6 ພະຍາດຮ້າຍ ຖ້າຫາກດື່ມນໍ້າໜ້ອຍ

1.ສະໝອງເຊື່ອມ

2. ລິດຊີດວງທະວານ

3. ປວດຂໍ້

4. ພົກປັດສະວະ (ພົກຍ່ຽວ) ອັກເສບ

5. ໂຣກອ້ວນ

6. ປະຈຳເດືອຍນມາບໍ່ສະໝໍ່າສະເໝີ

ສັນຍານຂອງການດື່ມນໍ້າໜ້ອຍຄື: ປັດສະວະໜ້ອຍ, ເປັນສີເຫຼືອງເຂັ້ມທຸກເທື່ອ ແລະ ມີກິນແຮງ

ສະນັ້ນ, ຄວນດື່ມນໍ້າໃຫ້ພຽງພໍຄື 6-8 ຈອກທຸກມື້, ເພື່ອສຸຂະພາບຂອງທ່ານເອງ.

ໃນວັນທີ 30 ກັນຍາ ທີ່ຜ່ານມາ, ຢູ່ເຂດບ້ານຈໍາປາ ເມືອງສີໂຄດຕະບອງ ນະຄອນຫຼວງວຽງຈັນ, ພະແນກຕໍາຫຼວດສິ່ງແວດລ້ອມ ຫ້ອງຕໍາຫຼວດ ປກສ ນວ ພ້ອມດ້ວຍພະນັກງານ ສົມທົບກັບພະແນກອຸດສາຫະກໍາ ແລະ ການຄ້າ ນວ ທໍາລາຍຢາສູບໄຟຟ້າ ນໍາເຂົ້າ ແລະ ຈໍາໜ່າຍບໍ່ຖືກຕ້ອງ ຢູ່ ນວ ທັງເປັນການລະເມີດກົດໝາຍ ແລະ ບຽບການຄວບຄຸມຢາສູບ ຈໍານວນ 2,365 ອັນ, ມູນຄ່າ 94,234,000 ກີບ.

ພັຕ ອານຸສອນ ວົງພະຈັນ ຮອງຫົວໜ້າພະແນກຕໍາຫຼວດສິ່ງແວດລ້ອມ ຫ້ອງຕໍາຫຼວດ ປກສ ນວ ໃຫ້ຮູ້ວ່າ: ອີງຕາມ ປະມວນກົດໝາຍອາຍາ ແລະ ກົດໝາຍວ່າດ້ວຍການດຳເນີນຄະດີອາຍາແຫ່ງ ສປປ ລາວ ສະບັບປັບປຸງ ( ປີ 2017 );

ກົດໝາຍວ່າດ້ວຍການຄວບຄຸມຢາສູບ ສະບັບປັບປຸງ ເລກທີ 09/ສພຊ ລົງວັນທີ 15 ພະຈິກ 2021; ດໍາລັດວ່າດ້ວຍການປັບໃໝ ແລະ ນໍາໃຊ້ມາດຕະການອື່ນ ຕໍ່ກັບການລະເມີດກົດໝາຍ ແລະ ລະບຽບການກ່ຽວກັບການ ຄວບຄຸມຢາສູບ ເລກທີ 52/ລບ, ລົງວັນທີ 21 ກຸມພາ 2019. ໃນຄັ້ງວັນທີ 14 ກັນຍາ 2022 ເຈົ້າໜ້າທີ່ພະແນກຕໍາຫຼວດສິ່ງແວດລ້ອມ ໄດ້ລົງກວດກາຮ້ານຂາຍຢາສູບໄຟຟ້າ ຢູ່ຕະຫຼາດແຫ່ງໜື່ງ ຢູ່ ນວ ພົບເຫັນຮ້ານທີ່ລະເມີດ ຈຳໜ່າຍຢາສູບໄຟຟ້າ ນໍາເຂົ້າບໍ່ຖືກຕ້ອງ ມີຈຳນວນ 8 ຮ້ານ, ຢຶດຢາສູບໄຟຟ້າໄດ້ທັງໝົດ 2,365 ອັນ, ລວມມູນຄ່າ 94,234,000 ກີບ.

