ຫ້ອງວ່າການແຂວງບໍ່ແກ້ວ ອອກແຈ້ງການ! ເລື່ອງ ເປີດການເຂົ້າ – ອອກ ດ່ານສາກົນຄືນ ທຸກດ່ານຢູ່ແຂວງບໍ່ແກ້ວ.
.
ຄົບຊຸດທັງຢາບ້າ ແລະ ຂອງຜິດກົດໝາຍ
ເຈົ້າໜ້າທີ່ ປກສ ນະຄອນໄກສອນ ຈັບກຸມຕົວເປົ້າໝາຍຄ້າຂາຍຢາເສບຕິດ ຈໍານວນ 381 ມັດ ເທົ່າກັບກັບ 762.078 ເມັດ ພ້ອມສິ່ງຜິດກົດໝາຍອີກຫຼາຍຢ່າງ.
ໃນວັນທີ 16 ພຶດສະພາ 2022 ນີ້, ເຈົ້າໜ້າທີ່ກອງບັນຊາການປ້ອງການຄວາມສະຫງົບ (ປກສ)ນະຄອນໄກສອນພົມວິຫານ ໄດ້ລາຍງານຕໍ່ນັກຂ່າວຂອງພວກເຮົາວ່າ: ໃນວັນທີ 13/5/2022 ເຈົ້າໜ້າທີ່ໜ່ວຍງານສະກັດກັ້ນ-ຕ້ານຢາເສບຕິດ ປກສ ນະຄອນໄກສອນ ໄດ້ອອກເຄື່ອນໄຫວປະຕິບັດໜ້າທີ່ວິຊາສະເພາະຕິດຕາມເປົ້າໝາຍຄ້າ-ຂາຍຢາເສບຕິດ ໃນຂອບເຂດນະຄອນໄກສອນພົມວິຫານ.
ໃນເວລາປະມານ 13 ໂມງ ຂອງວັນດຽວກັນນີ້ ເມື່ອເຄື່ອນໄຫວມາຮອດເຂດບ້ານຫົວເມືອງໃຕ້ ໄດ້ພົບເຫັນເປົ້າໝາຍຄ້າ-ຂາຍຢາເສບຕິດ, ເຈົ້າໜ້າທີ່ພວກເຮົາຈຶ່ງໄດ້ສະແດງຕົວເຂົ້າຈັບກຸມ, ເມື່ອເປົ້າໝາຍເຫັນເຈົ້າໜ້າທີ່ກໍ່ໄດ້ເອົາຕົວຫຼົບໜີ ແລ້ວຖິ້ມເຄື່ອງຂອງກາງໄວ້ໃນສະຖານທີ່ດັ່ງກ່າວ. ຜ່ານການກວດກາຕົວຈິງພົບເຫັນຢາເສບຕິດ (ຢາບ້າ) ຈໍານວນ 3 ມັດ ເທົ່າກັບ 6.000 ເມັດ, ຈາກນັ້ນ ເຈົ້າໜ້າທີ່ຈຶ່ງໄດ້ສຸມກໍາລັງຕິດຕາມຊອກຄົ້ນຫາເປົ້າໝາຍດັ່ງກ່າວເພື່ອຈັບກຸມຕົວມາດໍາເນີນຄະດີຕາມລະບຽບກົດໝາຍ.
ຈົນຮອດເວລາປະມານ 20 ໂມງຂອງວັນດຽວກັນ ຈຶ່ງສາມາດຈັບຕົວເປົ້າໝາຍດັ່ງກ່າວໄດ້ ເຊິ່ງມີຊື່ທ້າວ ໄຊສົມພອນ ຫຼື ບອຍ ອາຍຸ 26 ປີ, ອາຊີບວ່າງງານ, ບ້ານລັດຕະນະລັງສີເໜືອ ນະຄອນໄກສອນພົມວິຫານ ແຂວງສະຫວັນນະເຂດ , ພ້ອມທັງທໍາການກວດຄົ້ນຕົວຂອງຜູ້ກ່ຽວໄດ້ພົບເຫັນຢາອີ ຈໍານວນ 16 ເມັດ ຊຸກເຊື່ອງໄວ້ໃນຖົງໂສ້ງທາງເບື້ອງຂວາ, ມີໂທລະສັບມືຖືຍີ່ຫໍ້ຊໍາຊຸງ A72 ສີດໍາ 1 ໜ່ວຍ. ຈາກນັ້ນ, ຈຶ່ງໄດ້ສົມທົບກັບພາກສ່ວນທີ່ກ່ຽວຂ້ອງນໍາຕົວຜູ້ກ່ຽວໄປກວດຄົ້ນເຄຫະສະຖານບ່ອນທີ່ຜູ້ກ່ຽວພັກອາໄສຢູ່ບ້ານຫົວເມືອງໃຕ້ ຜ່ານການກວດຄົ້ນຫ້ອງນອນຂອງຜູ້ກ່ຽວໄດ້ພົບເຫັນສິ່ງທີ່ຜິດຕໍ່ລະບຽບກົດໝາຍຄື:
ຢາເສບຕິດ (ຢາບ້າ) ຈໍານວນ 378 ມັດ ກັບອີກ 78 ເມັດ ເທົ່າກັບ 756.078 ເມັດ, ຢາອີ ຈໍານວນ 4 ຖົງ ເທົ່າກັບ 361 ເມັດ, ອາວຸດປືນສັ້ນ 1 ກະບອກ ພ້ອມລູກກະສຸນຈໍານວນ 60 ລູກ. ລວມເຄື່ອງຂອງກາງທັງໝົດທີ່ຢຶດໄດ້ມີຢາບ້າ 381 ມັດ ກັບອີກ 78 ເມັດ ເທົ່າກັບ 762.078 ເມັດ, ຢາອີ 377 ເມັດ, ປືນສັ້ນ 1 ກະບອກ ພ້ອມກະສຸນ 60 ລູກ ແລະພາຫະນະລົດຈັກຍີ່ຫໍ້ຮອນດ້າ ລຸ້ນສະກຸບປີ້ໄອສີຄີມ 1 ຄັນ; ສໍາລັບຜູ້ກະທໍາຜິດແມ່ນຈະໄດ້ດໍາເນີນຄະດີຕາມລະບຽບກົດໝາຍ.
ຂໍ້ມູນ ແລະ ຮູບພາບຈາກ: ຫ້ອງການ ຖະແຫລ່ງຂ່າວ,ວັດທະນະທຳ ແລະ ທ່ອງທ່ຽວ ນະຄອນ ໄກສອນ ພົມວິຫານ
ເປີດບໍ່ແຮ່ໃຕ້ດິນຢູ່ ບໍ່ຄຳ-ທອງ ເຊໂປນຂອງ ບໍລິສັດ ລ້ານຊ້າງ ມິເນໂຣນສ໌ ລິມິເຕັດ
ຮອງລັດຖະມົນຕີ ກະຊວງພະລັງງານ ແລະ ບໍ່ແຮ່ ເປີດບໍ່ແຮ່ໃຕ້ດິນຢູ່ ບໍ່ຄຳ-ທອງ ເຊໂປນຂອງ ບໍລິສັດ ລ້ານຊ້າງ ມິເນໂຣນສ໌ ລິມິເຕັດ.
ວັນທີ 16 ພຶດສະພາ ທີ່ຜ່ານມາ, ຜູ້ມີສ່ວນຮ່ວມຈາກຊຸມຊົນ ແລະ ພາກລັດຖະບານໄດ້ຢ້ຽມຢາມ ບໍ່ຄຳ-ທອງ ເຊໂປນຂອງ ບໍລິສັດ ລ້ານຊ້າງ ມິເນໂຣນສ໌ ລິມິເຕັດ (ລຊມລ) ເພື່ອ ເປີດ ບໍ່ແຮ່ໃຕ້ດິນທັນສະໄໝແຫ່ງທຳອິດ ໃນ ສປປ ລາວ.
ດ້ວຍປະລິມານສະສົມແຮ່ເພື່ອສຳຫຼວດທີ່ມີຫຼາຍກວ່າ 9,5 ລ້ານໂຕນ ແລະ ການຜະລິດແຮ່ທີ່ຄາດວ່າຈະເພີ່ມຂຶ້ນຈາກ 400.000 ໂຕນໃນປີ 2023 ເປັນ 1,2 ລ້ານໂຕນຕໍ່ປີ ໃນປີຕໍ່ໆມາ, ຄາດວ່າ “ອຸມົງສຳຫຼວດບໍ່ໃຕ້ດິນດິສໂຄເວີຣີດິບ” ຈະຂະຫຍາຍອາຍຸບໍ່ຄຳ-ທອງ ເຊໂປນ ໄປອີກ 7 ປີເປັນຢ່າງຕ່ຳ ໄປເຖິງປີ 2030 ແລະ ປະກອບສ່ວນຕໍ່ການຫລຸດຜ່ອນ ຄວາມທຸກຍາກ ແລະ ການພັດທະນາທີ່ຍືນຍົງໃນຊຸມຊົນເຈົ້າພາບ.
