ກິດຈະກຳ ສື່ມວນຊົນພາທ່ຽວ ຂອງພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງ ບໍລິຄໍາໄຊ ເພື່ອສົ່ງເສີມການທ່ອງທ່ຽວ ‘’ ລາວທ່ຽວລາວ’’ ໄດ້ເລີ່ມຂຶ້ນໃນວັນທີ 20 ມີນາ 2021 ຢູ່ວັດພະທາດພະບາດ–ໂພນສັນ ເມືອງທ່າພະບາດ ໃຫ້ກຽດເຂົ້າຮ່ວມຂອງທ່ານ ອຸດອນ ສອນສຸລິນ ຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງ, ມີຫົວໜ້າຫ້ອງການ ຖະແຫຼງຂ່າວ, ວັດທະນະທຳ ແລະ ທ່ອງທ່ຽວເມືອງ ພ້ອມດ້ວຍສື່ມວນຊົນພາຍໃນແຂວງເຂົ້າຮ່ວມ.

ວັດພະທາດພະບາດ – ໂພນສັນ ເປັນວັດທີ່ໄດ້ຮັບການສ້າງຕັ້ງຂຶ້ນມາໄດ້ຫຼາຍທົດສະວັດແລ້ວ ແລະ ໄດ້ຖືກຮັບຮອງເປັນມໍລະດົກທາງດ້ານວັດທະນະທຳຂອງແຂວງບໍລິຄຳໄຊ ຕາມການລາຍງານຂອງທ່ານ ເຄນ ສານຸວົງ ຫົວໜ້າຫ້ອງການ ຖະແຫຼງຂ່າວ, ວັດທະນະທຳ ແລະ ທ່ອງທ່ຽວເມືອງ ໄດ້ໃຫ້ຮູວ່າ: ປະຊາຊົນໄດ້ຄົ້ນພົບຫີນສີລາລຶກຢູ່ວັດຮ້າງມີທີ່ຕັ້ງຢູ່ພະລານຫີນເຊີ່ງໃນເມືອກ່ອນເອີ້ນວ່າ: ‘’ ໂຄກຈິກວຽງງົວ ‘’ ເດີ່ນວັດພະບາດໃນປະຈຸບັນ ໄດ້ຂຽນເລກ 902 ຫຼື ປີ ຄ.ສ 902 ແລະ ໃນບໍລິເວນດັ່ງກ່າວກໍ່ໄດ້ມີທາດນ້ອຍໜ່ວຍໜຶ່ງຕັ້ງຢູ່ແຕ່ບໍທັນຄົ້ນຄວ້າໄດ້ຈະແຈ້ງວ່າສ້າງຂຶ້ນມາແຕ່ເມື່ອໃດ ແລະ ໃຜເປັນຄົນສ້າງ.

ດັ່ງນັ້ນ, ຫຼາຍຄົນຈື່ງສັນນິຖານວ່າສ້າງຂຶ້ນໃນປີ ຄສ 902 ຕາມບັນທຶກໄວ້ ໃນຫີນສີລາລຶກນັ້ນ ມາໃນປີ 1974 ໂດຍພະຄູເພົ້າ ກໍ່ໄດ້ມປະຕິສັງຂອນພະທາດດັ່ງກ່າວຄືນ ແລະ ໄດ້ສ້າງພະທາດເຈດີອົງໃຫຍ່ກວມເອົາເຈດີອັນເກົ່ານັ້ນໄວ້ ເຊິ່ງມີຂະໜາດ ຄວາມສູງ 46 ແມັດ, ຕີນກວ້າງ 10 x 10 ແມັດ ເປັນສີລະປະ ແລະ ສະຖາປັດຕະຍະກຳສິນສະໄໝອານາຈັກລ້ານຊ້າງ, ລັກສະນະຄ້າຍຄືພະ ທາດອີງຮັງ ທີ່ ແຂວງສະຫວັນນະເຂດ ແລະ ພະທາດ ເຊີງຊຸມ ທີ່ ແຂວງສະກົນນະຄອນ ປະເທດໄທ ແລະ ຫ່າງຈາກພະທາດເຈດີ ປະມານ 20 ແມັດ ກໍ່ໄດ້ມີຮອຍພະພຸດທະບາດ ຍາວ 1,20 ແມັດ ແລະ ເລິກ 0,49 ແມັດ, ປາຍນິ້ວຕີນພຽງລຽບສະເໝີກັນ, ພື້ນຮອຍຕີນມີຮູບກົງຈັກ ດອກບົວຢູ່ເຄິ່ງກາງ ແລະ ມີຮູບສັດຢູ່ອ້ອມພື້ນຕີນ 108 ຊະນິດ.

ໂອກາດດຽວກັນ ຄະນະສື່ມວນຊົນຍັງໄດ້ໄປທ່ຽວຊົມ ວັດນາຄານິມິດໂພນສັນ ຕາມຕຳນານ ເລົ່າກັນມາວ່າ : ໃນອະດີດພຸດທະການມີພະຍານາກ, 2 ໂຕ ໄດ້ນິມົນພະພຸດທະເຈົ້າສັນເຂົ້າຢູ່ສະຖານທີ່ແຫ່ງນີ້ ແລະ ສະຖານທີ່ແຫ່ງນີ້ກໍ່ກາຍມາເປັນອະນຸສອນສະຖານບ່ອນສັນເຂົ້າຂອງພະພຸດທະເຈົ້າ ເຊິ່ງສະເດັດລົງມາໂຜດສັດໂລກທັງຫຼາຍໃນພູມີປະເທດນີ້ເມື່ອ 2540 ກວ່າປີ ແລະ ໄດ້ເຂົ້າໄປຢ້ຽມຊົມແຫຼ່ງທ່ອງທ່ຽວທາງທຳມະຊາດ ນໍ້າຕົກຕາດຊາຍ – ນ້ຳຕົກຕາດຊາຍ ເປັນສາຍນ້ຳທີ່ໄຫຼຜ່ານແກ້ງຫີນ, ຜ່ານຮ່ອມຜາ ແລະ ໂຕນໂດ່ງກວມຜາຊາຍສູງປະມານ 40 ແມັດ, ໄຫຼເຂົ້າໃສ່ຊ່ອງແຄບຢ່າງປະທັບໃຈໃນທາມກາງປ່າຕຶບໜາຂຽວງາມອຸ່ມທຸ່ມ ເຊິ່ງທ່ານສາມາດຕິດຕາມ ເສັ້ນທາງທີ່ມີເຄື່ອງໝາຍໄປສູ່ອ່າງອາບນ້ຳທີ່ເກີດຈາກທຳມະຊາດ ແລະ ຍ່າງຕາມລະດູແລ້ງໃນສາຍນ້ຳທີ່ມີດິນຊາຍ ຢູ່ໃນຜົ້ງຫ້ວຍຂອງຕາດ, ບໍລິມາດນ້ຳປ່ຽນແປງຕາມລະດູການ ງຽບ ແລະ ສະຫງົບ ນັບແຕ່ເດືອນທັນວາ ຫາ ເດືອນ ພຶດສະພາ ນັກທ່ອງທ່ຽວທັງພາຍໃນແລະຕ່າງປະເທດມາທ່ອງທ່ຽວສະຖານທີ່ແຫ່ງນີ້ຢ່າງຫຼວງຫຼາຍ, ສ່ວນໃນລະດູຝົນກະແສນ້ຳຈະ ໄຫຼແຮງໂດຍສະເພາະແຕ່ເດືອນສິງຫາ ຫາ ເດືອນກັນຍາ.

