ປະຊາຊົນ 14 ຄອບຄົວຢູ່ເມືອງສະໜາມໄຊ ໄດ້ຮັບການຊ່ວຍເຫຼືອ ແນວພັນປາ ເພື່ອລ້ຽງໃສ່ນາເຂົ້າ

ອໍານາດການປົກຄອງເມືອງສະໜາມໄຊ ແຂວງອັດຕະປື ໄດ້ນໍາເອົາແນວພັນປາ ຈໍານວນ 2 ໝື່ນ 8 ພັນກວ່າໂຕ,ເຊິ່ງມີປະປາກ,ປານິນ ແລະ ປາໃນ,ລວມມູນຄ່າ 22 ລ້ານ 4 ແສນກີບ,ທີ່ໄດ້ຮັບການຊ່ວຍເຫຼືອຈາກອົງການຮ່ວມມືສາກົນປະເທດ ເກົາຫຼີ ໄປມອບໃຫ້ປະຊາຊົນ ຈໍານວນ 14 ຄອບຄົວ ໃນ 7 ບ້ານເປົ້າໝາຍຂອງເມືອງສະໜາມໄຊ ເພື່ອສ້າງໃຫ້ກາຍເປັນຄອບຄົວຕົວແບບໃນການລ້ຽງປາ ໃນນາເຂົ້າ ເຊິ່ງມີ:

ບ້ານຄັງ,ບ້ານຈູມໂພຍ,ບ້ານອິນທີ,ບ້ານດອນເສືອ,ບ້ານດອນໄຜ່,ບ້ານດອນສູງ ແລະ ບ້ານອຸດົມໄຊ.ພິທີມອບ-ຮັບໄດ້ຈັດຂື້ນຢ່າງເປັນທາງ ການ ເມື່ອວັນທີ 16 ສິງຫາ 2022 ທີ່ຫ້ອງການບ້ານດອນໄຜ່, ເປັນໃຫ້ກຽດເຂົ້າຮ່ວມ ແລະ ມອບໂດຍທ່ານນາງ ພູດອນ ຈູມມະລີ ຮອງເຈົ້າເມືອງສະໜາມໄຊ,ມີຜູ້ຕາງໜ້າຈາກອົງການຮ່ວມມືສາກົນປະເທດເກົ້າຫຼີປະຈໍາແຂວງອັດຕະປື,ພ້ອມດ້ວຍອຳນາດການປົກຄອງບ້ານ ແລະ ພໍ່ແມ່ປະຊາຊົນ ຄອບຄົວເປົ້າໝາຍການລ້ຽງປາໃສ່ນາເຂົ້າ ເຂົ້າຮ່ວມ.

