ສປປ ລາວ ເປັນໜຶ່ງໃນ 13 ປະເທດ ທີ່ນອນຢູ່ໃນຂົງເຂດ ຫຼື ທີ່ອາໄສຂອງເສືອປ່າ ທີ່ຍັງມີຢູ່ໃນທົ່ວໂລກ, ແຕ່ເສືອປ່າທີ່ເຄີຍມີ ຕອນນີ້ອາດສູນພັນໄປແລ້ວ ເພາະຈາກການຄົ້ນຫາ ຜ່ານການຕັ້ງກ້ອງດັກຖ່າຍ ແລະ ທາງວິທະຍາສາດ ຈາກຫລາຍພາກສ່ວນ ໃນເຂດປ່າສະຫງວນທີ່ມີຄວາມເປັນໄປໄດ້ສູງ ຕະຫລອດໄລຍະເກືອບ 10 ປີທີ່ຜ່ານມາ ແມ່ນບໍ່ມີຂໍ້ມູນ ແລະ ພາບຈາກກ້ອງດັກຖ່າຍ ຫຼື ເວົ້າໄດ້ວ່າ ເສືອອາດຖືກລ່າ ຈາກການໃສ່ແຮ້ວ ແລະ ອາດສູນພັນຈາກຜືນປ່າຂອງລາວເຮົາໄປແລ້ວ.

ປັດຈຸບັນ, ອົງການກອງທຶນອະນຸລັກສັດປ່າໂລກ ປະຈຳ ສປປ ລາວ (WWF-Laos) ໄດ້ສໍາເລັດການສ້າງແຜນຍຸດທະສາດ 5 ປີ ວ່າດ້ວຍການອະນຸລັກທໍາມະຊາດ ໃນການສະໜັບສະໜູນ ສປປ ລາວ ແລະ ກໍາລັງເລີ່ມຈັດຕັ້ງປະຕິບັດ ຈົນຮອດປີ 2025 ໃນນັ້ນລວມມີ ແຜນການອະນຸລັກສັດປ່າ ແລະ ແນວຄວາມຄິດ ຕໍ່ການນໍາເສືອປ່າຄືນສູ່ທໍາມະຊາດໃນ ສປປ ລາວ ທີ່ຄັ້ງໜຶ່ງເຄີຍເປັນຖິ່ນອາໄສ ຂອງປະຊາກອນເສືອຈໍານວນຫລາຍ.

ແນວຄວາມຄິດດັ່ງກ່າວ ແມ່ນອາດມີຄວາມເປັນໄປໄດ້ສູງ ຜ່ານການຮ່ວມມືຈາກຫລາຍພາກສ່ວນ ໂດຍສະເພາະ ອົງການ ແລະ ສະມາຄົມ ທີ່ເຮັດວຽກເພື່ອການອະນຸລັກ ແລະ ການນໍາພາຈາກພາກລັດ ໃນອະນາຄົດ.

ອົງການ WWF ຈະສືບຕໍ່ໃຫ້ການສະໜັບສະໜູນກິດຈະກໍາ ການອະນຸລັກເສືອໂຄ່ງ ລວມທັງການຄຸ້ມຄອງປ່າສະຫງວນຢ່າງມີປະສິດທິຜົນ, ການຂັດຂວາງການຄ້າສັດປ່າທີ່ຜິດກົດໝາຍ ແລະ ການຫລຸດຜ່ອນຄວາມຕ້ອງການເສືອ, ຊິ້ນສ່ວນ ແລະ ຜະລິດຕະພັນຂອງເສືອ. ໃນປີ 2022, WWF ຈະເຮັດວຽກຮ່ວມກັບຊຸມຊົນທີ່ອາໄສຢູ່ໃນພື້ນທີ່ ທີ່ມີເສືອ ເພື່ອສ້າງການເຊື່ອມຕໍ່, ສົ່ງເສີມການນຳເສືອຄືນໃນຖິ່ນເດີມ, ຫລຸດຜ່ອນຄວາມຂັດແຍ້ງຂອງມະນຸດ-ສັດປ່າ ແລະ ເພີ່ມຄວາມພະຍາຍາມໃນການອະນຸລັກຂ້າມແດນ. ນອກຈາກນັ້ນ, ຍັງຈະກວດກາ ເພື່ອໃຫ້ຮັບປະກັນຄວາມສອດຄ່ອງກັບບູລິມະສິດ ໂດຍລວມຂອງວາລະສິ່ງແວດລ້ອມ, ລວມທັງການປັບຕົວ ແລະ ຫລຸດຜ່ອນການປ່ຽນແປງຂອງດິນຟ້າອາກາດ, ການເຊື່ອມໂຊມຂອງດິນ, ແລະ ການຟື້ນຟູລະບົບນິເວດ ແລະ ການປູກຄືນ.

