ຕາມການລາຍງານຂອງເພຈສູນຂ່າວສານການແພດສຸຂະສຶກສາ

ກອງປະຊຸມນໍາສະເໜີໂຄງການ ແລະ ວາງແຜນການຈັດຕັ້ງປະຕິບັດກິດຈະກໍາໂຄງການສ້າງຂີດຄວາມສາມາດ ແລະ ເພີ່ມທະວີການຄາເຄະເນວາງແຜນລ່ວງໜ້າ ໂດຍຜ່ອນລະບົບການປົກປ້ອງສັງຄົມໃນວຽກງານຫຼຸດຜ່ອນຄວາມສ່ຽງໄພພິບັດ.ໃນວັນທີ 14 ມີນາ 2022 ທີ່ ນະຄອນຫຼວງວຽງຈັນ. ໂດຍເປັນປະທານຂອງ ທ່ານ ມີໄຊ ແສງຈັນທະວົງ ຮອງກົມສັງຄົມສົງເຄາະ ກະຊວງຮສສ, ໂດຍມີ ທ່ານ ເດວິດ ຊັບບາ, ຫົວຫນ້າແຜນງານການກຽມຄວາມພ້ອມໄພພິບັດ, ອົງການປົກປ້ອງພົນລະເຮືອນ ແລະ ການດໍາເນີນງານດ້ານມະນຸດສະທຳຂອງເອີຣົບ (DG ECHO) ປະຈໍາຫ້ອງການອາຊີ-ປາຊີຟິກ, ທ່ານ ນາງ ຮັງຖິແທັງ ພາມ, ຜູ້ຮັບຜິດຊອບວຽກງານເສີມສ້າງຄວາມເຂັ້ມແຂງໃນຂະແໜງໄພພິບັດ, ຫ້ອງການ FAO ປະຈໍາພາກພື້ນອາຊີ-ປາຊີຟິກ , ບັນດາທ່ານ ຫົວໜ້າກົມ, ຮອງຫົວໜ້າກົມ ຈາກບັນດາຂະແໜງການກຽ່ວຂ້ອງເຂົ້າຮວ່ມ.

ກອງປະຊຸມນໍາສະເໜີໂຄງການ ແລະ ວາງແຜນການຈັດຕັ້ງປະຕິບັດກິດຈະກໍາໂຄງການ ແລະ ເປັນການຮ່ວມມືກັບອົງການອາຫານ ແລະ ການກະເສດ FAO ຄັ້ງທໍາອິດ ທີ່ເຫັນໄດ້ຄວາມສໍາຄັນໃນການຄຸ້ມຄອງໄພພິບັດຢູ່ ສປປ ລາວ ໂດຍໂຄງການແມ່ນຈະໄດ້ເລັ່ງໃສ່ການກະກຽມຄວາມພ້ອມກ່ອນເກີດໄພພິບັດເປັນຕົ້ນແມ່ນໄພນໍ້າຖ້ວມ ແລະ ໄພແຫ້ງແລ້ງ ໂຄງການດັ່ງກ່າວແມ່ນຈະໄດ້ທົດລອງຈັດຕັ້ງປະຕິບັດຢູ່ 2 ສອງ ຄື ແຂວງຫຼວງພະບາງ ແລະ ແຂວງ ສະຫວັນນະເຂດ ແລະ ສ້າງຮ່າງບັນດານະໂຍບາຍທີ່ມີຢູ່ໃນປະຈຸບັນເພື່ອເຮັດແນວໃດໃຫ້ສາມາດທີ່ຈະເຊື່ອມສານວຽກງານ Anticipatory Action ເຂົ້າໃນວຽກງານຄຸ້ມຄອງໄພພິບັດໄດ້.

ທ່ານ ມີໄຊ ແສງຈັນທະວົງ ໃນນາມປະທານກອງປະຊຸມໄດ້ກ່າວມີຄຳເຫັນວ່າ: ດັ່ງທີ່ຮູ້ນໍາກັນ ແລ້ວວ່າໄພພິບັດນໍ້າຖວ້ມ ແລະ ແຫ້ງແລ້ງແມ່ນໄດ້ສົ່ງຜົນກະທົບຕໍ່ບັນດາພື້ນຖານໂຄງລ່າງ, ເສດຖະກິດ ແລະ ຊີວິດການເປັນຢູ່ຂອງປະຊາຊົນເຊິງໃນປີ 2019 ໄພນໍ້າຖ້ວມແມ່ນໄດ້ສົງຜົນກະທົບຕໍ່ປະຊາຊົນ ໃນ 6 ແຂວງພາກກາງ ແລະ ພາກໃຕ້ ແລະ ປີ2021 ທີ່ ຜ່ານມາ ໄດ້ມີຫຼາຍເຫດການໄພພິບັດເກີດຂຶ້ນ ເຊັ່ນ: ລົມພັດແຮງ, ນໍ້າຖ້ວມ, ໄຟໄໝ້ ແລະ ເຫດການຟ້າຜ່າ, ລວມເຫດການທັງໝົດທີ່ເກີດຂຶ້ນ ຈໍານວນ 52 ຄັ້ງ, ສົ່ງຜົນກະທົບໂດຍກົງຕໍ່ປະຊາຊົນຢູ່ 14 ແຂວງ (ແຂວງໄຊຍະບູລີ, ຊຽງຂວາງ, ຫຼວງພະບາງ, ຫຼວງນໍ້າທາ, ບໍ່ແກ້ວ, ຫົວພັນ, ບໍລິຄໍາໄຊ, ວຽງຈັນ, ຄໍາມ່ວນ, ສາລະວັນ, ຈໍາປາສັກ, ສະຫວັນນະເຂດ, ເຊກອງ ແລະ ແຂວງອັດຕະປື), 82 ເມືອງ, 764 ບ້ານ, 17.824 ຄອບຄົວ, 68.143 ຄົນ , ມີຜູ້ບາດເຈັບ 17 ຄົນ, ເສຍຊີວິດ 19 ຄົນ (ໃນນີ້, ຈາກເຫດການໄພພິບັດນໍ້າຖ້ວມ 04 ຄົນ, ລົມພະຍຸພັດ 10 ຄົນ (ໃນນີ້ ເຫດການເຮືອຫຼົ້ມ 08 ຄົນ), ໄຟໄໝ້ 01 ຄົນ ແລະ ເຫດການຟ້າຜ່າ 04 ຄົນ). ນອກນີ້, ຍັງສົ່ງຜົນກະທົບ, ເສຍຫາຍໃສ່ທາງດ້ານທີ່ຢູ່ອາໃສ ປະເພດເຮືອນຊານ ຈໍານວນ 2.638 ຫຼັງ ແລະ ຍັງໄດ້ສົ່ງຜົນກະທົບທາງດ້ານວຽກງານສາທາລະນະສຸກ, ວຽກງານສຶກສາທິການ, ວຽກງານກະສິກໍາ, ວຽກງານໂຍທາທິການ, ວຽກງານພະລັງງານ ແລະ ວຽກງານຫົວໜ່ວຍທຸດລະກິດຕ່າງໆ, ຄາດຄະເນມູນຄ່າເສຍຫາຍທັງໝົດ 398.906.944.143 ກີບ (398 ຕື້ກ່ວາ ກີບ). ສຳລັບໄພແຫ້ງແລ້ງກໍ່ເປັນໄພອັນຕະລາຍອັນໃຫຍ່ອັນໜຶ່ງຂອງ ສປປ ລາວ.

