ດັ່ງທີ່ເຮົາເຫັນປັດຈຸບັນ, ການຊື້ປີ້ລົດໄຟຍັງເປັນສິ່ງທ້າທາຍສຳລັບຜູ້ໂດຍສານທີ່ຕ້ອງການຊື້ປີ້ເພື່ອເດີນທາງໄປແຂວງທີ່ຕົນຕ້ອງການເດີນທາງໄປ ເພາະເມື່ອທຽບກັບເດີນທາງດ້ວຍລົດເມ ແລະ ລົດສ່ວນໂຕ ແມ່ນເຫັນໄດ້ວ່າການຂີ່ລົດໄຟແມ່ນປະຢັດເວລາຫຼາຍ.

ເມື່ອບໍ່ດົນມານີ້, ຕາມການລາຍງານຂອງໜັງສືພິມວຽງຈັນທາຍ ໃຫ້ຮູ້ວ່າ: ພົບເຫັນພະນັກງານປ້ອງກັນ, ເຈົ້າຫນ້າທີ່ຕໍາຫຼວດ, ພະນັກງານບໍລິສັດທ່ອງທ່ຽວ ລວມທັງພະນັກງານໂຮງແຮມຈໍານວນຫນຶ່ງທີ່ປະຈໍາຢູ່ສະຖານີລົດໄຟລາວ-ຈີນບາງແຫ່ງທີ່ຮັບແລ່ນຊື້ປີ້ລົດໄຟລ່ວງຫນ້າໃຫ້ຄົນຕົນເອງ ຫຼື ຜູ້ທີ່ີຮູ້ຈັກໂດຍບໍ່ຈໍາເປັນມາຊື້ດ້ວຍຕົວເອງ ເຊິ່ງມີການຮັບເອົາຄ່າບໍລິການ 30.000 – 50.000 ກີບ/ຄົນ.

ບັນຫາດັ່ງກ່າວແມ່ນໄດ້ມີຜູ້ ໂດຍສານຈໍານວນຫຼາຍໄດ້ລາຍງານມາຍັງຫນັງສືພິມວຽງຈັນທາຍ ເພື່ອໃຫ້ອອກຂ່າວ ແລະ ຕ້ອງການໃຫ້ບໍລິສັດທາງລົດໄຟລາວ-ຈີນ ເລັ່ງແກ້ໄຂບັນຫາປະກົດການຫຍໍ້ທໍ້ດັ່ງກ່າວດ່ວນ.

ສະເພາະກ່ອນທີ່ຂີ່ລົດໄຟ ລາວ-ຈີນ ຜູ້ໂດຍສານຕ້ອງໄດ້ຈອງປີ້ລ່ວງຫນ້າ 3 ວັນ ໂດຍໃຊ້ເວລາໃນການລຽນຄິວບໍ່ຕໍ່າກວ່າ 2-3 ຊົ່ວໂມງ ແຕ່ເມື່ອຮອດຄິວ ພະນັກງານຂາຍປີ້ພັດເວົ້າວ່າປີ້ໝົດແລ້ວ, ທັງທີ່ຜູ້ທີ່ມາລຽນຄິວຊື້ປີ້ນັ້ນກໍ່ມີໜ້ອຍກວ່າຈໍານວນປີ້ທີ່ໃຫ້ຈອງໃນແຕ່ລະວັນ.

ນອກນັ້ນ, ຍັງມີຜູ້ໂດຍສານຈໍານວນຫຼາຍທີ່ມາແຕ່ 6 ໂມງເຊົ້າ ກໍຍັງບໍ່ສາມາດຊື້ປີໄດ້ ຍ້ອນວ່າພະນັກງານດັ່ງກ່າວ ມີການຊື້ປີ້ລ່ວງຫນ້າໄວ້ໃຫ້ຄົນຂອງເຂົາເຈົ້າກ່ອນແລ້ວ.

ພິທີປະກາດການແຕ່ງຕັ້ງ, ຍົກຍ້າຍ ແລະ ມອບ-ຮັບໜ້າທີ່ ການນຳຂັ້ນສູງກະຊວງປ້ອງກັນປະເທດ ໄດ້ຈັດຂຶ້ນຢ່າງເປັນທາງການ ໃນວັນທີ 11 ກຸມພາ 2022, ໂດຍການເປັນປະທານຂອງ ສະຫາຍ ພົນເອກ ຈັນສະໝອນ ຈັນຍາລາດ, ກຳມະການກົມການເມືອງສູນກາງພັກ, ຮອງນາຍົກລັດຖະມົນຕີ, ລັດຖະມົນຕີ ກະຊວງປ້ອງກັນປະເທດ, ມີຄະນະພັກ-ຄະນະນຳກະຊວງ ເຂົ້າຮ່ວມ.

