ຕາມການລາຍງານ ຂອງກູ້ໄພມູນນິທິຈີນ1628 ໃຫ້ຮູ້ວ່າ: ເວລາປະມານທ່ຽງຄືນ ຂອງວັນທີ 22 ເມສາ 2022 ໄດ້ມີລາຍງານ ອຸບັດຕິເຫດ ລະຫວ່າງ ລົດເກັງ + ລົດກະບະ ທີ່ສີ່ແຍກໄຟແດງທົ່ງຂັນຄຳ ເມືອງຈັນທະບູລີ ນະຄອນຫຼວງວຽງຈັນ ເຮັດໃຫ້ມີຜູ້ເສຍຊີວິດ 1 ແລະ ບາດເຈັບ 1 ເຊິ່ງໄດ້ນຳຕົວສົ່ງໂຮງໝໍມິດຕະພາບເປັນທີ່ຮຽບຮ້ອຍ.

.

ຂໍສະແດງຄວາມເສຍໃຈນຳຍາດຜູ້ເສຍຊີວິດ

ສຳລັບປ້າຍຂອງລົດເກງແມ່ນ ວຣໍຮ 9669

ແຂວງສາລະວັນ ໄດ້ຈັດກອງປະຊຸມສະຫຼຸບການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ ໄລຍະທີ 1 ນັບແຕ່ເດືອນກັນຍາ ຫາເດືອນທັນວາ 2021 ແລະ 3 ເດືອນຕົ້ນປີ 2022 ຂຶ້ນໃນວັນທີ 21 ເມສາ ນີ້ ທີ່ຫ້ອງປະຊຸມສະໂມສອນແຂວງ ໂດຍການເປັນປະທານຂອງ ທ່ານ ໂພໄຊ ໄຊຍະສອນ ກຳມະການສູນກາງພັກ ເລຂາພັກແຂວງ ເຈົ້າແຂວງສາລະວັນ ປະທານວຽກງານປ້ອງກັນຊາດ-ປ້ອງກັນຄວາມສະຫງົບແຂວງ, ມີບັນດາພາກສ່ວນກ່ຽວຂ້ອງ ແລະ ແຂກຖືກເຊີນເຂົ້າຮ່ວມ.

ໃນໄລຍະຜ່ານມາ, ແຂວງສາລະວັນ ໄດ້ເກັບກຳຂໍ້ມູນພື້ນຖານ ຢ່າງລະອຽດ ແລະ ຂຶ້ນເປົ້າໝາຍ ທີ່ພົວພັນກັບຢາເສບຕິດ ໃນປີ 2021 ມີທັງໝົດ 11 ພັນກວ່າຄົນ. ໃນນັ້ນ, ຜູ້ເສບ 6 ພັນກວ່າຄົນ, ຄ້າ-ຂາຍ 4 ພັນກວ່າຄົນ ຍິງ 324 ຄົນຊຶ່ງມີລາຍໃຫຍ່ 534 ຄົນ ຍິງ 36 ຄົນ, ກາງ 964 ຄົນ ຍິງ 164 ຄົນ ແລະ ລາຍຍ່ອຍ 3 ພັນກວ່າຄົນ ຍິງ 124 ຄົນ, ມີສະຖານທີ່ອຳນວຍຄວບຄຸມຄວາມສະດວກບ່ອນມົ້ວສຸມ 1 ພັນກວ່າຈຸດ. ມາຮອດເດືອນ 3 ປີ 2022 ຈຳນວນເປົ້າໝາຍທີ່ມີການພົວພັນກັບຢາເສບຕິດ ຫຼຸດລົງຍັງເຫຼືອ 5 ພັນກວ່າຄົນ. ໃນນັ້ນ, ຜູ້ເສບ 5 ພັນກວ່າຄົນ, ຄ້າ-ຂາຍ 704 ຄົນ ຊຶ່ງມີຜູ້ຄ້າ-ຂາຍ ລາຍໃຫຍ່ 40 ຄົນ, ກາງ 69 ຄົນ ຍິງ 6 ຄົນ ລາຍຍ່ອຍມີ 595 ຄົນ ຍິງ 8 ຄົນ.

