ກຸ່ມແຮງງານລາວທີ່ໄດ້ເດີນທາງມາຈາກຕ່າງເມືອງ, ຕ່າງແຂວງໄດ້ຮັບອະນຸຍາດອອກຈາກສູນກັກຕົວຂອງເມືອງ ເພື່ອເມືອສືບຕໍ່ກັກຕົວເອງອີກຈໍານວນ 14 ວັນ ຢູ່ທີ່ບ້ານເຮືອນຂອງຕົນ

ໃນຕອນເຊົ້າຂອງວັນທີ 11 ພຶດສະພາ 2021 ນີ້, ຢູ່ທີ່ສູນກັກກັນໂຮງຮຽນປະຖົມພູຄໍາ ເມືອງວິລະບູລີ ທາງຄະນະສະເພາະກິດຂັ້ນເມືອງ ໄດ້ອະນຸຍາດໃຫ້ຜູ້ທີ່ໄດ້ກັກຕົວຄົບ 14 ວັນແລ້ວ ໄດ້ອອກຈາກສູນກັກກັນຂອງເມືອງ ເພື່ອກັບເມືອສືບຕໍ່ກັກຕົວເອງຢູ່ບ້ານເຮືອນຂອງໃຜລາວອີກຈໍານວນ 14 ວັນ ຕາມມາດຕະການປ້ອງກັນ, ຄວບຄຸມ ແລະສະກັດກັ້ນການແຜ່ລະບາດຂອງເຊື້ອພະຍາດໂຄວິດ-19 ທີ່ຂັ້ນເທິງໄດ້ວາງອອກ.

ໂດຍການໃຫ້ກຽດເຂົ້າຮ່ວມໃນພິທີຂອງທ່ານ ຄໍາຜຸຍ ສີບຸນເຮືອງ ກໍາມະການພັກແຂວງ ເລຂາພັກເມືອງ ເຈົ້າເມືອງໆວິລະບູລີ, ທ່ານ ບຸນເນືອງ ຈັນຫອມ ຄະນະປະຈໍາພັກເມືອງ ຮອງເຈົ້າເມືອງ ວິລະບູລີ ທັງເປັນຫົວໜ້າຄະນະສະພາະກິດເພື່ອປ້ອງກັນ, ຄວບຄຸມ ແລະສະກັດກັ້ນການແຜ່ລະບາດຂອງເຊື້ອພະຍາດໂຄວິດ-19 ຂັ້ນເມືອງ, ມີບັນດາທ່ານໃນຄະນະສະເພາະກິດຂັ້ນເມືອງ ພ້ອມດ້ວຍຄະນະຮັບຜິດຊອບສູນກັກກັນ ເຂົ້າຮ່ວມ.

ເມືອງ ວິລະບູລີ ແມ່ນໄດ້ກໍານົດເອົາໂຮງຮຽນປະຖົມສົມບູນພູຄໍາ ເປັນສູນກັກກັນຂອງເມືອງ ເຊິ່ງໄດ້ເລີ່ມນໍາເອົາຜູ້ທີ່ໄດ້ເດີນທາງມາຈາກຕ່າງເມືອງ, ຕ່າງແຂວງ ເພື່ອກັບມາຍັງພູມລໍາເນົາຂອງຕົນເອງ ເຂົ້າມາກັກຕົວຢູ່ໃນສູນດັ່ງກ່າວ ມາແຕ່ວັນທີ 27 ເມສາ ເປັນຕົ້ນມາ ເຊິ່ງມາຮອດປະຈຸບັນແມ່ນມີຈໍານວນຜູ້ເຂົ້າກັກຕົວທັງໝົດຈໍານວນ 62 ຄົນ, ຍິງ 17 ຄົນ ແລະຜູ້ໄດ້ຮັບອະນຸຍາດໃຫ້ອອກຈາກສູນກັກກັນໃນຊຸດທີ 1 ນີ້ແມ່ນມີຈໍານວນທັງໝົດ 21 ຄົນ, ຍິງ 6 ຄົນ, ຍັງຄ້າງກັກຕົວຢູ່ໃນສູນ 41 ຄົນ, ຍິງ 11 ຄົນ. ໃນໂອກາດນີ້ທ່ານເຈົ້າເມືອງ ວິລະບູລີ ກໍ່ໄດ້ໃຫ້ກຽດໂອ້ລົມຕໍ່ກັບຜູ້ທີ່ໄດ້ຮັບອະນຸຍາດໃຫ້ອອກຈາກສູນກັກກັນໃນຄັ້ງນີ້ວ່າ: ພາຍຫຼັງທີ່ໄດ້ອອກຈາກສູນກັກຕົວຂອງເມືອງແລ້ວ ກໍ່ໃຫ້ເອົາໃຈໃສ່ສືບຕໍ່ເມືອກັກຕົວຢູ່ບ້ານເຮືອນຂອງໃຜລາວອີກຈໍານວນ 14 ວັນ, ປະຕິບັດຕາມບັນດາມາດຕະການຕ່າງໆ ທີ່ທາງຂັ້ນເທິງໄດ້ວາງງອອກຢ່າງເຂັ້ມງວດ ເປັນຕົ້ນແມ່ນ:

ການໃສ່ຜ້າປິດປາກ-ດັງ, ໝັ່ນລ້າງມືໃສ່ສະບູ ຫຼື ເຈວລ້າງມື, ຮັກສາໄລຍະຫ່າງທາງສັງຄົມ, ເອົາໃຈໃສ່ຕິດຕາມເບິ່ງອາການຂອງຕົນເອງໃນແຕ່ລະວັນຈົນກວ່າຈະຄົບ 14 ວັນ, ຫ້າມບໍ່ໃຫ້ມີການຊຸມແຊວກັບຄົນອື່ນ, ພ້ອມນີ້ກໍ່ໃຫ້ສຸມໃສ່ໃນການຊ່ວຍວຽກຄອບຄົວເຮັດການຜະລິດກະສິກໍາ ເພື່ອຜະລິດສະບຽງອາອາຫານໃຫ້ພຽງພໍ ກັບຄວາມຕ້ອງການຂອງຄອບຄົວ ແລະ ສັງຄົມ, ຈາກນັ້ນທາງຄະນະສະເພາະກິດເພື່ອປ້ອງກັນ, ຄວບຄຸມ ແລະ ສະກັດກັ້ນການລະບາດຂອງພະຍາດໂຄວິດ-19 ຂັ້ນເມືອງ ກໍ່ຍັງໄດ້ມອບໃບຢັ້ງຢືນອອກຈາກສູນໃຫ້ພວກກ່ຽວ ເພື່ອນໍາໄປຢັ້ງຢືນຕໍ່ອໍານາດການປົກຄອງບ້ານຕໍ່ໄປ./.

ສະຫວັນພັດທະນາ ຂ່າວ

ໃນວັນທີ 11 ພຶດສະພາ 2021, ທີ່ກະຊວງປ້ອງກັນປະເທດ ໄດ້ມີກອງປະຊຸມ ຄັ້ງປະຖົມມະລຶກ ຄະນະກໍາມະການຄຸ້ມຄອງໄພພິບັດ ຂັ້ນສູນກາງ (ຄພສ) ໂດຍການເປັນປະທານຂອງທ່ານ ພົອ ຈັນສະໝອນ ຈັນຍາລາດ ຮອງນາຍົກລັດຖະມົນຕີ, ລັດຖະມົນຕີ ກະຊວງປ້ອງກັນປະເທດ ປະທານຄະ ນະກຳມະການ ຄພສ, ມີບັນດາລັດຖະມົນຕີ, ຮອງລັດຖະມົນຕີ ໃນຂະແໜງການກ່ຽວຂ້ອງເຂົ້າຮ່ວມ.

ກອງປະຊຸມດັ່ງກ່າວ, ຈະໄດ້ພ້ອມກັນປະກອບຄຳຄິດເຫັນ ແລະ ເປັນເຈົ້າການຄົ້ນຄວ້າ, ພິຈາລະ ນາຮັບຮອງ ຕໍ່ບັນດາເອກະສານທີ່ທາງກອງເລຂາ ຄະນະກໍາມະການຄຸ້ມຄອງໄພພິບັດ ໄດ້ນໍາສະເໜີ ເປັນ ຕົ້ນ ບົດລາຍງານສະພາບໄພພິບັດ ແລະ ການແກ້ໄຂຊ່ວຍເຫ]nອສຸກເສີນ ໄລຍະ 6 ເດືອນຕົ້ນປີ 2021, ແຜນຈຸດສຸມການການກຽມພ້ອມຕອບໂຕ້ໄພພິບັດ ປີ 2021 ແລະ ຮ່າງຂໍ້ຕົກລົງວ່າດ້ວຍການແບ່ງຄວາມຮັບຜິດຊອບ ຂອງຄະນະກຳມະການຄຸ້ມຄອງໄພພິບັດຂັ້ນສູນກາງ.ໃນໂອກາດດັ່ງກ່າວ, ທ່ານ ພົອ ຈັນສະໝອນ ຈັນຍາລາດ ໄດ້ກ່າວວ່າ: ກອງປະຊຸມຄັ້ງນີ້, ຖືວ່າເປັນຄັ້ງທໍາອິດ ຂອງຄະນະກໍາມະການຄຸ້ມຄອງໄພພິບັດ ພາຍຫລັງທີ່ ຂໍ້ຕົກລົງແຕ່ງຕັ້ງຄະນະກຳມະການຄຸ້ມຄອງໄພພິບັດຂັ້ນສູນກາງ ສະບັບເລກທີ 35/ນຍລົງວັນທີ 28 ເມສາ 2021, ໄດ້ອະນຸມັດຕາມກົດ ໝາຍວ່າດ້ວຍການຄຸ້ມຄອງໄພພິບັດ ເລກທີ 71/ສພຊ, ລົງວັນທີ 24 ມິຖຸນາ 2019 ແລະ ດໍາລັດ ວ່າດ້ວຍການຈັດຕັ້ງ ແລະ ການເຄື່ອນໄຫວ ຂອງຄະນະກຳມະການຄຸ້ມຄອງໄພພິບັດ ສະບັບເລກທີ 239/ນຍ, ລົງວັນທີ 18 ພຶດສະພາ 2020.

