ໃນວັນທີ່ 4 ພືດສະພາ ຜ່ານມາ, ຢູ່ທີ່ກອງບັນຊາການ ປກສ ແຂວງບໍ່ແກ້ວ ໄດ້ມີພິທີມອບ-ຮັບ ທຶນຊ່ວຍເຫຼືອຈາກໂຄງການການປູດພືດທົດແທນການປູກຝິ່ນເພື່ອນຳເຂົ້າໂຄງການສົ່ງເສີມການພັດທະນາສີມີແຮງງານຊ່າງຈອດໂລຫະຢູ່ສູນສ້າງຊິວິດໃໝ່ ທີ່ບ້ານນ້ຳຈ້ວມ ເມືອງ ຫ້ວຍຊາຍ ແຂວງບໍ່ແກ້ວໃຫ້ ຈຳນວນ 7 ບໍລິສັດດັ່ງນີ້:

1.ບໍລິສັດຈີງເສີນ ຢາງພາລາ ຈຳກັດ ຈຳນວນ: 10.000.000ກີບ

2.ບໍລິສັດພັດທະນາເຕັກໂນໂລຊີຊີວະສາດ ລີຮັງຈີນ-ລາວ ຈຳນວນ: 10.000.000ກີບ

3.ໂຮງງານລາວ-ຈີນ ເຊິນເຊິ້ງຈຳກັດ ຈຳນວນ: 10.000.000ກີບ.

4.ບໍລິສັດ ຢາງພາລາ ຢູນນາ ຈຳກັດ ຈຳນວນ: 5.000.000ກີບ

5. ບໍລິສັດ ພັດທພນາກະສິກຳ ເຕີຊານ ບໍ່ແກ້ວ ຈຳນວນ: 5.000.000ກີບ

6. ບໍລິສັດ ບໍ່ແກ້ວ-ນາຍຸງ ຈຳກັດຜູ້ດຽວ ຈຳນວນ: 5.000.000 ກີບ

7.ບໍລິສັດ ເປົ່າເຊີນ ຢາງພາລາ ບໍ່ແກ້ວ ຈຳນວນ 2.000.000ກີບ

ຕາງໜ້າຮັບໂດຍ ທ່າຍ ພັອ ຈັນພອນເພັດ ຄໍາສີ ຄະນະພັກ ຮອງກອງບັນຊາການ ປກສ ແຂວງບໍ່ແກ້ວ, ຫຼັງຈາກນັ້ນທາງກອງບັນຊາການ ປກສ ແຂວງໄດ້ມອບໃບກຽດຕິຄຸນ ແລະ ໃບຍ້ອງຍໍ ໃຫ້ບັນດາບໍລິນສັດທີ່ມີສ່ວນຮ່ວມເຂົ້າໃນໂຄງການສົ່ງເສີມການພັດທະນາສີມີແຮງງານຊ່າງຈອດໂລຫະຢູ່ສູນສ້າງຊິວິດໃໝ່.

ແຫຼ່ງຂ່າວ: PL Bokeo news

ເມື່ອບໍ່ດົນມານີ້, ຄະນະຮັບຜິດຊອບປັບປຸງກົດໝາຍ ຈັດກອງປະຊຸມກວດກາເນື້ອໃນຮອບດ້ານກ່ຽວກັບ ການປັບປຸງກົດໝາຍວ່າດ້ວຍຊັບສິນຂອງລັດ ສະບັບປັບປຸງ ໂດຍການເປັນປະທານຂອງ ທ່ານນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ, ມີ ທ່ານ ບຸນປອນ ວັນນະຈິດ ຮອງລັດຖະມົນຕີກະຊວງການເງິນ, ມີປະທານກຳມາທິການກົດໝາຍ, ປະທານກຳມາທິການແຜນການ, ການເງິນ ແລະ ການກວດສອບຂອງສະພາແຫ່ງຊາດ, ຕາງໜ້າຈາກກະຊວງຍຸຕິທຳ, ຫ້ອງວ່າການລັດຖະບານ ແລະ ບັນດາກົມອ້ອມຂ້າງກະຊວງການເງິນ ເຂົ້າຮ່ວມ.ໃນກອງປະຊຸມ, ທ່ານ ບຸນປອນ ວັນນະຈິດ ໄດ້ສະເໜີກ່ຽວກັບການປັບປຸງຮ່າງກົດໝາຍວ່າດ້ວຍຊັບສິນຂອງລັດ ສະບັບທີ່ນຳງໃຊ້ໃນປັດຈຸບັນ ເລກທີ14/ສພຊ, ລົງວັນທີ 05 ກໍລະກົດ 2021 ເປັນການປັບປຸງຈາກກົດໝາຍຊັບສິນຂອງລັດ ສະບັບເລກທີ 09/ສພຊ, ລົງວັນທີ 12 ຕຸລາ 2002 ເຊິ່ງກົດໝາຍສະບັບດັ່ງກ່າວ ໄດ້ຖືກສ້າງຂຶ້ນມີໜ້າທີ່ກຳນົດປະເພດ, ການຄຸ້ມຄອງ, ການນຳໃຊ້, ການປົກປັກຮັກສາ ແລະ ການພັດທະນາຊັບສິນຂອງລັດໃຫ້ມີປະສິດທິຜົນ, ຖືກຕ້ອງຕາມຈຸດປະສົງ, ເປົ້າໝາຍ, ລະບຽບກົດໝາຍ ແນ່ໃສ່ປະກອບສ່ວນເຂົ້າໃນການພັດທະນເສດຖະກິດ-ສັງຄົມແຫ່ງຊາດ ລວມທັງການປົກປັກຮັກສາຊັບພະຍາກອນທຳມະຊາດ ແລະ ສິ່ງແວດລ້ອມ.

