ອັດຕະປື ເຂັ້ມງວດຄຸ້ມຄອງ ລາຄາສິນຄ້າໄລຍະບຸນປີໃໝ່ລາວ ພສ 2565.

ໂດຍປະຕິບັດຕາມດໍາລັດ 74/ນຍ, ລົງວັນທີ 18 ພະຈິກ 2011 ວ່າດ້ວຍການຄຸ້ມຄອງລາ ຄາສິນຄ້າ ແລະ ການບໍລິການ ເພື່ອຮັບປະກັນໃຫ້ສັງຄົມມີຄວາມສະຫງົບ, ຜູ້ບໍລິໂພກໄດ້ຮັບຄວາມເປັນທໍາທາງດ້ານລາຄາ, ປະລິມານ ແລະ ຄຸນນະພາບ, ທັງເປັນການປະຕິບັດພາລະບົດບາດຂອງຂະແໜງອຸດສາຫະກໍາ ແລະ ການຄ້າ ໃນການຄຸ້ມລາຄາສິນຄ້າ ໂດຍສະພາະສິນຄ້າທີ່ມີຄວາມຈໍາເປັນ ແລະ ມີຜົນກະທົບໄວຕໍ່ຊີວິດການເປັນຢຸ່ຂອງພໍ່ແມ່ປະຊາຊົນ ເປັນຕົ້ນ:

ແມ່ນສິນຄ້າປະເພດສະບຽງອາຫານ ຊີ້ນ-ປາ, ພືດຜັກ, ນໍ້າມັນເຊື້ອໄຟ ແລະ ອື່ນໆ ຫລີກລ່ຽງການສວຍໂອກາດກັກຕຸນສິນຄ້າຂຶ້ນ ເພື່ອເກນກໍາໄລຂອງພໍ່ຄ້າມືກາງ ແລະ ຮັບປະກັນການສະໜອງ ໃຫ້ພຽງພໍກັບຄວາມຕ້ອງການຂອງຜູ້ບໍລິໂພກ.ທ່ານ ພູໄຊ ວໍລະລາດ ຮອງຫົວໜ້າພະແນກ ອຸດສະຫະກໍາ ແລະ ການຄ້າ ແຂວງ ອັດຕະປື ໃຫ້ສໍາພາດຕໍ່ສື່ມວນຊົນຄັ້ງວັນທີ 11 ເມສາ 2022 ນີ້ວ່າ:

ໃນໄລຍະເທດສະການບຸນປີໃໝ່ລາວ ພສ 2565 ນີ້້, ພະແນກ ອຸດສະຫະກໍາ ແລະ ການຄ້າແຂວງ ໄດ້ເປັນເຈົ້າການໃນການຈັດຕັ້ງຜັນຂະຫຍາຍ ດໍາລັດ ເລກທີ 474/ນຍ ໄດ້ຖືເອົາວຽກງານດັ່ງກ່າວ ເປັນວຽກງານໜຶ່ງທີ່ສໍາຄັນຂອງພັກ ແລະ ທັງໄດ້ປະສານສົມທົບຢ່າງກົມກຽວ ກັບຫ້ອງການ ອຸດສະຫະກໍາ ແລະ ການຄ້າ 5 ຕົວເມືອງ ແລະ ພາກສ່ວນກ່ຽວໃນການຄຸ້ມຄອງລາຄາສິນຄ້າໃນທ້ອງຕະຫລາດ ໂດຍສະເພາະແມ່ນເຂົ້າສານ, ຊີ້ນ, ປາ, ເຄື່ອງອຸປະໂພກ-ບໍລິໂພກ ແລະ ນໍາມັນເຊື້ອໄຟ ທີ່ມີຜົນກະທົບຕໍ່ສັງຄົມເປັນຕົ້ນ: ເຂົ້າຈ້າວຂາຍໃນລາຄາ 7.000-9.000 ກີບຕໍ່ກິໂລ, ແລະ ເຂົ້າມະລິ 10.000 ກີບຕໍ່ກິໂລ, ເຂົ້າໜຽວ 6.000-9.000 ກີບຕໍ່ກິໂລ, ຊີ້ນງົວ-ຄວາຍ 75.000–80.000 ກີບຕໍ່ກິໂລ, ຊີ້ນໝູ 53.000-55.000 ກີບຕໍ່ກິໂລ ແລະ ນໍາມັນເຊື້ອໄຟເຊັ່ນ:

