ທ່ານ ທອງລຸນ ສີສຸລິດ ປະທານປະເທດແຫ່ງ ສປປ ລາວ ຢ້ຽມຢາມໂຮງງານຜະລິດແປ້ງມັນຕົ້ນ ແລະ ໂຮງງານຜະລິດປຸຍຊີວະພາບ ເມືອງປາກລາຍ ແຂວງໄຊຍະບູລີ.

ເນື່ອງໃນໂອກາດທີ່ທ່ານ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກ, ປະທານປະເທດແຫ່ງ ສປປລາວ ພ້ອມຄະນະ ໄດ້ລົງເຄື່ອນໄຫວຢ້ຽມຢາມ ແລະ ເຮັດວຽກຢູ່ເມືອງ ປາກລາຍ, ແຂວງ ໄຊຍະບູລີ ໃນວັນທີ 3 ສິງຫາ 2022 ນີ້, ທ່ານພ້ອມຄະນະແມ່ນໄດ້ເຂົ້າຢ້ຽມຢາມໂຮງງານຜະລິດ ແປ້ງມັນຕົ້ນ ຂອງບໍລິສັດ ພັດທະນາກ້າວໜ້າລາວ ຈໍາກັດ ພ້ອມທັງໄດ້ຮັບຟັງການລາຍງານຫຍໍ້ຈາກທ່ານ ໂມ່ສ່ຽນຊຽງ ຜູ້ຈັດການ ບໍລິສັດ ພັດທະນາກ້າວໜ້າລາວ ຈໍາກັດ, ເຊິ່ງບໍລິສັດດັ່ງກ່າວຮອດປະຈຸບັນແມ່ນມີເຄື່ອງຈັກ 3 ຊຸດ ສາມາດຮອງຮັບຜົນຜະລິດໄດ້ 1,800-2,000 ໂຕນຕໍ່ວັນ, ມີວິຊາການ ແລະ ກຳມະກອນທັງໝົດ 400 ກ່ວາຄົນ, ຄົນລາວ 345 ຄົນ, ຍິງ 135 ຄົນ, ຄົນຈິນ 55 ຄົນ, ຍິງ 5 ຄົນ, ໄດ້ກໍານົດອັດຕາຄ່າງຈ້າງງານເປັນເດືອນ, ພ້ອມທັງມີນະໂຍບາຍຕໍ່ຜູ້ທີ່ເຮັດວຽກດີເດັ່ນ, ມີເງິນອູດໜູນທ້າຍປີ, ມີເງິນອາຍຸການເຮັດວຽກ ແລະ ມີນະໂຍບາຍເວລາເຈັບເປັນ, ການພັກເຊົາກໍ່ຢູ່ຟຣີ, ເງິນເດືອນຕ່ຳສຸດ 2.500.000-4.500.000ກີບ/ຄົນ/ ເດືອນ.

ເຊິ່ງສ້າງວຽກເຮັດງານທໍາໃຫ້ຊາວກະສິກອນ, ຜູ້ປະກອບການ ແລະ ແຮງງານຢູ່ຂັ້ນທ້ອງຖິ່ນນັບມື້ຫຼາຍຂຶ້ນ, ພ້ອມດຽວກັນທາງໂຮງງານຍັງໄດ້ຊອກບໍລິສັດມາລົງທຶນສ້າງຕັ້ງໂຮງງານປຸຍຊີວະພາບຂື້ນ, ໂດຍ ນໍາເອົາກາກ ແລະ ຂີ້ມັນຕົ້ນເປັນວັດຖຸຫຼັກປຸງແຕ່ງປຸຍຊີວະພາບ ເຊິ່ງສາມາດຜະລິດໄດ້ 108 ໂຕນ ຕໍ່ ວັນ, ໄດ້ຈໍາໜ່າຍຢູ່ພາຍໃນປະເທດລາວ, ເພື່ອໃຫ້ປະຊາຊົນໄປນໍາໃຊ້ເຂົ້າໃນການປູກພືດກະສິກຳ, ນອກຈາກນັ້ນທາງໂຮງງານໄດ້ສ້າງອ່າງບົ່ມແກັສ ຈາກນ້ຳລ້າງມັນຕົ້ນ ຈຳນວນ 3 ອ່າງ, ຂະໜາດບັນຈຸ 160,000 ແມັດກ້ອນ, ເພື່ອຜະລິດແກັສທົດແທນການນໍາໃຊ້ຖ່ານຫີນເຂົ້າໃນການອົບແປ້ງມັນຕົ້ນ.

ຈາກນັ້ນກໍ່ໄດ້ເຂົ້າຢ້ຽມຢາມ ໂຮງງານ ຜະລິດ ປຸຍຊີວະພາບ ຂອງບໍລິສັດ ປຸຍຊີວະພາບລາວ-ຈີນ ເຊິ່ງທັງ 2 ໂຮງງານແມ່ນຕັ້ງຢູ່ ບ້ານ ນໍ້າຊົ້ງ ເມືອງ ປາກລາຍ, ໃຫ້ການຕ້ອນຮັບ ແລະ ນໍາພາຢ້ຽມຢາມໂດຍ ທ່ານ ພົງສະຫວັນ ສິດທະວົງ ກໍາມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງ ໄຊຍະບູ, ມີການນໍາຂອງແຂວງ, ການນໍາຂອງເມືອງ ປາກລາຍ ແລະ ພະນັງງານທັງ 2 ໂຮງງານ.

ຂ່າວ ແລະ ຮູບພາບຈາກ: Lao National Radio

ສໍາມະນາ ທິດທາງ ປຸກລະດົມຂົນຂວາຍ ປະຊາຊົນ ເພື່ອຜ່ານຜ່າຄວາມຫຍຸ້ງຍາກດ້ານເສດຖະກິດ-ການເງິນ

ໃນວັນທີ 2 ສິງຫາ ນີ້, ທີ່ສູນກາງແນວລາວສ້າງຊາດ ໄດ້ຈັດກອງປະຊຸມສໍາມະນາກ່ຽວກັບ ທິດທາງ ແລະ ວິທີການປຸກລະດົມຂົນຂວາຍ ປະຊາຊົນ ຊັ້ນຄົນຕ່າງໆ ເພື່ອຜ່ານຜ່າຄວາມຫຍຸ້ງຍາກດ້ານເສດຖະກິດ-ການເງິນ-ເງິນຕາ ແລະ ຄ່າຄອງຊີບສູງ ໂດຍເປັນກຽດເຂົ້າຮ່ວມເປັນປະທານຂອງ ທ່ານ ສິນລະວົງ ຄຸດໄພທູນ ປະທານສູນກາງແນວລາວສ້າງຊາດ, ທ່ານ ສົມສະຫວາດ ເລັ່ງສະຫວັດ ອະດີດຮອງນາຍົກລັດຖະມົນຕີ ທີ່ປຶກສາສະພາທິດສະດີສູນກາງ, ທ່ານ ສົມດີ ດວງດີ ອະດີດຮອງນາຍົກລັດຖະມົນຕີ, ມີບັນດາທ່ານຮອງປະທານສູນກາງແນວລາວສ້າງຊາດ, ກໍາມະການສູນກາງແນວລາວສ້າງຊາດ, ຄະນະທີ່ປຶກສາຕ່າງໆ, ຜູ້ຕາງໜ້າຈາກທະນາຄານ ແຫ່ງ ສປປ ລາວ ລວມທັງຄະນະປະຈໍາແນວລາວສ້າງຊາດແຂວງໃນຂອບເຂດທົ່ວປະເທດ ເຂົ້າຮ່ວມດ້ວຍລະ ບົບປົກກະຕິ ແລະ ທາງໄກ.

