສ່ວນເຂົ້າໃນການສ້າງປະຊາຄົມອາຊຽນຂອງ ຍີ່ປຸ່ນ ໂດຍສະເພາະ ການຊ່ວຍເຫຼືອ ໃນດ້ານການພັດທະນາຊັບພະຍາກອນມະນຸດ, ການຈັດຕັ້ງປະຕິບັດແຜນແມ່ບົດເພື່ອການເຊື່ອມຈອດອາຊຽນ 2025 ແລະ ຂໍ້ລິເລີ່ມເພື່ອການເຊື່ອມໂຍງອາຊຽນ ສະບັບທີ 4 ກໍ່ຄື ການຊ່ວຍເຫຼືອໃນການຮັບມືກັບການແຜ່ລະບາດຂອງພະຍາດໂຄວິດ-19, ໂດຍສະເພາະ ການປະ ກອບສ່ວນຂອງ ຍີ່ປຸ່ນ ເຂົ້າໃນກອງທຶນອາຊຽນເພື່ອຮັບມືກັບການແຜ່ລະບາດຂອງພະຍາດໂຄວິດ-19 ຈໍານວນ 1 ລ້ານໂດລາສະຫະລັດ ແລະ 50 ລ້ານໂດລາສະຫະລັດ ໃນການສ້າງຕັ້ງສູນອາຊຽນ ວ່າດ້ວຍ ການຊ່ວຍເຫຼືອສຸກເສີນຂະແໜງສາທາລະນະສຸກ ແລະ ພະຍາດລະບາດ, ກໍ່ຄືການສະໜອງວັດຖຸອຸປະກອນທາງການແພດ ແລະ ສະໜອງວັກຊີນ ໃຫ້ແກ່ປະເທດສະມາຊິກອາຊຽນ ໂດຍສະເພາະ ສປປ ລາວ.

ຍີ່ປຸ່ນ ໄດ້ສືບຕໍ່ໃຫ້ຄຳໝາຍໝັ້ນທີ່ຈະໃຫ້ການຊ່ວຍ ເຫຼືອອາຊຽນ ໃນການສະກັດກັ້ນ, ຄວບຄຸມ ແລະ ແກ້ໄຂບັນຫາການແຜ່ລະບາດຂອງພະຍາດໂຄວິດ-19 ກໍຄື ການຟື້ນຟູລະບົບເສດຖະກິດຫຼັງໂຄວິດ-19, ສືບຕໍ່ເພີ່ມທະວີການຮ່ວມມືໃນການສົ່ງເສີມການເຊື່ອມໂຍງເສດຖະກິດພາກພື້ນ, ການຫັນເປັນດິຈິຕອນ, ການຊ່ວຍເຫຼືອດ້ານການພັດທະນາຊັບພະຍາ ກອນມະນຸດ, ນະວັດຕະກຳ ແລະ ອື່ນໆ. ໃນໂອກາດນີ້, ທ່ານ ພັນຄໍາ ວິພາວັນ ໄດ້ສະແດງຄວາມຊົມເຊີຍ ແລະ ຕີລາຄາສູງ ຕໍ່ການພົວພັນຮ່ວມມືສອງຝ່າຍ ລາວ-ຍີ່ປຸ່ນ, ພ້ອມທັງສະແດງຄວາມຂອບໃຈມາຍັງລັດຖະບານ ແລະ ປະຊາຊົນ ຍີ່ປຸ່ນ ທີ່ໄດ້ສືບຕໍ່ ໃຫ້ການ ສະໜັບສະໜູນຊ່ວຍເຫຼືອແກ່ ສປປ ລາວ ອັນໄດ້ປະກອບສ່ວນສໍາຄັນເຂົ້າໃນການພັດທະນາໂຄງລ່າງພື້ນຖານ ແລະ ເສດຖະກິດ-ສັງຄົມ ຂອງ ປະເທດຕະຫຼອດມາ.

ສ່ວນກອງປະຊຸມສຸດຍອດ ອາຊຽນ-ອົດສະຕຣາລີ ຄັ້ງທີ 1: ພາຍໃຕ້ການເປັນປະທານຮ່ວມຂອງ ສົມເດັດ ຊຸນຕານ ຮາຈິ ຮັດຊານານ ໂບນເກຍ ແຫ່ງ ບຣູໄນ ແລະ ທ່ານ ສະກອ໊ດ ມໍຣິສັນ ນາຍົກລັດຖະມົນຕີ ອົດສະຕຣາລີຜູ້ນຳອາຊຽນ ແລະ ອົດສະຕຣາລີ ໄດ້ຈັດກອງປະຊຸມສຸດຍອດອາຊຽນ-ອົດສະຕຣາລີ ແບບປະຈຳປີ ເປັນຄັ້ງທຳອິດ ຫຼັງຈາກທີ່ສອງຝ່າຍໄດ້ເຫັນດີຮ່ວມກັນໃນປີ 2020 ທີ່ຜ່ານມາ.

