Home Blog Page 12

ສະຫນັບສະຫນຸນປະເທດລາວໃນການເປັນເຈົ້າພາບຈັດກອງປະຊຸມ

By
ໂທລະໂຄ່ງ THOLAKHONG
-
0

ໃນວັນທີ 28 ພະຈິກ 2022 ພິທີເຊັນສັນຍາເອກະສານແລກປ່ຽນໃນ ໂຄງການພັດທະນາ ເສດຖະກິດ ແລະ ສັງຄົມ (ການສະຫນັບສະຫນຸນປະເທດລາວໃນການເປັນເຈົ້າພາບຈັດກອງປະຊຸມ ASEAN) ໄດ້ຖືກຈັດຂຶ້ນທີ່ກະຊວງການຕ່າງປະເທດລາວທີ່ນະຄອນຫຼວງວຽງຈັນ.

ເອກະສານແລກປ່ຽນດັ່ງກ່າວໄດ້ຖືກເຊັນໂດຍລະຫວ່າງ ພະນະທ່ານ ໂຄຍະຍະ ເຄັນອິຈິ, ເອກອັກຄະຣາຊະທູດຍີ່ປຸ່ນ ປະຈໍາ ສປປ ລາວ ແລະ ພະນະທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດລາວ ໃຫ້ກຽດເປັນສັກຂີພະຍານໂດຍ ພະນະທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດລາວ.

ໃນປີ 2024 ປະເທດລາວເຮົາຈະໄດ້ຮັບຫນ້າທີ່ເປັນເຈົ້າພາບຈັດກອງປະຊຸມ ASEAN ເພື່ອເປັນການສະຫນັບສະຫນຸນຫນ້າທີ່ອັນສໍາຄັນດັ່ງກ່າວ, ລັດຖະບານຍີ່ປຸ່ນໄດ້ມອບການຊ່ວຍເຫຼືອລ້າເປັນ ມູນຄ່າ 500 ລ້ານເຢັນ (ປະມານ 60ຕື້ກີບ ຫຼື ປະມານ 3.5 ລ້ານໂດລາສະຫະລັດ) ເຊິ່ງປະກອບມີລົດເກັງ Hybrid ຈໍານວນ 33 ຄັນເພື່ອຮັບໃຊ້ການນໍາ ຂັ້ນສູງໃນໄລຍະກອງປະຊຸມ ແລະ ນອກຈາກນັ້ນກໍ່ມີອຸປະກອນລະບົບເຄືອຂ່າຍ, LAN ແບບໄຮ້ສາຍ ແລະ firewall ເພື່ອຕິດຕັ້ງທີ່ຫໍປະຊຸມແຫ່ງຊາດ ແລະ ສູນ ICTC, ເຊິ່ງບັນດາລົດ ແລະ ອຸປະກອນເຫຼົ່ານີ້ແມ່ນມີຄວາມຈໍາເປັນສໍາຫຼັບກອງປະຊຸມອາຊຽນທີ່ຈະຖືກຈັດຂຶ້ນຕະຫຼອດປີ.

ນອກຈາກນີ້, ໃນຊ່ວງໄລຍະກອງປະຊຸມລະຫວ່າງປະເທດນັ້ນສິ່ງສໍາຄັນອີກຢ່າງຫນຶ່ງກໍ່ຄືການປ້ອງກັນການສື່ສານຈາກການໂຈມຕີທາງອອນລາຍເຊັ່ນການກໍ່ການຮ້າຍທາງໄຊເບີ ແລະ ອື່ນໆ. ກອງປະຊຸມ ASEAN ແລະ ກອງປະຊຸມປິ່ນອ້ອມໃນປີນີ້ ໄດ້ຖືກຈັດຂຶ້ນທີ່ພະນົມເປນ, ປະເທດກໍາປູເຈຍ. ໃນກອງປະຊຸມສຸດຍອດ ASEAN-ຍີ່ປຸ່ນ ທີ່ເຂົ້າຮ່ວມໂດຍ ທ່ານນາຍົກ ຄິຊິດະ ແຫ່ງປະເທດຍີ່ປຸ່ນ, ທ່ານນາຍົກ ພັນ ແຫ່ງປະເທດລາວ ແລະ ບັນດາຄູ່ຮ່ວມຕ່າງກໍ່ໄດ້ຕົກລົງເຫັນດີ ໃຫ້ “ກອງປະຊຸມສຸດຍອດ ASEAN-ຍີ່ປຸ່ນ ຄັ້ງພິເສດ” ໃຫ້ຈັດຂຶ້ນທີ່ ໂຕກຽວປີ 2023.

ຍີ່ປຸ່ນແມ່ນມີສາຍພົວພັນການຮ່ວມມືກັບ ASEAN ເປັນເວລາຍາວນານເຖິງເກືອບ 50 ປີ ແລະ ທັງຍັງໃຫ້ການສະຫນັບສະຫນຸນສັນຕິພາບ, ສະຖຽນລະພາບ, ການພັດທະນາ ແລະ ຄວາມ ຈະເລີນຮຸ່ງເຮື່ອງໃນທົ່ວພາກພື້ນອາຊີຕາເວັນອອກສຽງໃຕ້, ເສີມສ້າງສາຍພົວພັນທາງເສດຖະກິດຢ່າງໃກ້ຊິດໃນນາມຄູ່ຮ່ວມການລົງທຶນ ແລະ ການຄ້າ.

ຢີ່ປຸ່ນໄດ້ໃຫ້ການສະຫນັບສະໜູນ ASEAN ແລະ ປະເທດສະມາຊິກຕະຫຼອດມາໂດຍຢູ່ບົນ ພື້ນຖານເຂົ້າໃຈເຖິງຄວາມສໍາຄັນຂອງຄວາມສະຖຽນລະພາບ ແລະ ຄວາມຈະເລີນຮຸ່ງເຮືອງຂອງ ພາກພື້ນ ASEAN ທີ່ແມ່ນສູນກາງຂອງການຮ່ວມມືລະດັບພາກພື້ນ ແລະ ໄດ້ໃຫ້ຄວາມສໍາຄັນເຖິງ ການເຊື່ອມໂຍງ ໃນຖານະເປັນຄູ່ຮ່ວມທີ່ມີຄ່ານິຍົມຮ່ວມກັນທັງໃນດ້ານນິຕິທໍາ ແລະ ປະຊາທິປະໄຕ.

ປະເທດຍີ່ປຸ່ນມີຄວາມຕັ້ງໃຈຈະສືບຕໍ່ໃຫ້ການສະຫນັບສະຫນຸນລັດຖະບານ ແລະ ປະຊາຊົນລາວ ໃນການຮັບມືກັບສິ່ງທ້າທາຍຕ່າງໆ ເພື່ອສໍາເລັດການເປັນເຈົ້າພາບຈັດກອງປະຊຸມ ASEAN ແລະ ກອງປະຊຸມປິ່ນອ້ອມໃນປີ 2024 ແລະ ເພື່ອພັດທະນາສາຍພົວພັນຍີ່ປຸ່ນ-ລາວ ແລະ ຍີ່ປຸ່ນ- ASEAN ທັງໃນປະຈຸບັນ ແລະ ອານາຄົດ.

ສະເຫຼີມສະຫຼອງໃບຢັ້ງຢືນ ມໍຣະດົກໂລກໄຫຫີນ ແຫ່ງທີ 3

By
ໂທລະໂຄ່ງ THOLAKHONG
-
0

ໃນວັນທີ 29 ພະຈິກ 2022 ອຳນາດການປົກຄອງແຂວງຊຽງຂວາງ ຮ່ວມກັບກະຊວງຖະແຫຼງຂ່າວວັດທະນະທຳ ແລະທ່ອງທ່ຽວ ໄດ້ຈັດພິທີ ສະເຫຼີມ ສະຫຼອງໃບຢັ້ງຢືນມໍລະດົກໂລກໄຫຫີນ, ຂຶ້ນຢູ່ບໍລິເວນ ທົ່ງໃຫ້ຫີນ 1 ບ້ານນາໂອ ເມືອງແປກແຂວງຊຽງຂວາງ ໂດຍເປັນກຽດເຂົ້າຮ່ວມ ຂອງທ່ານ ກິແກ້ວ ໄຂຄຳພິທູນ ຮອງນາຍົກ ລັດ ຖະມົນຕີ, ທ່ານ ນາງ ສວນສະຫວັນ ວິຍະເກດ ລັດຖະມົນຕີກະຊວງຖະແຫຼງຂ່າວວັດທະນະທຳແລະທ່ອງທ່ຽວ, ທ່ານ ບຸນຈັນ ສີວົງພັນ ເຈົ້າແຂວງຊຽງຂວາງ, ມີຜູ້ຕາງໜ້າອົງການອຸຍແນສໂກ, ມີອຳນາດການປົກຂອງແຂວງ, ເມືອງ, ພ້ອມດ້ວຍຊາວບ້ານ ໄດ້ເຂົ້າຮ່ວມ.

ພິທີເລີ່ມຕົ້ນດ້ວຍ ຂະບວນແຫ່ໃບຍັ້ງຢືນ ຈາກຫ້ອງການມໍລະດົກໂລກໄຫຫີນຊຽງຂວາງ ອ້ອມຕົວເມືອງໂພນສະຫວັນ, ປະກອບມີ ຂະບວນຟ້ອນ ຈາກ 6 ຊົນເຜົ່າ, ຂະບວນເປົ່າແຄນຂັບລຳ, ມີຂະບວນຕີກອງຄູ່ໃນລົດແຫ່, ມີການຟ້ອນເທິງລົດແຫ່, ໂດຍມີຄົນຢືນລຽນແຖວຕ້ອນຮັບສອງຝາກທາງ, ນອກຈາກນີ້ ຜູ້ເຂົ້າຮ່ວມຍັງໄດ້ຊົມການສະແດງສິລະປະຕື່ມອີກ.