ເພື່ອປະຕິບັດຕາມແຜນວຽກ 6 ເດືອນທ້າຍປີ ຂອງຄະນະປະຈໍາ ສນຊ ແລະ ອີງໃສ່ສະພາບຄວາມຮຽກຮ້ອງຕ້ອງການຂອງສັງຄົມ ແລະ ການຊີ້ນໍາຂອງກົມການເມືອງ ໃນການແກ້ໄຂສະພາບແນວຄິດຈິດໃຈຂອງປະຊາຊົນຊັ້ນຄົນຕ່າງໆ ອັນເນື່ອງຈາກມີຜົນກະທົບຂອງພະຍາດໂຄວິດ-19 ແລະ ຄວາມຫຍຸ້ງຍາກດ້ານເສດຖະກິດການເງິນ-ເງິນຕາ, ການຂາດແຄນນໍ້າມັນ ແລະ ຄ່າຄອງຊີບສູງ.

ການສໍາມະນາໃນຄັ້ງນີ້, ປະກອບມີ 4 ຫົວຂໍ້ສໍາຄັນຄື: ປະສົບປະການ ແລະ ທິດທາງການແກ້ໄຂບັນຫານໍ້າມັນຢູ່ ສປປ ລາວ ໄລຍະສະເພາະໜ້າ ແລະ ຍາວນານ; ທິດທາງ ແລະ ວິທີການແກ້ໄຂເງິນເຟີ້, ການຂາດແຄນເງິນຕາ ແລະ ວິທີການປຸກລະດົມປະຊາຊົນຊັ້ນຄົນຕ່າງໆ ຜ່ານຜ່າຄວາມຫຍຸ້ງຍາກດ້ານເງິນຕາ; ວິທີການປຸກລະດົມຂົນຂວາຍປະຊາຊົນຊັ້ນຄົນຕ່າງໆ ຜ່ານຜ່າຄວາມຫຍຸ້ງຍາກດ້ານເສດຖະກິດ-ການເງິນ-ເງິນຕາ ແລະ ຄ່າຄອງຊີບສູງ ຂອງສູນກາງແນວລາວສ້າງຊາດ ແລະ ຄວາມເຂົ້າໃຈຂອງຄະນະທີ່ປຶກສາເສດຖະກິດ ສນຊ ກ່ຽວກັບທິດທາງ ແລະ ວິທີການຜ່ານຜ່າຄວາມຫຍຸ້ງຍາກດ້ານເສດຖະກິດ-ການເງິນ-ເງິນຕາ ແລະ ຄ່າຄອງຊີບສູງ ຂອງປະຊາຊົນຊັ້ນຄົນຕ່າງໆ.

ທ່ານປະທານ ສນຊ ໄດ້ໃຫ້ຮູ້ວ່າ: ປະເທດເຮົາປັດຈຸບັນມີຄວາມຫຍຸ້ງຍາກ 4 ບັນຫາຄື: ນໍ້າມັນບໍ່ພໍຮັບໃຊ້; ອັດຕາເງິນເຟີສູງ; ຂາດເງິນຕາຕ່າງປະເທດ ແລະ ຄ່າຄອງຊີບສູງ ທັງໝົດນີ້ແມ່ນສົ່ງຜົນກະທົບຕໍ່ການຜະລິດທຸລະກິດ ແລະ ຊີວິດການເປັນຢູ່ຂອງປະຊາຊົນລາວບັນດາເຜົ່າ ຕໍ່ກັບຜົນກະທົບດັ່ງກ່າວນັ້ນ, ສູນກາງແນວລາວສ້າງຊາດ ມີທິດທາງ ແລະ ວິທີການປຸກລະດົມຂົນຂວາຍປະຊາຊົນຊັ້ນຄົນຕ່າງໆ ຜ່ານຜ່າຄວາມຫຍຸ້ງຍາກດ້ານເສດຖະກິດ-ການເງິນ-ເງິນຕາ ແລະ ຄ່າຄອງຊີບສູງ ໃນຖານະເປັນອົງການແນວໂຮມໃນໄລຍະພົບຄວາມຫຍຸ້ງຍາກໄດ້ປະຕິບັດ 2 ພາລະບົດບາດສໍາຄັນຄື: ປຸກລະດົມຂົນຂວາຍປະຊາຊົນຊັ້ນຄົນຕ່າງໆ ຈັດຕັ້ງປະຕິບັດແຜນນະໂຍບາຍ ແຜນວຽກ, ແຜນງານ, ໂຄງການຕ່າງໆຂອງລັດ ຢູ່ສູນກາງ ແລະ ທ້ອງຖິ່ນ, ເຕົ້າໂຮມກໍາລັງແຮງຄວາມສາມັກຄີເປັນປຶກແຜ່ນຂອງປະຊາຊົນ; ຕ້ອງໄດ້ປຸກລະດົມຂະບວນການແຂ່ງຂັນ ສິນຄ້າລາວຜະລິດລາວໃຊ້ ແລະ ທ່ານຍັງໄດ້ຮຽກຮ້ອງໃຫ້ກໍາມະການສູນກາງແນວລາວສ້າງຊາດເປັນແບບຢ່າງທາງດ້ານທຸລະກິດຂອງຕົນໃຫ້ປະສົບຜົນສໍາເລັດ ແລະ ສຸມໃສ່ບາງໂຄງການໃໝ່ຂອງກໍາມະການສູນກາງແນວລາວສ້າງຊາດ ທັງໝົດນັ້ນ ເພື່ອຄະນະປະຈໍາ ສນຊ ຈະໄດ້ນໍາເປັນທິດທາງ, ວິທີການ ໃນການປຸກລະດົມຂົນຂວາຍປະຊາຊົນ, ຊັ້ນຄົນຕ່າງໆ, ເພື່ອພ້ອມກັນຈັດຕັ້ງປະຕິບັດແຜນນະໂຍບາຍຂອງພັກ-ລັດ ໃຫ້ສອດຄ່ອງ ແລະ ເຕົ້າໂຮມຄວາມສາມັກຄີປອງດອງປະຊາຊົນລາວບັນດາເຜົ່າ.