ນີ້ຄືຈຸດເລີ່ມຕົ້ນ ແລະ ວຽກງານດັ່ງກ່າວ ພ້ອມກັບອີກຫລາຍໂຄງການ ແລະ ກິດຈະກໍາ ທີ່ອົງການ WWF-Laos ຮ່ວມກັບຄູ່ຮ່ວມງານກໍາລັງຈັດຕັ້ງປະຕິບັດ ເປັນຕົ້ນ ວຽກງານຄຸ້ມຄອງປ່າໄມ້ ໃຫ້ມີປະສິດທິພາບ, ການເພີ່ມປະຊາກອນສັດປ່າ ແລະ ສັດນໍ້າ ໂດຍສະເພາະການຄຸ້ມຄອງຊະນິດສັດ ທີ່ໃກ້ຈະສູນພັນ ຜ່ານຂະບວນການຈັດຕັ້ງປະຕິບັດກົດ ໝາຍ ແລະ ປູກຈິດສໍານຶກໃຫ້ກັບສັງຄົມ ໃຫ້ເປັນເຈົ້າການ ແລະ ອື່ນໆ. ສິ່ງດັ່ງກ່າວ ຈະປະສົບຜົນສໍາເລັດໄດ້ນັ້ນ ທຸກທ່ານ ແລະ ທຸກພາກສ່ວນ ຕ້ອງໃຫ້ຄວາມສໍາຄັນ ແລະ ເຮັດພາລະບົດບາດ ເພື່ອເປັນສ່ວນໜຶ່ງຂອງວຽກງານອັນທ້າທາຍນີ້ ເພື່ອອະນາຄົດຂອງພວກເຮົາທຸກຄົນ ແລະ ໂລກ ທີ່ເຮົາອາໄສຢູ່.

ຂໍ້ມູນຈາກ: WWF-Laos

ໃນວັນທີ 8 ກຸມພາ 2022 ນີ້, ທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂ່ຳນັບຂອງ ທ່ານ ອະນຸລັກ ກິດຕິຄຸນ ຫົວໜ້າກອງເລຂາ ຄະນະກຳມາທິການແມ່ນ້ຳຂອງສາກົນ ຄົນໃໝ່.

ໃນໂອກາດນີ້, ທ່ານລັດຖະມົນຕີ ໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍຢ່າງຈິງໃຈ ທີ່ ທ່ານ ອະນຸລັກ ກິດຕິຄຸນ ໄດ້ຮັບການແຕ່ງຕັ້ງໃຫ້ດຳລົງຕຳແໜ່ງເປັນ ຫົວໜ້າກອງເລຂາຄະນະກຳມາທິການ ແມ່ນ້ຳຂອງສາກົນ ຄົນໃໝ່ ສົກປີ 2022-2024, ເຊິ່ງເປັນຮອບວຽນຂອງ ສປປ ລາວ, ສໍາລັບການຄັດເລືອກຜູ້ດຳລົງຕຳແໜ່ງດັ່ງກ່າວແມ່ນໝູນວຽນກັນ ລະຫວ່າງ ປະເທດສະມາຊິກຕາມລຳດັບຕົວອັກສອນ. ພ້ອມນີ້, ທ່ານ ລັດຖະມົນຕີ ຍັງໄດ້ສະແດງຄວາມຂອບໃຈ ແລະ ຕີລາຄາສູງຕໍ່ການປະກອບສ່ວນອັນສຳຄັນ ແລະ ມີປະສິດທິຜົນຂອງຄະນະກຳມາທິການແມ່ນ້ຳຂອງສາກົນ (MRC) ໃນວຽກງານການຄຸ້ມຄອງ ແລະ ພັດທະນາຊັບພະຍາກອນນໍ້າຮ່ວມກັບ ລັດຖະບານ ສປປ ລາວ ຕະຫລອດໄລຍະເວລາທີ່ຜ່ານມາ, ພ້ອມທັງໄດ້ສະແດງຄວາມເຊື່ອໝັ້ນຕໍ່ຫົວໜ້າກອງເລຂາຄົນໃໝ່ ແລະ ຄະນະໃນການສືບຕໍ່ໃຫ້ການສະໜັບສະໜູນການຈັດຕັ້ັ້ງປະຕິ ບັດບັນດາໂຄງການຕ່າງໆ ຢ່າງຕັ້ງໜ້າ ແລະ ເອົາໃຈໃສ່ສືບຕໍ່ຂົນຂວາຍການຮ່ວມມືຊ່ວຍເຫລືອຈາກພາຍນອກ ເພື່ອນໍາຜົນປະໂຫຍດອັນສໍາຄັນ ດ້ານການພັດທະນາອ່າງແມ່ນໍ້າຂອງ ແລະ ແມ່ນໍ້າສາຂາໃຫ້ມີຄວາມຍືນຍົງ.

