ເຈົ້້າໜ້າທີ່ ປກສ ເມືອງແອດ ແຂວງຫົວພັນ ໄດ້ຮັບແຫຼ່ງຂ່າວຈາກພົນລະເມືອງດີວ່າ ມີຄົນບໍ່ດີ ມົ້ວສຸມຄ້າຂາຍ ແລະເສບຢາເສບຕິດ ຢູ່ຂອບເຂດຊາຍແດນ ລະຫວ່າງ ບ້ານຫ້ວຍຊາຍ ເມືອງແອດ ແຂວງຫົວພັນ ແລະ ບ້ານ ບົວຫີນ ເມືອງຊົງມ່າ ແຂວງເຊິນລາ ສສ ຫວຽດນາມ, ສະນັ້ນເຈົ້າໜ້າທີ່ ປກສ ເມືອງແອດ ຈຶ່ງໄດ້ແຕ່ງຕັ້ງໜ່ວຍງານວິຊາສະເພາະ ລົງຕິດຕາມເກັບກໍາຂໍ້ມູນ ພິສູດແຫຼ່ງຂ່າວຕົວຈິງເຫັນວ່າມີຂໍ້ມູນຄວາມຈິງແທ້.

ຕົກມາຮອດຕອນເຊົ້າເວລາ 05 ໂມງ 00 ນາທີ ຂອງວັນທີ 11 ພະຈິກ 2022 ເຈົ້າໜ້າທີ່ ປກສ ເມືອງແອດໄດ້ນໍາກໍາລັງ ສົມທົບ ທະຫານຊາຍແດນ ຄໍ 212 ເຂົ້າກວດຄົ້ນ ຖຽງໄຮ່ ຂອງ ທ້າວຖ່າຍ ອາຍຸ 48 ປີ, ຊົນເຜົ່າມົ້ງ, ອາຊີບປະຊາຊົນ ຢູ່ບ້ານຫ້ວຍຊາຍ ເມືອງແອດ ແຂວງຫົວພັນ ຈຶ່ງພົບເຫັນ ທ້າວຖ່າຍ ແລະ ທ້າວ ກົວເນັ່ງ ປະຊາຊົນ ບ້ານຫ້ວຍຊາຍ ເມືອງແອດ ແຂວງຫົວພັນ ກໍາລັງມົ້ວສຸມເສບຢາເສບຕິດ ດັ່ງນັ້ນ ເຈົ້າໜ້າທີ່ຈຶ່ງໄດ້ກວດກາ ພົບເຫັນຢາເສບຕິດນໍາຕົນຕົວ ຂອງທ້າວ ກົວເນັ່ງ ມີຢາບ້າຈໍານວນ 2 ເມັດ, ເຮໂຣອິນ 1 ຫໍ່ນ້ອຍ ແລະ ພົບເຫັນຢາບ້າຈໍານວນ 1 ເມັດ, ເຮໂຣອິນ 1 ຫໍ່ນ້ອຍ ຊຸກເຊື່ອງຢູ່ໃນຖຽງໄຮ່ຂອງ ທ້າວຖ່າຍ.