ເອັດຊັງ 17.410 ກີບຕໍ່ລິດແລະ ກາຊວນ 17.000 ກີບຕໍ່ລິດ (ລາຄານີ້ອາດມີການປ່ຽນແປງຂຶ້ນ-ລົງໃນລະອາທິດ) ສາເຫດຍຍ້ອນປັດໄຈນໍ້າເຂົ້າຈາກຕ່າງປະເທດ ແລະ ເງິນຕາມີການເໜັງຕີງເປັນແຕ່ລະໄລຍະ. ພ້ອມດຽວກັນ, ພະແນກອຸດສາຫະກໍາ ແລະ ການຄ້າແຂວງ ກໍໄດ້ອອກແຈ້ງການສະບັບເລກທີ 012/ພອຄ.ອປ, ລົງວັນທີ 8 ເມສາ 2022 ເລື່ອງໃຫ້ເອົາໃຈໃສ່ຊີ້ນໍາໃນການຕິດຕາມ, ກວດກາ, ຄຸ້ມຄອງ, ແກ້ໄຂກ່ຽວສະພາບການການປັ່ນປ່ວນ, ກັກຕຸນ, ແລະ ສວຍໂອກາດຂຶ້ນລາຄາ ໃນໄລຍະເທດສະການບຸນປີໃໝ່ລາວ ໂດຍມອບໃຫ້ຫ້ອງການ ອຸດສາຫະກໍາ ແລະ ການຄ້າ 5 ຕົວເມືອງ ເປັນເຈົ້າການປະສານສົມທົບກັບຂະແໜງການທີ່ກ່ຽວຂ້ອງພາຍໃນເມືອງ ຈັດຕັ້ງປະຕິບັດ ບົນພື້ນຖານຄວາມເປັນເອກະພາບ ແລະ ການຮ່ວມມືກັນໃຫ້ດີ ເພື່ອຮັບປະກັນໃຫ້ແກ່ການເຄື່ອນໄຫວ.

ຖ້າພົບເຫັນຜູ້ປະກອບການແມ່ຄ້າຊາວຂາຍຂຶ້ນລາຄາສິນຄ້າເກີນຂອບເຂດ ຫລື ຕາຊັ່ງກິໂລມີການດັດປັບຜິດປົກກະຕິ ສາມາດໂທຫາສາຍດ່ວນ 1510 ຫລື ໂທລາຍງານຄະນະຮັບຜິດຊອບຂັ້ນແຂວງ ແລະ ເມືອງດ່ວນ ເພື່ອຈະໄດ້ແກ້ໄຂໃຫ້ທັນການ.

 ແຫຼ່ງຂ່າວ: ປະເທດລາວ

ພິທີ ມອບ-ຮັບ ແລະ ເປີດການນຳໃຊ້ຂົວຂ້າມນໍ້າພີດ ບ້ານໂຄກສະຫວ່າງ ເມືອງຍົມມະລາດ ແຂວງຄຳມ່ວນ ຈັດຂຶ້ນໃນວັນທີ 9 ເມສາ 2022 ໂດຍເປັນກຽດເຂົ້າຮ່ວມຂອງທ່ານ ວັນໄຊ ພອງສະຫວັນ ເຈົ້າແຂວງຄຳມ່ວນ, ມີບັນດາທ່ານການນຳຂອງແຂວງ, ບັນດາພະແນກການ, ການນຳເມືອງຍົມມະລາດ, ຂະແໜງການອ້ອມຂ້າງເມືອງ ຕະຫຼອດເຖິງພໍ່ແມ່ປະຊາຊົນເຂົ້າຮ່ວມ.