ທ່ານລັດຖະມົນຕີ ຍັງໄດ້ສະແດງຄວາມເຊື່ອໝັ້ນວ່າ ຄະນະກຳມາທິການແມ່ນ້ຳຂອງສາກົນ ຈະສືບຕໍ່ການປະສານງານ, ປຶກສາຫາລືບັນດາຫົວຂໍ້ຕ່າງໆ ກັບກອງເລຂາຄະນະກໍາມະການແມ່ນໍ້າຂອງແຫ່ງຊາດ ຢ່າງໃກ້ຊິດ, ລວມທັງກະຊວງທີ່ກ່ຽວຂ້ອງ ເພື່ອການດໍາເນີນໂຄງການຕ່າງໆໃຫ້ມີປະສິດ ທິພາບ ແລະ ປະສິດທິຜົນສູງສຸດ ແນໃສ່ຍຸດທະສາດດ້ານການພັດທະນາຂອງ ສປປ ລາວ ໂດຍສອດຄ່ອງຕາມສັນຍາແມ່ນໍ້າຂອງປີ 1995.

ທ່ານ ອະນຸລັກ ກິດຕິຄຸນ ກໍໄດ້ສະແດງຄວາມຂອບໃຈຢ່າງເລິກເຊິ່ງຕໍ່ ທ່ານລັດຖະມົນຕີ ສະເຫລີມໄຊ ກົມມະສິດ ທີ່ໄດ້ໃຫ້ກຽດຕ້ອນຮັບຢ່າງອົບອຸ່ນໃນຄັ້ງນີ້, ພ້ອມທັງໄດ້ໃຫ້ຄຳໝັ້ນສັນຍາວ່າ ຈະພະຍາຍາມຢ່າງສຸດຄວາມສາມາດເພື່ອຊຸກຍູ້ ແລະ ສະໜັບສະໜູນການຈັດຕັ້ງປະຕິບັດບັນດາໂຄງການຕ່າງໆ ເພື່ອພັດທະນາ ແລະ ຄຸ້ມຄອງຊັບພະຍາກອນນ້ຳ ຕາມລຳແມ່ນ້ຳຂອງ ແລະ ຈະສືບຕໍ່ປະສານງານຢ່າງໃກ້ຊິດຮ່ວມກັບ ກອງເລຂາຄະນະກຳມະການແມ່ນ້ຳຂອງແຫ່ງຊາດ ແລະ ກະຊວງທີ່ກ່ຽວຂ້ອງເພື່ອເສີມຂະຫຍາຍການພົວພັນຮ່ວມມື ແລະ ການດຳເນີນວຽກງານໂຄງການຕ່າງໆ ໃນຕໍ່ໜ້າໃຫ້ມີປະສິດທິຜົນຍິ່ງຂຶ້ນ, ລວມທັງການຈັດກອງປະຊຸມສຸດຍອດ ຄະນະກໍາມາທິການແມ່ນໍ້າຂອງສາກົນ ທີ່ ສປປ ລາວ ຈະເປັນເຈົ້າພາບໃນປີ 2023.

