ຫ້ອງການໂຍທາທິການ ແລະ ຂົນສົ່ງເມືອງເຊບັ້ງໄຟໄດ້ລົງຊຸກຍູ້ການກໍ່ສ້າງ ແລະ ສ້ອມແປງຂົວຢູ່ບ້ານປົ່ງແດງ ແລະ ບ້ານຄຳເຕີຍ.

ໃນທ້າຍອາທິດຜ່ານມານີ້ ທ່ານ ບຸນທັນ ພິມພົມມາ ຫົວໜ້າຫ້ອງການໂຍທາທິການ ແລະ ຂົນສົ່ງ ເມືອງເຊບັ້ງໄຟ ແຂວງຄໍາມ່ວນ ພ້ອມຄະນະໄດ້ລົງຊຸກຍູ້ຕິດຕາມການກໍ່ສ້າງ ແລະ ສ້ອມແປງຂົວຄືນໃໝ່ເຊິ່ງມີຢູ່ 02 ຈຸດຄື: ຈຸດທີ 01 ກໍ່ສ້າງຂົວໄໝ່ ຂົວຫ້ວຍຫະນຽມສອງ ຢູ່ບ້ານປົ່ງແດງ ເຊິ່ງເປັນຂົວໄມ້ ມີຄວາມຍາວ 15 ແມັດ ທຶນໃນການກໍ່ສ້າງແມ່ນ 15 ລ້ານກີບ, ຂົວດັ່ງກ່າວແມ່ນໄດ້ເລີ່ມລົງມືກໍ່ສ້າງແຕ່ວັນທີ 23 ພຶດສະພາ ຫາ ວັນທີ 07 ມິຖຸນາ 2022.

ຈຸດທີ 02 ສ້ອມແປງຄືນຂົວຫ້ວຍ ດູນສານ ບ້ານຄຳເຕີຍ ເຊິ່ງມີຄວາມຍາວ 20 ແມັດ ທຶນໃນການກໍ່ສ້າງແມ່ນ 3.500.000 ກີບ ເຂົ້າຮ່ວມໃນຂະບວນການກໍ່ສ້າງຂົວ ແລະ ສ້ອມແປງໃນຄັ້ງ ນີ້ມີ ທ່ານ ແກ້ວ ນາຍບ້ານໆ ປົ່ງແດງ ແລະ ທ່ານ ບຸນທັນ ນາຍບ້ານໆ ຄຳເຕີຍ ພ້ອມດ້ວຍການຈັດຕັ້ງບ້ານ ແລະ ພໍ່ແມ່ປະຊາຊົນທັງສອງບ້ານເຂົ້າຮ່ວມຢ່າງເປັນຂະບວນການຟົດຟື້ນ, ທຶນໃນການກໍ່ ສ້າງແມ່ນໄດ້ມາຈາກການລະດົມນຳພໍ່ແມ່ປະຊາຊົນພາຍໃນບ້ານພ້ອມດ້ວຍບັນດາພໍ່ຄ້າຊາວຂາຍ ໃນການກໍ່ສ້າງ ແລະ ສ້ອມແປງຂົວໃນຄັ້ງນີ້ ກໍ່ເພື່ອເຮັດໃຫ້ພໍ່ແມ່ປະຊາຊົນມີຄວາມສະດວກສະບາຍ ໃນການສັນຈອນໄປມາ ຫາສູ່ກັນລະຫວ່າງບ້ານຕໍ່ບ້ານໃຫ້ດີຂຶ້ນກວ່າເກົ່າ.

ແຫຼ່ງຂ່າວ: Khammouane News

ພະແນກອຸດສາຫະກຳ ແລະ ການຄ້າ ແຂວງຫຼວງພະບາງອອກແຈ້ງການ

ເລື່ອງ: ຫ້າມຕິດປະກາດ ຫຼື ໂຄສະນາເປັນເງິນຕາຕ່າງປະເທດ

#ຂໍອະນຸຍາດແຊສຕໍ່ ຈາກຜູ້ໃຊ້ເຟສບຸກທ່ານໜຶ່ງໄດ້ອອກມາແຊສຜົນຮ້າຍທີ່ເກີດຂຶ້ນກັບຕົນເອງຈາກການເຮັດວຽກໜັກຈົນເກີນໄປ ພັກຜ່ອນບໍ່ພຽງພໍ ກິນເຂົ້າບໍ່ຕົງເວລາ ເຊິ່ງໃນໂພສມີເນື້ອໃນດັ່ງນີ້:

ນ້ອຍຈະມາແຊຣຜົນກະທົບທີ່ຮ້າຍແຮງກ່ຽວກັບການເຮັດວຽກໜັກແລະພັກຜ່ອນບໍ່ພຽງພໍມັນຮ້າຍແຮງສຳໃດຈົນມາເຈີ້ກັບໂຕເອງຫາກໍ່ສິມາຮູ້ວ່າການພັກຜ່ອນບໍ່ພຽງພໍຈະຮ້າຍແຮງເຖິງຂະໜາດນີ້ ຍ້ອນຄິດມາຕະຫຼອດວ່າໂຕເອງແຂງແຮງໂຕເອງຍັງໄຫວ.

ຈົນມາມື້1 ຮ່າງກາຍນ໋ອກລົ້ມຫົວຟາດຟື້ນບໍ່ໄດ້ສະຕິຈົນເຂົ້າ ICU ເພາະຫົວໃຈຢຸດເຕັ້ນ2ເທື່ອໃນຂະນະນັ້ນຄືທຸກຄົນຄິດວ່າຂ້ອຍບໍ່ລອດແລ້ວພາກັນໄຫ້ໄວ້ຖ້າຢູ່ທາງນອກດີແຕ່ບຸນຍັງບໍ່ຮອດຄາວໄປຈຶ່ງໄດ້ສະຕິກັບມາໝໍປ້ຳຫົວໃຈທັນຈຶ່ງຄ່ອຍມີສະຕິກັບມາແຕ່ອາການກໍ່ຍັງບໍ່ໂອເຄຄືໝໍປຸກໃຫ້ຕື່ນຕະຫຼອດຫ້າມຫຼັບເດັດຂາດຂ້ອຍເຂົ້າໃຈເລີຍວ່າຄົນໄກ້ຈະຕາຍເປັນແນວໃດຂ້ອຍພະຍາຍາມຕໍ່ສູ້ກັບຮ່າງກາຍບໍ່ໃຫ້ໂຕເອງຫຼັບແຕ່ມັນກໍ່ເຮັດໄດ້ຍາກແຮງເພາະຕອນນັ້ນຂ້ອຍເພຍແລະຫຼ່ອຍໄປໝົດຫູອື້ຕາມົວແຕ່ເຫັນໝໍລາງໆ, ໃນຂະນະຕອນນັ້ນຂ້ອຍພະຍາຍາມອະທິຖານໃຫ້ຂ້ອຍລອດເພາະຂ້ອຍຫ່ວງແມ່ ແລະ ຄອບຄົວແຮງໝໍພະຍາຍາມຊ່ວຍເຕັມທີ່ແຍ່ທໍ່ຫາຍໃຈລົງປອດແລະຫຍັງຕໍ່ຫຍັງເຕັມໂຕຂ້ອຍໄປໝົດ.

ໃນທີ່ສຸດຂ້ອຍກໍ່ລອດມາໄດ້ແຕ່ຮ່າງກາຍບໍ່ຄືເກົ່າ (ແຕ່ໃນຮູບນີ້ຄືມີສະຕິແລ້ວໝໍເອົາອອກມາໄວ້ສຸກເສີນ) ມື້ຕໍ່ມາໝໍໄດ້ລົມກັບຂ້ອຍວ່າຮ່າງກາຍຂ້ອຍນ໋ອກລະເຮັດໃຫ້ເສັ້ນປະສາດຫຼ່ອຍເຈົ້າໂຊກດີທີ່ພື້ນມາລະປົກກະຕິດີ ເພາະຄົນທີ່ເປັນແນວນີ້ລອດມາໜ່ອຍສຸດຈະປົກກະຕິຄືບໍ່ພິການສະໝອງກະເປັນເຈົ້າຍິງນິທາ ຂ້ອຍຟັງແລ້ວຈົນນ້ຳຕາໄຫຼແລະຍ້ານແຮງ ສາເຫດຫຼັກໆເລີຍຄື