ໂຄງການກໍ່ສ້າງຂົວຊຸມຊົນ ບ້ານໂຄກສະຫວ່າງ ແມ່ນເປັນປະເພດຂົວ ເບຕົງ ປະສົມໄມ້, ມີຄວາມຍາວ 115 ແມັດ, ກວ້າງ 3,5 ແມັດ, ມີຈຳນວນເສົາຂົວ 44 ເສົາ, ສາມາດຮອງຮັບນໍ້າໜັກໄດ້ 3,5 ໂຕ່ນ.

ເຊິ່ງເປັນໂຄງການ ທີ່ໄດ້ຮັບການປະກອບສ່ວນຈາກຫຼາກພາກສ່ວນ ທັງພາກລັດ ແລະ ເອກະຊົນ ໂດຍບໍລິສັດເກດສຸວັນ ໄດ້ມີການ ປະກອບສ່ວນທາງດ້ານ ເຫຼັກ, ປູນຊີມັງ, ເຄື່ອງກົນຈັກໜັກ ແລະ ອື່ນໆ ມີທັງການປະກອບສ່ວນແບບຊ່ວຍເຫຼືອ ແລະ ການປະກອບສ່ວນໃນຮູບແບບຜູ້ຮັບເໝົາ ໂດຍບໍ່ຄິດກຳໄລ ສ່ວນທາງດ້ານແຮງງານຫຼັກແມ່ນ ນໍາໃຊ້ແຮງງານ ຂອງພໍ່ແມ່ປະຊາຊົນໃນເຂດອ້ອມຂ້າງ ເຊິ່ງການກໍ່ສ້າງແມ່ນແບ່ງອອກເປັນ 2 ໄລຍະຄື:

ໄລຍະທີ 1 ໃຊ້ເວລາ ການກໍ່ສ້າງ 14 ວັນ ກໍ່ສ້າງເສົາຂົວສຳເລັດ 30 ເສົາ ແລະ ໄລຍະທີ 2 ໃຊ້ເວລາ 36 ວັນ ກໍ່ສ້າງເສົາຂົວຕື່ມ 14 ເສົາ, ເສົາຫົວຂົວ 2 ເສົາ ພ້ອມປະກອບຂາງໄມ້ຕາມການອອກແບບ ເຊິ່ງການກໍ່ສ້າງແມ່ນໄດ້ສຳເລັດໃນວັນທີ 15 ທັນວາ 2021 ມີໄລຍະເວລາໃນການກໍ່ສ້າງແມ່ນ 50 ວັນ, ລວມມູຄ່າທັງໝົດ 1,08 ຕື້ກວ່າກີບ.

ທ່ານ ວັນໄຊ ພອງສະຫວັນ ເຈົ້າແຂວງຄຳມ່ວນ ໄດ້ກ່າວສະແດງຄວາມຍ້ອງຍໍຊົມເຊີຍ ຕໍ່ການຈັດຕັ້ງ ທຸກພາກສ່ວນ ທັງພາກລັດ ແລະ ເອກະຊົນ ທີ່ໄດ້ໃຫ້ການປະກອບສ່ວນ ພິເສດແມ່ນພໍ່ແມ່ປະຊາຊົນ ທີ່ໄດ້ສຸມຈິດ ສຸມໃຈ ແລະ ເຫື່ອແຮງສະຕິປັນຍາເຂົ້າໃນຂະບວນການກໍ່ສ້າງຂົວຂ້າມນໍ້າພີດຈົນສຳເລັດ.

ເຊິ່ງການກໍ່ສ້າງດັ່ງກ່າວ ຈະເປັນຕົວແບບ ແລະ ແບບຢ່າງທີ່ດີນຳໄປສູ່ຂະບວນການອື່ນ ເພື່ອພັດທະນາສັງຄົມ ເຮັດໃຫ້ພໍ່ແມ່ປະຊາຊົນ ມີຄວາມສະດວກສະບາຍໃນການສັນຈອນໄປ-ມາ ກໍ່ຄືການດຳລົງຊີວິດ, ແລກປ່ຽນຊື້-ຂາຍ ສິນຄ້າ ແລະ ອື່ນໆ.