ປັດຈຸບັນ, ບັນຫາໄພພິບັດ ແລະ ຄວາມສ່ຽງຈາກການປ່ຽນແປງຂອງດິນຟ້າອາກາດ ເປັນຕົ້ນ: ໄພນໍ້າຖ້ວມ, ແຜ່ນດິນໄຫວ, ຄື້ນຊຶນາມິ, ລົມພະຍຸພັດ, ການລະບາດຂອງພະຍາດ, ສັດຕູພືດ, ອື່ນໆ ຖືວ່າຍັງເປັນບັນຫາທີ່ຍັງສືບຕໍ່ເກີດຂື້ນຖີ່ ສ້າງຄວາມເສຍຫາຍ ແລະ ສູນເສຍ ຕໍ່ສຸຂະພາບ, ຊີວິດ, ຊັບສິນ ແລະ ການດໍາລົງຊີວິດຂອງປະຊາຊົນບັນດາເຜົ່າ, ສ້າງຄວາມເສຍຫາຍຕໍ່ພື້ນຖານໂຄງລ່າງເສດຖະກິດ, ສັງຄົມ ແລະ ສິ່ງແວດລ້ອມ, ເປັນການບັນທອນ ແລະ ທ່ວງດຶງຕໍ່ການພັດ ທະນາເສດຖະກິດ-ສັງຄົມ ຂອງບັນດາປະເທດ ໃນໂລກ ລວມທັງ ຢູ່ ສປປ ລາວ ຂອງພວກເຮົາ, ໃນນີ້ ລວມທັງ ບັນຫາການລະບາດຂອງພະຍາດ ໂຄວິດ-19 ທີ່ຍັງສືບຕໍ່ ແລະ ສົ່ງຜົນກະທົບຢ່າງໜັກໜ່ວງ ຕໍ່ສຸຂະພາບ, ຊີວິດ ແລະ ການດໍາລົງຊີວິດຂອງປະຊາຊົນ, ອື່ນໆ. ສະເພາະຢູ່ ສປປ ລາວ ຂອງພວກເຮົາ, ບັນຫາຜົນກະທົບຂອງໄພພິບັດ ແມ່ນໜັກໜ່ວງ ແລະ ສ້າງຄວາມເສຍຫາຍຫລາຍຂຶ້ນແຕ່ລະປີ, ສັງລວມແລ້ວ ໃນໄລຍະ 5 ປີຜ່ານມາ ໄດ້ມີເຫດການໄພພິບັດເກີດຂຶ້ນທັງໝົດ 235 ຄັ້ງ, ສົ່ງຜົນກະທົບໂດຍກົງຕໍ່ປະຊາຊົນ 1.860.165 ຄົນ, ເສຍຊີວິດ 121 ຄົນ, ສ້າງຄວາມເສຍຫາຍ ແລະ ສູນເສຍ ຕໍ່ໂຄງລ່າງພື້ນຖານເສດຖະກິດ-ສັງຄົມ ແລະ ສິ່ງແວດລ້ອມ ຄິດເປັນມູນຄ່າເສຍຫາຍທັງໝົດປະມານ 5.538.247.383.912 ກີບ.

ເຫດການທີ່ພົ້ນເດັ່ນ ແມ່ນໄພນໍ້າຖ້ວມ ໃນປີ 2018 ທີ່ສາເຫດມາຈາກ ເຂື່ອນເຊປ່ຽນ-ເຊນໍ້ານ້ອຍແຕກພັງ ສົ່ງຜົນກະທົບປະຊາຊົນ ຢູ່ ເມືອງ ສະໜາມໄຊ ແຂວງອັດຕະປື; ໄພ ນໍ້າຖ້ວມສົ່ງຜົນກະທົບຢູ່ 6 ແຂວງພາກກາງ ແລະ ພາກໄຕ້ ປີ 2019 ແລະ ປີ 2020 ນໍ້າຖ້ວມໜັກຢູ່ ແຂວງ ສະຫວັນນະເຂດ.ເລີ່ມແຕ່ທ້າຍ ປີ 2019 ຈົນເຖິງປັດຈຸບັນ, ຜົນກະທົບຈາກການແຜ່ລະບາດຂອງພະຍາດ ໂຄວິດ- 19 ຍິ່ງເພີ່ມຄວາມອັນຕະລາຍຕໍ່ການລົງຊີວິດຂອງປະຊາຊົນ, ຊຶ່ງໄດ້ສົ່ງຜົນກະທົບຢ່າງໃຫຍ່ຫລວງ ຕໍ່ໂຄງສ້າງຂອງສັງຄົມ, ເສດຖະກິດ, ເຮັດໃຫ້ການຜະລິດສົ່ງອອກ-ນຳເຂົ້າ ຖືກຍຸດສະຫງັກ, ຫລາຍທຸລະກິດຫ້າງຮ້ານ ຖືກຍຸດກິດຈະການ, ແຮງງານຖືກພັກວຽກ ແລະ ຫວ່າງງານ. ແນ່ນອນວ່າ, ສປປ ລາວ ທີ່ເປັນປະເທດພວມສູ້ຊົນ ພັດທະນາໃຫ້ຫລຸດພົ້ນອອກຈາກຄວາມທຸກຍາກ, ມາຖືກຄຸກຄາມຈາກໄພພິບັດທໍາມະຊາດ ທີ່ເກີດຢ່າງຮຸນແຮງຂຶ້ນຊໍ້າແລ້ວຊໍ້າອີກ ຍິ່ງຈະເຮັດໃຫ້ການພັດທະນາເສດຖະກິດ-ສັງຄົມ ພົບກັບອຸປະສັກ ບໍ່ສາມາດບັນລຸຕາມຄາດໝາຍທີ່ວາງໄວ້.

ທ່ານ ພົອ ຈັນສະໝອນ ຈັນຍາລາດ ກ່າວຕື່ມວ່າ: ກອງປະຊຸມຄະນະກໍາມະການຄຸ້ມຄອງໄພ ພິບັດຂັ້ນສູນກາງຄັ້ງນີ້, ສຸດທີ່ມີຄວາມໝາຍສໍາຄັນ ແລະ ເປັນຄັ້ງທໍາອິດ ທີ່ພວກເຮົາໄດ້ພົບປະຊຸມກັນ ຕາມຂໍ້ຕົກລົງ ຂອງນາຍົກລັດຖະມົນຕີ ສະບັບເລກທີ 35/ນຍ, ຊຶ່ງພວກເຮົາຈະໄດ້ຮ່ວມກັນຄົ້ນຄວ້າ ປະ ກອບຄໍາເຫັນ ແລະ ເອກະພາບ ຕໍ່ກັບຮ່າງຂໍ້ຕົກລົງການແບ່ງຄວາມຮັບຜິດຊອບຂອງຄະນະກໍາມະການຄຸ້ມຄອງໄພພິບັດຂັ້ນສູນກາງ; ນໍາສະເໜີແລກປ່ຽນຂໍ້ມູນ ກ່ຽວກັບການກຽມຄວາມພ້ອມຮັບມືກັບໄພພິບັດໃນລະດູຝົນປີ 2021 ຂອງບັນດາຂະແໜງການ ໃນຄະນະກໍາມະການຄຸ້ມຄອງໄພພິບັດຂັ້ນສູນກາງ ຕາມທີ່ໄດ້ກໍານົດໃນແຜນການກຽມພ້ອມຕອບໂຕ້ໄພພິບັດປະຈໍາ ປີ 2021 ທີ່ເຊັນຮັບຮອງໄປແລ້ວນັ້ນ, ລວມທັງ ຮ່ວມກັນປຶກສາຫາລື ແລະ ເອກະພາບ ໃນກົນໄກການປະສານງານ ແລະ ການລາຍງານສະພາບໄພ ພິບັດ ແລະ ການຊ່ວຍເຫລືອໄພພິບັດ ທັງໄລຍະສຸກເສີນ ແລະ ການຟື້ນຟູຄືນຫລັງໄພພິບັດ.

ຂ່າວ: ສົມຫວັງພາບ: ເກດສະໜາ

ລາຍງານຈາກ ວິທະຍຸກະຈາຍສຽງແຫ່ງຊາດ Lao National Radio ໃຫຮູ້ວ່າ: ທ່ານນາງຄໍາຈັນ ວົງແສນບຸນ ຮອງລັດຖະມົນຕີກະຊວງແຜນການ ແລະການລົງທຶນ ໃຫ້ຮູ້ ໃນໂອກາດເຂົ້າຮ່ວມຖະແຫລງຂ່າວນຳກອງເລຂາຄະນະສະເພາະກິດ ເພື່ອປ້ອງ ກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ໃນວັນທີ 10 ພຶດສະ ພາ 2021 ທີ່ກະຊວງສາທາລະນະສຸກວ່າ: ນັບແຕ່ມີການລະບາດຂອງພະຍາດໂຄວິດ 19 ໃນຕົ້ນປີ 2020. ລັດຖະບານໄດ້ໃຫ້ບູລິມະສິດຄວາມສຳຄັນໃນການແກ້ໄຂຜົນກະທົບຂອງການລະບາດພະຍາດໂຄວິດ 19 ຕໍ່ເສດຖະກິດ ສປປ ລາວ,

ມາຮອດປະຈຸບັນລັດຖະບານໄດ້ມີມາດຕະການອະນຸຍາດໃຫ້ພາກການຜະລິດ ແລະ ບໍລິການສາມາດດຳເນີນທຸລະກິດໄດ້, ແຕ່ໃຫ້ສືບຕໍ່ປະຕິບັດມາດຕະການປ້ອງກັນຢ່າງເຂັ້ມງວດ, ເພື່ອເຮັດໃຫ້ເສດຖະກິດມີສະພາບປົກກະຕິ, ເຖິງຢ່າງໃດກໍ່ຕາມຫລາຍຂະແໜງການຜະລິດ ແລະ ການບໍລິການເປັນຕົ້ນຂະແໜງການທ່ອງທ່ຽວ ແລະ ການບໍລິການທີ່ປິ່ນອ້ອມ ແລະ ຂະແໜງອຸດສາຫະກຳປຸງແຕ່ງ ຍັງສືບຕໍ່ໄດ້ຮັບຜົນກະທົບຈາກການລະບາດ ພະຍາດໂຄວິດ 19 ຮອບໃໝ່; ສະນັ້ນ ລັດຖະບານໄດ້ຄົ້ນຄ້ວາມາດຕະການຟື້ນຟູເສດຖະກິດຈຳນວນໜຶ່ງເພື່ອຊວ່ຍຊຸກຍູ້ໃຫ້ການຜະລິດ ແລະ ການບໍລິການໃຫ້ມີການຂະຫຍາຍຕົວໃຫ້ຫລາຍເທົ່າທີ່ຈະເປັນໄປໄດ້.