ມາຮອດວັນທີ 30 ກັນຍາ 2022 ໄດ້ທໍາລາຍຖິ້ມ. ຕໍ່ກັບເຈົ້າຂອງຮ້ານ ເຈົ້າໜ້າທີ່ ໄດ້ສຶກສາອົບຮົມ ແລະ ເຮັດບົດບັນທຶກກ່າວເຕືອນ ໃຫ້ຢຸດເຊົາຖ້າຍັງມີການລະເມີດແມ່ນຈະດໍາເນີນຄະດີຕາມລະບຽບກົດໝາຍ. ດັ່ງນັ້ນ ຮຽກຮ້ອງມາຍັງສັງຄົມ, ພໍ່ແມ່ປະຊາຊົນ, ຊາວຄ້າຂາຍ ຈົ່ງເປັນເຈົ້າການນໍາກັນ ຖ້າຫາກພົບເຫັນບຸກຄົນ ຫຼື ບັນດາຫ້າງຮ້ານໃດລະເມີດ ໃຫ້ລາຍງານຕໍ່ເຈົ້າໜ້າທີ່ກ່ຽວຂ້ອງ ເພື່ອສະກັດກັ້ນ ແລະ ແກ້ໄຂ ບໍ່ໃຫ້ຈໍາໜ່າຍອອກສູ່ວົງກວ້າງ.

ແຫຼ່ງຂ່າວ: ຄວາມສະຫງົບ

ທີມເຮືອຊ່ວງເມືອງ ຫ້ວຍຊາຍ ຊະນະເລີດອັນດັບໜຶ່ງ ໃນງານແຂ່ງຂັນເຮືອຊ່ວງບຸນອອກພັນສາທີ່ເມືອງຕົ້ນເຜິ້ງ ໄປຄອງ

ວັນທີ 2 ຕຸລາ 2022 ນີ້ ເມືອງ ຕົ້ນເຜິ້ງ ໄດ້ຈັດງານແຂ່ງຂັນກິລາຊ່ວງເຮືອປະເພນີບຸນອອກພັນສາປະວໍລະນາ ປະຈໍາປີ ພສ 2565 ຢູ່ທີ່ທ່ານໍ້າ ບ້ານ ພຽງງາມ ໂດຍການປະທານໃນງານແຂ່ງຂັນ ຂອງ ທ່ານ ຄຳແຍງ ຄອນໄຊຍະກິດ ເຈົ້າເມືອງໆ ຕົ້ນເຜິ້ງ, ໃຫ້ກຽດເຂົ້າຮ່ວມງານມີ ທ່ານ ປອ ບົວຄົງ ນາມມະວົງ ເຈົ້າແຂວງໆ ບໍ່ແກ້ວ, ທ່ານ ຈ້າວເຫວິຍ ປະທານສະພາບໍລິຫານເຂດເສດຖະກິດພິເສດສາມຫຼ່ຽມຄຳ, ມີບັນດາການນໍາ ບັນດາພະແນກການຂອງແຂວງ – ເມືອງ, ການນໍາ 5 ເມືອງ, ການນໍາເມືອງຊຽງແສນ, ສະພາບໍລິຫານເຂດເສດຖະກິດພິເສດສາມຫຼ່ຽມຄຳ, ຄະນະຮັບຜິດຊອບການແຂ່ງຂັນ, ທີມແຂ່ງຂັນເຮືອຊ່ວງ ຕະຫຼອດຮອດມວນຊົນທັງພາຍໃນ ແລະ ຕ່າງປະເທດ ເຂົ້າຮ່ວມທ່ຽວຊົມງານຕະຫຼາດນັດດວາງສະແດງສິນຄ້າ ແລະ ຊົມການແຂ່ງຂັນເຮືອຊ່ວງ ຢ່າງຄັບຄາໜາແໜ້ນ.