ສຳລັບຮ່າງກົດໝາຍດັ່ງກ່າວ ປະກອບດ້ວຍ 9 ພາກ, 7 ໝວດ, 66 ມາດຕາ ເຊິ່ງຈະເປັນບ່ອນອີງທາງດ້ານນິຕິກຳທີ່ໜັກແໜ້ນ ໃຫ້ແກ່ອົງການຈັດຕັ້ງລັດຂັ້ນສູນກາງ, ຂັ້ນທ້ອງຖິ່ນ ແລະ ພາກສ່ວນທີ່ກ່ຽວຂ້ອງໃນການຄຸ້ມຄອງຊັບສິນຂອງລັດ, ກົດໝາຍມີຄວາມຮັດກຸມ, ເປັນລະບົບຄົບຊຸດ, ມີເນື້ອໃນຈະແຈ້ງຄົບຖ້ວນ ແລະ ເຂົ້າໃຈງ່າຍ, ຮັບປະກັນປະ ສິດທິພາບໃນການຈັດຕັ້ງປະຕິບັດ, ສາມາດປົກປ້ອງສິດຜົນປະໂຫຍດຂອງລັດ, ລວມໝູ່, ສິດ ແລະ ຜົນປະໂຫຍດອັນຊອບທໍາຂອງປະຊາຊົນ, ປົກປັກຮັກສາ ແລະ ພັດທະນາຊັບສິນຂອງລັດ ໃຫ້ມີຄວາມຍືນຍົງ ແລະ ປະກອບສ່ວນສ້າງລາຍຮັບເຂົ້າງົບປະມານ, ຍົກສູງບົດບາດການຄຸ້ມຄອງຕິດຕາມ ແລະ ກວດກາ ການຈັດຕັ້ງປະຕິບັດກົດໝາຍຢ່າງເຂັ້ມງວດ, ມີຄວາມໂປ່ງໃສເອກະພາບ ແລະ ສາມາດກວດສອບໄດ້, ອັນເປັນການປະກອບສ່ວນເຮັດໃຫ້ການຈັດຕັ້ງປະຕິບັດວາລະແຫ່ງຊາດ ກ່ຽວກັບການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ບັນລຸໄດ້ຕາມຄາດໝາຍທີ່ວາງໄວ້.ຮ່າງກົດໝາຍດັ່ງກ່າວ, ໄດ້ຜ່ານການທາບທາມຄໍາຄິດເຫັນຢູ່ພາກກາງ, ພາກເໜືອ ແລະ ພາກໃຕ້ໃນເດືອມີນາ 2022 ຜ່ານມາ, ພ້ອມທັງໄດ້ຜ່ານການກວດກາເນື້ອໃນຮອບດ້ານກ່ຽວກັບການປັບປຸງ ກົດໝາຍວ່າດ້ວຍຊັບສິນຂອງລັດ(ສະບັບປັບປຸງ) ແລ້ວຈຶ່ງສະເໜີຕໍ່ລັດຖະບານໃນເດືອນເມສາ 2022 ຜ່ານຮູບແບບ ກອງປະຊຸມລັດຖະບານສະໄໝວິສາມັນ ເພື່ອພິຈາລະນາຮ່າງກົດໝາຍວ່າດ້ວຍຊັບສິນຂອງລັດ ຄັ້ງວັນທີ 12 ເມສາ 2022, ພ້ອມທັງຈະເໜີຮ່າງກົດໝາຍເບື້ອງຕົ້ນ ຕໍ່ກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດຊຸດທີ IX ປະຈຳປີ 2022 ນີ້.