ທ່ານ ທອງພັດ ອິນທະວົງ, ຮອງລັດຖະມົນຕີກະຊວງພະລັງງານ ແລະ ບໍ່ແຮ່ (ປະທານຄະນະກຳມະການຄຸ້ມຄອງໂຄງການຄຳ-ທອງ ເຊໂປນ), ທ່ານນາງ ທິບພະກອນ ຈັນທະວົງສາ, ຮອງລັດຖະມົນຕີປະຈຳສຳນັກງານນາຍົກລັດຖະມົນຕີ ແລະ ທ່ານ ວຽງທະວີສອນ ເທບພະຈັນ, ຮອງເຈົ້າແຂວງໆສະຫວັນນະເຂດ, ທ່ານ ຄຳຜຸຍ ສີບຸນເຮືອງ, ເຈົ້າເມືອງໆວິລະບູລີ ພ້ອມການນຳຊຸມຊົນຈາກ ເມືອງວິລະບູລີ, ແຂວງສະຫວັນນະເຂດ ເຊິ່ງເປັນທີ່ຕັ້ງຂອງບໍ່ຄຳ-ທອງ ເຊໂປນ ແລະ ເຈົ້າໜ້າທີ່ພາກລັດ ໄດ້ໃຫ້ກຽດເຂົ້າຮ່ວມງານຄັ້ງນີ້.
ທ່ານ ພໍ ແຮຮິສ, ຜູ້ຈັດການໃຫຍ່ ລຊມລ ໄດ້ກ່າວວ່າ: “ໂຄງການຄຳ-ທອງ ເຊໂປນ ມີປະຫວັດສາດການຂຸດຄົ້ນບໍ່ແຮ່ມາຫຼາຍພັນປີ. ການພັດທະນາໃໝ່ນີ້ຈະນຳໃຊ້ອຸປະກອນທີ່ທັນສະໄໝ ແລະ ເຕັກນິກການຂຸດຄົ້ນບໍ່ແຮ່ທີ່ກ້າວໜ້າ ເພື່ອ ຖ່າຍທອດຄວາມຮູ້ ແລະ ທັກສະໃຫ້ແກ່ ພະນັກງານ ແລະ ຜູ້ຮັບເໝົາຄົນລາວ ກໍຄື ວິຊາການມືອາຊີບດ້ານບໍ່ແຮ່ທີ່ເປັນຄົນລາວ ເພື່ອວາງມາດຕະຖານໃໝ່ໆໃນການຂຸດຄົ້ນບໍ່ແຮ່ໃຕ້ດິນ.”
ທ່ານ ສະໝານ ອະເນກາ,ຜູ້ອໍານວຍການໃຫຍ່ ລຊມລ ໄດ້ກ່າວຂອບໃຈຄະນະຜູ່ແທນຈາກພາກລັດຂັ້ນສູນກາງ, ແຂວງ, ເມືອງ ແລະ ຕາງຫນ້າຈາກຊຸມຊົນທ້ອງຖິ່ນ ອ້ອມຂ້າງ ທີ່ໄດ້ເຂົ້າມາຮ່ວມໃນພິທີເປີດບໍ່ແຮ່ໃຕ້ດິນຄັ້ງນີ້. ພ້ອມກັນນີ້ ທ່ານສະໝານ ກໍຍັງໄດ້ກ່າວຕື່ມອີກວ່າ “ດ້ານການພັດທະນາຊຸຸມຊົນແມ່ນໄດ້ມີ ກອງທຶນພັດທະນາຊຸມຊົນ ທີ່ໄດ້ປະກອບສ່ວນໃນການພັດທະນາຊີວິດການເປັນຢູ່ຂອງຊຸມຊົນທ້ອງຖິ່ນໃນ3 ຂະແໜງການຫຼັກ ຄື: ດ້ານການຜະລິດສະບຽງອາຫານ, ສຸກຂະພາບຊຸມຊົນ ແລະ ການສຶກສາຂອງ ຄົນຮຸ່ນໃໝ່. ບໍ່ໄຕ້ດິນນີ້ ເປັນບໍ່ທໍາອິດ ໃນ ສປປ ລາວ ທີ່ສອດຄ່ອງກັບຂັ້ນຕອນການປະເມີນຜົນກະທົບຕໍ່ສິ່ງແວດລ້ອມ ແລະ ສັງຄົມ, ພ້ອມທັງໄດ້ປະກອບສ່ວນ US$11 ລ້ານ ເຂົ້າໃສ່ກອງທຶນພັດທະນາຊຸມຊົນ ແລະ ສ້າງລາຍໄດ້ກວ່າ US$49 ລ້ານ ໃຫ້ແກ່ກຸ່ມທຸລະກິດທ້ອງຖິ່ນ.”
ລຊມລ ໄດ້ນຳເອົາ ຊ່ຽວຊານສະເພາະດ້ານຕ່າງປະເທດ ແລະ ອຸປະກອນ ເຂົ້າມາ ສປປ ລາວ ສຳລັບ ໂຄງການສຳຄັນຄັ້ງນີ້.
ຍຸດທະສາດການເຕີບໂຕສີຂຽວແຫ່ງຊາດຂອງ ລັດຖະບານລາວ ຮັບຮູ້ວ່າ ອຸດສາຫະກຳບໍ່ແຮ່ເປັນຂະແໜງການບູລິມະສິດຍ້ອນ ການປະກອບສ່ວນມະຫາສານຕໍ່ການພັດທະນາເສດຖະກິດ. ພ້ອມກັນນັ້ນ, ບໍລິສັດ ລຊມລ ກໍຍັງໄດ້ຮັບການຢັ້ງຢືນລະດັບ A+ ໂດຍກະຊວງພະລັງງານ ແລະ ບໍ່ແຮ່ ຢ່າງສະເໝີມາ ຍ້ອນສາມາດຮັກສາມາດຕະຖານສາກົນໄດ້ຢ່າງສະເໝີຕົ້ນສະເໝີປາຍ.
ທ່ານ ພໍ ແຮຣິສ໌ ໄດ້ກ່າວຕື່ມວ່າ: “ການຂຸດຄົ້ນບໍ່ແຮ່ໃຕ້ດິນຈະສ້າງຜົນປະໂຫຍດຕໍ່ເສດຖະກິດ ແລະ ສັງຄົມຂັ້ນ ປະເທດ, ພາກພື້ນ ແລະ ທ້ອງຖິ່ນ ກໍຄື ຜູ້ມີສ່ວນຮ່ວມ ແລະ ຊຸມຊົນເຈົ້າພາບຂອງພວກເຮົາ. ການຂຸດຄົ້ນບໍ່ແຮ່ໃຕ້ດິນຈະປະຢັດຫຼາຍກວ່າສຳລັບແຫຼ່ງແຮ່ທີ່ຢູ່ຊັ້ນເລິກກວ່າ ແລະ ມີຜົນກະທົບຕໍ່ສິ່ງແວດລ້ອມ ແລະ ສັງຄົມທີ່ຕ່ຳກວ່າຫຼາຍເມື່ອສົມທຽບໃສ່ ການຂຸດຄົ້ນບໍ່ແຮ່ເປີດໜ້າດິນ. ທີ່ ລຊມລ, ພວກເຮົາໝາຍໝັ້ນໃນການບັນລຸມາດຕະຖານສູງທີ່ສຸດດ້ານຄວາມປອດໄພ ແລະ ສິ່ງແວດລ້ອມ ແລະ ເຮັດວຽກຢ່າງໃກ້ຊິດກັບຊຸມຊົນທ້ອງຖິ່ນເພື່ອແບ່ງປັບຜົນປະໂຫຍດຢ່າງທົ່ວເຖິງ.”
ການສຳຫຼວດໃຕິດິນຢູ່ ບໍ່ຄຳ-ທອງ ເຊໂປນ ຈະດຳເນີນຕະຫຼອດຮອດປີ 2023, ໂດຍຄາດວ່າ ການຜະລິດຈາກ ການຂຸດຄົ້ນບໍ່ແຮ່ໃຕ້ດິນນີ້ແມ່ນຈະເລີ່ມໃນກາງປີ 2023. ບໍ່ໃຕ້ດິນຈະ ຂະຫຍາຍເຖິງ 450 ແມັດໃຕ້ໜ້າດິນ. ທາງເຂົ້າອຸມົງເພື່ອເຈາະສຳຫຼວດໃຕ້ດິນ ຈະມີຄວາມຍາວຫຼາຍກວ່າ 1.800 ແມັດ, ສູງ 5 ແມັດ, ກວ້າງ 5 ແມັດ ເພື່ອອຳນວຍໃຫ້ລົດຈົກ ແລະ ເຄື່ອງເຈາະທີ່ທັນສະໄໝ.
ລຊມລ ໄດ້ ດຳເນີນການຂຸດຄົ້ນບໍ່ແຮ່ຄຳ-ທອງເຊໂປນ ແບບເປີດໜ້າດິນຢູ່ ແຂວງສະຫວັນນະເຂດ ຕັ້ງແຕ່ປີ 2003 ເປັນຕົ້ນມາ. ໃນສອງທົດສະຫວັດຜ່ານມາ, ລຊມລ ໄດ້ປະກອບສ່ວນຫຼາຍກວ່າ US$1,6 ຕື້ ເປັນລາຍຮັບໂດຍກົງໃຫ້ແກ່ລັດຖະບານລາວ ຜ່ານການຈ່າຍພາສີອາກອນ ແລະ ຄ່າຊັບພະຍາກອນແຮ່ທາດ, ຫຼາຍຮ້ອຍລ້ານໂດລາເປັນຜົນປະໂຫຍດທາງອ້ອມ ຜ່ານການພັດທະນາຊຸມຊົນ, ການສ້າງວຽກເຮັດງານທຳ ແລະ ການຝຶກອົບຮົມສ້າງສີມືແຮງງານ.