ວັນທີ 21 ສື່ມວນຊົນພາທ່ຽວໃນຄັ້ງນີ້ ໄດ້ໄປທ່ຽວຊົມຖໍ້ານາງຜົມຫອມ ແລະ ສວນມະຫາວົງ ເຊິ່ງມີກິດຈະກຳຫລາຍຢ່າງເຊັ່ນ : ຊິດເບັດ, ມີສະລອຍນໍ້າໄວ້ບໍລິການ ແລະ ເຮືອຖີບ ແລະ ການບໍລິການອື່ນໆອີກ. ສວນມະຫາວົງຫ່າງຈາກເທດສະບານເມືອງບໍລິຄັນປະມານ 7 ກິໂລແມັດ ແລະ ຫາດດອນຄູນ ເມືອງບໍລິຄັນ ກໍ່ເປັນອີກທາງເລືອກໜຶ່ງ ທີ່ນັກທ່ອງທ່ຽວ ທີ່ມັກການພັກຜ່ອນ ພົບປະສ້າງສັນ, ສະຖານທີ່ແຫ່ງນີ້ ເປັນບ່ອນທ່ອງທ່ຽວທີ່ເປີດຂຶ້ນໃໝ່ ດ້ວຍການລົງທຶນຂອງຜູ້ປະກອບການເອກະຊົນໂດຍກົງ ເຊິ່ງ ຕາມການໃຫ້ສຳພາດຂອງທ່ານ ສົມສັກ ໄຊຍະວົງ ຜູ້ລົງທຶນ ຮູ້ວ່າ: ການຕັດສິນໃຈລົງທຶນສ້າງ ແລະ ບູລະນະທຳມະຊາດ ໃຫ້ກາຍເປັນແຫລ່ງທ່ອງທ່ຽວ ແຫ່ງນີ້ ແມ່ນຍ້ອນເຫັນທຳມະຊາດ ມີຄວາມສວຍສົດງົດງາມ ມີສາຍພູທີ່ເໝາະສົມແກ່ການເດີນທ່ຽວ, ມີແມ່ນ້ຳທີ່ໃສເຢັນ, ເສັ້ນທາງເຂົ້າເຖິງສະດວກ ບໍ່ໄກຈາກທາງຫລວງ,ໃນອະນາຄົດຈະສ້າງ ແຫລ່ງທ່ອງທ່ຽວທຳມະຊາດ ແຫ່ງນີ້ໃຫ້ກາຍເປັນແຫລ່ງທ່ອງທ່ຽວ ທີ່ສາມາດຮອງຮັບນັກທ່ອງທ່ຽວ ທັງພາຍໃນ ແລະ ຕ່າງປະເທດອີກ.

ວັນທີ 22 ມີນາ, ຄະນະໄດ້ເດີນທາງໄປເມືອງປາກກະດິງ, ທ່ຽວຊົມວັດບ້ານດອນໄຊ ແລະ ເດີນທາງໄປລີສອດສາຍນໍ້າເທີນ, ທ່ຽວຊົມຕາດໄກ້, ທ່ຽວຊົມລີສອດວັງນໍ້າເຢັນ ແລະ ທ່ຽວຊົມຖໍ້າມັງກອນ ແລະ ສູນຫັດຖະກຳໂພນຕານ ເມືອງຄຳເກີດ.

ຂ່າວ : ວຽງສະຫວັນ

ເມື່ອບໍ່ດົນມານີ້, ສະຫາຍ ພັນໂທ ທອງໄຂ ສີຍາລາດ ຮອງເລຂາຄະນະພັກ ຫົວໜ້າການທະ ຫານກອງບັນຊາການທະຫານແຂວງບໍ່ແກ້ວ ພ້ອມດ້ວຍອົງການຈັດຕັ້ງມະຫາຊົນຊາວໜຸ່ມ-ແມ່ຍິງ ເຄື່ອນໄຫວຢ້ຽມຢາມກອງຮ້ອຍ 1 ກອງພັນ 419 ທີ່ປະຕິບັດໜ້າທີ່ຢູ່ຈຸດຍຸດທະສາດສາມແຈເມືອງ. ເນື່ອງໃນໂອກາດວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 66 ປີ (22 ມີນາ 1955 – 22 ມີນາ 2021) ແລະ ວັນສຳຄັນຕ່າງໆ ໂດຍການຕ້ອນຮັບຢ່າງອົບອຸ່ນຈາກຄະນະພັກ-ຄະນະບັນຊາກົມກອງ ພ້ອມທັງໄດ້ຮັບຟັງການລາຍງານໂດຍຫຍໍ້ກ່ຽວກັບສະພາບການໃນການເຄື່ອນໄຫວປະຕິບັດໜ້າທີ່ໃຫ້ສະ ຫາຍໄດ້ຮັບຊາບ.

ໂອກາດນີ້, ສະຫາຍ ພັນໂທ ທອງໄຂ ສີຍາລາດ ໄດ້ກ່າວຄວາມຢ້ຽມຢາມຖາມຂ່າວ ແລະ ສະແດງຄວາມຂອບໃຈທີ່ພະນັກງານ-ນັກຮົບມີຄວາມຕັດສິນໃຈສູງ, ມີແນວຄິດການເມືອງໜັກແໜ້ນ, ມີຄວາມເສຍສະຫຼະອັນສູງສົ່ງພ້ອມກັນປະຕິບັດວຽກງານປ້ອງກັນຊາດ-ປ້ອງກັນຄວາມສະຫງົບ, ພ້ອມທັງ ກ່າວອວຍພອນໃຫ້ບັນດາພະນັກງານ-ນັກຮົບຈົ່ງມີແຕ່ໂຊກໄຊ, ປອດໄພ ເເລະ ເຮັດສຳເລັດທຸກໜ້າທີ່ ທີ່ຂັ້ນເທິງມອບໝາຍໃຫ້. ສະຫາຍຍັງໄດ້ຮຽກຮ້ອງໃຫ້ພະນັກງານ-ນັກຮົບຈົ່ງມີສະຕິລະວັງຕົວໃນການປະ ຕິບັດໜ້າທີ່ວຽກງານເປັນເຈົ້າການໃນການກວດກາ ແລະ ກຽມພ້ອມສູ້ຮົບຕະຫຼອດເວລາ, ເອົາໃຈໃສ່ປະຕິ ບັດໜ້າທີ່ອັນມີກຽດທີ່ພັກ ແລະ ປະຊາຊົນມອບໝາຍໃຫ້ຢ່າງມີປະສິດທິຜົນ. ໃນການລົງເຄື່ອນໄຫວ ຢ້ຽມຢາມຄັ້ງນີ້, ຍັງໄດ້ນໍາເອົາເຄື່ອງອຸປະໂພກ-ບໍລິໂພກ ຈຳນວນໜຶ່ງໄປມອບໃຫ້ກົມກອງ ເພື່ອເປັນ ການຊຸກຍູ້ພະນັກງານ-ນັກຮົບໃຫ້ມີກໍາລັງໃຈ ເຮັດສໍາເລັດໜ້າທີ່ການເມືອງຂອງຕົນອີກດ້ວຍ.