ເພື່ອສືບຕໍ່ຊຸກຍູ້ການດໍາເນີນທຸລະກິດ ກໍ່ຄື ການອະນຸຍາດການລົງທຶນ ຢູ່ ສປປ ລາວ ໃຫ້ເປັນປົກກະຕິໃນຊ່ວງໄລຍະການແຜ່ລະບາດຂອງພະຍາດໂຄວິດ 19 ຮອບໃໝ່ນີ້, ທາງກະຊວງ ແຜນການ ແລະ ການລົງທຶນ ໄດ້ມີການຈັດຕັ້ງປະຕິບັດຄືດັ່ງນີ້:

ໄດ້ສຸມໃສ່ຜັນຂະຫຍາຍການຈັດຕັ້ງປະຕິບັດ ຄໍາສັງເລກທີ 15 ຂອງນາຍົກລັດຖະມົນຕີ ເພື່ອແກ້ໄຂຜົນກະທົບຈາກການລະບາດຂອງພະຍາດ ໂຄວິດ 19, ກະຊວງ ແຜນການ ແລະ ການລົງທຶນ ໄດ້ສືບຕໍ່ຊຸກຍູ້ໃຫ້ບັດດາວິສາຫະກິດຕ່າງໆໃຫ້ຈັດຕັ້ງປະຕິບັດຕາມຄໍາສັ່ງ ແລະ ແຈ້ງການຂອງພາກສ່ວນກ່ຽວຂ້ອງໄດ້ວາງອອກ, ພ້ອມທັງຊຸກຍູ້ໃຫ້ບັນດາວິສາຫະກິດຕ່າງໆໃຫ້ສາມາດດໍາເນີນກິດຈະການຂອງຕົນເອງໄດ້ ເປັນຕົ້ນແມ່ນໂຄງການໄຟຟ້າ, ໂຄງການບໍ່ແຮ່, ໂຄງການທາງລົດໄຟ, ທາງດ່ວນ, ພ້ອມທັງການອໍານວຍຄວາມສະດວກໃຫ້ນໍາເຂົ້າ ຊ່ຽວຊານ ແລະ ແຮງງານຕ່າງປະເທດເຂົ້າມາຮັບໃຊ້ໃນໂຄງການຕ່າງໆ ຕາມກໍານົດເວລາ ໂດຍໃຫ້ປະຕິບັດມາດຕະການຂອງຄະນະສະເພາະກິດ ໂຄວິດ 19 ຢ່າງເຂັ້ມງວດ.

ກະຊວງແຜນການ ແລະ ການລົງທຶນ ກໍ່ໄດ້ອອກແຈ້ງການ ສະບັບເລກທີ 0449/ກຜທ.ຫຂສພ.05 ຄັ້ງວັນທີ 27 ເມສາ 2021 ວ່າດ້ວຍການດໍາເນີນກິດຈະການຂອງບັນດາໂຮງງານ, ບໍລິສັດ, ຫ້າງຮ້ານໃນເຂດເສດຖະກິດພິເສດ ພ້ອມທັງໃຫ້ແຕ່ລະເຂດສືບຕໍ່ການຈັດຕັ້ງປະຕິບັດມາດຕະການຄວບຄຸມການແຜ່ລະບາດຂອງພະຍາດໂຄວິດ 19 ຢ່າງເຂັ້ມງວດ, ໂດຍສະເພາະໂຮງງານຕັດຫຍີບ ແລະ ໂຮງງານຜະລິດເກີບໃນເຂດເສດຖະກິດພິເສດ ແມ່ນໃຫ້ຈັດຕັ້ງປະຕິບັດຕາມແຈ້ງການເລກທີ 0323/ອຄ.ກອຫ ຂອງກະຊວງອຸດສາຫະກໍາ ແລະ ການຄ້າວາງອອກ. ສໍາລັບກິດຈະການອື່ນໆ ທີ່ເຄື່ອນໄຫວຢູ່ໃນເຂດເສດຖະກິດພິເສດ ສືບຕໍ່ຈັດຕັ້ງປະຕິບັດມາດຕະການສະກັດກັ້ນທີ່ ກະຊວງ ຜທ ວາງອອກ ຢ່າງເດັດຂາດ. ຜ່ານການຈັດຕັ້ງປະຕິບັດຕົວຈິງເຫັນວ່າວິສາຫະກິດຈໍານວນໜຶ່ງກໍ່ໄດ້ຢຸດການເຄື່ອນໄຫວ ແລະ ປິດກິດຈະການຊົ່ວຄາວ, ແຕ່ກໍ່ມີຈໍານວນໜຶ່ງ ສືບຕໍ່ດຳເນີນກິດຈະການ ເນື່ອງຈາກວ່າມີການຕິດພັນກັບ ສັນຍາຜູກພັນກັບຄູ່ຄ້າ ແຕ່ກໍ່ໄດ້ ປະຕິບັດມາດຕະການຕາມຄະນະສະເພາະກິດວາງອອກຢ່າງເຄັ່ງຄັດ ເປັນຕົ້ນແມ່ນ ການສິດຢາຂ້າເຊື້ອ, ວັດແທກອຸ່ນນະພູມ, ໃສ່ຜ້າອັດປາກ-ດັງ, ເຈວລ້າງມື ແລະ ສັບປ່ຽນຜຽນກັນເພື່ອທໍາການຜະລິດ, ຮັກສາໄລຍະຫ່າງ ຢ່າງເຄັ່ງຄັດ. ພ້ອມທັງປຸກລະດົມໃຫ້ກໍາມະກອນ ເຂົ້າໃຈສະພາບ ແລະ ໄປກວດກາສຸຂະພາບ ພ້ອມທັງ ສິດຢາວັກຊີນ ຕາມຄະນະສະເພາະກິດວາງອອກ.

ສໍາລັບນະໂຍບາຍດ້ານການເງີນ ຕໍ່ກັບຜູ້ລົງທຶນ, ຫົວໜ່ວຍທຸລະກິດໃດ ທີ່ໄດ້ຮັບຜົນກະທົບຈາກການແຜ່ລະບາດຂອງພະຍາດໂຄວິດ 19, ຊຶ່ງເຮັດໃຫ້ ບໍລິສັດມີການຂາດທຶນ. ຜູ້ດໍາເນີນທຸລະກິດ ທີ່ເສຍອາກອນກໍາໄລຕາມລະບົບການຖືບັນຊີ ທີ່ມີການຂາດທຶນໃນປີ, ໂດຍມີການຢັ້ງຢືນຈາກອົງການກວດສອບບັນຊີ ຫຼື ບໍລິສັດກວດສອບບັນຊີເອກະລາດ ແລະ ມີການຮັບຮູ້ຈາກຂະແໜງ ການສວຍສາອາກອນ ແມ່ນມີສິດຍົກເງີນຂາດທຶນດັ່ງກ່າວ ໄປຫັກອອກຈາກກໍາໄລຂອງປີຖັດໄປ ພາຍໃນເວລາ ຫ້າປີ ຕິດຕໍ່ກັນ. ສໍາລັບທຸລະກິດກ່ຽວກັບການປູກຝັງ, ລຽງສັດ ທີ່ຂາດທຶນຍ້ອນເກີດພະຍາດລະບາດ ຫຼື ໄພພິບັດຈາກທໍາມະຊາດ ມີສິດຍົກເງີນຂາດທຶນດັ່ງກ່າວໄປຫັກອອກຈາກກໍາໄລຂອງປີຖັດໄປ ບໍ່ເກີນ 10 ປີ. ເມື່ອໝົດກໍານົດແລ້ວ ເງີນຂາດທຶນທີ່ຍັງຫັກບໍ່ໝົດນັ້ນ ຈະບໍ່ອະນຸຍາດໃຫ້ຫັກຕໍ່ໄປອີກ ຍົກເວັ້ນກິດຈະການທີ່ມີລາຍຮັບ ຫຼື ກໍາໄລ ຫຼັງຈາກການລົງທຶນເກີນກວ່າ ຫ້າປີ. ອີງຕາມມາດຕາທີ 23 ການຍົກເງີນຂາດທຶນປະຈໍາປີ ຂອງກົດໝາຍວ່າດ້ວຍ ອາກອນລາຍໄດ້, ສະບັບເລກທີ 67/ສພຊ, ລົງວັນທີ 18 ມີຖຸນາ 2019.

ພ້ອມກັນນີ້, ໃນການແກ້ໄຂບັນຫາຕ່າງໆທາງດ້ານເສດຖະກິດໃນໄລຍະການແຜ່ລະບາດຂອງພະ ຍາດໂຄວິດ 19, ກະຊວງແຜນການ ແລະ ການລົງທຶນ ນໍາໂດຍ ພະນະທ່ານ ສອນໄຊ ສີພັນດອນ, ຮອງນາຍົກລັດຖະມົນຕີ, ລັດຖະມົນຕີ ກະຊວງແຜນການ ແລະ ການລົງທຶນ ໄດ້ເປັນຫົວໜ້າຄະນະສະເພະກິດດັ່ງກ່າວ ໄດ້ລົງໄປຢ້ຽມຢາມຕິດຕາມຊຸກຍູ້ແກ້ໄຂບັນຫາ ບັນດາຫົວໜ່ວຍທຸລະກິດ ແລະ ຮັບຄໍາຮ້ອງຮຽນຈາກຜູ້ລົງທຶນພາຍໃນ ແລະ ຕ່າງປະເທດ ໃນການແກ້ໄຂບັນຫາຕ່າງໆ ເພື່ອໃຫ້ບັນດາຫົວໜ່ວຍທຸລະກິດ ສາມາດຜ່ານຜ່າບັນຫາຂໍ້ຫຍຸ້ງຍາກຕ່າງໆໃນໄລຍະການແຜ່ລະບາດຂອງພະຍາດໂຄວິດ 19 ແລະ ຊີ້ນໍາການແກ້ໄຂພາຍຫຼັງການແຜ່ລະບາດສີ້ນສຸດລົງ.

ສໍາລັບວຽກງານການອໍານວຍຄວາມສະດວກໃຫ້ຜູ້ລົງທຶນເປັນຕົ້ນແມ່ນ ວຽກການບໍລິການການລົງທຶນ ໂດຍຜ່ານຫ້ອງການບໍລິການການລົງທຶນປະຕູດຽວ ພວກເຮົາ ຍັງສືບຕໍ່ຈັດຕັ້ງປະຕິບັດຕາມປົກກະຕິ, ນັກລົງທຶນສາມາດດາວໂຫລດເອົາແບບຟອມຢູ່ເວັບໄຊຂອງກົມສົ່ງເສີມການລົງທຶນ ແລະ ສາມາດຢື່ນແບບຟອມຢູ່ຫ້ອງການປະຕູດຽວຂອງກົມສົ່ງເສີມການລົງທືນ. ໂດຍອີງຕາມຄໍາສັ່ງເລກທີ 15/ນຍ ວ່າດ້ວຍ ການເພີ່ມທະວີມາດຕະການສະກັດກັ້ນ, ຄວບຄຸມ ແລະ ກຽມຄວາມພ້ອມຮອບດ້ານເພື່ອຕ້ານພະຍາດໂຄວິດ19, ກະຊວງແຜນການ ແລະ ການລົງທຶນ ໄດ້ມີແຈ້ງການ ແລະ ອອກຂໍ້ຕົກລົງໃຫ້ພະນັກງານແບ່ງກັນມາປະຈໍາການ, ສ່ວນການຈັດກອງປະຊຸມກັບຂະແໜງການ ແລະ ທ້ອງຖິ່ນແມ່ນມີທັງ ຮູບແບບກອງປະຊຸມທາງໄກ (ອອນລາຍ) ແລະ ຮູບແບບພົບປະກັນເຊຶ່ງໜ້າ ຊຶ່ງຈໍາກັດຈໍານວນຜູ້ເຂົ້າຮ່ວມ ແລະ ຮັກສາໄລຍະຫ່າງຕາມມາດຕະການປ້ອງກັນພະຍາດ ໂຄວິດ19.