ແຫຼ່ງຂ່າວ: ປະຊາຊົນ

ດັ່ງທີ່ສັງຄົມເຫັນໃນປະຈຸບັນ ກ່ຽວກັບສະຖານະການການຊື້ປີ້ລົດໄຟລາວຈີນ ທີ່ຍັງພົບກັບຄວາມຫຍຸ້ງຍາກ, ຕໍ່ກັບສະພາບການຄວາມບໍ່ເປັນລະບຽບຮຽບຮ້ອຍ ໃນການເດີນທາງຜ່ານທາງລົດໄຟ ລາວ-ຈີນ ເປັນຕົ້ນ ມີນັກທ່ອງທ່ຽວລຽນແຖວຊື້ປີ້ລົດໄຟ ເປັນຈຳນວນຫລາຍ ຢູ່ສະຖານີລົດໄຟນະຄອນຫຼວງວຽງຈັນ, ບໍ່ມີຫ້ອງນ້ຳຢູ່ນອກອາຄານສະຖານີ, ມີກຸ່ມຄົນ, ບຸກຄົນສວຍໂອກາດ ຊື້-ຂາຍປີ້ ເກັງເອົາກຳໄລ ທີ່ບໍ່ຖືກຕ້ອງເຮັດໃຫ້ມີຫາງສຽງຈົ່ມວ່າຕ່າງໆ ທັງໃນທາງບວກ ແລະ ທາງລົບ ຂອງສັງຄົມຢູ່ເທິງສື່ສັງຄົມອອນລາຍ ເຊິ່ງອາດຈະສ້າງຄວາມເສຍຫາຍຕໍ່ພາບລັກ ແລະ ການທ່ອງທ່ຽວຂອງ ສປປ ລາວ.

ຕໍ່ກັບບັນຫາດັ່ງກ່າວ, ບໍລິສັດທາງລົດໄຟ ລາວ-ຈີນ ພ້ອມດ້ວຍພາກສ່ວນກ່ຽວຂ້ອງ ໄດ້ອອກມາຊີ້ແຈ້ງ ແລະ ຍອມຮັບຜິດທຸກບັນຫາ ທີ່ມີມູນຄວາມຈິງ ແລະ ພ້ອມທີ່ຈະປັບປຸງແກ້ໄຂບັນຫາດັ່ງກ່າວໂດຍໄວ ເພື່ອເຮັດໃຫ້ການບໍລິການຕ່າງໆ ໂດຍສະເພາະການບໍລິການ ຊື້-ຂາຍ ປີ້ລົດໄຟ ເປັນລະບົບ ໃັຫ້ມີຄວາມສະດວກສະບາຍ, ວ່ອງໄວຂຶ້ນກວ່າເກົ່າ.

ທ່ານ ດາວຈິນດາ ສີຫາລາດ ຮອງຜູ້ອຳນວຍການໃຫຍ່ ບໍລິສັດທາງລົດໄຟ ລາວ-ຈີນ ໄດ້ຊີ້ແຈງກ່ຽວກັບບັນຫາດັ່ງກ່າວ, ໃນວັນທີ 3 ສິງຫາ 2022 ນີ້ວ່າ: ຕໍ່ກັບບັນຫາທີ່ເກີດຂຶ້ນດັ່ງກ່າວ, ບໍລິສັດທາງລົດໄຟລາວ-ຈີນ ຍອມຮັບຕໍ່ຂໍ້ຜິດພາດ, ຂໍ້ຂາດຕົກບົກຜ່ອງທາງດ້ານຄວາມພ້ອມໃນການບໍລິການລົດໄຟ ແລະ ພ້ອມຈະນຳເອົາຂໍ້ຜິດ ພາດດັ່ງກ່າວ, ໄປປັບປຸງ, ແກ້ໄຂ ໃຫ້ດີຂຶ້ນເທື່ອລະກ້າວໂດຍໄວ; ຕໍ່ບາງບັນຫາທີ່ກ່ຽວພັນກັບວຽກງານການບໍລິການ ທາງບໍລິສັດຍິນດີຮັບເອົາຄໍາຕໍານິຕິຊົມ ທີ່ມີລັກຊະນະສ້າງສັນທຸກດ້ານ ໂດຍອີງໃສ່ສະພາບຄວາມເປັນຈິງ ແລະ ຄວາມອາດສາມາດຕົວຈິງ ເພື່ອນຳໄປປັບປຸງແກ້ໄຂ ໂດຍສະເພາະ ການບໍລິການຊື້-ຂາຍປີ້ລົດໄຟ.

ປັດຈຸບັນ ບໍລິສັດກຳລັງດໍາເນີນການສ້າງລະບົບຂາຍປີ້ ຜ່ານທາງອອນລາຍ ຜ່ານແອບເທິງມືຖືເຊິ່ງບໍລິສັດທາງລົດໄຟລາວ-ຈີນ ໄດ້ມີການຄົ້ນຄວ້າ, ຊຸກຍູ້ພາກສ່ວນທີ່ຮັບຜິດຊອບໃຫ້ດຳເນີນການໃຫ້ສຳເລັດໂດຍໄວ.

ມາຮອດປັດຈຸບັນ, ການດໍາເນີນການໄດ້ສຳເລັດໂດຍພື້ນຖານໃນລະບົບ software, ຂັ້ນຕອນຕໍ່ໄປກໍຈະໄດ້ດໍາເນີນການປັບປຸງໃຫ້ສົມບູນແບບ ແລະ ດຳເນີນການຈັດຊື້ອຸປະກອນ ເພື່ອມາຕິດຕັ້ງ, ຄາດວ່າຈະໃຫ້ສຳເລັດ ແລະ ສາມາດນຳໃຊ້ໄດ້ໃນທ້າຍປີ 2022 ນີ້.

ສຳລັບ ຫາງສຽງຂອງສັງຄົມ ກ່ຽວກັບຫ້ອງນໍ້າສາທາລະນະ ເພື່ອອຳນວຍຄວາມສະດວກໃຫ້ຜູ້ທີ່ມາລຽນແຖວຊື້ປີ້ ຫຼື ມາເຮັດທຸລະຕ່າງໆ ທາງບໍລິສັດ ກໍໄດ້ມີການແກ້ໄຂແລ້ວ ໂດຍໄດ້ຈັດສັນຊັ້ນສອງຂອງອາຄານສະຖານີ ມາເປັນຈຸດບໍລິການ.

