Blog - ໂທລະໂຄ່ງ THOLAKHONG

ງານມະຫາກຳສົ່ງເສີມແຮງງານລາວ 2022 ຈະຈັດລະຫວ່າງ ວັນທີ 16-20 ມີນາ 2022

-

February 10, 2022

ວັນທີ 10 ກຸມພາ 2022, ທີ່ ຫ້ອງປະຊຸມ ສະພາການຄ້າ ແລະ ອຸດສາຫະກຳແຫ່ງຊາດລາວ ໄດ້ມີພິທີຖະແຫຼງຂ່າວ ມະຫາກຳສົ່ງເສີມແຮງງານລາວ ປີ 2022

ໂດຍການເປັນ ປະທານ ທ່ານ ປອ. ໄຊບັນດິດ ຣາຊະພົນ, ຮອງປະທານ ສະພາການຄ້າ ແລະ ອຸດສາຫະກໍາແຫ່ງຊາດລາວ ( ສຄອຊ)

ໂດຍໃຫ້ກຽດເປັນປະທານຮ່ວມ ຂອງ ທ່ານ ວັນນະເລກ ເຫຼື້ອງ, ຮອງຫົວໜ້າກົມອາຊີວະສຶກສາ, ກະຊວງສຶກສາທິການ ແລະ ກິລາ, ທ່ານ ສຸລິສັກ ສຸພັນທອງ ຮອງຫົວໜ້າກົມພັດທະນາສີມືແຮງງານ ແລະ ຈັດຫາງານ, ກະຊວງແຮງງານ ແລະ ສະຫວັດດີການສັງຄົມ,

ທ່ານ ນາງ ຈັນເພັງ ມະນີແສງ, ຫົວໜ້າກົມປົກປ້ອງແຮງງານ, ສູນກາງສະຫະພັນກຳມະບານລາວ ພ້ອມຄະນະບໍລິຫານງານສະພາການຄ້າ ແລະ , ສະມາຄົມ, ກຸ່ມທຸລະກິດ ແລະ ບັນດາສື່ມວນຊົນ ເຂົ້າຮ່ວມ.

ງານມະຫາກຳສົ່ງເສີມແຮງງານລາວ Lao Employment 2022 ຈະຈັດຂຶ້ນໃນລະຫວ່າງ ວັນທີ 16-20 ມີນາ 2022 ທີ່ ສູນການຄ້າ ວຽງຈັນເຊັນເຕີ້, ນະຄອນຫຼວງວຽງຈັນ ໂດຍທາງ ສະພາການຄ້າ ແລະ ອຸດສາຫະກໍາແຫ່ງຊາດລາວ ຮ່ວມກັບ ກະຊວງແຮງງານແລະສະຫວັດດີການສັງຄົມ, ກະຊວງສຶກສາທິການແລະກິລາ, ສະຫະພັນກຳມະບານລາວ ໄດ້ຮ່ວມກັນຈັດງານດັ່ງກ່າວຂື້ນມາ. ເພື່ອສ້າງຄວາມເຂັ້ມແຂງໃຫ້ກັບ ບັນດາແຮງງານທີ່ຫວ່າງງານ ແລະ ຫົວໜ່ວຍທຸລະກິດ ທີ່ໄດ້ຮັບຜົນກະທົບຈາກການແຜ່ລະບາດຂອງເຊື້ອໄວຣັດ COVID-19 ໂດຍມີສ່ວນຮ່ວມກັບຜູ້ສຳຄັນໃນຂົງເຂດແຮງງານ ແລະ ສະຫວັດດີການສັງຄົມ, ສູນຝຶກອົບຮົມ, ວິທະຍາໄລເຕັກນິກວິຊາຊີບ, ບໍສັດ ສະມາຄົມທຸລະກິດທີ່ກ່ຽວຂ້ອງ, ອົງກອນຜູ້ໃຫ້ການສະໜັບສະໜູນ ແລະ ຜູ້ໃຊ້ແຮງງານ

ເປົ້າໝາຍ

1. ເປັນງານເປີດກວ້າງ ໃຫ້ຜູ້ປະກອບການ ແລະ ແຮງງານໄດ້ມາພົບປະ-ແລກປ່ຽນ.

2. ສົ່ງເສີມການສ້າງວຽກເຮັດງານທຳ ໃຫ້ກັບແຮງງານທີ່ຫວ່າງງານ.

3. ຍົກລະດັບສີມືການເຮັດວຽກຂອງແຮງງານດ້ວຍການຝຶກອົບຮົມຕ່າງໆ.

4. ເປັນເວທີແລກປ່ຽນປະສົບການ ແລະ ເຜີຍແຜ່ແນວທາງໃນການພັດທະນາສີມືແຮງງານ ຂອງຜູ້ ອອກແຮງງານ ແລະ ຜູ້ໃຊ້ແຮງງານ.

5. ເປັນເວທີໃຫ້ນັກສຶກສາໄດ້ມີການແລກປ່ຽນບົດຮຽນ ເພື່ອກຽມເຂົ້າສູ່ຕະຫຼາດແຮງງານໃນອະນາຄົດ.

6. ຮັບຮູ້ຂໍ້ມູນຂ່າວສານຕະຫຼາດແຮງງານ ແລະ ນະໂຍບາຍທີ່ຕິດພັນການຈ້າງງານ.

ກິດຈະກໍາສໍາຄັນໃນງານ

1. ຮ່ວມສົນທະນາ / ຝຶກອົບຮົມ (ໃຫ້ຄວາມຮູ້, ສ້າງແຮງບັນດານໃຈ)

2. ນັກສຶກສາກຽມເຂົ້າສູ່ຕະຫຼາດແຮງງານ

3. ຊ່ວຍເຫຼືອໃນການພັດທະນາທັກສະດ້ານແຮງງານ ແລະ ຍົກລະດັບສີມືແຮງງານ

4. ງານວາງສະແດງ ແລະ ສາທິດທັກສະດ້ານສີມືແຮງງານ, ເວທີສ້າງສ້າງຄວາມຮັບຮູ້ແກ່ສັງຄົມ

5. ການແຂ່ງຂັນສີມືແຮງງານ ແລະ ປະກາດໂຄງການສົ່ງເສີມສີມືແຮງງານຕ່າງໆ

6. ການພົບປະລະຫວ່າງອົງກອນ, ເຂດເສດຖະກິດ, ຫົວໜ່ວຍທຸລະກິດ ກັບຜູ້ຫວ່າງງານ,ແຮງງານທີ່ສົນໃຈ ແບບເປີດກວ້າງ.

