ສຶກສາມາດຕະການງານຈູດບັ້ງໄຟຖວາຍທາດນາງສາມຜິວ ເມືອງທົ່ງມີໄຊ ແຂວງໄຊຍະບູລີ.
ຄຶກຄື້ນ! ຫຼວງພະບາງຕ້ອນຮັບນັກທ່ອງທ່ຽວພາຍໃນເກີນຄາດໝາຍ
ອີງຕາມ ທ່ານ ວຽງທອງ ຫັດສະຈັນ, ເຈົ້ານະຄອນຫຼວງພະບາງ ໃຫ້ສໍາພາດຕໍ່ນັກຂ່າວວິທະຍຸກະຈາຍສຽງແຫ່ງຊາດລາວວ່າ:
ປີໃໝ່ລາວຢູ່ນະຄອນຫຼວງພະບາງປີນີ້ ແມ່ນປະຕິບັດຕາມແຈ້ງການຂອງຫ້ອງວ່າການປົກຄອງແຂວງ ສະບັບເລກທີ 333/ ຫວບ.ຫຼບ, ລົງວັນທີ 25 ມີນາ 2022 ກໍຄື ຄະນະສະເພາະກິດຂັ້ນສູນກາງວາງອອກ ເຮັດໃຫ້ຫຼາຍກິດຈະກໍາທີ່ເປັນການໂຮມຊຸມນຸມຂອງມວນຊົນບໍ່ໄດ້ຈັດຂຶ້ນຄືຫລາຍປີກ່ອນໜ້ານີ້ ເພື່ອປ້ອງກັນການລະບາດຂອງພະຍາດໂຄວິດ-19,
ແຕ່ອະນຸຍາດໃຫ້ຈັດຕາມຮີດຄອງປະເພນີອັນດີງາມທີ່ເຄີຍປະຕິບັດສືບທອດກັນມາຢູ່ແຕ່ລະບ້ານ ແລະ ແຕ່ລະຄອບຄົວ, ສ່ວນການຫົດສົງພະບາງ ແມ່ນໃຫ້ຫົດສົງກັບທີ່ແຕ່ບໍ່ໄດ້ມີການແຫ່ເປັນຂະບວນຄືເມື່ອກ່ອນ ເຮັດໃຫ້ອົງການປົກຄອງນະຄອນຫຼວງພະບາງ ຄາດວ່າຈະມີນັກທ່ອງທ່ຽວໄປທ່ອງທ່ຽວບໍ່ຫຼາຍ, ແຕ່ກົງກັນຂ້າມ ເມື່ອຮອດມື້ສະເຫຼີມສະຫຼອງປີໃໝ່ລາວ ແມ່ນມີນັກທ່ອງທ່ຽວໄປທ່ອງທ່ຽວຢ່າງຫຼວງຫຼາຍ ເຊີ່ງສ່ວນໃຫຍ່ແມ່ນນັກທ່ອງທ່ຽວພາຍໃນປະເທດ.
ເຈົ້ານະຄອນຫຼວງພະບາງ ໃຫ້ຮູ້ຕື່ມວ່າ: ສາເຫດທີ່ເຮັດໃຫ້ມີນັກທ່ອງທ່ຽວໄປທ່ອງທ່ຽວຢູ່ຫຼວງພະບາງຈໍານວນຫລວງຫລາຍໃນໂອກາດປີໃໝ່ລາວປີນີ້ ຍ້ອນຫຼວງພະບາງເປັນເມືອງທ່ອງທ່ຽວ, ບວກກັບການເດີນທາງໄປຫຼວງພະບາງ ມີຄວາມສະດວກສະບາຍຫຼາຍຂຶ້ນ ໂດຍສະເພາະການເດີນທາງດ້ວຍລົດໄຟລາວ-ຈີນ ທີ່ພວມໄດ້ຮັບຄວາມນິຍົມສູງໃນປັດຈຸບັນນີ້ ເຮັດໃຫ້ການຟື້ນຟູການທ່ອງທ່ຽວຢູ່ຫຼວງພະບາງໃຫ້ກັບມາຟົດຟື້ນອີກຄັ້ງ ພາຍຫຼັງທີ່ງຽບເຫົງາມາດົນ ຍ້ອນການລະບາດຂອງພະຍາດໂຄວິດ-19.