ຂ່າວ: ສົມໄຊ ສີລາຈັນ

ວັນທີ 26 ມີນາ 2021 ທີ່ເມືອງສິງ ແຂວງຫລວງນໍ້າທາ ໄດ້ມີພິທີເອົາງົວພັນຊີ້ນ 3.000 ໂຕ ເຂົ້າສູນກັກກັນປອດພະຍາດ 30 ວັນ (26/3/ – 26/3/2021) ເພື່ອກຽມສົ່ງອອກໃຫ້ຈີນ.

ທ່ານ ຈັນພິພັກ ກອງຈໍາປາ ເຈົ້າເມືອງໆ ສິງ ໃຫ້ຮູ້ວ່າ: ຖ້າບໍ່ມີອັນປ່ຽນແປງຫລື ເກີດມີບັນຫາຫຍັງເກີດຂຶ້ນ ງົວຈຳນວນດັ່ງກ່າວຕ້ອງຖືກສົ່ງອອກໄປຈີນ ຢ່າງເປັນທາງ ການ. ໂຄງການສົ່ງເສີມການລ້ຽງງົວພັນຊິ້ນ ສົ່ງອອກໄປ ຈີນ ແມ່ນໂຄງການຮ່ວມມື ແມ່ນຂອງຂວັນພິເສດທີ່ ທ່ານ ສີ ຈິນພີ້ງ ເລຂາທິ ການໃຫຍ່ ປະທານ ປະເທດຈີນ ແລະ ທ່ານ ບຸນຍັງ ວໍລະຈິດ ອາດີດເລຂາທິການໃຫຍ່ ປະທານ ປະເທດລາວ ໄດ້ຄົ້ນຄວ້າຄັດເລືອກເອົາ ເມືອງສິງ ເປັນບ່ອນຈັດຕັ້ງປະຕິບັດໂຄງການ,

ມາຮອດມື້ວັນທີ 26/03/2021 ລາວເຮົາໄດ້ນໍາເອົາງົວປະມານ 3000 ໂຕເຂົ້າສູນກັກກັນຂອດສຸດທ້າຍ, ນັບຖອຍຫຼັງອີກ30ວັນ, ຄາດວ່າໃນວັນທີ 27 ຫຼື 28/04/2021 ຈະສາມາດສົ່ງງົວອອກຈຳນວນດັ່ງກ່າວໄປຈີນ, ຈາກນັ້ນ ໃນແຕ່ລະປີລາວເຮົາຈະສົ່ງອອກງົວໃຫ້ຈີນປີລະ 500.000 ໂຕ ໂດຍອີງຕາມທ່າແຮງ ແລະ ຄວາມອາດສາມາດຂອງລາວ.

Cr: ເຈົ້າເມືອງໆ ສິງ

ບໍລິສັດ ການລົງທຶນຢາງພາລາ ຢຸນນານ ຈໍາກັດ ໄດ້ຈັດພິທີປ່ອຍເງິນກູ້ໂດຍບໍ່ມີດອກເບ້ຍ ໃຫ້ຊາວ ສວນຢາງພາລາຢູ່ແຂວງຫຼວງນໍ້າທາ ໃນວັນທີ 24 ມີນາຜ່ານມາ ໂດຍການເຂົ້າຮ່ວມຂອງ ທ່ານ ບຸນທໍາ ອິນທະປະເສີດ ຫົວໜ້າພະແນກແຜນການ ແລະ ການລົງທຶນແຂວງຫຼວງນໍ້າທາ, ທ່ານ ເກົ່າເຈ ຫົວໜ້າບໍລິ ສັດ ການລົງທຶນຢາງພາລາ ຢຸນນານ ຈໍາກັດ, ມີຜູ້ຕາງໜ້າກຸ່ມຂາຍຢາງພາລາ 8 ກຸ່ມພາຍໃນແຂວງຫຼວງ ນໍ້າທາ, ຕະຫຼອດຮອດພະນັກງານລັດຖະກອນ ແລະ ພະນັກງານຂອງບໍລິສັດເຂົ້າຮ່ວມ.

ທ່ານ ເກົ່າເຈ ໄດ້ລາຍງານການຈັດຕັ້ງປະຕິບັດການປ່ອຍເງິນກູ້ໂດຍບໍ່ມີດອກເບ້ຍ ໃຫ້ຊາວສວນຢາງ ພາລາ ໃນປີ 2020 ແລະ ຜ່ານແຜນການຮ່ວມມືກັບປະຊາຊົນ ໃນການປ່ອຍເງິນກູ້ໃນປີ 2021 ວ່າ: ການປ່ອຍເງິນກູ້

ໂດຍບໍ່ມີດອກເບ້ຍໃຫ້ແກ່ຊາວສວນຢາງພາລາໃນປີ 2021 ນີ້ ມີຈໍານວນ 28 ບ້ານ, ລວມ ເປັນເງິນມູນຄ່າ 4 ຕື້ກວ່າກີບ ແລະ ໄດ້ວາງແຜນການເກັບຊື້ນໍ້າຢາງພາລາໃນປີນີ້ໃຫ້ໄດ້ 90 ພັນໂຕນ, ເປັນມູນຄ່າ 540 ຕື້ກີບ. ພ້ອມນີ້ທາງບໍລິສັດຍັງໄດ້ສົ່ງເສີມພັດທະນາ ແລະ ປະກອບສ່ວນຊ່ວຍເຫຼືອສັງ ຄົມເປັນຕົ້ນການບໍາບັດຜູ້ຕິດສິ່ງເສບຕິດ, ຊ່ວຍເຫຼືອຊຸມຊົນ ແລະ ພັດທະນາເສດຖະກິດທ້ອງຖິ່ນ, ສ້າງສີມື ແຮງງານໃຫ້ກຳມະກອນ, ສ້າງທີ່ຢູ່ອາໄສ ແລະ ໂຮງຮຽນ ເພື່ອໃຫ້ລູກຫຼານກໍາມະກອນໄດ້ເຂົ້າໂຮງຮຽນອັນ ເປັນການປະກອບສ່ວນພັດທະນາເສດຖະກິດ ສປປ ລາວ ເວົ້າລວມ, ເວົ້າສະເພາະກໍຄືແຂວງຫຼວງນໍ້າທາ.