ທ່ານ ຄຳແຍງ ຄອນໄຊຍະກິດ ເຈົ້າເມືອງໆ ຕົ້ນເຜິ້ງ ໄດ້ກ່າວເປີດການແຂ່ງຂັນຢ່າງເປັນທາງການວ່າ: ໃນມື້ນີ້, ປະຊາຊົນຊາວເມືອງຕົ້ນເຜິ້ງ ພວກເຮົາໄດ້ພ້ອມກັນຈັດງານບຸນຊ່ວງເຮືອອອກພັນສາ ປະວໍລະນາ ປະຈຳປີ ພສ 2565 ຂຶ້ນຢ່າງເປັນທາງການທີ່ເຕັມໄປດ້ວຍບັນຍາກາດຄຶກຄົ້ນມ່ວນຊື່ນ ໂອກາດບຸນອອກພັນສາຈະບັນຈົບຄົບຮອບມາອີກວາລະໜຶ່ງເຊີງເປັນການສືບທອດມູນເຊື້ອເອກະລັກວັດທະນະທຳ, ຮີດຄອງປະເພນີອັນດີງາມຂອງຊາດ, ຂອງເຜົ່າທີ່ໄດ້ສືບທອດມາແຕ່ ດັ້ງເດີມ ທັງເປັນການສົ່ງເສີມ ໂຄສະນາເຜີຍແຜ່ດ້ານວັດທະນະທຳ, ຮີດຄອງປະເພນີອັນ ດີງາມໃຫ້ດັງກ້ອງໄປສູ່ອະນຸພາກພື້ນ ແລະ ສາກົນໄດ້ຮັບຮູ້ຢ່າງກວ້າງຂວາງ ພ້ອມທັງເປັນການສົ່ງເສີມການທ່ອງທ່ຽວ ເພື່ອດຶງດູດນັກທ່ອງທ່ຽວເຂົ້າມານັບມື້ນັບຫຼາຍຂຶ້ນ. ງານແຂ່ງຂັນຄັ້ງນີ້ ມີທີມເຮືອຊ່ວງ ເຂົ້າຮ່ວມແຂ່ງຂັນ ທັງໝົດ 16 ທີມ, ແບ່ງເປັນ 4 ສາຍ, ສາຍລະ 4 ທີມ. ເຊິ່ງການແຂ່ງຂັນຮອບເປີດສາຍນໍ້າເປັນການພົບກັນ ລະຫວ່າງ ທີມບ້ານໃຫຍ່ ຕົ້ນເຜິ້ງ ແລະ ທີມບ້ານມອມ ເຊິ່ງທີມບ້ານໃຫຍ່ ຕົ້ນເຜິ້ງ ສາມາດເຂົ້າສູ່ເສັ້ນໄຊໄປກ່ອນ.

ການແຂ່ງຂັນໄດ້ດຳເນີນຜ່ານແຕ່ລະຮອບ ດ້ວຍບັນຍາກາດອັນຄຶກຄື້ນມ່ວນຊື່ນ ດ້ວຍສຽງຊົມສຽງເຊຍຂອງຜູ້ຊົມຜູ້ເຊຍຈາກບັນດາບ້ານ ແລະ ພາກສ່ວນຕ່າງໆ ຈົນເຖິງຮອບ 4 ທີມ ເຊິ່ງທີມສາມາດເຂົ້າເຖິງຮອບດັ່ງກ່າວ ມີ: ທີມບ້ານສີບຸນເຮືອງ, ມີບ້ານດອນມູນ – ເຮືອນພັກທະວັດໄຊ, ທີມເມືອງຫ້ວຍຊາຍ ແລະ ທີມສິດເຈົ້າພໍ່ຫຸມພັນບ້ານຮົ່ມເຢັນ ແຕ່ຍ້ອນການແຂ່ງຂັນໄດ້ແກ່ຍາວມາເຖິງຊ່ວງມືດແລງ ຄະນະກຳມະການຈຶ່ງຕົກລົງເຫັນດີໃຫ້ຊິງຊະນະເລີດພ້ອມກັນ 4 ທີມ ຜ່ານການແຂ່ງຂັນຜົນປະກົດວ່າ ທີມທີ່ຊະນະເລີດອັນດັບ 1 ໄດ້ແກ່ທິມເມືອງຫ້ວຍຊາຍ, ອັນດັບ 2 ທີມບ້ານສີບຸນເຮືອງ, ອັນດັບ 3 ທີມບ້ານດອນມູນ – ເຮືອນພັກທະວັດໄຊ, ອັນດັບ 4 ສິດເຈົ້າພໍ່ຫຸມພັນບ້ານຮົ່ມເຢັນ. ຈາກນັ້ນ ກໍ່ໄດ້ເຂົ້າສຸ່ພິທີມອບຂັນ ແລະ ເງິນລາງວັນ ເຊິ່ງອັນດັບ 1 ໄດ້ຮັບຂັນພ້ອມເງິນລາງວັນ 10 ລ້ານກີບ, ອັນດັບ 2 ໄດ້ຮັບຂັນພ້ອມເງິນລາງວັນ 8 ລ້ານກີບ, ອັນດັບ 3 ໄດ້ຮັບຂັນພ້ອມເງິນລາງວັນ 6 ລ້ານກີບ, ແລະ ອັນດັບ 4 ໄດ້ຮັບເງິນລາງວັນ 4 ລ້ານກີບ ໃຫ້ກຽດມອບ ໂດຍ ທ່ານເຈົ້າເມືອງໆ ຕົ້ນເຜິ້ງ.ພາບ: ທີມງານຖ່າຍພາບງານແຂ່ງຂັນຊ່ວງເຮືອ.

