ສພຂ​ ຫົວພັນ​ ມອບເຄື່ອງຊ່ວຍເຫລືອໃຫ້ຄອບຄົວທີ່ປະສົບອັກຄີໄພ

ດ້ວຍຄວາມ​ເປັນຫ່ວງ​ເປັນ​ໃຍ​ ຂອງສະພາ​ປະຊາຊົນ​ ແຂວງຫົວພັນ​ ທີ່ມີຕໍ່ປະຊາຊົນບັນດາເຜົ່າ ເວົ້າລວມ, ເວົ້າສະເພາະ ຕໍ່ຄອບຄົວທີ່ຖືກປະສົບເຄາະຮ້າຍຈາກອັກຄີໄພ(ໄຟໄໝ້ເຮືອນ) ຕອນເຊົ້າ​ ວັນທີ​ 14​ ທັນວາ​ 2021​ ນີ້,​ ນຳໂດຍ ທ່ານ​ ນາງ​ ອຳໄພວອນ​ ລ້ອມບຸນແພງ​ກຳມະການສຳຮອງສູນກາງພັກ, ຮອງເລຂາພັກແຂວງ, ປະທານສະພາປະຊາຊົນແຂວງ;

ມີ​ບັນດາທ່ານ​ສະມາຊິກສະພາປະຊາຊົນແຂວງ ຫົວພັນ ປະຈຳເຂດເລືອກຕັ້ງເມືອງຊຳເໜືອ, ຮອງເລຂາທິການ ພ້ອມດ້ວຍທີມງານ ຕາງໜ້າ​ສະພາປະຊາຊົນແຂວງ ໄດ້ລົງມອບເຄື່ອງຊ່ວຍເຫລືຶອບັນເທົາທຸກ ໃຫ້ຄອບຄົວທີ່ຖືກເຄາະຮ້າຍ ເຊິ່ງໄດ້ຮັບຜົນກະທົບ​ຈາກ​ໄຟໄໝ້ເຮືອນ​ (ເຮືອນຂອງທ່ານ ພອນຄຳ​ ຄຳມີໄຊ​ພາຍໃນຄອບຄົວມີສະມາຊິກ 8​ ຄົນ​ ຍິງ​3ຄົນ​) ຢູ່ບ້ານບວຍ ເມືອງຊຳເໜືອ​ ແຂວງຫົວພັນ​ ກ່າວມອບໂດຍ ທ່ານ​ ນາງ​ ອຳໄພວອນ​ ລ້ອມບຸນແພງ​ ແລະ​ ກ່າວຮັບໂດຍ ທ່ານ​ ພອນຄຳ ຄຳມີໄຊ ເຄື່ອງທີ່ນຳໄປຊ່ວຍເຫລືອໃນຄັ້ງນີ້ ມີໝໍ້ໃຫຍ່,​ໝໍ້ນ້ອຍ, ຜ້າຫົ່ມໂຕໂຕ,​ມຸ້ງ,​ຜູກ,​ໝອນ,​ປ໋ອງປາ, ໝີ່ສຳເລັດຮູບ,​ເຄື່ອງນຸ່ງຫົ່ມ,​ເກີບ,​ເງິນສົດ 1 ລ້ານກວ່າກີບ ແລະ​ ອື່ນໆ ລວມມູນຄ່າ​ທັງໝົດ​ 3 ລ້ານກວ່າກີບ​; ການມອບເຄື່ອງຊ່ວຍເຫລືອຄັ້ງນີ້ ມີຄະນະພັກ,​ອຳນາດການປົກຄອງບ້ານ,​ເຖົ້າແກ່ແນວໂຮມ,​ອົງ​ການຈັດຕັ້ງ​ມະຫາຊົນ​ຂອງບ້ານ​ ພ້ອມດ້ວຍປະຊາຊົນພາຍໃນບ້ານເຂົ້າຮ່ວມເປັນສັກຂີພິຍານນຳ.