ລຊມລ ໝາຍໝັ້ນ ເປັນບໍລິສັດບໍ່ແຮ່ຕົວແບບທີ່ດີເລີດ ແລະ ເປັນຄູ່ຮ່ວມພັດທະນາຂະແໜງບໍ່ແຮ່ ຢູ່ໃນ ສປປ ລາວ.
ຂໍ້ມູນ ແລະ ຮູບພາບ: ບໍລິສັດ ລ້ານຊ້າງ ມີເນໂຣນສ໌ ລິມິເຕັດ (ບໍ່ຄຳ-ທອງ ເຊໂປນ)
ກຳນົດອອກມາແລ້ວ! ຊຽງຂວາງເກມ
ກໍານົດ 13-22ທັນວາເປັນມື້ຈັດງານກິລາແຫ່ງຊາດຄັ້ງທີ11 ຫຼື ຊຽງຂວາງເກມ
ລັດຖະບານລາວໄດ້ກໍານົດເອົາວັນທີ 13-22 ທັນວາ 2022 ເປັນມື້ເປີດ-ປິດງານກິລາແຫ່ງຊາດຄັ້ງທີ 11 ຫຼືຊ ຽງຂວາງເກມ ແລະມາຮອດປະຈຸບັນ, ຊຽງຂວາງໄດ້ມີຄວາມພ້ອມ 70% ໃນການເປັນເຈົ້າພາບຈັດງານ. ທ່ານ ບົວເງິນ ຫຸມໄຊຍະພົມ ຮອງເຈົ້າແຂວງໆຊຽງຂວາງໃຫ້ສໍາພາດຕໍ່ນັກຂ່າວ CRI ໃນວັນທີ 16 ພຶດສະພາ 2022 ນີ້, ທີ່ຫ້ອງວ່າການປົກຄອງແຂວງວ່າ:
ປະຈຸບັນຊຽງຂວາງໄດ້ມີຄວາມພ້ອມການເປັນເຈົ້າພາບຈັດງານກິລາແຫ່ງຊາດພາຍໃຕ້ຄໍາຂວັນ: “ເປັນເຈົ້າພາບຮ່ວມກັນທີ່ດີ ” ໂດຍໄດ້ກໍານົດເອົາວັນທີ 13 ທັນວາ ເຊິ່ງເປັນວັນເກີດຂອງທ່ານ ປະທານໄກສອນ ພົມວິຫານ ອະດີດປະທານປະເທດແຫ່ງ ສປປ ລາວ ເປັນມື້ເປີດງານກິລາແຫ່ງຊາດ ຄັ້ງທີ 11 ແລະເອົາວັນທີ 22 ທັນວາ 2022 ເປັນມື້ປິດງານ. ທ່ານໃຫ້ຮູ້ອີກວ່າ:
ປະຈຸບັນ,ພວມກະກຽມບຸກຄະລາກອນຄືນໃໝ່ ພາຍຫຼັງທີ່ໄດ້ມີການຍົກເລີກມາຫຼາຍຄັ້ງ ໂດຍໄດ້ປັບປຸງບຸກຄະລາກອນຜູ້ທີ່ຈະຮັບຜິດຊອບໃນ 10 ອະນຸກໍາມະການໃຫຍ່, ສ່ວນທາງດ້ານພື້ນຖານໂຄງລ່າງແມ່ນໄດ້ມອບໃຫ້ກອງເລຂາພະແນກສຶກສາທິການ ແລະ ກິລາແຂວງຊຽງຂວາງ ເພື່ອກວດກາຄືນໃໝ່ສະໜາມແຂ່ງຂັນກິລາ, ບານເຕະ, ປິ່ງປ່ອງ ແລະອື່ນໆ ພ້ອມທັງຂຶ້ນແຜນສ້ອມແປງຈຸດທີ່ຍັງຄົງຄ້າງໃຫ້ຮັບປະກັນໃນການຈັດງານມະຫາກໍາກິລາຄັ້ງນີ້.ໃນດ້ານຄວາມກຽມພ້ອມການແຂ່ງຂັນກິລາປະເພດຕ່າງໆແມ່ນຈະເລີ່ມແຕ່ວັນທີ 9 ພະຈິກເປັນຕົ້ນໄປ ແລະບາງປະເພດກິລາແມ່ນຈະຈັດການແຂ່ງຂັນຢູ່ນະຄອນຫຼວງວຽງຈັນ. ທ່ານກ່າວຕື່ມອີກວ່າ:ສ່ວນດ້ານງົບປະມານແມ່ນໄດ້ກວດສອບຄືນໃໝ່ເພື່ອຈະນໍາສະເໜີລັດຖະບານຊອກຫາວິທີແກ້ໄຂ.ມາຮອດປະຈຸບັນນັບແຕ່ສູນກາງຈົນຮອດທ້ອງຖິ່ນກໍຄືຊາວແຂວງຊຽງຂວາງແມ່ນມີຄວາມຄອງຄອຍໃນການເປັນເຈົ້າພາບຮ່ວມກັນທີ່ດີ.
ຂັບຂີ່ ແບບ “Unlimit Your Experience” ກັບ Next-Gen Ford Ranger
Ford ໂຊຄວາມສາມາດຮອບດ້ານ ແລະ ລະບົບເທັກໂນໂລຊີທີ່ຊ່ວຍນັກຂັບຂີ່ໄດ້ຫຼາຍຂຶ້ນພາຍໃຕ້ກິດຈະກຳ “Unlimit Your Experience” ກັບ Next-Gen Ford Ranger.
ເມື່ອວັນທີ 10 ພຶດສະພາ 2022 – ພູເກັດ ປະເທດໄທ, Ford ປະເທດໄທ ໄດ້ເຊີນຊວນບັນດາສື່ມວນຊົນຈາກຫຼາຍປະເທດເຂົ້າຮ່ວມກິດຈະກຳທົດລອງຂັບ Next-Gen Ford Ranger ລົດກະບະທີ່ມາພ້ອມຄວາມຮອບດ້ານ, ຄວາມແຂງແຮງທີ່ສຸດ ແລະ ຕອບສະໜອງກັບການໃຊ້ງານທີ່ສຸດໃນຕະກູນ Ford Ranger.
ເປັນຄັ້ງທຳອິດ, ເທິງເສັ້ນທາງພູເກັດ-ພັງງາ-ກະບີ່ ທີ່ຈະພານັກຂັບຂີ່ໄດ້ສຳພັດກັບຄວາມສາມາດຂອງກະບະທີ່ດີທີ່ສຸດ ບໍ່ວ່າຈະຂັບຢູ່ຖະໜົນລຽບ ແລະ ທາງທີ່ມີສິ່ງກີດຂວາງ ມາພ້ອມກັບເທັກໂນໂລຊີ ແລະ ອຸປະກອນທັນສະໄໝ ທີ່ອອກແບບມາເພື່ອຕອບໂຈດການໃຊ້ງານຮອບດ້ານ.
ລວມໄປເຖິງຄວາມສາມາດໃນການເຊື່ອມຕໍ່ການສື່ສານກັບລົດໄດ້ຢ່າງເໜື່ອງຂັ້ນໂດຍຜ່ານແອັບພິເຄຊັນ FordPass ຍົກລະດັບປະສົບການໃຊ້ງານຂອງຜູ້ຂັບຂີ່ ທີ່ກຳລັງຊອກຫາລົດທີ່ໃຊ້ເຮັດວຽກ, ລົດສຳລັບຄອບຄົວ ແລະ ການເດີນທາງທ່ອງທ່ຽວ.
ກິດຈະກຳຄັ້ງນີ້ ຈັດຂຶ້ນພາຍໃຕ້ແນວຄິດ “Unlimit Your Experience” ໝາຍເຖິງການເປີດປະສົບການຄັ້ງໃໝ່ທີ່ກ້າວຂ້າມຂໍ້ຈຳກັດແບບເກົ່າ ໄປກັບ Next-Gen Ford Ranger, ລຸ້ນ Wildtrank ແລະ ລຸ້ນ Sport.
ເລີ່ມຕົ້ນດ້ວຍການບັນຍາຍຂໍ້ມູນຜະລິດຕະພັນ, ການອອກແບບ, ແລະ ເທັກໂນໂລຊີ ຂອງ Next-Gen Ford Ranger ຈາກທີມວິສະວະກອນ ແລະ ນັກອອກແບບລົດ Ford ຈາກປະເທດອົດສະຕຣາລີ ແລະ ໄທ ລວມເຖິງການທົດລອງສະຕາດສລົດຈາກໄລຍະໄກດ້ວຍແອັບພຣິເຄຣຊັນ FordPass ກ່ອນອອກເດີນທາງ.
