ວັນທີ 2 ກັນຍາ 2022 ເຈົ້າໜ້າທີ່ ປກສ ແຂວງ ສະຫວັນນະເຂດ ໄດ້ລາຍງານວ່າ: ສາມາດຈັບຜູ້ກໍ່ເຫດໄດ້ ຖານແອບອ້າງເປັນເຈົ້າໜ້າທີ່ ແລະ ໄປຕົວະປະຊາຊົນ, ໂດຍມື້ເກີດເຫດ ໃນເວລາ 7 :15 ນາທີ ຂອງວັນອາທິດ ທີ 28 ສິງຫາ 2022 ມີຊາຍຜູ້ໜຶ່ງນຸ່ງເຄື່ອງແບບຕຳຫຼວດໄດ້ຍ່າງເຂົ້າມາທີ່ເຮືອນຂອງປະຊາຊົນ ແລ້ວໄດ້ອ້າງວ່າຕົນເປັນເຈົ້າໜັາທີ່ຕຳຫຼວດ ແລ້ວເວົ້າກັບເຈົ້າຂອງເຮືອນຜູ້ທີ່ເປັນປະຊາຊົນວ່າ ໄດ້ໃຫ້ຜູ້ກ່ຽວມາເອົາລົດ ແຕ່ປະຊາຊົນຜູ້ນັ້ນກໍ່ເບິ່ງວ່າມີທ່າທີບໍ່ດີ ບໍ່ໄດ້ຫຼົງເຊື່ອ ແລ້ວກໍ່ຮີບກັບເຂົ້າມາໃນເຮືອນ ແລະ ໄປແຈ້ງຕໍ່ເຈົ້າໜ້າທີ່ ປກສ ໃນພາຍຫຼັງ.

ມາໃນວັນທີ 30 ສິງຫາ 2022 ພາຍຫຼັງເຈົ້າໜ້າທີ່ສາມາດໄປຈັບໂຕໄດ້ ຈຶ່ງຮູ້ວ່າ ຜູ້ກ່ຽວມີຊື່ວ່າ ທ້າວ ສີເພັດໝັ້ນ ອາຍຸ 34 ປີ ບ້ານສຸນັນທາ ນະຄອນໄກສອນພົມວິຫານ ແຂວງສະຫວັນນະເຂດ ຜູ້ກ່ຽວເປັນຄົນເສຍຈິດ ເຊິ່ງຊຸດຕຳຫຼວດທີ່ຜູ້ກ່ຽວໃສ່ ແມ່ນລັກເອົາມາຈາກພີ່ນ້ອງ ຜູ້ທີ່ເປັນພະນັກງານ, ພາຍຫຼັງຮູ້ແນວນັ້ນ ເຈົ້າໜ້າທີ່ ປກສ ຈຶ່ງໄດ້ນຳມາສຶກສາອົບຮົບ ແລ້ວປ່ອຍໂຕຜູ້ກ່ຽວໃຫ້ກັບຄອບຄົວ ເພື່ອໄປຮັກສາປິ່ນປົວຈິດ.

ແຫຼ່ງຂ່າວ: ປກສ ແຂວງສະຫວັນນະເຂດ

ເຈົ້ານະຄອນຫຼວງພະບາງ ຊີ້ແຈງ 3 ສາເຫດທີ່ການຊ່ວງເຮືອປະຈຳປີ ພສ 2565 ບໍ່ມີການຊີງຊະນະເລີດ.

ອີງຕາມແຫຼ່ງຂ່າວຈາກ ແຂວງຫຼວງພະບາງ ໃຫ້ຮູ້ວ່າ: ທ່ານ ວຽງທອງ ຫັດສະຈັນ ເຈົ້ານະຄອນ ຫຼວງພະບາງ ໄດ້ຊີ້ແຈງໃນຕອນແລງ ວັນທີ 31 ສິງຫາ 2022 ກ່ຽວກັບ ບັນຫາຫາງສຽງສັງຄົມ ຕໍ່ການຊ່ວງເຮືອປະຈຳປີ ພສ 2565 ໂອກາດບຸນຫໍ່ເຂົ້າປະດັບ ດິນ ຊ່ວງເຮືອເດືອນ 9 ທີ່ບໍ່ມີການແຂ່ງຂັນໃນຮອບຊີງຊະນະເລີດ ເຊິ່ງເປັນການພົບກັນລະຫວ່າງ ເຮືອຊ່ວງຂອງນະຄອນຫຼວງວຽງຈັນ ບໍລິສັດແສງເພັດເກັບກູ້ລະເບີດ ກັບ ເຮືອຊ່ວງຂອງແຂວງໄຊຍະບູລີ ບໍລິສັດ ພັນທະມິດກຣຸບ ເນື່ອງມາຈາກ 3 ສາເຫດຫລັກ.