ເຫດການດັ່ງກ່າວ ໄດ້ເກີດຂຶ້ນໃນຕອນບ່າຍຂອງວັນທີ 8​ ທັນວາ​ 2021 ຜ່ານມາຍ້ອນໄຟຟ້າດັບວົງຈອນ​ ເຊິ່ງຜົນເສຍຫາຍໃນຄັ້ງນີ້ມີເຮືອນ 1 ຫລັງ, ​ລົດຮຸນໄດ 1 ຄັນ, ລົດໄຖນາ 1 ຄັນ,​ໂຮງສີເຂົ້າ 1 ເຄື່ອງ,​ເງິນເຈ້ຍ12ລ້ານກີບ​ ແລະ​ ອື່ນໆ​ ລວມມູນຄ່າເສຍຫາຍທັງໝົດ200ກວ່າລ້ານກີບ.​ ໂອກາດດຽວກັນນີ້,​ ທີມງານຍັງໄດ້ສະແດງຄວາມເສຍໃຈຕໍ່ເຫດການດັ່ງກ່າວທີ່ເກີດຂຶ້ນ ແລະ​ ຮຽກຮ້ອງມາຍັງຄອບຄົວທີ່ຖືກຜົນກະທົບ​ ຕະຫລອດຮອດພໍ່ແມ່ປະຊາຊົນ ຈົ່ງມີສະຕິໃນການນຳໃຊ້ໄຟຟ້າ,​ ມີຄວາມສາມັກຄີຊ່ວຍເຫລືອເຊິ່ງກັນແລະກັນ,​ຕ້ານທຸກປາກົດການຫຍໍ້ທໍ້ທີ່ເກີດຂຶ້ນໃນສັງຄົມ ແລະ​ ພ້ອມກັນເອົາໃຈໃສ່ສ້າງເສດຖະກິດຄອບຄົວໃຫ້ນັບມື້ດີຂຶ້ນ.​ ຂ່າວ: ສະພາປະຊາຊົນແຂວງຫົວພັນ

ແຫຼ່ງຂ່າວຈາກ ແຂວງຊຽງຂວາງ ໃຫ້ຮູ້ວ່າ: ທ່ານ ບຸນຈັນ ສີວົງພັນ ເຈົ້າແຂວງຊຽງຂວາງ ພ້ອມຄະນະລົງກວດກາ, ຊຸກຍູ້ການກໍ່ສ້າງພະເຈົ້າອົງຫລວງ ໃນວັນທີ 13 ທັນວາ 2021 ໂດຍໄດ້ຮັບການລາຍງານຈາກ ທ່ານ ບຸນມີ ສອນມີໄຊ ປະທານບໍລິສັດຮັບເໝົາກໍ່ສ້າງ ແທ່ນນັ່ງພະເຈົ້າອົງຫລວງ ກ່ຽວກັບວຽກທີ່ຕົນເອງຮັບຜິດຊອບ, ມາປັດຈຸບັນການກໍ່ສ້າງຂັ້ນໃດ, ເດີ່ນຊົມວິວຢູ່ຕໍ່ໜ້າພະເຈົ້າອົງຫລວງ ແລະ ສາລາຊົມວິວ ລວມມູນຄ່າ 2 ຕື້ກ່ວາກີບ ບາງໜ້າວຽກແມ່ນໃກ້ຈະສຳເລັດແລ້ວ, ບາງໜ້າວຽກ ກຳລັງຈັດຕັ້ງປະຕິບັດ ແລະ ຂັ້ນຕອນອອກແບບວຽກງານດັ່ງກ່າວ ເປັນວຽກລະອຽດອ່ອນເພາະຕ້ອງໄດ້ຖາມຊອກຮູ້ ເພື່ອໃຫ້ຖືກຕາມວັດທະນາທຳ.

ໂອກາດນີ້, ທ່ານເຈົ້າແຂວງຊຽງຂວາງ ກໍໄດ້ເນັ້ນໃຫ້ບໍລິສັດຮັບເໝົາ ເອົາໃຈໃສ່ຈັດລຳດັບບັນດາໜ້າວຽກທີ່ຈະປະຕິບັດ ເພື່ອເຮັດໃຫ້ວຽກງານດຳເນີນເປັນປົກກະຕິ ການກໍ່ສ້າງຈິ່ງຈະສຳເລັດຕາມຕາດໝາຍ ໂດຍເນັ້ນຄຸນນະພາບເປັນຫລັກ ແລະ ໃຫ້ປຶກສານຳພາກສ່ວນທກ່ຽວຂ້ອງ ເພື່ອໃຫ້ຖືກຕາມວັດທະນາທຳ, ຫລັກທຳ, ຫລັກການ ແລະ ເຕັກ ນິກໃນການກໍ່ສ້າງໃຫ້ສະຫງ່າ, ຍືນຍາວ ເພື່ອໃຫ້ປະຊາຊົນແຂວງຊຽງຂວາງ ໄດ້ກາບໄຫ້ວສັກກາລະບູຊາຕະຫລອດກາລະນານ.