ຄະນະກຳມາທິການແມ່ນ້ຳຂອງສາກົນ(MRC) ເປັນອົງການຈັດຕັ້ງສາກົນ ລະຫວ່າງລັດຖະບານ ເຊິ່ງລິເລີ່ມເປັນຄະນະກຳມາທິການແມ່ນ້ຳຂອງ ໃນປີ 1957 ແລະກາຍເປັນຄະນະກຳມະການຊົ່ວຄາວໃນປີ 1978 ເພື່ອສໍາຫລວດແມ່ນໍ້າຂອງຕອນລຸ່ມ.

ມາຮອດວັນທີ 5 ເມສາ 1995, 4 ປະເທດທີ່ຢູ່ໃນອ່າງແມ່ນ້ຳຂອງຕອນລຸ່ມຄື: ກຳປູເຈຍ, ສປປ ລາວ, ຣາຊະອານາຈັກໄທ ແລະ ສສ ຫວຽດນາມ ໄດ້ເຊັນສັນຍາວ່າດ້ວຍການຮ່ວມມື ເພື່ອການພັດທະນາອ່າງແມ່ນ້ຳຂອງແບບຍືນຍົງ (ສັນຍາແມ່ນໍ້າຂອງ ປີ 1995) ແລະ ໄດ້ກຳນົດເອົາວັນດັ່ງກ່າວ ເປັນມື້ສ້າງຕັ້ງຄະນະກຳມາທິການແມ່ນ້ຳຂອງສາກົນ (MRC). ຄະນະກຳມາທິການແມ່ນ້ຳຂອງສາກົນປະກອບດ້ວຍ: ສະພາມົນຕີ (ຂັ້ນລັດຖະມົນຕີ), ຄະນະກຳມະການຮ່ວມ(ຂັ້ນຫົວໜ້າກົມ) ແລະ ກອງເລຂາ(MRCS). ພ້ອມດຽວກັນນັ້ນ, ປະເທດສະມາຊິກ ໄດ້ສ້າງຕັ້ງຄະນະກຳມະທິການແມ່ນ້ຳຂອງແຫ່ງຊາດຂຶ້ນ (NMC) ເພື່ອສະໜັບສະໜູນພາລະກິດ ຂອງຄະນະກຳມາທິການແມ່ນ້ຳຂອງສາກົນ.

ແຫຼ່ງຂ່າວຈາກ: ປະເທດລາວ

ວັນທີ 8 ກຸມພາ 2022 ນີ້, ທ່ານ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກ ປະທານປະເທດແຫ່ງ ສປປ ລາວ ພ້ອມດ້ວຍພັນລະຍາ ແລະ ຄະນະໄດ້ເດີນທາງມາເຄື່ອນໄຫວຢຽມຢາມ ແລະ ເຮັດວຽກຢູ່ແຂວງຜົ້ງສາລີ. ໂອກາດນີ້ກໍ່ໄດ້ຮັບການຕ້ອນຮັບຈາກທ່ານ ຄຳຜອຍ ວັນນະສານ ກຳມະການສູນກາງພັກ, ເລຂາພັກແຂວງ, ເຈົ້າແຂວງໆຜົ້ງສາລີ, ພ້ອມດ້ວຍການນຳພັກລັດຂັ້ນແຂວງ ຢູ່ທີ່ສະໜາມບີນຂອງເມືອງຜົ້ງສາລີ.

ຈຸດປະສົງຫຼັກຂອງການມາເຄື່ອນໄຫວໃນຄັ້ງນີ່ ກໍ່ເພື່ອເປັນການຢ້ຽມຢາມ ແລະ ຕິດຕາມຊຸກຍູ້ການຈັດຕັ້ງປະຕິບັດມະຕິ XI ຂອງພັກ, ມະຕິ XI ຂອງແຂວງ ແລະ ແຜນພັດທະນາເສດຖະກິດ – ສັງຄົມຂອງແຂວງ, ທັງພົບປະໂອ້ລົມການນຳຫຼັກແຫລ່ງຂອງແຂວງຜົ້ງສາລີ, ພ້ອມກັນນັ້ນທ່ານປະທານປະເທດພ້ອມດ້ວຍຄະນະຍັງຈະໄດ້ໄປເຄື່ອນໄຫວຢ້ຽມຊົມພື້ນຖານການຜະລິດ ໂດຍສະເພາະກໍ່ແມ່ນໂຮງງານເຫຼົ້າຂຽວຂຸນສຸກ ແລະ ໂຮງງານຊາບູຮານແສງຄຳ ລາວລີ ແລະ ສວນຊາຢູ່ບ້ານລຸງຈີງ ແລະ ມອບເຄື່ອງຈຳນວນໝື່ງໃຫ້ກັບ ໂຮງຮຽນ ມສ ພູຟ້າ ແລະ ໂຮງຮຽນ ມ ສ ມົງເຈົາ ຕື່ມອີກ.

