ເນື່ອງໃນໂອກາດສະເຫຼີມສະຫຼອງວັນຄູແຫ່ງຊາດ ວັນທີ 7 ຕຸລາ ຄົບຮອບ 27 ປີພິທີສະເຫຼີມສະຫຼອງວັນຄູແຫ່ງຊາດ 7 ຕຸລາ ຄົບຮອບ 27 ປີ ໄດ້ຈັດຂຶ້ນໃນວັນທີ 6 ຕຸລານີ້ ທີ່ກະຊວງສຶກສາທິການ ແລະ ກິລາ (ສສກ) ໃນຮູບແບບທາງໄກ ໂດຍການເປັນປະທານຂອງ ທ່ານ ພຸດ ສິມມາລາວົງ ລັດຖະມົນຕີກະຊວງສຶກສາທິການ ແລະ ກິລາ ພ້ອມດ້ວຍບັນດາຜູ້ບໍລິຫານການສຶກສາ ແລະ ກິລາ, ຄູ – ອາຈານ, ນັກຮຽນ-ນັກສຶກສາເຂົ້າຮ່ວມ.
ໃນພິທີ ທ່ານ ລັດຖະມົນຕີກະຊວງສຶກສາທິການ ແລະ ກິລາ ໄດ້ອ່ານສານອວຍພອນ ເນື່ອງໃນວັນຄູແຫ່ງຊາດ ວັນທີ 7 ຕຸລາ ຄົບຮອບ 27 ປີ (ວັນທີ 7 ຕຸລາ 1994 – ວັນທີ 7 ຕຸລາ 2021).
ຮຽນບັນດາທ່ານການນໍາພັກ-ລັດ ທີ່ເຄົາລົບ ແລະ ນັບຖືຢ່າງສູງ. ຜູ້ບໍລິຫານການສຶກສາ ແລະ ກິລາ, ບັນດາຄູ – ອາຈານ, ນັກຮຽນ-ນັກສຶກສາ ແລະ ພໍ່ແມ່ຜູ້ປົກຄອງ ທົ່ວປະເທດ ທີ່ນັບຖື ແລະ ຮັກແພງ.
ວັນຄູແຫ່ງຊາດວັນທີ 7 ຕຸລາ ຊຶ່ງເປັນວັນປະຫວັດສາດທີ່ສໍາຄັນໜຶ່ງຂອງຊາດລາວເຮົາ ໄດ້ໝູນວຽນມາບັນຈົບຄົບຮອບ 27 ປີ, ຂ້າພະເຈົ້າ ຂໍຕາງໜ້າໃຫ້ຄະນະພັກ, ຄະນະນໍາກະຊວງສຶກສາທິການ ແລະ ກິລາ ສະແດງຄວາມຢື້ຢາມຖາມຂ່າວ, ຄວາມສາມັກຄີຮັກແພງອັນອົບອຸ່ນ ມາຍັງເພື່ອນໆຄູ – ອາຈານທຸກຊັ້ນ, ທຸກສາຍ, ທຸກລະດັບ ທຸກຂົງເຂດໃນຂອບເຂດທົ່ວປະເທດ ຕະຫຼອດຮອດຜູ້ບໍລິຫານການສຶກສາ ວິທະຍາສາດ ແລະ ກິລາ ທຸກຂັ້ນ. ການສະເຫຼີມຫຼອງວັນຄູແຫ່ງຊາດຄົບຮອບ 27 ປີ ໃນຮູບແບບທາງໄກ ໃນທົ່ວປະເທດປີນີ້, ກະຊວງສຶກສາທິການ ແລະ ກິລາ ໄດ້ຈັດພິທີຂຶ້ນ ໃນໄລຍະໃກ້ຄຽງກັນການສະເຫຼີມສະຫຼອງວັນຄູສາກົນ ແມ່ນໄດ້ຖືເອົາວັນທີ 5 ຕຸລາ ຂອງທຸກປີເປັນວັນຄູສາກົນ, ຫົວຂໍ້ການສະເຫຼີມສະຫຼອງວັນຄູສາກົນໃນປີນີ້ແມ່ນ; “ຄູຄືຫົວໃຈຂອງການຟື້ນຟູການສຶກສາໃນໄລຍະການແຜ່ລະບາດຂອງໂຄວິດ-19”.ສຳລັບ ສປປ ລາວ ເຮົາ, ພັກ ແລະ ລັດຖະບານ ເວລາໃດກໍໃຫ້ຄວາມສໍາຄັນ ແລະ ເອົາໃຈໃສ່ຕໍ່ວຽກງານການສຶກສາຄູ ແລະ ຖືເອົາຄູສອນເປັນກົກໃນການຍົກສູງຄຸນນະພາບຂອງການສຶກສາ ກໍຄືການພັດທະນາຊັບພະຍາກອນມະນຸດ ເພາະຄູມີບົດບາດສໍາຄັນໃນການສ້າງອະນາຄົດໃຫ້ຄົນແຕ່ລະຮຸ່ນ ແລະ ໃນພາລະກິດສ້າງສາພັດທະນາປະເທດຊາດໃຫ້ຈະເລີນຮຸ່ງເຮືອງ.
