ປະຊາຊົນບ້ານປຸ່ງຜາ ກຸ່ມພັດທະນາຫົວນໍ້າຄາ, ເມືອງເມິງ ຈັດພິທີບາສີສູ່ຂວັນ ໃຫ້ແກ່ການນໍາຂອງເມືອງ ເນື່ອງໃນໂອກາດບຸນປີໃໝ່ຂອງເຜົ່າລາຫູຟຸ

ໃນວັນທີ 25 ມີນາ 2022 ຜ່ານມານີ້ ຢູ່ທີ່ບ້ານປຸ່ງຜາ, ເມືອງເມິງ, ແຂວງບໍ່ແກ້ວ, ອົງການປົກຄອງບ້ານ, ເຖົ້າແກ່ແນວໂຮມ ຕະຫຼອດຮອດປະຊາຊົນບັນດາເຜົ່າພາຍໃນບ້ານປຸ່ງ ໄດ້ຈັດພິທີບາສີສູ່ຂວັນໃຫ້ແກ່ການນໍາຂອງເມືອງ ເຊິ່ງນໍາໂດຍ ທ່ານ ສົມສັກ ປິ່ນແກ້ວ, ກໍາມະການພັກແຂວງ, ເລຂາພັກເມືອງ, ເຈົ້າເມືອງໆເມິງ, ມີບັນດາທ່ານ ຄະນະປະຈໍາພັກເມືອງ, ກໍາມະການພັກເມືອງ, ຫົວໜ້າຫ້ອງການ – ຮອງຫ້ອງ, ອົງການປົກຄອງບ້ານ, ອົງການຈັດຕັ້ງບ້ານ ຕະຫຼອດພໍ່ແມ່ປະຊາຊົນບັນດາເຜົ່າພາຍໃນບ້ານເຂົ້າຮ່ວມຢ່າງເປັນຂະບວນການຟົດຟື້ນ.

ບ້ານປຸ່ງຜາ ຫ່າງຈາກເທດສະບານເມືອງເມິງປະມານ 12 ກິໂລແມັດ, ເປັນບ້ານໜຶ່ງທີ່ຂຶ້ນກັບກຸ່ມພັດທະນາຫົວນໍ້າຄາ, ເປັນຊົນເຜົ່າລາຫູຟຸ ຫຼື ມູເຊີຂາວ, ມີ 98 ຄອບຄົວ, ມີພົນລະເມືອງທັງໝົດ 406 ຄົນ, ຍິງ 202 ຄົນ. ອາຊີບຕົ້ນຕໍ ຂອງປະຊາຊົນແມ່ນເຮັດນາ, ເຮັດສວນ, ເຮັດໄຮ່ໝູນວຽນ, ອາຊີບສໍາຮອງ ແມ່ນລ້ຽງສັດ ແລະ ເກັບກູ້ເຄື່ອງປ່າຂອງດົງ ປະຊາຊົນ ແມ່ນເຊື່ອຖືຜີ; ພາຍໃນບ້ານ ແມ່ນຮັກສາໄດ້ຮີດຄອງປະເພນີອັນດີງາມທີ່ເປັນເອກະລັກຂອງເຜົ່າ ເຊິ່ງໄດ້ຮັບຮອງເປັນບ້ານວັດທະນະທໍາໃໝ່ ໃນວັນທີ 9 ກໍລະກົດ 2019. ເຊິ່ງໃນແຕ່ລະປີ ພາຍຫຼັງທີ່ຫຼິ້ນບຸນກີນຈຽງ ຫຼື ບຸນປະເພນີປີໃໝ່ຂອງເຜົ່າແລ້ວ ອົງການປົກຄອງບ້ານ ພ້ອມດ້ວຍເຖົ້າແກ່ແນວໂຮມ ແລະ ປະຊາຊົນພາຍໃນບ້ານ ແມ່ນຈະໄດ້ມາເຕົ້າໂຮມກັນ ຢູ່ທີ່ເຮືອນນາຍບ້ານ ຫຼື ໃຈກາງບ້ານ ເພື່ອຈັດພິທີບາສີສູ່ຂວັນ ໃຫ້ແກ່ຄະນະພັການນໍາຂອງບ້ານ, ຂອງເມືອງ ແລະ ເພື່ອອວຍພອນໄຊໃຫ້ພອນເຈົ້າບ້ານ – ເຈົ້າເມືອງ ມີສຸກຂະພາບແຂງແຮງ, ປົກປັກຮັກສາຄຸ້ມຄອງ ແລະ ເປັນສິລິມຸງຄຸນແກ່ບ້ານ ແລະ ປະຊາຊົນພາຍໃນບ້ານ ຕາມຄວາມເຊື່ອຖືຂອງເຜົ່າມາແຕ່ດົນນານ ພາຍຫຼັງທີ່ຫຼິ້ນບຸນປີໃໝ່ຂອງຕົນ ແລະ ກ່ອນທີ່ຈະລົງມືເຮັດການຜະລິດ ໃນລະດູການໃໝ່ ໂດຍສະເພາະ ແມ່ນການປູກ – ການລ້ຽງ ເພື່ອໃຫ້ຟ້າຝົນຕົກຖືກຕ້ອງຕາມລະດູການ ແລະ ເພື່ອໃຫ້ຜົນຜະຫຼິດຈະເລີນ ງອກງາມ ໄດ້ຮັບໝາກຮັບຜົນດີ

