ໃນວັນທີ 27/01/2022 ທີ່ບໍລິສັດ ສະຕາໂທລະຄົມ ໄດ້ຈັດຕັ້ງພິທີເຊັນບົດບັນທຶກຄວາມເຂົ້າໃຈ (MOU) ລະຫວ່າງບໍລິສັດ ສະຕາ ໂທລະຄົມ ຈໍາກັດ (ຢູນີເທວ) ແລະ ລັດວິສາຫະກິດ ໄຟຟ້າລາວ (ຟຟລ) “ວ່າດ້ວຍການສືກສາຄວາມເປັນໄປໄດ້ໃນການຮ່ວມທຸລະກິດດ້ານໂທລະຄົມມະນາຄົມ ແລະ ເຕັກໂນໂລຊີ ຂໍ້ມູນຂ່າວສານ”.ເຂົ້າຮ່ວມງານດັ່ງກ່າວມີ ທ່ານ ຈັນທະບູນ ສຸກອາລຸນ ຜູ້ອໍານວຍການໃຫຍ່ ລັດວິສາຫະກິດ ໄຟຟ້າລາວ; ທ່ານ ລີວ ແມ໋ງ ຮ່າ ຜູ້ອໍານວຍການໃຫຍ່ ບໍລິສັດ ສະຕາ ໂທລະຄົມ ພ້ອມດ້ວຍ ຄະນະນໍາ ຈາກ ລັດວິສາຫະກິດ ໄຟຟ້າລາວ ແລະ ຄະນະອໍານວຍການໃຫຍ່ ພ້ອມດ້ວຍຄະນະນໍາຈາກພະແນກການ, ສູນ ບໍລິສັດ ສະຕາ ໂທລະຄົມ.

ທ່ານ ບູນມີ ມາລາວົງ – ຮອງອໍານວຍການໃຫຍ່ ບໍລິສັດ ສະຕາ ໂທລະຄົມໄດ້ກ່າວວ່າ: ບໍລິສັດ ສະຕາ ໂທລະຄົມເຊີ່ງມີເຄື່ອງໝາຍການຄ້າຢູນີເທວ, ພາຍຫຼັງ 12 ປີໄດ້ສ້າງຕັ້ງຂື້ນ ແລະ ໄດ້ສືບຕໍ່ພັດທະນາພື້ນຖານໂຄງລ່າງລະບົບເຄືອຂ່າຍໂທລະຄົມມະນາຄົມ ທີ່ນຳໃຊ້ເຕັກໂນໂລຊີທັນສະໄໝຂອງໂລກ ໃນຂອບເຂດທົ່ວປະເທດ. ໄດ້ປະກອບສ່ວນໃນການສະໜອງບໍລິການທາງດ້ານໂທລະຄົມ ແລະ ການສື່ສານໃຫ້ກັບປະຊາຊົນລາວ ໄປຍັງເຂດຫ່າງໄກສອກຫຼີກ. ໂດຍຢຶດໝັ້ນວີໄສທັດຮັບໃຊ້ປະຊາຊົນ, ຍົກສູງຊີວິດການເປັນຢູ່ຂອງປະຊາຊົນນັບມື້ດີຂຶ້ນ ແລະ ປະຊາຊົນມີສ່ວນຮ່ວມ. ຢູນີເທວ ພວກເຮົາຍາມໃດກໍ່ຖືເອົາວຽກງານການພັດທະນາຕົນເອງເປັນໜ້າທີ່ສຳຄັນ ຈົນສາມາດຍົກລະດັບຕົນເອງກາຍເປັນ ບໍລິສັດໂທລະຄົມມະນາຄົມ ທີ່ນອນຢູ່ໃນລະດັບແຖວໜ້າຂອງ ສປປ ລາວ, ກັບພື້ນທີ່ປົກຄຸ້ມສັນຍານກວ້າງຂວາງ, ມີລະບົບເຄືອຂ່າຍໃຫຍ່ສຸດ ແລະ ຮັບໃຊ້ໃຫ້ລູກຄ້າຫຼາຍສຸດ.

