Home Blog Page 10

ເປີດຕະຫຼາດນັດວາງສະແດງ-ຂາຍສິນຄ້າໃນງານບຸນນະມັດສະການພະທາດພະບາດໂພນສັນ

By
ໂທລະໂຄ່ງ THOLAKHONG
-
0

ງານຕະຫຼາດນັດວາງສະແດງ ແລະ ຂາຍສິນຄ້າຕິດພັນກັບງານບຸນປະເພນີນະມັດສະການພະທາດພະບາດໂພນສັນໄດ້ຈັດຂຶ້ນໃນວັນທີ 3 ມັງກອນ ນີ້ ທີ່ເດີ່ນພະທາດພະບາດໂພນສັນ. ເປັນກຽດເຂົ້າຮ່ວມຂອງທ່ານ ກອງແກ້ວ ໄຊສົງຄາມ ເຈົ້າແຂວງບໍລິຄຳໄຊ, ມີທ່ານສົມສົດ ແສງອາພອນ ເຈົ້າເມືອງທ່າພະບາດ ແລະ ທ່ານ ໄກສອນ ຈັນສີນາ ຫົວໜ້າພະແນກອຸດສາຫະກຳ ແລະ ການຄ້າແຂວງ, ພ້ອມດ້ວຍພາກສ່ວນກ່ຽວຂ້ອງ ແລະ ປະຊາຊົນເຂົ້າຮ່ວມ.

ທ່ານ ກອນ ຫຼວງພິທັກ ຮອງເຈົ້າເມືອງທ່າພະບາດ ກ່າວວ່າ: ເພື່ອເປັນການອະນຸລັກວັດທະນະທຳ, ຮີດຄອງປະເພນີອັນດີງາມຂອງຊາດ-ຂອງແຂວງ, ເພີ່ມທະວີຄວາມເຂົ້າໃຈ, ຮັດແໜ້ນຄວາມສາມັກຄີມິດຕະພາບລະຫວ່າງປະຊາຊົນລາວບັນດາເຜົ່າ, ທັງເປັນການກະຕຸ້ນເສດຖະກິດທາງກົງ ແລະ ທາງອ້ອມໂດຍສະເພາະຫົວໜ່ວຍທຸລະກິດທີ່ປິ່ນອ້ອມໃນຂະແໜງການທ່ອງທ່ຽວສົ່ງເສີມການທ່ອງທ່ຽວທາງທຳມະຊາດ, ປະຫວັດສາດ ແລະ ວັດທະນະທຳ, ສຸມໃສ່ການພັດທະນາການທ່ອງທ່ຽວຂອງເມືອງທ່າພະບາດກໍຄືແຂວງບໍລິຄຳໄຊໃຫ້ສາມາດຮອງຮັບການເພີ່ມຂຶ້ນຂອງນັກທ່ອງທ່ຽວໃນປັດຈຸບັນ ແລະ ອະນາຄົດທີ່ຈະເຂົ້າມາທ່ຽວຊົມໃຫ້ຫຼາຍຂຶ້ນ.

ໂອກາດດັ່ງກ່າວທ່ານເຈົ້າແຂວງຍັງໄດ້ໃຫ້ກຽດຕັດແຖບຜ້າ, ລັ່ນຄ້ອງ 9 ບາດເພື່ອເປັນສິລິມຸງຄຸນໃນການເປີດພິທີຢ່າງເປັນທາງການ, ຫຼັງຈາກນັ້ນກໍໄດ້ທ່ຽວຊົມງານຕະຫຼາດນັດວາງສະແດງສິນຄ້າ “ໜຶ່ງເມືອງໜຶ່ງຜະລິດຕະພັນ (ODOP)”, ສິນຄ້າຄອບຄົວຕົວແບບ, ຜະລິດຕະພັນຂະໜາດນ້ອຍ-ກາງ, ສິນຄ້າກະສິກຳ-ຫັດຖະກຳ, ຈັກສານ, ຕ່ຳແຜ່ນແພ ແລະ ການວາງສະແດງຜະລິດຕະພັນການທ່ອງທ່ຽວ, ໃນນັ້ນມີບັນດາຮ້ານຄ້າທີ່ເຂົ້າຮ່ວມ 247 ຮ້ານ, ສິນຄ້າຫັດຖະກຳ 40 ຮ້ານ, ຮ້ານຂາຍອາຫານ-ເຄື່ອງດື່ມ, ຂາຍສິນຄ້າທົ່ວໄປ 24 ຮ້ານ,ຮ້ານຄ້າຕະຫຼາດນັດຂາຍສິນຄ້າທົ່ວໄປ 99 ຮ້ານ, ນອກຈາກນັ້ນຍັງມີຮ້ານຂາຍເຄື່ອງປະເພດຕ່າງໆອີກ 80 ຮ້ານ, ພາຍໃນງານຍັງມີການວາງສະແດງຈາກຟາມລ້ຽງສັດໃຫຍ່ (ງົວ, ຄວາຍ) ມີ 6 ຫົວໜ່ວຍ ລວມມູນຄ່າສິນຄ້າພາຍໃນງານ 3ຕື້ກວ່າກີບ, ມູນຄ່າຊື້-ຂາຍ ແລະ ການບໍລິການໃນແຕ່ລະວັນຄາດວ່າຈະສູງເຖິງ 1ຕື້ກວ່າກີບ. ສໍາລັບພິທີຕັກບາດບຸນນະມັດສະການພະບາດໂພນສັນແມ່ນຈະໄດ້ຈັດຂຶ້ນໃນວັນທີ 6 ມັງກອນທີ່ຈະມາເຖິງນີ້.

Cr. ປະຊາຊົນ

ຈັບຜູ້ກໍ່ເຫດທໍາລາຍຊັບ (ຈູດໂຮງຮຽນມັດທະຍົມ)

By
ໂທລະໂຄ່ງ THOLAKHONG
-
0

ໃນທ້າຍປີ2022ຜ່ານມານີ້,ທ່ານ ພັທ ພອນໄຊ ຮອງຫົວໜ້າພະແນກສືບສວນ-ສອບສວນ ຫ້ອງຕຳຫຼວດ ປກສ ນະຄອນ ໄກສອນ ພົມວິຫານ ໄດ້ໃຫ້ສຳພາດຕໍ່ສື່ມວນຊົນ ວ່າ: ໃນຄັ້ງວັນທີ 14 ທັນວາ 2022 ເວລາ 24 ໂມງ 30 ນາທີ ,ທາງເຈົ້າໜ້າທີ່ ປກສ ກຸ່ມ ໄດ້ລາຍງານທາງໂທລະສັບຫາເຈົ້າໜ້າທີ່ ປກສ ນະຄອນ ໄກສອນ ພົມວິຫານ ວ່າໃນເວລາປະມານ 24 ໂມງ 00 ນາທີ,ຂອງວັນດຽວກັນ ໄດ້ມີເຫດການເກີດອັກຄີໄຟໄໜ້ໂຮງຮຽນມັດທະຍົມຕອນຕົ້ນເລກ 03 ຢູ່ບ້ານ ທ່າເມືອງ ນະຄອນ ໄກສອນ ພົມວິຫານ ແຂວງສະຫວັນນະເຂດ ຈາກນັ້ນ, ເຈົ້າໜ້າທີ່ວິຊາສະເພາະ ຈິ່ງໄດ້ລົງກວດກາສະຖານທີ່ເກີດເຫດ ເຫັນວ່າມີຈິງແທ້ ຈິ່ງໄດ້ປະສານສົມທົບກັບພາກສ່ວນທີ່ກ່ຽວຂ້ອງ ເພື່ອຊັນນະສູດສະຖານທີ່ເກີດເຫດ ເຊິ່ງລວມມູນຄ່າເສຍຫາຍທັງໜົດ 786,480,000 ກີບ (ເຈັດຮ້ອຍແປດສິບຫົກລ້ານສີ່ແສນແປດສິບພັນກີບ) ຜ່ານການກວດກາຂອງເຈົ້າໜ້າທີ່ວິຊາສະເພາະ ຈິ່ງສາມາດຮູ້ໄດ້ວ່າສາເຫດທີ່ພາໃຫ້ເກີດອັກຄີໄຟແມ່ນເກີດຈາກຄົນຈູດ.ຕົກມາຮອດວັນທີ 20 ທັນວາ 2022 ໃນເວລາ 12 ໂມງ ທາງເຈົ້າທີ່ຕຳຫຼວດ ຈິ່ງສາມາດກັກຕົວຜູ້ກໍ່ເຫດໄດ້ 03 ຄົນຄື: ທ້າວ ສາຍຄຳ ຫຼື ໄກ່ ອາຍຸ 17 ປີ, ອາຊີບວ່າງງານ ບ້ານທ່າເມືອງ ນະຄອນ ໄກສອນ ພົມວິຫານ ,ທ້າວ ບີ້ ອາຍຸ 16 ປີ,ອາຊີບ ວ່າງງານ ບ້ານດົງດຳດວນ ນະຄອນ ໄກສອນ ພົມວິຫານ ແລະ ທ້າວ ຫຳນ້ອນ ຫຼື ເປີ້ນ ອາຍຸ 16 ປີ, ອາຊີບ ກຳມະກອນ ບ້ານ ໂນນສະຫວາດ ນະຄອນ ໄກສອນ ພົມວິຫານ ເພື່ອມາທຳການສອບສວນ.

ຜ່ານການສືບສວນ-ສອບສວນ ພວກກ່ຽວທັງສາມໄດ້ຍອມຮັບສະຫຼະພາບວ່າ: ໃນເວລາ 21ໂມງ ຂອງວັນທີ 13 ທັນວາ 2022 ທ້າວ ສາຍຄຳ ຫຼື ໄກ່ ໄດ້ຊັກຊວນ ທ້າວ ບີ້ ແລະ ທ້າວ ຫຳນ້ອຍ ຫຼື ເປີ້ນ ໄປລັກຢາສູນບາລາກູ(ຢາສູບໄຟຟ້າ) ພາຍຫຼັງຕົກລົງກັນແລ້ວກໍ່ພາກັນຍ່າງໄປ ແລະອຸປະກອນທີ່ຖືໄປນຳມີດພັບຍາວປະມານ 20 ຊັງຕີແມັດ ພໍຍ່າງໄປຮອດໂຮງຮຽນເວລາ 21 ໂມງຂອງວັນດຽວກັນ ກໍ່ພາກັນປີນຂື້ນກຳແພງຮົ້ວຂອງໂຮງຮຽນເບື້ອງທິດໃຕ້ ກໍ່ໄດ້ພາກັນຍ່າງໄປຕຶກຂອງອຳນວຍການໂຮງຮຽນ ແລ້ວໃຊ້ມີດທີ່ຖືມາງັດໜ່ວຍກະແຈປະຕູທາງເຂົ້າຫ້ອງການ ແຕ່ງັດບໍ່ໄດ້ ຈາກນັ້ນ,ພວກກຽ່ວຈິ່ງໄດ້ຍ່າງໄປທາງຫຼັງຫ້ອງການແລ້ວແນມເຫັນປະຕູທາງເຂົ້າເປັນຫວ່າງປະມານ 02 ນີ້ວ ທ້າວ ສາຍຄຳ ຫຼື ໄກ່ ຈິ່ງໄດ້ຈັບເອົາໄມ້ແຍເຂົ້າໄປໃນຮູແລ້ວງັດໄດ້ປະມານ 20 ນາທີ ງັດອອກມາໄດ້ ພາຍຫຼັງເຂົ້າໄປໄດ້ແລ້ວກໍ່ພາກັນຊອກຫາຢາສູບໄຟຟ້າແຕ່ບໍ່ເຫັນແລ້ວແນມເຫັນພ້າວາງໄວ້ຢູ່ຂ້າງຕຸກນ້ຳ ທ້າວ ສາຍຄຳ ຫຼື ໄກ່ ຈິ່ງໄດ້ຍ່າງໄປຈັບເອົາແລ້ວຖືໄປງັດຫ້ອງຮອງອຳນວຍການ ຍ້ອນວ່າຜູ້ກ່ຽວເຄີຍເປັນນັກຮຽນຢູ່ໂຮງຮຽນດັ່ງກ່າວ ແລະ ເຄີຍຖືກອາຈານ ເອີ້ນໄປສຶກສາອົບຮົມແລ້ວເຫັນຢາສູບໄຟຟ້າທີ່ຄູ-ອາຈານ ຢຶດຈາກນັກຮຽນມາໄວ້ຢູ່ໃນຫ້ອງດັ່ງກ່າວ ໂດຍໃຊ້ວິທີເອົາພ້າງັດກະແຈລູກບິດ ໄດ້ປະມານ 30 ນາທີ ຈີ່ງສາມາດງັດໄດ້ ຊຶ່ງພາຍຫຼັງງັດໄດ້ແລ້ວກໍ່ພາກັນເຂົ້າໄປຄົ້ນຫາຢາສູບໄຟຟ້າແລ້ວພົບເຫັນຢາສູບໄຟຟ້າ ຈຳນວນ 11 ອັນ ທີ່ປະໄວ້ຢູ່ໃນຕູ້ເອກະສານຊັ້ນທີ2 ຈິ່ງພາກັນຈັບເອົາໃສ່ຖົງໂສ້ງ ເຊິ່ງພາຍຫຼັງໄດ້ຢາສູບແລ້ວກໍ່ພາກັນຍ່າງອອກມາຫ້ອງໂຖງ ທ້າວ ສາຍຄຳ ຫຼື ໄກ່ ຈິ່ງແນມເຫັນເຈວລ້າງມື ວາງໄວ້ເທິງໂຕະອາຈານ ຈິ່ງໄດ້ຈັບເອົາແລ້ວຍ່າງເຂົ້າໄປຫ້ອງຮອງອຳນວຍການ ແລ້ວຖອກໃສ່ໂຕະເຮັດວຽກຂອງຮອງອຳນວຍການ ທ້າວ ສາຍຄຳ ຫຼື ໄກ່ ຈິ່ງໄດ້ເອົາກັບໄຟແຊັກນຳທ້າວ ບີ້ ແລ້ວຍ່າງໄປຂີດຈູດ ເຊີ່ງພາຍຫຼັງຈູດແລ້ວພວກກ່ຽວຈິ່ງເອົາຕົວຫຼົບໜີ ປັດຈຸບັນຄະດີລາຍນີ້, ເຈົ້າໜ້າທີ່ແມ່ນຍັງສືບຕໍ່ດຳເນີນຄະດີ ຕາມຂັ້ນຕອນລະບຽບກົດໜາຍ.