ນັບແຕ່ເດືອນກັນຍາ 2021 ຫາ ເດືອນມີນາ 2022 ສາມາດມ້າງຄະດີຢາເສບຕິດໄດ້ 114 ເລື່ອງ, ກັກຜູ້ຖືກຫາໄດ້ທັງໝົດ 167 ຄົນ ຍິງ 11 ຄົນ, ຢຶດຂອງກາງ (ຢາບ້າ) 186.608 ເມັດ, ໂທລະສັບມືຖື 81 ໜ່ວຍ, ລົດຈັກ 28 ຄັນ, ລົດໃຫຍ່ 24 ຄັນ, ເງິນກີບ 290 ລ້ານກວ່າກີບ, ສະເພາະ 3 ເດືອນຕົ້ນປີ 2022 ມ້າງຄະດີໄດ້ 29 ເລື່ອງ, ກັກຜູ້ຖືກຫາໄດ້ 42 ຄົນ ຍິງ 2 ຄົນ, ຢຶດຂອງກາງໄດ້ທັງໝົດຄື: ຢາບ້າ 89.845 ເມັດ, ຢາໄອ 10 ຖົງນ້ອຍ, ໂທລະສັບມືຖື 39 ໜ່ວຍ, ລົດໃຫຍ່ 6 ຄັນ, ລົດຈັກ 8 ຄັນ, ເງິນ 261 ລ້ານກວ່າກີບ.

ສຳລັບທິດທາງຕໍ່ໜ້າສືບຕໍ່ກວດກາ ແລະ ຈັດຕັ້ງປະຕິບັດແຜນວຽກຕາມວາລະແຫ່ງຊາດ ແລະ ເອົາໃຈໃສ່ຈັດຕັ້ງເຊື່ອມຊຶມວຽກງານດັ່ງກ່າວ ໃຫ້ກັບບັນດາພະແນກການຕ່າງໆ, ອົງການຈັດຕັ້ງ ເປັນຜູ້ຈັດຕັ້ງປະຕິບັດ ແລະ ເອົາໃຈໃສ່ໂຄສະນາຜ່ານສື່ຕ່າງໆໃຫ້ສັງຄົມໄດ້ຮັບຮູ້, ສືບຕໍ່ສ້າງ ແລະ ປັບປຸງນິຕິກໍາໃຕ້ກົດໝາຍທີ່ກ່ຽວຂ້ອງກັບບັນຫາຢາເສບຕິດ, ປັບປຸງການຈັດຕັ້ງ ແລະ ຍົກລະດັບຄວາມສາມາດ ຂອງອົງການສືບສວນ-ສອບສວນ ແລະ ພາກສ່ວນທີ່ກ່ຽວຂ້ອງ ສືບຕໍ່ຮ່ວມືກັບຄະນະປະສານງານຢາເສບຕິດປະຈຳພື້ນທີ່ຕາມບໍລິເວນຊາຍແດນ ແລະ ບັນຫາອື່ນໆ.

(ຂ່າວ-ພາບ: ສິດຕາ ເພັດວົງສາ)

ນາຍົກລັດຖະມົນຕີ ກ່າວປາໃສໃນ ກອງປະຊຸມ ທາງໄກ ເວທີປຶກສາຫາລື ໂບອາວ ເພື່ອອາຊີ 2022.