ໂອກາດນີ້, ທ່ານ ນາງ ສູນທອນ ໄຊຍະຈັກ ໄດ້ປະກອບຄຳຄິດຄຳເຫັນກົງໄປກົງມາ ເພື່ອເຮັດໃຫ້ຮ່າງເນື້ອໃນຊັດແຈ້ງ ແລະ ຮັດກຸມຫລາຍຂຶ້ນ, ກົດໝາຍສະບັບນີ້ ກໍເປັນໜຶ່ງໃນກົດໝາຍ ທີ່ຈະເອົາເຂົ້າໃນກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດຊຸດທີ IX ປະຈຳປີ 2022, ສ່ວນບາງມາດຕາ ທີ່ຍັງບໍ່ສາມາດໄດ້ຂໍ້ສະຫລຸບ ຈະໄດ້ນຳໄປປຶກສາຫາລືກັບຂັ້ນເທິງ ເພື່ອຄົ້ນຄວ້າພິຈາລະນາປັບປຸງເນື້ອໃນໃຫ້ຄົບຖ້ວນ ແລະ ຮັດກຸມຂຶ້ນຕື່ມ.

ຂ່າວ-ພາບ: ກະຊວງການເງິນ

ແຂວງວຽງຈັນ ອະໄພຍະໂທດປ່ອຍຕົວນັກໂທດ ແລະ ຫຼຸດຜ່ອນໂທດ ຈໍານວນ 100 ຄົນ ຍິງ 13 ຄົນ.

ໃນວັນທີ 29 ເມສາ 2022 ຜ່ານມາ ຢູ່ທີ່ສະໂມສອນອົງການໄອຍະການແຂວງວຽງຈັນ ໄດ້ຈັດພິທີ ອະໄພຍະໂທດປ່ອຍຕົວນັກໂທດ ແລະ ຫຼຸດຜ່ອນໂທດ ຈໍານວນ 100 ຄົນ ຍິງ 13 ຄົນ ໂດຍການເຂົ້າຮ່ວມຂອງ ທ່ານ ບຸນຄໍ້າ ທໍາມະວົງ ຫົວໜ້າອົງການໄອຍະການແຂວງວຽງຈັນ, ທ່ານ ພັທ ຈັນທະນົງສັກ ສີສົມພອນ ຫົວໜ້າຄ້າຍຄຸມຂັງ-ດັດສ້າງ ປກສ ແຂວງວຽງຈັນ ມີບັນດາພະແນກການທີ່ກ່ຽວຂ້ອງ, ແຂກຖືກເຊີນເຂົ້າຮ່ວມ.

ທ່ານ ບຸນຄໍ້າ ທໍາມະວົງ ຫົວໜ້າອົງການໄອຍະການແຂວງວຽງຈັນ ຂື້ນຜ່ານຄຳແນະນໍາ ສະບັບເລກທີ 016/ຄອຊ ລົງວັນທີ 24 ເມສາ 2018 ແລະ ສະບັບເລກທີ 001/ປປທ ລົງວັນທີ 20 ມີນາ 2018 ກ່ຽວກັບການຈັດຕັ້ງປະຕິບັດ ລັດຖະບັນຍັດ ຂອງປະທານປະເທດ ວ່າດ້ວຍການໃຫ້ ອະໄພຍະໂທດ ປ່ອຍຕົວນັກໂທດເນືື່ອງ ໃນໂອກາດວັນຊາດທີ 2 ທັນວາ ໃນທຸກໆປີ ສະນັ້ນ ຄະນະກຳມະການອະໄພຍະໂທດຂັ້ນແຂວງຊີ້ນຳຄ້າຍຄຸມຂັງ-ດັດສ້າງ ແຂວງວຽງຈັນ ຈັດຕັ້ງພິທີປະກາດອະໄພຍະໂທດປ່ອຍຕົວນັກໂທດ ແລະ ຫຼຸດຜ່ອນໂທດ ຈຳນວນທັງໝົດມີ 100 ຄົນ, ຍິງ 13 ຄົນ, ໃນນັ້ນ ອະໄພຍະໂທດປ່ອຍຕົວມີຈໍານວນ 37 ຄົນ, ຍິງ 03 ຄົນ, ອະໄພຍະໂທດຫຼຸດຜ່ອນໂທດ ມີຈໍານວນ 63 ຄົນ ຍິງ 10 ຄົນ ຕື່ມອີກ.

