ລາຍງານວັນທີ 15 ກັນຍາ 2021 ຂໍ້ມູນເບື້ອງຕົ້ນສໍາລັບການຕິດເຊື້ອໃນຊຸມຊົນ ຢູ່ນະຄອນຫຼວງວຽງຈັນ ມີລາຍລະອຽດດັ່ງນີ້:

ນະຄອນຫຼວງ 2 ຄົນ:

1.ເພດຊາຍ, ອາຍຸ 29 ປີ, ບ້ານນາທົ່ມ, ເມືອງໄຊທານີ, ອາຊີບ: ພະນັກງານ ປກສ, ບໍ່ມີພະຍາດປະຈຳໂຕ, ໄດ້ສັກວັກຊີນຄົບໂດສ.

• ຜູ້ກ່ຽວປະຈຳການຢູ່ສູນຈຳກັດບໍລິເວນ ມຊ ແຕ່ວັນທີ 6 ຫາ 31 ສິງຫາ 2021 ( ວັນທີ 30 ສິງຫາ 2021 ຜູ້ກ່ຽວກວດບໍ່ພົບເຊື້ອ ແຕ່ໝູ່ຂອງຜູ້ກ່ຽວ ກວດພົບເຊື້ອ ​).
• ວັນທີ 1​ ກັນຍາ 2021​ ເຂົ້າຈຳກັດບໍລິເວນຢູ່ສູນທີ່ຄະນະສະເພາະກິດກຳນົດໄວ້ ຈົນມາຮອດ ວັນທີ 14 ກັນຍາ ໄດ້ເກັບຕົວຢ່າງກວດຄັ້ງທີ 2 ຈຶ່ງພົບເຊື້ອ.

2.ເພດຊາຍ, ອາຍຸ 58 ປີ, ບ້ານດ່ານຊ້າງ, ເມືອງໄຊທານີ, ອາຊີບ: ພະນັກງານ ປກສ, ບໍ່ມີພະຍາດປະຈຳໂຕ, ໄດ້ສັກວັກຊີນຄົບໂດສ. ຜູ້ກ່ຽວເປັນຜູ້ສຳຜັດໃກ້ຊິດກັບຜູ້ຕິດເຊື້ອ.

• ວັນທີ 6 ຫາ 8 ກັນຍາ ຜູ້ກ່ຽວເຂົ້າຮ່ວມກອງປະຊຸມທາງໄກຢູ່ຫ້ອງການ ມີເພື່ອນຮ່ວມງານ 10 ກວ່າຄົນ
• ວັນທີ 11 ຫາ 12 ກັນຍາ ຢູ່ບ້ານ
• ວັນທີ 13 ກັນຍາ ມາການປົກກະຕິ
• ວັນທີ 14 ກັນຍາ ຄອບຄົວ (ພັນລະຍາຕິດເຊື້ອ) ຈຶ່ງໄດ້ໄປກວດ ແລະ ພົບເຊື້ອ

–ເຂດສ່ຽງ/ສະຖານທີ່ ທີ່ຜູ້ຕິດເຊື້ອໄດ້ເດີນທາງໄປ ໃນນະຄອນຫຼວງວຽງຈັນ: ຫ້ອງການ ປກສ ນະຄອນຫຼວງ

ຕັ້ງວົງຊຸມແຊວ…ຖືເບົາຕໍ່ການແຜ່ລະບາດພະຍາດໂຄວິດ-19

ຕາມ ແຟນເພຈ ປ້ອງກັນຄວາມສະຫງົບນະຄອນຫຼວງວຽງຈັນ ໃຫ້ຮູ້ວ່າ: ໃນເວລາ 20 ໂມງ 00 ນາທີ ວັນທີ 14 ກັນຍາ 2021 ປກສ ນວ ໄດ້ຮັບແຈ້ງຂໍ້ມູນຜ່ານ ເບີວອດແອັບ ປກສ ນວ 020 28899774 ຈຶ່ງໄດ້ແຕ່ງຕັ້ງວິຊາສະເພາະລົງກວດກາພົບເຫັນ ກຸ່ມຄົນຈຳນວນໜຶ່ງຢູ່ຮ່ອມ 6 ບ້ານດົງປ່າລານ ເມືອງສີສັດຕະນາກ ນວ ຖືເບົາຕັ້ງວົງຊຸມແຊວ ບໍ່ຢ້ານກົວຕໍ່ການແຜ່ລະບາດຂອງພະຍາດໂຄວິດ-19 ເຈົ້າໜ້າທີ່ ຈຶ່ງໄດ້ສຶກສາອົບຮົມກ່າວເຕືອນພ້ອມທັງເຮັດບົດບັນທຶກໄວ້ ແລະ ມອບໃຫ້ບ້ານຕິດຕາມຖ້າຍັງລະເມີດຈະດຳເນີນຕາມລະບຽບກົດໝາຍ

ກອງບັນຊາການ ປກສ ນະຄອນຫຼວງວຽງຈັນ ບີວອດແອັບ 020 28899774 ຮັບແຈ້ງຂໍ້ມູນ ແລະ ຄຳສະເໜີຂອງສັງຄົມ.

