ທ່ານ ສອນໄຊ ສີພັນດອນ ກຳມະການກົມການເມືອງສູນກາງພັກ ຮອງນາຍົກລັດຖະມົນຕີ ໄດ້ເຄື່ອນໄຫວພົບປະໂອ້ລົມ ອົງການປົກຄອງ ແລະ ປະຊາຊົນບ້ານວັງເຕົ່າ ເມືອງໂພນທອງ ແຂວງຈຳປາສັກ ໃນວັນທີ 18 ເມສານີ້ ໂດຍມີ ທ່ານ ວິໄລວົງ ບຸດດາຄໍາ ກໍາມະການສູນກາງພັກ ເລຂາພັກແຂວງ ເຈົ້າແຂວງຈໍາປາສັກ ພ້ອມດ້ວຍຄະນະນຳຂອງແຂວງ ແລະ ເມືອງໂພນທອງ, ມີອຳນາດການປົກຄອງ, ຕະຫຼອດຮອດພໍ່ແມ່ປະຊາຊົນ ບ້ານພັດທະນາວັງເຕົ່າ ໃຫ້ການຕ້ອນຮັບ.

ໂອກາດດັ່ງກ່າວ, ທ່ານຮອງນາຍົກລັດຖະມົນຕີ ພ້ອມຄະນະ ໄດ້ຮັບຟັງການລາຍງານໂດຍຫຍໍ້ ຕໍ່ ການນຳພາ-ຊີ້ນຳວຽກງານຮອບດ້ານ ຂອງຄະນະບໍລິຫານງານພັກເມືອງໂພນທອງ ແລະ ຮັບຟັງລາຍງານຂອງຄະນະພັກຮາກຖານບ້ານວັງເຕົ່າ ໂດຍສະເພາະແມ່ນກ່ຽວກັບວຽກງານປ້ອງກັນຊາດ-ປ້ອງກັນຄວາມສະຫງົບ ແລະ ວຽກງານເສດຖະກິດ, ວັດທະນະທຳ-ສັງຄົມ ຊຶ່ງຜ່ານມາຄະນະພັກ, ອົງການປົກຄອງບ້ານ ໄດ້ນຳພາປັບປຸງການຈັດຕັ້ງໃນສອງກຳລັງຢ່າງໃກ້ຊິດ, ເປັນປະຈຳ ແລະ ຕໍ່ເນື່ອງ ເພື່ອເຮັດໃຫ້ສອງກຳລັງມີຄວາມເຂັ້ມແຂງ ທາງດ້ານສິລະປະຍຸດ-ຍຸດທະວິທີ ເພື່ອປ້ອງກັນບ້ານ ແລະ ເອົາໃຈໃສ່ປັບປຸງວຽກງານແນວລາວສ້າງຊາດບ້ານ, ແນວໂຮມບ້ານ, ໃນການຊຸກຍູ້ສົ່ງເສີມ, ສຶກສາອົບຮົມໄວໜຸ່ມ-ຊາວໜຸ່ມ ປະຕິບັດຮີດຄອງປະເພນີ ອັນດີງາມຂອງຊາດ.

ຊຸກຍູ້ປະຊາຊົນສ້າງເສດຖະກິດຄອບຄົວ ດ້ວຍການປູກເຂົ້ານາປີເປັນອາຊີບຕົ້ນຕໍ, ແລ້ວຫັນມາປູກຝັງລ້ຽງສັດ ແລະ ຫັດຖະກຳຈັກສານເປັນສຳຮອງ, ປັດຈຸບັນມີ 246 ຄອບຄົວ ເຮັດຫັດຖະກຳຖັກຟອຍແຂມ, ໃນນັ້ນ ມີ 23 ຄອບຄົວ ຕົວແບບ, ແລະ ຜະລິດຕະພັນດັ່ງກ່າວໄດ້ຮັບຮອງເປັນໜຶ່ງເມືອງ ໜຶ່ງຜະລິດຕະພັນ ຫຼື ODOP.