ສະຫາຍ ພົນຕີ ສອນທອງ ພົມລາວົງ ຄະນະປະຈຳພັກກະຊວງ, ຮອງຫົວໜ້າກົມໃຫຍ່ການ ເມືອງກອງທັບ ໄດ້ຜ່ານຄໍາສັ່ງ ຂອງນາຍົກລັດຖະມົນຕີ ວ່າດ້ວຍ ການຍົກຍ້າຍ ສະຫາຍ ພົນຕີ ຈັນທອງ ສອນຕະອາດ ວ່າການຫົວໜ້າກົມໃຫຍ່ເສນາທິການກອງທັບ ໄປຮັບໜ້າທີ່ໃໝ່ ເປັນຮອງລັດຖະມົນຕີກະ ຊວງປ້ອງກັນປະເທດ; ດຳລັດຂອງນາຍົກລັດຖະມົນຕີ ວ່າດ້ວຍການແຕ່ງຕັ້ງ ສະຫາຍ ພົນຕີຄໍາລຽງ ອຸທະໄກສອນ ເປັນຮອງລັດຖະມົນຕີ ກະຊວງປ້ອງກັນປະເທດ ທັງເປັນຫົວໜ້າກົມໃຫຍ່ເສນາທິການກອງທັບ; ມະຕິຕົກລົງຂອງຄະນະເລຂາທິການສູນກາງພັກ ວ່າດ້ວຍການແຕ່ງຕັ້ງ ສະຫາຍ ພົນຕີ ຄໍາລຽງ ອຸທະໄກສອນ ກຳມະການສູນກາງພັກ ເປັນກຳມະການຄະນະປະຈຳພັກກະຊວງປ້ອງກັນປະເທດ ແລະ ຄໍາສັ່ງ ຂອງນາຍົກລັດຖະມົນຕີ ວ່າດ້ວຍການຍົກຍ້າຍ ສະຫາຍ ພົນຕີ ວົງສອນ ອິນປານພິມ ຮອງຫົວໜ້າ ກົມໃຫຍ່ການເມືອງກອງທັບ ກະຊວງປ້ອງກັນປະເທດ ໄປຮັບໜ້າທີ່ໃໝ່ ເປັນຮອງເລຂາພັກແຂວງ ໄຊສົມບູນ.

ໃນພິທີມອບ-ຮັບໜ້າທີ່ໃໝ່ນີ້, ສະຫາຍ ພົນເອກ ຈັນສະໝອນ ຈັນຍາລາດ ໄດ້ສະແດງຄວາມ ຍ້ອງຍໍ ແລະ ຕີລາຄາສູງຕໍ່ຜົນສໍາເລັດ ໃນການປະຕິບັດໜ້າທີ່ວຽກງານໃນໄລຍະຜ່ານມາຂອງແຕ່ລະສະ ຫາຍ, ເຊິ່ງມີຜົນສຳເລັດຫລາຍດ້ານ ພ້ອມນັ້ນຍັງເນັ້ນໃຫ້ຜູ້ທີ່ໄດ້ຮັບໜ້າທີ່ໃໝ່ ຈົ່ງເອົາໃຈໃສ່ນຳພາ-ຊີ້ນຳການເມືອງແນວຄິດໃຫ້ແກ່ພະນັກງານ, ຍົກສູງຄວາມຮັບຜິດຊອບຕໍ່ໜ້າທີ່ການເມືອງຂອງຕົນໃຫ້ສູງ, ເອົາ ໃຈໃສ່ປັບປຸງແບບແຜນວີທີເຮັດວຽກ, ແບບແຜນວິທີນຳພາໃຫ້ໜັກແໜ້ນເຂັ້ມແຂງ, ເອົາໃຈໃສ່ເພີ່ມທະວີຄວາມສາມັກຄີພາຍໃນໃຫ້ແໜ້ນແຟ້ນ, ກຳແໜ້ນ ແລະ ປະຕິບັດຫລັກການລວມສູນປະຊາທິປະໄຕ ເຮັດວຽກເປັນໝູ່ຄະນະ, ສືບຕໍ່ຝຶກຝົນຫລໍ່ຫລອມຕົນເອງ ແລະ ເອົາໃຈໃສ່ປັບປຸງວຽກງານກໍ່ສ້າງພັກ-ກໍ່ສ້າງພະ ນັກງານໃຫ້ ມີຄວາມກ້າວໜ້າ ແລະ ບັນຫາອື່ນໆ.