ວັນທີ 21 ເມສາ 2022 ນີ້, ທ່ານ ພັນຄໍາ ວິພາວັນ ນາຍົກລັດຖະມົນຕີ ແຫ່ງ ສປປ ລາວ ໄດ້ເຂົ້າຮ່ວມ ແລະ ກ່າວຄໍາປາໃສໃນພິທີເປີດກອງປະຊຸມທາງໄກ ເວທີປຶກສາຫາລື ໂບອາວ ເພື່ອອາຊີ 2022 ພາຍໃຕ້ຫົວຂໍ້ “ໂລກໃນທ່າມກາງການລະບາດຂອງພະຍາດໂຄວິດ-19: ຮ່ວມມືກັນເພື່ອການພັດທະນາ ແລະ ອະນາຄົດຮ່ວມກັນ”. ໂດຍມີ ທ່ານ ສີ ຈິ້ນຜິງ ປະທານປະເທດ ແຫ່ງ ສປ ຈີນ ພ້ອມດ້ວຍການນໍາຂັ້ນສູງຈາກບັນດາປະເທດໃນອາຊີ ແລະ ເຈົ້າໜ້າທີ່ຂັ້ນສູງ ຈາກອົງການຈັດຕັ້ງສາກົນ ເຂົ້າຮ່ວມ.

ໂອກາດນີ້, ທ່ານ ພັນຄຳ ວິພາວັນ ໄດ້ຍົກໃຫ້ເຫັນຜົນກະທົບຂອງການແພ່ລະບາດຂອງພະຍາດໂຄວິດ-19, ການຮ່ວມມືຂອງວົງຄະນາຍາດສາກົນໃນການປ້ອງກັນ ແລະ ຄວບຄຸມການລະບາດຂອງພະຍາດໂຄວິດ-19 ແລະ ຜົນສໍາເລັດທີ່ຍາດມາໄດ້ ໂດຍໄດ້ກ່າວວ່າ: “ການແພ່ລະບາດຂອງພະຍາດໂຄວິດ-19 ໄດ້ສ້າງຜົນກະທົບຢ່າງຫລວງຫລາຍ ຕໍ່ວົງຄະນະຍາດສາກົນ ໃນທຸກລະດັບບໍ່ວ່າໃນລະດັບໂລກ, ພາກພື້ນ ແລະ ລະດັບຊາດ ເຊິ່ງໄດ້ກາຍເປັນສິ່ງທ້າທາຍຢ່າງໃຫຍ່ຫລວງ ຕໍ່ລະບົສາທາລະນະສຸກ ກໍຄື ການພົວພັນໃນສັງຄົມ ຢູ່ພາຍໃນປະເທດ ແລະ ລະຫວ່າງປະເທດ ແລະ ຍັງໄດ້ສົ່ງຜົນກະທົບຢ່າງໜັກໜ່ວງຕໍ່ການຟື້ນຕົວ ແລະ ຂະຫຍາຍຕົວຂອງເສດຖະກິດໂລກ.

ຕໍ່ໜ້າສະພາບການດັ່ງກ່າວ, ວົງຄະນະຍາດສາກົນ ກໍໄດ້ໃຊ້ຄວາມພະຍາຍາມຮ່ວມກັນ ຢ່າງຕັ້ງໜ້າ ເພື່ອສະກັດກັ້ນການແພ່ລະບາດ ແລະ ວາງມາດຕະການຮັບມືກັບພະຍາດໂຄວິດ-19 ໄດ້ຢ່າງທັນການ ໂດຍສະເພາະແມ່ນການຮ່ວມມືກັນ ໃນການຄົ້ນຄວ້າວິທະຍາສາດການແພດ ເພື່ອຜະລິດວັກຊິນ ແລະ ຢາປົວພະຍາດໂຄວິດ-19, ການປັບຕົວເຂົ້າກັບການດໍາລົງຊິວິດປົກກະຕິແບບໃໝ່.”

ແຫຼ່ງຂ່າວ: ປະເທດລາວ

ຊົມເຊີຍເຈົ້າໜ້າທີ່ ປກສ ເມືອງໄຊທານີ ມ້າງເຄື່ອຄ່າຍຄະດີຢາເສບຕິດລາຍໃຫຍ່.