ໃນຍຸກປະຕິວັດອຸດສະຫະກໍາ 4.0 ພວກເຮົາໄດ້ຢືນຢັນວ່າ ຢູນີເທວ ໄດ້ກ້າວເຂົ້າສູ່ໄລຍະໃໝ່ຢ່າງເປັນທາງການ ແລະ ມີຄວາມກຽມພ້ອມທີ່ຈະກາຍເປັນບໍລິສັດ ເຕັກໂນໂລຊີ ແລະ ການສື່ສານ, ທີ່ນໍາໜ້າໃນການປະຕິວັດຫັນເປັນດີຈີຕ໋ອນຂອງປະເທດ, ນໍາເອົາລະບົບດີຈີຕ໋ອນເຂົ້າສູ່ການດໍາລົງຊີວິດຂອງປະຊາຊົນ, ຄຽງຄູ່ກັນນັ້ນ ຢູນີເທວ ຈະພະຍາຍາມສູ້ຊົນຖືເອົາການພົວພັນຮ່ວມມືກັບລັດຖະບານ, ລັດວິສາຫາຫະກິດ ເວົ້າລວມ, ເວົ້າສະເພາະແມ່ນ ລັດວິສາຫະກິດ ໄຟຟ້າລາວ ເປັນວຽກງານອັນດັບ 01 ໃນການຈັດຕັ້ງຜັນຂະຫຍາຍຫັນເປັນດີຈີຕ໋ອນ ແລະ ບໍລິການລູກຄ້າແບບທັນສະໄໝທັງພາຍໃນ ແລະ ຕ່າງປະເທດ, ເພື່ອເຮັດໃຫ້ປະເທດລາວຂອງພວກເຮົາກ້າວໜ້າທັນສະໄໝທຽບເທົ່າກັບ ພາກພື້ນ ແລະ ສາກົນ, ບົນພື້ນຖານທັງ 02 ຝ່າຍໄດ້ເຫັນດີເປັນເອກະພາບກັນ ເຊຶ່ງມີ 07 ເນື້ອໃນດັ່ງລຸ່ມນີ້:

1)ຄົ້ນຄວ້າ ແລະ ນຳໃຊ້ເຄືອຂ່າຍສາຍໃຍແກ້ວນໍາແສງ OPGW ຂອງ ລັດວິສາຫະກິດ ໄຟຟ້າລາວ ໃນຂອບເຂດທົ່ວປະເທດ, ເພື່ອຮ່ວມກັນໃຫ້ບໍລິການລູກຄ້າທັງພາຍໃນ ແລະ ຕ່າງປະເທດ.

2)ຄົ້ນຄວ້າຜະລິດຕະພັນທາງດ້ານໄອທີ, Smart Meter AMR/AMI, ບໍລິການແຈ້ງເຕືອນຜ່ານຂໍ້ຄວາມ ແລະ Package internet ຮັບໃຊ້ແກ່ ລັດວິສາຫະກິດ ໄຟຟ້າລາວ.

3)ສຶກສາການນຳໃຊ້ພື້ນຖານໂຄງລ່າງຂອງ ລັດວິສາຫະກິດໄຟຟ້າລາວ ເປັນຕົ້ນແມ່ນ: ເສົາໄຟຟ້າ, ສູນສະຖານີເພື່ອໝຸນໃຊ້ເຂົ້າໃນວຽກງານການກະຈາຍສັນຍານໂທລະຄົມຂອງ ຢູນິເທວ ຈົນເຖີງສືກການນຳໃຊ້ພື້ນຖານໂຄງລ່າງສາຍໄຍແກ້ວ ຂອງ ລັດວິສາຫະກິດ ໄຟຟ້າລາວ ໃນລະບົບ Smart Meter ຢູ່ 04 ຕົວເມືອງໃນນະຄອນຫຼວງ ເພື່ອສະໜອງບໍລິການ.