7. ການສະໜັບສະໜູນທຶນການສຶກສາ ເພື່ອສ້າງແຮງງານຄຸນນະພາບ

ກະຊວງການຕ່າງປະເທດຈັດກອງປະຊຸມຕີລາຄາທົບທວນວຽກງານຈັດຕັ້ງ 5 ປີ ແລະ ວາງທິດທາງໃນຕໍ່ໜ້າ

ລັດຖະບານ

ໂທລະໂຄ່ງ THOLAKHONG

-

February 10, 2022

0

ຕອນເຊົ້າຂອງ ວັນທີ 10 ກຸມພາ 2022 ທີ່ ກະຊວງການຕ່າງປະ ເທດ ໄດ້ຈັດກອງປະຊຸມຕີລາຄາທົບທວນວຽກງານຈັດຕັ້ງ 5 ປີຜ່ານມາ ແລະ ວາງທິດທາງແຜນການຕໍ່ໜ້າ, ໂດຍພາຍໃຕ້ການເປັນປະທານຂອງ ສະຫາຍ ສະເຫຼີມໄຊ ກົມມະສິດ, ກຳມະ ການກົມການເມືອງສູນກາງພັກ, ເລຂາຄະນະບໍລິຫານງານພັກກະຊວງການຕ່າງປະເທດ ຊຶ່ງມີບັນດາ ສະຫາຍ ຄະນະບໍລິຫານງານພັກກະຊວງ, ເລຂາໜ່ວຍພັກ, ຫົວໜ້າກົມ, ຮອງກົມ ແລະ ພະ ນັກງານຫຼັກແຫຼ່ງ ຂອງກະຊວງການຕ່າງປະເທດ ເຂົ້າຮ່ວມທັງໝົດ ຈໍານວນ 108 ສະຫາຍ, ຍິງ 33 ສະຫາຍ.

ຈຸດປະສົງຫຼັກຂອງກອງປະຊຸມຄັ້ງນີ້, ແມ່ນເພື່ອເປັນການຜັນຂະ ຫຍາຍມະຕິຂອງຄະນະບໍລິຫານງານສູນກາງພັກເລທີ 04/ຄລສພ ວ່າດ້ວຍການເພີ່ມທະວີການນໍາພາຂອງພັກ ເພື່ອສ້າງການຫັນປ່ຽນຢ່າງແຂງແຮງ ແລະ ເລິກເຊິ່ງວຽກງານພະນັກງານ ແລະ ຜັນຂະຫຍາຍເນື້ອໃນກອງປະຊຸມວຽກງານຈັດຕັ້ງທົ່ວປະເທດ ຄັ້ງທີ XI ໃຫ້ເປັນຮູບປະທໍາ ໃນວຽກພັກ ແລະ ພະນັກງານ.

ກອງປະຊຸມ ໄດ້ຮັບຟັງບົດລາຍ ງານ ການຕີລາຄາສະພາບການຈັດຕັ້ງປະຕິບັດວຽກງານພັກ-ພະ ນັກງານ ໃນ 5 ປີ ຜ່ານມາ ໂດຍໄດ້ຍົກໃຫ້ເຫັນຜົນງານອັນພົ້ນເດັ່ນໃນຫຼາຍດ້ານ, ໃນວຽກງານກໍ່ສ້າງພັກ, ວຽກງານພະນັກງານ, ວຽກ ງານປັບປຸງການຈັດຕັ້ງ, ເປັນຕົ້ນ ຄະນະພັກ ຄະນະນໍາກະຊວງການຕ່າງປະເທດໄດ້ເອົາໃຈໃສ່ຊີ້ນໍານໍາພາທາງດ້ານການເມືອງແນວຄິດ, ເຮັດໃຫ້ສະມາຊິກພັກ-ພະ ນັກງານ ເຊື່ອມຊຶມແນວທາງນະໂຍ ບາຍຂອງພັກ-ລັດ, ມີຄວາມອຸ່ນອ່ຽນທຸ່ນທ່ຽງ ແລະ ບຸກບືນ ຫ້າວ ຫັນ ໃນການປະຕິບັດໜ້າທີ່ວຽກ ງານທີ່ໄດ້ຮັບມອບໝາຍ; ໄດ້ສຸມໃສ່ວຽກງານກໍ່ສ້າງພັກ ເຮັດໃຫ້ພັກມີການຈັດຕັ້ງທີ່ເຂັ້ມແຂງ ແລະ ມີແບບແຜນວິທີນໍາພາຕາມຫຼັກການລວມສູນປະຊາທິປະໄຕ ແລະ ສ້າງພັກໄປຕາມທິດສ້າງພັກໃຫ້ປອດໃສ ເຂັ້ມແຂງ ໜັກແໜ້ນ, ເຊິ່ງໃນປີ 2020 ມີ 20 ໜ່ວຍພັກໄດ້ຮັບນາມມະຍົດໜ່ວຍພັກປອດໃສ ເຂັ້ມແຂງ ໜັກແໜ້ນ.

ໃນວຽກພະນັກງານ ກໍ່ໄດ້ມີການປັບປຸງ ແລະ ສ້າງນິຕິກໍາເປັນອັນສະເພາະຂອງກະຊວງການຕ່າງປະເທດ ແລະ ມີການສ້າງພະນັກງານໄປຕາມແຜນກໍານົດພະນັກງານ ທີ່ໄດ້ຜ່ານຂະ ບວນການທາບທາມຢ່າງມີປະ ຊາທິປະໄຕ, ມີການບໍາລຸງ-ກໍ່ສ້າງພະນັກງານ ຊຶ່ງໃນ 5 ປີຜ່ານມາ ໄດ້ສົ່ງພະນັກງານໄປຍົກລະດັບວິຊາສະເພາະຢູ່ພາຍໃນ ແລະ ຕ່າງປະເທດ 554 ຄົນ, ຍິງ 346 ຄົນ, ກໍ່ສ້າງ ແລະ ຝຶກອົບຮົມທິດ ສະດີການເມືອງຢູ່ພາຍໃນ ແລະ ຕ່າງປະເທດໄດ້ 160 ຄົນ, ຍິງ 55 ຄົນ, ມີການຄຸ້ມຄອງ, ແຕ່ງຕັ້ງ, ສັບຊ້ອນ, ຈັດວາງພະນັກງານ ຢ່າງເປັນລະບົບ, ລວມເຖິງມີການປະເມີນຜົນພະນັກງານຢ່າງເປັນປົກກະຕິ, ມີການປະຕິບັດນະ ໂຍບາຍ ລວມເຖິງປະຕິບັດວິໄນຕໍ່ພະນັກງານທີ່ເສຍທາດຂາດຄຸນ ລະເມີດກົດລະບຽບພັກ ແລະ ກົດໝາຍລັດ. ໃນວຽກງານປັບປຸງການຈັດຕັ້ງ, ຄະນະພັກແຕ່ລະຂັ້ນ ໄດ້ສຸມໃສ່ປັບປຸງໄປຕາມທິດກະ ທັດຮັດ ແລະ ມີການກໍານົດແບ່ງພາລະບົດບາດຢ່າງຊັດເຈນ ຫຼີກ ເວັ້ນການປະຕິບັດວຽກງານທັບຊ້ອນກັນ, ມາເຖິງປັດຈຸບັນ 8 ກົມ ຈາກທັງໝົດ 17 ກົມ ຂອງກະ ຊວງ ສາມາດສໍາເລັດການປັບປຸງ ການກໍານົດຕໍາແໜ່ງງານແລ້ວ ແລະ ຄາດວ່າ ຈະສູ້ຊົນໃຫ້ສໍາເລັດໃນອະນາຄົດອັນໃກ້ນີ້.

