ລັດຖະບານຍີ່ປຸ່ນ ໄດ້ມອບອຸປະກອນລະບົບຄວາມເຢັນເພື່ອເກັບຮັກສາ ເເລະ ຂົນສົ່ງວັກຊີນ ມູນຄ່າລວມກວ່າ 900,000 ໂດລາສະຫະລັດ ເເລະ ວັກຊີນປ້ອງກັນພະຍາດ ໂຄວິດ-19 AstraZeneca ຈຳນວນ 320,200 ໂດສ໌ ໃຫ້ແກ່ ກະຊວງສາທາລະນະສຸກ.

ນະ​ຄອນ​ຫຼວງວຽງ​ຈັນ, ວັນ​ທີ 28 ທັນ​ວ​າ 2021 – ໃນ​ມື້ນີ້ ລັດຖະບານຍີ່ປຸ່ນ ​ໄດ້​ມອບ​ອຸປະກອນລະບົບຄວາມເຢັນເພື່ອເກັບຮັກສາ ເເລະ ຂົນສົ່ງວັກຊີນ​ໃຫ້​ແກ່ ກະ​ຊວງ​ສາ​ທາ​ລະ​ນະ​ສຸກ ເພື່ອ​​ເສີນ​ສ້າງ​ຄວາມເຂັ້ມແຂງໃນຂະ​ບວນ​ການ​ສັກ​ຢາ​ວັກ​ຊີນປ້ອງ​ກັນ​ພະ​ຍາດ​ ໂຄວິດ-19 ​ໃນສປປ ລາວ.

ອຸ​ປະ​ກອນ​ດັ່ງ​ກ່າວ​ປະ​ກອບ​ມີ: ​ຕູ້ແຊ່ແຂງເພື່ອເກັບຮັກສາວັກ​ຊີນ​ ເເລະ ແທ່ງນໍ້າແຂງທຽມ ຈຳ​ນວນ 208 ຕູ້,ຕູ້​ເຢັນອີກຈ​ຳ​ນວນ 480 ຕູ້, ອາ​ໄຫຼ່​ສ​ຳ​ລັບ​ອຸ​ປະ​ກອນຕ່າງໆ, ກ່ອງ​ຂົນສົ່ງ​ວັກ​ຊີນ 500 ກ່ອງ, ກ່ອງ​ເຢັນ​ຈຳ​ນວນ 100 ກ່ອງ ແລະ ແທ່ງນໍ້າແຂງທຽມຈຳ​ນວນ 10,000 ແທ່ງ, ເຊີ່ງ​ທັງ​ໝົດນີ້ເເມ່ນການ​ຊ່ວຍ​ເຫຼືອ​ຈາກ​ຍີ່​ປຸ່ນ​ໂດຍ​ຜ່ານອົງການຢູ່ນິເຊັບ​ເເລະ ມີ​ມູນ​ຄ່າ​ລວມ​ທີ່ 913,141ໂດລາສະຫະລັດ.