ທ່ານ ວຽງທອງ ຫັດສະຈັນ ກ່າວວ່າ: ສຳລັບ 3 ສາເຫດທີ່ເຮັດໃຫ້ການຊ່ວງເຮືອປະຈຳປີ ພສ 2565 ຢູ່ນະຄອນ ຫຼວງພະບາງ ບໍ່ມີການຊີງຊະນະເລີດ ຍ້ອນວ່າ:

• ເຮືອຄູ່ຊີງຊະນະເລີດທັງສອງລຳ ມີຂໍ້ຂັດແຍ່ງກັນມາກ່ອນຮອບຊີງຊະນະເລີດ ເຮັດໃຫ້ເວລາຈະອອກຈາກພ່ວງປ່ອຍ ບາງຄັ້ງມີລຳໜຶ່ງອອກ ບາງລຳບໍ່ຍອມອອກ;
• ສາເຫດທີສອງ ນັກກິລາເຮືອຊ່ວງທັງສອງລຳ ຂາດຈັນຍາບັນຂອງນັກກິລາ ໂດຍບໍ່ຄິດວ່າທຸກຄົນທີ່ຊົມຢູ່ສອງຟັ່ງນ້ຳຄານ ແລະ ຊົມຜ່ານການຖ່າຍທອດສົດ ຖ້າເບິ່ງການຊ່ວງເຮືອຄູ່ຊີງຊະນະເລີດ
• ສາເຫດທີສາມ ຍ້ອນກຳມະການ ດຳເນີນການກວດກາເຕັກນິກບໍ່ຄົບຖ້ວນ ຕາມລະບຽບການ ແລະ ບໍ່ເຂັ້ມງວດໃນການປະຕິບັດໜ້າທີ່.

ສ່ວນບັນຫາທີ່ປີ່ນອ້ອມແມ່ນເວລາດຳເນີນການແຂ່ງຂັນ ຍັງມີຄະນະຮັບຜິດຊອບເຮືອຊ່ວງ ນຳໃຊ້ເຮືອຈັກ ແລ່ນໄປ-ມາ ໃນສະຖານທີ່ແຂ່ງຂັນ, ພ້ອມນີ້ ການແຂ່ງຂັນແຕ່ລະລ່ອງໃຊ້ເວລາແກ່ຍາວ ເຮັດໃຫ້ນັກກິລາບໍ່ມີສະມາທິໃນການແຂ່ງຂັນ.

ທ່ານ ວຽງທອງ ຫັນສະຈັນ ຍັງໃຫ້ຮູ້ອີກວ່າ: ຕໍ່ກັບບັນຫາຫາງສຽງສັງຄົມທີ່ເກີດຂຶ້ນ, ອົງການປົກຄອງນະຄອນ ຫລວງພະບາງ ໄດ້ເຮັດໜັງສືແຈ້ງເຊີນໃຫ້ພາກສ່ວນກ່ຽວ ຂ້ອງ ເຂົ້າມາປຶກສາຫາລືຊອກຫາສາເຫດຕົວຈິງ ໂດຍໄດ້ຮັບໜັງສືແຈ້ງຕອບຈາກທຸກພາກ ສ່ວນ ແລະ ສາມາດສະຫລຸບບັນຫາລວມຕົວຈິງ ແມ່ນເຮືອຊ່ວງຂອງແຂວງໄຊຍະບູລີ ໄດ້ສະລະສິດເຂົ້າແຂ່ງຂັນໃນຮອບຊີງຊະນະເລີດ ຍ້ອນສະພາບເຮືອມີບັນຫາຕິດຂັດ, ຄະນະ ກຳມະການຈຶ່ງຕັດສິນໃຫ້ເຮືອຊ່ວງນະຄອນຫລວງວຽງຈັນ ບໍລິສັດແສງເພັດ ເກັບກູ້ລະເບີດ ໄດ້ຄອງຊະນະເລີດ.

ໂອກາດນີ້, ເຈົ້ານະຄອນ ຫລວງພະບາງ ໄດ້ສະແດງຄວາມຂອບໃຈທີ່ທຸກພາກສ່ວນໃນສັງຄົມ ໄດ້ສົ່ງຄຳຄິດຄໍາເຫັນຕໍ່ການຈັດງານບຸນຊ່ວງເຮືອ ຢູ່ນະຄອນ ຫຼວງພະບາງ ໃນປີນີ້, ທຸກບັນຫາຄົງຄ້າງ ອົງການປົກນະຄອນ ຫລວງພະບາງ ຂໍຮັບເອົາທຸກບັນຫາ ເພື່ອສືບຕໍ່ຊີ້ນຳຄະນະກຳມະການຈັດການແຂ່ງຂັນ ເພື່ອເຮັດໃຫ້ການຈັດງານບຸນໃນປີຕໍ່ໄປ ກໍຄື ປີ 2023 ປະສົບຜົນສໍາເລັດ ແລະ ໄດ້ຮັບຜົນດີຂຶ້ນກວ່າເກົ່າ.

ແຫຼ່ງຂ່າວ: ປະເທດລາວ

ສານຂອງທ່ານ ພັນຄໍາ ວິພາວັນ ນາຍົກລັດຖະມົນຕີແຫ່ງ ສປປ ລາວ ໂອກາດວັນໄຂສົກຮຽນໃໝ່ 2022-2023 ໃນວັນທີ 1 ກັນຍາ 2022

– ຜູ້ບໍລິຫານການສຶກສາ ແລະ ກິລາ, ພະນັກງານ, ຄູອາຈານ, ນັກຮຽນ ນັກສຶກສາ.

