ກອງປະຊຸມວິຊາການໂພຊະນາການແຫ່ງຊາດ, ຈັດຂຶ້ນຕອນເຊົ້າ ວັນທີ 11 ກຸມພາ 2021 ທີ່ ຫໍປະຊຸມແຫ່ງຊາດ ນະຄອນຫລວງວຽງຈັນ ພາຍໃຕ້ການເປັນປະທານຂອງທ່ານ ຮສ.ດຣ. ພູທອນ ເມືອງປາກ, ຮອງລັດຖະມົນຕີ ກະຊວງສາທາລະນະສຸກ ຫົວໜ້າກອງເລຂາ ຄະນະກໍາມະການໂພຊະນາການແຫ່ງຊາດ ມີ ທ່ານ ດຣ.ພອນປະເສີດ ອຸນາພົມ ຫົວໜ້າກົມອະນາໄມ ແລະ ສົ່ງເສີມສຸຂະພາບ, ຄະນະກົມ, ຄະນະສູນ, ຄະນະພະແນກກະສິກໍາ ແລະປ່າໄມ້, ສຶກສາທິການ ແລະກິລາ, ແຜນການແລະການລົງທຶນ ແລະພະແນກສາທາລະນະສຸກແຂວງ ທົ່ວປະເທດເຂົ້າຮ່ວມ 300ຄົນ.

ທ່ານ ຮສ.ດຣ. ພູທອນ ເມືອງປາກ, ຮອງລັດຖະມົນຕີ ກະຊວງສາທາລະນະສຸກ ກ່າວໃນພິທີວ່າ: ພັກ ແລະ ລັດຖະບານ ຂອງ ສປປ ລາວ ໄດ້ສຸມໃສ່ ສືບຕໍ່ແກ້ໄຂບັນຫາການຂາດສານອາຫານທຸກຮູບແບບຂອງປະຊາຊົນລາວເວົ້າລວມ, ເວົ້າສະເພາະໃນເດັກອາຍຸລຸ່ມ 5 ປີ ລວມມີ ຫລຸດຜ່ອນການຂາດສານອາຫານຊໍາເຮື້ອ (ລວງສູງຫລຸດມາດຕະຖານ ຫລື ເດັກເຕ້ຍ), ເຊິ່ງມີຜົນສະແດງອອກຕາມຜົນການສໍາຫລວດດັດຊະນີໝາຍສັງຄົມລາວປີ 2017 ເຫັນວ່າມີການປັບປຸງດີຂື້ນ ຄືຕົວຊີ້ວັດທີ່ທ້າທ້າຍ ເຊັ່ນ ອັດຕາການຂາດສານອາຫານຊໍາເຮື້ອ ໄດ້ຫຼຸດລົງຈາກ 44% ໃນປີ 2012 (LSIS 1) ມາເປັນ 33% ໃນປີ 2017 (LSIS 2) ແລະ ເປັນ 24.3% ໃນປີ 2020 (DHIS2); ອັດຕານໍ້າໜັກຫລຸດມາດຕະຖານຫລຸດລົງຈາກ 25.5% ໃນປີ 2012 ມາເປັນ 21% ປີ 2017 ແລະ ເປັນ 18.9% ໃນປີ 2020 (DHIS2). ອັດຕາສ່ວນຂອງເດັກນ້ອຍທີ່ໄດ້ຮັບການລ້ຽງດ້ວຍນົມແມ່ພຽງຢ່າງດຽວ ໄດ້ເພີ່ມຂຶ້ນຈາກ 40% ໃນປີ 2012 ເປັນ 45% ໃນປີ 2017; ແລະ ຍັງມີຫຼາຍຕົວຊີ້ບອກດ້ານສາທາລະນະສຸກອີກຫຼາຍອັນທີ່ໄດ້ຮັບການປັບປຸງດີຂື້ນ.

ແຕ່ພວກເຮົາຍັງມີສິ່ງທ້າທາຍອື່ນໆ ທີ່ຕ້ອງເອົາໃຈໃສ່ເພີ້ມຕື່ມ ຈະຕ້ອງໄດ້ສືບຕໍ່ສູ້ຊົນຮັບມືຕໍ່ພາວະຂາດສານອາຫານອີກ. ປະເທດຂອງພວກເຮົາປະຈຸບັນ ຍັງມີ ເດັກນ້ອຍ 1 ໃນ 2 ຄົນເປັນເລືອດຈາງ; ມີ 1 ໃນ 2 ຂອງແມ່ຍິງໄວຈະເລີນພັນ ມີພາວະເລືອດຈາງ; ເດັກນ້ອຍປະມານ 75.000 ຄົນ ຍັງຂາດສານອາຫານກະທັນຫັນ (ຈ່ອຍຜອມ) ໃນແຕ່ລະປີ; ເດັກນ້ອຍ 1 ໃນ 3 ຄົນ ຍັງເຕັ້ຍເກີນໄປ ທຽບກັບອາຍຸຂອງເຂົາເຈົ້າ; ນອກນັ້ນ ພັດມີການເພີ່ມຂື້ນຂອງເດັກນ້ອຍທີ່ມີຄວາມອ້ວນ ຈາກ 2.0% ໃນປີ 2012 ມາເປັນ 3.5% ໃນ 2017 (LSIS 2). ພວກເຮົາຈໍາເປັນຕ້ອງສືບຕໍ່ເຮັດວຽກຮ່ວມກັນຢ່າງຕໍ່ເນື່ອງ ແລະໃກ້ຊິດ ເພື່ອເຮັດໃຫ້ອັດຕາດັ່ງກ່າວຫຼຸດລົງຕໍ່ໄປ ໃຫ້ຢູ່ໃນລະດັບທີ່ຍອມຮັບໄດ້.

ກອງປະຊຸມຄັ້ງນີ້ ແມ່ນກາລະໂອກາດອັນດີໃຫ້ແກ່ພວກເຮົາໄດ້ມາແລກປ່ຽນຖອດຖອນບົດຮຽນໃນການຈັດຕັ້ງປະຕິບັດ ບັນດາແຜນງານ ແລະໂຄງການໂພຊະນາການຕ່າງໆ ທີ່ໄດ້ຮັບຜົນສໍາເລັດ ລວມທັງການປະຕິບັດທີ່ດີທີ່ສຸດທີ່ສາມາດເປັນຕົວແບບໃຫ້ແກ່ພວກເຮົາໄດ້ເອົາໄປນໍາໃຊ້, ເສີມຂະຫຍາຍ ແລະ ປັບປຸງວຽກງານໃຫ້ດີຂື້ນກວ່າເກົ່າ. ຊຶ່ງໄດ້ມີການສົນທະນາແລກປ່ຽນບົດຮຽນໃນຫລາຍຫົວຂໍ້ ເຊັ່ນ ການເຮັດໂຄງການໂພຊະນາການ ແບບເຊື່ອມສານກັບວຽກງານກະສິກໍາ, ການບໍລິການສຸຂະພາບແມ່ແລະເດັກ, ການສຶກສາ, ການສະໜອງນໍ້າສະອາດ, ວິດຖ່າຍ ແລະ ສຸຂະອະນາໄມສິ່ງແວດລ້ອມ, ການຕອບໂຕ້ໄພພິບັດ, ການຄຸ້ມຄອງການຂາດສານອາຫານກະທັນຫັນແບບເຊື່ອມສານ; ການປະສານງານ ແລະ ການມີສ່ວນຮ່ວມຫລາຍຂະແໜງການ, ການຮ່ວມມືລະຫວ່າງພາກລັດ-ເອກກະຊົນ ແລະ ການມີສ່ວນຮ່ວມຂອງຊຸມຊົນ, ການສື່ສານເພື່ອປ່ຽນແປງພຶດຕິກໍາໃນສັງຄົມດ້ານໂພຊະນາການ ແລະ ອື່ນໆ. ຜົນສໍາເລັດອັນພົ້ນເດັ່ນ, ສິ່ງທ້າຍທາຍ, ບົດຮຽນທີ່ຖອດຖອນໄດ້, ວິທີການ ແລະ ກົນໄກການປະສານງານ, ທິດທາງໃນຕໍ່ໜ້າ ໂດຍສະເພາະຄວາມຍືນຍົງຂອງໂຄງການ ຈະໄດ້ສົນທະນາຄົ້ນຄວ້າ ແລະ ແລກປ່ຽນປະສົບການນໍາກັນ.

ໂອກາດນີ້ ທ່ານ ຮສ.ດຣ. ພູທອນ ເມືອງປາກ, ຮອງລັດຖະມົນຕີ ກະຊວງສາທາລະນະສຸກ ໄດ້ສະແດງຄວາມຂອບໃຈ ຕໍ່ບັນດາ ການນໍາ ແລະ ທີມງານຂອງກະຊວງສຶກສາ ທິການ ແລະກິລາ, ກະສິກໍາ ແລະປ່າໄມ້, ແຜນການ ແລະການລົງທຶນ ແລະ ກະຊວງການເງິນ ລວມທັງການນໍາພະແນກຂອງ 4 ຂະແໜງການດັ່ງກ່າວໃນຂັ້ນແຂວງ, ບັນດາອົງການສາກົນຕ່າງໆທຸກຂັ້ນ, ອົງການຈັດຕັ້ງມະຫາຊົນ ແລະ ອົງການຈັດຕັ້ງທາງສັງຄົມ ທີ່ໄດ້ມີການຮ່ວມມືອັນດີໃນການປັບປຸງວຽກງານໂພຊະນາການ ໂດຍເຮັດວຽກຮ່ວມກັນ ແບບເຊື່ອມສານ ແລະ ຢ່າງໃກ້ຊິດ. ທ່ານໄດ້ສະແດງຄວາມຂອບໃຈເປັນຢ່າງສູງ ຕໍ່ອົງການອຸຍນິເຊັບ, ສະຫະພາບເອີຣົບ ແລະ ຄູ່ຮ່ວມງານອື່ນໆ ທີ່ໃຫ້ການຊ່ວຍເຫລືອດ້ານງົບປະມານ ແລະ ວິຊາການ ແກ່ ສປປລາວ ຕະຫລອດມາ ໃນການປັບປຸງວຽກງານໂພຊະນາການໃຫ້ດີຂື້ນ ເພື່ອສູ້ຊົນບັນລຸເປົ້າໝາຍການພັດທະນາແບບຍືນຍົງ(SDG 2) ລວມທັງການສະໜັບສະໜັບສະໜູນໃນການຈັດກອງປະຊຸມວິຊາການໃນຄັ້ງນີ້ດ້ວຍ.