4)ສຶກສາການຊໍາລະ ຄ່າໄຟຟ້າຜ່ານບໍລິການ ກະເປົາເງິນເອເລັກໂຕຣນິກ ) Mobile Wallet) ໂດຍອີງໃສ່ທ່າແຮງ ຂອງ ບໍລິການ U-Money ເພື່ອອໍານວຍຄວາມສະດວກ ໃຫ້ລູກຄ້າ ຟຟລ ໃນການຊໍາລະຄ່າໄຟຟ້າ ໃນຂອບເຂດ ຕົວເມືອງ, ຊົນນະບົດ ແລະ ເຂດຫ່າງໄກສອກຫຼີກ

5)ຄົ້ນຄວ້າ ແລະ ແລກປ່ຽນບຸກຄະລາກອນດ້ານເຕັກນີກຂອງສອງຝ່າຍໃນວຽກງານບໍາລຸງຮັກສາ ແລະ ສ້ອມແປງລະບົບໂທລະຄົມມະນາຄົມ/ໄຟຟ້າ ເພື່ອຫຼຸດຜ່ອນຄ່າໃຊ້ຈ່າຍ ແລະ ແລກປ່ຽນວັດທະນະທໍາການເຮັດວຽກກ່ຽວກັບການເບິ່ງແຍງລູກຄ້າ.

6)ຄົ້ນຄວ້າ ແລະ ນຳໃຊ້ເຕັກໂນໂລຊີເພື່ອຫັນເປັນດິຈິຕອນນຳໃຊ້ເຂົ້າໃນວຽກງານເຊັ່ນ: ລະບົບຄອມພີວເຕີເຮັດວຽກອັດຕະໂນມັດ (RPA), ການກວດສອບຄວາມປອດໄພຂອງລະບົບໄອທີ (PenTest) , KPI Monitoring, Cloud Computing…

7)ຄົ້ນຄວ້າວຽກງານອື່ນໆທີ່ມີປະໂຫຍດຕໍ່ທັງສອງຝ່າຍ ແລະ ສັງຄົມ.

ການຮ່ວມມືຂອງທັງສອງຝ່າຍ ແມ່ນ ການຮ່ວມມືຂອງວິສາຫະກິດຂະໜາດໃຫຍ່ ຂອງ ສ ປປ ລາວ ເພື່ອແນ່ໃສ່ວຽກງານການຮ່ວມມືສຶກສາຄົ້ນຄວ້າການຫັນເປັນດິຈິຕອນ ນຳໃຊ້ເຕັກໂນໂລຊີທັນສະໄໝເຂົ້າໃນວຽກງານການຄຸ້ມຄອງ, ການສະໜອງບໍລິການໃຫ້ແກ່ລູກຄ້າ ທັງພາຍໃນ ແລະ ຕ່າງປະເທດ. ໃນຍຸກປະຕິວັດອຸດສະຫະກໍາ 4.0 ເພື່ອເປັນການຊຸກຍູ້ສົ່ງເສີມການຄຸ້ມຄອງ, ການບໍລິຫານ ລວມທັງການບໍລິການໃຫ້ແກ່ລັດຖະບານ ແລະ ສັງຄົມ ຕອບສະໜອງໄດ້ກັບຄວາມຕ້ອງການ ດ້ວຍລະບົບເຕັກໂນໂລຊີ ທີ່ທັນສະໄໝ ຕາມນະໂຍບາຍ ແລະ ແຜນພັດທະນາ ຂອງລັດຖະບານ, ບຸກຄະລາກອນ ຮັບປະກັນສິດຜົນປະໂຫຍດ ທັງສອງຝ່າຍຕາມຈຸດປະສົງຂອງໂຄງການຮ່ວມມື.