ສື່ມວນຊົນໄດ້ທົດລອງຂັບຂີ່ລົດເທິງຖະໜົນທີ່ເປັນເສັ້ນທາງຊື່ ແລະ ໂຄ້ງສະຫຼັບກັນ ຜູ້ຂັບຂີ່ສຳພັດໄດ້ເຖິງຄວາມອາດສະມາດຂອງເຄື່ອງຈັກ ຄວາມສະບາຍໃນຫ້ອງໂດຍສານ ທີ່ໃຫ້ຄວາມຮູ້ສຶກນຸ້ມນວນແບບລົດເກງ ລວມເຖິງການທົດລອງເທັກໂນໂລຊີຊ່ວຍໃນການຂັບຂີ່ ເຊັ່ນ: ລະບົບຄວບຄຸມຄວາມໄວແບບຮັກສາໄລຍະຫ່າງອັດຕະໂນມັດ ພ້ອມລະບົບ Stop & Go ແລະ ລະບົບຄວບຄຸມລົດຢູ່ໃນຊ່ອງທາງ (Adaptive Cruise Control with Stop-and-Go and Lane Centering) ຟິວເຈີໃໝ່ໃນ Next-Gen Ford Ranger ທີ່ຊ່ວຍໃຫ້ການເດີນທາງປອດໄພຍິ່ງຂຶ້ນ.
ນອກຈາກນີ້, Next-Gen Ford Ranger ຍັງມາພ້ອມກັບເຄື່ອງຈັກດີເຊວເທີໂບດ່ຽວ ແລະ ເຄື່ອງຈັກດີເຊວເທີໂບຄູ່ຂະໜາດ 2.0 ລິດ 4 ສູບ ໂດຍລຸ້ນ Wildtrak ມາພ້ອມເຄື່ອງຈັກເທີໂບຄູ່ 2.0 ລິດ ຈັບຄູ່ກັບເກຍອັດຕະໂນມັດ 10 ສະປີດ ມີໃຫ້ເລືອກທັງແບບຂັບເຄື່ອນ 4 ລໍ້ ແລະ ແບບຂັບເຄື່ອນ 2 ລໍ້ເປັນຄັ້ງທຳອິດແຮງ 210 ລິດ ທີ່ 3,750 ຮອບຕໍ່ນາທີ ແຮງບິດ 500 ນິວຕັນແມັດ ຢູ່ທີ່ 1,750-2,000 ຕໍ່ນາທີ.
ລຸ້ນ Wildtrak 4×2 ຕິດຕັ້ງເຄື່ອງຈັກດີເຊວເທີໂບດ່ຽວ 2.0 ລິດ ຈັບຄູ່ກັບເກຍອັດຕະໂນມັດ 6 ສະປີດ, ແຮງ 170 PS ທີ່ 3,500 ຮອບຕໍ່ນາທີ ພ້ອມແຮງບິດ 405 ນິວຕັນແມັດທີ່ 1,750-2,000 ຮອບຕໍ່ນາທີ.
ລຸ້ນ Sport ມາພ້ອມກັບເຄື່ອງຈັກດີເຊວເທີໂບດ່ຽວ 2.0 ລິດ ຈັບຄູ່ກັບເກຍອັດຕະໂນມັດ 6 ສະປີດ, ແຮງ 170 PS ທີ່ 3,500 ຮອບຕໍ່ນາທີ ແຮງບິດ 405 ນິວຕັນແມັດ ທີ່ 1,750-2,500 ຮອບຕໍ່ນາທີ.
ເມື່ອມາຮອດ Ford Ranger Ville, ສະໜາມ off-road ທີ່ອອກແບບມາພິເສດເພື່ອທົດລອງປະສິດທິພາບ ແລະ ການເລືອກຮູບແບບການຂັບຂີ່ທີ່ສ້າງຂຶ້ນໃນ Ford Ranger. ເປັນຄັ້ງທຳອິດ, ສື່ມວນສົນໄດ້ເປີດຕົວປະສົບການທີ່ທ້າທາຍ off-road ຢູ່ສະຖານີ 1, ເອົາຊະນະ ‘ Hill Maneuvering’ ໃນຮູບແບບປົກກະຕິທີ່ມີ 4H (4H) ເຊັ່ນດຽວກັນກັບການທົດລອງການປະຕິບັດທີ່ດີເດັ່ນຂອງສະມັດຕະພາບຊ່ວງລາງ ແລະ ການໄຕ່ລົງເນີນຊັນດ້ວຍລະບົບຄວບຄຸມຄວາມໄວໃນຂະນະລົງພູ Hill Descent Control ທີ່ຊ່ວຍປັບຄວາມດັນເບຣກຢ່າງຕໍ່ເນື່ອງ ຫຼຸດຜ່ອນໄຫຼຂອງລົດ ແລະຮັກສາຄວາມໄວຄົງທີ່ເມື່ອຂັບລົດລົງທາງເນີນສູງຊັນ.
ດັ່ງນັ້ນຜູ້ຂັບຂີ່ຈິ່ງສາມາດຄວາມຄຸມພວງມະໄລໄດ້ຍ່າງເຕັມທີ່ ແລະ ມີຄວາມໝັ່ນໃຈຫຼາຍຂຶ້ນ ດ້ວຍມຸມຫຼັງ 23 ອົງສາ (ເພີ່ມຂຶ້ນຈາກ 21 ອົງສາໃນຮຸ່ນກ່ອນ) ດ້ວຍຖານລໍ້ທີ່ກວ້າງ ແລະ ຍາວກວ່າຂອງ Ford Ranger ລຸ້ນໃໝ່ ປັບປຸງຄວາໜັ່ນຄົງຂອງການຂັບຂີ່ ຊ່ວຍຄວບຄຸມລົດຢ່າງມີປະສິດທິພາບ
ຕໍ່ດ້ວຍການຂັບຜ່ານແອງນໍ້າ ໄດ້ຢ່າງສະບາຍ ໃນສະຖານີ 2 ເພາະສາມາດທີ່ຈະລຸຍນໍ້າລຶກໄດ້ເລິກເຖິງ 800 ມມ. ໂດຍສະຖານີທີ 1 ແລະ 2 ສື່ມວນຊົນສາມາດເຫັນໄດ້ຊັດເຈນເຖິງສິ່ງກີດຂວາງຢູ່ນອກລົດໃນລະຫວ່າງການຂັບຂີ່.
ມາຮອດສະຖານີ 3 ສື່ມວນຊົນຕ້ອງໃຊ້ໂໝດ Slippery Track, ເຊິ່ງລະບົບຈະແຈກຢາຍແຮງບິດຂອງເຄື່ອງຈັກໃຫ້ທັງສີ່ລໍ້, ເພີ່ມຄວາມເຊື່ອໝັ້ນໃນການຂັບຂີ່ເທິງຖະໜົນທີ່ໝື່ນ ຫຼື ພື້ນຖະໜົນທີ່ບໍ່ສະໝ່ຳສະເໝີ ແລະ ຍັງໄດ້ສຳຜັດກັບທັດສະນະການຂັບຂີ່ທີ່ດີຂຶ້ນໃນພື້ນທີ່ແຄບດ້ວຍການອອກແບບຝາກະໂປງໜ້າໃໝ່ ທີ່ຊ່ວຍໃຫ້ກະໄລຍະຫ່າງເພື່ອຜ່ານອຸປະສັກຕ່າງໆໄດ້ຢ່າງງ່າຍດາຍ ລວມທັງການນຳໃຊ້ກ້ອງ 360 ອົງສາອ້ອມລົດທີ່ຊ່ວຍໃຫ້ຜູ້ຂັບຂີ່ສາມາດເບິ່ງເຫັນພາຍນອກຂອງລົດໄດ້, ຄວບຄຸມທິດທາງຂອງພວງມາໄລ ແລະ ຄວບຄຸມທິດທາງຂອງລົດຜ່ານສິ່ງກີດຂວາງ.
ໃນເສັ້ນທາງ ສະຖານີ 4, ເສັ້ນທາງຕົມ (Mud Track) ຍັງເປັນການຂັບລົດດ້ວຍໂໝດ Mud Mode ໂດຍໃຊ້ລະບົບຂັບເຄື່ອນ 4 ລໍ້ (4H) ພ້ອມສະແດງລະບົບ ລັອກເຟືອງທ້າຍ (Locking rear differential) ທີ່ຊ່ວຍຖ່າຍທອດພະລັງງານຂອງເຄື່ອງຈັກໄປຍັງ 4 ລໍ້, ເຮັດໃຫ້ຜ່ານຕົມ ຫຼື ເສັ້ນທາງໝື່ນໄປໄດ້ຢ່າງງ່າຍດາຍ.
ເຂົ້າໄປໃນສະຖານີ 5, ພື້ນຫີນ, ‘Loose Surface’ ໂດຍການປັບຮູບແບບການຂັບລົດກັບຄືນສູ່ໂໝດ Slippery mode ເພື່ອທົດສອບການຂັບລົດໃນເສັ້ນທາງຫີນ ສໍາລັບແຮງເຄື່ອງຈັກ ແລະ ການຕອບສະຫນອງຂອງລະບົບການຄວບຄຸມສະຖຽນລະພາບ ຄວາມນຸ້ມນວນຂອງເກຍຂະນະທີ່ໃຊ້ຮອບເຄື່ອງຈັກທີ່ສູງຂຶ້ນໃນຂະນະທີ່ຂັບລົດດ້ວຍຄວາມໄວສູງ.
