ພະຍາກອນອາກາດ ປະຈໍາວັນທີ 10 ພະຈິກ 2021 ອັບເດດເວລາ 16:00 ໂມງ

ມວນອາກາດເຢັນທີ່ປະເທດຈີນຍັງສືບຕໍ່ແຜ່ລົງມາປົກຄຸມຢູ່ທົ່ວທຸກພາກຂອງປະເທດລາວດ້ວຍກໍາລັງ ປານກາງ, ສົມທົບກັບ ກະແສລົມຕາເວັນອອກ-ຕາເວັນອອກສ່ຽງເຫນືອພັດປົກຄຸມ, ຊຶ່ງຈະເຮັດໃຫ້ອາກາດເຢັນຢູ່ທົ່ວໄປ ແລະ ອາກາດຍັງຈະຫນາວເຢັນຢູ່ ເຂດພາກເຫນືອດ້ານຕາເວັນອອກ, ແຂວງ ໄຊສົມບູນ ແລະ ເຂດພູພຽງບໍລະເວນ ແລະ ຈະມີຝົນຕົກໃນລະດັບຄ່ອຍ ພ້ອມມີລົມ ພັດແຮງເປັນບາງໂອກາດຢູ່ບາງທ້ອງຖິ່ນ.

ໃນແຕ່ລະປີ ການເກີດອຸປະຕິເຫດຕາມທ້ອງຖະໜົນ ສະເລ່ຍເກືອບ 1.000 ຄົນ ສາເຫດແມ່ນມາຈາກ 4 ປັດໄຈຫຼັກ ເປັນຕົ້ນ ຜູ້ຂັບຂີ່, ພາຫະນະ, ສະພາບຂອງເສັ້ນທາງ ແລະ ສະພາບແວດລ້ອມທົ່ວໄປ ຖືວ່າການເກີດອຸປະຕິເຫດແຕ່ລະຄັ້ງ ແມ່ນການເກີດ ທີ່ບໍ່ມີຄວາມຈຳເປັນ ແລະ ເຮົາສາມາດປົກປັກຮັກສາໄດ້.

ພ້ອມກັນນີ້, ການເພີ່ມຂຶ້ນຂອງຍານພາຫະນະທາງບົກ ໃນແຕ່ລະປີປະມານ 10-12%, ຖ້າທຽບໃສ່ປະຊາກອນ 7 ລ້ານກວ່າຄົນ ສະຖິຕິການຂຶ້ນຖະບຽນພາຫະນະສະສົມທົ່ວປະເທດ ມີຈຳນວນ 2.393.993 ຄັນ ຖ້າທຽບໃສ່ 3 ຄົນ ຕໍ່ພາຫະນະ 1 ຄັນ, ອັດຕາການເພີ່ມຂຶ້ນ ຂອງຍານພາຫະນະຢ່າງຫຼວງຫຼາຍ ສະແດງໃຫ້ເຫັນເຖິງ ການຈະເລີນເຕີບໂຕ ທາງດ້ານເສດຖະກິດ-ສັງຄົມ ຂອງປະເທດ.

ທ່ານ ວຽງສະຫວັດ ສີພັນດອນ ລັດຖະມົນຕີກະຊວງໂຍທາທິການ ແລະ ຂົນສົ່ງ(ຍທຂ) ໄດ້ສະເໜີຕໍ່ກອງປະຊຸມສະໄໝສາມັນ ເທື່ອທີ 2 ຂອງສະພາແຫ່ງຊາດຊຸດທີ IX ໃນຕອນເຊົ້າວັນທີ 10 ພະຈິກ 2021 ໂດຍຍົກໃຫ້ເຫັນເຫດຜົນ ແລະ ຄວາມຈຳເປັນ ໃນການສ້າງກົດໝາຍສະບັບນີ້ ເນື່ອງຈາກໃນໄລຍະຜ່ານມາ ການຄຸ້ມຄອງພາຫະນະທາງບົກ ຍັງບໍ່ທັນຮັດກຸມ, ບໍ່ມີຄວາມເປັນເອກະພາບ, ບໍ່ມີຄວາມປອດໄພ, ຄວາມສະຫງົບ, ຄວາມເປັນລະບຽບຮຽບຮ້ອຍ, ຄວາມປອດໄພຕໍ່ສຸຂະພາບ, ລວມເຖິງຄວາມປອດໄພຕໍ່ຊີວິດ ແລະ ຊັບສິນ ຍ້ອນຍັງບໍ່ທັນມີກົດໝາຍສະເພາະກ່ຽວກັບ ວຽກງານຄຸ້ມຄອງຍານພາຫະນະທາງບົກ. ສ່ວນນິຕິກໍາທີ່ມີໃນປັດຈຸບັນ ເຫັນວ່າຍັງບໍ່ທັນກໍານົດລະອຽດ, ຮັດກຸມ ແລະ ກວມເອົາວຽກງານທີ່ສໍາຄັນ ກ່ຽວກັບຍານພາຫະນະທາງບົກ ເຮັດໃຫ້ມີຄວາມຫຍຸ້ງຍາກໃນການ ຈັດຕັ້ງປະຕິບັດ.