ທ່ານ ຟອງປະສິດ ເພັດສີສຸກ ຮອງຜູ້ອໍານວຍການໃຫຍ່ ຟຟລ ໄດ້ກ່າວວ່າ: ຕາງໜ້າລັດວິສາຫະກິດໄຟຟ້າລາວ ໃນຖານະເປັນວິສາຫະກິດຂອງລັດຂໍຖືເປັນກຽດ ແລະ ຮູ້ສືກດີໃຈ ທີ່ໄດ້ຮ່ວມມືກັບ ບໍລິສັດ ສະຕາ ໂທລະຄົມ ຈໍາກັດ ໃນການເຊັນບົດບັນທຶກ ຄວາມເຂົ້າໃຈ (MOU) ແມ່ນເພື່ອສຶກສາຄວາມເປັນໄປໄດ້ທາງດ້ານເສດຖະກິດ-ເຕັກນິກ ກ່ຽວກັບ ການດໍາເນີນທຸລະກິດທາງດ້ານໂທລະຄົມ. ເຊິ່ງ ຟຟລ ເຫັນໄດ້ວ່າ ບໍລິສັດ ສະຕາ ໂທລະຄົມ ຈໍາກັດ ເປັນບໍລິສັດ ໂທລະຄົມມະນາຄົມ ທີ່ ນອນຢູ່ໃນລະດັບແຖວໜ້າ ຂອງ ສປປ ລາວ, ມີຄວາມພ້ອມດ້ານ ເຕັກໂນໂລຊີ ແລະ ການສື່ສານ ທີ່ນໍາ ໜ້າໃນການ ຫັນເປັນດີຈີຕ໋ອນ ຂອງ ປະເທດ. ເຊິ່ງຈະນໍາເອົາເຕັກໂນໂລຊີ ຂອງ ບໍລິສັດ ສະຕາ ໂທລະຄົມ ມາສຶກສາຄົ້ນຄ້ວາປັບເຂົ້າໃຊ້ໃນວຽກງານ ເຊັ່ນ: ລະບົບຄອມພີວເຕີເຮັດວຽກອັດຕະໂນມັດ Robotic Process Automatic (RPA), ການກວດສອບຄວາມປອດໄພຂອງລະບົບໄອທີ ໜ້າ 2 Penetration Testing (PenTest), ລະບົບຕິດຕາມລາຍງານ KPI Monitoring, ບ່ອນເກັບຂໍ້ມູນ Cloud Computing ເພື່ອເຮັດໃຫ້ ຟຟລ ມີເຄື່ອງມືໃນການເຮັດວຽກທີ່ດີຂື້ນໄປເລື້ອຍໆ. ແລະ ພວກເຮົາມີຄວາມເຊື່ອໝັ້ນວ່າ ວິຊາການຂອງທັງ 2 ຝ່າຍຈະຮ່ວມກັນສຶກສາ ແລະ ບັນລຸຜົນ ຂອງ ການສຶກສາຄວາມເປັນໄປໄດ້ກ່ຽວກັບ ການດໍາເນີນທຸລະກິດທາງດ້ານໂທລະຄົມ ລະຫວ່າງ ລັດວິສາຫະກິດໄຟຟ້າລາວ ແລະ ບໍລິສັດ ສະຕາ ໂທລະຄົມ ຈໍາກັດ ເຊິ່ງເປັນການປະກອບສ່ວນອັນສໍາຄັນ ເຂົ້າໃນການສຶບຕໍ່ພັດທະນາວຽກງານການບໍລິການ, ອໍານວຍຄວາມສະດວກໃຫ້ປະຊາຊົນ ແລະ ປະກອບສ່ວນເຂົ້າໃນການພັດທະນາຊິວິດການເປັນຢູ່ຂອງປະຊາຊົນບັນດາເຜົ່າໃຫ້ນັບມື້ສະດວກ ສະບາຍຍິ່ງຂື້ນ.