ການ​ສະ​ໜອງອຸປະກອນລະບົບຄວາມເຢັນ​ໃນ​ຄັ້ງ​ນີ້ ​ເເມ່ນເປັນ​ສ່ວນ​ໜຶ່ງ​ຂອງ​ໂຄງ​ການ​ທີ່​ລັດ​ຖະ​ບານ​ຍີ່​ປຸ່ນພວມຈັດ​ຕັ້ງ​ປະ​ຕິ​ບັດ​ເພື່ອສະ​ໜັບ​ສະ​ໜູນ ສ​ປ​ປ ລາວ ໃນ​ການເສີມສ້າງຄວາມເຂັ້ມແຂງໃຫ້ເເກ່ລະບົບຄວາມເຢັນສຳລັບການເກັບຮັກສາ ເເລະ ຂົນສົ່ງວັກຊີນເພື່ອເປັນການປະກອບສ່ວນເຂົ້າໃນວຽກງານການຮັບ​ມື​ກັບ​ພະ​ຍາດ ໂຄ​ວິດ-19, ເຊິ່ງ​​ໂຄງ​ການດັ່ງກ່າວເເມ່ນມີມູນ​ຄ່າ​ລວມທັ້ງໝົດ 1.1 ລ້ານ​ໂດ​ລາ​ສະ​ຫະ​ລັດ. ນອກຈາກການຈັດຊື້ອຸປະກອນລະບົບຄວາມເຢັນເເລ້ວ, ຈໍານວນທຶນທີ່ ເຫຼືອພາຍ​ໃຕ້​ໂຄງ​ການ​ນີ້​ແມ່ນຈະປະກອບສ່ວນເຂົ້າໃນການຜັນຂະຫຍາຍການຮ່ວມມືດ້ານວິຊາການລະຫວ່າງລັດຖະບານຍີ່ປຸ່ນ ແລະ ລັດຖະບານ ສປປ ລາວ ໃນວຽກງານເສີມສ້າງລະບົບຄວາມເຢັນ ຂອງ ສປປ ລາວ ໃນອະນາຄົດ.

ພະນະທ່ານ​ ດຣ. ໄພວັນ ແກ້ວປະເສີດ​, ຮອງລັດຖະມົນຕີກະຊວງສາທາລະນະສຸກ, ໄດ້ກ່າວວ່າ: “ກະ​ຊວງ​ສາ​ທາ​ລະ​ນະ​ສຸກ ຂໍ​ສະ​ແດງ​ຄວາມ​ຂອບໃຈຕໍ່​ລັດ​ຖະ​ບານ​ຍີ່​ປຸ່ນສຳລັບການ​ສະ​ໜັບ​ສະ​ໜູນ​ອຸ​ປະ​ກອນລະບົບຄວາມເຢັນໃນຄັ້ງນີ້.  ໂດຍການ​ເສີນ​ສ້າງ​ຄວາມເຂັ້ມ​ແຂງ​ໃຫ້​ກັບລະບົບຄວາມເຢັນເພື່ອເກັບຮັກສາ ເເລະ ຂົນສົ່ງວັກຊີນປ້ອງກັນ​ພະ​ຍາດ​ ໂຄວິດ-19, ພວກ​ເຮົາກໍ່​ຈະ​ສາ​ມາດຜັນຂະຫຍາຍວຽກງານການຊັກວັກຊີນໃຫ້ສາມາດ​ເຂົ້າ​ເຖິງ​ຈຳນວນປະຊາກອນ​ໄດ້ຫຼາຍຂື້ນໃນໄລ​ຍະ​ການ​ແຜ່​ລະ​ບາດຂອງ​ພະ​ຍາດ​ດັ່ງ​ກ່າວ.”

ນອກຈາກອຸ​ປະ​ກອນລະບົບຄວາມເຢັນເເລ້ວ, ລັດຖະບານຍີ່ປຸນຍັງໄດ້ມອບວັກຊີນປ້ອງກັນພະຍາດ ໂຄວິດ-19 AstraZeneca ຈຳນວນ 320,200 ໂດສ໌ ໃຫ້ແກ່ ກະຊວງສາທາລະນະສຸກ ຢ່າງເປັນທາງການອີກດ້ວຍໃນໂອກາດນີ້, ເຊີ່ງວັກຊີນເຫຼົ່ານີ້ເເມ່ນໄດ້ມາຮອດ ສປປ ລາວ ໃນວັນທີ 23 ທັນວາທີ່ຜ່ານມາ  ເເລະ ເປັນການຊ່ວຍເຫຼືອຈາກຍີ່ປຸນໂດຍຜ່ານໂຄງ​ການ COVAX Facility – ເຊີ່ງແມ່ນ​ການຮ່ວມມືກັນລະຫວ່າງອົງການພັນທະມິດຮ່ວມມືດ້ານນະວັດຕະກໍາເພື່ອຮັບມືກັບພະຍາດລະບາດ (CEPI), ອົງການກາວີ (Gavi) ແລະ ອົງການອະນາໄມໂລກ (WHO), ໂດຍມີ ອົງການຢູນິເຊັບ ເປັນຄູ່ຮ່ວມງານສຳຄັນໃນການຈັດສົ່ງ.