ໃນໂອກາດກ່າວມອບແນວພັນປາ ທ່ານນາງ ພູດອນ ຈູມມະລີ ຮອງເຈົ້າເມືອງສະໜາມໄຊ ໄດ້ກ່າວວ່າ: ເມືອງ ສະໜາມໄຊ ເປັນເມືອງໜຶ່ງທີ່ໄດ້ຮັບຜົນກະທົບຈາກເຫດການສັນເຂື່ອນເຊປ່ຽນ-ເຊນ້ຳນ້ອຍແຕກໃນຄັ້ງວັນທີ 23 ກໍລະກົດ ປີ 2018 ຜ່ານມາ,ສະນັ້ນ ເພື່ອເປັນການພື້ນຟູຊິວິດການເປັນຢູ່ຂອງພໍ່ແມ່ປະຊາ ຊົນ,ທາງອໍານາດການປົກຄອງເມືອງສະໜາມໄຊ ຮ່ວມກັບບັນດາອົງສາກົນ ໄດ້ພະຍາຍາມໃຫ້ການຊ່ວຍເຫຼືອພໍ່ແມ່ປະຊາຊົນຕະຫຼອດມາ,ໂດຍສະເພາະທາງໂຄງການຮ່ວມມືສາກົນປະເທດເກົາຫຼີ ເປັນໂຄງການໜຶ່ງທີ່ໄດ້ໃຫ້ທຶນສະໜັບ ສະໜູນ ການພື້ນຟູໄພພິບັນ ຢູ່ເມືອງສະໜາມໄຊ ຕະຫຼອດມາ,ເປັນຕົ້ນແມ່ນໂຄງການລ້ຽງໝູລາດ,ລ້ຽງໄກ່ລາດ ແລະ ໂຄງການປູກພືດສວນຄົວ ແລະ ຊ່ວຍເຫຼືອແນວພັນປາ ເພື່ອລ້ຽງປາໃນນາເຂົ້າ ຄັ້ງນີ້ ເປັນການລ້ຽງປາຂັ້ນເລີ່ມຕົ້ນຂອງໂຄງການທີ່ໄດ້ຈັດຕັ້ງຮ່ວມກັບພະແນກກະສິກຳ ແລະ ປ່າໄມ້ ຂັ້ນແຂວງ ແລະ ຂັ້ນເມືອງ ເພື່ອຕອບສະໜອງທາງດ້ານອາຫານ ໂພສະນາການ,ທັງເປັນການສົ່ງເສີມໃຫ້ພໍ່ແມ່ປະຊາຊົນ ກຸ້ມຕົນເອງ,ເພີ່ງຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ ເທື່ອລະກ້າວ.

ຂ່າວ: ກັນວົງໄຊ ໂອງຄຳມີ

ທ່ານ ປອ. ນາງ ວິພາວັນ ພົມວິຫານ ຢ້ຽມຢາມ ແລະ ມອບວັດຖຸອຸປະກອນໃຫ້ໂຮງຮຽນສາມັນກິນນອນຊົນເຜົ່າອຸດົມໄຊ

ເນື່ອງໃນໂອກາດທີ່ ທ່ານ ປອ. ນາງ ວິພາວັນ ພົມວິຫານ ພັນລະຍາທ່ານ ປອ. ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ ລົງຢ້ຽມຢາມ ແລະ ເຮັດວຽກຢູ່ແຂວງອຸດົມໄຊໃນຕອນເຊົ້າຂອງວັນທີ 15 ສິງຫາ 2022, ທ່ານ ປອ. ນາງ ວິພາວັນ ພົມວິຫານ ພ້ອມດ້ວຍຄະນະຈາກສະພາແຫ່ງຊາດ, ສະພາປະຊາຊົນແຂວງອຸດົມໄຊ ໄດ້ມາຢ້ຽມຢາມໂຮງຮຽນສາມັນກິນນອນຊົນເຜົ່າ ແຂວງອຸດົມໄຊ, ໃຫ້ກຽດຕ້ອນຮັບໂດຍ ທ່ານ ສີວອນ ເພັງມີໄຊ ຮອງຫົວໜ້າພະແນກສຶກສາທິການ ແລະ ກິລາ, ທ່ານ ສົມຈັນ ພົນທະສິດ ຜູ້ອຳນວຍການໂຮງຮຽນ ພ້ອມດ້ວຍຄະນະ, ຄູອາຈານ ແລະ ນ້ອງນັກຮຽນ.

ໃນການລົງມາຢ້ຽມຢາມໃນຄັ້ງນີ້ ທ່ານໄດ້ນຳເອົາວັດຖຸອຸປະກອນການຮຽນ, ເຄື່ອງມືກະສິກຳ ແລະ ເງີນ ລວມມູນຄ່າທັງໝົດ 30 ລ້ານ ກີບ ມອບໃຫ້ໂຮງຮຽນ ເພື່ອຮັບໃຊ້ເຂົ້າໃນວຽກບໍລິຫານ-ຄຸ້ມຄອງໂຮງຮຽນທັງສົ່ງເສີມໄປຕາມ 3 ລັກສະນະ 5 ຫັກມູນການສຶກສາ.