ພ້ອມນີ້ກໍ່ໄດ້ຈັດຕັ້ງປະຕິບັດວຽກງານປີນອ້ອມດັ່ງນີ້:

• ຂະບວນການຄົ້ນຄວ້າການຂໍອະນຸຍາດການລົງທຶນ, ເວລາທີ່ພວກເຮົາໄດ້ຮັບເອກະສານຂໍລົງທຶນຕ່າງໆ ພວກເຮົາກໍ່ໄດ້ສົ່ງຂໍຄໍາເຫັນນໍາຂະແໜງການກ່ຽວຂ້ອງເປັນປົກກະຕິ.
• ກອງປະຊຸມວິຊາການເພື່ອຄົ້ນຄ້ວາສະເໜີຂໍອະນຸມັດໂຄງການ ແມ່ນໄດ້ຈັດເປັນປົກກະຕິທັງໃນຮູບແບບ ເຊີນຂະແໜງການເຂົ້າຮ່ວມແບບຊ່ອງໜ້າ, ແບບອອນລາຍກັບຂະແໜງ ແລະ ທ້ອງຖີ່ນ.
• ໃນດ້ານນະໂຍບາຍຕ່າງໆເຊັ່ນ: ນະໂຍບາຍການນໍາເຂົ້າວັດຖຸດີບ, ວັດຖຸປະກອນ ແລະ ກົນຈັກ ແມ່ນສືບຕໍ່ໃຫ້ນະໂຍບາຍສົ່ງເສີມຕາມປົກກະຕິ, ຜູ້ລົງທຶນສາມາດ ມາຍື່ນສະເໜີ ແຜນນໍາເຂົ້າປະຈໍາປີ ເພື່ອມາດໍາເນີນການຜະລິດທຸລະກິດຂອງຕົນເອງໄດ້ຕະຫຼອດເວລາ ວັນລັດຖະການ, ແຕ່ຮູບແບບການຈັດກອງປະຊຸມກັບຂະແໜງການແມ່ນເຊັນດຽວກັນກັບກອງປະຊຸມຄົ້ນຄວ້າໂຄງການຂໍລົງທຶນ. ພວກເຮົາຈະສົ່ງຂໍຄໍາເຫັນຈາກຂະແໜງການເພື່ອມີຄໍາເຫັນ.ໃນສ່ວນນຶ່ງ ໂດຍອີງຕາມຄໍາເຫັນຂອງຂະແໜງການທີ່ສົ່ງມາແມ່ນສາມາດພິຈາລະນາອະນຸມັດການສະເໜີຂອງຜູ້ລົງທຶນໄດ້ເລີຍ ແລະ ອີກສ່ວນນຶ່ງແມ່ນຈະໄດ້ຈັດກອງປະຊຸມວິຊາການແບບທາງໄກ (ອອນລາຍ) ເຊັ່ນດຽວກັນກັບການອະນຸມັດໂຄງການ ເພື່ອໃຫ້ນະໂຍບາຍສົ່ງເສີມການລົງທຶນ ຍົກເວັ້ນວັດຖຸດີບ, ອຸປະກອນກົນຈັກຕ່າງໆໄດ້ທັນກໍານົດເວລາ.
• ນອກຈາກນີ້, ຍັງໄດ້ອໍານວຍຄວາມສະດວກ ໃນການຄົ້ນຄວ້າ ແລະ ພິຈາລະນາອະນຸມັດ ອອກໜັງສືອະນຸຍາດການຄໍ້າປະກັນເອົາສິນຄ້າອອກຈາກດ່ານກ່ອນ (IM8), ໜັງສືອະນຸຍາດລົບລ້າງປ້າຍພາຫະນະທີ່ໄດ້ຮັບນະໂຍບາຍ, ໜັງສືອະນຸຍາດນໍາອອກຄືນສຳລັບວັດຖຸປະກອນ ແລະ ພາຫະນະ, ໜັງສືຕໍ່ອາຍຸການນໍາເຂົ້າຊົ່ວຄາວສຳລັບວັດຖຸປະກອນ ແລະ ພາຫະນະ ໃຫ້ແກ່ບັນດາວິສາຫະກິດ ກໍານົດເວລາພາຍໃນ 05 ວັນລັດຖະການ.
• ວຽກງານການໃຫ້ບໍລິການອໍານວຍຄວາມສະດວກເຂົ້າ-ອອກ, ວີຊາ (visa) ຂອງນັກທຸລະກິດຕ່າງປະເທດ, ພວກເຮົາກໍ່ຍັງສືບຕໍ່ໃຫ້ການບໍລິການຕາມກົນໄກແບບປົກກະຕິ ພຽງແຕ່ຕ້ອງໄດ້ຜ່ານຄະນະສະເພາະກິດສະກັດກັ້ນ ແລະ ຄອບຄຸມການແຜ່ລະບາດຂອງພະຍາດໂຄວິດ 19 ອະນຸມັດສາກ່ອນ. ການເຂົ້າມາຂອງນັກລົງທຶນຕ້ອງໄດ້ເຂົ້າດ່ານທີ່ກໍານົດໃຫ້ສະເພາະ ແລະ ພາຍຫຼັງເຂົ້າມາ ສປປ ລາວ ແລ້ວ ແມ່ນຕ້ອງໄດ້ກັກໂຕ ໃຫ້ຄົບຕາມກໍານົດເວລາທີ່ຄະນະສະເພາະກິດວາງອອກສາກອນ ຈຶ່ງຈະສາມາດເຂົ້າມາເຮັດວຽກໄດ້ຕາມປົກກະຕິ.
• ວຽກງານຕິດຕາມຄຸ້ມຄອງການຈັດຕັ້ງປະຕິບັດຊຸກຍູ້ທຸລະກິດໃນໂຄງການຕ່າງໆ ແມ່ນບັນດາ ຂະແໜງການ ແລະ ທ້ອງຖິ່ງ ເປັນຜູ້ຈັດຕັ້ງປະຕິບັດ ແລະ ຕິດຕາມ, ຖ້າມີບັນຫາ ແມ່ນໃຫ້ລາຍງານສູນກາງເພື່ອຮັບຊາບ ແລະ ຈັດກອງປະຊຸມທາງໄກເພື່ອແກ້ໄຂໃຫ້ທັນເວລາ.

ສັງລວມແລ້ວການຈັດຕັ້ງປະຕິບັດວຽກງານສົ່ງເສີມການລົງທຶນແມ່ນຍັງດໍາເນີນໄປຕາມກົນໄກປົກກະຕິ, ພຽງແຕ່ພວກເຮົາໄດ້ນໍາໃຊ້ລະບົບອອນລາຍເຂົ້າມາຊ່ວຍ ໃນການຈັດກອງປະຊຸມທາງໄກ ແລະ ຈໍາກັດຈໍານວນລົງ ເພື່ອຮັກສາໄລຍະຫ່າງ, ສ່ວນນະໂຍບາຍສະໜັບສະໜູນການລົງທຶນ ເລີ່ມຕັ້ງແຕ່ຂັ້ນຕອນການອະນຸຍາດການລົງທຶນ, ໃບອະນຸຍາດການລົງທຶນ, ເອກະສານຂໍ້ຕົກລົງ, ໃບອະນຸຍາດນໍາເຂົ້າວັດຖຸປະກອນ, ກົນຈັກ, ນະໂຍບາຍດ້ານວິຊາ ແລະ ການປະສານງານກັບຂະແໜງ ການຕ່າງໆ ແມ່ນພວກເຮົາຍັງຈັດຕັ້ງປະຕິບັດປົກກະຕິ.

ລາຍງານຈາກ ຂ່າວສານປະເທດລາວ (ຂປລ) ໃຫ້ຮູ້ວ່າ ວັນທີ 9 ພຶດສະພາ 2021 ນີ້, ທີ່ສະໜາມບິນສາກົນຫລວງພະບາງ ໄດ້ມີພິທີຕ້ອນຮັບຄະນະແພດ ແລະ ຊ່ຽວຊານ ຈາກ ສປ ຈີນ ທີ່ເດີນທາງມາຊ່ວຍການແກ້ໄຂສະພາບການລະບາດຂອງພະຍາດໂຄວິດ-19 ຢູ່ບັນດາແຂວງພາກເໜືອ ໃຫ້ກຽດຕ້ອນຮັບໂດຍ ທ່ານ ບຸນເລື່ອມ ມະນີວົງ ຮອງເຈົ້າແຂວງ, ຫົວໜ້າຄະນະສະເພາະກິດຂັ້ນແຂວງຫລວງພະບາງ, ພ້ອມດ້ວຍຄະນະສະເພາະກິດແຂວງຫລວງພະບາງ ແລະ ແຂວງອຸດົມໄຊ.

ໂອກາດນີ້, ຄະນະແພດ ແລະ ຊ່ຽວຊານ ຈາກ ສປ ຈີນ ກໍໄດ້ປະຊຸມຮ່ວມກັບຄະ ນະສະເພາະກິດແຂວງຫລວງພະບາງ ໂດຍໄດ້ຮັບຟັງການລາຍງານສະພາບການລະບາດຂອງພະຍາດໂຄວິດ-19 ຢູ່ແຂວງຫລວງພະບາງ ຈາກຫົວໜ້າຄະນະສະເພາະກິດຂັ້ນແຂວງ. ຈາກນັ້ນຜູ້ເຂົ້າຮ່ວມໄດ້ແລກປ່ຽນຄໍາເຫັນຮ່ວມກັນ ກ່ອນຈະລົງເບິ່ງການປະຕິບັດວຽກງານຕົວຈິງ ຈາກທີມແພດທີ່ພົວປີ່ນປົວຜູ້ຕິດເຊື້ອພະຍາດໂຄວິດ-19 ຢູ່ໂຮງໝໍແຂວງຫລວງພະບາງ.

ພາຍຫລັງສຳເລັດການເຮັດວຽກຮ່ວມກັບທີມແພດ ແລະ ຄະນະສະເພາະກິດແຂວງຫລວງພະບາງແລ້ວ, ຄະນະແພດ ແລະ ຊ່ຽວຊານ ຈາກ ສປ ຈີນ ຈະເດີນທາງໄປເຮັດວຽກຮ່ວມກັບຄະນະສະເພາະກິດ ແລະ ທີມແພດ ທີ່ປີ່ນປົວຄົນເຈັບຕິດເຊື້ອພະຍາດໂຄວິດ -19 ຢູ່ບັນດາແຂວງອື່ນ ຂອງພາກເໜືອ ຕື່ມອີກ.