ໃນພິທີ ທ່ານ ສີວິໄລ ແສງຈະເລີນ ຮອງເຈົ້າແຂວງຊຽງຂວາງ ໄດ້ຂຶ້ນລາຍງານສະພາບຄວາມເປັນມາກ່ຽວກັບການຮັບຮອງເປັນມໍລະດົກໂລກໄຫຫີນ ທ່ານໃຫ້ຮູ້ວ່າ: ຕະຫຼອດໄລຍະ 20 ກວ່າປີທີ່ຢາກໃຫ້ໄຫຫີນໄດ້ເຂົ້າເປັນມໍລະດົກໂລກ, ລັດຖະບານແຫ່ງ ສປປ ລາວ ແລະ ອົງການອຸຍແນດສະໂກໄດ້ມີການຮ່ວມມືກັນໃນການສຶກສາສຳຫຼວດ, ຄົ້ນຄວ້າ ແລະ ກຳນົດ ແຜນໃນການປົກປັກຮັກສາ ແລະ ຄຸ້ມຄອງ ມໍລະດົກ ທາງດ້ານວັດທະນະທຳອັນລໍ້າຄ່າດັ່ງກ່າວໃຫ້ມີ ຄວາມຍືນຍົງ ແລະ ເກີດປະໂຫຍດສູງສຸດ ໂດຍສຸມໃສ່ບັນດາໜ້າວຽກທີ່ສຳຄັນຄື:

ມາຮອດວັນທີ 25 ມັງກອນ 2018 ເອກະສານຄຳຮ້ອງ ແລະ ເອກະສານແຜນແມ່ບົດແຫຼ່ງໄຫຫີນ ແຂວງຊຽງຂວາງ ໄດ້ຖືກຮັບຮອງຈາກລັດຖະບານແຫ່ງ ສປປ ລາວ ເປັນສະບັບສົມ ບູນໄດ້ສຳເລັດ ແລະ ຖືກນຳສົ່ງໄປຍັງສູນມໍລະດົກໂລກ ຂອງອົງການອຸຍແນດສະໂກຢ່າງເປັນທາງການ ແລະ ວັນທີ 20-30 ຕຸລາ 2018 ທາງອົງການອຸຍແນດສະໂກໄດ້ສົ່ງຜູ້ຊ່ຽວຊານ ຂອງອົງການອີໂຄມອດສ ລົງມາກວດກາເບິ່ງສະພາບຄວາມເປັນຈິງ ຂອງພື້ນທີ່ແຫຼ່ງໄຫຫີນ ແຂວງຊຽງຂວາງ; ໃນວັນທີ 10 ກໍລະ ກົດ 2019 ກອງປະຊຸມໃຫຍ່ຄັ້ງທີ 43 ຂອງອົງການອຸຍແນດສະໂກ ໄດ້ຈັດຂຶ້ນຢູ່ເມືອງ ບາກູ ປະເທດ ອາແຊກໄບຊານ ໄດ້ຮັບຮອງເອົາ “ ໄຫຫີນ ” ເຂົ້າເປັນມໍລະດັກໂລກຢ່າງເປັນທາງການ.

ແຫຼ່ງມໍລະດົກໄຫຫີນ 11 ແຫ່ງທີ່ປະກອບດ້ວຍ 15 ອົງປະກອບໄດ້ກວມເອົາເນື້ອທີ່ຂະໜາດ ໃຫຍ່ ຊຶ່ງນອນຢູ່ໃນ 4 ເມືອງ ຂອງແຂວງຊຽງຂວາງຄື: ເມືອງແປກ, ເມືອງຜາໄຊ, ເມືອງພູກູດ ແລະ ເມືອງຄຳ ທີ່ປະກອບດ້ວຍໄຫຫີນໃຫຍ່-ນ້ອຍ ທີ່ຖືກຄວັດເຈາະຢ່າງປານີດ ຈຳນວນ 1.325 ໜ່ວຍ ຢັງ ຢາຍກັນຢູ່ ຊຶ່ງໜ່ວຍໄຫຫີນມີຂະໜາດ 1 ຫາ 3 ແມັດ, ມີແຜ່ນຫີນຈຳນວນໜຶ່ງອາດມີຄວາມເປັນໄປໄດ້ ທີ່ຈະເປັນຝາປິດໄຫຫີນ, ບັນດາອົງປະກອບຕ່າງໆນັ້ນ ລ້ວນແຕ່ແມ່ນຫຼັກຖານທີ່ໂດດເດັ່ນທີ່ສຸດສະແດງ ໃຫ້ເຫັນຄວາມຈະເລີນຮຸ່ງເຮືອງ ຂອງຊຸມຊົນໃນສັງຄົມຍຸກເຫຼັກ ທີ່ເປັນຜູ້ສ້າງ ແລະ ນຳໃຊ້ບັນດາໄຫຫີນ ເຫຼົ່ານັ້ນ ຊຶ່ງມີອາຍຸລະຫວ່າງ 2.500-3000 ປີ.

ໃນຈຳນວນ 15 ອົງປະກອບ ຂອງບັນດາແຫຼ່ງໄຫຫີນນັ້ນ ແມ່ນປະກອບມີ 5 ແຫຼ່ງໄຫຫີນໃຫຍ່ ຄຶ: ແຫຼ່ງໄຫຫີນ 1, ໄຫຫີນ 2, ໄຫຫີນ 3, ໄຫຫີນ 42 ແລະ ໄຫຫີນ 52. ຈາກນັ້ນ, ຍັງປະກອບມີ ແຫຼ່ງໄຫຫີນນ້ອຍເຊັ່ນ: ໄຫຫີນ 23, 25 ແລະ 28 ທີ່ຖືກຄັດເລືອກດ້ວຍເຫດຜົນທີ່ມີຄວາມໝາຍສຳ ຄັນທາງດ້ານຫຼັກຖານບູຮານຄະດີ, ສ່ວນອີກ 3 ແຫຼ່ງແມ່ນຖືກຄັດເລືອກດ້ວຍເຫດຜົນທີ່ເປັນຕົວແທນ ໃຫ້ແກ່ແຫຼ່ງຕັດຫີນ ແລະ ແຫຼ່ງຜະລິດໄຫຫີນເຊັ່ນ: ແຫຼ່ງໄຫຫີນ 8, 21 ແລະ 12 ຕາມລຳດັບ.

ໂອກາດຂຶ້ນກ່າວມອບໃບຢັ້ງຢືນ ທົ່ງໄຫຫີນແຂວງຊຽງຂວາງ ມໍຣະດົກໂລກແຫ່ງທີ 3 ຂອງ ສປປ ລາວ ຂອງທ່ານ ນາງ ສວນສະຫວັນ ວິຍາເກດ ລັດຖະມົນຕີກະຊວງຖະແຫຼງຂ່າວວັດທະນະທຳແລະທ່ອງທ່ຽວ ໄດ້ກ່າວບາງຕອນທີ່ສຳຄັນວ່າ: ທົ່ງໄຫຫີນແຂວງຊຽງຂວາງໄດ້ຖືກຮັບຮອງໃຫ້ເປັນມໍຣະດົກໂລກຈາກອົງການອຸຍແນັສໂກ ໃນວັນທີ 10 ກໍລະກົດ 2019 ເຊິ່ງເປັນແຫ່ງທີ 3 ຂອງ ສປປ ລາວ ຖັດຈາກເມືອງມໍຣະດົກໂລກຫຼວງພະບາງ ແລະ ວັດພູຈໍາປາສັກ. ມື້ນີ້ພວກເຮົາໄດ້ພ້ອມກັນມາເຕົ້າໂຮມເພື່ອສະເຫຼີມສະຫຼອງທົ່ງໄຫຫີນອັນເອກະລັກທີ່ເປັນມິ່ງຂວັນຂອງຊາວພວນແຂວງຊຽງຂວາງ ທີ່ມີປະຫວັດສາດຄວາມເປັນມາຍາວນານ ແລະ ມີຄຸນຄ່າອັນໂດດເດັ່ນລະດັບຈັກກະວານຄຽງຄູ່ແຜ່ນດິນຊຽງຂວາງນັບເປັນເວລາຫຼາຍພັນປີ ໂດຍມີວັດຖຸໄຫຫີນມໍຣະດົກໂລກ ຈຳນວນຫຼາຍກວ່າ 2.100 ໜ່ວຍ ທີ່ເຄີຍນຳໃຊ້ເຂົ້າໃນພິທີຊາປະນະກິດສົບໃນຍຸກເຫຼັກ ແລະ ໄດ້ກາຍມາເປັນຊື່ຂອງທົ່ງໄຫຫີນ. ຜ່ານການກະກຽມຮອບດ້ານ ແລະ ການຄອງຄອຍມາເປັນເວລາຍາວນານ 20 ກວ່າປີ ທີ່ຢາກໃຫ້ທົ່ງໄຫຫີນ ໄດ້ເປັນມໍຣະດົກໂລກ. ມາປະຈຸບັນນີ້ຄວາມພະຍາຍາມກໍໄດ້ກາຍເປັນຄວາມຈິງສົມດັ່ງຄວາມຫວັງຕັ້ງໃຈ ແລະ ການຄອງຄອຍ ປະຊາຊົນລາວບັນດາເຜົ່າໃນທົ່ວປະເທດ ແລະ ປະຊາຊົນຊາວຊຽງຂວາງ ແມ່ນສຸດແສນມີຄວາມປິຕິຊົມຊື່ນຍິນດີເປັນຢ່າງຍິ່ງ. ແມ່ນກຽດສັກສີອັນສູງສົ່ງຂອງຊາດ ຢູ່ໃນເວທີລະດັບໂລກ. ມັນເຮັດໃຫ້ຊື່ສຽງ ແລະ ພາບພົດຂອງປະເທດຊາດຖືກໂຄສະນາເຜີຍແຜ່ໂດ່ງດັງໄປທົ່ວໂລກ ເຮັດໃຫ້ຊາວໂລກສົນໃຈຢາກມາທ່ຽວຊົມປະເທດລາວນັບມື້ນັບເພີ່ມຂຶ້ນ. ນາມມະຍົດແຫ່ງຄວາມເປັນມໍຣະ ດົກໂລກ ໄດ້ກະຕຸກຊຸກຍູ້ອຸດສະຫະກໍາການທ່ອງທ່ຽວທາງວັດທະນະທຳ ແລະ ທຳມະຊາດ ທີ່ມີຄຸນຄ່າຍອດຍິ່ງລະດັບໂລກ ແລະ ທັງເປັນແມ່ເຫຼັກດຶງດູດການລົງທຶນ, ການຮ່ວມມືສາກົນ, ການພັດທະນາລະບົບໂຄງລ່າງຮອບດ້ານ ຊຶ່ງເປັນການປະກອບສ່ວນອັນສຳຄັນໃຫ້ແກ່ການຫຼຸດຜ່ອນຄວາມທຸກຍາກໃຫ້ແກ່ປະຊາຊົນ, ເປັນການສ້າງວຽກເຮັດງານທຳໃຫ້ແກ່ຊຸມຊົນທ້ອງຖິ່ນ, ເປັນການປັບປຸງຊີວິດການເປັນຢູ່ຂອງປະຊາຊົນໃຫ້ນັບມື້ນັບດີຂຶ້ນ. ສັງລວມແລ້ວອາດເວົ້າໄດ້ວ່າການອະນຸລັກ ແລະການພັດທະນາ ແມ່ນໄດ້ຊຸກຍູ້ສົ່ງເສີມຊຶ່ງກັນ ແລະ ກັນ ເພາະເມື່ອພວກເຮົາຫາກມີຄວາມເຂົ້າໃຈເລິກຊຶ່ງໃນການພັດທະນາຢ່າງມີການວາງແຜນການຮອບຄອບ ໂດຍຄຳນຶງລ່ວງໜ້າເຖິງທ່າແຮງຂອງມໍຣະດົກທີ່ບັນພະບູລຸດໄດ້ປູພື້ນຖານໄວ້ໃຫ້ແລ້ວນັ້ນ ກໍຍ່ອມເຮັດໃຫ້ເກີດພະລັງແຮງຕໍ່ຍອດ ຊຸກຍູ້ຊຶ່ງກັນ ແລະ ກັນ, ກາຍເປັນຊັບພະຍາກອນການທ່ອງທ່ຽວທີ່ບໍ່ບົກແຫ້ງ, ຍືນຍົງ ແລະ ເປັນແມ່ແຮງທາງດ້ານເສດຖະກິດແບບສີຂຽວຂອງຊາດ. ທັງໝົດທັງມວນນັ້ນກໍແມ່ນ ເພື່ອຍົກໃຫ້ທົ່ວສັງຄົມເຫັນໄດ້ຄຸນຄ່າອັນແທ້ຈິງຂອງມໍຣະດົກ ແລະ ຜົນໄດ້ຈາກການນຳໃຊ້ຄຸນຄ່າຂອງມໍຣະດົກດັ່ງກ່າວໃນການປະກອບສ່ວນແກ້ໄຂບັນຫາຊີວິດການເປັນຢູ່ຂອງປະຊາຊົນໃຫ້ນັບມື້ນັບດີຂຶ້ນ, ຊຶ່ງມັນກໍແມ່ນເປົ້າໝາຍຂອງນະໂຍບາຍ ຂອງພັກ ແລະ ລັດຖະບານ.