ທ່ານ ເກ່ເຈ ກ່າວໃຫ້ຮູ້ອີກວ່າ: ການປ່ອຍເງິນກູ້ໂດຍບໍ່ມີດອກເບ້ຍໃຫ້ແກ່ຊາວສວນ ໃນໄລຍະທີ່ ຜ່ານມາ, ບໍລິສັດໄດ້ມີຄວາມຕັ້ງໜ້າປະກອບສ່ວນການພັດທະນາຢາງພາລາຢູ່ໃນທ້ອງຖິ່ນ ພາຍໃຕ້ການສະ ໜັບສະໜູນໃຫ້ການຊ່ວຍເຫຼືອອໍານວຍຄວາມສະດວກຈາກພາກສ່ວນທີ່ກ່ຽວຂ້ອງທຸກຂັ້ນຂອງແຂວງຫຼວງນ້ຳ ທາ. ບໍລິສັດໄດ້ເລີ່ມຮ່ວມມືກັບປະຊາຊົນ ນັບແຕ່ປີ 2012 ເປັນຕົ້ນມາ ໂດຍໄດ້ປ່ອຍເງິນກູ້ໂດຍບໍ່ມີດອກ ເບ້ຍໃຫ້ຊາວສວນຢາງ ເພື່ອແກ້ໄຂຄວາມຫຍຸ້ງຍາກຂອງປະຊາຊົນ. ມາຮອດປີ 2020, ບໍລິສັດໄດ້ເຊັນ ສັນຍາຮ່ວມມືກັບປະຊາຊົນລວມທັງໝົດ ຈຳນວນ 136 ບ້ານ, ໄດ້ປ່ອຍເງິນກູ້ໂດຍບໍ່ມີດອກເບ້ຍຈໍານວນ 13 ຕື້ 690 ລ້ານກີບ ໃຫ້ປະຊາຊົນໄດ້ຮັບຜົນປະໂຫຍດໂດຍກົງ ສ້າງສາຍພົວພັນການຮ່ວມມືທີ່ຍາວ ນານ. ເຖິງວ່າປີ 2020, ໄດ້ຮັບຜົນກະທົບຈາກພະຍາດໂຄວິດ-19 ແລະ ດິນຟ້າອາກາດແຫ້ງແລ້ງຢ່າງໜັກໜ່ວງ ແຕ່ເພື່ອແກ້ໄຂຄວາມຫຍຸ້ງຍາກຂອງປະຊາຊົນບໍລິສັດໄດ້ປ່ອຍເງິນກູ້ໂດຍບໍ່ມີດອກເບ້ຍ ໃຫ້ແກ່ຊາວສວນເປັນ ມູນຄ່າ 2 ຕື້ກວ່າກີບ ແລະ ໄດ້ບໍລິຈາກອຸປະກອນປ້ອງກັນໂຄວິດ-19 ໃຫ້ອົງການປົກຄອງທ້ອງຖິ່ນຈຳ ນວນໜຶ່ງເປັນມູນຄ່າ 100 ລ້ານກີບ.

ຫຼັງຈາກນັ້ນ ທ່ານ ເກົ່າເຈ ກໍໄດ້ມອບເງິນກູ້ໂດຍບໍ່ມີດອກເບ້ຍ ໃຫ້ແກ່ຜູ້ຕາງໜ້າຫົວໜ້າກຸ່ມ 8 ກຸ່ມ ຂອງຊາວສວນຢາງຈໍານວນ 28 ບ້ານຕື່ມອີກ. (ຂ່າວ-ພາບ: ສົມພອນ ຂຸນດາວົງ).

ພິທີມອບ-ຮັບ ໜ້າທີ່ຫົວໜ້າຫ້ອງວ່າການປະທານປະເທດ ລະຫວ່າງ ທ່ານ ຄຳເມິງ ພົງທະດີ ເລຂາຄະນະພັກ ຫົວໜ້າຫ້ອງວ່າການປະທານປະເທດ ຜູ້ເກົ່າ ແລະ ທ່ານ ນາງ ເຂັມມະນີ ພົນເສນາ ເລຂາຄະນະພັກ ຫົວໜ້າຫ້ອງວ່າການ ປະທານປະທດຜູ້ໃໝ່ ໄດ້ຈັດຂຶ້ນເມື່ອວັນທີ 25 ມີນານີ້ ທີ່ຫ້ອງວ່າການປະທານປະເທດ ໂດຍໃຫ້ກຽດເຂົ້າຮ່ວມ ຂອງ ທ່ານ ນາງ ສີໃສ ລືເດດມູນສອນ ກຳມະການກົມການເມືອງສູນກາງພັກ ຄະນະເລຂາທິການສູນກາງພັກ ຫົວໜ້າຄະນະຈັດຕັ້ງສູນກາງ ພັກ, ແຂກຖືກເຊີນ ແລະ ພາກສ່ວນກ່ຽວຂ້ອງເຂົ້າເຂົ້າຮ່ວມ.

ທ່ານ ດວງຕາ ຈູມພາວັນ ຫົວໜ້າຫ້ອງການຄະນະຈັດຕັ້ງສູນກາງພັກໄດ້ຂຶ້ນອ່ານລັດ ຖະດຳລັດຂອງປະທານປະເທດ ສປປ ລາວ ເລກທີ 111/ປປທ, ລົງວັນທີ 24/3/2021 ວ່າດ້ວຍການອອກພັກການ – ຮັບອຸດໜູນບຳນານ, ຄຳສັ່ງຂອງກົມການເມືອງສູນກາງພັກເລກທີ 10/ກມສພ, ລົງວັນທີ 24/3/2021 ວ່າດ້ວຍການຍົກຍ້າຍພະນັກງານການນຳຂັ້ນສູງໄປຮັບໜ້າທີ່ໃໝ່, ມະຕິຕົກລົງຂອງກົມການເມືອງສູນກາງພັກເລກທີ 16/ກມສພ, ລົງວັນທີ 24/3/2021 ວ່າດ້ວຍການແຕ່ງຕັ້ງເລຂາຄະນະບໍລິຫານງານພັກ, ຫົວໜ້າຫ້ອງວ່າການສຳນັກງານປະທານປະເທດ.

ອີງຕາມການຕົກລົງໃນກອງປະຊຸມກົມການເມືອງສູນກາງພັກ ແລະ ຄະນະເລຂາທິການ ສູນກາງພັກຄັ້ງວັນທີ 24-25 ກຸມພາ 2021, ອີງຕາມການເຫັນດີຮັບຮອງໃນກອງປະຊຸມຄົບຄະນະ ບໍລິຫານງານສູນກາງພັກ ຄັ້ງທີ 2 ສະໄໝທີ XI ຄັ້ງວັນທີ 1-3 ມີນາ 2021 ແລະ ອີງຕາມໜັງສື ສະເໜີຄະນະຈັດຕັ້ງສູນກາງພັກ ສະບັບເລກທີ 87/ຄຈສພ ລົງວັນທີ 23 ມີນາ 2021.
ທ່ານ ນາງ ສີໃສ ລືເດດມູນສອນ ໄດ້ໃຫ້ກຽດໂອ້ລົມ ແລະ ເນັ້ນໃຫ້ບັນດາສະຫາຍຄະນະພັກ, ການນໍາທຸກຂັ້ນ ເປັນເອກະພາບນໍາສູນກາງພັກ, ລັດຖະບານ ຕໍ່ການສັບປ່ຽນໜ້າທີ່ຄວາມຮັບຜິດຊອບ ຂອງພະນັກງານການນໍາຂັ້ນສູງໃນຄັ້ງນີ້.

ຍົກສູງ, ເສີມຂະຫຍາຍມູນເຊື້ອຄວາມສາມັກຄີພາຍໃນພັກ, ຄະນະພັກໃຫ້ມີຄວາມໜັກແໜ້ນ, ມີຄວາມເປັນເອກະພາບສູງ, ສືບຕໍ່ເປັນຫຼັກແຫຼ່ງ, ເປັນຄັນທຸງ ແລະ ເປັນແກນນໍາໃນການເຕົ້າໂຮມ ຄວາມສາມັກຄີໃນຖັນແຖວພະນັກງານ-ສະຊິກພັກ.

ເອົາໃຈໃສ່ວຽກງານສຶກສາອົບຮົມການເມືອງ-ແນວຄິດ ໃຫ້ພະນັກງານ-ສະມາຊິກພັກໃຫ້ມີ ທັດສະນະການເມືອງໜັກແໜ້ນ, ມີຄວາມສາມັກຄີເປັນປຶກແຜ່ນ, ແໜ້ນໜາ, ມີຄວາມຈົງຮັກພັກ ດີຕໍ່ພັກ ແລະ ເຊື່ອໝັ້ນຕໍ່ການນໍາພາຂອງພັກ.