Lao National Radio

ວັນທີ 9 ກຸມພາຜ່ານມານີ້ ທ່ານ ກິແກ້ວ ໄຂຄໍາພິທູນ ກຳມະການກົມການເມືອງສູນກາງພັກ ລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ກຳມະການຄະນະກຳມະ ການເລືອກຕັ້ງລະດັບຊາດ ກຳມະການອະນຸກຳມະການໂຄສະນາ ແລະ ປຸກລະດົມຂະບວນການ ພ້ອມຄະນະໄດ້ລົງຕິດຕາມການໂຄສະນາ, ປຸກລະດົມຂະບວນການໃນບັ້ນເລືອກຕັ້ງສະມາຊິກສະພາແຫ່ງ ຊາດ ຊຸດທີ IX ແລະ ສະມາຊິກສະພາປະຊາຊົນແຂວງ ຊຸດທີ II ຢູ່ແຂວງຄຳມ່ວນ ໂດຍມີທ່ານ ວົງເພັດ ຈິດປັນຍາ ຮອງເລຂາພັກແຂວງຄຳມ່ວນ, ທ່ານ ສົມໃຈ ເພັດສີນວນ ປະທານສະພາປະຊາຊົນແຂວງ ພ້ອມດ້ວຍບັນດາທ່ານໃນອະນຸກຳມະການໂຄສະນາ, ປຸກລະດົມຂະບວນການ ກຳມະການເລືອກຕັ້ງຂອງ ແຂວງເຂົ້າຮ່ວມ.

ທ່ານ ວົງເພັດ ຈິດປັນຍາ ໄດ້ລາຍງານສະພາບໂດຍລວມ ຂອງແຂວງຄຳມ່ວນໃຫ້ແກ່ຄະນະຂອງ ທ່ານລັດຖະມົນຕີກະຊວງ ຖວທ ໄດ້ຮັບຊາບ. ຈາກນັ້ນ ທ່ານ ສົມໃຈ ເພັດສີນວນ ກໍໄດ້ລາຍງານໂດຍ ຫຍໍ້ກ່ຽວກັບສະພາບການກະກຽມໃຫ້ແກ່ການເລືອກຕັ້ງ ສສຊ ຊຸດທີ IX ແລະ ສສຂ ຊຸດທີ II ຊຶ່ງ ພາຍຫຼັງທີ່ໄດ້ຮັບຄຳແນະນຳຂອງຄະນະກຳມະການເລືອກຕັ້ງລະດັບຊາດ ກໍໄດ້ຄົ້ນຄວ້າປະກອບບຸກ ຄະລາກອນ ພ້ອມທັງອອກຂໍ້ຕົກລົງແຕ່ງຕັ້ງອະນຸກຳມະການຕ່າງໆ ແລະ ອອກແຜນດຳເນີນງານຂອງ ຄະນະກຳມະການເລືອກຕັ້ງຂັ້ນແຂວງ ເພື່ອດຳເນີນການເລືອກຕັ້ງ ແລະ ໄດ້ລົງເກັບກຳສະຖິຕິຈຳນວນ ຜູ້ມີສິດປ່ອນບັດ ຊຶ່ງໃນທົ່ວແຂວງມີຈຳນວນຜູ້ມີສິດປ່ອນບັດເລືອກຕັ້ງທັງໝົດ 230.311 ຄົນ ຍິງ 119.746 ຄົນ ແລະ ໄດ້ກໍານົດຈຸດປ່ອນບັດເລືອກຕັ້ງທັງໝົດ 369 ຈຸດ.

ໂອກາດດຽວກັນ ທ່ານ ກິແກ້ວ ໄຂຄໍາພິທູນ ກໍໄດ້ມີຄຳເຫັນ ເພື່ອໃຫ້ປະຕິບັດໜ້າທີ່ການເລືອກຕັ້ງ ຄັ້ງນີ້ໄດ້ຮັບຜົນສຳເລັດຕາມຄາດໝາຍຕ້ອງຮູ້ເຖິງເງື່ອນໄຂທີ່ອຳນວຍຄວາມສະດວກກໍຄືມີແນວທາງການ ເມືອງທີ່ຖືກຕ້ອງ, ມີນິຕິກຳ, ລະບຽບຫຼັກການ, ມີການນຳພາ-ຄຸ້ມຄອງ ແລະ ມີຈຸດໝາຍໃນການເລືອກ ຕັ້ງລວມເຖິງປະສົບການທີ່ເປັນພື້ນຖານອຳນວຍຄວາມສະດວກໃຫ້ແກ່ການເລືອກຕັ້ງຄັ້ງນີ້ ແຕ່ຄຽງຄູ່ກັບຂໍ້ ສະດວກນັ້ນ ກໍຍັງມີດ້ານອຸປະສັກ ແລະ ສິ່ງທ້າທາຍຫຼາຍດ້ານທີ່ຈະຕ້ອງໄດ້ພ້ອມພາກັນເອົາໃຈໃສ່ ຢ່າງເປັນເຈົ້າການ ເປັນຕົ້ນແມ່ນການປະຕິບັດຕໍ່ມາດຕະການແຜ່ລະບາດຂອງພະຍາດໂຄວິດ-19 ລວມ ເຖິງບັນຫາປະກົດການຫຍໍ້ທໍ້ໃນສັງຄົມ ແລະ ກຸ່ມຄົນທີ່ບໍ່ດີ ທີ່ມີກົນອຸບາຍຫວັງມ້າງເພທຳລາຍ ພ້ອມນັ້ນ ກໍຕ້ອງກຳແໜ້ນຕໍ່ທິດຊີ້ນຳຂອງພັກກ່ຽວກັບການເລືອກຕັ້ງ ແລະ ເອົາໃຈໃສ່ໂຄສະນາ, ຊີ້ແຈງໃຫ້ປະ ຊາຊົນໄດ້ເຂົ້າໃຈຕໍ່ເຫດການສຳຄັນດັ່ງກ່າວ ພ້ອມທັງປຸກລະດົມໃຫ້ປະຊາຊົນໄດ້ເປັນເຈົ້າການເຂົ້າຮ່ວມໃນ ຂະບວນການເລືອກຕັ້ງ ເພື່ອຮັບປະກັນຕາມ 3 ຄາດໝາຍໃຫຍ່ຄື: ຮັບປະກັນໃຫ້ຜູ້ມີສິດໄດ້ຕື່ນຕົວ ແລະ ສະໝັກໃຈໄປປ່ອນບັດເລືອກຕັ້ງຢ່າງຄົບຖ້ວນ 100%, ຮັບປະກັນບໍ່ໃຫ້ມີບັດເສຍ ຫຼື ບັດຂີດບໍ່ຖືກຕ້ອງ 100% ແລະ ຮັບປະກັນດ້ານຄວາມສະຫງົບຄວາມປອດໄພໃນບັ້ນເລືອກຕັ້ງ 100%.

ໃນໂອກາດນີ້ ທາງຄະນະຍັງໄດ້ເດີນທາງໄປທີ່ເມືອງໜອງບົກ ແຂວງຄຳມ່ວນ ເພື່ອຕິດຕາມການ ລາຍງານຄວາມພ້ອມຂອງຄະນະກຳມະການໃນການຮັບໃຊ້ບັ້ນເລືອກຕັ້ງ ແລະ ລົງພົບປະໂອ້ລົມປຸກລະ ດົມໃຫ້ປະຊາຊົນບ້ານສອງເໝືອງໃຕ້ ໜ່ວຍປ່ອນບັດເລືອກຕັ້ງທີ 17 ມີສະຕິຕື່ນຕົວໃນການມາເລືອກ ຕັ້ງໃນວັນທີ 21 ກຸມພານີ້ ຢ່າງຕັ້ງໜ້າ.