ໃນໂອກາດດັ່ງກ່າວ ທ່ານກໍໄດ້ນຳເອົາຄວາມອົບອຸ່ນ ແລະ ບາງເນື້ອໃນຈິດໃຈໂອ້ລົມຕໍ່ພະນັກງານ, ຄູອາຈານ ພ້ອມກັນນັ້ນໄດ້ໄປຢ້ຽມຊົມຫ້ອງວາງສະແດງເຄື່ອງນຸ່ງບັນດາເຜົ່າຂອງນ້ອງນັກຮຽນ.

ເພື່ອເປັນການຈັດຕັ້ງຜັນຂະຫຍາຍວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ ແລະ ຈັດຕັ້ງປະຕິບັດ ຕາມດຳລັດສະບັບເລກທີ 599/ລບ ວ່າດ້ວຍລົດຂອງລັດ, ໃນວັນທີ 15 ສິງຫາ 2022 ຫ້ອງວ່າການສູນກາງພັກ ໄດ້ຈັດຕັ້ງເຜີຍແຜ່ເຊື່ອມຊຶມເອກະສານດັ່ງກ່າວ ພາຍໃຕ້ການເປັນປະທານຂອງ ສະຫາຍ ເພັດຖາວອນ ພິລາວັນ ຄະນະປະຈຳພັກ ຮອງຫົວໜ້າຫ້ອງວ່າການສູນກາງພັກ ໂດຍມີບັນດາພະນັກງານຂັ້ນກົມ, ພະແນກ ແລະ ພະນັກງານທົ່ວຫ້ອງວ່າການສູນກາງພັກເຂົ້າຮ່ວມ.

ໃນໂອກາດນີ້, ສະຫາຍ ສົມບູນ ລັດຕະນະພອນ ຫົວໜ້າກົມຄຸ້ມຄອງຊັບສິນຂອງລັດ ກະຊວງການເງິນ ໄດ້ໃຫ້ກຽດເຜີຍແຜ່ບັນດານິຕິກຳດັ່ງກ່າວ, ເພື່ອເປັນການຈັດຕັ້ງຜັນຂະຫຍາຍ ວາລະແຫ່ງຊາດວ່າດ້ວຍການແກ້ໄຂຄວາມທຸກຍາກດ້ານເສດຖະກິດ-ການເງິນ ແລະ ທັງເປັນການຄຸ້ມຄອງຊັບສິນຂອງລັດໃຫ້ເຂົ້າສູ່ລະບຽບການ ແລະ ເປັນການປະຕິບັດດຳລັດເລກທີ 599/ລບ, ວ່າດ້ວຍລົດຂອງລັດ ກໍຄືການປະຢັດມັດທະຍັດ, ຕ້ານການຟຸ່ມເຟືອຍ ແລະ ຈຳກັດລາຍຈ່າຍງົບປະມານ, ການຄຸ້ມຄອງລົດຂອງລັດ ກໍແມ່ນໜຶ່ງໃນມາດຕະການປະຢັດ ແລະ ຄຸ້ມຄອງການນຳໃຊ້ພາຫະນະຂອງທາງລັດຖະການຖືກເປົ້າໝາຍ, ມີຄວາມໂປ່ງໃສ, ມີລະບຽບວິໄນ, ສາມາດກວດສອບໄດ້ ແລະ ສອດຄ່ອງກັບເງື່ອນໄຂຕົວຈິງຂອງປະເທດເຮົາ.