ວັນທີ 28 ມັງກອນ 2022 ນີ້, ເມືອງເງິນ ແຂວງ ໄຊຍະບູລີ. ໄດ້ເປີດກອງປະຊຸມ ສະຫລຸບການຈັດ ຕັ້ງປະຕິບັດແຜນງົບປະມານແຫ່ງລັດ ປະຈຳປີ 2021. ແລະ ວາງທິດທາງແຜນການ ປີ 2022. ໂດຍຊີ້ໃຫ້ເຫັນແຜນເບື້ອງຕົ້ນ 1,85 ຕື້ກີບ. ດັດແກ້ແຜນເພີ່ມຂື້ນ 550 ລ້ານກີບ, ລວມແຜນດັດແກ້ 2,40 ຕື້ກີບ ປະຕິບັດໄດ້ 2,68 ຕື້ກີບ ເທົ່າກັບ 144,61%ຂອງແຜນເບື້ອງຕົ້ນ, ເທົ່າກັບ 111,54% ຂອງແຜນດັດແກ້,ໃນນັ້ນ ສວຍສາອາກອນ ແຜນດັດແກ້ 2,25 ຕື້ກີບ ປະຕິບັດໄດ້ 2,50 ຕື້ກີບ ເທົ່າກັບ 111,39 % ຂອງແຜນດັດແກ້. ຊັບສິນ ແຜນ 155 ລ້ານກີບ ປະຕິບັດໄດ້ 176 ລ້ານກີບ, ເທົ່າກັບ 113,60% ຂອງແຜນການປີ.

ທ່ານ ວິລະພົງ ອິນທະວົງ ຫົວໜ້າຫ້ອງການ – ການເງິນ ເມທອງເງິນ ກ່າວວ່າ: ສຳລັບລາຍຮັບເກັບໃຫ້ແຂວງ ປະຕິບັດໄດ້ 5,87 ຕື້ກີບ. ປະຕິບັດລາຍຈ່າຍ: ທັງໝົດ 2 ຕື້ກວາກີບ. ເທົ່າກັບ 97,61% ຂອງແຜນການປີ. ໃນນີ້ ເງິນບໍລິຫານ 1.659.617.000 ກີບ ເທົ່າກັບ 98,70%ຂອງແຜນການປີ. ເງິນດັດສົມ, ສົງເສີມ, ຊ່ວຍໜູນ 431 ລ້ານກີບ ເທົ່າກັບ 93,62%. ທິດທາງແຜນການ ແລະ ມາດຕະການຄາດຄະເນ ການຈັດຕັ້ງປະຕິບັດແຜນງົບປະມານ ປະຈຳປີ 2022. ເມືອງເງິນ ໄດ້ຮັບຕົວເລກແຜນລາຍຮັບ-ລາຍຈ່າຍງົບປະມານດັ່ງນີ້: ດ້ານລາຍຮັບ ແຜນລາຍຮັບທັງໝົດ 5,18 ຕື້ກີບໃນນັ້ນ ສວຍສາອາກອນ 5 ຕື້ກວ່າກີບ, ລາຍຮັບຊັບສີນ 180 ລ້ານກີບ. ຄາດຄະເນແຜນລາຍຈ່າຍ ງົບປະມານທັງໝົດ 2,51 ຕື້ກີບ ໃນນີ້: ຈ່າຍບໍລິຫານ 2,01 ຕື້ກີບ. ຈ່າຍດັດສົມ-ສົ່ງເສີມ 504 ລ້ານກີບ.

ໃນວາລະກອງປະຊຸມ ບັນດາຂະແໜງການຕ່າງໆ ກໍ່ໄດ້ພ້ອມກັນປະກອບຄຳຄິດເຫັນ ຢ່າງກົງໄປກົງມາ ເພື່ອຊອກ ໃຫ້ເຫັນຈຸດດີ, ຂໍ້ຄົງຄ້າງ ເພື່ອພ້ອມປັບປຸງແກ້ໄຂໃນຕໍ່ໜ້າ.