ສະນັ້ນ, ເພື່ອເປັນເຄື່ອງມືໃນການຄຸ້ມຄອງ ຍານພາຫະນະທາງບົກຕາມແນວທາງນະ ໂຍບາຍຂອງພັກ ດ້ວຍການຄຸ້ມຄອງລັດແຫ່ງກົດໝາຍ, ແກ້ໄຂຂໍ້ຄົງຄ້າງ, ສ້າງລະບົບຄຸ້ມຄອງຍານພາ ຫະນະທາງບົກໃຫ້ລວມສູນ, ທັນສະໄໝ, ເປັນມິດຕໍ່ສິ່ງແວດລ້ອມ, ທັງມີການແບ່ງຂັ້ນຄຸ້ມຄອງຊັດເຈນ ລະຫວ່າງສູນກາງ ແລະ ທ້ອງຖິ່ນ, ມີກົນໄກປະສານງານ ແລະ ຕິດຕາມກວດກາໄດ້ຢ່າງທັນການ ທັງຮັບປະກັນການຈັດຕັ້ງປະຕິບັດສັນຍາ ແລະ ອະນຸສັນຍາ ກັບອະນຸພາກພື້ນ ແລະ ສາກົນ ທີ່ ສປ ປ ລາວ ເປັນພາຄີ ແລະ ເພື່ອປະກອບສ່ວນສ້າງລາຍຮັບເຂົ້າງົບປະມານແຫ່ງຊາດ.

ດັ່ງນັ້ນ ກະຊວງໂຍທາທິການ ແລະ ຂົນສົ່ງ ຈິ່ງໄດ້ສ້າງຮ່າງກົດໝາຍ ວ່າດ້ວຍຍານພາຫະ ນະທາງບົກ ສະບັບນີ້ຂຶ້ນມາເຊິ່ງປະກອບມີ 13 ພາກ, 12 ໝວດ ແລະ 91 ມາດຕາ ໂດຍມີກໍານົດຫລັກການ, ລະບຽບການ ແລະ ມາດຕະການ ກ່ຽວກັບການຄຸ້ມຄອງ ແລະ ຕິດຕາມ ກວດກາ ວຽກງານຍານພາຫະນະທາງບົກ ໃຫ້ມີປະສິດທິພາບ, ປະສິດທິຜົນ, ທັນສະໄໝ ແລະ ລວມສູນ. ພ້ອມນັ້ນ ກໍເພື່ອແນໃສ່ເຮັດໃຫ້ການເຄື່ອນໄຫວວຽກງານ ຍານພາຫະນະທາງບົກ ດໍາເນີນໄປຢ່າງເປັນເອກະພາບ, ສອດຄ່ອງກັບຕົວຈິງ, ສາມາດເຊື່ອມໂຍງກັບພາກພື້ນ ແລະ ສາກົນ ປະກອບສ່ວນເຂົ້າໃນການພັດທະນາ ເສດຖະກິດ-ສັງຄົມຂອງຊາດ ໃຫ້ນັບມື້ກ້າວໜ້າ ແລະ ທັນສະໄໝ.

ທ່ານ ສົມມາດ ພົນເສນາ ຮອງປະທານສະພາແຫ່ງຊາດ ປະທານກອງປະຊຸມ ໄດ້ຍົກໃຫ້ເຫັນໝາກຜົນຂອງການປະກອບຄຳຄິດຄຳເຫັນ ຂອງບັນດາສະມາຊິກສະພາແຫ່ງຊາດ ຕໍ່ເນື້ອໃນຂອງແຕ່ລະໝວດ ແຕ່ລະມາດຕາ ເປັນຕົ້ນ ການຄຸ້ມຄອງຍານພາຫະນະທາງບົກ, ປະເພດລົດເບົາ, ການນໍາເຂົ້າຍານພາຫະນະທາງບົກ ແບບຖາວອນ ແລະ ແບບຊົ່ວຄາວ, ລວມທັງມາດຕະຖານ ແລະ ເງື່ອນ ໄຂທາງດ້ານເຕັກນິກຂອງຍານພາຫະນະທາງບົກ ແລະ ການຍົກຍ້າຍຍານພາຫະນະທາງບົກ. ພ້ອມນີ້ ບັນດາ ສສຊ ລົງເລິກ ການຂຶ້ນທະບຽນ, ປ້າຍທະບຽນ ແລະ ການກວດກາເຕັກນິກ ຍານພາຫະນະທາງບົກ ແລະ ພາກທຸລະກິດ ກ່ຽວກັບຍານພາຫະນະທາງບົກ ແລະ ອື່ນໆ.

ທັງນີ້ ກໍເພື່ອຮັບປະກັນໃຫ້ເນື້ອໃນຂອງຮ່າງກົດໝາຍສະບັບນີ້ ມີຄວາມຄົບຖ້ວນ, ຮັດກຸມ ແລະ ສາມາດຈັດຕັ້ງປະຕິບັດໄດ້ໃນຕໍ່ໜ້າ.