ຂ່າວ-ພາບ: ກົມສືມວນຊົນ

ໃນລະຫວ່າງວັນທີ 2-6 ກຸມພາ 2021, ທ່ານ ຈັນສີ ໂພສີຄຳ ຮອງປະທານຄະນະກຳມະການເລືອກຕັ້ງລະດັບຊາດ ພ້ອມດ້ວຍຄະນະ ໄດ້ເຄື່ອນໄຫວເຮັດວຽກຢູ່ 4 ແຂວງພາກເໜືອ, ຜົ້ງສາລີ, ຫຼວງນ້ຳທາ, ອຸດົມໄຊ ແລະ ບໍ່ແກ້ວ ເພື່ອຕິດຕາມ-ຊຸກຍູ້ ການກະກຽມ ແລະ ດຳເນີນການເລືອກຕັ້ງສະມາຊິກສະພາແຫ່ງຊາດ (ສສຊ) ຊຸດທີ IX ແລະ ສະພາປະຊາຊົນແຂວງ (ສສຂ) ຊຸດທີ II. ໃຫ້ການຕ້ອນຮັບຄະນະໃນການຢ້ຽມຢາມເຮັດວຽກຄັ້ງນີ້ ມີປະທານຄະນະກຳມະການເລືອກຕັ້ງຂັ້ນແຂວງ ພ້ອມດ້ວຍຄະນະ ເຊິ່ງຢູ່ແຂວງຜົ້ງສາລີ ມີທ່ານ ຄຳຜອຍ ວັນນະສານ ກຳມະການສູນກາງພັກ, ເລຂາພັກແຂວງ, ປະທານຄະນະກຳມະການເລືອກຕັ້ງແຂວງຜົ້ງສາລີ; ຢູ່ແຂວງຫຼວງນໍ້າທາ ມີທ່ານ ຄຳໄຫຼ ສີປະເສີດ ກຳມະການສູນກາງພັກ, ເລຂາພັກແຂວງ, ປະທານຄະນະກຳມະການເລືອກຕັ້ງແຂວງຫຼວງນໍ້າທາ; ແຂວງອຸດົມໄຊ ມີທ່ານ ບຸນຄົງ ຫຼ້າຈຽມພອນ ກຳມະການສຳຮອງສູນກາງພັກ, ຮັກສາການເລຂາພັກແຂວງ, ປະທານຄະນະກຳມະການເລືອກຕັ້ງແຂວງອຸດົມໄຊ ແລະ ຢູ່ແຂວງບໍ່ແກ້ວ ໃຫ້ການຕ້ອນຮັບໂດຍທ່ານ ປອ ບົວຄົງ ນາມມະວົງ ກຳມະການສູນກາງພັກ, ເລຂາພັກແຂວງ, ປະທານຄະນະກຳມະການເລືອກຕັ້ງແຂວງບໍ່ແກ້ວ.

ຢູ່ແຕ່ລະແຂວງ, ທ່ານ ຈັນສີ ໂພສີຄຳ ພ້ອມດ້ວຍຄະນະໄດ້ເຮັດວຽກຮ່ວມກັບຄະນະກຳມະການເລືອກຕັ້ງຂັ້ນແຂວງ, ຂັ້ນເມືອງ ແລະ ໜ່ວຍເລືອກຕັ້ງຂັ້ນບ້ານ; ຢູ່ແຕ່ລະບ່ອນ ຄະນະຮັບຜິດຊອບໄດ້ລາຍງານສະພາບການກະກຽມຄວາມພ້ອມຮອບດ້ານໃນບັ້ນເລືອກຕັ້ງ ສສຊ ແລະ ສສຂ ຄັ້ງນີ້ ເຊິ່ງຢູ່ແຂວງຜົ້ງສາລີ ມີຜູ້ອອກຮັບສະໝັກເລືອກຕັ້ງເປັນ ສສຊ ຊຸດທີ IX ຈຳນວນ 9 ທ່ານ ເລືອກເອົາ 6 ທ່ານ, ຜູ້ສະໝັກ ສສຂ ຊຸດທີ II ມີ 38 ທ່ານ ເລືອກເອົາ 24 ທ່ານ, ຈໍານວນຜູ້ມີສິດປ່ອນບັດເລືອກຕັ້ງທີມີອາຍຸ 18 ປີ ຂຶ້ນໄປ ໃນທົ່ວແຂວງຜົ້ງສາລີ ມີທັງໝົດ 115.666 ຄົນ, ຍິງ 56.889 ຄົນ ແລະ ໄດ້ກໍານົດຈຸດເລືອກຕັ້ງທັງໝົດມີ 241 ໜ່ວຍ. ແຂວງຫຼວງນ້ຳທາ ມີຜູ້ສະໝັກຮັບເລືອກຕັ້ງເປັນ ສສຊ ຊຸດທີ IX ຈຳນວນ 9 ທ່ານ ເລືອກເອົາ 6 ທ່ານ, ຜູ້ສະໝັກ ສສຂ ຊຸດທີ II ມີ 31 ທ່ານ ເລືອກເອົາ 21 ທ່ານ, ຈໍານວນຜູ້ມີສິດປ່ອນບັດເລືອກຕັ້ງທົ່ວແຂວງຫຼວງນ້ຳທາ ມີ 118.870 ຄົນ, ຍິງ 59.310 ຄົນ ແລະ ມີໜ່ວຍເລືອກຕັ້ງທັງໝົດ 294 ໜ່ວຍ. ແຂວງອຸດົມໄຊ ມີຜູ້ອອກສະໝັກຮັບເລືອກຕັ້ງເປັນ ສສຊ ຊຸດທີ IX ຈຳນວນ 10 ທ່ານ ເລືອກເອົາ 7 ທ່ານ, ຜູ້ສະໝັກ ສສຂ ຊຸດທີ II ມີ 39 ທ່ານ ເລືອກເອົາ 25 ທ່ານ, ຈໍານວນຜູ້ມີສິດປ່ອນບັດເລືອກຕັ້ງທົ່ວແຂວງອຸດົມໄຊ ມີ 214.896 ຄົນ, ຍິງ 104.547 ຄົນ, ມີໜ່ວຍເລືອກຕັ້ງທັງໝົດ 450 ໜ່ວຍ. ແຂວງບໍ່ແກ້ວ ມີຜູ້ອອກສະໝັກຮັບເລືອກຕັ້ງເປັນ ສສຊ ຊຸດທີ IX ຈຳນວນ 9 ທ່ານ ເລືອກເອົາ 6 ທ່ານ, ຜູ້ສະໝັກ ສສຂ ຊຸດທີ II ມີ 31 ທ່ານ ເລືອກເອົາ 21 ທ່ານ, ຈໍານວນຜູ້ມີສິດປ່ອນບັດເລືອກຕັ້ງທົ່ວແຂວງບໍ່ແກ້ວ ມີ 118.099 ຄົນ, ຍິງ 53.311 ຄົນ ແລະ ມີໜ່ວຍເລືອກຕັ້ງທັງໝົດ 189 ໜ່ວຍ.

ຢູ່ແຕ່ລະຈຸດທີ່ໄດ້ລົງເຄື່ອນໄຫວຢ້ຽມຢາມ-ເຮັດວຽກ, ທ່ານ ຈັນສີ ໂພສີຄຳ ໄດ້ມີຄຳເຫັນໂອ້ລົມອະທິບາຍກ່ຽວກັບຄວາມໝາຍຄວາມສຳຄັນໃນການເລືອກຕັ້ງ ສສຊ ແລະ ສສຂ; ການເລືອກຕັ້ງດັ່ງກ່າວເປັນການປັບປຸງການຈັດຕັ້ງເບື້ອງລັດ ແລະ ເປັນການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຊິ່ງເປັນພັນທະ ແລະ ກຽດສັກສີຂອງພົນລະເມືອງລາວ ທີ່ຈະໄດ້ໃຊ້ສິດປະຊາທິປະໄຕຂອງຕົນ ປ່ອນບັດເລືອກຕັ້ງເອົາຜູ້ແທນຂອງຕົນເຂົ້າໃນອົງການນິຕິບັນຍັດ (ສະພາ) ເຊິ່ງເປັນອົງການຕົວແທນສິດ ແລະ ຜົນປະໂຫຍດລວມຂອງປະຊາຊົນລາວບັນດາເຜົ່າ, ເປັນອົງການທີ່ໄດ້ຮັບມອບໝາຍສິດອຳນາດຈາກປະຊາຊົນ ແລະ ສະມາຊິກສະພາກໍ່ເປັນຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນ, ໄດ້ຮັບການເລືອກຕັ້ງຈາກປະຊາຊົນ ແລະ ປະຊາຊົນມີສິດກວດກາສະມາຊິກສະພາ ຫຼື ຜູ້ແທນຂອງຕົນຕະລອດໄລຍະການປະຕິບັດໜ້າທີ່ວຽກງານ. ກອງປະຊຸມຄັ້ງປະຖົມມະເລີກຂອງສະພາແຫ່ງຊາດແຕ່ລະຊຸດ ຈະໄດ້ເລືອກຕັ້ງເອົາປະທານປະເທດ, ຮອງປະທານປະເທດ, ເລືອກຕັ້ງເອົານາຍົກລັດຖະມົນຕີ, ປະທານສະພາ, ປະທານ ແລະ ຫົວໜ້າ ອົງການຕຸລາການ (ປະທານສານ ແລະ ຫົວໜ້າອົງການໄອຍະການປະຊາຊົນສູງສຸດ), ພິຈາລະນາ-ຮັບຮອງເອົາຄະນະລັດຖະບານ, ແຜນພັດທະນາເສດຖະກິດ-ສັງຄົມແຫ່ງຊາດ, ຕົກລົງ ແລະ ພິຈາລະນາຮັບຮອງເອົາບັນຫາສຳຄັນຕ່າງໆຂອງຊາດ ຕາມພາລະບົດບາດຂອງສະພາແຫ່ງຊາດທີ່ໄດ້ກຳນົດໄວ້ໃນກົດໝາຍ… ໃນກອງປະຊຸມຄັ້ງປະຖົມມະເລີກຂອງສະພາປະຊາຊົນແຂວງກໍ່ເຊັ່ນດຽວກັນ ຈະໄດ້ເລືອກຕັ້ງເອົາບຸກຄະລາກອນການນຳຂອງແຂວງ ເຊັ່ນ: ເຈົ້າແຂວງ, ຮອງເຈົ້າແຂວງ, ປະທານ ແລະ ຮອງປະທານສະພາປະຊາຊົນແຂວງ, ປະທານສານປະຊາຊົນແຂວງ, ຫົວໜ້າໄອຍະການປະຊາຊົນແຂວງ, ພິຈາລະນາ ຮັບຮອງເອົາແຜນພັດທະນາເສດຖະກິດ-ສັງຄົມຂອງແຂວງ ແລະ ບັນຫາສຳຄັນຕ່າງໆຂອງແຂວງ ຕາມພາລະບົດບາດຂອງສະພາປະຊາຊົນແຂວງ.