ຕໍ່ກັບຜົນສຳເລັດດັ່ງກ່າວນີ້ແມ່ນຮຽກຮ້ອງໃຫ້ອຳນາດການປົກຄອງ ແລະ ພໍ່ແມ່ປະຊາຊົນຖືເປັນຊັບສົມບັດຂອງບ້ານ ເພື່ອພ້ອມກັນເປັນເຈົ້າການຕິດຕາມ, ກວດກາ ແລະ ບູລະນະປົກປັກຮັກສາ ເພື່ອເຮັດແນວໃດໃຫ້ຂົວດັ່ງກ່າວ ນຳໃຊ້ໃຫ້ເກີດປະໂຫຍດສູງສຸດ ແລະ ນຳໃຊ້ໄດ້ຢ່າງຍາວນານ.

ພ້ອມນີ້ກໍ່ສະເໜີໃຫ້ພໍ່ແມ່ປະຊາຊົນ ພ້ອມກັນສຸມໃສ່ ໃນການຜະລິດຕາມເງື່ອນໄຂ ແລະ ທ່າແຮງຂອງຕົນ ເພື່ອແກ້ໄຂຊີວິດການເປັນຢູ່ ແລະ ກາຍເປັນສິນຄ້າ ສ້າງລາຍຮັບເຂົ້າສູ່ຄອບຄົວ, ພ້ອມກັນປະຕິບັດມາດຕະການປ້ອງກັນການແຜ່ລະບາດຂອງພະຍາດໂຄວິດ-19 ແລະ ຊຸກຍູ້ປຸກລະດົມປະຊາຊົນ ກໍ່ຄືສະມາຊິກພາຍໃນຄອບຄົວຜູ້ທີ່ຄົບເງື່ອນໄຂ ໄປສັກວັກຊິນ ເພື່ອສ້າງພູມຄຸ້ມກັນ ຕໍ່ການຕິດເຊື້ອ ແລະ ການເສຍຊີວິດຈາກພະຍາດຮ້າຍດັ່ງກ່າວ.

ແຫຼ່ງຂ່າວ: Khammouane News

ຕາມການລາຍງານຂອງສູນຂ່າວສານການແພດສຸຂະສຶກສາ

ຕິດເຊື້ອໃໝ່ຈາກການນຳເຂົ້າ 9 ຄົນ.

ສະພາບໂຄວິດມື້ນີ້ ຕິດເຊື້ອ 924 ເສຍຊີວິດ 6 ຄົນ

.

ວັນທີ 5 ເມສາ 2022 ນີ້ ຢູ່ສະໂມສອນບ້ານ ຫາດຮວນ ກຸ່ມລາດແອ່ນ ເມືອງງອຍ ແຂວງຫຼວງພະບາງ ການນໍາເມືອງງອຍ ໄດ້ນໍາເອົາໄກ່ລາດ ໄປມອບໃຫ້ປະຊາຊົນ 3 ບ້ານ ກຸ່ມລາດແອ່ນ ແລະ ກຸ່ມປາກຈີມລ້ຽງ,ໂດຍມີທ່ານ ຄໍາເພັດ ຈັນທຸມມາ ຫົວໜ້າຫ້ອງການຄະນະໂຄສະນາອົບຮົມເມືອງ ພ້ອມດ້ວຍພາກສ່ວນທີ່ກ່ຽວຂ້ອງ ແລະອົງການຈັດຕັ້ງບ້ານເຂົົ້າຮ່ວມ.

ບ້ານທີ່ໄດ້ຮັບໄກ່ລາດຄັ້ງນີ້ ໂດຍໄດ້ຮັບທຶນຊ່ວຍເຫຼືອຈາກໂຄງການຫຼຸດຜ່ອນຄວາມສ່ຽງ ແລະ ຜົນກະທົບຈາກໂຄວິດ-19 ສໍາລັບຊາວກະສີກອນຂະໜາດນ້ອຍຢູ່ແຂວງພາກເໜືອ ປະກອບມີ: ບ້ານ ຫາດຮວນ ກຸ່ມລາດແອ່ນ, ບ້ານ ຄອນເກິ່ງ ແລະບ້ານ ປາກຈີມ ກຸ່ມ ປາກຈີມ, ມີໄກ່ທັງໜົດ 1.700 ກ່ວາໂຕ. ເປັນມູນຄ່າທັງໜົດ 35.450.000 ກີບ. ມອບໃຫ້ 189 ຄອບຄົວ, ຄອບຄົວ 1 ໄດ້ 9 ໂຕ.