ມີຜົນກະທົບເກືອບທຸກປີ, ລັດຖະບານລາວ ໄດ້ໃຫ້ຄວາມສໍາຄັນ ໂດຍເອົາສອງປະເພດໄພພິບັດເຂົ້າໃນການຫຼຸດຜ່ອນຄວາມສ່ຽງໄພພິບັດ ແລະ ຊອກຫາຊອງວ່າງວິທີແກ້ໄຂເພື່ອຫຼຸດຜ່ອນຜົນກະທົບ ເຊິ່ງປະຈຸບັນທາງກອງເລຂາຄະນະກໍາມະການຄຸ້ມຄອງໄພພິບັດກໍ່່ຄືກະຊວງແຮງງານ ແລະ ສະຫວັດດການສັງຄົມ ແລະ ບັນດາຂະແໜງການທີ່ກ່ຽວຂ້ອງກໍ່ໄດ້ມີນິຕິກໍາ ເພື່ອເປັນບ່ອນອີງໃນການຈັດຕັ້ງປະຕິບັດວຽກງານຄຸ້ມຄອງໄພພິບັດຢູ່ ສປປ ລາວ.

(ຂ່າວສານຮສສ)

ຕາມການລາຍງານຂອງ ມູນນິທິຊ່ວຍເຫຼືອຄົນທຸກຍາກແຫ່ງ ສປປ ລາວ ສາຂາ ແຂວງຈຳປາສັກ ໃຫ້ຮູ້ວ່າ: ໃນວັນທີ 16/03/2022 ເວລາ 09:40 ນາທີ ຈຸດເກີດເຫດ: ເສັ້ນທາງບ້ານນາຫວ້າ ໄດ້ຮັບແຈ້ງເຫດຜ່ານເບີສຸກເສີນ 1623 ຈາກປະຊາຊົນວ່າ ມີອຸບັດຕິເຫດ ລົດໃຫຍ່+ລົດຈັກ ພໍໜ່ວຍກູ້ໄພອອກກວດສອບເຫດ ພົບຜູ້ເສຍຊີວິດຈຳນວນ 02 ຄົນ ເຊິ່ງເປັນເພດຊາຍທັງ2.

ຜູ້ທີ 1 ອາຍຸ28ປີ ອາຊີບ ປະຊາຊົນ, ປັດຈຸບັນຢູ່ບ້ານກ້ວຍ, ເມືອງໂພນທອງ,ແຂວງຈຳປາສັກ ມີອາການເບື້ອງຕົ້ນແມ່ນ ຖືກກະທົບຫົວຢ່າງຮຸນແຮງເສຍຊີວິດຄາທີ່.

ຜູ້ທີ 2 ອາຍຸ 36 ປີ ອາຊີບເຮັດນາ ຢູ່ບ້ານໂພໄຊ, ເມືອງໂພນທອງ, ແຂວງຈໍາປາສັກ ມີອາການເບື້ອງຕົ້ນແມ່ນກະທົບຫົວຢ່າງຮຸນແຮງ, ຂາຂວາຜິດຮູບ ແລະ ແຂນເບື້ອງຂວາຜິດຮູບເສຍຊີວິດຄາທີ່.

ດັ່ງນັ້ນ, ເຈົ້າໜ້າທີ່ຈຶ່ງໄດ້ມ້ຽນຄາບສົບແລ້ວນຳສົ່ງກັບບ້ານເພື່ອເຮັດພິທິທາງສາສະໜາເປັນທີ່ຮຽບຮ້ອຍ.

