119 ຄົນ ທີ່ເຂົ້າມາອາໄສຢູ່ເມືອງແອດແບບບໍ່ຖືກຕ້ອງໄດ້ຮັບໃບຢັ້ງຢືນເປັນພົນລະເມືອງລາວ ສັນຊາດລາວ

ຕອນເຊົ້າ ວັນທີ 4 ພຶດສະພາ 2023 ນີ້, ຢູ່ທີ່ສະໂມສອນ ປກສ ເມືອງແອດໄດ້ຈັດພິທີຮັບຮອງເອົາຜູ່ຍົກຍ້າຍມາຕັ້ງພູມລຳເນົາຕາມລຳພັງໃຈ ແລະ ສ້າງຄອບຄົວບໍ່ຖືກລະບຽບຕາມບ້ານບໍລິເວນຊາຍແດນລາວ-ຫວຽດນາມ ເຂົ້າເປັນພົນລະເມືອງລາວ, ໃຫ້ກຽດເຂົ້າຮ່ວມມອບໃບຢັ້ງຢືນໂດຍ ທ່ານ ອະນຸສິນ ຂັດຕິຍະລາດ ຫົວໜ້າຫ້ອງການຄະນະກຳມະການຊາຍແດນແຫ່ງຊາດ ກະຊວງການຕ່າງປະເທດ ແລະ ເປັນປະທານຮ່ວມໂດຍທ່ານ ທອງສຸກ ສົມພາວັນ ກຳມະການພັກແຂວງ ເລຂາພັກເມືອງ ເຈົ້າເມືອງໆແອດ, ມີພະແນກການຕ່າງປະເທດ, ພາກສ່ວນທີ່ກ່ຽວຂ້ອງຂັ້ນເມືອງ-ຂັ້ນແຂວງ-ຂັ້ນກະຊວງ, ມີຄະນະພັກ-ນາຍບ້ານໆທີ່ມີບຸກຄົນເຂົ້າມາອາໄສແບບບໍ່ຖືກຕ້ອງຕາມລະບຽບ ພ້ອມດ້ວຍຜູ້ທີ່ຖືກຮັບຮອງເຂົ້າເປັນພົນລະເມືອງລາວໃນຄັ້ງນີ້ເຂົ້າຮ່ວມ.

ໃນວາລະດຳເນີນພິທີ ຄະນະຮັບຜິດຊອບໄດ້ຜ່ານເອກະສານທີ່ກ່ຽວຂ້ອງ ເຊິ່ງໃຫ້ຮູ້ວ່າ: ລັດຖະບານລາວໄດ້ອະນຸມັດໃຫ້ກະຊວງພາຍໃນ ອອກເອກະສານຈົດທະບຽນ ແລະ ອອກໃບຢັ້ງຢືນໃຫ້ສັນຊາດລາວ ແກ່ປະຊາຊົນຫວຽດນາມທີ່ມາຕັ້ງພູມລຳເນົາຕາມລຳພັງໃຈ ແລະ ສ້າງຄອບຄົວບໍ່ຖືກລະບຽບການໃນໄລຍະຜ່ານມາ ຢູ່ບໍລິເວນບ້ານທີ່ຕິດຈອດກັບຊາຍແດນລາວ-ຫວຽດນາມ ຢູ່ໃນ 7 ເມືອງທົ່ວແຂວງຫົວພັນ ເຊິ່ງມີ 720 ຄົນ, ຍິງ 617 ຄົນ, ໃນນີ້ມີ 119 ຄົນ, ຍິງ 96 ຄົນ ທີ່ອາໄສຢູ່ໃນ 33 ບ້ານຂອງເມືອງແອດ, ສະນັ້ນ ຄະນະຮັບຜິດຊອບຈິ່ງໄດ້ຈັດພິທີຮັບຮອງເອົາ ເປັນພົນລະເມືອງລາວ ສັນຊາດລາວ ຖືກຕ້ອງຕາມລະບຽບກົດໝາຍຂອງ ສ ປ ປ ລາວ.