ແຫຼ່ງຂ່າວ ແລະ ຮູບພາບ: ໜັງສືພິມບໍ່ແກ້ວ Bokeo Newspaper

ໃນຕອນເຊົ້າຂອງວັນທີ 29 ກັນຍາ 2022 ຢູ່ຫໍປະຊຸມໃຫຍ່ຂອງເມືອງໂພນໄຊ ໄດ້ຈັດກອງປະຊຸມສະຫຼຸບຖອດຖອນບົດຮຽນບັ້ນລົງແກ້ໄຂປະກົດການຫຍໍ້ທໍ້ບັນຫາຢາເສບຕິດ 2 ກຸ່ມຄຶ:

ກຸ່ມທ່າຂ້າມ ແລະ ກຸ່ມສົບເຈ້ຍ ຂຶ້ນຢ່າງເປັນທາງການ ໂດຍເປັນປະທານຂອງ ສະຫາຍ ທອງຈັນ ລັດຕະນະປະດິດ ເຈົ້າເມືອງໂພນໄຊ ປະທານປ້ອງການຊາດ-ປ້ອງກັນຄວາມສະ ຫງົບເມືອງ ມີຄະນະປະຈໍາພັກເມືອງ, ກໍາມະການພັກເມືອງ, ຫົວໜ້າຫ້ອງການ, ຮອງຫ້ອງການ, ຄະນະຊີ້ນໍາບ້ານທັງ 57 ບ້ານທົ່ວເມືອງ ເຂົ້າຮ່ວມ.

ກອງປະຊຸມດັ່ງກ່າວ ສະຫາຍ ພັນໂທ ສຸລິໂພ ຍົດສະນີ ຫົວໜ້າກອງບັນຊາການ ປກສ ເມືອງ ໄດ້ຂື້ນຜ່ານບົດສະຫຼຸບໃນການຈັດຕັ້ງປະຕິບັດໃນບັ້ນລົງແກ້ໄຂບັນຫາຢາເສບຕິດ ( ຕິດພັນກັບປະ ຕິບັດ 2 ວາລະແຫ່ງຊາດ)ຢູ່ພາຍໃນສອງກຸ່ມມີ 17 ບ້ານ, ມີ 1.371 ຄອບຄົວ, ພົນລະເມືອງ 7.753 ຄົນ, ຍິງ 3.522 ຄົນ, ມີ 107 ໜ່ວຍຄຸ້ມຄອງ, ມີກອງຫຼອນ 213 ສະຫາຍ, ຖືອາວຸດ 55 ກະບອກ,ປ້ອງກັນບ້ານ 106 ສະຫາຍ, ຖືອາວຸດ 27 ກະບອກ, ບາດກ້າວໃນການຈັດຕັ້ງປະຕິບັດ ໄດ້ເຕົ້າໂຮມການຈັດ ຕັ້ງທຸກພາກສ່ວນ ແລະ ປະຊາຊົນທີ່ມີອາຍຸ 18 ປີຂື້ນໄປ ເພື່ອເຂົ້າຮ່ວມຂະບວນການແກ້ໄຂບັນຫາຢາເສບຕິດໄດ້ເຊື່ອມຊຶມບັນດາເອກະສານມີເອກະສານວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ, ເອກະສານຢາເສບຕິດ, ຜົນຮ້າຍຂອງຢາເສບຕິດ, ຂໍ້ກໍນົດວ່າດ້ວຍການຄຸ້ມຄອງອາວຸດເສີກ ແລະ ອາວຸດລ່າເນື້ອ, ຄອບຄົວເປົ້າໝາຍພົວພັນຢາເສບຕິດມີ 534 ຄອບຄົວ ກວມເອົາ 38 %, ເປົ້າໝາຍເສບຢາເສບຕິດມີ 658 ຄົນ, ຍິງ 16 ຄົນ ກວມເອົາ 8 % ຂອງພົນລະເມືອງທັງ 17 ບ້ານ, ເປົ້າໝາຍຄ້າ-ຂາຍຢາເສບຕິດ 46 ຄົນ, ຍິງ 11 ຄົນ, ເປົ້າໝາຍມີອາວຸດລ່າເນື້ອມີ 202 ຄົນ,ກວມເອົາ 5 ສ່ວນຮ້ອຍ, ເປົ້າໝາຍມີອາວຸດເສີກ 1 ຄົນ, ເປົ້າໝາຍປະກົດການຫຍໍ້ທໍ້ຕ່າງໆມີ 27 ກໍລະນີ, ຂື້ນບັນຊີເປົ້າໝາຍເຊື່ອຖືສາສະໝາຕ່າງປະເທດ 2 ຄົນ, ຍິງ 1 ຄົນ, ພົນລະເມືອງບໍ່ທັນໄດ້ຂື້ນສໍາມະໂນຄົວ 236 ຄົນ, ຍິງ 128 ຄົນ.