ຂໍ້ມູນ: ຂປລ (ຂ່າວ: ມະນີທອນ, ພາບ: ອ່າຍຄຳ)

ນັກໂທດ 7 ຄົນ ໃນຄ້າຍຄຸມຂັງ ແຂວງສຕຣຶງເຕຣງ (Stung Treng Province) ໃນປະເທດກຳປູເຈຍ ໄດ້ໂຕນໜີຈາກຄ້າຍຄຸມຂັງ ດ້ວຍການທຸບກຳແພງ, ໃນນັກໂທດທັງ 7 ທີ່ຫຼົບໜີແມ່ນ ມີຄົນລາວ 4 ຄົນ ແລະ ຄົນກຳປູເຈຍ 3 ຄົນ.

ເຫດການເກີດຂຶ້ນ ໃນເວລາ 3:00 ໂມງ ຂອງວັນຈັນ (01/11/2021) ທີ່ຜ່ານມາ, ຕາມການລາຍງານຂອງ Knmer Times ໃຫ້ຮູ້ວ່າ: ຫຼັງຈາກທີ່ນັກໂທດທຸບກຳແພງໂຕນໜີ ພວກເຂົາໄດ້ລັກເອົາເຮືອ ແລະ ຂ້າມນໍ້າຂອງໄປໃນເຂດບ້ານໃກ້ຄຽງ ເຊິ່ງເຈົ້າໜ້າທີ່ກຳປູເຈຍເຊື່ອວ່າ: ນັກໂທດທັງ 7 ຄົນ ກຳລັງເດີນທາງໄປ ສປປ ລາວ.

ໂຄສົກປະຈຳແຂວງເມັນກຸງ (Men Kung) ໄດ້ກ່າວກັບສຳນັກຂ່າວ Khmer Times ວ່າ: ເຈົ້າໜ້າທີ່ຕຳຫຼວດ ກຳລັງຮ່ວມມືກັບເຈົ້າໜ້າທີ່ໃນຄ້າຍຄຸມຂັງ ເພື່ອຊອກຫາໂຕນັກໂທດທີ່ຫຼົບໜີ.

ມີພະຍານຄົນໜຶ່ງ ທີ່ອາໄສຢູ່ໃນບ້ານໃກ້ຄຽງຂອງທ້ອງຖິ່ນ ໄດ້ບອກວ່າ: ເວລາປະມານ 04:00 ໂມງ ຂອງວັນຈັນ ລາວໄດ້ເຫັນຊາຍ 7 ຄົນ ບໍ່ໃສ່ເສື້ອ ແລະ ຕົນໂຕປຽກ, ພວກເຂົາຂໍຊື້ເກີບນຳລາວ ແຕ່ເມື່ອລາວບອກວ່າບໍ່ມີ ພວກເຂົາທັງ 7 ກໍໄດ້ຍ່າງໜີໄປ.

ພ້ອມນີ້, ເຈົ້າໜ້າທີ່ຍັງເຊື່ອວ່າ: ຫົວໜ້າກຸ່ມໂຕນຄຸກຫຼົບໜີໃນເທື່ອນີ້ ມີຊື້ວ່າ: ແຈັກກີ້ ເຈີທາລີ (Jakky Seutaly) ເຊິ່ງເປັນນັກໂທດຖືກຕັດສິນຈຳຄຸກຕະຫຼອດຊີວິດ ໃນຂໍ້ຫາລັກລອບຂົນສົ່ງຢາເສບຕິດ.

ຕາມການຖະແຫຼງຂ່າວ ຂອງຄະນະສະເພາະກິດປະຈຳວັນທີ 10 ພະຈິກ 2021 ໃຫ້ຮູ້ວ່າ:

ທົ່ວປະເທດ ໄດ້ເກັບຕົວຢ່າງມາກວດຊອກຫາເຊືື້ອ COVID-19 ທັງໝົດ 7,703 ຕົວຢ່າງ, ໃນນັ້ນ ກວດພົບຜູ້ຕິດເຊືື້ອໃໝ່ 1,140 ຄົນ (ຕິດເຊື້ອພາຍໃນ ມີ 1,134 ຄົນ ແລະ ຕິດເຊື້ອນໍາເຂົ້າ6 ຄົນ).