ນອກຈາກນີ້, ບົດລາຍງານຍັງໄດ້ຊີ້ໃຫ້ເຫັນບາງຈຸດທີ່ຈະຕ້ອງໄດ້ພ້ອມກັນເອົາໃຈໃສ່, ບົດຮຽນທີ່ຖອດຖອນໄດ້ ແລະ ໄດ້ວາງທິດ ທາງແຜນການຕໍ່ໜ້າ ຊຶ່ງໄດ້ກໍານົດໜ້າວຽກຕ່າງໆທີ່ສໍາຄັນ ເພື່ອແນໃສ່ເຮັດໃຫ້ວຽກງານພັກ-ພະ ນັກງານ ຂອງກະຊວງການຕ່າງປະ ເທດ ກ້າວເຂົ້າສູ່ຄຸນນະພາບອັນໃໝ່ສູງຂຶ້ນກ່ວາເກົ່າ.

ໃນກອງປະຊຸມໄດ້ມີການປະກອບຄໍາຄິດຄໍາເຫັນຕໍ່ບົດລາຍງານຢ່າງກ້ວາງຂວາງ ແລະ ກົງໄປກົງມາ, ພ້ອມທັງສະເໜີແນະວິທີການ ແລະ ມາດຕະການ ໃນການຍົກສູງຄຸນນະພາບວຽກງານກໍ່ສ້າງພັກ-ພະນັກງານ ຂອງກະຊວງການຕ່າງປະເທດໃນຕໍ່ໜ້າ ແລະ ມີການຮັບຮອງເອົາມະຕິກອງປະຊຸມຢ່າງເປັນເອກະສັນ. ໃນຕອນທ້າຍກອງປະຊຸມ ສະຫາຍ ສະເຫຼີມໄຊ ກົມມະສິດ, ກໍາມະການກົມການເມືອງສູນກາງພັກ, ເລຂາຄະນະບໍລິຫານງານພັກກະ ຊວງການຕ່າງປະເທດ ໄດ້ໂອ້ລົມໃຫ້ທິດຊີ້ນໍາຕໍ່ກອງປະຊຸມ ໂດຍໄດ້ເນັ້ນໜັກບາງບັນຫາ ເປັນຕົ້ນວຽກງານກໍ່ສ້າງພັກ ຕ້ອງການເພີ່ມທະວີການນໍາພາການເມືອງ- ແນວຄິດ ຂອງບັນດາສະຫາຍຄະນະພັກໃຫ້ຫຼາຍຂຶ້ນກວ່າເກົ່າ, ເພື່ອເຮັດໃຫ້ຖັນແຖວພະນັກງານນຳພາ ໄດ້ຮັບການປະກອບຄວາມຮູ້ລັດທິມາກ-ເລນິນ ແລະ ແນວຄິດປະທານ ໄກສອນ ພົມວິຫານ ເພື່ອເປັນພື້ນຖານທິດສະດີໃນພາລະກິດປະຕິບັດໜ້າທີ່ວຽກ ງານຂອງຕົນ, ໂດຍຕິດພັນກັບການກໍ່ສ້າງພັກໃຫ້ມີຄວາມປອດໃສ, ເຂັ້ມແຂງ ແລະ ໜັກແໜ້ນ, ມີແບບແຜນນໍາພາທີ່ຖືກຕ້ອງ, ປະຕິບັດຕາມຫຼັກການລວມສູນປະຊາທິປະໄຕ, ຕົກລົງເປັນໝູ່ ຄະນະ, ແບ່ງວຽກ ໃຫ້ບຸກຄົນຮັບຜິດຊອບ, ມີການຕິດຕາມກວດກາ, ປະເມີນຜົນການຈັດຕັ້ງປະຕິບັດໜ້າທີ່ຢ່າງປົກກະຕິ, ເດັດດ່ຽວແກ້ໄຂປະກົດການຫຍໍ້ທໍ້ຢູ່ພາຍໃນພັກ.

ວຽກງານພະນັກງານ ໃຫ້ເອົາໃຈໃສ່ ສືບຕໍ່ກໍ່ສ້າງພະນັກ ງານນຳພາ-ຄຸ້ມຄອງ ແລະ ພະນັກ ງານສືບທອດປ່ຽນແທນຢູ່ແຕ່ລະຂັ້ນ ຢ່າງເປັນລະບົບ ແລະ ຕໍ່ ເນື່ອງ, ເລືອກເຟັ້ນ ແລະ ສັບຊ້ອນພະນັກງານ ດ້ວຍການວາງລະ ບຽບ, ກົນໄກ, ມາດຕະຖານຕໍ່ພະນັກງານນຳພາຄຸ້ມຄອງແຕ່ລະປະເພດໃຫ້ລະອຽດ, ຊັດເຈນ ແລະ ຈະແຈ້ງ; ໃຫ້ເອົາໃຈໃສ່ປະຕິບັດນະໂຍບາຍຢ່າງທົ່ວເຖິງ, ຍຸຕິທໍາ ແລະ ໂປ່ງໃສ ແລະ ຕ້ອງສືບຕໍ່ປັບປຸງກົງຈັກການຈັດຕັ້ງໃຫ້ເຂັ້ມແຂງ ແລະ ມີປະສິດທິພາບ ໄປຕາມທິດກະທັດຮັດ, ບຸກຄົນໜຶ່ງຮັບຜິດຊອບຫຼາຍວຽກ.

ສຸດທ້າຍ, ສະຫາຍ ສະເຫຼີມໄຊ ກົມມະສິດ ໄດ້ເນັ້ນໜັກໃຫ້ຄະນະພັກແຕ່ລະຂັ້ນນໍາເອົາເນື້ອໃນຈິດໃຈທີ່ໄດ້ຕົກລົງກັນ ໃນກອງປະຊຸມໄປຈັດຕັ້ງຜັນຂະຫຍາຍໃຫ້ເປັນຮູບປະທຳ.

ຂ່າວ;ພາບ: ກົມການຂ່າວ ກະຊວງການຕ່າງປະເທດ

ມື້ນີ້ເສຍຊີວິດ 1 ຄົນ ປົວດີ 133 ແລະ ຕິດໃໝ່ 450

ຂ່າວໂຄວິດ-19

ໂທລະໂຄ່ງ THOLAKHONG

-

February 10, 2022

0

ມື້ນີ້ເສຍຊີວິດ 1 ຄົນ ປົວດີ 133 ແລະ ຕິດໃໝ່ 450

ສະພາບການລະບາດຂອງພະຍາດ COVID-19 ຢູ່ ສປປ ລາວ ວັນທີ 9 ກຸມພາ 2022, ໄດ້ກວດວິເຄາະທັງໝົດ 3.312 ຕົວຢ່າງ ໃນຂອບເຂດທົ່ວປະເທດ ແລະ ພົບເຊື້ອ ທັງໝົດ 450 ຄົນ (ຕິດເຊື້ອພາຍໃນ 443 ຄົນ ແລະ ນໍາເຂົ້າ 7 ຄົນ).