ໂອກາດນີ້, ທ່ານ ສອນໄຊ ສີພັນດອນ ກໍໄດ້ຍ້ອງຍໍຊົມເຊີຍການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຂອງຄະນະພັກ-ອົງການປົກຄອງທຸກຂັ້ນ ທີ່ໄດ້ເອົາໃຈໃສ່ຈັດຕັ້ງຜັນຂະຫຍາຍດ້ວຍຄວາມຮັບຜິດຊອບສູງ, ເຮັດໃຫ້ແຂວງມີບາດກ້າວຂະຫຍາຍຕົວດີຂຶ້ນ, ພ້ອມນັ້ນ ກໍໄດ້ນຳເອົາຄວາມຢ້ຽມຢາມຖາມຂ່າວ ຄວາມຮັກແພງຈາກກົມການເມືອງສູນກາງພັກ ແລະ ລັດຖະບານ ມາຍັງການນຳຂອງແຂວງ, ເມືອງ, ອົງການປົກຄອງ ແລະ ພໍ່ແມ່ປະຊາຊົນ ບ້ານພັດທະນາວັງເຕົ່າ, ພ້ອມໄດ້ເນັ້ນໃຫ້ຄະນະພັກ-ອົງການປົກຄອງທຸກຂັ້ນ ຕ້ອງໄດ້ເອົາໃຈໃສ່ປະຕິບັດນຳພາສອງວາລະແຫ່ງຊາດຄື

• ການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ, ຊຸກຍູ້ໃຫ້ຫຼາຍຄອບຄົວໄດ້ກາຍເປັນຄອບຄົວຕົວແບບຂອງເມືອງ ແລະ ແຂວງ,
• ພື້ນຖານໂຄງລ່າງໃນທົ່ວແຂວງ ເວົ້າລວມ ແມ່ນໄດ້ຮັບການພັດທະນາ;
• ການພັດທະນາໃນຂົງເຂດວັດທະນະທຳ-ສັງຄົມ ກໍໄດ້ມີຜົນສໍາເລັດເປັນກ້າວໆ ແລະ ສໍາລັບການແກ້ໄຂບັນຫາຢາເສບຕິດ ແມ່ນຕ້ອງຍົກສູງປະສິດທິພາບດ້ານການຄຸ້ມຄອງ, ຊີ້ນຳການຈັດຕັ້ງປະຕິບັດຮອບດ້ານໃນວຽກງານແກ້ໄຂບັນຫາຢາເສບຕິດ;
• ປັບປຸງຂີດຄວາມສາມາດໃນການເຄື່ອນໄຫວເຮັດໜ້າທີ່ການເມືອງແຕ່ລະຂັ້ນ, ເວົ້າລວມແລ້ວ ແມ່ນຕ້ອງໄດ້ກວດກາ ເຊື່ອມຊຶມ ແລະ ກຳແໜ້ນບັນດານິຕິກຳຕ່າງໆ ແລ້ວນຳພາການຈັດຕັ້ງປະຕິບັດໃຫ້ປະກົດຜົນເປັນຈິງ ແລະ ໃນການເຄື່ອນໄຫວພົບປະໂອ້ລົມຄັ້ງນີ້ ທ່ານຮອງນາຍົກລັດຖະມົນຕີ ຍັງໄດ້ມອບເງິນຈຳນວນໜຶ່ງໃຫ້ແກ່ຮາກຖານບ້ານວັງເຕົ່າຕື່ມອີກ.

ແຫຼ່ງຂ່າວ: ປະຊາຊົນ

ຕາມການລາຍງານຈາກສະຖານີວິທະຍຸກະຈາຍສຽງແຫ່ງປະເທດໄທ ໃຫ້ຮູ້ວ່າ: ພົນເອກ ປະຢຸດ ຈັນໂອຊາ ນາຍົກລັດຖະມົນຕີ ແລະ ລັດຖະມົນຕີກະຊວງປ້ອງກັນປະເທດ ກ່າວຍ້ອງຍໍທຸກໜ່ວຍງານທັງພາກລັດ ແລະ ເອກະຊົນ ທີ່ຮ່ວມມືຮ່ວມໃຈກັນສົ່ງເສີມການທ່ອງທ່ຽວ ຈາກກໍລະນີທີ່ໄທກາຍເປັນປະເທດທຳອິດ ທີ່ດຳເນີນໄດ້ຕາມການຖະແຫຼງການ ຂອງອົງການອຸຍເນສໂກເພື່ອການທ່ອງທ່ຽວຍືນຍົງ (UNESCO Sustainable Travel Pledge).