ຕໍ່ກັບເປົ້າໝາຍທີມີການພົວພັນຢາເສບຕິດໄດ້ຂຽນບົດບັນທຶກຕໍ່ຄອບຄົວເປົ້າໝາຍເສບຢາເສບຕິດມີ 493 ຄອບຄົວ, ບັນລຸໄດ້ 92%, ຍັງຄ້າງ 41 ຄອບຄົວ,ໄດ້ຂຽນປະຕິຍານຕົນເອງມີ 593 ຄົນ ບັນລຸໄດ້ 90%, ໃນນັ້ນມີຢາບ້າ 581 ຄົນ, ເສບຢາຝີ່ນ 12 ຄົນ,ຍັງຄ້າງ 65 ຄົນ,ຍິງ 3 ຄົນ, ໄດ້ຂຽນບົດບັນທຶກຕໍ່ເປົ້າໝາຍຄ້າ-ຂາຍ 10 ຄົນບັນລຸໄດ້ 100%, ນໍາເຂົ້າສູນບໍາບັດດັດສ້າງ 25 ຄົນ, ຍຶດຂອງກາງໄດ້ຢາບ້າ 2,161 ເມັດ, ຢາຝີ່ນໄດ້ 2 ຄົນແລະ ອຸປະກອນເສບຢາຝີ່ນ 3 ຊຸດ,ກວດນໍ້າມຸດ 4 ຄົນ, ພົບສານເສບຕິດ 3 ຄົນ, ໄດ້ຂື້ນທະບຽນອາວຸດລ່າເນື້ອ 538 ກະບອກເທົ່າກັບ 6 ສ່ວນຮ້ອຍ, ທ້ອນໂຮມອາວຸດລ່າເນື້ອໄດ້ 207 ກະບອກ, ບັນລຸໄດ້ 38 ສ່ວນຮ້ອຍ,ອາວຸດເສີກ 1 ກະບອກບັນລຸໄດ້ຮ້ອຍສ່ວນຮ້ອຍ ແລະ ໄດ້ຂຽນບົດບັນທຶກຕໍ່ເປົ້າໝາຍມີອາວຸດລ່າເນື້ອ 1 ຄົນ, ພາຍຫຼັງສໍາເລັດກອງປະຊຸມແລ້ວຄະນະປະທານ, ແຂກທີຖືກເຊີນທຸກຂະແໜງການຂອງເມືອງ ແລະ ອົງການປົກຄອງບ້ານແຕ່ລະບ້ານທັງ 17 ບ້ານ ໄດ້ພ້ອມກັນທໍາລາຍ, ຈູດ, ເຜົາ ຢາເສບຕິດ ແລະອາວຸດລ່າສັດທຸກຊະນິດ,ທຸກປະເພດຕື່ມອີກ