ເກີດຈາກ ພັກຜ່ອນໜ່ອຍແຕ່ລະຄືນຂ້ອຍນອນ3-4ໂມງເຊົ້າທຸກມື້ແລ້ວຕື່ນ9ໂມງບາງມື້ມີວຽກຫຼາຍຕື່ນ 7 – 8ໂມງນອນພຽງແຕ່ 4 – 5 ຊົ່ວໂມງ ເຮັດວຽກໜັກເກີນຮ່າງກາຍ ກີນອາຫານບໍ່ຕົງເວລາ ອອກກຳລັງກາຍໜັກ ກະຍ້ອນຄິດວ່າບໍ່ເປັນຫຍັງ ຈົນເກີດກັບຕົວເອງຈຶ່ງຮູ້ວ່າມັນອັນຕະລາຍຮ້າຍແຮງ ຕອນນີ້ຂ້ອຍຮູ້ສຶກຮັກໂຕເອງແຮງ ແລະ ຈະບໍ່ໃຫ້ມີເຫດການແບບນີ້ເກີດຂື້ນກັບຂ້ອຍອີກຈະປັບປ່ຽນການໃຊ້ຊີວິດໃໝ່ພັກຜ່ອນໃຫ້ຫຼາຍຂື້ນເຮັດວຽກໃຫ້ໜ່ອຍລົງຕາມທີ່ໂຕເອງໄຫວ.

ພ້ອມນີ້ເຈົ້າຂອງໂພສຍັງໄດ້ຝາກ #ເຕືອນເດີ້ທຸກຄົນໃຜທີ່ຫັກໂຫມແບບຂ້ອຍໃຫ້ຢຸດແລ້ວກັບມາເບິ່ງແຍງໂຕເອງດີໆເພາະທຸກຄົນອາດຈະບໍ່ໂຊກດີສະເໝີໄປ (ເພາະຂ້ອຍເສຍໝູ່ທີ່ຂ້ອຍຮັກໄປ2ຄົນແລ້ວຍ້ອນອາການແນວນີ້) ຂ້ອຍຈຶ່ງມາແຊຣບໍ່ຢາກໃຫ້ທຸກຄົນເຈີ້ເຫດການນີ້ເກີດຂື້ນກັບຂ້ອຍແຕ່ວັນທີ່7 ຕອນນີ້ຄືຢູ່ໃນຊ່ວງຟື້ນຟູໂຕເອງເພາະອາການຕອນນີ້ເຮັດຫຍັງກະເມື່ອຍງ່າຍແລະຫອບໄວຫຼັກໆຄືມັກເຈັບຫົວຂ້າງ1.

(ຂໍອະນຸຍາດເຈົ້າຂອງໂພສ ແລະ ຂໍຂອບໃຈເຈົ້າຂອງໂພສທີ່ໄດ້ແຊສປະສົມການໃນຄັ້ງນີ້)

ວັນທີ 14 ມິຖຸນາ 2022 ນີ້, ທ່ານ ກິແກ້ວ ໄຂຄໍາພິທູນ ຮອງນາຍົກ ລັດ ຖະມົນຕີ, ປະທານຄະນະກຳມະການ ຕ້ານການຄ້າມະນຸດລະດັບຊາດ ພ້ອມດ້ວຍຄະນະ ໄດ້ເຄື່ອນໄຫວເຮັດວຽກ ແລະ ພົບປະໂອ້ລົມໃຫ້ທິດຊີ້ນໍາກ່ຽວກັບ ວຽກງານຕ້ານການຄ້າມະນຸດ ຕໍ່ການນຳຫລັກແຫລ່ງແຂວງບໍ່ແກ້ວ ໂດຍມີ ທ່ານ ບົວຄົງ ນາມມະວົງ ເຈົ້າແຂວງບໍ່ແກ້ວ ພ້ອມດ້ວຍພະນັກງານການນໍາຂອງແຂວງ ເຂົ້າຮ່ວມຮັບຟັງ.