ໃນສະຖານີທີ 6, ຂັບລຸຍທາງຫີນ ‘Rocky Terrain’, ສື່ມວນຊົນໄດ້ໃຊ້ໂໝດການຂັບຂີ່ປົກກະຕິ ພ້ອມລະບົບຂັບເຄື່ອນສີ່ລໍ້ (4L) ແລະ ລະບົບລັອກເຟືອງທ້າຍ (Locking rear differential) ເພື່ອທົດສອບແຮງບິດຂອງເຄື່ອງຈັກໃນຮອບຕໍ່າ ແລະ ອັດຕາສ່ວນເກຍ ລວມທັງຄວາມສູງຂອງກ້ອງລົດ ແລະ ລະບົບ ຊ່ວງລາງທີ່ນຸ້ນນວນ.
ສືບຕໍ່ກັບການຂັບຂີ່ໃນສະພາບຖະໜົນທີ່ມີດິນຊາຍ, ‘Sand Track’ ຢູ່ສະຖານີທີ 7, ໂດຍໃຊ້ໂໝດຊາຍ (Sand mode), ເຮັດໃຫ້ສຳພັດໄດ້ເຖິງການຄວບຄຸມຄວາມໜັ່ນຄົງຂອງການຊົງໂຕ ແລະ ການກະຈາຍຂອງແຮງບິດຂອງເຄື່ອງຈັກ ທີ່ເຮັດໃຫ້ລົດສາມາດຜ່ານອຸປະສັກໄປໄດ້.
ເຂົ້າສູ່ສະຖານີທີ 8, ເສັ້ນທາງ (Off-Road Maneuvering) ໂດຍໃຊ້ໂໝດປົກກະຕິ (Normal mode) ດ້ວຍການຂັບຂີ່ສີ່ລໍ້ (4H) ທົດສອບການຄວບຄຸມການຊີ້ນໍາ ຄວາມດຸ່ນດ່ຽງຂອງລົດ ແລະ ແຮງຂອງເຄື່ອງຈັກ, ແຮງບິດອັດສະລິຍະ ແລະ ອັດຕາສ່ວນເກຍ ສະແດງໃຫ້ເຫັນຄວາມອາດສາມາດໃນການຂັບຂີ່ off-road ໂດຍລວມທີ່ດີຂຶ້ນກວ່າເກົ່າ ດ້ວຍມຸມສູງ 30 ອົງສາ (ເພີ່ມຂຶ້ນຈາກ 28.5 ອົງສາໃນແບບກ່ອນ).
ຫຼັງຈາກການຮຽນຮູ້ວິທີການນໍາໃຊ້ຮູບແບບການຂັບຂີ່ off-road ຢູ່ສະຖານີຕ່າງໆໃນ Ford Ranger Ville, ສື່ມວນຊົນຍັງສືບຕໍ່ທົດລອງການຂັບຂີ່ off-road ຂອງໃນເສັ້ນທາງທໍາມະຊາດທີ່ທ້າທາຍ ແລະ ໜ້າຈື່ຈຳ.
ນອກຈາກການທົດລອງຄວາມສາມາດໃນການຂັບຂີ່, ສື່ມວນຊົນຍັງໄດ້ສຳຜັດກັບຄວາມຄ່ອງໂຕຂອງລົດ Next-Gen Ford Ranger ທັງການເປັນລົດຄູ່ໃຈສໍາລັບການເຮັດວຽກ ແລະ ເປັນລົດຄອບຄົວ ດ້ວຍກະບະຫຼັງທີ່ຮອງຮັບການມ້ຽນສິ່ງຂອງໄດ້ຫຼາຍຮູບແບບ(Cargo management system), ບ່ອນຢຽບຂ້າງເຮັດໃຫ້ການຂຶ້ນຫຼັງຂອງລົດກະບະໄດ້ງ່າຍຂຶ້ນ.
ການນໍາໃຊ້ເຄື່ອງໃຊ້ໄຟຟ້າໂດຍການເຊື່ອມຕໍ່ລະບົບໄຟຟ້າຈາກເຕົ້າສຽບໄຟຢູ່ທ້າຍກະບະ ເພື່ອເຮັດວຽກວິຊາການຫຼືການສະຫນອງໄຟໃຫ້ອຸປະກອນເອເລັກໂຕຣນິກຕ່າງໆ ການອອກແບບບ່ອນເກັບມ້ຽນໃຕ້ບ່ອນນັ່ງໃໝ່ ພື້ນທີ່ກ້ວາງສໍາລັບການຈັດລະບຽບ ເກັບຮັກສາສິ່ງຂອງ ໃນຂະນະບ່ອນນັ່ງຍັງກວ້າງຂວາງ ແລະ ສະດວກສະບາຍ ລວມເຖິງບ່ອນມັດເຊືອກເພື່ອຮັດເຄື່ອງທ້າຍກະບະ ທີ່ໄດ້ອອກແບບມາເພື່ອຫັດແໜ້ນເອົາອຸປະກອນພັກຜ່ອນໃນເວລາເດີນທາງ.
ກິດຈະກຳການທົດສອບຂັບລົດນີ້ໄດ້ຖືກຈັດຂຶ້ນເພື່ອພິສູດເຖິງຄວາມເປັນລົດກະບະທີ່ມີຄວາມສາມາດທີ່ສຸດ, ແຂງແຮງທີ່ສຸດ, ເພື່ອຕອບສະໜອງໄດ້ຫຼາຍທີ່ສຸດໃນຄອບຄົວ Ford Ranger ທີ່ທີມວິສະວະກອນ ແລະນັກອອກແບບຂອງ Ford ເຮັດວຽກຮ່ວມກັບລູກຄ້າທົ່ວໂລກເພື່ອສ້າງສຸດຍອດລົດກະບະ Ford Ranger ລຸ້ນໃໝ່ ໃຫ້ເປັນລົດທີ່ພ້ອມຕອບສະໜອງໄດ້ທັງການເຮັດວຽກ, ເປັນລົດຄອບຄົວ ແລະ ເປັນລົດເດີນທາງໃນຍາມພັກຜ່ອນ Ford Pass ໃຫ້ລູກຄ້າສາມາດເຊື່ອມຕໍ່ກັບລົດ Ford Ranger ຂອງຕົນເອງໄດ້ຕະຫຼອດ 24 ຊົ່ວໂມງຕໍ່ມື້ ມັນສາມາດສະຕາສລົດຈາກໄລຍະໄກໄດ້ ປັບອຸນຫະພູມລົດກ່ອນທີ່ຈະເຂົ້າໄປໃນຫ້ອງໂດຍສານໄດ້ ແລະຍັງແຈ້ງເຕຶອນສະຖານະການທີ່ໄດ້ຮັບໂດຍຜ່ານແອັບພິເຄເຊິນໃນໂທລະສັບມືຖືເຄື່ອນທີ່ລວມເຖິງການເຊື່ອມຕໍ່ກັບການສື່ສານໄດ້ຕະຫຼອດເວລທີ່ຢູ່ໃນລົດ Ford Ranger ຜ່ານລະບົບການເຊື່ອມຕໍ່ສື່ສານຜ່ານລະບົບຄຳສັ່ງສຽງ SYNC 4A “ທ່ານນາງ ກະມົນຊານົກ ປະເສີດສົມ ຜູ້ອຳນວຍການຝ່າຍການສື່ສານກົມບໍລິສັດ ຟອດ ປະເທດໄທ ແລະ ຕະຫຼາດອາຊຽນ ກ່າວວ່າ:
ນອກຈາກການເປີດຕົວລົດຮຸ່ນໃໝ່ແລ້ວ, Ford ຍັງມຸ່ງໝັ້ນທີ່ຈະມອບການດູແລລູກຄ້າ “ພ້ອມສະເໝີ Always On” ດ້ວຍການບໍລິການ ແລະ ການເບິ່ງແຍງລູກຄ້າທຸກໆຄົນໃຫ້ຄືກັບຄອບຄົວທີ່ມີນະວັດຕະກໍາໃນການບໍລິການໃໝ່ໆຫຼາກຫຼາຍທີ່ຈະມີການເປີດໂຕພ້ອມກັບການເລີ່ມຂາຍລົດ Ford Ranger ລຸ້ນໃໝ່ໃນທ້າຍເດືອນພຶດສະພານີ້.
ເພີ່ມເຕີມຕິດຕໍ່ໄດ້ທີ່ Lao Ford City: +856 20 76 666 690
ກິດຈະກໍາຝຶກອົບຮົມກ່ຽວກັບລະເບີດບໍ່ທັນແຕກ
ໃນຄັ້ງວັນທີ່ 12 ຫາ 13 ພຶດສະພາ 2022 ທີ່ຜ່ານມານີ້, ກອງຄຸ້ມຄອງອຸທິຍານແຫ່ງຊາດນໍ້າແອດ-ພູເລີຍ, ອົງການອະນຸລັກສັດປ່າປະຈໍາລາວ(NGO WCS) ແລະ ອົງການເພື່ອມະນຸດສະທໍາ ແລະ ການມີສ່ວນຮ່ວມ(HI) Humanity & Inclusion Lao PDR ປະຈໍາຢູ່ແຂວງຫົວພັນ ໄດ້ຈັດກິດຈະກໍາຝຶກອົບຮົມກ່ຽວກັບລະເບີດບໍ່ທັນແຕກ ໃຫ້ແກ່ກຸ່ມບໍລິການນັກທ່ອງທ່ຽວຂອງອຸທິຍານແຫ່ງຊາດນໍ້າແອດ-ພູເລີຍ ຢູ່ບ້ານນໍ້າປຸ່ງ ແລະ ບ້ານສາກົກ ເມືອງຮ້ຽມ ແຂວງຫົວພັນ.