ແຫຼ່ງຂ່າວ: Media Laos

ໂດຍຕອບສະໜອງຕາມຄຳເຊື້ອເຊີນຂອງ ສະຫາຍ ພັນຄຳ ວິພາວັນ, ນາຍົກລັດຖະມົນຕີ ແຫ່ງ ສປປ ລາວ, ສະຫາຍ ມານູເອັນ ມາເຣໂຣ ກຣູຊ໌ (Manuel Marrero Cruz), ນາຍົກລັດຖະມົນຕີ ແຫ່ງ ສາທາລະນະລັດ ກູບາ ແລະ ຄະນະ ໄດ້ເດີນທາງມາຢ້ຽມຢາມ ສປປ ລາວ ຢ່າງເປັນທາງການ, ໃນວັນທີ 02-04 ຕຸລາ 2022, ເພື່ອເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີ ທີ່ມີມາແຕ່ດົນນານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ກູບາ ຖານອ້າຍນ້ອງຮ່ວມອຸດົມການອັນດຽວກັນ ໃຫ້ນັບມື້ເຂັ້ມແຂງ ແລະ ແຕກດອກອອກຜົນຍິ່ງໆຂຶ້ນໃນຊຸມປີຕໍ່ຫນ້າ. ພິທີຕ້ອນຮັບຢ່າງເປັນທາງການ ໄດ້ຈັດຂຶ້ນຢ່າງສົມກຽດ ທີ່ສຳນັກງານນາຍົກລັດຖະມົນຕີ, ໃນຕອນບ່າຍຂອງວັນທີ 02 ຕຸລາ 2022,

ຈາກນັ້ນ ກໍ່ໄດ້ມີການພົບປະສອງຝ່າຍ ຢ່າງເປັນທາງການ, ເຊິ່ງ ຄະນະຜູ້ແທນຝ່າຍລາວ ນໍາໂດຍ ສະຫາຍ ພັນຄຳ ວິພາວັນ, ນາຍົກລັດຖະມົນຕີ ແຫ່ງ ສປປ ລາວ ແລະ ຝ່າຍກູບາ ນຳໂດຍ ສະຫາຍ ມານູເອັນ ມາເຣໂຣ ກຣູຊ໌, ນາຍົກລັດຖະມົນຕີ ແຫ່ງ ສາທາລະນະລັດ ກູບາ. ໃນໂອກາດດັ່ງກ່າວ, ສະຫາຍ ນາຍົກລັດຖະມົນຕີ ພັນຄຳ ວິພາວັນ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງມາຍັງ ສະຫາຍ ມານູເອັນ ມາເຣໂຣ ກຣູຊ໌, ນາຍົກລັດຖະມົນຕີ ແຫ່ງ ສ.ກູບາ ທີ່ໄດ້ນຳພາຄະນະຜູ້ແທນຂັ້ນສູງ ເດີນທາງມາຢ້ຽມຢາມ ສປປ ລາວ ເປັນຄັ້ງທຳອິດ ແລະ ເປັນຄັ້ງປະຫວັດສາດ, ເຊິ່ງເປັນ​ນິ​ມິດ​ໝາຍ​ອັນ​ດີໃນການສືບຕໍ່ຮັດແໜ້ນ ແລະ ​ເສີມຂະຫຍາຍສາຍພົວພັນ​ມິດ​ຕະ​ພາບ ແລະ ການຮ່ວມມືຖານອ້າຍນ້ອງ ທີ່ເປັນມູນເຊື້ອອັນດີມາແຕ່ດົນນານ ລະຫວ່າງ ສອງຊາດ ລາວ-ກູບາ. ການພົບປະໃນຄັ້ງນີ້ ສອງຝ່າຍ ໄດ້ປຶກສາຫາລືແລກປ່ຽນຄຳຄິດເຫັນຢ່າງກົງໄປກົງມາ, ຕີລາຄາຄືນສະພາບການພົວພັນຮ່ວມມືສອງຝ່າຍ ໃນໄລຍະຜ່ານມາ ແລະ ກຳນົດທິດທາງແຜນການຮ່ວມມືໃນຕໍ່ຫນ້າ, ເຊິ່ງ ສອງຝ່າຍ ໄດ້ຕີລາຄາສູງຕໍ່ສາຍພົວພັນຮ່ວມມືສອງຝ່າຍທີ່ເປັນມູນເຊື້ອມາແຕ່ຍາວນານ, ບົນພື້ນຖານແຫ່ງການເຂົ້າອົກເຂົ້າໃຈ ແລະ ຊ່ວຍເຫຼືອເຊິ່ງກັນ ແລະ ກັນ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ກູບາ, ພາຍຫຼັງທີ່ສອງປະເທດ ໄດ້ສ້າງຕັ້ງສາຍພົວພັນການທູດນຳກັນ ໃນວັນທີ 04 ພະຈິກ 1974 ເປັນຕົ້ນມາ, ເຊິ່ງ ການພົວພັນຮ່ວມມືດ້ານການເມືອງ ແມ່ນສືບຕໍ່ຢູ່ໃນລະດັບດີເລີດ ແລະ ນັບມື້ນັບໜັກແໜ້ນຍິ່ງໆຂຶ້ນ, ສະແດງອອກໃນການພົບປະແລກປ່ຽນການຢ້ຽມຢາມເຊິ່ງກັນ ແລະ ກັນ ຂອງການນຳຂັ້ນສູງຂອງສອງປະເທດ ລາວ-ກູບາ ເປັນແຕ່ລະໄລຍະ, ໄດ້ມີການປຶກສາຫາລື ແລະ ແລກປ່ຽນຄຳຄິດເຫັນກັນ ໃນບັນຫາຕ່າງໆຢ່າງເປັນປະຈຳ ລວມທັງ ໃນຮູບແບບກອງປະຊຸມທາງໄກໃນໄລຍະການແຜ່ລະບາດຂອງພະຍາດໂຄວິດ-19.