– ພີ່ນ້ອງ ປວງຊົນລາວ ໃນທົົ່ວປະເທດ ທີ່ນັບຖື ແລະ ຮັກແພງ.

ເນື່ອງໃນໂອກາດວັນໄຂສົກຮຽນໃໝ່ ສົກຮຽນ 2022-2023 ນີີ້, ຂ້າພະເຈົ້າ ຂໍຕາງໜ້າໃຫ້ສູນກາງພັກ ແລະ ລັດຖະບານ ຂໍຝາກຄວາມຢ້ຽມຢາມຖາມຂ່າວ, ຄວາມຮັກແພງສາມັກຄີມາຍັງຜູ້ບໍລິຫານການສຶກສາ, ຄູອາຈານ ແລະ ນັກຮຽນນັກສຶກສາທຸກຖ້ວນໜ້າໃນຂອບເຂດທົົ່ວປະເທດ.

ວຽກງານການສຶກສາ, ວິທະຍາສາດ ແລະ ກິລາ ແມ່ນຂະແໜງການໜຶ່ງທີ່ລັດຖະບານ ໄດ້ໃຫ້ຄວາມສໍາຄັນຍິ່ງໃນການປະຕິບັດນະໂຍບາຍຂອງພັກ ແລະ ຜັນຂະຫຍາຍແຜນພັດທະນາເສດຖະກິດ-ສັງຄົມຂອງລັດ ຕໍໍ່ວຽກງານການພັດທະນາການສຶກສາ, ວິທະຍາສາດ ແລະ ກິລາ ກໍຄື ການພັດທະນາຄົນໃຫ້ມີຄວາມຮູ້, ຄວາມສາມາດ, ມີຄຸນສົມບັດສິນທໍາປະຕິວັດ ແລະ ມີຄ່ານິຍົມທີ່ຖືກຕ້ອງ, ມີສຸຂະພາບທາງດ້ານຮ່າງກາຍ ແລະ ຈິດໃຈທີີ່ແຂງແຮງ, ຮັກຄວາມກ້າວໜ້າ ເພື່ອກາຍເປັນກໍາລັງແຮງງານທີີ່ມີຄຸນນະພາບ ສືບທອດພາລະກິດປົກປັກຮັກສາ ແລະ ສ້າງສາປະເທດຊາດໃນອະນາຄົດ.

ຄູອາຈານ ແລະ ນັກຮຽນ ນັກສຶກສາ ທີ່ຮັກແພງທັງຫຼາຍ, ສົກຮຽນໃໝ່ 2022-2023 ເປັນສົກຮຽນໜຶ່ງທີ່ມີຄວາມສໍາຄັນໃນພາລະກິດການສຶກສາຂອງພວກເຮົາ. ສະນັ້ນ, ເພື່ອຮັບປະກັນໃຫ້ການຮຽນການສອນດໍາເນີນໄປຢ່າງມີປະສິດທິພາບ ແລະ ປະສິດທິຜົນ, ຂ້າພະເຈົ້າ ຂໍຮຽກຮ້ອງມາຍັງຜູ້ບໍລິຫານການສຶກສາ, ຄູອາຈານ, ນັກຮຽນ ນັກສຶກສາ, ການຈັດຕັ້ງ ແລະ ທຸກພາກສ່ວນທົົ່ວສັງຄົມ ໃຫ້ພ້ອມກັນເອົາໃຈໃສ່ປະຕິບັດໜູ້າທີ່ຂອງຕົນ ດັ່ງນີີ້:

(1) ໃຫູ້ຜູ້ບໍລິຫານການສຶກສາ ແລະ ກິລາ ທຸກຂັ້ນ ຈົົ່ງເພີ່ມທະວີຄວາມຮັບຜິດຊອບຕໍໍ່ໜ້າທີ່ວຽກງານຂອງຕົນໃນການຄຸ້ມຄອງບໍລິຫານການສຶກສາໃຫ້ສູງຂຶ້ນ, ເອົາໃຈໃສ່ພັດທະນາຊັບພະຍາກອນມະນຸດໃຫ້ມີຄຸນນະພາບ ແລະ ໄດ້ມາດຕະຖານຕາມ 3 ລັກສະນະ ແລະ 5 ຫຼັກມູນຂອງການສຶກສາ, ພ້ອມກັນຕ້ານປະກົດການຫຍໍໍ້ທໍໍ້ຕ່າງໆ ໂດຍສະເພາະແມ່ນການສະກັດກັ້ນ ແລະ ຕ້ານບັນຫາ ຢາເສບຕິດທີ່ຕິດພັນກັບວາລະແຫ່ງຊາດໃຫ້ເຂັ້ມງວດ ແລະ ເດັດຂາດ.