ປກສ ກຸ່ມ ວັງຊາຍ ສໍາເລັດການລົງເຮັດບົດບັນທຶກສັນຍາ ປ້ອງກັນຄວາມສະຫງົບດີ ຢູ່ 10 ບ້ານທີ່ຂຶ້ນກັບກຸ່ມ

ຕາມການລາຍງານຂອງປ້ອງກັນຄວາມສະຫງົບນະຄອນຫຼວງວຽງຈັນໃຫ້ຮູ້ວ່າ: ປກສ ກຸ່ມ ວັງຊາຍ ເມືອງໄຊເສດຖາ ນະຄອນຫຼວງວຽງຈັນ ໄດ້ສົມທົບກັບ ພະນັກງານລົງກໍ່ສ້າງຮາກຖານ, ອໍານາດການປົກຄອງບ້ານ 10 ບ້ານ ທີ່ຂຶ້ນກັບກຸ່ມ ລົງເຮັດບົດບັນທຶກສັນຍາປ້ອງກັນຄວາມສະຫງົບ ກັບບັນດາຮ້ານຂາຍເຄື່ອງທີ່ອາດຈະມີການຂາຍທາດທີ່ມີສຽງແຕກ, ຮ້ານກີນດື່ມ, ບໍລິສັດ, ຫ້ອງແຖວ, ຮ້ານເສີມສວຍ, ຮ້ານຮັບຊື້ເຫຼັກເສດ ເພື່ອຮັກສາຄວາມສະຫງົບໃນໄລຍະສົ່ງທ້າຍປີເກົ່າ 2021 ຕ້ອນຮັບປີໃໝ່ 2022.ພັທ ຊື່ວ່າງ ກ່າລໍ່ ຫົວໜ້າ ປກສ ກຸ່ມ ວັງຊາຍ ເມືອງໄຊເສດຖາ ນະຄອນຫຼວງວຽງຈັນ ໃຫ້ຮູ້ວ່າ:

ແຕ່ວັນທີ 22-27 ທັນວາ 2021 ປກສ ກຸ່ມໄດ້ໄດ້ປະສານສົບທົບກັບ ອໍານາດການປົກຄອງບ້ານ 10 ບ້ານ ເພື່ອເຮັດບົດບັນທຶກສັນຍາປ້ອງກັນຄວາມສະຫງົບດີ ເຊິ່ງມີທັງໝົດ 238 ຮ້ານ ແລະ ໃນບົດບັນທືກໄດ້ກໍານົດຫ້າມບໍ່ໃຫ້ຊື້-ຂາຍວັດຖຸທີ່ເຮັດໃຫ້ມີສຽງແຕກເນືອງນັນ, ຫ້າມເຮັດໃຫ້ມີສຽງແຕກທຸກປະເພດ, ຫ້າມຈັດງານຂິດຂວາງການສັນຈອນ, ຫ້າມຫຼີ້ນການພະນັນ, ຫ້າມໃຊ້ສຽງດັງລົບກວນຄົນອື່ນ.