ແຫຼ່ງຂ່າວຈາກ: ຫ້ອງການ ຖວທ ເມືອງແອດ

ໂດຍປະຕິບັດຕາມມະຕິຕົກລົງຂອງຄະນະປະຈຳພັກແຂວງສະຫວັນນະເຂດ ສະໄໝສາມັນ ຄັ້ງທີ 4 ປະຈຳເດືອນມີນາ 2023 ກ່ຽວກັບການຄຸ້ມຄອງການດຳເນີນທຸລະກິດເກັບຊື້-ຂາຍເຫຼັກ ເສດ-ເສດໂລຫະໃຫ້ເຂົ້າສູ່ລະ ບຽບກົດໝາຍ, ເພື່ອເປັນການສະກັດກັ້ນປະກົດ ການຫຍໍ້ທໍ້ ຂີ້ລັກງັດແງະວັດຖຸສິ່ງ ຂອງຂອງລັດ, ບຸກຄົນ ແລະນິຕິບຸກຄົນ ເປັນຕົ້ນ: ເຫຼັກເສດ, ເສດໂລຫະຕ່າງໆທີ່ມີການຊື້-ຂາຍ ແບບຊະຊາຍ.

ມາໃນວັນທີ 2 ພຶດສະພາ 2023 ທ່ານ ໄຊຍະເດດ ຜຸຍຍະວົງ ຮອງຫົວໜ້າພະແນກ ອຸດສາຫະກຳ-ການຄ້າແຂວງສະ ຫວັນນະເຂດ ພ້ອມດ້ວຍວິຊາການຈາກພະແນກການທີ່ກ່ຽວຂ້ອງ ແລະເຈົ້າໜ້າທີ່ ປກສ ແຂວງ ກໍໄດ້ລົງເຄື່ອນໄຫວສົມທົບກັບອຳນາດການປົກຄອງບ້ານ, ໃນການລົງເຮັດບົດບັນທຶກກັບຮ້ານ ທີ່ດຳເນີນທຸລະກິດເກັບຊື້ເຫຼັກເສດ-ເສດໂລຫະໃນເທສະບານ ນະຄອນໄກສອນພົມວິຫານ, ເຊິ່ງ ມີຈຳນວນ 46 ຮ້ານ, ໃນນັ້ນ ຫຼາຍກວ່າໝູ່ແມ່ນເຂດບ້ານສະໜາມໄຊ ມີທັງໝົດ 15 ຮ້ານ. ທາງວິຊາການພະແນກການຄ້າແຂວງ, ສົມທົບກັບພະແນກໂຍທາທິການ ແລະຂົນສົ່ງແຂວງ, ພະແນກແຮງງານ ແລະສະຫວັດດີການ ສັງຄົມແຂວງ, ກອງບັນຊາການ ປກສ ແຂວງ, ນະຄອນ, ກຸ່ມບ້ານ, ອຳນາດການປົກຄອງບ້ານກໍ່ໄດ້ ພ້ອມກັນລົງເຮັດບົດບັນທຶກ.

ໂດຍປະຕິບັດຕາມແຈ້ງການ ຂອງທ່ານ ຫົວໜ້າພະແນກອຸດສາຫະກຳ-ການຄ້າແຂວງສະບັບ ເລກທີ 1859/ພອຄ, ລົງວັນທີ 12 ເມສາ 2023 ເຊິ່ງມີລາຍລະອຽດດັ່ງນີ້: ໃຫ້ຢຸດໂຈະຊົ່ວຄາວການດຳເນີນທຸລະກິດການເກັບ ຊື້ເຫຼັກເສດ, ເສດໂລຫະທີ່ເຄື່ອນ ໄຫວຢູ່ບັນດາເມືອງ-ນະຄອນ ເພື່ອຈະໄດ້ມີການກວດກາດັດສົມຄືນບັນດາຮ້ານດັ່ງກ່າວມານັ້ນ ທີ່ດຳເນີນທຸລະກິດບໍ່ຖືກຕ້ອງ ແລະບໍ່ສອດຄ່ອງກັບລະບຽບກົດໝາຍເປັນຕົ້ນແມ່ນມາດຕາ 212-213 ຂອງກົດໝາຍວ່າດ້ວຍ ວິສາຫະກິດ ແລະຄຳສັ່ງເລກທີ 62/ນຍ, ລົງວັນທີ 13/11/2015, ກ່ຽວກັບການອຳນວຍຄວາມສະດວກ ໃຫ້ຄວາມຮ່ວມມືໃນການຂຶ້ນທະບຽນ ແລະການອອກບັດ ເຄື່ອນໄຫວຊົ່ວຄາວໃຫ້ຊາວຕ່າງປະເທດ; ໃນໄລຍະຢຸດໂຈະຊົ່ວຄາວແມ່ນຫ້າມເດັດຂາດບໍ່ໃຫ້ມີການເກັບຊື້-ຂາຍເຫຼັກເສດ, ເສດໂລຫະຈົນກວ່າຄະນະກຳມະ ການຂັ້ນແຂວງທຳການກວດກາ ແລະດັດສົມສຳເລັດ; ເມື່ອສຳເລັດ ຈາກການກວດກາ, ດັດສົມຂອງຄະນະກຳມະການຂັ້ນແຂວງແລ້ວ, ຖ້າເອກະສານຖືກຕ້ອງ ຄົບຖ້ວນຕາມລະບຽບກົດໝາຍ, ທາງຄະນະກຳມະການ ຈຶ່ງຈະອະນຸຍາດໃຫ້ເຄື່ອນໄຫວດຳເນີນທຸລະກິດຕໍ່ໄດ້. ທັງນີ້ກໍ ເພື່ອເປັນ ການຫັນທຸລະກິດການເກັບຊື້ເຫຼັກ ເສດ, ເສດໂລຫະໃຫ້ຫັນເຂົ້າສູ່ລະ ບຽບກົດໝາຍ ແລະຖືກວັດຖຸປະສົງຂອງການດຳເນີນທຸລະກິດໃນດ້ານນີ້.