– ຂໍ້ມູນໂດຍຫຍໍ້ກ່ຽວກັບ ການຕິດເຊືື້ອພາຍໃນໃໝ່ ທັງໝົດ 443 ຄົນ ຈາກ 17 ແຂວງ ແລະ ນະຄອນຫຼວງວຽງຈັນ ມີລາຍລະອຽດ ດັ່ງນີ້:

ສໍາລັບການຕິດເຊື້ອນໍາເຂົ້າ ມີ 7 ຄົນ ທັງໝົດຈາກ ສະຫວັນນະເຂດ 5 ຄົນ, ນະຄອນຫຼວງ 01 ຄົນ, ແລະ ບໍລິຄໍາໄຊ 1 ຄົນ ເຊິ່ງໄດ້ເຂົ້າຈຳກັດບໍລິເວນຕາມສະຖານທີ່ກຳນົດໄວ້ກ່ອນຈະກວດພົບເຊື້ອ.

ຮອດປັດຈຸບັນ ມີຜູ້ຕິດເຊື້ອທັງໝົດ ຢຸ່ໃນ ສປປ ລາວ 138.007 ຄົນ, ອອກໂຮງໝໍວານນີ້ 133 ຄົນ, ກຳລັງປິ່ນປົວ 3,854 ຄົນ ແລະ ເສຍຊີວິດສະສົມທັງໝົດ 584 ຄົນ (ເສຍຊິວິດໃໝ່ 01 ຄົນ).

ສຳລັບຜູ້ເສຍຊີວິດໃໝ່ 01 ຄົນ ຢູ່ ແຂວງອຸດົມໄຊ

ທີ່ມາ

ຢາກປະຢັດນໍ້າມັນ ຕ້ອງລອງ!

ຂ່າວນານາສາລະ

-

February 10, 2022

0

ດັ່ງທີ່ທຸກຄົນຮູ້, ປັດຈຸບັນ ລາຄານໍ້າມັນປັບສູງຂຶ້ນ ໃນບາງເດືອນລາຄານໍ້າມັນກໍປັບຂຶ້ນຫຼາຍເຖິງ 2 ເທື່ອ ເຮັດໃຫ້ຜູ້ຂັບຂີ່ຕ້ອງໄດ້ເພີ່ມເງິນເພື່ອໃສ່ນໍ້າມັນ ເມືື່ອຢາກໄດ້ນໍ້າມັນປະລິມານທີ່ຕົນເອງນັ້ນເຄີຍໃສ່ເປັນປະຈຳ, ເຊິ່ງມື້ນີ້ໂທລະໂຄ່ງມີວິທີງ່າຍໆທີ່ໃຫ້ທຸກຄົນໄດ້ລອງ ເພື່ອຈະຊ່ວຍໃຫ້ລົດຂອງທ່ານປະຢັດນໍ້າມັນຫຼາຍຂຶ້ນ ເຊິ່ງມີດັ່ງນີ້:

1. ໝັ່ນກວດລົມຢາງລົດສະເໝີ: ການປ່ອຍໃຫ້ຢາງລົດອ່ອນຈະເຮັດໃຫ້ເກີດການສຽດສີຫຼາຍຂື້ນ ເຄື່ອງຈັກຈະເຮັດວຽກໜັກ ດັ່ງນັ້ນຈຶ່ງເຮັດໃຫ້ເປືອງນໍ້າມັນກວ່າປົກກະຕິ ສະນັ້ນຄວນກວດລົມລົດຕະຫຼອດ ໂດຍສະເພາະຍາມເດີນທາງໄກ ແລະ ຄວນເຕີມລົມລົດຕາມມາດຕະຖານ ທີ່ກຳນົດທັງລໍ້ໜ້າ ແລະ ລໍ້ຫຼັງ.

2. ຂັບລົດດ້ວຍຄວາມໄວສະໝໍ່າສະເໝີ: ແຮ່ງຂັບໄວແຮ່ງເຮັດໃຫ້ລົດກິນນໍ້າມັນຫຼາຍຂື້ນ ເພາະປົກະຕິລົດສ່ວນໃຫຍ່ຈະປະຢັດນໍ້າມັນ ເມື່ອເຮົາຂີ່ດ້ວຍຄວາມໄວ 50-80 ກິໂລແມັດ/ຊົ່ວໂມງ ແຕ່ຖ້າຫາກຂີ່ກາຍນັ້ນຄວາມໄວກໍ່ຈະເຜົ່າຜານເຊື້ອໄຟເພີ່ມຂື້ນເລື່ອຍໆ.

3. ບໍ່ຄວນເປີດແອເຢັນເກີນໄປ: ຮູ້ບໍ່ວ່າການເຮັດວຽກຂອງເຄື່ອງປັບອາກາດໃນລົດ ມັນດຶງພະລັງງານນໍ້າມັນເຊື້ອໄຟເຖິງ 10 – 20 ສ່ວນຮ້ອຍ ດັ່ງນັ້ນເຮົາຄວນປັບອຸນຫະພູມແອໃຫ້ເໝາະສົມ.

4. ມອດແອກ່ອນຮອດຈຸດໝາຍ: ເມື່ອໃກ້ຈະຮອດຈຸດໝາຍ ປະມານ 100-200 ແມັດ ຄວນມອດແອໄວ້ເລີຍ ເພາະອຸນຫະພູມຍັງຄົງເຢັນຢູ່ ແລະ ເຮັດໃຫ້ປະຢັດນໍ້າມັນເຕີ່ມອີກ.

5. ຄ່ອຍໆອອກລົດເບົາໆ ແລະ ເລັ່ງລົດໃນຍາມຈຳເປັນ: ເມື່ອໃສ່ເກຍລົດແລ້ວ ຄວນຄ່ອຍໆອອກໂຕຢ່າງເບົາທີ່ສຸດ ເພາະການອອກໂຕລົດແຮງເກີນໄປ ເຮັດໃຫ້ເປືອງນໍ້າມັນ ແລະ ຍັງເຮັດໃຫ້ອາໄຫຼ່ຕ່າງໆ ເປແພງໄວກ່ອນກຳນົດ.

6. ເບກໃຫ້ໜ້ອຍທີ່ສຸດ ໃຊ້ການສະລໍແທນ: ການປະເມີນສະຖານະການລວງໜ້າເພື່ອສະລໍລົດ ແທນການເບກບາດດຽວ ເປັນອີກໜຶ່ງວິທີ ທີ່ຊ່ວຍໃນການປະຢັດນໍ້ມັນໄດ້ດີ.