ໃນການພົບປະໂອ້ລົງຄັ້ງນີ້, ທ່ານ ຄໍາຜະຫຍາ ພົມປັນຍາ ຮອງເຈົ້າແຂວງບໍ່ແກ້ວ, ຜູ້ຊີ້ນໍາວຽກງານຂົງເຂດວັດທະນະທໍາ-ສັງຄົມ, ປະທານຄະນະກໍາມະການຕ້ານການຄ້າມະ ນຸດຂັ້ນແຂວງ ກໍໄດ້ລາຍງານໃຫ້ຊາບກ່ຽວກັບສະພາບການຈັດຕັ້ງປະຕິບັດວຽກງານຕ້ານ ແລະ ສະກັດກັ້ນການຄ້າມະນຸດ ໃນໄລຍະຜ່ານມາ ໂດຍສະເພາະ ໃນໄລຍະປີ 2021-2022 ໄດ້ເຄື່ອນໄຫວຕິດຕາມ, ກວດກາ ເຫດການຕ່າງໆຢ່າງເປັນປົກກະຕິ ຕິດພັນກັບວຽກງານໂຄສະນາເຜີຍແຜ່ຜົນຮ້າຍຂອງການຄ້າມະນຸດ, ວຽກງານຕ້ານການຄ້າມະນຸດ ຢູ່ບັນດາເມືອງ, ບ້ານເປົ້າໝາຍ ແລະ ສະຖານການສຶກສາຕ່າງໆ; ບັນດາຂະແໜງການກ່ຽວຂ້ອງໄດ້ເອົາໃຈໃສ່ໃນການດຳເນີນຄະດີຄວາມຕາມຂະບວນການຍຸຕິທໍາ, ຖືກຕ້ອງຕາມກົດໝາຍ, ລະບຽບການ ແລະ ມີຄວາມໂປ່ງໃສ, ໃນນີ້ ໄດ້ຮັບແຈ້ງຄວາມ, ຄໍາຮ້ອງຟ້ອງ ແລະ ພົບເຫັນຜູ້ລັກລອບເຂົ້າອອກເມືອງ ແລະ ຜູ້ກະທໍາຜິດກ່ຽວກັບການຄ້າມະນຸດ 16 ຄັ້ງ, ຮັບຄໍາຮ້ອງທຸກຊ່ວຍເຫລືອຜູ້ຖືກເຄາະຮ້າຍ 9 ຄັ້ງ, ໄດ້ເປີດການສືບສວນ-ສອບສວນ 14 ຄັ້ງ; ຮັບແຈ້ງຄວາມ, ຄໍາຮ້ອງຟ້ອງ, ຄໍາຮ້ອງຂໍຄວາມຊ່ວຍເຫລືອຈາກຜູ້ປົກຄອງ ແລະ ຈາກສະຖານທູດຕ່າງປະເທດ ລວມ 66 ຄັ້ງ, ແກ້ໄຂປະກົດການຫຍໍ້ທໍ້ໄດ້ 18 ຄັ້ງ, ສຶກສາອົບຮົມຜູ້ກະທໍາຜິດຄ້າປະເວນີ, ກວດກາການເຂົ້າມາພັກເຊົາບໍ່ຖືກຕ້ອງຂອງຄົນຕ່າງປະ ເທດ; ກອງບັນຊາການ ປກສ ແຂວງ ໄດ້ສົມທົບກັບພາກສ່ວນທີ່ກ່ຽວຂ້ອງ ຊ່ວຍເຫລືອຜູ້ຖືກເຄາະຮ້າຍ ແລະ ແຮງງານລາວ, ຕ່າງປະເທດ ທັງໝົດ 66 ຄັ້ງ ມີທັງໝົດ 477 ຄົນ, ຍິງ 199 ຄົນ. ພ້ອມກັນນີ້, ຍັງໄດ້ເອົາໃຈໃສ່ໃນການປະສານງານ, ພົວພັນຮ່ວມມືກັບຕ່າງປະເທດ ແລະ ອົງການຈັດຕັ້ງຕ່າງໆ ເພື່ອເຮັດໃຫ້ວຽກງານດັ່ງກ່າວ ໄດ້ຮັບການແກ້ໄຂຢ່າງວ່ອງໄວ ແລະ ທັນການ.