ມາຮອດເວລາ 06 ໂມງ 30 ນາທີ ຂອງວັນດຽວກັນນີ້ ໄດ້ເຂົ້າກວດກາ ຖຽງໄຮ່ຂອງ ນາງ ໄມ່ ອາຍຸ 45 ປີ, ຊົນເຜົ່າມົ້ງ, ປະຊາຊົນ ຢູ່ບ້ານ ຫ້ວຍຊາຍ ເມືອງແອດ ແຂວງຫົວພັນ, ເຈົ້າໜ້າທີ່ ຈິ່ງຂໍກວດຄົ້ນຕົນຕົວ ໄດ້ພົບເຫັນຂອງກາງປະເພດຢາບ້າ ຈໍານວນ 637 ເມັດ, ເງິນດົງ ຈໍານວນ 310,000 ດົງ ( ສາມແສນສິບພັນດົງ ); ໂທລະສັບ 1 ເຄື່ອງ ຢູ່ນໍາຖົງຮັດແອວຂອງຜູກ່ຽວ, ຜ່ານການສືບສວນ-ສອບສວນຂອງເຈົ້າໜ້າທີ່ ຜູ່ກ່ຽວໄດ້ຮັບສາລະພາບວ່າ ຢາເສບຕິດ ແລະ ຂອງກາງ ຈໍານວນດັ່ງກ່າວແມ່ນຂອງຜູ່ກ່ຽວແທ້, ສະນັ້ນເຈົ້າໜ້າທີ່ ປກສ ເມືອງແອດ ຈຶ່ງໄດ້ຍຶດຂອງກາງດັ່ງກ່າວ ພ້ອມທັງຈັບຕົວພວກກ່ຽວ ມາດໍາເນີນການສືບສວນ-ສອບສວນ ຫາກຸ່ມແກ້ງຮ່ວມຂະບວນການ ແລະ ດໍາເນີນຄະດີຕາມຂັ້ນຕອນຂອງກົດໝາຍ.

ແຫຼ່ງຂ່າວ: ປກສ ເມືອງແອດ

ເມື່ອບໍ່ດົນມານີ້, ທ່ານ ພອຍຄໍາ ຮຸ່ງບຸນຍວງ ເຈົ້າແຂວງໄຊສົມບູນ ພ້ອມຄະນະ ລົງຕິດຕາມ ແລະ ຊຸກຍູ້ ວຽກງານການຈັດຕັ້ງປະຕິບັດຄວາມຄືບໜ້າ ໂຄງການກໍ່ສ້າງທາງປູຢາງ 2 ຊັ້ນ ແຕ່ບ້ານທົ່ງຄູນ-ທົ່ງຮັກ ຫາສາມແຍກພູຄໍາ ເມືອງອະນຸວົງ ແຂວງໄຊສົມບູນ ມີຄວາມຍາວ 18 ກິໂລແມັດ ໂດຍມີ ທ່ານ ພູນໄຊ ພູນມີໄຊ ປະທານບໍລິສັດ ພິເອັດກໍ່ສ້າງ ແລະ ທອງທ່ຽວ ຈໍາກັດ ຜູ້ດຽວ, ທ່ານ ຄໍາພຸດ ແກ້ວວົງພອນ, ຮອງຫົວໜ້າພະແນກ ໂຍທາທິການ ແລະ ຂົນສົ່ງ ແຂວງ ພ້ອມດ້ວຍບໍລິສັດທີ່ປຶກສາ ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມ.