7. ເມື່ອລົດຕິດໃຫ້ໃສ່ເກຍວ່າງ: ຖ້າຢູ່ໃນສະຖານະການລົດຕິດຢ່າງໜາແໜ້ນ ແນະນຳໃຫ້ໃສ່ເກຍວ່າງ ຫຼື ເກຍ N (ຖ້າເກຍໂອໂຕ) ແທນທີ່ຈະໃສ່ເກຍ D ແລ້ວຢຽບເບກປະມ້ຽນ ເພາະເປັນອີກວິທີນີ້ທີ່ຊ່ວຍໃນການປະຢັດນໍ້າມັນ ແລະ ເຮັດໃຫ້ບໍ່ເມື່ອຍຂາ.

8. ບໍ່ຈຳເປັນຕ້ອງຢຽບຄັນເລັ່ງທຸກເທື່ອ: ເມື່ອເຂົ້າເກຍໄປໜ້າ (D) ຫຼື ເກຍ 1 ແລ້ວຄ່ອຍໆປ່ອຍໃຫ້ລົດອອກໂຕໄປເອງໂດຍບໍ່ຕ້ອງຢຽດຄັນເລັ່ງ ວິທີນີ້ໃຊ້ຫຼາຍໃນຍາມລົດຕິດ ເພາະເປັນການປະຢັດນໍ້າມັນໄດ້ດີຄືກັນ.

9. ບໍ່ຄວນບັນທຸກນໍ້າໜັກຫຼາຍເກີນໄປ: ການບັນທຸກນໍ້າໜັກຫຼາຍເກີນຂອບເຂດກຳນົດ ກໍ່ສົ່ງຜົນໃຫ້ເຄື່ອງຈັກເຮັດວຽກໜັກເຊັ່ນກັນ ແລະ ແນ່ນອນວ່າການກິນນໍ້າມັນກໍ່ຫຼາຍຂື້ນ ດັ່ງນັ້ນສິ່ງທີ່ບໍ່ໄດ້ໃຊ້ກໍ່ຄວນເກັບອອກຈາກລົດ.

10. ບໍ່ຄວນເອົາເຄື່ອງໄວ້ເທິງຫຼັງຄາລົດ: ຫຼາຍຄົນມັກໄປທ່ຽວແລ້ວຕິດຕັ້ງຄານໄວ້ເທິງຫຼັງຄາລົດເພື່ອເອົາກະເປົາ ແລະ ເຄື່ອງໄວ້ ແຕ່ຮູ້ບໍ່ວ່າສິ່ງນີ້ເຮັດໃຫ້ສີ້ນເປືອງນໍ້າມັນຢ່າງຫຼວງຫຼາຍ ເພາະມີແຮງຕ້ານຫຼາຍຂື້ນ.

ນອກຈາກວິທີຂ້າງເທິງແລ້ວ ທ່ານເຄີຍລອງໃຊ້ວິທີອື່ນໃນການຊ່ວຍປະຢັດນໍ້່າມັນຕື່ມບໍ່?

ຂໍ້ມູນຈາກ: Laopost

ທຳລາຍສິນຄ້າໝົດອາຍຸຈາກ 30 ຮ້ານ ໃນນັ້ນມີຮ້ານຂາຍຢາ 2 ຮ້ານ!

ຂ່າວທ້ອງຖິ່ນ

ໂທລະໂຄ່ງ THOLAKHONG

-

February 10, 2022

0

ທຳລາຍສິນຄ້າໝົດອາຍຸຈາກ 30 ຮ້ານ ໃນນັ້ນມີຮ້ານຂາຍຢາ 2 ຮ້ານ!

ຫ້ອງການອຸດສາຫະກຳ ແລະ ການຄ້າເມືອງໄຊສະຖານ ຈັດພິທີທຳລາຍສິນຄ້າໝົດອາຍຸ ປະຈໍາປີ 2022.

ໂດຍປະຕິບັດຕາມກົດໝາຍວ່າດ້ວຍການປົກປ້ອງຜູ້ຊົມໃຊ້ສະບັບເລກທີ 02/ສພຊ ລົງວັນທີ 30 ມິຖຸນາ 2010 ແລະ ປະຕິບັດຕາມຂໍ້ຕົກລົງຂອງທ່ານເຈົ້າເມືອງໄຊສະຖານສະບັບເລກທີ 18/ຈມ.ຊຖ, ລົງວັນທີ 8 ກຸມພາ 2022 ວ່າດ້ວຍການອະນຸມັດຈັດພິທີທຳລາຍສິນຄ້າໝົດອາຍຸປະຈໍາປີ 2022 ດັ່ງນັ້ນຫ້ອງການອຸດສາຫະກໍາ ແລະ ການຄ້າເມືອງໄຊສະຖານ, ແຂວງໄຊຍະບູລີ ໄດ້ຈັດພິທີທຳລາຍສິນຄ້າໝົດອາຍຸ ປະຈໍາປີ 2022 ຂື້ນຢ່າງເປັນທາງການ ໃນວັນທີ 9 ເດືອນ ກຸມພາ ປີ 2022 ນີ້ຢູ່ທີ່ຫ້ອງການດັ່ງກ່າວໂດຍການເປັນກຽດເຂົ້າຮ່ວມຂອງທ່ານ ຈັນໄຊ ໄຊປໍລີ ກໍາມະການພັກເມືອງ ຫົວໜ້າຫ້ອງການການເງິນເມືອງ ໄຊສະຖານ,ມີຫົວໜ້າຫ້ອງການ,ຮອງຫົວໜ້າຫ້ອງການ,ຄະນະກໍາມະການຄຸ້ມຄອງລາຄາສິນຄ້າຂັ້ນເມືອງເຂົ້າຮ່ວມ.

ໃນພິທີດັ່ງກ່າວຜູ້ເຂົ້າແມ່ນໄດ້ຮັບຟັງບົດລາຍງານຫຍໍ້ໃນການລົງຈັດຕັ້ງປະຕິບັດກວດກາສິນຄ້າໝົດອາຍຸຕາມຫ້າງຮ້ານພາຍໃນເມືອງ ໃນໄລຍະ 1 ປີ ລວມມີບ້ານໄດ້ 5 ບ້ານ,ຮ້ານຂາຍເຄື່ອງທັງໝົດ 28 ຮ້ານ,ຮ້ານຂາຍຢາ 2 ຮ້ານ ,ໄດ້ກວດພົບສິນຄ້າໝົດອາຍຸ 15 ກ່ວາລາຍການ ໃນນັ້ນມີປະເພດເຂົ້າໜົມ,ໝີ່,ນ້ຳອັດລົມ , ປະເພດເຄື່ອງສຳອາງ ແລະ ສິນຄ້າອຸປະໂພກ-ບໍລິໂພກອື່ນໆລວມມູນຄ່າທັງໝົດ 1.055.000 ກີບ.