ແຫຼ່ງຂ່າວ: CRI, ຮູບພາບ Luang Prabang Update
ຮ່ວມໃຈ-ຮ່ວມພະລັງ ຂຶ້ນພິຊິດຈອມພູເບ້ຍ
ແຂວງໄຊສົມບູນ ສ້າງກິດຈະກຳຮ່ວມໃຈ-ຮ່ວມພະລັງ ຂຶ້ນພິຊິດຈອມພູເບ້ຍ
ເນື່ອງໃນໂອກາດສະເຫຼີມສະຫຼອງບຸນປີໃໝ່ລາວ ທີ່ໝູນວຽນມາບັນຈົບອີກວາລະໜຶ່ງ ກໍຄືສອງວັນປະຫວັດສາດປີສາມັກຄີລາວ-ຫວຽດນາມ, ວັນເຊັນສົນທິສັນຍາມິດຕະພາບ ແລະ ການຮ່ວມມືຮອບດ້ານ ຄົບຮອບ 45 ປີ ແລະ ວັນສ້າງຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 60 ປີ ໃຫ້ເຕັມໄປດ້ວຍບັນຍາກາດຟົດຟື້ນ, ເບີກບານມ່ວນຊື່ນ ແລະ ມີຄວາມໝາຍ-ຄວາມສຳຄັນ ທາງປະຫວັດສາດ.
ໃນຕອນເຊົ້າຂອງວັນທີ 16 ເມສາ ຜ່ານມານີ້, ແຂວງໄຊສົມບູນ ໄດ້ສ້າງກິດຈະກຳຮ່ວມແຮງຮ່ວມໃຈ-ຮ່ວມພະລັງ ຂຶ້ນພິຊິດຈອມພູເບ້ຍ ໂດຍການນຳພາ ຂອງທ່ານ ພົຕ ວົງສອນ ອິນປານພິມ ຮອງເລຂາພັກແຂວງ, ມີທ່ານ ຫງວຽນ ແອງແທ່ງ, ຜູ້ອຳນວຍການບໍລິສັດ ແຮ່ທາດ ແລະ ຫລອມໂລຫະວຽງຈັນ ຈຳກັດຜູ້ດຽວ ທີ່ຂຶ້ນກັບກຸ່ມບໍລິສັດ ຮ່ວມມືເສດຖະກິດໂອເອກໂກ ສສ ຫວຽດ ນາມ ພ້ອມດ້ວຍຄະນະນຳແຂວງ ຕະຫລອດຮອດພາກ ສ່ວນຕ່າງໆ ພາຍໃນແຂວງ ເຂົ້າຮ່ວມຂະບວນຢ່າງຟົດຟື້ນ.
ການສ້າງກິດຈະກຳຄັ້ງນີ້ ກໍເພື່ອທົດສອບຄວາມມານະອົດທົນ ແລະ ຄວາມພາກພຽນພະຍາຍາມ ຂອງແຕ່ລະຄົນ ເພື່ອມຸ່ງໜ້າໄປໃຫ້ເຖິງຈຸດໝາຍ ໂດຍສະເພາະ ກໍຄືຈອມພູເບ້ຍ ຊຶ່ງເປັນພູທີ່ສູງທີ່ສຸດໃນລາວ ໂດຍມີຄວາມສູງໃນລະດັບ 2.820 ແມັດ, ມີທິວທັດທຳມະຊາດທີ່ສວຍສົດງົດງາມ ແລະ ພື້ນທີ່ເທິງເນີນພູ ຖືກປົກຄຸມໄປດ້ວຍມ່ານໝອກ ທີ່ໜ້າຕິດຕາຕຶງໃຈ ບວກກັບສະພາບອາກາດອັນບໍລິສຸດຜຸດຜ່ອງ ແລະ ໜາວເຢັນຕະຫລອດປີ. ນອກນັ້ນເທິງພູເບ້ຍ ຍັງຖືກອ້ອມຮອບໄປດ້ວຍຕົ້ນໄມ້ທີ່ປົກຫຸ້ມດ້ວຍຂົນ ແລະ ຕົ້ນດອກກຸຫຼາບລ້ານປີ ທີ່ເກີດແຊມຊອນເທິງຈອມພູ ຕາມທຳມະຊາດຢ່າງຫຼວງຫຼາຍ.