ພ້ອມດຽວກັນນີ້, ສອງຝ່າຍ ກໍ່ໄດ້ຕີລາຄາສູງຕໍ່ການຮ່ວມມື ດ້ານສາທາລະນະສຸກ, ດ້ານການສຶກສາ-ກິລາ, ເຊິ່ງເປັນຂະແໜງການຮ່ວມມືທີ່ມີມູນເຊື້ອມາແຕ່ດົນນານ ແລະ ພົ້ນເດັ່ນ ມີປະສິດທິພາບ ແລະ ປະສິດທິຜົນສູງ ໃນໄລຍະຜ່ານມາ. ນອກຈາກນີ້, ສອງຝ່າຍ ກໍ່ໄດ້ແຈ້ງໃຫ້ກັນຊາບໂດຍຫຍໍ້ ກ່ຽວກັບ ສະພາບການພາຍໃນທີ່ພົ້ນເດັ່ນ, ແລກປ່ຽນຄຳຄິດຄຳເຫັນຕໍ່ກັບສະພາບການພາກພື້ນ ແລະ ສາກົນ ທີ່ມີຄວາມສົນໃຈຮ່ວມກັນ. ໃນໂອກາດນີ້, ສະຫາຍ ນາຍົກລັດຖະມົນຕີ ພັນຄຳ ວິພາວັນ ໄດ້ຕາງໜ້າໃຫ້ ພັກ, ລັດຖະບານ ແລະ ປະຊາຊົນລາວ ສະແດງຄວາມຂອບໃຈ ແລະ ຮູ້ບຸນຄຸນຕໍ່ການສະໜັບສະໜູນຊ່ວຍເຫຼືອອັນລ້ຳຄ່າ ໃຫ້ແກ່ ສປປ ລາວ ຕະຫຼອດໄລຍະຜ່ານມາ ເປັນຕົ້ນແມ່ນ ການສະໜອງທຶນການສຶກສາ ເພື່ອການພັດທະນາຊັບພະຍາກອນມະນຸດ, ການສົ່ງຊ່ຽວຊານແພດຫມໍ ກູບາ ມາຊ່ວຍເຫຼືອໃຫ້ຄວາມຮູ້ແກ່ຝ່າຍລາວ, ການສົ່ງທີມຄູຝຶກມວຍສາກົນ ເພື່ອມາຝຶກແອບໃຫ້ແກ່ນັກກິລາລາວ ໃນການເຂົ້າຮ່ວມງານກິລາສຳຄັນຕ່າງໆ ແລະ ການຊ່ວຍເຫຼືອອື່ນໆ. ສອງຝ່າຍ ຢືນຢັນເຖິງຄວາມມຸ້ງໝັ້ນຈະສືບຕໍ່ຊອກຫາທຸກວິທີທາງທີ່ເປັນໄປໄດ້ ເພື່ອເສີມຂະຫຍາຍການຮ່ວມມືໃນດ້ານຕ່າງໆ ໂດຍສະເພາະດ້ານເສດຖະກິດ-ການຄ້າ ໄປສູ່ຄວາມສໍາເລັດອັນໃໝ່ຮ່ວມກັນ. ໃນຕອນທ້າຍ, ສະຫາຍນາຍົກ ລັດຖະມົນຕີ ພັນຄຳ ວິພາວັນ ໄດ້ອວຍພອນໃຫ້ ສະຫາຍ ນາຍົກລັດຖະມົນຕີ ມານູເອັນ ມາເຣໂຣ ກຣູຊ໌ ພ້ອມດ້ວຍຄະນະຜູ້ແທນຂັ້ນສູງຂອງ ກູບາ ຈົ່ງປະສົບຜົນສຳເລັດໃນໂອກາດເດີນທາງມາຢ້ຽມຢາມ ສປປ ລາວ ໃນຄັ້ງນີ້, ອວຍພອນໃຫ້ສາຍພົວພັນມິດຕະພາບ ແລະ ການຮ່ວມມືທີ່ເປັນມູນເຊື້ອອັນດີງາມທີ່ມີມາແຕ່ດົນນານ ລະຫວ່າງ ສອງປະເທດ ລາວ-ກູບາ ຈົ່ງຫມັ້ນຍືນ, ສືບຕໍ່ເຂັ້ມແຂງ, ຂະຫຍາຍຕົວ ແລະ ມີປະສິດທິຜົນຍິ່ງຂຶ້ນ.