ການຈັດພິທີບາສີສູ່ຂວັນດັງກ່າວນີ້ ກໍ່ເພື່ອປະຕິບັດຕາມຮີດ 12 ຄອງ 14 ປະເພນີອັນດີງາມຂອງເຜົ່າ ທີ່ເຄີຍປະຕິບັດກັນມາແຕ່ດົນນານ, ທັງເປັນການປົກປັກຮັກສາວັດທະນະທໍາ, ຮີດຄອງປະເພນີ, ກິດຈະກໍາຕ່າງໆຂອງເຜົ່າ ເພື່ອໃຫ້ລຸ້ນລູກ – ລຸ້ນຫຼານ ໄດ້ສືບສານໃນການຈັດຕັ້ງປະຕິບັດຕໍ່ໆໄປ; ທັງເປັນການຮັດແໜ້ນຄວາມສາມັກຄີ ລະຫວ່າງ ການນໍາຂອງເມືອງ, ອົງການປົກຄອງບ້ານ ກໍ່ຄືປະຊາຊົນບັນດາເຜົ່າພາຍໃນເມືອງ ໃຫ້ເປັນປຶກແຜ່ນແໜ້ນໜາ.

ແຫຼ່ງຂ່າວ: ໜັງສືພິມບໍ່ແກ້ວ Bokeo Newspaper

ລົດໃຫຍ່ໃນວັນທີ 28/03/2022 ເວລາ09:30 ນາທີ ໄດ້ຮັບແຈ້ງເຫດເຂົ້າໝາຍເລກສຸກເສີນ 1624 ວ່າມີເຫດລົດໃຫຍ່ກັບລົດຈັກຕຳກັນ ເຂດບ້ານທາດຂາວ ເມືອງສີສັດຕະນາກ ແຂວງນະຄອນຫຼວງວຽງຈັນ.

ທີມກູ້ໄພນະຄອນຫຼວງ(ສູນສັ່ງການ) ຈຶ່ງໄດ້ອອກກວດສອບເຫດພົບຜູ້ບາດເຈັບ 02ຄົນ ເປັນເພດຍິງ ຜູ້ບາດເຈັບຄົນທີ 1 ອາການເບື້ອງຕົ້ນແມ່ນ: ກະທົບຂາເບື້ອງຂວາ (ໄດ້ນໍາສົ່ງໂຮງໝໍມະໂຫສົດ)

ຜູ້ບາດເຈັບຄົນທີ2 ອາການເບື້ອງຕົ້ນແມ່ນ: ກະທົບຫົວ(ກະໂຫຼກຫົວແຕກ) ເສຍຊີວິດຄາທີ່

ດັ່ງນັ້ນ,ໜ່ວຍກູ້ໄພນະຄອນຫຼວງ1624ຈຶ່ງໄດ້ມ້ຽນສົບຜູ້ເສຍຊີວິດແລ້ວນໍາສົ່ງໄປໄວ້ວັດເພື່ອໃຫ້ພີ່ນ້ອງເຮັດພິທີທາງສາສະໜາ.