ພ້ອມນັ້ນ ຍັງໄດ້ກຳນົດຂອບເຂດໃນການນຳໃຊ້ລົດຕາມແຕ່ລະຕຳແໜ່ງບໍລິຫານ ຢູ່ບັນດາອົງການຈັດຕັ້ງພັກ-ລັດ, ອົງການແນວລາວສ້າງຊາດ, ອົງການຈັດຕັ້ງມະຫາຊົນ, ຢູ່ສູນກາງ ແລະ ໃນຂອບເຂດທົ່ວປະເທດ ຊຶ່ງລົດທຸກຄັນທີ່ນຳໃຊ້ວຽກບໍລິຫານລວມ, ລົດຮັບໃຊ້ວຽກວິຊາສະເພາະ ແລະ ລົດວິຊາສະເພາະແມ່ນຈະໄດ້ຕິດກາໝາຍ “ລົດຮັບໃຊ້ວຽກງານທາງລັດຖະການ” ຂອງແຕ່ລະຂະແໜງການ, ສໍາລັບລົດຮັບໃຊ້ໂຄງການ ແລະ ວິສາຫະກິດ ຕ້ອງຕິດແຜ່ນກາໝາຍນຳໃຊ້ທີ່ລະບຸຊື່ໂຄງການ ຫຼື ລັດວິສາຫະກິດ ໂດຍໃຫ້ຕິດໃສ່ປະຕູເບື່ອງໜ້າທັງສອງດ້ານ.ໂອກາດນີ້, ສະຫາຍ ເພັດຖາວອນ ພິລາວັນ ໄດ້ເນັ້ນໃຫ້ພະນັກງານທົ່ວຫ້ອງວ່າການສູນກາງພັກ ໃຫ້ເອົາໃຈໃສ່ປະຕິບັດດຳລັດດັ່ງກ່າວໃຫ້ຖືກຕ້ອງຕາມລະບຽບການ ເພື່ອໃຫ້ການນຳໃຊ້ລົດບໍລິຫານລັດ ໃຫ້ມີປະສິດທິຜົນສູງ, ພ້ອມທັງສ້າງຄວາມເປັນເອກະພາບໃນການຈັດຕັ້ງປະຕິບັດຕົວຈິງ ພາຍໃນຫ້ອງວ່າການສູນກາງພັກ.

ພາຍຫຼັງສຳເລັດການເຜີຍແຜ່ດຳລັດວ່າດ້ວຍລົດລັດ ແລະ ຕິດສະຕິກເກີ້ລົດລັດຖະການແລ້ວ ສະຫາຍ ທອງສະລິດ ມັງໜໍ່ເມກ ຄະນະເລຂາທິການສູນກາງພັກ ຫົວໜ້າຫ້ອງວ່າການສູນກາງພັກ ກໍໄດ້ໃຫ້ກຽດເຂົ້າຮ່ວມເປັນສັກຂີພິຍານໃນການປະກາດການນຳໃຊ້ສະຕິກເກີ້ຕິດລົດທາງລັດຖະການໃນຄັ້ງນີ້.

ຂ່າວ-ພາບ: ຫ້ອງວ່າການສູນກາງພັກ

ເຈົ້າແຂວງໄຊຍະບູລີ ມອບເງິນໃຫ້ເມືອງຊຽງຮ່ອນນໍາໄປຟື້ນຟູພື້ນຖານໂຄງລ່າງ ທີ່ຖືກນໍ້າຖ້ວມ

ແຫລ່ງຂ່າວຈາກ ແຂວງໄຊຍະບູລີ ໃຫ້ຮູ້ວ່າ: ໃນໂອກາດທີ່ ລົງຕິດຕາມສະພາບຜົນກະທົບຈາກໄພນໍ້າຖ້ວມຢູ່ເມືອງຊຽງຮ່ອນ ໃນວັນທີ 14 ສິງຫາ 2022 ນີ້, ທ່ານ ພົງສະຫວັນ ສິດທະວົງ ເຈົ້າແຂວງໄຊຍະບູລີ ຍັງໄດ້ມອບເງິນຈໍານວນ 100 ລ້ານກີບ ໃຫ້ການນໍາຂອງເມືອງ ເພື່ອນໍາໄປຟື້ນຟູບູລະນະພື້ນຖານໂຄງລ່າງຕ່າງໆທີ່ໄດ້ຮັບຜົນກະທົບ ຈາກໄພພິບັດທາງທໍາມະຊາດ. ພ້ອມທັງເນັ້ນໃຫ້ອົງການປົກຄອງເມືອງຈົ່ງເອົາໃຈ ໃສ່ຟື້ນຟູສະພາບຈິດໃຈປະຊາຊົນຜູ້ທີ່ໄດ້ຮັບຜົນກະທົບ ແລະ ຟື້ນຟູອາຄານສະຖານທີ່ຕ່າງໆໃຫ້ຜູ້ປະສົບໄພ ໃຫ້ສາມາດກັບມາໃຊ້ຊີວິດຢ່າງເປັນປົກກະຕິ.