ທ່ານ ນາຍົກລັດຖະມົນຕີ ຕັ້ງໜັ່ນ ແລະ ຕິດຕາມການເຮັດວຽກຂອງລັດ ແນໃສ່ການດຳເນີນນະໂຍບາຍ ທີ່ໃຫ້ຄວາມສຳຄັນກັບຄວາມຍືນຍົງດ້ານສິ່ງແວວລ້ອມ ແລະ ຄວາມຫຼາກຫຼາຍທາງວັດທະນາທຳ ຕະຫຼອດເຖິງປະຊາສຳພັນ ກຳນົດແຮງຈູງໃຈໃຫ້ເອກະຊົນເຂົ້າຮ່ວມກັບລັດຖະບານຕໍ່ຍອດ ເຊິ່ງມີໂຮງແຮມຫຼາຍກວ່າ500 ແຫ່ງທົ່ວປະເທດ ຕັ້ງໜັ່ນໃນການຍົກເລີກການໃຊ້ພາສຕິກ ທີ່ໃຊ້ພຽງເທື່ອດຽວ  ແລະ ສົ່ງເລີມວັດທະນາທຳ ທ້ອງຖິ່ນ ໂດຍສະເພາະໂຮງແຮມສ່ວນໃຫຍ່ຕັ້ງຢູ່ໃນສະຖານທີ່ທ້ອງທ່ຽວຍອດນິຍົມທີ່ສຸດໃນໄທ.

ຖະແຫຼງການ ຂອງອົງການອຸຍເນສໂກເພື່ອການທ່ອງທ່ຽວຍືນຍົງ (UNESCO Sustainable Travel Pledge) ເປັນສ່ວນໜຶ່ງຂອງການຮ່ວມມືລະຫວ່າງ UNESCO และ Expedia Group ເພື່ອສົ່ງເສີມການທ່ອງທ່ຽວແບບຍືນຍົງ ຫຼຸດຜ່ອນການໃຊ້ພາສຕິກແບບໃຊ້ເທື່ອດຽວຖິ້ມ ແລະ ໃຫ້ປະຊາຊົນທ້ອງຖິ່ນມີການພັດທະນາແນວທາງປະຕິບັດ ແລະ ຄວາມຮູ້ດ້ານການທ່ອງທ່ຽວແບບຍືນຍົງ ເພື່ອຫຼຸດຜ່ອນຜົນກະທົບຕໍ່ສິ່ງແວວລ້ອມທີ່ເກີດຈາກທຸລະກິດທ່ອງທ່ຽວ ແລະ ສ້າງຄວາມນຶກຄິດໃຫ້ກັບນັກທ່ອງທ່ຽວ.

ຕາມການລາຍງານ ຂອງຄວາມສະຫງົບ ໃຫ້ຮູ້ວ່າ: ພັທ ທອງໄຫຼ ເພັດດາວົງ ຫົວໜ້າ ປກສ ເມືອງຫົງສາ ແຂວງໄຊຍະບູລີ ຖະແຫຼງກ່ຽວກັບປະຕິບັດການສະກັດລົດຂົນສົ່ງຢາເສບຕິດ ໃນລະຫວ່າງ ວັນທີ 11 ແລະ 12 ເມສາ 2022 ຂອງເຈົ້າໜ້າທີ່ ປກສ ເມືອງຫົງສາ ສາມາດຢຶດລົດໃຫຍ່ໄດ້ 2 ຄັນ, ຜູ້ຕ້ອງຫາ 1 ຄົນ, ລວມຂອງກາງຢາບ້າ 952 ກິໂລກຼາ, ໄອສ 534 ກິໂລກຼາມ. ພັທ ທອງໄຫຼ ເພັດດາວົງ ກ່າວວ່າ: ໃນວັນທີ 11 ເມສາ 2022, ເຈົ້າໜ້າທີ່ໄດ້ຮັບລາຍງານຈາກພົນລະເມືອງດີວ່າ ຈະມີກຸ່ມຄົນຈຳນວນໜຶ່ງເຄື່ອນຍ້າຍຂົນສົ່ງຢາເສບຕິດຜ່ານ ເມືອງຫົງສາ, ປກສ ເມືອງຈິ່ງໄດ້ຈັດຕັ້ງກຳລັງ ແລະ ວາງແຜນການເພື່ອສະກັດຈັບລົດເປົ້າໝາຍ.