ປະທານສະພາແຫ່ງຊາດ ເນັ້ນໃຫ້ ບໍລິສັດ ວັງຕັດ ຂຸດຄົ້ນບໍ່ແຮ່ ຕ້ອງຮັກສາສິ່ງແວດລ້ອມ

ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ ພ້ອມດ້ວຍຄະນະ ໄດ້ລົງເຄື່ອນໄຫວຢ້ຽມຢາມ ບໍລິສັດ ວັງຕັດ ຂຸດຄົ້ນບໍ່ແຮ່ ຈໍາກັດ ຢູ່ແຂວງອັດຕະປື ໃນ​ວັນ​ທີ 3 ພຶດ​ສະ​ພາ ຜ່ານ​ມາ ໂດຍການຕ້ອນຮັບຂອງ ທ່ານ ພົງໄຊ ໄຊສະນະ ໄຊຍະເສນາ ປະທານ ບໍລິສັດ ວັງຕັດຂຸດຄົ້ນບໍ່ແຮ່ ຈໍາກັດ ພ້ອມດ້ວຍຄະນະ.

ໃນ​ໂອ​ກາດ​ດັ່ງ​ກ່າວ​ນີ້ ທ່ານປະທານ ບໍລິສັດ ວັງຕັດ ຂຸດຄົ້ນບໍ່ແຮ່ ຈໍາກັດ ໄດ້ລາຍງານໃຫ້ຮູ້ວ່າ: ບໍລິສັດ ໄດ້ສ້າງຕັ້ງຂຶ້ນໃນປີ 2009 ຢູ່ເຂດບ້ານວັງຕັດໃຫຍ່-ບ້ານຢຽງດາກ ເມືອງຊານໄຊ ແຂວງອັດຕະປື, ໄດ້ດຳເນີນໂຄງການຊອກຄົ້ນ, ສຳຫຼວດ ແລະ ຂຸດຄົ້ນແຮ່ທາດທີ່ເຂດຈຸດສຸມວັງຕັດ ເມືອງຊານໄຊ ແລະ ເນື້ອທີ່ຈຳນວນໜຶ່ງທີ່ເຂດດາກລຸກ ເມືອງດາກຈຶງ ແຂວງເຊກອງ.

ປັດຈຸບັນ ມີເນື້ອທີ່ຊອກຄົ້ນ, ສຳ ຫຼວດທັງໝົດ 399,1 ກິໂລຕາແມັດ ແລະ ເນື້ອທີ່ໆໄດ້ຮັບອະນຸຍາດຂຸດຄົ້ນມີພຽງ 18 ກິໂລຕາແມັດ.

ໂຄງການດັ່ງກ່າວ ນອນໃນເຂດພູມສັນຖານເນີນພູ, ໃນພື້ນທີ່ສຳ​ຫຼວດ-ຂຸດ​ຄົ້ນແມ່ນພົບຄວາມຫຍຸ້ງຍາກ ແລະ ລະບົບພື້ນຖານໂຄງລ່າງແມ່ນຍັງບໍ່ທັນຮັບການພັດທະນາ.

ປີຜ່ານມາ, ບໍລິສັດໄດ້ສຸມໃສ່ການສຳຫຼວດ ເປີດເນື້ອທີ່ ທີ່ໄດ້ຮັບອະນຸຍາດຊອກຄົ້ນ-ສຳຫຼວດ ແລະ ສຸມໃສ່ການສຳຫຼວດເລິກ ໃນບັນດາພື້ນທີ່ ທີ່ໄດ້ຮັບອະນຸຍາດການຂຸດຄົ້ນ ເພື່ອແນໃສ່ປະເມີນລາຄາທີ່ແນ່ນອນທາງດ້ານຄຸນນະພາບ ແລະ ປະລິມານສະສົມຂອງແຮ່, ໄດ້ດຳເນີນການເຊັນສັນຍາ ກັບໜ່ວຍງານຊີເຈາະສຳຫຼວດທີ່ມີຊື່ສຽງລະດັບສາກົນ.