ທ່ານ ທອງພັນ ສຸກສະຫວັດ ຮອງເຈົ້າເມືອງໆເງິນ ໄດ້ເນັ້ນໃຫ້ ຄະນະນຳຂະແໜງການເງິນແຕ່ລະຂັ້ນ ຕ້ອງໄດ້ເອົາໃຈໃສ່ໃນການສຶກສາອົບຮົມການເມືອງແນວຄິດ, ເຊື່ອມຊືມແນວທາງນະໂຍບາຍຂອງພັກ-ລະບຽບກົດໝາຍຂອງລັດຕໍ່ຖັນແຖວພະນັກງານ-ລັດຖະກອນຂອງຂະແໜງການເງິນຢ່າງເລີກເຊີງເຖີງຖອງ, ເຊີດຊູສິດ, ໜ້າທີ ຄວາມຮັບຜິດຊອບຂອງຕົນໃຫ້ສູງຂື້ນ, ມີຈັນຍາບັນໃນການປະຕິບັດໜ້າທີວຽກງານໃຫ້ເຂັ້ມງວດ. ເອົາໃຈໃສ່ປັບປຸງລະບອບນຳພາ ແລະ ແບບແຜນວິທີເຮັດວຽກໃຫ້ດີ, ປັບປຸງຂອດກົນໄກປະສານງານລະຫວ່າງຂະແໜງການທີກ່ຽວ ຂ້ອງໃຫ້ມີຄວາມໜັກແໜ້ນ ເຂັ້ມແຂງ,ກະທັດຮັດ, ກົມ ກຽວເປັນເອກະພາບ, ການຈັດຕັ້ງປະຕິບັດມີຄວາມສະ ດວກ, ວ່ອງໄວ ທັນຕາມສະພາບການ. ເພື່ອເຮັດໃຫ້ການຈັດຕັ້ງປະຕິບັດແຜນລາຍຮັບ ງົບປະມານແຫ່ງລັດ ປະຈຳປີ 2022 ຢູ່ເມືອງເງິນ ໃຫ້ບັນລຸຕາມແຜນການທີ່ວາງໄວ້.

ໂດຍ: ອິນແປງ ແຫວນຄຳ

ສະພາບໂຄວິດ-19 ວັນອັງຄານ ທີ 1 ກຸມພາ 2011

ລາຍລະອຽດ

ແຂວງໄຊສົມບູນ ມອບ-ຮັບໜ້າທີ່ ເລຂາພັກແຂວງ-ເຈົ້າແຂວງ ຜູ້ໃໝ່

ພິທີ ມອບ-ຮັບໜ້າທີ່ ລະຫວ່າງ ສະຫາຍ ພົຕ ຄຳລຽງ ອຸທະໄກສອນ, ເລຂາພັກແຂວງ, ເຈົ້າແຂວງໄຊສົມບູນ ຜູ້ເກົ່າ ແລະ ສະຫາຍ ພອຍຄຳ ຮຸ່ງບຸນຍວງ ຮອງເລຂາພັກແຂວງ ຂຶ້ນເປັນເລຂາພັກແຂວງ, ເຈົ້າແຂວງໄຊສົມບູນ ຜູ້ໃໝ່ ໄດ້ຈັດຂຶ້ນ ໃນວັນທີ 31 ມັງກອນ 2022 ໂດຍການເຂົ້າຮ່ວມຂອງ ສະຫາຍ ບຸນທອງ ຈິດມະນີ ກຳມະການກົມການເມືອງສູນກາງພັກ, ຜູ້ປະຈຳການຄະນະເລຂາທິການສູນກາງພັກ, ຮອງປະທານປະເທດ, ມີບັນດາສະຫາຍ ຮອງລັດຖະມົນຕີ, ຮອງຫົວໜ້າຫ້ອງວ່າການສູນກາງພັກ, ຫົວໜ້າກົມ-ຮອງກົມ ຈາກສູນກາງ ພ້ອມດ້ວຍຄະນະພັກ-ຄະນະນຳ ແຂວງ, ການນຳທັງ 5 ເມືອງ ແລະ ພາກສ່ວນກ່ຽວຂ້ອງ ເຂົ້າຮ່ວມເປັນສັກຂີພິຍານ.