ເນື່ອງຈາກບຸນປີໃຫມ່ສາກົນ 2022 ນີ້ ແມ່ນຍັງຢູ່ໃນສະພາບຂອງການລະບາດພະຍາດໂຄວິດ-19 ພາຍໃນປະເທດ ເວົ້າລວມ, ເວົ້າສະເພາະແຂວງຈໍາປາສັກ ຍັງສືບຕໍ່ມີການແຜ່ລະບາດໃນຊຸມຊົນ, ສະນັ້ນ, ເພື່ອເປັນການຮັບປະກັນໃນການ ຈັດຕັ້ງການສະເຫຼີມສະຫຼອງບຸນປີໃຫມ່ສາກົນປີນີ້ ຂອງປະຊາຊົນບັນດາເຜົ່າໃນທົ່ວແຂວງຈໍາປາສັກ ໃຫ້ເປັນບັນຍາກາດແຫ່ງ ຄວາມເບີກບານມ່ວນຊື່ນ ແລະ ມີໄມຕີຈິດມິດຕະພາບ, ເຕັມໄປດ້ວຍຄວາມສາມັກຄີ ທັງຮັບປະກັນຄວາມສະຫງົບ, ປອດ ໄພ ແລະ ຄວາມເປັນລະບຽບຮຽບຮ້ອຍຢູ່ໃນສັງຄົມ ຕິດພັນກັບການສືບຕໍ່ເອົາໃຈໃສ່ປະຕິບັດມາດຕະການຕ່າງໆ ຕາມຄໍາສັ່ງ ສະບັບເລກທີ 15/ນຍ ແລະ ຄໍາສັ່ງ ຂອງເຈົ້າແຂວງ ເລກທີ 18/ຈຂ.ຈສ ໃນການປ້ອງກັນ ແລະ ສະກັດກັ້ນການແຜ່ລະບາດ ຂອງພະຍາດໂຄວິດ-19 ທີ່ລັດຖະບານ ແລະ ແຂວງໄດ້ວາງອອກ. ຄະນະສະເພາະກິດຂັ້ນແຂວງ ຂໍຖືເປັນກຽດ ແຈ້ງມາຍັງທຸກ ພາກສ່ວນຮັບຊາບ ແລະຈັດຕັ້ງປະຕິບັດດັ່ງນີ້:

1. ຫ້າມບໍ່ໃຫ້ແຕ່ລະສໍານັກງານ, ອົງການຈັດຕັ້ງພັກ-ລັດ ທຸກຂັ້ນ ຈັດງານສະເຫຼີມສະຫຼອງສົ່ງທ້າຍປີເກົ່າ 2021 ແລະ ຕ້ອນຮັບປີໃຫມ່ 2022 ຢ່າງເດັດຂາດ; ກໍລະນີມີຄວາມປະສົງຕ້ອງການອ່ວຍພອນໃນງານຄອບຄົວ ກໍສາມາດຈັດ ໄດ້, ບົນພື້ນຖານກະທັດຮັດ, ງ່າຍດາຍ ( ບໍ່ອະນຸຍາດເຕົ້າໂຮມຈໍານວນຜູ້ເຂົ້າຮ່ວມຫລາຍ ແລະ ຈັດເຄົ້າດາວ ) ແລະ ຕ້ອງຮັບປະກັນມາດຕະການປ້ອງກັນການລະບາດຂອງພະຍາດໂຄວິດ-19 ຢ່າງເຂັ້ມງວດ.

2. ມອບໃຫ້ກອງບັນຊາການທະຫານແຂວງ, ກອງບັນຊາການປ້ອງກັນຄວາມສະຫງົບແຂວງ, ອົງການ ປົກຄອງນະຄອນປາກເຊ ແລະ 9 ເມືອງ ຈັດຕັ້ງປະຕິບັດດັ່ງນີ້:

2.1 ຊີ້ນໍາບັນດາບ້ານ, ກຸ່ມບ້ານ, ກໍາລັງກອງຫຼອນບ້ານ ເປັນເຈົ້າການກວດກາ, ຕິດຕາມ ບັນດາກິດຈະກໍາທີ່ບໍ່ອະນຸຍາດໃຫ້ດໍາເນີນ ຕາມຄໍາສັ່ງ ສະບັບເລກທີ 18/ຈຂ.ຈສ, ລົງວັນທີ 16 ພະຈິກ 2021 ຢ່າງເຂັ້ມງວດ.

.