ແຫຼ່ງຂ່າວ: News.XBL

ສ້າງລະບົບການສຶກສາຂອງລາວໃຫ້ມີຄວາມຍືດຍຸ່ນຫຼາຍຂຶ້ນ ຜ່ານການຫັນເປັນດິຈິຕ້ອນ

ໂທລະໂຄ່ງ THOLAKHONG

-

February 9, 2022

0

ສ້າງລະບົບການສຶກສາຂອງລາວໃຫ້ມີຄວາມຍືດຍຸ່ນຫຼາຍຂຶ້ນ ຜ່ານການຫັນເປັນດິຈິຕ້ອນ

“ນ້ອງລົງທະບຽນນໍາໃຊ້ ຄັງປັນຍາລາວ ໃນເດືອນກໍລະກົດຫຼັງຈາກທີ່ເຫັນຕາມໂຄສະນາ. ຍ້ອນບໍ່ສາມາດເຂົ້າເຖິງປື້ມແບບຮຽນໄດ້ ເລີຍລອງໃຊ້ເບິ່ງເພື່ອເອົາມາຊ່ວຍໃນການກຽມສອບເສັງທີ່ສໍາຄັນທີ່ສຸດຂອງນ້ອງ ກໍ່ຄືການເສັງຈົບຊັ້ນ ມ 7. ນ້ອງໄດ້ທົບທວນເບິ່ງທຸກໆບົດຮຽນທີ່ກ່ຽວຂ້ອງກັບການສອບເສັງຜ່ານແອັບດັ່ງກ່າວ ພ້ອມທັງໄດ້ແນະນໍາໃຫ້ຄອບຄົວ ແລະ ອ້າຍເອື້ອຍນ້ອງມາໃຊ້ນໍາກັນ.”

ຍ້ອນການລະບາດຂອງພະຍາດ ໂຄວິດ-19 ຮອບທີສອງບັນດາໂຮງຮຽນ ແລະ ສະຖາບັນການສຶກສາຕ່າງໆໄດ້ຖືກສັ່ງປິດນັບຕັ້ງແຕ່ເດືອນເມສາ 2021 ເປັນຕົ້ນມາ. ການລະບາດດັ່ງກ່າວໄດ້ສະແດງໃຫ້ເຫັນເຖິງຄວາມຈໍາເປັນອັນໃຫຍ່ຫຼວງຂອງຄວາມອາດສາມາດ, ການພັດທະນາ ແລະ ການເຂົ້າເຖິງການສຶກສາຜ່ານທາງດິຈິຕ້ອນ ເພື່ອຮັບປະກັນໃຫ້ສາມາດສະໜອງການສຶກສາຢ່າງຕໍ່ເນື່ອງແກ່ເດັກນ້ອຍ ແລະ ໄວໜຸ່ມຫຼາຍກວ່າ 1.7 ລ້ານຄົນ ທີ່ອາໄສຢູ່ ສປປ ລາວ.

ດັ່ງນັ້ນ, ກະຊວງສຶກສາທິການ ແລະ ກິລາ ຈຶ່ງໄດ້ເປີດໂຕແພລດຟອມການຮຽນ-ການສອນດີຈີຕ້ອນແຫ່ງຊາດທີ່ມີຊື່ວ່າ: ຄັງປັນຍາລາວ ເພື່ອສົ່ງເສີມການຫັນເປັນດິຈິຕ້ອນດ້ານການສຶກສາໃຫ້ແກ່ຄູອາຈານ ແລະ ນັກຮຽນ ແລະ ເພື່ອເປັນການສະໜັບສະໜູນການຮຽນຮູ້ຂອງເດັກນ້ອຍໃນໄລຍະການແຜ່ລະບາດຂອງພະຍາດໂຄວິດ-19.

ແພລດຟອມດັ່ງກ່າວແມ່ນມີທັງແບບອອນລາຍ, ແບບເທິງມືຖື ແລະ ອອບລາຍ ທີ່ຈະຊ່ວຍໃນການເຂົ້າເຖິງເນື້ອໃນການຮຽນການສອນແບບດິຈິຕ້ອນທີ່ມີຄຸນະພາບຢ່າງຕໍ່ເນື່ອງແກ່ຄູອາຈານ ແລະ ນັກຮຽນ ຊັ້ນ ປ 1 – ມ 7 ແລະ ເດັກນ້ອຍອະນຸບານ.

ຄັງປັນຍາລາວ ໄດ້ຖືກພັດທະນາໂດຍຜ່ານການສະໜັບສະໜູນຈາກ ສະຫະພາບເອີຣົບ (EU), ອົງການ UNICEF ແລະ ກອງທຶນຮ່ວມສາກົນເພື່ອການສຶກສາ (GPE) ເພື່ອອໍານວຍຄວາມສະດວກໃນການຮຽນຮູ້ທາງໄກ ແລະ ເພື່ອຮັບປະກັນຄວາມຕໍ່ເນື່ອງຂອງການຮໍ່າຮຽນໃນຊ່ວງໄລຍະຂອງການປິດໂຮງຮຽນຍ້ອນການລະບາດຂອງພະຍາດ ໂຄວິດ-19 ແລະ ເຫດການສຸກເສີນອື່ນໆ. ແພຣດຟອມດັ່ງກ່າວຍັງຖືກອອກແບບໃຫ້ສາມາດນໍາໃຊ້ມາເປັນແຫຼ່ງຂໍ້ມູນເສີມສໍາລັບສິດສອນໃນຫ້ອງຮຽນແບບເຊິ່ງໜ້ານໍາອີກ.

ມາຮອດເດືອນມັງກອນປີ 2022, ມີນັກຮຽນຫຼາຍກວ່າ 71,000 ຄົນໄດ້ລົງທະບຽນເຂົ້າຮຽນຢູ່ ຄັງປັນຍາລາວ ເຊິ່ງຕົວເລກນີ້ຍັງຄົງສືບຕໍ່ເພີ່ມຂຶ້ນ

ສິ່ງທ້າທາຍ: ການລະບາດຂອງພະຍາດໄດ້ເຜີຍໃຫ້ເຫັນເຖິງຄວາມທ້າທາຍ ແລະ ຄວາມບໍ່ສະເໝີພາບລະຫວ່າງຜູ້ທີ່ສາມາດເຂົ້າເຖິງເຕັກໂນໂລຊີດິຈິຕ້ອນ ແລະ ຜູ້ທີ່ບໍ່ສາມາດເຂົ້າເຖິງໄດ້ເຊິ່ງລວມເຖິງຊຸມຊົນທີ່ຫ່າງໄກ ແລະ ດ້ອຍໂອກາດ. ລັດຖະບານລາວ ແລະ ບັນດາຄູ່ຮ່ວມມືດ້ານການສຶກສາໄດ້ມຸ່ງໝັ້ນທີ່ຈະແກ້ໄຂບັນຫານີ້ ເພື່ອ ຮັບປະກັນວ່າເດັກນ້ອຍທຸກຄົນຈະສາມາດເຂົ້າເຖິງການຮຽນຮູ້ແບບດິຈິຕ້ອນໄດ້ບໍ່ວ່າພວກເຂົາຈະຢູ່ໃສກໍ່ຕາມຜ່ານແພລດຟອມການຮຽນ-ການສອນດັ່ງກ່າວນີ້.

