ກອງພັນໃຫຍ່ 201 ຫັດແອບສວນສະໜາມ ກຽມສະຫຼອງວັນສ້າງຕັ້ງກົມກອງ ຄົບຮອບ 20 ປີ

ເພື່ອຮັບປະກັນໃຫ້ແກ່ການສະເຫຼີມສະຫຼອງວັນສ້າງຕັ້ງ ກອງພັນໃຫຍ່ 201 ຄົບຮອບ 20 ປີ (9 ເມສາ 2002-9 ເມສາ 2022) ທີ່ຈະມາເຖິງ ໃຫ້ມີຄວາມເປັນເອກະພາບ, ເຂັ້ມແຂງ, ສວຍງາມທາງດ້ານ ກ້ອນກຳລັງສວນສະໜາມພາກສ່ວນບຸກຄົນ. ໃນວັນທີ 7 ເມສາ ຜ່ານມານີ້, ກອງພັນໃຫຍ່ 201 ທີ່ຂຶ້ນກັບກອງພົນທີ 2 ໄດ້ຈັດຕັ້ງຫັດແອບສວນສະໜາມປະສານກ້ອນກຳລັງ, ມີຄະນະພັກ-ຄະນະບັນຊາກອງພັນໃຫຍ່, ພະແນກການ, ກອງພັນນ້ອຍ, ກອງຮ້ອຍເອກະລາດ, ໝວດ ທີ່ຂຶ້ນກັບ ພ້ອມດ້ວຍຄະນະຮັບຜິດຊອບຊີ້ນຳ, ອະນຸກຳມະການ, ພາກສ່ວນທີ່ກ່ຽວຂ້ອງ ແລະ ພະນັກງານ- ນັກຮົບທົ່ວກອງພັນໃຫຍ່ເຂົ້າຮ່ວມ. ສະຫາຍ ພັນຕີ ສຸບັນ ວັນນະເກດ ຫົວໜ້າຂະແໜງອົບຮົມ ໃຫ້ຮູ້ວ່າ:

ພາຍຫຼັງທີ່ໄດ້ຮັບການອະນຸມັດແຜນການຫັດແອບຈາກຂັ້ນເທິງແລ້ວ, ພວກເຮົາກໍໄດ້ຮີບຮ້ອນມອບໝາຍໜ້າທີ່ໃຫ້ບັນດາສະຫາຍພະນັກງານທີ່ຊ່ວຍວຽກຂະແໜງອົບຮົມ, ທັງຊີ້ນຳ ແລະ ຫ້າງຫາກະກຽມວຽກງານຮອບດ້ານ ເພື່ອກະກຽມຫັດແອບກ້ອນກຳລັງສວນສະໜາມ ນັບທັງລະບຽບບຸກຄົນ ກ້າວໄປເຖິງລະບຽບຮູບແຖວຕາມລຳດັບ ບາດກ້າວຂອງການຫັດແອບ, ສຳລັບການຫັດແອບສວນສະໜາມເພື່ອສະເຫຼີມສະຫຼອງວັນສ້າງຕັ້ງກອງພັນໃຫຍ່ 201 ຄົບຮອບ 20 ປີ ໃນຄັ້ງນີ້, ກົມກອງໄດ້ນຳໃຊ້ກຳລັງທັງໝົດ 630 ສະຫາຍ.

ເຊິ່ງໃນນັ້ນ, ມີກ້ອນກຳລັງພົນ 10 ກ້ອນ ຊຶ່ງປະກອບມີກ້ອນທຸງໄຊ, ກ້ອນພະນັກງານ 5 ອົງການ, ກ້ອນເຫຼົ່າຮົບເສນາຮັກ, ກ້ອນເຫຼົ່າຮົບຊ່າງແສງ, ກ້ອນເຫຼົ່າຮົບສື່ສານ, ກ້ອນເຫຼົ່າຮົບສືບຂ່າວ, ກ້ອນສະຫະພັນແມ່ຍິງ, ກ້ອນກອງພັນນ້ອຍທະຫານຮາບທີ 3, ກ້ອນກອງພັນນ້ອຍທະຫານຮາບ 613, ກ້ອນກອງພັນນ້ອຍທະຫານຮາບ 404.