ໂອກາດນີ້ ທ່ານ ເພັດສະຫວັນ ພັນສະດາ ຫົວໜ້າຂະແໜງຂົວທາງ ແລະ ທາງນໍ້າ ໄດ້ລາຍງານຄວາມຄືບໜ້າຂອງ ໂຄງການດັ່ງກ່າວວ່າ: ໂຄງການກໍ່ສ້າງທາງປູຢາງ 2 ຊັ້ນ ແຕ່ບ້ານທົ່ງຄູນ-ທົ່ງຮັກ ຫາສາມແຍກພູຄໍາ ເມືອງອະນຸວົງ ໄດ້ເຊັນສັນຍາທີ່ປືກສາຄວບຄຸມການກໍ່ສ້າງກໍານົດ 24 ເດືອນ ແລະ ປັດຈຸບັນ ແມ່ນໝົດອາຍຸສັນຍາແລ້ວ, ແຕ່ກໍາລັງດໍາເນີນຂັ້ນຕອນການສະເໜີຕໍ່ສັນຍາ ສໍາລັບໜ້າວຽກທີ່ໄດ້ຈັດຕັ້ງປະຕິບັດ ໃນນີ້, ໄດ້ບຸກເບີກ ແລະ ອະນາໄມ ສໍາເລັດ 100 %, ວຽກຕັດດິນສໍາເລັດ 94,97 %, ວຽກຕັດຫີນ ສໍາເລັດ 81,83 %, ວຽກຖົມດິນຍົກ ລະດັບ ສໍາເລັດ 94,97%, ວຽກດິນຖົມຊັ້ນຮອງພື້ນທາງ ສໍາເລັດ 31,46 %, ວຽກດິນຖົມຊັ້ນພື້ນທາງ ສໍາເລັດ 30,75 %, ວຽກປູຢາງຊັ້ນ 1 ສໍາເລັດ 27,73 %, ສໍາເລັດທໍ່ລ່ຽມ 6 ຈຸດ ເທົ່າກັບ 13,33%, ຍັງເຫລືອ 7 ຈຸດ ທີ່ຈະຈັດຕັ້ງປະຕິບັດ ແລະ ສໍາເລັດທໍ່ກົມ 52 ຈຸດ ເທົ່າກັບ 47,00% ຍັງເຫລືອ 10 ຈຸດ ທີ່ຈະຈັດຕັ້ງປະຕິບັດໃນຕໍ່ໜ້າ. ນອກນີ້,ວຽກງານຕ່າງໆທີ່ຍັງບໍ່ທັນສໍາເລັດ ກໍຈະສືບຕໍ່ຈັດຕັ້ງປະຕິບັດໃຫ້ສໍາເລັດຕາມຄາດໝາຍທີ່ວາງໄວ້.

ໂອກາດດຽວກັນນີ້, ທ່ານ ພອຍຄໍາ ຮຸ່ງບຸນຍວງ ໄດ້ເນັ້ນໜັກໃຫ້ແຕ່ລະພາກສ່ວນທີ່ກ່ຽວຂ້ອງ ໂດຍສະເພາະແມ່ນຄະນະກໍາມະການ, ເຈົ້າຂອງໂຄງການ ແລະ ບໍລິສັດຮັບເໝົາ ກໍ່ສ້າງ ຈົ່ງພ້ອມກັນເອົາໃຈໃສ່ສືບຕໍ່ແກ້ໄຂ ແລະ ຈັດຕັ້ງປະຕິບັດທຸກໜ້າວຽກໃຫ້ສໍາເລັດ ແລະ ໃຫ້ປະຊາຊົນບັນດາເຜົ່າ ສາ ມາດນໍາໃຊ້ເສັ້ໜທາງດັ່ງກ່າວ ເຂົ້າໃນການສັນຈອນໄປມາ ດ້ວຍຄວາມສະດວກສະບາຍ ແລະ ປອດໄພ.

ແຫຼ່ງຂ່າວ: ຂປລ

ວັນທີ 10 ພະຈິກ 2022 ທ່ານ ປອ. ບຸນທອງ ຈິດມະນີ ກຳມະການກົມການເມືອງສູນກາງພັກ ຜູ້ປະຈຳການຄະນະເລຂາທິການສູນກາງພັກ ຮອງປະທານປະເທດພ້ອມຄະນະໄດ້ເຄື່ອນໄຫວ ແລະ ເຮັດວຽກຢູ່ເມືອງບົວລະພາ ແຂວງຄຳມ່ວນ ໂດຍມີ ທ່ານ ວັນໄຊ ພອງສະຫວັນ ກຳມະການສູນກາງພັກ, ເລຂາພັກແຂວງ, ເຈົ້າແຂວງຄຳມ່ວນ, ທ່ານ ບຸນມີ ພິມມະສອນ ປະທານສະພາປະຊາຊົນແຂວງ, ພ້ອມດ້ວຍຄະນະການນຳຂອງແຂວງ, ພະແນກການ, ຄະນະພັກ-ອຳນາດການປົກຄອງເມືອງ, ຕະຫຼອດຮອດພະນັກງານ, ທະຫານ-ຕໍາຫຼວດ, ນ້ອງນັກຮຽນ ແລະ ປະຊາຊົນ ເມືອງບົວລະພາເຂົ້າຮ່ວມ.