ໃນຂອດການປະສານງານ ແລະ ການປະຕິບັດໜ້າທີ່ການເມືອງຂອງແຕ່ລະຂະແໜງການຈະຕ້ອງມີຄວາມປະສົມກົມກືນ ຊຶ່ງຈະພາໃຫ້ເກີດຄວາມເຂັ້ມແຂງໃນການປະຕິບັດນະໂຍບາຍແຫ່ງການອະນຸລັກ ແລະ ການພັດທະນາເພື່ອເປັນພື້ນຖານ ຄວາມຮັບຮູ້ ແລະ ເຂົ້າໃຈທີ່ເປັນເອກະພາບກັນຂອງຂະແໜງການ ໂດຍ ການມີສ່ວນຮ່ວມຂອງ ປະຊາຊົນ ໃນການວາງແຜນ, ປະຕິບັດເງື່ອນໄຂ, ລະບຽບຫຼັກການ, ພັນທະ ແລະ ໜ້າທີ່ ໃນການເຂົ້າຮ່ວມເປັນພາຄີຂອງລັດເຮົາຕໍ່ສົນທິສັນຍາສາກົນ ໃນເມື່ອເຮົາໄດ້ຮັບເຂົ້າເປັນມໍຣະດົກໂລກ ກໍຄືໄດ້ກາຍເປັນພາຄີຂອງສົນທິສັນຍາສາກົນຕ່າງໆ. ການປັບປຸງ, ປົວແປງກົນໄກຂອດການປະສານງານຂອງແຕ່ລະຂະແໜງການ ແມ່ນເປັນເປົ້າໝາຍເຮັດໃຫ້ມີຄວາມຄ່ອງຕົວ, ລວມສູນ ແລະ ແທດເໝາະຫຼາຍຂຶ້ນເພື່ອເຮັດໃຫ້ການຊີ້ນໍາ, ນໍາພາ ແລະ ເສີມຂະຫຍາຍທ່າແຮງທາງດ້ານຊັບພະຍາກອນວັດທະນະທໍາຂອງຊາດ ໃຫ້ມີຄວາມຍືນຍົງ.

ໃນຕອນທ້າຍ ທ່ານ ບຸນຈັນ ສີວົງພັນ ເຈົ້າແຂວງຊຽງຂວາງ ໄດ້ຂຶ້ນກ່າວຮັບເຊິ່ງທ່ານ ໄດ້ມີຄວາມເຫັນບາງຕອນສຳຄັນວ່າ: ທົ່ງໄຫຫີນ ເປັນເອກະລັກທີ່ເປັນມິ່ງຂວັນຊາວເມືອງພວນ ທີ່ຍືນຍົງຄົງຢູ່ຄູ່ແຜ່ນດິນຊຽງຂວາງນັບເປັນເວລາພັນໆປີມາແລ້ວ. ຕະຫຼອດໄລຍະເວລາ 20 ກວ່າປີ ທີ່ລັດຖະບານ ແຫ່ງ ສປປລາວ ແລະ ອົງການອຸຍແນັດສະໂກ ໄດ້ຮ່ວມມືກັນໃນການດຳເນີນການສຶກສາ, ຄົ້ນຄວ້າ ແລະ ວາງແຜນ ໃນການປົກປັກຮັກສາມໍລະດົກວັດທະນະທຳອັນລ້ຳຄ່າດັ່ງກ່າວ ຈົນມາເຖິງວັນທີ 10 ກໍລະກົດ 2019 ໄຫຫີນແຂວງຊຽງຂວາງ ໄດ້ຖືກຮັບຮອງໃຫ້ເປັນມໍລະດົກໂລກແຫ່ງທີ 3 ຂອງ ສປປ ລາວ ຢ່າງເປັນທາງການ. ເຊິ່ງໄດ້ເປັນກຽດສັກສີອັນສູງສົ່ງຂອງຊາດລາວ ຢູ່ໃນເວທີສາກົນ ແລະ ພາກພື້ນ, ໄດ້ເຮັດໃຫ້ຊື່ສຽງຂອງປະເທດລາວໂດ່ງດັງໄປທົ່ວໂລກ ເຮັດໃຫ້ຊາວໂລກສົນໃຈຢາກມາທ່ອງທ່ຽວ ສປປລາວ ເພີ່ມຂຶ້ນ. ນາມມະຍົດມໍລະດົກໂລກ ມີຄຸນຄ່າຍອດຍິ່ງ ແລະ ເປັນແຮງດຶງດູດການລົງທຶນ, ການຮ່ວມມືຈາກສາກົນ ເຊິ່ງໄດ້ເປັນການປະກອບສ່ວນອັນໃຫຍ່ຫຼວງ ເຂົ້າໃນສ້າງວຽກເຮັດງານທຳ ທັງເປັນການປັບປຸງຊີວິດການເປັນຢູ່ຂອງປະຊາຊົນບັນດາເຜົ່າ ເຮັດໃຫ້ຫຼຸດພົ້ນຈາກຄວາມທຸກຍາກເທື່ອລະກ້າວ.

ຫຼັງຈາກນັ້ນ ທ່ານ ກິແກ້ວ ໄຂຄຳພິທູນ ຮອງນາຍົກລັດຖະມົນຕີ ພ້ອມດ້ວຍ ການນຳແຂວງ, ບັນດາແຂກ ໄດ້ຂຶ້ນເປັນສັກຂີພິຍານລັ່ນຄ້ອງເກົ້າບາດ, ເພື່ອເປັນມົງຄຸນ ແລະຢັ້ງຢືນການຮັບໃບຢັ້ງຢືນຢ່າງເປັນທາງການ.

ແຫຼ່ງຂ່າວ: Lao National Radio

ການລັກຊັບ ຍັງເປັນບັນຫາທີ່ພົ້ນເດັ່ນ

By
ໂທລະໂຄ່ງ THOLAKHONG
-
0

ປັດຈຸບັນ, ການລັກຊັບພົນລະເມືອງໃນນະຄອນຫຼວງວຽງຈັນ (ນວ) ຍັງເປັນບັນຫາທີ່ພົ້ນເດັ່ນ ແລະ ເກີດຂຶ້ນໃນແຕ່ລະວັນຈໍານວນຫຼາຍຄັ້ງ ເປັນຕົ້ນແມ່ນບັນຫາການລັກລົດຈັກ ເຊິ່ງກຸ່ມຄົນບໍ່ດີດັ່ງກ່າວໄດ້ກໍ່ເຫດເຄື່ອນໄຫວກະທໍາຜິດແບບຕ່ອງໂສ້, ເປັນກຸ່ມແກ້ງ ຫຼື ບຸກຄົນ ພາໃຫ້ສັງຄົມບໍ່ມີຄວາມສະຫງົບ-ປອດໄພ ແລະ ສ້າງຄວາມເສຍຫາຍຫຼາຍສົມຄວນ.

ພັອ ອຸບົນ ຈຸນລະມະນີ ຮອງຫົວໜ້າກອງບັນຊາການ ປກສ ນະຄອນຫຼວງວຽງຈັນ ຫົວໜ້າຫ້ອງຕໍາຫຼວດ ໃຫ້ສາພາດໃນວັນທີ 23 ພະຈິກ 2022 ວ່າ: ປັດຈຸບັນສະພາບປະກົດການຫຍໍ້ທໍ້ທີ່ເກີດຂື້ນຢູ່ນະຄອນຫຼວງວຽງຈັນ ຍັງເປັນບັນຫາທີ່ພົ້ນເດັ່ນ ໂດຍສະເພາະການປຸ້ນຊັບ-ຊີງຊັບ, ງັດແງະ-ລັກຊັບ ພົ້ນເດັ່ນແມ່ນການລັກລົດຈັກເກີດຂຶ້ນເປັນລາຍວັນ ເຫັນວ່າມີລັກສະນະເພີ່ມຂຶ້ນ ຫຼື ຫຼຸດລົງໃນບາງຄັ້ງຄາວ ຍ້ອນກຸ່ມຄົນບໍ່ດີຈຳນວນໜຶ່ງຍັງສືບຕໍ່ເຄື່ອນໄຫວສ້າງຄວາມບໍ່ສະຫງົບ, ຄວາມບໍ່ເປັນລະບຽບຮຽບຮ້ອຍ ດ້ວຍຫຼາຍຮູບແບບຫຼາຍວິທີການ, ຫຼາຍເລ້ລ່ຽມເລີກແລບແນບນຽນ ແລະ ມີການເຄື່ອນໄຫວກໍ່ການກະທຳຜິດເປັນຕ່ອງໂສ້, ເປັນກຸ່ມແກ້ງ ຫຼື ເປັນລາຍບຸກຄົນ ໃນນີ້້, ບາງກຸ່ມຍັງໄດ້ນໍາໃຊ້ພາຫານະເຄື່ອງມືອຸປະກອນ-ອາວຸດປະເພດລົດຈັກບໍ່ຕິດປ້າຍທະບຽນ ຫຼືປ້າຍປອມຂີ່ຊ້ອນກັນ ແລ້ວຊອກຫາເຍື່ອເມື່ອພວກເຂົາມີໂອກາດ, ຊ່ອງຫວ່າງກໍ່ລົງມືກໍ່ເຫດປຸ້ນຊັບ-ຊີງຊັບຂອງບຸກຄົນ ນັບທັງຄົນລາວ ຫຼື ຄົນຕ່າງປະເທດ ແລະ ລັກເອົາລົດຈັກຂອງພົນລະເມືອງທີ່ຈອດໄວ້ສະຖານທີ່ຕ່າງໆ ຫຼື ໃຊ້ອາວຸດນາບຂູ່ໃຊ້ຄວາມຮຸນແຮງເພື່ອຍາດຊີງເອົາຊັບ ແລະ ຈຳນວນໜຶ່ງກໍນຳໃຊ້ເຄື່ອງມືອຸປະກອນເຂົ້າງັດເເງະລັກຊັບຕາມບໍລິສັດ, ສໍານັກງານອົງການ ແລະ ເຮືອນປະຊາຊົນ ເມື່ອສຳເລັດແລ້ວກໍເອົາໂຕຫຼົບໜີໄປລີ້ຊ່ອນຢູ່ຕ່າງເມືອງ, ຕ່າງແຂວງເພື່ອຫຼີກລ້ຽງການຈັບກຸມຂອງເຈົ້າໜ້າທີ່.