ວັນທີ 16 ມີນາ 2022 ນີ້, ກອງບັນຊາການທະຫານແຂວງວຽງຈັນໄດ້ສະຫລຸບວຽກງານເຮັດໃຫ້ສະພາບມີຄວາມສະຫງົບປະຈໍາປີ 2021 ແລະ ວາງທິດທາງຈຸດສຸມປີ 2022 ໂດຍເປັນກຽດເຂົ້າຮ່ວມເປັນປະທານຂອງສະຫາຍ ພົນເອກ ຈັນສະໝອນ ຈັນຍາລາດ ກໍາມະການກົມການເມືອງສູນກາງພັກ, ຮອງປະທານ ຜູ້ປະຈໍາການຄະນະກຳມະການ ປກຊ-ປກສ ສູນກາງ, ຮອງນາຍົກລັດຖະມົນຕີ ລັດຖະມົນຕີກະຊວງປ້ອງກັນປະເທດ, ມີສະຫາຍ ຄໍາພັນ ສິດທິດໍາພາ ກໍາມະການສູນກາງພັກ, ປະທານ ກຳມະການ ປກຊ-ປກສ ແຂວງ, ເຈົ້າແຂວງ ແຂວງວຽງຈັນ, ຄະນະນໍາກະຊວງປ້ອງກັນປະເທດ, ການນໍາແຂວງ, ຄະນະພັກ-ຄະນະບັນຊາ ກອງພົນທີ 1, ກອງບັນຊາການທະຫານແຂວງວຽງຈັນ, ໄຊສົມບູນ, ກອງບັນຊາການ ປກສ ແຂວງ ພ້ອມດ້ວຍພະນັກງານພາກສ່ວນກ່ຽວຂ້ອງເຂົ້າຮ່ວມ.

ສະຫາຍ ພົນຈັດຕະວາ ບຸນມາ ວົງດາລາແສນ ຄະນະປະຈໍາພັກແຂວງ, ຮອງປະທານ ຜູ້ປະຈໍາການ ຄະນະກຳມະການ ປກຊ-ປກສ ແຂວງ, ຫົວໜ້າການທະຫານ ກອງບັນຊາການທະຫານແຂວງວຽງຈັນໄດ້ກ່າວວ່າ: ການຈັດຕັ້ງປະຕິບັດວຽກງານເຮັດໃຫ້ສະພາບມີຄວາມສະຫງົບ ໂດຍພາຍໃຕ້ການຊີ້ນຳ-ນຳພາຂອງພັກ, ລັດຖະບານກໍ່ຄື ຄະນະກຳມະການ ປ້ອງກັນຊາດ-ປ້ອງກັນຄວາມສະຫງົບ ສູນກາງ, ຄະນະພັກ-ຄະນະບັນຊາ ກຳລັງປະກອບອາວຸດທອງຖິ່ນແຂວງວຽງຈັນໄດ້ພ້ອມກັນຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງສູນກາງພັກ, ມະຕິກອງປະຊຸມໃຫຍ່ V ຂອງອົງຄະນະພັກກະຊວງ ປ້ອງກັນປະເທດ ກໍ່ຄືມະຕິກອງປະຊຸມໃຫຍ່ຂອງຄະນະພັກແຂວງວຽງຈັນ ແລະ ຄະນະພັກກອງບັນຊາການທະຫານແຂວງວຽງຈັນຫັນເປັນແຜນການແລະທິດທາງອັນລະອຽດ.

ເຊິ່ງສາມາດຍາດໄດ້ຜົນງານຫຼາຍດ້ານທີ່ສຳຄັນ ເປັນຕົ້ນແມ່ນຮັກສາໄດ້ສະຖຽນລະພາບດ້ານການເມືອງ, ຄວາມເປັນລະບຽບຮຽບຮ້ອຍທາງສັງຄົມ, ລະບົບການຈັດຕັ້ງນັບແຕ່ຂັ້ນແຂວງ, ເມືອງ, ລົງຮອດຮາກຖານ ໄດ້ມີການປັບປຸງຢ່າງໜັກແໜ້ນເຂັ້ມແຂງ, ຊີວິດການເປັນຢູ່ຂອງພະນັກງານ-ນັກຮົບ ແລະ ປະຊາຊົນບັນດາເຜົ່ານັບມື້ດີຂຶ້ນ, ກຳລັງປະກອບວຸດທ້ອງຖິ່ນໄດ້ມີການເຕີບໃຫຍ່ເຂັ້ມແຂງ ແລະ ນັບມື້ທັນສະໄໝຂຶ້ນເປັນກ້າວໆ,ຍ້ອນຄະນະພັກ-ຄະນະບັນຊາທຸກຂັ້ນ ຖືເອົາວຽກງານສຶກສາອົບຮົມ ການເມືອງ-ນໍາພາແນວຄິດເປັນກົກ, ຫັນເອົາກໍາລັງລົງກໍ່ສ້າງຮາກຖານການເມືອງ ພັດທະນາຊົນນະບົດຮອບດ້ານຕາມ 4 ເນື້ອໃນ 4 ຄາດໝາຍ.