ແຫຼ່ງຂ່າວ: ປະເທດລາວ

ຫໍພິພິທະພັນແຫ່ງຊາດຫຼວງພະບາງ ໄດ້ເປີດໃຫ້ບໍລິການແລ້ວ

ເລີ່ມແຕ່ວັນທີ 8 ທັນວາ 2021 ເປັນຕົ້ນມາ ຫໍພິພິທະພັນແຫ່ງຊາດຫຼວງພະບາງ ແມ່ນໄດ້ເລີ່ມເປີດບໍລິການໃຫ້ນັກທ່ອງທ່ຽວທັງພາຍໃນ ແລະ ຕ່າງປະເທດ ເຂົ້າມາທ່ຽວຊົມໄດ້ແລ້ວ, ແຕ່ວ່ານັກທ່ອງທ່ຽວທຸກຄົນ ຕ້ອງໄດ້ປະຕິບັດຕາມມາດຕະການປ້ອງກັນ, ພະຍາດໂຄວິດ-19 ຢ່າງເຄັ່ງຂັດ, ເຊັ່ນ: ທຸກຄົນຕ້ອງໄດ້ໃສ່ຜ້າປິດປາກ-ດັງ, ວັດແທກອຸນ​ຫະພູມ ແລະ ລ້າງມືທຸກຄັ້ງກ່ອນເຂົ້າຊົມ.

ສຳລັບການເປີດບໍລິການແມ່ນ ເລີ່ມແຕ່ວັນພຸດ-ວັນທິດ, ວັນຈັນ ແລະ ວັນອັງຄານແມ່ນພັກ, ສະເພາະວັນສຸກແມ່ນເປີດບໍລິການເຄິ່ງຕອນ, ສ່ວນຕອນແລງແມ່ນພັກອະນາໄມ.

ດັ່ງນັ້ນ, ຖ້ານັກທ່ອງທ່ຽວທ່ານໃດຕ້ອງການມາທ່ຽວຊົມກໍສາມາດມາໄດ້ຕາມວັນ ແລະ ເວລາທີ່ກຳນົດໄວ້ ພ້ອມກັນປະຕິບັດຕາມມາດຕະການປ້ອງກັນພະຍາດໂຄວິດ-19 ຢ່າງເຂັມງວດ.

ຂ່າວ: ຫຼວງ​ພະ​ບາງ

ຂົວຂ້າມນໍ້າພີດ ເມືອງຍົມມະລາດ ໃກ້ຈະສ້າງສຳເລັດແລ້ວ ວັນທີ 10 ທັນວາ 2021 ພໍ່ແມ່ປະຊາຊົນ ບ້ານໂຄກສະຫວ່າງ ເມືອງຍົມມະລາດ ແຂວງຄຳມ່ວນ ແລະ ບັນດາອົງການຈັດຕັ້ງມະຫາຊົນຫ້ອງການອ້ອມຂ້າງເມືອງຍົມມະລາດ ໄດ້ຮ່ວມຂະບວນການສ້າງຂົວຂ້າມນໍ້າພີດ ເຊິ່ງຂົວດັ່ງກ່າວເປັນຂົວຊຸມຊົນ ມີຫຼາຍພາກສ່ວນທີ່ໃຫ້ການປະກອບສ່ວນ ລວມທັງພາກລັດ ແລະ ເອກະຊົນ.