ໃນໂອກາດນີ້ ທ່ານ ບຸນກວ້າງ ແກ້ວບຸນຍົງ ກຳມະການພັກແຂວງ, ເລຂາພັກເມືອງ, ເຈົ້າເມືອງ ບົວລະພາໄດ້ລາຍງານສະພາບທີ່ຕັ້ງ, ຈຸດພິເສດ ແລະ ການພັດທະນາເສດຖະກິດ-ສັງຄົມ ຂອງເມືອງໃຫ້ທ່ານຮອງປະທານປະເທດພ້ອມດ້ວຍຄະນະໄດ້ຮັບຊາບ, ເມືອງ ບົວລະພາ ເປັນເມືອງໜຶ່ງໃນ 10 ເມືອງຂອງແຂວງຄຳມ່ວນ ປະກອບ ມີ 73 ບ້ານ, ມີ 11 ກຸ່ມບ້ານ, ມີ 6.479 ຄອບຄົວ, ພົນລະເມືອງ 36.527 ກວ່າຄົນ, ມີ 6 ຈຸດສຸມພັດທະນາ, ເປັນເມືອງທີ່ຫ່າງໄກສອກຫຼີກ ເນື່ອງຈາກລະບົບຄົມມະນາຄົມ ຍັງມີຂໍ້ຈໍາກັດຫຼາຍ, ປະຈຸບັນຍັງມີ ບ້ານທຸກ 49 ບ້ານຕາມການປະເມີນ ດຳລັດ 348/ລບ, ມີຄອບຄົວທຸກ 2.311 ຄອບຄົວ. ປະຊາຊົນ ປະມານ 90% ຍັງດໍາລົງຊີວິດຕິດພັນກັບກະສິກໍາ, ການຜະລິດຍັງອີງໃສ່ທໍາມະຊາດ, ລະບົບຊົນລະປະທານມີຈໍາກັດ, ເນື້ອທີ່ທຳການຜະລິດສ່ວນຫຼາຍ ໄດ້ຮັບຜົນກະທົບຈາກລະເບີດບໍ່ທັນແຕກ ຍັງກວມເອົາພື້ນທີ່ 80%ໃນທົ່ວເມືອງ, ດ້ານລາຍຮັບງົບປະມານສາມາດປະຕິບັດໄດ້ທັງໝົດ 1.320 ລ້ານກວ່າກີບ ເທົ່າກັບ 66% ຂອງແຜນປີ, ດ້ານລາຍຈ່າຍງົບປະມານ ເທົ່າກັບ 13.667 ລ້ານກວ່າກີບ ເທົ່າກັບ 91% ຂອງແຜນປີ.

ປະຈຸບັນທົ່ວເມືອງມີໂຄງການລົງທຶນ ທັງໝົດ 45 ໂຄງການ, ມີມູນຄ່າອະນຸມັດປີ 2022 ມີ 21,78 ຕື້ກີບ, ໃນນັ້ນມີໂຄງການສືບຕໍ່ 22 ໂຄງການ ມູນຄ່າ 9 ຕື້ກວ່າກີບ, ໂຄງການສໍາລະໜີ້ສິນ 22 ໂຄງການ ມູນຄ່າ 11 ຕື້ກວ່າກີບ, ໂຄງການສະເໜີໃໝ່ 01 ໂຄງການ ມູນຄ່າ 1,5 ຕື້ກີບ. ຄຽງຄູ່ກັນນັ້ນ ດ້ານວຽກງານພັກ – ພະນັກງານ, ວຽກງານຂົງເຂດວັດທະນະທຳ-ສັງຄົມ ແລະ ວຽກງານອົງການຈັດຕັ້ງມະຫາຊົນກໍ່ໄດ້ຮັບການເອົາໃຈໃສ່ພັດທະນາເປັນກ້າວໆມາ. ນອກນັ້ນຕາງໜ້າການນໍາຂອງເມືອງຍັງໄດ້ມີພາກສະເໜີຈໍານວນໜຶ່ງທີ່ຕິດພັນກັບການພັດທະນາພື້ນຖານໂຄງລ່າງຂອງເມືອງເປັນຕົ້ນ: ສະເໜີ ໂຄງການກໍ່່ສ້າງທາງປູຢາງສອງຊັ້ນ – ຂົວເບຕົງຂ້າມນໍ້າເຊບັ້ງໄຟ ເສັ້ນທາງເລກທີ 5528 ໂຮ່ຈີ່ມິນ ແຍກທາງເລກທີ 12 ຈຸດສຸມຫຼັງຄັງ ຫາ ເຂດແດນເມືອງວິລະບູລີ ແຂວງສະຫວັນນະເຂດ, ໂຄງການກໍ່ສ້າງຂົວເບຕົງຂ້າມນຳພະນັງໃຫ້ເທສສະບານເມືອງບົວລະພາ, ໂຄງການກໍ່ສ້າງນໍ້າປະປາໃນເທດສະບານເມືອງບົວລະພາ ແລະ ຈຸດສຸມຫຼັງຄັງ ແລະ ສະເໜີ ໂຄງການກໍ່ສ້າງ ຫໍພິພິທະພັນ ຂອງເມືອງ ເຂົ້າແຜນງົບປະມານແຫ່ງລັດ.