ໃນການຝຶກອົບຮົມຄັ້ງນີ້ໄດ້ມີນັກສໍາມະນາກອນທີ່ເປັນກຸ່ມບໍລິການນັກທ່ອງທ່ຽວຂອງອຸທິຍານຢູ່ບ້ານນໍ້າປຸ່ງເຂົ້າຮ່ວມທັງໝົດ 22 ທ່ານ (ຍິງ 07 ທ່ານ/ຊາຍ 15 ທ່ານ) ແລະ ບ້ານສາກົກເຂົ້າຮ່ວມທັງໝົດ 36 ທ່ານ (ຍິງ 13 ທ່ານ/ຊາຍ 23 ທ່ານ)ຂໍຂອບໃຈຢ່າງສຸດຊຶ້ງມາຍັງອົງການເພື່ອມະນຸດສະທໍາ ແລະ ການມີສ່ວນຮ່ວມ (HI) ແຂວງຫົວພັນ ໃນການຝຶກອົບຮົມອັນລໍາຄ່າຄັ້ງນີ້.
ຕ້ອນຮັບປະທານສະພາແຫ່ງຊາດ ສສ ຫວຽດນາມ
ເລຂາທິການໃຫຍ່ ພັກ ປປ ລາວ ຕ້ອນຮັບປະທານສະພາແຫ່ງຊາດ ສສ ຫວຽດນາມ
ວັນທີ 16 ພຶດສະພາ 2022 ນີ້, ສະຫາຍ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກປະຊາຊົນ ປະຕິວັດລາວ, ປະທານປະເທດ ແຫ່ງ ສປປ ລາວ ໄດ້ໃຫ້ກຽດຕ້ອນຮັບການເຂົ້າຢ້ຽມຂ່ຳນັບ ຂອງຄະນະຂັ້ນສູງ ສສ ຫວຽດນາມ ນໍາໂດຍ ສະຫາຍ ເວືອງ ດິງ ເຫວະ ກຳມະການກົມການເມືອງສູນກາງພັກກອມມູນິດຫວຽດນາມ, ປະທານສະພາແຫ່ງຊາດ ແຫ່ງ ສສ ຫວຽດນາມ ພ້ອມດ້ວຍຄະນະ ໃນໂອກາດເດີນທາງມາຢ້ຽມຢາມສັນຖະ ວະໄມຕີ ຢູ່ ສປປ ລາວ ລະຫວ່າງ ວັນທີ 15-17 ພຶດສະພາ ນີ້.
ສະຫາຍ ທອງລຸນ ສີສຸລິດ ໄດ້ສະແດງຄວາມຕ້ອນຮັບຊົມເຊີຍ ແລະ ຕີລາຄາສູງຕໍ່ການມາຢ້ຽມຢາມ ແລະ ເຮັດວຽກຢູ່ ສປປ ລາວ ຂອງຄະນະຜູ້ແທນສະພາແຫ່ງຊາດ ແຫ່ງ ສສ ຫວຽດນາມ ເຊິ່ງເປັນການປະກອບສ່ວນ ຮັດແໜ້ນສາຍພົວພັນມິດຕະພາບ ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ອ້າຍນ້ອງທີ່ມີມູນເຊື້ອມາແຕ່ດົນນານແລ້ວນັ້ນ ໃຫ້ນັບມື້ແໜ້ນແຟ້ນຍິ່ງໆຂຶ້ນ.
ການມາຢ້ຽມຢາມຄັ້ງນີ້ ແມ່ນຢູ່ທ່າມກາງທີ່ສອງພັກ, ສອງລັດລາວ-ຫວຽດນາມ ກະກຽມຄວາມພ້ອມການສະເຫລີມສະຫລອງ ປີສາມັກຄີມິດຕະພາບລາວ-ຫວຽດນາມ ປີ 2022 ກໍຄື ສະເຫລີມສະຫລອງວັນເຊັນສົນທິສັນຍາມິດຕະພາບແລະ ການຮ່ວມມື ຄົບຮອບ 54 ປີ(18/07/1977-18/07/2022) ແລະ ວັນສ້າງຕັ້ງສາຍພົວພັນການທູດລາວ-ຫວຽດນາມ ຄົບຮອບ 60 ປີ(05/09/1962-05/09/2022) ໃຫ້ມີບັນຍາ ກາດຟົດຟື້ນ. ໂອກາດນີ້, ສະຫາຍ ເວືອງ ດິງ ເຫວະ ໄດ້ຕາງໜ້າຄະນະສະແດງຄວາມຂອບໃຈຕໍ່ ສະຫາຍ ທອງລຸນ ສີສຸລິດ ທີ່ໄດ້ໃຫ້ການຕ້ອນ ຮັບຢ່າງອົບອຸ່ນ ພ້ອມທັງລາຍງານຫຍໍ້ກ່ຽວກັບຈຸດປະສົງຂອງການມາຢ້ຽມຢາມ ແລະ ເຮັດວຽກຢູ່ ສປປ ລາວ ໂດຍສະເພາະແມ່ນເຮັດວຽກຮ່ວມກັບສະພາແຫ່ງຊາດລາວ ໃຫ້ສະຫາຍ ເລຂາທິການໃຫຍ່ ໄດ້ຮັບຊາບ.
ແຫຼ່ງຂ່າວ: ປະເທດລາວ
ຊົມເຊີຍ! ແຂວງສາລະວັນ ມ້າງລາຍຄະດີຢາເສບຕິດໄດ້ 29 ເລື່ອງຍຶດຢາບ້າໄດ້ 89,845 ເມັດ
3 ເດືອນຕົ້ນປີ 2022 ແຂວງສາລະວັນ ສາມາດມ້າງລາຍຄະດີຢາເສບຕິດໄດ້ 29 ເລື່ອງຍຶດຢາບ້າໄດ້ 89,845 ເມັດ.
ພັຕ ແສງສຸລີ ວົງສາລາດ ຫົວໜ້າພະແນກສະກັດກັ້ນຕ້ານຢາເສບຕິດ ທັງເປັນກອງເລຂາແກ້ໄຂບັນຫາຢາເສບຕິດແຂວງຂັ້ນແຂວງ ຈາກກອງບັນຊາການປ້ອງກັນຄວາມສະຫງົບແຂວງສາລະວັນ ໄດ້ໃຫ້ສຳພາດຕໍ່ສື່ມວນຊົນ ໃນວັນທີ 12 ພືດສາພາ 2022 ວ່າ: ໄລຍະ 03 ເດືອນຕົ້ນປີ 2022 ສາມາດມ້າງລາຍຄະດີຢາເສບຕິດທັງໝົດໄດ້ 29 ເລື່ອງ, ກັກຜູ້ຖືກຫາໄດ້ທັງໝົດ 42 ຄົນ, ຍິງ 02 ຄົນ, ຢຶດຂອງກາງໄດ້ທັງໝົດມີຄື:
ປະເພດຢາບ້າໄດ້ 89,845 ເມັດ, ຢາໄອສ໌ 10 ຖົງນ້ອຍ, ຕໍ່ກັບບັນຫາດັ່ງກ່າວທາງເຈົ້າໜ້າທີ່ຈິ່ງໄດ້ສືບຕໍ່ເພີ່ມທະວີປະສານສົມທົບກັບບັນດາກົມກອງອ້ອມຂ້າງແຂວງ, ກົມກອງວິຊາສະເພາະຂັ້ນເມືອງ, ຂະແໜງການທີ່ກ່ຽວຂ້ອງ ແລະ ອໍານາດການປົກຄອງທ້ອງຖິ່ນຢ່າງເປັນປົກກະຕິ ແລະແຂງແຮງ, ເນື່ອງນິດລຽນຕິດ ເພື່ອຊອກຮູ້, ຊອກໃຫ້ເຫັນທົ່ວໄປ, ບ່ອນຜະລິດ, ຜູ້ຂົນສົ່ງ, ຜູ້ຄ້າ-ຂາຍ ແລະ ເປົ້າໝາຍຢາເສບຕິດ, ພ້ອມໂຄສະນາປູກຈິດສຳນຶກ ແລະສຶກສາອົບຮົມປະຊາຊົນໃຫ້ເຫັນຜົນຮ້າຍຂອງຢາເສບຕິດຢ່າງກວ້າງຂວາງດ້ວຍຫຼາຍຮູບການ, ຫຼາຍວິທີ ແລະ ຫຼາຍລະດັບ. #ທ່ານຍັງໄດ້ກ່າວຕໍ່ໄປອີກວ່າ: ພະແນກສະກັດກັ້ນຕ້ານຢາເສບຕິດ ກອງບັນຊາການປ້ອງກັນຄວາມສະຫງົບແຂວງສາລະວັນ ຍັງໄດ້ຕິດຕາມກວດກາຂຶ້ນບັນຊີເປົ້າໝາຍທີ່ພົວພັນກັບຢາເສບຕິດ ລວມມີທັງໝົດ 5.836 ຄົນ, ຍິງ 49 ຄົນ ໃນນັ້ນເປົ້າໝາຍເສບຢາເສບຕິດ 5.132 ຄົນ, ຍິງ 33 ຄົນ, ເປົ້າໝາຍຄ້າຂາຍຢາເສບຕິດ 704 ຄົນ, ຍິງ 16 ຄົນ, ເຊິ່ງມີແຜນກວດລ້າງ, ກັກຍືດໃຫ້ນັບມື້ຫຼຸດນ້ອຍຖອຍລົງ ທັງນີ້ກໍ່ເພື່ອເປັນການປະຕິບັດຕາມວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ ຂອງລັດຖະບານໃຫ້ປະກົດຜົນເປັນຈິງ.
