(ສພຊ) ໃນຕອນເຊົ້າວັນທີ 30 ມີນາ 2022 ສະພາແຫ່ງຊາດ ໄດ້ດໍາເນີນກອງປະຊຸມຄະນະປະຈໍາສະພາແຫ່ງຊາດ ປະຈໍາເດືອນມີນາ ເຊິ່ງຈະໄດ້ຄົ້ນຄວ້າພິຈາລະນາຫລາຍບັນຫາສໍາຄັນຂອງຊາດ ໂດຍການເປັນປະທານຂອງ ທ່ານ ປອ. ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ປະທານຄະນະປະຈໍາສະພາແຫ່ງຊາດ, ປະທານສະພາແຫ່ງຊາດ, ມີບັນດາຮອງປະທານຄະນະປະຈຳ, ອົງການ ແລະ ແຂກຖືກເຊີນເຂົ້າຮ່ວມ.

ກອງປະຊຸມດັ່ງກ່າວ ຈະດໍາເນີນໄປຈົນຮອດວັນທີ 31 ມີນາ 2022 (ມື້ນີ້) ຈຶ່ງຈະສຳເລັດ.

ແຫຼ່ງຂ່າວ: ຂ່າວ “ຜູ້ແທນປະຊາຊົນ” Phouthen Pasaxon News

ຕາມການລາຍງານສະພາບໂຄວິດ-19 ປະຈຳວັນໃນ ສປປ ລາວ ວັນທີ 31 ມີນາ 2022 ໃຫ້ຮູ້ວ່າ:

ປັດຈຸບັນ ສະພາບການລະບາດຂອງພະຍາດໂຄວິດ-19 ໃນ ສປປ ລາວ ເຫັນວ່າ ການຕິດເຊື້ອໃນຊຸມຊົນ ຍັງເພີ້ມຂື້ນຢ່າງຕໍ່ເນື່ອງໃນແຕ່ລະວັນ ໂດຍສະເພາະ ຢູ່ນະຄອນຫຼວງວຽງຈັນ ຍັງຄົງໜ້າເປັນຫ່ວງທີ່ສຸດ ຈຳເປັນຕ້ອງໄດ້ເຝົ້າລະວັງ ແລະ ຕິດຕາມສະພາບການລະບາດຢ່າງໃກ້ຊິດ ໃນແຕ່ລະໄລຍະ, ເນື່ອງຈາກ ຍັງມີລາຍງານຕົວເລກຜູ້ຕິດເຊື້ອຫຼັກພັນໃນແຕ່ລະວັນ ໝາຍຄວາມວ່າ ທຸກຄົນ ແມ່ນມີຄວາມສ່ຽງສູງ ແລະ ສາມາດຕິດເຊື້ອພະຍາດໂຄວິດໄດ້ທຸກທີ່ ແລະ ທຸກເວລາ, ຖ້າຫາກທ່ານ ຍັງບໍ່ປະຕິບັດຕາມແຈ້ງການຂອງຄະນະສະເພາະກິດ ແລະ ຄຳແນະນຳຂອງຂະແໜງການກ່ຽວຂ້ອງ ທີ່ໄດ້ວາງອອກໃນແຕ່ລະໄລຍະ ຢ່າງເຄັ່ງຄັດ.