ສັງລວມແລ້ວ ການເຄື່ອນໄຫວປະຕິບັດໜ້າທີ່ການເມືອງຂອງກໍາລັງປະກອບອາວຸດທ້ອງຖິ່ນແຂວງວຽງຈັນສາມາດປະຕິບັດໜ້າທີ່ອັນມີກຽດຂອງຕົນທີ່ພັກ-ລັດ ແລະ ປະຊາຊົນມອບໝາຍໃຫ້ມີຜົນສໍາເລັດເປັນກ້າວໆມາ.ພ້ອມນັ້ນຍັງໄດ້ຍ້ອງຍໍຜົນງານບຸກຄົນທີ່ໄດ້ປະກອບສ່ວນສໍາຄັນເຂົ້າໃນວຽກງານ ປກຊ-ປກສ ເພື່ອປົກປັກຮັກສາແລະສ້າງສາພັດທະນາປະເທດຊາດ.ໃນນີ້ກະຊວງປ້ອງກັນປະເທດຕົກລົງມອບຫລຽນໄຊພິລະອາດຫານຊັ້ນ I ຈໍານວນ 6 ສະຫາຍ, ຊັ້ນ II ຈໍານວນ 14 ສະຫາຍ,ຊັ້ນ III ຈໍານວນ 10 ສະຫາຍ ແລະ ເລື່ອນຊັ້ນໃຫ້ນາຍທະຫານຜູ້ທີ່ມີຜົນງານດີເດັ່ນຈຳນວນໜຶ່ງຢ່າງສົມກຽດ.

ໂອກາດດັ່ງກ່າວນີ້, ສະຫາຍ ພົນເອກ ຈັນສະໝອນ ຈັນຍາລາດ ໄດ້ມີຄໍາເຫັນໂອ້ລົມ ແລະ ໃຫ້ທິດຊີ້ນໍາຫຼາຍບັນຫາທີ່ສໍາຄັນຕໍ່ຄະນະນໍາຂອງແຂວງ, ຄະນະພັກ-ຄະນະບັນຊາບັນດາກົມກອງ, ໂດຍເນັ້ນໃຫ້ເອົາໃຈໃສ່ການຫັນເອົາກໍາລັງລົງກໍ່ສ້າງຮາກຖານການເມືອງພັດທະນາຊົນນະບົດຮອບດ້ານຕາມ 4 ເນື້ອໃນ 4 ຄາດໝາຍ ໂດຍປິ່ນອ້ອມ 4 ໜ້າທີ່ໃຫຍ່ 26 ແຜນງານທີ່ຄະນະພັກກະຊວງປ້ອງກັນປະເທດວາງອອກ, ພ້ອມທັງເອົາໃຈໃສ່ວຽກງານການອົບຮົມ-ຫັດແອບໃຫ້ກອງທະຫານເປັນປະຈໍາ,ນອກນັ້ນກໍ່ໃຫ້ເອົາໃຈໃສ່ມູນເຊື້ອອອກແຮງງານເພິ່ມພູມຜະລິດຜົນປູກຝັງ-ລ້ຽງສັດຕາມເງື່ອນໄຂທ່າແຮງບົ່ມຊ້ອນຂອງຕົນດ້ວຍການຍົກສູງນໍ້າໃຈເພິ່ງຕົນເອງ,ກຸ້ມຕົນເອງແລະສ້າງຄວາມເຂັ້ມແຂງດ້ວຍຕົນເອງຢ່າງແຂງແຮງ, ກໍາແໜ້ນ, ກວດກາ, ສຶກສາອົບຮົມກໍ່ສ້າງເປົ້າໝາຍພະນັກງານສືບທອດ ແລະ ມີມາດຕະການຕໍ່ຜູ້ກະທໍາຜິດຢ່າງເດັດຂາດ, ພະນັກງານແຕ່ລະຂັ້ນຕ້ອງເຊື່ອມຊຶມກໍາແໜ້ນໜ້າທີ່ການເມືອງຕົນ, ມີຄວາມເປັນເອກະພາບກັບແຜນການ ພ້ອມທັງຫັນເອົາແຜນການດັ່ງກ່າວ ມາຈັດຕັ້ງຜັນຂະຫຍາຍເຂົ້າສູ່ວຽກງານຕົວຈິງ, ມີຄວາມຕັດສິນໃຈສູງ ກ້າຄິດ, ກ້າເຮັດ, ກ້າຮັບຜິດຊອບຕໍ່ຜົນໄດ້ຜົນເສຍຕາມໜ້າທີ່ຂອງຕົນ, ການກໍ່ສ້າງຮາກຖານການເມືອງພັດທະນາຊົນນະບົດຮອບດ້ານ

ຕ້ອງຕິດພັນກັບວຽກງານ 3 ສ້າງຂອງກົມການເມືອງສູນກາງພັກ, ສຸມໃສ່ແກ້ໄຂສະພາບຄວາມບໍ່ສະຫງົບໃຫ້ຂາດຕົວ, ຖືເອົາການສຶກສາອົບຮົມການເມືອງ-ນໍາພາແນວຄິດເປັນກົກ, ເອົາການພັດທະນາເສດຖະກິດ-ສັງຄົມເປັນໃຈກາງ, ຄະນະພັກທຸກຂັ້ນເປັນຄັນທຸງນໍາໜ້າໃນການນໍາພາຂະແໜງການຕ່າງໆເຕົ້າໂຮມຄວາມສາມັກຄິພາຍໃນເປັນປຶກແຜ່ນ, ກໍານົດລະອຽດຈະແຈ້ງບັນດາວຽກງານຈຸດສຸມແຕ່ລະໄລຍະ, ປະສານສົມທົບຢ່າງກົມກຽວ ລະຫວ່າງ ສູນກາງ ແລະ ທ້ອງຖິ່ນ ເພື່ອຮັບປະກັນໃນການປະຕິບັດໜ້າທີ່ຂອງທຸກພາກສ່ວນອົງການ ກົມກອງ ມີຜົນສໍາເລັດສູງ.

ຂໍ້ມູນຈາກ: ຄວາມສຫງົບ

ເລື່ອງນີ້ເກີດຂຶ້ນທີ່ປະເທດໄທ ແລະ ກຳລັງເປັນກະແສໃນປັດຈຸບັນ ເນື່ອງຈາກເປັນເລື່ອງແທ້ ບໍ່ແມ່ນເລື່ອງໃນໜັງສັ້ນໃດໆ.