ພ້ອມນັ້ນ, ບໍລິສັດທາງລົດໄຟ ຍັງຈະຂະຫຍາຍຊ່ອງຊື້ປີ້ລົດໄຟຕື່ມອີກ ເພື່ອເຮັດໃຫ້ການຊື້-ຂາຍປີ້ລົດໄຟ ວ່ອງໄວຂຶ້ນກວ່າເກົ່າ.ສຳລັບ ແຜນການໃນຕໍ່ໜ້າ ບໍລິສັດທາງລົດໄຟ ລາວ-ຈີນ ຈະສົມທົບກັບກົມທາງລົດໄຟ ກະຊວງ ຍທຂ, ກົມຄຸ້ມຄອງການທ່ອງທ່ຽວ ກະຊວງຖະແຫລ່ງຂ່າວ, ວັດທະນະທຳ ແລະ ທ່ອງທ່ຽວ ຮ່ວມກັນຄົ້ນຄວ້າແກ້ໄຂປີ້ລົດໄຟ ແກ່ບັນດານັກທ່ອງທ່ຽວ ໃຫ້ມີຄວາມສະດວກສະບາຍ; ເພີ່ມເວລາການເປີດບໍລິການອາຄານສະຖານີ ສຳລັບຜູ້ໂດຍ ສານທີ່ຕ້ອງການເດີນທາງ, ເຊິ່ງຜ່ານມາມີຜູ້ໂດຍສານຈຳນວນໜຶ່ງ ເດີນທາງມາຮອດສະຖານີກ່ອນເວລາລົດອອກ ເປັນເວລາດົນ ແຕ່ທາງອາຄານສະຖານີຍັງບໍ່ທັນເປີດບໍລິ ການ ເຮັດໃຫ້ຕ້ອງໄດ້ລໍຖ້າຂ້າງນອກເປັນເວລາດົນ.

ທ່ານ ພັນເອກ ໄກສອນ ແກ້ວມະນີ ຫົວໜ້າກົມຕ່ຳຫລວດລົດໄຟ ກະຊວງໂຍທາທິການ ແລະ ຂົນສົ່ງ ໄດ້ກ່າວວ່າ: ຕໍ່ກັບສະພາບການຄວາມບໍ່ເປັນລະບຽບຮຽບຮ້ອຍໃນການເດີນທາງ, ການລຽນແຖວຊື້ປີ້ ໃນສະຖານີລົດໄຟ ນະຄອນຫລວງວຽງຈັນເກີດຂຶ້ນ ກໍຍ້ອນສະພາບຄວາມຕ້ອງການເດີນທາງ ແລະ ການເພີ້ມຂຶ້ນຂອງນັກທ່ອງທ່ຽວທັງພາຍໃນ ແລະ ຕ່າງປະເທດ, ນອກນັ້ນ, ກໍເກີດມີກຸ່ມຄົນ, ບຸກຄົນ ສວຍໂອ ກາດຊື້-ຂາຍປີ້ ເກັງກຳໄລ ທີ່ບໍ່ຖືກຕ້ອງ ໂດຍສະເພາະຢູ່ໃນກຸ່ມນັກທ່ອງທ່ຽວ, ທຳມະດາບໍລິສັດທ່ອງທ່ຽວແບ່ງໂກຕ້າໃຫ້ແລ້ວ ແຕ່ກໍຍັງລະດົມຄົນມາຊື້ປື້ຕື່ມ ເພື່ອໃຫ້ໄດ້ຈໍານວນຫລາຍ, ນອກນັ້ນ ກໍຍັງບຸກຄົນມາລຽນແຖວ ມື້ໜຶ່ງຫລາຍໆເທື່ອເພື່ອຂາຍປີ້ຕໍ່ເກັງກຳໄລ.

ຕໍ່ກັບບັນຫາດັ່ງກ່າວ, ຕໍາຫລວດລົດໄຟ ຈະສົມທົບກັບ ເຈົ້າໜ້າທີ່ກວດກາການແລ່ນລົດໄຟ ຈະເອົາໃຈໃສ່ຈັດສັນການລຽນແຖວຊື້ປີ້ ໃຫ້ເປັນລະບຽບຮຽບຮ້ອຍໃນສະ ຖານີ, ສະກັດກັ້ນບຸກຄົນ ແລະ ກຸ່ມຄົນທີ່ຊື້-ຂາຍປີ້ຕໍ່ເກັງກຳໄລ ທີ່ບໍ່ຖືກຕ້ອງຈະໄດ້ມີມາດຕະການແກ້ໄຂຢ່າງເຂັ່ງຄັດ. ພ້ອມທັງ, ສະເໜີໃຫ້ ບໍລິສັດທາງລົດໄຟລາວ-ຈີນ ແຍກບ່ອນຂາຍປີ້ໃຫ້ກຸ່ມນັກທ່ອງທ່ຽວ ຫລື ບໍລິສັດທ່ອງທ່ຽວສະເພາະ ເພື່ອຄວາມເປັນລະບຽບຮຽບຮ້ອຍ, ຫລຸດຜ່ອນການແອອັດ. ສຳລັບກຸ່ມຄົນທົ່ວໄປທີ່ມາຊື້ປີ້ ຕ້ອງຖືບັດປະຈໍາຕົວ ຫລື ສຳມະໂນຄົວ (ສຳເນົາ ຫລື ເອກະສານຢັ້ງຢືນທີ່ຢູ່ ຫລື ສຳມະໂນຄົວມາພ້ອມ), ໃຫ້ເຈົ້າໜ້າທີ່ກ່ຽວຂ້ອງກວດກາ ເພື່ອຕິດຕາມ, ຄວບຄຸມຄວາມເປັນລະບຽບ ຮຽບຮ້ອຍ; ຕຳຫລວດລົດໄຟ ແລະ ເຈົ້າໜ້າທີ່ກວດກາການແລ່ນລົດໄຟ ຈະໄດ້ຕິດຕາມຫາບຸກຄົນ ຫລື ກຸ່ມຄົນທີ່ຊື້-ຂາຍປີ້ບໍ່ຖືກຕ້ອງຕາມຕາມລະບຽບ ທີ່ໄດ້ວາງອອກ, ຖ້າພົບເຫັນຈະໄດ້ປະຕິບັດມາດຕະການຕາມ ລະບຽບກົດໝາຍຄື: ສຶກສາອົບຮົມ, ປັບໃໝ ແລະ ດຳເນີນຄະດີຕາມຂັ້ນຕອນ. ພ້ອມທັງ ຮຽກຮ້ອງໃຫ້ປະຊາຊົນບໍ່ເຂົ້າຮ່ວມໃນການກະທໍາຜິດ ໂດຍການເອົາບັດປະຈຳຕົວຂອງຕົນເອງ ຫລື ເອກະສານປະຈຳຕົນເອງ ໃຫ້ບຸກຄົນ ຫລື ກຸ່ມຄົນ ໄປຊື້ຂາຍປີ້ທີ່ບໍ່ຖືກຕ້ອງ, ພ້ອມທັງຕິດເລກໂທລະສັບສາຍດ່ວນຕາມຈຸດຕ່າງໆ ເມື່ອໃຊ້ບໍລິການບໍ່ໄດ້ຮັບຄວາມເປັນທຳ ຫລື ຖ້າພົບເຫັນບຸກຄົນ ຫລື ກຸ່ມຄົນທີ່ມີພຶດຕິກໍາບໍ່ຖືກຕ້ອງ ຫລື ເຈົ້າໜ້າທີ່ພວກເຮົາ ສາມາດໂທແຈ້ງໄດ້ທຸກເວລາ.