ຕໍ່ກັບສະພາບການດັ່ງກ່າວ, ເຈົ້າໜ້າທີ່ຫ້ອງຕຳຫຼວດ ປກສ ນະຄອນຫຼວງວຽງຈັນ ໄດ້ສຸມໃສ່ແກ້ໄຂຕາມຄຳສັ່ງວ່າດ້ວຍການເພີ່ມທະວີວຽກງານສະກັດກັ້ນ ແລະ ແກ້ໄຂສະພາບປະກົດການຫຍໍ້ທໍ້ໃນສັງຄົມ ໂດຍສົມທົບກັບກອງບັນຊາການ ປກສ 9 ເມືອງ, ປກສ ກຸ່ມ ແລະ ພະນັກງານກໍ່ສ້າງຮາກຖານ ເພື່ອສ້າງແຜນມ້າງ ແລະ ແກ້ໄຂສະພາບປະກົດການຫຍໍ້ທໍ້ ໂດຍອອກເຄື່ອນໄຫວກວດກາລາດຕາເວນຕາມຈຸດຫຼໍ່ແຫຼມ, ເສັ້ນທາງສ່ຽງ ນອກນັ້ນ, ຍັງໄດ້ຂຶ້ນບັນຊີເປົ້າໝາຍ, ໄລ່ຊອກໄລ່ຈັບ ພ້ອມທັງກວດກາຄົນພັກເຊົາ, ຄົນເຂົ້າ-ອອກຕາມສະຖານທີ່ອື່ນໆເພື່ອຮັບປະກັນ ແລະ ຫຼຸດຜ່ອນບັນດາປະກົດການຫຍໍ້ທໍ້ທີ່ເກີດຂຶ້ນໃຫ້ນັບມື້ຫຼຸດໜ້ອຍຖອຍລົງຕາມລໍາດັບ.

ຂ່າວ: ລັດດາວັນ

ການລັກຊັບ ຍັງເປັນບັນຫາທີ່ພົ້ນເດັ່ນ

————————

ປັດຈຸບັນ, ການລັກຊັບພົນລະເມືອງໃນນະຄອນຫຼວງວຽງຈັນ (ນວ) ຍັງເປັນບັນຫາທີ່ພົ້ນເດັ່ນ ແລະ ເກີດຂຶ້ນໃນແຕ່ລະວັນຈໍານວນຫຼາຍຄັ້ງ ເປັນຕົ້ນແມ່ນບັນຫາການລັກລົດຈັກ ເຊິ່ງກຸ່ມຄົນບໍ່ດີດັ່ງກ່າວໄດ້ກໍ່ເຫດເຄື່ອນໄຫວກະທໍາຜິດແບບຕ່ອງໂສ້, ເປັນກຸ່ມແກ້ງ ຫຼື ບຸກຄົນ ພາໃຫ້ສັງຄົມບໍ່ມີຄວາມສະຫງົບ-ປອດໄພ ແລະ ສ້າງຄວາມເສຍຫາຍຫຼາຍສົມຄວນ.

ພັອ ອຸບົນ ຈຸນລະມະນີ ຮອງຫົວໜ້າກອງບັນຊາການ ປກສ ນະຄອນຫຼວງວຽງຈັນ ຫົວໜ້າຫ້ອງຕໍາຫຼວດ ໃຫ້ສາພາດໃນວັນທີ 23 ພະຈິກ 2022 ວ່າ: ປັດຈຸບັນສະພາບປະກົດການຫຍໍ້ທໍ້ທີ່ເກີດຂື້ນຢູ່ນະຄອນຫຼວງວຽງຈັນ ຍັງເປັນບັນຫາທີ່ພົ້ນເດັ່ນ ໂດຍສະເພາະການປຸ້ນຊັບ-ຊີງຊັບ, ງັດແງະ-ລັກຊັບ ພົ້ນເດັ່ນແມ່ນການລັກລົດຈັກເກີດຂຶ້ນເປັນລາຍວັນ ເຫັນວ່າມີລັກສະນະເພີ່ມຂຶ້ນ ຫຼື ຫຼຸດລົງໃນບາງຄັ້ງຄາວ ຍ້ອນກຸ່ມຄົນບໍ່ດີຈຳນວນໜຶ່ງຍັງສືບຕໍ່ເຄື່ອນໄຫວສ້າງຄວາມບໍ່ສະຫງົບ, ຄວາມບໍ່ເປັນລະບຽບຮຽບຮ້ອຍ ດ້ວຍຫຼາຍຮູບແບບຫຼາຍວິທີການ, ຫຼາຍເລ້ລ່ຽມເລີກແລບແນບນຽນ ແລະ ມີການເຄື່ອນໄຫວກໍ່ການກະທຳຜິດເປັນຕ່ອງໂສ້, ເປັນກຸ່ມແກ້ງ ຫຼື ເປັນລາຍບຸກຄົນ ໃນນີ້້, ບາງກຸ່ມຍັງໄດ້ນໍາໃຊ້ພາຫານະເຄື່ອງມືອຸປະກອນ-ອາວຸດປະເພດລົດຈັກບໍ່ຕິດປ້າຍທະບຽນ ຫຼືປ້າຍປອມຂີ່ຊ້ອນກັນ ແລ້ວຊອກຫາເຍື່ອເມື່ອພວກເຂົາມີໂອກາດ, ຊ່ອງຫວ່າງກໍ່ລົງມືກໍ່ເຫດປຸ້ນຊັບ-ຊີງຊັບຂອງບຸກຄົນ ນັບທັງຄົນລາວ ຫຼື ຄົນຕ່າງປະເທດ ແລະ ລັກເອົາລົດຈັກຂອງພົນລະເມືອງທີ່ຈອດໄວ້ສະຖານທີ່ຕ່າງໆ ຫຼື ໃຊ້ອາວຸດນາບຂູ່ໃຊ້ຄວາມຮຸນແຮງເພື່ອຍາດຊີງເອົາຊັບ ແລະ ຈຳນວນໜຶ່ງກໍນຳໃຊ້ເຄື່ອງມືອຸປະກອນເຂົ້າງັດເເງະລັກຊັບຕາມບໍລິສັດ, ສໍານັກງານອົງການ ແລະ ເຮືອນປະຊາຊົນ ເມື່ອສຳເລັດແລ້ວກໍເອົາໂຕຫຼົບໜີໄປລີ້ຊ່ອນຢູ່ຕ່າງເມືອງ, ຕ່າງແຂວງເພື່ອຫຼີກລ້ຽງການຈັບກຸມຂອງເຈົ້າໜ້າທີ່.

ຕໍ່ກັບສະພາບການດັ່ງກ່າວ, ເຈົ້າໜ້າທີ່ຫ້ອງຕຳຫຼວດ ປກສ ນະຄອນຫຼວງວຽງຈັນ ໄດ້ສຸມໃສ່ແກ້ໄຂຕາມຄຳສັ່ງວ່າດ້ວຍການເພີ່ມທະວີວຽກງານສະກັດກັ້ນ ແລະ ແກ້ໄຂສະພາບປະກົດການຫຍໍ້ທໍ້ໃນສັງຄົມ ໂດຍສົມທົບກັບກອງບັນຊາການ ປກສ 9 ເມືອງ, ປກສ ກຸ່ມ ແລະ ພະນັກງານກໍ່ສ້າງຮາກຖານ ເພື່ອສ້າງແຜນມ້າງ ແລະ ແກ້ໄຂສະພາບປະກົດການຫຍໍ້ທໍ້ ໂດຍອອກເຄື່ອນໄຫວກວດກາລາດຕາເວນຕາມຈຸດຫຼໍ່ແຫຼມ, ເສັ້ນທາງສ່ຽງ ນອກນັ້ນ, ຍັງໄດ້ຂຶ້ນບັນຊີເປົ້າໝາຍ, ໄລ່ຊອກໄລ່ຈັບ ພ້ອມທັງກວດກາຄົນພັກເຊົາ, ຄົນເຂົ້າ-ອອກຕາມສະຖານທີ່ອື່ນໆເພື່ອຮັບປະກັນ ແລະ ຫຼຸດຜ່ອນບັນດາປະກົດການຫຍໍ້ທໍ້ທີ່ເກີດຂຶ້ນໃຫ້ນັບມື້ຫຼຸດໜ້ອຍຖອຍລົງຕາມລໍາດັບ.

ແຫຼ່ງຂໍ້ມູນ:

ຕ້ອນຮັບການເຂົ້າອວຍພອນ ຂອງທູຕານຸທູດ ໃນໂອກາດວັນຊາດແຫ່ງ ສປປ ລາວ

By
ໂທລະໂຄ່ງ THOLAKHONG
-
0

ການນຳຂັ້ນສູງຂອງລາວ ຕ້ອນຮັບການເຂົ້າອວຍພອນ ຂອງທູຕານຸທູດ ໃນໂອກາດວັນຊາດແຫ່ງ ສປປ ລາວ

ໃນ​ຕອນ​ເຊົ້າ​​ວັນ​ທີ 28 ພະຈິກ 2022 ທີ່ ທຳນຽບປະທານ​ປະ​ເທດ, ການ​ນຳຂັ້ນສູງພັກ-ລັດ ແຫ່ງ ສປປ ລາວ ນຳໂດຍ ທ່ານ ທອງລຸນ ສີສຸລິດ ປະທານປະເທດ ພ້ອມດ້ວຍພັນລະຍາ, ທ່ານ ພັນຄຳ ວິພາວັນ ນາຍົກລັດຖະມົນຕີ ພ້ອມດ້ວຍພັນລະຍາ, ທ່ານ​ ໄຊສົມພອນ ພົມວິຫານ ປະທານ​ສະພາ​ແຫ່ງ​ຊາດ, ທ່ານ ສະເຫຼີມໄຊ ກົມມະສິດ ຮອງນາຍົກລັດຖະມົນຕີ ລັດຖະມົນຕີກະຊວງການຕ່າງປະເທດ ພ້ອມດ້ວຍພັນລະຍາ, ທ່ານ ນາງ ເຂັມມະນີ ພົນເສນາ ຫົວໜ້າຫ້ອງວ່າການປະທານປະເທດ ແລະ ທ່ານ ທອງສະຫວັນ ພົມວິຫານ ຫົວໜ້າຄະນະພົວພັນຕ່າງປະເທດສູນກາງພັກ ໄດ້ເປັນກຽດຕ້ອນຮັບການເຂົ້າຢ້ຽມຂໍ່ານັບອວຍພອນຂອງທູຕານຸທູດ ແລະ ບັນດາຜູ້ຕາງໜ້າອົງການຈັດຕັ້ງສາກົນ ປະຈຳລາວ ຊຶ່ງ ນຳໂດຍ ທ່ານ ຫງວຽນ ບ໋າ ຮຸ່ງ ເອກອັກຄະລັດຖະທູດ ແຫ່ງ ສາທາລະນະລັດ ສັງຄົມນິຍົມ ຫວຽດນາມ ປະຈຳ ສປປ ລາວ (ເຮັດໜ້າທີ່ແທນທູດອາວູໂສ) ເນື່ອງໃນໂອກາດວັນສະຖາປະນາ ສປປ ລາວ ຄົບຮອບ 47 ປີ (2/12/1975 ​- 2/12/2022) ແລະ ປີໃໝ່ສາກົນ ປີ 2023 ທີ່ໃກ້ຈະມາເຖິງນີ້.