(2) ບັນດາຄູອາຈານ ຈົົ່ງເອົາໃຈໃສ່ໃນການສຶກສາຄົ້ນຄວ້າ ທໍາຄວາມເຂົ້າໃຈກ່ຽວກັບຫຼັກສູດ ແລະ ການຈັດການຮຽນການໃຫ້ມີຄຸນນະພາບ, ຮຽນຮູ້ນໍາໃຊ້ເຕັກໂນໂລຊີຂໍໍ້ມູນຂ່າວສານປະກອບການສອນ, ໃຫ້ຈັດຕັ້ງທົບທວນ-ສໍາມະນາກັນຄືນກ່ຽວກັບຮູບແບບ, ເຕັກນິກ, ວິທີການສອນ ແລະ ການວັດຜົນ ແລະ ປະເມີນຜົນຜູ້ຮຽນໃຫ້ສອດຄ່ອງກັບສະພາບວິຖີການດໍາລົງຊີວິດແບບໃໝ່. ພ້ອມກັນນີີ້, ກໍໃຫ້ເພີ່ມທະວີຄວາມຮັບຜິດຊອບຕໍໍ່ໜ້າທີ່ວຽກງານຂອງຕົນ, ປະຕິບັດໜ້າທີ່ຢ່າງເປັນມືອາຊີບ ໃຫ້ສົມກັບເປັນແມ່ພິມທີ່ດີຂອງຊາດ ມີຄວາມສັດຊື່ບໍລິສຸດ ແລະ ມີຈັນຍາບັນ, ຝຶກຝົນ ແລະ ພັດທະນາຕົນເອງດ້ານວິຊາສະເພາະ ແລະ ເຕັກນິກວິທີການສອນໃຫ້ທັນກັບສະພາບການ ປ່ຽນແປງ ແລະ ເຕັກໂນໂລຊີໃໝ່ ເພື່ອສົົ່ງຄວາມຮູ້ໃຫ້ແກ່ນັກຮຽນ ນັກສຶກສາໃຫ້ມີປະສິດທິຜົນສູງຂຶ້ນ.

(3) ພໍໍ່ແມ່ຜູ້ປົກຄອງນັກຮຽນ ຈົົ່ງພ້ອມກັນຊຸກຍູ້ສົົ່ງເສີມໃຫ້ລູກຫຼານທີີ່ຢູ່ໃນເກນອາຍຸເຂົ້າຮຽນໄປ ເຂົ້າໂຮງຮຽນທັງການສຶກສາກ່ອນໄວຮຽນ, ສາມັນສຶກສາ, ວິຊາຊີບ ແລະ ການສຶກສາຊັັ້ນສູງ ແລະ ເອົາໃຈໃສ່ຕໍໍ່ການແນະນໍາລູກຫຼານໃນການສຶກສາຮໍ່າຮຽນເວລາຢູ່ເຮືອນ, ອົບຮົມຕັກເຕືອນເຂົາເຈົ້າໃຫ້ເຫັນຄວາມສໍາຄັນຂອງການສຶກສາ ທັງຕໍໍ່ຕົນເອງ, ຄອບຄົວ, ສັງຄົມ ແລະ ປະເທດຊາດ.

(4) ສໍາລັບລູກຫຼານນັກຮຽນ ນັກສຶກສາ ຈົົ່ງຕັ້ງໃຈສຶກສາຮໍ່າຮຽນຢູ່ໃນຫ້ອງຮຽນ ແລະ ຮຽນດ້ວຍ ຕົນເອງໃຫ້ຫຼາຍຂຶ້ນ, ມີຄວາມດຸໝັ່ນຂະຫຍັນພຽນ, ຕັ້ງໜ້າຝຶກຝົນຫຼໍໍ່ຫຼອມໃຫ້ກາຍເປັນນັກຮຽນທີ່ຮຽນດີ, ຮຽນເກັ່ງຂອງຄູອາຈານ, ເປັນລູກຫຼານທີ່ດີຂອງພໍໍ່ແມ່, ເປັນພົນລະເມືອງທີ່ດີຂອງປະເທດຊາດ.

(5) ການຈັດຕັ້ງພັກ-ລັດ, ອົງການຈັດຕັ້ງມະຫາຊົນ, ສະມາຄົມພໍໍ່ແມ່ນັກຮຽນ, ຄະນະພັດທະນາ ການສຶກສາຂັ້ນບ້ານ, ຊຸມຊົນ, ການຈັດຕັ້ງສັງຄົມ, ຜູ້ປະກອບການທຸກພາກສ່ວນ ຈົົ່ງພ້ອມກັນ ປະກອບສ່ວນຕາມພາລະບົດບາດຂອງຕົນ ໃນການສຶກສາອົບຮົມ, ບົົ່ມສອນ ແລະ ສ້າງສະພາບແວດລ້ອມທີ່ດີ ເພື່ອໃຫ້ນັກຮຽນ ນັກສຶກສາ ໄດ້ເກີດການຮຽນຮູ້ ແລະ ເຕີບໃຫຍ່ຂະຫຍາຍຕົວເປັນພົນລະເມືອງທີີ່ດີຂອງປະເທດຊາດ ແລະ ຖືເອົາວຽກງານການສຶກສາ, ວິທະຍາສາດ ແລະ ກິລາ ເປັນໜ້າທີ່ ແລະ ຄວາມຮັບຜິດຊອບຂອງທົົ່ວປວງຊົນລາວທັງຊາດ.