ເມື່ອບໍ່ດົນມານີ້, ສາວໄທຄົນໜຶ່ງໄດ້ໂພສລົງໃນຕິກຕັອກ (TickTok) ທີ່ມີຊື່ວ່າ: Sarah_seba ໄດ້ເລົ່າເລື່ອງຕົນເອງທີ່ເຫຼືອເຊື່ອບໍ່ຄິດວ່າຈະເກີດຂຶ້ນແທ້ໃນຊີວິດນີ້. ລາວໄດ້ເລົ່າວ່າ: ລາວໄດ້ລົມກັບໝຸ່ມຕ່າງຊາດຄົນໜຶ່ງ ຕອນທຳອິດ, ໜຸ່ມຄົນນັ້ນບອກວ່າ ເປັນພະນັກງານອະນາໄມທຳມະດາ ຖານະທຸກ ຮັບສະພາບໄດ້ບໍ່? ເຊິ່ງສາວໄທກໍໄດ້ຕອບກັບວ່າ ລວຍທຸກບໍ່ສຳຄັນ ເຮົາຊ່ວຍກັນສ້າງດຽວກໍລວຍ ເຊິ່ງໝຸ່ມຕ່າງຊາດກໍເຮັດວຽກທຸກມື້ເພື່ອຈະທ້ອນເງິນມາຫາສາວໄທ.

ຈາກນັ້ນທັງສອງກໍໄດ້ສົ່ງຂໍ້ຄວາມລົມກັນ ແລະ ໃຫ້ກຳລັງໃຈກັນຢ່າງສະໝໍ່າສະເໝີ, ຈົນມື້ໜຶ່ງໝຸ່ມຕ່າງຊາດໄດ້ມາບອກກັບສາວໄທວ່າ ລາວເປັນລູກຊາຍປະທານບໍລິສັດ, ສາວໄທເລົ່າວ່າ: “ສາເຫດທີ່ສາລະພາບກໍເພາະ ຕອນນັ້ນເສດຖະກິດເຈີໂຄວິດ ແລະ ມັນເຮັດໃຫ້ລາຍໄດ້ຂອງຂ້ອຍຫຼຸດລົງ ເຮັດໃຫ້ລາວສົ່ງເງິນມາຊ່ວຍຂ້ອຍ ເຖິງແມ່ນວ່າ ເຮົາຈະບໍ່ເຄີຍເຈີກັນໂຕແທ້ມາກ່ອນ”.

ສຸດທ້າຍທັງສອງກໍໄດ້ມາເຈີກັນ ແລະ ຕັດສິນໃຈແຕ່ງງານໃຊ້ຊີວິດຄູ່ຮ່ວມກັນ.

ອ້າງອີງ: Khaosod

ວັນທີ 15 ມີນາ 2022 ຢູ່ທີ່ຫ້ອງການອຸດສາຫະກຳ ແລະ ການຄ້າ ເມືອງຕົ້ນເຜິ້ງ ໄດ້ມີພິທີທຳລາຍສິນຄ້າຕ້ອງຫ້າມ,ສິນຄ້າໝົດອາຍຸ ແລະ ສິນຄ້າລອກຮຽນແບບ ໂດຍການເຂົ້າຮ່ວມຂອງທ່ານ ອິນປອນ ແກ້ວດາວົງ ກຳມະການພັກເມືອງ ຮອງເຈົ້າເມືອງໆ ຕົ້ນເຜິ້ງ, ມີທ່ານ ແສງປະເສີດ ຫລວງລືໄຊ ກຳມະການພັກເມືອງ ຫົວໜ້າຫ້ອງການອຸດສາຫະກຳ ແລະ ການຄ້າເມືອງ, ມີພະແນກການອຸດສາຫະກຳການຄ້າແຂວງ, ຫ້ອງການທີ່ກ່ຽວຂ້ອງຂັ້ນເມືອງເຂົ້າຮ່ວມ.

ການກວດກາສິນຄ້າໝົດອາຍຸ ເຊິ່ງໄດ້ເລີມຈັດຕັ້ງປະຕິບັດມາແຕ່ຕົນເດືອນກຸມພາເປັນຕົ້ນມາ ໂດຍປະຕິບັດຕາມສິດ ແລະ ພາລະບົດບາດ ທັງເປັນການປົກປ້ອງຜູ້ຊົມໃຊ້ໃຫ້ໄດ້ໃຊ້ສິນຄ້າທີ່ມີຄຸນນະພາບ ແລະ ມີຄວາມປອດໄພ ເຈົ້າໜ້າທີ່ການຄ້າຈື່ງໄດ້ລົງກວດກາຮ້ານຂາຍຍົກ-ຂາຍຍ່ອຍພາຍໃນເມືອງຕົ້ນເຜິ້ງທັງໝົດ 63 ຮ້ານ, ໃນນັ້ນມີ 20 ຮ້ານທີ່ພົບເຫັນວ່າມີສິນຄ້າໝົດອາຍຸວາງຂາຍຢູ່ພາຍໃນຮ້ານ ເປັນຕົ້ນ ໝີ່ສຳເລັດຮູບ, ເຂົ້າໜົມ,ນ້ຳອັດລົມ, ນົມຄາເນຊັ້ນ, ເສັ້ນລ້ອນ, ນ້ຳຕານ ແລະ ສິນຄ້າອື່ນໆ ລວມ 21 ລາຍການ ຕົກເປັນມູນຄ່າ 19 ລ້ານ 9 ແສນກວ່າກີບ.