ໃນໂອກາດດັ່ງກ່າວ, ທ່ານ ຫງວຽນ ບ໋າ ຮຸ່ງ ໄດ້ຕາງໜ້າຄະນະທູຕານຸທູດ ແລະ ບັນດາຜູ້ຕາງໜ້າອົງການຈັດຕັ້ງສາກົນ ປະຈຳ ສປປ ລາວ ຂຶ້ນກ່າວສະແດງຄວາມຊົມເຊີຍຕໍ່ຜົນສຳເລັດ​ອັນໃຫຍ່ຫຼວງຂອງ ພັກ, ລັດຖະບານ ແລະ ປະຊາຊົນລາວບັນດາເຜົ່າ ທີ່ສາມາດຍາດໄດ້ຕະຫຼອດ​ໄລຍະ 47 ປີຜ່ານມາ​ ​ໃນ​ພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ, ສະແດງຄວາມຊົມເຊີຍຕໍ່ ພັກ-ລັດຖະບານລາວ ທີ່ມີຜົນສຳເລັດໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ໃນແຕ່ລະໄລຍະ ຊຶ່ງໄດ້ຊີ້ໃຫ້ເຫັນວ່າ ສປປ ລາວ ສາມາດ​ບັນລຸຜົນສຳ​ເລັດອັນໂດດ​ເດັ່ນໃນ​ຫຼາຍ​ດ້ານ ເປັນຕົ້ນການ​ຮັກສາ​ຈັງຫວະ​ການ​ຂະຫຍາຍຕົວທາງດ້ານ​ເສດຖະກິດ​ຢ່າງ​ຕໍ່​ເນື່ອງ, ມີສະຖຽນລະພາບທາງການເມືອງ ຄວາມໝັ້ນຄົງ, ສັງຄົມ ມີ​ຄວາມ​ເປັນ​ລະບຽບ​ຮຽບຮ້ອຍ, ອັນໄດ້​ຮັບປະກັນ​ໃຫ້​ປະຊາຊົນ​ລາວ ​ທຸກຊົນ​ເຜົ່າ​ສາມາດ​ມີ​ສິດ​ອັນ​ຊອບ​ທຳ ​ແລະ ​ເສລີພາບ ​ໃນ​ການ​ເຂົ້າ​ຮ່ວມພັດທະນາ​ປະ​ເທດ​ຊາດ ​ໄດ້​ຢ່າງ​ຫ້າວຫັນ. ອັນພົ້ນເດັ່ນ ໃນປີ 2021, ສປປ ລາວ ໄດ້ສຳເລັດການເປີດນຳໃຊ້ໂຄງການລົດໄຟຄວາມໄວສູງ ລາວ-ຈີນ, ຈີນ-ລາວ ຢ່າງເປັນທາງການ ຊຶ່ງຖືເປັນເຫດການປະຫວັດສາດສຳຄັນຂອງ ສປປ ລາວ ໃນໄລຍະໃໝ່, ຈະປະກອບສ່ວນອັນສຳຄັນເຂົ້າໃນການພັດທະນາເສດຖະກິດ-ສັງຄົມ ຂອງ ສປປ ລາວ ໃນຕໍ່ໜ້າ. ​ ປີ 2024 ກໍຖືເປັນປີທີ່ມີຄວາມໝາຍສໍາຄັນສໍາລັບ ສປປ ລາວ ໃນການເປັນປະທານໝູນວຽນອາຊຽນ ຊຶ່ງບັນດາປະເທດເພື່ອນມິດ ສະແດງຄວາມຍິນດີຈະໃຫ້ການສະໜັບສະໜູນ ແລະ ຊ່ວຍເຫຼືອ ສປປ ລາວ ເພື່ອຈັດຕັ້ງປະຕິບັດໃຫ້ສຳເລັດຕາມຈຸດປະສົງເປົ້າໝາຍ.

ໃນໂອກາດນີ້, ທ່ານ ທອງລຸນ ສີສຸລິດ ປະທານປະເທດແຫ່ງ ສປປ ລາວ ໄດ້ກ່າວສະແດງຄວາມຂອບໃຈຕໍ່ ທ່ານ ຫງວຽນ ບ໋າ ຮຸ່ງ ທີ່ໄດ້ຕາງໜ້າຄະນະທູຕານຸທູດ ແລະ ບັນດາຜູ້ຕາງໜ້າອົງການຈັດຕັ້ງສາກົນ ປະຈຳ ສປປ ລາວ ມີຄຳເຫັນ ແລະ ຄຳອວຍພອນອັນຈົບງາມ. ປະທານປະເທດຍັງໄດ້ມີຄຳເຫັນວ່າຕະຫຼອດໄລຍະ 47 ປີ ແຫ່ງການປົກປັກຮັກສາ ແລະ ພັດທະນາປະເທດຊາດ, ສປປ ລາວ ໄດ້ຜ່ານຜ່າອຸປະສັກ ແລະ ຄວາມຫຍຸ້ງຍາກນາໆປະການ ສາມາດຍາດໄດ້ຜົນສຳເລັດເປັນກ້າວໆມາໃນຫຼາຍດ້ານ, ປະເທດຊາດ ສືບຕໍ່ມີສະຖຽນລະພາບທາງດ້ານການເມືອງຢ່າງໜັກແໜ້ນ, ສັງຄົມມີຄວາມສະຫງົບປອດ ໄພ, ເປັນລະບຽບຮຽບຮ້ອຍ, ເສດຖະກິດໄດ້ຮັບການຂະຫຍາຍຕົວເປັນກ້າວໆ, ຊີວິດການເປັນຢູ່ຂອງປະຊາຊົນ ໄດ້ຮັບການປັບປຸງນັບມື້ດີຂຶ້ນ ຊຶ່ງທັງໝົດນີ້ ເປັນການສ້າງເງື່ອນໄຂທີ່ດີຫຼາຍດ້ານທີ່ຈະເຮັດໃຫ້ ສປປ ລາວ ຫຼຸດພົ້ນອອກຈາກສະຖານະພາບປະເທດດ້ອຍພັດທະນາ ໃນປີ 2026 ນີ້.

ໝາກຜົນທັງໝົດນັ້ນ ຈະບໍ່ສາມາດເກີດຂຶ້ນໄດ້ ຖ້າຫາກປາສະຈາກການສະໜັບສະໜູນຊ່ວຍເຫຼືອຈາກບັນດາປະເທດເພື່ອນມິດຂອງ ສປປ ລາວ ກໍຄື ວົງຄະນາຍາດສາກົນ. ພັກ-ລັດຖະບານ ແລະ ປະຊາຊົນລາວ ຕີລາຄາສູງຕໍ່ການຮ່ວມມື ແລະ ການຊ່ວຍເຫຼືອຂອງບັນດາປະເທດເພື່ອນມິດ ກໍຄື ບັນດາອົງການຈັດຕັ້ງສາກົນ ຕະຫຼອດໄລຍະທີ່ຜ່ານມາບົນພື້ນຖານຄວາມເຂົ້າໃຈຊຶ່ງກັນ ແລະ ກັນ ກໍຄື ຕ່າງຝ່າຍຕ່າງມີຜົນປະໂຫຍດນຳກັນ.

ລັດຖະບານ ສປປ ລາວ ສືບຕໍ່ຢຶດໝັ້ນນະໂຍບາຍການຕ່າງປະເທດ ສັນຕິພາບ, ເອກະລາດ, ມິດຕະພາບ ແລະ ການຮ່ວມມື ຢ່າງສະເໝີຕົ້ນສະເໝີປາຍ ອັນເປັນພື້ນຖານຂອງການເສີມຂະຫຍາຍການພົວພັນຮ່ວມມືທີ່ດີກັບຕ່າງປະເທດ ກໍຄືການປະກອບສ່ວນປະຕິບັດພັນທະຂອງຕົນໃນເວທີພາກພື້ນ ແລະ ສາກົນ, ເຂົ້າຮ່ວມຢ່າງຫ້າວຫັນໃນຂະບວນການສົ່ງເສີມ ແລະ ປົກປັກຮັກສາສັນຕິພາບ, ຄວາມໝັ້ນຄົງຂອງສາກົນ ແລະ ການຮ່ວມມືເພື່ອການພັດທະນາໃນສະພາບທີ່ທົ່ວໂລກ ກຳລັງປະເຊີນໜ້າກັບສິ່ງທ້າທາຍຫຼາຍຢ່າງ, ທັງບັນຫາໄພພິບັດທາງທຳມະຊາດ, ການແຜ່ລະບາດຂອງເຊື້ອພະຍາດໂຄວິດ-19 ຕະຫຼອດຮອດ ຄວາມຂັດແຍ່ງທາງພູມສາດການເມືອງ ກໍຄື ວິກິດການດ້ານເສດຖະກິດ ແລະ ພະລັງງານ. ການຮ່ວມມືສາກົນທີ່ເປັນປຶກແຜ່ນ, ຄວາມເຊື່ອໝັ້ນ ແລະ ເຂົ້າໃຈຊຶ່ງກັນ ແລະ ກັນ ກາຍເປັນສິ່ງທີ່ຂາດບໍ່ໄດ້ ຊຶ່ງມັນສາມາດຊ່ວຍໃຫ້ແກ້ໄຂບັນຫານໍາກັນດ້ວຍສັນຕິວິທີ, ສ້າງເງື່ອນໄຂໃຫ້ພວກເຮົາ ສາມາດຜ່ານຜ່າອຸປະສັກ ແລະ ສິ່ງທ້າທາຍນາໆປະການ ທີ່ໂລກກຳລັງປະເຊີນໜ້າຢູ່ໃນປັດຈຸບັນນີ້, ສປປ ລາວ ພ້ອມທີ່ຈະສືບຕໍ່ປະກອບສ່ວນຢ່າງຕັ້ງໜ້າເຂົ້າໃນການສົ່ງເສີມສັນຕິພາບ ແລະ ການຮ່ວມມືໃນພາກພື້ນ ແລະ ສາກົນ.