ຂ່າວຍັງແຈ້ງຕື່ມອີກວ່າ: ໄດ້ມີເຫດການທຳຮ້າຍຮ່າງກາຍຢູ່ແຄມຂອງທ່າຫຼັງໂຮງໜໍແຂວງ ໃນເວລາ16ໂມງ,ຂອງວັນທີ 18 ທັນວາ 2022 ໄດ້ມີເຟສບຸກຊື່:ພາສາລາວ ປ໋າໄກ່ ສາຍພາເພີນ ໄດ້ໂພສລົງເຟສບຸກຕໍ່ກັບເຫດການທຳຮ້າຍຮ່າງກາຍ ໂດຍໃຊ້ສະກັອດມັດມືທາງຫຼັງແລ້ວລົງມືແຕະຕີພ້ອມທັງເອົາຕີນຍັນລົງນ້ຳຂອງ ສະຖານທີ່ຢູ່ທ່າທາງຫຼັງໂຮງໜໍແຂວງ ພາຍຫຼັງໄດ້ຮັບແຫຼງຂ່າວ ເຫັນວ່າມີມູນຄວາມຈິງແທ້ ຈີ່ງໄດ້ຂື້ນບັນຊີເປົ້າໜາຍ ແລະ ຮູ້ໄດ້ວ່າຜູ້ຖືກທຳຮ້າຍຮ່າງກາຍຊື່: ທ້າວ ບີ້ ອາຍຸ 16 ປີ,ອາຊີບ ວ່າງງານ ບ້ານດົງດຳດວນ ແລະມາຮອດວັນທີ 20 ທັນວາ 2022 ຈິ່ງໄດ້ນຳຕົວທ້າວ ບີ້ (ຜູ້ຖືກທຳຮ້າຍຮ່າງກາຍ)ເອົາມາສອບຖາມ ແລ້ວຮູ້ວ່າຜູ້ທີ່ທຳຮ້າຍຮ່າງກາຍຄື: ທ້າວ ສາຍຄຳ ຫຼື ໄກ່ ອາຍຸ 17 ປີ,ອາຊີບ ວ່າງງານ ບ້ານທ່າເມືອງ,ທ້າວ ວຽງສະຫວັນ ຫຼື ໂປ ອາຍຸ 13 ປີ,ອາຊີບ ກຳມະກອນ ບ້ານສະພານເໜືອ,ທ້າວ ຈູມຸງ ອາຍຸ 15 ປີ,ອາຊີບ ວ່າງງານ ບ້ານ ໄຊຍະມຸງຄຸນ ແລະ ທ້າວ ພອນຄຳ ຫຼື ໂອ ອາຍຸ 13 ປີ,ອາຊີບ ນັກຮຽນ ບ້ານ ທ່າແຮ່ ນະຄອນ ໄກສອນ ພົມວິຫານ ຈາກນັ້ນ,ຈີ່ງໄດ້ກັກຕົວພວກກ່ຽວມາທຳການສືບສວນ-ສອບສວນ.

ສາຍເຫດ ແລະ ແຮງຈູງໃຈ ໃນການກໍ່ເຫດຄັ້ງນີ້ຍ້ອນແມ່ນທ້າວ ບີ້ ໄປລັກໂທລະສັບຂອງ ສາຍຄຳ ຫຼື ໄກ່ ພວກກ່ຽວທັງສີ່ຈິ່ງໄດ້ໂທດດ້ວຍການເອົາສະກອດມັດມືແລ້ວຍັນລົງນ້ຳຂອງແລະພ້ອມທັງຫຸ້ມທຳຮ້າຍຮ່າງກາຍ

Cr. Media Laos

ກອງປະຊຸມສະຫຼຸບວຽກງານປ້ອງກັນຊາດ-ປ້ອງກັນຄວາມສະຫງົບ

By
ໂທລະໂຄ່ງ THOLAKHONG
-
0

ກອງປະຊຸມສະຫຼຸບວຽກງານປ້ອງກັນຊາດ-ປ້ອງກັນຄວາມສະຫງົບ 3 ແຂວງພາກເໜືອ, 1 ນະ ຄອນຫຼວງ ແລະ 2 ກອງພົນ ປະຈໍາປີ 2022 ແລະ ທິດທາງແຜນການວຽກງານປີ 2023

ກອງປະຊຸມວຽກງານ ປ້ອງກັນຊາດ-ປ້ອງກັນຄວາມສະຫງົບ 3 ແຂວງພາກເໜືອ, 1 ນະຄອນ ຫຼວງ ແລະ 02 ກອງພົນ (ແຂວງຫຼວງພະບາງ, ໄຊຍະບູລີ, ວຽງຈັນ, ນະຄອນ ຫຼວງ ແລະ ກອງພົນທີ 1, ທີ 2) ປະຈໍາປີ 2022 ແລະ ທິດທາງ ແຜນການປີ 2013 ໄດ້ຈັດຂຶ້ນໃນວັນທີ 3 ມັງກອນ 2023, ຢູ່ທີ່ຫ້ອງປະຊຸມກອງບັນຊາການທະຫານແຂວງຫຼວງພະບາງ ໂດຍການເປັນປະທານຂອງທ່ານ ພົນເອກ ວິໄລ ຫຼ້າຄຳຟອງ ກຳມະການກົມການເມືອງສູນກາງພັກ, ຄະນະກຳມະການປ້ອງກັນຊາດ-ປ້ອງກັນຄວາມສະຫງົບຂັ້ນສູນກາງ, ຮອງນາຍົກລັດຖະມົນຕີ, ລັດຖະມົນຕີກະຊວງ ປກສ; ມີບັນດາທ່ານ ເຈົ້າແຂວງ-ຮອງເຈົ້າແຂວງ, ປະທານ-ຮອງປະທານຄະນະກຳມະການ ປກຊ-ປກສ ແຂວງ; ຜູ້ແທນຈາກຫ້ອງວ່າການສູນກາງພັກ, ສະພາແຫ່ງຊາດ, ກະ ຊວງປ້ອງກັນປະເທດ, ກະຊວງປ້ອງກັນຄວາມສະຫງົບ, ຫ້ອງການຄະນະກຳມະການ ປກຊ-ປກສ, ຄະນະພັກ-ຄະນະບັນຊາກອງພົນທະຫານຮາບທີ 1, ທີ 2, ກອງທັບ, ປກສ ແຂວງ, ຫ້ອງວ່າການແຂວງພາຍໃນແຂວງ, ຫ້ອງການຄະນະກຳມະການ ປກຊ-ປກສ ບັນດາແຂວງ ແລະ ພາກສ່ວນທີ່ກ່ຽວ ຂ້ອງເຂົ້າຮ່ວມຢ່າງພ້ອມພຽງ.

ທ່ານ ພັອ ວີລ່ຽມ ວົງທິສານ ຮອງປະທານຜູ້ປະຈຳ ການຄະນະກຳມະການ ປກຊ-ປກສ ແຂວງຫຼວງພະບາງ, ຫົວໜ້າການທະຫານກອງບັນຊາການທະ ຫານແຂວງຫຼວງພະບາງ ໄດ້ຂຶ້ນຜ່ານຮ່າງສະຫຼຸບຕີລາຄາຄືນສະພາບລວມການຈັດຕັ້ງປະຕິບັດວຽກງານປ້ອງກັນຊາດ-ປ້ອງກັນຄວາມສະຫງົບ 3 ແຂວງ 1 ນະຄອນຫຼວງ ແລະ 2 ກອງພົນ ປະຈໍາປີ 2022 ແລະ ວາງທິດທາງແຜນການວຽກງານຈຸດສຸມ ປີ 2023; ເຊິ່ງໃນໄລຍະຜ່ານມາ, ພາຍໃຕ້ການຊີ້ນຳ-ນຳພາຂອງກົມການເມືອງສູນກາງພັກລັດຖະ ບານ ໂດຍສະເພາະແມ່ນການຊີ້ນຳ-ນຳພາຂອງຄະ ນະກຳມະການ ປກຊ-ປກສ ສູນກາງແຂວງ ແລະ ໄດ້ຮັບການຮ່ວມມືຈາກບັນດາອົງການຈັດຕັ້ງ, ອົງການປົກຄອງແຕ່ລະຂັ້ນ, ການປະກອບສ່ວນຂອງປະຊາຊົນບັນດາເຜົ່າທຸກຊັ້ນຄົນ ແລະ ຄວາມບຸກບືນສູ້ຊົນຂອງກຳລັງປ້ອງກັນຊາດ-ປ້ອງກັນຄວາມສະຫງົບ ໃນການຈັດຕັ້ງປະຕິບັດວຽກງານປ້ອງກັນຊາດ-ປ້ອງກັນຄວາມສະຫງົບ ສາມາດຍາດໄດ້ຜົນງານດ້ານດີຫຼາຍດ້ານ, ສະແດງອອກໃນການເຮັດໃຫ້ປະເທດຊາດມີຄວາມສະຫງົບ ເວົ້າລວມ, ເວົ້າສະເພາະ 3 ແຂວງ ແລະ ນະຄອນຫຼວງວຽງຈັນ ມີຄວາມສະຫງົບ, ມີສະຖຽນລະພາບທາງດ້ານການເມືອງຢ່າງໜັກແໜ້ນ ສັງຄົມມີຄວາມເປັນລະບຽບຮຽບຮ້ອຍ, ລະບົບການເມືອງຢູ່ຂັ້ນຮາກຖານໄດ້ຮັບການປັບປຸງເສດຖະກິດໄດ້ຮັບການພັດທະນາ ແລະ ຂະຫຍາຍຕົວຊີວິດການເປັນຢູ່ຂອງປະຊາຊົນບັນດາເຜົ່າໄດ້ພັດທະນາດີຂຶ້ນເທື່ອລະກ້າວ, ກຳລັງປ້ອງກັນຊາດ-ປ້ອງກັນຄວາມສະຫງົບ ນັບມື້ເຕີບໃຫຍ່ເຂັ້ມແຂງ ຮັບປະກັນໃຫ້ແກ່ການປົກປັກຮັກສາ ແລະ ສ້າງສາພັດທະນາປະເທດຊາດກ້າວຂຶ້ນຢ່າງບໍ່ຢຸດຢັ້ງ, ປະຊາຊົນບັນດາເຜົ່າມີຄວາມສາມັກຄີປອງດອງ ແລະ ພ້ອມກັນປະກອບສ່ວນຢ່າງແຂງ ແຮງເຂົ້າໃນການເຮັດໜ້າທີ່ປ້ອງກັນຊາດ-ປ້ອງກັນຄວາມສະຫງົບ ຢູ່ຂັ້ນທ້ອງຖິ່ນຂອງຕົນຢ່າງເປັນຂະ ບວນກວ້າງຂວາງ.