ໂອກາດນີ້, ທ່ານ ກົງທອງ ສິດທິໄຊ ເຈົ້າເມືອງຊຽງຮ່ອນ ໄດ້ລາຍງານໃຫ້ຮູ້ວ່າ: ອຸທົກກະໄພຄັ້ງນີ້ ໄດ້ສ້າງຄວາມເສຍຫາຍໃຫ້ປາຊາຊົນ ຈໍານວນ 244 ຄອບຄົວ, ເຮືອນເສຍຫາຍ 4 ຫລັງ, ເຮືອນຖືກນໍ້າພັດໄຫລສູນຫາຍ 1 ຫລັງ, ໂຮງຮຽນ 1 ຫລັງ, ເນື້ອທີ່ທໍາການຜະລິດເສຍຫາຍ 600 ກວ່າເຮັກຕາ, ເນື້ອທີ່ສວນຢາງພາລາ 2,5 ເຮັກຕາ,ມີງົວຕາຍ 21 ໂຕ, ໄກ່ ແລະ ເປັດ 790 ໂຕ, ລົດໄຖນາເສຍຫາຍ 2 ຄັນ, ລົດຈັກ 13 ຄັນ, ໜອງປາ 43 ໜອງ, ເຂົ້າເປືອກເສຍຫາຍ 789 ເປົາ, ເຂົ້າສານເສຍຫາຍ 231 ເປົາ, ຊົນລະປະທານຫລາຍແຫ່ງໄດ້ຮັບຜົນເສຍຫາຍ, ດິນເຈື່ອນທັບຖົມທາງ, ນໍ້າເຊາະເສັ້ນທາງ ລະຫວ່າເມືອງ ຊຽງຮ່ອນ-ເມືອງເງິນ ຖືກຕັດຂາດ, ຊັບສິນ, ເຄື່ອງໃຊ້ໃນຄົວເຮືອນຂອງປະຊາຊົນເສຍຫາຍເປັນຈຳນວນຫລວງຫລາຍ ເຊິ່ງຍັງບໍ່ສາມາດປະເມີນມູນຄ່າເສຍຫາຍພ້ອມກັນນີ້, ທ່ານເຈົ້າແຂວງ ພ້ອມດ້ວຍການນຳຂັ້ນເມືອງ ຍັງໄດ້ລົງຕິດຕາມສະພາບຜົນກະທົບຈາກນໍ້າຖ້ວມຢູ່ ບ້ານປົ່ງ, ບ້ານາອອນ ແລະ ບ້ານທາດ ອີກດ້ວຍ.