ຈາກຂໍ້ມູນໜັງສືພິມກອງທັບປະຊາຊົນລາວໃຫ້ຮູ້ວ່າ: ອາຄານລາດຊະວົງພລາຊາ ຕຶກສູງທີ່ສຸດຈະສືບຕໍ່ກໍ່ສ້າງອີກຄັ້ງ ລາດຊະວົງ ພລາຊາ ເປັນອາຄານສູນການຄ້າຄົບວົງຈອນ ແລະໂຮງແຮງລະດັບຫ້າດາວ ເຊິ່ງເປັນຕຶກສູງທີ່ສຸດໃນປະເທດລາວ ຈະຖືກດໍາເນີນການກໍ່ສ້າງຄືນໃໝ່, ເນື່ອງຈາກປີ 2016 ຜູ້ປະກອບການຂອງອາຄານດັ່ງກ່າວພົບຄວາມຫຍຸ້ງຍາກທາງດ້າການເງິນ ຈິ່ງໄດ້ໂຈະການດໍາເນີນການກໍ່ສ້າງ.

ອີງຕາມ ທ່ານ ພັນເອກ ສີພອນໄຊ ຫົວໜ້າກົມເສດຖະກິດກະຊວງປ້ອງກັນປະເທດ ລາຍງານໃນພິທີເສັນສັນຍາສືບຕໍ່ໂຄງການລາດຊະວົງ ພລາຊາ ໃນວັນທີ 23 ທັນວາ 2021 ທີ່ນະຄອນຫຼວງວຽງຈັນ ໂດຍມີທ່ານ ພົນຕີ ວົງຄຳ ພົມມະກອນ ຮອງລັດຖະມົນຕີກະຊວງປ້ອງກັນປະເທດ, ທ່ານ ໄຊຊະນະ ສິດທິພອນ ຮອງປະທານຄະນະກໍາມະການຮ່ວມມື ລາວ-ຈີນ, ທ່ານ ຮຸ່ງເພັດ ຈັນທະວົງ ເລຂາທິການສະມາຄົມມິດຕະພາບລາວ-ຈີນ, ທ່ານ ເຊຍເກຍເວນ ເລຂາຄະນະພັກ ບໍລິສັດທາງລົດ ໄຟລາວ-ຈີນ ຈຳກັດ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

ທ່ານຫົວໜ້າກົມເສດຖະກິດກະຊວງປ້ອງກັນປະເທດ ໃຫ້ຮູ້ວ່າ: ໂຄງການກໍ່ສ້າງລາດຊະວົງພລາຊາເປັນການຮ່ວມມືທຸລະກິດລະຫວ່າງກະຊວງປ້ອງກັນປະເທດ ແລະ ບໍລິສັດ ຊົງຊີງ ຟາງເຕີ ເຊິ່ງໄດ້ເຊັນສັນຍາ ແລະເລີ່ມກໍ່ສ້າງມາແຕ່ທ້າຍປີ 2013. ລາດຊະວົງພລາຊາ ເປັນອາຄານໂຮງແຮມລະດັບ 5 ດາວ, ຫ້ອງການ, ສູນບຳບັດ, ສູນການຄ້າຄົບວົງຈອນ ແລະອື່ນໆ ຕັ້ງຢູ່ໃຈກາງນະຄອນຫຼວງວຽງຈັນ ໂດຍມີມູນຄ່າຫຼາຍກວ່າ 99 ລ້ານໂດລາສະຫະລັດ. ພາຍຫຼັງເຊັນສັນຍາບໍລິສັດດັ່ງກ່າວໄດ້ດຳເນີນການກໍ່ສ້າງ ແລະໄດ້ພົບກັບຄວາມຫຍຸ້ງຍາກຫຼາຍດ້ານ ໂດຍສະເພາະດ້ານການເງິນ, ນິຕິກຳ ຈຳນວນໜຶ່ງຍັງບໍ່ສອດຄ່ອງ. ສະນັ້ນ, ປີ 2016 ໂຄງການດັ່ງກ່າວໄດ້ໂຈະການກໍ່ສ້າງ ຊົ່ວຄາວຈົນເຖິງປັດຈຸບັນ.