ຕໍ່ກັບສິນຄ້າດັ່ງກ່າວທາງເຈົ້າໜ້າທີ່ໄດ້ອາຍັດສິນຄ້າໄວ້ ພ້ອມທັງສ້າງບົດບັນທຶກກ່າວເຕືອນ ແລະ ໄດ້ປັບໄຫມບາງຮ້ານຄ້າ ຕາມລະບຽບການອີກຈຳນວນໝື່ງ.

ເຈົ້າໜ້າທີ່ຍັງໄດ້ໃຫ້ຄຳແນະນຳເຈົ້າຂອງຮ້ານຮູ້ເຖິງວິທີການກວດກາສິນຄ້າໝົດອາຍຸ ທັງເຮັດໃຫ້ເຂົາເຈົ້າມີຄວາມເຂົ້າໃຈໃນລະບຽບການ ມີຄວາມຕື່ນຕົວກວດກາສິນຄ້າທີ່ໝົດອາຍຸດ້ວຍຕົນເອງ.

ແຫຼ່ງຂ່າວ: ໜັງສືພິມບໍ່ແກ້ວ Bokeo Newspaper

ຕາມການລາຍງານ ຂອງຄວາມສະຫງົບ ໃຫ້ຮູ້ວ່າ: ທ້າວ ສີສຸກ ດາວເຮືອງ ຫຼື ເຕື່ອງ ອາຍຸ 45 ປີ ນັກທຸລະກິດຢູ່ບ້ານຂຸນຕາທົ່ງ ເມືອງສີໂຄດຕະບອງ ນະຄອນຫຼວງວຽງຈັນ ຖືກຄະນະສານອາຍາ ສານປະ ຊາຊົນນະຄອນຫຼວງວຽງຈັນ ຕັດສິນລົງໂທດປະຫານຊີວິດ ໃນວັນທີ 3 ມີນາ 2022 ສະຖານການຄ້າຂາຍຢາເສບຕິດ, ການຟອກເງິນ ແລະ ການຊື້-ຂາຍອາວຸດເສິກໂດຍບໍ່ຖືກຕ້ອງຕາມກົດໝາຍ.

ອົງການໄອຍະການ ປະຊາຊົນ ນະຄອນຫຼວງວຽງຈັນ ໄດ້ຖະແຫຼງວ່າ: ພາຍຫຼັງທີ່ ທ້າວ ໄຊຊະນະ ແກ້ວພິມພາ ຖືກເຈົ້າໜ້າທີ່ປະເທດໄທ ຈັບຕົວໃນຄັ້ງວັນ ທີ 19 ມັງກອນ 2017, ຜ່ານການດຳເນີນຄະດີຂອງທາງການໄທ ທ້າວ ໄຊຊະ ນະ ແກ້ວພິມພາ ໄດ້ໃຫ້ການຊັດທອດວ່າ ທ້າວ ສີສຸກ ດາວເຮືອງ ໄດ້ມີການເຄື່ອນໄຫວຄ້າຂາຍຢາເສບຕິດ ຮ່ວມກັບ ທ້າວ ໄຊນູເດັ່ງ (ຄົນມາເລເຊຍ) ຢູ່ເຂດຊາຍແດນພາກໃຕ້ຂອງປະເທດໄທ ຕາມຄຳໃຫ້ການຂອງ ທ້າວ ໄຊຊະ ນະ ແກ້ວພິມພາ ສະບັບລົງວັນທີ 21 ມັງກອນ 2017 ແລະ ມີຫຼັກຖານການໂອນເງິນຄ່າຢາເສບຕິດ ຈາກ ທ້າວ ໄຊນູເດັ່ງ ທີ່ໄດ້ໂອນເງິນມາ ໃຫ້ຈຳເລີຍໂດຍຜ່ານບັນຊີຮ້ານແລກປ່ຽນເງິນຕາ ແຂວງໜອງຄາຍ ປະເທດໄທ ໃນປີ 2015 ຫາ 2016 ລວມເປັນເງິນທັງໝົດ 144.000.000 ບາດ ໂດຍເປັນເງິນຄ່າຢາບ້າ ຈຳນວນ 1.600 ມັດ ເທົ່າກັບ 3.200.000 ເມັດ ນ້ຳໜັກ 320 ກິໂລກຼາມ ທີ່ຈຳເລີຍໄດ້ທຳການຄ້າ-ຂາຍຮ່ວມກັບທ້າວ ໄຊນູເດັ່ງ ໂດຍແມ່ນ ທ້າວ ລັດຊະພົນ ຫຼື ກຸ່ມ ເລັ່ງເປັນຄົນໄປຮັບເອົາເງິນ ແລ້ວເອົາມາມອບໃຫ້ຈຳເລີຍຕາມຂໍ້ມູນຫຼັກຖານທີ່ເຈົ້າໜ້າທີ່ໄທໄດ້ຢືດ ແລະ ກວດໂທລະສັບມືຖືຂອງ ທ້າວ ລັດຊະພົນ ຫຼື ກຸ່ມເລັ່ງ ພົບເຫັນວ່າ ຈໍາເລີຍ ໄດ້ມີການສົນທະນາກ່ຽວກັບການໂອນເງິນແຕ່ລະຄັ້ງກັບ ທ້າວ ລັດຊະພົນ ຜ່ານໂປແກຼມວ໋ອດແອັບ.