ການເສີມສ້າງທັກສະດ້ານດິຈິຕ້ອນແກ່ເດັກ ນ້ອຍ, ໄວໜຸ່ມ, ຄູອາຈານ ແລະ ພະນັກງານໃນຂະແໜງການສຶກສາໃນລາວ ແມ່ນມີຄວາມຈຳເປັນຕໍ່ການຮັບປະກັນການເຂົ້າເຖິງການສຶກສາຢ່າງສະເໝີພາບເທົ່າທຽມກັນ ແລະ ເພື່ອເຮັດໃຫ້ມີການນຳໃຊ້ແພລດຟອມ ຄັງປັນຍາລາວ ຢ່າງມີປະສິດທິຜົນ.

ກະຊວງສຶກສາທິການ ແລະ ກິລາ ໄດ້ລິເລີ່ມເປີດການຝຶກອົບຮົມການນຳໃຊ້ຄັງປັນຍາລາວແກ່ຄູອາຈານໃນທົ່ວປະເທດ ທັງແບບສິດສອນໃນຫ້ອງຮຽນ ແລະ ທັງແບບນໍາໃຊ້ເປັນແຫຼ່ງຂໍ້ມູນການຮຽນ-ການສອນສໍາລັບຢູ່ເຮືອນ ເພື່ອຊ່ວຍໃຫ້ການເຂົ້າເຖິງການສຶກສາມີຄວາມຍືດຍຸ່ນຫຼາຍຂຶ້ນ.

“ເປັນການດີທີ່ເຮົາຈະໄດ້ນໍາໃຊ້ ຄັງປັນຍາລາວ ໃນໄລຍະຂອງການລ໋ອກດາວຍ້ອນພະຍາດ ໂຄວິດ-19 ກໍ່ຄືຊ່ວງທີ່ຜູ້ຄົນບໍ່ສາມາດອອກໄປນອກເຮືອນໄດ້. ແອັບດັ່ງກ່າວໃຫ້ຜົນດີຫຼາຍໆຢ່າງໃນການໃຫ້ຄວາມຮູ້ແກ່ພວກເຮົາເພາະນອກຈາກຈະສາມາດນໍາໃຊ້ມາສິດສອນແລ້ວຄັງປັນຍາຍັງຊ່ວຍໃຫ້ເຮົາຮູ້ວິທີຈັດກິດຈະກຳການຮຽນ-ການສອນຕ່າງໆໃຫ້ແກ່ນັກຮຽນ ເຊິ່ງຈະເປັນການຊ່ວຍດຶງດູດໃຫ້ນັກຮຽນຢາກຮູ້ຢາກຮຽນບົດຮຽນນັ້ນໆຫຼາຍຂຶ້ນຕື່ມ. ການຝຶກອົບຮົມຄັ້ງນີ້ຖືເປັນຊຸດທໍາອິດ ແລະ ທຸກໆຄົນລ້ວນມີຄວາມສຸກ ພ້ອມທັງໃຫ້ຄວາມສົນໃຈທີ່ຈະຮຽນຮູ້ເຂົ້າໃຈວິທີນໍາໃຊ້ ຄັງປັນຍາລາວ ໃຫ້ເປັນໄວໆ.”

ຂໍສະແດງຄວາມຂອບໃຈຕໍ່ການສະໜັບສະໜູນຂອງ EU, UNICEF ແລະ GPE ທີ່ຊ່ວຍເຫຼືອດ້ານການຈັດຝຶກອົບຮົມ ຄັງປັນຍາລາວ ຜ່ານທາງອອນລາຍ ໂດຍນໍາໃຊ້ຮູບແບບການຝຶກອົບຮົມທາງໄກ ແລະ ແບບປະສົມ. – ເຊິ່ງໄດ້ມີການສະໜອງແທັບເລັດ, ໂທລະພາບ ແລະ ໂປເຈັກເຕີ ໃຫ້ແກ່ ອໍານວຍການໂຮງຮຽນ ແລະ ຄູສອນ ໃນບາງຕົວເມືອງ. – ການຝຶກອົບຮົມດັ່ງກ່າວຖືເປັນການຝຶກອົບຮົມຮູບແບບໃໝ່ສໍາລັບ ສປປ ລາວ.

ສະຫະພາບເອີຣົບ ຍັງສືບຕໍ່ເອົາໃຈໃສ່ ແລະ ເຮັດວຽກຢ່າງໃກ້ຊິດຕິດແທດກັບ ລັດຖະບານລາວ ເພື່ອສະໜັບສະໜູນການປັບຕົວຂອງລະບົບການສຶກສາ ແລະ ການສິດສອນຝຶກອົບຮົມແບບຍືນຍົງ ແລະ ມີປະສິດທິພາບ ເພື່ອກ້າວໄປສູ່ຍຸກດິຈິຕ້ອນພາຍໃຕ້ ກອບແຜນດໍາເນີນງານດ້ານການສຶກສາດິຈິຕ້ອນຂອງ ສະຫະພາບເອີຣົບ (2021-2027).

ໂຄງການສະໜັບສະໜູນງົບປະມານດ້ານການສຶກສາຂອງ EU: ສະຫະພາບເອີຣົບ (EU) ໄດ້ສະໜອງທຶນຈໍານວນ 42,9 ລ້ານເອີໂຣ (515 ຕື້ກີບ) ໃຫ້ແກ່ ສປປ ລາວ ໃນປີ 2021 ເພື່ອໃຊ້ເຂົ້າໃນບັນດາວຽກງານບຸລິມະສິດຂອງຂະແໜງການສຶກສາ ແລະ ໂພຊະນາການ ລວມທັງວຽກງານການຕອບໂຕ້ຕໍ່ຜົນກະທົບຂອງພະຍາດໂຄວິດ-19. ໃນນັ້ນ 26,4 ລ້ານເອີໂຣ (318 ຕື້ກີບ) ໄດ້ຖືກຈັດສັນໃຫ້ແກ່ ໂຄງການສະໜັບສະໜູນງົບປະມານດ້ານການສຶກສາຂອງສະຫະພາບເອີຣົບ ທີ່ສອດຄ່ອງຕາມຍຸດທະສາດການພັດທະນາການສຶກສາ ແລະ ກິລາຂອງລັດຖະບານລາວ ໄລຍະປີ 2021-2025.