ແຫຼ່ງຂ່າວ: ປະຊາຊົນ

ໃນວັນທີ 30 ມີນາ 2022, ກອງພັນປ້ອງກັນເຄື່ອນທີ່ ປກສ ແຂວງຫົວພັນ ໄດ້ຈັດພິທີສຶກສາອົບຮົມ ພວກກຸ່ມແກ້ງຊາວໜຸ່ມ-ໄວຫນຸ່ມນັກຮຽນ ທີ່ໄດ້ສ້າງຄວາມບໍ່ສະຫງົບ-ຄວາມບໍ່ເປັນລະບຽບຮຽບຮ້ອຍຕໍ່ ສັງຄົມ ແລະ ແກ້ໄຂພາຫະນະລົດຈັກທີ່ພວກຊາວໜຸ່ມ ແລະ ນັກຮຽນໄດ້ຂັບຂີ່ລົດຈັກກວນເມືອງໂດຍ ການເປັນປະທານຂອງ ພັທ ພັນວອນ ບຸນສະຫວັນ ຮອງຫົວຫນ້າກອງພັນປ້ອງກັນເຊື້ອທີ່ ປກສ ແຂວງ, ເຂົ້າຮ່ວມມີພໍ່-ແມ່ຜູ້ປົກຄອງ, ຄູ-ອາຈານ ຂອງເດັກ ແລະ ເຈົ້າຫນ້າທີ່ພາກສ່ວນກ່ຽວຂ້ອງ.

ເຈົ້າໜ້າທີ່ ໃຫ້ຮູ້ວ່າ: ອີງຕາມຄໍາສັ່ງຂອງທ່ານເຈົ້າແຂວງ ສະບັບເລກທີ 34/ຈຂ, ລົງວັນທີ 2 ກັນຍາ 2016 ວ່າດ້ວຍການຕ້ານ ແລະ ແກ້ໄຂປະກົດ ການຫຍໍ້ທໍ້ໃນສັງຄົມທົ່ວແຂວງຫົວພັນ, ໃນຄັ້ງວັນທີ 20 ມັງກອນ 2022 ໄດ້ມີເຫດການພວກກຸ່ມແກ້ງ, ຊາວໜຸ່ມ-ໄວໜຸ່ມ ແລະ ນັກຮຽນໄດ້ຂັບ ຂີ່ລົດກວນເມືອງ ເຊິ່ງໄດ້ນໍາໃຊ້ພາຫະນາລົດຈັກເປັນກຸ່ມແກງເຊິ່ງໄດ້ສ້າງຄວາມບໍ່ສະຫງົບ, ຄວາມບໍ່ເປັນລະບຽບຮຽບຮ້ອຍ ຢູ່ໃນສັງຄົມ ແລະ ການກໍ່ກວນສ້າງຄວາມບໍ່ສະຫງົບໃນຄັ້ງນີ້ແມ່ນນໍາໃຊ້ພາຫະນະລົດຈັກທັງຫມົດແມ່ນ 10 ຄັນ.