ເມື່ອບໍ່ດົນມານີ້, ກະຊວງກະສິກຳ ແລະ ປ່າໄມ້ ໄດ້ອອກແຈ້ງການ ເລກທີ 0346/ກປ ກ່ຽວກັບການແບ່ງຂັ້ນຄຸ້ມຄອງ ໂຮງງານອຸດສາຫະກໍາປຸງແຕ່ງ ກະສິກໍາຂັ້ນຕົ້ນ, ໄມ້ ແລະ ເຄື່ອງປ່າຂອງດົງ ເພື່ອຄຸ້ມຄອງ, ຊຸກຍູ້, ສົ່ງເສີມ ແລະ ພັດທະນາ ບັນດາໂຮງງານອຸດສາຫະກໍາປຸງແຕ່ງກະສິກໍາຂັ້ນຕົ້ນ, ປຸງແຕ່ງໄມ້ ແລະ ເຄື່ອງປ່າຂອງດົງ ໃຫ້ຖືກຕ້ອງ, ສອດຄ່ອງ ຕາມພາລະບົດບາດໃໝ່ ຂອງຂະແໜງກະສິກໍາ ແລະ ປ່າໄມ້.

ລັດຖະບານ ໄດ້ຕົກລົງມອບວຽກງານອຸດສາຫະກໍາປຸງແຕ່ງ ກະສິກໍາ ແລະ ປ່າໄມ້ ໃຫ້ຂະແໜງກະສິກໍາ ແລະ ປ່າໄມ້ ຄຸ້ມຄອງ, ຊຸກຍູ້, ສົ່ງເສີມ ແລະ ພັດທະນາ ເຊິ່ງປະກອບມີ: ໂຮງສີເຂົ້າ, ໂຮງງານປຸງແຕ່ງແປ້ງມັນຕົ້ນ, ໂຮງງານປຸງແຕ່ງອ້ອຍ, ໂຮງງານຂ້າສັດ, ໂຮງງານຜະລິດອາຫານສັດ, ໂຮງງານຜະລິດວັກຊິນ, ຢາປາບສັດຕູພືດ, ຢາປົວພະຍາດ ເຄື່ອງມືສັດຕະວະແພດ, ໂຮງງານປຸງແຕ່ງໄມ້, ໂຮງເລື່ອຍ, ໂຮງຊອຍ, ໂຮງເຟີນີເຈີ ແລະ ໂຮງງານປຸງແຕ່ງເຄື່ອງປ່າຂອງດົງທຸກປະເພດ, ໂຮງງານປຸງແຕ່ງຢາງພາລາ, ໂຮງງານຜະລິດຝຸ່ນຊີວະພາບ ແລະ ອົງຄະທາດ, ໂຮງງານຄັດແຍກເມັດພັນ ແລະ ຫຸ້ມຫໍ່ ຜົນຜະລິດ ກະສິກໍາ ແລະ ໂຮງງານຜະລິດເຄື່ອງມື ແລະ ກົນຈັກກະສິກໍາ.