ແຫຼ່ງຂ່າວ: ຂປລ

ປະຈຸບັນການແຜ່ລະບາດຂອງພະຍາດໂຄວິດ-19 ຢູ່ແຂວງຄຳມ່ວນ ຜ່ອນຄາຍລົງຫຼາຍແລ້ວ, ແຂວງ ຄຳມ່ວນຈຶ່ງໄດ້ກະກຽມຈັດງານບຸນນະມັດສະການພຣະທາດສີໂຄດຕະບອງ ປະຈຳປີ 2022 ເພື່ອ​ເປັນ​ການ​ເສີມ​ຂະຫຍາຍ​ມູນ​ເຊື້ອ ​ແລະ ອະນຸລັກ​ຮັກສາ​ຮີດຄອງປະ​ເພນີອັນ​ດີງາມ​ຂອງ​ຊາດ ​ເວົ້າ​ລວມ​ ​ເວົ້າ​ສະ​ເພາະ​ ປະຊາຊົນ​ລາວ​ບັນດາ​ເຜົ່າ​ຊາວ​ເມືອງ​ທ່າ​ແຂກ ທີ່​ໄດ້​ສືບ​ທອດ​ກັນມາ​ແຕ່​ບູຮານ​ນະ​ການໃຫ້​ຄົງ​ຢູ່​ກັບ​ສັງ​ຄົມ​ລາວ​ຕະຫຼອດ​ໄປ ແລະ ເພື່ອເປັນການຟື້ນຟູການທ່ອງທ່ຽວພາຍໃນແຂວງ, ກະກຽມໃສ່ເປີດການທ່ອງທ່ຽວສີຂຽວ ໄລຍະ 2 ຂອງລັດຖະບານ.

ທ່ານ ​ແກ້ວ​ລັນ​ດອນ ຈັນທະ​ປານີ ​ເຈົ້າ​ເມືອງທ່າ​ແຂກ ​ຮອງ​ປະທານ​ຈັດ​ງານ​ບຸນ​ນະມັດສະການ​ພຣະທາດ​ສີ​ໂຄດ​ຕະບອງ ​ປະຈຳ​ປີ 2022 ໄດ້​ໃຫ້​ສຳພາດ​ຕໍ່​ສື່​ມວນຊົນທ້ອງ​ຖິ່ນ​ວ່າ: ໂດຍປະຕິບັດຕາມຂໍ້ຕົກລົງຂອງທ່ານເຈົ້າແຂວງຄຳມ່ວນ ວ່າດ້ວຍ ການແຕ່ງຕັ້ງຄະນະຮັບຜິດຊອບຈັດງານບຸນນະມັດສະການພຣະທາດສີໂຄດຕະບອງ ປະຈຳປີ 2022 ໂດຍໄດ້ປຶກສາຫາລືຮ່ວມກັນ ແລະ ແບ່ງຄວາມຮັບຜິດຊອບແຕ່ລະອະນຸກຳ​ມະ​ການ ​ຊຶ່ງມີຄວາມພ້ອມແລ້ວ ໂດຍ​ສະ​ເພາະພື້ນຖານ​ໂຄງ​ລ່າງກໍຄືສະຖານທີ່ພາຍໃນ ແລະ ພາຍນອກງານ​​ແມ່ນໄດ້ສົມທົບກັບພະແນກໂຍທາທິການ ແລະ ຂົນສົ່ງແຂວງໃນການປັບປຸງປົວແປງເສັ້ນທາງເລກທີ 11, ສ້ອມແປງບາງຈຸດ ແລະ ອະນາໄມເດີ່ນຢູ່ບໍລິເວນເດີ່ນພຣະທາດ.

ສຳລັບ​ກິດຈະກຳລະອຽດຂອງການຈັດງານບຸນ​​ແມ່ນ​​ໃນ​ລະຫວ່າງວັນ​ທີ 14 – 16 ກຸມພາ 2022 ​​ຊຶ່ງໃນວັນທີ 14 ກົງ​ກັບ​ມື້ຂຶ້ນ 13 ຄໍ່າ​ ມີພິທີຕັກບາດຖວາຍສັງຄະທານຢູ່ ຫໍພຣະຍາສີໂຄດຕະບອງ, ຕອນບ່າຍຈະໄດ້ມີການແຂ່ງຂັນກິລາປະເພດຕ່າງໆ, ການເສັງກອງແຕ້ – ກອງຈິງ ແລະ ຕອນກາງຄືນມີການສະແດງ​ສິລະປະ – ວັນນະຄະດີ, ການປະກວດຂັບລຳມະຫາໄຊທີ່ມາຈາກບັນດາເມືອງ ແລະ ຄົບງັນຕາມຮີດຄອງປະເພນີ. ວັນທີ 15 ຂຶ້ນ 14 ຄໍ່າ ​ເລີ່​ມ​ແຕ່​ເວລາ 13 ​ໂມງ ເຕົ້າໂຮມມວນຊົນເມືອງທ່າແຂກ ຢູ່ເດີ່ນຫ້ອງວ່າການເມືອງ​​ກະກຽມ​ແຫ່​ຜາສາດ​ເຜິ້ງ​ໄປຫາ​ພຣະ​ທາດສີໂຄດຕະບອງ ພ້ອມທັງດຳເນີນພິທີທາງສາສະໜາ ຕາມຮີດຄອງປະເພນີ, ຮັບຊົມການເສັງກອງແຕ້ – ກອງຈິງຮອບຊີງຊະນະເລີດ ແລະ ກິລາປະເພດຕ່າງໆ, ກາງຄືນມີການຄົບງັນຕາມຮີດຄອງປະເພນີ ​ແລະ ​ໃນ​ວັນ​ທີ 16 ຂຶ້ນ 15 ຄໍ່າ ​ແມ່ນ​ຈະ​ໄດ້​ຕັກບາດ​ຖວາຍ​ສັງຄະ​ທານ​ແດ່ພະສົງສຳມະເນນ, ຕອນບ່າຍຮັບຊົມການແຂ່ງຂັນກິລາປະເພດຕ່າງໆ ຮອບຊີງສະນະເລີດ, ກາງຄືນມີການວຽນທຽນຄົບງັນຕາມຮີດຄອງປະເພນີ.