ແຫຼ່ງຂ່າວ: ປະເທດລາວ

ທ່ານ ທອງລຸນ ສີສຸລິດ ປະທານປະເທດແຫ່ງ ສປປ ລາວ ຢ້ຽມຢາມພື້ນທີ່ການຜະລິດຂອງປະຊາຊົນ ບ້ານໃຫຍ່ພັດທະນາ ບວມເລົາ-ຜາແກ້ວ ເມືອງ ປາກລາຍ ແຂວງໄຊຍະບູລີ ໃນວັນທີ 3 ສິງຫາ 2022 ນີ້ ທ່ານ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກ, ປະທານປະເທດແຫ່ງ ສປປລາວ ພ້ອມຄະນະ ໄດ້ລົງຢ້ຽມຢາມຂົງເຂດການຜະລິດເປັນສິນຄ້າຂອງປະຊາຊົນ ບ້ານໃຫຍ່ພັດທະນາ ບວມເລົາ-ຜາແກ້ວ ເມືອງໄຊຍະບູລີ ແຂວງໄຊຍະບູລີ, ໃຫ້ການຕ້ອນຮັບ ແລະ ນໍາພາລົງສູ່ພື້ນທີ່ການຜະລິດໂດຍມີ:

ທ່ານ ພົງສະຫວັນ ສິດທະວົງ ກໍາມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງ ໄຊຍະບູລີ, ທ່ານ ກອງສີ ວົງສີ ກໍາມະການພັກແຂວງ ເລຂາພັກເມືອງ, ເຈົ້າເມືອງ ປາກລາຍ, ມີບັນດາການນໍາຂອງແຂວງ, ການນໍາຂອງເມືອງ ປາກລາຍ ແລະ ປະຊາຊົນຜູ້ປູກພືດເປັນສິນຄ້າເຂດບ້ານ ໃຫຍ່ພັດທະນາ ບວມເລົາ-ຜາແກ້ວ ໃຫ້ການຕ້ອນຮັບຢ່າງອົບອຸ່ນ, ການຢ້ຽມຢາມພື້ນທີ່ການຜະລິດເປັນສິນຄ້າຂອງປະຊາຊົນຄັ້ງນີ້ ແມ່ນໄດ້ເຂົ້າເບິ່ງສວນປູກມັນຕົ້ນ ແລະ ສວນສາລີ, ພ້ອມດຽວກັນກໍ່ໄດ້ເຂົ້າເບິ່ງການລ້ຽມງົວແບບເປັນກຸ່ມ, ເປັນຟາມ ຕິດພັນກັບການປູກຫຍ້າຂອງປະຊາຊົນບ້ານດັ່ງກ່າວ, ຈາກນັ້ນກໍ່ໄດ້ເຂົ້າຢ້ຽມຊົມໂຮງງານຜະລິດແປ້ງມັນຕົ້ນຂອງ ບໍລິສັດ ພັດທະນາກ້າວໜ້າລາວ ຈໍາກັດ ແລະ ເບິ່ງ ໂຮງງານຜະລິດປຸຍຊີຜະພາບ ຂອງບໍລິສັດຈີນຊຸຸຍ ທີ່ຕັ້ງຢູ່ ບ້ານນໍ້າຊົ້ງ ເມືອງປາກລາຍ.

ແຫຼ່ງຂ່າວ: Lao National Radio

ໃນວັນທີ 28 ກໍລະກົດ ທີ່ຜ່ານມາ, ທ່ານ ບຸນທົງ ເເກ້ວສີຍາ ຫົວໜ້າຫ້ອງການ ຍຸຕິທໍາ ເມືອງໄຊບົວທອງ ແຂວງຄຳມ່ວນ ໄດ້ເຄື່ອນໄຫວລົງຊຸກຍູ້ຂະບວນການສ້ອມເເປງຂົວຂ້າມຫ້ວຍໂຄນຢູ່ທີ່ບ້ານນາພ້າວທີ່ເປ່ເພ, ໂດຍມີ ທ່ານ ບຸນຫຼາຍ ສຸມະນີ ວິຊາການ ຫ້ອງການ ໂຍທາທິການ ແລະ ຂົນສົ່ງເມືອງ, ມີການຈັດຕັ້ງຂັ້ນບ້ານ, ເຖົ້າເເກ່ເເນວໂຮມຕະຫຼອດຮອດ ພໍ່ເເມ່ປະຊາຊົນບ້ານດັ່ງກ່າວເຂົ້າຮ່ວມດ້ວຍຄວາມສາມັກຄີ ເເລະ ຄວາມຮັບຜິດຊອບສູງ, ເຊິ່ງຂົວຂ້າມຫ້ວຍໂຄນບ້ານນາພ້າວນີ້ ເເມ່ນໄດ້ເປ່ເພມາໃນຊ່ວງໄລຍະເວລາໜຶ່ງເເລ້ວ.

ດັ່ງນັ້ນ, ການນໍາຂັ້ນເມືອງ ເເລະ ພໍ່ເເມ່ປະຊາຊົນບ້ານນາພ້າວຈຶ່ງເຫັນໄດ້ຄວາມຫຍຸ້ງຍາກໃນການໄປ-ມາ ຈຶ່ງໄດ້ຄົ້ນຄວ້າຊອກຫາໄມ້ຂາງ, ໄມ້ແປ້ນປູຂົວໃໝ່ ເຊິ່ງການສ້າງຂະບວນການດັ່ງກ່າວເເມ່ນນໍາໃຊ້ເເຮງງານຂອງຊາວ ເພື່ອເປັນການພັດທະນາພື້ນຖານໂຄງລ່າງຂອງບ້ານກໍ່ຄືເມືອງໄຊບົວທອງ ເຮັດໃຫ້ການສັນຈອນໄປ-ມາ, ແລກປ່ຽນຊື້-ຂາຍສິນຄ້າ ຂອງພໍ່ແມ່ປະຊາຊົນ ໃຫ້ສະດວກສະບາຍ, ພ້ອມດຽວກັນນີ້ການນໍາເມືອງໃຊ້ບົວທອງ ກໍ່ຍັງໄດ້ມອບເງິນຈໍານວນ 3 ລ້ານກີບເພື່ອເປັນທຶນຮອນສົມທົບໃນການສ້ອມແປງຂົວດັ່ງກ່າວ.

ແຫຼ່ງຂ່າວ: Media Laos

ໃນຕົ້ນເດືອນກໍລະກົດ 2022 ຜ່ານມາ, ເຈົ້າໜ້າທີ່ຕໍາຫຼວດ ປກສ ກຸ່ມບ້ານນາເຕີຍ ເມືອງ ແລະ ແຂວງຫຼວງນ້ໍາທາ ໄດ້ຮັບແຈ້ງຈາກພົນລະເມືອງດີ ວ່າ: ມີເດັກນ້ອຍເກີດໃໝ່ຖືກຖິ້ມປະໄວ້ ຢູ່ສວນຢາງພາລາ ຈຶ່ງໄດ້ແຕ່ງຕັ້ງເຈົ້າຫນ້າທີ່ວິຊາສະເພາະ ສົມທົບ ກັບ ພາກສ່ວນທີ່ກ່ຽວຂ້ອງ ກວດກາສະຖານທີ່ເກີດເຫດ ພົບເຫັນເດັກນ້ອຍເກີດໃໝ່ເປັນເພດຍິງນອນຫງາຍເສຍຊີວິດ.