ການປະຊິດຈອມພູເບ້ຍຄັ້ງນີ້ ຍັງເປັນການສົ່ງເສີມວຽກ ງານການທ່ອງທ່ຽວ ຂອງແຂວງໄຊສົມບູນ ໃຫ້ເຕີບໃຫຍ່ຂະ ຫຍາຍຕົວຢ່າງຕໍ່ເນື່ອງ ທັງປະກອບສ່ວນທີ່ສຳຄັນ ເຂົ້າໃນການພັດທະນາເສດຖະກິດ-ສັງຄົມ ຂອງແຂວງ ຕາມ 5 ທ່າແຮງ ທີ່ວາງໄວ້ ໃຫ້ປະກົດຜົນເປັນຈິງ. ພ້ອມທັງເປັນການໂຄສະນາເພື່ອດຶງດູດນັກທ່ອງທ່ຽວ ທັງພາຍໃນ ແລະ ຕ່າງປະເທດ ໃຫ້ຮັບຮູ້ເຖິງຄວາມອັດສະຈັນ, ຄວາມສວຍງາມຂອງພູເບ້ຍ ແລະ ເຂົ້າມາທ່ຽວຊົມ ແຂວງໄຊສົມບູນ ໃຫ້ມີຈຳນວນເພີ່ມຂຶ້ນໃນອະນາຄົດ.
ແຫຼງຂ່າວ: ຂປລ, Media Laos
ເຖິງແມ່ນວ່າຜູ້ຕິດເຊື້ອຈະຫຼຸດລົງ ແຕ່ກໍຍັງມີຜູ້ເສຍຊີວິດໃນແຕ່ລະວັນ
ຕາມການລາຍງານຂອງສູນຂ່າວສານການແພດສຸຂະສຶກສາ ໃນວັນທີ 18/04/2022
ລາຍງານພົບຜູ້ເສຍຊີວິດໃນແຕ່ລະວັນ
ກັກຊາຍ 2 ຄົນ ພ້ອມຂອງກາງຢາບ້າ
ຕາມການລາຍງານ ຂອງປ້ອງກັນຄວາມສະຫງົບນະຄອນຫຼວງວຽງຈັນໃຫ້ຮູ້ວ່າ: ໃນເວລາ 20:30 ໂມງ ຂອງວັນທີ 16 ເມສາ ຜ່ານມາ, ກອງພັນປ້ອງກັນເຄື່ອນທີ່ນະຄອນຫຼວງວຽງຈັນ(ນວ) ໄດ້ສົມທົບກັບທະຫານ ນວ ອອກກວດກາລາດຕະເວນ ເພື່ອຮັກສາຄວາມເປັນລະບຽບຮຽບຮ້ອຍ ໃນຂອບເຂດເມືອງໄຊເສດຖາ, ເມືອງສີສັດຕະນາກ, ເມືອງຈັນທະບູລີ ແລະ ເມືອງໄຊທານີ, ເມື່ອມາຮອດ ເວລາ 21:15 ໂມງ ໄດ້ພົບເຫັນຜູ້ຂັບຂີ່ 2 ຄົນກໍາລັງຂີ່ລົດ MSX ສີແດງ ເລກທະບຽນ ດຫ 2874 ກໍາແພງນະຄອນ ຢູ່ເຂດບ້ານພະຂາວ ເມືອງໄຊທານີ ສະແດງພຶດຕິກໍາສົງໄສ ຈິ່ງໄດ້ເຂົ້າກວດຄົ້ນ ພົບເຫັນຢາບ້າຈໍານວນ 65 ເມັດ ແລະ ໄດ້ກັກຕົວມາສອບສວນ.
ຜ່ານການສອບສວນເບື້ອງຕົ້ນຮູ້ໄດ້ວ່າ: ເປົ້າໝາຍຊື່ ທ້າວ ຂັນທອງ ອາຍຸ 24 ປີ ແລະ ທ້າວໂຈ້ ອາຍຸ 21 ປີ ທັງ 2 ພັກເຊົາຢູ່ບ້ານດອນກອຍ ເມືອງສີສັດຕະນາກ ນວ. ປັດຈຸບັນ, ແມ່ນໄດ້ນໍາສົ່ງພວກກ່ຽວ ພ້ອມດ້ວຍຂອງກາງ ໃຫ້ພະແນກຕໍາຫຼວດສະກັດກັ້ນ ແລະ ຕ້ານຢາເສບຕິດ ສືບຕໍ່ດໍາເນີນການສອບສວນ ເພື່່ອຊອກຫາກຸ່ມແກ້ງທີ່ຮ່ວມຂະບວນການມາດໍາເນີນຄະດີຕາມກົດໝາຍ.