ໃນໂອກາດດັ່ງກ່າວ ສະຫາຍ ປອ. ບຸນທອງ ຈິດມະນີ ຮອງປະທານປະເທດ ຍັງໄດ້ເປັນກຽດມີຄໍາເຫັນໂອ້ລົມ ກ່ອນອື່ນ ສະຫາຍ ໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນງານການເຄື່ອນໄຫວທີ່ທາງເມືອງຍາດມາໄດ້ ພ້ອມທັງເນັ້ນໜັກຕໍ່ຄະນະພັກອໍານາດການປົກຄອງເມືອງໃນຫຼາຍບັນຫາໂດຍສະເພາະແມ່ນ: ສືບຕໍ່ເພີ່ມທະວີເອົາໃຈໃສ່ໃນການສຶກສາອົບຮົມການເມືອງນຳພາແນວຄິດໃຫ້ພະນັກງານ, ທະຫານ, ຕຳຫລວດ, ພໍ່ແມ່ປະຊາຊົນພາຍໃນເມືອງໃຫ້ມີຄວາມເຊື່ອມຊຶມຕໍ່ແນວທາງຂອງພັກ, ຂອງລັດ, ກໍ່ຄືຂອງແຂວງ, ເມືອງ, ສຶກສາອົບຮົມປະຊາຊົນໃຫ້ຮັບຮູ້, ເຂົ້າໃຈ ແລະ ມີສະຕິຕໍ່ສະພາບບັນຫາທີ່ເກີດຂຶ້ນໃນສັງຄົມ, ເປັນຕົ້ນບັນຫາອັດຕາເງິນເຟີ, ບັນຫານໍ້າມັນ ແລະ ອື່ນໆ. ກ່ຽວກັບວຽກງານພັດທະນາເສດຖະກິດແກ້ໄຂຊີວິດການເປັນຢູ່ຂອງປະຊາຊົນ ໃຫ້ສືບຕໍ່ນຳໃຊ້ທ່າແຮງ ທີ່ມີຂອງເມືອງ, ເສີມຂະຫຍາຍ ທ່າແຮງດ້ານການປູກ, ການລ້ຽງ, ການບໍລິການ ແລະ ອາຊີບທີ່ຕິດພັນມູນເຊື້ອການທຳມາຫາກິນຂອງປະຊາຊົນພາຍໃນເມືອງ ແລະ ຈັດສັນໃຫ້ຖຶກຕ້ອງ, ພ້ອມນັ້ນກໍ່ຕ້ອງສືບຕໍ່ຊຸກຍູ້ແກ້ໄຂດ້ານການສຶກສາ ເພື່ອຫຼຸດຜ່ອນອັດຕາປະລະການຮຽນ ແລະ ຄວາມແຕກໂຕນກັນໃນການເຂົ້າຮຽນ ລະຫວ່າງເພດຍິງ ກັບເພດຊາຍ ເພື່ອໃຫ້ມີຄວາມສະເໝີພາບກັນ, ເອົາໃຈໃສ່ປັບປຸງລະບົບການເມືອງ, ການຈັດຕັ້ງຮາກຖານພັກ ໃຫ້ໜັກແໜ້ນ, ເຂັ້ມແຂງ ແລະ ຄະນະພັກ, ຄະນະນຳ ໃຫ້ສືບຕໍ່ ເພີ່ມທະວີການນຳພາໃນທຸກຂົງເຂດ, ແບ່ງຄວາມຮັບຜິດຊອບໃຫ້ລະອຽດ, ເພື່ອພ້ອມກັນພັດທະນາເມືອງບົວລະພາໃຫ້ດີຂຶ້ນໄປເລື້ອຍໆ.