ຜ່ານການຈັດຕັ້ງປະຕິບັດໜ້າທີ່ວິຊາສະເພາະ ຈຶ່ງສາມາດຮູ້ໄດ້ພວກກຸ່ມແກ້ງຊາວຫນຸ່ມ-ໄວຫນຸ່ມ ແລະ ນັກຮຽນໃນເບື້ອງຕົ້ນ ຈໍານວນ 2 ຄົນ ຄື: ທ້າວ ມິກ ແລະ ທ້າວ ຈັນສະຫມອນ ພ້ອມດ້ວຍລົດຈັກ 2 ຄັນ ເປັນປະເພດລົດແຕ່ງ 1 ຄັນ; ຜ່ານການສືບສວນ-ສອບສວນຕົວຈິງ, ເຈົ້າໜ້າທີ່ພວກເຮົາສາ ມາດຮູ້ໄດ້ກຸ່ມ ແກ້ງຮ່ວມຂະບວນການກໍ່ກວນ, ກໍ່ຄວາມວຸ້ນວາຍ-ຄວາມບໍ່ເປັນລະບຽບຮຽບຮ້ອຍ ໃນຄັ້ງນີ້ແມ່ນມີ ທັງຫມົດ 19 ຄົນ ພາຫະນະລົດຈັກ 10 ຄັນ, ເປັນປະເພດລົດແຕ່ງທີ່ດັດແປງສະພາບເຕັກນິກ 3 ຄັນ, ເຊິ່ງ ເຈົ້າຫນ້າທີ່ໄດ້ໃຫ້ປ່ຽນອຸປະກອນທີ່ດັດແປງໃຫ້ກັບຄືນສະພາບເດີມ ຈຶ່ງອະນຸ ຍາດໃຫ້ແກ້ໄຂເອົາລົດອອກໄປ ໄດ້, ເຊິ່ງລົດທັງ 10 ຄັນແມ່ນໄດ້ແກ້ໄຂຫມົດແລ້ວ ແລະ ໄດ້ສຶກສາອົບຮົບສ້າງບົດບັນທຶກນໍາອີກ.

ແຫຼ່ງຂ່າວ: ຄວາມສະຫງົບ

ເບີກຈ່າຍເງິນອຸດໜູນແບບມີເງື່ອນໄຂໃຫ້ແກ່ຜູ້ໄດ້ຮັບຜົນປະໂຫຍດ (ແມ່ຍິງຖືພາ ແລະ ເດັກນ້ອຍ 0-2 ປີ) ຂອງໂຄງການຫລຸດຜ່ອນຄວາມທຸກຍາກ ແລະ ການຂາດໂພຊະນາການໃນເຂດຊົນນະບົດ (ລພຊ).

ຖວທ ເມືອງ ຫລາ ພິທີເບີກຈ່າຍເງິນອຸດໜູນເເບບມີເງື່ອນໄຂໃຫ້ແກ່ຜູ້ໄດ້ຮັບຜົນປະໂຫຍດ (ແມ່ຍິງຖືພາ ແລະ ເດັກນ້ອຍ 0-2 ປີ) ຂອງໂຄງການຫລຸດຜ່ອນຄວາມທຸກຍາກ ແລະ ການຂາດໂພຊະນາການໃນເຂດຊົນນະບົດ (ລພຊ) ເຊິ່ງໄດ້ຈັດຂຶ້ນໃນຕອນເຊົ້າ ຂອງວັນທີ 6-8 ເມສາ 2022 ຢູ່ທີ່ຫ້ອງການບ້ານລາວຫວ່າງ ກຸ່ມອາໂນ ເມືອງຫລາ ແຂວງອຸດົມໄຊ ໂດຍການເປັນປະທານຂອງ ທ່ານ ຫຸມພັນ ບຸບຜາຄຳ ກຳມະການພັກແຂວງ ເລຂາພັກເມືອງເຈົ້າເມືອງ-ເມືອງຫລາ, ເປັນກຽດເຂົ້າຮ່ວມຂອງ ທ່ານ ອ່ອນແກ້ວ ອຸ່ນອາລົມ ຮອງເຈົ້າແຂວງອຸດົມໄຊ, ມີທ່ານຮອງພະແນກກະສິກຳແຂວງ, ຫົວໜ້າຫ້ອງການກະສິກຳ ແລະ ປ່າໄມ້ ເມືອງ, ຜູ້ປະສານງານໂຄງການຫລຸດຜ່ອນຄວາມທຸກຍາກ ແລະ ຂາດໂພສະນາການໃນເຂດຊົນນະບົດ (ລພຊ) ຂັ້ນແຂວງ-ຂັ້ນເມືອງ, ບໍລິສັດສະຕາໂທລະຄົມ, ພະນັກງານວິຊາການຈາກຂະແໜ່ງການທີ່ກ່ຽວຂ້ອງ, ເລຂາພັກບ້ານ-ເລຂາພັກກຸ່ມ, ຕະຫລອດຮອດພໍ່ແມ່ປະຊາຊົນເຂົ້າຮ່ວມ.