ໄກ່ທີ່ນໍາໄປມອບແມ່ນໄດ້ຮັບການສັກຢາປ້ອງກັນພະຍາດສັດປີກ ຄົບຖ້ວນຕາມຫຼັກການສັດຕະວັດແພດ,ໂດຍແມ່ນທ່ານ ຄໍາເພັດ ຈັນທຸມມາ ຫົວໜ້າຫ້ອງການຄະນະໂຄສະນາອົບຮົມເມືອງ ເປັນຜູ້ຕາງໜ້າມອບ ໃຫ້ອົງການຈັັດຕັ້ງ 3 ບ້ານ ແລະທ່ານ ຈັນທະລີ ຄຸນສີດາ ນາຍບ້ານ ບ້ານ ຫາດຮວນ ຕາງໜ້າຮັບ ເພື່ອນໍາໄປມອບໃຫ້ບັນດາ ຄອບຄົວທີ່ໄດ້ຮັບໄກ່ລາດໄປລ້ຽງເຂົົ້າຮ່ວມເປັນສັກຂີພີຍານ.

ໂອກາດດັ່ງກ່າວນີ້ທ່ານ ຈັນທະລີ ຄຸນສີດາ ນາຍ ບ້ານບ້ານ ຫາດຮວນ ກໍໄດ້ສະແດງຄວາມຂອບໃຈມາຍັງທາງໂຄງການ ແລະການນໍາຂອງເມືອງ ພ້ອມດ້ວຍພາກສ່ວນທີ່ກ່ຽວຂ້ອງ ທີ່ໄດ້ໃຫ້ຊ່ວຍເຫຼືອໃນຄັ້ງນີ້, ຫວັງຢ່າງຍິ່ງວ່າໂອກາດໜ້າຈະໄດ້ຮັບການຊ່ວຍເຫຼື່ອຕື່ມອີກ ແລະຈະນໍາເອົາຄໍາແນະນໍາບົດຮຽນການລ້ຽງໄກ່ໄປໝູນໃຊ້ເຂົ້າໃນການຈັດຕັ້ງປະຕິບັດຕົວຈີງ ເພື່ອພັດທະນາຄອບຄົວໃຫ້ມີລາຍຮັບດີຂື້ນເປັນກ້າວໆ.

ແຫຼ່ງຂ່າວ ແລະ ຮູບພາບ: Media Laos

ກອງພັນໃຫຍ່ 201 ຫັດແອບສວນສະໜາມ ກຽມສະຫຼອງວັນສ້າງຕັ້ງກົມກອງ ຄົບຮອບ 20 ປີ

ເພື່ອຮັບປະກັນໃຫ້ແກ່ການສະເຫຼີມສະຫຼອງວັນສ້າງຕັ້ງ ກອງພັນໃຫຍ່ 201 ຄົບຮອບ 20 ປີ (9 ເມສາ 2002-9 ເມສາ 2022) ທີ່ຈະມາເຖິງ ໃຫ້ມີຄວາມເປັນເອກະພາບ, ເຂັ້ມແຂງ, ສວຍງາມທາງດ້ານ ກ້ອນກຳລັງສວນສະໜາມພາກສ່ວນບຸກຄົນ. ໃນວັນທີ 7 ເມສາ ຜ່ານມານີ້, ກອງພັນໃຫຍ່ 201 ທີ່ຂຶ້ນກັບກອງພົນທີ 2 ໄດ້ຈັດຕັ້ງຫັດແອບສວນສະໜາມປະສານກ້ອນກຳລັງ, ມີຄະນະພັກ-ຄະນະບັນຊາກອງພັນໃຫຍ່, ພະແນກການ, ກອງພັນນ້ອຍ, ກອງຮ້ອຍເອກະລາດ, ໝວດ ທີ່ຂຶ້ນກັບ ພ້ອມດ້ວຍຄະນະຮັບຜິດຊອບຊີ້ນຳ, ອະນຸກຳມະການ, ພາກສ່ວນທີ່ກ່ຽວຂ້ອງ ແລະ ພະນັກງານ- ນັກຮົບທົ່ວກອງພັນໃຫຍ່ເຂົ້າຮ່ວມ. ສະຫາຍ ພັນຕີ ສຸບັນ ວັນນະເກດ ຫົວໜ້າຂະແໜງອົບຮົມ ໃຫ້ຮູ້ວ່າ:

ພາຍຫຼັງທີ່ໄດ້ຮັບການອະນຸມັດແຜນການຫັດແອບຈາກຂັ້ນເທິງແລ້ວ, ພວກເຮົາກໍໄດ້ຮີບຮ້ອນມອບໝາຍໜ້າທີ່ໃຫ້ບັນດາສະຫາຍພະນັກງານທີ່ຊ່ວຍວຽກຂະແໜງອົບຮົມ, ທັງຊີ້ນຳ ແລະ ຫ້າງຫາກະກຽມວຽກງານຮອບດ້ານ ເພື່ອກະກຽມຫັດແອບກ້ອນກຳລັງສວນສະໜາມ ນັບທັງລະບຽບບຸກຄົນ ກ້າວໄປເຖິງລະບຽບຮູບແຖວຕາມລຳດັບ ບາດກ້າວຂອງການຫັດແອບ, ສຳລັບການຫັດແອບສວນສະໜາມເພື່ອສະເຫຼີມສະຫຼອງວັນສ້າງຕັ້ງກອງພັນໃຫຍ່ 201 ຄົບຮອບ 20 ປີ ໃນຄັ້ງນີ້, ກົມກອງໄດ້ນຳໃຊ້ກຳລັງທັງໝົດ 630 ສະຫາຍ.

ເຊິ່ງໃນນັ້ນ, ມີກ້ອນກຳລັງພົນ 10 ກ້ອນ ຊຶ່ງປະກອບມີກ້ອນທຸງໄຊ, ກ້ອນພະນັກງານ 5 ອົງການ, ກ້ອນເຫຼົ່າຮົບເສນາຮັກ, ກ້ອນເຫຼົ່າຮົບຊ່າງແສງ, ກ້ອນເຫຼົ່າຮົບສື່ສານ, ກ້ອນເຫຼົ່າຮົບສືບຂ່າວ, ກ້ອນສະຫະພັນແມ່ຍິງ, ກ້ອນກອງພັນນ້ອຍທະຫານຮາບທີ 3, ກ້ອນກອງພັນນ້ອຍທະຫານຮາບ 613, ກ້ອນກອງພັນນ້ອຍທະຫານຮາບ 404.

ແຫຼ່ງຂ່າວ: ປະຊາຊົນ

ໃນວັນທີ 30 ມີນາ 2022, ກອງພັນປ້ອງກັນເຄື່ອນທີ່ ປກສ ແຂວງຫົວພັນ ໄດ້ຈັດພິທີສຶກສາອົບຮົມ ພວກກຸ່ມແກ້ງຊາວໜຸ່ມ-ໄວຫນຸ່ມນັກຮຽນ ທີ່ໄດ້ສ້າງຄວາມບໍ່ສະຫງົບ-ຄວາມບໍ່ເປັນລະບຽບຮຽບຮ້ອຍຕໍ່ ສັງຄົມ ແລະ ແກ້ໄຂພາຫະນະລົດຈັກທີ່ພວກຊາວໜຸ່ມ ແລະ ນັກຮຽນໄດ້ຂັບຂີ່ລົດຈັກກວນເມືອງໂດຍ ການເປັນປະທານຂອງ ພັທ ພັນວອນ ບຸນສະຫວັນ ຮອງຫົວຫນ້າກອງພັນປ້ອງກັນເຊື້ອທີ່ ປກສ ແຂວງ, ເຂົ້າຮ່ວມມີພໍ່-ແມ່ຜູ້ປົກຄອງ, ຄູ-ອາຈານ ຂອງເດັກ ແລະ ເຈົ້າຫນ້າທີ່ພາກສ່ວນກ່ຽວຂ້ອງ.