ສືບຕໍ່ເປັນເສນາທິການທີ່ດີໃຫ້ແກ່ທ່ານປະທານປະເທດ, ທ່ານຮອງປະທານປະເທດໃນ ການກະກຽມດ້ານເນື້ອໃນ, ສະຖານທີ່ ແລະ ຄວາມພ້ອມຕ່າງໆຢ່າງຮອບດ້ານໃຫ້ແກ່ການເຄື່ອນໄຫວ ລັດຖະກິດທັງພາຍໃນ ແລະ ຕ່າງປະເທດ ລວມທັງທຸກວຽກງານປິ່ນອ້ອມຢູ່ຫ້ອງວ່າ ການປະທານ ປະເທດໃຫ້ມີຄວາມຮັບປະກັນ ແລະ ມີປະສິດທິຜົນຍິ່ງໆຂຶ້ນ.

ຍູ້ແຮງການຈັດຕັ້ງຜັນຂະຫຍາຍ ມະຕິກອງປະຊຸມໃຫຍ່ ຄັ້ງທີ XI ຂອງພັກ, ແຜນພັດ ທະນາເສດຖະກິດ-ສັງຄົມ 5 ປີ ແຫ່ງລັດ ຄັ້ງທີ IX ແລະ ມະຕິກອງປະຊຸມໃຫຍ່ ຂອງອົງຄະນະພັກ ຫ້ອງວ່າການປະທານປະເທດ ໃຫ້ບັນລຸຕາມຈຸດປະສົງ ແລະ ຄາດໝາຍທີ່ວາງໄວ້ ເພື່ອສ້າງການຫັນ ປ່ຽນທີ່ແຂງແຮງ, ເລິກເຊິ່ງ ແລະ ຮອບດ້ານ.

ຂ່າວ:ສຳນານ

ພິທີມອບ-ຮັບໜ້າທີ່ ລະຫວ່າງ ທ່ານນາງ ເຂັມມະນີ ພົນເສນາ ກໍາມະການສູນກາງພັກ ເລຂາຄະນະພັກ ລັດຖະມົນຕີກະຊວງອຸດສາຫະກໍາ ແລະ ການຄ້າ (ຜູ້ເກົ່າ) ແລະ ທ່ານ ຄໍາແພງ ໄຊສົມແພງ ກໍາມະການສູນກາງພັກ ເລຂາຄະນະພັກ ລັດຖະມົນຕີກະຊວງອຸດສາຫະກໍາ ແລະ ການຄ້າ (ຜູ້ໃໝ່) ໄດ້ຈັດຂຶ້ນວັນທີ 25 ມີນາ 2021 ທີ່ກະຊວງອຸດສາຫະກຳ ແລະ ການຄ້າ ໂດຍໃຫ້ກຽດເຂົ້າຮ່ວມຂອງ ທ່ານ ບຸນທອງ ຈິດມະນີ ກໍາມະການກົມການເມືອງສູນກາງພັກ ຜູ້ປະຈຳການຄະນະເລຂາທິການສູນກາງພັກ ຮອງປະທານປະເທດ, ມີພາກສ່ວນກ່ຽວຂ້ອງເຂົ້າຮ່ວມ.   

ການມອບຮັບ-ໜ້າທີ່ຄັ້ງນີ້ ແມ່ນອີງຕາມຄໍາສັ່ງຂອງກົມການເມືອງສູນກາງພັກ ວ່າດ້ວຍການຍົກຍ້າຍພະນັກງານການນໍາຂັ້ນສູງໄປຮັບໜ້າທີ່ໃໝ່ ອີງຕາມມະຕິຕົກລົງຂອງກົມການເມືອງສູນກາງພັກ ສະບັບເລກທີ 031/ກມສພ ວ່າດ້ວຍວຽກງານຄຸ້ມຄອງພະນັກງານ ອີງຕາມການຕົກລົງໃນກອງປະຊຸມກົມການເມືອງສູນກາງພັກ ແລະ ຄະນະເລຂາທິການສູນກາງພັກຄັ້ງວັນທີ 24-25 ກຸມພາ 2021 ອີງຕາມການເຫັນດີຮັບຮອງໃນກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 2 ສະໄໝທີ XI ຄັ້ງວັນທີ 1-3 ມີນາ 2021 ແລະ ອີງຕາມໜັງສືສະເໜີຄະນະຈັດຕັ້ງສູນກາງພັກ ສະບັບເລກທີ 87/ຄຈສພ ລົງວັນທີ 23 ມີນາ 2021 ກົມການເມືອງສູນກາງພັກ ອອກຄໍາສັ່ງຍົກຍ້າຍ ທ່ານ ນາງ ເຂັມມະນີ ພົນເສນາ ກໍາມະການສູນກາງພັກ ເລຂາຄະນະພັກ ລັດຖະມົນຕີກະຊວງອຸດສາຫະກໍາ ແລະ ການຄ້າ ໄປຮັບໜ້າທີ່ໃໝ່ຢູ່ຫ້ອງວ່າການສໍານັກງານປະທານປະເທດ ແລະ ຍົກຍ້າຍທ່ານ ຄໍາແພງ ໄຊສົມແພງ ກໍາມະການສູນກາງພັກ ເລຂາຄະນະພັກ ລັດຖະມົນຕີກະຊວງແຮງງານ ແລະ ສະຫວັດດີການ-ສັງຄົມ ມາຮັບໜ້າທີ່ເປັນເລຂາຄະນະພັກ ລັດຖະມົນຕີກະຊວງອຸດສາຫະກໍາ ແລະ ການຄ້າ ຜູ້ໃໝ່.

ຂ່າວ: ຂັນທະລີ

ໃນອາທິດທີ່ຜ່ານມາ, ສະຫາຍ ພົນຕີ ຢວນຢ້າພິງ ຫົວໜ້າກອງບັນຊາການຕຳຫຼວດ ລາດຕະເວນ ທາງນໍ້າ ແຂວງຢູນນານ ສປ ຈີນ ພ້ອມຄະນະ ໄດ້ເຄື່ອນໄຫວເຮັດວຽກຢູ່ສູນປະສານງານ ລາວ-ຈີນ ແຂວງບໍ່ແກ້ວ ໂດຍມີສະຫາຍ ພັນເອກ ບຸນມີ ພາມີໄຊ ຄະນະປະຈຳພັກແຂວງ ເລຂາຄະນະພັກ ຫົວໜ້າການເມືອງ ກອງບັນຊາການທະຫານແຂວງບໍ່ແກ້ວ ແລະ ສະຫາຍ ພັນໂທ ຈັນພອນເພັດ ຄຳສີ ຮອງຫົວໜ້າກອງບັນຊາການ ປກສ ແຂວງບໍ່ແກ້ວ ພ້ອມຄະນະ ໃຫ້ການຕ້ອນຮັບຢ່າງອົບອຸ່ນຢູ່ ທີ່ສູນປະສານງານ ລາວ-ຈີນ ບ້ານມອມ ເມືອງຕົ້ນເຜິ້ງ ແຂວງບໍ່ແກ້ວ.