ທ່ານ ບຸນທະໄຫວ ໂດໄລສານ ຮອງເຈົ້າເມືອງຍົມມະລາດ ກ່າວໃຫ້ຮູ້ວ່າ: ພາຍຫຼັງທີ່ຂົວເກົ່າແຫ່ງນີ້ໄດ້ມີ ການເປ່ເພ ເຮັດໃຫ້ການສັນຈອນ ໄປ-ມາ ແລະ ການຂົນສົ່ງສິນຄ້າທີ່ຜະລິດຈາກພໍ່ແມ່ປະຊາຊົນມີຄວາມຫຍຸ້ງຍາກ ໂດຍສະເພາະແມ່ນລູກຫຼານທີ່ເດີນທາງໄປເຂົ້າໂຮງຮຽນ ສະນັ້ນທາງການນຳຂັ້ນເມືອງຈຶ່ງໄດ້ຄົ້ນຄວ້າ ປຶກສາຫາລື ໂດຍໄດ້ສົມທົບກັບອຳນາດການປົກຄອງບ້ານ ເພື່ອນຳສະເໜີຕໍ່ຂັ້ນເທິງ ຄົ້ນຄວ້າພິລາລະນາ ແລະ ໄດ້ຕົກລົງເພື່ອ ທຳການກໍ່ສ້າງ. ທ່ານ ແກ້ວຕາ ອິນທະວົງ ຮອງຫົວໜ້າຂະແໜງຂົວທາງ ພະແນກໂຍທາທິການ ແລະ ຂົນສົ່ງແຂວງ ຄຳມ່ວນ ທັງເປັນຫົວໜ້າກອງເລຂາຊີ້ນຳການກໍ່ສ້າງຂົວນໍ້າພີດ ໄດ້ລາຍງານກ່ຽກັບລາຍລະອຽດໃນການກໍ່ສ້າງ ຂົວນໍ້າພີດວ່າ:

ໂຄງການດັ່ງກ່າວແມ່ນໄດ້ແບ່ງເປັນ 2 ໄລຍະໃນການກໍ່ສ້າງ ຄື: ໄລຍະທີ 1 ແມ່ນເລີ່ມແຕ່ວັນທີ 17-31 ພຶດສະພາ 2021 ເຊິ່ງໃນຊ່ວງໄລຍະດັ່ງກ່າວ ເຂື່ອນໄຟຟ້ານໍ້າເທີນ 2 ແມ່ນໄດ້ປິດການປ່ອຍນໍ້າ ເຮັດໃຫ້ນໍ້າໃນ ສາຍນໍ້າພີດນັ້ນບົກແຫ້ງ ຈຶ່ງສາມາດລົງມືການກໍ່ສ້າງໄດ້ສະດວກ ແລະ ໄລຍະທີ 2 ແມ່ນເລີ່ມແຕ່ ວັນທີ 10 ພະຈິກ ເປັນຕົ້ນມາ ເຊິ່ງຂົວດັ່ງກ່າວແມ່ນເປັນຂົວປະເພດ ເບຕົງປະສົມໄມ້, ມີຄວາມຍາວທັງໝົດ 115 ແມັດ, ກວ້າງ 3,5 ແມັດ, ຕາມການຄິດໄລ່ເບື້ອງຕົ້ນແມ່ນສາມາດຮັບນໍ້າໜັກໄດ້ປະມານ 3,5 ໂຕ່ນ, ມາຮອດປະຈຸບັນ ການກໍ່ສ້າງ ແມ່ນມີຄວາມຄືບໜ້າປະມານ 85% ແລະ ຄາດວ່າຈະໃຫ້ສຳເລັດພາຍໃນເດືອນທັນວາ 2021 ນີ້ ລວມມູຄ່າ ການກໍ່ສ້າງ 1,08 ຕື້ກວ່າກີບ (ໂດຍບໍ່ໄດ້ໄລ່ມູນຄ່າແຮງງານຂອງພໍ່ແມ່ປະຊາຊົນ).