ການເຄື່ອນໄຫວຢ້ຽມຢາມ ແລະ ເຮັດວຽກຂອງທ່ານປະທານປະເທດແຫ່ງ ສປປ ລາວພ້ອມດ້ວຍພັນລະຍາ ແລະ ຄະນະ ຢູ່ແຂວງຜົ້ງສາລີ ແມ່ນຈະດຳເນີນຮອດວັນທີ 9 ກຸມພາ 2022 ຈຶ່ງຈະສຳເລັດ.

ອ້າງອີງ: ສະຖານີວິທະຍຸ – ໂທລະພາບແຂວງຜົ້ງສາລີ

ໃນວັນທີ 7 ກຸມພາ 2022, ທ່ານ ທອງລຸນ ສີສຸລິດ ເລຂາທິການໃຫຍ່ພັກປະຊາຊົນ ປະຕິວັດລາວ, ປະທານປະເທດ ສປປ ລາວ ພ້ອມພັນລະຍາ ແລະ ຄະນະ ໄດ້ເດີນທາງ ໄປຢ້ຽມຢາມ ແລະເຮັດວຽກຢູ່ແຂວງຫລວງນໍ້າທາ ໂດຍໄດ້ຮັບການຕ້ອນຮັບຈາກທ່ານ ຄຳໄຫຼ ສີປະເສີດ ເຈົ້າແຂວງຫຼວງນ້ຳທາ ພ້ອມຄະນະ, ໂອກາດດັ່ງກ່າວ ຍັງໄດ້ຢ້ຽມຊົມການພັດທະນາເຂດເສດຖະກິດພິເສດບໍ່ເຕັນແດນງາມ ແລະ ຮັບຟັງການລາຍງານ ສະພາບຈຸດພິເສດ ຂອງດ່ານບໍ່ເຕັນ; ການຈັດຕັ້ງປະຕິບັດວຽກງານ ຢູ່ດ່ານສາກົນ ບໍ່ເຕັນ.

ຈາກນັ້ນ ທາງຄະນະຍັງໄດ້ໄປຢ້ຽມຢາມການຜະລິດກະສິກຳປູກພືດເປັນສິນຄ້າຂອງບໍລິສັດ ເຖິງເຝີຍ ການຄ້າ ແລະ ສົ່ງເສີມກະສິກຳ ປູກຫມາກຖົ່ວເຫຼືອງເປັນສິນຄ້າ ໃນເນື້ອທີ່ 150 ເຮັກຕາ ຊຶ່ງສາມາດສ້າງວຽກເຮັດງານທໍາ ໃຫ້ປະຊາຊົນໃນ 5 ບ້ານ, 186 ຄອບຄົວ ແລະ ໃນນີ້ບໍລິສັດຍັງໄດ້ເຊົ່າດິນປະຊາຊົນ ທໍາການຜະລິດເຮັກຕາ ລະ5.000.000 ກີບຕໍ່ປີ ອີກຈຳນວນໜຶ່ງ. ມາຮອດປະຈຸບັນບໍລິສັດ ປູກຖົ່ວເຫຼືອງໄດ້ແລ້ວ 70%, ຄາດໝາຍວ່າຈະໃຫ້ສຳເລັດໃນເດືອນ ກຸມພານີ້.

ໃນເວລາຕໍ່ມາ, ຄະນະໄດ້ໄປຢ້ຽມຢາມການລ້ຽງສັດ ຂອງຄອບຄົວ ເຊີລິວົງ ທີ່ໄດ້ລ້ຽງຫມູ, ສ້າງເຕົາຂ້າສັດຍ່ອຍ ແລະ ລ້ຽງປາ ເປັນອາຊີບ ປະຈຸບັນ ຄອບຄົວດັ່ງກ່າວ ໄດ້ລ້ຽງປາ 28 ຫນອງ ໃນເນື້ອທີ່ 5,6 ເຮັກຕາ,ໃນແຕ່ລະປີໄດ້ມີການປ່ອຍປານ້ອຍຈຳນວນ 500.000 ໂຕ/ປີ ແລະ ສະໜອງປາຂາຍສູ່ທ້ອງຕະຫຼາດໄດ້ເຖິງ 120 ໂຕນ/ປີ ຕອບສະໜອງການບໍລິໂພກພາຍໃນເທດສະບານເມືອງ ແລະ ແຂວງໄດ້ຢ່າງພຽງພໍໂດຍພື້ນຖານ ແລະ ຍັງສະຫນອງໃຫ້ແຂວງອື່ນໆຕື່ມອີກຈຳນວນໜຶ່ງ.