ຈາກນັ້ນ, ຈຶ່ງໄດ້ເກັບກໍາຂໍ້ມູນ ເພື່ອຊອກຫາແມ່ທີ່ນໍາເອົາລູກມາຖິ້ມໄວ້ເຂດດັ່ງກ່າວ ແລະ ຕໍ່ມາຈຶ່ງສາມາດຈັບຕົວ ນາງ ຈັນ ອາຍຸ 22 ປີ ຢູ່ບ້ານໄໝ່, ເມືອງນ້ໍາບາກ, ແຂວງຫຼວງພະບາງ ມາດໍາເນີນ ຄະດີ. ຜ່ານການສອບສວນຂອງເຈົ້າຫນ້າທີ່ ນາງ ຈັນ ຮັບສາລະພາບ ວ່າ: ເດັກນ້ອຍທີ່ຫາກໍ່ເກີດໃໝ່ ແມ່ນລູກຂອງຜູ້ກ່ຽວແທ້; ເຊິ່ງໄລຍະຜ່ານມາ, ຜູ້ກ່ຽວໄດ້ເຄື່ອນໄຫວເຮັດວຽກເປັນກໍາມະກອນຢູ່ໂຮງງານຕ່າງໆ ໃນເຂດນະຄອນຫຼວງວຽງຈັນ ແລະ ຕົກມາຮອດທ້າຍປີ 2001 ໄດ້ ມາເຮັດວຽກເປັນສາວບໍລິການຢູ່ຕາມຮ້ານກິນດື່ມ ເຂດບ້ານນາເຕີຍ. ໄລຍະດຽວກັນນັ້ນ, ກໍ່ໄດ້ຮັບແຂກ ແລະ ທຸກຄັ້ງທີ່ມີຄົນມາໃຊ້ບໍລິການ ແມ່ນໄດ້ປ້ອງກັນຕົນເອງຕະຫຼອດ.

ກ່ອນເກີດເຫດ ໃນຕອນກາງຄືນຂອງວັນທີ 8 ກໍລະກົດ 2022, ຜູ້ກ່ຽວໄດ້ຮັບແຂກ ແລະ ກິນດື່ມ ເຫຼົ້າ-ເບຍນໍາແຂກ ຈົນມາຮອດເວລາປະມານ 23:00 ໂມງ ຈຶ່ງໄດ້ປິດຮ້ານແລ້ວເຂົ້ານອນ; ແຕ່ໃນຂະນະນັ້ນ, ຜູ້ກ່ຽວຮູ້ສຶກເຈັບທ້ອງ ຈຶ່ງໄດ້ເຂົ້າຫ້ອງນໍ້າ ແລະ ປະກົດວ່າ ເຫັນລູກນ້ອຍອອກມາຈາກຊ່ອງຄອດເປັນ ເພດຍິງ. ຜູ້ກ່ຽວຈຶ່ງຄິດວ່າ ບໍ່ມີໃຜຊິລ້ຽງຊ່ວຍ ແລະ ຮັບເປັນພໍ່ ເນື່ອງຈາກວ່າໄດ້ນອນນໍາຜູ້ຊາຍຫຼາຍຄົນ, ຈຶ່ງຕັດສິນໃຈໃຊ້ມືເບື້ອງຂວາບີບຄໍລູກນ້ອຍ ແລ້ວຈັບໂຍນຖິ້ມໄປໃນສວນຢາງພາລາ ເຂດຫຼັງຫ້ອງນ້ໍາ, ມື້ຕໍ່ມາ, ຈຶ່ງມີພົນລະເມືອງດີເຂົ້າມາພົບເຫັນ ແລະ ໄດ້ແຈ້ງຕໍ່ເຈົ້າຫນ້າທີ່-ທີ່ກ່ຽວຂ້ອງ ພ້ອມທັງໄດ້ນໍາຕົວ ນາງ ຈັນ ມາດໍາເນີນຄະດີຕາມລະບຽບກົດຫມາຍ.

ເຈົ້າໜ້າທີ່ ຍັງໃຫ້ຮູ້ຕື່ມວ່າ: ການກະທໍາຂອງນາງ ຈັນ ເປັນການກະທໍາທີ່ຜິດຕໍ່ປະມວນກົດຫມາຍອາຍາ (ປີ 2021) ມາຕາ 191 ການຄາດຕະກໍາ ຫຼື ການປະຖິ້ມລູກທີ່ຫາກໍເກີດ ເຊິ່ງລະບຸໄວ້ວ່າ: ແມ່ຜູ້ໃດຫາກໄດ້ຄາດຕະກໍາ ຫຼື ປະຖິ້ມລູກ ທີ່ຫາກໍເກີດຂອງຕົນ ໃຫ້ເສຍຊີວິດ ຈະດ້ວຍເຫດຜົນໃດກໍ່ຕາມ ຈະຖືກລົງໂທດຕັດອິດສະລະພາບ ແຕ່ 2 ຫາ 5 ປີ ແລະ ໃນກໍລະທີ່ຄາດຕະກໍາ ຫຼື ປະຖິ້ມລູກທີ່ຫາກໍເກີດຂອງຕົນ ໃຫ້ເສຍຊີວິດແຕ່ສອງຄົນຂຶ້ນໄປ ຈະຖືກລົງໂທດຕັດອິດສະລະພາບ ແຕ່ 5 ຫາ 7 ປີ.

ແຫຼ່ງຂ່າວ ແລະ ຮູບພາບຈາກ: ຄວາມສະຫງົບ

ອີງຕາມການລາຍງານຂອງ Lao National Radio ໃຫ້ຮູ້ວ່າ: ການຂາຍເຄື່ອງໃສ່ບາດໃຫ້ກັບນັກທ່ອງ ທ່ຽວຢູ່ ນະຄອນ ຫຼວງພະບາງ ໄລຍະຜ່ານມາຍັງມີຜູ້ປະກອບການສວຍໂອກາດລະເມີດລະບຽບ ເວລາທີ່ບໍ່ມີເຈົ້າໜ້າທີ່ໄປຕິດຕາມກວດກາ ເພື່ອເຮັດໃຫ້ການຂາຍເຄື່ອງໃສ່ບາດໃຫ້ກັບນັກທ່ອງທ່ຽວຢູ່ ນະຄອນ ຫຼວງພະບາງ ມີຄວາມເປັນລະບຽບ-ຮຽບຮ້ອຍ ໃນໄລຍະຜ່ານມາອົງການປົກຄອງນະຄອນ ຫຼວງພະບາງ ໄດ້ອອກລະບຽບການຄຸ້ມຄອງຢ່າງຫັດກຸມ ທັງໄດ້ແຕ່ງຕັ້ງຄະນະກຳມະການແຕ່ລະພາກສ່ວນ ຮັບຜິດຊອບຢ່າງລະອຽດ ຮັບປະກັນບໍ່ໃຫ້ເກີຫາສຽງທີ່ບໍ່ດີຕາມມາ ທັງສ້າງສີ່ງຈູງໃຈໃຫ້ກັບນັກທ່ອງທ່ຽວ ເຂົ້າມາທ່ອງທ່ຽວຫຼວງພະບາງນັບມື້ນັບຫຼາຍຂື້ນ. ທ່ານ ວິໄລທອງ ມະນີວອນ ຮອງເຈົ້ານະຄອນ ຫຼວງພະບາງ ໄດ້ໃຫ້ສຳພາດວ່າ:

ການໃສ່ບາດຍາມເຊົ້າ ເປັນປະເພນີທີ່ຊາວຫຼວງພະບາງ ເມືອງມໍລະດົກໂລກສືບທອດກັນມາຫຼາຍເຊັ່ນຄົນ ແລະພາຍຫຼັງ ຫຼວງພະບາງ ໄດ້ຮັບການຮັບຮອງໃຫ້ເປັນເມືອງມໍລະດົກຂອງໂລກ ກິດຈະກຳການໃສ່ບາດຍາມເຊົ້າ ໄດ້ກາຍເປັນສີ່ງດືງດູດເອົານັກທ່ອງ ທ່ຽວ ເຂົ້າມາທ່ອງທ່ຽວ ແລະຮ່ວມກິດ ຈະກຳການໃສ່ບາດ ທີ່ນະຄອນ ຫຼວງພະບາງ ໄດ້ເປັນຢ່າງດີ ສະເພາະໄລຍະລັດ ຖະບານ ໄດ້ເປີດຕ້ອນຮັບນັກທ່ອງທ່ຽວເຕັມຮູບແບບ ພາຍຫຼັງການລະບາດຂອງພະຍາດໂຄວິດ-19 ຜ່ອນຄາຍລົງ ສັງເກດເຫັນວ່ານັກທ່ອງທ່ຽວຈາກປະເທດເພື່ອບ້ານ ໂດຍສະເພາະປະເທດໄທ ໄດ້ເຂົ້າມາທ່ອງທ່ຽວຫຼາຍຂື້ນ ແລະໄດ້ມີຫາງສຽງຈົ່ມວ່າ ກ່ຽວກັບປະກົດການຫຍໍ້ທໍ້ ເວລາທີ່ໄດ້ຮ່ວມກິດຈະກຳເຮັດບຸນໃສ່ບາດ, ຕໍ່ກັບບັນຫາທີ່ເກີດຂື້ນ ຮອງເຈົ້ານະຄອນ ຫຼວງພະບາງ ໄດ້ໃຫ້ຮູ້ວ່າ: ບັນຫາຫາງສຽງຈົ່ມວ່າ ກ່ຽວກັບການເຮັດບຸນໃສ່ບາດຂອງນັກທ່ອງທ່ຽວ ແມ່ນເປັນປະກົດການທີ່ເກີດຂື້ນ ໃນໄລຍະທີ່ຄະນະຮັບຜິດຊອບມີການລະເຫຼີງ ຕໍ່ການລົງຕິດຕາມກວດກາ ຈື່ງເຮັດໃຫ້ຜູ້ປະກອບການ ຫຼື ແມ່ຄ້າຜູ້ຂາຍເຂົ້າໃສ່ບາດ ສວຍໂອກາດລະເມີດລະບຽບການທີ່ວາງໄວ້, ເຊີ່ງບັນຫານີ້ ອົງການປົກຄອງນະຄອນ ຫຼວງພະບາງ ໄດ້ປະສານສົມທົບກັບພາກສ່ວນທີ່ກ່ຽວຂ້ອງ ເລັ່ງແກ້ໄຂບັນຫາໂດຍດ່ວນ ທັງໄດ້ອອກລະບຽບການຄືນໃໝ່ ເພື່ອໃຫ້ຫັດກຸມຂື້ນກວ່າເກົ່າ.

ໂອກາດນີ້ ທ່ານ ວິໄລທອງ ມະນີວອນ ໄດ້ຮຽກຮ້ອງໃຫ້ຜູ້ປະກອບການຂາຍເຂົ້າໃສ່ບາດ ຈົ່ງເອົາໃຈໃສ່ປະຕິບັດລະບຽບການໃຫ້ເຂັ້ມງວດ ສຳລັບພະນັກງານນຳທ່ຽວ ຕ້ອງເປັນເຈົ້າການແນະນຳ ແລະອຳນວຍຄວາມສະດວກໃຫ້ກັບນັກທ່ອງທ່ຽວ ເພື່ອບໍ່ໃຫ້ເກີດບັນຫາປະກາດການຫຍໍ້ທໍ້ ກ່ຽວກັບການຂາຍເຂົ້າໃສ່ບາດຂື້ນອີກຄັ້ງໃໝ່.

ທ່ານ ວິໄລທອງ ມະນີວອນ ໃຫ້ຮູ້ອີກວ່າ: ສຳລັບກົດລະບຽບ ວ່າດ້ວຍການຄຸ້ມຄອງຄວາມເປັນລະບຽບຮຽບຮ້ອຍ ໃນການຂາຍເຄື່ອງໃສ່ບາດ ທີ່ໄດ້ປັບປຸງໃໝ່ ແມ່ນປ່ຽນແທນສະບັບທີ່ໄດ້ອອກໃນປີ 2019 ໂດຍລະບຸແຈ້ງຂື້ນຕື່ມກ່ຽວກັບການບໍລິ ການ ແລະການໃຫ້ບໍລິການ ການຂາຍເຄື່ອງໃສ່ບາດ, ການສັນຈອນຕາມເສັ້ນ ທາງ ໄລຍະການໃສ່ບາດ ທັງໄດ້ລະບຸແຈ້ງກ່ຽວກັບຂໍ້ຫ້າມ ແລະມາດຕະການຕໍ່ຜູ້ລະເມີດ ເພື່ອເຮັດໃຫ້ການບໍລິການຂາຍເຄື່ອງໃສ່ບາດ ແລະການເຮັດບຸນໃສ່ບາດ ຢູ່ນະຄອນຫຼວງພະບາງ ມີຄວາມເປັນລະບຽບຮຽບຮ້ອຍຫຼາຍຂື້ນ.