ສະຫາຍ ພັນເອກ ບຸນມີ ພາມີໄຊ ໄດ້ກ່າວວ່າ: ການມາເຄື່ອນໄຫວຂອງຄະນະດັ່ງກ່າວແມ່ນເພື່ອ ປະຕິບັດສັນຍາວ່າດ້ວຍການລາດຕະເວນຮ່ວມທາງນໍ້າຕະຫຼອດໄລຍະຜ່ານມາ ໃນການຮ່ວມມື 4 ຝ່າຍ (ຈີນ, ລາວ, ມຽນມາ ແລະ ໄທ) ຄັ້ງທີ 103 ເຫັນໄດ້ເຖິງຜົນສຳເລັດພິເສດແມ່ນ 2 ຝ່າຍ ລາວ-ຈີນ, ໃນການເພີ່ມພູນຄູນສ້າງມູນເຊື້ອອັນດີງາມຂອງ 2 ພັກ, 2 ລັດ ແລະ ປະຊາຊົນ 2 ຊາດ ໃນການແກ້ ໄຂບັນຫາສະພາບການຂ້າມແດນຜິດກົດໝາຍ, ຄ້າຂາຍເຖື່ອນ, ຄ້າຂາຍຢາເສບ ຕິດຕາມຊາຍແດນ ທີ່ໄດ້ມີການພົວພັນປະສານສົມທົບກັນຢ່າງແໜ້ນແຟ້ນໃນການປະຕິບັດກົດໝາຍ ລາດຕະເວນຮ່ວມກັນ ເພື່ອຮັກສາຄວາມສະຫງົບ, ຄວາມເປັນລະບຽບຮຽບຮ້ອຍຕາມແມ່ນໍ້າລ້ານຊ້າງ-ແມ່ນໍ້າຂອງຂອງສອງ ປະເທດ ລາວ-ຈີນ,

ການພົວພັນຮ່ວມມືຊ່ວຍເຫຼືອຊຶ່ງກັນ ແລະ ກັນ ບົນພື້ນຖານຈິດໃຈສາມັກຄີ, ມິດຕະພາບ ແລະ ການຮ່ວມມືຮອບດ້ານ, ຍົກລະດັບການພົວພັນຮ່ວມມືປະສານສົມທົບລະ ຫວ່າງກຳລັງປ້ອງກັນຊາຍແດນຂອງສອງປະເທດໃຫ້ນັບມື້ກ້າວເຂົ້າສູ່ລວງເລິກ ເພື່ອພ້ອມກັນສ້າງຊາຍ ແດນລາວ-ຈີນ ໃຫ້ເປັນຊາຍແດນສັນຕິພາບ, ມິດຕະພາບ ແລະ ຮ່ວມມືພັດທະນາຮອບດ້ານ, ຕາມການລົງທຶນເປັນແຫຼ່ງທ່ອງທ່ຽວ (ສົນທິສັນຍາປັກກິງ) ໃຫ້ກາຍເປັນ 4 ຫຼ່ຽມເສດຖະກິດໃນອະນາຄົດ.
ຂ່າວ: ວໍລະສິດ ພິດສະຫາຍ.

ເມື່ອບໍ່ດົນມານີ້, ຄະນະບໍລິຫານງານຊາວໜຸ່ມ ແຂວງອັດຕະປື ໄດ້ເຂົ້າຮ່ວມຂະບວນຄາຣາວານ ທົ່ວແຂວງອັດຕະປື ເພື່ອຫວນຄືນເຂດທີ່ໝັ້ນການປະຕິວັດເຂດພາກໃຕ້ລາວ, ມີຄະນະນຳຂອງແຂວງ, ເມືອງ, ຄະນະຊາວໜຸ່ມແຂວງ, ຄະນະຊາວໜຸ່ມຮາກຖານ, ໜ່ວຍຮາກຖານຊາວໜຸ່ມ ຕະຫຼອດຮອດບັນດາສະມາ ຊິກຊາວໜຸ່ມ-ເຍົາວະຊົນ ອ້ອມຂ້າງແຂວງ ແລະ ເມືອງ ເຂົ້າຮ່ວມຢ່າງເປັນຂະບວນຟົດຟື້ນ.

ພິທີດັ່ງກ່າວ, ໄດ້ຈັດຂຶ້ນທີ່ຖານທີ່ໝັ້ນການປະຕິວັດເຂດພາກໃຕ້ລາວ ບ້ານອຸດົມໄຊ ເມືອງສະໜາມໄຊ ແຂວງອັດຕະປື ໂດຍມີຈຸດປະສົງເພື່ອເປັນການສະເຫຼີມສະຫຼອງວັນສ້າງຕັ້ງພັກປະຊາຊົນ ປະຕິວັດ ຄົບຮອບ 66 ປີ, ວັນຄຽດແຄ້ນຂອງປະຊາຊົນລາວ, ວັນເສຍອົງຄະ ແລະ ວັນເສຍສະຫຼະຊີວິດ ເພື່ອປະເທດຊາດ ຄົບຮອບ 75 ປີ, ອີກອັນໜຶ່ງ ເພື່ອເປັນການຫວນຄືນມູນເຊື້ອປະຫວັດຄວາມເປັນມາ ໃຫ້ສະມາຊິກຊາວໜຸ່ມ-ເຍົາວະຊົນ ແລະ ອະນຸຊົນທັນວາ ຮັບຮູ້ເຂົ້າໃຈເຖິງມູນເຊື້ອດັ່ງກ່າວ,

ໃນພິທີໄດ້ຮັບຟັງການເລົ່າມູນເຊື້ອປະຫວັດຄວາມ ເປັນມາການສ້າງຕັ້ງຖານທີ່ໝັ້ນການປະຕິວັດເຂດພາກໃຕ້ລາວ ຈາກສະຫາຍນາງ ບຸນນານ ບຸນນະແສງ ຄະນະປະຈຳພັກແຂວງ ຫົວໜ້າຄະນະໂຄສະນາອົບຮົມແຂວງ ໃຫ້ຮູ້ວ່າ: ເຖິງແມ່ນວ່າບັນດາວິລະບູລຸດ ແຕ່ລະໄລຍະ, ແຕ່ລະສະໄໝ ທີ່ມີຄວາມເກັ່ງກ້າສາມາດຕໍ່ສູ້ຂັບໄລ່ສັດຕູອອກຈາກຜືນແຜ່ນດິນລາວກໍຕາມ ແຕ່ພວກລ່າເມືອງຂຶ້ນແບບເກົ່າ ແລະ ແບບໃໝ່ ກໍໄດ້ກັບຄືນມາຮຸກຮານລາວຢ່າງໂຫດຫ້ຽມ, ປ່າເຖື່ອນ ແລະ ທະວີຄູນຂຶ້ນເລື້ອຍໆ ຍ້ອນມີການນຳພາຂອງພັກປະຊາຊົນ ປະຕິວັດລາວ ທີ່ສະຫຼາດສ່ອງໃສ, ໄດ້ຮ່ວມແຮງຮ່ວມໃຈເປັນຈິດໜຶ່ງໃຈດຽວເຕົ້າໂຮມຄວາມສາມັກຄີ, ບັນດານັກຮຽນ, ນັກສຶກສາ, ຊາວໜຸ່ມ-ໄວໜຸ່ມ ຕະຫຼອດຮອດປະຊາຊົນລາວບັນດາເຜົ່າແຕ່ເໜືອເຖິງໃຕ້ທີ່ມີນ້ຳຮັກຊາດ, ຮັກບ້ານເກີດເມືອງນອນ ກໍໄດ້ພ້ອມກັນລຸກຮືຂຶ້ນຕໍ່ສູ້ຕ້ານການຮຸກຮານຂອງຈັກກະພັດຢ່າງດຸເດືອດຂ້ຽວຂາດ, ຮ່ວມທຸກສຸກ, ຄຽງບ່າ, ຄຽງໄຫຼ່ ແລະ ເສຍສະຫຼະເລືອດເນື້ອເພື່ອຍາດເອົາຜືນແຜ່ນດິນລາວອອກຈາກການປົກຄອງຂອງ ລະບອບລ່າເມືອງຂຶ້ນແບບໃໝ່ ຈົນສາມາດຍາດໄຊຊະນະ ແລະ ໄດ້ປະກາດສະຖາປະນາ ໃນວັນທີ 2 ທັນວາ 1975 ເປັນປະທດ ສປປ ລາວ.