ສາເຫດຫຼັກ ຍ້ອນຜູ້ຂັບຂີ່ລົດໃນຂະນະທີ່ມຶນເມົາ
ອີງຕາມການລາຍງານ ຂອງເຈົ້າໜ້າທີ່ ພະແນກຕຳຫຼວດຈະລາຈອນ ນະຄອນຫຼວງວຽງຈັນ ໃນວັນທີ 17 ເມສາ 2022 ຊາບວ່າ:
ໃນລະຫວ່າງວັນທີ 14-16 ເມສາ 2022 ຂອງບຸນປີໃໝ່ລາວ ພ.ສ 2565 ທົ່ວຂອບເຂດນະຄອນຫຼວງວຽງຈັນ ມີອຸບັດຕິເຫດເກີດຂຶ້ນທັງໝົດ 23 ກໍລະນີ, ໃນນີ້ ມີຄົນເສຍຊີວິດ 7 ຄົນ, ຍິງ 2 ຄົນ ທຽບໃສ່ປີທີ່ຜ່ານມາ ຖືວ່າມີອຸບັດຕິເຫດເພີ່ມຂຶ້ນ 5 ກໍລະນີ ແຕ່ຄົນເສຍຊີວິດແມ່ນຫຼຸດລົງ 1 ຄົນ.
ຜົນເສຍຫາຍມີພາຫະນະເປເພເລັກໜ້ອຍ 16 ຄັນ, ສົມຄວນ 24 ຄັນ ໃຊ້ການບໍ່ໄດ້ 2 ຄັນ ມີຄົນໄດ້ ຮັບບາດເຈັບເລັກໜ້ອຍ 8 ຄົນ, ສົມຄວນ 15 ຄົນ, ສາຫັດ 6 ຄົນ.
ສຳລັບເມືອງທີ່ເກີດອຸບັດເຫດມີ: ເມືອງຈັນທະບູລີ, ໄຊທານີ, ເມືອງລະ 5 ລາຍ, ສີໂຄດຕະບອງ ໄຊເສດຖາ ເມືອງລະ 4 ລາຍ, ສີສັດຕະນາກ, ປາກງຶ່ມ ເມືອງລະ 2 ລາຍ ແລະ ຫາດຊາຍຟອງ 1 ລາຍ.
ສາເຫດຫຼັກ ທີ່ພາໃຫ້ເກີດອຸບັດຕິເຫດ ຍ້ອນຜູ້ຂັບຂີ່ລົດລະເມີດກົດລະບຽບການສັນຈອນ ຂັບຂີ່ໃນຂະນະທີ່ມຶນເມົາ ຂັບຂີ່ບໍ່ໃສ່ໝວກກັນກະທົບ, ຂັບຂີ່ໄວເກີນກຳນົດ ປ່ຽນທິດທາງເດີນ, ແຊງບໍ່ຮັບປະກັນ, ບໍ່ປ່ອຍສິດເວລາອອກສູ່ທາງໃຫຍ່, ລ່ວງໄຟແດງ, ລ່ວງປ້າຍຫ້າມ, ຈອດລົດຊະຊາຍ, ຂັບຂີ່ລົດເປັນພຶ່ງເປັນແຜ ແລະ ອື່ນໆ.
ພະຍາກອນອາກາດ ປະຈໍາວັນທີ 15 ເມສາ 2022
ພະຍາກອນອາກາດ ປະຈໍາວັນທີ 15 ເມສາ 2022 ເວລາ 7:00 ໂມງ
ຄວາມກົດດັນຕໍ່າຂອງອາກາດຮ້ອນ ຍັງຈະປົກຄຸມຢູ່ທົ່ວທຸກພາກຂອງ ປະເທດລາວ ດ້ວຍກໍາລັງອ່ອນ ຫາ ປານກາງ ສົມທົບກັບກະແສລົມຕາເວັນ ຕົກ-ຕາເວັນຕົກສ່ຽງໃຕ້ພັດປົກຄຸມ ຊຶ່ງຈະເຮັດໃຫ້ອາກາດຍັງຈະສືບຕໍ່ ຮ້ອນຢູ່ທົ່ວໄປ ແລະ ຈະມີຝົນຕົກ ຟ້າຮ້ອງ ຟ້າເຫລື້ອມໃນລະດັບຄ່ອຍ ພ້ອມມີລົມພັດແຮງຢູ່ບາງທ້ອງຖິ່ນໃນແຕ່ລະພາກ.