ວັນທີ 9 ພຶດສະພາ 2021 ທ່ານ ສະຫວັນຄອນ ຣາຊມຸນຕຣີ ຮອງລັດຖະມົນຕີ ກະຊວງ ຖະແຫລງຂ່າວ, ວັດທະນຳທໍາ ແລະ ທ່ອງທ່ຽວ (ຖວທ) ໄດ້ເຂົ້າຮ່ວມຖະ ແຫລງຂ່າວປະຈໍາວັນນຳກອງເລຂາຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19, ທ່ານໄດ້ໃຫ້ຮູ້ກ່ຽວກັບການປະຕິບັດວຽກ ງານຂອງກະຊວງ ຖະແຫລງຂ່າວ, ວັດທະນະທຳ ແລະ ທ່ອງທ່ຽວ ກໍ່ຄື ຄະນະສະເພາະກິດໜ່ວຍງານໂຄສະນາ ທີ່ໄດ້ສຸມໃສ່ເຮັດໜ້າທີ່ໂຄສະນາ ຜ່ານທຸກພາຫະນະ ແລະ ເວທີທີ່ມີຢູ່ໃນການຄຸ້ມຄອງຂອງຕົນ ທັງສືແບບເກົ່າ ແລະ ແບບໃໝ່ ແຕ່ສູນກາງຮອດທ້ອງຖິ່ນ

ໂດຍໄດ້ເຜີຍແຜ່ເນື້ອໃນຄຳສັ່ງ, ແຈ້ງການ, ບົດແນະນຳຕ່າງໆ ຂອງພັກ, ຂອງລັດ ແລະ ຂອງຄະນະສະເພາະກິດ, ການເຄື່ອນໄຫວຕ່າງໆ, ລວມທັງຜົນກະທົບຕໍ່ເສດຖະກິດ, ຕໍ່ຊີວິດການເປັນຢູ່ຂອງປະຊາຊົນ, ມາດຕະການການຊ່ວຍ ເຫຼືອ, ການຊ່ວຍເຫຼືອຂອງເພື່ອນມິດ ແລະ ການກຽມຄວາມພ້ອມໃນດ້ານຕ່າງໆ ດ້ວຍຄວາມວ່ອງໄວທັນການ. ທັງວິທະຍຸ, ໂທລະພາບ, ໂທລະໂຄງ ແລະ ໜັງສືພິມທີມີລະບົບອອນລາຍ ໄດ້ຖ່າຍທອດສົດການຖະແຫຼງຂ່າວຂອງຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການ ລະບາດຂອງພະຍາດໂຄວິດ-19 ໃນແຕ່ລະວັນ ເຮັດໃຫ້ປວງຊົນໄດ້ຮັບຮູ້ຂໍ້ມູນຂ່າວສານທີ່ຖືກຕ້ອງວ່ອງໄວ ແລະ ກ້ວາງຂວາງ ເຮັດໃຫ້ປວງຊົນໄດ້ຮັບຮູ້ຂໍ້ມູນຂ່າວສານຢ່າງຖືກຕ້ອງທັນການ ແລະ ພ້ອມກັນ ປະຕິບັດຕາມທິດຊີ້ນຳ, ຄຳສັ່ງ, ແຈ້ງການ, ບົດແນະນຳຕ່າງໆ ຈິ່ງເປັນສ່ວນໜຶ່ງທີ່ຊ່ວຍເຮັດໃຫ້ການແຜ່ລະບາດມີທ່າອ່ຽງຫຼຸດລົງ.

ຮອງລັດຖະມົນຕີກະຊວງ ຖວທ ໃຫ້ຮູ້ຕື່ມວ່າ: ຄຽງຄູ່ກັບຜົນສໍາເລັດທີ່ປະຕິ ບັດໄດ້, ໄລຍະຜ່ານມາມີກຸ່ມຄົນຈຳນວນໜຶ່ງ ທີ່ພະຍາຍາມສ້າງຂ່າວ ແລະ ພາບປອມ ແປງພິກປີ້ນຄວາມເປັນຈິງ ອອກຜ່ານສືສັງຄົມອອນລາຍ ທີ່ໄດ້ສ້າງຄວາມປັນປ່ວນແຕກແຍກຄວາມສາມັກຄີຢູ່ໃນສັງຄົມ. ດັ່ງນັ້ນ, ທ່ານໄດ້ຮຽກຮ້ອງໃຫ້ທຸກຄົນຈົ່ງມີສະຕິໃນການຕິດຕາມ ແລະ ຮັບຂໍ້ມູນຂ່າວສານຢ່າງມີການໄຕ່ຕອງພິຈາລະນາ ແລະ ບໍ່ຄວນສົ່ງຂໍ້ຕໍ່ມູນຂ່າວສານທີ່ບໍ່ຖືກຕ້ອງນັ້ນອອກໄປ ເຊິ່ງຈະເປັນການລະເມີດກົດ ໝາຍສື່ມວນຊົນ ແລະ ຈະຖືກປະຕິບັດວິໄນຕາມທີ່ກົດໝາຍໄດ້ກຳນົດໄວ້.

ເຊີ່ງຄະນະສະເພາະກິດໜ່ວຍງານໂຄສະນາ ໄດ້ມີໜ່ວຍງານຕິດຕາມກວດກາໃນແຕ່ລະວັນເປັນປະຈຳ ເພື່ອດຳເນີນການຕໍ່ກັບຂໍ້ມູນຂ່າວສານທີ່ປອມແປງ ແລະ ບຸກຄົນທີ່ກະ ທຳຜິດນັ້ນ.

ພ້ອມນີ້ ທ່ານໄດ້ຮຽກຮ້ອງທຸກຄົນໃນສັງຄົມຄວນສືບຕໍ່ຕິດຕາມຮັບເອົາຂໍ້ມູນຂ່າວສານທີ່ຖືກຕ້ອງ ແລະ ເຊື່ອຖືໄດ້ຈາກແຫຼງຂ່າວ ແລະ ສື່ຂ່າວທີ່ເປັນທາງ ການ. ເຊີ່ງກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ຈະໄດ້ພະຍາຍາມສຸດຄວາມສາມາດນຳເອົາຂໍ້ມູນຂ່າວສານມາເຜີຍແຜ່ໃຫ້ວ່ອງໄວທັນການກວ່າເກົ່າ ເພື່ອໃຫ້ປວງຊົນຮັບຮູ້ ແລະ ເຂົ້າຮ່ວມຈັດຕັ້ງປະຕິບັດຕາມຄຳສັ່ງຂອງລັດຖະບານ ກໍ່ຄື ຄຳແນະນຳຂອງຄະນະສະເພາະກິດວາງອອກ.

ໂດຍ: ບຸນຕຽງ ຈັນທະວົງ

Lao National Radio

ຂະແໜງການທະນາຄານ ຈະສືບຕໍ່ໃຫ້ນະໂຍບາຍສິນເຊື່ອ ເພື່ອແກ້ໄຂຜົນກະ ທົບຈາກການແຜ່ລະບາດຂອງພະຍາດ COVID-19 ຮອບໃໝ່.

ແຫຼ່ງຂ່າວ ວິທະຍຸກະຈາຍສຽງແຫ່ງຊາດ Lao National Radio ແຈ້ງໃຫ້ຮູ້ວ່າ ໃນວັນທີ 08 ພຶດສະພາ 2021 ທ່ານ ພຸດທະໄຊ ສີວິໄລ ຮອງຜູ້ວ່າການທະນາຄານແຫ່ງ ສປປ ລາວ, ຫົວໜ້າໜ່ວຍງານນະໂຍບາຍດ້ານເງິນຕາ ໄດ້ອອກຖະແຫຼງຂ່າວ ກ່ຽວກັບບັນດານະໂຍບາຍຂອງຂະແໜງທະນາຄານ ເພື່ອແກ້ໄຂຜົນກະທົບຈາກສະພາບການລະບາດຂອງພະຍາດອັກເສບປອດຈາກເຊື້ອຈຸລະໂລກສາຍພັນໃໝ່ (COVID-19). ໂດຍຈະສືບຕໍ່ບັນດານະໂຍບາຍດ້ານເງິນຕາດັ່ງທີ່ໄດ້ປະຕິບັດຜ່ານມາ ເພື່ອແກ້ໄຂຜົນກະທົບຈາກການລະບາດຂອງພະຍາດ COVID-19.

ນັບແຕ່ການລະບາດຂອງພະຍາດ COVID-19 ໃນຕົ້ນປີ 2020, ທະນາຄານແຫ່ງ ສປປ ລາວ (ທຫລ) ໄດ້ປະຕິບັດບັນດານະໂຍບາຍຈຳນວນໜຶ່ງ ເພື່ອແກ້ໄຂຜົນກະທົບຈາກການແຜ່ລະບາດຂອງພະຍາດດັ່ງກ່າວ ໄດ້ແກ່: 1) ປັບຫຼຸດອັດຕາດອກເບ້ຍພື້ນຖານ ຂອງທະນາ ຄານແຫ່ງ ສປປ ລາວ ແລະ ອັດຕາສ່ວນເງິນແຮຝາກບັງຄັບ ຂອງທະນາຄານທຸ ລະກິດ; 2) ປະຕິບັດນະໂຍບາຍສິນເຊື່ອ ເພື່ອແກ້ໄຂຜົນກະທົບຈາກສະພາບການລະບາດຂອງພະຍາດ COVID-19 ຕາມຂໍ້ຕົກລົງສະບັບເລກທີ 238/ທຫລ. ລົງວັນທີ 26 ມີນາ 2020; 3) ດຳເນີນໂຄງ ການສິນເຊື່ອ ເພື່ອຊຸກຍູ້ການຜະລິດ ແລະ ແກ້ໄຂຜົນກະທົບ ຈາກການລະບາດຂອງພະຍາດ COVID-19 ສະບັບເລກທີ 318/ທຫລ, ລົງວັນທີ 19 ພຶດສະພາ 2020; 4) ຊຸກຍູ້ ແລະ ຕິດຕາມການສະໜອງແຫຼ່ງທຶນຂອງກອງທຶນສົ່ງເສີມວິສາຫະກິດຂະໜາດນ້ອຍ ແລະ ກາງ ຮ່ວມກັບກະຊວງອຸດສະຫະກຳ ແລະ ການຄ້າ ໂດຍສຸມໃສ່ສະໜອງແຫຼ່ງທຶນໃຫ້ຫົວໜ່ວຍວິສາຫະກິດຂະໜາດນ້ອຍ ແລະ ກາງ (ວນກ) ໃນຂົງເຂດທີ່ໄດ້ຮັບຜົນກະທົບຈາກການລະບາດຂອງ COVID-19.