ຕາມການລາຍງານ ຂອງຄວາມສະຫງົບ ໃຫ້ຮູ້ວ່າ: ວັນທີ 21 ເມສາ 2022 ທີ່ກອງບັນຊາການ ປກສ ເມືອງໄຊທານີ, ພັທ ສຸລິວັນ ແກ້ວມະນີວົງ ຮອງຫົວໜ້າກອງບັນຊາການ ປກສ ເມືອງໄຊທານີ ນະຄອນຫຼວງວຽງຈັນ ຜູ້ຊີ້ນຳວຽກງານຕຳຫຼວດ ໄດ້ໃຫ້ຮູ້ວ່າ: ໃນວັນທີ 16 ມີນາ 2022, ເຈົ້າໜ້າທີ່ພະແນກຕຳຫຼວດ ປກສ ເມືອງ ສາມາດມ້າງເຄື່ອຄ່າຍຂະບວນການຄ້າຂາຍຢາເສບຕິດ ໄດ້ຢູ່ 5 ຈຸດ, ຈັບໄດ້ຜູ້ຖືກຫາທີ່ກ່ຽວພັນກັບການຊື້ຂາຍຢາເສບຕິດໄດ້ 6 ຄົນ ແລະ ຜູ້ມົ້ວສຸມຈຳນວນໜຶ່ງ.

ການມ້າງຄະດີຢາເສບຕິດຄັ້ງນີ້ ເຈົ້າໜ້າທີ່ສາມາດຢຶດຢາບ້າໄດ້ຈຳນວນ 471.465 ເມັດ, ຢາໄອສ໌ 6 ຖົງໃຫຍ່ ກັບ 3 ຖົງນ້ອຍ, ເຮໂຣອິນ 1 ຖົງນ້ອຍ, ປືນສັ້ນ 9ມມ 1 ກະບອກ ພ້ອມລູກປືນ 13 ລູກ, ລົດໃຫຍ່ 2 ຄັນ, ລົດຈັກ 3 ຄັນ, ເງິນ 6,400,000 ກີບ, 82,000 ບາດ, 1,000 ໂດຍລາ, ສາຍແຂນຄຳ 1 ເສັ້ນ, ແວນຄຳ 1 ວົງ, ສາຍຄໍຄຳ 1 ເສັນ.

ສຳລັບລາຍລະອຽດໜັງສືພິມຄວາມສະຫງົບ ຈະລາຍງານອີກຄັ້ງ.

ປັດຈຸບັນ, ຫ້ອງການຄຸ້ມຄອງ ແລະ ບໍລິການຕົວເມືອງວຽງຈັນ (ຄບຕ) ຍັງພົບຄວາມຄວາມຫຍຸ້ງຍາກ ໃນການເກັບມ້ຽນຂີ້ເຫຍື້ອ ແລະ ຍັງມີຫາງສຽງຈົ່ມວ່າຈາກສັງຄົມ ໃນການຈັດຕັ້ງປະຕິບັດວຽກງານ ເພາະບໍ່ ທັນໄດ້ດີເທົ່າທີ່ຄວນ, ແຕ່ຢ່າງໃດກໍຕາມໃນຕໍ່ຫນ້າ ຫ້ອງການ ຄບຕ ຈະມີການປັບປຸງຮ່າງນິຕິກໍາຄືນໃຫມ່ ແລະ ຂອດຈັດຕັ້ງປະຕິບັດໃຫ້ດີກວ່າເກົ່າ.