ໄປຄຽງຄູ່ກັບດ້ານວຽກງານທີ່ກ່າວມາຂ້າງເທິງນັ້ນ, ໃນວາລະກອງປະຊຸມບັນດາຜູ້ແທນກອງປະຊຸມ ກໍໄດ້ພ້ອມກັນປະກອບຄຳເຫັນ, ແລກປ່ຽນບົດຮຽນໝາກຜົນຂອງການຈັດ ຕັ້ງປະຕິບັດວຽກງານປ້ອງກັນຊາດ-ປ້ອງກັນຄວາມສະຫງົບ ຢູ່ກົມກອງທ້ອງຖິ່ນຂອງຕົນ ແລະ ປະ ກອບຄຳຄິດຄຳເຫັນໃສ່ທິດທາງແຜນການ, ວຽກ ງານຈຸດສຸມ ໃນປີ 2023 ເພື່ອເຮັດໃຫ້ການຈັດຕັ້ງປະຕິບັດວຽກງານໄດ້ຮັບໝາກຜົນດີກວ່າເກົ່າໃນຕໍ່ໜ້າ.

ໂອກາດດຽວກັນນີ້, ທ່ານ ພົນເອກ ວິໄລ ຫຼ້າຄຳຟອງ ຍັງໄດ້ໃຫ້ກຽດໂອ້ລົມ, ຊີ້ນຳຕໍ່ກອງປະຊຸມ, ເຊິ່ງກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນສໍາເລັດໃນການຊີ້ນໍາ-ນໍາພາ, ການຈັດຕັ້ງປະຕິ ບັດວຽກງານ ປ້ອງກັນຊາດ-ປ້ອງກັນຄວາມສະ ຫງົບ ໃນໄລຍະ 1 ປີຜ່ານມາ, ເຖິງວ່າຈະປະເຊີນໜ້າກັບສະພາບຄວາມຫຍຸ້ງຍາກຫຼາຍປະການ, ແຕ່ກໍາລັງປ້ອງກັນຊາດ-ປ້ອງກັນຄວາມສະຫງົບ, ບັນ ດາກົມກອງ, ກຳລັງປະກອບອາວຸດແຕ່ລະຂັ້ນ ກໍໄດ້ສຸມທຸກກຳລັງແຮງເຮັດສໍາເລັດໜ້າທີ່ຂອງຕົນ ດ້ວຍນໍ້າໃຈຄວາມຮັບຜິດຊອບຢ່າງແທ້ຈິງ, ຈາກນັ້ນ, ທ່ານກໍຍັງໄດ້ເນັ້ນໜັກໃຫ້ກຳລັງປ້ອງກັນຊາດ-ປ້ອງກັນຄວາມສະຫງົບ ຢູ່ບັນດາແຂວງ, ອົງການຈັດຕັ້ງພາກສ່ວນກ່ຽວຂ້ອງຈົ່ງພ້ອມກັນເພີມທະວີຍົກສູງຄວາມຮັບຜິດຊອບ ຕໍ່ໜ້າທີ່ການເມືອງອັນມີກຽດສະຫງ່າຂອງຕົນ ທີ່ພັກ, ລັດ ແລະ ປະຊາ ຊົນມອບໝາຍໃຫ້, ພ້ອມກັນຈັດຕັ້ງປະຕິບັດວຽກ ງານ ປ້ອງກັນຊາດ-ປ້ອງກັນຄວາມສະຫງົບ ທົ່ວປວງຊົນຮອບດ້ານ ເພື່ອຮັບປະກັນໃຫ້ປະເທດ ຊາດ, ກໍຄື 3 ແຂວງ ແລະ ນະຄອນຫຼວງວຽງຈັນ ສືບຕໍ່ມີຄວາມສະຫງົບ, ມີສະຖຽນລະພາບທາງ ດ້ານການເມືອງ ສັງຄົມມີຄວາມເປັນລະບຽບຮຽບຮ້ອຍ, ປະຊາຊົນມີຄວາມຜາສຸກ, ສ້າງບາດ ກ້າວການພັດທະນາໃຫ້ບັນລຸຕາມເປົ້າໝາຍທີ່ພັກ, ລັດ ແລະ ປະຊາຊົນມອບໝາຍໃຫ້ໃນສະເພາະໜ້າກໍຄື: ຍາວໜານ.

ໃນຕອນທ້າຍກອງປະຊຸມ, ທ່ານ ພົນເອກ ວິໄລ ຫຼ້າຄຳຟອງ ກຳມະການກົມການເມືອງສູນກາງພັກ, ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນຄວາມສະຫງົບ, ປະທານຄະນະກຳມະ ການ ປກຊ-ປກສ ສູນກາງ ໄດ້ຕາງໜ້າໃຫ້ຄະນະກຳມະການ ປກຊ-ປກສ ສູນກາງມອບເຄື່ອງໃຊ້ຫ້ອງການປະເພດປິນເຕີ້ 1 ໜ່ວຍ ແລະ ຈັກກ໊ອບປີ 1 ໜ່ວຍ ໃຫ້ຫ້ອງການ ປກຊ-ປກສ ແຂວງຫຼວງພະບາງ ເພື່ອມູນໃຊ້ເຂົ້າໃນວຽກງານວິຊາສະເພາະໃຫ້ມີຄວາມສະດວກ ແລະ ວ່ອງໄວກວ່າເກົ່າ.

ແຫຼ່ງຂ່າວ: ຄວາມສະຫງົບ Lao Security News

5 ວັນອັນຕະລາຍ ສະຫຼອງປີໃໝ່ສາກົນ

By
ໂທລະໂຄ່ງ THOLAKHONG
-
0

5 ວັນອັນຕະລາຍ ສະຫຼອງປີໃໝ່ ສາກົນປີນີ້ ມີຜູ້ເສຍຊີວິດ 26 ຄົນໃນໄລຍະ 5 ວັນອັນຕະລາຍ(29 ທັນວາ 2022 ຫາ 2 ມັງກອນ 2023) ຂອງການສະເຫຼີມສະຫຼອງປີໃໝ່ສາກົນ 2023 ທົ່ວປະເທດ ໄດ້ເກີດອຸບັດເຫດ 190 ຄັ້ງ, ມີຜູ້ບາດເຈັບ 311 ຄົນ, ເສຍຊີວິດທັງໝົດ 26 ຄົນ, ພາຫະນະເປ່ເພ 323 ຂັນ; ໃນນັ້ນແຂວງທີ່ເກີດອຸບັດເຫດຫຼາຍກວ່າໝູ່ແມ່ນ ນະຄອນຫລວງວຽງຈັນ 26 ຄັ້ງ, ເສຍຊີວິດ 5 ຄົນ; ສະຫວັນນະເຂດ 22 ຄັ້ງ, ເສຍຊີວິດ 5 ຄົນ; ຫຼວງພະບາງ 19 ຄັ້ງ, ບໍລິຄຳໄຊ 14 ຄັ້ງເຊິ່ງສາເຫດຕົ້ນຕໍທີ່ພາໃຫ້ເກີດອຸບັດເຫດ ແມ່ນຍ້ອນດື່ມສິ່ງມຶນເມົາແລ້ວຂັບຂີ່ລົດ. ຢ່າງໃດກໍຕາມ ເມື່ອສົມທຽບຈຳນວນອຸບັດເຫດທີ່ເກີດຂຶ້ນໃນປີນີ້ ກັບປີຜ່ານມາແມ່ນຫລຸດລົງ 7 ຄັ້ງ ແລະ ເສຍຊີວິດຫລຸດລົງ 17 ຄົນ.

ທ່ານ ພັອ ກົງສີ ສຸວັນນະຕຸ້ມ ຫົວໜ້າກົມຕຳຫລວດຈະລາຈອນ ກະຊວງປ້ອງກັນຄວາມສະຫງົບ ໄດ້ຖະແຫລງຂ່າວ ຕໍ່ສື່ມວນຊົນໃນວັນທີ 3 ມັງກອນ 2023 ວ່າ: ເພື່ອເຮັດໃຫ້ການສະເຫລີມສະຫລອງສົ່ງທ້າຍປີເກົ່າ-ຕ້ອນຮັບປີໃໝ່ສາກົນ 2022-2023 ມີຄວາມສະຫງົບ, ມີຄວາມເປັນລະບຽບຮອບຮ້ອຍ ແລະ ປອດໄພ ໃນການສັນຈອນ ໄປ-ມາ ປະສະຈາກໄດ້ປະກົດການຫຍໍ້ທໍ້ ແລະ ຫລຸດຜ່ອນຜົນເສຍຫາຍຈາກການເກີດອຸບັດເຫດ, ກົມຕຳຫລວດຈະລາຈອນໄດ້ວາງມາດຕະການຕ່າງໆ ເພື່ອປ້ອງກັນອຸບັດຕິເຫດ ຢ່າງເຂັ້ມງວດ ແຕ່ກໍຍັງມີຜູ້ໃຊ້ລົດໃຊ້ຖະໜົນຈຳນວນໜຶ່ງ ຖືເບົາຕໍ່ກົດລະບຽບຈະລາຈອນ ເປັນຕົ້ນ: ຂັບຂີ່ລົດໄວເກີນກຳນົດ, ດື່ມສິ່ງມຶນເມົາແລ້ວຂັບຂີ່ພາຫະນະ, ປ່ຽນທິດທາງການຂັບຂີ່ຢ່າງກະທັນຫັນ, ເຕັກ ນິກບໍ່ຮັບປະກັນ, ແຊງບໍ່ຮັບປະກັນ ແລະ ບໍ່ປ່ອຍສິດໃຫ້ຄົນອື່ນ.

ແຫຼ່ງຂ່າວ: ຂປລ

ສອງທະນາຄານທຸລະກິດຂອງລັດ ທີ່ໄດ້ຮັບການປະຕິຮູບ

By
ໂທລະໂຄ່ງ THOLAKHONG
-
0

ທະນາຄານພັດທະນາລາວ ແລະ ທະນາຄານສົ່ງເສີມກະສິກໍາ ແມ່ນສອງທະນາຄານທຸລະກິດຂອງລັດ ທີ່ໄດ້ຮັບການປະຕິຮູບ ຕາມທິດທາງແຜນການຂອງພັກ-ລັດຖະບານ ໃນການປະຕິຮູບລັດວິສາຫະກິດ ຊຶ່ງແມ່ນໜຶ່ງໃນມາດຕະການແກ້ໄຂຄວາມຫຍຸ້ງຍາກ ດ້ານເສດຖະກິດ-ການເງິນ ທີ່ເປັນວາລະແຫ່ງຊາດ ຊຶ່ງພາຍຫຼັງການປະຕິຮູບມາຮອດທ້າຍປີຜ່ານມາ ເຫັນວ່າມີທ່າອ່ຽງກ້າວໄປສູ່ປະສິດທິຜົນດີຂຶ້ນ ໄດ້ເລີ່ມມີກຳໄລສຸດທິ ຄື: ທະນາຄານພັດທະນາລາວ ມີກຳໄລສຸດທິ 359 ຕື້ກີບ ແລະ ທະນາຄານສົ່ງເສີມກະສິກຳ ມີ 22,21 ຕື້ກີບ.