ໃນໂອກາດນີີ້, ຂ້າພະເຈົ້າຂໍຮຽກຮ້ອງມາຍັງທຸກການຈັດຕັ້ງ ທັງພາກລັດ ແລະ ພາກເອກະຊົນ, ພໍໍ່ແມ່ ຜູ້ປົກຄອງ ແລະ ນັກຮຽນ ນັກສຶກສາ ໃນຂອບເຂດທົົ່ວປະເທດ ຈົົ່ງໃຫ້ການຮ່ວມມື ແລະ ເປັນເຈົ້າການຮ່ວມກັບຂະແໜງການສຶກສາ ແລະ ກິລາ ແລະ ຂະແໜງສາທາລະນະສຸກ ແຕ່ລະຂັ້ນ ໃນການກະກຽມຄວາມພ້ອມ, ອໍານວຍຄວາມສະດວກ ແລະ ຊ່ວຍເຫຼືອຕາມເງື່ອນໄຂ ແລະ ຄວາມສາມາດຕົວຈິງຂອງແຕ່ລະພາກສ່ວນ ເພື່ອໃຫ້ສົກຮຽນໃໝ່ 2022-2023 ດໍາເນີນໄປໄດ້ດ້ວຍດີ ແລະ ມີຜົນສໍາເລັດ.

ທ້າຍສຸດນີີ້, ຂ້າພະເຈົ້າ ຂໍອວຍພອນໄຊອັນປະເສີດມາຍັງຜູ້ບໍລິຫານການສຶກສາ ແລະ ກິລາ ທຸກຂັັ້ນ, ຄູອາຈານ, ນັກຮຽນ ນັກສຶກສາ, ພະນັກງານ-ລັດຖະກອນ, ທະຫານ, ຕໍາຫຼວດ ຕະຫຼອດຮອດປະຊາຊົນລາວບັນດາເຜົ່າໃນທົົ່ວປະເທດ ຈົົ່ງມີສຸຂະພາບແຂງແຮງ ແລະ ປະສົບຜົນສໍາເລັດໃນໜ້າທີ່ວຽກງານຂອງຕົນ.

ແຂວງອຸດົມໄຊ ອອກແຈ້ງຂ່າວ ໄພພິບັດນໍ້າຖ້ວມ

ຮຽນ/ເຖິງ: ບັນດາພະແນກການອ້ອມຂ້າງແຂວງ, ຫ້ອງການອ້ອມຂ້າງເມືອງ, ອົງການຈັດຕັ້ງພັກ-ລັດທຸກຂັ້ນ, ນັກທຸລະກິດພາຍໃນ, ຊາວຕ່າງດ້າວ, ຜູ້ປະກອບການ ແລະ ຫ້າງຮ້ານຕ່າງໆ ຕະຫຼອດຮອດພໍ່ແມ່ປະຊາຊົນທີ່ດໍາລົງຊີວິດຢູ່ພາຍໃນເມືອງໄຊ ເພື່ອຮັບຊາບ.

ເລື່ອງ:ຊ່ວຍປະກອບສ່ວນວັດຖຸ-ປັດໃຈຕ່າງໆ ເພື່ອບັນເທົາທຸກໃຫ້ແກ່ປະຊາຊົນທີ່ໄດ້ຮັບຜົນກະທົບຈາກໄພພິບັດນ້ໍາຖ້ວມຢູ່ເມືອງໄຊ ໃນວັນທີ 26 ສິງຫາ 2022. – ອີງຕາມ ຂໍ້ຕົກລົງວ່າດ້ວຍການຈັດຕັ້ງ ແລະ ການເຄື່ອນໄຫວຂອງຄະນະກໍາມະການຄຸ້ມຄອງໄພພິບັດຂັ້ນເມືອງເລກທີ່ 331/ຈມ.ມຊ, ລົງວັນທີ 13 ມິຖຸນາ 2022. – ອີງຕາມສະພາບໄພພິບັດນ້ໍາຖ້ວມທີ່ເກີດຂຶ້ນຢ່າງຫນັກຫນ່ວງ ໃນວັນທີ 26 ສິງຫາ 2022.

ອີງຕາມ ການຄົ້ນຄວ້າເຫັນດີເປັນເອກະພາບຂອງຄະນະປະຈໍາພັກເມືອງໄຊ ໃນວັນທີ 27 ສິງຫາ 2022.ເນື່ອງຈາກສະພາບຝົນຕົກຫນັກ ໃນວັນທີ 26 ສິງຫາ 2022 ຜ່ານມານີ້ ເຮັດໃຫ້ປະລິມານນ້ໍາກໍ່ ໄດ້ເພີ່ມຂຶ້ນ ຢ່າງກະທັນຫັນ ແລະ ໄດ້ໄຫຼສຸເອົາເຮືອນ-ຊານ, ດິນຖະຫຼົ່ມໃສ່ອາຄານສະຖານທີ່ພັກອາໄສ, ຮົ້ວສວນ, ຊັບສິນຕ່າງໆ ລວມທັງຜົນລະປູກຂອງພໍ່ແມ່ປະຊາຊົນບັນດາເຜົ່າ ທີ່ອາໄສຢູ່ລຽບຕາມຮ່ອມຫ້ວຍ ແລະ ລຽບຕາມລ້ອງສາຍນ້ໍາກໍ ໄດ້ຮັບຜົນກະທົບຢ່າງຫຼວງຫຼາຍ, ລະບົບນໍ້າລິນ-ນໍ້າປະປາຖືກເປເພ່, ເສັ້ນທາງຄົມມະນາຄົມຖືກຕັດຂາດ, ເສົາໄຟຟ້າ ຫຼັກ, ຂາດແຄນອາຫານ ແລະ ນ້ໍາດື່ມ ຢ່າງຫນັກຫນ່ວງ.