ພະຍາກອນອາກາດ ແຕ່ເວລາ 7:00 ໂມງຂອງວັນທີ 15/04/2022 ເຖິງ ເວລາ 7:00 ໂມງ ວັນທີ 16/04/2022
-ພາກເໜືອດ້ານຕາເວັນອອກ (ແຂວງຜົ້ງສາລີ, ຫົວພັນ ແລະ ຊຽງຂວາງ): ອາກາດເຢັນໃນຕອນເຊົ້າ ແລະ ຈະມີລົມພັດແຮງຢູ່ບາງ ທ້ອງຖິ່ນ. ອຸນຫະພູມໃນລະຫວ່າງ 17-31 ອົງສາ.
-ພາກເໜືອດ້ານຕາເວັນຕົກ (ແຂວງຫລວງນໍ້າທາ, ບໍ່ແກ້ວ, ອຸດົມໄຊ, ຫລວງພະບາງ ແລະ ໄຊຍະບູລີ): ອາກາດເຢັນໃນຕອນເຊົ້າ ສ່ວນຕອນບ່າຍ ອາກາດຮ້ອນ ແລະ ຈະມີຝົນຕົກ ຟ້າຮ້ອງ ຟ້າເຫລື້ອມໃນລະດັບຄ່ອຍ ພ້ອມມີລົມພັດແຮງຢູ່ບາງທ້ອງຖິ່ນ ຫລື ເນື້ອທີ່ການປົກຫຸ້ມຂອງຝົນ ເທົ່າກັບ 30% ຂອງພາກ. ອຸນຫະພູມໃນລະຫວ່າງ 18-37 ອົງສາ.
-ນະຄອນຫລວງວຽງຈັນ: ອາກາດຮ້ອນ ພ້ອມມີໝອກແຫ້ງປົກຫຸ້ມ ຢູ່ທົ່ວໄປ ແລະ ຈະມີລົມພັດແຮງຢູ່ບາງບໍລິເວນ. ອຸນຫະພູມໃນລະຫວ່າງ 26-36 ອົງສາ.
-ພາກກາງ (ແຂວງວຽງຈັນ, ບໍລິຄໍາໄຊ, ຄໍາມ່ວນ ແລະ ສະຫວັນນະເຂດ): ອາກາດຮ້ອນ ແລະ ຈະມີຝົນຕົກ ຟ້າຮ້ອງ ຟ້າເຫລື້ອມໃນລະດັບຄ່ອຍ ພ້ອມມີລົມພັດແຮງຢູ່ບາງທ້ອງຖິ່ນ ຫລື ເນື້ອທີ່ການປົກຫຸ້ມຂອງຝົນ ເທົ່າກັບ 30% ຂອງພາກ. ອຸນຫະພູມໃນລະຫວ່າງ 21-36 ອົງສາ.
-ແຂວງໄຊສົມບູນ: ອາກາດເຢັນ ແລະ ຈະມີຝົນຕົກໃນລະດັບຄ່ອຍ ພ້ອມມີລົມພັດແຮງຢູ່ບາງບໍລິເວນ ຫລື ເນື້ອທີ່ການປົກຫຸ້ມຂອງຝົນ ເທົ່າກັບ 20%. ອຸນຫະພູມໃນລະຫວ່າງ 16-29 ອົງສາ.
-ພາກໃຕ້ (ແຂວງສາລະວັນ, ເຊກອງ, ຈໍາປາສັກ ແລະ ອັດຕະປື): ອາກາດຮ້ອນ ແລະ ຈະມີຝົນຕົກ ຟ້າຮ້ອງ ຟ້າເຫລື້ອມໃນລະດັບຄ່ອຍ ພ້ອມມີລົມພັດແຮງຢູ່ບາງທ້ອງຖິ່ນ ຫລື ເນື້ອທີ່ການປົກຫຸ້ມຂອງຝົນ ເທົ່າກັບ 40%. ອຸນຫະພູມໃນລະຫວ່າງ 24-36 ອົງສາ.
-ເຂດພູພຽງບໍລະເວນ: ອາກາດເຢັນ ແລະ ຈະມີຝົນຕົກ ຟ້າຮ້ອງ ຟ້າເຫລື້ອມໃນລະດັບຄ່ອຍ ພ້ອມມີລົມພັດແຮງຢູ່ບາງບໍລິເວນ ຫລື ເນື້ອທີ່ການປົກຫຸ້ມຂອງຝົນເທົ່າກັບ 30%. ອຸນຫະພູມໃນລະຫວ່າງ 16-28 ອົງສາ.