ພິ​ເສດໃນປີນີ້, ທ່ານເຈົ້າແຂວງ ໄດ້ສົມທົບກັບການນຳແຂວງ – ເມືອງ ຕັ້ງ​ກອງຜ້າປ່າສາມັກຄີເພື່ອທອດຖວາຍໃນງານບຸນນະມັດສະການພຣະທາດສີໂຄດຕະບອງ ເພື່ອເປັນການສົມທົບທຶນໃນການສ້າງສາລາໂຮງທຳໃນບໍລິເວນເດີ່ນພຣະທາດ.

ສ່ວນກິດຈະກຳວາງສະແດງ ແລະ ຂາຍສິນຄ້າແມ່ນຈະໄດ້ເຊື້ອເຊີນບັນດາເມືອງທີ່ເປັນຕົວແທນຂອງແຂວງຈຳນວນ 10 ເມືອງ ແລະ ຫົວໜ່ວຍບໍລິສັດຫ້າງຮ້ານມາວາງສະແດງ ແລະ ຂາຍສິນຄ້າທັງພາຍໃນ ແລະ ຕ່າງແຂວງ. ສຳລັບເຮືອນຊົງລາວຈະໄດ້ມອບໃຫ້ບັນດາ 10 ຕົວເມືອງນຳເອົາ ສິນຄ້າໜຶ່ງເມືອງໜຶ່ງຜະລິດຕະພັນເຂົ້າມາວາງຂາຍ. ​

ດັ່ງນັ້ນ, ຈຶ່ງຂໍ​ເຊີນຊວນ​ບັນດາ​ພໍ່​ແມ່ ​ພີ່ນ້ອງ​ ປະຊາຊົນລາວ​ບັນດາ​ເຜົ່າ​ ຮ່ວມ​​ເປັນ​ເຈົ້າພາບ, ​ເຈົ້າສັດທາ ​ແລະ ຂໍຮຽກຮ້ອງ​ມາ​ຍັງ​ພໍ່​ແມ່​ປະຊາຊົນ​ລວມ​ເຖິງ​ຜູ້​ທີ່​ຈະ​ເຂົ້າມາ​ຮ່ວມ​ໃນ​ງານ​ບຸນ​ໃຫ້​ເປັນ​ເຈົ້າການ​ໃນ​ການ​ປ້ອງ​ກັນ​​ໂຕ​ເອງ ປະຕິບັດ​ມາດ​ຕະການ​ປ້ອງ​ກັນ​ພະຍາດ​ໂຄ​ວິດ-19, ດ້ວຍ​ການ​ໃສ່​ຜ້າ​ປິດ​ປາກ – ດັງ, ການຮັກສາໄລຍະຫ່າງ ​ແລະ ເປັນ​ເຈົ້າການ​ປົກ​ປັກ​ຮັກສາ​ຄວາມ​ສະຫງົບ​ຄວາມ​ເປັນ​ລະຽບຮຽບຮ້ອຍ ​ເພື່ອ​ຮັບປະກັນ​ການ​ດຳ​ເນີນ​ງານ​ບຸນ​ປະ​ເພນີ​ຄັ້ງນີ້​ໃຫ້​ມີ​ຜົນສຳ​ເລັດ​ຢ່າງ​ຈົບງາມ.

ແຫຼ່ງຂໍ້ມູນ: ປະເທດລາວ

ຄະນະພັກ​ -​ ອົງການປົກຄອງແຂວງ​ຈໍາປາສັກ​ ຮ່ວມກັບພາກສ່ວນຕ່າງໆທີ່ກ່ຽວຂ້ອງແຂວງ ໄດ້ຈັດງານບຸນນະມັດສະການຜາສາດຫີນວັດພູ​ ຈໍາປາສັກ ມໍລະດົກໂລກ ແຫ່ງທີ​ II​​ ຂຶ້ນໃນ​ວັນທີ​ 13​ ກຸມພາ​ ຜ່ານ​ມາ ຢູ່ບໍລິເວນເດີ່ນທາງຂຶ້ນຜາສາດຫີນວັດພູ ໂດຍການເຂົ້າຮ່ວມຂອງ ພະອາຈານ​ ສຸວັນ ຈັນທະຣາຊ ກໍາມະການສູນກາງ ອພສ​ ປະທານ​ ອພສ​ ແຂວງ,​ ທ່ານ​ ວິໄລວົງ​ ບຸດ​ດາ​ຄໍາ​ ເຈົ້າແຂວງ​ຈໍາປາສັກ​ ປະທານ​ຈັດງານ​ ພ້ອມພັນລະຍາ ແລະ ຄະ​ນະ, ຕະຫຼອດ​ຮອດພໍ່ແມ່ປະຊາຊົນ​ຊາວແຂວງຈໍາປາສັກເຂົ້າຮ່ວມ.