ແຈ້ງການຈາກ ຄະນະສະເພາະກິດນະຄອນປາກເຊ ເລື່ອງ ການເຂັ້ມງວດມາດຕະການປ້ອງກັນ, ສະກັດກັ້ນ ແລະ ຄວບຄຸມ ການລະບາດ ຂອງໂຄວິດ-19 ໃນເຂດພື້ນທີ່ສີແດງ-ເຫຼືອງ ແລະ ສະຖານທີ່ສ່ຽງຕ່າງໆ

ນະຄອນ ໄກສອນ ພົມວິຫານ ເພີ່ມຄວາມເຂັ້ມງວດຕໍ່ຜູ້ລະເມີດ ຝາຝືນ ຕໍ່ຄຳສັ່ງຂອງທ່ານເຈົ້າແຂວງ ເປີດຮ້ານຂາຍເສື້ອຜ້າ, ຕັ້ງວົງຊຸມແຊວເຫຼົ້າ-ເບຍ ແລະ ກິລາໃນຮົ່ມ.

ເພື່ອສືບຕໍ່ປະຕິບັດຕາມຄຳສັ່ງຂອງທ່ານເຈົ້າແຂວງ ວ່າດ້ວຍການເພີ່ມທະວີຄວາມເຂັ້ມງວດ ໃນການປະຕິບັດມາດຕະການເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19.

ຢູ່ນະຄອນ ໄກສອນ ພົມວິຫານ ໃນວັນທີ 12 ກັນຍາ ທີ່ຜ່ານມາ ທີມງານກອງເລຂາຄະນະສະເພາະກິດນະຄອນ ນໍາໂດຍ ທ່ານ ທິບພະມົນ ພິມມະສອນ ຮອງຫົວໜ້າຫ້ອງວ່າການນະຄອນ ໄກສອນ ພົມວິຫານ ທັງເປັນກອງເລຂາຄະນະສະເພາະກິດນະຄອນ,ໄດ້ສົມທົບກັບກໍາລັງ ເຈົ້າໜ້າທີ່ຕໍາຫຼວດ ປກສ ນະຄອນ ,ປກສ ກຸ່ມບ້ານ ແລະ ນາຍບ້ານ ໄດ້ລົງເຮັດບົດທຶກ ກ່າວເຕືອນ ປະຊາຊົນຈຳນວນໜຶ່ງ ທີ່ຍັງຖືກເບົາ ຕັ້ງວົງຊຸມແຊວເຫຼົ້າເບຍ,ຮ້ານຂາຍເສື້ອ ,ແລະ ກິລາໃນຮົ່ມທຸກປະເພດ ຍັງພົບເຫັນວ່າ:ຍັງມີຫຼາຍຮ້ານທີ່ລະເມີດ ແລະ ຝາຝືນຕໍ່ຄຳສັ່ງດັ່ງກ່າວໂດຍມີການລັກເປີດຮ້ານຂາຍເສື້ອຜ້າ,ຊຸມແຊວເຫຼົ້າເບຍແລະ ກິລາໃນຮົ່ມ ລະເມີດຕໍ່ຄຳສັ່ງແຈ້ງການຂອງຂັ້ນເທິງວາງອອກ ຈາກນັ້ນທາງພະນັກງານເຈົ້າໜ້າທີ່ໄດ້ອະທີບາຍ ເພື່ອກ່າວເຕືອນເຈົ້າຂອງຮ້ານຜູ້ປະກອບການ,ຕັ້ງວົງຊຸມແຊວເຫຼົ້າເບຍ ແລະ ກິລາໃນຮົ່ມ ຂໍໃຫ້ການຮ່ວມໄມ້ຮ່ວມມື ແລະ ເປັນເຈົ້າການນໍາກັນ ໃນການປະຕິບັດມາດຕະການ ຂອງຄະນະສະເພາະກິດວາງອອກຢ່າງເຂັ້ມງວດ.