ບັນດາການນຳທີ່ຖືກເລືອກຕັ້ງໃນສະພາ ຈະເປັນຜູ້ນຳເອົາແນວທາງນະໂຍບາຍຂອງພັກ ແລະ ແຜນພັດທະນາເສດຖະກິດ-ສັງຄົມຂອງລັດ ມານຳພາຈັດຕັ້ງຜັນຂະຫຍາຍສູ່ການພັດທະນາປະເທດຊາດ ແລະ ທ້ອງຖິ່ນຮາກຖານ ຕາມຄວາມມຸ່ງມາດປາດຖະໜາຂອງປະຊາຊົນພົນລະເມືອງລາວ. ດັ່ງນັ້ນ ຈິ່ງເວົ້າໄດ້ວ່າ ການໄປໃຊ້ສິດປະຊາທິປະໄຕປ່ອນບັດເລືອກຕັ້ງ ສສຊ ແລະ ສສຂ ແມ່ນສິດ, ພັນທະ ແລະ ກຽດສັກສີຂອງພົນລະເມືອງລາວຢ່າງແທ້ຈິງ, ການເລືອກຕັ້ງ ຕ້ອງຮັບປະກັນໃຫ້ໄດ້ ສາມຮ້ອຍສ່ວນຮ້ອຍ (ຮັບປະກັນຕື່ນຕົວມາໃຊ້ສິດ 100%, ຮັບປະກັນບໍ່ໃຫ້ບັດຕາຍ 100% ແລະ ຮັບປະກັນຄວາມສະຫງົບປອດໄພ 100%).

ຂ່າວ ແລະ ພາບ: ນັກຂ່າວກໍ່ສ້າງພັກ

ທ່ານ ປອ ບຸນຍະເດດ ທອງສະຫວັນ ກຳມະການພັກແຂວງ ຫົວໜ້າພະແນກອຸດສາຫະກໍາ ແລະ ການຄ້າແຂວງ ຈຳປາສັກ ໄດ້ກ່າວວ່າ:ປີ 2020 ທົ່ວແຂວງຈຳປາສັກ ມີໂຮງງານອຸດສາຫະກໍາ ແລະ ຫັດຖະກຳທັງໝົດ 1.692 ແຫ່ງ ມູນຄ່າການລົງທຶນທັງໝົດ 2 ພັນຕື້ 700 ກວ່າລ້ານກີບ, ມີຈຳນວນແຮງງານທັງໝົດ 7,399 ຄົນ. ແຮງງານຍິງ 2,500 ກວ່າຄົນ, ເຊິ່ງໃນຈໍານວນໂຮງງານ 1,692 ແຫ່ງນັ້ນ ມີໂຮງງານຂະໜາດໃຫຍ່ 56 ແຫ່ງ ມູນຄ່າລົງທຶນ 1,841 ຕື້ກວ່າກີບ, ໂຮງງານຂະໜາດກາງ 63 ແຫ່ງ ມູນຄ່າການລົງທຶນ 435 ຕື້ 400 ກວ່າລ້ານກີບ, ໂຮງງານຂະໜາດນ້ອຍ 1,257 ແຫ່ງ ມູນຄ່າການລົງທຶນ 641 ຕື້ 400 ກວ່າລ້ານກີບ. ແລະ ອຸດສາຫະກໍາແບບຄອບບຄົວ 316 ແຫ່ງ ມູນຄ່າການລົງທຶນ 43 ຕຶື້ 400 ກວ່າລ້ານກີບ.

ລວມຍອດການຜະລິດອຸດສາຫະກໍາ ແລະ ຫັດຖະກຳບັນລຸໄດ້ 4,285 ຕື້ 600 ກວ່າລ້ານກີບ. ທຽບໃສ່ໄລຍະດຽວກັນຫຼຸດລົງ8 ກວ່າສ່ວນຮ້ອຍ ທຽບໃສ່ແຜນປະຕິບັດໄດ້ 88 ກວ່າສ່ວນຮ້ອຍ, ສໍາລັບການຈໍາໜ່າຍຜະລິດຕະພັນອຸດສາຫະກໍາ ແລະ ຫັດຖະກໍາບັນລຸໄດ້ 5,849 ຕື້ 400 ກວ່າກີບ ທຽບໃສ່ໄລຍະດຽວກັນ ຫຼຸດລົງ 6 ກວ່າສ່ວນຮ້ອຍ, ທຽບໃສ່ແຜນປະຕິບັດໄດ້ 90 ກວ່າສ່ວນຮ້ອຍ.

ທ່ານ ປອ ບຸນຍະເດດ ທອງສະຫວັນ ຫົວໜ້າພະແນກອຸດສາຫະກໍາ ແລະ ການຄ້າແຂວງ ຈຳປາສັກຍັງກ່າວອີກວ່າ:ອຸດສາຫະກໍາທີ່ພົ້ນເດັ່ນຂອງແຂວງຈຳປາສັກປະກອບແມ່ນອຸດສາຫະກຳປຸງແຕ່ງອາຫານລວມມີ 24 ລາຍການ, ຍອດຜະລິດຕະພັນບັນລຸໄດ້ 2 ພັນກວ່າຕື້ກີບ, ອຸດສາຫະກຳແຮ່ທາດທີ່ບໍ່ແມ່ນໂລຫະ ລວມມີ 11 ລາຍການ ຍອດຜະລິດຕະພັນບັນລຸ 529 ຕື້ກີບ, ອຸດສາຫະກຳປຸງແຕ່ງເຄມີ ລວມມີ 10 ລາຍການ ຍອດຜະລິດຕະພັນບັນລຸໄດ້ 396 ຕື້ກີບ, ອຸດສາຫະກຳຮັບໃຊ້ຄົວເຮືອນ ລວມມີ 14 ລາຍການຍອດຜະລິດຕະພັນບັນລຸໄດ້ 142 ຕື້ 200 ກວ່າລ້ານກີບ.

ພາບແລະຂ່າວ: ປະພິດ ສີສົມບູນ

ງານບຸນກາເຟ ພູພຽງບໍລະເວນ ປະຈໍາປີ 2021 ໄດ້ຈັດຂຶ້ນ ຢູ່ສູນການຄ້າ ເຟຣັນຊິບມໍ ນະຄອນປາກເຊ ແຂວງຈໍາປາສັກ ໃນວັນທີ 8 ກຸມພາ 2021,ໂດຍການໃຫ້ກຽດເຂົ້າຮ່ວມຂອງ ທ່ານ ວິໄລວົງ ບຸດດາຄໍາ ເຈົ້າແຂວງໆຈໍາປາສັກ, ທ່ານ ນາງ ເຂັມມະນີ ພົນເສນາ ລັດຖະມົນຕີກະຊວງອຸດສາຫະກໍາ-ການຄ້າ, ທ່ານ ເພັດ ພົມພິທັກ ລັດຖະມົນຕີກະຊວງກະສິກໍາ-ປ່າໄມ້, ບັນດາທ່ານຕາງໜ້າອົງການຈັດຕັ້ງສາກົນ,ການນໍາພາຍໃນແຂວງ ຕ່າງແຂວງ,ພະແນກອຸດສາຫະກໍາ-ການຄ້າ ,ສະມາຄົມກາເຟລາວ ຕະຫຼອດຮອດຜູ້ປະກອບການ ແລະ ຫົວໜ່ວຍທຸລະກິດຕ່າງໆ ພາຍແຂວງ ແລະ ຕ່າງແຂວງ ເຂົ້າຮ່ວມ.

ທ່ານ ບຸນຍະເດດ ທອງສະຫວັນ ຫົວໜ້າພະແນກອຸດສະຫະກໍາ ແລະ ການຄ້າແຂວງໄດ້ກ່າວວ່າ:ງານບຸນກະເຟ ພູພຽງບໍລະເວນ ປະຈໍາປີ 2021 ຄັ້ງນີ້ ໄດ້ກະກຽມມາເປັນຢ່າງດີ ມີຫຼາຍກິດຈະກໍາເຊັ່ນ: ງານວາງສະແດງໃຫ້ແຂກ ແລະ ມວນຊົນໄດ້ທ່ຽວຊົມ,ແລກປ່ຽນຂໍ້ມູນຂ່າວສານ ແລະ ຊື້ – ຂາຍ ຜະລິດຕະພັນກາເຟ ທີ່ຕະຫຼາດສູນການຄ້າແຟນຊິບມໍ ມີຫົວໜ່ວຍທຸລະກິດເຂົ້າຮ່ວມທັງໝົດ 45 ຫົວໜ່ວຍ,ຜະລິດຕະພັນສິນຄ້າທີ່ນໍາມາຈໍາໜ່າຍຫຼັກແມ່ນກາເຟ ແລະ ອື່ນໆ ທີ່ເປັນສິນຄ້າຜະລິດຕະພັນອຸດສາຫະກໍາ,ຫັດຖະກໍາ ແລະ ກະສິກໍາ,ສິນຄ້າໜຶ່ງເມືອງ,ໜຶ່ງຜະລິດຕະພັນ ພາຍໃນແຂວງ ເຊິ່ງມີມູນຄ່າເຂົ້າມາຈໍາໜ່າຍປະມານ 3 ຕື້ 500 ລ້ານກີບ.