ໂອກາດນີ້ ທ່ານ ປອ. ບຸນທອງ ຈິດມະນີ ພ້ອມຄະນະ ຍັງໄດ້ເຄື່ອນໄຫວຢ້ຽມຢາມພົບປະໂອ້ລົມ ອຳນາດການປົກຄອງ ແລະ ພໍ່ແມ່ປະຊາຊົນບ້ານຕະຫລອງ ເຊິ່ງບ້ານດັ່ງກ່າວ ແມ່ນຊົນເຜົ່າຜູ້ໄທການດຳລົງຊີວິດຕິດພັນກັບທຳມະຊາດ, ມີມູນເຊື້ອດຸໜັ່ນຂະຫຍັນພຽນ, ຍຶດຖືອາຊີບປູກຝັງ – ລ້ຽງສັດ, ມີຄວາມສາມັກຄີເປັນປຶກແຜ່ນ ແລະ ຮັກສາໄດ້ຮີດຄອງປະເພນີອັນດີງາມຂອງເຜົ່າໄດ້ເປັນຢ່າງດີ.

ພິເສດ : ໂອກາດທີ່ທ່ານຮອງປະທານປະເທດ ພ້ອມຄະນະເຄື່ອນໄຫວຢ້ຽມຢາມຄັ້ງນີ້ຍັງໄດ້ນຳເອົາເສື້ອກັນໜາວ, ຜ້າຮົມ ແລະ ເງິນສົດຈຳນວນໜຶ່ງມາມອບໃຫ້ເມືອງບົວລະພາ ແລະ ບ້ານຕາຫລອງອີກດ້ວຍ.