ອີງຕາມເອກະສານເນື້ອໃນຕອບຄໍາຊັກຖາມຂອງສະມາຊິກສະພາແຫ່ງຊາດ ຕໍ່ບົດລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ໄດ້ໃຫ້ຮູ້ວ່າ: ເຖິງແມ່ນວ່າຍັງຢູ່ໃນໄລຍະການດໍາເນີນການປະຕິຮູບບັນດາຫົວໜ່ວຍລັດວິສາຫະກິດຂະໜາດໃຫຍ່ ຕາມແຜນການຂອງລັດຖະບານ ແຕ່ໝາກຜົນການປະຕິຮູບກໍມີອັນພົ້ນເດັ່ນ ເປັນຕົ້ນການປະຕິຮູບ ສອງທະນາຄານລັດ (ທະນາຄານພັດທະນາລາວ ແລະ ທະນາຄານສົ່ງເສີມກະສິກໍາ) ເຫັນວ່າມີທ່າອ່ຽງ ກ້າວໄປສູ່ປະສິດທິຜົນດີຂຶ້ນ ມາຮອດປັດຈຸບັນທັງສອງທະນາຄານໄດ້ເລີ່ມມີກໍາໄລສຸດທິ (ທະນາຄານພັດທະນາລາວ 359 ຕື້ກີບ ແລະ ທະນາຄານສົ່ງເສີມກະສິກໍາ 22,21 ຕື້ກີບ).

ເນື້ອໃນເອກະສານດັ່ງກ່າວ, ຍັງໃຫ້ຮູ້ວ່າ: ເຖິງແມ່ນວ່າພວກເຮົາມີໝາກຜົນຄວາມຄືບໜ້າຈໍານວນໜຶ່ງໃນການປະຕິບັດບັນດາວຽກຈຸດສຸມທັງ 5 ໃນໄລຍະ 1 ປີ 3 ເດືອນຜ່ານມາ, ແຕ່ຫຼາຍວຽກຈຸດສຸມຍັງຕ້ອງການໃຊ້ເວລາໃນການຊຸກຍູ້ ວຽກງານຕົວຈິງ ໂດຍສະເພາະໃນຂັ້ນທ້ອງຖິ່ນ. ສະນັ້ນ, ເຫັນວ່າໃນໄລຍະປີ 2023 ຊຶ່ງແມ່ນປີສຸດທ້າຍຂອງການປະຕິບັດວາລະແຫ່ງຊາດຈະໄດ້ສຸມໃສ່ວຽກງານຕ່າງໆທີ່ຍັງບໍ່ທັນສໍາເລັດ ແລະ ສ້າງໜໍ່ແໜງໃນການສ້າງລາຍຮັບສືບຕໍ່ໄປໃນໄລຍະອີກຊຸມປີຕໍ່ໜ້າເພີ່ມຕື່ມ.

ສໍາລັບການເຂົ້າເຖິງແຫຼ່ງທຶນຂອງ SME ທີ່ເປັນບຸລິມະສິດໃນການຜະລິດເພື່ອທົດແທນການນໍາເຂົ້າ, ໄລຍະຜ່ານມາລັດຖະບານໄດ້ສະໜອງແຫຼ່ງທຶນ SME ຜ່ານໂຄງການສິນເຊື່ອ SME ບ້ວງ 300 ຕື້ກີບ, ໂຄງການສິນເຊື່ອເພື່ອຟື້ນຟູການຜະລິດບ້ວງ 1.800 ຕື້ກີບ ຊຶ່ງມີຈຸດປະສົງສະໜອງແຫຼ່ງທຶນໃຫ້ແກ່ຂະແໜງການຜະລິດທີ່ຕິດພັນກັບຂະແໜງກະສິກໍາ, ປຸງແຕ່ງກະສິກໍາ, ຫັດຖະກໍາ ແລະ ການທ່ອງທ່ຽວ. ມາຮອດປັດຈຸບັນ ເຫັນໄດ້ວ່າໄດ້ສະໜອງແຫຼ່ງທຶນຜ່ານໂຄງການສິນເຊື່ອດັ່ງກ່າວໃຫ້ແກ່ບັນດາ SMEບຸລິມະສິດໃນຂອບເຂດທົ່ວປະເທດເກືອບໝົດແລ້ວ ແລະເພື່ອສ້າງເງື່ອນໄຂໃຫ້ບັນດາຜູ້ປະກອບການ SME ເຂົ້າເຖິງແຫຼ່ງທຶນໄດ້ຫຼາຍຂຶ້ນ, ລັດຖະບານຈະພະຍາຍາມຄົ້ນຄວ້າ ແລະ ຈັດຕັ້ງປະຕິບັດບັນດາໂຄງການສິນເຊື່ອໃໝ່ຈໍານວນໜຶ່ງໃນປີ 2023 ໂດຍສະເພາະໂຄງການສິນເຊື່ອຖົມຂຸມດອກເບ້ຍ ແລະ ໂຄງການສິນເຊື່ອກະຈາຍແຫຼ່ງທຶນ,ທ້ອງຖິ່ນ ຊຶ່ງປັດຈຸບັນທະນາຄານແຫ່ງ ສປປ ລາວກໍາລັງຄົ້ນຄວ້າ ສ້າງແຜນດໍາເນີນການ. ພ້ອມນັ້ນ, ຈະໄດ້ສຸມໃສ່ການສ້າງຄວາມເຂັ້ມແຂງໃຫ້ແກ່ຫົວໜ່ວຍ SME ທີ່ເປັນບຸລິມະສິດໃນການຂຽນແຜນທຸລະກິດ, ແຜນຄຸ້ມຄອງການເງິນ, ການຖືບັນຊີ ແລະ ອື່ນໆ ເພື່ອເຮັດໃຫ້ຜູ້ປະກອບການມີເງື່ອນໄຂໃນການເຂົ້າເຖິງໂຄງການສິນເຊື່ອຫຼາຍຂຶ້ນ. ອີກປະການໜຶ່ງ, ຈະໄດ້ສຸມໃສ່ ເຜີຍແຜ່ໂຄສະນາບັນດາໂຄງການສິນເຊື່ອ SME ໃຫ້ກວ້າງຂວາງ ແລະ ເຂົ້າເຖິງບັນດາຫົວໜ່ວຍການຜະລິດທີ່ມີທ່າແຮງຢ່າງແທ້ຈິງ.

ແຫຼ່ງຂ່າວ: ປະຊາຊົນ

ລ້ຽງປາ ສ້າງລາຍຮັບ ໄດ້ 140 ລ້ານກີບຕໍ່ປີ

By
ໂທລະໂຄ່ງ THOLAKHONG
-
0

ຄອບຄົວຂອງທ່ານ ວິລະຈິດ ບຸບຜາສາລີ ປະຊາຊົນບ້ານ ຄັນມະກ່ອງ ເມືອງໄຊເສດຖດ ແຂວງ ອັດຕະປື ແມ່ນໜຶ່ງໃນ 129 ຄອບຄົວຕົວແບບດີເດັ່ນ ຂອງແຂວງອັດຕະປື ໃນການສ້າງລາຍຮັບດ້ວການປະກອບອາຊີບລ້ຽງປາຂາຍ ເຊິ່ງສາມາດສ້າງລານຮັບໄດ້ ເຖິງ 140 ລ້ານກີບຕໍ່ປີ.

ທ່ານ ວິລະຈິດ ບຸບຜາສາລີ ຕາງໜ້າຄອບຄົວຕົວແບບດ້ານການຜະລິດ ສ້າງເສດຖະກິດຄອບຄົວ ກ່າວລາຍງານຢູ່ໃນກອງປະຊຸມສະຫຼຸບວຽກງານ 3 ສ້າງ ວຽກງານແຂ່ງຂັນ-ຍ້ອງຍໍຮັກຊາດ ແລະ ພັດທະນາ ທົ່ວແຂວງອັດຕະປື ທີ່ຈັດຂຶ້ນເມື່ອວັນທີ 27 ທັນວາ 2022 ນີ້ວ່າ: ພາຍໃນຄອບຄົວຂອງຕົນມີ 3 ຄົນ,ຍິງ 1 ຄົນ, ມີແຮງງານຕົ້ນຕໍ 3 ຄົນ,ຍິງ 1 ຄົນ, ມີເນື້ອທີ່ເຮັດການຜະລິດ 1 ເຮັກຕາເຄິ່ງ, ຜ່ານມາໄດ້ເຮັດທຸລະກິດຄ້າຂາຍ ແລະ ເຮັດບໍລິສັດກໍ່ສ້າງຂົວທາງ ແຕ່ທຸລະກິດດັ່ງກ່າວໄດ້ພົບບັນຫາທາງດ້ານການເງີນ, ມາຮອດປີ 2012 ໂດຍອິງໃສ່ນະໂຍບາຍຂອງພັກ-ລັດຖະບານ,ໃນການຊຸກຍູ້ໃຫ້ປະຊາຊົນເຮັດການຜະລິດໃຫ້ມີຢູ່ມີກິນ, ຕົນເອງຈຶ່ງໄດ້ປຶກສາກັບຄອບຄົວ ພ້ອມທັງໄດ້ສຶກສາກ່ຽວກັບເຕັກນິກການລ້ຽງປາ ແລະໄດ້ຕັດສິນໃຈນໍາໃຊ້ທຶນຂອງຕົນເອງຈຳນວນໜຶ່ງ ຈົກໜອງປາ ຈຳນວນ 2 ໜອງ ໃນມູນຄ່າ 55 ລ້ານກີບ ເພື່ອທໍາການຜະລິດ ເບື້ອງຕົ້ນສາມາດລ້ຽງ ແລະຈໍາໜ່າຍປາອອກຂາຍໄດ້ຈໍານວນໜຶ່ງ ແຕ່ບໍ່ທັນເປັນສິນຄ້າຫຼາຍປານໃດ ເນື່ອງຈາກວ່າ ຈໍານວນໜອງປາຍັງບໍ່ຫລາຍ ຈຶ່ງເຮັດຜົນຜະລິດບໍ່ຫຼາຍ ແລະບໍ່ສາມາດຕອບສະໜອງກັບຄວາມຕ້ອງການຂອງສັງຄົມ, ຈາກນັ້ນ ທາງຄອບຄົວວິລະຈິດ ບຸບຜາສາລີ ໄດ້ຂະຫຍາຍໜອງເພີ່ມຕື່ມອີກ 2 ໜອງ ແລະ ໄດ້ສຶກສາການລ້ຽງປາແບບໃຊ້ເຕັກນິກ ດ້ວຍການຫລຸດຕົ້ນທຶນລົງ ໂດຍການນໍາໃຊ້ແໜແດງ ແລະຜັກຕົບເກືອປາ ເຊິ່ງສາມາດຫຼຸດຜ່ອນລາຍຈ່າຍ ຈາກການຊື້ຫົວອາຫານສຳເລັດຮູບລົງໄດ້ຈຳນວນໜຶ່ງ, ເຮັດໃຫ້ລາຍຮັບຈາກການຂາຍປາ ສະເລ່ຍ 140 ລ້ານກີບຕໍ່ປີ ສາມາດແກ້ໄຂຊີວິດການເປັນຢູ່ຂອງຄອບຄົວດີຂຶ້ນ.

ນອກຈາກການລ້ຽງປາແລ້ວ ທາງຄອບຄົວຍັງໄດ້ລ້ຽງ ງົວ 20ໂຕ ແລະ ລ້ຽງແບ້ 14ໂຕ, ເຊິ່ງຜົນສໍາເລັດທັງໝົດນັ້ນແມ່ນຍ້ອນການຕັດສີນໃຈຂອງຄອບຄົວ,ໂດຍການສະໜັບສະໜູນດ້ານວິຊາການ ລ້ຽງສັດ ແລະ ການປະມົງ ຂອງເມືອງ ແລະ ແຂວງ ບວກກັບການຊອກຮູ້ຮໍ່າຮຽນຈາກສື່ໂຄສະນາຕ່າງໆ .

ທ່ານ ວິລະຈິດ ບຸບຜາສາລີ ໄດ້ກ່າວຕື່ມວ່າ: ເພື່ອເປັນການສູ້ຊົນຂະຫຍາຍກິດຈະການ ແລະ ເພີ່ມລາຍຮັບໃຫ້ສູງຂື້ນເລື້ອຍໆ ທາງຄອບຄົວຈະສຶບຕໍ່ປັບປຸງຂະຫຍາຍກິດຈະການດັ່ງກ່າວເພື່ອໃຫ້ເປັນສິນຄ້າ ຫຼາຍຂຶ້ນ ແລະ ຕອບສະໜອງໄດ້ຕາມຄວາມ ຮຽກຮ້ອງຕ້ອງການຂອງຕະຫຼາດພາຍໃນເມືອງ ແລະ ທົ່ວແຂວງ.