ເມື່ອເວົ້າເຖິງບົດບາດຂອງຄູແລ້ວ ກໍມີການນຳພັກ-ລັດ, ນັກສຶກສາ ແລະ ນັກສັງຄົມສາດຫຼາຍທ່ານໄດ້ຂະໜານນາມຄູວ່າ: ຄູແມ່ນຄົນຂອງພັກ, ຄູແມ່ນວິສະວະກອນແຫ່ງດວງວິນຍານ, ຄູແມ່ນແມ່ພິມຂອງຊາດ, ຄູແມ່ນພໍ່ແມ່ຜູ້ທີ່ສອງຂອງເດັກ, ຄູແມ່ນຜູ້ທີ່ມີຄວາມຮູ້ ແລະ ປະສົບການ ທີ່ສາມາດຖ່າຍທອດໃຫ້ແກ່ຜູ້ອື່ນ, ຄູຄືຜູ້ນໍາພາການປ່ຽນແປງໃໝ່ ແລະ ອື່ນໆ.
ດັ່ງຄຳເວົ້າຂອງ ປະທານ ໄກສອນ ພົມວິຫານ ທີ່ວ່າ: “ການສຶກສາເປັນວິທະຍາສາດກ່ຽວກັບການສ້າງຄົນ, ວິທະຍາສາດຊີ້ໃຫ້ເຫັນວ່າ ບັນດາຄວາມຮູ້ດ້ານວິທະຍາສາດ, ເຕັກນິກ, ຄຸນສົມບັດ ແລະ ຊຳນິຊຳນານ ໃນການອອກແຮງງານນັ້ນ ບໍ່ເກີດຂຶ້ນຕາມເສັ້ນທາງສືບເຊື້ອ, ແຕ່ຫາກກໍ່ຕົວຂຶ້ນຕາມເສັ້ນທາງສິດສອນ, ຮ່ຳຮຽນ ແລະ ນຳໃຊ້ອຸປະກອນການອອກແຮງງານ ໝາຍວ່າມັນກໍ່ຕົວຂຶ້ນຕາມເສັ້ນທາງການສຶກສາ. ດັ່ງນັ້ນການສຶກສາ ຈຶ່ງເປັນພາກສ່ວນສຳຄັນຂອງໂຄງບົນ ຊຶ່ງມີໜ້າທີ່ ນຳເອົາລະດັບການສຶກສາມາໃຫ້ທຸກຄົນໃນສັງຄົມ ນັບມື້ນັບສູງຂຶ້ນ.
ສັງລວມແລ້ວບໍ່ວ່າເວລາໃດ, ຄູ-ອາຈານ ໄດ້ເປັນໝາກຫົວໃຈຕັດສິນໃນການສ້າງຊັບພະຍາ ກອນມະນຸດ ເພື່ອປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ຂອງປະເທດຊາດ. ຄູ-ອາຈານ ໄດ້ອຸທິດເຫື່ອແຮງສະຕິປັນຍາ ດ້ວຍຄວາມພາກພຽນມານະອົດທົນ ໃນການປະຕິບັດໜ້າທີ່ການສອນຂອງຕົນຢ່າງບໍ່ຮູ້ອິດເມື່ອຍ, ເຮັດໃຫ້ການສຶກສາໄດ້ຂະຫຍາຍຕົວຈາກຕົວເມືອງ ໄປສູ່ເຂດຊົນນະບົດຫ່າງໄກສອກ ຫຼີກ, ຫຼຸດຜ່ອນຊ່ອງວ່າງອັດຕາການຮູ້ໜັງສືຂອງປະຊາຊົນບັນດາເຜົ່າ.