ຜ່ານການຈັດຕັ້ງປະຕິບັດນະໂຍບາຍຜ່ອນຜັນດ້ານສິນເຊື່ອໃນໄລຍະຜ່ານມາ ຮອດເດືອນ ມີນາ 2021 ເຫັນວ່າ: ທະນາຄານທຸລະກິດ ໄດ້ມີການປະຕິບັດນະໂຍບາຍສິນເຊື່ອ ໃຫ້ແກ່ລູກຄ້າທັງໝົດ 4.846 ລາຍ ລວມມູນຄ່າ 9.565,24 ຕື້ກີບ. ສຳລັບເບື້ອງ ສະຖາບັນການເງິນ ທີ່ບໍ່ແມ່ນທະນາຄານ ໄດ້ມີການປະຕິບັດນະໂຍບາຍສິນເຊື່ອ ໃຫ້ແກ່ລູກຄ້າທັງໝົດ 454.163 ລາຍ ລວມມູນຄ່າ 263,63 ຕື້ກີບ. ນະໂຍບາຍສິນເຊື່ອທີ່ທະນາຄານ ແລະ ສະຖາບັນການເງິນປະຕິບັດ ສ່ວນ ໃຫຍ່ແມ່ນນະໂຍບາຍການປັບຫຼຸດອັດຕາດອກເບ້ຍ, ຮອງລົງມາແມ່ນນະໂຍບາຍເລື່ອນຊຳລະໜີ້ທັງຕົ້ນທຶນ ແລະ ດອກ ເບ້ຍ , ປະຕິບັດນະໂຍບາຍປ່ອຍກູ້ໃໝ່ ເພື່ອຟື້ນຟູການຜະລິດ ຫຼື ທຸລະກິດ, ນະ ໂຍບາຍປັບຫຼຸດຄ່າທໍານຽມ ແລະ ນະໂຍ ບາຍອື່ນໆ. ການສະຫນອງສິນເຊື່ອໃຫມ່ໃຫ້ແກ່ລູກຄ້າທີ່ໄດ້ຮັບຜົນກະທົບພາຍໃຕ້ໂຄງການສິນເຊື່ອຊຸກຍູ້ການຜະລິດ ແລະ ແກ້ໄຂຜົນກະທົບຈາກພະຍາດ COVID-19 ຕາມຂໍ້ຕົກລົງເລກທີ 318/ທຫລ ແມ່ນໄດ້ມີການສະໜອງເງິນກູ້ໃຫ້ແກ່ລູກຄ້າທີ່ໄດ້ຮັບຜົນກະທົບ ຜ່ານທະນາຄານທຸລະກິດທີ່ເຂົ້າຮ່ວມໂຄງການທັງໝົດ 1.652,57 ຕື້ກີບ ຈໍານວນ ລູກຄ້າ 477 ລາຍ ແລະ ຖອນນໍາໃຊ້ແລ້ວ 1.369,44 ຕື້ກີບ. ສໍາລັບການສະຫນອງສິນເຊື່ອໃຫ້ແກ່ ວນກ ໂດຍກອງທຶນສົ່ງເສີມວິສາຫະກິດຂະໜາດນ້ອຍ ແລະ ກາງ ແມ່ນໄດ້ປ່ອຍກູ້ແລ້ວ ປະມານ 165,06 ຕື້ກີບ (ມີຈໍານວນ 116 ຫົວໜ່ວຍ ວນກ, ມີ 143 ສັນຍາເງິນກູ້ ມາຈາກ 14 ແຂວງ).

ຕໍ່ກັບສະພາບການລະບາດຂອງພະຍາດ COVID-19 ໃນປະຈຸບັນ, ທຫລ ຈະສືບຕໍ່ປະຕິບັດນະໂຍບາຍ ແລະ ມາດຕະການທີ່ ທຫລ ໄດ້ປະຕິບັດຜ່ານມາຂ້າງເທິງນັ້ນ ໃນການແກ້ໄຂຜົນກະທົບຈາກການລະບາດຂອງພະຍາດ COVID-19 ໂດຍສະເພາະສືບຕໍ່ປະຕິບັດນະໂຍບາຍສິນເຊື່ອ ເພື່ອແກ້ໄຂຜົນກະທົບຈາກ COVID-19 ຕາມຂໍ້ຕົກລົງສະບັບເລກທີ 238/ທຫລ. ລົງວັນທີ 26 ມີນາ 2020 ໂດຍການອອກແຈ້ງການເພີ່ມເຕີມໃຫ້ທະນາຄານທຸລະກິດ ແລະ ສະຖາບັນການເງິນ ເພີ່ມທະວີການປະຕິບັດນະໂຍບາຍສິນເຊື່ອແກ້ໄຂຜົນກະທົບ ຕາມຂໍ້ຕົກລົງດັ່ງກ່າວ ໃຫ້ວ່ອງໄວ, ທັນສະພາບການ ແລະ ທົ່ວເຖິງ ຕາມສະພາບເງື່ອນໄຂຂອງລູກຄ້າທີ່ໄດ້ຮັບຜົນກະທົບຕົວຈິງ; ສືບຕໍ່ດຳເນີນໂຄງການສິນເຊື່ອເພື່ອສະໜອງເງິນກູ້ໃໝ່ໃຫ້ແກ່ບຸກຄົນ, ຈຸນລະວິສາຫະກິດ ແລະ ວນກ ທີ່ໄດ້ຮັບຜົນກະທົບ ຜ່ານທະນາຄານທຸລະກິດ ທີ່ເຂົ້າຮ່ວມໂຄງການ ຈຳນວນ 16 ທະນາຄານ ໄດ້ແກ່: ທະນາຄານການຄ້າຕ່າງປະເທດລາວ ມະຫາຊົນ, ທະນາຄານຮ່ວມທຸລະກິດລາວ-ຫວຽດ, ທະນາຄານລາວຈີນ ຈຳກັດ, ທະນາຄານຮ່ວມພັດທະນາ, ທະນາຄານມາຣູຮານເຈແປນລາວ ຈຳກັດ, ທະນາຄານບີໄອຊີລາວ ຈຳກັດ, ທະນາຄານເອັສທີ ຈຳກັດ, ທະນາຄານພັດທະນາລາວ, ທະນາຄານອາເຮັສບີ ລາວ ຈຳກັດ, ທະນາຄານໄຊງ່ອນເທືອງຕິ່ນ ຈຳກັດ, ທະນາຄານຫວຽດຕິນ ລາວ ຈຳກັດ, ທະນາຄານແຄນາເດຍ ລາວ ຈຳກັດ, ທະນາຄານການຄ້າຕ່າງປະເທດຫວຽດນາມ ປະຈຳລາວ ຈຳກັດ, ທະນາຄານອຸດສາຫະກຳ ແລະ ການຄ້າຈີນ ຈຳກັດ ສາຂານະຄອນຫຼວງ, ທະນາຄານກະສິກອນໄທ ຈຳກັດ ແລະ ທະນາຄານສົ່ງເສີມກະສິກຳ; ແລະ ຈັດຕັ້ງປະຕິບັດໂຄງການສິນເຊື່ອ ເພື່ອກະຕຸ້ນເສດຖະກິດຂອງ ສປປ ລາວ ໄດ້ແກ່: ນະໂຍບາຍສິນເຊື່ອສົ່ງເສີມການຜະລິດໄຟຟ້າ ເພື່ອການສົ່ງອອກ, ສິນເຊື່ອເພື່ອສົ່ງເສີມການຜະລິດສິນຄ້າທົດແທນການນຳເຂົ້າ ແລະ ສິນເຊື່ອ ເພື່ອຊຸກຍູ້ການຜະລິດກະສິກຳເປັນ ສິນຄ້າສົ່ງອອກ.

ລູກຄ້າທີ່ມີເງື່ອນໄຂໄດ້ຮັບນະໂຍບາຍສິນເຊື່ອດັ່ງກ່າວແມ່ນໝາຍເຖິງ : 1) ບຸກຄົນ ຫຼື ນິຕິບຸກຄົນ ທີ່ເປັນເຈົ້າຂອງ ຫຼື ດໍາເນີນກິດຈະການ ທີ່ຕ້ອງຢຸດເຊົາກິດຈະການທັງໝົດ ຫຼື ສ່ວນໃດສ່ວນໜຶ່ງ ເນື່ອງຈາກການປະຕິບັດມາດຕະການປ້ອງກັນຄວບຄຸມການແຜ່ລະບາດຂອງພະຍາດ COVID-19; 2) ຜູ້ປະກອບອາຊີບອິດສະຫຼະ ທີ່ບໍ່ສາມາດປະກອບອາຊີບຂອງຕົນໄດ້ຕາມປົກກະຕິ ລວມທັງຜູ້ທີ່ໄດ້ຮັບຜົນກະທົບທາງອ້ອມ.

ຂັ້ນຕອນໃນການຂໍຮັບນະໂຍບາຍຜ່ອນຜັນ ແມ່ນລູກຄ້າຕ້ອງ : 1) ຂຽນໜັງສືສະເໜີເຖິງ ທະນາຄານ ຫຼື ສະຖາບັນການເງິນ ທີ່ເປັນເຈົ້າໜີ້ຂອງຕົນເພື່ອຂໍນະໂຍບາຍ; 2) ປະກອບເອກະສານຢັ້ງຢືນ ຜົນກະທົບທີ່ຕົນໄດ້ຮັບ ໂດຍຢັ້ງຢືນຈາກອົງການຈັດຕັ້ງທີ່ກ່ຽວຂ້ອງ ສໍາລັບວິສາຫະກິດ ຫຼື ອໍານາດການປົກຄອງບ້ານ ສໍາລັບບຸກຄົນທີ່ປະກອບອາຊີບອິດສະຫຼະ; 3) ປະກອບເອກະສານອື່ນໆ ທີ່ກ່ຽວຂ້ອງ; ສຳລັບທະນາຄານ ແລະ ສະຖາບັນການເງິນ ທີ່ໄດ້ຮັບການສະ ເໜີຈາກລູກຄ້າຂອງຕົນ ຈະດໍາເນີນການສໍາຫຼວດ, ເກັບກໍາຂໍ້ມູນໃຫ້ລະອຽດ ແລ້ວປະເມີນຜົນກະທົບຕາມກໍລະນີໜັກ-ເບົາ ແລ້ວປະຕິບັດນະໂຍບາຍຜ່ອນຜັນສິນເຊື່ອຕາມຄວາມເໝາະສົມ.