ດັ່ງນັ້ນເພື່ອສະກວດໃນການຄຸ້ມຄອງ, ກະຊວງກະສິກຳ ແລະ ປ່າໄມ້ຈຶ່ງມີຄຳສັ່ງແບ່ງຂັ້ນຄຸ້ມຄອງຄື: ກົມປູກຝັງ ຮັບຜິດຊອບຄຸ້ມຄອງ, ຊຸກຍູ້, ສົ່ງເສີມ ແລະ ພັດທະນາ ໂຮງສີເຂົ້າ, ໂຮງງານປຸງແຕ່ງແປ້ງມັນຕົ້ນ, ໂຮງງານປຸງແຕ່ງອ້ອຍ, ໂຮງງານຜະລິດຢາປາບສັດຕູພືດ, ໂຮງງານຜະລິດເຄື່ອງມື ແລະ ກົນຈັກຮັບໃຊ້ການປູກຝັງ-ກະສິກໍາ, ໂຮງງານປຸງແຕ່ງພືດ ແລະ ຜະລິດຕະພັນພືດອື່ນໆໃນຂອບເຂດທົ່ວປະເທດ; ກົມລ້ຽງສັດ ແລະ ການ ປະມົງ ຮັບຜິດຊອບຄຸ້ມຄອງ, ຊຸກຍູ້, ສົ່ງເສີມ ແລະ ພັດທະນາ ໂຮງງານຂ້າສັດ, ໂຮງງານຜະລິດອາຫານສັດ, ໂຮງງານຜະລິດຢາວັກຊິນ, ໂຮງງານຜະລິດຢາປົວສັດ ແລະ ເຄື່ອງມືສັດຕະວະແພດ, ໂຮງງານຜະລິດເຄື່ອງມື ແລະ ກົນຈັກຮັບໃຊ້ການລ້ຽງສັດ, ສັດຕະວະແພດ, ໂຮງປຸງແຕ່ງຜະລິດຕະພັນສັດ ແລະ ສັດນໍ້າ ໃນຂອບເຂດທົ່ວປະເທດ;ກົມປ່າໄມ້ ຮັບຜິດຊອບຄຸ້ມຄອງ, ຊຸກຍູ້, ສົ່ງເສີມ ແລະ ພັດທະນາ ໂຮງງານປຸງແຕ່ງໄມ້, ໂຮງເລື່ອຍ, ໂຮງຊອຍ, ໂຮງງານເຟີນີເຈີ, ໂຮງງານຜະລິດເຈ້ຍໂດຍນໍາໃຊ້ໄມ້ ເປັນວັດຖຸດິບ, ໂຮງງານເຟີນີເຈີແບບຄອບຄົວ, ໂຮງງານປຸງແຕ່ງຢາງພາລາ, ໂຮງງານປຸງແຕ່ງເຄື່ອງປ່າຂອງດົງ ແລະ ໂຮງງານຜະລິດຖ່ານ ໃນຂອບເຂດທົ່ວປະເທດ; ກົມຄຸ້ມຄອງ ແລະ ພັດທະນາທີ່ດີນກະສິກໍາ ຮັບຜິດຊອບ ຄຸ້ມຄອງ, ຊຸກຍູ້, ສົ່ງເສີມ ແລະ ພັດທະນາ ໂຮງງານຜະລິດຝຸ່ນ (ຝຸ່ນຊີວະພາບ, ຝຸ່ນອົງຄະທາດ ແລະ ຝຸ່ນວິທະຍາສາດ) ໃນຂອບເຂດທົ່ວປະເທດ; ກົມສົ່ງເສີມກະສິກໍາ ແລະ ສະຫະກອນ ຮັບຜິດຊອບຄຸ້ມຄອງ, ຊຸກຍູ້, ສົ່ງເສີມ ແລະ ພັດທະນາ ໂຮງງານປຸງແຕ່ງກະສິກໍາຂະໜາດນ້ອຍ ລະດັບຄອບຄົວ, ກຸ່ມ, ສະຫະກອນ ພ້ອມທັງ ສົ່ງເສີມເຕັກນິກການອົບ, ການຕາກ, ໂຮງຄັດແຍກເມັດພັນ, ຈັດເກຣດ, ຫຸ້ມຫໍ່ ແລະ ແປຮູບ-ປຸງຣົດ ຜົນຜະລິດກະສິກໍາ ເພື່ອສ້າງມູນຄ່າເພີ່ມ ໃນຂອບເຂດທົ່ວປະເທດ