ຈາກນີ້ກໍມີກິດຈະກໍາເປີດໃຫ້ມີການທ່ຽວຊົມຮ້ານວາງສະແດງ ແລະ ຊິມກາເຟນັບແຕ່ວັນທີ 8-10 ກຸມພາ 2021, ມີພິທີສຳມະນາຫົວຂໍ້ຍົກສູງຄຸນຄ່າກາເຟລາວສູ່ຕະຫຼາດພາກພື້ນ ແລະ ສາກົນ, ມີການນໍາພາທັດສະນະສຶກສາເຂດການຜະລິດກາເຟ ທີ່ພູພຽງບໍລິເວນທີ່ ເມືອງປາກຊ່ອງ ແລະ ພິເສດກໍ ເປີດໃຫ້ມີການເຊັນບົດບັນທຶກ ແລະ ສັນຍາຮ່ວມມືກັນລະຫວ່າງພາກລັດເຊັ່ນ: ແຂວງຈໍາປາສັກ ກັບ ກະຊວງອຸດສະຫະກໍາ ແລະ ການຄ້າ,ແຂວງຈໍາປາສັກກັບກະຊວງກະສິກໍາ ແລະ ປ່າໄມ້ ແລະ ບັນດາບໍລິສັດຫົວໜ່ວຍທຸລະກິດດ້ວຍກັນ.ໃນນັ້ນມີ 2 ບົດບັນທຶກ ແລະ 6 ສັນຍາ. ຊຶ່ງສັນຍາລະຫວ່າງບໍລິສັດຜູ້ຜະລິດ ກັບ ບໍລິສັດຈໍາໜ່າຍສິນຄ້າທີ່ເຊັນກັນໃນຄັ້ງນີ້ມິມູນຄ່າທັງໝົດ 3 ຕື້ 200 ລ້ານກີບ. ທ່ານ ປອ ວິໄລວົງ ບຸດດາຄໍາ ເຈົ້າແຂວງຈໍາປາສັກ ກ່າວເປີດ ງານບຸນກາເຟ ພູພຽງບໍລະເວນ ປະຈໍາປີ 2021 ວ່າ: ການຈັດງານບຸນກາເຟພູພຽງບໍລະເວນຄັ້ງນີ້ ມີຈຸດປະສົງເພື່ອຊຸກຍູ້ການພັດທະນາເສດຖະກິດ-ສັງຄົມຂອງແຂວງ ກໍຄືການປະຕິບັດຍຸດທະສາດການພັດທະນາກາເຟລາວ,ການກະກຽມເງື່ອນໄຂໃຫ້ແກ່ການສະເຫຼີມສະວັນສ້າງຕັ້ງສະມາຄົມກາເຟລາວຄົບຮອບ 26 ປີ.

ທີ່ສໍາຄັນເປັນການຊຸກຍູ້ສົ່ງເສີມວຽກງານການຜະລິດກະສິກໍາເປັນສິນຄ້າ ໂດຍສະເພາະກາເຟໃຫ້ມີການຂະຫຍາຍຕົວທາງດ້ານປະລິມານ ແລະ ຄຸນນະພາບ,ຊອກຕະຫຼາດຈໍາໜ່າຍໃຫ້ກ້ວາງຂວາງ ແລະສ້າງລາຍຮັບໃຫ້ແກ່ຜູ້ປະກອບການກາເຟ ໃຫ້ຫຼາຍຂຶ້ນ ທັງເປັນການດຶງດູດສົ່ງເສີມດ້ານການທ່ອງທ່ຽວ ໂດຍຮູບແບບ ລາວທ່ຽວລາວ ທີ່ລັດຖະບານວາງອອກໃຫ້ປະກົດຜົນເປັນຈິງ .

ພາຍຫຼັງພີທີເປີດຂຶ້ນຢ່າງເປັນທາງການ ໄດ້ມີການເຊັນບົດບັນທຶກ ແລະ ສັນຍາການຊື້-ຂາຍກໍຄືການດໍາເນີນທຸລະກິດດ້ວຍກັນຂອງພາກສ່ວນບໍລິສັດ,ຫ້າງຮ້ານ,ຈາກນີ້ທ່ານເຈົ້າແຂວງ,ບັນດາລັດຖະມົນຕີ ແຂກ ແລະ ມວນຊົນທີ່ເຂົ້າຮ່ວມກໍໄດ້ຢ້ຽມຊົມຮ້ານວາງສະແດງ,ຈໍາໜ່າຍສິນຄ້າ,ຊິມ ແລະ ເລືອກຊື້ສິນຄ້າປະເພດກາເຟ ແລະອື່ນໆ ຢ່າງຫຼວງຫຼາຍ. ງານບຸນກາເຟ ພູພຽງບໍລະເວນ ປະຈໍາປີ 2021ຈະດໍາເນີນໄປຮອດວັນທີ 10 ກຸມພາ 2021 ຈິ່ງຈະສໍາເລັດ.

ຂ່າວ,ພາບ: ເກດສະໜາ ແກ້ວສຸວັນນະແສງ

ອີງຕາມຜົນສຳເລັດຂອງກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກ ແລະ ຜົນຂອງກອງປະຊຸມຄັ້ງປະຖົມມະລືກຂອງຄະນະບໍລິຫານງານສູນກາງພັກ ສະໄໝທີ XI, ໃນຕອນແລງ ວັນທີ 5 ກຸມພາ 2021 ທີ່ສະໂມສອນຄະນະກວດກາສູນກາງພັກ ໄດ້ມີພິທີມອບ – ຮັບ ໜ້າທີ່ລະຫວ່າງ ສະຫາຍ ບຸນທອງ ຈິດມະນີ ກຳມະການກົມການເມືອງສູນກາງພັກ ຜູ້ປະຈໍາການຄະນະເລຂາທິການສູນກາງພັກ ຮອງນາຍົກລັດຖະມົນຕີ ປະທານຄະນະກວດກາສູນກາງພັກ (ຜູ່ເກົ່າ) ປະທານອົງການກວດກາລັດຖະບານ ປະທານອົງການຕ້ານການສໍ້ລາດບັງຫຼວງຂັ້ນສູນກາງ ແລະ ສະຫາຍ ຄຳພັນ ພົມມະທັດ ກຳມະການກົມການເມືອງສູນກາງພັກ ຄະນະ ເລຂາທິການສູນກາງພັກ ປະທານຄະນະກວດກາສູນກາງພັກ (ຜູ່ໃໝ່) ໂດຍມີສະຫາຍ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກ ນາຍົກລັດຖະມົນຕີ ພ້ອມດ້ວຍບັນດາສະຫາຍແຂກຖືກເຊີນເຂົ້າຮ່ວມ.

ໂອກາດເຂົ້າຮ່ວມພິທີຄັ້ງ ນີ້, ສະຫາຍ ທອງລຸນ ສີສຸລິດ ໄດ້ມີຄໍາເຫັນໂອ້ລົມໃນຫຼາຍບັນ ຫາທີ່ສຳຄັນ ໂດຍສະເພາະຕໍ່ສະຫາຍປະທານຄະນະກວດ ກາສູນກາງພັກ (ຜູ່ເກົ່າ ແລະ ຜູ່ໃໝ່) ພ້ອມທັງໄດ້ສະເໜີບາງວຽກງານທີ່ຕ້ອງໄດ້ເອົາໃຈໃສ່ ທີ່ມີເນື້ອໃນສຳຄັນບາງຕອນດັ່ງນີ້: ພາຍໃຕ້ການນຳພາ-ຊີ້ນຳຂອງກົມການເມືອງ, ຄະນະເລຂາທິການສູນກາງພັກ ຕໍ່ວຽກງານກວດກາ ມີສະຫາຍ ບຸນທອງ ຈິດມະນີ ເປັນປະທານນັ້ນ, ໄດ້ມີການປ່ຽນແປງຫຼາຍດ້ານທີ່ຕັ້ງໜ້າ ໄປສູ່ຄຸນນະພາບໃໝ່. ອັນພົ້ນເດັ່ນ, ແມ່ນການສະເໜີໃຫ້ສູນກາງ ອອກທິດຊີ້ນໍາກ່ຽວກັບການແກ້ໄຂພະຍາດອາດຍາສິດ ແລະ ຕ້ານການສໍ້ລາດບັງຫຼວງ; ການປັບປຸງປົວ ແປງໃນທົ່ວພັກກໍຄືການແກ້ໄຂ ບັນຫາຫຍໍ້ທໍ້ທີ່ເກີດຂຶ້ນໃນກົງ ຈັກພັກ-ລັດ ແລະ ສະມາຊິກພັກ -ພະນັກງານ. ອັນນັ້ນແມ່ນຜົນ ສຳເລັດທີ່ໜ້າຊື່ນຊົມຂອງຄະ ນະກວດກາແຕ່ລະຂັ້ນ ເວົ້າລວມ, ເວົ້າ ສະເພາະແມ່ນຂອງຄະນະກວດກາສູນກາງພັກ ໂດຍແມ່ນສະຫາຍ ບຸນທອງ ຈິດມະນີ ເປັນຫຼັກແຫຼ່ງນຳພາ ຊຶ່ງແມ່ນຜົນງານ, ການປະ ກອບ ສ່ວນຂອງສະຫາຍຕໍ່ການຕິດ ຕາມກວດກາ, ການຈັດຕັ້ງປະ ຕິບັດມະຕິກອງປະຊຸມໃຫຍ່ ແລະ ກົດລະບຽບຂອງພັກໃນ 2 ສະໄໝທີ່ຜ່ານມາ. ຄວາມຮັບ ຜິດຊອບ ແລະ ຜົນງານການນຳພາ-ຊີ້ນຳຂອງສະຫາຍ ຜ່ານມານຳໄປສູ່ການປັບປຸງແບບແຜນນຳພາ, ແບບແຜນວິທີເຮັດວຽກ ຂອງພັກ ແລະ ໄດ້ເປັນການສ້າງບາດກ້າວ ທີ່ດີຂຶ້ນເຖິງການຍົກບົດບາດອິດທິພົນຂອງພັກເຮົາ.