ພ້ອມດຽວກັນນີ້, ທ່ານ ຮອງຜູ້ວ່າການ ທຫລ, ຫົວໜ້າໜ່ວຍງານດ້ານນະໂຍບາຍເງິນຕາ ຮຽກຮ້ອງໃຫ້ ບັນດາທະນາຄານທຸລະກິດ ແລະ ສະຖາບັນການເງິນ ທີ່ບໍ່ແມ່ນທະນາຄານ ພ້ອມກັນເປັນເຈົ້າການເຊື່ອມຊືມເຂົ້າໃຈນະໂຍບາຍສິນເຊື່ອດັ່ງກ່າວ ແລະ ເປັນເຈົ້າການປະຕິບັດນະໂຍບາຍດັ່ງກ່າວຢ່າງວ່ອງໄວ, ທັນສະພາບການ ແລະ ທົ່ວເຖິງ ຕາມສະພາບເງື່ອນໄຂຂອງລູກຄ້າ ທີ່ໄດ້ຮັບຜົນກະທົບຕົວຈິງ; ແລະ ຮຽກຮ້ອງໃຫ້ລູກຄ້າສິນເຊື່ອ ທີ່ໄດ້ຮັບຜົນກະທົບມີຄວາມເຂົ້າໃຈແຈ້ງ ຕໍ່ນະໂຍບາຍຜ່ອນຜັນດ້ານສິນເຊື່ອດັ່ງກ່າວ ແລະ ມີຄວາມຈິງໃຈ ແລະ ເປັນເຈົ້າການປະຕິບັດໃຫ້ຖືກຕ້ອງຕາມເງື່ອນໄຂທີ່ກຳນົດໄວ້. ຫຼີກເວັ້ນການສວຍໃຊ້ນະໂຍບາຍດັ່ງກ່າວ ເພື່ອເອື້ອອຳນວຍຜົນປະໂຫຍດແກ່ຕົນ ທີ່ບໍ່ສອດຄ່ອງກັບລະບຽບການວາງອອກ ລວມທັງການມີຄຳເຫັນປັ່ນປ່ວນ ສ້າງຄວາມເຂົ້າໃຈຜິດໃຫ້ແກ່ສັງຄົມ.

ລູກຄ້າສິນເຊື່ອຂອງ ທະນາຄານທຸລະກິດ ແລະ ສະຖາບັນການເງິນທີ່ບໍ່ແມ່ນທະນາຄານ ທີ່ໄດ້ຮັບຜົນກະທົບຈາກການແຜ່ລະບາດຂອງພະຍາດດັ່ງກ່າວ ແລະ ຜູ້ທີ່ໄດ້ຮັບຜົນກະທົບທີ່ສົນໃຈຂໍສິນເຊື່ອເພີ່ມ ພາຍໃຕ້ໂຄງການສິນເຊື່ອຕາມຂໍ້ຕົກລົງ 318/ທຫລ ກໍໃຫ້ປະສານກັບບັນດາທະນາຄານທຸລະກິດທີ່ເຂົ້າຮ່ວມໂຄງການ 16 ທະນາຄານ ຂ້າງເທິງ. ສຳລັບຜູ້ທີ່ມີຄຳຖາມ ແລະ ຂໍ້ຂ້ອງໃຈຕິດພັນກັບການປະຕິບັດນະໂຍບາຍຜ່ອນຜັນດ້ານສິນເຊື່ອຕາມຂໍ້ຕົກລົງ 238/ທຫລ ສາມາດປະສານກົມຄຸ້ມຄອງທະນາຄານທຸລະກິດ (ເບີໂທ: 021 219825) ແລະ ກົມຄຸ້ມຄອງສະຖາບັນການເງິນ (ເບີໂທ: 021 265715 ຫຼື 021 265712)

ລາຍງານຈາກ ກົມອຸດສາຫະກໍາ, ກະຊວງອຸດສາຫະກໍາ ແລະ ການຄ້າໃຫ້ຮູ້ວ່າ: ສືບເນື່ອງຈາກການລະບາດຂອງພະຍາດໂຄວິດ-19 ຮອບສອງ ຢູ່ປະເທດເຮົາ ທີ່ເລີ່ມທະວີຄວາມຮຸນແຮງຂຶ້ນ ຫຼັງຈາກປີໃໝ່ລາວເປັນຕົ້ນມາ ແລະ ພາຍໃຕ້ນະໂຍບາຍຂອງລັດຖະບານເພື່ອລະດົມໃຫ້ທຸກຄົນໄດ້ຮັບການສັກວັກຊິນ, ທ່ານ ປອ ໄຊບັນດິດ ຣາຊະພົນ ຮອງປະທານສະພາການຄ້າ ແລະ ອຸດສາຫະກໍາແຫ່ງຊາດ ປະທານສະມາຄົມອຸດສາຫະກຳຕັດຫຍິບລາວ ທັງເປັນສະມາຊິກສະພາແຫ່ງຊາດຈາກແຂວງຈຳປາສັກ ໄດ້ເປີດເຜີຍວ່າ: ສະມາຄົມໄດ້ຮ່ວມເຮັດວຽກກັບ ຜູ້ບໍລິຫານຂອງບັນດາໂຮງງານຕັດຫຍິບຊຸກຍູ້ ແລະ ສ້າງຄວາມສະດວກໃຫ້ແກ່ພະນັກງານ ແລະ ກຳມະກອນ ໄດ້ຮັບການສັກວັກຊິນປ້ອງກັນພະຍາດໂຄວິດ-19 ເພື່ອຊ່ວຍສ້າງພູມຄຸ້ມກັນແກ່ຮ່າງກາຍບໍ່ໃຫ້ຕິດເຊື້ອພະຍາດໂຄວິດ-19 ແລະ ແຜ່ເຊື້ອດັ່ງກ່າວ ທັງເປັນການປົກປ້ອງຄອບຄົວ, ຜູ້ໃກ້ຊິດ ແລະ ສັງຄົມ ກໍຄືປະກອບສ່ວນໃນການຫຼຸດຜ່ອນການລະບາດຂອງພະຍາດໂຄວິດ-19.

ອີກດ້ານໜຶ່ງ, ແມ່ນເພື່ອເອື້ອອຳນວຍໃຫ້ບັນດາໂຮງງານຕັດຫຍິບ ສາມາດສືບຕໍ່ດໍາເນີນກິດຈະການໄດ້ຢ່າງຕໍ່ເນື່ອງ ຄຽງຄູ່ກັບການປະຕິບັດມາດຕະການປ້ອງກັນການລະບາດຂອງພະຍາດໂຄວິດ-19 ຢູ່ໃນໂຮງຈັກໂຮງງານ ບໍ່ວ່າຈະເປັນການຮັກສາໄລຍະຫ່າງ, ການກວດວັດແທກອຸນຫະພູມ ແລະ ການອະນາໄມຂ້າເຊື້ອຕ່າງໆ.

ຂະບວນການສັກວັກຊິນປ້ອງກັນພະຍາດໂຄວິດ-19 ແມ່ນດຳເນີນຢູ່ຕາມໂຮງໝໍ ແລະ ສະຖານທີ່ຕ່າງໆ ທີ່ກະຊວງສາທາລະນະສຸກ ຈັດໃຫ້ແກ່ສາທາລະນະຊົນ ຊຶ່ງພິເສດກໍມີການຈັດໜ່ວຍເຄື່ອນທີ່ລົງສັກວັກຊິນໃຫ້ຢູ່ບາງໂຮງງານ ໂດຍທີ່ມາການເຂົ້າຮ່ວມຂະບວນການນີ້ຢ່າງຄຶກຄື້ນໃນນີ້ປະກອບມີ: ມີໂຮງງານຕຣີແມັກ, ໂຮງງານດິບວູ, ໂຮງງານສະກາວີລາວ, ໂຮງງານໄຮເທັກ, ໂຮງງານອານປີລາວ, ໂຮງງານເວັນເຈີ, ໂຮງງານເກຣດລາວ, ໂຮງງານໄອຊິນ, ໂຮງງານອັບປາແຣນ, ໂຮງງານແຮັກເກີ, ໂຮງງານກຽນວິໄລ, ໂຮງງານຫວຽດທູ, ໂຮງງານຢາມາເກັນ ແລະ ແຫ່ງອື່ນໆ. ໂດຍລວມແລ້ວ ຮອດວັນທີ 7 ພຶດສະພາ 2021, ມີພະນັກງານ ແລະ ກຳມະກອນ 4.980 ຄົນ ຈາກໂຮງງານຕັດຫຍິບຫຼາຍກວ່າ 20 ແຫ່ງ ໄດ້ຮັບການສັກວັກຊິນປ້ອງກັນພະຍາດໂຄວິດ-19. ມີໂຮງງານອີກຈຳນວນໜຶ່ງ ກໍຂຶ້ນແຜນເພື່ອສ້າງຂະບວນການ ສັກວັກຊິນກັບທີ່ ນັບແຕ່ອາທິດໜ້າເປັນຕົ້ນໄປ.

ທ່ານ ໄຊບັນດິດ ລາຊະພົນ ໄດ້ຕາງໜ້າໃຫ້ສະມາຊິກຂອງສະມາຄົມອຸດສາຫະກຳຕັດຫຍິບລາວ ສະແດງຄວາມຂອບອົກຂອບໃຈມາຍັງພາກ-ລັດ ໂດຍສະເພາະກະຊວງສາທາລະນະສຸກ ແລະ ໂຮງໝໍກ່ຽວຂ້ອງທີ່ໄດ້ເອົາໃຈໃສ່ ແລະ ອຳນວຍສະດວກແກ່ຂະບວນການສັກວັກຊິນປ້ອງກັນໂຄວິດ-19 ໃຫ້ແກ່ບັນດາໂຮງງານຕັດຫຍິບຕ່າງໆ.

ຂ່າວ: ກົມອຸດສາຫະກຳ

ໃນວັນທີ 7 ພຶດສະພາ 2021, ບໍລິສັດ ເດລີເວີຣີ ຮີໂຣ ລາວ ຈຳກັດຜູ້ດຽວ ຫຼື foodpanda ຮ່ວມມືກັບ ກະຊວງສາທາລະນະສຸກ ແລະ ກະຊວງເຕັກໂນໂລຊີ ແລະ ການສື່ສານໄດ້ຈັດຕັ້ງປະຕິບັດໂຄງການຊັກວັກຊີນໃຫ້ກັບ ພະນັກງານສົ່ງອາຫານຟູດແພນດ້າ ຫຼື ໄຣເດີ້ ພາຍໃນນະຄອນຫຼວງວຽງຈັນ ແລະ ຄາດວ່າ ພະນັກງານສົ່ງອາຫານຢູ່ຕ່າງແຂວງຈະໄດ້ຮັບການຊັກວັກຊີນໃນໄວໆນີ້.

ໃນທ່າມກາງການແຜ່ລະບາດຂອງພະຍາດໂຄວິດ 19 ພາຍໃນປະເທດຢ່າງຕໍ່ເນື່ອງ, ອີກພາກສ່ວນໜຶ່ງທີ່ຍັງຄົງເຮັດວຽກໜັກຮັບໃຊ້ສັງຄົມແມ່ນ ພະນັກງານໄຣເດີ້ ໃນການໄປຮັບ ແລະ ສົ່ງອາຫານໃຫ້ກັບປະຊາຊົນ ໃນແຕ່ລະຂົງເຂດ. ທັ້ງໃດທັ້ງນັ້ນ, ເພື່ອເປັນການປ້ອງກັນໄຣເດີ້ຈາກພະຍາດໂຄວິດ 19 ແລະ ຊ່ວຍໃຫ້ ພະນັກງານໄຣເດີ້ເອງໄດ້ເຂົ້າເຖີງການສັກວັກຊີນໄດ້ງ່າຍ ແລະ ໄວຂຶ້ນ, ຟູດແພນດ້າຈຶ່ງ ໄດ້ຮ່ວມມືກັບ ພາກສ່ວນທີ່ກ່ຽວຂ້ອງ ໃນການສັກວັກຊີນໃຫ້ກັບພະນັັກງານສົ່ງອາຫານຟູດແພນດ້າເປັນຈຳນວນຫຼວງຫຼາຍ. 