ພ້ອມນີ້, ໃຫ້ກົມປ່າໄມ້ ແລະ ກົມກວດກາປ່າໄມ້ ຄົ້ນຄ້ວາກໍານົດແຜນດຸ່ນດ່ຽງ ໃນການສະໜອງວັດຖຸດິບທີ່ສາມາດສະໜອງຈາກປ່າທໍາມະຊາດ ແລະ ປ່າປູກ ລວມທັງເຄື່ອງປ່າຂອງດົງ. ຈາກນັ້ນ, ກໍານົດທ່າແຮງໃນການພັດທະນາ ອຸດສາຫະກໍາປຸງແຕ່ງໄມ້ ແລະ ເຄື່ອງປ່າຂອງດົງ ຄືນໃໝ່ ຢ່າງມີຈຸດສຸມ; ໃຫ້ກົມປ່າໄມ້ ແລະ ກວດກາປ່າໄມ້ ຄົ້ນຄວ້າກຳນົດແຜນດຸ່ນດ່ຽງ ໃນການສະໜອງວັດຖຸດິບ ທີ່ສາມາດສະໜອງຈາກປ່າທຳມະຊາດ ແລະ ປ່າປູກ ລວມທັງເຄື່ອງປ່າຂອງດົງ ຄືນໃໝ່ຢ່າງມີຈຸດສຸມ; ສະຖາບັນຄົ້ນຄວ້າກະສິກຳ, ປ່າໄມ້ ແລະ ພັດທະນາຊົນນະບົດຮັບຜິດຊອບຄຸ້ມຄອງ, ຊຸກຍູ້, ສົ່ງເສີມ ແລະ ພັດທະນາໂຮງງານ ແລະ ເຄື່ອງຄັດແຍກເມັດພັນ, ເຄື່ອງອົບເມັດພັນ, ສາງເຢັນເກັບເມັດພັນພືດ, ຄົ້ນຄວ້າ ແລະ ພັດທະນາເຕັກນິກ, ເຕັກໂນໂລຊີການປຸງແຕ່ງກະສິກຳ ແລະ ປຸງແຕ່ງໄມ້ ເພື່ອສະໜອງຂໍ້ມູນທາງດ້ານວິທະຍາສາດ, ເຕັກນິກໃໝ່ ແລະ ເຕັກໂນໂລຊີ ໃນການປຸ່ງແຕ່ງກະສິກຳ ແລະ ປຸງແຕ່ງໄມ້ ໃຫ້ໄດ້ຮັບຜົນດີຢ່າງມີປະສິດທິຜົນສູງ ແລະ ສຶກສາ, ຄົ້ນຄວ້າ, ວິເຄາະວິໄຈ ສະພາບການປຸ່ງແຕ່ງ ຂອງບັນດາໂຮງຈັກ ແລະ ໂຮງງານປຸງແຕ່ງກະສິກຳຂັ້ນຕົ້ນ, ປຸງແຕ່ງໄມ້ ແລະ ເຄື່ອງປ່າຂອງດົງ ໃນໄລຍະຜ່ານມາ ໂດຍຍົກໃຫ້ເຫັນໄດ້ດ້ານດີ, ດ້ານອ່ອນ, ຂໍ້ຄົງຄ້າງ ແລະ ວິທີທາງແກ້ໄຂ ພ້ອມທັງສະເໜີແຜນການໃນຕໍ່ໜ້າ ແລະ ທິດສີຂຽວ ແລະ ຍືນຍົງ.

ແຫຼ່ງຂ່າວ: ປະເທດລາວ

ເຈົ້າໜ້າທີ່ ປກຊ-ປກສ ສະກັດຈັບລົດຕ໊ອກໆບັນທຸກໂຄເຄນກຽມສົ່ງຂ້າມຊາຍແດນ

ວັນທີ 25 ມີນາ 2022, ໄດ້ມີກຸ່ມຄົນຈຳນວນໜຶ່ງ ໃຊ້ລົດຕ໊ອກໆ ຈຳນວນ 3 ຄັນ ບັນທຸກຢາເສບຕິດຫວັງສົ່ງຂ້າມຊາຍແດນ ແຕ່ເຈົ້າໜ້າທີ່ ປກຊ ແລະ ປກສ ປະຈຳດ່ານ ຕມ ດົງກະລໍ ສະກັດຈັບໄດ້.