ໂອກາດນີ້, ທ່ານຮອງນາຍົກລັດຖະມົນຕີ ໄດ້ມີຄໍາເຫັນຊີ້ນໍາ ແລະ ເນັ້ນໃຫ້ແຂວງບໍ່ແກ້ວ ເອົາໃຈໃສ່ຕື່ມບາງດ້ານ ເພື່ອເປັນທິດທາງໃນການແກ້ໄຂຂໍ້ຄົງຄ້າງ ແລະ ວາງແຜນການໃນຕໍ່ໜ້າ. ນອມນີ້, ກໍໃຫ້ປັບປຸງແບບແຜນວິທີເຮັດວຽກ, ກົນໄກການປະສານສົມທົບ ລະຫວ່າງສູນກາງກັບແຂວງ, ແຂວງ ກັບ ເມືອງ ແລະ ກຸ່ມບ້ານ ໃຫ້ກົມກຽວກັນ, ການສະໜອງຂໍ້ມູນຂ່າວສານ, ລະບອບການລາຍງານໃຫ້ມີຄວາມວ່ອງໄວຊັດເຈນທັນເວລາ; ສືບຕໍ່ເພີ່ມທະວີການພົວພັນຮ່ວມມືກັບຕ່າງປະເທດ, ໂດຍສະເພາະກັບປະເທດທີ່ມີຊາຍແດນຕິດຈອດ ເພື່ອຍາດແຍ່ງການສະໜັບສະໜູນ, ແລກປ່ຽນຂໍ້ມູນຂ່າວສານບົດຮຽນ ລວມທັງປະສານງານ ໃນການຕ້ານອາດຊະຍາກໍາທີ່ກ່ຽວຂ້ອງກັບການຄ້າມະນຸດ; ກຳນົດວາງທິດທາງແຜນການຈັດຕັ້ງປະຕິບັດວຽກງານ ຕ້ານການຄ້າມະນຸດເປັນແຕ່ລະໄລຍະ, ໃນນັ້ນໃຫ້ກໍານົດບັນດາຄາດໝາຍສູ້ຊົນ ແລະ ໄລຍະເວລາຈັດຕັ້ງປະຕິບັດຈະແຈ້ງ, ມີການປະເມີນຜົນ ແລະ ສະຫລຸບຖອດຖອນບົດຮຽນເປັນປົກກະຕິໃນແຕ່ລະຂັ້ນ, ແຕ່ລະໄລຍະ ບົນພື້ນຖານເນື້ອໃນຄາດໝາຍ ທີ່ວາງໄວ້.

ລັດຖະ​ບານ ​ຈຳ​ກັດການຫັນປ່ຽນທີ່ດິນກະສິກຳ ເປັນດິນປະເພດອື່ນ

ເພື່ອຮັບປະກັນການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ – ການເງິນ ໂດຍສະເພາະແມ່ນການຕອບໂຕ້ກັບສະພາບການຂາດແຄນສະບຽງອາຫານທີ່ອາດຈະເກີດຂຶ້ນໃນຕໍ່ໜ້າ; ລັດຖະບານ ກໍຄື ກະຊວງກະສິກໍາ ແລະ ປ່າໄມ້ (ກປ) ໄດ້ດໍາເນີນ 4 ວຽກງານສໍາຄັນ ໃນການສະກັດກັ້ນການຫັນປ່ຽນທີ່ດິນກະສິກຳໄປເປັນດິນປະເພດອື່ນ.

ທ່ານ ເພັດ ພົມພິພັກ ລັດຖະມົນຕີກະຊວງ ກປ ໄດ້ຊີ້ແຈງຂໍ້ຊັກຖາມຂອງສະມາຊິກສະພາແຫ່ງຊາດ ກ່ຽວກັບວຽກງານຂອງຂະແໜງຕົນ ທີ່ຕິດພັນກັບວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ໃນກອງປະຊຸມສະໄໝສາມັນ ເທື່ອທີ 3 ຂອງສະພາແຫ່ງຊາດ ຊຸດທີ IX ໃນວັນທີ 20 ມິຖຸນາ ຜ່ານມາ.

ທ່ານ ເພັດ ພົມ​ພິ​ພັກ ກ່າວວ່າ: ກະຊວງ ປກ ໄດ້ດໍາເນີນການສະກັດກັ້ນການຫັນປ່ຽນທີ່ດິນກະສິກຳ ໄປເປັນດິນປະເພດອື່ນ, ການປົກປັກຮັກສາຄຸນນະພາບຂອງດິນກະສິກຳ ໄປຕາມທິດທາງແຜນການ ໃນການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ຊຶ່ງໄດ້ດຳເນີນ 4 ວຽກງານທີ່ສຳຄັນຄື:

1). ໄດ້ປະຕິບັດຕາມ ມະຕິຂອງສະພາແຫ່ງຊາດ ວ່າດ້ວຍແຜນແມ່ບົດການຈັດສັນທີ່ດິນແຫ່ງຊາດ ຊຶ່ງໄດ້ຈັດສັນທີ່ດິນທີ່ຈະສະຫງວນ ແລະ ອະນຸລັກໄວ້ ເພື່ອເປັນເນື້ອທີ່ປ່າໄມ້ປົກຫຸ້ມ 70% ລວມທັງດິນບໍລິເວນນ້ຳ ທີ່ນອນໃນເຂດພື້ນທີ່ດັ່ງກ່າວ ຂອງເນື້ອທີ່ທົ່ວປະເທດ 16,5 ລ້ານເຮັກຕາ ກວມເອົາ 3 ປະເພດປ່າ (ປ່າສະຫງວນ, ປ່າປ້ອງກັນ ແລະ ປ່າຜະລິດ) ແລະ ເນື້ອທີ່ດິນກະສິກຳ 4,5 ລ້ານເຮັກຕາ. ໃນນີ້, ດິນນາ 2 ລ້ານເຮັກຕາ (ປັດຈຸບັນເປັນດິນນາ 1.160.000 ເຮັກຕາ ຍັງຈະຂະຫຍາຍເພີ່ມຕື່ມ 840.000 ເຮັກຕາ), ເນື້ອທີ່ປູກພືດອາຍຸສັ້ນ 1 ລ້ານເຮັກຕາ (ປັດຈຸບັນນຳເຂົ້າໃນການຜະລິດແລ້ວ 760.000 ເຮັກຕາ ແລະ ຍັງຈະຂະຫຍາຍເພີ່ມຕື່ມອີກ ຈຳນວນ 240.000 ເຮັກຕາ), ເນື້ອທີ່ປູກພືດອາຍຸຍາວ/ໄມ້ໃຫ້ໝາກ 800.000 ເຮັກຕາ ປັດຈຸບັນມີ 610.000 ເຮັກຕາ ຍັງຈະຂະຫຍາຍເພີ່ມຕື່ມຈໍານວນ 190.000 ເຮັກຕາ), ເນື້ອທີ່ທົ່ງຫຍ້າທຳມະຊາດ 700.000 ເຮັກຕາ (ສໍາລັບປູກຫຍ້າລ້ຽງສັດ 164.466 ເຮັກຕາ). ມາຮອດປັດຈຸບັນ ແມ່ນສໍາເລັດໃນການເອກະພາບຈຸດພື້ນທີ່ ແລະ ​ໂຕເລກ ກັບທ້ອງຖິ່ນຂັ້ນແຂວງ ຈຳນວນ 16 ແຂວງ (ກໍາລັງສືບຕໍ່ເອກະພາບກັບແຂວງຊຽງຂວາງ ແລະ ນະຄອນຫຼວງວຽງຈັນ).

2. ກຳລັງດຳເນີນການໂຄງການຈັດສັນທີ່ດິນ ແລະ ປັກຫຼັກໝາຍເຂດສະຫງວນໃນການຜະລິດ ບັນດາພືດສິນຄ້າບຸລິມະສິດ ທີ່ໄດ້ມີຕະຫຼາດຮອງຮັບແລ້ວ ເພື່ອຕອບສະໜອງໃຫ້ແກ່ການລົງທຶນຂະ ໜາດນ້ອຍ, ຂະໜາດກາງ ແລະ ຂະໜາດໃຫຍ່;

3. ໄດ້ສ້າງ ແລະ ປັບປຸງນິຕິກໍາ ເພື່ອຄຸ້ມຄອງ ແລະ ພັດທະນາທີ່ດິນກະສິກໍາ ໃຫ້ສອດຄ່ອງກັບສະພາບ ແລະ ເງື່ອນໄຂຂອງການພັດທະນາໃນໄລຍະໃໝ່ ໂດຍສະເພາະແມ່ນດໍາລັດການຄຸ້ມຄອງທີ່ດິນກະສິກຳ ປັດຈຸບັນກຳລັງກະກຽມຜ່ານຮ່າງດຳລັດວ່າດ້ວຍທີ່ດິນກະສິກຳ;