ໃນພິທີໄດ້ຮັບຟັງການລາຍງານ ການເຄື່ອນໄຫວວຽກງານຂອງໂຄງການຫຼຸດຜ່ອນຄວາມທຸກຍາກ ແລະ ຂາດໂພຊະນາການໃນເຂດຊົນນະບົດ ຫລື (ລພຊ) ແຂວງອຸດົມໄຊ ແລະ ມອບເງິນນະໂຍບາຍໃຫ້ແມ່ຍິງຖືພາ, ແມ່ຍິງມີລູກນ້ອຍອາຍຸບໍ່ເກີນ 2 ປີ ພາຍໃນບ້ານເປົ້າໝາຍຂອງໂຄງການ.

ໃນນີ້, ສຳລັບ ບ້ານລາວຫວ່າງ ກຸ່ມອາໂນ ເປັນບ້ານໜຶ່ງທີ່ໄດ້ຮັບການຊ່ວຍເຫລືອຈາກໂຄງການ ລພຊ , ພາຍໃນບ້ານມີຄົວເຮືອນທັງໝົດ 81 ຄົວເຮືອນ, ມີພົນລະເມືອງທັງໝົດ 567 ຄົນ ຍິງ 299 ຄົນ ມີກຸ່ມເປົ້າໝາຍທັງໝົດ 44 ຄົນ ຍິງ ຖືພາ 12 ຄົນ, ມີຜູ້ທີ່ໄດ້ຮັບຜົນປະໂຫຍດທັງໝົດ 42 ຄົນ ຍິງ 12 ຄົນ ໄດ້ຮັບເງິນຕົວຈິງ 20 ຄົນ ເພື່ອນຳເງິນໄປໃຊ້ຈ່າຍຊື້ອາຫານທີ່ມີໂພຊະນາການຕໍ່ຮ່າງກາຍໃນໄລຍະຖືພາ ແລະ ແມ່ຍິງມີລູກນ້ອຍ ໄດ້ກິນອາຫານຢ່າງໜ້ອຍ 4 ຫມວດ ໃນຫມວດອາຫານທີ່ແພດກຳນົດ ແລະ ໃຫ້ໃຊ້ຈ່າຍເປັນຄ່າເດີນທາງໄປກວດສຸຂະພາບ, ຝາກທ້ອງຕາມສະຖານທີ່ບໍລິການດ້ານສາທາລະນະສຸກຕ່າງໆ ເງິນນະໂຍບາຍແບບມີເງື່ອນໄຂແມ່ນໄດ້ເບີກຈ່າຍເປັນຮອບຄື:

2 ເດືອນຕໍ່ຄັ້ງ 1 ຂອງທຸກໆວັນທີ 26 ຂອງເດືອນທີ 2 ແມ່ຍິງຖືພາ ແລະ ແມ່ຍິງມີລູກນ້ອຍອາຍຸຕໍ່າກວ່າ 2 ປີ ໄດ້ຮັບແມ່ນປະຕິບັດຕາມເງື່ອນໄຂຂອງໂຄງການຫຼຸດຜ່ອນຄວາມທຸກຍາກ ແລະ ຂາດໂພຊະນາການໃນເຂດຊົນນະບົດ ໂດຍຈະໄດ້ຮັບເງິນນະໂຍບາຍແບບມີເງື່ອນ ເດືອນລະ 180.000 ກີບ ຕໍ່ລູກ 1 ຄົນ ນັບແຕ່ມື້ຖືພາຈົນລູກຮອດອາຍຸ 2 ປີ ຖ້າຫາກມີລູກແຝດຈະໄດ້ຄູນຕາມຈຳນວນເງິນທີ່ໄດ້ຮັບໃນແຕ່ລະເດືອນຕາມເງື່ອນໄຂທີ່ໂຄງການໄດ້ກຳນົດໄວ້ ໂດຍຈ່າຍຜ່ານຕົວແທນຜູ້ໃຫ້ບໍລິການຢູມັນນີ (U-money ) ຂອງບໍລິສັດສະຕາໂທລະຄົມເປັນເງິນສົດໃນທຸກໆ 2 ເດືອນ ສຳລັບແຂວງອຸດົມໄຊ ມີເປົ້າໝາຍຜູ້ທີ່ໄດ້ຮັບເງິນນະໂຍບາຍ ຈາກໂຄງການດັ່ງກ່າວ ມີ 2 ເມືອງຄື: ເມືອງນາໝໍ້ 63 ບ້ານ ແລະ ເມືອງຫລາ 45 ບ້ານ ການຈັ້ດຕັ້ງປະຕິບັດຂອງໂຄງການແມ່ນເລີ່ມແຕ່ປີ 2020-2024 ໂອກາດດັ່ງກ່າວ ທ່ານ ອ່ອນແກ້ວ ອຸ່ນອາລົມ ຮອງເຈົ້າແຂວງອຸດົມໄຊ ໄດ້ໃຫ້ກຽດໂອ້ລົມຕໍ່ພິທີ ພ້ອມໄດ້ຮຽກຮ້ອງຕໍ່ພໍ່ແມ່ປະຊາຊົນ ຜູ້ທີ່ໄດ້ຮັບຜົນປະໂຫຍດໃນຄັ້ງນີ້ ຈົ່ງນຳເອົາເງິນຊ່ວຍເຫຼືອດັ່ງກ່າວນີ້ນຳໄປໝູນໃຊ້ໃຫ້ເກີດປະໂຫຍດແກ້ເດັກນ້ອຍ ແລະ ແມ່ຍິງຖືພາ ໃນການເຂົ້າເຖິງໂຮງໝໍ ຫລື ສຸກສາລະນະສຸກ ແລະ ຊື້ອາຫານທີ່ມີໂພຊະນາການເພື່ອບຳລຸງເດັກນ້ອຍໃຫ້ໄດ້ຮັບໂພຊະນາການທີ່ດີ.

ແຫຼ່ງຂ່າວ: Media Laos

ສະຫຼຸບວຽກງານຈັດຕັ້ງທົ່ວປະເທດ ຄັ້ງທີ 2 ອົງການໄອຍະການປະຊາຊົນ

ໃນວັນທີ 7 ເມສາ 2022, ທີ່ສູນການຮ່ວມມື ແລະ ຝຶກອົບຮົມ ນະຄອນຫລວງວຽງຈັນ ອົງການໄອຍການປະຊາຊົນສູງສຸດ(ອອປສ) ໄດ້ຈັດກອງປະຊຸມສະຫຼຸບຕີລາຄາວຽກງານຈັດຕັ້ງທົ່ວປະເທດ ຄັ້ງທີ 2 ຂອງອົງການໄອຍະການປະຊາຊົນ ໃນໄລຍະ 5 ປີ ຜ່ານມາ ໂດຍການເປັນປະທານຂອງ ສະຫາຍ ໄຊຊະນະ ໂຄດພູທອນ ກຳມະການສູນກາງພັກ, ຫົວໜ້າອົງການໄອຍະການປະ ຊາຊົນສູງສຸດ, ມີບັນດາຄະນະພັກ-ຄະນະນຳ ອົງການໄອຍະການປະຊາຊົນສູງສຸດ, ອົງການໄອຍະການທະຫານຂັ້ນສູງ, ອົງການໄອຍະການປະຊາຊົນພາກ, ອົງການໄອຍະການປະຊາຊົນແຂວງ-ນະ ຄອນຫຼວງ, ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ໃນໂອກາດດັ່ງກ່າວ, ສະຫາຍ ໄຊຊະນະ ໂຄດພູທອນ ໄດ້ກ່າວວ່າ: ກອງປະຊຸມຄັ້ງນີ້ ບັນດາຜູ້ເຂົ້າຮ່ວມຈະໄດ້ພ້ອມກັນສະຫຼຸບຕີລາຄາວຽກງານຈັດຕັ້ງ, ກໍ່ສ້າງພັກ-ພະນັກງານ ໃນໄລຍະ 5 ປີ ຜ່ານມາ ແລະ ກໍານົດທິດທາງໜ້າທີ່ 5 ປີ ຕໍ່ໜ້າ ໃຫ້ກ້າວສູ່ບາດລ້ຽວທີ່ກ້າວໜ້າ ແລະ ທັນສະໄໝ ຂອງວຽກງານໄອຍະການປະຊາຊົນ, ສ້າງຄວາມເປັນເອກະພາບທາງດ້ານທັດສະນະ, ທາງດ້ານຄວາມຮັບຮູ້ ແລະ ທາງດ້ານການຈັດຕັ້ງຜັນຂະຫຍາຍແນວທາງການຈັດຕັ້ງຂອງພັກ ທີ່ໄດ້ກໍານົດຢູ່ໃນມະຕິກອງປະຊຸມໃຫຍ່ ຄັ້ງທີ XI ຂອງພັກ, ເນື້ອໃນກອງປະຊຸມວຽກງານຈັດຕັ້ງທົ່ວປະເທດ ຄັ້ງທີ XI ໃຫ້ກາຍເປັນແຜນງານ, ໂຄງການ ແລະ ແຜນກິດຈະກໍາອັນລະອຽດ ໃນຂົງເຂດວຽກງານໄອຍະການປະຊາຊົນ.ສະຫາຍ ຈັນທະບູນ ເພັງຄໍາໃສ ຫົວໜ້າກົມຈັດຕັ້ງ-ພະນັກງານ ໄດ້ຊີ້ໃຫ້ເຫັນວ່າ:

ໃນໄລຍະ 5 ປີ (2016-2020), ຄະນະພັກອົງການໄອຍະການປະຊາຊົນສູງສຸດ ໄດ້ນໍາພາສະມາຊິກພັກ, ພະນັກງານພາຍໃນຄວາມຮັບຜິດຊອບຂອງຕົນ ເຂົ້າຮ່ວມຄົ້ນຄວ້າ, ເຊື່ອມຊຶມມະຕິກອງປະຊຸມໃຫຍ່ ຄັ້ງທີ X ຂອງພັກ, ຈັດຕັ້ງຜັນຂະຫຍາຍເນື້ອໃນວຽກງານຈັດຕັ້ງທົ່ວປະເທດ ຄັ້ງທີ X, ມະຕິກອງປະຊຸມໃຫຍ່ ຄັ້ງທີ IV ຂອງອົງຄະນະພັກ ອົງການໄອຍະການປະຊາຊົນສູງສຸດ, ຄໍາສັ່ງ, ຄໍາແນະນໍາ, ກົດລະບຽບຂອງພັກ, ກົດຫມາຍຂອງລັດໃນແຕ່ລະໄລຍະ ແລະ ເຂົ້າຮ່ວມຮັບຟັງການເຜີຍແຜ່ມູນເຊື້ອວັນສໍາຄັນຕ່າງໆຂອງພັກ ຂອງຊາດ ແລະ ສາກົນ ຈໍານວນ 9.223 ເທື່ອຄົນ, ຍິງ 3.660 ເທື່ອຄົນ, ດໍາເນີນຊີ ວິດການເມືອງປັບປຸງປົວແປງພາຍໃນພັກ ປະຈໍາປີ 2017 ແລະ 2019 ແນໃສ່ສ້າງທັດສະນະຫັນ ປ່ຽນຄຸນທາດການເມືອງຂອງສະມາຊິກພັກ ໄປສູ່ຄຸນນະພາບ;

ຄະນະພັກໄດ້ຖືເອົາວຽກງານສຶກສາອົບ ຮົມແນວຄິດຂອງພະນັກງານເປັນກົກ ເພື່ອກະຕຸກຊຸກຍູ້ສະມາຊິກພັກ, ພະນັກງານ ໃຫ້ມີຄວາມຕື່ນຕົວຕໍ່ແນວທາງການເມືອງຂອງພັກ, ມີຄຸນທາດການເມືອງໜັກແໜ້ນ, ມີຄຸນສົມບັດສິນທໍາປະຕິວັດ, ມີຄວາມອຸ່ນອ່ຽນ, ທຸ່ນທ່ຽງເຊື່ອໝັ້ນຕໍ່ການນໍາພາຂອງພັກ ສະແດງອອກສະມາຊິກພັກທຸກສະຫາຍຍັງສືບຕໍ່ ເປັນແບບຢ່າງທີ່ດີໃຫ້ແກ່ມະຫາຊົນ ແລະ ປະຕິບັດໜ້າທີ່ການເມືອງຂອງຕົນດ້ວຍຜົນສໍາເລັດ.