ຕາມບົດລາຍງານຂອງເຈົ້າໜ້າທີ່ ປກສ ແຂວງຈຳປາສັກໃຫ້ຮູ້ວ່າ:

ໃນເວລາ 2:00 ( ກາງຄືນ ) ຂອງວັນທີ 25 ມີນາ 2022, ເຈົ້າໜ້າທີ່ຕຳຫຼວດ ຕມ ສົມທົບກັບເຈົ້າໜ້າທີ່ທະຫານ ຄໍ 526 ປະຈຳຢູ່ດ່ານດົງກະລໍ ເມືອງໂຂງ ໄດ້ພາກັນອອກລາດຕະເວນຕາມຂອບເຂດຊາຍແດນລາວ-ກຳປູເຈຍ ໄດ້ພົບເຫັນຄົນຂັບລົດຕ໊ອກໆຈຳນວນ 3 ຄັນ ຂີ່ມາຕາມເສັ້ນທາງແລວໄຟຟ້າແຮງສູງ ຢູ່ທາງຫຼັງດ່ານຊາຍແດນດົງກະລໍ ກຳລັງຈະມຸ່ງໜ້າໄປປະເທດກຳປູເຈຍ, ເຈົ້າໜ້າທີ່ ໄດ້ບອກໃຫ້ພວກກ່ຽວຢຸດລົດ ແລ້ວພວກກ່ຽວໄດ້ອາໃສຄວາມມືດຫຼົບໜີເຂົ້າປ່າ.

ຫຼັງຈາກນັ້ນ ເຈົ້າໜ້າທີ່ໄດ້ເຂົ້າກວດຄົ້ນລົດຕ໊ອກໆທັງ 3 ຄັນ ພົບເຫັນຢາເສບຕິດ ປະເພດໂຄເຄນ ຈຳນວນ 32 ກະສອບ ມີ 640 ຖົງ ນໍ້າໜັກ 640 ກິໂລກຼາມ. ເຈົ້າໜ້າທີ່ ຈຶ່ງໄດ້ຢືດລົດ ແລະ ຢາເສບຕິເສບຈຳນວນດັ່ງກ່າວໄວ້ເປັນຂອງກາງ, ສ່ວນຜູ້ຖືກຫາເຈົ້າໜ້າທີ່ກຳລັງເລັ່ງສືບສວນ-ສອບສວນ ເພື່ອນຳຈັບຕົວມາດຳເນີນຄະດີ.

ແຫຼ່ງຂ່າວ: ຄວາມສະຫງົບ

ພິທີເລີ່ມການກໍ່ສ້າງທາງເບຕົງ ຜ່ານພູຊ້າງນ້ອຍ ເມືອງຍົມມະລາດ ແຂວງຄພມ່ວນ ໄດ້ເປີດຂຶ້ນຢ່າງເປັນທາງການ ໃນວັນທີ 25 ມີນາ 2022 ໂດຍເປັນກຽດເຂົ້າຮ່ວມຂອງ ທ່ານ ມອນໄຊ ລາວມົວຊົ່ງ ກໍາມະການສໍາຮອງສູນກາງພັກ ເລຂາຄະນະບໍລິຫານງານສູນກາງຊາວໜຸ່ມ ປະຊາຊົນ ປະຕິວັດລາວ, ທ່ານ ປອ ແກ້ວອຸດອນ ບຸດສິງຂອນ ຮອງເຈົ້າແຂວງໆ ຄໍາມ່ວນ, ທ່ານ ບຸນທັນ ສຸວັນນະລາດ ເຈົ້າເມືອງໆ ຍົມມະລາດ ມີບັນດາທ່ານ ການນໍາຂັ້ນແຂວງ-ຂັ້ນເມືອງ ພະແນກການອ້ອມຂ້າງແຂວງ, ສະມາຄົມນັກທຸລະກິດໜຸ່ມ ຕະຫຼອດອົງການຈັດຕັ້ງບ້ານ ພ້ອມດ້ວຍພໍ່ແມ່ປະຊາຊົນ ເຂົ້າຮ່ວມຢ່າງເປັນຂະບວນ.