ແຫຼ່ງຂ່າວ: ສະຫວັນພັດທະນາ ຂ່າວ / Savanhphathana News

ເມື່ອເວົ້າເຖິງສັງຄົມອອນລາຍ ຖືວ່າເປັນສິ່ງຫຼັກໆທີ່ສັງຄົມປັດຈຸບັນ ນຳໃຊ້ ແລະ ນຶກເຖິງໃນແຕ່ລະວັນ ບໍ່ວ່າຈະເປັນການແບ່ງປັນຮູບພາບ, ວີດີໂອ, ບົດຄວາມ… ເພື່ອໃຫ້ຄົນອື່ນໄດ້ຮູ້ຈັກ ແລະສະແດງຄວາມຄິດເຫັນ.

ເມື່ອບໍ່ດົນມານີ້, ຜູ້ໃຊ້ຕິກຕ໋ອກ ທີ່ໃສ່ຊື່ວ່າ Newkiim ໄດ້ເລົ່າປະສົບການເລື່ອງທີ່ຕົນເອງ ແລະ ໝູ່ມາທ່ຽວລາວຄັ້ງທຳອິດ ແລະ ໄດ້ຖືກປັບໃໝຈາກເຈົ້າໜ້າທີ່ ໂດຍມີເນື້ອໃນຂໍ້ຄວາມດັ່ງນີ້:

“ປະສົບການມາທ່ຽວ ສປປ ລາວ ກັບໝູ່ຄັ້ງທຳອິດ ຖືກຕຳຫຼວດປັບໃໝ່ 300 ບາດໄທ ເນື່ອງຈາກທ່ຽວແບບບໍ່ມີຄົນນຳທ່ຽວ (ໄກ້ນຳທ່ຽວ) ງົງ ແບບນີ້ ຖ້າທ່ຽວຈຸດອື່ນກໍຕ້ອງຈ່າຍແບບນີ້ໄປເລື່ອຍໆບໍ່?”

ເຈົ້າຂອງວີດີໂອໃຫ້ຮູ້ເພີ່ມເຕີມວ່າ: ເຈົ້າໜ້າທີ່ແຈ້ງວ່າເນື່ອງຈາກເປັນກຸ່ມໃຫຍ່ ແຕ່ບໍ່ມີຄົນນຳທ່ຽວ, ແຕ່ຄວາມຈິງແລ້ວ ຕົນເອງ ແລະໝູ່ແມ່ນມາເຮັດວຽກ ແລ້ວອອກໄປເລາະກິນເຂົ້າ ແລະໄດ້ແວ່ຖ່າຍຮູບ ເຊິ່ງລົດກໍແມ່ນເຊົ່າລົດລາວ ເປັນການຈ້າງລົດໂຮງແຮມ ເພື່ອຈະມາສົ່ງຖ່າຍຮູບທີ່ປະຕູໄຊ ເຊິ່ງມາຖ່າຍຮູບແລ້ວກໍຈະກັບ ແຕ່ເຈົ້າໜ້າທີ່ກໍເຂົ້າມາໂອລົມ.