4. ການປົກປັກຮັກສາຄຸນນະພາບຂອງດິນກະສິກຳ: ຜ່ານມາ, ໄດ້ສົ່ງທີມງານລົງປະສານສົມທົບກັບຜູ້ປະກອບການ, ຊາວກະສິກອນ ແລະ ອົງການຈັດຕັ້ງ ທີ່ເຮັດການຜະລິດກະສິກໍາ ເພື່ອປັບປຸງດິນໃຫ້ມີຄຸນນະພາບ ໂດຍການນຳໃຊ້ຝຸ່ນອົງຄະທາດ, ຊີວະພາບອົງຄະທາດ, ຝຸ່ນຂຽວ ແລະ ຝຸ່ນເຄມີ. ໃນນັ້ນ, ໄດ້ສຸມໃສ່ 10 ແຂວງຈຸດສຸມ ຂອງໂຄງການຄ້ຳປະກັນສະບຽງອາຫານ; ການຈັດການດິນ, ນ້ຳ, ຝຸ່ນ ແລະ ທາດອາຫານພືດ ໃນການປູກພືດໃນເຂດແຫ້ງແລ້ງ 6 ແຂວງ (ຄຳມ່ວນ, ສະຫວັນນະເຂດ ແລະ 4 ແຂວງພາກໃຕ້).

ແຫຼ່ງຂ່າວ: ປະຊາຊົນ

ວັນທີ 20 ມິຖຸນາປີ 2022 ນີ້, ເຂື່ອນໄຟຟ້ານ້ຳທາຂອງປະເທດລາວໄດ້ສົ່ງໄຟຟ້າໄປແຂວງຢຸນນານຈີນຢ່າງສຳເລັດຜົນ ເຊິ່ງໄດ້ປ່ຽນສະພາບເດີມທີ່ຈີນສົ່ງໄຟຟ້າໄປລາວພຽງຝ່າຍດຽວໃຫ້ກາຍເປັນຈີນ-ລາວສົ່ງໄຟຟ້າໃຫ້ກັນແລະກັນ. ນີ້ແມ່ນຕາໜ່າງໄຟຟ້າລາວ-ຈີນສາມາດສົ່ງໄຟຟ້າໃຫ້ກັນແລະກັນເປັນຄັ້ງທຳອິດໃນຮອບ 12 ປີຜ່ານມານີ້ ເຊິ່ງເປັນຂີດໝາຍສະແດງໃຫ້ເຫັນວ່າ: ການຄ້າພະລັງງານໄຟຟ້າລະຫວ່າງລາວ-ຈີນໄດ້ກ້າວເຂົ້າສູ່ໄລຍະໃໝ່.

ເພື່ອຊ່ວຍເຫຼືອລາວແກ້ໄຂບັນຫາໄຟຟ້າທີ່ມີສ່ວນເຫຼືອໃນລະດູຝົນ, ບໍລິສັດຕາໜ່າງໄຟຟ້າພາກໃຕ້ຈີນກັບລັດວິສາຫະກິດໄຟຟ້າລາວໄດ້ເຊັນສັນຍາວ່າດ້ວຍການຄ້າໄຟຟ້າຜ່ານຕາຂ່າຍ 115 ກິໂລໂວນລະຫວ່າງຈີນ-ລາວ ໃນເດືອນ ມີນາ ປີ 2022 ເຊິ່ງໄດ້ສ້າງພື້ນຖານໃຫ້ແກ່ການສົ່ງໄຟຟ້າໃຫ້ກັນແລະກັນລະຫວ່າງສອງປະເທດຢ່າງສຳເລັດຜົນໃນຄັ້ງນີ້. ອີງຕາມສັນຍາລະຫວ່າງສອງຝ່າຍ, ລາວຈະສົ່ງໄຟຟ້າທີ່ສ່ວນເຫຼືອໃນລະດູຝົນທີ່ຜະລິດຢູ່ເຂື່ອນໄຟຟ້ານ້ຳທາໄປນຳໃຊ້ຢູ່ແຂວງຢຸນນານຈີນ, ເມື່ອຮອດລະດູແລ້ງ, ຈີນຈະສົ່ງໄຟຟ້າໄປນຳໃຊ້ຢູ່ເຂດທີ່ຂາດເຂີນໄຟຟ້າຢູ່ທາງພາກເໜືອລາວ.

ຕາມຂ່າວແຈ້ງໃຫ້ຮູ້ວ່າ: ການສົ່ງໄຟຟ້າແມ່ນອາໄສສາຍສົ່ງ 115 ກິໂລໂວນທີ່ມີຢູ່ໃນປັດຈຸບັນ ເຊິ່ງລົງທຶນຮ່ວມໂດຍຈີນແລະລາວ, ມາຮອດປັດຈຸບັນໄດ້ໃຫ້ການບໍລິການມາເປັນເວລາ 12 ປີແລ້ວ.

ແຫຼ່ງຂ່າວ: CRI