ໃນຕອນທ້າຍ, ທ່ານປະທານປະເທດ ກໍໄດ້ຕາງໜ້າໃຫ້ ພັກ, ລັດຖະບານ ແລະ ປະຊາຊົນລາວ ບັນດາເຜົ່າ ສະແດງຄວາມຮູ້ບຸນຄຸນຢ່າງເລິກເຊິ່ງ ແລະ ຂອບໃຈຢ່າງຈິງໃຈ ມາຍັງທູຕານຸທູດ ແລະ ຜູ້ຕາງໜ້າອົງການຈັດຕັ້ງສາກົນ ແລະ ຜ່ານບັນດາທ່ານ ໄປຍັງປະມຸກລັດ ຫົວໜ້າລັດຖະບານ ຂອງບັນດາປະເທດ ແລະ ອົງການຈັດຕັ້ງສາກົນຕ່າງໆ ທີ່ໄດ້ໃຫ້ການສະໜັບສະໜູນ ແລະ ຊ່ວຍເຫຼືອອັນລ້ຳຄ່າແກ່ ສປປ ລາວ ຕະຫຼອດໄລຍະທີ່ຜ່ານມາ, ໂດຍສະເພາະແມ່ນການຊ່ວຍເຫຼືອຢ່າງທັນການເພື່ອຮັບມືກັບພະຍາດໂຄວິດ-19 ໃນໄລຍະເວລາທີ່ມີການແຜ່ລະບາດຢູ່ ສປປ ລາວ, ທັງໝົດນີ້ ໄດ້ສະແດງໃຫ້ເຫັນເຖິງນໍ້າໃຈໄມຕີຈິດມິດຕະພາບ ແລະ ການພົວພັນຮ່ວມມືອັນດີນຳກັນ ລະຫວ່າງ ສປປ ລາວ ກັບ ທຸກປະເທດເພື່ອນມິດໃນໂລກ, ພັກ-ລັດຖະບານລາວ ຈະສືບຕໍ່ຮ່ວມມືກັບວົງຄະນາຍາດສາກົນໃນການສະກັດກັ້ນ ແລະ ແກ້ໄຂຜົນກະທົບຂອງພະຍາດໂຄວິດ-19 ນີ້ຕໍ່ໄປ.

ແຫຼ່ງຂ່າວ: ປະຊາຊົນ

ແຂວງຊຽງຂວາງປິດການຮຽນການສອນ ຊົ່ວຄາວ

By
ໂທລະໂຄ່ງ THOLAKHONG
-
0

ຕາມການລາຍງານຂອງໜັງສືພິມວຽງຈັນທາຍ ໃຫ້ຮູ້ວ່າ: ອໍານາດການປົກຄອງແຂວງຊຽງຂວາງ ຈະປິດການຮຽນການສອນ ຊົ່ວຄາວ ເຊິ່ງມີໂຮງຮຽນ 19 ແຫ່ງ ໃນທົ່ວແຂວງ ທັງພາກລັດ ແລະ ເອກະຊົນ ເລີ່ມແຕ່ວັນທີ 13-25 ທັນວາ 2022,

ສະເພາະໂຮງຮຽນຢູ່ ພາຍໃນເທດສະບານເມືອງແປກ (ກຸ່ມ 1, 2, 3) ໂດຍ ໃຫ້ພັກຮຽນ ເລີ່ມແຕ່ວັນທີ 1-25 ທັນວາ 2022 ເພື່ອໃຊ້ເປັນທີ່ພັກຄູຝຶກ, ນັກກິລາ ຈາກພາກສ່ວນຕ່າງໆ ໃນງານມະຫະກໍາກິລາແຫ່ງຊາດຄັ້ງ ທີ 11 ຫຼື ຊຽງຂວາງ ເກມ ລະຫວ່າງວັນທີ 13-22 ທັນວາ 2022 ນີ້.

ຊຽງຂວາງ ເກມ ກໍານົດສະຫນາມຮັບໃຊ້ການແຂ່ງຂັນກິລາ 5 ຈຸດ ປະກອບມີ ສະຫນາມທົ່ງໄຫຫີນ (ເປັນສະຫນາມເປີດ-ປິດ ການແຂ່ງຂັນ), ສະຫນາມໄຊຊະນະ (ບ້ານໂພນມີໄຊ), ສະຫນາມວິທະຍາໄລຄູ ຄັງໄຂ, ສະຫນາມຮົ່ມສວນມອນ (ບ້ານໂງຍ) ແລະ ສະຫນາມຍິງປືນ ໂຮງຮຽນນາຍສິບ ປກສ ແຂວງ.

ສ່ວນການແຂ່ງຂັນກິລາ “ຊຽງຂວາງ ເກມ” ໃນຄັ້ງນີ້ ແມ່ນມີການຊີງໄຊກັນທັງຫມົດ 25 ປະເພດກິລາ ມີ 22 ພາກສ່ວນ ໃນນັ້ນ ມີ 17 ແຂວງ, 1 ນະຄອນຫຼວງວຽງຈັນ ແລະ 4 ກະຊວງ ຄື ກະຊວງ ປ້ອງກັນປະເທດ, ກະຊວງປ້ອງກັນຄວາມສະຫງົບ, ກະຊວງສາທາລະນະສຸກ ແລະ ກະຊວງພະລັງງານ ແລະ ບໍ່ແຮ່.

ໂຄງການເສີມສ້າງຄວາມຫມັ້ນຄົງຂອງມະນຸດຂັ້ນຮາກຖານ (GGP)

By
ໂທລະໂຄ່ງ THOLAKHONG
-
0

ນະຄອນຫຼວງວຽງຈັນ, ວັນທີ 18 ພະຈິກ 2022 ລັດຖະບານຍີ່ປຸ່ນໄດ້ໃຫ້ການຊ່ວຍເຫຼືອເປັນມູນຄ່າປະມານ 90,000 ໂດລາສະຫະລັດເພື່ອຈັດຕັ້ງປະຕິບັດໂຄງການກໍ່ສ້າງໂຮງຮຽນມັດທະຍົມຕອນຕົ້ນເມືອງວັນ ແຂວງຫົວພັນ ພາຍໃຕ້ໂຄງການເສີມສ້າງຄວາມຫມັ້ນຄົງຂອງມະນຸດຂັ້ນຮາກຖານ (GGP).

ພິທີເຊັນສັນຍາໂຄງການ ດັ່ງກ່າວໄດ້ຖືກຈັດຂຶ້ນໃນວັນທີ 18 ພະຈິກ 2022 ລະຫວ່າງ ພະນະທ່ານ ໂຄບະຢະຊິ ເຄັນອິຈິ, ເອກອັກ ຄະຣາຊະທູດຍີ່ປຸ່ນ ປະຈໍາ ສປປ ລາວ, ແລະ ພະນະທ່ານ ວັນໄຊ ແພງຊຸມມາ, ເຈົ້າແຂວງໆຫົວພັນ ພ້ອມ ດ້ວຍບັນດາຜູ້ກ່ຽວຂ້ອງຈາກແຂວງທີ່ໄດ້ຮັບໂຄງການ.

ໂຄງການດັ່ງກ່າວແມ່ນ ການສະຫນັບສະຫນູນທຶນຮອນເພື່ອກໍ່ສ້າງອາຄານຮຽນ ແລະ ຫ້ອງນໍ້າໃຫມ່, ພ້ອມທັງສະຫນອງອຸປະກອນເຄື່ອງໃຊ້ໃຫ້ແກ່ໂຮງຮຽນມັດທະຍົມຕອນຕົ້ນເມືອງນັ້ນ ໃນ ແຂວງຫົວພັນ ເພື່ອ ປະກອບສ່ວນເຂົ້າໃນການປັບປຸງສະພາບແວດລ້ອມການສຶກສາ ແລະ ສະພາບສຸຂະອານະໄມຂອງໂຮງຮຽນ

ດັ່ງກ່າວ.

ໂຄງການເສີມສ້າງຄວາມຫມັ້ນຄົງຂອງມະນຸດຂັ້ນຮາກຖານ (GGP) ແມ່ນ ການສະຫນອງທຶນທີ່ຈໍາເປັນ ໃຫ້ແກ່ໂຄງການຂະຫນາດນ້ອຍທີ່ໃຫ້ຜົນປະໂຫຍດໂດຍກົງແກ່ປະຊາຊົນຜູ້ອາໄສ ແລະ ມີຈຸດປະສົງເພື່ອການ ພັດທະນາເສດຖະກິດ-ສັງຄົມຂອງປະເທດລາວ ໂດຍອີງຕາມຄວາມຕ້ອງການພື້ນຖານຂອງມະນຸດເປັນຫຼັກ. ລັດ

ຖະບານຍີ່ປຸ່ນຈະສືບຕໍ່ໃຫ້ການຊ່ວຍເຫຼືອລັດຖະບານລາວປັບປຸງພື້ນຖານຊີວິດການເປັນຢູ່ຂັ້ນຮາກຖານຕໍ່ໄປເພື່ອ ຮັບປະກັນ “ບໍ່ໃຫ້ມີໃຜຖືກຖິ້ມໄວ້ທາງຫຼັງ”.

ໂຄງການສ້ອມແປງປັບປຸງທາງ 13 ໄຕ້ ສັນຍາ 1

By
ໂທລະໂຄ່ງ THOLAKHONG
-
0

ຕາມການໃຫ້ສຳພາດຂອງທ່ານ ກ້ອນນວນດຳ ຈັນທະມີນາວົງ ຮອງຫົວໜ້າໂຄງການປັບປຸງ ແລະ ສ້ອມແປງທາງເລກທີ 13 ໃຕ້ ຊ່ວງແຂວງບໍລິຄຳໄຊ ( ກມ 71 – ກມ 190 ) ໄດ້ໃຫ້ສຳພາດ ຜ່ານສື່ມວນຊົນຂອງແຂວງບໍລິຄຳໄຊ ໃນວັນທີ 22 ພະຈິກ 2022 ວ່າ:

ໂຄງການປັບປຸງ ແລະ ສ້ອມແປງທາງ 13 ໃຕ້, ຊ່ວງ ແຂວງ ບໍລິຄຳໄຊ, ສັນຍາ 1 ຈາກ ກມ 71 ຫາ ກມ 111 ແລະ ສັນຍາ 2 ຈາກ ກມ 111 ຫາ ກມ 190 ແມ່ນສ່ວນໜຶ່ງຂອງໂຄງການປັບປຸງ ແລະ ສ້ອມແປງທາງ 13 ໃຕ້ ຈາກນະຄອນຫຼວງວຽງຈັນ ຫາ ແຂວງຄຳມ່ວນ, ຈາກ ກມ 71 ຫາ 346 ຊຶ່ງໄດ້ແປງເປັນ 4 ຊ່ວງສັນຍາ ແລະ ໄດ້ຮັບການ ສະໜັບສະໜູນເງິນກູ້ດອກເບ້ຍຕ່ຳ (ດອກເບັ້ຍແບບຜ່ອນຜັນ) ຈາກທະນາຄານໂລກ (WB), ທະນາຄານ ການລົງທຶນຂອງເອີຣົບ (EIB), ທະນາຄານການລົງທຶນເພື່ອພັດະນາໂຄງລ່າງພື້ນຖານຂອງອາຊີ (AIIB) ແລະ ງົບປະມານຈາກກອງທຶນທາງຂອງລາວ ສຳລັບໂຄງການປັບປຸງ ແລະ ສ້ອມແປງທາງ 13 ໃຕ້.