ດ້ວຍເຫດການນັ້ນ, ການນຳຂອງແຂວງ ໄດ້ເຫັນຄວາມສຳຄັນຫຼາຍ ຈຶ່ງໄດ້ຈັດຂະບວນຄາຣາວານ ສູ່ຖານທີ່ໝັ້ນປະຕິວັດເຂດພາກໃຕ້ລາວໃຫ້ຄະນະພັກ, ສະມາຊິກພັກ, ພະນັກງານ-ລັດຖະກອນ, ສະມາຊິກຊາວໜຸ່ມ-ໄວໜຸ່ມ ແລະ ສະມາຊິກເຍົາວະຊົນ-ອະນຸຊົນທັນວາ ຕະຫຼອດຮອດປະຊາຊົນຊາວແຂວງອັດຕະປື ໄດ້ຮູ້ເຖິງສະຖານທີ່ການປະຕິວັດເຂດພາກໃຕ້ລາວຢ່າງຈະແຈ້ງ.
(ຂ່າວ: ຄຳດິດ ມຽງລາວັນ)

ໃນວັນທີ 25 ມີນາ2021, ທີ່ສະຖາບັນການຕ່າງປະເທດ ໄດ້ຈັດພິທີປິດຊຸດຝຶກອົບຮົມວຽກງານການຕ່າງ ປະເທດ ໃຫ້ແກ່ພະນັກງານພະແນກການຕ່າງປະເທດແຂວງ ແລະນະຄອນຫລວງວຽງຈັນ ໂດຍໃຫ້ກຽດເຂົ້າຮ່ວມເປັນປະທານ ຂອງ ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ ພ້ອມທັງບັນດາຫົວຫນ້າກົມ,ຄະນະກົມ, ວິທະນາກອນ ແລະ ນັກສຳມະນາກອນຂອງຊຸດຝຶກອົບຮົມທັງຫມົດ 50 ທ່ານ.

ຊຸດຝຶກອົບຮົມວຽກງານຕ່າງປະເທດ ແມ່ນໄດ້ດຳເນີນມາແຕ່ວັນທີ 15 ມີນາ 2021 ເປັນຕົ້ນມາ, ເຊິ່ງມີຜູ້ເຂົ້າຮ່ວມຝຶກອົບຮົມທີ່ມາຈາກພະແນກການຕ່າງປະເທດແຕ່ລະແຂວງທົ່ວປະເທດ ທັງຫມົດ 20 ທ່ານ, ຍິງ 03 ທ່ານ. ການຈັດຝຶກອົບຮົມໃນຄັ້ງນີ້ ແມ່ນຫນຶ່ງໃນກິດຈະກຳ ທີ່ໄດ້ຮັບການສະຫນັບສະຫນູນຈາກມູນນິທິອາຊີ, ເພື່ອເປີດໂອກາດໃຫ້ແກ່ພະນັກງານທີ່ເຮັດວຽກໃນຂະແຫນງການຕ່າງປະເທດໄດ້ຮຽນຮູ້ ແລະ ເຂົ້າໃຈເລິກເຊິ່ງ ກ່ຽວກັບເອກະສານຕ່າງໆດ້ານວິຊາການໃນການເຄື່ອນໄຫວວຽກງານການຕ່າງປະເທດ ເພື່ອແນໃສ່ສ້າງຄວາມເຂົ້າໃຈທີ່ເປັນເອກະພາບໃນການຈັດຕັ້ງປະຕິບັດວຽກງານຂະແຫນງການຕ່າງປະເທດ ລະຫວ່າງສູນກາງ ແລະ ທ້ອງຖິ່ນໃຫ້ມີປະສິດທິຜົນຍິ່ງໆຂຶ້ນ.

ທ່ານ ໄມ ໄຊຍະວົງສ໌, ຫົວຫນ້າສະຖາບັນການຕ່າງປະເທດ, ໄດ້ຂຶ້ນກ່າວສະຫລຸບລາຍງານຜົນການຝຶກອົບຮົມຕະຫລອດໄລຍະ 10 ມື້ທີ່ຜ່ານມາ, ເຊິ່ງຜູ້ເຂົ້າຮ່ວມໄດ້ຮຽນຮູ້ວຽກງານວິຊາສະເພາະການຕ່າງປະເທດຫລາຍດ້ານທີ່ຈຳເປັນເຊັ່ນ: ນະໂຍບາຍການຕ່າງປະເທດຂອງພັກ ແລະ ລັດຖະບານໃນແຕ່ລະໄລຍະ, ສະພາບການພົ້ນເດັ່ນໃນພາກພື້ນ ແລະ ສາກົນ, ນະໂຍບາຍການຄ້າ ແລະ ສິດທິພິເສດຕ່າງໆ ທີ່ ສປປລາວໄດ້ຮັບ, ແຜນການພັດທະນາເສດຖະກິດ-ສັງຄົມ ຂອງ ສປປ ລາວ ໃນໄລຍະໃຫມ່, ສິດທິມະນຸດ, ການຕ້ານການຟອກເງິນ, ການຄ້າມະນຸດ, ວຽກງານຊາຍແດນ, ວຽກງານອາຊຽນ, ວຽກງານການຂ່າວ, ວຽກງານພິທີການ, ວຽກງານກົງສູນ, ການເຄື່ອນໄຫວການທູດໃນຊ່ອງທາງຕ່າງໆເຊັ່ນ: ການທູດປະຊາຊົນ, ການທູດເສດຖະກິດ ແລະ ການເຈລະຈາການທູດ ແລະ ວຽກງານອື່ນໆທີ່ກ່ຽວຂ້ອງ.

ແຕ່ລະຫົວຂໍ້ຂອງການຝຶກອົບຮົມ ແມ່ນໄດ້ເຊື້ອເຊີນເອົານັກວິທະຍາກອນ ຈາກຫລາຍພາກສ່ວນ ມາຂຶ້ນຫ້ອງບັນຍາຍເປັນຕົ້ນ: ບັນດາທ່ານທູດອາວຸໂສບຳນານ, ກົມທີ່ກ່ຽວຂ້ອງຈາກກະຊວງອຸດສາຫະກຳ ແລະ ການຄ້າ, ກະຊວງແຜນການ ແລະ ການລົງທຶນ ແລະ ກົມກິດຈະການການເມືອງ ແລະ ກົມຕ່າງໆພາຍໃນກະຊວງການຕ່າງປະເທດ. ເຖິງວ່າຊຸດຝຶກອົບຮົມຄັ້ງນີ້ຈະມີໄລຍະສັ້ນ ແຕ່ເນື້ອໃນຫລັກສູດ ລ້ວນແລ້ວແຕ່ມີຄວາມສຳຄັນ ແລະ ໄດ້ກັ່ນຕອງເອົາບັນດາຫນ້າວຽກທີ່ເປັນຫມາກຫົວໃຈຂອງວຽກງານໃນຂະແຫນງການຕ່າງປະເທດ, ເຊິ່ງເປັນການປະກອບອາວຸດທີ່ແຫລມຄົມ ໃຫ້ແກ່ພະນັກງານທ້ອງຖິ່ນນຳໄປຫມູນໃຊ້ເຂົ້າໃນວຽກງານຕົວຈິງ.