ການໄປເຄື່ອນໄຫວຢ້ຽມຢາມ ແລະເຮັດວຽກຢູ່ແຂວງຫລວງນໍ້າທາຂອງທ່ານເລຂາທິການໃຫຍ່ ປະທານປະເທດ ຄັ້ງນີ້ ໄດ້ອອກເດີນທາງດ້ວຍຂະບວນລົດໄຟ ລາວ-ຈີນ ຈາກສະຖານີ ນະຄອນຫຼວງ ວຽງຈັນ ຫາສະຖານີປາຍທາງບໍ່ເຕັນ. ລົດໄຟ ລາວ-ຈີນ ຖືກອອກແບບ ໃຫ້ມີຄວາມໄວ 160 ກິໂລແມັດຕໍ່ຊົ່ວໂມງ, ສະເພາະໄລຍະເວລາ ການກວດກາເຕັກນິກເຄື່ອນທີ່ນັ້ນ, ລົດໄຟຈະເລີ່ມທົດລອງແລ່ນໃນຄວາມໄວ 80 ກິໂລ ແມັດຕໍ່ຊົ່ວໂມງ ແລະ ຄ່ອຍຍົກລະດັບຄວາມໄວຂຶ້ນຕາມການອອກແບບ ຈົນຮອດຄວາມໄວ ສູງສຸດ 176 ກິໂລແມັດຕໍ່ຊົ່ວໂມງ. ສະເພາະ ລົດໄຟຂະບວນລ້ານຊ້າງ, ມີທັງໝົດ 9 ຕູ້, ລວມມີ: ຕູ້ລົດ ໄຟທີ່ຂັບເຄືື່ອນໄດ້ເອງ 1 ຕູ້, ຕູ້ລົດໂດຍສານຊັ້ນ 1 ແລະ ຕູ້ຫ້ອງອາຫານ 1 ຕູ້, ຕູ້ລົດໂດຍສານຊັ້ນສອງ 6 ຕູ້ , ບັນຈຸໄດ້ 720 ຄົນ ແລະ ສາມາດ ເຊື່ອມຕໍ່ ສອງຂະບວນລົດໄຟໄດ້ ໃນເວລາທີ່ຕ້ອງການ; ພາຍໃນຕູ້ໂດຍສານ ມີຕັ້ງນັ່ງ 30 ແຖວໆລະ 05 ບ່ອນນັ່ງ, ມີຫ້ອງນໍ້າປົກກະຕິ ແລະ ຫ້ອງນໍ້າສຳລັບຄົນພິການ ແລະ ສີ່ງອຳນວຍຄວາມສະ ດວກຕ່າງໆ ພ້ອມທັງຕົວໜັງສືຊີ້ບອກເປັນພາສາລາວ-ອັງກິດ ແລະ ຈີນ.ໂຄງການກໍ່ສ້າງທາງລົດໄຟ ລາວ-ຈີນ ມີສະຖານີລົດໄຟທັງໝົດ 33 ສະຖານີ. ໃນນີ້, ມີສະຖານີໂດຍສານ ແລະ ສິນຄ້າລວມຢູ່ນຳກັນ 11 ຈຸດ, ມີຈຸດສະຫລັບລາງ ແລະ ຈຸດຫລີກ ທັງໝົດ 284 ແຫ່ງ. ເສັ້ນທາງລົດໄຟຄວາມໄວສູງ ລາວ-ຈີນ ມີຄວາມຍາວ ປະມານ 422,4 ກິໂລແມັດ ໃຊ້ເວລາເດີນທາງ ປະມານ 3 ຊົ່ວໂມງປາຍ ຈາກສະຖານີນະຄອນຫລວງວຽງຈັນຫາບໍ່ເຕັນ.

ແຫຼ່ງຂ່າວ: ປະເທດລາວ