ໃນໂອກາດດັ່ງກ່າວ ສະຫາຍ ປອ. ບຸນທອງ ຈິດມະນີ ຮອງປະທານປະເທດ ຍັງໄດ້ເປັນກຽດມີຄໍາເຫັນໂອ້ລົມ ກ່ອນອື່ນ ສະຫາຍ ໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນງານການເຄື່ອນໄຫວທີ່ທາງເມືອງຍາດມາໄດ້ ພ້ອມທັງເນັ້ນໜັກຕໍ່ຄະນະພັກອໍານາດການປົກຄອງເມືອງໃນຫຼາຍບັນຫາໂດຍສະເພາະແມ່ນ: ສືບຕໍ່ເພີ່ມທະວີເອົາໃຈໃສ່ໃນການສຶກສາອົບຮົມການເມືອງນຳພາແນວຄິດໃຫ້ພະນັກງານ, ທະຫານ, ຕຳຫລວດ, ພໍ່ແມ່ປະຊາຊົນພາຍໃນເມືອງໃຫ້ມີຄວາມເຊື່ອມຊຶມຕໍ່ແນວທາງຂອງພັກ, ຂອງລັດ, ກໍ່ຄືຂອງແຂວງ, ເມືອງ, ສຶກສາອົບຮົມປະຊາຊົນໃຫ້ຮັບຮູ້, ເຂົ້າໃຈ ແລະ ມີສະຕິຕໍ່ສະພາບບັນຫາທີ່ເກີດຂຶ້ນໃນສັງຄົມ, ເປັນຕົ້ນບັນຫາອັດຕາເງິນເຟີ, ບັນຫານໍ້າມັນ ແລະ ອື່ນໆ. ກ່ຽວກັບວຽກງານພັດທະນາເສດຖະກິດແກ້ໄຂຊີວິດການເປັນຢູ່ຂອງປະຊາຊົນ ໃຫ້ສືບຕໍ່ນຳໃຊ້ທ່າແຮງ ທີ່ມີຂອງເມືອງ, ເສີມຂະຫຍາຍ ທ່າແຮງດ້ານການປູກ, ການລ້ຽງ, ການບໍລິການ ແລະ ອາຊີບທີ່ຕິດພັນມູນເຊື້ອການທຳມາຫາກິນຂອງປະຊາຊົນພາຍໃນເມືອງ ແລະ ຈັດສັນໃຫ້ຖຶກຕ້ອງ, ພ້ອມນັ້ນກໍ່ຕ້ອງສືບຕໍ່ຊຸກຍູ້ແກ້ໄຂດ້ານການສຶກສາ ເພື່ອຫຼຸດຜ່ອນອັດຕາປະລະການຮຽນ ແລະ ຄວາມແຕກໂຕນກັນໃນການເຂົ້າຮຽນ ລະຫວ່າງເພດຍິງ ກັບເພດຊາຍ ເພື່ອໃຫ້ມີຄວາມສະເໝີພາບກັນ, ເອົາໃຈໃສ່ປັບປຸງລະບົບການເມືອງ, ການຈັດຕັ້ງຮາກຖານພັກ ໃຫ້ໜັກແໜ້ນ, ເຂັ້ມແຂງ ແລະ ຄະນະພັກ, ຄະນະນຳ ໃຫ້ສືບຕໍ່ ເພີ່ມທະວີການນຳພາໃນທຸກຂົງເຂດ, ແບ່ງຄວາມຮັບຜິດຊອບໃຫ້ລະອຽດ, ເພື່ອພ້ອມກັນພັດທະນາເມືອງບົວລະພາໃຫ້ດີຂຶ້ນໄປເລື້ອຍໆ.

ໂອກາດນີ້ ທ່ານ ປອ. ບຸນທອງ ຈິດມະນີ ພ້ອມຄະນະ ຍັງໄດ້ເຄື່ອນໄຫວຢ້ຽມຢາມພົບປະໂອ້ລົມ ອຳນາດການປົກຄອງ ແລະ ພໍ່ແມ່ປະຊາຊົນບ້ານຕະຫລອງ ເຊິ່ງບ້ານດັ່ງກ່າວ ແມ່ນຊົນເຜົ່າຜູ້ໄທການດຳລົງຊີວິດຕິດພັນກັບທຳມະຊາດ, ມີມູນເຊື້ອດຸໜັ່ນຂະຫຍັນພຽນ, ຍຶດຖືອາຊີບປູກຝັງ – ລ້ຽງສັດ, ມີຄວາມສາມັກຄີເປັນປຶກແຜ່ນ ແລະ ຮັກສາໄດ້ຮີດຄອງປະເພນີອັນດີງາມຂອງເຜົ່າໄດ້ເປັນຢ່າງດີ.

ພິເສດ : ໂອກາດທີ່ທ່ານຮອງປະທານປະເທດ ພ້ອມຄະນະເຄື່ອນໄຫວຢ້ຽມຢາມຄັ້ງນີ້ຍັງໄດ້ນຳເອົາເສື້ອກັນໜາວ, ຜ້າຮົມ ແລະ ເງິນສົດຈຳນວນໜຶ່ງມາມອບໃຫ້ເມືອງບົວລະພາ ແລະ ບ້ານຕາຫລອງອີກດ້ວຍ.