ສະນັ້ນ; ເພື່ອເປັນການແກ້ໄຂບັນຫາດັ່ງກ່າວຢ່າງຮີບດ່ວນ, ຄະນະກໍາມະການຄຸ້ມຄອງໄພພິບັດຂັ້ນເມືອງ ຂໍຖື ເປັນກຽດຢ່າງສູງແຈ້ງຂ່າວມາຍັງບັນດາພະແນກການອ້ອມຂ້າງແຂວງ, ຫ້ອງການອ້ອມຂ້າງເມືອງ, ອົງການຈັດຕັ້ງ: ພັກ-ລັດທຸກຂັ້ນ, ນັກທຸລະກິດພາຍໃນ, ຊາວຕ່າງດ້າວ, ຜູ້ປະກອບການ ແລະ ຫ້າງຮ້ານຕ່າງໆ ຕະຫຼອດຮອດພໍ່ແມ່ ປະຊາຊົນທີ່ດໍາລົງຊີວິດ ແລະ ເຮັດທຸລະກິດຢູ່ພາຍໃນເມືອງໄຊ ຮັບຊາບວ່າ:

ປະຈຸບັນນີ້ ທາງເມືອງໄຊພວກເຮົາ ໄດ້ ຈັດຕັ້ງການປຸກລະດົມ ແລະ ຮັບບໍລິຈາກວັດຖຸປັດໃຈຕ່າງໆ ຈາກທຸກພາກສ່ວນໃນສັງຄົມ ເປັນຕົ້ນແມ່ນ: ເຂົ້າສານອາຫານແຫ້ງ, ນ້ໍາດື່ມ, ຫມີ, ປ່ອງປາ, ທຽນໄຂ, ໄຟສາຍ, ເຄື່ອງນຸ່ງຫົ່ມ ແລະ ສິ່ງທີ່ຈໍາເປັນອື່ນໆ ເພື່ອນໍາໄປມອບ ຊ່ວຍເຫຼືອບັນເທົາທຸກໃຫ້ແກ່ປະຊາຊົນທີ່ໄດ້ຮັບຜົນກະທົບຈາກໄພພິບັດນ້ໍາຖ້ວມຢູ່ເມືອງໄຊ ໃນຄັ້ງນີ້, ເຊິ່ງ ສະຖານທີ່ຮັບບໍລິຈາກ ແມ່ນຢູ່ສະໂມສອນປົກຄອງເມືອງໄຊ ຫຼັງເກົ່າ (ບ້ານວັງໄຮ) ຕະຫຼອດ 24 ຊົ່ວໂມງ.

ຫວັງຢ່າງຍິ່ງວ່າຈະໄດ້ຮັບການຮ່ວມໄມ້ຮ່ວມມື ແລະ ປະກອບສ່ວນຊ່ວຍເຫຼືອຈາກທ່ານຕາມຄວາມເຫມາະສົມ.ຄະນະກໍາມະການຄຸ້ມຄອງໄພພິບັດຂັ້ນເມືອງ,ຕິດຕໍ່ພົວພັນ:

1). ທ່ານ ນ ຂັນຄໍາ ແສງສູນລວງ 020 55442294 ແລະ 2). ທ່ານ ໄຊສະຫວັນ ໄຊສົງຄາມ 020 52341555

ນາຍົກລັດຖະມົນຕີ ຕ້ອນຮັບ ຄະນະຜູ້ແທນກອງທັບ ກຳປູເຈຍ

ໃນວັນທີ 30 ສິງຫາ 2022 ນີ້, ທ່ານ ພັນຄຳ ວິພາວັນ ນາຍົກລັດຖະມົນຕີ ໄດ້ໃຫ້ກຽດຕ້ອນຮັບ ທ່ານ ພົນໂທ ຮຸນ ມາແນດ ຮອງຜູ້ບັນຊາການທະຫານສູງສຸດ, ຜູ້ບັນຊາການທະຫານບົກ ກອງທັບ ແຫ່ງ ຣາຊະອານາຈັກ ກຳປູເຈຍ ພ້ອມດ້ວຍຄະນະ ໃນໂອກາດເດີນທາງມາຢ້ຽມຢາມ ແລະ ເຮັດວຽກ ຢູ່ ສປປ ລາວ ໃນລະຫວ່າງວັນທີ 29-31 ສິງຫາ 2022.