ຕໍ່ກັບສະພາບການດັ່ງກ່າວ, ຂໍຮຽກຮ້ອງມາຍັງພໍ່ແມ່, ພີ່ນ້ອງ, ທະຫານ, ຕຳຫຼວດ, ປະຊາຊົນ ແລະ ທຸກພາກສ່ວນໃນສັງຄົມ ຍົກສູງສະຕິຄວາມຮັບຜິດຊອບ ເປັນເຈົ້າການຕົນເອງ ໃນການປະຕິບັດມາດຕະການປ້ອງກັນການຕິດເຊື້ອຢ່າງເຂັ້ມງວດ ໃຫ້ກາຍເປັນຄວາມຊີນເຄີຍໃນການດຳລົງຊີວິດປົກກະຕິປະຈຳວັນແບບໃໝ່ (new normal) ເປັນຕົ້ນ ໃສ່ຜ້າປິດປາກດັງ ເມື່ອອອກຈາກບ້ານ, ໝັ່ນລ້າງມືເລື້ອຍໆ ດ້ວຍນ້ຳສະອາດໃສ່ສະບູ ຫຼື ເຈວລ້າງມືຂ້າເຊື້ອ​, ຮັກສາໄລຍະຫ່າງ 2 ແມັດຂຶ້ນໄປ, ບໍ່ຊຸມແຊວກັນເປັນກຸ່ມ, ຫຼີກລ້ຽງການເດີນທາງໄປສະຖານທີ່ແອອັດ ຫຼື ມີຄວາມສ່ຽງ ເຊິ່ງ ການປະຕິບັດທັງໝົດນີ້ ກໍ່ແມ່ນເພື່ອສະກັດກັ້ນການລະບາດ ບໍ່ໃຫ້ຂະຫຍາຍເປັນວົງກວ້າງໃນປະເທດຂອງພວກເຮົາ.

ກ່ອນຈະເຂົ້າສູ່ໄລຍະບຸນປີໃໝ່ລາວໃນອີກ 2 ອາທິດຂ້າງໜ້ານີ້  ຄາດຄະເນວ່າ ຈຳນວນຜູ້ຕິດເຊື້ອໃໝ່ປະຈຳວັນ ຢູ່ ສປປລາວ ອາດຈະເພິ່ມສູງຂຶ້ນເປັນຈຳນວນຫຼາຍ, ຖ້າຫາກບັນດາທ່ານປ່ອຍປະລະເລີຍໃນການປະຕິບັດມາດຕະການປ້ອງກັນຕົນເອງ ຢ່າງເຂັ້ມງວດ. ສະນັ້ນ, ຈຶ່ງຂໍຮຽກຮ້ອງມາຍັງບັນດາທ່ານ ເອົາໃຈໃສ່ປະຕິບັດມາດຕະການປ້ອງກັນການຕິດເຊື້ອຢ່າງຮອບດ້ານ ເພື່ອຄວາມປອດໄພຂອງໂຕທ່ານເອງ, ຄົນໃນຄອບຄົວ ແລະ ຊຸມຊົນຂອງທ່ານ.

ອອປສ ປະກາດການຈັດຕັ້ງ ແລະ ເລື່ອນຂັ້ນພະນັກງານໄອຍະການປະຊາຊົນທົ່ວປະເທດ

ໃນວັນທີ 31 ມີນາ 2022 ທີ່ ອົງການໄອຍະການປະຊາຊົນສູງສຸດ (ອອປສ) ໄດ້ຈັດພິທີປະກາດການຈັດຕັ້ງ ແລະ ປະກາດການເລື່ອນຂັ້ນພະນັກງານໄອຍະການປະຊາ ຊົນ ໃນຂອບເຂດທົ່ວປະເທດ ໂດຍການເປັນປະທານຂອງ ສະຫາຍ ໄຊຊະນະ ໂຄດພູທອນ ກໍາມະການສູນກາງພັກ, ເລຂາຄະນະບໍລິຫານງານພັກ, ຫົວໜ້າການໄອຍະການປະຊາຊົນສູງສຸດ, ມີ ບັນດາສະຫາຍຄະນະພັກ ຄະນະນຳ ແລະ ພາກສ່ວນກຽ່ວຂ້ອງເຂົ້າຮ່ວມຜ່ານລະບົບກອງປະຊຸມທາງໄກ.

ໃນພິທີສະຫາຍ ສີອຳພອນ ຈັນລາຕີ ຕາງຫນ້າຄະນະຈັດຕັ້ງສູນກາງພັກ ໄດ້ຜ່ານ ລັດຖະດໍາລັດຂອງປະທານປະເທດ ສະບັບເລກທີ 035/ປປລ, ລົງວັນທີ 17 ມີນາ 2022 ຂອງປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ວ່າດ້ວຍການແຕ່ງຕັ້ງ ສະຫາຍ ຄໍາເພັດ ສົມວໍລະຈິດ ຄະນະປະຈໍາພັກ, ຫົວໜ້າກົມແຜນການ ແລະ ຮ່ວມ ມືຕ່າງປະເທດ ເປັນຮອງຫົວໜ້າອົງການໄອຍະການປະຊາຊົນສູງສຸດ.