ອອປສ ໄດ້ຖືເປັນສໍາຄັນ ໃນການພັດທະນາບຸກຄະລາກອນທາງດ້ານຈໍານວນ, ກໍຄືຄຸນະພາບກ່ອນອື່ນແມ່ນໄດ້ກໍານົດ ຕໍາແຫນ່ງງານຕາມຄວາມຮຽກຮ້ອງຕ້ອງການ ຂອງໜ້າທີ່ການເມືອງໃນລະ ບົບອົງການໄອຍະການປະຊາຊົນ;

ຈາກນັ້ນ, ຈຶ່ງໄດ້ສ້າງແຜນບັນຈຸສັບຊ້ອນພະນັກງານ ເພື່ອຂໍຕົວເລກລັດຖະກອນແຕ່ລະສົກງົບປະມານຈາກລັດຖະບານ.

ຮອດປີ 2020 ລັດຖະກອນໃນທົ່ວລະບົບອົງ ການໄອຍະການປະຊາຊົນທັງໝົດມີ 1.680 ຄົນ ຍິງ 605 ຄົນ, ໃນນີ້ເປັນ ພະນັກງານໄອຍະການປະຊາຊົນ ແລະ ຜູ້ຊ່ວຍ 704 ຄົນ, ຍິງ 156 ຄົນ, ລະບົບອົງການໄອຍະການປະຊາຊົນ ສາມາດຮັບຮອງແຜນກໍານົດພະນັກງານນໍາພາ-ຄຸ້ມຄອງສໍາເລັດ ໃນຂອບເຂດທົ່ວປະເທດແຕ່ ປີ 2016-2020.

ດ້ານວຽກງານຂະບວນການແຂ່ງຂັນຮັກຊາດ ແລະ ພັດທະນາໃນທົ່ວລະບົບອົງການໄອຍະການປະຊາຊົນໄດ້ຮັບການຈັດຕັ້ງປະຕິບັດຢ່າງກວ້າງຂວາງແຕ່ສູນກາງຮອດທ້ອງຖິ່ນ ໂດຍເອົາເນື້ອໃນແຂ່ງຂັນ 3 ມີ 4 ຮັບປະກັນເປັນ ການຊຸກຍູ້ຂະບວນການ ແລະ ເປັນໄມ້ຫລາວັດແທກໃນການຕີລາ ຄາປະເມີນຜົນການ ປະຕິບັດຫນ້າທີ່ວຽກງານຂອງສະມາຊິກພັກ, ພະນັກງານ-ລັດຖະກອນແຕ່ລະຄົນ.

ເນື່ອງໃນວັນສະເຫຼີມສະຫຼອງວັນສ້າງຕັ້ງອົງການໄອຍະການປະຊາຊົນສູງສຸດ ຄົບຮອບ 30 ປີ ມີບຸກຄົນ ແລະ ກົມກອງດີເດັ່ນທີ່ຮັບການຍ້ອງຍໍຄື ຫຼຽນໄຊອິດສະຫລະI, ຫຼຽນໄຊແຮງງານ, ຫຼຽນກາແຮງງານ, ໃບຍ້ອງຍໍລັດຖະບານ ແລະ ໃບຍ້ອງຍໍຫົວໜ້າອົງການໄອຍະການປະຊາຊົນສູງສຸດ ຈຳນວນຫຼາຍ.

ຂໍ້ມູນ: ປະເທດລາວ

ທ່ານຮອງເຈົ້າແຂວງຫຼວງພະບາງຕ້ອນຮັບຄະນະຊ່ຽວຊານຈາກສູນມໍລະດົກໂລກ ອົງການອີໂກໂມສ.