ຂໍ້ມູນ: khammouanenews

ວັນທີ 7 ທັນວາ ຜ່ານມາ,ດ່ານສາກົນບໍ່ເຕ່ນ ແຂວງຫຼວງນ້ຳທາ ໄດ້ຈັດພິ ທີມອບ-ຮັບໜ້າທີ່ຫົວ ໜ້າຄະນະຄຸ້ມຄອງດ່ານສາກົນບໍ່ເຕ່ນ ລະຫວ່າງຜູ້ເກົ່າ ແລະ ຜູ້ໃໝ່, ໂດຍມີ ທ່ານ ຈັນທອງ ແກ້ວປະເສີດ ຮອງເຈົ້າແຂວງຫຼວງນ້ຳທາ, ພ້ອມດ້ວຍຄະນະນຳຂັ້ນແຂວງ, ຫົວໜ້າຄະນະຄຸ້ມຄອງດ່ານສາກົນບໍ່ເຕ່ນ ແລະ ພາກສ່ວນທີ່ເຂົ້າຮ່ວມ.

ທ່ານ ຄຳສີ ດັງສະໄຫວ ຮອງຫົວໜ້າຄະນະຈັດຕັ້ງແຂວງ ໄດ້ຂຶ້ນຜ່ານຂໍ້ຕົກຂອງກະຊວງປ້ອງກັນຄວາມສະຫງົບ ສະບັບເລກທີ 2121/ປກສ, ລົງວັນທີ 17 ພະຈິກ 2021,ມະຕິຕົກລົງຄະນະປະຈຳພັກແຂວງ ສະບັບເລກທີ 57/ຄປພຂ,ວ່າດ້ວຍການຍົກຍ້າຍ ພັທ ກອງແກ້ວ ສິງມີໄຊ ຈາກຫົວໜ້າຄະນະຄຸ້ມຄອງດ່ານສາກົນບໍ່ເຕ່ນ ( ຜູ້ເກົ່າ) ໄປຮັບໜ້າທີໃໝ່ຢູ່ກອງບັນຊາ ການ ປກສ ແຂວງຫຼວງນໍ້າທາ ແລະ ຍົກຍ້າຍ ພັທ ຄຳຕຸ່ນ ບຸນລຽນຂັນ ຈາກຮອງຫົວໜ້າກອງບັນຊາການ ປກສ ແຂວງຫຼວງນໍ້າທາ ໄປຮັບໜ້າທີ່ໃໝ່ ເປັນຫົວໜ້າຄະນະຄຸ້ມຄອງດ່ານສາກົນບໍ່ເຕ່ນ ( ຜູ້ໃໝ່) ທັງເປັນເລຂາໜ່ວຍພັກ, ທ່ານ ທອງສີ ກັນທະຈັກ ເປັນຮອງເລຂາໜ່ວຍພັກ, ທ່ານ ວິລະກອນ ເກດຕະວົງ ເປັນກຳມະການໜ່ວຍພັກ ແລະ ປະທານກວດກາໜ່ວຍພັກ, ພັທ ວຽງວິໄລ ສະໄຫວວັນ ແລະ ທ່ານ ຄຳຫຼ້າ ວິສີສົມບັດ ເປັນກຳມະ ການໜ່ວຍພັກ.

ໃນໂອກາດນີ້, ທ່ານ ຈັນທອງ ແກ້ວປະເສີດ ກ່າວວ່າ: ເພື່ອແນໃສ່ຕອບສະ ໜອງຕາມຄວາມຮຽກຮ້ອງຕ້ອງການຂອງໜ້າທີ່ການເມືອງ,ວຽກງານວິຊາສະເພາະໃຫ້ມີຄວາມເຕີບໃຫຍ່ເຂັ້ມແຂງໜັກແໜ້ນ ແລະ ສອດຄ່ອງກັບສະພາບເງື່ອນໄຂໃໝ່ໃນປັດຈຸບັນ ຮຽກຮ້ອງໃຫ້ຫົວໜ້າຜູ້ໃໝ່ຈົ່ງພ້ອມກັນຮັກສາມູນເຊື້ອຄວາມສາມັກຄີເປັນເອກະພາບໃນໝູ່ຄະນະ, ເສີມຂະຫຍາຍຈຸດດີ, ແກ້ໄຂຈຸດອ່ອນ, ມີແບບແຜນການນຳພາ-ບັນຊາວຽກງານໃຫ້ມີຄວາມເຂັ້ມແຂງ ແລະ ຈະເລີນກ້າວໜ້າຂຶ້ນໄປເລື້ອຍໆ.

ແຫຼ່ງຂໍ້ມູນ: ຄວາມສະຫງົບ