ຂໍ້ມູນໂດຍຫຍໍ້ກ່ຽວກັບການຕິດເຊືື້ອພາຍໃນໃໝ່ ທັງໝົດ 1,134 ຄົນ ຈາກ 15 ແຂວງ ເຊິ່ງລາຍລະອຽດ ດັ່ງນີ້:

–ນະຄອນຫຼວງ 671 ຄົນ: ມາຈາກ 185 ບ້ານ, ໃນ 7 ເມືອງ

• ເມືອງຈັນທະບູລີ ມີ 16 ບ້ານ (61 ຄົນ)
• ເມືອງສີໂຄດຕະບອງ ມີ 40 ບ້ານ (104 ຄົນ)
• ເມືອງໄຊເສດຖາ ມີ 32 ບ້ານ (116 ຄົນ)
• ເມືອງສີສັດຕະນາກມີ 12 ບ້ານ (39 ຄົນ)
• ເມືອງ ນາຊາຍທອງ ມີ 12 ບ້ານ (19 ຄົນ)
• ເມືອງໄຊທານີ ມີ 51 ບ້ານ (226 ຄົນ)
• ເມືອງຫາດຊາຍຟອງ ມີ 21 ບ້ານ (44 ຄົນ)
• ຕ່າງແຂວງ (03 ຄົນ)
• ຍັງສືບຕໍ່ເອົາຂໍ້ມູນ 59 ຄົນ

–ຫຼວງພະບາງ ມີ 157 ຄົນ ໃນ 39 ບ້ານ ແລະ 9 ເມືອງ

–ແຂວງວຽງຈັນ ມີ 71 ຄົນ ໃນ 31 ບ້ານ  ແລະ 7 ເມືອງ

–ຫຼວງນ້ຳທາ ມີ 29 ຄົນ ໃນ 17 ບ້ານ  ແລະ 3 ເມືອງ

–ຜົ້ງສາລີ ມີ 13 ຄົນ ໃນ 3 ເມືອງ

-ໄຊຍະບູລີ ມີ 60 ຄົນ ໃນ 18 ບ້ານ  ແລະ 2 ເມືອງ

–ຈຳປາສັກ ມີ 27 ຄົນ

–ອຸດົມໄຊ ມີ 20 ຄົນ ໃນ 11 ບ້ານ  ແລະ 1 ເມືອງ

-ເຊກອງ ມີ 17 ຄົນ ໃນ 9 ບ້ານ  ແລະ 2 ເມືອງ

–ບໍລິຄຳໄຊ ມີ 7 ຄົນ ໃນ 5 ບ້ານ  ແລະ 2 ເມືອງ

–ຄຳມ່ວນ ມີ 19 ຄົນ ໃນ 5 ບ້ານ  ແລະ 1 ເມືອງ

–ສະຫວັນນະເຂດ ມີ 25 ຄົນ ໃນ 10 ບ້ານ  ແລະ 3 ເມືອງ

–ບໍ່ແກ້ວ ມີ 13 ຄົນ

–ສາລະວັນ ມີ 3 ຄົນ

-ຊຽງຂວາງ ມີ 2 ຄົນ ໃນ 2 ບ້ານ  ແລະ 2 ເມືອງ

ສ່ວນການຕິດເຊືື້ອນໍາເຂົ້າ ຂອງຜູ້ທີ່ເດີນທາງເຂົ້າປະເທດມີຈໍານວນ 06 ຄົນ ຈາກ ແຂວງສະຫວັນນະເຂດ 1 ຄົນ ແລະ ບໍ່ແກ້ວ 5 ຄົນ, ທັງໝົດແມ່ນໄດ້ເກັບຕົວຢ່າງ ແລະ ສົ່ງໄປຈໍາກັດບໍລິເວນຢູ່ສູນຈໍາກັດບໍລິເວນຂອງແຕ່ລະແຂວງ. ເມື່ອຜົນກວດເປັນບວກ ພວກກ່ຽວໄດ້ຖືກນຳສົ່ງໄປສະຖານທີ່ປິ່ນປົວທີ່ແຂວງກໍານົດໄວ້.

ມາຮອດວັນທີ 9 ພະຈິກ ຕົວເລກຜູ້ຕິດເຊື້ອສະສົມ ພະຍາດໂຄວິດ-19 ຢູ່ ສປປ ລາວ 50,032 ຄົນ, ເສຍຊີວິດສະສົມ 91 ຄົນ (ໃໝ່ 02), ປິ່ນປົວຫາຍດີ ແລະ ກັບບ້ານໃນມື້ວານ ມີ 459 ຄົນ, ກໍາລັງປິ່ນປົວ 9,591 ຄົນ.

ລາຍລະອຽດຜູ້ເສຍຊີວິດໃໝ່ 02 ຄົນ ມີດັ່ງນີ້:

ຜູ້ທີ 1: ເພດຍີງ, ອາຍຸ 56 ປີ, ບ້ານ ທົ່ງນາມີ, ເມືອງປາກກະດິງ, ແຂວງບໍລິຄຳໄຊ

• ພະຍາດປະຈໍາຕົວ: ເບົາຫວານ ແລະ ໄຂ່ຫຼັງຊຸດໂຊມ
• ຜ່ານມາບໍ່ໄດ້ຮັບການສັກຢາວັກຊີນກັນໂຄວິດ-19
• ວັນທີ 22 ຕຸລາ 2021: ໄດ້ເກັບຕົວຢ່າງກວດຊອກຫາພະຍາດໂຄວິດ-19
• ວັນທີ 25 ຕຸລາ 2021: ຜົນກວດພົບເຊື້ອ
• ວັນທີ 26 ຕຸລາ 2021 ຫາ ວັນທີ 3 ພະຈິກ 2021: ຜູ້ກ່ຽວໄດ້ເຂົ້ນອນປີ່ນປົວຢູ່ສູນສະໂມສອນດອກປີກໄກ່ເມືອງປາກຊັນ, ແຂວງບໍລິຄຳໄຊ ດ້ວຍອາການເບົາບາງ ແຕ່ມາຮອດເວລາ 09:00 ໂມງ ຂອງວັນທີ 03 ພະຈິກ ຜູ້ກ່ຽວມຄວາມດັນເລືອດຕໍ່າ ຈື່ງໄດ້ຍ້າຍເຂົ້າມາປີ່ນປົວຢູ່ສູນຫຼັກ 6
• ໄລຍະເວລາປີ່ນປົວຢູ່ໂຮງໝໍພາກສະໜາມ ແຕ່ວັນທີ 26 ຕຸລາ – 8 ພະຈິກ 2021, ເປັນເວລາ 14 ວັນ.
• ມາຮອດເວລາ 8:30 ໂມງ ຂອງວັນທີ 09 ພະຈິກ 2021: ຄົນເຈັບໄດ້ເສຍຊິວິດ.

ຜູ້ທີ 2: ເພດຍີງ, ອາຍຸ 82 ປີ, ບ້ານ ຫາດຊາຍຄຳ, ເມືອງປາກກະດິງ, ແຂວງບໍລິຄຳໄຊ

• ພະຍາດປະຈໍາຕົວ: ຫືດ ແລະ ຄວາມດັນເລືອດສູງ
• ຜ່ານມາບໍ່ໄດ້ຮັບການສັກຢາວັກຊີນກັນໂຄວິດ-19  
• ວັນທີ 9 ພະຈິກ 2021 ເວລາ 8:00 ໂມງ ມາໂຮງໝໍຊຸມຊົນ ເມືອງປາກກະດິງ ຍ້ອນ ອິດເມື່ອຍ  
• ຫັນໃຈຝຶດ ທ່ານໝໍໄດ້ໃຫ້ການປີ່ນປົວທີ່ເໝາະສົມ ແຕ່ອາການບໍ່ດີຂື້ນ ຈື່ງຂໍຂື້້ນເມືອປີ່ນປົວຢູ່ໂຮງໝໍແຂວງ, ກ່ອນໄປ ໄດ້ເກັບຕົວຢ່າງກວດຫາເຊື້ອໂຄວິດ-19​ ແລະ  ຜົນກວດພົບເຊື້ອ ຈຶ່ງໄດ້ນໍາສົ່ງເຂົ້າ
• ສູນປີ່ນປົວຫຼັກ 6 ຂອງເມືອງປາກຊັນ ແຂວງບໍລິຄຳໄຊ ໂດຍໄດ້ໃຊ້ເຄື່ອງຊ່ວຍຫາຍໃຈ. ເວລາ 20:30 ໂມງ ມາຮອດສູນປີນປົວຫຼັກ 6 ອາການຜູ້ກ່ຽວໜັກລົງ ທີມງານແພດຊ່ວຍ ເຊີດຊູປີ່ນປົວ ສຸດຄວາມສາມາດ ແຕ່ອາການບໍ່ດີຂື້້ນ
• ມາຮອດເວລາ 00:45  ໂມງ ຂອງວັນທີ 10 ພະຈິກ 2021: ຜູ້ກ່ຽວໄດ້ເສຍຊິວິດ

ສະເໜີລັດ ແກ້ໄຂບັນຫາ ການຈັບຈອງທີ່ດິນ ແຕ່ບໍ່ມີການພັດທະນາ

ຕົວແທນຈາກສູນກາງແນວລາວສ້າງຊາດ ໄດ້ສະເໜີຕໍ່ສະພາແຫ່ງ ໃຫ້ດຳເນີນການຕິດຕາມກວດກາ ຕໍ່ບັນຫາທີ່ດິນ ບໍ່ວ່າຈະເປັນ ການຈັບຈອງທີ່ດິນປ່າ, ດິນຫວງຫ້າມ, ດິນບ້ານ ແລະ ດິນປະເພດຕ່າງໆ ເປັນຈໍານວນຫຼາຍໄວ້ຫລາຍປີ ແຕ່ບໍ່ໄດ້ມີການພັດທະນາຫຍັງ ທັງບໍ່ທັນໄດ້ເສຍພັນທະຕໍ່ລັດ ຂອງບຸກຄົນ, ນິຕິບຸກຄົນ ຍັງມີຢູ່ທ້ອງຖິ່ນຕ່າງໆ ແຕ່ປະຊາຊົນຈໍານວນບໍ່ໜ້ອຍ ບໍ່ມີບ່ອນປຸກສ້າງທີ່ຢູ່ອາໄສ, ບໍ່ມີທີ່ດິນທໍາການຜະລິດ, ບໍ່ມີລາຍຮັບທີ່ໝັ້ນຄົງ, ມີຄວາມທຸກຍາກ ຕໍ່ສະພາບການດັ່ງກ່າວ ຄວນໄດ້ເອົາໃຈໃສ່ກວດກາຄືນ ແລະ ມີການຈັດສັນ, ມີຊ່ອງທາງເພື່ອຊ່ວຍ ເຫຼືອແກ້ໄຂ.