ໃນພິທີ​ ທ່ານ​ ສະຫວາດ​ ແກ້ວບັນດິດ​ ເຈົ້າເມືອງ​ຈໍາປາສັກ​ ໄດ້ກ່າວລາຍງານການຈັດງານບຸນນະມັດສະຜາສາດຫີນວັດພູ ປະຈໍາປີ 2022 ວ່າ: ການກະກຽມຈັດງານບຸນນະມັດສະການຜາສາດຫີນວັດພູຈຳປາສັກ ປີ 2022​ ພວກເຮົາ​ໄດ້ຈັດກິດຈະກໍາປູກຕົ້ນດອກຈຳປາ ເພື່ອເປັນສວນອຸດທິຍານປະດັບເອ້ສະຖານທີ່ປູສະນີຍະສະຖານແຫ່ງນີ້ ຕິດພັນກັບການຈັດງານພຸດທະສາສະນະກິດ ເພື່ອຮັກສາຮີດຄອງປະເພນີ,​ ວັດທະນະທໍາອັນດີງາມຂອງ ຊາດ ຂອງທ້ອງຖິ່ນ. ພິເສດ ປີນີ້, ໄດ້ມີການຈັດຕັ້ງພັກ​ – ລັດ​ ຂອງແຂວງ, ເມືອງ, ນະຄອນປາກເຊ ໄດ້ເປັນເຈົ້າພາບເຈົ້າສັດທາ ຮ່ວມກັນສ້າງກອງບຸນຂຶ້ນ ຈຳນວນ 11 ກອງ ເພື່ອອຸທິດເຖິງບັນພະບູລຸດ, ພໍ່ແມ່, ຄູບາ​ -​ ອາຈານ, ເຈົ້າຖິ່ນເຈົ້າຖານ, ເຈົ້າແມ່ທໍລະນີ, ເຈົ້າກຳນາຍເວນ ເພື່ອເປັນສິລິມຸງຄຸນ ແກ່ຄອບຄົວທຸກໆທ່ານດ້ວຍກັນ.​ ຈາກນັ້ນ, ທ່ານ​ ວິໄລວົງ​ ບຸດ​ດາ​ຄໍາ​ ໄດ້ກ່າວເປີດງານ ບາງຕອນທ່ານກ່າວວ່າ: ພວກເຮົາເຫັນໄດ້ຄຸນຄ່າອັນໂດດເດັ່ນຂອງສະຖານບູຮານວັດພູຈໍາປາສັກ, ລັດຖະບານ ແລະ ອົງການປົກຄອງແຂວງ ໄດ້ເອົາໃຈໃສ່ປົກປັກຮັກສາ, ບູລະນະ ແລະ ປະຕິສັງຂອນ ໃຫ້ເພີ່ມຄຸມຄ່າມໍລະດົກຍິ່ງຂຶ້ນຕະຫຼອດມາ ໂດຍດຶງດູດການຊ່ວຍເຫຼືອແຫຼ່ງທຶນທັງພາຍໃນ, ອົງການຈັດຕັ້ງສາກົນ ແລະ ບັນດາປະເທດເພື່ອນມິດໃນໂລກຢ່າງກວ້າງຂວາງ ຈຶ່ງມີນັກທ່ອງທ່ຽວທັງພາຍໃນ ແລະ ຕ່າງປະເທດເຂົ້າມາກາບໄຫວ້, ສຶກສາຄົ້ນຄວ້າ, ທ່ອງທ່ຽວນັບມື້ນັບເພີ່ມຂຶ້ນໃນແຕ່ລະປີ.​

ໃນ​ໂອ​ກາດນີ້, ຂໍເຊີນຊວນບັນດາທ່ານທ່ຽວຊົມ ຫໍວາງສະແດງວັດຖຸບູຮານ, ປະຫວັດການກໍ່ສ້າງຜາສາດຫີນວັດພູ, ທ່ຽວງານຕະຫຼາດນັດວາງສະແດງ ແລະ ຈຳໜ່າຍສິນຄ້າ​ ທີ່ມີຫຼາຍຜະລິດຕະພັນ ທັງພາຍໃນ ແລະ​ ຕ່າງປະເທດ, ຊົມການແຂ່ງຂັນກິລາພື້ນເມືອງ, ຊົມສິລະປະດົນຕີ, ຮັບປະທານອາຫານທ້ອງຖິ່ນເອກະລັກເມືອງຈໍາປາສັກ ເຊັ່ນ: ເຂົ້າຫຼາມ,​ ປີ້ງໄກ່,​ ຕົ້ມໄກ່ໃສ່ໄຂ່ມົດແດງ, ນະມັດສະການກາບໄຫວ້,​ ບູຊາພະພຸດທະຮູບ.​

ໃນຄ່ຳຄືນວັນທີ 15 ຈະມີພິທີທາງສາສະໜາ, ໄຫວ້ພະ,​ ຮັບ​ສິນ,​ ຟັງທຳ ສູດປະລິຕະມຸງຄຸນ ແລະ ໃນຕອນເຊົ້າ​ ເລີ່ມແຕ່ເວລາ 6:3​0 ໂມງ​ ຈະມີພິທີທໍາບຸນໃສ່ບາດ​ ແລະ​ ຖວາຍສັງຄະທານ ແດ່ພະສົງ 100 ອົງ. ຕໍ່ມາ,​ ປະທານ, ຄະນະປະທານ ແລະ ແຂກຖືກເຊີນ ກໍໄດ້ເປັນກຽດຕີຄ້ອງໄຊ 9 ບາດ ເພື່ອເປີດງານ ຢ່າງເປັນທາງການ​.