ຊ່ວງ ແຂວງບໍລິຄຳໄຊ (ກມ 71 ຫາ ກມ 190) ໄດ້ ແບ່ງອອກເປັນ 2 ສັນຍາ ຄື: ສັນຍາ 1 ຈາກ ກມ 71 ຫາ ກມ 111 ຍາວ 40 ກິໂລແມັດ ແມ່ນຖືກຮັບເໝົາກໍ່ສ້າງໂດຍບໍລິສັດ ທັງລ່ອງ ( Than Long ) ສສ ຫວຽດນາມ ຮ່ວມກັບ ບໍລິສັດ ສຸພາພອນ ( Souphaphone ) ສປປ ລາວ ມູນຄ່າສັນຍາທັງໝົດ 17.531.013 ໂດລາສະຫະລັດ ໃນໄລຍະເວລາການປະຕິບັດ 120 ເດືອນ ຫຼື 10 ປີ, ໃນນີ້ ໄລຍະປັບປຸງເສັ້ນທາງແມ່ນ 2 ປີ ແຕ່ວັນທີ 1 ເມສາ 2021 – 31 ມີນາ 2023 ແລະ ໄລຍະສ້ອມແປງພາຍຫຼັງສຳເລັດການປັບປຸງ ແມ່ນ 8 ປີ ມາຮອດປະຈຸບັນແມ່ນມີຄວາມຄືບໜ້າແລ້ວ 28,96%.

ສັນຍາ 2 ຈາກ ກມ 111 ຫາ ກມ 190 ຍາວ 79 ກິໂລແມັດ ແມ່ນຖືກຮັບເໝົາກໍ່ສ້າງໂດຍບໍລິສັດ ຈຸງນາມ ( Trung Nam ) ສສ ຫວຽດນາມ ຮ່ວມກັບ ບໍລິສັດ ສຸພາພອນ ສປປ ລາວ ມູນຄ່າຂອງໂຄງການແມ່ນ 28.129.999 ໂດລາສະຫະລັດ ໃນໄລຍະເວລາການປະຕິບັດ 120 ເດືອນ ຫຼື 10 ປີ, ໃນນີ້ ໄລຍະປັບປຸງເສັ້ນທາງແມ່ນ 3 ປີ ແຕ່ວັນທີ 1 ສິງຫາ 2021 – 31 ກໍລະກົດ 2024 ແລະ ໄລຍະສ້ອມແປງພາຍຫຼັງສຳເລັດການປັບປຸງ ແມ່ນ 7 ປີ ມາຮອດປະຈຸບັນແມ່ນມີຄວາມຄືບໜ້າແລ້ວ 12,67%.

ຕອນທ້າຍ ທ່ານຮອງຫົວໜ້າໂຄງການ ຍັງໄດ້ຮຽກຮ້ອງມາຍັງຜູ້ນຳໃຊ້ລົດ ຕາມຖະໜົນຫົນທາງ ຈົ່ງມີສະຕິໃນການເດີນທາງໄປ-ມາ ເພາະຢູ່ໃນໄລຍະການປັບປຸງເສັ້ນທາງ ເພື່ອລີກລ່ຽງໃນການເກີດອຸບັດເຫດ.

Cr. bolikhamxay.gov.la

ກອງປະຊຸມທະວິພາຄີປະຈໍາປີ 2022

By
ໂທລະໂຄ່ງ THOLAKHONG
-
0

ໃນລະຫວ່າງວັນທີ 20-23 ພະຈິກ 2022 ຄະນະຜູ້ແທນຂອງ ທະນາຄານແຫ່ງ ສປປ ລາວ ນໍາໂດຍ ທ່ານ ບຸນເຫຼືອ ສິນໄຊວໍຣະວົງ ຜູ້ວ່າການ ທະນາຄານແຫ່ງ ສປປ ລາວ ໄດ້ເດີນທາງໄປຢ້ຽມຢາມ ຣາຊະອານາຈັກ ກຳປູເຈຍ ຊຶ່ງໃນຕອນເຊົ້າ, ວັນທີ 21 ພະຈິກ 2022 ທີ່ ນະຄອນພະນົມ, ຣາຊະອານາຈັກ ກຳປູເຈຍ ໄດ້ມີກອງປະຊຸມທະວິພາຄີປະຈໍາປີ 2022 ລະຫວ່າງ ທະນາຄານແຫ່ງ ສປປ ລາວ (ທຫລ) ແລະ ທະນາຄານແຫ່ງຊາດ ກຳປູເຈຍ ຊຶ່ງຝ່າຍ ທຫລ ຕາງໜ້າໂດຍ ທ່ານ ບຸນເຫຼືອ ສິນໄຊວໍຣະວົງຜູ້ວ່າການ ທະນາຄານແຫ່ງ ສປປ ລາວ ແລະ ຝ່າຍ ທະນາຄານແຫ່ງຊາດ ກຳປູເຈຍ ຕາງໜ້າໂດຍ ທ່ານ ເຈຍ ຈັນໂຕ ຜູ້ວ່າການ ທະນາຄານແຫ່ງຊາດ ກຳປູເຈຍ ພ້ອມດ້ວຍຄະນະກົມຕາງໜ້າຈາກສອງທະນາຄານກາງ ແລະ ທ່ານເລຂານຸການເອກ, ສະຖານເອກອັກຄະລັດຖະທູດ ປະຈໍາ ສປປ ລາວ ຣາຊະອານາຈັກ ກຳປູເຈຍ ກໍ່ໄດ້ໃຫ້ກຽດເຂົ້າຮ່ວມ.

ກອງປະຊຸມດັ່ງກ່າວແມ່ນ ເພື່ອເປັນການສະຫຼຸບໝາກຜົນການຮ່ວມມືຂອງຂະແໜງການເງິນ-ເງິນຕາ ໃນໄລຍະ 01 ປີຜ່ານມາ ແລະ ແລກປ່ຽນທັດສະນະໃນການວາງທິດທາງການຮ່ວມມືໃນຕໍ່ໜ້າ ໂດຍໄດ້ມີການປຶກສາຫາລື ແລະ ແລກປ່ຽນບົດຮຽນຮ່ວມກັນໃນຫຼາຍບັນຫາສໍາຄັນຕົ້ນຕໍຄື: ສະພາບເສດຖະກິດມະຫາພາກ, ການດຳເນີນນະໂຍບາຍເງິນຕາ, ວຽກງານຄຸ້ມຄອງທະນາຄານທຸລະກິດລັດ, ການຮ່ວມມືທາງດ້ານວິຊາການ ແລະ ບັນຫາອື່ນໆ ທີ່ສອງຝ່າຍໃຫ້ຄວາມສົນໃຈຮ່ວມກັນ. ນອກນັ້ນ, ໃນຕອນທ້າຍຂອງກອງປະຊຸມຍັງໄດ້ເປີດໂອກາດໃຫ້ ຕາງໜ້ານັກທຸລະກິດຂອງສອງປະເທດ ລາວ-ກຳປູເຈຍ ລາຍງານການດຳເນີນທຸລະກິດ ແລະ ແລກປ່ຽນຂໍ້ຄິດເຫັນນໍາ ການນໍາທະນາຄານກາງຂອງສອງປະເທດ.

ໃນກອງປະຊຸມທະວິພາຄີປະຈໍາປີ 2022 ຄັ້ງນີ້, ທະນາຄານແຫ່ງ ສປປ ລາວ ແລະ ທະນາຄານແຫ່ງຊາດ ກຳປູເຈຍ ກໍ່ໄດ້ມີການລົງນາມໃນບົດບັນທຶກຄວາມເຂົ້າໃຈ ວ່າດ້ວຍການຮ່ວມມືດ້ານນະວັດຕະກຳທາງການເງິນ ແລະ ລະບົບການຊໍຳລະ ລະຫວ່າງ ທະນາຄານແຫ່ງ ສປປ ລາວ ແລະ ທະນາຄານແຫ່ງຊາດ ກຳປູເຈຍ.

ກອງປະຊຸມໃນຄັ້ງນີ້ ໄດ້ດຳເນີນໄປດ້ວຍບັນຍາກາດໄມຕີຈິດມິດຕະພາບ, ຄວາມສາມັກຄີ ແລະ ການຮ່ວມມືທີ່ດີ ລະຫວ່າງ ທະນາຄານແຫ່ງ ສປປ ລາວ ແລະ ທະນາຄານແຫ່ງຊາດ ກໍາປູເຈຍ ແລະ ສາມາດບັນລຸຜົນສຳເລັດຕາມລະດັບຄາດ ໝາຍ. ຜົນສຳເລັດຂອງກອງປະຊຸມຄັ້ງນີ້ ຖືເປັນຂີດໝາຍອັນສໍາຄັນໃນການເສີມຂະຫຍາຍສາຍພົວພັນຮ່ວມມືຂອງສອງປະເທດ ເວົ້າລວມ, ເວົ້າສະເພາະກໍ່ຄື ສອງທະນາຄານກາງໃຫ້ນັບມື້ນັບເພີ່ມທະວີຄວາມສະໜິດແໜ້ນ, ຄວາມສາມັກມິດຕະພາບ ແລະ ການຮ່ວມມືທີ່ເລິກຊຶ່ງຫຼາຍຂຶ້ນກວ່າເກົ່າ.

ນອກນີ້, ທະນາຄານແຫ່ງຊາດ ກໍາປູເຈຍ ຍັງໄດ້ມີວາລະພິເສດ ເພື່ອແລກປ່ຽນບົດຮຽນ ແລະ ປະສົບການກ່ຽວກັບການຄຸ້ມຄອງເງິນຕາຕ່າງປະເທດ (Sharing FX management experience) ໃຫ້ແກ່ ຜູ້ແທນ ທະນາຄານແຫ່ງ ສປປ ລາວ ຊຶ່ງເປັນບົດຮຽນອັນລໍ້າໃຫ້ແກ່ ທະນາຄານແຫ່ງ ສປປ ລາວ ນໍາໄປຈັດຕັ້ງຜັນຂະຫຍາຍເຂົ້າໃນວຽກງານຂອງຂະແໜງການທະນາຄານ.