ເຈົ້າໜ້າທີ່ ໃຫ້ຮູ້ວ່າ: ອີງຕາມຄໍາສັ່ງຂອງທ່ານເຈົ້າແຂວງ ສະບັບເລກທີ 34/ຈຂ, ລົງວັນທີ 2 ກັນຍາ 2016 ວ່າດ້ວຍການຕ້ານ ແລະ ແກ້ໄຂປະກົດ ການຫຍໍ້ທໍ້ໃນສັງຄົມທົ່ວແຂວງຫົວພັນ, ໃນຄັ້ງວັນທີ 20 ມັງກອນ 2022 ໄດ້ມີເຫດການພວກກຸ່ມແກ້ງ, ຊາວໜຸ່ມ-ໄວໜຸ່ມ ແລະ ນັກຮຽນໄດ້ຂັບ ຂີ່ລົດກວນເມືອງ ເຊິ່ງໄດ້ນໍາໃຊ້ພາຫະນາລົດຈັກເປັນກຸ່ມແກງເຊິ່ງໄດ້ສ້າງຄວາມບໍ່ສະຫງົບ, ຄວາມບໍ່ເປັນລະບຽບຮຽບຮ້ອຍ ຢູ່ໃນສັງຄົມ ແລະ ການກໍ່ກວນສ້າງຄວາມບໍ່ສະຫງົບໃນຄັ້ງນີ້ແມ່ນນໍາໃຊ້ພາຫະນະລົດຈັກທັງຫມົດແມ່ນ 10 ຄັນ.

ຜ່ານການຈັດຕັ້ງປະຕິບັດໜ້າທີ່ວິຊາສະເພາະ ຈຶ່ງສາມາດຮູ້ໄດ້ພວກກຸ່ມແກ້ງຊາວຫນຸ່ມ-ໄວຫນຸ່ມ ແລະ ນັກຮຽນໃນເບື້ອງຕົ້ນ ຈໍານວນ 2 ຄົນ ຄື: ທ້າວ ມິກ ແລະ ທ້າວ ຈັນສະຫມອນ ພ້ອມດ້ວຍລົດຈັກ 2 ຄັນ ເປັນປະເພດລົດແຕ່ງ 1 ຄັນ; ຜ່ານການສືບສວນ-ສອບສວນຕົວຈິງ, ເຈົ້າໜ້າທີ່ພວກເຮົາສາ ມາດຮູ້ໄດ້ກຸ່ມ ແກ້ງຮ່ວມຂະບວນການກໍ່ກວນ, ກໍ່ຄວາມວຸ້ນວາຍ-ຄວາມບໍ່ເປັນລະບຽບຮຽບຮ້ອຍ ໃນຄັ້ງນີ້ແມ່ນມີ ທັງຫມົດ 19 ຄົນ ພາຫະນະລົດຈັກ 10 ຄັນ, ເປັນປະເພດລົດແຕ່ງທີ່ດັດແປງສະພາບເຕັກນິກ 3 ຄັນ, ເຊິ່ງ ເຈົ້າຫນ້າທີ່ໄດ້ໃຫ້ປ່ຽນອຸປະກອນທີ່ດັດແປງໃຫ້ກັບຄືນສະພາບເດີມ ຈຶ່ງອະນຸ ຍາດໃຫ້ແກ້ໄຂເອົາລົດອອກໄປ ໄດ້, ເຊິ່ງລົດທັງ 10 ຄັນແມ່ນໄດ້ແກ້ໄຂຫມົດແລ້ວ ແລະ ໄດ້ສຶກສາອົບຮົບສ້າງບົດບັນທຶກນໍາອີກ.

ແຫຼ່ງຂ່າວ: ຄວາມສະຫງົບ