ຕາມການລາຍງານຂອງຄວາມສະຫງົບ ໃຫ້ຮູ້ວ່າ: ທ້າວ ເຕ້ຍ ອາຍຸ 24 ປີ ບ້ານໜອງມ່ວງ, ເມືອງສະຫນາມໄຊ, ແຂວງອັດຕະປື ໄດ້ເຂົ້າແຈ້ງຄວາມຕໍ່ ເຈົ້າຫນ້າທີ່ ປກສ ເມືອງປາກຊ່ອງ ແຂວງຈໍາປາສັກ ວ່າ: ໃນຄັ້ງວັນທີ 25 ເມສາ 2022 ໃນເວລາປະມານ 21:10 ໂມງ ມີຄົນໄດ້ປຸ້ນເອົາຊັບຂອງຜູ້ກ່ຽວ ໂດຍໃຊ້ກ້ອນຫີນທຸບຫົວຈົນໝົດສະຕິ ເພື່ອປຸ້ນເອົາເງິນ ແລະ ລົດຈັກຫຼົບໜີ.

ເຈົ້າໜ້າທີ່ວິຊາສະເພາະ ປກສ ແຂວງຈໍາປາສັກ ໃຫ້ຮູ້ວ່າ: ພາຍຫຼັງທີ່ໄດ້ຮັບແຈ້ງຄວາມ ກໍໄດ້ລົງຈຸດເກີດເຫດທີ່ອານຸສາວະລີ ທ່ານ ສີທົນ ກົມມະດໍາ ບ້ານບັງລຽງ ເມືອງປາກຊ່ອງ ແຂວງຈໍາປາສັກ ພ້ອມທັງປະຕິບັດຕາມຫຼັກການວິຊາສະເພາະ, ມາຮອດວັນທີ 6 ມິຖຸນາ 2022, ສາມາດກັກຕົວຜູ້ກໍ່ເຫດ ຊື່ ທ້າວ ໂຫຼຍ ອາຍຸ 31 ປີ ບ້ານແກ ເມືອງໂພນທອງ ແຂວງຈໍາປາສັກ; ຜູ້ກ່ຽວສາລະພາບວ່າ: ໃນວັນທີ 25 ເມສາ 2022 ເວລາປະມານ 19:00 ໂມງ, ໄດ້ຍ່າງມາແຕ່ຫຼິ້ນແຕ່ພໍຍ່າງໄປຮອດທະນາຄານການຄ້າຕ່າງປະເທດສາຂາເມືອງປາກຊ່ອງ ພົບເຫັນ ທ້າວ ເຕ້ຍ (ຜູ້ຖືກເສຍຫາຍ) ນັ່ງຄາບລົດຈັກຢູ່ ແລະ ຜູ້ກ່ຽວຈຶ່ງເຂົ້າໄປຖາມວ່າ ເຈົ້າຊິໄປໃສ, ທ້າວ ເຕ້ຍ ຕອບວ່າຈະໄປທະນາຄານ.

ຈາກນັ້ນ, ທັງສອງກໍ່ໄດ້ໄປກິນຢູ່ໃນຮ້ານອາຫານ ຢູ່ຈຸດດັ່ງກ່າວໂດຍແມ່ນ ທ້າວ ເຕ້ຍ ເປັນຜູ້ຈ່າຍເງິນ; ເວລານັ້ນ, ສັງເກດເຫັນເງິນ ທ້າວ ເຕ້ຍ ຈຶ່ງເກີດມີແນວຄິດຢາກໄດ້ ພ້ອມທັງວາງແຜນຊັກ ຊວນ ທ້າວ ເຕ້ຍ ໃຫ້ຂັບລົດຈັກໄປສົ່ງຢູ່ຮ້ານຜູ້ສາວຢູ່ເຂດບ້ານບັງລຽງ ແຕ່ບໍ່ໄດ້ເຂົ້າຮ້ານຜູ້ສາວ. ຈາກນັ້ນ, ໄດ້ ຊວນທ້າວ ເຕ້ຍ ຂັບຂີ່ລົດໄປຫຼິ້ນຢູ່ອານຸສາວະລີ, ພໍ່ໄປຮອດຜູ້ກ່ຽວ ແມ່ນນັ່ງຢູ່ຂອບອ່າງນ້ໍາພຸ, ສ່ວນ ທ້າວ ເຕ້ຍ ແມ່ນນັ່ງຄາບລົດຈັກ ໄດ້ປະມານ 10 ນາທີ ສັງເກດເຫັນ ກ້ອນຫີນປະມານສ່ໍາຄ້ໍາປັ້ນ ຈຶ່ງຈັບເອົາກ້ອນຫີນມາຕີໃສ່ຫົວຂອງ ທ້າວ ເຕ້ຍ 1 ບາດ.

ເວລານັ້ນ, ທ້າວ ເຕ້ຍ ໄດ້ແລ່ນໜີຂຶ້ນເທິງລະບຽງອ່າງນໍ້າພຸອານຸ ສາວະລີ, ເມື່ອເປັນແນວນັ້ນ, ຜູ້ກ່ຽວຈຶ່ງເອົາກ້ອນຫີນໄລ່ຕີປະມານ 2-3 ບາດ ເຮັດໃຫ້ທ້າວ ເຕ້ຍ ສະຫຼົບ. ຈາກນັ້ນ, ກໍຈົກເອົາເງິນໃນຖົງໂສ້ງ ແລະ ເອົາລົດຈັກເວັບຈີນ ຂັບຂີ່ຫຼົບໜີໄປຫາພີ່ນ້ອງຢູ່ບ້ານນໍ້າປົດ, ເມືອງປາກຊ່ອງ, ແຂວງຈໍາປາສັກ ແລະ ໄດ້ນອນຢູ່ເຮືອນພີ່ນ້ອງ 1 ຄືນ.

ມື້ຕໍ່ມາ, ຈຶ່ງໄດ້ຂັບລົດຈັກຂອງ ທ້າວ ເຕ້ຍ ກັບມາບ້ານຂອງຜູ້ກ່ຽວ ແລະ ໄດ້ຂີ່ລົດໂດຍສານໄປຫາຫມູ່ ຢູ່ບ້ານພຽງດີ ເມືອງໂຂງ ແຂວງຈໍາປາສັກ. ຈົນຮອດທີ 4 ມິຖຸນາ 2022, ໄດ້ກັບມາພັກຢູ່ບ້ານພັກແຫ່ງຫນຶ່ງ ເຂດຫຼັກ 4 ນະຄອນປາກເຊ ແລະ ພັກຢູ່ບ້ານພັກ 2 ຄືນ.

ຮອດຕອນເຊົ້າຂອງວັນທີ 6 ມິຖຸນາ 2022, ໄດ້ຈ້າງຄົນຂັບລົດຈັກໃຫ້ໄປສົ່ງຢູ່ບ້ານແກ ເມືອງໂພນທອງ ແຂວງຈໍາປາສັກ ກ່ອນຖືກເຈົ້າຫນ້າທີ່ ປກສ ເມືອງ ໂພນທອງ ຈັບຕົວສົ່ງ ໃຫ້ເຈົ້າຫນ້າທີ່ ປກສ ເມືອງປາກຊ່ອງ ດໍາເນີນຄະດີຕາມຂັ້ນຕອນຂອງກົດຫມາຍ.

ແຫຼ່ງຂ່າວ: ຄວາມສະຫງົບ