ໃນພິທີ ສະຫາຍ ດວງຕາ ຈູມພາວັນ, ຫົວໜ້າກົມຄຸ້ມຄອງພະນັກງານ, ຄະນະຈັດຕັ້ງສູນກາງພັກ ໄດ້ຜ່ານຄຳສັ່ງ, ດຳລັດຍົກຍ້າຍ ແລະ ການແຕ່ງຕັ້ງການນຳຂັ້ນສູງ ຂອງແຂວງໄຊສົມບູນ ໂດຍຍົກຍ້າຍ ສະຫາຍ ພົຕ ຄຳລຽງ ອຸທະໄກສອນ ເລຂາພັກແຂວງ, ເຈົ້າແຂວງໄຊສົມບູນ ຜູ້ເກົ່າ ໄປຮັບໜ້າທີ່ໃໝ່ຢູ່ກະຊວງປ້ອງກັນປະເທດ ແລະ ແຕ່ງຕັ້ງສະຫາຍ ພອຍຄຳ ຮຸ່ງບຸນຍວງ ຮອງເລຂາພັກແຂວງ ຂຶ້ນເປັນເລຂາພັກແຂວງ, ເຈົ້າແຂວງໄຊສົມບູນ ຜູ້ໃໝ່, ພ້ອມທັງຍົກຍ້າຍ ສະຫາຍ ພົຕ ວົງສອນ ອິນປານພິມ ຈາກກະຊວງປ້ອງກັນປະເທດ ມາຮັບໜ້າທີ່ໃໝ່ ເປັນຮອງເລຂາພັກແຂວງ, ຜູ້ຊີ້ນຳວຽກງານພັກ-ພະນັກງານ ຢູ່ແຂວງໄຊສົມບູນ ຕື່ມອີກ.

ໃນພິທີ, ສະຫາຍ ພົຕ ຄໍາລຽງ ອຸທະໄກສອນ ໄດ້ລາຍງານການນໍາພາ-ຊີ້ນຳ ການຈັດຕັ້ງປະຕິບັດວຽກງານຮອບດ້ານ ໃນໄລຍະ 3 ປີຜ່ານມາ ໂດຍໄດ້ເອົາໃຈໃສ່ສຶກສາອົບຮົມການເມືອງ-ແນວຄິດ ໃຫ້ສະມາຊິກພັກ, ພະນັກງານ-ລັດຖະກອນ, ທະຫານ, ຕຳຫຼວດ ແລະ ປະຊາຊົນບັນດາເຜົ່າຢ່າງກວ້າງຂວາງ ໄປພ້ອມກັບການເຕົ້າໂຮມຄວາມສາມັກຄີ ຢ່າງເປັນປຶກແຜ່ນ, ເຮັດໃຫ້ແຂວງໄຊສົມບູນ ມີຄວາມສະຫງົບຢ່າງໜັກແໜ້ນ, ເສດຖະກິດມີບາດກ້າວຂະຫຍາຍຕົວ ດ້ວຍຈັງຫວະໄວ ແລະ ຕໍ່ເນື່ອງ ໂດຍເຕີບໂຕໃນລະດັບ 7,6%, ລວມຍອດຜະລິດຕະພັນພາຍໃນ ຫລື GDP ບັນລຸໄດ້ 1.336,54 ຕື້ກີບ, ລາຍຮັບສະເລ່ຍຕໍ່ຫົວຄົນ 13,59 ລ້ານກີບ ຕໍ່ຄົນຕໍ່ປີ, ເທົ່າກັບ 103,69% ຂອງແຜນປີ ແລະ ຊີວິດການເປັນຢູ່ ຂອງປະຊາຊົນບັນດາເຜົ່າ ໄດ້ຮັບການປັບປຸງປົວແປງດີຂຶ້ນຢ່າງຕໍ່ເນື່ອງ.