ແຫຼ່ງຂ່າວ: ຄວາມສະຫງົບ
ທ່ານຮອງນາຍົກ ລົງຕິດຕາມ ຊຸກຍູ້ວຽກງານ ການບໍລິການເຂົ້າ-ອອກ
ເພື່ອຕິດຕາມ, ກວດກາ ແລະ ຊຸກຍູ້ ການຈັດຕັ້ງປະຕິບັດ ບັນດາວຽກງານ ທີ່ຕິດພັນກັບການບໍລິການ ເຂົ້າ-ອອກເມືອງ ກໍ່ຄືການຮອງຮັບຄົນເຂົ້າ-ອອກເມືອງ ໃນເງື່ອນໄຂທີ່ ສປປ ລາວ ເປີດປະເທດເຕັມຮູບແບບ ໃຫ້ມີຄວາມຄວາມຄ່ອງຕົວ, ສະດວກ, ວ່ອງໄວ, ເປັນລະບຽບຮຽບຮ້ອຍ, ປອດໄພ, ມີປະສິດທິພາບ ແລະ ປະສິດທິຜົນສູງ.
ໃນຕອນເຊົ້າ ວັນທີ 13 ພຶດສະພາ ທີ່ຜ່ານມາ, ທ່ານ ກິແກ້ວ ໄຂຄໍາພິທູນ, ຮອງນາຍົກລັດຖະມົນຕີ ພ້ອມດ້ວຍຄະນະ ໄດ້ລົງເຄື່ອນໄຫວຊຸກຍູ້ວຽກງານ ຢູ່ດ່ານສາກົນຂົວມິດຕະພາບ ລາວ-ໄທ ແຫ່ງທີ 1 ແລະ ສະໜາມບິນສາກົນວັດໄຕ.
ໃນໂອກາດນີ້, ທ່ານຮອງນາຍົກລັດຖະມົນຕີ ໄດ້ຮັບຟັງການລາຍງານໂດຍຫຍໍ້ ກ່ຽວກັບສະພາບການເຄື່ອນ ໄຫວວຽກງານຂອງດ່ານ ເຫັນວ່າ: ຢູ່ດ່ານສາກົນ ຂົວມິດຕະພາບ ລາວ-ໄທ ແຫ່ງທີ 1 ໃນໄລຍະວັນທີ 9-12 ພຶດສະພາ ມີຄົນຜ່ານດ່ານ ຂາເຂົ້າ ຈຳນວນ 1.619 ຄົນ, ຍິງ 675 ຄົນ; ຂາອອກ ຈໍານວນ 2.101 ຄົນ, ຍິງ 873 ຄົນ; ມີລົດເຂົ້າ 260 ຄັນ ແລະ ລົດອອກ 956 ຄັນ. ສໍາລັບຢູ່ສະໜາມບິນສາກົນວັດໄຕ, ໃນປະຈຸບັນ ມີສາຍການບິນ ເຂົ້າ-ອອກປະເທດ ຈຳນວນ 18 ຖ້ຽວ/ອາທິດ, ບິນໄປ 6 ປະເທດ ຄື:
ເກົາຫຼີໃຕ້, ໄທ, ຫວຽດນາມ, ສິງກະໂປ, ຈີນ ແລະ ມາເລເຊຍ; ໃນໄລຍະແຕ່ວັນທີ 9-12 ພຶດສະພາ ມີຜູ້ໂດຍສານຂາເຂົ້າຕ່າງປະເທດ ຈໍານວນ 691 ຄົນ, ຍິງ 188 ຄົນ; ຜູ້ໂດຍສານຂາອອກຕ່າງປະເທດ ຈຳນວນ 861 ຄົນ, ຍິງ 282 ຄົນ; ສະເພາະ ສາຍການບິນພາຍໃນ ມີສາຍການບິນລາວ ແລະ ສາຍການບິນລາວສະກາຍເວ,ໃນນັ້ນ ສາຍການບິນລາວ ບິນໄປ 7 ແຂວງ ຄື: ຈໍາປາສັກ, ສະຫວັນນະເຂດ, ຊຽງຂວາງ, ຫຼວງພະບາງ, ອຸດົມໄຊ, ຫຼວງນໍ້າທາ ແລະ ບໍ່ແກ້ວ; ສາຍການບິນລາວສະກາຍເວ ບິນໄປ 9 ແຂວງ ຄື: ຈຳປາສັກ, ສະຫວັນນະເຂດ, ຊຽງຂວາງ, ຫົວພັນ, ຫຼວງພະບາງ, ອຸດົມໄຊ, ຫຼວງນໍ້າທາ, ບໍ່ແກ້ວ ແລະ ຜົ້ງສາລີ.ການລົງຊຸກຍູ້ຢູ່ແຕ່ລະຈຸດ, ທ່ານຮອງນາຍົກລັດຖະມົນຕີ ແລະ ຄະນະ ໄດ້ໄປກວດກາເບິ່ງ ສະຖານທີ່ ແລະ ຈຸດບໍລິການຕ່າງໆ, ລວມທັງ ການປະຕິບັດວຽກງານຕົວຈິງ ຂອງພະນັກງານ ພາຍໃນດ່ານ. ນອກຈາກນັ້ນ, ທ່ານ ຮອງນາຍົກລັດຖະມົນຕີ ຍັງໄດ້ຊີ້ນຳ ໃຫ້ພະນັກງານ ແລະ ເຈົ້າໜ້າທີ່ ພາຍໃນດ່ານ ເອົາໃຈໃສ່ຕື່ມບາງດ້ານ ເປັນຕົ້ນ:
ເພີ່ມທະວີຄວາມເປັນແບບຢ່າງ ໃນການປະຕິບັດວຽກງານ ດ້ວຍຄວາມຮັບຜິດຊອບສູງ, ເຂັ້ມງວດຕາມກົດໝາຍ ແລະ ລະບຽບການ ໂດຍສະເພາະ ລະບຽບການຄຸ້ມຄອງດ່ານ ແລະ ຄົນເຂົ້າ-ອອກເມືອງ; ຫັນການບໍລິການຕ່າງໆ ດ້ວຍລະບົບທີ່ທັນສະໄໝ, ໂປ່ງໃສ ແລະ ສາມາດກວດສອບໄດ້; ສ້າງເງື່ອນໄຂ ແລະ ອຳນວຍຄວາມສະດວກ ໃຫ້ແກ່ບໍລິການ ຄົນເຂົ້າ-ອອກເມືອງ ໃຫ້ມີຄວາມເປັນລະບຽບຮຽບຮ້ອຍ, ວ່ອງໄວ, ສະຫງົບ ແລະ ປອດໄພ; ປະຕິບັດມາດຕະການເຂົ້າ-ອອກ ສປປ ລາວ ຕາມແຈ້ງການ ສະບັບເລກທີ 627/ຫສນຍ, ລົງວັນທີ 7 ພຶດສະພາ 2022; ກໍລະນີ ມີບັນຫາຕ່າງໆເກີດຂຶ້ນ ແມ່ນໃຫ້ລາຍງານຂັ້ນເທິງ ດ້ວຍຄວາມວ່ອງໄວ ແລະ ທັນການ; ກວດກາຄືນ ບັນດານິຕິກຳ ທີ່ຮັບໃຊ້ໜ້າທີ່ວຽກງານ ຖ້າຫາກຍັງມີຈຸດໃດ ທີ່ເຫັນວ່າ ຍັງບໍ່ທັນຈະແຈ້ງ ແລະ ບໍ່ທັນຄົບຖ້ວນ ແມ່ນໃຫ້ນຳສະເໜີພາກສ່ວນກ່ຽວຂ້ອງ ພິຈາລະນາປັບປຸງແກ້ໄຂ ຕາມຂັ້ນຕອນ ແລະ ລະບຽບການ.