ພໍຮອດເວລາ 12 ໂມງຂອງວັນດຽວກັນ ເຈົ້າໜ້າທີ່ກໍພົບເຫັນລົດເປົ້າໝາຍ 1 ຄັນ ຈິ່ງເຂົ້າສະກັດລົດຄັນດັ່ງກ່າວ ເປັນລົດວີໂກ້ແຊັມ ໝາຍເລກທະບຽນ ກວ ກຳແພງນະຄອນ 5869 ແລະ ໄດ້ຈັບຕົວຜູ້ຂັບຂີ່ທັນທີ ພ້ອມກວດຄົ້ນພາຍໃນລົດ ພົບເຫັນຢາບ້າ 1.690 ມັດ ເທົ່າກັບ 380 ກິໂລກຼາມ, ຢາໄອສ໌ 531 ຫໍ່ ເທົ່າກັບ 534 ກິໂລກຼາມ, ຢຶດໂທລະສັບມືຖື 2 ເຄື່ອງ ແລະ ນຳຕົວຜູ້ຖືຫາມາດຳເນີນການສືບສວນ-ສອບສວນ. ຜ່ານການສອບສວນ ຈິ່ງຮູ້ວ່າ:

ຜູ້ຖືກຫາ ຊື່ທ້າວ ສີແພງ ລີຢົງວ່າງ ອາຊີບພະນັກງານ ຢູ່ບ້ານແດນກາງ ເມືອງລອງ ແຂວງຫຼວງນໍ້າທາ ແລະ ຜູ້ກ່ຽວສາລະພາບວ່າ: ໄດ້ຮ່ວມກັບພັກພວກຂົນສົ່ງຢາເສບຕິດໃນຄັ້ງນີ້.

ຈາກຄຳໃຫ້ການຂອງຜູ້ຖືກຫາ, ເຈົ້າໜ້າທີ່ຈິ່ງໄດ້ຈັດວາງກຳລັງອອກຊອກໄລ່ຈັບຜູ້ຮ່ວມຂະບວນການທັນທີ ຈົນຮອດເວລາ 11 ໂມງ ຂອງວັນທີ 12 ເມສາ 2022 ເຈົ້າໜ້າທີ່ກໍພົບເຫັນລົດກະບະຣີໂວ້ ບໍ່ມີລົດເລກທະບຽນຈອດຖິ້ມໄວ້ແຄມທາງເຂດບ້ານພູແລ້ງກາງ ເມືອງຫົງສາ, ເຈົ້າໜ້າທີ່ເຂົ້າກວດຄົນບໍລິເວນໃກ້ຄຽງພົບຮ່ອງຮອຍຂອງກຸ່ມຄົນຈຳນວນໜຶ່ງຫຼົບໜີເຂົ້າປ່າ ແລະ ພົບເຫັນຢາບ້າຈຳນວນ 21 ເປົາ ນໍ້າໜັກ 572 ກິໂລກຼາມ ແລະ ກົດລົດພົບເຫັນຮ່ອງຮອຍການແກະປ້າຍທະບຽນອອກ ເຈົ້າໜ້າທີ່ຈິ່ງກວດຄົ້ນບໍເວນໃກ້ຄຽງອີກຄັ້ງກໍພົບເຫັນ ປ້າຍທະບຽນລົດ ກລ ກຳແພງນະຄອນ 6328, ເຈົ້າໜ້າທີ່ຈິ່ງນຳເອົາຢາບ້າ ແລະ ລົດ ມາກອງບັນຊາການ ປກສ ເມືອງເພື່ອສືບຕໍ່ສືບສວນ-ສອບສວນຂະຫຍາຍຜົນ.

ຫົວໜ້າ ປກສ ເມືອງຫົງສາ ຍັງໃຫ້ຮູ້ອີກວ່າ: ນີ້ກໍແມ່ນອີກໜຶ່ງຜົນງານຂອງ ປກສ ເມືອງຫົງສາ ໃນການຈັດຕັ້ງປະຕິບັດວາລະແຫ່ງຊາດແກ້ໄຂຢາເສບຕິດ ເຊິ່ງຂອງກາງທີ່ຢຶດໄດ້ໃນຄັ້ງນີ້ ລວມມີຂອງກາງຢາບ້າ 952 ກິໂລກຼາ, ໄອສ 534 ກິໂລກຼາມ, ລົດໃຫຍ່ 2 ຄັນ, ຜູ້ຖືກຫາ 1 ຄົ ແລະ ໂທລະສັບມືຖື 2 ເຄື່ອງ ແລະ ເຈົ້າທີ່ກຳລັງເລັ່ງສືບສວນ-ສອບສວນເພື່ອນຳຈັບຜູ້ຮ່ວມຂະບວນການທັງຫມົດມາລົງໂທດຕາມກົດໝາຍ.