ແຫຼ່ງຂໍ້ມູນ: ປະຊາຊົນ

ປີ 2021 ມູນຄ່າການຄ້າລາວ-ຈີນ ບັນລຸ 4,35 ຕື້ໂດລາ ຫຼື ເພີ່ມຂຶ້ນ 21,4% ແລະ ຍັງຖືວ່າ ຈີນຍັງຄອງອັນດັບໜຶ່ງຂອງການລົງທຶນໃນ ສປປ ລາວ ມີທັງໝົດ 821 ໂຄງການ.

ຄະນະກໍາມະການຮ່ວມມືລາວ-ຈີນລາຍງານໃນກອງປະຊຸມທາງໄກ ກ່ຽວກັບການສະຫຼຸບຕີລາຄາ ໝາກຜົນການຮ່ວມມື ດ້ານເສດຖະກິດ, ການຄ້າ ແລະ ເຕັກນິກ ລະຫວ່າງ ລາວ-ຈີນ ປະຈໍາປີ 2021 ເຊິ່ງຈັດຂຶ້ນໃນວັນ 10 ກຸມພາ 2022 ນີ້ ເຊິ່ງມີທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ປະທານຄະນະກໍາມະການຮ່ວມມືລາວ-ຈີນເປັນປະທານ.

ທ່ານ ໄຊຊະນະ ສິດທິພອນ ຮອງປະທານຄະນະກໍາມະການຮ່ວມມືລາວ-ຈີນ ໄດ້ລາຍງານຕໍ່ກອງປະຊຸມດັ່ງກ່າວວ່າ: ປີ 2021, ໄດ້ປະຕິບັດໂຄງການຊ່ວຍເຫຼືອຈາກ ສປ ຈີນສໍາເລັດທັງໝົດ 3 ໂຄງການ ຄືໂຄງການແສງສະຫວ່າງໃນເຂດເທດສະບານໃຈກາງຕົວເມືອງນະຄອນຫຼວງວຽງຈັນຊຸດທີ 1, ໂຄງການຮ່ວມມືສ້າງບ້ານຕົວແບບແກ້ໄຂຄວາມທຸກຍາກລາວ-ຈີນ (ຢູ່ບ້ານຊໍ້ ເມືອງສັງທອງ ນະຄອນຫຼວງວຽງຈັນ ແລະ ບ້ານຊຽງລ້ອມ ນະຄອນ-ຫຼວງພະບາງ ແຂວງຫຼວງພະບາງ), ໂຄງການກໍ່ສ້າງໂຮງໝໍມະໂຫສົດໄລຍະທີ 1.

ນອກນັ້ນ, ໂຄງການຊ່ວຍເຫຼືອທີ່ພວມຈັດຕັ້ງປະຕິບັດທັງໝົດ 18 ໂຄງການ ເຊັ່ນ: ໂຄງການກໍ່ສ້າງພື້ນຖານໂຄງລ່າງຢູ່ຊົນນະບົດລາວຊຸດທີ 1, ໂຄງການກໍ່ສ້າງໂຮງໝໍມະໂຫສົດໄລຍະທີ 2, ໂຄງການກໍ່ສ້າງສູນກິດຈະກໍາຊາວໜຸ່ມປະຊາຊົນ ປະຕິວັດລາວ, ໂຄງການສ້າງລະບົບການຄ້າຜ່ານເອເລັກໂຕຣນິກ ສໍາລັບຜະລິດຕະພັນກະສິກໍາຂອງລາວ, ແລະໂຄງການອື່ນໆ. ພິເສດ, ນັບແຕ່ໂຄວິດ-19 ລະບາດເປັນຕົ້ນມາ, ລັດຖະບານຈີນ ໄດ້ສົ່ງຊ່ຽວຊານການແພດສະເພາະດ້ານ ມາຊ່ວຍທີມແພດລາວຕ້ານໂຄວິດ, ສະໜອງວັກຊິນໃຫ້ແກ່ລາວ ລວມທັງໝົດ 8 ຄັ້ງ ຈໍານວນ 8,9 ລ້ານກວ່າໂດສ ສະຫຼຸບແລ້ວຈີນໄດ້ກາຍເປັນປະເທດທີ່ໃຫ້ການຊ່ວຍເຫຼືອວັກຊິນແກ່ ສປປ ລາວ ຫຼາຍທີ່ສຸດ.