ໃນຖານະທີ່ ສປປ ລາວ ເປັນປະເທດປະສານງານ ການພົວພັນຮ່ວມມືອາຊຽນ-ອົດສະຕຣາລີ, ທ່ານ ພັນຄຳ ວິພາວັນ, ນາຍົກລັດຖະມົນຕີ ແຫ່ງ ສປປ ລາວ ໄດ້ຮັບກຽດອ່ານບົດຄໍາເຫັນລວມ (ASEAN Common Statement) ຂອງ ອາຊຽນ ຕໍ່ກອງປະຊຸມສຸດຍອດດັ່ງກ່າວ, ເຊິ່ງໄດ້ສະແດງຄວາມເພິ່ງພໍໃຈຕໍ່ການພົວພັນ-ຮ່ວມມືອາຊຽນ-ອົດສະຕຣາລີ ໃນໄລຍະຜ່ານມາ, ເຊິ່ງອົດສະຕຣາລີ ໄດ້ໃຫ້ການຊ່ວຍເຫຼືອ ແລະ ສະໜັບສະໜູນ ອາຊຽນ ໃນຂົງເຂດຕ່າງໆ ເຊັ່ນ: ດ້ານການສຶກສາ, ການເຊື່ອມໂຍງພາກພື້ນ, ການເຊື່ອມຈອດອາຊຽນ, ການຮັດແຄບຄວາມແຕກໂຕນດ້ານການພັດທະນາ ແລະ ການຊ່ວຍເຫຼືອໃນການຮັບມືກັບການແຜ່ລະບາດຂອງພະຍາດໂຄວິດ-19.

ພິເສດ, ກອງປະຊຸມໄດ້ສະແດງຄວາມຍິນດີຕໍ່ການປະກາດໃຫ້ການຊ່ວຍເຫຼືອຂອງ ລັດຖະບານອົດສະຕຣາລີ ຈຳ ນວນ 1 ລ້ານໂດລາອົດສະຕຣາລີ ເຂົ້າໃນກອງທຶນອາຊຽນເພື່ອຮັບມືກັບພະຍາດໂຄວິດ-19, 1 ລ້ານໂດລາອົດສະຕຣາລີ ເຂົ້າໃນແຜນຟື້ນຟູຮອບດ້ານຂອງອາຊຽນ ແລະ 21 ລ້ານໂດລາອົດສະຕຣາລີ ເພື່ອສະໜັບສະໜູນການສ້າງຕັ້ງສູນອາຊຽນ ວ່າດ້ວຍ ການຊ່ວຍເຫຼືອສຸກເສີນຂະແໜງສາທາລະນະສຸກ ແລະ ພະຍາດແຜ່ລະບາດ.ກອງປະຊຸມ ໄດ້ໃຫ້ຄຳໝາຍໝັ້ນທີ່ຈະສືບຕໍ່ຮ່ວມມືໃນບາງຂົງເຂດບູລິມະສິດ ເຊັ່ນ: ສາທາລະນະສຸກ ລວມທັງ ການຮັບມືກັບພະຍາດໂຄວິດ-19; ການຍົກລະດັບການເຊື່ອມໂຍງເສດຖະກິດພາກພື້ນໂດຍການຫັນເປັນດີຈິຕອນ; ການສຶກສາ, ການເຊື່ອມຈອດອາຊຽນ, ການຈັດຕັ້ງປະຕິບັດຂໍ້ລິເລີ່ມເພື່ອການເຊື່ອມໂຍງອາຊຽນ ສະບັບທີ 4 ແຕ່ປີ 2021-2025; ການພັດທະນາແບບຍືນຍົງ ແລະ ການພັດທະນາເຄືອຂ່າຍຕົວເມືອງອັດສະລິຍະອາຊຽນ. ໃນໂອກາດກອງປະຊຸມ ບັນດາຜູ້ນຳອາຊຽນ ແລະ ອົດສະຕຣາລີ ໄດ້ເຫັນດີໃນດ້ານຫຼັກການ ໃນການຍົກລະດັບການຮ່ວມມືຈາກການເປັນຄູ່ຮ່ວມຍຸດທະສາດອາຊຽນ-ອົດສະຕຣາລີ ຂື້ນສູ່ລະດັບການ.

ຂໍ້ມູນ: Lao National Radio