ແຫຼ່ງຂ່າວ: Lao National Radio

ຄະດີຄາດຕະກຳ ປະຈຳປີ 2022

By
ໂທລະໂຄ່ງ THOLAKHONG
-
0

ອີງຕາມການລາຍງານຈາກ ຄວາມສະຫງົບ Lao Security News ໃຫ້ຮູ້ວ່າ: ໃນປີ 2022 ນີ້, ໃນທົ່ວປະເທດໄດ້ມີປະກົດການຫຍໍ້ທໍ້ເກີດຂຶ້ນ 6.982 ເລື່ອງ ເຊິ່ງໄດ້ສ້າງຄວາມບໍ່ສະຫງົບ ແລະ ຄວາມບໍ່ເປັນລະບຽບຮຽບຮ້ອຍໃຫ້ແກ່ສັງຄົມ. ໃນນີ້, ໄດ້ມີເຫດການຄາດຕະກຳເກີດຂຶ້ນຫຼາຍສົມຄວນ, ມີບາງຄະດີກໍເກີດຈາກຂໍ້ຂັດແຍ່ງຕ່າງໆ, ເກີດຈາກຄວາມຜິດຖຽງກັນ, ເກີດຈາກການຫຼິ້ນຊູ້, ເກີດຈາກການເສບຢາເສບຕິດ ແລະ ອື່ນໆ; ເຊິ່ງໃນປີນີ້, ໜັງສືພິມຄວາມສະຫງົບ ກໍໄດ້ຄັດຈ້ອນເລືອກເຟັ້ນເອົາ 10 ອັນດັບຄະດີຄາດຕະກຳ ມີດັ່ງນີ້:

ອັນດັບ10: ຄະດີຄາດຕະກຳລູກເກີດໃໝ່: ຄະດີນີ້ເກີດຂຶ້ນໃນວັນທີ 8 ກໍລະກົດ 2022 ຢູ່ເຂດບ້ານນາເຕີຍ ເມືອງ ແລະ ແຂວງຫຼວງນໍ້າທາ. ຜູ້ກໍ່ເຫດຄາດຕະກຳລູກ ຊື່ ນາງ ຈັນ ອາຍຸ 22 ປີ ຢູ່ບ້ານໃໝ່ ເມືອງນໍ້າບາກ ແຂວງຫຼວງພະບາງ.

ໃນມື້ເກີດເຫດ, ຜູ້ກ່ຽວໄດ້ເກີດລູກ ເປັນເພດຍິງ ແລະ ຄິດວ່າບໍ່ມີໃຜລ້ຽງຊ່ວຍ ແລະ ບໍ່ມີໃຜຮັບເປັນພໍ່ ຈຶ່ງໄດ້ຕັດສິນໃຈໃຊ້ມືບີບຄໍລູກນ້ອຍ ແລ້ວໂຍນຖິ້ມໃນສວນຢາງພາລາ ເຂດຫຼັງຫ້ອງນໍ້າບ່ອນຜູ້ກ່ຽວພັກເຊົາ, ມື້ຕໍ່ມາມີຄົນໄປພົບເຫັນສົບເດັກນ້ອຍ ແລ້ວຜູ້ກ່ຽວກໍຖືກຈັບໄປດຳເນີນຄະດີ.

ອັນດັບ 9: ຄະດີຄາດຕະກຳ ທ້າວ ດວງ ອາຍຸ 28 ປີ: ເຫດເກີດຂຶ້ນຢູ່ທີ່ບ້ານນາແຫກ ນະຄອນປາກເຊ ແຂວງຈຳປາສັກ ໃນຄັ້ງວັນທີ 29 ເມສາ 2022; ເຊິ່ງຄາດຕະກອນຄະດີນີ້ ຊື່ ທ້າວ ກິກ ອາຍຸ 25 ປີ ຢູ່ບ້ານໜອງນໍ້າຂາວ ເມືອງບາຈຽງຈະເລີນສຸກ ແຂວງຈຳປາສັກ, ຜູ້ກ່ຽວໄດ້ໃຊ້ປືນແກັບຍິງຜູ້ເຄາະຮ້າຍ ຖືກບໍລິເວນຫົວ ເບື້ອງຫຼັງ ຈົນເສຍຊີວິດ.

ສ່ວນສາເຫດຂອງການຄາດຕະກຳໃນຄັ້ງນີ້ ຍ້ອນຜູ້ຖືກຫາມີອາການປະສາດຫຼອນຈາກການເສບຢາບ້າ ຈຳນວນ 10 ເມັດ.

ອັນດັບ 8: ຄະດີຄາດຕະກຳໃຊ້ປືນແກັບຍິງຄົນຢູ່ຂ້າງເຮືອນ: ເຫດການນີ້ເກີດຂຶ້ນໃນວັນທີ 3 ກັນຍາ 2022 ຢູ່ບ້ານສົບໜ້າວ ເມືອງໃໝ່ ແຂວງຜົ້ງສາລີ, ຜູ້ຖືກຫາລາຍນີ້ ຊື່ ທ້າວ ຕຸ້ຍ ອາຍຸ 30 ປີ, ສ່ວນຜູ້ເສຍຊີວິດ ຊື່ ທ້າວ ນິ່ງ ອາຍຸ 32 ປີ. ສໍາລັບສາເຫດມາຈາກການຜິດຖຽງກັນ ເລື່ອງໃຊ້ສຽງດັງລົບກວນກັນ.

ອັນດັບ 7: ຄະດີຄາດຕະກຳ ນາງ ຄໍາມະນີ ອາຍຸ 44 ປີ: ເຫດເກີດຂຶ້ນຢູ່ບ້ານໜອງຫອຍ ເມືອງຊະນະສົມບູນ ແຂວງຈຳປາສັກ ໃນຄັ້ງວັນທີ 28 ກຸມພາ 2022, ຜູ້ຖືກຫາ ຊື່ ທ້າວ ເພັດສະໝອນ ຫຼື ເຟມ ອາຍຸ 23 ປີ ຢູ່ບ້ານາຊອນ ເມືອງຊະນະສົມບູນ ໄດ້ເອົາໄມ້ຄ້ອນທຸບຕີບໍລິເວນຫົວ ແລະ ໃບໜ້າຂອງຜູ້ເຄາະຮ້າຍຈຳນວນຫຼາຍຄັ້ງຈົນເສຍຊີວິດ ເພື່ອປຸ້ນເອົາສາຍແຂນຄຳ 1 ເສັ້ນ ນໍ້າໜັກ 1 ບາດ ຂອງຜູ້ເສຍຊີວິດ ໄປຂາຍໃຊ້ໜີ້ການພະນັນ ຈຳນວນ 16 ລ້ານກວ່າກີບ.

ອັນດັບ 6: ຄະດີຄາດຕະກຳເມຍ: ເຫດເກີດຂຶ້ນໃນວັນທີ 11 ກັນຍາ 2022 ຢູ່ທີ່ຖຽງນາຂອງຜູ້ເສຍຊີວິດ ເຂດບ້ານນາເກືອ ເມືອງຊໍາໃຕ້ ແຂວງຫົວພັນ; ຜູ້ກໍ່ເຫດ ຊື່ ທ້າວ ໄຊເກີ ອາຍຸ 40 ປີ (ຜົວ) ໄດ້ໃຊ້ຈົກທຸບຫົວເມຍ ຊື່ ນາງ ມີ້ ອາຍຸ 36 ປີ ຈໍານວນ 3 ບາດ ເສຍຊີວິດຄາທີ່, ສ່ວນສາເຫດແມ່ນຜົວເມົາຢາບ້າ.

ອັນດັບ 5: ຄະດີຄາດຕະກຳໂດຍໃຊ້ແກ້ວເບຍທີ່ແຕກແທງຄໍ ທ້າວ ຈັນ ອາຍຸ 50 ປີ ເສຍຊີວິດ: ເຫດການສະເທືອນຂວັນນີ້ເກີດຂຶ້ນໃນຄັ້ງວັນທີ 16 ກໍລະກົດ 2022 ຢູ່ແຄມທາງເຂດບ້ານຫ້ວຍເພັກ ເມືອງໂພນທອງ ແຂວງຈຳປາສັກ, ຄາດຕະກອນ ຊື່ ທ້າວ ມົນຕີ ອາຍຸ 38 ປີ, ໃນມື້ເກີດເຫດ ໄດ້ມີໝູ່ຄົນບ້ານດຽວກັນ (ບ້ານຫ້ວຍເພັກ) ມາຮັບພາກັນໄປກິນເບຍ ໝົດເບຍ 4 ແກ້ວ ແລະ ເສບຢາບ້ານຳກັນໝົດ 2 ເມັດ.

ຫຼັງຈາກນັ້ນ, ກໍໄປສົ່ງຜູ້ກ່ຽວຢູ່ເຮືອນ ແຕ່ຜູ້ກ່ຽວໄດ້ອອກໄປຊອກກີນເບຍຕື່ມອີກ, ແລ້ວພົບເຫັນຜູ້ເຄາະຮ້າຍສອງຄົນ ເປັນຍິງໜຶ່ງຊາຍໜຶ່ງນັ່ງກິນເບຍຢູ່ແຄມທາງ, ຜູ້ກ່ຽວກໍເຂົ້າໄປຫາເລື່ອງ ແລະ ຈັບເອົາແກ້ວເບຍທຸບຕີຫົວ ເຮັດໃຫ້ແກ້ວເບຍແຕກ ແລ້ວແທງຄໍ ທ້າວ ຈັນ ຈົນເສຍຊີວິດ.

ຜ່ານມາຜູ້ຖືກຫາລາຍນີ້ ແມ່ນເຄີຍຕ້ອງໂທດມາແລ້ວໃນຂໍ້ຫາທໍາຮ້າຍຮ່າງກາຍ 1 ຄັ້ງ ແລະ ຄະດີຢາເສບຕິດ 3 ຄັ້ງ ແລະ ຖືກດັດສ້າງຢາເສບຕິດ 1 ຄັ້ງ.

ອັນດັບ 4: ຄະດີຂົ່ມຂືນແລ້ວຄາດ ຕະກຳ ເດັກຍິງອາຍຸ 14 ປີ: ເຫດການນີ້ເກີດຂຶ້ນໃນວັນທີ 16 ເມາສາ 2022 ຢູ່ຫ້ວຍນໍ້າສານ ເຂດບ້ານພູນສານ ເມືອງວຽງໄຊ ແຂວງຫົວພັນ. ຜູ້ກໍ່ເຫດ ຊື່ ທ້າວ ແສງແກ້ວ ອາຍຸ 34 ປີ ຢູ່ບ້ານພູນສານ ເມືອງວຽງໄຊ (ບ້ານດຽວກັນກັບຜູ້ເສຍຊີວິດ).

ໃນມື້ເກີດເຫດ ຜູ້ກ່ຽວໄດ້ຂົ່ມຂືນ ນາງ ນ້ອຍ (ນາມສົມມຸດ) ຢູ່ແຄມຫ້ວຍນໍ້າສານ ຈົນສໍາເລັດ ແລ້ວໃຊ້ມືບີບຄໍ ນາງ ນ້ອຍ ຢ່າງແຮງປະມານ 5 ນາທີ. ຫຼັງຈາກນັ້ນ, ກໍໃຊ້ຕີນເບື້ອງຂວາຢັນໃສ່ຄໍ, ບ່າໄຫຼ່ທັງສອງເບື້ອງ, ປາກ ແລະ ຄາງກະໄຕຂອງ ນາງ ນ້ອຍ ຈໍານວນ 3 ຄັ້ງ ຈົນເສຍຊີວິດຄາທີ່.