ອີງຕາມ ທ່ານ ບຸນຈັນ ແກ້ວສີທໍາມະ ຫົວຫນ້າຫ້ອງການ ຄບຕ ໃຫ້ສໍາພາດ ວ່າ: ຜ່ານມາ, ການຈັດຕັ້ງປະຕິບັດກ່ຽວກັບ ການເກັບມ້ຽນຂີ້ເຫຍື້ອ ໃນນະຄອນຫຼວງວຽງຈັນ ຍັງພົບ ຄວາມຫຍຸ້ງຍາກຫຼາຍ ຍ້ອນວ່າຍັງມີປະຊາຊົນຈໍານວນໜຶ່ງບໍ່ເຮັດສັນຍາເກັບມ້ຽນຂີ້ເຫຍື້ອ ຍ້ອນບໍ່ຢາກຈ່າຍເງິນ, ເຮັດໃຫ້ເກີດມີການລັກເອົາຂີ້ເຫຍື່ອໄປຖີ້ມໃສ່ເນື້ອທີ່ດິນເປົ່າຫວ່າງຕ່າງໆ; ຂະນະດຽວກັນ, ບາງຄອບຄົວທີ່ເຮັດສັນຍາແລ້ວເອົາຂີ້ເຫຍື້ອອອກມາປະໄວ້ໜ້າເຮືອນ ກ່ອນມື້ລົດຈະໄປເກັບເອົາ ເຮັດໃຫ້ມີສັດ ແລະ ບຸກຄົນຈໍານວນຫນຶ່ງທີ່ເລາະເກັບເອົາຕຸກເປົ່າໄປຂາຍ ຄົ້ນຮື້ຈົນເປົ້າຂາດ ຫຼື ເຂັ້ງລົ້ມ ເຮັດໃຫ້ຂີ້ເຫຍື້ອ ຕົກເຮຍຊະຊາຍໄປບ່ອນອື່ນ. ນອກນີ້, ມີບາງບ່ອນເປັນທາງຮ່ອມແຄບ ເຮັດໃຫ້ລົດເກັບມ້ຽນຂີ້ເຫຍື້ອ ເຂົ້າເຖິງບໍ່ໄດ້ ແລະອື່ນໆ.

ຄຽງຄູ່ກັນນີ້, ໃນໄລຍະຜ່ານມາ ການຈັດຕັ້ງປະຕິບັດເກັບມ້ຽນຂີ້ເຫຍື້ອຂອງ ຫ້ອງການ ຄບຕ ຍັງມີ ຫາງສຽງຈໍານວນໜຶ່ງເກີດຂຶ້ນໃນສັງຄົມກ່ຽວກັບ ບັນຫາລົດບໍ່ໄປເກັບເອົາຂີ້ເຫຍື້ອຢູ່ບັນດາຄອບຄົວທີ່ມີ ສັນຍາກັນໄວ້, ເຊິ່ງຄະນະຮັບຜິດຊອບທີ່ກ່ຽວຂ້ອງຂອງ ຄບຕ ໄດ້ກວດກາຢ່າງລະອຽດ ເຫັນວ່າ: ມີຄົນຂັບລົດ ແລະ ແອັດລົດເກັບມ້ຽນຂີ້ເຫຍື້ອຈໍານວນໜຶ່ງ ສວຍຊ່ອງວ່າງຫາຜົນປະໂຫຍດສ່ວນຕົວ ດ້ວຍການເຮັດສັນຍາເກັບມ້ຽນຂີ້ເຫຍື້ອກັບປະຊາຊົນໂດຍທີ່ ຄບຕ ບໍ່ຮູ້ເລື່ອງນໍາ.

ນອກຈາກນີ້, ຍັງໄດ້ສວຍໂອກາດເກັບເງິນນໍາບາງຄອບຄົວ ທີ່ໄດ້ເຮັດສັນຍາເກັບມ້ຽນຂີ້ເຫຍື້ອ ແຕ່ມີຂີ້ເຫຍື້ອເກີນກໍານົດ ເນື່ອງຈາກຕາມສັນຍາທີ່ເຮັດໄວ້ກັບ ຄບຕ ຄອບຄົວຫນຶ່ງແມ່ນ ອະນຸຍາດໃຫ້ມີຂີ້ເຫຍື້ອ 1 ເຄັ່ງ ຫຼື 1 ເປົ້າຕໍ່ອາທິດ (ອາທິດໜຶ່ງມີລົດໄປເກັບເອົາຂີ້ເຫຍື້ອ 1 ຄັ້ງ), ລວມ 1 ເດືອນ ລົດຕ້ອງໄປເກັບ ມ້ຽນຂີ້ເຫຍື້ອ ທັງໝົດ 4 ຄັ້ງ ໃນລາຄາ 40.000 ກີບ/ເດືອນ, ແຕ່ບາງຄອບຄົວມີຂີ້ເຫຍື້ອເກີນກໍານົດ ເຮັດໃຫ້ຄົນຂັບລົດ ແລະ ແອັດລົດສວຍໂອກາດຂໍເງິນເພີ່ມແຕ່ເອົາເຂົ້າຖົງຕົວເອງ, ຖ້າຄອບຄົວໃດຈ່າຍກໍເກັບມ້ຽນຂີ້ເຫຍື້ອໄປ ແຕ່ຄອບຄົວໃດບໍ່ຈ່າຍກໍ່ປະຖີ້ມຂີ້ເຫຍື້ອທີ່ເກີນກໍານົດນັ້ນໄວ້ແລ້ວໜີໄປ ເຮັດໃຫ້ຂີ້ເຫຍື້ອ ທີ່ປະໄວ້ເຮ່ຍຊະຊາຍ ເມື່ອຄົນມາເຫັນຈຶ່ງຕີລາຄາວ່າລົດບໍ່ໄປເກັບມ້ຽນຂີ້ເຫຍື້ອ ແລ້ວເກີດມີຫາງສຽງຂຶ້ນ.