ຄູ – ອາຈານຫຼາຍທ່ານ ໄດ້ຮັບການສັນລະເສີນເປັນຄູສອນດີ – ສອນເກັ່ງ, ກາຍເປັນຄູປະສົບການ, ຄູຊໍານານງານ, ຄູຊ່ຽວຊານ. ບົດ ບາດກຽດສັກສີຊື່ສຽງຂອງຄູ-ອາຈານ ແມ່ນໄດ້ຮັບການຍ້ອງຍໍສັນລະເສີນຈາກການຈັດຕັ້ງ ແລະ ສັງຄົມ. ຕາງໜ້າໃຫ້ການນໍາກະຊວງສຶກສາທິການ ແລະ ກິລາ, ຂ້າພະເຈົ້າ ຂໍສະແດງຄວາມກະຕັນຍູ, ຮູ້ບຸນ ຄຸນ ແລະ ຍ້ອງຍໍສັນລະເສີນຕໍ່ຄຸນງາມຄວາມດີຂອງຄູ-ອາຈານ. ພ້ອມກັນນີ້ ຂໍສະແດງຄວາມຂອບໃຈມາຍັງການນຳພັກ-ລັດ ແລະ ທຸກພາກສ່ວນໃນທົ່ວສັງຄົມ ທີ່ໄດ້ມີສ່ວນຮ່ວມ ແລະ ໃຫ້ການຊ່ວຍເຫຼືອອຸ້ມຊູ ຄູ – ອາຈານ ທີ່ກໍາລັງປະຕິບັດໜ້າທີ່ການສິດສອນໃນຂອບເຂດທົ່ວປະເທດ ໂດຍສະເພາະໃນເຂດທີ່ກຳລັງມີການລະບາດຂອງພະຍາດໂຄວິດ-19, ພວກເຮົາຕ້ອງຮ່ວມແຮງຮ່ວມໃຈກັນເຮັດທຸກວິທີທາງເພື່ອເອົາຊະນະກັບພະຍາດດັ່ງກ່າວ. ເພື່ອສ້າງໂອກາດໃຫ້ລູກຮັກ-ຫຼານແພງ ຂອງປະຊາຊົນລາວບັນດາເຜົ່າ ໄດ້ມີໂອກາດກັບຄືນມາສຶກສາຮໍ່າຮຽນ ແລະ ດຳລົງຊີວິດຕາມປົກກະຕິແບບໃໝ່.
ເຖິງແມ່ນວ່າ ຄູ-ອາຈານ ໄດ້ມີຜົນສຳ ເລັດຫຼາຍດ້ານໃນໄລຍະຜ່ານມາ, ແຕ່ພວກເຮົາກໍໄດ້ປະເຊີນກັບສິ່ງທ້າທາຍ ແລະ ທົດສອບຫຼາຍຢ່າງ ເປັນຕົ້ນແມ່ນການແຜ່ລະບາດຂອງພະຍາດໂຄວິດ-19, ຄູ-ອາຈານຈຳນວນໜຶ່ງ ມີການເຊື່ອມທາດທາງດ້ານຈັນຍາບັນ-ຈັນຍາທຳ, ຂາດການຄົ້ນຄວ້າ ສິດສອນແຕ່ແນວເກົ່າ ບໍ່ຄົ້ນຄິດປະດິດສ້າງ, ຈຳນວນໜຶ່ງພົວພັນກັບສິ່ງທີ່ຜິດກັບຫຼັກການຂອງສັງຄົມ, ຫຼິ້ນກິນຟຸ່ມເຟືອຍ ແລະ ພົວພັນກັບປະກົດການຫຍໍ້ທໍ້ຕ່າງໆໃນສັງຄົມ.
ຍ້ອນແນວນີ້, ຮຽກຮ້ອງໃຫ້ພວກເຮົາຈະຕ້ອງໄດ້ພ້ອມກັນບຸກທະລຸ ແລະ ເລັ່ງທວງເອົາກຽດສັກສີ ແລະ ຄຸນງາມຄວາມດີຂອງບັນພະບູລຸດ ຄູປະຕິວັດອາວຸໂສ ທີ່ໄດ້ຝາກໄວ້ ມາຍັງຄູຮຸ່ນປັດຈຸບັນ ແລະ ຮຸ່ນສືບທອດ ຈົ່ງໄດ້ເພີ່ມທະວີສ້າງຕົນໃຫ້ຄົບອົງປະກອບຂອງຈັນຍາບັນຄູລາວຄື: ມີຈັນຍາບັນຕໍ່ຕົນເອງ, ຕໍ່ວິຊາຊີບ, ຕໍ່ການຈັດຕັ້ງ ແລະ ຕໍ່ປະຊາຊົນ-ສັງຄົມ. ຄູ-ອາຈານທຸກຄົນ ຕ້ອງພ້ອມກັນຝຶກຝົນຫຼໍ່ຫຼອມຕົນເອງ ໃຫ້ມີຄຸນທາດການເມືອງໜັກແໜ້ນ, ມີຄຸນສົມບັດສິນທຳປະຕິວັດ, ຊື່ສັດບໍລິສຸດ, ມີຄວາມໂປ່ງໃສ, ມີວິໄນຕົວເອງ, ບໍ່ກ່ຽວຂ້ອງກັບສິ່ງເສບຕິດ ແລະ ປະກົດການຫຍໍ້ທໍ້ຕ່າງໆ.