ອັນດັບ 3: ຄະດີຄາດຕະກໍາຜົວ ໂດຍເມຍຮ່ວມກັບຊາຍຊູ້ ໃຊ້ປືນແກັບຍິງຜົວ: ຄະດີນີ້ເກີດຂຶ້ນຢູ່ບ້ານນໍ້າມະອຸ່ນ ເມືອງສິງ ແຂວງຫຼວງນໍ້າທາ ໃນວັນທີ 24 ມິຖຸນາ 2022. ຜູ້ກໍ່ເຫດທັງສອງ ຊື່ ທ້າວ ແຊຈ່າ ອາຍຸ 28 ປີ (ຊາຍຊູ້) ແລະ ນາງ ສໍຈົມ ອາຍຸ 33 ປີ (ເມຍຜູ້ເສຍຊີວິດ), ສ່ວນຜູ້ເສຍຊີວິດ ຊື່ ທ້າວ ຕໍພຽວ.

ໃນປີ 2021 ນາງ ສໍຈົມ ຮ່ວມກັບຊາຍຊູ້ ວາງແຜນຄາດຕະກໍາ ດ້ວຍການເອົານໍ້າກົດກ້ອນປະສົມກັບອາຫານໃຫ້ຜົວກິນ ແຕ່ບໍ່ເສຍຊີວິດ.

ມາວັນທີ 24 ມິຖຸນາ 2022, ຈຶ່ງໄດ້ວາງແຜນຄາດຕະກຳໃໝ່ ໂດຍໃຫ້ ທ້າວ ແຊຈ່າ ເອົາປືນແກັບໄປຍິງ ທ້າວ ຕໍພຽວ (ຜົວ) ໃນຂະນະທີ່ຜູ້ກ່ຽວກຳລັງໄຖນາ ຢູ່ເຂດຫ້ວຍນໍ້າມະອຸ່ນ ແຕ່ຜູ່ກ່ຽວກໍບໍ່ຕາຍ ແລະ ຕໍ່ມາເຈົ້າໜ້າທີ່ ຈຶ່ງຈັບພວກກ່ຽວທັງສອງໄປດຳເນີນຄະດີ.

ອັນດັບ 2: ຄະດີຄາດຕະກຳອ້າຍ: ຄະດີສະເທືອນຂວັນນີ້ ເກີດຂຶ້ນວັນທີ 20 ເມສາ 2022 ຢູ່ບ້ານກາດ ເມືອງຍອດອູ ແຂວງຜົ້ງສາລີ. ຜູ້ເສຍຊີວິດ ຊື່ ທ້າວ ແສງຄໍາ ອາຍຸ 37 ປີ (ອ້າຍ). ສ່ວນຜູ້ກໍ່ເຫດ ເປັນນ້ອງຊາຍຄີງ ຊື່ ທ້າວກອງແກ້ວ ໄດ້ໃຊ້ມິດແທ່ງອ້າຍ ຖືກບໍລິເວນທ້ອງ 1 ບາດ ແລະ ຟັນໃສ່ຫຼັງ 3 ບາດ ເຮັດໃຫ້ເສຍຊີວິດຄາທີ່.

ອັນດັບ 1: ຄະດີຄາດຕະກໍາ 2 ສົບ: ຄະດີນີ້ ເກີດຂຶ້ນໃນວັນທີ 18 ມີນາ 2022, ຜູ້ເສຍຊີວິດ ຊື່ ທ້າວ ບຸນທ່ຽງ ອາຍຸ 53 ປີ ນັກທຸລະກິດ ຢູ່ບ້ານດົງນາໂຊກເໜືອ ເມືອງສີໂຄດຕະບອງ ນະຄອນຫຼວງວຽງຈັນ ແລະ ທ້າວ ເຊິນຫາຍເຜິ້ງ ອາຍຸ 49 ປີ ພັກເຊົາຢູ່ບ້ານດົງນາໂຊກເໜືອ.

ພວກກ່ຽວຖືກລັກພາໂຕໄປຮຽກຄ່າໄຖ່ ແຕ່ວັນທີ 18 ມີນາ ແລະ ຖືກພົບເຫັນເປັນສົບຝັງດິນຢູ່ປ່າ ເຂດບ້ານໃໝ່ ເມືອງສີໂຄດຕະບອງ ໃນວັນທີ 26 ມີນາ.

ຜ່ານການລົງແກ້ໄຂຄະດີດັ່ງກ່າວ, ເຈົ້າໜ້າທີ່ ສາມາດຕິດຕາມຈັບຜູ້ຖືກຫາໄດ້ຈໍານວນ 13 ຄົນ ຍິງ 1 ຄົນ; ໃນນີ້, ເປັນຄົນລາວ 8 ຄົນ ຍິງ 1 ຄົນ, ຄົນສັນຊາດຈີນ 4 ຄົນ, ພາຫະນະຮັບໃຊ້ເຂົ້າໃນການກະທຳຜິດ ລົດໃຫຍ່ 2 ຄັນ.

ປະກອບຄຳເຫັນໃສ່ບາງເນື້ອໃນ, ບາງມາດຕາຂອງຮ່າງກົດໝາຍວ່າດ້ວຍວິສາຫະກິດສະບັບປັບປຸງ

By
ໂທລະໂຄ່ງ THOLAKHONG
-
0

ໃນວາລະກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດຊຸດທີ IX ໃນວັນທີ 21 ທັນວາ ນີ້ໂດຍການເປັນປະທານຂອງ ທ່ານ ສົມມາດ ພົນເສນາ ຮອງປະທານສະພາແຫ່ງຊາດ.

ບັນດາສະມາຊິກສະພາແຫ່ງຊາດ (ສສຊ) ໄດ້ປະກອບຄຳເຫັນໃສ່ບາງເນື້ອໃນ, ບາງມາດຕາຂອງຮ່າງກົດໝາຍວ່າດ້ວຍວິສາຫະກິດສະບັບປັບປຸງເພື່ອໃຫ້ມີເນື້ອໃນຄົບຖ້ວນ, ຈະແຈ້ງ, ຮັດກຸມສອດຄ່ອງກັບແນວທາງນະໂຍບາຍຂອງພັກໃນໄລຍະໃໝ່ ປະກອບສ່ວນຊຸກຍູ້ສົ່ງເສີມການຜະລິດ, ທຸລະກິດ, ການບໍລິການເພື່ອເຮັດໃຫ້ການພັດທະນາເສດຖະກິດ-ສັງຄົມແຫ່ງຊາດມີການເຕີບໃຫຍ່ເຂັ້ມແຂງ ຍົກລະດັບຊີວິດການເປັນຢູ່ຂອງປະຊາຊົນໃຫ້ດີຂຶ້ນເທື່ອລະກ້າວ.

ທ່ານ ສີເຮັ່ງ ຫອມສົມບັດ ສສຊ ເຂດເລືອກຕັ້ງທີ 14 ແຂວງສາລະວັນ ໄດ້ປະກອບຄຳເຫັນຕໍ່ກົດ ໝາຍດັ່ງກ່າວ ໂດຍສະເພາະຢາກໃຫ້ເບິ່ງຄືນນະໂຍບາຍການສ້າງຕັ້ງວິສາຫະກິດໃນມາດຕາ 4 ແລະ ມາດຕາ 7 ສະເໜີໃຫ້ຄະນະຮັບຜິດຊອບປັບປຸງ ຫຼື ຍ້າຍໄດ້ບໍເພື່ອໃຫ້ສອດຄ່ອງ, ມາດຕາ 10 ຫົວຂໍ້ຂອງວິສາຫະກິດຕ່າງໆເປັນໄປໄດ້ບໍຂໍໃຫ້ເອົາວິສາຫະກິດຂອງລັດຂຶ້ນກ່ອນ, ມາດຕາ 12 ຮູບແບບວິສາຫະກິດຮຸ່ນສ່ວນ ແລະ ບໍລິສັດ ຊຶ່ງມີ 3 ຮູບແບບ ໃນນີ້ຢາກໃຫ້ກຳນົດແຈ້ງມັນພົວພັນກັບມາດຕາ 90 ການສ້າງຕັ້ງບໍລິສັດຈຳກັດ ຢາກໃຫ້ມີມາດຖານກຳນົດຈະແຈ້ງຮັດກຸມແທ້ໆໃນການສ້າງຕັ້ງບໍລິສັດຈຳກັດຜູ້ດຽວຢ່າງໜ້ອຍຕ້ອງມີ 3 ຄົນຂຶ້ນໄປ ຖ້າມີແຕ່ 2 ຄົນເຫັນວ່າບໍ່ເປັນໝູ່ຄະນະ.

ຜ່ານມາສະມາຊິກສະພາເຫັນວ່າຫຼາຍບໍລິສັດໄປຈົດທະບຽນພໍຄືໆແຕ່ເຄື່ອນໄຫວຕົວຈິງບໍ່ມີໃຜຮູ້, ຕໍ່ມາດຕາ 188 ວິສາຫະກິດຂອງລັດ ເຫັນວ່າສໍາຄັນຫຼາຍຢາກໃຫ້ຍ້າຍມາເປັນໝວດ ຫຼື ມາດຕາຕົ້ນໆຂອງໂຄງສ້າງກົດໝາຍສະບັບນີ້, ຜ່ານການຄົ້ນຄວ້າຢາກໃຫ້ປັບປຸງໂຄງສ້າງຂອງມາດຕານີ້ໄປເຊື່ອມໂຍງກັບມາດຕາທີ 190 ຫຼັກການພື້ນຖານໃນການເຄື່ອນໄຫວທຸລະກິດຂອງລັດວິສາຫະກິດ ຊຶ່ງມີທັງໝົດ 4 ຫຼັກການຢາກໃຫ້ເພີ່ມເປັນ 5 ຫຼັກການໄດ້ບໍ ເພື່ອໃຫ້ມັນເປັນຫຼັກການໄດ້ໂລດວ່າວິສາຫະກິດຂອງລັດຕ້ອງດຳລົງບົດບາດເປັນເຈົ້າພາທາງ ແລະ ຮັບຜິດຊອບຕໍ່ຜົນປະໂຫຍດລວມຂອງຊາດຢາກໃຫ້ຂຽນແຈ້ງແນວນັ້ນ.

ທ່ານ ສົມສັກ ແສງສັກດາ ສສຊ ເຂດເລືອກຕັ້ງທີ 15 ແຂວງຈຳປາສັກ ມີຄຳເຫັນຕໍ່ບົດບັນຍັດທົ່ວໄປໂດຍລວມໂຄງສ້າງຂອງກົດໝາຍຂຽນໄວ້ຢູ່ 7 ມາດຕາ ແຕ່ສັງເກດເຫັນວ່າໃນຮ່າງກົດໝາຍສະບັບນີ້ບໍ່ທັນກຳນົດຫຼັກການກ່ຽວກັບວິສາຫະກິດ. ດັ່ງນັ້ນຂໍສະເໜີແລກປ່ຽນນໍາຄະນະຮັບຜິດຊອບຕໍ່ພາກທີ 1 ບົດບັນຍັດທົ່ວໄປຢາກໃຫ້ຕັດອອກ 3 ມາດຕາ ແລະ ເພີ່ມໃໝ່ 1 ມາດຕາໄດ້ບໍ, ໃນມາດຕາ 1,2,3 ເຫັນດີຮັກສາໄວ້ຕາມເດີມ, ສ່ວນມາດຕາ 4,5,6 ສະເໜີຕັດອອກ ຫຼື ຍ້າຍໄປໃສ່ພາກທີ 11 ແລະ ປັບປຸງຊື່ພາກຄືນໃໝ່, ສຳລັບມາດຕາທີ 4 ເຫັນດີໃຫ້ຍົກເອົາມາດຕາທີ 7 ຍ້າຍມາເປັນມາດຕາທີ 4 ເພື່ອປ່ຽນຊື່ຂອງມາດຕາ 4 ຕື່ມຈາກນະໂຍບາຍຂອງລັດກ່ຽວກັບວິສາຫະກິດປ່ຽນມາເປັນນະໂຍບາຍຂອງລັດຕໍ່ວິສາຫະກິດ, ມາດຕາ 5 ສະ ເໜີເພີ່ມໃໝ່ໃສ່ຊື່ມາດຕາວ່າຫຼັກການກ່ຽວກັບວິສາຫະກິດ ເພາະວ່າໃນກົດໝາຍສະບັບນີ້ບໍ່ທັນເຫັນຫຼັກການກ່ຽວກັບວິສາຫະກິດ ສ່ວນທາງດ້ານເນື້ອໃນສະເໜີຕື່ມຊື່ຂອງມາດຕາ 6 ນີ້ຈາກຂອບເຂດການນຳໃຊ້ເປັນຂອບເຂດການນຳໃຊ້ກົດໝາຍ ຢາກໃຫ້ຂຽນເນື້ອໃນໃຫ້ມັນເຕັມ.