ໂອກາດດັ່ງກ່າວ, ທ່ານ ພັນຄຳ ວິພາວັນ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງ ຕໍ່ທ່ານ ພົນໂທ ຮຸນ ມາແນດ ທີ່ໄດ້ນຳພາຄະນະເດີນທາງມາຢ້ຽມຢາມ ແລະ ເຮັດວຽກ ຢູ່ ສປປ ລາວໃນຄັ້ງນີ້, ເປັນການປະກອບສ່ວນອັນສຳຄັນ ເຂົ້າໃນການຮັດແໜ້ນການພົວພັນຮ່ວມມື ລະຫວ່າງສອງປະເທດ ໂດຍສະເພາະ ການພົວພັນຮ່ວມມື ລະຫວ່າງສອງກອງທັບ ລາວ-ກຳປູເຈຍ ໃຫ້ໄດ້ຮັບການພັດທະນາ ແລະ ແໜ້ນແຟ້ນຂຶ້ນໄປເລື້ອຍໆ. ທ່ານ ພົນໂທ ຮຸນ ມາແນດ ກໍໄດ້ ສະແດງຄວາມຂອບໃຈຕໍ່ ທ່ານ ພັນຄຳ ວິພາວັນ ທີ່ໄດ້ຕ້ອນຮັບຢ່າງອົບອຸ່ນໃນຄັ້ງນີ້, ພ້ອມທັງ ແຈ້ງຈຸດປະສົງຂອງການເດີນທາງມາຢ້ຽມຢາມ ແລະ ເຮັດວຽກ ຢູ່ ສປປ ລາວ ໃຫ້ທ່ານນາຍົກລັດຖະມົນຕີຊາບ.

ຂ່າວ: ທະນູທອງ ພາບ: ເກດສະໜາ

ຕາມການໃຫ້ສຳພາດຂອງ ທ່ານ ສົມຈັນ ພົນທະສິດ ອຳນວຍການໂຮງຮຽນສາມັນກິນນອນຊົນເຜົ່າ ແຂວງອຸດົມໄຊ ໃນວັນທີ 29 ສິງຫາ 2022 ນີ້ວ່າ: ໂຮງຮຽນສາມັນກິນນອນຊົນເຜົ່າ ເປັນສະຖານທີ່ໜຶ່ງທີ່ໄດ້ຮັບຜົນກະທົບຈາກໄພນ້ຳຖ້ວມ ແລະ ເສຍຫາຍຫລາຍພໍສົມຄວນ.

ສະນັ້ນ, ສົກຮຽນປີນີ້ ຈະໄດ້ມີເລື່ອນການຮັບນັກຮຽນມາເຂົ້າຮຽນ ຈາກປົກກະຕິແມ່ນ 29 ສິງຫາ 2022 ແລະ ໄດ້ເລື່ອນແຜນຮັບນັກຮຽນອອກໄປເປັນວັນທີ 5 ກັນຍາ 2022.ທ່ານ ສົມຈັນ ພົນທະສິດ ຍັງໃຫ້ຮູ້ອີກວ່າ: ໂຮງຮຽນສາມັນກິນນອນຊົນເຜົ່າ ແຂວງອຸດົມໄຊ ໄດ້ຮັບຜົນກະທົບຈາກໄພນ້ຳຖ້ວມຄັ້ງນີ້ຫລາຍສົມຄວນ ເຊັ່ນ: ໜອງປາທີ່ປ່ອຍປາແລ້ວ 13ພັນໂຕ ໃຊ້ທຶນ 21ລ້ານກີບ ຖືກເສຍຫາຍ, ຊີມັງສອງໂຕນເຄິ່ງ, ຜ້າຢາງມູນຄ່າສາມລ້ານກວ່າກີບ, ກ໊ອກນ້ຳ, ທໍ່ນ້ຳຫັກເປ່ເພບໍ່ສາມາດໃຊ້ນ້ຳໄດ້.

ນອກຈາກນີ້, ສວນຜັກ, ໜານດອກໄມ້ ແລະ ອຸປະກອນການກະເສດຈຳນວນໜຶ່ງກໍໄຫລໄປນຳກະແສນ້ຳ.ປັດຈຸບັນ, ໄດ້ປະສານທາງຫ້ອງວ່າການປົກຄອງແຂວງ, ກຳລັງ ປກສ, ປກຊ, ຊາວໜຸ່ມຕະລຸມບອນ ລະດົມກຳລັງມາຊ່ວຍຊະລ້າງຂີ້ຕົມ ເພື່ອໃຫ້ທັນເປີດຮັບນັກຮຽນໃນວັນທີ 5 ກັນຍາ 2022 ນີ້.

ແຫຼ່ງຂ່າວ: ຂປລ

ລັດຖະມົນຕີກະຊວງການເງິນ ເຄື່ອນໄຫວຊຸກຍູ້ການປະຕິບັດລາຍຮັບ ຢູ່ແຂວງຄຳມ່ວນ.