ນອກຈາກນີ້, ຈໍາເລີຍ ຍັງແມ່ນເປົ້າໝາຍຄ້າ-ຂາຍຢາເສບຕິດລາຍໃຫຍ່ລະດັບປະເທດ ແລະ ພາກພື້ນ ໂດຍມີການຕິດຕາມຂອງເຈົ້າໜ້າທີ່ຫຼາຍປະເທດ ແລະ ທີ່ສໍາຄັນຈຳເລີຍ ໄດ້ມີການພົວພັນກັບກຸ່ມເຄື່ອຄ່າຍພໍ່ຄ້າຢາເສບຕິດ ຄື: ທ້າວ ຄອນປະສົງ ຫຼື ຊຽງເທີ ແລະ ທ້າວ ໄຊຊະນະ ແກ້ວພິມພາ. ນອກນັ້ນ, ໃນເວລາຈັບຕົວ ແລະ ກວດຄົ້ນເຄຫາສະຖານເຮືອນຂອງຈຳເລີຍ ຍັງພົບເຫັນຢາໄອສ໌ ນ້ຳໜັກ 12,4 ກຼາມ, ຄັນຊາແຫ້ງນ້ຳໜັກ 29,9 ກຼາມ ແລະ ໃນເວລາຈັບຕົວ ທ້າວ ທົງໄຊ ຍັງພົບຢາອີ ຈຳນວນ 8 ເມັດ, ເຊິ່ງ ເປັນຢາອີຂອງຈຳເລີຍທີ່ໄດ້ມອບໃຫ້ຜູ້ກ່ຽວເປັນຄົນຮັກສາໄວ້ໃຫ້ ແລະ ພົບເຫັນອາວຸດເສິກປະເພດປືນ ພ້ອມດ້ວຍລູກປືນ ຈຳນວນ 5 ກະບອກ ຕາມບົດບັນທຶກຈັບຕົວ ແລະ ບົດບັນທຶກກວດຄົ້ນເຄຫາ ສະຖານ, ເມື່ອຈຳເລີຍ ໄດ້ເງິນມາຈາກການກະທຳຜິດແລ້ວ ກໍເອົາໄປປ່ຽນຮູບດ້ວຍການຊື້ລົດຫຼູລາຄາແພງມາວາງຂາຍ, ຊື້ທີ່ດິນຈໍານວນຫຼາຍຕອນ ແລະ ເອົາພັນທະບັດມູນຄ່າຫຼາຍຕື້ໃຫ້ບຸກຄົນກູ້ຢືມ ແຕ່ກົງກັນຂ້າມຈໍາເລີຍ ໄດ້ເອົາໃບຕາດິນໄປເປັນຫຼັກຊັບຄ້ຳປະກັນກູ້ຢືມເງິນຈາກທະນາຄານໃນນະຄອນ ຫຼວງວຽງຈັນ ເພື່ອເຊື່ອງອຳຊ້ອນເງື່ອນກ່ຽວກັບທີ່ມາຂອງເງິນເພື່ອເຮັດໃຫ້ເງິນທີ່ໄດ້ມາຈາກການກະທຳຜິດນັ້ນໃຫ້ຖືກຕ້ອງຕາມກົດໝາຍ.ໃນບົດຖະແຫຼງຂອງອົງການໄອຍາການ ໃຫ້ຮູ້ວ່າ:ໃນປີ 1997 ຈຳເລີຍ ໄດ້ໄປເຮັດວຽກກໍ່ສ້າງຂົວ-ທາງ ໄດ້ເງິນປະມານ 500.000 ບາດ, ປີ 1999 ໄດ້ເປີດຮ້ານສ້ອມແປງລົດຈັກ ແລະ ຮ້ານຂາຍລົດຈັກມືສອງໄດ້ກຳໄລເດືອນລະ 50.000-100.000 ບາດ, ປີ 2002 ໄດ້ເປີດຮ້ານຂາຍລົດໃຫຍ່ ມືສອງ ຊື້ນຳປະຊາຊົນຄັນລະ 100.000-500.000 ບາດ ແລ້ວເອົາມາຂາຍຕໍ່ໄດ້ກຳໄລຄັນ ລະ 50.000-100.000 ບາດ, ປີ 2003 ໄດ້ສ້າງຄອບຄົວກັບ ນາງ ບົວທອງ ໄຕປະດິດ ໃນເວລາແຕ່ງງານມີລົດໃຫຍ່ທີ່ເອົາມາຂາຍປະມານ 10 ຄັນ, ມີເງິນບາດ ຈໍານວນ 8.000.000 ບາດ; ສ່ວນເມຍ ແມ່ນມີລົດ ກະບະໄທ ເກີແຄັບ 1 ຄັນ, ປີ 2007 ຈຳເລີຍ ໄດ້ເອົາທີ່ດິນພ້ອມເຮືອນຢູ່ບ້ານພະໄຊ ເມືອງສີສັດຕະນາກ ໄປຄ້ຳປະກັນກູ້ຢືມເງິນນຳທະນາຄານພາບລິກ ຈໍານວນ 100.000 ໂດລາສະຫະລັດ ດອກເບ້ຍ 10% ຕໍ່ປີ ແລ້ວມາຊື້ລົດໃຫຍ່ເຂົ້າມາໃນຮ້ານຕື່ມອີກ, ປີ 2011 ໄດ້ໄປກູ້ຢືມເງິນນຳທະຄານພົງສະຫວັນຈຳນວນ 90. 000.000 ບາດ ກັບ 10 ຕື້ກີບ ດອກເບຍ 12% ຕໍ່ປີ ໂດຍເອົາໃບຕາດິນຈຳນວນ 14 ໃບ ເປັນ ຫຼັກຊັບຄ້ຳປະກັນ, ເງິນທີ່ກູ້ຢືມມາແມ່ນເອົາມາຊື້ລົດໃຫຍ່, ຈໍາເລີຍ ຍັງໄດ້ໂກຕ້າລົດທີ່ຕິດຕັ້ງແກັດຈາກລັດຖະບານເສຍພາສີ 50% ຂອງ ມູນຄ່າພາສີຂອງລັດນໍາເຂົ້າຈາກ ປະເທດອາເມລິກາ, ເຢຍລະມັນ, ໄທ, ຍີ່ປຸ່ນ, ດູໃບ ແລະ ໃຕ້ຫວັນ ຈໍານວນ 200 ກວ່າຄັນ ຄັນລະ 90.000 ຫາ150.000 ໂດລາສະຫະລັດ.