ສ່ວນການຮ່ວມມືທາງດ້ານການຄ້າ, ທ່ານ ໄຊຊະນະ ຍັງໃຫ້ຮູ້ຕື່ມວ່າ: ສປ ຈີນ ຍັງສືບຕໍ່ເປັນຄູ່ຄ້າສໍາຄັນອັນດັບ 2 ຂອງລາວ, ສະເພາະ ປີ 2021 ມູນຄ່າການຄ້າຂອງສອງຝ່າຍສາມາດບັນລຸໄດ້ 4,35 ຕື້ໂດລາ, ເພີ່ມຂຶ້ນ 21,4%, ໃນນີ້ ລາວນໍາເຂົ້າ 1,67 ຕື້ໂດລາ, ເພີ່ມຂຶ້ນ 11,9%, ແຕ່ຈີນໄດ້ກາຍເປັນປະເທດເປົ້າໝາຍທີ່ລາວສົ່ງອອກຫຼາຍທີ່ສຸດ ລວມມູນຄ່າ 2,68 ຕື້ໂດລາ, ເພີ່ມຂຶ້ນ 28,2%. ພາຍຫຼັງເປີດການນໍາໃຊ້ທາງລົດໄຟລາວ-ຈີນ ຢ່າງເປັນທາງການ ການຂົນສົ່ງສິນຄ້າຜ່ານທາງລົດໄຟລາວ-ຈີນ ສາມາດປະຕິບັດໄດ້ 90 ຖ້ຽວ, ມີິປະລິມານຂົນສົ່ງ 80 ພັນກວ່າໂຕນ, ໃນນັ້ນສິນຄ້າເຂົ້າ-ອອກຫຼາຍກວ່າ 40 ພັນໂຕນ ກາຍເປັນບາດກ້າວໃໝ່ໃນການຊຸກຍູ້ວຽກງານການຄ້າລະຫວ່າງສອງຝ່າຍລາວ-ຈີນ ໃຫ້ມີຄວາມສະດວກວ່ອງໄວ ແລະ ມີປະສິດທິຜົນສູງຂຶ້ນຢ່າງປະຈັກຕາ. ສ່ວນການຮ່ວມມືດ້ານການລົງທຶນ ສປ ຈີນ ຍັງຄອງອັນດັບໜຶ່ງຂອງການລົງທຶນ ຢູ່ ສປປ ລາວ. ປີ 1989 ຮອດ 2021, ການລົງທຶນຂອງວິສາຫະກິດຈີນຢູ່ລາວມີທັງໝົດ 821 ໂຄງການ. ສະເພາະປີ 2021 ມີ 20 ໂຄງການ, ມີມູນຄ່າ 1 ຕື້ກວ່າໂດລາ ເຊິ່ງໄດ້ປະກອບສ່ວນກະຕຸ້ນການພັດທະນາເສດຖະກິດ-ສັງຄົມ ແລະ ສ້າງວຽກເຮັດງານທໍາໃຫ້ແກ່ປະຊາຊົນລາວເປັນຈໍານວນຫຼາຍ.

ທ່ານ ສອນໄຊ ສີພັນດອນໄດ້ປຸກລະດົມ,ຊຸກຍູ້ການສົ່ງອອກພືດກະສິກໍາຂອງລາວທີ່ມີທ່າແຮງໄປຈີນໃຫ້ຫຼາຍຂຶ້ນຕື່ມ, ລວມເຖິງໃຫ້ເອົາໃຈໃສ່ ຊຸກຍູ້ບັນດາໂຄງການຮ່ວມມື, ໂຄງການຊ່ວຍເຫຼືອ ແລະໂຄງການອື່ນໆ ລະຫວ່າງ ລາວ-ຈີນ ໃຫ້ມີປະສິດຜົນ ແລະ ລົງເລິກກວ່າເກົ່າໂດຍສະເພາະການປ້ອງກັນໂຄວິດ-19.

ແຫຼ່ງຂໍ້ມູນ: ໜັງສືພິມປະຊາຊົນ

ທະນາຄານແຫ່ງ ສປປ ລາວ ອອກໜັງສືແຈ້ງການ ເຖິງ: ພໍ່ແມ່ປະຊາຊົນ, ຊາວຄ້າຂາຍ, ນັກທຸລະກິດ ທັງພາຍໃນ ແລະ ຕ່າງປະເທດ, ພະນັກງານ, ທະຫານ ແລະ ຕໍາຫຼວດ, ຕະຫຼອດຮອດຜູ້ທີ່ອາໄສຢູ່ ສປປ ລາວ ໃນຂອບເຂດທົ່ວປະເທດ.  ເລື່ອງ: ເພີ່ມທະວີຄວາມມີສະຕິລະວັງຕົວ ແລະ ປ້ອງກັນຄວາມສ່ຽງ ໃນການລົງທຶນໃນທຸລະກິດທີ່ບໍ່ໄດ້ຮັບອະນຸຍາດຈາກພາກສ່ວນທີ່ກ່ຽວຂ້ອງ. (ລາຍລະອຽດໃນໃບແຈ້ງການ)