ໃນຕອນທ້າຍຂອງພິທີ, ທ່ານ ທອງຜ່ານ ສະຫວັນເພັດ ໄດ້ໃຫ້ກຽດໂອ້ລົມ ແລະ ໃຫ້ທິດຊີ້ນຳແກ່ຜູ້ເຂົ້າຮັບການຝຶກອົບຮົມ ເອົາໃຈໃສ່ ແລະ ສືບຕໍ່ເອົາຄວາມຮູ້ທີ່ໄດ້ຈາກການຝຶກອົບຮົມຄັ້ງນີ້ໄປປະຕິບັດ ແລະ ຈັດຕັ້ງຜັນຂະຫຍາຍເຂົ້າໃນຫນ້າທີ່ວຽກງານຂອງຕົນ ເພື່ອຍາດແຍ່ງເອົາການພົວພັນ ຮ່ວມມືກັບສາກົນ, ສະກັດກັ້ນ ແລະ ຕ້ານທຸກປະກົດການຫຍໍ້ທໍ້ທີ່ອາດເກີດຂຶ້ນ ເພື່ອພ້ອມກັນປະຕິບັດແນວທາງ ຂອງພັກປະຊາຊົນ ປະຕິວັດລາວ ໃຫ້ມີຜົນສຳເລັດຢ່າງຈົບງາມ.

ພັທ ດວງໃຈ ແກ້ວນະຄອນ ຮອງຫົວໜ້າ ປກສ ກຸ່ມສີຖານເໜືອ ເມືອງສີໂຄດຕະບອງ ນວ ໃຫ້ຮູ້ວ່າ: ໃນວັນທີ 23 ມີນາ 2021 ເວລາ 11ໂມງ 00 ນາທີ ເຈົ້າໜ້າທີ່ ປກສ ກຸ່ມສີຖານເໜືອໄດ້ຮັບລາຍງານຈາກພົນລະເມືອງດີວ່າ: ມີກຸ່ມໄວລຸ້ນມົ້ວສຸມຢາເສບຕິດຢູ່ເຮືອນພັກເຂດບ້ານໜອງສະໂນຄຳ ເມືອງສີໂຄດຕະບອງ ດັ່ງນັ້ນເຈົ້າໜ້າທີ່ ປກສ ກຸ່ມ ຈຶ່ງໄດ້ສົມທົບກັບເຈົ້າຂອງເຮືອນພັກ ລົງກວດກາຕົວຈິງພົບເຫັນອຸປະກອນເສບຢາບ້າຈຳນວນ 7 ອັນ ແລະ ມີຊາວໜຸ່ມຈໍານວນ 15 ຄົນ, ຍິງ 5 ຄົນ ກໍາລັງມົ້ວສຸມເສບຢາເສບຕິດ(ຢາບ້າ) ຈຶ່ງໄດ້ນໍາຕົວພວກກ່ຽວທັງ 15 ຄົນຂຶ້ນມາຫ້ອງການ ປກສ ກຸ່ມ ເພື່ອທຳການສອບສວນຈຶ່ງຮູ້ວ່າ: ໄວລຸ້ນ 15 ຄົນນີ້ແມ່ນໄດ້ມີການເຕົ້າໂຮມລວມຕົວກັນມາມົ້ວສຸມຢາເສບຕິດແທ້

ຈາກນັ້ນຈຶ່ງຂໍຄຳເຫັນຈາກກອງບັນຊາການ ປກສ ເມືອງສີໂຄດຕະບອງ ຕົງລົງໃຫ້ສຶກສາອົບ ຮົມພວກກ່ຽວ ພ້ອມຊີ້ແຈງໃຫ້ຜູ້ປົກຄອງຮັບຮູ້ ແລະ ເຂົ້າເຖິງຜົນຮ້າຍ ແລະ ໄພອັນຕະລາຍຂອງຢາເສບຕິດທີ່ມີຜົນອອກລິດຕໍ່ຈິດປະສາດ ແລະ ມີຜົນເສຍຕໍ່ສຸຂະພາບຂອງຜູ້ເສບ ແລະ ສ້າງຄວາມສູນເສຍທັງກຳລັງແຮງງານ ແລະ ຊັບສິນຂອງຄອບຄົວ ເຮັດໃຫ້ສັງຄົມບໍ່ມີຄວາມສະຫງົບ ແລະເປັນການກົດໜ່ວງທ່ວງດຶງ ໃນການສ້າງສາພັດທະນາປະເທດຊາດອີກດ້ວຍ.

ຕໍ່ກັບບັນຫາດັ່ງກ່າວ ກອງບັນຊາການ ປກສ ນະຄອນຫຼວງວຽງຈັນ ຮຽກຮ້ອງມາຍັງພໍ່ແມ່ປະຊາຊົນ ຈົ່ງເອົາໃຈໃສ່ຄຸ້ມຄອງເບິ່ງແຍງລູກຫຼານຂອງຕົນໃຫ້ດີຖ້າຫາກພົບເຫັນປະກົດການວ່າລູກຫຼານຂອງຕົນເຄື່ອນໄຫວໄປໃນທາງທີ່ບໍ່ຖືກຕ້ອງຂໍໃຫ້ຈິງໃຈລາຍງານຕໍ່ເຈົ້າໜ້າທີ່ ຊ່ວຍແກ້ໄຂສະກັດກັ້ນການກະທຳດັ່ງກ່າວ, ພ້ອມນີ້, ເຈົ້າຂອງກິດຈະການກໍ່ຕ້ອງເອົາໃຈໃສ່ຄຸ້ມຄອງກິດຈະການຂອງຕົນໃຫ້ດີ, ບໍ່ສ້າງເງື່ອນໄຂເອື້ອອຳນວຍໃຫ້ເກີດການຊື້-ຂາຍ ແລະມົ້ວສຸມຢາເສບຕິດໃນສະຖານທີ່ກິດຈະການຂອງທ່ານ ແລະ ຂໍຄວາມຮ່ວມມືຈາກພົນລະເມືອງດີ ຖ້າຫາກຮູ້ຂໍ້ມູນຂອງການຄ້າ-ຂາຍ, ມົ້ວສຸມຢາເສບຕິດ ແຈ້ງຂໍ້ມູນມາໃຫ້ເຈົ້າໜ້າທີ່ບ່ອນທີ່ໃກ້ທີ່ສຸດ ຫຼື ແຈ້ງທາງເບີວອດແອັບ 02028899774 ແລະ ແຈ້ງຜ່ານທາງຊ່ອງທາງເຟສບຸກ ປ້ອງກັນຄວາມສະຫງົບ ນະຄອນຫຼວງວຽງຈັນ.