ແຫຼ່ງຂ່າວ: ປະເທດລາວ Pathedlao

ແຫຼງຂ່າວຈາກ ແຂວງສະຫວັນນະເຂດ ໃຫ້ຮູວ່າ: ເມື່ອບໍ່ດົນມານີ້, ຫ້ອງການອຸດສາຫະກຳ ແລະ ການຄ້າ ນະຄອນ ໄກສອນ ພົມວິຫານ ຈັດພິທີມອບສົ່ງສິນຄ້າເສື່ອມຄຸນນະພາບ, ໝົດອາຍຸການນໍາໃຊ້ ເພື່ອນໍາໄປທໍາລາຍຖິ້ມ ທີ່ສະໜາມຂີ້ເຫຍື້ອບ້ານຊອກ ຈໍານວນ 56 ລາຍການ, ມູນຄ່າລວມ 155 ລ້ານກວ່າກີບ. ທັງນີ້ ກໍເພື່ອເຮັດໃຫ້ຜູ້ຂາຍ ແລະ ຜູ້ຊື້ ເຫັນໄດ້ຄວາມສຳຄັນໃນການຄັດເລືອກ ເອົາສິນຄ້າທີ່ມີຄຸນນະພາບມາຈຳໜ່າຍ, ຊົມໃຊ້ ແລະ ບໍລິໂພກ ສິນຄ້າທີ່ໄດ້ຕາມມາດຕະຖານ, ທັງຮັບປະກັນທາງດ້ານສຸຂະພາບຂອງຕົນເອງ ແລະ ຄົນໃນຄອບຄົວ ໂດຍມີ ທ່ານ ປະສົງສິນ ຈະເລີນສຸກ ເຈົ້ານະຄອນ ໄກສອນ ພົມວິຫານ ແລະ ພາກສ່ວນກ່ຽວຂ້ອງ ເຂົ້າຮ່ວມ.

ໃນພິທີ, ທ່ານ ຄໍາສີເພັດ ໄຊຍະວົງ ຫົວໜ້າຫ້ອງການອຸດສາຫະກໍາ ແລະ ການຄ້ານະຄອນ ໄກສອນ ພົມວິຫານ ໄດ້ໃຫ້ຮູ້ວ່າ: ຜ່ານການຈັດຕັ້ງປະຕິບັດ ໃນໄລຍະຜ່ານມາ ຫ້ອງການອຸດສາຫະກຳ ແລະການຄ້າ ກໍຄື ເຈົ້າໜ້າທີ່ກວດກາການຄ້າ ໄດ້ເອົາໃຈໃສ່ລົງຕິດຕາມ ກວດກາສິນຄ້າທີ່ລະເມີດ ຕໍ່ກົດລະບຽບຄຸ້ມຄອງການຄ້າ ເປັນຕົ້ນ ສິນຄ້າເສື່ອມຄຸນ, ສິນຄ້າໝົດອາຍຸການນໍາໃຊ້, ສິນຄ້າຫ້າມຈຳໜ່າຍ, ສິນຄ້າທີ່ມີສານປົນເປື້ອນ ແລະ ສິນຄ້າບໍ່ໄດ້ມາດຕະຖານ ຕາມຫ້າງຮ້ານ, ຮ້ານສະດວກຊື້, ຕະຫລາດ, ສ້າງເກັບມ້ຽນ ແລະ ສະຖານທີ່ບໍລິການຕ່າງໆ ໃນເທສະບານນະຄອນ ໄກສອນ ພົມວິຫານ.ຜ່ານການລົງເຄື່ອນໄຫວຕົວຈິງ ສາມາດລົງກວດກາສິນຄ້າຮ້ານສະດວກຊື້ໄດ້ 23 ຮ້ານ, ຮ້ານຂາຍຍ່ອຍໄດ້ 75 ຮ້ານ, ຮ້ານຂາຍອາຫານສົດ ແລະ ອາຫານທະເລ ໄດ້ 7 ຮ້ານ, ສາງແຊເຢັນ 6 ສາງ, ຄຣິນິກເສີມຄວາມງາມ 6 ແຫ່ງ, ຮ້ານນວດສະປາ 9 ຮ້ານ ແລະ ສາມາດກວດຢຶດ-ອາຍັດສິນຄ້າໄດ້ ປະເພດສິນຄ້າເສື່ອມຄຸນນະພາບ(ເສຍຄຸນ) ຈໍານວນ 56 ລາຍການ, ມູນຄ່າລວມ 155 ລ້ານກວ່າກີບ ແລະ ໄດ້ນໍາມາທຳລາຍຖິ້ມໃນຄັ້ງນີ້.ຂ່າວ-ພາບ: ນະຄອນ ໄກສອນ ພົມວິຫານ.

ແຫຼ່ງຂ່າວ: ຂປລ