ເຖິງວ່າປັດຈຸບັນແຂວງຫົວພັນຍັງບໍ່ມີຜູ້ຕິດເຊື້ອພະຍາດ ໂຄວິດ-19 ກໍຕາມແຕ່ຄະນະນໍາແຂວງ ກໍຄືຄະນະສະເພາະກິດຂັ້ນແຂວງຍັງສືບຕໍ່ໃຫ້ຄວາມສຳຄັນອັນດັບໜຶ່ງ ໃນການເຝົ້າລະວັງເພື່ອຕ້ານ ແລະ ສະກັດກັ້ນ ໂດຍໄດ້ສຸມໃສ່ເຮັດທຸກວິທີທາງແນໃສ່ໃຫ້ແຂວງຫົວພັນປາສະຈາກພະຍາດລະບາດດັ່ງກ່າວ.

ທ່ານ ອຳຈະເລີນ ສອນທະວີໄຊ ຮອງຫົວໜ້າພະແນກສາທາລະນະສຸກແຂວງຫົວພັນ, ຕາງໜ້າຄະ ນະສະເພາະກິດຂັ້ນແຂວງ ລາຍງານເມື່ອວັນທີ 2 ພຶດສະພາຜ່ານມາໃຫ້ຮູ້ວ່າ: ພາຍຫຼັງທີ່ໄດ້ຮັບຄຳ ສັ່ງຂອງທ່ານນາຍົກລັດຖະມົນຕີ ສະບັບທີ 15/ນຍ ລົງວັນທີ 21 ເມສາ 2021 ແລະ ຄຳສັ່ງຂອງ ທ່ານເຈົ້າແຂວງ ສະບັບເລກທີ 123/ຈຂ.ຫພ ລົງວັນທີ 22 ເມສາ 2021 ວ່າດ້ວຍການເພີ່ມທະວີ ມາດຕະການສະກັດກັ້ນ, ຄວບຄຸມ ແລະ ກຽມຄວາມພ້ອມຮອບດ້ານເພື່ອຕ້ານພະຍາດໂຄວິດ-19, ຄະນະ ສະເພາະກິດຂັ້ນແຂວງໄດ້ຮີບຮ້ອນຈັດຕັ້ງປະຕິບັດປິດແຂວງ ໂດຍຕັ້ງຈຸດຄັດກອງເພື່ອຫາກໍລະນີສົງໄສ ແລະ ກໍລະນີສຳຜັດຢູ່ຈຸດເຊື່ອມຕໍ່ລະຫວ່າງແຂວງຕໍ່ແຂວງ ຄືຈຸດນໍ້າເນີນເປັນຈຸດເຊື່ອມຕໍ່ກັບແຂວງ ຊຽງຂວາງ ແລະ ຈຸດຫາດສາ ເປັນເສັ້ນທາງເຊື່ອມຕໍ່ກັບແຂວງຫຼວງພະບາງ.

ມາຮອດວັນທີ 27 ເມສາ 2021 ຄະນະສະເພາະກິດຂັ້ນແຂວງໄດ້ປະເມີນຄືນເຫັນວ່າສະພາບການລະບາດຂອງພະຍາດໂຄວິດ-19 ຢູ່ໃນ ສປປ ລາວ ມີທ່າອຽງເພີ່ມຂຶ້ນ ດັ່ງນັ້ນ, ຄະນະສະເພາະກິດຂັ້ນແຂວງຈຶ່ງຕົກລົງເປັນເອກະພາບ ອອກແຈ້ງການ ສະບັບເລກທີ 194/ຫວຂ.ຫພ ລົງວັນທີ 27 ເມສາ 2021 ວ່າດ້ວຍການເພີ່ມທະວີ ແລະ ເອົາໃຈໃສ່ໃນການປະຕິບັດມາດຕະການເພື່ອປ້ອງກັນ, ຄວບຄຸມ ແລະ ແກ້ໄຂການລະບາດພະຍາດ ໂຄ ວິດ-19 ໂດຍມີເນື້ອຫາໃຫ້ປິດການສັນຈອນລະຫວ່າງເມືອງຕໍ່ເມືອງພາຍໃນແຂວງ, ເພີ່ມຈຸດຄັດກອງຢູ່ບັນ ດາຈຸດທີ່ມີຄວາມສ່ຽງພາຍໃນເທດສະບານແຂວງເປັນຕົ້ນແມ່ນຕະຫຼາດ, ຈັດຕັ້ງຜັດປ່ຽນກັນປະຈຳການເພື່ອ ຫຼຸດຜ່ອນຄວາມແອອັດສຳລັບພະນັກງານ-ລັດຖະກອນ, ສົ່ງເສີມໃຫ້ປະຊາຊົນປະຕິບັດຕາມມາດຕະການ ຢ່າງເຂັ້ມງວດ ເປັນຕົ້ນແມ່ນງົດອອກຈາກເຮືອນຖ້າບໍ່ມີຄວາມຈຳເປັນ, ຖ້າອອກແມ່ນໃຫ້ໃສ່ຜ້າປິດປາກ ປິດດັງ, ຮັກສາໄລຍະຫ່າງທາງສັງຄົມ, ກໍລະນີຈໍາເປັນຖ້າທ່ານໃດຢາກອອກຕ່າງເມືອງແມ່ນຕ້ອງໄດ້ຮັບ ອະນຸຍາດຈາກຄະນະສະເພາະກິດ. ພ້ອມດຽວກັນນີ້, ຍັງໄດ້ປຸກລະດົມ, ສົ່ງເສີມໃຫ້ພະນັກງານ, ລັດຖະ ກອນ, ປະຊາຊົນໄປຮັບການສັກຢາກັນພະຍາດໂຄວິດ-19 ໂດຍເປີດໃຫ້ບໍລິການທຸກວັນຢູ່ໂຮງໝໍແຂວງ ແລະ ໂຮງໝໍ 9 ເມືອງ, ແຂວງຫົວພັນໄດ້ຮັບວັກຊິນກັນພະຍາດໂຄວິດ-19 ເພີ່ມຕື່ມ 20 ພັນໂດສ ໂດຍໄດ້ແບ່ງໃຫ້ເມືອງລະ 1.200 ໂດສ.

ໃນຂະນະດຽວກັນ, ທ່ານນາງ ໄຫວພອນ ຈັນທະວີຄຳ ຫົວໜ້າຂະແໜງຄວບຄຸມພະຍາດຕິດຕໍ່ ພະແນກສາທາລະນະສຸກແຂວງ ໃຫ້ຮູ້ວ່າ: ນັບແຕ່ວັນທີ 28 ເມສາ ເປັນຕົ້ນມາ, ໄດ້ແບ່ງທີມງານ ແພດໝໍສົມທົບກັນກຳລັງເຈົ້າໜ້າທີ່ ປກສ ແຂວງລົງປະຈຳຢູ່ບັນດາຈຸດທີ່ມີຊຸມຊົນແອອັດຈຳນວນ 4 ຈຸດຄື:

ຈຸດຕະຫຼາດໃຫຍ່, ຈຸດຕະຫຼາດຂາຍຊີ້ນ, ຈຸດຕະຫຼາດພັນເຊິນ ແລະ ຈຸດຕະຫຼາດເມືອງຊຳເໜືອ. ຜ່ານ ການຈັດຕັ້ງປະຕິບັດສາມາດກວດກາ ແລະ ຄັດກອງຄົນເຂົ້າ-ອອກໄດ້ເກືອບ 14 ພັນເທື່ອຄົນ. ທັງນີ້, ເພື່ອເປັນການຄັດກອງຫາກໍລະນີຕິດເຊື້ອເພື່ອຄວບຄຸມແກ້ໄຂໃຫ້ທັນເວລາ.

ໂອກາດດຽວກັນນີ້, ທ່ານນາງ ວັນທອງ ແພງຊຸມມາ ຫົວໜ້າຈຸດຄັດກອງຕະຫຼາດໃຫຍ່ເລົ່າສູ່ຟັງວ່າ: ການຄັດກອງແມ່ນເນັ້ນໃສ່ການວັດແທກອຸນຫະພູມ, ແຈກຜ້າປິດປາກ-ປິດດັງໃຫ້ຜູ້ທີ່ມາໃຊ້ບໍລິການຢູ່ຕະ ຫຼາດ ຜ່ານການຈັດຕັ້ງປະຕິບັດນັບແຕ່ທ້າຍເດືອນເມສາເປັນຕົ້ນມາເຫັນວ່າປະຊາຊົນໃຫ້ຄວາມຮ່ວມມືເປັນ ຢ່າງດີ, ຜ່ານການຄັດກອງ ແລະ ກວດກາມາເຖິງປັດຈຸບັນນີ້ບໍ່ທັນເຫັນກໍລະນີໃດທີ່ສົງໄສ ຍ້ອນການຮ່ມມື ກັບຫຼາຍພາກສ່ວນ. ນອກນີ້ຍັງໄດ້ຮັບອຸປະກອນຮັບໃຊ້ຈາກຂັ້ນເທິງຢ່າງຄົບຖ້ວນ ໂດຍໄດ້ຮັບການສະ ໜັບສະໜູນອຸປະຖຳດ້ານວັດຖຸປັດໄຈຈາກປະຊາຊົນ ແລະ ຊາວຂາຍຢ່າງເນື່ອງນິດລຽນຕິດຕະຫຼອດມາ.

ໃນໂອກາດດັ່ງກ່າວຕາງໜ້າຄະນະສະເພາະກິດຂັ້ນແຂວງໄດ້ຮຽກຮ້ອງໃຫ້ປະຊາຊົນທົ່ວແຂວງຫົວ ພັນພ້ອມກັນໄປສັກວັກຊິນ ເປັນເຈົ້າການໃນການຕິດຕາມກວດກາການລັກລອບເຂົ້າເມືອງໂດຍບໍ່ຜ່ານຈຸດ ຄັດກອງ, ພ້ອມກັນປະຕິບັດການດຳລົງຊີວິດແບບໃໝ່ ຈັດຕັ້ງປະຕິບັດຕາມມາດຕະການປ້ອງກັນ, ຄວບ ຄຸມ ແລະ ແກ້ໄຂການລະບາດພະຍາດໂຄວິດ-19 ທີ່ຄະນະສະເພາະກິດວາງອອກຢ່າງເຂັ້ມງວດ.

ຂ່າວ-ພາບ: ໄອແກ້ວ