ຕໍ່ກັບສະພາບນີ້ ການນຳຂອງກະຊວງປ້ອງກັນປະເທດໄດ້ ໄດ້ແຕ່ງຕັ້ງຄະນະສະເພາະກິດແກ້ໄຂ ແລະຊຸກຍູ້ໂຄງການດັ່ງກ່າວ ເພື່ອຊ່ວຍເຫຼືອຜູ້ປະກອບການລົງທຶນໄດ້ສືບຕໍ່ກໍ່ສ້າງໃຫ້ສໍາເລັດພາຍໃນ 2 ປີ ນັບແຕ່ມື້ລົງລາຍເຊັນສັນຍາເປັນຕົ້ນໄປໂດຍໄດ້ແບ່ງເປັນ 2 ໄລຍະຄື: 6 ເດືອນຕໍ່ໜ້າຈະດຳເນີນການກໍ່ສ້າງບັນດາໜ້າວຽກທີ່ຍັງຄ້າງໃຫ້ສໍາເລັດ ແລະສາມາດເປີດບໍລິການໄດ້ໃນປີກາງປີ 2022; ໄລຍະທີ 2: ປີ 2023 ຈະກໍ່ສ້າງໂຄງການລາດຊະວົງ ພລາຊາ ໃຫ້ສໍາເລັດຢ່າງ ສົມບູນ ແລະ ສາມາດເປີດບໍລິການຮັບໃຊ້ສັງຄົມເຕັມຮູບແບບ.

ໃນທ້າຍອາທິດຜ່ານມານີ້, ກອງບັນຊາການປ້ອງກັນຄວາມສະຫງົບເມືອງຫ້ວຍຊາຍ, ສໍາເລັດປະເມີນການແກ້ໄຂປະກົດການຫຍໍ້ທໍ້ຕິດພັນກັບການສ້າງຄອບຄົວ ແລະ ບ້ານປ້ອງກັນຄວາມສະຫງົບດີ ຢູ່ກຸ່ມ ບ້ານນໍ້າຍອນ, ໂດຍການເປັນປະທານຂອງ ທ່ານ ພັນໂທ ມະນີວອນ ຜິວຜາສຸກ ກໍາມະການພັກເມືອງ, ຫົວໜ້າກອງບັນຊາການປ້ອງກັນຄວາມສະຫງົບເມືອງຫ້ວຍຊາຍ, ເຂົ້າຮ່ວມຂອງທ່ານ ພັນໂທ ຄໍາເຫຼັກ ໄຊຍະອຸ່ນ ຮອງຫ້ອງ 509 ປກສ ແຂວງບໍ່ແກ້ວ, ມີບັນດາຄະນະພັກຮາກຖານ, ອໍານາດການປົກຄອງບ້ານພາຍໃນກຸ່ມເຂົ້າຮ່ວມ.