ທ່ານ ນາງ ຄຳຈັນ ພົມແສງສະຫວັນ ຮອງປະທານສູນກາງແນວລາວສ້າງຊາດໄດ້ສະຫນີຕໍ່ສະພາແຫ່ງຊາດ ໃຫ້ກວດກາຕື່ມຕໍ່ສະພາບການຊື້-ຂາຍດິນ ແລະ ເຮືອນ ໃຫ້ຄົນຕ່າງປະເທດ ແຕ່ອອກຊື່ເປັນຄົນລາວ ເກີດມີຢ່າງແຜ່ຫຼາຍ, ເກີດມີສະພາບການສໍ້ໂກງກັນລະຫວ່າງຜູ້ຊື້ດິນ ແລະ ຜູ້ອອກຊື່ ໃນໃບຕາດິນ ພາໃຫ້ເກີດມີຄວາມບໍ່ສະຫງົບ ສະເໜີໃຫ້ມີວິທີການແກ້ໄຂເປັນຮູບປະທໍາ; ບັນຫາຂໍ້ຂັດແຍ່ງ ໃນການຊົດເຊີຍຜົນເສຍ ຫາຍຕໍ່ການຜະລິດກະສິກໍາ ຂອງປະຊາຊົນບັນດາເຜົ່າ ທີ່ຖືກຜົນກະທົບ ຈາກໂຄງການກໍ່ສ້າງ, ສໍາປະທານ ເພື່ອເຮັດກິດຈະກໍາຕ່າງໆຂອງລັດ ແລະ ເອກະຊົນຈໍານວນໜຶ່ງ ຍັງບໍ່ທັນຖືກຕ້ອງສອດຄ່ອງກັບແນວທາງ, ກົດໝາຍ ສະພາບຕົວຈິງຍັງມີຫາງສຽງ, ມີການສະເໜີ, ຮ້ອງທຸກ ຕໍ່ການຈັດ ຕັ້ງກ່ຽວຂ້ອງຂັ້ນຕ່າງໆ ແຕ່ການແກ້ໄຂຕົວຈິງຍັງມີຄວາມຫຍຸ້ງຍາກ, ຊັກຊ້າແກ່ຍາວ; ຍັງມີບາງບ່ອນ ມັກໃຊ້ອໍານາດບໍລິຫານຕໍ່ປະຊາຊົນ ຢ່າງບໍ່ມີເຫດຜົນພຽງພໍ.

ສະເໜີສະພາແຫ່ງຊາດ ລົງຕິດຕາມກວດກາ ບັນຫາຂໍ້ຂັດແຍ່ງ ທີ່ດິນລະຫວ່າງບໍລິສັດນໍ້າທາກໍ່ສ້າງຂົວທາງ ກັບປະຊາຊົນຢູ່ບ້ານຊຽງດາ ເມືອງ ໄຊເຊດຖາ ນະຄອນຫລວງວຽງຈັນ ຈໍານວນ 126 ຄອບຄົວ, ແກ່ຍາວມາຫລາຍປີ ປັດຈຸບັນເຫັນວ່າ ມັນກາຍເປັນບັນຫາ ລະຫວ່າງປະຊາຊົນ ກັບ ບໍລິສັດ ແລະ ອົງການປົກຄອງນະຄອນຫຼວງ, ຖ້າບໍ່ໄດ້ຮັບການແກ້ໄຂຢ່າງສົມ ເຫດສົມຜົນ ອາດຈະເປັນບັນຫາກວ້າງຕື່ມ.

ຂໍ້ມູນ: ຂປລ

ໃນວັນທີ 05 ພະຈິກ 2021 ແຂວງຄຳມ່ວນ ໄດ້ຈັດ ກອງປະຊຸມເຊື່ອມຊຶມເອກະສານການຈັດຕັ້ງເຜີຍແຜ່ແຜນການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ ( 2021-2023 ) ຢູ່ທີ່ສະໂມ ສອນໃຫຍ່ຂອງແຂວງຄຳມ່ວນ ໂດຍການເປັນປະທານຮ່ວມຂອງ ທ່ານ ວັນໄຊ ພອງສະຫວັນ ກຳມະການສູນກາງພັກ ເລຂາພັກແຂວງ ເຈົ້າແຂວງໆຄຳມ່ວນ, ທ່ານ ພົຕ ກົງທອງ ພົງວິຈິດ ຮອງລັດຖະມົນຕີກະຊວງ ປ.ກ.ສ, ມີຄະນະພັກ-ຄະນະບັນຊາ ປ.ກ.ຊ-ປ.ກ.ສ, ອົງການປົກຄອງແຂວງ, ບັນດາເມືອງ ແລະ ພະແນກການ ອ້ອມຂ້າງແຂວງເຂົ້າຮ່ວມ.