ສຳລັບ ສະຫາຍ ຄຳພັນ ພົມມະທັດ ມາຮັບໜ້າທີ່ໃໝ່ທີ່ສຳຄັນນີ້ແມ່ນການມອບໝາຍ ໜ້າທີ່ຄວາມຮັບຜິດຊອບອັນໜັກໜ່ວງ ແລະ ມີກຽດ. ເຊື່ອໝັ້ນວ່າດ້ວຍມູນເຊື້ອຄວາມສາ ມັກຄີເປັນປຶກແຜ່ນຂອງຄະນະກວດກາສູນກາງພັກ ແລະ ດ້ວຍການນຳພາຂອງ ສະຫາຍຈະເຮັດໃຫ້ວຽກ ງານກວດກາໄດ້ ຮັບການປັບປຸງ, ຍົກລະດັບ ແລະ ໄດ້ຮັບຜົນສຳເລັດໃໝ່ໃຫຍ່ຫຼວງຫຼາຍຂຶ້ນກວ່າເກົ່າ, ຕອບສະ ໜອງການເລັ່ງທວງໃນການແກ້ໄຂບັນຫາຢູ່ພາຍໃນພັກ-ລັດ ກໍຄືຢູ່ໃນສັງຄົມ ໃຫ້ຕົກໄປເປັນກ້າວໆ ແລະ ມີການຫັນປ່ຽນທີ່ຈະແຈ້ງ.

ສະຫາຍ ທອງລຸນ ສີສຸລິດ ໄດ້ສະເໜີບາງວຽກງານຈຸດສຸມ ຂອງວຽກງານກວດກາຄື: ອັນຮີບດ່ວນກວ່າໝູ່ແມ່ນຕ້ອງສຸມໃສ່ກວດກາ ແລະ ແກ້ໄຂບັນຫາການເຊື່ອມຖອຍທາງດ້ານຄຸນທາດການເມືອງ, ຄຸນສົມບັດສິນທຳປະຕິວັດກໍຄືມານະຈິດປະຕິວັດ ໃນຖັນແຖວສະມາຊິກພັກ-ພະນັກງານ ແຕ່ລະຂັ້ນ (ພະນັກງານກວດກາຕ້ອງເປັນ ແບບຢ່າງ ແລະ ຕັດສິນໃຈ ໃນການນໍາໜ້າ ເພື່ອຈະກວດກາຜູ່ອື່ນໄດ້); ຍົກສູງຂີດຄວາມສາ ມາດຂອງຄະນະພັກ, ສະມາ ຊິກພັກແຕ່ລະຂັ້ນໃນການນໍາ ພາແກ້ໄຂບັນຫາທີ່ເກີດຂຶ້ນຢູ່ ແຕ່ລະບ່ອນໃຫ້ມີການຫັນປ່ຽນ ທີ່ຈະແຈ້ງ, ອັນນີ້ແມ່ນຄວາມຮັບຜິດຊອບ ໂດຍກົງຂອງຄະ ນະພັກແຕ່ລະຂັ້ນ; ຕ້ອງກວດກາ ແລະ ແກ້ໃຫ້ໄດ້ສະພາບການຂະຫຍາຍສະມາຊິກທີ່ຂາດແຫຼ່ງຝຶກຝົນຫຼໍ່ຫຼອມທີ່ໜັກແໜ້ນ ແລະ ບໍ່ຖືກຕ້ອງຕາມກົດລະບຽບຂອງພັກ. (ສິ່ງຈູງໃຈເຂົ້າພັກ, ຊ່ອງວ່າງໃຫ້ຄົນບໍ່ດີເລັດລອດເຂົ້າໃນການຈັດຕັ້ງພັກ ໂດຍບໍ່ມີອຸດົມການອັນຈະແຈ້ງ, ມີຜົນປະໂຫຍດແອບແຝງ…); ຄົ້ນຄວ້າ, ກຳນົດກົນໄກ, ວິທີການ ແລະ ມາດຕະ ການຕົວຈິງໃນການປະເມີນຜົນການສ້າງໜ່ວຍພັກ ປອດໃສ, ເຂັ້ມແຂງ ແລະ ໜັກແໜ້ນ ໃຫ້ຮັບປະ ກັນຄຸນນະພາບແທ້ (ບໍ່ປະໃຫ້ເກີດມີສະພາບໜ່ວຍພັກໃດກໍ່ແຂງ ແຕ່ບັນຫາຫຍໍ້ທໍ້ກໍ່ຫຼາຍ ແລະ ອາດຫຼາຍກວ່າເກົ່າ…ພວກເຮົາຈະຕີລາຄາລົງເລິກແນວໃດໃຫ້ບັນຫານີ້ແຈ້ງຂຶ້ນ).

ຕໍ່ໄປນີ້ອົງການກວດກາ ລັດຖະບານຈະກາຍມາເປັນຄະ ນະກຳມະການກວດກາແຫ່ງລັດ (ຂຶ້ນກັບກົມການເມືອງສູນກາງພັກ, ຂຶ້ນກັບເລຂາທິການໃຫຍ່) ຊຶ່ງຈະຕ້ອງໄດ້ເອົາໃຈໃສ່ຕິດຕາມ, ກວດກາການປະ ຕິບັດພາລະບົດ ບາດ, ໜ້າທີ່-ສິດ, ຄວາມຮັບຜິດຊອບ, ການປະຕິບັດມະຕິ, ຄໍາສັ່ງຂອງພັກ, ກົດໝາຍ ແລະ ລະບຽບການຕ່າງໆຂອງລັດຢູ່ບັນດາກະຊວງ-ອົງການ ແລະທ້ອງຖິ່ນ (ບັນດາຂອດຂັ້ນ, ການກົດໜ່ວງຖ່ວງດຶງ, ການກະທຳທີ່ເປັນການລະເມີດກົດໝາຍ); ການປະຢັດຕ້ານການຟຸມເຟືອຍຂອງອົງການບໍລິຫານລັດແຕ່ລະຂັ້ນ; ຕິດຕາມ-ກວດກາ ໂຄງ ການລົງ ທຶນຂອງລັດເລີ່ມແຕ່ຫົວທີ ລວມທັງໂຄງການກໍ່ສ້າງທາງລົດໄຟລາວ-ຈີນ, ການຄຸ້ມຄອງ-ນຳໃຊ້ ກອງທຶນປະເພດຕ່າງໆທີ່ອົງ ການລັດຕັ້ງຂຶ້ນ, ການຄຸ້ມຄອງປົກປັກຮັກສາ ແລະ ນຳໃຊ້ຊັບ ພະຍາກອນຕ່າງໆ ເປັນຕົ້ນທີ່ດິນ, ປ່າໄມ້, ແຮ່ທາດ ແລະ ອື່ນໆ; ບັນຫາສຳຄັນທີ່ມີລັກສະ ນະເລັ່ງທວງ ຊຶ່ງສັງຄົມກໍຄືໃນທົ່ວພັກໃຫ້ຄວາມສົນໃຈ ແລະ ເປັນຫ່ວງຫຼາຍແມ່ນການແກ້ໄຂຜົນຂອງການກວດກາ-ກວດສອບ ແລະ ການຮ້ອງທຸກ, ຮ້ອງ ຟ້ອງຂອງພະນັກ ງານກໍຄືປະ ຊາຊົນໃຫ້ທັນການ, ເຂັ້ມງວດ, ສັກສິດຕາມກົດລະບຽບຂອງພັກ, ກົດໝາຍຂອງລັດ. ບັນຫານີ້ພົວພັນເຖິງການປັບປຸງກົນໄກ ການປະສານງານ, ຄວາມເປັນເອກະພາບ ລະຫວ່າງ ອົງການກ່ຽວຂ້ອງໃນການແກ້ໄຂບັນຫາຕ່າງໆ.