ພ້ອມທັງເຮັດບົດບັນທຶກກັບເຈົ້າຂອງຮ້ານ ແນະນໍາໃຫ້ປິດຮ້ານຊົ່ວຄາວ ປະເພດຮ້ານຮ້ານຂາຍເສື້ອຜ້າຈໍານວນໜຶ່ງ ເພື່ອເປັນຫຼັກຖານຖ້າຫາກວ່າຜູ້ກຽ່ວຍັງມີການລະເມີດຝາຝືນ ບໍ່ປະຕິບັດມາດຕະການ ຫຼື ແຈ້ງການ,ຄໍາແນະນໍາຕ່າງໆ ທີ່ຜິດຕໍ່ລະບຽບກົດໝາຍ ຈະບໍ່ມີຂໍ້ຍົກເວັ້ນໃດໆ ແລະ ສັ່ງຈະໂຈະບໍ່ໃຫ້ເປີດຮ້ານ ພ້ອມທັງປັບໃໝ ຕາມລະບຽບການ.

ນີ້ກໍ່ເພື່ອເປັນການປ້ອງກັນ ແລະ ຄວບຄຸມ ການຕິດເຊື້ອ,ແຜ່ເຊື້ອພະຍາດ ພະຍາດໂຄວິດ-19 ຢູ່ໃນຊຸມຊົນນະຄອນ ໄກສອນ ພົມວິຫານກໍ່ຄືແຂວງສະຫວັນນະເຂດ ທີນັບມື້ຫຼຸດລົງ ປະຊາຊົນຈະໄດ້ທໍາມາຫາກິນ ສູ່ສະພາບປົກກະຕິ.

ແຫຼງຂ່າວຈາກ ແຂວງສາລະວັນ ໃຫ້ຮູ້ວ່າ: ເວລາປະມານ 18:00 ແລງ ວັນທີ 11 ກັນຍາ 2021 ເກີດເຫດມີລົມພະຍຸເຂດຮ້ອນ ໂກນເຊີນ ພັດຜ່ານ ເຮັດໃຫ້ເຮືອນຂອງພໍ່ແມ່ປະຊາຊົນ ບ້ານໂພນໃຜ່ ເມືອງສາລະວັນ ໄດ້ຮັບຜົນເສຍຫາຍ ມີເຮືອນລົ້ມ, ຫລັງຄາເລີກ ຈຳນວນ 75 ຫລັງ, ໃນນັ້ນເສຍຫາຍໜັກຈໍານວນ 20 ຫລັງ, ເ ສຍຫາຍປານກາງ 45 ຫລັງ ແລະ ເສຍຫາຍເລັກນ້ອຍ 10 ຫລັງ, ເຮັດໃຫ້ມີຜູ້ເສຍຊີວິດ 1 ຄົນ ເພດຍິງ ອາຍຸ 50 ກວ່າ ປີ, ບາດເຈັບສາຫັດ 2 ຄົນ ແລະ ບາດເລັກນ້ອຍ 6 ຄົນ, ປັດຈຸບັນ ປະຊາຊົນຈຳນວນ 139 ຄົນ ຂາດທີ່ຢູ່ອາໄສ.

ທ່ານ ພິດສະໄໝ ເຂັມວິໄລ ຮອງເລຂາພັກເມືອງສາລະວັນ ໄດ້ໃຫ້ສໍາພາດໃນຕອນເຊົ້າວັນ 12 ກັນຍາ 2021 ນີ້ວ່າ: ປັດຈຸບັນ ອຳນາດການປົກຄອງແຂວງ ແລະ ເມືອງ ໄດ້ມີການຄົ້ນຄ້ວາ, ແຕ່ງຕັ້ງຄະນະຮັບຜິດຊອບລົງຊ່ວຍເຫລືອພໍ່ແມ່ປະຊາຊົນ, ຈັດຫາທີ່ພັກອາໄສຊົ່ວຄາວ ແລະ ຈັດວາງກຳລັງປ້ອງກັນຊາດ-ປ້ອງກັນຄວາມສະຫງົບ ເຂົ້າຊ່ວຍເຫລືອສ້ອມແປງເຮືອນໃຫ້ພໍ່ແມ່ປະຊາຊົນຢ່າງຮີບດ່ວນ.

ໃນໂອກາດດຽວກັນ, ຫ້ອງການສະພາປະຊາຊົນແຂວງສາລະວັນ ກໍໄດ້ນຳເອົາເຂົ້າ ສານໜຽວ ຈຳນວນ 1 ໂຕນ ມາມອບໃຫ້ອຳນາດການປົກຄອງ ບ້ານໂພນໃຜ່ ເພື່ອເປັນການບັນເທົາໃນເບື້ອງຕົ້ນ.