ທ່ານ ວັນໄຊ ພອງສະຫວັນ ກຳມະການສູນກາງພັກ ເລຂາພັກແຂວງ ເຈົ້າແຂວງໆ ຄຳມ່ວນຍັງໄດ້ເຜີຍແຜ່ຄໍາສັ່ງຂອງກົມການເມືອງສູນກາງພັກເລກທີ 02/ກມສພ, ລົງວັນທີ 26 ກໍລະກົດ 2021 ວ່າດ້ວຍການເພີ່ມທະວີການນໍາພາຊີ້ນໍາຂອງຄະ ນະພັກແຕ່ລະຂັ້ນຕໍ່ການສະກັດກັ້ນແລະແກ້ໄຂບັນຫາຢາເສບຕິດ; ມະຕິຂອງສະພາແຫ່ງຊາດເລກທີ 04/ສພຊ, ລົງວັນທີ 10 ສິງຫາ 2021 ວ່າດ້ວຍການຮັບຮອງເອົາວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ ( 2021-2023 ); ວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ; ກົດໝາຍວ່າດ້ວຍການປັບປຸງບາງມາດຕາຂອງກົດໝາຍວ່າດ້ວຍຢາເສບຕິດເລກທີ 02/ສພຊ, ລົງວັນທີ9ສິງຫາ 2021; ຄຳສັ່ງເລກທີ19/ນຍລົງວັນທີ 4 ຕຸລາ 2021 ກ່ຽວກັບການຈັດຕັ້ງປະຕິບັດວາລະແຫ່ງຊາດວ່າດ້ວຍ ການແຂ້ໄຂບັນຫາຢາເສບຕິດ ( 2021-2023 ).

ຈາກນັ້ນທ່ານ ພົຕ ກົງທອງ ພົງວິຈິດ ຮອງລັດຖະມົນຕີກະຊວງປ້ອງກັນຄວາມສະຫງົບກໍ່ໄດ້ຜ່ານແຜນການ ຈັດຕັ້ງປະຕິບັດວາລະແຫ່ງຊາດວ່າດ້ວຍ ການແກ້ໄຂບັນຫາຢາເສບຕິດ ( 2021-2023 ) ໂດຍມີຈຸດປະສົງເພື່ອຍົກສູງຄວາມຮັບຮູ້, ຄວາມເຂົ້າໃຈ, ຄວາມເປັນເອກະພາບທາງດ້ານທັດສະນະແລະຄວາມຮັບຜິດຊອບໃນການນໍາພາ-ຊີ້ນໍາຂອງຄະນະພັກ-ຄະນະບັນຊາແຕ່ລະຂັ້ນຂອງກໍາລັງປ້ອງກັນຄວາມສະຫງົບໃນການປະຕິບັດຕົວຈິງ; ເພື່ອເຮັດໃຫ້ຄະນະພັກ – ຄະນະບັນຊາແຕ່ລະຂັ້ນກໍາແໜ້ນເນື້ອໃນສໍາຄັນທີ່ເປັນພື້ນຖານຮັບປະກັນໃຫ້ແກ່ການແກ້ໄຂບັນຫາຢາເສບຕິດດໍາເນີນໄປຢ່າງເປັນລະບົບ, ຕໍ່ເນື່ອງ, ປະຕິບັດຕາມຂັ້ນຕອນຂອງກົດໝາຍ, ເດັດຂາດ, ໂປ່ງໃສ, ເຂັ້ມງວດ, ເປັນມືອາຊີບ ແລະ ທັນເວລາ; ເພື່ອແກ້ໄຂສາເຫດແລະເງື່ອນໄຂພາໃຫ້ເກີດບັນຫາຢາເສບຕິດໃຫ້ຖືກກັບສະພາບຈຸດພິເສດຂອງແຕ່ລະກົມກອງ, ຂະແໜງການແລະທ້ອງຖິ່ນແຕ່ລະຂັ້ນ, ເສີມຂະຫຍາຍຜົນງານ, ຜົນສໍາເລັດທີ່ຍາດມາໄດ້, ພ້ອມກັນນັ້ນກໍ່ປັບປຸງແກ້ໄຂດ້ານອ່ອນ ແລະ ຂໍ້ຄົງຄ້າງໃນໄລຍະທີ່ຜ່ານມາ.

ວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ 2021-2023 ປະກອບມີ3ພາກຄື: ພາກທີ1ແມ່ນສະພາບລວມແລະຄວາມຈໍາເປັນຮີບດ່ວນໃນການແກ້ໄຂບັນຫາຢາເສບຕິດຢູ່ລາວ; ພາກທີ2ແມ່ນເນື້ອໃນມາດຕະ ການແກ້ໄຂບັນຫາຢາເສບຕິດແຕ່ປີ 2021-2023 ພາກທີ 03 ແມ່ນແບ່ງຄວາມຮັບຜິດຊອບແລະພາກທີ4 ແມ່ນວິທີການຈັດຕັ້ງປະຕິບັດວິທີຈັດຕັ້ງປະຕິບັດວາລະແຫ່ງຊາດໄດ້ແບ່ງອອກເປັນ 03 ໄລຍະຄື:

ໄລຍະທີ 01 ເລີ່ມແຕ່ເດືອນກັນຍາ – ທັນວາ 2021 ແມ່ນໄລຍະກະກຽມຄວາມພ້ອມ ແລະ ເຊື່ອມຊຶມເອກະສານເຊັ່ນ:

ຄໍາສັ່ງຂອງກົມການເມືອງສູນກາງພັກເລກທີ 02/ກມສພ, ລົງວັນທີ 26 ກໍລະກົດ 2021 ວ່າດ້ວຍການເພີ່ມທະວີການນໍາພາຊີ້ນໍາຂອງຄະນະພັກແຕ່ລະຂັ້ນຕໍ່ການສະກັດກັ້ນແລະແກ້ໄຂບັນຫາຢາເສບຕິດ; ມະຕິຂອງສະພາແຫ່ງຊາດເລກທີ 04/ສພຊ, ລົງວັນທີ10ສິງຫາ 2021 ວ່າດ້ວຍການຮັບຮອງເອົາວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ ( 2021-2023); ວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ; ກົດໝາຍວ່າດ້ວຍການປັບປຸງບາງມາດຕາຂອງກົດໝາຍວ່າດ້ວຍ ຢາເສບຕິດເລກທີ 02/ສພຊ, ລົງວັນທີ 9 ສິງຫາ 2021 ໄລຍະທີ 2 ແຕ່ເດືອນມັງກອນ 2022 – ເມສາ 2023 ( ໄລຍະເກັບຂໍ້ມູນ-ວິໄຈຂໍ້ມູນ, ຈັດຕັ້ງປະຕິບັດແຜນການແລະແກ້ໄຂບັນຫາຢາເສບຕິດຕາມ 6 ແຜນວຽກຈຸດສຸມທີ່ໄດ້ກໍານົດໃນວາລະແຫ່ງຊາດສ້າງຄວາມຮັບຮູ້ໃນທົ່ວສັງຄົມດ້ວຍການສຶກສາອົບຮົມ, ໂຄສະນາເຜີຍແຜ່ລະບຽບກົດໝາຍແລະຜົນຮ້າຍຂອງຢາເສບຕິດ; ສ້າງຂະບວນການສະເຫຼີມສະຫຼອງວັນແຫ່ງຊາດ, ວັນສາກົນຕ້ານຢາເສບຕິດ ແລະ ປຸກລະດົມຂົນຂວາຍເງິນເຂົ້າກອງທຶນຄວບຄຸມ, ສະກັດກັ້ນແລະຕ້ານຢາເສບຕິດ; ລົງໂຄສະນາເຜີຍແຜ່ສຶກສາອົບຮົມບັນດາບ້ານເປົ້າໝາຍທີ່ກໍານົດໄວ້ໃຫ້ໄດ້ 80% ຂຶ້ນໄປ ຂອງຈໍານວນບ້ານເປົ້າໝາຍທັງໝົດ.

ໄລຍະທີ 3 ແຕ່ເດືອນກັນຍາຫາເດືອນທັນວາ 2023 ( ໄລຍະສະຫຼຸບ, ປະເມີນຜົນການຈັດຕັ້ງປະຕິບັດວາລະແຫ່ງຊາດ ) ມອບໃຫ້ຄະນະພັກ-ການນໍາຂັ້ນກະຊວງ, ຂະແໜງການທີ່ກ່ຽວຂ້ອງແລະອໍານາດການປົກຄອງທ້ອງຖິ່ນແຕ່ລະຂັ້ນຈັດຕັ້ງການສະຫຼຸບ, ປະເມີນຜົນ, ຕີລາຄາຄືນການຈັດຕັ້ງປະຕິບັດ, ຖອນຖອນບົດຮຽນຂອງວາລະແຫ່ງຊາດແລະຈັດຕັ້ງການຍ້ອງຍໍຊົມເຊີຍຕໍ່ກົມກອງແລະບຸກຄົນຜູ້ທີ່ມີຜົນງານດີເດັ່ນໃຫ້ສໍາເລັດພາຍໃນເດືອນທັນວາ 2023.

ໂອກາດດັ່ງກ່າວ ຄະນະປະທານຍັງໄດ້ເນັ້ນໃຫ້ຜູ້ເຂົ້າຮ່ວມກໍ່ຄືຄະນະຮັບຜິດຊອບຕ້ອງກໍາແໜ້ນບັນດາມະຕິ,ຄຳສັ່ງຂອງຂັ້ນເທິງເພື່ອນຳໄປຈັດຕັ້ງຜັນຄະຫຍາຍວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດໃຫ້ມີປະ ສິດທິຜົນແລະມີຜົນສໍາເລັດຕາມລະດັບຄາດໝາຍ.

ຂໍ້ມູນ: Khammouane News