ທົ່ວປະເທດກຽມປ່ອຍປາ 58 ລ້ານໂຕ ເພື່ອຄືນຄວາມອຸດົມສົມບູນລົງສູ່ແຫຼ່ງນໍ້າ ໃຫ້ໄດ້ 58 ລ້ານໂຕ ເນື່ອງໃນໂອກາດສະເຫຼີມສະຫຼອງວັນປ່ອຍປາ ແລະ ອະນຸລັກສັດນ້ຳ ແລະ ສັດປ່າແຫ່ງຊາດ ວັນທີ 13 ກໍລະກົດ ທີ່ຈະມາຮອດນີ້.
ທ່ານ ບຸນປອນ ແສງທອງ, ຮັກສາການຫົວໜ້າກົມປ່າໄມ້ ກະຊວງກະສິ ກຳ ແລະປ່າໄມ້ ແຈ້ງໃຫ້ຮູ້ວ່າ: ການສະເຫຼີມສະຫຼອງວັນປ່ອຍປາ ແລະ ອະນຸລັກສັດນ້ຳ ແລະ ສັດປ່າແຫ່ງຊາດ ວັນທີ 13 ກໍລະກົດ ປີນີ້ ຈະຈັດແບບກະທັດຮັດ, ເບົາບາງ, ປະຢັດມັດທະຍັດ ເນື່ອງຈາກສະພາບການແຜ່ລະບາດ ຂອງພະຍາດໂຄວິດ19 ແຕ່ຮັບປະກັນໄດ້ທາງດ້ານເນື້ອໃນ ແລະ ຈຸດປະສົງຕົ້ນຕໍ ຂອງວັນທີ່ມີຄວາມໝາຍສຳຄັນນີ້ ແນ່ໃສ່ເພີ່ມຄວາມອຸດົມສົມບູນ ໃຫ້ປະຊາກອນສັດນໍ້າ ແລະ ສັດປ່າ ທີ່ເປັນມໍລະດົກທາງທຳມະຊາດໃຫ້ໄດ້ຮັບການປົກປັກຮັກສາ ແລະ ຊົມໃຊ້ຢ່າງຍືນຍົງ.
ຮັກສາການຫົວໜ້າກົມປ່າໄມ້ ກະຊວງກະສິກຳ ແລະປ່າໄມ້ ໃຫ້ຮູ້ຕື່ມວ່າ: ສຳລັບກິດຈະກຳປ່ອຍປາເພື່ອສະເຫຼີມສະຫຼອງວັນປ່ອຍປາ ແລະ ອະນຸລັກສັດນ້ຳ ແລະ ສັດປ່າແຫ່ງຊາດ ປີນີ້, ກົມປ່າໄມ້ ແລະ ສູນພັດທະນາ ແລະ ບໍລິການດ້ານການກະເສດ ຫ້ວຍຊອນ-ຫ້ວຍຊົ້ວ ສົມທົບກັບພາກ ສ່ວນທີ່ກ່ຽວຂ້ອງ ຈະປ່ອຍປາທັງໝົດ 50.000 ໂຕ ໃນນີ້ ມີປາປາກ 20.000 ໂຕ, ປາໃນ 15.000 ໂຕ ແລະ ປານວນຈັນ 15.000 ໂຕ, ທີ່ສູນຝຶກອົບຮົມປ່າໄມ້ (ຫ້ວຍປ່າມ້ອມ), ເມືອງຫີນເຫີບ, ແຂວງວຽງຈັນ.