ພາຍຫຼັງສຳເລັດການພົບປະສອງຝ່າຍ, ສະຫາຍ ນາຍົກລັດຖະມົນຕີ ພັນຄຳ ວິພາວັນ ແລະ ສະຫາຍ ນາຍົກລັດຖະມົນຕີ ມານູເອັນ ມາເຣໂຣ ກຣູຊ໌ ກໍ່ໄດ້ເຂົ້າຮ່ວມເປັນສັກຂີພິຍານໃນພິທີລົງນາມເອກະສານບົດບັນທຶກຄວາມເຂົ້າໃຈ ຈຳນວນ 4 ສະບັບ ຄື:

1.) ບົດບັນທຶກຄວາມເຂົ້າໃຈ ລະຫວ່າງ ກະຊວງສຶກສາທິການ ແລະ ກິລາ ແຫ່ງ ສປປ ລາວ ແລະ ກະຊວງສຶກສາຊັ້ນສູງ ແຫ່ງ ສ.ກູບາ ວ່າດ້ວຍການຮ່ວມມືດ້ານການສຶກສາຊັ້ນສູງ ແລະ ຄົ້ນຄວ້າວິທະຍາສາດໃນໄລຍະປີ 2022-2027;

2.) ບົດບັນທຶກຄວາມເຂົ້າໃຈ ລະຫວ່າງ ກະຊວງກະສິກໍາ ແລະ ປ່າໄມ້ ແຫ່ງ ສປປ ລາວ ແລະ ກະຊວງກະສິກໍາ ແຫ່ງ ສ.ກູບາ ກ່ຽວກັບການຮ່ວມມືໃນຂົງເຂດກະສິກໍາ;

3.) ແຜນການຮ່ວມມືດ້ານການແພດ ລະຫວ່າງ ກະຊວງສາທາລະນະສຸກ ແຫ່ງ ສປປ ລາວ ແລະ ກະຊວງສາທາລະນະສຸກ ແຫ່ງ ສ.ກູບາ;

4.) ບົດບັນທຶກຄວາມເຂົ້າໃຈການຮ່ວມມື ລະຫວ່າງ ມະຫາວິທະຍາໄລແຫ່ງຊາດລາວ ແລະ ມະຫາວິທະຍາໄລ ລາຮາວານ ໃນຂົງເຂດການສຶກສາ.

ການພົບປະສອງຝ່າຍຄັ້ງນີ້ ໄດ້ດຳເນີນໄປດ້ວຍບັນຍາກາດແຫ່ງໄມຕີຈິດມິດຕະພາບ, ສະໜິດສະໜົມ, ສ້າງສັນ, ກົງໄປກົງມາ ແລະ ມີຄວາມເຂົ້າໃຈກັນຖານສະຫາຍອ້າຍນ້ອງທີ່ແທ້ຈິງ ຮ່ວມອຸດົມການສັງຄົມນິຍົມອັນດຽວກັນ, ສ່ອງແສງໃຫ້ເຫັນເຖິງສາຍພົວພັນມິດຕະພາບທີ່ເປັນມູນເຊື້ອທີ່ມີມາຢ່າງຍາວນານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ກູບາ.

ພາບ-ຂ່າວ: ກົມການຂ່າວ, ກະຊວງການຕ່າງປະເທດ