ໃນຕອນບ່າຍຂອງ ວັນທີ 6 ເມສາ 2022 ນີ້, ທ່ານ ບຸນເລືອມ ມະນີວົງ ຮອງເຈົ້າແຂວງໆຫຼວງພະບາງໃຫ້ກຽດຕ້ອນຮັບຄະນະຊ່ຽວຊານຈາກສູນມໍລະດົກໂລກ ແລະ ອົງການອີໂກໂມສ (ICOMOS ) ພ້ອມດ້ວຍຄະນະ ກຳມະການລະດັບທອງຖິ່ນເພື່ອມໍລະດົກໂລກ ທີ່ໄດ້ລົງເຄື່ອນໄຫວຕິດຕາມ ກວດກາສະພາບ ການປົກປັກສາເມືອງມໍລະດົກໂລກແຂວງຫຼວງພະບາງ ແລະຕິດຕາມການເຄື່ອນໄຫວກອງທຶນມໍລະດົກໂລກ.

ການພົບກັນໃນຄັ້ງນີ້ ແມ່ນມີປະຈຸດປະສົງ ເພື່ອແນໃສ່ໃນການຮ່ວມມື, ປົກປັກຮັກສາວັນທະນະທຳ ພາຍໃນແຂວງຫຼວງພະບາງໃຫ້ເປັນມໍລະດົກໂລກ ຄະນະຊ່ຽວຊານຈາກ ສູນມໍລະດົກໂລກເຊິ່ງເປັນທີ່ປຶກສາ ຂອງອົງການອຸຍແນັສໂກ (UNESCO) ຈະມາປະເມີນຕິດຕາມ, ກວດກາສະພາບການປົກປັກຮັກສາເມືອງມໍຣະດົກໂລກຫຼວງພະບາງ ຢ່າງຮອບດ້ານ.

ເປັນຕົ້ນແມ່ນການປະຕິບັດນະໂຍບາຍການອານຸລັກມໍຣະດົກໂລກ, ລະບຽບການທີ່ກ່ຽວຂ້ອງ ການເຄື່ອນໄຫວກອງທຶນມໍຣະດົກໂລກ ແລະ ບັນດາໂຄງການພັດທະນາພື້ນຖານໂຄງລາງເຊັ່ນ: ເຄື່ອນໄຟຟ້ານ້ຳຂອງແຂວງຫຼວງພະບາງ, ໂຄງການກໍ່ສ້າງຕາຝັັ່ງກັນເຈື່ອນແຄມນ້ຳຄານ, ໂຄງການບູລະນະຂົວນ້ຳຄານເກົ່າ ແລະວຽກງານອື່ນອີກ.

ໃນການພົບປະຄັ້ງນີ້ທ່ານຮອງເຈົ້າແຂວງໄດ້ຕີລາຄາສູງຕໍ່ການມາຢ້ຽມຢາມແຂວງຫຼວງພະບາງຂອງຄະນະຊ່ຽວຊານ ຈາກສູນມໍຣະດົກໂລກ ທີ່ໄດ້ເປັນຫ່ວງເປັນໃຍຕໍ່ການພັດທະນາຂອງແຂວງກໍຄືການພັດທະນາເຂດມໍລະດົກໂລກ ໃຫ້ຢູ່ໃນກອບຂອງອົງການອົງການອຸຍແນັສໂກກໍານົດໄວ້.

ພ້ອມນີ້, ອຳນາດການປົກຄອງແຂວງຫຼວງພະບາງຕ້ອງໄດ້ເອົາໃຈໃສ່ເປັນພິເສດຕໍ່ກັບພາລະບົດບາດ ຂອງການເປັນມໍຣະດົກໂລກ. ເຊິ່ງທາງຄະນະຊ່ຽວຊານຈະຊ່ວຍລະດົມທຶນ ທາງດ້ານງົມປະປານແກ່ຫ້ອງການມໍລະດົກໂລກ ໂດຍສະເພາະກົນໄກກອງທຶນມໍຣະດົກໂລກ ຊ່ວຍ ສປປ ລາວ ໂດຍສະເພາະກໍແມ່ນເມືອງມໍລະດົກໂລກຫຼວງພະບາງ.

ພາບ-ຂ່າວ: ຂ່າວສານຫຼວງພະບາງ