ຫຼັງຈາກວີດີໂອຖືກແຊສອອກໄປ ກໍມີຜູ້ຄົນເຂົ້າມາສະແດງຄວາມຄິດເຫັນຈຳນວນຫຼາຍ. ບາງຄົນກໍວ່າເຮັດເກີນໄປ, ສ່ວນບາງຄົນກໍວ່າຖືກແລ້ວ ເພາະການມາທ່ຽວເປັນກຸ່ມກໍຕ້ອງມີຄົນນຳທ່ຽວ.

ສາມາດເບິ່ງວີດີໂອໄດ້ທີ່: ລີ້ງ

ຈາກຜົນການສຳຫຼວດກຳລັງແຮງງານລາວໃນປີ 2022 ດ້ານພົນລະເມືອງລາວທັງໝົດມີປະມານ 7,4 ລ້ານກວ່າຄົນ.

ໃນນັ້ນມີອາຍຸໃນເກນອອກແຮງງານ 5,3 ລ້ານຄົນ ( ອາຍຸ 15 ປີຂຶ້ນໄປ), ເປັນກຳລັງແຮງງານ 2,​7 ລ້ານຄົນ, ມີວຽກເຮັດ​ 2,4 ລ້ານຄົນ ( 35% ມີເງິນເດືອນ ແລະ ເປັນນາຍຈ້າງ 65% ເຮັດວຽກອິດສະຫຼະ, ເຮັດວຽກໃຫ້ຄອບຄົວບໍ່ມີຄ່າແຮງງານ), ວ່າງງານ 2,4% ເທົ່າກັບ 61 ​ພັນກວ່າຄົນ.

ທ່ານ ພົງໄຊສັກ ອິນຖາລາດ ຮອງລັດຖະມົນຕີກະຊວງແຮງງານ ແລະ ສະຫວັດດີການ-ສັງຄົມ ( ຮສສ ) ໄດ້ໃຫ້ສຳພາດຕໍ່ນັກຂ່າວໜັງສືພິມປະຊາຊົນເມື່ອບໍ່ດົນມານີ້ວ່າ: ກຳລັງແຮງງານລາວດ້ານຄຸນນະພາບ ຖ້າເບິ່ງດ້ານການສຶກສາ, ບໍ່ມີການສຶກສາ 12%, ບໍ່ຈົບປະຖົມ, ຕ່ຳກວ່າປະຖົມ 31,5%, ຈົບປະຖົມ 18% ແລະ ຈົບມັດທະຍົມປາຍ 7,5%, ວິຊາສະເພາະຊັ້ນຕົນ 1%, ຊັ້ນກາງ 3%, ສູງ 5,9% ແລະ ມະຫາວິທະຍາໄລ 6,9% ຍັງບໍ່ມີການສຳຫຼວດປະສິດທິພາບຂອງແຮງງານລາວຢ່າງເປັນທາງການ ແຕ່ມີບາງຂະແໜງເສດຖະກິດໄດ້ມີການສົມທຽບໃນລະດັບພາກພື້ນອາຊຽນເຫັນວ່າ ແຮງງານລາວມີຕ່ຳກວ່າຫຼາຍປະເທດໃນອາຊຽນ ແລະ ໃນຂະນະດຽວກັນແຮງງານລາວມີຄຸນນະພາບສູງໃນຂະແໜງການບໍລິການ ການເງິນ, ການທະນາຄານ, ໂທລະຄົມມະນາຄົມ ສັງເກດເຫັນວ່າມີສັດ ສ່ວນການນຳໃຊ້ແຮງງານຕ່າງປະເທດບໍ່ສູງ ເຖິງຈະເປັນຂະແໜງການທີ່ຈຳເປັນຕ້ອງໃຊ້ສີມືຂ້ອນຂ້າງສູງກໍຕາມ ຊຶ່ງ ຫົວໜ່ວຍແຮງງານທີ່ມີຄວາມໝັ້ນຄົງສູງກວ່າ, ມີການຈ່າຍຄ່າແຮງງານທີ່ສູງກວ່າ, ມີສະຫວັດດີການແຮງງານທີ່ດີ ຈະບໍ່ມີບັນຫາໃນການຂາດແຄນແຮງງານທີ່ມີສີມື.