ທ່ານ ພັນໂທ ກາສີ ແພງເຈືອຫຼ້າ ຮອງພະແນກສໍາມະໂນຄົວ ແລະ ກໍ່ສ້າງຮາກຖານ ປກສ ເມືອງຫ້ວຍຊາຍ ກ່າວວ່າ: ກຸ່ມບ້ານນໍ້າຍອນເປັນກຸ່ມໜຶ່ງທີ່ຂຶ້ນກັບເມືອງຫ້ວຍຊາຍ, ຫ່າງຈາກຕົວເມືອງ 19 ກິໂລແມັດ, ປະກອບມີ 4 ບ້ານ, ມີ 627 ຄົວເຮືອນ, ມີ 722 ຄອບຄົວ, ມີພົນລະເມືອງທັງໝົດ 3569 ຄົນ, ຍິງ 1849 ຄົນ, ຢູ່ພາຍໃນກຸ່ມບ້ານນໍ້າຍອນໃນໄລຍະຜ່ານມາເຫັນວ່າ ພໍ່ແມ່ປະຊາຊົນບັນດາເຜົ່າສ່ວນຫຼາຍມີຄວາມເຂົ້າໃຈ ແລະ ເຊື່ອມຊືມຕໍ່ແນວທາງນະໂຍບາຍຂອງພັກ-ລັດ ໃນແຕ່ລະໄລຍະຕັ້ງໜ້າປະກອບສ່ວນເຂົ້າຮ່ວມວຽກງານ ປກສ-ປກຊ ເປັນຢ່າງດີປະຕິບັດຕາມຂໍ້ກໍານົດກົດລະບຽບວາງອອກ, ມີຄວາມຕື່ນຕົວ ແລະ ຈິງໃຈໃນການໃຫ້ຂໍ້ມູນຕ່າງໆພາຍໃນຄອບຄົວໄດ້ລາຍງານສະພາບປະກົດການຫຍໍ້ທໍ້ຕ່າງໆທີ່ເກີດຂຶ້ນຢູ່ພາຍໃນບ້ານຂອງຕົນໃຫ້ອໍານາດການປົກຄອງບ້ານຊາບເພື່ອຊອກຫາວິທີການແກ້ໄຂໃຫ້ທັນກັບເວລາ, ຜ່ານການປະເມີນການສ້າງຄອບຄົວ ແລະ ບ້ານປ້ອງກັນຄວາມສະຫງົບດີ ວຽກງານສໍາມະໂນຄົວ ປະເມີນໄດ້ 95% ວຽກງານ ປກສ-ປກຊ ປະເມີນໄດ້ 90% ວຽກງານອາຊີບ

– ພາຫະນະພິເສດ ປະເມີນໄດ້ 95% ວຽກງານຕໍາຫຼວດ ປະເມີນໄດ້ 80% ວຽກງານສັນຕິບານ ປະເມີນໄດ້ 85% ວຽກງານ 504 ປະເມີນໄດ້ 95%.

ໂອກາດນີ້, ທ່ານ ພັນໂທ ມະນີວອນ ຜິວຜາສຸກ ກໍາມະການພັກເມືອງ, ຫົວໜ້າກອງບັນຊາການປ້ອງກັນຄວາມສະຫງົບເມືອງຫ້ວຍຊາຍ, ໄດ້ມີຄຳເຫັນຍ້ອງຍໍຊົມເຊີຍຕໍ່ຄະນະທີມງານລົງແກ້ໄຂປະກົດການຫບໍ້ທໍ້ ແລະ ຕິດພັນກັບປະເມີນການສ້າງຄອບຄົວ ແລະ ບ້ານປ້ອງກັນຄວາມສະຫງົບດີ, ທ່ານໄດ້ເນັ້ນໜັກໃຫ້ຄະນະຮັບຜິດຊອບຈົ່ງພ້ອມກັນເພີ້ມທະວີວຽກງານວິຊາສະເພາະຂອງຕົວ, ເອົາໃຈໃສໃນການເປັນເຈົ້າການໃນການສຶກສາອົບຮົມການເມືອງແນວຄິດໃຫ້ແກ່ຄະນະພັກອໍານາດການປົກຄອງບ້ານ ແລະ ພໍ່ແມ່ປະຊາຊົນບັນດາເຜົ່າໄດ້ຮັບຮູ້ ແລະ ເຂົ້າໃຈຢ່າງເລິກເຊີ່ງ, ເພື່ອກໍາແໜ້ນຕໍ່ແນວທາງປ້ອງກັນຊາດປ້ອງກັນຄວາມສະຫງົບໃຫ້ເປັນຢ່າງດີ, ພ້ອມດຽວກັນນັ້ນໃນພິທີດັ່ງກ່າວ ປະທານ ແລະ ຄະນະປະທານ ໄດ້ພ້ອມກັນທໍາລາຍອາວຸດລ່າເນື້ອ (ປືນແກັບ) ທີ່ຍຶດໄດ້ຈາກປະຊາຊົນພາຍໃນກຸ່ມນໍ້າຍອນ ມີທັງໝົດ 105 ກະບອກຕື່ມອີກ.

ແຫຼງຂ່າວ: ຖວທ ເມືອຫ້ວຍຊາຍ