ທ່ານ ໄຊສົມພອນ ພົມວິຫານ ໄດ້ເນັ້ນໃຫ້ບໍລິສັດເອົາໃຈໃສ່ບາງບັນຫາ ເປັນຕົ້ນແມ່ນວຽກງານການປົກປັກຮັກສາສິ່ງແວດລ້ອມ ແລະ ທໍາມະຊາດ ເນື່ອງຈາກວ່າການລົງທຶນຂຸດຄົ້ນບໍ່ແຮ່ ມີການນໍາໃຊ້ເຕັກນິກ ເຕັກໂນໂລຊີທີ່ທັນສະໄໝ ຊຶ່ງອາດສົ່ງຜົນກະທົບຕໍ່ຄຸນນະພາບຂອງນໍ້າ ທີ່ປະຊາຊົນນໍາໃຊ້ເຂົ້າໃນການດໍາລົງຊີວິດປະຈໍາວັນ.

ຖ້າການຂຸດຄົ້ນບໍ່ແຮ່ ສົ່ງຜົນກະທົບຕໍ່ແມ່ນໍ້າລໍາເຊ ກໍຂໍໃຫ້ບໍລິສັດຄົ້ນຄວ້າຊອກຫາວິທີການບໍາບັດ ແລະ ວິທີການອື່ນທີ່ຈະເກີດຜົນກະທົບໜ້ອຍທີ່ສຸດ. ການຊົດເຊີຍຜົນກະທົບຕໍ່ບ່ອນຢູ່ອາໄສ, ທີ່ດິນທໍາການຜະລິດຂອງປະຊາຊົນ ຖ້າມີກໍໃຫ້ເອົາໃຈໃສ່ຄົ້ນຄວ້າຊອກຫາວິທີແກ້ໄຂຢ່າງເໝາະສົມ. ພ້ອມກັນນີ້, ການລົງທຶນຂຸດຄົ້ນບໍ່ແຮ່ ເປັນການລົງທຶນທີ່ປະຊາຊົນໃຫ້​ຄວາມສົນໃຈຫຼາຍ ແລະ ເອົາໃຈໃສ່ຕິດຕາມການດໍາເນີນໂຄງການ ໂດຍສະເພາະປະຊາຊົນທີ່ອາໄສຢູ່ທ້ອງຖິ່ນທີ່ຕິດພັັນກັບຊັບພະ​ຍາ​ກອນດັ່ງກ່າວ.

ສະນັ້ນ, ຈຶ່ງສະເໜີໃຫ້ບໍລິສັດເອົາໃຈໃສ່ປະຕິບັດໂຄງການລົງທຶນຕາມກົດໝາຍກໍານົດ; ພ້ອມ​ທັງຮັບປະກັນ 3 ຜົນປະໂຫຍດ ເປັນຕົ້ນຜົນປະໂຫຍດລວມຂອງປະເທດຊາດ, ຜົນປະໂຫຍດຂອງຜູ້ລົງທຶນ ແລະ ຜົນປະໂຫຍດຂອງທ້ອງຖິ່ນ, ບ່ອນບໍ່ແຮ່ຕັ້ງຢູ່ກໍໃຫ້ໄດ້ຮັບການພັດທະນາ.

ນອກຈາກນີ້.ການປະກອບສ່ວນຂອງຜູ້ລົງທຶນ ເຂົ້າໃນການພັດທະນາທ້ອງຖິ່ນ ເປັນແນວທາງນະ ໂຍບາຍ ທັງເປັນວຽກງານທີ່ສໍາຄັນຫຼາຍ, ໂຄງການລົງທຶນໄດ້ຮັບຜົນສໍາເລັດ, ທ້ອງຖິ່ນກໍໄດ້ຮັບການພັດທະນາ ເພື່ອແກ້ໄຂບັນຫາຮ້ອງຂໍຕໍ່ວ່າຂອງປະຊາຊົນ ທີ່ດໍາລົງຊີວິດຢູ່ຂອບເຂດດັ່ງກ່າວ ທັງເປັນການສ້າງຄວາມກົມກຽວ ລະຫວ່າງ ຜູ້ລົງທຶນ ແລະ ປະຊາຊົນ.