ແຫຼ່ງຂ່າວ: ປະເທດລາວ

ກອງປະຊຸມສຸດຍອດສະຫຼອງການພົວພັນ ອາຊຽນ-ອີຢູ ຄົບຮອບ 45 ປີ

By
ໂທລະໂຄ່ງ THOLAKHONG
-
0

ໃນວັນທີ 14 ທັນວາ 2022, ທ່ານ ພັນຄໍາ ວິພາວັນ ນາຍົກລັດຖະມົນຕີ ແຫ່ງ ສປປ ລາວ ໄດ້ນໍາພາຄະນະຜູ້ແທນລາວ ເຂົ້າຮ່ວມກອງປະຊຸມສຸດຍອດ ສະເຫລີມສະຫລອງການພົວພັນ ອາຊຽນ-ສະຫະພາບ ເອີຣົບ(ອາຊຽນ-ອີຢູ) ຄົບຮອບ 45 ປີ ທີ່ບຣຸກແຊນ, ປະເທດແບນຊິກ, ພາຍໃຕ້ການເປັນປະທານຮ່ວມຂອງ ກໍາປູເຈຍ ແລະ ອີຢູ.

ບັນດາຜູ້ນໍາອາຊຽນ ແລະ ອີຢູ ໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ໝາກຜົນຂອງການພົວພັນຮ່ວມມືອາຊຽນ-ອີຢູ ຕະຫລອດໄລຍະ 45 ປີທີ່ຜ່ານມາ, ຊຶ່ງໄດ້ຮັບການເສີມຂະຫຍາຍຢ່າງຕໍ່ເນື່ອງ ຈາກການຮ່ວມມືແບບປົກກະຕິ ກ້າວເຂົ້າສູ່ການຮ່ວມມືແບບຄູ່ຮ່ວມຍຸດທະສາດ ໃນປີ 2020. ປັດຈຸບັນ, ອີຢູ ເປັນຄູ່ຄ້າໃຫຍ່ອັນດັບ 3 ຂອງອາຊຽນ ແລະ ອາຊຽນກໍເປັນຄູ່ຄ້າໃຫຍ່ອັນດັບ 3 ຂອງ ອີຢູ, ມູນຄ່າການຄ້າສອງຝ່າຍບັນລຸໄດ້ 268.92 ຕື້ໂດລາສະຫະລັດ ໃນປີ 2021. ພ້ອມກັນນີ້, ອີຢູ ກໍເປັນຜູ້ລົງທຶນໂດຍກົງລາຍໃຫຍ່ຂອງອາຊຽນ, ຊຶ່ງມີມູນຄ່າ 26.534 ຕື້ໂດລາສະຫະລັດ ໃນປີ 2021.

ບັນດາຜູ້ນໍາອາຊຽນ ແລະ ອີຢູ ຍັງໄດ້ທົບທວນຄືນການຈັດຕັ້ງປະຕິບັດບັນດາໂຄງການ ການຮ່ວມມື ພາຍໃຕ້ແຜນປະຕິບັດງານອາຊຽນ-ອີຢູ (2018-2022), ຊຶ່ງເຫັນວ່າໄດ້ຮັບຜົນສໍາເລັດ ຫລາຍດ້ານ ເປັນຕົ້ນ ດ້ານການຄ້າ, ການລົງທຶນ, ການສຶກສາ, ການແລກປ່ຽນຂໍ້ມູນຂ່າວສານ, ວິທະຍາສາດ-ເຕັກໂນໂລຊີ, ການເຊື່ອມຈອດ ແລະ ອື່ນໆ. ບັນດາຜູ້ນໍາອາຊຽນ-ອີຢູ ໄດ້ຊຸກຍູ້ໃຫ້ເພີ່ມທະວີການຮ່ວມມືກັນຫລາຍຂຶ້ນ ໂດຍຜ່ານການຈັດຕັ້ງປະຕິບັດແຜນປະຕິບັດງານອາຊຽນ-ອີຢູ ສະບັບໃໝ່ (2023-2027) ທີ່ໄດ້ຮັບຮອງເອົາໃນໂອກາດກອງປະຊຸມລັດຖະມົນຕີຕ່າງປະເທດອາຊຽນ-ອີຢູ ໃນເດືອນສິງຫາ 2022 ໂດຍເນັ້ນໃສ່ການຮ່ວມມືດ້ານສາທາລະນະສຸກ, ການໄປມາຫາ ສູ່ກັນຂອງປະຊາຊົນສອງພາກພື້ນ, ການຂົນສົ່ງທາງອາກາດ, ການຄ້າ, ການລົງທຶນ, ການຮັບມືກັບໄພພິບັດທາງທໍາມະຊາດ, ການຕ້ານການກໍ່ການຮ້າຍ ແລະ ອື່ນໆ. ບັນດາຜູ້ນໍາອາຊຽນໄດ້ສະແດງຄວາມຊົມເຊີຍຕໍ່ການປະກອບສ່ວນຂອງອີຢູ ເຂົ້າໃນຂະບວນການສ້າງປະຊາຄົມອາຊຽນ ກໍຄື ການເຊື່ອມໂຍງ-ເຊື່ອມຈອດອາຊຽນ ແລະ ໄດ້ສະແດງຄວາມຍິນດີຕໍ່ຄວາມໝາຍໝັ້ນຂອງອີຢູ ທີ່ຈະສືບຕໍ່ໃຫ້ການສະໜັບສະໜູນການຈັດຕັ້ງປະຕິບັດແຜນວຽກສະບັບທີ 4 ຂອງ ຂໍ້ລິເລີ່ມວ່າດ້ວຍການເຊື່ອມໂຍງອາຊຽນ (IAI) ແລະ ແຜນແມ່ບົດເພື່ອການເຊື່ອມຈອດອາຊຽນ 2025(MPAC 2025). ພ້ອມກັນນີ້, ບັນດາຜູ້ນໍາອາຊຽນ ແລະ ອີຢູ ໄດ້ແລກປ່ຽນຄໍາຄິດເຫັນກ່ຽວກັບບັນຫາພາກພື້ນ ແລະ ສາກົນ ທີ່ມີຄວາມສົນໃຈຮ່ວມກັນ.

ໂອກາດນີ້, ທ່ານນາຍົກລັດຖະມົນຕີ ພັນຄໍາ ວິພາວັນ ໄດ້ຊຸກຍູ້ໃຫ້ ອາຊຽນ-ອີຢູ ສືບຕໍ່ເພີ່ມທະວີການຮ່ວມມື ເພື່ອຟື້ນຟູເສດຖະກິດຫລັງພະຍາດໂຄວິດ-19 ແລະ ສ້າງຄວາມເຂັ້ມແຂງໃຫ້ແກ່ເສດຖະກິດພາກພື້ນ ໂດຍການເສີມຂະຫຍາຍການຮ່ວມມືດ້ານການເຊື່ອມຈອດຕ່ອງໂສ້ການຜະລິດພາກພື້ນ ແລະ ລະຫວ່າງພາກພື້ນ, ການຫັນເປັນເສດຖະກິດດີຈິຕອນ, ການສົ່ງເສີມການຄ້າ ແລະ ການລົງທຶນ, ການທ່ອງທ່ຽວ, ການພັດທະນາຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ, ການພັດທະນາສີຂຽວ, ການປ່ຽນແປ່ງດິນຟ້າອາກາດ ແລະ ອື່ນໆ.

ໃນຕອນທ້າຍ, ກອງປະຊຸມໄດ້ຮັບຮອງເອົາຖະແຫລງການຮ່ວມ ຂອງກອງປະຊຸມສຸດຍອດສະເຫລີມສະຫລອງການພົວພັນ ອາຊຽນ-ອີຢູ ເພື່ອເປັນທິດທາງໃຫ້ແກ່ການຜັນຂະຫຍາຍການເປັນຄູ່ຮ່ວມຍຸດທະສາດ ລະຫວ່າງອາຊຽນ ແລະ ອີຢູ ໃນອະນາຄົດ.

ໃນໂອກາດເຂົ້າຮ່ວມກອງປະຊຸມສຸດຍອດການພົວພັນ ອາຊຽນ-ອີຢູ, ທ່ານ ນາຍົກລັດຖະ ມົນຕີ ພັນຄຳ ວິພາວັນ ຍັງໄດ້ມີໂອກາດພົບປະສອງຝ່າຍກັບ ທ່ານ ຟາມ ມິງ ຈິ່ງ ນາຍົກລັດຖະມົນ ຕີ ແຫ່ງ ສສ ຫວຽດນາມ ໂດຍໄດ້ປຶກສາຫາລືກ່ຽວກັບ ການກະກຽມໃຫ້ແກ່ການພົບປະຂອງສອງກົມການເມືອງ, ການມາຢ້ຽມຢາມສປປລາວ ແລະ ການເຂົ້າຮ່ວມສະຫລຸບປີມິດຕະພາບຂອງນາຍົກລັດຖະມົນຕີຫວຽດນາມໃນທ້າຍປີນີ້. ນອກນັ້ນ, ກໍໄດ້ເຂົ້າຮ່ວມພົບປະສາມນາຍົກ ຊຶ່ງໄດ້ຖືໂອກາດແລກປ່ຽນຄໍາເຫັນກັບ ນາຍົກຮຸນເຊນ ໃນການຊຸກຍູ້ໃຫ້ມີການລົງນາມແຜນດໍາເນີນງານກ່ຽວກັບການເປັນຄູ່ຮ່ວມມືຍຸດທະສາດ ໝັ້ນຄົງ ຍາວນານ ແລະ ສົນທິສັນຍາວ່າດ້ວຍການປັກຫລັກໝາຍຊາຍແດນ 86%. ພ້ອມກັນນັ້ນ, ທ່ານ ນາຍົກລັດຖະມົນຕີ ກໍໄດ້ພົບປະກັບ ທ່ານ ຊາກ ມິແຊນ ປະທານສະພາອີຢູ ໂດຍສອງຝ່າຍຕີລາຄາສູງຕໍ່ການພົວພັນຮ່ວມມືລະຫວ່າງອາຊຽນ-ອີຢູ ກໍຄື ສປປ ລາວ-ອີຢູ ແລະ ຝ່າຍອີຢູໄດ້ແຈ້ງໃຫ້ຊາບກ່ຽວກັບ ທຶນການຊ່ວຍເຫລືອ ຈາກ ອີຢູ ດ້ານງົບ ປະມານຈໍານວນ 550 ລ້ານ ເອີໂລ ສໍາລັບສົກປີ 2021-2024 ຕໍ່ໂຄງການບຸລິມະສິດຕ່າງໆຂອງ ສປປ ລາວ ແລະ ຍັງໄດ້ພົບປະກັບ ທ່ານ ວິກຕໍ ອໍບານ ນາຍົກລັດຖະມົນຕີຮົງກາຣີ ຊຶ່ງສອງຝ່າຍ ໄດ້ຕີລາຄາສູງຕໍ່ການພົວພັນຮ່ວມມື ລະຫວ່າງ ລາວ ແລະ ຮົງກາຣີ ໂດຍສະເພາະແມ່ນຂົງເຂດການສຶກສາ ທີ່ ຮົງກາໄດ້ ໃຫ້ທຶນການສຶກສາ ແກ່ ສປປ ລາວ ປີລະ 150 ທຶນ.

ນອກຈາກນີ້, ທ່ານ ນາຍົກລັດຖະມົນຕີ ພັນຄຳ ວິພາວັນ ຍັງໄດ້ສືບຕໍ່ ພົບປະສອງຝ່າຍ ກັບທ່ານ ໂອລາຟ ໂຊນ ນາຍົກລັດຖະມົນຕີເຢຍລະມັນ ໂດຍໄດ້ມີການປຶກສາຫາລື, ພ້ອມທັງຕີລາຄາການພົວພັນຮ່ວມມືສອງຝ່າຍໃນໄລຍະຜ່ານມາ ກໍຄື ການທິດທາງຂອງການຮ່ວມມືໃນອະນາຄົດ ແລະ ທ່ານ ນາຍົກລັດຖະມົນຕີ ກໍໄດ້ມີການພົບປະສອງຝ່າຍ ກັບ ທ່ານ ມາກ ຣຸດທ໌ ນາຍົກລັດຖະ ມົນຕີ ໂຮນລັງ ໂດຍທັງສອງໄດ້ພ້ອມກັນຕີລາຄາການພົວພັນຮ່ວມມືໃນໄລຍະຜ່ານມາ ກໍຄືແຜນການຮ່ວມມືໃນອະນາຄົດຮ່ວມກັນ.