ພາບ ແລະ ຂ່າວ: ກົມປະຊາສຳພັນ
ຫສນຍ ຍົກສູງຄຸນນະພາບວຽກງານເສນາທິການ ໃນໄລຍະໃໝ່
ວັນທີ 12 ພຶດສະພາ 2022 ຫ້ອງວ່າການສຳນັກງານນາຍົກລັດຖະມົນຕີ (ຫສນຍ) ໄດ້ຈັດກອງປະຊຸມປຶກສາຫາ ລື ກ່ຽວກັບ “ການຍົກສູງຄຸນນະພາບວຽກງານເສນາທິການ ໃນໄລຍະໃໝ່” ຮ່ວມກັບບັນດາກະຊວງ, ອົງການທຽບເທົ່າ ແລະ ບັນດາແຂວງໃນທົ່ວປະເທດ ຜ່ານລະບົບກອງປະຊຸມທາງໄກ, ໂດຍການເປັນປະທານ ຂອງທ່ານ ອາລຸນໄຊ ສູນນະລາດ ລັດຖະມົນຕີ, ຫົວໜ້າ ຫສນຍ; ມີບັນດາຮອງລັດ ຖະມົນຕີ, ຮອງຫົວໜ້າອົງການທຽບເທົ່າກະຊວງ, ຮອງເຈົ້າແຂວງ, ຮອງເຈົ້າຄອງນະຄອນຫຼວງວຽງຈັນ, ຫົວໜ້າຫ້ອງ ການກະຊວງ-ອົງການ, ຫົວໜ້າຫ້ອງວ່າການແຂວງ-ນະ ຄອນຫຼວງວຽງຈັນ ແລະ ຄະນະກົມ ພາຍໃນ ຫສນຍ ເຂົ້າ ຮ່ວມ.
ກອງປະຊຸມ ເພື່ອປັບປຸງຄຸນນະພາບການເປັນເສນາທິ ການໃນໄລຍະໃໝ່ ແລະປັບປຸງຮອບດ້ານ ວຽກງານເສນາທິ ການຮັບໃຊ້ຂັ້ນເທິງ ກໍ່ຄືການບໍລິການຮັບໃຊ້ປະຊາຊົນ ໂດຍສະເພາະ ເພື່ອປຶກສາຫາລື ແລະ ທົບທວນການຈັດຕັ້ງປະຕິ ບັດວຽກງານສຳຄັນ ຈຳນວນໜຶ່ງ ເປັນຕົ້ນ ການຈັດຕັ້ງປະຕິ ບັດລະບຽບແລະກົນໄກການເຮັດວຽກຂອງລັດຖະບານ ຊຸດ ທີ IX ຕາມຂໍ້ຕົກລົງ ສະບັບເລກທີ 41/ນຍ, ລົງວັນທີ 30 ເມສາ 2021 ຕິດພັນກັບພາລະບົດບາດການເປັນເສນາ ທິການ, ການປະສານງານຂອງບັນດາຂະແໜງການຂັ້ນສູນ ກາງ ແລະ ທ້ອງຖິ່ນ; ຜ່ານຮ່າງບົດສະຫຼຸບວຽກງານພົ້ນເດັ່ນ ປະຈຳອາທິດ, ເດືອນ, 3 ເດືອນ ແລະປະຈຳປີຂອງທ້ອງຖິ່ນ ຕໍ່ລັດຖະບານ ແລະ ແຜນວຽກຈຸດສຸມ ໃນຕໍ່ໜ້າ; ຊຸກຍູ້ຂະ ແໜງການ ແລະທ້ອງຖິ່ນໃນການປະຕິບັດວຽກງານຮີບດ່ວນຈຳນວນໜຶ່ງ ເຊັ່ນ: ການເປີດປະເທດ, ການຈັດຕັ້ງປະ ຕິບັດ 2 ວາລະແຫ່ງຊາດ ຕິດພັນກັບແກ້ໄຂບັນຫານໍ້າມັນເຊື້ອໄຟ, ເງິນຕາ, ການຂົນສົ່ງຢູ່ດ່ານຊາຍແດນ. ນອກຈາກນັ້ນ ຍັງເປັນການຕິດຕາມ ແລະ ຊຸກຍູ້ການຈັດຕັ້ງປະຕິບັດບັນດານິຕິກຳຂອງລັດຖະບານ ເປັນຕົ້ນດຳລັດ ສະບັບເລກ ທີ 599/ນຍ, ລົງວັນທີ 29 ກັນຍາ 2021 ວ່າດ້ວຍລົດຂອງລັດ ກໍ່ຄືມາດຕະການປະຢັດມັດທະຍັດ ແລະແຈ້ງການທິດ ຊີ້ນຳຕ່າງໆຂອງລັດຖະບານ, ພ້ອມທັງແລກປ່ຽນຂໍ້ມູນກ່ຽວກັບສະພາບຄວາມເປັນຈິງຂອງບັນດາຂະແໜງການ ສູນກາງ ແລະ ທ້ອງຖິ່ນ.
ໃນໂອກາດນີ້, ຜູ້ຕາງໜ້າບັນດາ ກະຊວງ, ອົງການ, ແຂວງ ແລະ ນະຄອນຫຼວງວຽງຈັນ ໄດ້ຜັດປ່ຽນກັນລາຍງານ ແລະ ແລກປ່ຽນຄຳຄິດເຫັນ ຕໍ່ການຈັດຕັ້ງປະຕິບັດວຽກງານ ທີ່ຕິດພັນກັບຂະແໜງການ ແລະ ທ້ອງຖິ່ນຂອງຕົນ ໂດຍສະ ເພາະ ບັນດາຫົວຂໍ້ທີ່ທ່ານປະທານກອງປະຊຸມໄດ້ເຈາະຈີ້ມ, ລວມທັງ ສະພາບພົ້ນເດັ່ນຕ່າງໆ. ນອກຈາກນີ້, ກອງປະຊຸມ ຍັງລະດົມຄວາມຄິດເຫັນຈາກຜູ້ເຂົ້າຮ່ວມ ເພື່ອນຳໄປຄົ້ນຄວ້າ ແກ້ໄຂຂໍ້ຄົງຄ້າງ ແລະ ບັນຫາຫຍຸ້ງຍາກຕ່າງໆ ທີ່ກຳລັງປະເຊີນ ໃນປະຈຸບັນ.
ຕອນທ້າຍ, ທ່ານ ປະທານກອງປະຊຸມ ໄດ້ມີຄຳເຫັນສະ ຫຼຸບ, ສັງລວມຜົນຂອງກອງປະຊຸມຄັ້ງນີ້, ພ້ອມທັງເນັ້ນໜັກ ໃຫ້ບັນດາຫ້ອງການກະຊວງ-ອົງການທຽບເທົ່າ ແລະ ຫ້ອງວ່າການແຂວງ-ນະຄອນຫຼວງວຽງຈັນ ເອົາໃຈໃສ່ວຽກງານການເປັນເສນາທິການ ຕື່ມບາງດ້ານ ເປັນຕົ້ນ ຕ້ອງກຳນົດວິ ໄສທັດວຽກງານຫ້ອງວ່າການ ຫຼື ຫ້ອງການຂອງຕົນຢ່າງຊັດ ເຈນ ເພື່ອຮັບປະກັນ ໃຫ້ສາມາດຕອບສະໜອງຄວາມຮຽກ ຮ້ອງຕ້ອງການໃນການບໍລິຫານວຽກງານ ແຕ່ລະຂັ້ນ ແລະ ແຕ່ລະໄລຍະ;ມີຄວາມກ້າຫານໃນການໃຫ້ທັດສະນະຕ່າງໆ ແກ່ຂັ້ນເທິງ ບົນພື້ນຖານຂໍ້ມູນຖືກຕ້ອງ, ແທດຕົວຈິງ, ສອດ ຄ່ອງກັບລະບຽບກົດໝາຍ, ມີວິທະຍາສາດ ແລະ ມີຫຼາຍທາງເລືອກ; ຫ້ອງວ່າການ, ຫ້ອງການ ຕ້ອງກຳສະພາບການຮອບດ້ານໃຫ້ໄດ້ ທັງວຽກງານສາຍຕັ້ງ ແລະ ສາຍຂວາງ, ພ້ອມກັນນັ້ນ ພະນັກງານທີ່ເຮັດໜ້າທີ່ເສນາທິການ ກໍ່ຕ້ອງຄິດໄວ, ຫູໄວ, ຕາໄວ, ເຮັດວຽກໄວ ແລະ ຄາດຄະເນລ່ວງ ໜ້າໄດ້ດີ. ນອກຈາກນັ້ນ ການປະສານງານ ກໍ່ໃຫ້ມີຄວາມຄ່ອງຕົວ ທັງໂດຍກົງ ແລະ ຮູບແບບທາງການ ເພື່ອໃຫ້ໄດ້ຂໍ້ມູນທີ່ຫຼາກຫຼາຍ, ຖືກຕ້ອງ ແລະ ຊັດເຈນ ແນໃສ່ເຮັດໃຫ້ການເປັນເສນາທິການໃຫ້ແກ່ການນຳທຸກຂັ້ນ ໂດຍສະເພາະ ການປະສານງານມີຄວາມຄ່ອງຕົວ, ການບໍລິຫານ ແລະຈັດ ຕັ້ງປະຕິບັດວຽກງານ ທັງແບບປົກກະຕິ ແລະ ຮີບດ່ວນ ມີຄວາມສະດວກ, ວ່ອງໄວ, ທັນສະໄໝ-ທັນການ, ໂປ່ງໃສ, ຮັກສາໄດ້ຄວາມລັບ, ມີປະສິດທິພາບ ແລະປະສິດທິຜົນສູງ ຂຶ້ນ.
ພາບ ແລະ ຂ່າວ: ກົມປະຊາສຳພັນ ຫສນຍ.