ວຽກງານຕ້ານ ແລະ ສືບສວນ-ສອບສວນຄະດີສໍ້ລາດບັງຫຼວງ ຕ້ອງໄດ້ສຸມໃສ່ຕິດຕາມ-ກວດກາຂົງເຂດທີ່ມີຄວາມສ່ຽງພາໃຫ້ເກີດມີພຶດຕິກຳສໍ້ລາດບັງຫຼວງເຊັ່ນ: ການເກັບລາຍຮັບພາສີ-ອາກອນ, ການຄຸ້ມຄອງລາຍຮັບ-ລາຍຈ່າຍງົບປະມານ, ການລົງທຶນກໍ່ສ້າງພື້ນຖານໂຄງລ່າງ, ສຳ ຫຼວດອອກແບບ, ການປະມູນ, ການຈັດຊື້-ຈັດຈ້າງ; ການຄຸ້ມຄອງ-ນຳໃຊ້ທີ່ດິນ, ປ່າໄມ້, ແຮ່ທາດ, ການສືບສວນ-ສອບສວນ, ການດຳເນີນ ແລະ ແກ້ໄຂຄະດີ, ການຈັດວາງສັບຊ້ອນ ພະນັກງານ, ການຮັບລັດຖະ ກອນໃໝ່, ການບໍລິການຂອງລັດ, ການກວດກາ, ກວດສອບ ແລະ ອື່ນໆ; ຕິດຕາມ-ກວດກາພະນັກງານນຳພາ-ຄຸ້ມຄອງ, ສະມາຊິກພັກ, ພະນັກງານ-ລັດ ຖະກອນ, ທະຫານ, ຕຳຫຼວດ, ພະນັກງານລັດວິສາຫະກິດ ແລະ ນາຍບ້ານທີ່ມີພຶດຕິກຳສໍ້ລາດບັງຫຼວງ, ຮັ່ງມີຜິດປົກກະຕິ, ມີການລາຍງານ-ຮ້ອງຟ້ອງຈາກສະມາຊິກພັກ, ພະນັກງານ ແລະ ພົນລະເມືອງ; ເອົາໃຈໃສ່ດຳເນີນການກວດກາການສືບສວນ-ສອບສວນຄະດີຕ່າງໆທີ່ເປັນການສໍ້ລາດບັງຫຼວງໃຫ້ເລິກເຊິ່ງ, ພາວະວິໄສ, ຖືກຕ້ອງ, ຊັດເຈນ ແລະ ຍຸຕິທຳ; ລົງເລິກບັນດາລັດວິສາຫະກິດ, ຊອກໃຫ້ເຫັນຄວາມຮັບຜິດຊອບ, ຜູ້ຮັບຜິດຊອບຕໍ່ຜົນເສຍຫາຍຂອງຊັບສິນ, ທຶນຮອນຂອງພັກຢ່າງຫຼວງຫຼາຍ ຊຶ່ງກາຍເປັນການສ້າງໜີ້ສິນຈຳນວນມະຫາ ສານໃຫ້ລັດຕ້ອງແບກຫາບ ແທນ… ຕ້ອງກວດໃຫ້ເຫັນ, ເຫັນແລ້ວ ຕ້ອງມີມາດຕະການແກ້ໄຂໃຫ້ຖືກລະດັບ; ສືບຕໍ່ປະ ຕິບັດການແຈ້ງຊັບສິນ ແລະ ລາຍຮັບຂອງພະນັກງານ-ລັດຖະກອນ, ທະຫານ, ຕຳຫຼວດ ຮອບທີ 3 ຕາມທີ່ໄດ້ກຳນົດໄວ້ໃນດຳລັດວ່າດ້ວຍການແຈ້ງຊັບສິນ ແລະ ຕິດຕາມ-ກວດກາຕໍ່ຜູ້ລະເມີດລະບຽບການແຈ້ງຊັບ ສິນທີ່ກຳນົດໄວ້; ສືບຕໍ່ເພີ່ມທະ ວີການພົວພັນຮ່ວມມື ແລະ ແລກປ່ຽນບົດຮຽນວຽກງານກວດກາ, ສະກັດກັ້ນ ແລະ ຕ້ານການສໍ້ລາດບັງຫຼວງກັບບັນດາປະເທດເພື່ອນມິດຍຸດທະສາດ, ບັນດາປະເທດໃນພາກພື້ນ ແລະ ສາກົນ.

ນອກນີ້, ຍັງມີບັນຫາທີ່ຕ້ອງເອົາໃຈໃສ່ ໃນສະເພາະໜ້າເປັນຕົ້ນແມ່ນຕ້ອງຮີບຮ້ອນ ເປີດກອງປະຊຸມໃຫຍ່ ຂອງບັນດາໜ່ວຍພັກ ທີ່ຂຶ້ນກັບຄະນະກວດກາສູນກາງພັກ ແລະ ອົງການກວດກາລັດຖະບານໃຫ້ສໍາເລັດໂດຍໄວ ເພື່ອກ້າວເຂົ້າສູ່ການດຳເນີນກອງປະຊຸມໃຫຍ່ ຄັ້ງທີ IV ຂອງອົງຄະນະພັກ ຄະນະກວດກາສູນກາງພັກ ໂດຍຖືເອົາບັ້ນເຜີຍແຜ່ ແລະ ດຳເນີນຜົນກອງປະຊຸມໃຫຍ່ ຄັ້ງທີ XI ຂອງພັກນີ້; ສືບຕໍ່ປັບປຸງສັບຊ້ອນກົງຈັກການຈັດຕັ້ງ, ຈັດວາງພະນັກງານຄືນໃໝ່ໄປຄຽງຄູ່ກັບການປັບ ປຸງກົງຈັກການຈັດຕັ້ງ ແລະ ພາ ລະບົດບາດ, ໜ້າທີ່, ຂອບເຂດ ສິດຂອງຄະນະກວດກາແຕ່ ລະຂັ້ນ ຕາມທິດກະທັດຮັດ, ສົມເຫດສົມຜົນ, ສອດຄ່ອງກັບກົດລະບຽບຂອງພັກ, ກົດໝາຍ ແລະ ລະບຽບການຂອງລັດ. ເພີ່ມທະວີຫັນການກວດກາເປັນທັນສະໄໝ, ຫັນເຕັກໂນໂລຊີໃໝ່ ເຂົ້າໃນການກວດກາ ເພື່ອຄວາມສະດວກ, ວ່ອງໄວ ແລະ ຊັດເຈນ.

ຂ່າວ- ພາບ: ສຸກສະຫວັນ

ກອງປະຊຸມຖອດຖອນບົດຮຽນ ກ່ຽວກັບການຈັດຕັ້ງປະຕິບັດໂຄງການ ສ້າງຄວາມພ້ອມ ແລະສ້າງຄວາມເຂັ້ມແຂງໃຫ້ທ້ອງ ຖິ່ນ ໃນການປ້ອງກັນ, ຄວບຄຸມ ແລະໂຕ້ ຕອບພະຍາດໂຄວິດ 19 ໄດ້ຈັດຂື້ນໃນວັນທີ 2 ກຸມພານີ້ ທີໂຮງແຮງພູແມນ ນະຄອນ-ຫຼວງພະບາງ ໂດຍເປັນປະທານຂອງ ຮສຈ ດຣ ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກ, ມີຮອງຫົວໜ້າຫ້ອງການສຳນັກງານນາຍົກ, ຮອງລັດຖະມົນຕີກະຊວງພາຍໃນ, ຮອງເຈົ້າແຂວງ, ຄູ່ຮ່ວມພັດທະນາ, ອົງການຈັດຕັ້ງສາກົນ, ພະແນກສາທາລະນະສຸກແຂວງ, ໂຮງໝໍແຂວງ ພ້ອມດ້ວຍພາກ ສ່ວນກ່ຽວຂອງຈາກກະຊວງ ແລະຂະ ແໜງການ 7 ແຂວງ ຄື: ຫຼວງພະບາງ, ໄຊຍະບູລີ, ສະຫວັນນະເຂດ, ຈຳປາສັກ, ສາ ລະວັນ, ເຊກອງ ແລະອັດຕະປື ເຂົ້າຮ່ວມ.

ວາລະດຳເນີນກອງປະຊຸມ ທ່ານຮອງລັດ ຖະມົນຕີກະຊວງ ສາທາລະນະສຸກ ໄດ້ມີຄຳເຫັນວ່າ: ກອງປະຊຸມຄັ້ງນີ້ ມີຄວາມໝາຍສຳຄັນຫຼາຍ ໃນການສ້າງຄວາມເຂັ້ມແຂງ ໃຫ້ທ້ອງຖິ່ນ ໃນການເຝົ້າລະວັງ, ປ້ອງກັນ, ຄວບຄຸມ ແລະໂຕ້ຕອບພະຍາດໂຄວິດ 19. ເຊິ່ງເປັນພະຍາດທີ່ສົ່ງຜົນກະທົບຢ່າງຮ້າຍແຮງ ຕໍ່ສຸຂະພາບຂອງຄົນ ລວມທັງການພັດທະນາເສດຖະກິດ ຂອງພາກພື້ນ ແລະສາກົນ ລວມທັງ ສປປ ລາວ ປັດຈຸບັນທົ່ວໂລກມີຜູ້ຕິດເຊື້ອຫຼາຍກ່ວາ 103 ລ້ານຄົນ, ເສຍຊິວິດໄປແລ້ວຫຼາຍກ່ວາ 2 ລ້ານ 2 ແສນຄົນ, ປິ່ນປົວຫາຍດີຫຼາຍກ່ວາ 75 ລ້ານຄົນ, ປະເທດທີ່ຕິດເຊື້ອຫຼາຍກວ່າໝູ່ ແມ່ນສະຫະລັດອາເມລິກາ, ຮອງລົງມາແມ່ນ ປະເທດອິນເດຍ. ສຳລັບ ສປປ ລາວ ມາຮອດປະຈຸບັນກວດພົບຜູ້ຕິດເຊື້ອໂຄວິດ 19 ທັງໝົດ 44 ຄົນ ໃນນັ້ນປິ່ນປົວຫາຍດີ ແລະອອກໂຮງໝໍແລ້ວ 41 ຄົນ, ຍັງສືບຕປີ່ນປົວ 3 ຄົນ.