ໃນໂອກາດນີ້, ສະຫາຍ ບຸນທອງ ຈິດມະນີ ກໍໄດ້ເນັ້ນໜັກໃຫ້ສະຫາຍ ເລຂາພັກແຂວງ, ເຈົ້າແຂວງໄຊສົມບູນ ຜູ້ໃໝ່ ຈົ່ງສືບຕໍ່ນຳພາ-ຊີ້ນຳໝູ່ຄະນະ ແລະ ເປັນຫົວຈັກຫລັກແຫລ່ງ ໃນການສ້າງສາພັດທະນາ ແຂວງໄຊສົມບູນ ໃຫ້ມີຄວາມເຂັ້ມແຂງຮອບດ້ານ ໂດຍເອົາໃຈໃສ່ສຶກສາອົບຮົມການເມືອງ-ແນວຄິດ ໃຫ້ພະນັກງານສະມາຊິກພັກ, ທະຫານ-ຕຳຫລວດ ແລະ ປະຊາຊົນບັນດາເຜົ່າ ເປັນວຽກງານແຖວໜ້າ ພ້ອມທັງເປັນຄັນທຸງເຕົ້າໂຮມຄວາມສາມັກຄີພາຍໃນພັກໃຫ້ແໜ້ນແຟ້ນ ໂດຍສອດຫ້ອຍກັບການເພີ່ມທະວີວຽກງານປ້ອງກັນຊາດ-ປ້ອງກັນຄວາມສະຫງົບ ທົ່ວປວງຊົນຮອບດ້ານ ເພື່ອຮັບປະກັນໃຫ້ແຂວງໄຊສົມບູນ ມີສະຖຽນລະພາບທາງດ້ານການເມືອງ ແລະ ມີຄວາມສະຫງົບປອດໄພ ຢ່າງໜັກແໜ້ນ ໄປພ້ອມກັບການຫັນພະນັກງານລົງກໍ່ສ້າງຮາກຖານການເມືອງ ຕາມທິດ 3 ສ້າງ ຢູ່ຮາກຖານປະຊາຊົນ ເພື່ອນຳເອົາແນວທາງນະໂຍບາຍຂອງພັກ ແລະ ແຜນພັດທະນາເສດຖະກິດ-ສັງຄົມ ຂອງລັດ ລົງເຜີຍແຜ່ໃຫ້ປະຊາຊົນ ໄດ້ກຳແໜ້ນຢ່າງເລິກເຊິ່ງ ໂດຍເອົາໃຈໃສ່ປັບປຸງຊີວິດການເປັນຢູ່ ຂອງເຂົາເຈົ້າ ໃຫ້ໄດ້ຮັບການແກ້ໄຂດີຂຶ້ນເປັນກ້າວໆ ລວມໄປເຖິງການເອົາໃຈໃສ່ສັກວັກຊິນປ້ອງກັນພະຍາດໂຄວິດ-19 ໃຫ້ບັນລຸຕາມເປົ້າໝາຍ ແລະ ສືບຕໍ່ນຳພາ-ຊີ້ນຳພັດທະນາ ແຂວງໄຊສົມບູນ ໃຫ້ຈະເລີນກ້າວໜ້າຂຶ້ນຢ່າງບໍ່ຢຸດຢັ້ງ.

ພ້ອມນີ້ ສະຫາຍ ບຸນທອງ ຈິດມະນີ ຍັງໄດ້ນຳເອົາອຸປະກອນປ້ອງກັນໂຄວິດ-19 ຈຳນວນໜຶ່ງ ມາມອບໃຫ້ແຂວງໄຊສົມບູນ ຕື່ມອີກ.

.

ລາຍງານໂຄວິດ-19 ປະຈໍາວັນ ອາທິດ ທີ່ 30 ມັງກອນ 2022

ຕິດເຊື້ອໃໝ່ 306 ຄົນ, ເສຍຊີວິດ 6, ປົວຫາຍດີ 428 ຄົນ.

ສະຖານະການ ໂຄວິດ-19 ປະຈໍາວັນເສົາ ທີ 29 ມັງກອນ 2022

ເສຍຊີວິດໃໝ່ 0, ຕິດເພີ່ມ 537, ປົວດີ 610