ຂໍ້​ມູນ​ຈາກ: ສະ​ພາ​ແຫ່ງ​ຊາດ

ລມ​ຕ ກະຊວງການເງິນ ເຄື່ອນໄຫວຊຸກວຽກການເງິນ ຕ້ານການຮົ່ວໄຫຼລາຍຮັບຢູ່ແຂວງຊຽງຂວາງ ໃນຫວ່າງບໍ່ດົນມານີ້, ທ່ານ ບຸນໂຈມ ອຸບົນປະເສີດ ກຳມະການສູນກາງພັກ ລັດຖະມົນຕີກະຊວງການເງິນ ພ້ອມດ້ວຍຄະນະ ໄດ້ຢ້ຽມຢາມ ແລະ ເຮັດວຽກຢູ່ແຂວງຊຽງຂວາງ, ໂດຍການຕ້ອນຮັບຂອງທ່ານ ບຸນຈັນ ສີວົງພັນ ກຳມະການສູນກາງພັກ ເຈົ້າແຂວງຊຽງຂວາງ, ຄະນະພະແນກການເງິນ, ຫົວໜ້າຫ້ອງການ-ການເງິນ, ພະນັກງານ – ລັດຖະກອນຂະແໜງການເງິນເຂົ້າຮ່ວມ.

ໂອກາດນີ້, ທ່ານລັດຖະມົນຕີກະຊວງການເງິນ ພ້ອມດ້ວຍຄະນະໄດ້ຮັບຟັງການລາຍງານການຈັດຕັ້ງປະຕິບັດວຽກງານໄລຍະຜ່ານມາຂອງຂະແໜງການເງິນແຂວງຊຽງຂວາງ ຈາກທ່ານ ຄຳພູມີ ບົວລະພີມ ຫົວໜ້າພະແນກການເງິນແຂວງຊຽງຂວາງ ຊຶ່ງໄດ້ຍົກໃຫ້ເຫັນການເຄື່ອນໄຫວວຽກງານການຈັດຕັ້ງປະຕິບັດວາລະແຫ່ງຊາດໃນການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ທີ່ຕິດພັນກັບຄຳສັ່ງເລກທີ 18/ນຍ ວ່າດ້ວຍ ການຕ້ານການຮົ່ວໄຫຼລາຍຮັບທຸກຮູບແບບ, ການແກ້ໄຂພາຫະນະທີ່ນຳເຂົ້າທີ່ບໍ່ຖືກຕ້ອງ, ການຕິດຕັ້ງຊິງຊັ່ງທີ່ທັນສະໄໝຢູ່ດ່ານສາກົນນ້ຳກັ່ນ (ສ້າງແລ້ວ, ແຕ່ຍັງເປີດນຳໃຊ້ບໍ່ໄດ້ເພາະເຄື່ອງປະກອບຍັງບໍ່ຄົບ), ຄາດຄະເນລາຍຮັບງົບປະມານທັງໝົດ 148,93 ຕື້ກີບ, ຄາດຄະເນລາຍຈ່າຍງົບປະມານທັງໝົດ 424,21 ຕື້ກີບ (ບໍ່ມີລາຍຈ່າຍພາກລົງທຶນ).

ໂອກາດນີ້, ທ່ານ ບຸນໂຈມ ອຸບົນປະເສີດ ໄດ້ເນັ້ນໃຫ້ການ​ເງິນ​ແຂວງເອົາໃຈໃສ່ໃນການຄຸ້ມຄອງການຈັດເກັບລາຍຮັບ, ຊິງຊັ່ງ, ແຮ່ທາດ ຫັນໄປສູ່ຄວາມທັນສະໄໝ ໂດຍນຳໃຊ້ເຄື່ອງເອເລັກໂຕຣນິກເປັນຕົ້ນແມ່ນຊິງຊັ່ງຢູ່ດ່ານສາກົນນ້ຳກັ່ນ, ເພື່ອສະດວກໃນການກວດກາຕິດຕາມ ແລະ ຕ້ານການຮົ່ວໄຫຼລາຍຮັບ, ກວດກາເກັບອາກອນທີ່ດິນ, ແຮງງານ, ສິ່ງແວດລ້ອມໃຫ້ມີຄຸນນະພາບ, ປັບປຸງບຸກຄະລາກອນ, ປະເມີນຜົນພະນັກງານ, ຝຶກອົບຮົມວຽກງານອຸປະກອນຮັບໃຊ້, ກວດກາຄືນລົດປະຈຳຕຳແໜ່ງ ແລະ ບັນຫາອື່ນໆ.

ຂໍ້ມູນຂ່າວ-ພາບ: ກະ​ຊວງ​ການ​ເງິນ