ທ່ານ ບຸນໂຈມ ອຸບົນປະເສີດ ລັດຖະມົນຕີກະຊວງການເງິນ ໄດ້ເຄື່ອນໄຫວຊຸກຍູ້ການຈັດ ຕັ້ງປະຕິບັດວຽກງານ ຂະຫຍາຍຖານລາຍຮັບຕິດພັນກັບວາລະແຫ່ງຊາດ ໃນວັນທີ 29 ສິງຫາ 2022 ຢູ່ແຂວງຄຳມ່ວນ, ພ້ອມທັງໄດ້ເນັ້ນຂະແໜງການເງິນແຂວງ ສືບຕໍ່ເພີ່ມທະວີຍົກສູງນໍ້າໃຈຮັກຊາດ, ນໍ້າໃຈສາມັກຄີ, ນໍ້າໃຈເສຍສະຫຼະ ແລະ ປະຢັດມັດທະຍັດ ເພື່ອພ້ອມກັນສູ້ຊົນຜ່ານຜ່າວິກິດການທີ່ກໍາລັງປະເຊີນໃນປັດຈຸບັນ ໃຫ້ຜ່ານພົ້ນໄປດ້ວຍດີ. ພ້ອມນີ້ ຍັງໄດ້ແນະນໍາໃນການພັດທະນາວຽກງານບຸກຄະລາກອນ, ການກໍານົດແຜນກໍ່ສ້າງພະນັກງານນໍາພາ-ຄຸ້ມຄອງ ໃນຂະແໜງການເງິນ ຍົກລະດັບຄວາມຮູ້ຄວາມສາມາດຂອງພະນັກງານ ໃຫ້ມີຄຸນນະພາບໃນການເຮັດໜ້າທີ່ ບົນພື້ນຖານຕາມລະບຽບຫລັກການ ເພື່ອຮັບປະກັນການຄຸ້ມຄອງເກັບລາຍຮັບໃຫ້ຄົບຖ້ວນ ແລະ ໂປ່ງໃສ.

ທ່ານ ຄຳສິງ ໄຊສິດທິເດດ ຫົວໜ້າພະແນກການເງິນແຂວງຄໍາມ່ວນ ໄດ້ລາຍງານໃຫ້ຊາບວ່າ: 8 ເດືອນຕົ້ນປີ 2022, ແຂວງຄຳມ່ວນ ສາມາດເກັບລາຍຮັບເຂົ້າງົບປະມານໄດ້ 615,72 ຕື້ກີບ ເທົ່າກັບ 65,75% ຂອງແຜນການປີ;

ໃນນີ້, ລາຍຮັບສູນກາງ 308,64 ຕື້ກີບ ເທົ່າກັບ 50,55% ຂອງແຜນການປີ, ລາຍຮັບທ້ອງຖິ່ນ ປະຕິບັດໄດ້ 307,07 ຕື້ກີບ, ເທົ່າກັບ 94,22% ຂອງແຜນການປີ. ສ່ວນດ້ານລາຍຈ່າຍປະຕິບັດໄດ້ 415,86 ຕື້ກີບ, ເທົ່າກັບ 68,96% ຂອງແຜນການປີ; ສາມາດຈ່າຍເງິນເດຶອນໃຫ້ພະ ນັກງານ-ລັດຖະກອນຂັ້ນແຂວງ ແລະ ຂັ້ນເມຶອງໄດ້ເປັນປົກກະຕິ, ສ່ວນລາຍຈ່າຍບໍລິຫານ ແລະ ຮ່ວງ ອື່ນໆ ກໍສືບຕໍ່ແກ້ໄຂຕາມເງື່ອນໄຂຄວາມຈໍາເປັນ ແລະ ຄວາມສາມາດໃນການສະໜອງ ເຮັດໃຫ້ການປະ ຕິບັດລາຍຈ່າຍ ມີຄວາມສະຫງົບປັດສະຈາກຫາງສຽງສັງຄົມ. ສຳລັບການຈັດຕັ້ງປະຕິບັດ ແຜນງົບປະມານແຫ່ງລັດປະຈຳປີ 2022 ໂດຍສະເພາະໃນໄລຍະ 8 ເດືອນ ແລະ ແຜນການ 4 ເດຶອນທ້າຍປີ 2022, ແຂວງຄຳມ່ວນ ໄດ້ຮັບຜົນກະທົບຈາກອັດຕາເງິນເຟີ້ສະ ເລ່ຍ 12%, ເພີ່ມຂຶ້ນກວ່າປີຜ່ານມາ, ການອ່ອນຄ່າຂອງເງິນກີບທຽບກັບໂດລາ ແລະ ເງິນບາດ ແມ່ນສ່ວນໜຶ່ງທີ່ສົ່ງຜົນເຮັດໃຫ້ບັນດາລາຄາສິນຄ້າ ແລະ ການບໍລິການອື່ນໆ ເພີ່ມຂຶ້ນຫລາຍ.

ສຳລັບດ້ານການຈັດຕັ້ງປະຕິບັດວຽກງານວາລະແຫ່ງຊາດ ກ່ຽວກັບການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ໄດ້ກໍານົດໜ້າວຽກລະອຽດ 18 ໜ້າວຽກ, ປະຕິບັດສຳເລັດແລ້ວ 9 ໜ້າວຽກ ໂດຍໄດ້ຈັດບັນດາໜ້າວຽກ ເຂົ້າແຕ່ລະຂະແໜງຢ່າງເປັນຮູບປະທຳ

ແຫຼ່ງຂ່າວ: ຂປລ