ເພື່ອແກ້ໄຂບັນຫາທີ່ເກີດຂຶ້ນ ທາງ ຄບຕ ໄດ້ຮຽກຄົນຂັບລົດ ແລະ ແອັດລົດທີ່ກະທໍາຜິດມາສຶກສາ ອົບຮົມກ່າວເຕືອນແລ້ວ, ຖ້າມີການກະທໍາຜິດອີກ ຈະຖືກໄລ່ອອກທັນທີ.

ນອກຈາກນີ້, ຄບຕ ກໍາລັງປັບປຸງ ນິຕິກໍາກ່ຽວກັບ ການເກັບມ້ຽນຂີ້ເຫຍື້ອຄືນໃຫມ່ໃຫ້ເຂັ້ມງວດ ເພື່ອໃຫ້ແຕ່ລະຄອບຄົວໄດ້ຈ່າຍຄ່າຂີ້ເຫຍື້ອ ຕາມຕົວຈິງທີ່ມີໃນຄອບຄົວ ແລະ ຮັບປະກັນບໍ່ໃຫ້ມີການສວຍໃຊ້ຊ່ອງວ່າງຫາຜົນປະໂຫຍດສ່ວນຕົວເກີດຂຶ້ນ ແລະ ຮັບປະກັນບໍ່ໃຫ້ມີລາຍຮັບຕົກເຮ່ຍເສຍຫາຍເກີດຂຶ້ນ ເພາະນີ້ຖືເປັນມາດຕະການນຶ່ງໃນການຈັດຕັ້ງປະຕິບັດວາລະແຫ່ງຊາດວ່າດ້ວຍ ການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ຂອງ ລັດຖະບານ, ເຊິ່ງຄາດວ່າ ການປັບປຸງຈະສໍາເລັດໃນອີກບໍ່ດົນນີ້ ເພື່ອໃຫ້ກອງປະຊຸມສະພາປະຊາຊົນ ນະຄອນຫຼວງວຽງຈັນ ພິຈາລະນາ ແລະ ຮັບຮອງເອົາໃນຕໍ່ຫນ້າ.

ດັ່ງນັ້ນ, ຫົວໜ້າຫ້ອງການ ຄບຕ ໄດ້ຮຽກຮ້ອງໃຫ້ທຸກຄອບຄົວ ຈົ່ງເຮັດສັນຍາເກັບມ້ຽນຂີ້ເຫຍື້ອນໍາ ຄບຕ ເພື່ອບໍ່ໃຫ້ມີການຖີ້ມຂີ້ເຫຍື້ອຊະຊາຍເກີດຂຶ້ນ, ທັງເປັນການປະກອບສ່ວນໃນການຈັດຕັ້ງປະຕິບັດ ສ.ສະອາດ ຂອງນະຄອນຫຼວງວຽງຈັນ ຕື່ມອີກ.

ແຫຼ່ງຂ່າວ: ຄວາມສະຫງົບ