ຈາກນັ້ນ, ສະຫາຍ ຈັນທະບູນ ເພັງຄໍາໃສ ກໍາມະການຄະນະບໍລິຫານງານພັກ, ຫົວໜ້າກົມຈັດຕັ້ງ-ພະນັກງານ ໄດ້ຜ່ານຂໍ້ ຕົກລົງວ່າດ້ວຍການເລື່ອນຂັ້ນພະນັກງານໄອຍະການປະຊາຊົນໃນຂອບເຂດທົ່ວປະເທດ ຊຶ່ງມີພະນັກງານໄອຍະການປະຊາຊົນຂັ້ນ I ຈຳນວນ 15 ສະຫາຍ, ຂັ້ນ II ຈຳນວນ 8 ສະຫາຍ, ຂັ້ນ III ຈຳນວນ 73 ສະຫາຍ, ຍິງ 23 ສະຫາຍ, ຜູ້ຊ່ວຍພະນັກງານໄອຍະການປະຊາຊົນ 15 ສະ ຫາຍ, ຍິງ 4 ສະຫາຍ ແລະ ຂໍ້ຕົກລົງວ່າດ້ວຍການແຕ່ງຕັ້ງຫົວໜ້າກົມ, ຮັກສາການຫົວໜ້າກົມ, ຫົວໜ້າພະ ແນກ, ຮອງພະແນກ ແລະ ສັບຊ້ອນ ບ່ອນປະຈໍາການ ຂອງພະ ນັກງານ ວິຊາການຈໍານວນໜຶ່ງ.

ໃນໂອກາດດັ່ງກ່າວ ສະຫາຍ ໄຊຊະນະ ໂຄດພູທອນ ໄດ້ມີຄໍາເຫັນໂອ້ລົມ ສະແດງຄວາມຍ້ອງຍໍ ຊົມເຊີຍ ຕໍ່ຜົນງານດ້ານດີ ທີ່ບັນດາສະຫາຍ ຊຶ່ງໄດ້ຮັບການປະກາດການຈັດ ຕັ້ງໃນຄັ້ງນີ້ ຍາດມາໄດ້. ການແຕ່ງຕັ້ງ, ສັບຊ້ອນຈັດວາງພະ ນັກງານ ໄປຮັບຫນ້າທີ່ ທີ່ມີກຽດ ທີ່ພັກ-ລັດ ແລະ ປະຊາ ຊົນ ມອບໝາຍໃຫ້, ເປັນວຽກງານປົກກະຕິ, ເປັນການຈັດຕັ້ງຜັນຂະຫາຍມະຕິຂອງພັກ, ແນວທາງການຈັດຕັ້ງຂອງພັກ, ຜົນສໍາເລັດຂອງກອງປະຊຸມໃຫຍ່ສະມາຊິກພັກອົງ ຄະນະພັກ ອົງການໄອຍະການປະຊາຊົນສູງສຸດ ຄັ້ງທີ V ເຂົ້າສູ່ ວຽກງານໄອຍະການປະຊາຊົນ ເຮັດໃຫ້ອົງການໄອຍະການປະຊາຊົນ ໃຫ້ນັບມື້ເຕີບໃຫຍ່ ເຂັ້ມແຂງ, ເຮັດສໍາເລັດໜ້າທີ່ການເມືອງ ຂອງຕົນ ໃນການຕິດຕາມກວດກາການເຄົາລົບ ແລະ ປະຕິບັດກົດໝາຍ ແລະ ສັ່ງຟ້ອງຜູ້ຖືກຫາຂຶ້ນສານ, ປະກອບສ່ວນເຂົ້າໃນ ພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ຕາມຈຸດໝາຍທີ່ວາງໄວ້.

ຂ່າວ ອອປສ