ວຽກງານນີ້ຖືເປັນບູລິມະສິດທີ່ EU ກໍາລັງສືບຕໍ່ສະໜັບສະໜູນ ລັດຖະບານ ສປປ ລາວ ແລະ ບັນດາຄູ່ຮ່ວມມືດ້ານການສຶກສາ ໃຫ້ສາມາດກ້າວໄປສູ່ການຫັນເປັນດິຈິຕ້ອນເພື່ອສ້າງຜົນປະໂຫຍດໃຫ້ແກ່ເດັກນ້ອຍ, ນັກຮຽນ ແລະ ຄູອາຈານ ທີ່ໄດ້ຮັບຜົນກະທົບຈາກການປິດສະຖາບັນການສຶກສາ ແລະ ເພື່ອເປັນການກະກຽມໃຫ້ແກ່ການກັບຄືນສູ່ໂຮງຮຽນຢ່າງປອດໄພ ແລະ ປະສົບຜົນສຳເລັດໃນທົ່ວປະເທດລາວ.

ໄລຍະບຸນກຸດຈີນທີ່ຜ່ານມາ! ການຂົນສົ່ງສິນຄ້າສາກົນຕາມເສັ້ນທາງລົດໄຟລາວ-ຈີນ ມີປະລິມານຫຼາຍກວ່າ 2 ໝື່ນໂຕນ

ຂ່າວລົດໄຟລາວ-ຈີນ

ໂທລະໂຄ່ງ THOLAKHONG

-

February 9, 2022

0

ໄລຍະບຸນກຸດຈີນທີ່ຜ່ານມາ! ການຂົນສົ່ງສິນຄ້າສາກົນຕາມເສັ້ນທາງລົດໄຟລາວ-ຈີນ ມີປະລິມານຫຼາຍກວ່າ 2 ໝື່ນໂຕນ

ປະລິມານການຂົນສົ່ງສິນຄ້າສາກົນຕາມເສັ້ນທາງລົດໄຟລາວ-ຈີນ ໃນໄລຍະບຸນກຸດຈີນມີຫຼາຍກວ່າ 2 ໝື່ນໂຕນ

ວັນທີ 7 ກຸມພານີ້, ດ່ານພາສີຄຸນໝິງໄດ້ລາຍງານວ່າ: ແຕ່ວັນທີ 31 ມັງກອນຫາວັນທີ 6 ກຸມພານີ້, ຂະບວນລົດໄຟຂົນສົ່ງສິນຄ້າສາກົນຕາມເສັ້ນທາງລົດໄຟລາວ-ຈີນທີ່ໄດ້ຜ່ານການຕິດຕາມກວດກາຈາກດ່ານພາສີຄຸນໝິງມີທັງໝົດ 42 ຂະບວນ, ປະລິມານຂົນສົ່ງສິນຄ້າມີທັງໝົດປະມານ 20.300 ໂຕນ, ມີມູນຄ່າທັງໝົດ 217 ລ້ານຢວນ.

ຕາມຂ່າວແຈ້ງໃຫ້ຮູ້ວ່າ: ໃນໄລຍະບຸນກຸດຈີນ, ສິນຄ້າສົ່ງອອກທີ່ຂົນສົ່ງໂດຍຂະບວນລົດໄຟລາວ-ຈີນມີສິນຄ້າ 100 ກວ່າຊະນິດເຊິ່ງລວມທັງ ລົດໄຟໂດຍສານ ສາຍໄຟຟ້າ ເຊີບເວີ ແລະອື່ນໆທີ່ມາຈາກເມືອງຄຸນໝິງ ນະຄອນຈູງກິ່ງ ເມືອງນານກິ່ງ ເມືອງຢີ້ອູ່ ເມືອງເສິນເຈິ້ນແລະແຫ່ງອື່ນໆ, ສິນຄ້ານຳເຂົ້າຕົ້ນຕໍມີຢາງພາລາ ແຮ່ເຫຼັກ ແລະອື່ນໆ. ເພື່ອຮັບປະກັນໃຫ້ການຂົນສົ່ງສິນຄ້າສາກົນຕາມເສັ້ນທາງລົດໄຟລາວ-ຈີນໃນໄລຍະບຸນກຸດຈີນສາມາດຜ່ານດ່ານໄດ້ຢ່າງສະດວກປອດໄພແລະມີປະສິດທິຜົນສູງ, ດ່ານພາສີຄຸນໝິງໄດ້ເພີ່ມທະວີການປະສານງານແລະປະສານສົມທົບກັບພາກສ່ວນທີ່ກ່ຽວຂ້ອງຕ່າງໆ ເພື່ອຮັບປະກັນໃຫ້ວຽກງານດ້ານຕ່າງໆເດີນແມ່ນແລ່ນສະດວກ.

ແຫຼ່ງຂ່າວ: CRI

ຈັບໄດ້ໄລ່ທັນ! ໂຈນລັກແບ້ ເຂດບ້ານນາທາມ ເມືອງຫາດຊາຍຟອງ ນະຄອນຫຼວງວຽງຈັນ

ໂທລະໂຄ່ງ THOLAKHONG

-

February 9, 2022

0

ຈັບໄດ້ໄລ່ທັນ! ໂຈນລັກແບ້ ເຂດບ້ານນາທາມ ເມືອງຫາດຊາຍຟອງ ນະຄອນຫຼວງວຽງຈັນ

ໂຈນລັກແບ້ ໄປບໍ່ລອດຖືກຈັບ ພ້ອມຂອງກາງຄາມື ໝູ່ໄປນຳກັນກະຖີ້ມໃຫ້ຖືກຈັບຄົນດຽວ.

ໃນວັນທີ 7 ກຸມພາ 2022 ທີ່ຜ່ານມາ, ເກີດເຫດໂຈນເຂົ້າມາລັກແບ້ປະຊາຊົນ, ຫຼັງຈາກເກີດເຫດບໍ່ດົນກໍ່ສາມາດຈັບຜູ້ກໍ່ເຫດ ແລະ ຂອງກາງຫຼັກຖານຄົບຖ້ວນ.

ພາຍຫຼັງສອບຖາມໃຫ້ຮູ້ວ່າ: ຜູ້ກໍ່ເຫດລັກແບ້ໃນຄັ້ງນີ້ແມ່ນ ທ້າວ ຕຸ້ຍ ເຊິ່ງລາວໄດ້ຂີ່ລົດຈັກໄປລັກແບ້ ປະຊາຊົນຢູ່ບ້ານນາທາມ (ແກ້ງປາຢາງ) ເມືອງຫາດຊາຍຟອງ ນະຄອນຫຼວງວຽງຈັນ ແຕ່ໂຊກບໍ່ເຂົ້າຂ້າງ ຖືກຈັບໄດ້ ພ້ອມຂອງກາງ ແບ້ 1 ໂຕ ສ່ວນໝູ່ທີ່ມານຳກັນແມ່ນແລ່ນຫຼົບຫນີ, ປ່ອຍໃຫ້ຜູ້ກ່ຽວຖືກຈັບຄົນດຽວ.