ແຫຼ່ງຂ່າວ: ປະເທດລາວ

ເອັດສຊີຈີ ມອບທຶນການສຶກສາ “SCG Sharing the Dream” ໃນ ສປປ ລາວ ຕໍ່ເນື່ອງເປັນປີທີ 11

By
ໂທລະໂຄ່ງ THOLAKHONG
-
0

ເອັດສຊີຈີ ໄດ້ຮ່ວມມືກັບ ກະຊວງສຶກສາທິການ ແລະ ກິລາ ແລະ ສະມາຄົມຮ່ວມນ້ຳໃຈກັບເດັກນ້ອຍລາວ (ALC) ຈັດງານມອບທຶນການສຶກສາ ໃນໂຄງການ “SCG Sharing the Dream” ໃນ ສປປ ລາວ ເປັນປີທີ 11, ເຊິ່ງໃນປີນີ້ ມີການມອບທຶນໃຫ້ນັກຮຽນຊັ້ນມັດທະຍົມຕອນປາຍ ໃນນະຄອນຫຼວງວຽງຈັນ ແລະ ແຂວງ ຄຳມ່ວນ, ແຂວງລະ 110 ທຶນ ແລະ ໄດ້ມອບທຶນການສຶກສາ ໃຫ້ນັກສຶກສາລະດັບມະຫາວິທະຍາໄລ ອີກ 10 ທຶນ, ລວມທັງໝົດ 230 ທຶນ, ເພື່ອເປັນການສະໜັບສະໜູນ ຊາວໜຸ່ມທີ່ເປັນຄົນດີ, ມີຄວາມກະຕັນຍູຮູ້ບຸນຄຸນ, ເອົາໃຈໃສ່ຕໍ່ສິ່ງແວດລ້ອມ ແລະ ມຸ່ງໝັ້ນທີ່ຈະສ້າງສັງຄົມທີ່ດີ, ໃຫ້ພວກເຂົາໄດ້ມີໂອກາດສຶກສາຮ່ຳຮຽນຕໍ່ ແລະ ນຳເອົາຄວາມຮູ້ມາພັດທະນາປະເທດຊາດ ເພື່ອຂັບເຄື່ອນສັງຄົມ ໄປສູ່ອະນາຄົດທີ່ຍືນຍົງ. ນອກຈາກນີ້ ຍັງເປັນການຫຼຸດຜ່ອນຄວາມບໍ່ສະເໝີພາບທາງດ້ານການສຶກສາ ຕາມເປົ້າໝາຍ ESG 4 Plus ຂອງ ເອັດສຊີຈີ.

ພາຍໃນພິທີດັ່ງກ່າວ, ທ່ານ ປອ ສຸລິອຸດົງ ສຸນດາລາ ຮອງລັດຖະມົນຕີ ກະຊວງສຶກສາທິການ ແລະ ກິລາ ຍັງໄດ້ກ່າວຕື່ມວ່າ “ຂໍໃຫ້ນ້ອງນັກຮຽນທັງໝົດທີ່ໄດ້ຮັບທຶນສືບຕໍ່ເປັນຄົນດີ, ມີຄວາມດຸໝັ່ນ ພາກພຽນ ຕັ້ງໜ້າໃສ່ການຮໍ່າຮຽນ ແລະ ຊ່ວຍເຫຼືອວຽກງານຄອບຄົວ, ສັງຄົມ ສືບຕໍ່ຮຽນໃຫ້ເກັ່ງ ເສັງຈົບຊັ້ນໃຫ້ໄດ້ຄະແນນດີ, ສົມກັບຄວາມຕັ້ງໃຈທີ່ເພີ່ນໄດ້ຊຸກຍູ້ຊ່ວຍເຫຼືອ ນອກຈາກນີ້ຍັງໄດ້ສະແດງຄວາມຂອບໃຈຕໍ່ກັບໂຄງການ ໂດຍສະເພາະ ກຸ່ມບໍລິສັດ SCG ປະເທດໄທ ທີ່ໃຫ້ການສະໜັບສະໜູນ ຊຸກຍູ້ຊ່ວຍເຫຼືອນ້ອງນັກຮຽນຂອງພວກເຮົາໃນຫຼາຍປີຜ່ານມາ ແລະ ຫວັງວ່າໂຄງການຈະສືບຕໍ່ໄປ ພ້ອມທັງຂະຫຍາຍກວ້າງຂວາງອອກໄປໃນຂອບເຂດທົ່ວປະເທດຕື່ມອີກ”

“SCG Sharing the Dream” ແມ່ນໜຶ່ງໃນໂຄງການຂອງ ເອັດສຊີຈີ ເພື່ອພັດທະນາທ່າແຮງຂອງຊາວໜຸ່ມ ໃນບັນດາປະເທດອາຊຽນ, ເຊິ່ງ ເອັດສຊີຈີ ຖືວ່າເປັນວິທີໃນການດຳເນີນທຸລະກິດທີ່ພວກເຂົາໄດ້ປະຕິບັດມາຕະຫຼອດ 110 ປີ ນັບຕັ້ງແຕ່ກໍ່ຕັ້ງບໍລິສັດ, ຈຸດປະສົງແມ່ນເພື່ອຊຸກຍູ້ນັກຮຽນ, ນັກສຶກສາ ໃຫ້ມີທຶນຮອນໃຊ້ຈ່າຍສະໜັບສະໜູນການສຶກສາຂອງຕົນເອງ ຕາມຄວາມຝັນທີ່ໄດ້ຕັ້ງໃຈໄວ້ ພ້ອມກັບການຊຸກຍູ້ໃຫ້ພວກເຂົາຄິດດີ, ເຮັດດີ, ມີຄວາມກະຕັນຍູຮູ້ບຸນຄຸນຕໍ່ຄອບຄົວ, ມີຄວາມຮັບຜິດຊອບຕໍ່ສັງຄົມ ແລະ ສິ່ງແວດລ້ອມ ແລະ ຫຼຸດຜ່ອນຄວາມບໍ່ສະເໝີພາບໃນໂອກາດດ້ານການສຶກສາຕາມແນວທາງ ESG 4Plus ຂອງ ເອັດສຊີຈີ, ກໍຄື: 1. ເປົ້າໝາຍ Net Zero, 2. GO Green, 3. Lean ຄວາມບໍ່ສະເໝີພາບ, 4. ເນັ້ນໃສ່ການຮ່ວມມືບົນພື້ນຖານຄວາມຍຸຕິທໍາ ແລະ ຄວາມໂປ່ງໃສ. ເຊິ່ງເປັນໝາກຫົວໃຈໃນການດຳເນີນທຸລະກິດຂອງ ເອັດສຊີຈີ ເພື່ອມອບໂລກທີ່ໜ້າຢູ່ອາໄສ ແລະ ຍືນຍົງສໍາລັບຄົນລຸ້ນຕໍ່ໄປ ເຊິ່ງຈະກາຍເປັນກຳລັງທີ່ສຳຄັນໃນການພັດທະນາປະເທດ.” ທ່ານ ທີລະວັດ ພູນການຈະນະໂຣດ, Country Director Laos, SCG Cement-Build Material Co., Ltd ໄດ້ກ່າວ.

ທ້າວ ພູລິດ ແສນກາງ, ເປັນໜຶ່ງໃນນັກຮຽນທີ່ໄດ້ຮັບທຶນການສຶກສາຈາກ ໂຄງການ “SCG Sharing the Dream” ຕັ້ງແຕ່ຮຽນມັດທະຍົມປີທີ 6 ແລະ ໄດ້ຮັບທຶນມາຢ່າງຕໍ່ເນື່ອງໃນລະດັບມະຫາວິທະຍາໄລ, ຈົນຈົບປະລິນຍາຕີ ສາຂາວິສະວະກໍາບໍ່ແຮ່ ຈາກ ຄະນະວິສະວະກຳສາດ, ມະຫາວິທະຍາໄລແຫ່ງຊາດ ໂດຍໄດ້ກ່າວເຖິງຄວາມປະທັບໃຈຂອງລາວ ຕໍ່ໂຄງການນີ້ວ່າ “ທີ່ຜ່ານມາ ນ້ອງໄດ້ພົບກັບອຸປະສັກຫຼາຍຢ່າງໃນຊີວິດ ແຕ່ກໍຍັງພະຍາຍາມສຸມໃສ່ການຮຽນຢູ່ສະເໝີ ຫຼັງຈາກໄດ້ຮັບທຶນຈາກ ເອັດສຊີຈີ ນ້ອງໄດ້ໃຊ້ທຶນການສຶກສາເພື່ອສະໜັບສະໜູນການຮຽນ ແລະ ການໃຊ້ຊີວິດປະຈໍາວັນຂອງນ້ອງຈົນຮຽນຈົບ. ປັດຈຸບັນ, ນ້ອງກໍາລັງສຶກສາໃນລະດັບປະລິນຍາໂທ, ສາຂາວິສະວະກໍາທໍລະນີ, ທີ່ ມະຫາວິທະຍາໄລ ກາດຈາ ມາດາ (Gadjah Mada University), ສາທາລະນະລັດ ອິນໂດເນເຊຍ. ທີ່ນ້ອງສາມາດມາຮອດມື້ນີ້ໄດ້, ນ້ອງຢາກຂໍຂອບໃຈ ໂຄງການ SCG Sharing the Dream ແລະ ບັນດາພາກສ່ວນທີ່ກ່ຽວຂ້ອງ ທີ່ໄດ້ໃຫ້ການສະໜັບສະໜູນນ້ອງ ຈົນເຖິງປັດຈຸບັນ”.

ໃນແຕ່ລະປີ, ໂຄງການ “SCG Sharing the Dream” ໄດ້ໃຫ້ທຶນການສຶກສາແກ່ນັກຮຽນຢ່າງໜ້ອຍ 5,000 ຄົນໃນທົ່ວອາຊຽນ ເປັນຕົ້ນແມ່ນ ປະເທດຟີລິບປິນ, ອິນໂດເນເຊຍ, ກຳປູເຈຍ, ຫວຽດນາມ ແລະ ສປປ ລາວ, ເພື່ອຮ່ວມເປັນສ່ວນໜຶ່ງຂອງການພັດທະນາປະເທດທີ່ ເອັດສຊີຈີ ໄດ້ເຂົ້າໄປດຳເນີນທຸລະກິດ, ໂດຍໂຄງການນີ້ ໄດ້ຈັດຕັ້ງປະຕິບັດຢູ່ໃນ ສປປ ລາວ ຕັ້ງແຕ່ປີ 2011 ດ້ວຍຄວາມຕັ້ງໃຈ ແລະ ເອົາໃຈໃສ່, ເພື່ອສົ່ງເສີມ ແລະ ຊຸກຍູ້ໃຫ້ຊາວໜຸ່ມທີ່ເປັນຄົນດີ, ມີຄວາມກະຕັນຍູຕໍ່ຄອບຄົວ ແລະ ຊຸມຊົນ ແຕ່ຂາດທຶນຮອນໃນການຮໍ່າຮຽນ ໃຫ້ມີໂອກາດໃນການສຶກສາຈົນຈົບ, ນອກຈາກການສະໜັບສະໜູນທາງດ້ານການເງິນ ແລະ ອຸປະກອນການຮຽນແລ້ວ, ເອັດສຊີຈີ ຍັງມີການເຄື່ອນໄຫວເພື່ອພັດທະນາທ່າແຮງ ແລະ ເສີມຂະຫຍາຍຄຸນສົມບັດສິນລະທຳໃຫ້ແກ່ຊາວໜຸ່ມ ຕະຫຼອດໂຄງການອີກດ້ວຍ

1...91011...261Page 10 of 261