(ຕິດຕາມອ່ານຕໍ່ ສະບັບວັນທີ 17 ມິນາ 2022 ໃນເພຈ >>>ໜັງສືພິມຄວາມສະຫງົບ<<<)

ຈຸດຂາຍປີ້ບໍລິສັດລົດໄຟລາວ-ຈີນ ຫຼວງພະບາງ ຈະເປີດໃຫ້ບໍລິການໃນມື້ອື່ນນີ້!

ເພື່ອປັບປຸງຮູບແບບການບໍລິການຂາຍປີ້ຂອງທາງລົດໄຟລາວ-ຈີນ ທີ່ມີຢູ່ແລ້ວໃຫ້ດີຂຶ້ນກວ່າເກົ່າ ແລະ ເພື່ອອຳນວຍຄວາມສະດວກໃຫ້ແກ່ການຊື້ປີ້ຂອງປະຊາຊົນໃນເມືອງລຽບຕາມເສັ້ນທາງລົດໄຟ, ບວກກັບກະແສຕອບຮັບທີ່ດີຂອງຈຸດຂາຍປີ້ໃນນະຄອນຫຼວງວຽງຈັນ, ບໍລິສັດທາງລົດໄຟລາວ-ຈີນ ຈິ່ງໄດ້ເປີດຈຸດຂາຍປີ້ແຫ່ງທີ 2 ທີ່ຫຼວງພະບາງ, ເຊິ່ງປັດຈຸບັນກໍໄດ້ສຳເລັດການກໍ່ສ້າງ ແລະ ຈະເປີດໃຫ້ບໍລິການໃນມື້ອື່ນ ວັນທີ 17 ມີນານີ້.

ຈຸດຂາຍປີ້ຕັ້ງຢູ່ຖະໜົນໂພທິສາລາດ ໃຈກາງຕົວເມືອງຫຼວງພະບາງ, ກົງກັນຂ້າມກັບຕຶກສຳນັກງານລັດຖະບານແຂວງ ແລະ ພະແນກຕ່າງປະເທດ, ຫ່າງຈາກຕະຫຼາດກາງຄືນ 650 ແມັດ ແລະ ຫ່າງຈາກເດີ່ນຈະຕຸລັດ 200 ແມັດ. ຈຸດຂາຍປີ້ລົດໄຟກຳນົດຂາຍປີ້ຈາກສະຖານີຫຼວງພະບາງ-ສະຖານີເມືອງໄຊ, ສະຖານີບໍ່ເຕ່ນ (ຖ້ຽວລົດໄຟ C82) ແລະ ຫຼວງພະບາງ-ນະຄອນຫຼວງວຽງຈັນ, ວັງວຽງ (ຖ້ຽວລົດໄຟ C81/C83). ສຳລັບລາຍລະອຽດ: -ໄລຍະເວລາກ່ອນການຂາຍປີ້ແມ່ນ 3 ມື້ ແລະ ຈະຂາຍປີ້ສໍາລັບມື້ທີສາມທີ່ຈະອອກເດີນທາງເທົ່ານັ້ນ.

ປີ້ທີ່ຂາຍແມ່ນຄິດຄ່າບໍລິການນອກສະຖານທີ່ໃນລາຄາ 20.000 ກີບ/ປີ້.

ເລີ່ມຂາຍປີ້ໃນເວລາ 10:00 ໂມງເຊົ້າ ຫາ 12:00 ໂມງ, 12:30 ໂມງ ຫາ 15:30 ໂມງທຸກໆ ມື້ ແລະ ຈະຢຸດຂາຍເມື່ອປີ້ຫມົດ. -ແຕ່ລະຄົນຈໍາກັດພຽງແຕ່ 2 ປີ້, ໃນເວລາຊື້ປີ້ຈໍາເປັນຕ້ອງກວດສອບບັດປະຈຳໂຕ ແລະ ໃບຢັ້ງຢືນການສັກວັກຊີນ (ບັດຂຽວ) ຂອງຜູ້ທີ່ຈະຊື້ປີ້.

ຈຸດຂາຍປີ້ຈະປະກາດຈໍານວນຖ້ຽວລົດໄຟທີ່ຂາຍ, ລາຄາປີ້ ແລະ ຄ່າບໍລິການນອກສະຖານທີ່, ເພື່ອໃຫ້ຜູ້ໂດຍສານສາມາດເຫັນໄດ້ໃນເວລາຕົວຈິງ. -ເພື່ອປັບປຸງປະສິດທິພາບການຂາຍປີ້, ຈຸດຂາຍປີ້ຮອງຮັບການຊຳລະເງິນດ້ວຍການຮູດບັດ (UnionPay) ແລະ QR Code ( Onepay, UnionPay, Alipay ແລະ Wechat ) ທີ່ເຄື່ອງ POS, ປະຈຸບັນຍັງບໍ່ຮອງຮັບການຊຳລະດ້ວຍເງິນສົດ.

ຂໍ້ມູນຈາກ: Laos – China Railway Company Limited