ແຫຼ່ງຂ່າວ: ທະນາຄານແຫ່ງ ສປປ ລາວ – Bank of the Lao PDR

ກອງປະຊຸມລັດຖະບານ ສະໄໝສາມັນ ປະຈຳເດືອນພະຈິກ 2022

By
ໂທລະໂຄ່ງ THOLAKHONG
-
0

ກອງປະຊຸມລັດຖະບານ ສະໄໝສາມັນ ປະຈຳເດືອນພະຈິກ 2022 ໄດ້ໄຂຂຶ້ນຢ່າງເປັນທາງການ ໃນຕອນເຊົ້າຂອງວັນທີ 21 ພະຈິກ 2022 ທີ່ສໍານັກງານນາຍົກລັດຖະມົນຕີ, ພາຍໃຕ້ການເປັນປະທານຂອງທ່ານ ພັນຄໍາ ວິພາວັນ, ນາຍົກລັດຖະມົນຕີ, ມີບັນດາທ່ານ ຮອງນາຍົກລັດຖະມົນຕີ, ສະມາຊິກລັດຖະບານ ແລະ ຜູ້ຕາງໜ້າຈາກບັນດາກະຊວງເຂົ້າຮ່ວມ.

ປະ

ກອງປະຊຸມລັດຖະບານ ສະໄໝສາມັນປະຈຳເດືອນພະຈິກ 2022 ຈະໄດ້ດຳເນີນເປັນເວລາ 1 ວັນເຄິ່ງ ເຊິ່ງເນື້ອໃນຂອງກອງປະຊຸມ ຈະໄດ້ປຶກສາຫາລື, ຄົ້ນຄວ້າ ແລະ ເປັນເອກະພາບກັນ ຕໍ່ຫົວຂໍ້ ທີ່ສໍາຄັນ ແລະ ຈໍາເປັນ ຕາມ 6 ວາລະ ຄື:

ວາລະທີ 1: ສະຫຼຸບການເຄື່ອນໄຫວວຽກງານພົ້ນເດັ່ນ ປະຈໍາເດືອນພະຈິກ ແລະ ທິດທາງແຜນການ ປະຈໍາເດືອນທັນວາ 2022 ຂອງລັດຖະບານ ເຊັ່ນ: ວຽກງານຂົງເຂດເສດຖະກິດ, ປ້ອງກັນຊາດ-ປ້ອງກັນຄວາມສະຫງົບ, ການຕ່າງປະເທດ ລວມທັງ ສະຫຼຸບຕີລາຄາໂດຍຫຍໍ້ ວຽກງານປ້ອງກັນ, ຄວບຄຸມ ແລະ ແກ້ໄຂ ການແຜ່ລະບາດ ຂອງພະຍາດໂຄວິດ-19 ໃນໄລຍະ 6 ເດືອນຜ່ານມາ (ນັບແຕ່ມື້ເປີດປະເທດເປັນຕົ້ນມາ).

ວາລະທີ 2: ລາຍງານກ່ຽວກັບຮ່າງດຳລັດ ວ່າດ້ວຍການກຳນົດຂະໜາດຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ຂະໜາດກາງ (ສະບັບປັບປຸງ); ແລະ ລາຍງານກ່ຽວກັບຮ່າງດຳລັດ ວ່າດ້ວຍກອງທຶນສົ່ງເສີມວິສາຫະກິດຂະ ໜາດນ້ອຍ ແລະ ຂະໜາດກາງ (ສະບັບປັບປຸງ);

ວາລະທີ 3: ລາຍງານກ່ຽວກັບຮ່າງດຳລັດ ວ່າດ້ວຍການແຕ່ງກາຍ;

ວາລະທີ 4: ລາຍງານກ່ຽວກັບຮ່າງດຳລັດ ວ່າດ້ວຍເລກປະຈຳຕົວຜູ້ເສຍອາກອນ;

ວາລະທີ 5: ລາຍງານກ່ຽວກັບຮ່າງຍຸດທະສາດວຽກງານຄຸ້ມຄອງລັດຖະກອນ ແຫ່ງ ສປປ ລາວ ຮອດປີ 2030;

ວາລະທີ 6: ຜ່ານບົດລາຍງານແຫ່ງຊາດ ປະຈຳໄລຍະທີ 10 ໃນການຈັດຕັ້ງປະຕິບັດສົນທິສັນຍາ ວ່າດ້ວຍການລຶບລ້າງທຸກຮູບແບບ ການຈຳແນກຕໍ່ແມ່ຍິງ (ຊີດໍ) ຢູ່ ສປປ ລາວ.

ກອງປະຊຸມລັດຖະບານ ຄັ້ງນີ້ ດໍາເນີນໃນທ່າມກາງບັນຍາກາດ ທີ່ສະພາບການສາກົນ ແລະ ພາກພື້ນ ຍັງສືບຕໍ່ຜັນແປໄປຢ່າງສັບສົນ. ສະເພາະ ຢູ່ ສປປ ລາວ ທຽບໃສ່ໄລຍະຕົ້ນປີ ເຖິງສະພາບຈະມີທ່ວງທ່າທີ່ດີຂຶ້ນ ແລະ ລັດຖະບານ ຍັງສາມາດຮັກສາສະຖຽນລະພາບໄດ້ ແຕ່ກໍ່ຍັງປະເຊີນໜ້າກັບສິ່ງທ້າທາຍຫຼາຍສົມຄວນ. ດັ່ງນັ້ນ, ສິ່ງທີ່ສໍາຄັນ, ຈໍາເປັນ ແລະ ຮີບດ່ວນທີ່ສຸດໃນໄລຍະນີ້ ລັດຖະບານ ຈະໄດ້ສືບຕໍ່ສຸມກໍາລັງແຮງ ຂອງທຸກພາກສ່ວນໃນສັງຄົມ ເພື່ອປະຕິບັດແຜນດຳເນີນງານຂອງລັດຖະບານ, ແຜນພັດທະນາເສດຖະກິດ-ສັງຄົມແຫ່ງຊາດ, ໂດຍສະເພາະ ເລັ່ງຈັດຕັ້ງປະຕິບັດ 2 ວາລະແຫ່ງຊາດ ໃຫ້ເປັນຮູບປະທໍາ ແລະ ມີໝາກຜົນຕົວຈິງຫຼາຍຂຶ້ນ.

ໃນໂອກາດກ່າວເປີດກອງປະຊຸມ, ທ່ານ ປະທານກອງປະຊຸມ ໄດ້ຮຽກຮ້ອງບັນດາ ສະມາຊິກລັດຖະບານ, ຜູ້ເຂົ້າຮ່ວມກອງປະຊຸມ ຈົ່ງພ້ອມກັນເອົາໃຈໃສ່ຄົ້ນຄວ້າ ແລະ ປະກອບຄຳເຫັນ ຢ່າງເລິກເຊິ່ງ ດ້ວຍການສະເໜີທັດສະນະ ຢ່າງກົງໄປກົງມາ, ມີຈຸດສຸມ ແລະ ມີທາງອອກທີ່ຈະແຈ້ງ ເພື່ອເຮັດໃຫ້ກອງປະຊຸມຄັ້ງນີ້ ມີປະສິດທິຜົນສູງ ແລະ ສຳເລັດຕາມຄາດໝາຍ ທີ່ໄດ້ກຳນົດໄວ້.

ແຫຼ່ງຂໍ້ມູນ: Lao National Radio

ກຽມສ້າງຕັ້ງໂຮງງານຜະລິດໂຊດາໄຟ

By
ໂທລະໂຄ່ງ THOLAKHONG
-
0

ລັດຖະບານ ເຫັນດີໃຫ້ບໍລິສັດ ລາວ-ຈິນດາອຸດສະຫະກໍາ ເຊົ່າທີ່ດິນຂອງລັດ ສ້າງຕັ້ງໂຮງງານຜະລິດໂຊດາໄຟ

ໃນວັນທີ 18 ພະຈິກ 2022 ຜ່ານມານີ້, ກະຊວງການເງິນ, ໄດ້ຕາງໜ້າລັດຖະບານ ລົງນາມໃນສັນຍາ ເຫັນດີໃຫ້ ບໍລິສັດລາວ-ຈິນດາອຸດສະຫະກໍາ ຈໍາກັດຜູ້ດຽວ, ເຊົ່າທີ່ດິນຂອງລັດຈໍານວນ 52 ເຮັກຕາກວ່າ ເພື່ອດໍາເນີນໂຄງການສ້າງໂຮງງານຜະລິດປຸງແຕ່ງໂຊດາໄຟ ຢູ່ບ້ານດົງໃຕ້ ເມືອງທ່າແຂກ ແຂວງຄໍາມ່ວນກັບ ຊຶ່ງລົງນາມໂດຍ ທ່ານ ພຸດທະສິນ ເຮືອງທະວົງ ຫົວໜ້າກົມຄຸ້ມຄອງຊັບສິນແຫ່ງລັດ ກະຊວງການເງິນ ແລະ ທ່ານ Meng Ling Sheng ຜູ້ອໍານວຍການບໍລິສັດ ລາວ-ຈິນດາອຸດສະຫະກໍາ ຈໍາກັດຜູ້ດຽວ, ມີຄະນະກົມຄຸ້ມຄອງຊັບສິນ ແຫ່ງລັດ, ຫົວໜ້າພະແນກ, ຮອງຫົວໜ້າພະແນກ, ຕາງໜ້າຈາກກົມອ້ອມຂ້າງກະຊວງການເງິນ ແລະ ບໍລິສັດ ລາວ-ຈິນດາອຸດສະຫະກໍາຈໍາກັດຜູ້ດຽວ ເຂົ້າຮ່ວມ.

ໂຄງການສ້າງໂຮງງານຜະລິດປຸງແຕ່ງໂຊດາໄຟ ໃນເນື້ອທີ່ດັ່ງກ່າວ ມີກໍານົດອາຍຸສັນຍາເຊົ່າທີ່ດິນຂອງລັດ 30 ປີ, ເລີ່ມແຕ່ປີ 2022-2052, ສໍາລັບອັດຕາຄ່າເຊົ່າແມ່ນປະຕິບັດຕາມລັດຖະບັນຍັດ ຂອງປະທານປະເທດ ວ່າດ້ວຍ ອັດຕາຄ່າເຊົ່າ ແລະ ຄ່າສໍາປະທານທີ່ດິນຂອງລັດ ສະບັບເລກທີ 02/ປປທ, ລົງວັນທີ 18 ພະຈິກ 2009 ມາດຕາ 6, ເພື່ອກິດຈະການອຸດສາຫະກໍາຂໍ້ທີ 15 ໃນອັດຕາ 800 ໂດລາສະຫະລັດ/ເຮັກຕາ/ປີ, ຊຶ່ງເລີ່ມເກັບຄ່າເຊົ່ານັບແຕ່ປີ 2022 ເປັນຕົ້ນໄປ ແລະ ທຸກໆ 5 ປີໃດໃຫ້ເພີ່ມຂຶ້ນ 5% ຂອງອັດຕາເຊົ່າທີ່ດິນຂອງລັດ. ນອກນັ້ນ, ບໍລິສັດຍັງເຫັນ ດີມອບເງິນບ້ວງເງິນຕິດຕາມສັນຍາເຊົ່າ-ສໍາປະທານທີ່ດິນຂອງລັດ ຈໍານວນ 1.000 ໂດລາສະຫະລັດ/ປີ ຕື່ມອີກ.

ແຫຼ່ງຂ່າວ: ຂປລ

1...111213...261Page 12 of 261