ທ່ານ ເຫຼັງຄໍາ ໄຊຄໍາຜັນ ຮອງເລຂາຄະນະບໍລິຫານງານຊາວໜຸ່ມແຂວງ ໄດ້ຂຶ້ນລາຍງານ ໂຄງການກໍ່ສ້າງທາງເບຕົງເສີມເຫຼັກຜ່ານພູຊ້າງນ້ອຍ ບ້ານວຽງຫຼວງ ເມືອງຍົມມະລາດ ຄັ້ງນີ້ວ່າ: ເສັ້ນທາງດັ່ງກ່າວ ເປັນເສັ້ນທາງໜຶ່ງທີ່ມີຄວາມເປັນມາທາງດ້ານປະຫວັດສາດຂອງເມືອງ, ຂອງແຂວງ ເປັນເສັ້ນທາງເຂົ້າເຂດຈຸດສຸມພັດທະນາຂອງເມືອງ, ປະກອບມີ 4 ບ້ານໃຫຍ່ ມີພົນລະເມືອງຫຼາຍກວ່າ 4.000 ຄົນ, ແຜນການກໍ່ສ້າງເສັ້ນທາງນີ້ເລີ່ມແຕ່ຕີນພູຊ້າງນ້ອຍບ້ານຕາດ ຜ່ານສັນພູໄປຫາເຂດບ້ານວຽງຫຼວງ ໜ້າທາງປູດ້ວຍເບຕົງເສີມເຫຼັກ ທີ່ມີຄວາມຍາວ 1.180 ແມັດ, ຄວາມກວ້າງໜ້າທາງ 3,5 ແມັດ, ຄວາມໜາ 0,23 ແມັດ, ພ້ອມດ້ວຍລະບົບຮ່ອງລະບາຍນໍ້າ 2 ຂ້າງທາງ ແລະ ຈຸດຫຼີກລົດ ຈຳນວນ 5 ຈຸດ.

ຄາດວ່າຈະໄດ້ໃຊ້ງົບປະມານເຂົ້າໃນການກໍ່ສ້າງ ປະມານ 1 ຕື້ ກວ່າກີບ; ເປັນໂຄງການນຳໃຊ້ງົບປະມານ ແລະ ທ່າແຮງລະດົມຈາກພາກສ່ວນຕ່າງໆ ໃນທົ່ວສັງຄົມ, ໃນການປະຕິບັດວຽກງານຕົວຈິງ ມາຮອດປະຈຸບັນ ໄດ້ຮັບການປະກອບສ່ວນຈາກອົງການຈັດຕັ້ງພັກ-ລັດ, ອົງການຈັດຕັ້ງສັງຄົມ, ຫົວໜ່ວຍທຸລະກິດ ຄື: ຮັບການປະກອບສ່ວນ ທ່ານ ຖາວອນ ອາດສະໝຸດ ຮອງປະທານສະມາຄົມນັກທຸລະກິດໜຸ່ມແຫ່ງຊາດລາວ ປະທານກຸ່ມບໍລິສັດລ່ອງແຈ້ງພັດທະນາ ຈໍາກັດ ຈໍານວນ ເງິນສົດ 50.000.000 ກີບ, ຮັບຈາກການນໍາເມືອງຍົມມະລາດ ປະກອບສ່ວນເງິນສົດ 20.000.000 ກີບ ແລະ ບໍລິສັດຄໍາມະນີ ເຈເນີຣອນ ເຊີວິສ ( K.G.S) ເງິນສົດ 15.000.000 ກີບ ມາຮອດປະຈຸບັນ ເງິນທີ່ລະດົມໄດ້ ທັງໝົດ 85.000.000 ກີບ.