ກອງປະຊຸມຄັ້ງນີ້ ຜູ້ເຂົ້າຮ່ວມໄດ້ຮັບຟັງ ການລາຍງານສະພາບປັດຈຸບັນຂອງໂລກ, ຂອງປະເທດ ແລະການໂຕ້ຕອບຕໍ່ພະຍາດໂຄວິດ 19, ຜົນກະທົບຂອງໂຄວິດ 19 ຕໍ່ການຊົມໃຊ້ ການບໍລິການດູແລສຸຂະພາບທີຈຳເປັນ ຂອງອົງການປົກຄອງທ້ອງຖິ່ນ ແລະການຮັກສາສຸຂະພາບຂັ້ນຕົ້ນ, ຮັບຟັງການລາຍງານໂດຍຫຍໍ້ ກ່ຽວກັບການສ້າງຄວາມເຂັ້ມແຂງ ໃຫ້ແກ່ອົງການປົກຄອງທ້ອງຖິ່ນ, ລະບົບການຄຸ້ມຄອງຂໍ້ມູນ ສະຖານທີ່ຈຳກັດ ບໍລິເວນ ຢູ່ ສປປ ລາວ, ຮັບຟັງການສັງລວມຜົນການປະເມີນວຽກງານຄຸ້ມຄອງດ້ານ 4 ແຂວງເປົ້າໝາຍ ກ່ຽວກັບສະພາບ-ການຈັດຕັ້ງປະຕິບັດຄຸ້ມຄອງດ່ານເຂົ້າ-ອອກ ໄລຍະຜ່ານມາ, ການສັງລວມຜົນໄດ້ຮັບຈາກສູນຈຳກັດບໍລິເວນ, ສິ່ງທ້າທາຍກ່ຽວກັບສູນຈຳກັດບໍລິເວນ, ດ່ານ ແລະການຂົນສົ່ງ, ຜົນຂອງການເຝົ້າລະວັງມາດຕະການດ້ານສາທາລະນະສຸກ ແລະທາງສັງຄົມໃນຊຸມຊົນ, ບົດຮຽນການຈັດຕັ້ງປະຕິບັດການເຝົ້າລະວັງໃນຊຸມຊົນ. ພ້ອມນີ້ ໄດ້ວາງແຜນສ້າງຄວາມເຂັ້ມແຂງ ໃນການກຽມຄວາມພ້ອມເພື່ອປ້ອງກັນ ແລະໂຕ້ຕອບຕໍ່ການລະບາດຂອງໂຄວິດ 19 ແນໃສ່ຮັບປະກັນ ແລະສ້າງທຸກເງື່ອນໄຂໃນປ້ອງກັນ, ຄວບຄຸມ ແລະໂຕ້ຕອບພະຍາດ ໂຄວິດ 19 ບໍ່ໃຫ້ກັບຄືນມາລະບາດຮອບໃໝ່.

ຂ່າວ: ແຫຼ້ ສຸລີນພອນ – Lao National Radio

ວັນທີ 5 ກຸມພາ 2021, ຢູ່ເຂດເມືອງມຸນລະປາໂມກ, ສະຫາຍ ມະໄລທອງ ກົມມະສິດ #ກຳມະການສຳຮອງສູນກາງພັກ ຮອງເລຂາຄະນະບໍລິຫານງານພັກແຂວງ ຮອງປະທານຄະນະກໍາມະການປ້ອງກັນຊາດ-ປ້ອງກັນຄວາມສະຫງົບແຂວງ ຈຳປາສັກ ໄດ້ເຄື່ອນໄຫວຢ້ຽມຢາມ-ອວຍພອນ ຄະນະພັກ-ຄະນະບັນຊາ, ນາຍ ແລະພົນທະຫານ ກອງພັນທະຫານຮາບທີ 20 ໃນ ໂອກາດວັນສ້າງຕັ້ງ #ກອງທັບປະຊາຊົນລາວ ຄົບຮອບ 72 ປີ ( 20 ມັງກອນ 1949 -20 ມັງກອນ 2021 ) ມີ ຄະນະກໍາມະການປ້ອງກັນຊາດ-ປ້ອງກັນຄວາມສະຫງົບແຂວງ ແລະ ເມືອງມຸນລະປາໂມກ, ການນຳພະແນກການຂອງແຂວງ, ມີ ທະນາຄານແຫ່ງ ສປປ ລາວ, ລັດວິສາຫະກິດໄຟຟ້າລາວ, ຕາງໜ້າ ກຸ່ມບໍລິສັດຕັງຈະເລີນ, ຕາງໜ້າ ບໍລິສັດ ເບຍລາວ, ສະມາຄົມນັກທຸລະກິດແມ່ຍິງແຂວງ, ຕະຫຼອດຮອດຂະແໜງການທີ່ກ່ຽວຂ້ອງຂອງແຂວງ ເຂົ້າຮ່ວມຕິດຕາມ.

ການມາຢ້ຽມຢາມ ຄະນະພັກ-ຄະນະບັນຊາ, ນາຍ ແລະພົນທະຫານ ກອງພັນທະຫານຮາບທີ 20 ເທື່ອນີ້ ໄດ້ນຳເອົາ ເຂົ້າສານ, ເຄື່ອງບໍລິໂພກ-ອຸປະໂພກ ທີ່ຈຳເປັນ ແລະເງິນສົດ ຈຳນວນໜຶ່ງ ທີ່ໄດ້ຮັບ ການອຸປະຖຳ ປະກອບສ່ວນຈາກພາກສ່ວນ ຜູ້ປະກອບການ ກຸ່ມນັກທູລະກິດ ແຂວງຈຳປາສັກ, ຂະແໜງການເງິນ-ການທະນາຄານ ພາກວິສາຫະກິດ ແລະ ພະແນກການ-ກົມກອງອ້ອມຂ້າງຂອງແຂວງຈຳປາສັກ ກໍ່ຄືທົ່ວສັງຄົມ ທັງນີ້ກໍ່ເພື່ອສະແດງເຖິງຄວາມສາມັກຄີຮັກແພງອັນອົບອຸ່ນ, ເປັນຫ່ວງເປັນໄຍ ຕໍ່ ຄະນະພັກ-ຄະນະບັນຊາ, ນາຍ ແລະ ພົນທະຫານ ແລະຮູ້ບຸນຄູນ ໄປຍັງບັນດາພະນັກງານ, ສະມາຊິກພັກ, ນັກຮົບໃນທົ່ວກອງທັບ ທີ່ເສຍສະຫຼະ ເພື່ອປົກປ້ອງຄວາມເປັນເອກະລາດຂອງຊາດ, ປົກປ້ອງລະບອບປະຊາທິປະໄຕປະຊາຊົນ ແລະຄວາມຢູ່ເຢັນເປັນສຸກຂອງປະຊາຊົນບັນດາເຜົ່າ ຕະຫຼອດ 72 ປີ ຜ່ານມາ.

ເພື່ອເຮັດໃຫ້ມີຄວາມໝາຍຄວາມສຳຄັນ, ສະຫາຍ ມະໄລທອງ ກົມມະສິດ ໃນນາມ ຮອງປະທານຄະນະກໍາມະການປ້ອງກັນຊາດ-ປ້ອງກັນຄວາມສະຫງົບ ແຂວງຈຳປາສັກ ໄດ້ມີຄຳເຫັນໂອ້ລົມ ເພື່ອສືບຕໍ່ເຮັດໃຫ້ສຳເລັດໜ້າທີ່ອັນມີກຽດ ໃນການປົກປັກຮັກສາ ແລະສ້າງສາພັດທະນາປະເທດຊາດກໍຄືແຂວງຈຳປາສັກ ເຊິ່ງໄດ້ຮຽກຮ້ອງມາຍັງ ຄະນະພັກ-ຄະນະບັນຊາ, ນາຍ ແລະພົນທະຫານ ຈົ່ງພ້ອມກັນ ສືບຕໍ່ ຮັກສາ 3 ທາດແທ້ ແລະ 6 ມູນເຊື້ອ ອັນສະຫງ່າ ອົງອາດຂອງ ກອງທັບ ປະຊາຊົນລາວ, ເສີມຂະຫຍາຍທາດແທ້ ແລະມູນເຊື້ອກອງທັບປະຊາຊົນລາວ ໃນການປົກປັກຮັກສາ ແລະສ້າງສາພັດທະນາປະເທດຊາດ ພ້ອມກັນຢຶດໝັ້ນເສັ້ນທາງ, ຈຸດໝາຍ ແລະອຸດົມການສັງຄົມນິຍົມ ປະກອບສ່ວນ ເຂົ້າໃນພາລະກິດປ່ຽນແປງໃໝ່ໃນການສ້າງສາພັດທະນາປະເທດຊາດໃຫ້ມັ່ງຄັ້ງເຂັ້ມແຂງ, ສັງຄົມມີຄວາມສາມັກຄີປອງດອງ, ປະຊາທິປະໄຕ, ສີວິໄລ ແລະຍຸຕິທຳ, ເພິ່ມທະວີວຽກງານສ້າງ ແລະປັບປຸງພັກໃຫ້ໜັກແໜ້ນ ທາງດ້ານການເມືອງ ຢຶດໝັ້ນຫຼັກການລວມສູນ ປະຊາທິປະໄຕ, ເພີ່ມທະວີລະບຽບວິໄນພາຍໃນພັກ, ກອງທັບ ຢ່າງເຂັ້ມງວດ ເຊີດຊູຄວາມເປັນແບບຢ່າງນຳໜ້າ ຂອງພະນັກງານ ສະມາຊິກພັກ ໃນທຸກການເຄື່ອນໄຫວ ປະຕິບັດໜ້າທີ່ວຽກງານ ແລະການດຳລົງຊີວິດ.

ຂ່າວ: ທັດຊະນະ