ທະນາຄານແຫ່ງ ສປປ ລາວ ຂໍຖືເປັນກຽດແຈ້ງການມາຍັງພໍ່ແມ່ປະຊາຊົນ, ຊາວຄ້າຂາຍ, ພະນັກງານ ແລະ ທະຫານຕໍາຫຼວດ ຕະຫຼອດຮອດຄົນຕ່າງປະເທດ ທີ່ອາໄສຢູ່ ສປປ ລາວ ຈົ່ງມີສະຕິຕໍ່ການໂຄສະນາເກີນຄວາມເປັນຈິງ ທີ່ຊັກຊວນລົງທຶນທີ່ໃຫ້ຜົນຕອບແທນສູງ ເປັນຕົ້ນ ການຊື້ວັດຖຸມີຄ່າປະເພດຄໍາ, ເງິນ, ເພັດ, ພອຍ, ວັດຖຸໂບຮານ ຫຼື ສິ່ງທີ່ມີມູນຄ່າສູງຂອງບຸກຄົນ, ກຸ່ມຄົນ, ນິຕິບຸກຄົນ ຫຼື ອົງກອນ. ພ້ອມນັ້ນ ກໍໃຫ້ເພີ່ມການຊອກຮູ້ຂໍ້ມູນຂ່າວສານ ທີ່ ຮອບຄອບ, ພຽງພໍໃຫ້ແກ່ການຕັດສິນໃຈຂອງຕົນກ່ອນການລົງທຶນໃນໂຄງການໃດຫນຶ່ງ, ຮູບແບບການລົງທຶນໃດ ຫນຶ່ງເພື່ອຫຼີກລ້ຽງຄວາມສ່ຽງຕໍ່ຊັບສິນ ແລະ ທຶນຮອນຂອງພໍ່ແມ່ປະຊາຊົນ.

ໃນວັນທີ 11 ກຸມພາ 2022ນີ້ ຢູ່ທີ່ ຫ້ອງວ່າການແຂວງຈຳປາສັກ ທ່ານ ປອ ວິໄລວົງ ບຸດດາຄຳ ກຳມະການສູນກາງພັກ ເລຂາພັກແຂວງ ເຈົ້າແຂວງໆຈຳປາສັກໄດ້ຖະແຫຼງຕໍ່ສື່ມວນຊົນ ໂດຍກ່າວວ່າ: ແຂວງຈຳປາສັກຈະຈັດ 4 ກິດຈະກຳສຳຄັນ ໃນເດືອນກຸມພານີ້.

ເປັນຕົ້ນແມ່ນກິດຈະກຳ ທີ 1. ການປູກຕົ້ນດອກຈຳປາ 1,565 ຕົ້ນໃສ່ບໍລິເວນວັດພູມໍລະດົກໂລກແຫ່ງທີ 2 ຂອງລາວ ໃນວັນທີ 12 ກຸມພາ.

ກິດຈະກຳທີ 2. ແມ່ນງານບຸນນະມັດສະການຜາສາດຫີນວັດພູຈຳປາສັກ ມໍລະດົກໂລກ ຈະໄດ້ຈັດຂື້ນນັບແຕ່ວັນທີ 14-16 ກຸມພາ 2022.

ກິດຈະກຳທີ 3. ແມ່ນງານບຸນມະໂຫລານກາເຟ-ຊາ ພູພຽງບໍລະເວນ ປະຈຳປີ 2022 ຈະໄດ້ຈັດຂຶ້ນ ນັບແຕ່ວັນທີ 17 – 19 ກຸມພາ 2022.

ກິດຈະກຳທີ 4. ແມ່ນພິທີປະກາດອຸດທະຍານແຫ່ງຊາດ 2 ແຫ່ງ ຄື: ອຸດທະຍານແຫ່ງຊາດ ດົງຫົວສາວ ແລະ ອຸດທະຍານແຫ່ງຊາດ ເຊປຽນ ເຊິ່ງຈະໄດ້ຈັດຂຶ້ນ ໃນວັນທີ 17 ກຸມພາ 2022.

ໃນພິທີເປີດງານບຸນມະໂຫລານກາເຟ-ຊາ ພູພຽງບໍລະເວນ, ທ່ານ ເຈົ້າແຂວງໆຈຳປາສັກໄດ້ກ່າວເຖິງຄວາມສຳຄັນ ແລະຈຸດປະສົງ ແຕ່ລະກີດຈະກຳຂອງງານອີກດ້ວຍ.

ແຫຼ່ງຂ່າວ: ສະຖານີວິທະຍຸແຂວງຈຳປາສັກ

ຕາມການລາຍງານຂອງສູນຂ່າວສານການແພດສຸຂະສຶກສາ ປະຈຳວັນທີ 12 ກຸມພາ 2022

ເຮົາຈະເຫັນວ່າແຂວງຫົວພັນແມ່ນມີຜູ້ຕິດເຊື້ອໃໝ່ສູງສຸດມື້ນີ້້