ຈາກນັ້ນ, ຍັງໄດ້ຮັບຟັງການປະກອບຄໍາຄິດເຫັນຈາກ ທ່ານ ມອນໄຊ ລາວມົວຊົ່ງ ເລຂາຄະນະບໍລິຫານງານສູນກາງຊາວໜຸ່ມ ປະຊາຊົນ ປະຕິວັດລາວ, ທ່ານ ປອ ແກ້ວອຸດອນ ບຸດສິງຂອນ ຮອງເຈົ້າແຂວງໆ ຄໍາມ່ວນ ເຊິ່ງທັງສອງທ່ານ ໄດ້ຕີລາຄ່າສູງຕໍ່ການສ້າງຂະບວນການຄັ້ງນີ້ ຖືວ່າເປັນຂະບວນການ ທີ່ມີສ່ວນຮ່ວມຂອງທົ່ວປວງຊົນ ທີ່ຈະປະກອບສ່ວນເຫື່ອແຮງສະຕິປັນຍາ ປຸກລະດົມຂົນຂວາຍທ່າແຮງບົ່ມຊ້ອນ ນໍາພາສ້າງຂະບວນການດ້ວຍຄວາມເປັນເຈົ້າການຮ່ວມກັນ ໃນທົ່ວສັງຄົມ ໂດຍສະເພາະ ກໍາລັງຊາວໜຸ່ມຕະລຸມບອນ ຈະເປັນທ່າແຮງກໍາລັງຫຼັກ ປະຈັນບານຂັບເຄື່ອນວຽກງານຂະບວນການໃຫ້ມີຜົນສໍາເລັດຕາມຄາດໝາຍ ທີ່ກໍານົດໄວ້ ເພາະຍາມໃດ ຊາວໜຸ່ມກໍ່ມີຄວາມສາມັກຄີ ຮັກແພງ ຊ່ວຍເຫຼືອເຊິ່ງກັນ ແລະ ກັນ ທັງເປັນການປະກອບສ່ວນເຂົ້າໃນຂະບວນການແຂ່ງຂັນ “ຮັກຊາດ ແລະ ພັດທະນາ” ໃຫ້ເກີດຜົນປະໂຫຍດສູງສຸດ ແກ່ສັງຄົມ ແລະ ປະເທດຊາດ ດັ່ງກັບຄໍາຂວັນຂອງຊາວໜຸ່ມ ທີ່ວ່າ: “ບ່ອນໃດຍາກຊາວໜຸ່ມບຸກ ບ່ອນໃດທຸກຊາວໜຸ່ມຜ່ານຜ່າ ເມື່ອໃດຊາດຕ້ອງການຊາວໜຸ່ມຂານອາສາ”.

ຕອນທ້າຍ ຍັງໄດ້ມີການມອບ-ຮັບ ການອຸປະຖໍາ ຕໍ່ຂະບວນການດັ່ງກ່າວ ໂດຍມີການອຸປະຖໍາ ຈາກພາກສ່ວນການນໍາພັກ-ລັດ, ພະແນກການອ້ອມຂ້າງແຂວງ, ນັກທຸລະກິດ ພໍ່ຄ້າຊາວຂາຍ ຕະຫຼອດ ທົ່ວສັງຄົມ ທີ່ໄດ້ເຫັນຄວາມສໍາຄັນ ຕໍ່ຂະບວນການຄັ້ງນີ້ ເປັນກຽດຮັບໂດຍ ທ່ານ ບຸນທັນ ສຸວັນນະລາດ ເຈົ້າເມືອງໆ ຍົມມະລາດ; ພ້ອມດຽວກັນນັ້ນ ກໍ່ໄດ້ເປີດໂຄງການກໍ່ສ້າງທາງເບຕົງເສີມເຫຼັກຜ່ານພູຊ້າງນ້ອຍ ບ້ານວຽງຫຼວງ ເມືອງຍົມມະລາດ ຢ່າງເປັນທາງການ.

ແຫຼ່ງຂ່າວ: Khammouane News