ທ່ານ ພົງໄຊສັກ ອິນຖາລາດ ກ່າວເນັ້ນໃຫ້ຮູ້ອີກວ່າ: ສຳລັບແຜນການໃນຕໍ່ໜ້າ ກະຊວງ ຮສສ ຈະສືບຕໍ່ຈັດຕັ້ງປະຕິບັດແນວທາງຂອງພັກ, ແຜນ 8 ຂອງລັດຖະບານ ແລະ ແຜນ 4 ຂອງກະຊວງ, ສ້າງນິຕິກຳໂດຍສະເພາະກົດໝາຍວ່າດ້ວຍການພັດທະນາສີມືແຮງງານ ເພື່ອເປັນບ່ອນອີງໃຫ້ແກ່ການມີສ່ວນຮ່ວມຂອງຫຼາຍພາກສ່ວນໃນການສ້າງກຳລັງແຮງງານລາວໃຫ້ມີຄຸນນະພາບ ລວມທັງຜູ້ໃຊ້ແຮງງານ ແລະ ຜູ້ອອກແຮງງານ, ປັບປຸງເງື່ອນໄຂ ແລະ ສ້າງສະພາບແວດລ້ອມທີ່ດີຂຶ້ນໃນບາງຫົວໜ່ວຍແຮງງານ, ໂຄງການລົງທຶນຕ່າງໆ ເພື່ອຮັບປະກັນຜົນປະໂຫຍດດ້ານຄ່າແຮງງານ ແລະ ສະຫວັດດີການແຮງງານໃຫ້ຜູ້ອອກແຮງງານ ເພື່ອສ້າງແຮງຈູງໃຈໃຫ້ກຳລັງແຮງງານຮຽນສາຍວິຊາຊີບ ແລະ ພັດທະນາຕົນເອງໃຫ້ຫຼາຍຂຶ້ນ ລວມງທັງການຍົກສູງຜະລິດຕະພາ່ບຂອງແຮງງານໃຫ້ສູງຂຶ້ນ, ເກັບກຳຄວາມຕ້ອງການໃນການຢາກຝຶກສີມືແຮງງານ ເພື່ອປະກອບອາຊີບອິດສະຫຼະ ຕາມໂຄງການເງິນກູ້ຈາກທະນາຄານໂລກ 2023-2026, ຂົນຂວາຍແຫຼ່ງທຶນຈາກພາກທຸລະກິດ, ຈາກຕ່າງປະເທດ ເພື່ອລົງທຶນສ້າງພື້ນຖານໂຄງລ່າງ ແລະ ຍົກລະດັບດ້ານວິຊາການໃນການພັດທະນາ ຫຼື ສ້າງກຳລັງແຮງງານລາວໃຫ້ມີຄຸນນະພາບ.

ກະຊວງ ຮສສ ຍາມໃດກໍມີຄວາມເປັນຫ່ວງ ເປັນໃຍຕໍ່ກຳລັງແຮງງານໃຫ້ໄດ້ຮັບການປົກປ້ອງຄຸ້ມຄອງ ສິດຜົນປະໂຫຍດຢ່າງຊອບທຳຈາກຜູ້ໃຊ້ແຮງງານ ໂດຍໄດ້ກຳນົດນິຕິກຳ ປັບປຸງນິຕິກຳໃຫ້ສອດຄ່ອງກັບສະພາບເງື່ອນໄຂຕົວຈິງໃນແຕ່ລະໄລຍະ ແນໃສ່ເຮັດໃຫ້ຊາວຜູ້ອອກແຮງງານໄດ້ຮັບການປົກປ້ອງສິດຜົນປະໂຫຍດຢ່າງຊອບທຳຖຶກຕ້ອງສອດຄ່ອງຕາມລະບຽບກົດໝາຍ. ເພື່ອປະກອບສ່ວນສຳຄັນເຂົ້າໃນການພັດທະນາ ສ້າງສາເສດຖະກິດ-ສັງຄົມຂອງຂອງຊາດ.

ແຫຼ່ງຂ່າວ: ປະຊາຊົນ