ປະຕິບັດການສອນຕາມການມອບ ໝາຍດ້ວຍຄວາມຮັບຜິດຊອບສູງ, ສິດສອນດ້ວຍຄວາມເປັນທຳ, ດຸໝັ່ນຄົ້ນຄວ້າ-ສຶກສາຮໍ່າຮຽນ ແລະ ພັດທະນານະວັດຕະກຳ ເພື່ອຮັບໃຊ້ວິຊາຊີບຂອງຕົນ, ມີຄວາມສາມັກຄີ, ເອື້ອເຟື້ອເຜື່ອແຜ່ເພື່ອນຮ່ວມງານ ແລະ ຜູ້ຮຽນ. ເຄົາລົບ ແລະ ມີສະຕິຕໍ່ການຈັດຕັ້ງ, ປະຕິບັດຕາມພາລະບົດບາດ, ມີຫົວຄິດປະດິດສ້າງພັດທະນາການຈັດຕັ້ງ, ມີແບບແຜນວິທີເຮັດວຽກເປັນໝູ່ຄະນະ, ປະຕິບັດໂມງເວລາເຂັ້ມງວດ, ປົກປັກຮັກສາຊັບສົມບັດລວມໝູ່ ແລະ ບໍ່ສວຍໃຊ້ໜ້າທີ່ເພື່ອຫາຜົນປະໂຫຍດສ່ວນຕົວ. ຈິງໃຈບໍລິການຮັບໃຊ້ປະຊາຊົນດ້ວຍຄວາມເຕັມໃຈ, ມີຄວາມດຸໝັ່ນເປັນແບບຢ່າງໃນການປະພຶດທີ່ດີໃຫ້ແກ່ສັງຄົມ, ມີນໍ້າໃຈເສຍສະຫຼະ ແລະ ຮັກສາກຽດສັກສີຂອງຄູລາວ.ສຳລັບການສະເຫຼີມສະຫຼອງ ວັນຄູແຫ່ງຊາດປີນີ້ ຢູ່ສະຖາບັນການສຶກສາ ຂໍໃຫ້ຈັດແບບກະທັດຮັດ, ເນັ້ນເນື້ອໃນ, ຈັດປາຖະກະຖາປະຫວັດວັນຄູ, ສະຫຼຸບຕີລາຄາການປະຕິບັດງານຂອງຄູ-ອາຈານ ໃນໜຶ່ງປີຜ່ານມາ, ເພື່ອພ້ອມກັນປັບປຸງຈັນຍາບັນຄູລາວ ໃຫ້ມີຄວາມພ້ອມຮອບດ້ານ, ສະເໜີຍ້ອງຍໍ ຄູ-ອາຈານ ທີ່ມີຜົນງານດີເດັ່ນ ແລະ ອື່ນໆ ໂດຍປະຕິບັດຕາມມາດຕະການປ້ອງກັນ ແລະ ຄວບຄຸມການແຜ່ລະບາດຂອງພະຍາດໂຄວິດ-19 ຢ່າງເຂັ້ມງວດ.
ໃນໂອກາດນີ້, ຂ້າພະເຈົ້າຂໍສົ່ງກຳລັງໃຈມາຍັງຄູ-ອາຈານ ແລະ ຜູ້ບໍລິຫານການສຶກສາ-ກິລາ ທຸກທ່ານ ຈົ່ງພ້ອມກັນຜ່ານຜ່າ ສະພາບການລະບາດຂອງໂຄວິດ-19 ໃນຄັ້ງນີ້ ດ້ວຍນໍ້າໃຈບຸກທະລຸອັນສູງສົ່ງ. ສຸດທ້າຍນີ້, ຂ້າພະເຈົ້າ ຂໍອວຍພອນໄຊອັນປະເສີດມາຍັງບັນດາທ່ານຜູ້ນຳພັກ-ລັດ, ເພື່ອນໆຄູ – ອາຈານສອນ, ຜູ້ບໍລິຫານການສຶກສາ, ຜູ້ປະກອບການການສຶກສາ, ຕະຫຼອດຮອດປະຊາຊົນລາວບັນດາເຜົ່າ ຈົ່ງມີສຸຂະພາບເຂັ້ມແຂງ, ມີພະລານາໄມສົມບູນ, ມີຄວາມສຸກຄວາມຈະເລີນ ແລະ ປະສົບຜົນສໍາເລັດໃນການປະຕິບັດໜ້າທີ່ວຽກງານຂອງຕົນ. ນໍ້າໃຈວັນຄູແຫ່ງຊາດ 7 ຕຸລາ ໝັ້ນຍືນ !
ຂໍ້ມູນ: ປະຊາຊົນ
